He parau pāpaꞌi ki te taina
ꞌEvereo
Te haꞌamata iŋa o te puka nei e haka ꞌite mai ꞌana pē nei ē: mai te haꞌamata iŋa o te ao te ꞌAtua e vānaŋa e oho mai ena o ruŋa i tāꞌana meꞌe manaꞌu mo aŋa, ꞌi raꞌe hai perofeta ꞌe, hora nei, hai Ietū Kiritō, Poki ꞌāꞌana (1.2). ꞌI ruŋa nei takoꞌa e haka aŋi-aŋi mai ena: a Ietū ꞌata hau rō atu ki te merahi (1.4–2.9), ki a ⌊Mōtē⌋ (3.3–6), ki a ⌊Kosuē⌋ (4.8), ki a ⌊ꞌĀrone⌋, ki te ⌊oromatuꞌa hopeꞌa o te ra-rahi⌋ taꞌatoꞌa (5.1–10; 7.20–8.6), ꞌe ki te ⌊haka tere iŋa raꞌe o te ꞌAtua ananake ko te taŋata⌋ (8.7–13). A Ietū ꞌata hau rō atu takoꞌa ki te tūtia taꞌatoꞌa, ꞌi te meꞌe era ko vaꞌai ꞌā i a ia pa he tūtia mo haka kore o te hara, he tūtia e tahi mau nō mo te hora taꞌatoꞌa; pē ira he tano te ꞌAtua mo haka kore i te tātou hara (10.12).
Ki oti te haka ꞌite mai: ꞌata hau rō atu a Ietū ki te taꞌatoꞌa, he haka ꞌite takoꞌa mai pē hē te noho iŋa tano mo te nuꞌu ⌊kiritiano⌋. O roto i te meꞌe taꞌatoꞌa kī mai o ruŋa i te noho iŋa tano, te meꞌe ꞌata hauhaꞌa he haka moe i te manaꞌu ꞌi ruŋa i te ꞌAtua. He ꞌaꞌamu mai ia o ruŋa i te ŋāŋata ꞌe o ruŋa i te ŋā viꞌe i haka moe i oho nō i te rāua manaꞌu ꞌi ruŋa i te ꞌAtua, ka ai atu te meꞌe hōrea e te ꞌAtua ki a rāua ꞌina ꞌā i a rāua (11.4–39).
Te vānaŋa o ruŋa i te parau nei, vānaŋa nehe-nehe tano ki te meꞌe haŋa mo haka ꞌite mai, ꞌe mai te haꞌamata iŋa o te puka nei e aŋi-aŋi rō ꞌā pē nei ē: te kope era ꞌāꞌana te meꞌe nei i pāpaꞌi, ka ai atu kai ꞌite mai ko ai, ko ꞌite riva-riva ꞌana i te meꞌe o ruŋa i te ⌊Pāpaꞌi Moꞌa⌋. ꞌIna he rohi-rohi e kī e oho mai ena pē nei ē: hai meꞌe aŋa era e Ietū mo tātou hora vaꞌai era i a ia mo mate ꞌi ruŋa i te tātaurō, ꞌina he hauhaꞌa toe o te tūtia o muꞌa ꞌā aŋa hai ꞌanimare mo haka kore e te ꞌAtua i te tātou hara (7.27; 9.12,26; 10.10).
I haka oti ai i te parau nei hai ꞌaroha mo te nuꞌu taꞌatoꞌa ⌊haka moe i te manaꞌu⌋ ꞌi ruŋa i a Ietū, nuꞌu haꞌataꞌa e te ꞌAtua māꞌana (13.24).
1Te Poki o te ꞌAtua
1ꞌI muꞌa ꞌā, i rahi rō te mahana ꞌe hai rauhuru nō atu rāveꞌa i vānaŋa ai te ꞌAtua ki te tātou tupuna hai tāꞌana ŋā perofeta era. 2ꞌE hora nei, ꞌi te ŋā hora hopeꞌa nei, ko vānaŋa mai ꞌā hai Poki era ꞌāꞌana, kope hai ia i aŋa ai i te ao ꞌe ki a ia i vaꞌai tahi ai i te parau o te meꞌe taꞌatoꞌa. 3Te ꞌana-ꞌana ꞌe te pūai nui-nui o te ꞌAtua e takeꞌa ena ꞌi ruŋa i tāꞌana Poki; a ia he ꞌāriŋa mau ꞌā o te ꞌAtua, ꞌe ꞌāꞌana te haka noho i te meꞌe taꞌatoꞌa o te ao ꞌi tōꞌona kona hai kī mau nō e ia. I tuꞌu mai era ki te ao nei, he aŋa tahi i tāꞌana meꞌe taꞌatoꞌa mo aŋa mo haka kore e te ꞌAtua i te tātou hara. I oti tahi era nei aŋa, he hoki ki te raŋi ꞌe he noho ꞌi te pāꞌiŋa mataꞌu o te ꞌAtua. 4Hai meꞌe nei i haka takeꞌa mai ai e te ꞌAtua i hau rō atu tāꞌana Poki ki te merahi. I a ia, paꞌi, te tōroꞌa ꞌata hau rō atu ki te tōroꞌa o te merahi.
Te Poki o te ꞌAtua i hau rō atu ki te merahi
5Te ꞌAtua ꞌina kai kī ki te merahi pē nei ē:
«He Poki koe ꞌāꞌaku,
ꞌe ꞌi ꞌaŋarīnā he haka takeꞌa e au:
a au he Matuꞌa ōꞌou».
ꞌE ꞌina kai kī takoꞌa mo te merahi:
«He ai a au he matuꞌa mōꞌona,
ꞌe a ia mo poki ꞌāꞌaku».
6ꞌE ꞌi te rua kona, hora haka ꞌite era i tāꞌana ꞌAtariki ki te ao, i kī ai:
«E haꞌamuri ki a ia
te merahi taꞌatoꞌa o te ꞌAtua».
7Te meꞌe i kī e te ꞌAtua mo te merahi:
«He maꞌuroŋo hōrou pa he tokerau,
ꞌe he tāvini pa he ura ahi ena ꞌā».
8ꞌE ki te Poki i kī ai:
«Tuꞌu haka tere iŋa, e te ꞌAtua ē, ꞌina he hopeꞌa raꞌa,
ꞌe hai tī-tika koe e haka tere ena.
9Taꞌa meꞌe haŋa he meꞌe riva-riva
ꞌe taꞌa meꞌe taꞌe haŋa he meꞌe taꞌe tano;
ꞌo ira a au, tuꞌu ꞌAtua, i haka nui-nui ai i a koe,
ꞌe i vaꞌai atu ai i te koa ꞌata hau rō atu ki tuꞌu ŋā hokorua ena».
10E kī takoꞌa rō ꞌana ꞌi ruŋa i te Pāpaꞌi Moꞌa:
«ꞌI te haꞌamata iŋa ꞌā, e te Pūꞌoko Haka Tere ē,
i aŋa ai koe i te henua ꞌe ꞌāꞌau i aŋa takoꞌa i te raŋi.
11Te ŋā meꞌe ena e ŋaro rō,
ꞌe ko koe te meꞌe ka taꞌe ŋaro ena ki te hora hopeꞌa.
Te ŋā meꞌe ena e pau tahi rō pa he kahu;
12¡e hā-hatu rō e koe pa he hā-hatu iŋa ena i te kahu,
ꞌe e mono rō pa he mono iŋa ena ꞌā o te kahu!
ꞌE a koe he noho mau rō ꞌai pē nā,
ꞌe ꞌina he hopeꞌa raꞌa o tuꞌu ora».
13ꞌIna te ꞌAtua kai kī ki te merahi:
«Ka noho koe i tōꞌoku pāꞌiŋa mataꞌu,
ꞌātā ka haka riro rō a au i te nuꞌu taꞌe haŋa atu he meꞌe mo raŋo o tuꞌu vaꞌe».
14Te merahi taꞌatoꞌa, paꞌi, he vārua aŋa ki te ꞌAtua uŋa mo hāꞌūꞌū ki te nuꞌu eꞌa mai roto i te ūtuꞌa o te hara ꞌe ravaꞌa i te ora ꞌāpī ꞌina he hopeꞌa raꞌa vaꞌai e te ꞌAtua.
2Te hauhaꞌa o te meꞌe haka ꞌite mai era
1ꞌI te ai he parautiꞌa te ŋā meꞌe taꞌatoꞌa nei, e uꞌi e maꞌu riva-riva te roŋo ŋaroꞌa e tātou, ꞌo haka tapa mai te ara parautiꞌa o te ꞌAtua. 2ꞌIna ko rehu: te nuꞌu hara ꞌe taꞌe haꞌatura ki te ⌊haka tere iŋa ꞌa Mōtē⌋ haka ꞌite mai era e te ꞌAtua hai merahi era ꞌāꞌana ꞌi muꞌa ꞌā, e haka ūtuꞌa era hai ūtuꞌa tano mo rāua. 3Mo ai pē ira, ¿pē hē ia ana taꞌe haka ūtuꞌa i a tātou ana hārui hai tuaꞌivi i te rāveꞌa vaꞌai mai e te ꞌAtua mo eꞌa mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa? Te meꞌe nei o te Pūꞌoko Haka Tere mau nei ꞌā o tātou i haka ꞌite raꞌe mai. I oho era he haka ꞌite takoꞌa mai he parautiꞌa mau ꞌā e te nuꞌu ŋaroꞌa era i rā meꞌe mai i a ia. 4ꞌE o te ꞌAtua i haka aŋi-aŋi takoꞌa mai he parautiꞌa mau ꞌā hai aŋa i te mana a roto i rā nuꞌu, ꞌe hai vaꞌai ki a rāua, hai ⌊Vārua Maitai⌋, rauhuru nō atu meꞌe mo aŋa i tāꞌana aŋa, tano ki tōꞌona manaꞌu.
A Ietū i riro ai he taŋata mo te tātou riva-riva
5Te ꞌAtua kai vaꞌai ki te rima o te merahi i te haka tere iŋa o te ao ꞌāpī ka oho mai ena, he meꞌe vānaŋa o tātou. 6Ki te rima o te taŋata i vaꞌai ai. Pē nei, paꞌi, e kī ena ꞌi te kona e tahi o ruŋa i te ⌊Pāpaꞌi Moꞌa⌋:
«E te ꞌAtua, ¿he aha te meꞌe he taŋata?
¿He aha koe e manaꞌu ꞌe e hāpaꞌo ena i a rāua?
7Mo te hora ꞌiti-ꞌiti e tahi i vaꞌai rō ki te merahi
i te tōroꞌa ꞌata hau rō atu ki te tōroꞌa o te taŋata.
I oho era he haka nui-nui haka ꞌou i te taŋata
ꞌe he moꞌa pa he moꞌa iŋa ki te ꞌariki,
8ꞌe he vaꞌai ki tōꞌona rima i te haka tere iŋa o te meꞌe taꞌatoꞌa».
Te haꞌaauraꞌa o te kī nei: «ko vaꞌai ꞌana ki tōꞌona rima i te meꞌe taꞌatoꞌa mo haka tere e ia» ko te meꞌe nei: ꞌina e tahi meꞌe o te ao mo taꞌe haka tere e ia, ka ai atu ꞌina kai takeꞌa vave mai ꞌā. 9ꞌE, ko ꞌite ꞌana e tātou: te meꞌe nei ko haka tano ꞌana ꞌi ruŋa i a Ietū. I riro era, paꞌi, he taŋata, ꞌata hau rō atu te tōroꞌa o te merahi ki tōꞌona tōroꞌa «mo te hora ꞌiti-ꞌiti e tahi», ꞌe, hora nei, ꞌo te vaꞌai i a ia ki te mate mo tātou ꞌi te haŋa ꞌe ꞌi te riva rahi o te ꞌAtua mo tātou, «ko haka nui-nui ꞌā ꞌe ko moꞌa ꞌā pa he ꞌariki».
10ꞌI te haŋa o te ꞌAtua, kope aŋa ꞌe hāpaꞌo i te meꞌe taꞌatoꞌa, mo maꞌu meꞌe rahi taŋata ki muri i a ia mo ŋā poki ꞌāꞌana, ŋā poki te rāua huru pa he huru mau era ꞌā ōꞌona, i tano ai mo haka riro i a Ietū, hai ꞌati haꞌatiꞌa e ia mo ꞌamo, he kope hopeꞌa o te tano mo maꞌu i te taŋata ki a ia. A Ietū, paꞌi, he kope haka eꞌa i te taŋata mai roto i te ūtuꞌa o te hara ꞌe vaꞌai i te ora ꞌāpī ꞌina he hopeꞌa raꞌa. 11Te kope ꞌāꞌana te haka tano i te taŋata ki te mata o te ꞌAtua ꞌe te nuꞌu haka kore e ia i te hape o tū Matuꞌa tahi ꞌana a rāua. ꞌO ira te Poki o te ꞌAtua e taꞌe haꞌamā ena mo kī he taina rāua ōꞌona. 12I kī rō, paꞌi, e ia ꞌi ruŋa i te Pāpaꞌi Moꞌa:
«E vānaŋa rō a au o ruŋa i a koe ki tōꞌoku taina,
ꞌe e hīmene rō atu a au ꞌi vāeŋa o te nuꞌu haꞌamuri atu».
13I kī takoꞌa rō:
«ꞌI ruŋa i a ia a au ka haka noho nei i tōꞌoku manaꞌu».
ꞌE, takoꞌa:
«ꞌĪ a au ꞌī aꞌa ananake ko te ŋā poki vaꞌai mai era e te ꞌAtua».
14ꞌI te ai o te ŋā poki o te ꞌAtua he taŋata e mate nō i haka riro ai a Ietū i a ia he taŋata, ki mate takoꞌa ai ꞌe ki haka kore ai, hai mate era ōꞌona, i te pūai o te kope i a ia te mate, te auraꞌa, ko Rukifero. 15ꞌE he haka kore takoꞌa i te riꞌa-riꞌa o te taŋata ꞌi te mate, he meꞌe haka ꞌekaravo i te taŋata mai te rāua poreko iŋa ꞌā. 16A ia taꞌe ki te merahi hāꞌūꞌū i oho mai ai, ki te hakaara o ⌊ꞌAparahama⌋. 17Mo te meꞌe nei i haka riro ai i a ia he taŋata, mo riro ōꞌona he ⌊oromatuꞌa hopeꞌa o te ra-rahi⌋, māhatu haka ꞌaroha, taꞌe haka rē ki te hora hopeꞌa i tāꞌana meꞌe aŋa ki te ꞌAtua, ki ꞌamo ai e ia i te ūtuꞌa o te hara, ki tano ai te ꞌAtua mo haka rehu i te hara o te taŋata. 18ꞌE, ꞌi te ai ko ꞌamo ꞌana a ia i te ꞌati ꞌe ko haka ꞌatu ꞌā i a ia e Rukifero mo hara, e tano ena a ia, ꞌi te hora nei, mo hāꞌūꞌū ki te nuꞌu haka ꞌatu e Rukifero mo hara.
3I hau rō atu a Ietū ki a ⌊Mōtē⌋
1ꞌO ira, e te taina ē, a kōrua, te nuꞌu haꞌataꞌa ꞌe haŋa e te ꞌAtua mo tuꞌu ki muri i a ia ꞌi te raŋi, e manaꞌu riva-riva o ruŋa i a Ietū, he kope ꞌi ruŋa i a ia a tātou e haka moe ena i te manaꞌu. A ia he kope uŋa mai e te ꞌAtua mo ⌊oromatuꞌa hopeꞌa o te ra-rahi⌋ o tātou. 2ꞌE ꞌa Ietū, kope haꞌataꞌa e te ꞌAtua mo rā aŋa, i aŋa tahi rō i te meꞌe kī e te ꞌAtua mo aŋa. Pē ira ꞌana a Mōtē, i aŋa tahi rō i te meꞌe kī e te ꞌAtua mo aŋa hora haka tere era e ia i tōꞌona taŋata.
3Ka ai atu pē ira, mo te ꞌAtua, ꞌata hau rō atu a Ietū ki a Mōtē, pa he oho iŋa ena i hau rō atu te kope ꞌāꞌana te hare i aŋa, ki rā hare mau ꞌā. 4Taꞌatoꞌa hare i ai rō te taŋata ꞌāꞌana i aŋa, ꞌe te meꞌe taꞌatoꞌa e ai ena o te ꞌAtua i aŋa. 5A Mōtē, pa he tāvini o te ꞌAtua, kai taꞌe aŋa i te meꞌe taꞌatoꞌa kī e te ꞌAtua mo aŋa hora haka tere era e ia i tōꞌona taŋata, ꞌe rā aŋa era ꞌāꞌana he haꞌaauraꞌa o te meꞌe ka haka ꞌite era e te ꞌAtua pe muꞌa ka oho era. 6Pē ira ꞌā te ⌊Kiritō⌋, ꞌina e ko taꞌe aŋa i te meꞌe taꞌatoꞌa kī e te ꞌAtua mo aŋa. Te meꞌe topa kē ōꞌona, a ia he Poki o te ꞌAtua, ꞌe pa he Poki o te ꞌAtua e haka tere ꞌe e hāpaꞌo ena i te nuꞌu taꞌatoꞌa o te ꞌAtua, ꞌe rā nuꞌu ko tātou ana maꞌu hio-hio ana oho nō tātou i te manaꞌu ꞌi ruŋa i a ia, ꞌe ana tiaki hai koa i te meꞌe taꞌatoꞌa hōrea mai e ia.
ꞌIna ko haka hio-hio te kōrua māhatu
7ꞌO ira, pa he meꞌe kī e te ⌊Vārua Maitai⌋ ꞌi ruŋa i te ⌊Pāpaꞌi Moꞌa⌋:
«Mo ŋaroꞌa e kōrua ꞌi ꞌaŋarīnā i te meꞌe kī atu e te ꞌAtua,
8ꞌina ko haka hio-hio te kōrua manaꞌu,
pa he nuꞌu era ꞌi te kona ꞌone taꞌe noho taŋata taꞌe haꞌatura era ki te ꞌAtua,
aŋa era i te meꞌe taꞌe tano mo uꞌi ꞌātā ki hē te roa ka haꞌaoromaꞌi era e ia.
9ꞌI ira te kōrua tupuna i haka ꞌatu mai ai i a au,
ka ai atu i takeꞌa rō i te mana aŋa e au ꞌi roto i te matahiti e maha ꞌahuru.
10ꞌO ira a au i riri ai ꞌe i kī ai mo te nuꞌu era:
“Taꞌe te rāua māhatu ꞌi ruŋa i a au,
ꞌe ꞌina he haŋa mo haꞌatura mai”.
11ꞌE ꞌi roto i tōꞌoku riri a au i hōrea ai:
“Ki te hora hopeꞌa ꞌina a rāua e ko oꞌo
ki te kona haka riva-riva era e au mo haka ora o rāua”».
12E te taina, e uꞌi ꞌo ai te kōrua māhatu taꞌe tano taꞌe ⌊haka moe i te manaꞌu⌋ ꞌi ruŋa i te ꞌAtua ora, ꞌo haꞌataꞌa rō kōrua mai muri i a ia. 13Te meꞌe mo aŋa paurō te mahana mai ora ꞌā kōrua, he hatu ki te rua mo haka noho mo oho i te manaꞌu ꞌi ruŋa i te ꞌAtua, ꞌo reo-reo atu e te hara, ꞌo hio-hio te māhatu, ꞌo taꞌe haŋa haka ꞌou mo haꞌatura ki a ia. 14E te taina, mo haka moe mo oho nō tātou i te manaꞌu ꞌi ruŋa i a Ietū ki te hora hopeꞌa pa he hora raꞌe era ꞌā, mo tātou takoꞌa te meꞌe taꞌatoꞌa ꞌa Ietū Kiritō.
15ꞌO ira e kī ena:
«Mo ŋaroꞌa e kōrua ꞌi ꞌaŋarīnā i te meꞌe kī atu e te ꞌAtua,
ꞌina ko haka hio-hio te kōrua manaꞌu
pa he nuꞌu taꞌe haꞌatura era ki a ia».
16¿Ko ai tū nuꞌu taꞌe haꞌatura era ki te ꞌAtua hora ŋaroꞌa era i tōꞌona reꞌo? He nuꞌu taꞌatoꞌa haka eꞌa era e Mōtē mai Ehipto. 17¿Mo kuā ai te ꞌAtua i riri ai ꞌi te ŋā matahiti era e maha ꞌahuru? Mo te nuꞌu hara mā-mate era ꞌi te kona ꞌone taꞌe noho taŋata. 18ꞌE ¿ki a ai i kī ai e te ꞌAtua e ko oꞌo a rāua ki te kona haka riva-riva e ia mo haka ora? Ki te nuꞌu taꞌe haꞌatura era ki a ia. 19ꞌE, he aŋi ꞌā, ꞌina mau ꞌā a rāua kai oꞌo, he taꞌe haka moe i te manaꞌu ꞌi ruŋa i te ꞌAtua.
41ꞌE hora nei, hora e ai nō ꞌā mo tātou te meꞌe hōrea mai e te ꞌAtua pē nei ē: he oꞌo ki te kona haka riva-riva e ia mo haka ora, e uꞌi ꞌo taꞌe ravaꞌa rō mo oꞌo e tahi o tātou. 2Te roŋo riva-riva nei ko haka ꞌite mai ꞌana ki a tātou ꞌe pē ira takoꞌa ꞌana ki te tātou tupuna. I hopeꞌa ai kai ai pa he meꞌe riva-riva mo rāua, he taꞌe ⌊haka moe i te manaꞌu⌋ ꞌi ruŋa i te ꞌAtua ꞌe ꞌi ruŋa i tāꞌana roŋo. 3ꞌE a tātou, te nuꞌu haka moe i te manaꞌu ꞌi ruŋa i a ia, e oꞌo rō ki roto i te haka ora o te ꞌAtua. ꞌE mo te nuꞌu taꞌe haka moe i te manaꞌu ꞌi ruŋa i a ia i kī ai e te ꞌAtua:
«ꞌI roto i tōꞌoku riri a au i hōrea ai:
“Ki te hora hopeꞌa ꞌina a rāua e ko oꞌo
ki te kona haka riva-riva era e au mo haka ora o rāua”».
Te haka ora nei o te ꞌAtua ko haka riva-riva era ꞌā mai te aŋa iŋa era ōꞌona i te ao. 4ꞌE ꞌi ruŋa i te ⌊Pāpaꞌi Moꞌa⌋ e kī ena o ruŋa i te hitu mahana:
«Te ꞌAtua i haka ora ai mai tāꞌana aŋa ꞌi te hitu mahana».
5E kī takoꞌa rō ꞌana pē nei ē:
«ꞌIna e ko oꞌo ki tōꞌoku haka ora nei».
6ꞌE e ai nō ꞌana te nuꞌu mo oꞌo ki roto i te haka ora nei; te nuꞌu ꞌite raꞌe era, paꞌi, o ruŋa, ꞌina kai oꞌo he taꞌe haꞌatura ki te ꞌAtua. 7ꞌO ira te ꞌAtua i vaꞌai haka ꞌou mai ai i te mahana mo oꞌo ki roto, ꞌe rā mahana ko ꞌaŋarīnā. I haka ꞌite mai ai hai meꞌe kī e ⌊Tāvita⌋ ꞌi ruŋa i te Pāpaꞌi Moꞌa ko rahi atu ꞌā te matahiti mai te noho iŋa o rā nuꞌu ꞌite raꞌe era, he meꞌe haka ꞌite atu era e au pē nei ē:
«Mo ŋaroꞌa e kōrua ꞌi ꞌaŋarīnā i te meꞌe kī atu e te ꞌAtua,
ꞌina ko haka hio-hio te manaꞌu».
8ꞌĀhani te haka ora vaꞌai e ⌊Kosuē⌋ ki te itaraera he haka ora hōrea e te ꞌAtua mo tōꞌona taŋata, e ko vānaŋa mai ia e te ꞌAtua o ruŋa i te mahana haka ꞌou e tahi mo oꞌo ki roto i tōꞌona haka ora. 9Pē ira a tātou e ꞌite nei e ai nō ꞌana te haka ora haka riva-riva e te ꞌAtua mo tōꞌona taŋata. 10Te kope oꞌo ki roto i te haka ora nei, he haka ora mai tāꞌana aŋa, pa he haka ora iŋa era o te ꞌAtua mai tāꞌana aŋa. 11ꞌO ira, ki vaꞌai tahi tātou i a tātou mo oꞌo ki roto i tōꞌona haka ora, ꞌo taꞌe oꞌo rō e tahi o tātou, pa he nuꞌu taꞌe haꞌatura era ki te ꞌAtua.
12Te vānaŋa o te ꞌAtua vānaŋa ora ꞌe vānaŋa pūai. ꞌAta hau rō atu ꞌi te kaꞌi-kaꞌi ki te hoe kaꞌi-kaꞌi ararua pāꞌiŋa. E oꞌo ena ki roto nui atu era o te māhatu ꞌe o te vārua, ꞌe ꞌātā ki te kona hopeꞌa mau era o te manaꞌu taŋata, ꞌe ꞌāꞌana te haka ꞌite i te manaꞌu ꞌe i te meꞌe haŋa mau o te māhatu. 13ꞌIna e tahi meꞌe o te meꞌe aŋa e te ꞌAtua mo taꞌe takeꞌa e ia; tōꞌona mata ꞌi ruŋa i te meꞌe taꞌatoꞌa, ꞌe ki a ia tātou ka kī ena i te tātou meꞌe i aŋa.
A Ietū he ⌊oromatuꞌa⌋ māhatu ꞌaroha
14A Ietū, Poki o te ꞌAtua, he oromatuꞌa hopeꞌa o te ra-rahi o tātou ꞌi te raŋi. ꞌO ira, e haka moe e oho tātou i te manaꞌu ꞌi ruŋa i a ia. 15Te tātou oromatuꞌa hopeꞌa nei o te nui-nui e aŋi-aŋi rō ꞌā i te huru taꞌe pūai nei o tātou o te taŋata. ꞌI muꞌa ꞌana, paꞌi, i haka ꞌatu takoꞌa rō i a ia mo hara e Rukifero, pa he haka ꞌatu iŋa mai nei i a tātou. Te meꞌe nō, ꞌina a ia kai hara ki te hora hopeꞌa. 16ꞌO ira, ꞌina tātou ko riꞌa-riꞌa mo haka hāhine hai pure ki te ꞌAtua, ki haka ꞌaroha mai ai i a tātou ꞌe, ꞌi tōꞌona riva rahi, e hāꞌūꞌū rō mai ꞌi te hora o te ꞌati.
51Te ⌊oromatuꞌa hopeꞌa o te ra-rahi⌋ e toꞌo ena mo vānaŋa ki te ꞌAtua mo te taꞌatoꞌa, mo vaꞌai ki te ꞌAtua i te meꞌe haꞌataꞌa e rāua māꞌana ꞌe mo aŋa i te tūtia mo te rāua hara. 2Te ŋā oromatuꞌa nei he taŋata e ai rō ꞌana te hape. ꞌO ira e ꞌite ena mo haꞌaoromaꞌi i te nuꞌu taꞌe ꞌite riva-riva i te meꞌe o te ꞌAtua oho a te ara kē. 3ꞌE ꞌo ira takoꞌa, ꞌi te hora aŋa i te tūtia mo te hara o te taŋata, e aŋa ena i te tūtia mo te rāua hara.
4ꞌIna e tahi kope toꞌo i a ia ꞌā mo oromatuꞌa hopeꞌa o te ra-rahi; o te ꞌAtua mau nō i vaꞌai i te aŋa nui-nui era, pa he vaꞌai iŋa era ꞌā ki a ⌊ꞌĀrone⌋. 5Pē ira takoꞌa ꞌana te ⌊Kiritō⌋, taꞌe ꞌāꞌana i haꞌataꞌa i a ia mo oromatuꞌa hopeꞌa o te ra-rahi. O te ꞌAtua i vaꞌai i te aŋa nui-nui era; ꞌāꞌana, paꞌi, i kī:
«He Poki koe ꞌāꞌaku,
ꞌe ꞌi ꞌaŋarīnā he haka takeꞌa e au:
a au he Matuꞌa ōꞌou».
6ꞌE ꞌi te rua kona o te ⌊Pāpaꞌi Moꞌa⌋ e kī takoꞌa ena:
«He oromatuꞌa koe
ꞌe he noho mau rō ꞌai koe
he oromatuꞌa ki te hora hopeꞌa,
pa he oho iŋa era o ⌊Merekitereke⌋».
7Hora era o Ietū ꞌi te ao nei, ꞌi te ꞌite e ai rō ꞌā i te ꞌAtua te pūai mo haka eꞌa i a ia mai te mate, he pure he ani nō te aŋa hai reꞌo pūai koia ko taŋi; ꞌe ꞌi tōꞌona haꞌatura, he haka roŋo e te ꞌAtua. 8A Ietū Kiritō, ka ai atu he Poki o te ꞌAtua, i ꞌamo rō i te ꞌati o te ao nei pa he taŋata; pē ira i aŋi-aŋi ai e paŋahaꞌa rō ꞌā mo te taŋata te meꞌe ena he haꞌatura ki te ꞌAtua. 9ꞌE ꞌi te haꞌatura ōꞌona ꞌe ꞌi te aŋa i te meꞌe taꞌatoꞌa kī e te ꞌAtua mo aŋa, i riro ai he kope haka eꞌa i te taŋata mai roto i te ūtuꞌa o te hara ꞌe vaꞌai i te ora ꞌāpī ꞌina he hopeꞌa raꞌa mo te nuꞌu taꞌatoꞌa haꞌatura ki a ia. 10ꞌE he kī e te ꞌAtua he oromatuꞌa hopeꞌa o te ra-rahi pa he oho iŋa era o Merekitereke.
E manaꞌu paꞌari ꞌi te meꞌe o te ꞌAtua
11Meꞌe rahi nō atu te mātou meꞌe mo kī atu o ruŋa i a Ietū pa he oromatuꞌa ra-rahi o tātou, ꞌe aŋa riꞌa-riꞌa mo haka aŋi-aŋi atu he pūꞌoko hio-hio o kōrua. 12A kōrua ko haka moe nō mai era ꞌā i te manaꞌu ꞌi ruŋa i a Ietū. ꞌO ira, te tano mau: e hāpī kōrua i te rua. Ka ai atu pē ira, ko te ai iŋa ꞌana kōrua pa he nuꞌu e hāpī haka ꞌou i te meꞌe taꞌe aŋarahi mo aŋi-aŋi o ruŋa i te ꞌAtua. E tuꞌu rō ꞌana kōrua pa he ŋā poki poreko iho ꞌomo-ꞌomo ū taꞌe ꞌite mo kai i te kai paka-paka. 13Te ŋā poki poreko iho, paꞌi, he ū mau nō te meꞌe kai. Pē ira te nuꞌu taꞌe manaꞌu paꞌari mo te meꞌe o te ꞌAtua: te hāpī ꞌata hōhonu o te ꞌAtua o ruŋa i te meꞌe tano ꞌe i te meꞌe taꞌe tano mo aŋa ꞌina he aŋi-aŋi. 14ꞌE te nuꞌu paꞌari e tano rō ꞌā mo ŋau-ŋau i te kai paka-paka. Pē ira te nuꞌu manaꞌu paꞌari mo te meꞌe o te ꞌAtua e tano rō ꞌana mo aŋi-aŋi i te hāpī ꞌata hōhonu o te ꞌAtua o ruŋa i te meꞌe tano ꞌe i te meꞌe taꞌe tano mo aŋa ꞌo te ai hai rā meꞌe e haka tere ena i a rāua.
61ꞌO ira, e te taina ē, ꞌina tātou ko noho mau rō ꞌai ꞌi ruŋa i te hāpī raꞌe o ruŋa i te ⌊Kiritō⌋. Ki ꞌata hāpī ki oho tātou ꞌātā ka paꞌari rō ꞌi te meꞌe o te ꞌAtua, ꞌo teka-teka ꞌo oho nō tātou ꞌi ruŋa i te hāpī raꞌe era pe he hāpī o ruŋa i te huri iŋa o te manaꞌu ki te ꞌAtua, o ruŋa i te haka tapa iŋa mai roto i te meꞌe taꞌe tano maꞌu ki te mate, o ruŋa i te haka moe iŋa i te manaꞌu ꞌi ruŋa i a Ietū, 2o ruŋa i te ⌊papatito⌋, o ruŋa i te haka puā iŋa hai rima ki te pūꞌoko mo haꞌamaitai, o ruŋa i te ora iŋa mai te mate, ꞌe o ruŋa i te ture hopeꞌa. 3Te meꞌe mau o tātou mo aŋa, ana haꞌatiꞌa e te ꞌAtua, he ꞌite he oho o tātou o ruŋa i te hōhonu o tāꞌana hāpī.
4Te nuꞌu haka māꞌeha e te ꞌAtua i te manaꞌu o ruŋa i te parautiꞌa aŋi-aŋi i te riva rahi o te ꞌAtua, i te pūai o te ⌊Vārua Maitai⌋, 5i te reka ꞌe i te ora o te vānaŋa o te ꞌAtua, ꞌe i te pūai ōꞌona ka haka takeꞌa era pe muꞌa ka oho ena, 6mo hārui i te ꞌAtua hai tuaꞌivi, e ko ravaꞌa haka ꞌou mo haka huri i te rāua manaꞌu ki te ꞌAtua, he tuꞌu pa he meꞌe ena ē: e veo haka ꞌou ꞌā a rāua i te Poki o te ꞌAtua ꞌi ruŋa i te tātaurō, mo haka meꞌe-meꞌe haka ꞌou e te taꞌatoꞌa.
7Te kope ki a ia e hāpī ena o ruŋa i te ꞌAtua pa he henua topa rahi e te ꞌua. Mo riva-riva o te kai ka hua ena ꞌi rā henua, he haꞌamaitai e te ꞌAtua. 8ꞌE mo tupu o te mauku pū-pū ꞌe te tētahi atu mauku rake-rake, ꞌina ia e tahi hauhaꞌa. He tohu e te ꞌAtua ꞌe, ka hopeꞌa era, he toꞌo mai he tutu.
9E te taina haŋa rahi ē, ka ai atu meꞌe paŋahaꞌa te mātou meꞌe kī atu, e ꞌite riva-riva rō ꞌā e mātou: a kōrua pa he henua hua o te kai riva-riva tano o te nuꞌu eꞌa mai roto i te ūtuꞌa o te hara ꞌe ravaꞌa i te ora ꞌāpī ꞌina he hopeꞌa raꞌa. 10Te ꞌAtua, paꞌi, ꞌAtua aŋa i te meꞌe tano. ꞌIna he rehu i a ia te kōrua meꞌe riva-riva aŋa ꞌe te haŋa ena o kōrua mo tōꞌona taŋata. Te haŋa ena o kōrua e takeꞌa ena hai hāꞌūꞌū ki a rāua, he meꞌe o kōrua e aŋa mai ena.
11E haŋa rō ꞌana a mātou mo aŋa mo oho nō o kōrua pē nā, ꞌe mo ŋatu mo oho i te kōrua haŋu ki te meꞌe hōrea atu e te ꞌAtua ꞌātā ka haka tano tahi rō e ia. 12ꞌE ꞌina a mātou he haŋa mo hupe-hupe o kōrua. Ka aŋa ka oho nō, pa he meꞌe aŋa e te nuꞌu ⌊haka moe i te manaꞌu⌋ ꞌi ruŋa i a Ietū taꞌe haka rē i a ia ki te hora hopeꞌa. I a rāua te meꞌe hōrea e te ꞌAtua.
Te ꞌAtua e haka tano rō ꞌā i tāꞌana meꞌe hōrea
13Hora hōrea era o te ꞌAtua ki a ⌊ꞌAparahama⌋, hai ꞌīŋoa mau era ꞌā ōꞌona i hōrea ai ꞌo te ai ꞌina he rua kope ꞌata hau rō atu ki a ia ki hōrea ai hai rā ꞌīŋoa. 14He kī: «ꞌĪ a au he haꞌamaitai i a koe ꞌe he haka rahi i tuꞌu hakaara ka ꞌī ka ꞌī». 15I tiaki i oho nō a ꞌAparahama hai haumārū ꞌe i haka tano rō e te ꞌAtua i rā meꞌe hōrea era ki a ia.
16Te taŋata haŋa mo haka aŋi-aŋi ki te nuꞌu pē nei ē: tāꞌana vānaŋa he parautiꞌa mau ꞌā e hōrea ena hai ꞌīŋoa o te kope ꞌata hau rō atu ki a ia, ꞌe mo aŋa pē ira, ꞌina ia he vānaŋa toe mo kī. 17Pē ira takoꞌa ꞌana te ꞌAtua, ꞌi te haŋa mo haka aŋi-aŋi riva-riva ki te nuꞌu era i a rāua tāꞌana hōrea pē nei ē: e haka tano tahi mau rō a ia i tāꞌana meꞌe kī era, ꞌe ꞌina e tahi o rā ŋā meꞌe mo taꞌe haka tano, hai hōrea i haka ꞌite ai.
18Te meꞌe kī ꞌe te meꞌe hōrea e te ꞌAtua e ko taꞌe haka tano; taꞌe, paꞌi, a ia he reo-reo. Mo tātou mo te nuꞌu haka hāhine ki te ꞌAtua mo hāpaꞌo e ia, te parautiꞌa nei he meꞌe haka pūai i te tātou manaꞌu ꞌi ruŋa i a ia, mo tiaki mo oho nō o tātou ki te haka tano iŋa ōꞌona i tāꞌana meꞌe hōrea mai era. 19ꞌI te ꞌite o tātou i te ŋā meꞌe nei, e hio-hio nei te tātou manaꞌu, pa he haka hio-hio iŋa ena o te pahī e te ꞌaka, ꞌe he tuꞌu pa he meꞌe: ko oꞌo ꞌā tātou ki te kona era ꞌi ira te ꞌAtua ꞌi te raŋi, pa he oꞌo iŋa o te ⌊oromatuꞌa hopeꞌa o te ra-rahi⌋, ꞌi muꞌa ꞌā, ki te ⌊Kona ꞌAta Moꞌa⌋ puru era hai korotina. 20Ko oꞌo ꞌana a Ietū ki rā kona ꞌi te raŋi mo mātaki mai i te ara mo tātou, ꞌe ko riro ꞌana a ia he oromatuꞌa hopeꞌa o te ra-rahi ꞌātā ki te hopeꞌa raꞌa pē Merekitereke, he oromatuꞌa o muꞌa ꞌā.
7A Ietū he ⌊oromatuꞌa⌋ pē Merekitereke ꞌā
1Te taŋata nei ko Merekitereke he ꞌariki o te kona era ko Tārema, ꞌe he oromatuꞌa o te ꞌAtua o te raŋi. Hora hoki mai era o ⌊ꞌAparahama⌋ mai te tamaꞌi, rē era ki te ꞌariki hoko hā, he piri a Merekitereke ꞌe he haꞌamaitai. 2He vaꞌai e ꞌAparahama e tahi ꞌapa o te ꞌapa e hoꞌe ꞌahuru o tāꞌana meꞌe taꞌatoꞌa ravaꞌa ꞌi te tamaꞌi, he ꞌapa tano mo vaꞌai ki te oromatuꞌa. Te ꞌīŋoa nei ko Merekitereke e rua haꞌaauraꞌa: e tahi, «he ꞌariki tano ki te mata o te ꞌAtua»; ꞌe te rua, «he ꞌariki o te haumārū»; a ia, paꞌi, he ꞌariki o te kona era ko Tārema, ꞌe te auraꞌa o te ꞌīŋoa nei he haumārū. 3ꞌIna e tahi meꞌe ꞌite e te nuꞌu o ruŋa i te matuꞌa tane ꞌe o ruŋa i te matuꞌa vahine ꞌe o tōꞌona tupuna; pē ira ꞌā o ruŋa i tōꞌona poreko ꞌe o ruŋa i tōꞌona mate. ꞌO ira e tuꞌu rō ꞌā pa he meꞌe ena ē: ko te aŋa ko te oho iŋa ꞌā a ia i tāꞌana aŋa pa he oromatuꞌa ꞌina he hopeꞌa raꞌa, pē Ietū, Poki o te ꞌAtua.
4E haka topa rā kōrua i te manaꞌu o ruŋa i te hōnui o Merekitereke: ꞌātā te tātou tupuna era ko ꞌAparahama i vaꞌai rō ki a ia i te ꞌapa tano mo vaꞌai ki te oromatuꞌa o tāꞌana meꞌe taꞌatoꞌa ravaꞌa era ꞌi te tamaꞌi. 5Ki te ⌊haka tere iŋa era ꞌa Mōtē⌋, te oromatuꞌa haka ara mai i a ⌊Rēvī⌋ e haka ꞌauhau rō ꞌā i te taŋata e tahi ꞌapa o te ꞌapa e hoꞌe ꞌahuru o te rāua meꞌe taꞌatoꞌa, ka ai atu rā nuꞌu he huaꞌai ꞌe mai i a ꞌAparahama takoꞌa i haka ara ai. 6ꞌE a Merekitereke, ka ai atu taꞌe he hakaara o Rēvī, a ꞌAparahama, kope i a ia te hōrea o te ꞌAtua, i vaꞌai nō i te ꞌapa tano mo vaꞌai ki te oromatuꞌa o tāꞌana meꞌe taꞌatoꞌa ravaꞌa era. ꞌE he haꞌamaitai e Merekitereke. 7ꞌE a tātou e ꞌite rō ꞌana i hau rō atu te kope ꞌāꞌana te haꞌamaitai ki te kope haꞌamaitai era.
8ꞌI te ao nei, te oromatuꞌa ki a rāua e ꞌauhau ena e tahi ꞌapa o te ꞌapa e hoꞌe ꞌahuru he taŋata e mate nō. ꞌE ꞌi ruŋa i te ⌊Pāpaꞌi Moꞌa⌋ e vānaŋa ena o ruŋa i a Merekitereke pa he kope e ora e oho nō ꞌā. 9Hora ꞌauhau era e ꞌAparahama ki a Merekitereke pa he moꞌa iŋa ki a ia, e tuꞌu rō ꞌana pa he meꞌe ena ē: i moꞌa ꞌe i ꞌauhau takoꞌa rō e te oromatuꞌa taꞌatoꞌa haka ara mai i a Rēvī, he nuꞌu ki a rāua e ꞌauhau ena ꞌi te hora nei 10ꞌo te ai hora piri era o Merekitereke ki a ꞌAparahama, ko ai nō mai era ꞌana ꞌi ruŋa i a ꞌAparahama tōꞌona hakaara taꞌatoꞌa kai poreko hia ꞌā.
He oromatuꞌa haka ara iŋa kē
11Ki te ⌊haka tere iŋa ꞌa Mōtē⌋ vaꞌai era e te ꞌAtua ki te itaraera, te oromatuꞌa mai te hakaara mau nō o Rēvī ana eꞌa mai. ꞌĀhani i ravaꞌa e te ŋā oromatuꞌa nei mo haka tano i te taŋata ki te mata o te ꞌAtua hai aŋa o rāua, e ko mono ia e te ꞌAtua i te ŋā oromatuꞌa nei hai oromatuꞌa kē, oromatuꞌa pē Merekitereke taꞌe o te hakaara o Rēvī pē ⌊ꞌĀrone⌋. 12ꞌE mo mono o te oromatuꞌa, he mono takoꞌa ia te haka tere iŋa.
13Te tātou Pūꞌoko Haka Tere ko Ietū Kiritō, mōꞌona e kī ena te ŋā vānaŋa nei ꞌi ruŋa i te Pāpaꞌi Moꞌa, taꞌe o te hakaara o Rēvī, o te rua hakaara, ꞌe ꞌina he oromatuꞌa o rā hakaara. 14ꞌE a tātou, paꞌi, ko ꞌite riva-riva ꞌana: mai te hakaara o ⌊Hūrā⌋ te tātou Pūꞌoko Haka Tere i poreko ai, ꞌe a Mōtē, hora vānaŋa era o ruŋa i te oromatuꞌa, ꞌina e tahi meꞌe i kī o ruŋa i te hakaara nei.
15Mo manaꞌu o tātou: a Ietū he oromatuꞌa o te oho iŋa kē pē Merekitereke, ꞌe hai ia i mono ai e te ꞌAtua i te ŋā oromatuꞌa raꞌe era, he aŋi-aŋi riva-riva ia e tātou pē nei ē: te haka tere iŋa raꞌe era ko mono takoꞌa ꞌā. 16A Ietū i oromatuꞌa ai taꞌe ꞌo te haka tano ki te haka tere iŋa era ꞌa Mōtē pē nei ē: he hakaara o Rēvī; i oromatuꞌa ai ꞌo te ai i a ia te pūai o te ora ꞌina he hopeꞌa raꞌa. 17He meꞌe nei te meꞌe i kī e te ꞌAtua o ruŋa i a ia:
«He oromatuꞌa koe
ꞌe he noho mau rō ꞌai koe
he oromatuꞌa ki te hora hopeꞌa,
pa he oho iŋa era o Merekitereke».
18Te ꞌAtua i haka kore ai i te haka tere iŋa raꞌe era, he taꞌe hāꞌūꞌū i te taŋata mo tuꞌu ki te roa haŋa e ia mo rāua. 19Kai ravaꞌa, paꞌi, e te haka tere iŋa era ꞌa Mōtē mo haka tano i te taŋata ki te mata o te ꞌAtua. ꞌE hora nei, ko vaꞌai mai ꞌana e te ꞌAtua i a Ietū mo oromatuꞌa, ꞌe hai ia a tātou e hāhine nei ki te ꞌAtua.
ꞌAta hau rō atu a Ietū ki te tētahi oromatuꞌa
20-21ꞌI te hora oꞌo era o te hakaara o Rēvī mo oromatuꞌa, ꞌina kai hōrea e te ꞌAtua e tahi meꞌe ki a rāua. ꞌE hora oꞌo era o Ietū mo oromatuꞌa i hōrea rō e te ꞌAtua. E kī rō ꞌana, paꞌi, ꞌi ruŋa i te Pāpaꞌi Moꞌa:
«Ko hōrea ꞌana e te ꞌAtua
ꞌe ꞌina e ko taꞌe haka tano:
“He oromatuꞌa koe
ꞌe he noho mau rō ꞌai koe
he oromatuꞌa ki te hora hopeꞌa”».
22Hai hōrea nei o ruŋa i a Ietū, e ꞌite nei e tātou: hai ia ka haka tano ena te haka tere iŋa ꞌāpī nei o te ꞌAtua ananake ko te taŋata, haka tere iŋa ꞌata hau rō atu ki te haka tere iŋa raꞌe era. 23Oromatuꞌa rahi te oromatuꞌa o te hakaara o Rēvī, ꞌe a rāua e ko noho e ko oho mau rō ꞌai he oromatuꞌa ꞌi te meꞌe era te taŋata e mate rō ꞌā. 24ꞌE a Ietū, ꞌi te taꞌe mate, he aŋa he oho mau rō ꞌai i tāꞌana aŋa he oromatuꞌa. 25ꞌO ira a Ietū e riva ena mo haka eꞌa mau rō mai ꞌai i a tātou mai roto i te ūtuꞌa o te hara ꞌe mo vaꞌai mai i te ora ꞌāpī ꞌina he hopeꞌa raꞌa ki a tātou ki te nuꞌu haka hāhine ki te ꞌAtua hai ⌊haka moe i te manaꞌu⌋ ꞌi ruŋa i a ia. A Ietū, paꞌi, e ora e oho ena mo ani ki te ꞌAtua mo tātou.
26A Ietū he oromatuꞌa hopeꞌa o te ra-rahi tano mo tātou. Te ꞌAtua e koa rō ꞌana mōꞌona. ꞌIna, paꞌi, ōꞌona hara ꞌo hape mo tuhi iŋa e te rua. Ko haꞌataꞌa ꞌana i a ia mai muri i te nuꞌu hara ꞌe ko vaꞌai ꞌana i te tōroꞌa hopeꞌa o te nui-nui ꞌi te raŋi. 27A ia taꞌe pe he tētahi ŋā oromatuꞌa ra-rahi ena, tiŋaꞌi i te ꞌanimare paurō te mahana mo tūtia ki te ꞌAtua mo haka maꞌitaki i tōꞌona hara ꞌi raꞌe, ki tano iho ai mo tūtia i te ꞌanimare ki te ꞌAtua mo te hara o te taꞌatoꞌa. Taꞌe pē ira a Ietū. E tahi mau nō tūtia i aŋa e ia hora vaꞌai era i a ia mo mate ꞌi ruŋa i te tātaurō, ꞌe rā tūtia mo te hora taꞌatoꞌa. 28ꞌI te haka tere iŋa era ꞌa Mōtē te meꞌe i haka oromatuꞌa he taŋata hara. ꞌE hai hōrea aŋa e te ꞌAtua i mono ai i te haka tere iŋa nei, ꞌe te meꞌe i haka oromatuꞌa mo oromatuꞌa hopeꞌa o te ra-rahi he Poki era ꞌāꞌana, he kope ꞌina e tahi hape ki te hora hopeꞌa.
8A Ietū he ⌊oromatuꞌa hopeꞌa o te ra-rahi⌋
1Te meꞌe haŋa ꞌāꞌaku mo aŋi-aŋi e kōrua: te tātou oromatuꞌa hopeꞌa o te ra-rahi ko Ietū Kiritō, ꞌai te raŋi e noho rō ꞌā ꞌi te pāꞌiŋa mataꞌu o te ꞌAtua, kona mo te kope hopeꞌa o te hōnui. 2ꞌI ira a ia e aŋa ena i tāꞌana aŋa he oromatuꞌa ꞌi muꞌa o te ꞌAtua, he ⌊Kona Moꞌa⌋ parautiꞌa aŋa e te ꞌAtua mo haꞌamuri ki a ia, taꞌe ꞌō ꞌi te Kona Moꞌa aŋa e te taŋata.
3Te aŋa o te oromatuꞌa taꞌatoꞌa he tūtia ꞌe he vaꞌai i te meꞌe mo te ꞌAtua. ꞌO ira, e ai takoꞌa te meꞌe ꞌa Ietū Kiritō mo vaꞌai ki te ꞌAtua. 4ꞌĀhani a ia ꞌi te ao nei, e ko oromatuꞌa; e ai rō ꞌana, paꞌi, te oromatuꞌa o te ao nei vaꞌai i te meꞌe mo te ꞌAtua, pa he meꞌe kī e te ⌊haka tere iŋa ꞌa Mōtē⌋. 5Te ŋā oromatuꞌa nei e aŋa ena ꞌi te kona tuꞌu pa he kona parautiꞌa mau era ꞌi te raŋi. A tātou e ꞌite ena i te meꞌe nei ꞌo te ai hora oho era o Mōtē mo aŋa i te ⌊Karapā Moꞌa⌋ mo haꞌamuri ki te ꞌAtua he kī e te ꞌAtua: «E uꞌi e aŋa tahi pa he meꞌe haka takeꞌa mau atu era ꞌā e au ꞌi ruŋa i te maꞌuŋa». 6Te aŋa vaꞌai era e te ꞌAtua ki te tātou Oromatuꞌa hopeꞌa o te ra-rahi i hau rō atu ki te aŋa o te tētahi oromatuꞌa, ꞌe pē ira ꞌana te ⌊haka tere iŋa ꞌāpī o te ꞌAtua ananake ko te taŋata⌋ haka riva-riva e Ietū, ki te haka tere iŋa raꞌe era ꞌo te ai hora aŋa era i te haka tere iŋa ꞌāpī, te meꞌe hōrea mai e te ꞌAtua meꞌe ꞌata nui-nui ki te meꞌe hōrea mai e ia hora aŋa era i te haka tere iŋa raꞌe era.
Te haka tere iŋa raꞌe
7ꞌĀhani te haka tere iŋa raꞌe era o te ꞌAtua ananake ko te taŋata i hāꞌūꞌū i te taŋata mo tuꞌu ki te roa haŋa e ia mo rāua, e ko mono mai ia hai rua haka tere iŋa. 8ꞌE ꞌi te takeꞌa e te ꞌAtua i te hape o te taŋata, i kī ai pē nei ē:
«E tuꞌu rō te mahana he aŋa e au
i te haka tere iŋa ꞌāpī ananake ko tōꞌoku taŋata taꞌatoꞌa, he hakaara o Itaraera ꞌe o Hūrā.
9Te haka tere iŋa nei e ko ai pa he haka tere iŋa vaꞌai era e au ki te kōrua tupuna,
hora toꞌo mai era e au a te rima mo haka eꞌa mai te henua era ko Ehipto;
ꞌe ꞌi te taꞌe haꞌatura o rāua ki rā haka tere iŋa, he hārui e au hai tuaꞌivi,
i kī ai e te ꞌAtua.
10Te haka tere iŋa ꞌāpī ka aŋa ena e au ananake ko te itaraera ꞌi rā mahana, ko te meꞌe nei:
He ha-haꞌo e au i tāꞌaku roŋo ꞌi roto i te rāua manaꞌu,
ꞌe he pāpaꞌi ꞌi roto i te rāua māhatu.
He riro a au he ꞌAtua o rāua,
ꞌe a rāua he taŋata ꞌāꞌaku.
11ꞌI rā noho iŋa, ¿mo aha atu ꞌā a rāua ana hāpī haka ꞌou ki te huaꞌai ꞌe ki te nuꞌu o te henua o ruŋa i a au?
Taꞌatoꞌa nō, paꞌi, ka ꞌite ena ko ai a au,
mai te kope hopeꞌa o te ꞌiti-ꞌiti ki te kope hopeꞌa o te nui-nui.
12He haka kore e au i te rāua meꞌe taꞌe tano aŋa,
ꞌe he haka rehu i te rāua hara».
13ꞌI te hora vānaŋa o te ꞌAtua o ruŋa i te haka tere iŋa ꞌāpī ananake ko te taŋata, mōꞌona te haka tere iŋa raꞌe era he meꞌe tuai; ꞌe te meꞌe tuai ꞌe rūꞌau, e ko roa he ŋaro rō ꞌai.
9Te meꞌe taꞌe ravaꞌa e te ŋā tūtia raꞌe era
1ꞌI te haka tere iŋa raꞌe era o te ꞌAtua ananake ko te itaraera e ai rō ꞌā te rāua meꞌe mo aŋa mo haꞌamuri ki a ia ꞌi roto i te ⌊Karapā Moꞌa⌋ aŋa era e rāua. 2E rua piha o te karapā nei. ꞌI roto i te piha raꞌe te hakariꞌi ꞌe te ꞌamuramaꞌa ꞌi ruŋa te haraoa haꞌataꞌa mo te ꞌAtua. E kī era i te piha nei he ⌊Kona Moꞌa⌋. 3Te oꞌo iŋa ki te piha nei e puru rō ꞌā hai korotina. E ai takoꞌa rō ꞌana te rua korotina puru i te rua piha e kī era he ⌊Kona ꞌAta Moꞌa⌋. 4ꞌI nei piha te ⌊fata⌋ aŋa hai piru mo tutu i te meꞌe mo haka ꞌeo, ꞌe te ⌊ꞌavahata o te haka tere iŋa o te ꞌAtua ananake ko te taŋata⌋, ꞌavahata viri tahi hai piru. ꞌI roto i rā ꞌavahata te toko-toko era o ⌊ꞌĀrone⌋ ko pipi ꞌā, te māꞌea pāpaꞌi era ꞌi ruŋa te roŋo o te ꞌAtua, ꞌe te poko-poko e tahi aŋa hai piru, te meꞌe o roto he ⌊mānā⌋. 5ꞌI ruŋa i rā ꞌavahata e rua meꞌe tuꞌu pa he merahi e haka roa-roa rō ꞌā te karā a ruŋa i te puꞌa, he tāpaꞌo pē nei ē: ꞌai ira te ꞌAtua.9.5 Te puꞌa o te ꞌavahata he kona ꞌi ira e pī-pī era te oromatuꞌa i te toto mo haka kore e te ꞌAtua i te hara o te taŋata. O ruŋa i te ŋā meꞌe nei o roto o te karapā he oti ꞌā tāꞌaku meꞌe mo kī atu.
6Te Karapā Moꞌa nei pē ira koia ko tōꞌona meꞌe taꞌatoꞌa o roto. Paurō te mahana e uru era te oromatuꞌa ki te piha raꞌe era, he Kona Moꞌa, ki te rāua aŋa. 7ꞌE, ꞌi te rua piha, he Kona ꞌAta Moꞌa, he oromatuꞌa hopeꞌa o te ra-rahi mau nō te meꞌe mo uru ki roto e tahi nō mahana ꞌi te matahiti. E uru era, e maꞌu rō ꞌā i te toto ꞌanimare mo tūtia ki te ꞌAtua mo tōꞌona hara ꞌe mo te hara aŋa e te taŋata mā te taꞌe ꞌite e rāua. 8Hai ŋā piha nei e rua e haŋa ena te ⌊Vārua Maitai⌋ mo haka ꞌite mai pē nei ē: te ara ki te ꞌAtua e ko ha-hata ki te taŋata mo ai ko te maꞌu iŋa ꞌana i te haka tere iŋa raꞌe era. 9Te meꞌe nei e haka ꞌite mai ꞌā ki a tātou nei pē nei ē: te meꞌe taꞌatoꞌa vaꞌai ꞌe tūtia ki te ꞌAtua e ko haka kore i te hara o te nuꞌu haꞌamuri ki a ia hai rā haka tere iŋa raꞌe era 10ꞌo te ai te roŋo o rā haka tere iŋa he meꞌe mau nō o te haho, pa he roŋo o ruŋa i te meꞌe tano mo kai ꞌe mo unu, ꞌe o ruŋa i te ⌊haka maꞌitaki⌋ iŋa. Te ŋā meꞌe nei i hauhaꞌa ai ꞌātā ki te hora mono era e te ꞌAtua hai rua haka tere iŋa.
Te meꞌe i ravaꞌa e Ietū Kiritō hai tūtia i a ia
11ꞌE hora nei, ko oꞌo ꞌana te ⌊Kiritō⌋ mo oromatuꞌa hopeꞌa o te ra-rahi o te meꞌe riva-riva taꞌatoꞌa e ai ena mo tātou hai tūtia i a ia, ꞌe e aŋa mai ena ꞌi te Kona ꞌAta Moꞌa ꞌata nui-nui ꞌe ꞌata riva-riva ꞌi te meꞌe era taꞌe o te taŋata i aŋa ꞌe taꞌe o te ao nei. 12E tahi mau nō oꞌo iŋa o Ietū ki te Kona ꞌAta Moꞌa parautiꞌa ꞌi te raŋi mo te hora taꞌatoꞌa, ꞌe kai maꞌu i te toto o te vato-vato ꞌe o te puaꞌa mo tūtia ki te ꞌAtua. I tūtia ai hai toto mau era ꞌā ōꞌona, ꞌe hai toto era ōꞌona i ravaꞌa ai mo haka eꞌa mau rō ꞌai i a tātou mai roto i te ūtuꞌa o te hara ꞌe mo vaꞌai mai i te ora ꞌāpī ꞌina he hopeꞌa raꞌa.
13Ki te ⌊haka tere iŋa ꞌa Mōtē⌋, e ai rō ꞌana te pūai o te toto o te puaꞌa, o te vato-vato, ꞌe o te ꞌeo-ꞌeo o te puaꞌa taŋa vahine tutu ꞌi ruŋa i te fata mo haka maꞌitaki a te haho i te nuꞌu taꞌe maꞌitaki ana pī-pī a ruŋa i a rāua. 14ꞌE mo ai o te pūai o te ŋā meꞌe era mo haka maꞌitaki i te taŋata, ¡ka manaꞌu atu ia kōrua pē hē te pūai o te toto o Ietū Kiritō! Hai Vārua Maitai, paꞌi, i vaꞌai ai e Ietū i a ia ki te ꞌAtua pa he tūtia ꞌina e tahi hape. ꞌE te meꞌe haka maꞌitaki hai toto ōꞌona he manaꞌu taꞌe tano o tātou o te taŋata maꞌu i a tātou ki te mate, ki riva ai tātou mo tāvini ki te ꞌAtua, tōꞌona ora ꞌina he hopeꞌa raꞌa.
Te ⌊haka tere iŋa ꞌāpī o te ꞌAtua ananake ko te taŋata⌋
15ꞌO ira, ꞌi te haka tere iŋa ꞌāpī nei, a Ietū he kope haka riva-riva i te taŋata ki te ꞌAtua, ki ravaꞌa ai e te nuꞌu kī e te ꞌAtua mo taŋata ꞌāꞌana i te meꞌe taꞌatoꞌa ꞌina he hopeꞌa raꞌa hōrea e ia mo rāua. A Ietū Kiritō, paꞌi, i mate ai mo haka eꞌa takoꞌa mai roto i te ūtuꞌa o te hara i te taŋata hara o te haka tere iŋa raꞌe era.
16Mo pāpaꞌi o te kope e tahi i te parau ꞌi ruŋa e kī ena ki a ai ki a ai ana tuhaꞌa te hauhaꞌa ōꞌona ꞌi te hora o tōꞌona mate, ꞌi raꞌe ki te tuhaꞌa, e ai e tahi taŋata mo mataꞌite ko mate mau ꞌā a ia. 17ꞌIna e tahi hauhaꞌa, paꞌi, o rā parau mo ai e ora nō ꞌā te kope era ꞌāꞌana i pāpaꞌi; e mate ki hauhaꞌa iho ai.
18Pē ira takoꞌa te haka tere iŋa raꞌe era o te ꞌAtua ananake ko te taŋata: e haka hauhaꞌa era hai toto, he mataꞌite o te mate. 19A Mōtē, i oti era te haka ꞌite i te roŋo taꞌatoꞌa o te ꞌAtua ki te taŋata, he toꞌo mai i te huru-huru mea-mea e tahi ꞌe i te maŋa ꞌiti-ꞌiti o te tumu he ꞌītopo, he haka rari ꞌi roto i te toto o te puaꞌa ararua ko te vato-vato ꞌānoꞌi hai vai, ꞌe ꞌai ka pī-pī a ruŋa i te puka o te roŋo ꞌe a ruŋa i te taŋata taꞌatoꞌa. 20I oti era he kī: «Hai toto nei e tāpaꞌo ena e te ꞌAtua i te haka tere iŋa ōꞌona ananake ko te taŋata kī mai era mo haꞌatura e tātou». 21I pī-pī takoꞌa rō e Mōtē hai toto i te Karapā Moꞌa era koia ko te meꞌe taꞌatoꞌa o roto mo haꞌamuri ki te ꞌAtua. 22Ki te haka tere iŋa era ꞌa Mōtē, te rahi raꞌa o te meꞌe e haka maꞌitaki era hai toto. ꞌE ꞌina e ko haka kore i te hara mo taꞌe tehe o te toto. 23ꞌO ira te Karapā Moꞌa era ꞌe te meꞌe taꞌatoꞌa o roto e haka maꞌitaki era hai toto. Te ŋā meꞌe taꞌatoꞌa nei he meꞌe i aŋa nō e te taŋata mo tuꞌu pa he meꞌe parautiꞌa era ꞌi te raŋi. ꞌE te meꞌe parautiꞌa mau era e haka maꞌitaki hai tūtia ꞌata hau rō atu ki te toto o te ꞌanimare.
ꞌI muꞌa o te ꞌAtua a Ietū
24Te kona oꞌo era o Ietū taꞌe ko te kona aŋa era e te taŋata mo haꞌamuri ki te ꞌAtua, kona i aŋa mo tuꞌu pa he kona parautiꞌa era ꞌi te raŋi. Ki te raŋi mau ꞌana a Ietū i oꞌo ai, ꞌe ꞌai muꞌa o te ꞌAtua ꞌi te hora nei e ani ꞌana mo te riva-riva o tātou. 25ꞌE taꞌe i oꞌo ai mo vaꞌai mo oho i a ia pa he tūtia te matahiti te matahiti, pa he meꞌe aŋa e te oromatuꞌa hopeꞌa o te ra-rahi hora uru o rāua ki te Kona ꞌAta Moꞌa tūtia i te toto o te ꞌanimare. 26ꞌĀhani, paꞌi, i ai pē ira, ko ai ꞌana meꞌe rahi nō atu mate iŋa o Ietū mai te hora aŋa era e te ꞌAtua i te ao. ꞌE te parautiꞌa mau, hora nei, he hora hopeꞌa, ko tuꞌu mai ꞌā a ia ki te ao nei ꞌe ko vaꞌai ꞌā i a ia, mo te hora taꞌatoꞌa, pa he tūtia mo haka kore mau rō ꞌai i te pūai o te hara mai ruŋa i a tātou. 27E tahi mau nō mate iŋa o tātou o te taŋata ꞌe ki oti ka kī mai ena e te ꞌAtua i te tano ꞌe i te taꞌe tano o te tātou meꞌe aŋa. 28Pē ira takoꞌa a Ietū Kiritō: e tahi mau nō vaꞌai iŋa i a ia mo mate pa he tūtia mo haka kore i te hara o te nuꞌu. ꞌE pe muꞌa ka oho ena he tuꞌu haka ꞌou mai a Ietū taꞌe ꞌō mo vaꞌai haka ꞌou i a ia pa he tūtia mo te hara o te taŋata, mo vaꞌai ki te nuꞌu tiaki ki a ia i te ora ꞌāpī ꞌina he hopeꞌa raꞌa.
10Te meꞌe taꞌe ravaꞌa e te ⌊haka tere iŋa ꞌa Mōtē⌋
1Hora nei ko aŋi-aŋi ꞌana e tātou: te haka tere iŋa ena ꞌa Mōtē he haꞌaauraꞌa nō o ruŋa o te meꞌe mo oho mai ꞌe taꞌe ꞌō ko rā meꞌe mau era, te auraꞌa, he meꞌe riva-riva era mo vaꞌai mai e te ꞌAtua hai Ietū Kiritō. Te haka tere iŋa ena, paꞌi, ꞌa Mōtē, ꞌina e ko haka tano ki te mata o te ꞌAtua i te nuꞌu haka hāhine ki a ia aŋa ka matahiti ka matahiti i tū tūtia ꞌā. 2ꞌĀhani e haka tano rō ꞌā e te haka tere iŋa era, ꞌo e haka rehe rō ꞌā i te paŋahaꞌa o te rāua hara, e ko aŋa e ko oho nō ia i te tūtia. 3Te meꞌe aŋa e te tūtia era he haka manaꞌu i te nuꞌu, paurō te matahiti, o ruŋa i te rāua hara. 4Te toto, paꞌi, o te puaꞌa ꞌe o te vato-vato e ko haka kore i te hara o te taŋata.
Te vaꞌai iŋa o Ietū i a ia pa he tūtia
5ꞌO ira, hora tuꞌu mai era o Ietū ki te ao nei i kī ai ki te ꞌAtua:
«ꞌIna ꞌō koe he koa ki te tūtia o te ꞌanimare
ꞌe ki te tētahi atu meꞌe haka ꞌou mo vaꞌai atu;
he hakari ōꞌoku taꞌa meꞌe i vaꞌai mai mo tūtia atu.
6Meꞌe taꞌe koa ꞌāꞌau he ꞌanimare tūtia tutu ka oti rō
ꞌe he meꞌe vaꞌai atu mo haka kore o te hara.
7ꞌĪ a au ia ꞌi aꞌa mo aŋa i taꞌa meꞌe haŋa, e te ꞌAtua ē,
pa he meꞌe kī mau era ꞌā o ruŋa i a au ꞌi ruŋa i te puka».
8Te auraꞌa o te vānaŋa raꞌe kī nei e Ietū: te ꞌAtua ꞌina he haŋa ꞌe he koa ꞌi te rauhuru meꞌe vaꞌai e te taŋata ki a ia, ꞌi te tūtia o te ꞌanimare ꞌe ꞌi te ꞌanimare tūtia tutu ka oti rō mo haka kore o te hara, ka ai atu te ŋā meꞌe nei he meꞌe mo aŋa hāꞌaki ꞌi ruŋa i te haka tere iŋa era ꞌa Mōtē. 9ꞌE te rua vānaŋa era: «ꞌĪ a au ꞌi aꞌa mo aŋa i taꞌa meꞌe haŋa». Hai meꞌe nei e ꞌite ena: he haka kore e te ꞌAtua i te tūtia haŋa tuai era ꞌe he mono hai meꞌe ꞌāpī. 10ꞌO te aŋa e Ietū Kiritō i te meꞌe haŋa o te ꞌAtua hora vaꞌai era, e tahi vaꞌai iŋa mau nō mo te hora taꞌatoꞌa, i tōꞌona hakari mau era ꞌā pa he tūtia, i haka kore ai e te ꞌAtua i te tātou hara ꞌe i haꞌataꞌa ai i a tātou māꞌana pa he nuꞌu ꞌina e tahi hara.
11ꞌE te aŋa o te ⌊oromatuꞌa⌋ ⌊hūrio⌋ taꞌatoꞌa he tūtia, paurō te mahana, i tū tūtia ꞌā, ka ai atu e ko haka kore, ki te hora hopeꞌa, i te hara o te taŋata e te ŋā tūtia nei. 12ꞌE a Ietū Kiritō i vaꞌai ai i a ia pa he tūtia mo haka kore o te hara, e tahi nō tūtia iŋa mo te hora taꞌatoꞌa, ꞌe i oti era he noho ꞌi te pāꞌiŋa mataꞌu o te ꞌAtua. 13ꞌAi ira e tiaki ꞌana ꞌātā ki te haka riro e te ꞌAtua i te nuꞌu taꞌe haŋa ki a ia he meꞌe mo raŋo o tōꞌona vaꞌe. 14Hai tūtia mau nō era ōꞌona e tahi i haka riro ai i te nuꞌu haꞌataꞌa e te ꞌAtua māꞌana he nuꞌu ꞌina e tahi hara ki te hora hopeꞌa. 15ꞌE o te ⌊Vārua Maitai⌋ te haka ꞌite mai he parautiꞌa mau ꞌā te meꞌe nei hai vānaŋa ena e kī ena ꞌi ruŋa i te ⌊Pāpaꞌi Moꞌa⌋:
16«Te haka tere iŋa ꞌāpī ka aŋa ena e au ananake ko tōꞌoku taŋata pe muꞌa ka oho ena, ko te meꞌe nei:
He ha-haꞌo e au i tāꞌaku roŋo ꞌi roto i te rāua māhatu,
ꞌe he pāpaꞌi ꞌi roto i te rāua manaꞌu.
17ꞌIna a au e ko manaꞌu haka ꞌou ki te rāua hara
ꞌe ki te rāua meꞌe taꞌe tano aŋa».
18ꞌE mo ai ko haka kore ꞌā e te ꞌAtua i te hara, ¿mo aha ia ana tūtia haka ꞌou mo haka kore i te hara?
E haka hāhine ki te ꞌAtua hai māhatu
19E te taina, hora nei, hai haka moe o tātou i te manaꞌu ꞌi ruŋa i te meꞌe ravaꞌa e Ietū mo tātou hai mate ōꞌona ꞌe hai tehe o tōꞌona toto, e tano nei a tātou mo hāhine ki te ꞌAtua ꞌina he riꞌa-riꞌa, pa he hāhine era o te oromatuꞌa ra-rahi ki te ꞌAtua ꞌi roto i te ⌊Kona ꞌAta Moꞌa⌋. 20ꞌE pa he puru iŋa era e te korotina i te Kona ꞌAta Moꞌa, pē ira te hara e puru era i a tātou ꞌo hāhine ki te ꞌAtua. ꞌE hora nei, hai vaꞌai o Ietū i tōꞌona hakari pa he tūtia mo ꞌamo i te ūtuꞌa o te hara mo tātou, i mātaki ai i te ara ꞌāpī mo hāhine o tātou ki te ꞌAtua, ꞌe rā ara ko ia. 21ꞌE taꞌe nō ꞌō pē ira, a ia he oromatuꞌa hopeꞌa o te ra-rahi haka tere i te nūnaꞌa taŋata haꞌataꞌa e te ꞌAtua māꞌana.
22ꞌO ira, e haka hāhine tātou ki te ꞌAtua hai māhatu, hai haka moe iŋa i te manaꞌu ꞌina he ꞌaka-ꞌaka ꞌi ruŋa i a ia, hai manaꞌu maꞌitaki pa he meꞌe ena: ko pī-pī ꞌā e te toto era o Ietū ꞌe hai hakari maꞌitaki pa he meꞌe ena: ko hopu ꞌā hai vai maꞌitaki. 23E haka hio-hio e oho nō tātou i te manaꞌu ꞌi ruŋa i te meꞌe hōrea mai era e te ꞌAtua. A ia, paꞌi, e ko taꞌe aŋa i tāꞌana meꞌe kī. 24E uꞌi tātou i te rāveꞌa mo hāꞌūꞌū ki a tātou ꞌā mo ꞌata pūai o te haŋa ꞌi roto i a tātou i te taina ꞌe mo aŋa i te meꞌe riva-riva. 25ꞌIna ko taꞌe haka taka-taka tātou mo haꞌamuri ki te ꞌAtua, pa he tētahi nuꞌu. Te meꞌe o tātou mo aŋa he ꞌata haka hio-hio i te manaꞌu o te tātou taina ꞌi te ŋā hora nei; ko ꞌite ꞌana, paꞌi, a tātou ko hāhine mai ꞌā te hoki iŋa mai o te tātou Pūꞌoko Haka Tere ko Ietū Kiritō.
26Mo hara mo oho nō o tātou ka ai atu ko ꞌite ꞌana a tātou i te hāpī parautiꞌa o ruŋa i a Ietū, ꞌina ia he rua tūtia mo haka kore i te hara era o tātou. 27Te meꞌe toe nō mo tātou he ture taparahi-taꞌata o te ꞌAtua, ꞌe he ahi pūai haka ūtuꞌa i te nuꞌu hārui i te ꞌAtua hai tuaꞌivi.
28ꞌI muꞌa ꞌā, taŋata nō era mo hape ki te haka tere iŋa ꞌa Mōtē, ꞌina he haka ꞌaroha, he haka ūtuꞌa hai mate ana ai e rua ꞌo e toru kope mataꞌite ko hape mau ꞌā a ia. 29Mo ai pē ira e haka ūtuꞌa era i te nuꞌu taꞌe haꞌatura ki te haka tere iŋa ꞌa Mōtē, ka manaꞌu atu kōrua i te ūtuꞌa mo te nuꞌu taꞌe haŋa ꞌe hārui i te Poki o te ꞌAtua hai tuaꞌivi, ꞌe taꞌe haka hauhaꞌa i tōꞌona toto, toto tāpaꞌo i te ⌊haka tere iŋa ꞌāpī o te ꞌAtua ananake ko te taŋata⌋, haka maꞌitaki i a rāua mai te hara ꞌe haꞌataꞌa i a rāua mo te ꞌAtua. Te nuꞌu aŋa i te meꞌe pē ira, e parauꞌino ꞌā ki te Vārua Maitai, kope haka takeꞌa i te riva rahi o te ꞌAtua. 30Ko ꞌite ꞌana a tātou ko kī ꞌana e te ꞌAtua pē nei ē: «I a au te parau mo haka ūtuꞌa i te rāua hape ꞌe mo vaꞌai i te meꞌe tano ki te rāua meꞌe aŋa». ꞌE i kī takoꞌa rō: «Māꞌaku e uꞌi i te meꞌe tano ꞌe i te meꞌe taꞌe tano o tōꞌoku taŋata». 31¡He taparahi-taꞌata e tahi te meꞌe ena ꞌi te rima o te ꞌAtua koe mo haka ūtuꞌa atu!
32ꞌO ira, e manaꞌu kōrua ki te hora raꞌe māhani era ki a Ietū Kiritō. I ꞌamo i oho nō kōrua hai pūai i te ꞌati nui-nui e topa atu era. 33Tētahi o kōrua i vā-vā rō ꞌe i tōtōā rō ꞌi muꞌa o te taŋata, ꞌe tētahi atu i mamae takoꞌa rō ꞌi te ꞌati topa ki rā nuꞌu. 34I haka ꞌaroha rō kōrua mo te nuꞌu puru ꞌi roto i te hare maꞌuꞌaurī, ꞌe ꞌātā hai koa e haka rē era e kōrua mo toꞌo e te nuꞌu i te kōrua hauhaꞌa, he ꞌite o kōrua: ꞌi te raŋi e ai rō ꞌā te meꞌe ꞌata hau rō atu e ko pau ki te hora hopeꞌa.
35ꞌAti nō era mo topa atu e haka noho e oho nō te kōrua manaꞌu ꞌi ruŋa i te ꞌAtua; pē ira i a kōrua te meꞌe hopeꞌa o te nui-nui pe muꞌa ka oho ena. 36E ꞌite i te haꞌaoromaꞌi i te ꞌati hai pūai mo aŋa i te meꞌe haŋa o te ꞌAtua; pē ira takoꞌa i a kōrua pe muꞌa ka oho ena te meꞌe hōrea mai era e ia. 37E kī rō ꞌana, paꞌi, ꞌi ruŋa i te Pāpaꞌi Moꞌa:
«Nā he tuꞌu mai te kope era mo oho mai;
e ko roa hia.
38Te nuꞌu tano ki tōꞌoku mata ꞌi te ⌊haka moe i te manaꞌu⌋ ꞌi ruŋa i a au,
he ravaꞌa i te ora ꞌāpī ꞌina he hopeꞌa raꞌa.
ꞌE mo haka tapa te manaꞌu mai ruŋa i a au,
e ko koa a au».
39Taꞌe a tātou o roto i te nuꞌu haka tapa i te manaꞌu mai ruŋa i te ꞌAtua, nuꞌu te rāua hopeꞌa raꞌa he ūtuꞌa. A tātou o roto i te nuꞌu eꞌa mai roto i te ūtuꞌa o te hara ꞌe ravaꞌa i te ora ꞌāpī ꞌina he hopeꞌa raꞌa vaꞌai e te ꞌAtua ꞌo te haka moe i te tātou manaꞌu ꞌi ruŋa i a ia.
11Te haka moe iŋa o te manaꞌu ꞌi ruŋa i te ꞌAtua
1¿Pē hē e ꞌite ena ko haka moe mau ꞌana a tātou i te manaꞌu ꞌi ruŋa i te ꞌAtua? Hai ꞌite e tātou pē nei ē: he parautiꞌa mau ꞌā e ai rō i a tātou te meꞌe e tiaki nei, ꞌe he parautiꞌa takoꞌa mo tātou e ai mau rō ꞌā te ŋā meꞌe ena ꞌina e tātou he takeꞌa. 2He haka moe o te tātou tupuna i te rāua manaꞌu ꞌi ruŋa i te ꞌAtua i tano ai ki tōꞌona mata.
3He haka moe o tātou i te manaꞌu ꞌi ruŋa i te ꞌAtua e ꞌite nei: hai vānaŋa era ꞌāꞌana i aŋa ai i te ao. Te meꞌe taꞌatoꞌa e tātou e takeꞌa ena i aŋa ai mai te meꞌe taꞌe takeꞌa.
4He haka moe o ⌊ꞌĀvere⌋ i te manaꞌu ꞌi ruŋa i te ꞌAtua i aŋa ai i te tūtia ꞌata hau rō atu ki te tūtia aŋa e tōꞌona taina ko ⌊Kāiŋa⌋. ꞌO ira te ꞌAtua i kī ai e tano rō ꞌā ki tōꞌona mata, ꞌe he koa mo tāꞌana tūtia. ꞌE hora nei, ka ai atu ko mate ꞌana a ꞌĀvere, ko te noho iŋa ꞌā te haꞌaauraꞌa ōꞌona: he hauhaꞌa o tōꞌona haka moe iŋa era i te manaꞌu ꞌi ruŋa i te ꞌAtua.
5He haka moe o ꞌĒnoko i te manaꞌu ꞌi ruŋa i te ꞌAtua i toꞌo ora ai ki te raŋi, ꞌe ꞌina kai takeꞌa haka ꞌou. ꞌI ruŋa i te ⌊Pāpaꞌi Moꞌa⌋ e kī ena mo ꞌĒnoko hora era kai toꞌo ꞌā ki te raŋi: he kope tano ki te mata o te ꞌAtua. 6ꞌIna e tahi taŋata taꞌe ⌊haka moe i te manaꞌu⌋ ꞌi ruŋa i te ꞌAtua mo tano ki tōꞌona mata. Mo hāhine ki a ia, e ai he parautiꞌa mau ꞌā mōꞌou e ai rō ꞌā te ꞌAtua ꞌe e ai rō ꞌana te meꞌe mo vaꞌai ki te nuꞌu kimi i a ia.
7He haka moe o Nōē i te manaꞌu ꞌi ruŋa i te ꞌAtua i aŋa ai i te pahī ꞌo mate tāꞌana huaꞌai hora kī era e te ꞌAtua e topa rō te meꞌe kai takeꞌa hia ꞌā e te mata o te taŋata. ꞌE ꞌi tōꞌona haꞌatura ki te ꞌAtua i takeꞌa ai: te taŋata taꞌatoꞌa o rā hora e aŋa rō ꞌana i te meꞌe taꞌe tano, ꞌe e tano rō ꞌana mo haka ūtuꞌa e te ꞌAtua. ꞌE a Nōē i tano ai ki te mata o te ꞌAtua ꞌo te haka moe i tōꞌona manaꞌu ꞌi ruŋa i a ia.
8He haka moe o ⌊ꞌAparahama⌋ i te manaꞌu ꞌi ruŋa i te ꞌAtua i haꞌatura ai, ꞌe i eꞌa i oho ai mai tōꞌona kāiŋa hora kī era e te ꞌAtua mo oho ki te henua vaꞌai mo rāua, ka ai atu ꞌina kai ꞌite hia ki hē a ia ka oho era. 9ꞌE he haka moe ōꞌona i te manaꞌu ꞌi ruŋa i te ꞌAtua, i noho ai pa he taŋata o te rua kona ꞌi te henua e ai rō mo rāua pe muꞌa ka oho era, henua hōrea era e te ꞌAtua mo vaꞌai. ꞌI roto i te karapā e noho era; pē ira ꞌana tāꞌana poki ko Itaꞌata ꞌe tōꞌona makupuna ko Hākovo, i a rāua takoꞌa rā hōrea era o te ꞌAtua. 10A ꞌAparahama i aŋa ai i te meꞌe nei e tiaki e oho ꞌana ki te kona mau era mo noho ꞌina he hopeꞌa raꞌa, he kona manaꞌu ꞌe aŋa e te ꞌAtua.
11He haka moe i te manaꞌu ꞌi ruŋa i te ꞌAtua, a Tara, viꞌe ꞌa ꞌAparahama, ka ai atu he paꞌa ꞌe ko rūꞌau riva-riva ꞌā, i tupu nō te poki ꞌo te ꞌite e ko taꞌe haka tano e te ꞌAtua i tāꞌana meꞌe hōrea. 12Pē ira ꞌana a ꞌAparahama, ka ai atu ko korohuꞌa riva-riva ꞌana, i rahi nō tōꞌona hakaara pa he hetuꞌu ena ꞌā o te raŋi, ꞌe pa he ꞌone o te taha-taha tai e ko oti mo tataku.
13Te nuꞌu taꞌatoꞌa nei i mā-mate ai e haka moe nō ꞌana i te manaꞌu ꞌi ruŋa i te ꞌAtua, ka ai atu ꞌina kai ai hia ꞌā i a rāua te meꞌe hōrea era e te ꞌAtua. A rāua, paꞌi, e ꞌite rō ꞌana: pe muꞌa ka oho ena i a rāua rā ŋā meꞌe taꞌatoꞌa, ꞌe e koa rō ꞌā o ruŋa. ꞌE e aŋi-aŋi rō ꞌana ꞌe e kī rō ꞌana: te ao nei taꞌe he kāiŋa mau o rāua. 14Te nuꞌu kī era pē ira e haka ꞌite mai ꞌana ko te kimi ko te oho iŋa ꞌana i te kāiŋa mo rāua. 15ꞌĀhani e manaꞌu rō ꞌā: te rāua kāiŋa mau he kona era mai ira i eꞌa ai, e ko taꞌe hoki ia ki ira. 16Te meꞌe haŋa mau o rāua he kāiŋa ꞌata riva-riva, te auraꞌa, he kāiŋa era ꞌi te raŋi. ꞌO ira te ꞌAtua e taꞌe haꞌamā ena mo kī he ꞌAtua a ia o rāua; ko haka riva-riva ꞌana, paꞌi, e ia i te kona mo rāua mo noho.
17He haka moe o ꞌAparahama i te manaꞌu ꞌi ruŋa i te ꞌAtua i maꞌu ai i tāꞌana poki ko Itaꞌata mo vaꞌai pa he tūtia hora haka ꞌatu era i a ia e te ꞌAtua. Te haŋa o ꞌAparahama he haka tano i te meꞌe uŋa era mo aŋa, ka ai atu e tahi mau nō ꞌāꞌana poki ꞌe ko hōrea ꞌana e te ꞌAtua: 18«Hai Itaꞌata ka ai ena tuꞌu hakaara». 19He ꞌite o ꞌAparahama e ko taꞌe haka tano e te ꞌAtua i tāꞌana meꞌe kī, ꞌe i te ꞌAtua te pūai mo haka ora i te taŋata mai te mate, i aŋa ai i te meꞌe kī era e te ꞌAtua. Mōꞌona, paꞌi, he ravaꞌa haka ꞌou e ia i rā poki era ꞌāꞌana mai te mate.
20He haka moe o Itaꞌata i te manaꞌu ꞌi ruŋa i te ꞌAtua i haꞌamaitai ai i a ⌊Hākovo⌋ ararua ko ⌊Etaū⌋, he ŋā poki ꞌāꞌana, ꞌo te ꞌite: pe muꞌa ka oho ena e ai rō te meꞌe riva-riva o te ꞌAtua mo rāua.
21He haka moe o Hākovo i te manaꞌu ꞌi ruŋa i te ꞌAtua, hora oho era mo mate, e toŋa rō ꞌana hai toko-toko, i haꞌamaitai ai i te ŋā poki ꞌa ⌊Kōsē⌋ ꞌe i haꞌamuri ai ki te ꞌAtua.
22He haka moe o Kōsē i te manaꞌu ꞌi ruŋa i te ꞌAtua i haka ꞌite ai ki te itaraera, ꞌi te hora era he mate, e eꞌa rō a rāua pe muꞌa ka oho ena mai te henua era ko Ehipto, ꞌe he aha te rāua meꞌe mo aŋa ki tōꞌona hakari.
23He haka moe i te manaꞌu ꞌi ruŋa i te ꞌAtua te ŋā matuꞌa era o ⌊Mōtē⌋, ka ai atu ko kī ꞌā e te ꞌariki: te ŋā poki tane itaraera taꞌatoꞌa e tiŋaꞌi e haka mate, i naꞌa nō e toru ꞌāvaꞌe i te poki nehe-nehe poreko iho era o rāua ko Mōtē.
24He haka moe o Mōtē i te manaꞌu ꞌi ruŋa i te ꞌAtua i taꞌe haŋa haka ꞌou ai, ko paꞌari ꞌā, mo kī: he poki a ia o te poki vahine o te ꞌariki. 25ꞌAta hau rō atu, paꞌi, te haŋa mo tōtōā i a ia e te ehipto ꞌi muri i tōꞌona taŋata he itaraera ki te noho ki te oho e koa rō ꞌā ꞌi roto i te hara. 26Tōꞌona manaꞌu: i hau rō atu mōꞌona te ꞌamo i te ꞌati topa ꞌi ruŋa i te nuꞌu ŋatu i te haŋu ki te ⌊Mētia⌋ mo uŋa mai e te ꞌAtua ki te ai i a ia te hauhaꞌa o Ehipto; a ia, paꞌi, e tiaki ꞌana ki te meꞌe hopeꞌa o te riva-riva mo vaꞌai e te ꞌAtua.
27He haka moe o Mōtē i te manaꞌu ꞌi ruŋa i te ꞌAtua i eꞌa i oho ai mai te henua era ko Ehipto ꞌina kai riꞌa-riꞌa ꞌo riri te ꞌariki. He oho mau rō ꞌai ꞌe ꞌina kai hārui haka ꞌou a tuꞌa; e tuꞌu rō ꞌā pa he meꞌe ena ē: tōꞌona mata ꞌi ruŋa i te ꞌAtua ꞌā. 28He haka moe o Mōtē i te manaꞌu ꞌi ruŋa i te ꞌAtua i aŋa ai i te ⌊ŋoŋoro o te Pakate⌋, pa he meꞌe kī e te ꞌAtua. He uŋa he haka paru hai toto i te ꞌōpani o te hare o te hakaara taꞌatoꞌa o ⌊Itaraera⌋, mo vari roa-roa o te merahi o te mate, ꞌo tiŋaꞌi i te ŋā poki ꞌatariki tane o te itaraera hora tiŋaꞌi era i te ŋā poki ꞌatariki tane o te ehipto.
29He haka moe i te manaꞌu ꞌi ruŋa i te ꞌAtua i haꞌere i oho ai te itaraera a vāeŋa tini o Vaikava Mea-mea ki te rua pāꞌiŋa pa he meꞌe: e haꞌere ꞌana a te ara paka-paka hora ꞌāvahi era e te ꞌAtua i te vaikava. ꞌE i oho era te ehipto ꞌi tuꞌa, he emu tahi rō atu ꞌai.
30He haka moe o te itaraera i te manaꞌu ꞌi ruŋa i te ꞌAtua i haka teka i haka vari ai e hitu mahana a te kona era ko Herikō, ꞌe he marua tahi rō ꞌai te ꞌāua ruŋa nui puru o ira.
31He haka moe i te manaꞌu ꞌi ruŋa i te ꞌAtua te taiꞌo era ko Rāhava i taꞌe mate ai ꞌi muri i te nuꞌu taꞌatoꞌa o Herikō taꞌe haꞌatura ki te ꞌAtua, ꞌo te hāꞌūꞌū ki te ŋāŋata itaraera oho piko uꞌi i rā kona.
32¿He aha tāꞌaku meꞌe haka ꞌou mo kī atu? ꞌIna he hora mo ꞌaꞌamu tahi atu o ruŋa i a Kereone,11.32 A Kereone he pūꞌoko haka tere e tahi o te itaraera ꞌi muꞌa ꞌā. I haka moe rō i tōꞌona manaꞌu ꞌi ruŋa i te ꞌAtua ꞌe i ani rō mo haka ꞌite ki a ia he aha te meꞌe tano mo aŋa. ꞌI te hora oho ꞌi muꞌa o te vaꞌehau ki te tamaꞌi, ka ai atu nuꞌu taꞌe rahi a rāua, i rē nō ꞌi te hāꞌūꞌū o te ꞌAtua. o Vāraka,11.32 A Vāraka he pūꞌoko haka tere haka ꞌou e tahi o te itaraera o te noho iŋa tuai era. I tamaꞌi era ki te nuꞌu taꞌe haŋa ki a rāua, ko ia te meꞌe oho ꞌi muꞌa ꞌe he rē ki rā nuꞌu hai hāꞌūꞌū o te ꞌAtua. o Tamatona,11.32 A Tamatona i ai takoꞌa rō he pūꞌoko haka tere o te itaraera o muꞌa ꞌā. I haka ai rō e te ꞌAtua he taŋata hopeꞌa o te haŋu. o Hefetē,11.32 A Hefetē he vaꞌehau ꞌaito e tahi ꞌe he pūꞌoko haka tere o te itaraera ꞌi muꞌa ꞌā. o ⌊Tāvita⌋, o ⌊Tamuere⌋ ꞌe o te perofeta taꞌatoꞌa. 33He haka moe i te manaꞌu ꞌi ruŋa i te ꞌAtua te ŋā nuꞌu nei ꞌe te tētahi atu i rē ai i te tamaꞌi ꞌe i ravaꞌa henua ai, i haka tere ai i te taŋata hai tī-tika, i ai ai i a rāua te meꞌe hōrea e te ꞌAtua, i puru ai i te haha o te reone, 34i tiŋaꞌi ai i te ahi taparahi-taꞌata, i taꞌe mate ai ꞌi te hoe, i ai ai te pūai ka ai atu ꞌina he haŋu o rāua, i riro ai he ꞌaito o te tamaꞌi ꞌe i rē ai ki te vaꞌehau o te rua henua.
35He haka moe i te manaꞌu ꞌi ruŋa i te ꞌAtua te tētahi ŋā viꞌe i ravaꞌa haka ꞌou ai i te rāua huaꞌai mai te mate ꞌe te tētahi nuꞌu i mā-mate ai i tōtōā he taꞌe haŋa mo hārui i te ꞌAtua hai tuaꞌivi ꞌi te tiaki ki te noho iŋa riva-riva ꞌi te raŋi ki ora haka ꞌou rāua mai te mate.
36Tētahi atu i haka meꞌe-meꞌe ꞌe i tiŋaꞌi hai ꞌuaka, ꞌe ꞌātā i here-here hai vivi ꞌe i puru ꞌi roto i te hare maꞌuꞌaurī. 37ꞌE tētahi i mate ai i tamaꞌi hai māꞌea, i hore hai hia-hia a vāeŋa ꞌe i ꞌo-ꞌoka hai hoe. Ki kona era ki e kona era i hāꞌere i oho ai e uru rō ꞌana i te kahu aŋa hai kiri o te māmoe ꞌe o te vato-vato. A rāua nuꞌu veve, ꞌamo i te ꞌati ꞌe tōtōā e te rua. 38A te kona taꞌatoꞌa nō i oho ai: a te kona ꞌone taꞌe noho taŋata ꞌe a ruŋa i te maꞌuŋa; ꞌe e noho era ꞌi roto i te ꞌana ꞌe ꞌi roto i te pū. Te parautiꞌa, te nuꞌu hara o te ao nei nuꞌu taꞌe tano mo hokorua i te nuꞌu tuꞌu pē nei.
39Ka ai atu te nuꞌu taꞌatoꞌa nei e tano rō ꞌana ki te mata o te ꞌAtua ꞌo te haka moe i te manaꞌu ꞌi ruŋa i a ia, kai takeꞌa i te haka tano iŋa o te ꞌAtua i tāꞌana meꞌe hōrea era i mā-mate rō ai. 40I aŋa ai e te ꞌAtua pē ira he manaꞌu ki a tātou ꞌe ki te meꞌe ꞌata hau rō atu o te riva-riva: ꞌi te hora ka haka tano ena e ia i tāꞌana hōrea, te auraꞌa, ꞌi te hora ka maꞌu ena i tāꞌana nuꞌu ki te raŋi mo noho ꞌi muri i a ia, a tātou taꞌatoꞌa ananake ko rā ŋā nuꞌu.
12He ꞌite mo ꞌamo i te ꞌati hai pūai
1ꞌI te ꞌite o tātou e ai rō ꞌā meꞌe rahi nō atu nuꞌu ꞌi raꞌe ki a tātou ⌊haka moe i te manaꞌu⌋ ꞌi ruŋa i te ꞌAtua ꞌātā ki te hopeꞌa, ꞌe a rāua pa he nuꞌu haka haŋu mai, e toꞌo mai ruŋa i a tātou te meꞌe paŋahaꞌa taꞌatoꞌa haka tu-tuki mai, ꞌe i te hara haka hihi-hihi mai mo tuꞌu o tātou ki te hopeꞌa o te ꞌāꞌati haka rē mai e te ꞌAtua, te auraꞌa, mo tuꞌu o tātou ki te roa haŋa e ia mo tātou.
2Te tātou mata a ruŋa i a Ietū ana uꞌi ꞌo te ai mai i a ia te haka moe iŋa nei o tātou i te manaꞌu ꞌi ruŋa i te ꞌAtua ꞌe ꞌāꞌana te haka tī-tika. A ia, paꞌi, i haꞌaoromaꞌi rō i tōꞌona mate ꞌi ruŋa i te tātaurō, ꞌe ꞌina kai tapa atu i te haꞌamā o te mate iŋa tuꞌu pē ira ꞌo te ꞌite ki oti te ꞌati he koa a ia. ꞌE hora nei, ko noho ꞌā ꞌi te pāꞌiŋa mataꞌu o te ꞌAtua.
3E haka topa te tātou manaꞌu pē hē a Ietū i haꞌaoromaꞌi ai i te meꞌe taꞌatoꞌa taꞌe tano aŋa e te nuꞌu hara ki a ia; ꞌo ira ꞌina kōrua ko rohi-rohi ꞌe ꞌina ko hōriŋa 4ꞌi te hora tōtōā atu e te nuꞌu hara. A kōrua, paꞌi, kai mate pē Ietū ꞌi te aŋa iŋa mo rē ki te hara. 5¿Ko rehu ko oti ꞌana ꞌō i a kōrua te meꞌe hatu atu ꞌi ruŋa i te ⌊Pāpaꞌi Moꞌa⌋ pē nei ē:
«E haka roŋo koe, e te poki ꞌāꞌaku ē,
ana haka tī-tika atu e te ꞌAtua,
ꞌe ꞌina koe ko hōriŋa ana ture atu.
6Te ꞌAtua, paꞌi, e haka tī-tika rō ꞌana i te kope haŋa e ia,
ꞌe e vaꞌai rō ꞌana ki te kope toꞌo mo poki ꞌāꞌana
i te ūtuꞌa tano mo tōꞌona taꞌe haꞌatura.»?
7E haꞌaoromaꞌi te ꞌati e ꞌamo mai ena e kōrua, he meꞌe mo haka tī-tika atu i a kōrua. Te ꞌAtua, paꞌi, e hāpaꞌo ena i a kōrua pa he ŋā poki ꞌāꞌana. ¿E ai mau rō ꞌana hō te matuꞌa taꞌe ture taꞌe haka tī-tika i tāꞌana ŋā poki? 8ꞌE mo taꞌe ture mo taꞌe haka tī-tika e te ꞌAtua i a kōrua, pa he haka tī-tika iŋa ena i tāꞌana ŋā poki taꞌatoꞌa, taꞌe ia kōrua he poki parautiꞌa ꞌāꞌana.
9E ŋā poki nō ꞌana a tātou, te matuꞌa o tātou o te ao nei e ture e haka tī-tika rō mai ꞌana, ꞌe he moꞌa e tātou. ¿He aha ia a tātou ana taꞌe haka rē mo haka tere mai i a tātou e te tātou Matuꞌa o te raŋi, ki riro ai te tātou noho iŋa noho iŋa riva-riva, haꞌamaitai e ia?
10Te matuꞌa o tātou o te ao nei, matahiti taꞌe rahi nō i ture i haka tī-tika mai ai i a tātou ki te rāua manaꞌu. ꞌE te ꞌAtua e ture e haka tī-tika mai ena mo te tātou riva-riva, mo riro o tātou pē ia ꞌā ꞌina e tahi hara. 11ꞌIna e tahi ūtuꞌa au ꞌi te hora o te haka ūtuꞌa; te meꞌe mo ŋaroꞌa e koe he mamae. Ka ai atu pē ira, mo ravaꞌa ōꞌou mo haka tī-tika i tuꞌu haka tere iŋa hai rā ūtuꞌa, he ravaꞌa ia e koe te noho iŋa tano ꞌi roto i te haumārū.
12ꞌO ira, ꞌina ko haka hōriŋa haka ꞌou ki te ꞌati e ꞌamo mai ena. Ka haka hio-hio ka oho te kōrua manaꞌu ꞌi ruŋa i te ꞌAtua 13ꞌe ka haꞌere ka oho a roto i te ara tī-tika, ki takeꞌa ai te kōrua haka tere iŋa e te taina taꞌe pūai o te rāua manaꞌu ꞌi ruŋa i te ꞌAtua, ꞌe ki haka hio-hio takoꞌa ai i te rāua haka moe iŋa i te manaꞌu ꞌi ruŋa i te ꞌAtua.
He hatu iŋa mo ꞌara riva-riva o te mata
14E uꞌi kōrua i te rāveꞌa mo noho hai haumārū ananake ko te taŋata taꞌatoꞌa ꞌe mo tano te kōrua noho iŋa ki te mata o te ꞌAtua. ꞌIna, paꞌi, e tahi kope taꞌe tano ki tōꞌona mata mo takeꞌa i a ia. 15E uꞌi takoꞌa ꞌo hārui e tahi o kōrua i te riva rahi o te ꞌAtua hai tuaꞌivi, ꞌo tuꞌu rō pa he tumu hua o te meꞌe maŋeo. Te kope pē ira he haka tupu i te manaꞌu taꞌe tano ꞌi roto i te tētahi nuꞌu. 16ꞌIna e tahi o kōrua mo moe i te viꞌe i te taŋata taꞌe he viꞌe ꞌo he kenu o kōrua ꞌe ꞌina e tahi mo taꞌe moꞌa i te meꞌe o te ꞌAtua pē ⌊Etaū⌋, kope hoꞌo i tōꞌona tōroꞌa ꞌatariki ki te mareti kai. 17Ko ꞌite ꞌana a kōrua pē hē i hopeꞌa ai rā meꞌe. I haŋa era a Etaū mo vaꞌai e tōꞌona matuꞌa tane i te haꞌamaitai o te ꞌatariki, ka ai atu i taŋi rahi rō, kai ravaꞌa i rā meꞌe haŋa era e ia; ꞌina, paꞌi, he rāveꞌa toe mo haka hoki i te meꞌe a tuꞌa.
18E te taina, kai hāhine tātou ki te ꞌAtua pa he itaraera ꞌi muꞌa ꞌā. I hāhine ai a rāua ki a ia hai meꞌe e takeꞌa rō ꞌā, he maꞌuŋa era ko Tinaī, e ura rō ꞌā ꞌi te ahi, e pōhāhā rō ꞌā, ꞌe e hu-hū rō ꞌā ꞌi te tokerau. 19ꞌE kai ŋaroꞌa e tātou i te puhi iŋa o te koneta ꞌe i te reꞌo o te ꞌAtua pē rāua. I ŋaroꞌa era e te itaraera i rā reꞌo, he ani ki a ⌊Mōtē⌋ mo taꞌe vānaŋa haka ꞌou o te ꞌAtua ki a rāua, 20he riꞌa-riꞌa ꞌi rā reꞌo ꞌe he riꞌa-riꞌa takoꞌa ꞌi te roŋo kī era ki a rāua pē nei ē: «Meꞌe nō era mo eke ki ruŋa i te maꞌuŋa e tiŋaꞌi e haka mate hai māꞌea ka ai atu he taŋata ꞌo he ꞌanimare». 21ꞌI te taparahi-taꞌata o te meꞌe ŋaroꞌa ꞌe takeꞌa era e rāua, he riꞌa-riꞌa tahi rō atu ꞌai, ꞌe ꞌātā i kī rō e Mōtē: «Ko rurū ꞌana a au ꞌi te riꞌa-riꞌa».
22ꞌE te tātou haka hāhine ki te ꞌAtua ora, e te taina ē, taꞌe pē ira. E hāhine nei tātou ki a ia e tuꞌu rō ꞌana pa he meꞌe: ko uru tī-tika ꞌā a tātou ki muꞌa ōꞌona ꞌi te maꞌuŋa era ko ⌊Tione⌋ ꞌi Hērutarema o te raŋi, he kona ꞌi ira e taka-taka ena meꞌe rahi nō atu merahi e koa rō ꞌā, 23ꞌe te nuꞌu taꞌatoꞌa haka moe i te manaꞌu ꞌi ruŋa i a Ietū, nuꞌu i a rāua te tōroꞌa o te ŋā poki ꞌatariki ꞌe te rāua ꞌīŋoa ko pāpaꞌi ꞌana ꞌi ruŋa i te raŋi, ꞌe he kona ꞌi ira a tātou e piri nei ki te ꞌAtua, kope ꞌāꞌana te ture i te taꞌatoꞌa; ki te vārua o te nuꞌu mā-mate ko haka tano ko oti ꞌā ki te mata o te ꞌAtua; 24ki a Ietū, kope ꞌāꞌana te haka riva-riva i te taŋata ki te ꞌAtua ꞌi te haka tere iŋa ꞌāpī nei ꞌāꞌana ananake ko te taŋata; ꞌe ki te toto haka maꞌitaki i a tātou, he toto ꞌata hau rō atu ki te toto o ⌊ꞌĀvere⌋, toto ani era ki te ꞌati kōpeka.
25E te taina, e uꞌi kōrua ꞌo taꞌe haka roŋo rō ki te vānaŋa o te ꞌAtua. Te nuꞌu o muꞌa ꞌā hārui hai tuaꞌivi ki tāꞌana vānaŋa haka ꞌite e Mōtē ꞌi te ao nei ꞌina kai taꞌe haka ūtuꞌa e te ꞌAtua. Pē ira ka topa ena ki a tātou mo taꞌe haka roŋo ki te kope ꞌāꞌana te vānaŋa mai mai te raŋi. 26ꞌI te noho iŋa era o Mōtē i haka rurū rō te henua e te reꞌo o te ꞌAtua. ꞌE hora nei, ko kī ꞌā e ia: «He haka rurū haka ꞌou e au i te henua ꞌe pē ira takoꞌa ꞌana te raŋi». 27Te auraꞌa o tāꞌana vānaŋa kī era «he haka rurū haka ꞌou»: he haka kore i te meꞌe taꞌatoꞌa aŋa e ia o te ao nei, ki noho ai te meꞌe mau era o te raŋi, he meꞌe mo taꞌe ŋaro ki te hora hopeꞌa. 28ꞌO ira, ki māuru-uru tātou ki te ꞌAtua ꞌo te ai o tātou ꞌi roto i te nūnaꞌa taŋata haka tere e ia, he meꞌe e ko ŋaro ki te hora hopeꞌa, ꞌe ki haꞌamuri tātou ki a ia hai māhatu ꞌe hai moꞌa, pa he meꞌe haŋa e ia. 29ꞌIna ko rehu i a kōrua: te tātou ꞌAtua pa he ahi haka kore tahi i te meꞌe taꞌe tano.
13He huru tano o te ⌊kiritiano⌋
1A kōrua he taina ⌊haka moe i te manaꞌu⌋ ꞌi ruŋa i a Ietū. ꞌO ira, e haŋa e oho nō kōrua ꞌi roto i a kōrua ꞌā. 2Nuꞌu nō era mo tuꞌu atu ki te kōrua hare e hāpaꞌo riva-riva, koiꞌite he merahi te meꞌe ka tuꞌu atu ena, pa he meꞌe i topa ki te tētahi nuꞌu.
3ꞌIna ko rehu i a kōrua mo hāꞌūꞌū i te taina puru ꞌi roto i te hare maꞌuꞌaurī. E hāpaꞌo kōrua i a rāua pa he meꞌe haŋa o kōrua mo hāpaꞌo atu e te rua i a kōrua. Pē ira takoꞌa i te nuꞌu tōtōā; e tano nō, paꞌi, mo topa takoꞌa atu te ꞌati era ki a kōrua.
4Te ⌊hāipo-ipo⌋ he meꞌe mo moꞌa e te taꞌatoꞌa. Te nuꞌu hāipo-ipo e ꞌite mo moꞌa i te rāua hāipo-ipo ꞌe mo hāpaꞌo i te rāua hakari mo rāua ꞌā. Te ꞌAtua, paꞌi, e haka ūtuꞌa rō i te nuꞌu moe i te viꞌe i te taŋata taꞌe he viꞌe taꞌe he kenu ꞌāꞌana ꞌe i te nuꞌu taiꞌata.
5ꞌIna kōrua ko haŋa rahi ki te moni; e koa mo te meꞌe ai o kōrua. I kī rō, paꞌi, e te ꞌAtua:
«ꞌIna a au e ko haka rē i a kōrua ki te hora hopeꞌa».
6ꞌO ira e tano nō tātou mo kī:
«O te ꞌAtua te hāꞌūꞌū mai.
¿He aha ia ana riꞌa-riꞌa ꞌi te meꞌe mo aŋa mai e te taŋata?».
7E manaꞌu ki te kōrua pūꞌoko haka tere o muꞌa ꞌā haka ꞌite atu i te vānaŋa o te ꞌAtua. E haka topa te manaꞌu ki te meꞌe riva-riva taꞌatoꞌa poreko o te rāua noho iŋa tano, ꞌe ꞌai kōrua ka haka moe ka oho nō i te manaꞌu ꞌi ruŋa i te ꞌAtua pē rāua.
8E te taina, ko tū manaꞌu ꞌā te manaꞌu o Ietū Kiritō ꞌi muꞌa ꞌā, ꞌi ꞌaŋarīnā ꞌe ki te hora hopeꞌa. 9ꞌO ira, ꞌina ko haka roŋo ꞌe ꞌina ko maꞌu i te hāpī kē, taꞌe he hāpī parautiꞌa haka ꞌite atu era. E haka pūai e oho te tātou māhatu hai riva rahi o te ꞌAtua, ꞌe taꞌe ꞌō hai haꞌatura o tātou ki te ⌊haka tere iŋa era ꞌa Mōtē⌋ o ruŋa i te kai, he meꞌe ꞌina e tahi hauhaꞌa mo te nuꞌu maꞌu i rā haka tere iŋa.
10Te haꞌamaitai o te ꞌAtua mo tātou mo te nuꞌu haka moe i te manaꞌu ꞌi ruŋa i a Ietū, ravaꞌa e Ietū mo tātou hai mate ōꞌona ꞌi ruŋa i te tātaurō, taꞌe mo te nuꞌu maꞌu oho nō i te haka tere iŋa era ꞌa Mōtē. 11ꞌI te ⌊haka tere iŋa raꞌe o te ꞌAtua ananake ko te taŋata⌋ te ⌊oromatuꞌa hopeꞌa o te ra-rahi⌋ e maꞌu ena i te toto o te ꞌanimare ki roto i te ⌊Kona ꞌAta Moꞌa⌋, ki haka kore ai e te ꞌAtua i te rāua hara, ꞌe te hakari o rā ŋā ꞌanimare tūtia era e tutu ena ꞌi haho o te rāua kona noho pa he haꞌaauraꞌa pē nei ē: te ūtuꞌa o te hara ꞌi ruŋa o rā ŋā ꞌanimare. 12ꞌI te ⌊haka tere iŋa ꞌāpī o te ꞌAtua ananake ko te taŋata⌋ e ai rō ꞌā te meꞌe tuꞌu pē ira. A Ietū, paꞌi, i mate ai ꞌi haho o Hērutarema, ꞌi ruŋa i a ia te ūtuꞌa o te ꞌAtua mo te hara o te taŋata, mo haka riro i a rāua he nuꞌu haꞌataꞌa ꞌe ꞌina e tahi hara mo te ꞌAtua hai toto mau era ꞌā ōꞌona.
13ꞌO ira, e te taina ē, ki eꞌa tātou ki haho ki a Ietū ki ꞌamo takoꞌa i te haꞌamā ꞌamo e ia, te auraꞌa: ꞌina tātou ko maꞌu haka ꞌou i te meꞌe o te haka tere iŋa raꞌe era o te ꞌAtua ananake ko te taŋata. Ki haka moe ki oho nō tātou i te manaꞌu ꞌi ruŋa i a Ietū, nōatu te nuꞌu taꞌe haka au mai i a tātou ꞌo te peꞌe ki a ia. 14Te ao nei, paꞌi, taꞌe he kāiŋa mau o tātou; e tiaki nō ꞌana a tātou ki te kāiŋa ꞌi te raŋi pe muꞌa ka oho ena. 15Te meꞌe mo aŋa mo oho nō o tātou hai Ietū Kiritō he haꞌahana-hana ꞌe he māuru-uru ki te ꞌAtua. Te haꞌahana-hana nei he tūtia tano mo vaꞌai ki a ia e te nuꞌu kī: a Ietū he Pūꞌoko Haka Tere o rāua. 16ꞌE ꞌina ko rehu mo aŋa i te meꞌe riva-riva ꞌe mo vaꞌai takoꞌa ki te rua o te meꞌe ai o kōrua. Te ŋā meꞌe nei he tūtia haŋa takoꞌa o te ꞌAtua.
17E haꞌatura ki te pūꞌoko haka tere o kōrua o te nuꞌu haka moe i te manaꞌu ꞌi ruŋa i a Ietū. E haka rē mo rāua e haka tere atu. O rāua, paꞌi, te hāpaꞌo i a kōrua pa he nuꞌu ꞌite: pe muꞌa ka oho ena he haka ꞌite e rāua ki te ꞌAtua pē hē i aŋa ai i te rāua aŋa. Mo haka rē o kōrua i a rāua mo haka tere atu, he koa ꞌi te rāua aŋa ꞌe e ko ai he meꞌe paŋahaꞌa e tahi mo ꞌamo. ꞌE mo taꞌe aŋa o kōrua pē ira, e ko ai ia mo te kōrua riva-riva.
18E te taina, e pure kōrua mo mātou. E ꞌite riva-riva rō ꞌana a mātou ꞌina e tahi mātou meꞌe taꞌe tano i aŋa ꞌo te ai te meꞌe haŋa nō o mātou mo aŋa he meꞌe riva-riva. 19He no-noꞌi atu a au mo pure mai mōꞌoku, mo haꞌatiꞌa mai e te ꞌAtua mo hoki hōrou atu ōꞌoku ki muri i a kōrua.
He haꞌamaitai ꞌe he ꞌaroha
20Mo te ꞌAtua vaꞌai i te haumārū, haka ora mai te mate i te tātou Pūꞌoko Haka Tere ko Ietū Kiritō, kope riva-riva hāpaꞌo māmoe, tāpaꞌo i te haka tere iŋa ꞌina he hopeꞌa raꞌa o te ꞌAtua ananake ko te taŋata hai toto era ōꞌona, 21e haka riro i a kōrua he taŋata riva, tano i te meꞌe taꞌatoꞌa, mo aŋa i tāꞌana meꞌe haŋa. ꞌE māꞌana takoꞌa e aŋa ꞌi ruŋa i a tātou tāꞌana meꞌe nō era i haŋa hai Ietū Kiritō. ¡Ki haꞌahana-hana tātou ki a Ietū Kiritō ꞌātā ki te hopeꞌa raꞌa! Ka ai pē ira.
22E te taina, he ani atu au mo haka roŋo riva-riva kōrua ki tāꞌaku meꞌe ꞌiti-ꞌiti pāpaꞌi atu ena mo haka pūai i te kōrua manaꞌu ꞌi ruŋa i te ꞌAtua. 23Mo ꞌite o kōrua: te tātou taina ko Timoteo ko eꞌa ꞌana mai roto i te hare maꞌuꞌaurī. Mo hōrou ōꞌona mo tuꞌu mai, he maꞌu atu e au ꞌi te hora ōꞌoku ka oho atu ena uꞌi i a kōrua.
24E ꞌaroha atu kōrua ki te kōrua pūꞌoko haka tere ꞌe ki te nuꞌu taꞌatoꞌa haka moe i te manaꞌu ꞌi ruŋa i a Ietū. Te ŋā taina era o ꞌĪtāria ko ꞌaroha mai ꞌana mo kōrua.
25Ka ai te riva rahi o te ꞌAtua ꞌi ruŋa i a kōrua taꞌatoꞌa.