He parau pāpaꞌi e Pauro ki te taina o
Karatia
Te parau nei ꞌa Pauro mo te nuꞌu ⌊haka moe i te manaꞌu⌋ ꞌi ruŋa i a Ietū o te kona taꞌatoꞌa o Karatia. E vānaŋa ꞌana o ruŋa o te eꞌa iŋa o te ⌊kiritiano⌋ mai te pūai o te hara ꞌe o te haka rē iŋa i te manaꞌu pē nei ē: hai haꞌatura ki te ⌊haka tere iŋa ꞌa Mōtē⌋ he tano ki te mata o te ꞌAtua.
I haka ꞌite ai a Pauro i te parau ꞌāpī riva-riva o ruŋa i a Ietū Kiritō ꞌi te kona taꞌatoꞌa o Karatia ꞌi te rua ara oho ōꞌona haka ꞌite ki te nuꞌu i te roŋo o te ꞌAtua (Aŋa o te ꞌĀpōtoro 16.6). Meꞌe rahi nō atu nuꞌu o Karatia i haka moe i te rāua manaꞌu ꞌi ruŋa i a Ietū, ꞌe i toꞌo mo pūꞌoko haka tere o rāua. Te meꞌe nō, i tuꞌu rō ki rā ŋā kona te tētahi atu nuꞌu kī he kiritiano a rāua ꞌe he hāpī ki te taina o rā ŋā kona pē nei ē: mo tano ki te mata o te ꞌAtua, e ꞌāmui ki te haka moe iŋa o te manaꞌu ꞌi ruŋa i a Ietū te haꞌatura ki te haka tere iŋa ꞌa Mōtē (1.6–9). He ture e Pauro ꞌo te haka tapa mai te hāpī parautiꞌa hāpī e ia (3.1–5).
He haka aŋi-aŋi e Pauro ki te taina o Karatia pē hē te haka tere iŋa tano o te taŋata haka moe i te manaꞌu ꞌi ruŋa i a Ietū hai ꞌaꞌamu ꞌiti-ꞌiti o ruŋa i te hōrea aŋa e te ꞌAtua ki a ⌊ꞌAparahama⌋, ꞌe pē hē a ꞌAparahama i haka moe ai i tōꞌona manaꞌu ꞌi ruŋa i te ꞌAtua. I oti era he haka ꞌite e Pauro: te haka tere iŋa ꞌa Mōtē taꞌe he meꞌe rake-rake, he meꞌe riva-riva. Ka ai atu pē ira, i vaꞌai mai ai e te ꞌAtua i rā haka tere iŋa taꞌe mo haka tano i a tātou ki tōꞌona mata, mo te meꞌe kē (3.21): mo maꞌori hāpī haka tika i te tātou manaꞌu ki a Ietū mo haka moe o tātou i te manaꞌu ꞌi ruŋa i a ia (3.24). Te kī ꞌa Pauro: mo te ꞌAtua, a tātou, te nuꞌu taꞌatoꞌa ꞌa Ietū Kiritō, pē tū hauhaꞌa tahi ꞌā, ka viꞌe ka taŋata, ka ⌊hūrio⌋ ka ⌊kirieko⌋, ka ꞌekaravo ꞌo ka taꞌe ꞌekaravo (3.28), ꞌe te haka tere iŋa era ꞌa Mōtē taꞌe toe he meꞌe haꞌataꞌa i a tātou.
Te kī takoꞌa ꞌa Pauro: te taꞌe ai haka ꞌou o tātou he ꞌekaravo o te haka tere iŋa era ꞌa Mōtē taꞌe he ꞌōtohe mo aŋa i te meꞌe taꞌe tano pohe nō e te hakari (5.13). Te meꞌe mo aŋa he haka rē i a tātou mo haka tere e te ⌊Vārua Maitai⌋. Ki oti he haka aŋi-aŋi mai e Pauro i te huru o te kiritiano parautiꞌa (5.22–24), ꞌe he kī mai: te tātou noho iŋa ꞌāpī nei o te Vārua Maitai i vaꞌai mai. ꞌO ira, ki haka rē i a tātou māꞌana e haka tika mai (5.25).
1He ꞌaroha
1A au, a Pauro, haꞌataꞌa mo te aŋa he ꞌāpōtoro, tōroꞌa taꞌe o te taŋata i vaꞌai mai, ꞌa Ietū Kiritō, ꞌe o te ꞌAtua Matuꞌa haka ora i a ia mai te mate, 2he ꞌaroha atu mātou ananake ko te taina taꞌatoꞌa o nei ki a kōrua ki te nuꞌu taꞌatoꞌa ⌊haka moe i te manaꞌu⌋ ꞌi ruŋa i a Ietū o Karatia. 3Ka ai ꞌi ruŋa i a kōrua te riva rahi ꞌe te haumārū o te ꞌAtua Matuꞌa ꞌe o Ietū Kiritō, he Pūꞌoko Haka Tere o tātou.
4A Ietū i vaꞌai ai i a ia mo mate mo haka kore e te ꞌAtua i te tātou hara ꞌe mo haka eꞌa i a tātou mai roto i te noho iŋa taꞌe tano o te ao, ꞌi te meꞌe era ko haŋa ꞌā e te ꞌAtua, Matuꞌa o tātou. 5¡Ki haꞌahana-hana tātou ki a ia ꞌātā ki te hopeꞌa raꞌa! ⌊ꞌĀmene⌋.
He māere iŋa o Pauro ꞌi te nuꞌu o Karatia
6Ko māere riva-riva ꞌana a au ꞌi te hōrou o kōrua mo hārui hai tuaꞌivi i te ꞌAtua ꞌe i tāꞌana hāpī parautiꞌa. O te ꞌAtua, paꞌi, i haꞌataꞌa i a kōrua māꞌana hai riva rahi mau nō o te ⌊Kiritō⌋, mo eꞌa o kōrua mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa. ꞌE nā kōrua e haka roŋo mai ena ki te hāpī kē manaꞌu e kōrua he ⌊roŋo riva-riva o te ꞌAtua⌋. 7ꞌE te parautiꞌa, ꞌina he rua roŋo riva-riva o te ꞌAtua. Te meꞌe nō, e ai rō ꞌana te nuꞌu nā e haka mira-mira ꞌana i te kōrua manaꞌu. E haŋa ꞌā mo haka poteko i te ⌊roŋo riva-riva o ruŋa i a Ietū⌋. 8ꞌĪ a au he kī atu: ka ai atu ko mātou mau nei ꞌā ꞌo he merahi e tahi o te raŋi hāpī atu i te rua meꞌe, taꞌe he roŋo riva-riva hāpī atu era e mātou ꞌi muꞌa ꞌā, ka topa ꞌi ruŋa te ūtuꞌa o te ꞌAtua. 9Ko kī atu era ꞌā e mātou i te meꞌe nei ꞌe ꞌī e au he kī haka ꞌou atu: mo ai o te kope haka ꞌite atu i te rua roŋo, taꞌe he roŋo riva-riva hāpī atu era e mātou, ka topa ꞌi ruŋa i a ia te ūtuꞌa o te ꞌAtua.
Mai i a Ietū i ꞌite ai a Pauro i te roŋo o te ꞌAtua
10Ki te kōrua manaꞌu, ¿e aŋa nei a au mo koa o te taŋata ꞌo mo koa o te ꞌAtua? ꞌĀhani mo koa o te taŋata, taꞌe ia a au he tāvini o te Kiritō.
11E ꞌite kōrua, e te taina ē: te roŋo riva-riva o te ꞌAtua haka ꞌite e au taꞌe he meꞌe poreko mai te manaꞌu taŋata. 12ꞌE taꞌe o te taŋata i hāpī mai; a Ietū Kiritō mau ꞌā i haka ꞌite mai.
13Ko ŋaroꞌa ꞌana e kōrua o ruŋa i tāꞌaku meꞌe aŋa ꞌi muꞌa ꞌā, pē hē a au e tute era mo tōtōā i te nuꞌu haka moe i te manaꞌu ꞌi ruŋa i a Ietū hora era ōꞌoku e maꞌu nō ꞌana i te haka tere iŋa hūrio. Te manaꞌu ōꞌoku ꞌi rā hora mo haka kore i a rāua. 14ꞌI rā noho iŋa, i hau rō atu a au ꞌi te haka kē ki te tētahi nuꞌu o tōꞌoku taŋa mo maꞌu i te hāpī haka rē mai e te mātou tupuna. 15-16ꞌE, ka ai atu i tute rō a au mo tōtōā i te nuꞌu haka moe i te manaꞌu ꞌi ruŋa i a Ietū, te ꞌAtua, kai poreko hia ꞌana a au, i haꞌataꞌa rō ai i a au māꞌana ꞌe, hai riva rahi ōꞌona, i haka ꞌite mai ai ko ai a Ietū, mo haka moe ōꞌoku i te manaꞌu ꞌi ruŋa i a ia. Te haŋa ōꞌona: mo haka ꞌite mo oho ōꞌoku i te roŋo riva-riva o ruŋa i a Ietū ki te nuꞌu taꞌe he hūrio. Hora topa mai era o te meꞌe nei, ꞌina a au kai oho kai kimi e tahi kope mo haka ꞌite mai o ruŋa i te roŋo o te ꞌAtua, 17ꞌe ꞌina takoꞌa a au kai oho ki Hērutarema kai ꞌui ki te nuꞌu era ko rāua te ꞌāpōtoro raꞌe ki a au. Te meꞌe raꞌe ꞌāꞌaku i aŋa, he oho a au ki te henua era ko Aravia, ꞌe i tano era tōꞌoku hora ꞌi ira, he eꞌa a au he hoki ki Rāmako.
He māhani iŋa o Pauro ki a Pētero
18Ka toru matahiti mai te hora haka moe ōꞌoku i te manaꞌu ꞌi ruŋa i a Ietū i oho iho ai a au ki Hērutarema mo māhani ki a Pētero, ꞌe e hoꞌe ꞌahuru mā pae mahana i noho ai a au ꞌi muri i a ia. 19ꞌIna he rua ꞌāpōtoro i takeꞌa e au; te kope haka ꞌou nō ꞌāꞌaku i māhani ko Tanatiako, taina o Ietū. 20ꞌE ꞌī a au he kī atu ꞌi muꞌa i te ꞌAtua: te meꞌe taꞌatoꞌa nei e au e pāpaꞌi atu ena he parautiꞌa.
21Mai ira a au i oho ai ki te ŋā kona era o Tīria ꞌe o Tiritia. 22Te taina haka moe i te manaꞌu ꞌi ruŋa i a Ietū o Hūrea kai takeꞌa hia ꞌana i a au. 23Te meꞌe nō o rāua i ŋaroꞌa o ruŋa i a au: «Te kope tute era i a tātou mo tōtōā hora nei e haka ꞌite e oho ꞌā i te roŋo riva-riva o te ꞌAtua, roŋo haŋa era e ia mo haka kore ꞌi muꞌa ꞌā». 24ꞌE ꞌi te parau ꞌāpī era o ruŋa i a au, i haꞌahana-hana ai rā nuꞌu ki te ꞌAtua.
21E hoꞌe ꞌahuru mā maha matahiti mai te hora tuꞌu raꞌe era ōꞌoku ki Hērutarema i hoki haka ꞌou ai a au ki ira ararua māua ko Verenāvē. ꞌI muri i a māua i maꞌu takoꞌa ai i a Tito. 2I oho ai a au ꞌo te ai ko kī mai ꞌana e te ꞌAtua mo oho ōꞌoku. ꞌI ira i haka ꞌite ai a au ki te nuꞌu mau nō era ko rāua te pūꞌoko haka tere o te taina o Hērutarema o ruŋa i tāꞌaku roŋo hāpī ki te nuꞌu taꞌe he hūrio, mo aŋi-aŋi riva-riva e rāua: te meꞌe hāpī ꞌāꞌaku he parautiꞌa, ꞌo taꞌe hauhaꞌa rō tāꞌaku aŋa ka hopeꞌa ena. 3He koa rō atu ꞌai, ꞌe ꞌina kai kī mai mo hore i te kiri o te kinoŋa o tōꞌoku hokorua ⌊kirieko⌋ nei ko Tito.
4Ka ai atu pē ira, i ai rō ꞌi ira te nuꞌu haka tuꞌu i a rāua pa he nuꞌu ⌊haka moe i te manaꞌu⌋ ꞌi ruŋa i a Ietū, te haŋa mo uꞌi hoki ko te maꞌu iŋa ꞌana a mātou i te ⌊haka tere iŋa ꞌa Mōtē⌋ ꞌe, mo taꞌe ai pē ira, mo haka ꞌamo haka ꞌou mai i rā haka tere iŋa. ꞌE te parautiꞌa, ꞌina he pūai toe o te haka tere iŋa ꞌa Mōtē ꞌi ruŋa i a tātou ꞌo te ai o tātou ꞌa Ietū Kiritō. 5ꞌIna a mātou kai haka roŋo ki te rāua manaꞌu, ꞌo taꞌe maꞌu haka ꞌou kōrua i te roŋo parautiꞌa o ruŋa i a Ietū hāpī atu era e mātou.
6Te nuꞌu era ko rāua te pūꞌoko haka tere o ira kai takeꞌa e tahi hape o tāꞌaku meꞌe hāpī. (ꞌE ꞌina a au he tapa atu hoki a rāua he nuꞌu ra-rahi. Te ꞌAtua, paꞌi, ꞌi te hora e uꞌi ena i te tano ꞌe i te taꞌe tano o te meꞌe aŋa e te taŋata, ꞌina he tapa atu hoki he taŋata ra-rahi ꞌo he taŋata taꞌe ra-rahi; mōꞌona pē tū huru tahi ꞌā te taŋata). 7Te meꞌe o rāua i aŋi-aŋi: o te ꞌAtua mau ꞌā i vaꞌai mai i te aŋa he haka ꞌite he oho i te ⌊roŋo riva-riva o ruŋa i a Ietū⌋ ki te nuꞌu taꞌe he hūrio, pa he vaꞌai iŋa era ꞌā ki a Pētero mo haka ꞌite mo oho i te roŋo nei ki te hūrio. 8O te ꞌAtua uŋa era i a Pētero pa he ⌊ꞌāpōtoro⌋ ki te ⌊hūrio⌋, i uŋa takoꞌa i a au pa he ꞌāpōtoro ki te nuꞌu taꞌe he hūrio.
9I aŋi-aŋi era e ⌊Tanatiako⌋, e Pētero ꞌe e ⌊Iovani⌋, pūꞌoko haka tere o te nuꞌu haka moe i te manaꞌu ꞌi ruŋa i a Ietū o Hērutarema pē nei ē: o te ꞌAtua mau ꞌana i vaꞌai mai, hai riva rahi ōꞌona, i te aŋa nei ki a au, he vaꞌai mai ia e kuā Pētero i te rāua rima mo haka takeꞌa mai ki a māua ko Verenāvē: a māua he hokorua takoꞌa o rāua ꞌi te aŋa o te ꞌAtua, ꞌe e tano rō ꞌana ki a rāua mo oho o māua mo aŋa ꞌi roto o te nuꞌu taꞌe he hūrio, ꞌe ko rāua mo haka ꞌite mo oho ki te nuꞌu hūrio. 10Te meꞌe mo taꞌe rehu nō i a māua i kī mai ai: mo hāꞌūꞌū ki te nuꞌu veve o Hērutarema, he meꞌe ko manaꞌu era ꞌana e au mo aŋa.
11ꞌI Antiokia a au i tuꞌu atu ai a Pētero, ꞌe ki tōꞌona ꞌāriŋa mau ꞌā e au i kī ai i te hape o tāꞌana meꞌe i aŋa. 12Te ŋā mahana raꞌe era ōꞌona ꞌi ira e kai era ananake ko te nuꞌu taina taꞌe he hūrio. ꞌE, i tuꞌu atu era te taina hūrio e maꞌu nō ꞌā ꞌi te haka tere iŋa ꞌa Mōtē uŋa atu e Tanatiako, he haꞌamata he haka topa kē i a ia; ꞌina kai haŋa haka ꞌou mo kai ꞌi muri i tū nuꞌu era, ꞌi te riꞌa-riꞌa ꞌo ture e tū nuꞌu hūrio era ꞌo te aŋa i te meꞌe ꞌina he tano ki te haka tere iŋa hūrio. 13ꞌE tētahi atu taina hūrio o Antiokia i peꞌe takoꞌa rō ki tū meꞌe aŋa era e Pētero, ꞌe ꞌātā ki a Verenāvē. 14ꞌO ira, i takeꞌa era e au ꞌina he tano tāꞌana meꞌe aŋa ki te parautiꞌa o te roŋo riva-riva o ruŋa i a Ietū, he kī e au ki a Pētero ꞌi muꞌa o te taina taꞌatoꞌa: «Mo ai e tano rō ꞌā mōꞌou, e te hūrio ē, mo noho pa he taŋata taꞌe he hūrio, ¿e tano rō ꞌana ia mo kī o tātou ki te nuꞌu taꞌe he hūrio mo haka tere i a rāua pa he hūrio?».
Pē hē e tano nei ki te mata o te ꞌAtua
15A mātou i poreko ai he hūrio, taꞌe ꞌō pē nei ē: «he nuꞌu hara taꞌe ꞌite ko ai te ꞌAtua parautiꞌa», pa he meꞌe manaꞌu e mātou ꞌi muꞌa ꞌā o ruŋa i te nuꞌu taꞌe he hūrio. 16Ka ai atu pē ira, e ꞌite rō ꞌana e tātou ꞌina e tahi kope mo tano ki te mata o te ꞌAtua hai haꞌatura ki te haka tere iŋa ꞌa Mōtē. Hai haka moe mau nō i te manaꞌu ꞌi ruŋa i a Ietū ana tano te taŋata ki te mata o te ꞌAtua. ꞌO ira a mātou, te hūrio, e haka moe ena i te manaꞌu ꞌi ruŋa i a Ietū, mo tano o mātou ki te mata o te ꞌAtua hai meꞌe nei ꞌe taꞌe ꞌō hai haꞌatura ki te haka tere iŋa ꞌa Mōtē. ꞌIna, paꞌi, e tahi taŋata mo tano ki a ia hai haꞌatura ki rā haka tere iŋa.
17Te meꞌe nō, ꞌi te kimi iŋa o mātou mo tano ki te mata o te ꞌAtua hai haka moe i te manaꞌu ꞌi ruŋa i a Ietū e kī ena e te tētahi nuꞌu hūrio pē nei ē: he nuꞌu hara a mātou ꞌo te taꞌe haꞌatura tahi i te haka tere iŋa ꞌa Mōtē. ¿Te kī hō, a Ietū te uŋa i te taŋata ki roto i te hara? Taꞌe pē ira. 18Te parautiꞌa, e hara ꞌana a au mo hoki haka ꞌou ōꞌoku ki te haka tere iŋa ꞌa Mōtē mo tano ki te mata o te ꞌAtua. 19I aŋi-aŋi era e au e ko ravaꞌa mo tano ki te mata o te ꞌAtua hai haꞌatura ki te haka tere iŋa ꞌa Mōtē, kai haka haŋu haka ꞌou ia a au a ruŋa i rā haka tere iŋa. ꞌE hora nei, mo te ꞌAtua mau nō a au e ora nei. I haka moe era a au i tōꞌoku manaꞌu ꞌi ruŋa i a Ietū, i tuꞌu rō pa he meꞌe ena ē: ko mate takoꞌa ꞌana a au ꞌi muri i a ia ꞌo te ai i mate ai a ia mōꞌoku. 20ꞌE hora nei, taꞌe ko au toe te meꞌe e ora atu ena, ko Ietū Kiritō te meꞌe e ora nei ꞌi roto i a au ꞌe e haka tere nei i a au ꞌi te ao nei. Te meꞌe nei e ai ena hai haka moe ōꞌoku i te manaꞌu ꞌi ruŋa i te Poki o te ꞌAtua haŋa mai ki a au ꞌe vaꞌai i a ia ki te mate mōꞌoku. 21Kai taꞌe haka hauhaꞌa a au i te riva rahi o te ꞌAtua pa he nuꞌu era. Mo ai rō, paꞌi, hai haꞌatura ki te haka tere iŋa ꞌa Mōtē e tano ena te taŋata ki te mata o te ꞌAtua, i mate tahaŋa nō ia a Ietū.
3¿Pē hē e ai ena te Vārua Maitai?
1E te taina pūꞌoko hio-hio o Karatia ē, ¿ꞌa ꞌai kōrua i haka maꞌa-maꞌa atu? ꞌI roto i te hāpī iŋa atu era o mātou i haka ꞌite riva-riva atu ai ki a kōrua he aha te meꞌe i ravaꞌa e Ietū mo tātou hora mate era ōꞌona ꞌi ruŋa i te tātaurō. 2Iā. ꞌĪ a au he ꞌui atu: ¿Te Vārua Maitai o roto i a kōrua hai haꞌatura ki te ⌊haka tere iŋa ꞌa Mōtē⌋ ꞌo hai haka moe i te manaꞌu ꞌi ruŋa i a Ietū? ¿Taꞌe ꞌō hai haka moe i te manaꞌu ꞌi ruŋa i a Ietū? 3ꞌE, mo ai pē ira, ¿ko te taꞌe aŋi-aŋi iŋa ꞌana e kōrua? ꞌIna ko rehu: hai pūai o te Vārua Maitai i haꞌamata ai kōrua a te ara o te ꞌAtua. ꞌE hora nei, ¿e haŋa ꞌana a kōrua mo tuꞌu ki te roa hopeꞌa o rā ara, te auraꞌa, ki te roa haŋa e te ꞌAtua mo kōrua, hai pūai mau nō o te taŋata? 4¿Ka kī ꞌō te meꞌe riva-riva taꞌatoꞌa topa atu era ki a kōrua mai te hora haka moe i te manaꞌu ꞌi ruŋa i a Ietū, ꞌina e tahi hauhaꞌa mo kōrua? ¡Pē hiva ꞌā ana taꞌe ai pē ira! 5Ka haka topa rā te kōrua manaꞌu he aha te ꞌAtua e vaꞌai atu ena i te Vārua Maitai ꞌe e aŋa ena i te mana ꞌi roto i a kōrua. ꞌO te haka moe o kōrua i te manaꞌu ꞌi ruŋa i a Ietū ꞌe ꞌi ruŋa i tāꞌana roŋo, taꞌe ꞌō ꞌo te haꞌatura ki te haka tere iŋa ꞌa Mōtē.
He haꞌaauraꞌa iŋa hai ꞌAparahama
6Ka haka topa rā te kōrua manaꞌu ki a ⌊ꞌAparahama⌋: i haka moe rō i te manaꞌu ꞌi ruŋa i te meꞌe kī e te ꞌAtua, ꞌe hai nei meꞌe i kī ai e te ꞌAtua e tano rō ꞌana ki tōꞌona mata. 7ꞌO ira, e ꞌite kōrua: te hakaara parautiꞌa o ꞌAparahama he nuꞌu haka moe i te rāua manaꞌu ꞌi ruŋa i te ꞌAtua. 8Ko manaꞌu era ꞌana, paꞌi, e te ꞌAtua, ꞌe ko haka ꞌite era ꞌā e ia ꞌi ruŋa i te ⌊Pāpaꞌi Moꞌa⌋ pē nei ē: mo haka moe o te nuꞌu taꞌe he hūrio i te rāua manaꞌu ꞌi ruŋa i a ia, e kī takoꞌa rō e te ꞌAtua mo rāua: he nuꞌu tano ki tōꞌona mata. Te parau ꞌāpī nei i haka ꞌite rō ki a ꞌAparahama ꞌi te hora kī era pē nei ē: «Hai koe ka haꞌamaitai nei e au i te taŋata taꞌatoꞌa o te ao». 9Pē ira te nuꞌu taꞌatoꞌa haka moe i te manaꞌu ꞌi ruŋa i a Ietū, he haꞌamaitai takoꞌa e te ꞌAtua pa he haꞌamaitai iŋa era ꞌā i a ꞌAparahama.
10Te nuꞌu manaꞌu: hai haꞌatura ki te haka tere iŋa ꞌa Mōtē he tano a rāua ki te mata o te ꞌAtua ko ai era ꞌā te ūtuꞌa mo rāua. E kī rō ꞌana, paꞌi, ꞌi ruŋa i te Pāpaꞌi Moꞌa: «Te kope taꞌe haꞌatura ki te roŋo taꞌatoꞌa o te haka tere iŋa ꞌa Mōtē, he haka ūtuꞌa e te ꞌAtua ꞌātā ki te hopeꞌa raꞌa». 11Hai meꞌe nei e ꞌite ena ꞌina e tahi taŋata mo tano ki te mata o te ꞌAtua hai haꞌatura ki te haka tere iŋa ꞌa Mōtē, ꞌi te meꞌe era e hāꞌaki rō ꞌana ꞌi ruŋa i te Pāpaꞌi Moꞌa pē nei ē: «Te kope kī e te ꞌAtua e tano rō ꞌana ki tōꞌona mata ꞌo te haka moe i te manaꞌu ꞌi ruŋa i a ia, he ravaꞌa i te ora ꞌāpī ꞌina he hopeꞌa raꞌa». 12ꞌE, mo ravaꞌa tāꞌue e te kope e tahi mo haꞌatura tahi i rā roŋo, i a ia takoꞌa ia te ora ꞌāpī ꞌina he hopeꞌa raꞌa, ka ai atu ꞌina he haka moe i te manaꞌu ꞌi ruŋa i te ꞌAtua. Nā, paꞌi, e kī rō ꞌana ꞌi ruŋa i te Pāpaꞌi Moꞌa: «Te kope haꞌatura ki te haka tere iŋa taꞌatoꞌa ꞌa Mōtē he ravaꞌa i te ora ꞌāpī ꞌina he hopeꞌa raꞌa».
13Te meꞌe nō, ko ꞌite ꞌā e tātou taꞌatoꞌa, ꞌina e tahi kope mo ravaꞌa i rā meꞌe. ꞌO ira ko tano riva-riva ꞌā mo ai ꞌi ruŋa i a tātou i te taŋata te ūtuꞌa kī e te ꞌAtua. ꞌE a Ietū i haka kore i te ūtuꞌa mai ruŋa i a tātou hai ꞌamo e ia i rā ūtuꞌa hora mate era ꞌi ruŋa i te tātaurō. E hāꞌaki rō ꞌana, paꞌi, ꞌi ruŋa i te Pāpaꞌi Moꞌa: «Te ūtuꞌa o te ꞌAtua ꞌi ruŋa i te kope mate ꞌi ruŋa i te tātaurō». 14Te meꞌe nei i topa ai mo ravaꞌa takoꞌa e te nuꞌu taꞌe he hūrio, hai Ietū Kiritō, i te haꞌamaitai hōrea e te ꞌAtua ki a ꞌAparahama, ꞌe mo ai ꞌi roto i a tātou taꞌatoꞌa, hai haka moe i te manaꞌu ꞌi ruŋa i a Ietū, te Vārua Maitai hōrea mai e te ꞌAtua.
Te haka tere iŋa ꞌa Mōtē ꞌe te hōrea o te ꞌAtua
15E te taina, ꞌī a au he haꞌaauraꞌa atu hai haka tere iŋa taŋata: te kope e rua haꞌaꞌau e tahi meꞌe, ꞌe he tāpura hai ꞌīŋoa o rāua ꞌi ruŋa i te parau, ꞌina he rua taŋata mo haka kore ꞌe mo pāpaꞌi haka ꞌou e tahi meꞌe ꞌi ruŋa. 16Pē ira takoꞌa te hōrea nei o te ꞌAtua, hōrea kī e te ꞌAtua ki a ꞌAparahama ꞌe ki tōꞌona hakaara. ꞌE te vānaŋa kī era e te ꞌAtua ki a ꞌAparahama «he hakaara», taꞌe mo te hakaara taꞌatoꞌa o ꞌAparahama, mo te hakaara mau nō era ōꞌona ko Ietū. 17Iā. Tāꞌaku kī: te hōrea kī era e te ꞌAtua ki a ꞌAparahama ꞌina e ko tano mo haka kore ꞌe mo taꞌe haka hauhaꞌa e te haka tere iŋa ꞌa Mōtē. Te hōrea aŋa era, paꞌi, e te ꞌAtua ki a ꞌAparahama, ko kī era ꞌana ka maha hānere ka toru ꞌahuru matahiti ki te haka tere iŋa era ꞌa Mōtē. 18Te ꞌAtua e ko taꞌe haka tano i tāꞌana meꞌe hōrea. ꞌO ira, ꞌāhani hai haꞌatura nō o tātou ki te haka tere iŋa ꞌa Mōtē ana vaꞌai mai e te ꞌAtua i te meꞌe hōrea mai, e ko ai ia he meꞌe ko hōrea mai era ꞌā e ia. Pē ira takoꞌa ꞌana te meꞌe hōrea era e te ꞌAtua ki a ꞌAparahama. ꞌĀhani ꞌo te aŋa o ꞌAparahama e tahi meꞌe i vaꞌai ai e te ꞌAtua i rā meꞌe, e ko ai ia he meꞌe ko hōrea era ꞌana e ia. ꞌE te parautiꞌa, te ꞌAtua i vaꞌai ai i rā meꞌe ki a ꞌAparahama ꞌo te ai mau nō ko hōrea era ꞌana e ia.
19¿Mo aha ia te haka tere iŋa ꞌa Mōtē? Te haka tere iŋa ꞌa Mōtē i vaꞌai mai ai e te ꞌAtua mo aŋi-aŋi e tātou taꞌatoꞌa e hara rō ꞌana a tātou. Te manaꞌu o te ꞌAtua: hai rā haka tere iŋa ana haka tika ana oho a tātou ꞌātā ki te tuꞌu iŋa mai o tū hakaara era ko Ietū Kiritō, he kope ꞌi ruŋa i a ia te hōrea kī era e te ꞌAtua ki a ꞌAparahama. E ko hape tātou mo kī i hau rō atu ꞌi te hauhaꞌa te meꞌe hōrea e te ꞌAtua ki te haka tere iŋa ꞌa Mōtē. Te haka tere iŋa nei hai merahi i uŋa mai ai, ꞌe a Mōtē i haka ꞌite ki te taŋata. 20ꞌE te hōrea vaꞌai era e te ꞌAtua ki a ꞌAparahama ꞌina kai uŋa mai hai rua kope, ꞌāꞌana mau ꞌā i kī ki a ꞌAparahama.
Mo aha te haka tere iŋa ꞌa Mōtē
21¿Te kī hō, te haka tere iŋa ꞌa Mōtē e taꞌe haka hauhaꞌa rō ꞌā ꞌi te hōrea o te ꞌAtua? Taꞌe pē ira. Mo te meꞌe kē, mo te meꞌe kē i vaꞌai mai ai i te ŋā meꞌe nei. ꞌE, mo ai ko vaꞌai mai ꞌā e te ꞌAtua i te haka tere iŋa ꞌa Mōtē mo ravaꞌa e tātou i te ora ꞌāpī ꞌina he hopeꞌa raꞌa, he tano ia a tātou ki tōꞌona mata ꞌo te haꞌatura ki rā haka tere iŋa. 22Te meꞌe nō, pē nei e kī ena ꞌi ruŋa i te Pāpaꞌi Moꞌa: te taŋata taꞌatoꞌa o te hara te haka tere, ꞌe te rāveꞌa nō mo ravaꞌa i te meꞌe hōrea e te ꞌAtua, he ora ꞌāpī ꞌina he hopeꞌa raꞌa, e haka moe i te manaꞌu ꞌi ruŋa i a Ietū.
23Hora era ꞌina kai tuꞌu mai ꞌā te rāveꞌa he haka moe i te manaꞌu ꞌi ruŋa i a Ietū mo tano te taŋata ki te mata o te ꞌAtua, e tuꞌu rō ꞌā a tātou pa he nuꞌu puru ꞌauario e te haka tere iŋa ꞌa Mōtē, tiaki ki te hora vaꞌai i te rāveꞌa he haka moe i te manaꞌu ꞌi ruŋa i a Ietū. 24Mo tātou te haka tere iŋa ꞌa Mōtē pa he kope hāpaꞌo ŋā poki, haka tika i te tātou ara ꞌātā ki te tuꞌu iŋa mai o Ietū Kiritō, ki ai ai hora era ōꞌona ka tuꞌu mai ena he tano a tātou ki te mata o te ꞌAtua hai haka moe i te manaꞌu ꞌi ruŋa i a ia. 25ꞌE, hora nei, ko tuꞌu mai ꞌā rā rāveꞌa era he haka moe i te manaꞌu ꞌi ruŋa i a Ietū mo tano o tātou ki te mata o te ꞌAtua, ꞌe ꞌina toe tātou he hāpaꞌo ꞌe he haka tika e te haka tere iŋa ꞌa Mōtē.
26Hai haka moe mau nō i te manaꞌu ꞌi ruŋa i a Ietū e ŋā poki nei tātou o te ꞌAtua. 27ꞌE e tuꞌu rō ꞌā pa he meꞌe ena ē: a tātou taꞌatoꞌa, te nuꞌu haka moe i te manaꞌu ꞌi ruŋa i a Ietū ⌊papatito⌋ i a rāua mo takeꞌa e te nuꞌu ꞌa Ietū a rāua, ko uru tahi ꞌana i te ⌊Kiritō⌋, pa he uru iŋa ena ꞌā o te taŋata i te kahu. 28ꞌE ꞌi te hora nei, ki te mata o te ꞌAtua, taꞌe he meꞌe te ai ōꞌou he ⌊hūrio⌋ ꞌo he ⌊kirieko⌋, he ꞌekaravo ꞌo taꞌe he ꞌekaravo, he viꞌe ꞌo he taŋata. ꞌO te ai o tātou ꞌa Ietū Kiritō, a tātou taꞌatoꞌa e tahi mau nō. 29ꞌE, ꞌi te ai o tātou ꞌāꞌana, he hakaara tātou o ꞌAparahama, ꞌe mo tātou takoꞌa ia te meꞌe hōrea e te ꞌAtua ki a ia.
4He ŋā poki tātou, taꞌe toe he ꞌekaravo
1Pē nei te haꞌaauraꞌa: Te poki ki a ia ka haka rē era te hauhaꞌa taꞌatoꞌa o tōꞌona matuꞌa, ꞌi te hora e ŋā poki nō ꞌana, pa he ꞌekaravo haka ꞌou nō atu e tahi o te hare ꞌi te meꞌe era o te rua te haka tere i a ia, ka ai atu ōꞌona rā hauhaꞌa. 2Te auraꞌa: e ai rō ꞌana te nuꞌu hāpaꞌo i a ia ꞌe i tāꞌana meꞌe taꞌatoꞌa ꞌātā ka tano rō te matahiti kī e tōꞌona matuꞌa. 3Te meꞌe nei pa he oho iŋa era ꞌā o tātou ꞌi muꞌa ꞌā: ꞌi te hora era kai aŋi-aŋi ꞌā i te hāpī parautiꞌa o te ꞌAtua, ꞌe kai haka moe ꞌā i te manaꞌu ꞌi ruŋa i a Ietū, o te hāpī taꞌe hauhaꞌa o te ao nei te haka tere mai i a tātou. 4ꞌE, i tano era te hora, he uŋa mai e te ꞌAtua i tāꞌana Poki ꞌe he haka poreko mai roto i te viꞌe haꞌatura ki te ⌊haka tere iŋa ꞌa Mōtē⌋, 5mo haka eꞌa i a tātou mai roto i rā haka tere iŋa, ꞌe mo haka riro i a tātou i te nuꞌu ⌊haka moe i te manaꞌu⌋ ꞌi ruŋa i tāꞌana Poki he ŋā poki parautiꞌa ꞌāꞌana. 6ꞌE, ko ꞌite ꞌana a tātou he ŋā poki parautiꞌa tātou o te ꞌAtua ꞌo te ai ko uŋa mai ꞌā i te ⌊Vārua Maitai⌋ o tāꞌana Poki ki roto i te tātou māhatu; ꞌe hai ia e tano nei a tātou mo kī ki te ꞌAtua ꞌi te hora e pure nei tātou: «E koro ōꞌoku ē». 7Hora nei ia taꞌe he ꞌekaravo toe kōrua o te meꞌe haka tere i te ao nei. He ŋā poki kōrua o te ꞌAtua; ꞌe, ꞌi te ai o kōrua he ŋā poki ꞌāꞌana, mo kōrua takoꞌa ia te meꞌe taꞌatoꞌa hōrea e ia mo vaꞌai ki tāꞌana ŋā poki.
8ꞌI muꞌa ꞌā, hora era kai haka moe ꞌana kōrua i te manaꞌu ꞌi ruŋa i te ꞌAtua parautiꞌa, he ꞌekaravo kōrua o te meꞌe kī e kōrua he ꞌatua. 9ꞌE hora nei, he hora ko toꞌo ꞌana a kōrua i te ꞌAtua parautiꞌa mo ꞌAtua o kōrua, ꞌo, te tī-tika mau, he hora ko toꞌo ꞌana i a kōrua pa he ŋā poki ꞌāꞌana, ¿he aha ia kōrua e haka rē ena mo haka tere haka ꞌou atu e te ŋā meꞌe ena ꞌina rāua pūai ꞌe mo haka riro haka ꞌou atu i a kōrua he ꞌekaravo o rāua? 10¿E manaꞌu ena ꞌō kōrua: hai aŋa o kōrua i te ŋoŋoro mo te ꞌAtua ꞌi te tētahi mahana, ꞌi te tētahi ꞌāvaꞌe ꞌe ꞌi te tētahi matahiti, he tano kōrua ki tōꞌona mata? 11¿Ka kī ꞌō tū aŋa taꞌatoꞌa era ꞌāꞌaku ꞌi roto i a kōrua ko māuꞌa tahi ꞌā?
He manaꞌu iŋa o Pauro ki te nuꞌu o Karatia
12ꞌE te taina, he ani atu a au mo riro o kōrua pē au ꞌā, kope taꞌe manaꞌu pē nei ē: mo tano ki te mata o te ꞌAtua e maꞌu takoꞌa ꞌō i te haka tere iŋa ꞌa Mōtē. A au, paꞌi, i riro rō pē kōrua, nuꞌu taꞌe maꞌu i rā haka tere iŋa. ꞌI te hora era ōꞌoku ꞌi muri i a kōrua, ꞌina kōrua kai tōtōā mai. 13E manaꞌu kōrua: ꞌi tōꞌoku māui-ui a au i tuꞌu atu ai ki a kōrua ena ꞌe i hāpī atu ai i te ⌊roŋo riva-riva o te ꞌAtua⌋. 14ꞌE, ka ai atu māui-ui taꞌe au tōꞌoku, kai taꞌe haka au mai kōrua. Te meꞌe o kōrua i aŋa he toꞌo he hāpaꞌo i a au ꞌi roto i a kōrua pa he meꞌe ena ē: e toꞌo ꞌā i te merahi o te ꞌAtua ꞌo i a Ietū Kiritō mau ꞌā. 15¿Ka kī ꞌō ko ŋaro ꞌana tū koa era o tātou o muꞌa ꞌā? E riva nō a au mo kī: a kōrua, ꞌi muꞌa ꞌā, ꞌāhani he meꞌe e ravaꞌa rō mo aŋa, ꞌātā e kume nō mai i te kōrua mata mo vaꞌai mai mōꞌoku. 16ꞌE hora nei, ¿ko ai ꞌana a au he kope taꞌe haŋa o kōrua ꞌo te kī nō atu i te parautiꞌa?
17Te nuꞌu hāpī atu i te meꞌe taꞌe he parautiꞌa e tuꞌu rō ꞌā pa he meꞌe ena ē: e uꞌi ꞌā i te kōrua riva-riva. ꞌE te parautiꞌa mau, te manaꞌu o rāua mo kōrua manaꞌu taꞌe riva-riva. Te haŋa he haka topa kē i a kōrua mai i a mātou mo haka roŋo ki a rāua mau nō. 18Ka haka roŋo mai, e te taina ē. Te meꞌe ena he uꞌi i te riva-riva o te rua meꞌe tano ana ai hai manaꞌu riva-riva ꞌe paurō te mahana, taꞌe nō ꞌō e ai atu a au ꞌi roto i a kōrua. 19E te ŋā poki haŋa rahi ꞌāꞌaku ē, pa he māui-ui ŋaroꞌa e te viꞌe aꞌu i te poki te māui-ui ŋaroꞌa e au mo kōrua ꞌātā ka ai rō te kōrua huru taꞌatoꞌa pē Ietū Kiritō ꞌā. 20ꞌĀhani ꞌō a au nā ꞌi muri i a kōrua mo vānaŋa koroꞌiti mo oho atu. Te parautiꞌa, kai ꞌite a au he aha tāꞌaku meꞌe mo manaꞌu o ruŋa i a kōrua.
Ko ꞌĀkara4.21 A ꞌĀkara he ꞌekaravo ꞌa Tara ꞌe he matuꞌa vahine o Itamaera. ꞌe ko ⌊Tara⌋
21Ka kī mai rā kōrua, e te nuꞌu haŋa mo maꞌu i te haka tere iŋa ꞌa Mōtē ē, ¿kai ŋaroꞌa ꞌana ꞌō e kōrua te meꞌe hāꞌaki ꞌi ruŋa i rā haka tere iŋa? 22Pē nei e kī ena: e rua poki ꞌa ⌊ꞌAparahama⌋, e tahi mai roto i te viꞌe ꞌekaravo, ꞌe te rua, mai roto i tāꞌana viꞌe mau era ꞌā. 23Te poki poreko era mai roto i te viꞌe ꞌekaravo hai manaꞌu taŋata nō i poreko ai. ꞌE te poki poreko era mai tāꞌana viꞌe e haka tano ꞌana i te hōrea aŋa e te ꞌAtua ki a ꞌAparahama. 24E ai rō ꞌana te haꞌaauraꞌa o te meꞌe nei: te ŋā viꞌe nei e rua e haka takeꞌa mai ꞌā e rua rāveꞌa o te ⌊haka tere iŋa o te ꞌAtua ananake ko te taŋata⌋. Te rāveꞌa raꞌe he roŋo vaꞌai era e te ꞌAtua ki a Mōtē ꞌi ruŋa i te maꞌuŋa era ko ⌊Tinaī⌋, ꞌe te tāpaꞌo o rā haka tere iŋa ko ꞌĀkara, matuꞌa vahine o te poki ka poreko era he ꞌekaravo takoꞌa. 25Te viꞌe nei ko ꞌĀkara pa he tāpaꞌo o te maꞌuŋa era ko Tinaī ꞌi te henua era ko Aravia, he kona ꞌi ira i poreko ai te haka tere iŋa ꞌa Mōtē. ꞌE he tāpaꞌo takoꞌa o Hērutarema o te hora nei, he kona ko te maꞌu ko te oho iŋa ꞌā e te taŋata i te haka tere iŋa ꞌa Mōtē pa he nuꞌu ꞌekaravo o rā haka tere iŋa. 26ꞌE a ⌊Tara⌋, pa he tāpaꞌo o te rua haka tere iŋa o te ꞌAtua ananake ko te taŋata ꞌe o Hērutarema o te raŋi. A Tara taꞌe he ꞌekaravo, ꞌe a tātou, pa he hakaara o Tara, taꞌe he ꞌekaravo takoꞌa. 27E hāꞌaki rō ꞌana, paꞌi, ꞌi ruŋa i te ⌊Pāpaꞌi Moꞌa⌋ pē nei ē:
«Ka koa, e te viꞌe paꞌa ē, a koe ena ꞌina e tahi poki;
ka ꞌeha koe, e te viꞌe taꞌe ꞌite i te meꞌe he mamae mo aꞌu i te poki ē.
Te viꞌe hoa era e tāꞌana kenu, paꞌi,
ꞌata rahi rō atu te poki ka ai era ki te viꞌe ꞌina kai hoa».
28A Itaꞌata, poki era ꞌa ꞌAparahama, i poreko ai ꞌo te haka moe o ꞌAparahama i tōꞌona manaꞌu ꞌi ruŋa i te meꞌe hōrea e te ꞌAtua ki a ia. Pē ira ꞌana a tātou, e te taina ē. He haka moe o tātou i te manaꞌu ꞌi ruŋa i tāꞌana meꞌe hōrea mai e ai nei a tātou he ŋā poki o te ꞌAtua. 29Te poki poreko era ꞌa ꞌAparahama hai manaꞌu taŋata he taꞌe haka au nō te aŋa i te poki poreko era hai hāꞌūꞌū o te Vārua Maitai. ꞌE pē ira ꞌā ꞌi te hora nei: te nuꞌu manaꞌu e haꞌatura ki te haka tere iŋa ꞌa Mōtē mo tano ki te mata o te ꞌAtua he taꞌe haka au nō mai te aŋa i a tātou i te nuꞌu ko ꞌite ꞌana: mo tano ki te mata o te ꞌAtua e haka moe i te manaꞌu ꞌi ruŋa i a Ietū. 30ꞌE, ¿pē hē e kī ena ꞌi ruŋa i te Pāpaꞌi Moꞌa? Pē nei e kī ena: «Ka haka oho te viꞌe ꞌekaravo ena koia ko tāꞌana poki. E ko tano, paꞌi, mo ai takoꞌa mo te poki o te viꞌe ꞌekaravo te meꞌe mo te poki poreko mai te viꞌe taꞌe he ꞌekaravo». 31Pē ira, e te taina ē, taꞌe a tātou he poki o te viꞌe ꞌekaravo era, a tātou o te rua viꞌe era.
5Taꞌe toe he ꞌekaravo o te ⌊haka tere iŋa ꞌa Mōtē⌋
1A Ietū Kiritō i haka eꞌa i a tātou mai te meꞌe ena he ꞌamo i te haka tere iŋa ꞌa Mōtē mo tano ki te mata o te ꞌAtua. ꞌO ira, e uꞌi kōrua ꞌo haka ꞌamo haka ꞌou rō atu i te haka tere iŋa era, ꞌo ꞌekaravo haka ꞌou kōrua o rā haka tere iŋa.
2Haka roŋo mai. ꞌĪ a au, a Pauro, he kī atu: mo hore o te kiri o te kinoŋa hai manaꞌu: pē ira he tano kōrua ki te mata o te ꞌAtua, te meꞌe aŋa era ia e Ietū e ko hāꞌūꞌū atu. 3ꞌE ꞌī a au he kī haka ꞌou atu: te kope hore i te kiri o te kinoŋa e haꞌatura ia ki te roŋo taꞌatoꞌa o ruŋa i te haka tere iŋa ꞌa Mōtē. 4A kōrua, te nuꞌu haŋa mo tano ki te mata o te ꞌAtua hai haꞌatura ki rā haka tere iŋa, ko haka tapa ꞌana mai muri i a Ietū, ꞌe ko hārui ꞌana hai tuaꞌivi i te riva rahi o te ꞌAtua. 5ꞌE a tātou, te nuꞌu ꞌa Ietū Kiritō, hai ⌊Vārua Maitai⌋ e ꞌite nei: te ꞌAtua e kī rō: he nuꞌu tano a tātou ki tōꞌona mata ꞌo te ⌊haka moe i te manaꞌu⌋ ꞌi ruŋa i a Ietū. 6ꞌE, ꞌi te ai o tātou ꞌa Ietū Kiritō, te ꞌAtua e taꞌe tapa haka ꞌou ena hoki ko hore ꞌā te kiri o te hua ꞌo ꞌina kai hore. Te meꞌe hauhaꞌa mau he haka moe i te manaꞌu ꞌi ruŋa i a Ietū, he meꞌe e takeꞌa ena hai haŋa ki te rua.
7ꞌI muꞌa ꞌā, a te ara parautiꞌa a kōrua e oho era. ꞌE hora nei, ¿ꞌa ꞌai te haka noho i a kōrua ꞌo maꞌu ꞌo oho i te hāpī parautiꞌa o te ꞌAtua? 8Te haka tapa o kōrua mai te ara nei taꞌe he meꞌe o te ꞌAtua. ꞌĀꞌana mau ꞌā, paꞌi, i kī atu mo oho o kōrua a nei ara. 9ꞌO ira, e uꞌi kōrua e te hāpī taꞌe parautiꞌa, ꞌo riro pa he meꞌe kī e te nuꞌu: «hai ꞌapa ꞌiti-ꞌiti e tahi o te revaura he ahu tahi te haraoa mata». 10ꞌE, ꞌi te ai o kōrua ꞌa Ietū Kiritō takoꞌa, ko ꞌite riva-riva ꞌana e au he maꞌu kōrua i te hāpī haka ꞌite atu era e au ꞌe taꞌe ꞌō i te hāpī kē. ꞌE te ꞌAtua he haka ūtuꞌa i te kope haka huri i te kōrua manaꞌu, nōatu ko ai rā kope.
11E te taina, nā e ai rō ꞌā te nuꞌu kī o ruŋa i a au pē nei ē: e hāpī ꞌana a au ki te nuꞌu taꞌe he hūrio: mo tano o rāua ki te mata o te ꞌAtua, ꞌāmui ki te haka moe i te manaꞌu ꞌi ruŋa i a Ietū, e hore i te kiri o te kinoŋa. Mo ai o te vānaŋa nei he parautiꞌa, ¿he aha ia te nuꞌu ra-rahi o te ⌊hūrio⌋ e tute mai ena i a au mo tōtōā? Mo ai, paꞌi, pē ira mau ꞌā a au e hāpī nei, ꞌina ia rāua ko riri ꞌo te hāpī ōꞌoku o ruŋa i te mate era o Ietū ꞌi ruŋa i te tātaurō. 12ꞌE mo ai he meꞌe nui-nui e tahi mo te nuꞌu haka mira-mira atu i te kōrua manaꞌu te hore i te kiri o te kinoŋa, ¡ka pātehe ia i a rāua ꞌā!
Hai haŋa mau nō ki te rua
13E te taina, o te ꞌAtua i haka eꞌa i a tātou mai te meꞌe he ꞌamo i te haka tere iŋa ꞌa Mōtē mo tano o tātou ki tōꞌona mata. Te parautiꞌa nei ꞌina ko ai mo tātou he ꞌōtohe mo aŋa i te meꞌe taꞌe tano pohe nō e te hakari. Te meꞌe o tātou mo aŋa he haŋa ꞌe he hāꞌūꞌū ki te rua hai māhatu. 14Mo haꞌatura o tātou ki te roŋo mau nō nei e tahi: «E haŋa ki te rua pa he haŋa iŋa mau ena ꞌā ōꞌou ki a koe», ko haꞌatura tahi ꞌana ia a tātou ki te roŋo taꞌatoꞌa o te ꞌAtua haka pāpaꞌi ki a Mōtē. 15ꞌE, mo moto ꞌe mo tātake ꞌi roto i a kōrua, e uꞌi ꞌo kore rō te kōrua haŋa pa he taina ꞌe ꞌo haka tapa rō te kōrua manaꞌu mai ruŋa i a Ietū.
E haka rē mo haka tere atu e te Vārua Maitai
16ꞌO ira, ꞌī a au he kī atu: e haka rē mo haka tere atu i a kōrua e te Vārua Maitai, ꞌo aŋa i te meꞌe taꞌe tano pohe nō e te hakari. 17Te meꞌe taꞌe tano pohe e te hakari meꞌe taꞌe haŋa o te Vārua Maitai. ꞌE te meꞌe haŋa ꞌāꞌana mo aŋa e tātou taꞌe he meꞌe taꞌe tano pohe e te hakari. Te ŋā meꞌe nei ararua e tātake rō ꞌā ꞌi roto i a tātou. ꞌO ira a tātou e taꞌe ravaꞌa ena mo aŋa i te meꞌe haŋa mau era mo aŋa. 18Ka ai atu pē ira, mo haka rē o tātou mo haka tere mai e te Vārua Maitai, ꞌina he pūai toe o te haka tere iŋa ꞌa Mōtē ꞌi ruŋa i a tātou.
19Te meꞌe aŋa e te nuꞌu haka tere i a rāua hai manaꞌu ki te meꞌe pohe nō e te hakari ko te meꞌe nei: he moe o te viꞌe ꞌe o te taŋata i te kope taꞌe he kenu ꞌo he viꞌe ꞌāꞌana ꞌe tētahi haka ꞌou atu meꞌe taꞌe tano tuꞌu pē ira, ꞌe he aŋa i te meꞌe hano-hano taꞌe tano ki te hakari. 20He haꞌamuri ki te ꞌītoro, he aŋa i te tahu-tahu, he maꞌu i te riri ꞌi roto i te māhatu, he haka tumu i te ture, ꞌe he mākota ꞌi te rua. E ko roa he riri, te meꞌe haŋa mau nō he meꞌe manaꞌu o rāua, te aŋa he haka tātake mo haka topa kē i te taŋata, ꞌe he manaꞌu he meꞌe mau nō era o rāua te meꞌe tano. 21He fiꞌiꞌi, he rava taꞌero, he rava kai, ꞌe tētahi haka ꞌou atu meꞌe tuꞌu pē ira. ꞌE ꞌī a au he kī haka ꞌou atu i te meꞌe kī atu era e au ꞌi muꞌa ꞌā: te nuꞌu pē nei ꞌina e ko oꞌo ki roto i te nūnaꞌa taŋata haka tere e te ꞌAtua.
22ꞌE te meꞌe poreko ꞌi roto i te nuꞌu haka tere e te Vārua Maitai ko te ŋā meꞌe nei: he haŋa, he koa, he haumārū, he ꞌite mo haꞌaoromaꞌi, he huru riva, he māhatu ꞌaroha, he haka tano iŋa i te meꞌe kī, 23he taꞌe manaꞌu i hau rō atu ki te rua, ꞌe he ꞌite mo hāito i te meꞌe kī ꞌe i te meꞌe aŋa. Te nuꞌu pē nei, e ko aŋa e tahi meꞌe hape ki te haka tere iŋa o te ꞌAtua. 24A tātou, te nuꞌu ꞌa Ietū Kiritō, ko veo ꞌana i te huru hara taꞌatoꞌa era o tātou o muꞌa ꞌā ꞌi ruŋa i te tātaurō, te auraꞌa, ko hārui ꞌana a tātou hai tuaꞌivi ki rā ŋā meꞌe. 25ꞌE, ꞌi te meꞌe era te tātou noho iŋa ꞌāpī nei o te Vārua Maitai i vaꞌai mai, ki haꞌatiꞌa ia māꞌana e haka tika mai.
26ꞌI roto i a tātou, ꞌina ko manaꞌu i hau rō atu tātou ki te rua, ꞌina ko haka tātake i te kope e tahi ki te rua ꞌe ꞌina ko mākota.
6Te meꞌe mo aŋa e te nuꞌu ⌊kiritiano⌋
1E te taina, mo takeꞌa e kōrua e tahi taina ⌊haka moe i te manaꞌu⌋ ꞌi ruŋa i a Ietū e hara ꞌā, e hāꞌūꞌū e kōrua e te nuꞌu ko te haka tere iŋa ꞌā e te ⌊Vārua Maitai⌋, mo hoki haka ꞌou ōꞌona a te ara tī-tika. ꞌE ana hāꞌūꞌū, hai haŋa ꞌe hai haumārū. E uꞌi ꞌo haka hara rō atu i a kōrua. 2E hāꞌūꞌū takoꞌa kōrua i te rua mo ꞌamo i tōꞌona ꞌati; pē ira he haka tano kōrua i te meꞌe kī mai e te ⌊Kiritō⌋ mo aŋa.
3Mo manaꞌu o te kope e tahi ꞌina a ia e ko tano mo hāꞌūꞌū i te rua ꞌi te meꞌe era ꞌata hau rō atu a ia ki rā kope, he meꞌe taꞌe he parautiꞌa, e reo-reo ꞌana ki a ia mau ꞌā. 4Mo tātou mau ꞌā, hoko tahi hoko tahi, e uꞌi hoki e riva-riva rō ꞌā te tātou haka tere iŋa, ꞌe, mo ai pē ira, e koa tātou. ꞌIna e tahi o tātou mo manaꞌu e haka tano ꞌō te tātou haka tere iŋa ki te haka tere haŋa o te rua ana koa iho o tātou. 5Taꞌatoꞌa nō, paꞌi, ko ꞌite ꞌana he aha te meꞌe tano ꞌe te meꞌe taꞌe tano ki te mata o te ꞌAtua.
6Te kope hāpī i te vānaŋa o te ꞌAtua, e hāꞌūꞌū hai meꞌe ai ꞌāꞌana ki te maꞌori hāpī i a ia.
7E uꞌi kōrua ꞌo manaꞌu rō pē nei ē: e ravaꞌa rō e kōrua mo reo-reo ki te ꞌAtua. E kī atu ena a au i te meꞌe nei ꞌo te ai te meꞌe ꞌoka e te taŋata ko rā meꞌe mau ꞌā te meꞌe ka kato era. 8Te kope ꞌoka, paꞌi, i te meꞌe pohe nō e te hakari, te meꞌe mo ravaꞌa he ūtuꞌa o te hara he mate; ꞌe te kope ꞌoka i te meꞌe haŋa e te Vārua Maitai, he ora ꞌāpī ꞌina he hopeꞌa raꞌa. 9ꞌO ira, ꞌina ko rohi-rohi mo hāꞌūꞌū ki te rua. Mo taꞌe rohi-rohi, ꞌi te hora tano he haꞌamaitai a tātou e te ꞌAtua. 10Mo ai i a tātou te rāveꞌa mo hāꞌūꞌū, he hāꞌūꞌū tātou, ꞌe he nuꞌu taina haka moe i te manaꞌu ꞌi ruŋa i a Ietū te meꞌe raꞌe o tātou mo hāꞌūꞌū.
He hatu ꞌe he ꞌaroha
11¡Ka uꞌi rā te nu-nui o tāꞌaku tiꞌaraꞌa! Hai rima mau nei ꞌā ōꞌoku i pāpaꞌi ai i te vānaŋa nei. 12Te nuꞌu kī atu mo hore i te kiri o te kinoŋa, e kī atu ena pē ira mo tano o rāua ki te mata o te nuꞌu ra-rahi o te ⌊hūrio⌋, ꞌo tute i a rāua mo tōtōā ꞌo te hāpī pē nei ē: hai haka moe nō i te manaꞌu ꞌi ruŋa i a Ietū ꞌe ꞌi ruŋa i te meꞌe ravaꞌa e ia hai mate iŋa era ōꞌona ꞌi ruŋa i te tātaurō he eꞌa te taŋata mai roto i te ūtuꞌa o te hara ꞌe he ravaꞌa i te ora ꞌāpī ꞌina he hopeꞌa raꞌa. 13Te parautiꞌa, ꞌina e tahi nuꞌu haꞌatura ki te roŋo taꞌatoꞌa o te ⌊haka tere iŋa ꞌa Mōtē⌋, ꞌātā te nuꞌu hore i te kiri o te kinoŋa. E haŋa ena a rāua mo hore o kōrua i te kiri o te kinoŋa mo teꞌo-teꞌo pē nei ē: ko ravaꞌa ꞌana ꞌō e rāua mo maꞌu e kōrua i te tāpaꞌo ena ꞌi ruŋa i te kōrua hakari.
14Tāꞌaku meꞌe mau nō mo teꞌo-teꞌo he meꞌe aŋa era e Ietū Kiritō, Pūꞌoko Haka Tere o tātou. Hai mate iŋa era ōꞌona ꞌi ruŋa i te tātaurō i taꞌe ai haka ꞌou ai a au he ꞌekaravo o te meꞌe o te ao nei, ꞌe ꞌina he pūai toe o te ŋā meꞌe nei mo haka tere mai i a au. 15ꞌE, ki te mata o te ꞌAtua, ꞌina e tahi hauhaꞌa o te meꞌe he hore ꞌo he taꞌe hore o te kiri o te kinoŋa. Te meꞌe hauhaꞌa mōꞌona he haka ꞌāpī atu i a koe e te Vārua Maitai. 16Ka ai te haumārū ꞌe te riva rahi o te ꞌAtua ꞌi ruŋa i te nuꞌu taꞌatoꞌa haka tere i a rāua hai meꞌe kī atu ena e au; a rāua he itaraera parautiꞌa o te ꞌAtua, te auraꞌa, he nuꞌu haꞌataꞌa e te ꞌAtua māꞌana.
17Mo haka hopeꞌa atu: e ko haŋa a au mo taꞌe haka au haka ꞌou mai o te kope e tahi o ruŋa i tāꞌaku meꞌe hāpī. ꞌI ruŋa i tōꞌoku hakari, paꞌi, a au e maꞌu nei i te more tuai, he tāpaꞌo: ki a Ietū a au e tāvini nei.
18E te taina, ka ai ꞌi ruŋa i a kōrua taꞌatoꞌa te riva rahi o te tātou Pūꞌoko Haka Tere ko Ietū Kiritō. ⌊ꞌĀmene⌋.