ĒFETO

He parau pāpaꞌi e Pauro ki te taina o

Ēfeto

A Ēfeto he kona nui-nui e tahi o te kona taꞌatoꞌa haka tere e te rōmano. E rua tuꞌu iŋa o Pauro ki te kona nei. ꞌI te rua ara oho ōꞌona ki ira e rua matahiti tūmaꞌa i noho ai (Aŋa o te ꞌĀpōtoro 18.19–21; 19.1–20.1). Te nuꞌu ⌊haka moe i te manaꞌu⌋ ꞌi ruŋa i a Ietū Kiritō o rā kona, nuꞌu taꞌe haka tapa i te rāua manaꞌu mai ruŋa ki te hora hopeꞌa, ꞌe nuꞌu ꞌamo i te ꞌati riꞌa-riꞌa ꞌo te ai o rāua ꞌa Ietū (Meꞌe Haka Takeꞌa 2.1–3). Ka ai atu pē ira, e ai rō ꞌana te tētahi hāpī haŋa a Pauro mo haka aŋi-aŋi riva-riva ki rā nuꞌu.

ꞌI te parehe raꞌe o tāꞌana parau nei (1.1–3.21) e ai rō ꞌana te hāpī hōhonu o te ꞌAtua, hāpī e ꞌite e te nuꞌu taꞌatoꞌa haka moe i te manaꞌu ꞌi ruŋa i a Ietū. He haka manaꞌu e Pauro i te pūai o te ꞌAtua, pūai haka takeꞌa ꞌi te hora haka ora mai te mate i a Ietū (1.19–20), kope ki a ia i vaꞌai ai e te ꞌAtua i te parau mo haka tere i te meꞌe taꞌatoꞌa (1.21–22). He haka aŋi-aŋi e Pauro ki te nuꞌu o Ēfeto pē nei ē: ꞌi te riva rahi o te ꞌAtua ko haka eꞌa ꞌana i a rāua mai roto i te ūtuꞌa o te hara ꞌo te haka moe o rāua i te manaꞌu ꞌi ruŋa i a Ietū. Taꞌe he meꞌe i ravaꞌa e rāua, he meꞌe o te ꞌAtua i vaꞌai, ꞌe taꞌe ꞌō o te aŋa o rāua i te meꞌe riva-riva (2.8–9).

Mai te vāeŋa o te parau nei pe muꞌa (4.1–6.20) e hāꞌaki ena pē hē te nuꞌu ⌊kiritiano⌋ ana haka tere i a rāua paurō te mahana. He haka ꞌite e Pauro ki te kenu mo haŋa ki te rāua ŋā viꞌe, pa he haŋa iŋa ena ꞌā o Ietū Kiritō ki tāꞌana nuꞌu haka moe i te manaꞌu ꞌi ruŋa i a ia, he nuꞌu mo rāua i vaꞌai ai i a ia mo mate ꞌi ruŋa i te tātaurō (5.25). He haka ꞌite takoꞌa pē hē te noho iŋa tano o te poki ararua ko tōꞌona matuꞌa, o te matuꞌa ararua ko tāꞌana poki, o te ꞌekaravo ararua ko te kope haka aŋa i a ia ꞌe o rā kope ararua ko tāꞌana ꞌekaravo ꞌo te ai o rāua he taina haka moe i te manaꞌu ꞌi ruŋa i a Ietū, Pūꞌoko Haka Tere o rāua taꞌatoꞌa (6.1–9).

I haka mao ai te parau nei e Pauro hai haꞌaauraꞌa pē nei ē: mo rē o te nuꞌu kiritiano ki a Rukifero e ai rō ꞌana te meꞌe mo hāpaꞌo i a rāua pa he meꞌe hāpaꞌo i te vaꞌehau ꞌi te hora o te tamaꞌi (6.10–17). I oti era, he ꞌaroha a Pauro ki te nuꞌu taina o Ēfeto koia ko ani ki te ꞌAtua ꞌe ki a Ietū Kiritō mo nei nuꞌu (6.23–24).

He ꞌaroha

¹A au, a Pauro, ⌊ꞌāpōtoro⌋ ꞌa Ietū Kiritō hai haŋa o te ꞌAtua, he ꞌaroha atu ki a kōrua ki te taŋata haꞌataꞌa e ia māꞌana o Ēfeto, nuꞌu ꞌa Ietū Kiritō ꞌo te ⌊haka moe i te manaꞌu⌋ ꞌi ruŋa i a ia. ²Ka ai ꞌi ruŋa i a kōrua te riva rahi ꞌe te haumārū o te ꞌAtua Matuꞌa ꞌe o Ietū Kiritō, he Pūꞌoko Haka Tere o tātou.

He haꞌahana-hana iŋa ki te ꞌAtua

³Ki haꞌahana-hana tātou ki te ꞌAtua, he Matuꞌa o te tātou Pūꞌoko Haka Tere ko Ietū Kiritō, ꞌi te meꞌe era ko haꞌamaitai mai ꞌana i a tātou hai vaꞌai mai i te meꞌe riva-riva ai ꞌi ruŋa i te raŋi mo hāꞌūꞌū mai ꞌi te tātou haꞌere iŋa a tōꞌona ara ꞌo te ai o tātou ꞌa Ietū Kiritō. ⁴ꞌI muꞌa ꞌā, hora era kai aŋa ꞌana i te ao, i haꞌataꞌa rō ai te ꞌAtua i a tātou i te nuꞌu ꞌa Ietū Kiritō mo nuꞌu ꞌāꞌana ꞌina e tahi hape ꞌi muꞌa i a ia. He haŋa mai o te ꞌAtua ki a tātou ⁵i manaꞌu ai mo haka riro i a tātou he ŋā poki ꞌāꞌana hai meꞌe aŋa e Ietū Kiritō. Te meꞌe nei i aŋa ai e te ꞌAtua he riva rahi ōꞌona ꞌe ꞌi te ai ko haŋa ꞌana e ia. ⁶ꞌO ira, ki haꞌahana-hana ki te ꞌAtua ꞌi tōꞌona riva rahi haka takeꞌa mai ꞌo te ai o tātou ꞌa Ietū Kiritō, he Poki haŋa rahi ꞌāꞌana.

^7-8Hai toto tehe era o Ietū ꞌi ruŋa i te tātaurō te ꞌAtua ko haka rehu ꞌana i te tātou hara, ꞌe ko haka kore ꞌana i te ūtuꞌa mai ruŋa i a tātou ꞌo te ai o tātou ꞌa Ietū Kiritō. I aŋa ai i te meꞌe nei e te ꞌAtua he riva rahi ōꞌona ꞌina he hāito ꞌi ruŋa i a tātou. ꞌE ꞌāꞌana takoꞌa i vaꞌai mai i te mārama-rama mo aŋi-aŋi e tātou i te parautiꞌa o ruŋa i a ia. ⁹Ko haka ꞌite mai ꞌana, paꞌi, i tāꞌana meꞌe manaꞌu era mo aŋa taꞌe haka ꞌite era e ia ꞌi muꞌa ꞌā. ꞌE, ꞌi tōꞌona riva rahi, i manaꞌu ai mo aŋa i te meꞌe nei hai Ietū Kiritō ¹⁰ꞌi te mahana kī e ia. Rā meꞌe manaꞌu era e te ꞌAtua mo aŋa he haka riro i a Ietū Kiritō he Pūꞌoko Haka Tere o te meꞌe taꞌatoꞌa o te raŋi ꞌe o te ao.

¹¹I haꞌataꞌa ai i a tātou, ꞌi muꞌa ꞌā, e te ꞌAtua mo nuꞌu ꞌāꞌana hai Ietū Kiritō, he meꞌe i manaꞌu e ia mo aŋa. Te ꞌAtua, paꞌi, e haka tano tahi rō ꞌana i tāꞌana meꞌe haŋa ꞌe i tāꞌana meꞌe manaꞌu. ¹²I aŋa ai i te meꞌe nei mo haꞌahana-hana te taŋata ki te ꞌAtua ꞌi te nui-nui o tōꞌona pūai hai mātou hai ⌊hūrio⌋, nuꞌu haka moe raꞌe i te manaꞌu ꞌi ruŋa i a Ietū.

¹³ꞌE a kōrua, te nuꞌu taꞌe he hūrio, i ŋaroꞌa era i te parautiꞌa, he ⌊roŋo riva-riva o te ꞌAtua⌋ o ruŋa i te rāveꞌa pē hē ana eꞌa mai roto i te ūtuꞌa o te hara ꞌe ana ravaꞌa i te ora ꞌāpī ꞌina he hopeꞌa raꞌa, he haka moe rō ꞌai kōrua i te manaꞌu ꞌi ruŋa i a Ietū, ꞌe he tāpaꞌo rō atu ꞌai e te ꞌAtua i a kōrua pa he nuꞌu ꞌāꞌana hai vaꞌai atu i te ⌊Vārua Maitai⌋, pa he meꞌe hōrea e ia. ¹⁴ꞌE, ꞌo te ai o te Vārua Maitai ꞌi roto i a tātou, e ꞌite nei: te ꞌAtua e haka oti rō i tāꞌana meꞌe haꞌamata aŋa era: he haka eꞌa i a tātou mai roto i te hara, ꞌe pe muꞌa ka oho ena he vaꞌai mai i te meꞌe taꞌatoꞌa hōrea mo tāꞌana nuꞌu, ki haꞌahana-hana tahi ai a tātou i te nui-nui o tōꞌona pūai.

He pure mo te nuꞌu taina

¹⁵Mai te hora ꞌite ōꞌoku e haka moe rō ꞌana kōrua i te manaꞌu ꞌi ruŋa i a Ietū ꞌe e haŋa rō ꞌana ki te nuꞌu haꞌataꞌa e te ꞌAtua māꞌana, ¹⁶tāꞌaku aŋa he māuru-uru nō ki a ia mo kōrua ꞌi roto i tāꞌaku pure. ¹⁷He ani nō tāꞌaku aŋa ki te ꞌAtua o te tātou Pūꞌoko Haka Tere ko Ietū Kiritō, ki te tātou Matuꞌa o te raŋi, i a ia te pūai ꞌe te nui-nui taꞌatoꞌa, mo vaꞌai atu, hai Vārua Maitai, i te mārama-rama mo aŋi-aŋi e kōrua i te parautiꞌa o ruŋa ōꞌona, ki māhani riva-riva ai kōrua ki a ia. ¹⁸ꞌE e ani takoꞌa rō ꞌana a au ki a ia mo haka māꞌeha atu i te kōrua manaꞌu, ki ꞌite ai kōrua he aha te meꞌe ꞌāꞌana mo kōrua pe muꞌa ka oho ena ꞌo te ai o kōrua he nuꞌu haꞌataꞌa māꞌana, ꞌe ki ꞌite takoꞌa ai kōrua i te rahi ꞌe i te nui-nui o te meꞌe hōrea e ia mo tāꞌana nuꞌu, ¹⁹ꞌe i te rahi o tōꞌona pūai e hāꞌūꞌū mai ena ki a tātou ki te nuꞌu haka moe i te manaꞌu ꞌi ruŋa i a Ietū. Te pūai nei he mana haka takeꞌa era e te ꞌAtua ²⁰ꞌi te hora haka ora i a Ietū mai te mate ꞌe haka noho i a ia ꞌi tōꞌona pāꞌiŋa mataꞌu ꞌi te raŋi. ^21-22Te ꞌAtua ko vaꞌai ꞌana ki a Ietū i te parau mo pūꞌoko haka tere o te merahi ꞌe o te vārua taꞌatoꞌa taꞌe takeꞌa e tātou haka tere ꞌi te ao nei ꞌe, takoꞌa, o te meꞌe taꞌatoꞌa o te ao; tōꞌona tōroꞌa, he tōroꞌa ꞌina e ko ravaꞌa e te rua ꞌi te hora nei ꞌe pe muꞌa ka oho ena. ꞌE i vaꞌai rō e te ꞌAtua i a Ietū mo Pūꞌoko o te nuꞌu taꞌatoꞌa haka moe i te manaꞌu ꞌi ruŋa i a ia; ²³a rāua he hakari ōꞌona. Mai i a ia e ravaꞌa ena e rāua i te ora ꞌe i te pūai; ꞌāꞌana, paꞌi, te vaꞌai i te ora ki te meꞌe taꞌatoꞌa o te ao.

He riva rahi o te ꞌAtua

¹ꞌI muꞌa ꞌā, ꞌi te hora kai haka moe ꞌana a kōrua i te manaꞌu ꞌi ruŋa i a Ietū, e tuꞌu rō ꞌana kōrua pa he nuꞌu mate mo te meꞌe o te ꞌAtua, te auraꞌa, ꞌina he ŋaroꞌa ꞌe ꞌina he haꞌatura ki a ia, ꞌi te meꞌe era ko ŋaro ꞌana kōrua ꞌi roto i te hara. ²Te noho iŋa era o kōrua e haka tano era ki te noho iŋa taꞌe tano o te nuꞌu o te ao nei taꞌe haŋa ki te ꞌAtua, ꞌe e aŋa era i te meꞌe haŋa ꞌa Rukifero, he pūꞌoko haka tere o te tātane e noho mai ena ꞌi roto i te tokerau. ꞌĀꞌana te haka tere i te manaꞌu o te nuꞌu taꞌe haꞌatura ki te ꞌAtua.

³Pē ira te noho iŋa o tātou taꞌatoꞌa ꞌi muꞌa ꞌā, ꞌi te hora kai haka moe ꞌana i te manaꞌu ꞌi ruŋa i a Ietū. E aŋa ꞌā a tātou i te meꞌe haŋa nō era o tātou. E haka tano ꞌana i te noho iŋa ki te meꞌe taꞌe tano manaꞌu ꞌe pohe nō o te hakari. ꞌI rā hora e tano mau rō ꞌā te ꞌAtua mo riri ꞌe mo haka ūtuꞌa mai i a tātou, pa he meꞌe ka aŋa ena ki te tētahi nuꞌu. ⁴ꞌE, ꞌi te riva rahi o te ꞌAtua ꞌe ꞌi te māhatu ꞌaroha ōꞌona, i haŋa rahi nō mai ⁵ꞌe, ka ai atu a tātou pa he nuꞌu mate mo te meꞌe ꞌāꞌana ꞌo te noho o tātou ꞌi roto i te hara, i vaꞌai nō mai e te ꞌAtua i te ora ꞌāpī ꞌina he hopeꞌa raꞌa ꞌo te ai o tātou ꞌa Ietū Kiritō. (Hai riva rahi mau nō, paꞌi, o te ꞌAtua, ko eꞌa ꞌana a kōrua mai roto i te ūtuꞌa o te hara ꞌe ko ravaꞌa ꞌana i te ora ꞌāpī ꞌina he hopeꞌa raꞌa).

⁶ꞌI te ai o tātou ꞌa Ietū Kiritō, e tuꞌu rō ꞌana pa he meꞌe ena: ko haka ora takoꞌa ꞌana e te ꞌAtua i a tātou ꞌi muri i a Ietū Kiritō, ꞌe ko haka noho takoꞌa ꞌana i a tātou ꞌi muri i a ia ꞌi te raŋi mo haka tere pa he ꞌariki ꞌi muri i a ia. ⁷Te meꞌe nei i aŋa ai e te ꞌAtua mo haka takeꞌa ki te nuꞌu taꞌatoꞌa, pe muꞌa ka oho ena, i te rahi o tōꞌona riva ꞌe o tōꞌona māhatu ꞌaroha mo tātou mo te nuꞌu ꞌa Ietū Kiritō. ⁸ꞌI te riva rahi o te ꞌAtua ko haka eꞌa ꞌana i a tātou mai roto i te ūtuꞌa o te hara ꞌo te haka moe o tātou i te manaꞌu ꞌi ruŋa i a Ietū. Taꞌe he meꞌe i ravaꞌa e tātou, he meꞌe o te ꞌAtua i vaꞌai mai, ⁹ꞌe taꞌe ꞌō ꞌo te aŋa o tātou i te meꞌe riva-riva. ꞌO ira ꞌina e tahi kope mo teꞌo-teꞌo ꞌo te eꞌa ōꞌona mai te ūtuꞌa o te hara. ¹⁰Ko haka ꞌāpī ꞌana te ꞌAtua i te tātou noho iŋa ꞌo te ai o tātou ꞌa Ietū Kiritō, ki aŋa ai a tātou i te meꞌe riva-riva, ꞌe ki haka tano ai i te meꞌe manaꞌu e ia ꞌi muꞌa ꞌā mo aŋa e tātou.

E tahi mau nō nūnaꞌa

¹¹E te nuꞌu taꞌe hūrio ē, kī mo kōrua e te hūrio: «nuꞌu taꞌe hore i te kiri o te kinoŋa» ꞌe kī mo rāua mau ꞌana ꞌo te tāpaꞌo i te rāua hakari: «he nuꞌu hore i te kiri o te kinoŋa», ¹²ka haka topa te kōrua manaꞌu: ꞌi muꞌa ꞌana, ꞌi te hora kai haka moe ꞌana a kōrua i te manaꞌu ꞌi ruŋa i a Ietū, taꞌe kōrua ꞌa Ietū Kiritō, ꞌe e topa kē rō ꞌana mai te itaraera. Te ⌊haka tere iŋa o te ꞌAtua ananake ko te taŋata⌋ ꞌe te meꞌe taꞌatoꞌa hōrea e ia mo te itaraera kai ai ꞌana, ꞌi rā hora, mo kōrua. E noho era kōrua ꞌina he ꞌite ko ai te ꞌAtua parautiꞌa, ꞌe ꞌina he manaꞌu pē nei ē: e ai rō ꞌō te meꞌe riva-riva mo kōrua pe muꞌa ka oho ena. ¹³ꞌE hora nei, ꞌi te ai o kōrua ꞌa Ietū Kiritō, ko haka hāhine ꞌana e te ꞌAtua i a kōrua ki a ia hai toto tehe era o Ietū ꞌi ruŋa i te tātaurō.

¹⁴Hai Ietū i poreko ai te haumārū ꞌi roto i te nuꞌu hūrio ꞌe taꞌe hūrio, ꞌe he riro nei ŋā nuꞌu he nūnaꞌa mau nō e tahi. Te meꞌe haka riri ꞌe haꞌataꞌa era i a rāua ko haka kore ꞌā. ¹⁵Pē nei te auraꞌa: ꞌi muꞌa ꞌā te hūrio e taꞌe haka au rō ꞌana ki te nuꞌu taꞌe hūrio ꞌo te taꞌe haꞌatura ki te ⌊haka tere iŋa ꞌa Mōtē⌋. ꞌE a Ietū, hai mate era ōꞌona ꞌi ruŋa i te tātaurō, i haka kore ai i te meꞌe ena he haꞌatura ki rā haka tere iŋa mo tano ki te mata o te ꞌAtua. I aŋa ai pē ira mo riro o te nuꞌu taꞌatoꞌa ꞌāꞌana, ka hūrio, ka taꞌe hūrio, e tahi mau nō nūnaꞌa, ꞌe mo haka poreko i te haumārū ꞌi roto i a rāua. ¹⁶Hai mate era ōꞌona ꞌi ruŋa i te tātaurō i haka kore ai e Ietū i te riri o te ŋā nūnaꞌa nei e rua, ꞌe i haka riva-riva ai i a rāua ki te ꞌAtua. ꞌE hora nei, te nuꞌu ꞌāꞌana, ka hūrio ka taꞌe hūrio, pa he hakari mau nō e tahi.

¹⁷A Ietū i oho mai ai ki te ao nei mo haka ꞌite mai pē hē te taŋata ana riva-riva ki te ꞌAtua. I haka ꞌite ai i te meꞌe nei ki a kōrua ki te nuꞌu taꞌe hūrio, nuꞌu ꞌava-ꞌava mai muri i a ia, ꞌe, takoꞌa, ki te hūrio, nuꞌu hāhine ki a ia. ¹⁸Hai meꞌe aŋa era e Ietū Kiritō e riva nō tātou, te hūrio ꞌe te nuꞌu taꞌe hūrio, mo haka hāhine ki te ꞌAtua Matuꞌa hai ⌊Vārua Maitai⌋ vaꞌai mai e ia. ¹⁹ꞌO ira, a kōrua, te nuꞌu taꞌe hūrio ⌊haka moe i te manaꞌu⌋ ꞌi ruŋa i a Ietū, taꞌe toe kōrua he hau kē mo te ꞌAtua, he taŋata henua ananake ko te tētahi atu nuꞌu haꞌataꞌa e te ꞌAtua māꞌana, ꞌe he ŋā poki ꞌāꞌana takoꞌa ananake ko rā ŋā nuꞌu.

²⁰A tātou, te nuꞌu taꞌatoꞌa haka moe i te manaꞌu ꞌi ruŋa i a Ietū, pa he māꞌea o te hare e tahi aŋa e te ꞌAtua. Te hāpī o te ⌊ꞌāpōtoro⌋ ꞌe o te perofeta pa he mekerā ꞌi ruŋa e haka tuꞌu ena i rā hare, ꞌe a Ietū pa he māꞌea matuꞌa haka noho hare. ²¹ꞌĀꞌana, paꞌi, te haka pi-piri ꞌe te haka hio-hio te oho i te hare nei ꞌātā ka riro rō he hare moꞌa e tahi, he kona mo haꞌamuri ki a ia. ²²ꞌE a kōrua, ꞌo te ai ꞌa Ietū Kiritō takoꞌa, e toꞌo ena i a kōrua e te ꞌAtua ꞌe e titi ena ki ruŋa i rā hare, he kona ꞌi ira a ia e noho ena hai Vārua Maitai.

Te aŋa ꞌa Pauro

¹A au, a Pauro, i puru nei ꞌi roto i te hare maꞌuꞌaurī ꞌo te aŋa ki a Ietū Kiritō mo te riva-riva o kōrua o te nuꞌu taꞌe he hūrio. ²Ko ꞌite ꞌana a kōrua: o te ꞌAtua i vaꞌai mai i te aŋa nei he haka ꞌite he oho atu i te nui-nui o tōꞌona riva rahi mo kōrua. ³ꞌĀꞌana i haka ꞌite mai i te parautiꞌa taꞌe haka ꞌite era ꞌi muꞌa ꞌā, he meꞌe nā ko pāpaꞌi ꞌiti-ꞌiti atu ꞌana e au. ⁴Ki taiꞌo, he aŋi-aŋi e kōrua e ꞌite rō ꞌana a au i rā parautiꞌa era o ruŋa i a Ietū, ⁵he meꞌe taꞌe haka ꞌite era ki te taŋata ꞌi muꞌa ꞌā, ꞌe, ꞌi te hora nei, ko haka ꞌite ꞌana e te ꞌAtua ki tāꞌana ⌊ꞌāpōtoro⌋ ꞌe ki te perofeta hai ⌊Vārua Maitai⌋. ⁶Rā parautiꞌa ko te meꞌe nei: mo haka moe o te nuꞌu taꞌe hūrio i te manaꞌu ꞌi ruŋa i a Ietū, mo rāua takoꞌa te haꞌamaitai ena o te ꞌAtua mo tōꞌona taŋata he itaraera. ꞌI te hora nei, te ⌊hūrio⌋ ꞌe te nuꞌu taꞌe hūrio ⌊haka moe i te manaꞌu⌋ ꞌi ruŋa i a Ietū he nūnaꞌa mau nō e tahi, ꞌe te meꞌe taꞌatoꞌa hōrea e te ꞌAtua mo te hūrio mo rāua takoꞌa, ꞌi te meꞌe era a rāua takoꞌa, paꞌi, ꞌa Ietū Kiritō. ⁷ꞌE, ꞌi tōꞌona riva rahi mōꞌoku, ko vaꞌai mai ꞌana i te aŋa he haka ꞌite he oho i te ⌊roŋo riva-riva o ruŋa i a Ietū⌋ hai pūai ōꞌona.

⁸Te tētahi nuꞌu haꞌataꞌa e te ꞌAtua māꞌana i hau rō atu ki a au. Ka ai atu pē ira, i vaꞌai nō mai ki a au e te ꞌAtua i te aŋa he haka ꞌite ki te nuꞌu taꞌe hūrio i te roŋo o ruŋa i te hauhaꞌa mo vaꞌai e te ⌊Kiritō⌋ ki a rāua, hauhaꞌa e ko ravaꞌa mo aŋi-aŋi hai manaꞌu taŋata mau nō. ⁹ꞌE ko vaꞌai takoꞌa mai ꞌana i te aŋa he haka aŋi-aŋi ōꞌoku ki te taŋata taꞌatoꞌa pē hē i haka tano ai e ia i tāꞌana meꞌe manaꞌu era mo aŋa. Te ꞌAtua, kope ꞌāꞌana i aŋa i te meꞌe taꞌatoꞌa, ko haka ꞌite mai ꞌana i tāꞌana meꞌe manaꞌu era mo aŋa, he meꞌe taꞌe haka ꞌite era ki te taŋata ꞌi muꞌa ꞌā, ¹⁰mo takeꞌa aŋe ai, ꞌi te hora nei, e te merahi ꞌe e te vārua taꞌatoꞌa taꞌe takeꞌa e tātou, hai nuꞌu haka moe i te manaꞌu ꞌi ruŋa i a Ietū, te mārama-rama o tāꞌana meꞌe i aŋa mo haka riva-riva i te taŋata ki a ia. ¹¹Ko manaꞌu era ꞌā e te ꞌAtua mo aŋa i te meꞌe nei mai muꞌa ꞌā, mai te hora kai aŋa ꞌana i te ao, ꞌe ko aŋa ꞌana hai meꞌe i aŋa e Ietū Kiritō, he Pūꞌoko Haka Tere o tātou, hora mate era ōꞌona ꞌi ruŋa i te tātaurō.

¹²ꞌE hora nei, ꞌo te ai o tātou ꞌa Ietū Kiritō ꞌe ꞌo te haka moe o tātou i te manaꞌu ꞌi ruŋa i a ia, e riva nei tātou mo pure mo haka hāhine ki te ꞌAtua ꞌina he riꞌa-riꞌa. ¹³ꞌE, ka ai atu ꞌī a au e ꞌamo atu ena i te ꞌati ꞌo te haka ꞌite ōꞌoku i te ⌊roŋo riva-riva o te ꞌAtua⌋, he ani atu a au mo taꞌe haka hōriŋa o te kōrua haka moe iŋa o te manaꞌu ꞌi ruŋa i a Ietū. E koa kōrua; te meꞌe nei mo te kōrua riva-riva.

He pure ꞌe he haꞌahana-hana iŋa ki te ꞌAtua

¹⁴E haka topa nei au i tōꞌoku manaꞌu ki te meꞌe taꞌatoꞌa nei, he tū-turi a au he pure ki te ꞌAtua Matuꞌa, ¹⁵Matuꞌa o te nuꞌu taꞌatoꞌa haka moe i te manaꞌu ꞌi ruŋa i a Ietū, ka ai atu a rāua ꞌi ruŋa i te raŋi ꞌo ꞌi ruŋa i te henua, ¹⁶ꞌe he ani a au ki a ia mo hāꞌūꞌū atu, hai pūai taꞌe pau ōꞌona ꞌe hai Vārua Maitai, mo haka hio-hio i te kōrua manaꞌu ꞌi ruŋa i a Ietū. ¹⁷He ani takoꞌa a au mo noho mo oho nō atu a Ietū Kiritō ꞌi roto i a kōrua hai haka moe i te manaꞌu ꞌi ruŋa i a ia, ꞌe mo haka pūai mo oho nō i te kōrua haŋa ki a ia ꞌe ki te rua. ¹⁸Pē ira ka aŋi-aŋi ena e kōrua ꞌe e te taꞌatoꞌa haka ꞌou atu nuꞌu haꞌataꞌa e te ꞌAtua māꞌana i te rahi o te haŋa o Ietū mo tātou, he meꞌe e ko oti ki te hora hopeꞌa. ¹⁹Ka ai atu ꞌina e tahi kope mo aŋi-aŋi riva-riva i te rahi o tōꞌona haŋa mo te taŋata, tāꞌaku meꞌe ani ki te ꞌAtua, he ꞌata haka ꞌite he oho atu ꞌi roto i te kōrua māhatu i te haŋa o Ietū Kiritō mo kōrua, ꞌātā ka riro rō te kōrua huru, pa he huru riva ōꞌona ꞌina e tahi hape.

²⁰Ki haꞌahana-hana tātou ki te ꞌAtua. I a ia, paꞌi, te pūai mo aŋa i te meꞌe ꞌata hau rō atu ki te meꞌe manaꞌu ꞌe ki te meꞌe no-noꞌi e tātou ki a ia hai pūai o tōꞌona Vārua Maitai noho ꞌe aŋa ꞌi roto i a tātou. ²¹Ka haꞌahana-hana te taŋata i te ꞌAtua, ꞌi te hora nei ꞌe ki te hopeꞌa raꞌa, ꞌi te pūai nui-nui ōꞌona haka takeꞌa e ia hai Ietū Kiritō ꞌe hai nuꞌu taꞌatoꞌa haka moe i te manaꞌu ꞌi ruŋa i a ia. Ka ai pē ira.

E tahi mau nō manaꞌu

¹A au, a Pauro, e puru atu ena ꞌo te haka ꞌite i te ⌊roŋo riva-riva o ruŋa i a Ietū Kiritō⌋, he ani atu: ꞌo te ai o kōrua he nuꞌu haꞌataꞌa e te ꞌAtua māꞌana, e ai te kōrua noho iŋa, noho iŋa tano o te nuꞌu ꞌāꞌana. ²ꞌIna ko manaꞌu i hau rō atu kōrua ki te rua, ꞌina ko ꞌōhumu, ꞌina ko riri tahaŋa, ꞌe e ꞌite kōrua mo haꞌaoromaꞌi hai haŋa i te rua. ³A kōrua, paꞌi, e tahi nō manaꞌu hai ⌊Vārua Maitai⌋; ꞌo ira, e ai te haumārū ꞌi roto i a kōrua ꞌo topa kē-kē rō kōrua. ⁴A tātou, te nuꞌu ꞌa Ietū Kiritō, pa he ŋā kona ena ꞌā o te hakari mau nō e tahi, ꞌe e tahi mau nō vārua haka tika i a tātou, he Vārua Maitai. ꞌE te meꞌe tiaki e tātou taꞌatoꞌa ko tū meꞌe ꞌā, he haꞌamaitai hōrea e te ꞌAtua mo te nuꞌu taꞌatoꞌa haꞌataꞌa e ia māꞌana. ⁵E tahi mau nō Pūꞌoko Haka Tere o tātou ko Ietū Kiritō, e tahi mau nō hāpī parautiꞌa o ruŋa i a ia, ꞌe e tahi mau nō ⌊papatito⌋. ⁶E tahi mau nō ꞌAtua, he Matuꞌa o tātou taꞌatoꞌa. A ia e noho ena ꞌi roto i a tātou hai Vārua Maitai, e haka tere mai ena, ꞌe e aŋa ena i tāꞌana meꞌe haŋa hai tātou.

⁷Ki te taꞌatoꞌa nō o tātou i vaꞌai mai ai e Ietū huru kē huru kē te meꞌe mo aŋa i te aŋa o te ꞌAtua, he meꞌe i haŋa e ia mo vaꞌai mai. ⁸ꞌO ira e kī ena ꞌi ruŋa i te Pāpaꞌi Moꞌa:

«Ko iri ꞌana ki te kona ruŋa nui e maꞌu rō ꞌā i te nuꞌu ꞌa-ꞌaru mai te tamaꞌi,

ꞌe ki tōꞌona taŋata i vaꞌai ai huru kē huru kē te meꞌe».

⁹¿He aha te haꞌaauraꞌa o te vānaŋa ena: «ko iri ꞌana»? Te haꞌaauraꞌa: mo iri i topa raꞌe mai ki ruŋa i te henua. ¹⁰Te kope topa mai era ko Ietū, ꞌe te kope iri era ki te kona ruŋa nui ko ia ꞌā, mo Pūꞌoko Haka Tere o te kona taꞌatoꞌa o te ao. ¹¹ꞌE ꞌāꞌana mau ꞌā i haꞌataꞌa, mai roto i te nuꞌu taꞌatoꞌa ⌊haka moe i te manaꞌu⌋ ꞌi ruŋa i a Ietū, i te nuꞌu ki a rāua i vaꞌai ai i tōꞌona pūai mo aŋa i te aŋa o te ꞌAtua, kē pa he ⌊ꞌāpōtoro⌋, kē pa he taŋata vānaŋa i te meꞌe haka ꞌite e te ꞌAtua ki a ia, kē pa he maꞌori haka ꞌite oho i te ⌊roŋo riva-riva o te ꞌAtua⌋, ꞌe kē pa he taŋata hāpaꞌo ꞌe hāpī i te taina. ¹²I aŋa ai a Ietū i te meꞌe nei mo hāpī ꞌe mo haka riva-riva o te nuꞌu nei i a tātou i te nuꞌu taꞌatoꞌa haꞌataꞌa e te ꞌAtua māꞌana, ki tano tahi ai a tātou mo aŋa takoꞌa ki a ia. Pē ira ka hio-hio ka oho ena a tātou te nuꞌu taꞌatoꞌa ꞌāꞌana, ¹³ꞌātā ka ai rō e tahi mau nō manaꞌu ꞌo te māhani ꞌe ꞌo te haka moe i te manaꞌu ꞌi ruŋa i te Poki o te ꞌAtua. ꞌE pē ira takoꞌa ka paꞌari ka oho ena te tātou manaꞌu o ruŋa i te meꞌe o te ꞌAtua, ꞌātā ka ai rō te tātou huru, huru riva, pa he huru riva o Ietū Kiritō, ꞌina e tahi hape. ¹⁴E ko ai haka ꞌou ia a tātou pa he ŋā poki e ko roa he huri te manaꞌu ꞌi te haka roŋo ki te hāpī taꞌe he parautiꞌa haka ꞌite e te nuꞌu mārama-rama ꞌite i te reo-reo. ¹⁵E ai rō tātou pa he nuꞌu paꞌari maꞌu hio-hio ꞌe haka ꞌite hai haŋa ki te nuꞌu i te hāpī parautiꞌa o te ꞌAtua, ꞌe te tātou huru e hāhine e oho rō ki te huru riva o Ietū Kiritō, Pūꞌoko o tātou. ¹⁶ꞌE, ꞌo te ai ōꞌona he Pūꞌoko o tātou ꞌe a tātou he hakari ōꞌona, māꞌana e haka tika e papa e haka riva-riva ꞌi tōꞌona kona i a tātou, he kona o tōꞌona hakari. ꞌE mo aŋa tahi o te ŋā kona nei i te rāua aŋa hai haŋa, he nui-nui ꞌe he pūai he oho te hakari.

Te noho iŋa ꞌāpī hai Ietū Kiritō

¹⁷Te meꞌe haŋa ꞌa Ietū Kiritō mo kī atu e au ko te meꞌe nei: ꞌina kōrua ko noho haka ꞌou pa he nuꞌu taꞌe ꞌite ko ai te ꞌAtua parautiꞌa. Te noho iŋa, paꞌi, o rā nuꞌu e haka tano ena ki te manaꞌu taꞌe hauhaꞌa ꞌe taꞌe hāꞌūꞌū i a rāua. ¹⁸ꞌE, ꞌi te pūꞌoko hio-hio, ꞌina he haŋa mo ꞌite ꞌe mo aŋi-aŋi o ruŋa i te meꞌe o te ꞌAtua. E pōhāhā nō ꞌā te manaꞌu, ꞌe ꞌina i a rāua te ora ꞌāpī ꞌina he hopeꞌa raꞌa vaꞌai e te ꞌAtua. ¹⁹ꞌIna he haꞌamā haka ꞌou ꞌi te meꞌe taꞌe tano aŋa e rāua; ko vaꞌai mau ꞌana i a rāua ki te rauhuru nō atu meꞌe taꞌe tano pohe e te hakari.

²⁰ꞌE taꞌe he meꞌe ena te meꞌe i hāpī atu, e te taina ē, hora haka ꞌite atu era o ruŋa i a Ietū Kiritō. ²¹ꞌI te ꞌite ōꞌoku e haka moe rō ꞌana kōrua i te manaꞌu ꞌi ruŋa i a Ietū, e ꞌite takoꞌa nei a au ko hāpī atu ꞌana i te parautiꞌa o ruŋa i a ia ꞌe o ruŋa i te noho iŋa tano haŋa e ia mo kōrua. ²²ꞌO ira, e haka rē te kōrua huru ꞌe te kōrua noho iŋa taꞌe tano o muꞌa ꞌā haka tere e te meꞌe taꞌe tano pohe e te hakari. O te meꞌe ena te reo-reo ꞌe te maꞌu i te taŋata a te ara taꞌe tano. ²³E haka rē mo te Vārua Maitai e haka ꞌāpī atu i te kōrua manaꞌu. ²⁴Te meꞌe mo takeꞌa ꞌi ruŋa i a kōrua he huru ꞌe he noho iŋa ꞌāpī tano ki te huru ꞌāpī vaꞌai atu e te ꞌAtua, pa he huru mau era ꞌā ōꞌona. Te noho iŋa nei he noho iŋa tī-tika, tano ki te mata o te ꞌAtua, ꞌina e tahi hape.

Te meꞌe mau mo aŋa

²⁵ꞌO ira, ꞌina ko reo-reo haka ꞌou; e kī te parautiꞌa ki te rua. Taꞌatoꞌa nō, paꞌi, a tātou o tū hakari ꞌā. ²⁶Mo riri, e uꞌi kōrua ꞌo hara; ꞌe ꞌina ko maꞌu te riri ki te rua mahana, ²⁷ꞌo ravaꞌa rō i a kōrua e Rukifero mo haka hara.

²⁸Te toke-toke, ꞌina ko toke haka ꞌou. E aŋa mo ravaꞌa o tāꞌana meꞌe ꞌe mo hāꞌūꞌū ki te nuꞌu veve.

²⁹ꞌIna ko parauꞌino ꞌe ꞌina ko kī i te vānaŋa mo taꞌe au o te rua. Te meꞌe mau nō o kōrua mo vānaŋa he meꞌe riva-riva mo hāꞌūꞌū i te rua.

³⁰ꞌIna ko haka māui-ui te māhatu o te Vārua Maitai hai aŋa i te meꞌe taꞌe tano; hai ia, paꞌi, te ꞌAtua i tāpaꞌo ai i a kōrua pa he taŋata ꞌāꞌana mo te mahana pe muꞌa ka oho ena ka haka oti ena e te ꞌAtua i tāꞌana meꞌe haꞌamata aŋa: he haka eꞌa mau rō ꞌāvai i a kōrua mai roto i te hara.

³¹E haka kore mai i a kōrua te ŋā meꞌe nei: he manaꞌu he oho o ruŋa i te meꞌe taꞌe tano aŋa atu e te rua, he hū he riri mo te rua, he tātake, he vā-vā, ꞌe he taꞌatoꞌa nō huru o te meꞌe taꞌe tano aŋa ki te rua. ³²E ai kōrua he nuꞌu riva, māhatu ꞌaroha, ꞌite i te haka rehu i te meꞌe taꞌe tano aŋa atu e te rua, pa he haka rehu iŋa era e te ꞌAtua i te kōrua hara hai Ietū Kiritō.

¹Pa he ŋā poki haŋa rahi kōrua o te ꞌAtua, e tuꞌu kōrua pē ia. ²E haka rē mo te haŋa e haka tika atu, pa he meꞌe aŋa e Ietū hora vaꞌai era i a ia ki te mate mo tātou. ꞌE tōꞌona mate era, mo te ꞌAtua, pa he tūtia ꞌeo.

³E ai te kōrua noho iŋa noho iŋa tano o te nuꞌu haꞌataꞌa e te ꞌAtua māꞌana. ꞌIna kōrua ko moe i te viꞌe ꞌe i te taŋata taꞌe he kenu ꞌe he viꞌe o kōrua, ꞌina kōrua ko aŋa i te tētahi haka ꞌou atu meꞌe taꞌe tano tuꞌu pē ira ꞌe, takoꞌa, ꞌina ko nou-nou. E hāpaꞌo te kōrua noho iŋa, ꞌo manaꞌu tāꞌue te nuꞌu pē nei ē: e aŋa rō ꞌana kōrua i te ŋā meꞌe nei.

⁴ꞌIna kōrua ko vānaŋa i te meꞌe hano-hano, ꞌina ko kī i te vānaŋa maꞌa-maꞌa ꞌe i te vānaŋa ꞌi-ꞌino. Te meꞌe o kōrua mo aŋa he haꞌahana-hana i te ꞌAtua.

⁵E ꞌite kōrua: te kope aŋa i te meꞌe taꞌe tano pohe e te hakari, te kope aŋa i te meꞌe hano-hano, ꞌe te kope haka rē i a ia ki te nou-nou, e ko oꞌo ki roto o te nūnaꞌa taŋata haka tere e Ietū ꞌe e te ꞌAtua. Te nou-nou, paꞌi, e tuꞌu rō ꞌā pa he meꞌe ena: e haꞌamuri ꞌana kōrua ki te ꞌītoro, ꞌe rā ꞌītoro he taoꞌa.

⁶E uꞌi kōrua ꞌo haka roŋo ki te reo-reo ana kī atu: te nuꞌu aŋa i te ŋā meꞌe ena ꞌina he hape. Te ꞌAtua e ko taꞌe haka ūtuꞌa i te nuꞌu taꞌe haꞌatura ki a ia aŋa i te ŋā meꞌe nei. ⁷ꞌO ira, e uꞌi ꞌo aŋa takoꞌa rō kōrua i te meꞌe taꞌe tano aŋa e tū nuꞌu era.

He noho iŋa ꞌi roto i te māꞌeha

⁸ꞌI muꞌa ꞌā e noho era kōrua ꞌi roto i te pōhāhā. ꞌE hora nei, ꞌi te ai o kōrua ꞌa Ietū Kiritō, ꞌi roto i te māꞌeha kōrua. ꞌO ira, e haka tere kōrua pa he nuꞌu noho ꞌi roto i te māꞌeha. ⁹ꞌE te meꞌe poreko mai te nuꞌu noho ꞌi roto i te māꞌeha he meꞌe riva-riva, tī-tika ꞌe parautiꞌa. ¹⁰Te auraꞌa: e ꞌite kōrua he aha te meꞌe mo koa o te tātou Pūꞌoko Haka Tere ko Ietū Kiritō, ꞌe ꞌai ka aŋa rō.

¹¹ꞌIna ko aŋa i te meꞌe taꞌe hauhaꞌa aŋa e te nuꞌu noho o roto i te pōhāhā. Te meꞌe o kōrua mo aŋa he hāꞌūꞌū ki a rāua mo aŋi-aŋi pē nei ē: te meꞌe aŋa o rāua meꞌe taꞌe tano. ¹²Te meꞌe aŋa e te nuꞌu era e naꞌa rō ꞌā ꞌo takeꞌa e te taŋata he meꞌe haꞌamā ꞌātā mo vānaŋa o ruŋa. ¹³ꞌE mo haka māꞌeha e te mōrī i te ŋā meꞌe nei, he takeꞌa e te taꞌatoꞌa i te rake-rake o nei ŋā meꞌe. ¹⁴O te mōrī, paꞌi, te haka takeꞌa i te huru parautiꞌa o te meꞌe. Pa he meꞌe kī ꞌi ruŋa i te ⌊Pāpaꞌi Moꞌa⌋:

«Ka ꞌara koe, e haꞌuru mai ena;

ka eꞌa mai roto i te nuꞌu mate,

ꞌe mā Ietū Kiritō e haka māꞌeha atu i a koe».

¹⁵ꞌO ira, e uꞌi te kōrua noho iŋa. ꞌIna ko ai pa he noho iŋa o te nuꞌu taꞌe ꞌite mo haka topa i te manaꞌu. ¹⁶Mo ai o te meꞌe riva-riva mo aŋa e kōrua, e aŋa; hora nei, paꞌi, nuꞌu rahi te nuꞌu aŋa i te meꞌe taꞌe tano. ¹⁷ꞌIna kōrua ko aŋa i te meꞌe ꞌina kai manaꞌu riva-riva hia; e noho e haka topa he aha te meꞌe haŋa mau o te ꞌAtua.

¹⁸ꞌIna ko unu ka taꞌero rō, ꞌo taꞌe tano te kōrua noho iŋa; e haka rē mo te ⌊Vārua Maitai⌋ e vaꞌai atu i tōꞌona pūai ꞌe e haka tere atu i a kōrua. ¹⁹Pē ira he hīmene kōrua i te vānaŋa o te ꞌAtua aŋa mo hīmene, i te hīmene kati-kati mo te ꞌAtua, ꞌe i te meꞌe haka hīmene e te Vārua Maitai koia ko haꞌahana-hana hai māhatu ki te ꞌAtua. ²⁰ꞌO te ai o kōrua ꞌa Ietū Kiritō, Pūꞌoko Haka Tere o tātou, e māuru-uru e oho ki te ꞌAtua Matuꞌa mo te meꞌe taꞌatoꞌa.

²¹E te taina, e moꞌa kōrua ꞌi roto i a kōrua ꞌana, ki takeꞌa ai e moꞌa rō ꞌana kōrua i a Ietū Kiritō.

He kenu ꞌe he viꞌe ⌊kiritiano⌋

²²Pa he haka rē iŋa o te viꞌe mo haka tere i a ia e Ietū, pē ira takoꞌa ana haka rē i a ia mo haka tere e tāꞌana kenu. ²³Te kenu, paꞌi, he pūꞌoko o te viꞌe, pē Ietū he pūꞌoko o te nūnaꞌa taŋata ⌊haka moe i te manaꞌu⌋ ꞌi ruŋa i a ia, hakari ōꞌona. A Ietū takoꞌa he kope haka eꞌa i a rāua mai roto i te ūtuꞌa o te hara ꞌe vaꞌai i te ora ꞌāpī ꞌina he hopeꞌa raꞌa. ²⁴Pa he haka rē iŋa o tātou o te nuꞌu haka moe i te manaꞌu ꞌi ruŋa i a Ietū mo haka tere mai e ia, pē ira takoꞌa ꞌana te ŋā viꞌe ana haka rē i a rāua mo haka tere e te rāua kenu ꞌi te meꞌe taꞌatoꞌa.

²⁵E te kenu, e haŋa ki te kōrua ŋā viꞌe, pa he haŋa iŋa ena ꞌā o Ietū ki a tātou, ki te nuꞌu taꞌatoꞌa haka moe i te manaꞌu ꞌi ruŋa i a ia, haka takeꞌa hai vaꞌai iŋa era i a ia ki te mate mo tātou. ²⁶I aŋa ai a Ietū i te meꞌe nei mo haka riro i a tātou i te nuꞌu taꞌatoꞌa haka moe i te manaꞌu ꞌi ruŋa i a ia he nuꞌu ꞌina e tahi hape ki te mata o te ꞌAtua hai ⌊papatito⌋ ꞌe hai vānaŋa era ꞌāꞌana, ²⁷mo riro tahi o tātou pa he viꞌe hāipo-ipo nehe-nehe māꞌana, ꞌina e tahi meꞌe taꞌe tano ꞌe ꞌina e tahi hape ꞌi te hora ka toꞌo ena i a tātou mo noho ꞌi muri i a ia. ²⁸Pē ira a kōrua te kenu ana haŋa ki te kōrua viꞌe, pa he haŋa iŋa mau ena ꞌā ki te kōrua hakari. Te kope haŋa ki tāꞌana viꞌe e haŋa ꞌā ki a ia mau ꞌā. ²⁹ꞌIna, paꞌi, e tahi taŋata taꞌe haŋa ki tōꞌona hakari. Te meꞌe aŋa he hāŋai ꞌe he hāpaꞌo, pa he hāpaꞌo iŋa o Ietū Kiritō i a tātou i te nūnaꞌa taŋata haka moe i te manaꞌu ꞌi ruŋa i a ia. ³⁰A tātou taꞌatoꞌa, paꞌi, he hakari ōꞌona; e tahi e tahi o tātou he kona o rā hakari. ³¹E kī rō ꞌana, paꞌi, ꞌi ruŋa i te Pāpaꞌi Moꞌa pē nei ē: «Te taŋata e hāipo-ipo ena, he haka rē i tōꞌona matuꞌa tane ꞌe i tōꞌona matuꞌa vahine mo noho ꞌi muri i tāꞌana viꞌe ꞌe ararua he riro he hakari mau nō e tahi». ³²Hai ŋā vānaŋa nei e takeꞌa ena i te nui-nui o te parautiꞌa taꞌe haka ꞌite mai era e te ꞌAtua ꞌi muꞌa ꞌā pē nei ē: a Ietū ꞌe te nūnaꞌa taŋata haka moe i te manaꞌu ꞌi ruŋa i a ia e tahi mau nō. ³³ꞌE mo kōrua takoꞌa te vānaŋa nei: e haŋa te kenu ki tāꞌana viꞌe, pa he haŋa iŋa mau era ꞌā ōꞌona ki a ia, ꞌe te viꞌe, e ꞌite mo moꞌa i tāꞌana kenu.

He poki ꞌe he matuꞌa ⌊kiritiano⌋

¹E te ŋā poki, ꞌo te ai o kōrua ꞌa Ietū Kiritō, e haꞌatura ki te kōrua matuꞌa, he meꞌe tano mo aŋa e kōrua. ²ꞌĀꞌana, paꞌi, i kī ꞌi ruŋa i te ⌊Pāpaꞌi Moꞌa⌋: «E moꞌa te kōrua matuꞌa tane ꞌe te kōrua matuꞌa vahine». Te roŋo nei he roŋo raꞌe o te ꞌAtua ai o te hōrea mo te nuꞌu haꞌatura. ³Pē nei e kī ena:

«Mo moꞌa ōꞌou i tuꞌu matuꞌa,

he haꞌamaitai ꞌe he haka roa-roa au i tuꞌu noho iŋa ꞌi te ao nei».

⁴ꞌE a kōrua, e te matuꞌa tane ē, ꞌina ko haka riri i te kōrua ŋā poki. Te tano mau: e hāpaꞌo e hāpī i a rāua hai oho iŋa tano haŋa e te tātou Pūꞌoko Haka Tere ko Ietū Kiritō.

He ꞌekaravo ꞌe he nuꞌu haka aŋa i a rāua

⁵E te ꞌekaravo, e haꞌatura ki te nuꞌu haka aŋa atu i a kōrua hai moꞌa ꞌe hai māhatu pa he meꞌe: e tāvini ꞌana a kōrua ki a Ietū. ⁶E aŋa riva-riva te kōrua aŋa, taꞌe nō ꞌō ꞌi te hora ꞌi muri i a kōrua te nuꞌu haka aŋa atu ki koa ai a rāua. E aŋa kōrua pa he tāvini o Ietū aŋa hai māhatu i te meꞌe haŋa e te ꞌAtua. ⁷E aŋa riva-riva kōrua hai koa, pa he meꞌe: e tāvini ꞌana kōrua ki a Ietū, taꞌe ꞌō ki te taŋata. ⁸E ꞌite: e ai rō ꞌā te meꞌe mo vaꞌai e te ꞌAtua ki te taŋata, ka ꞌekaravo ꞌo ka taꞌe ꞌekaravo, ꞌo te meꞌe riva-riva aŋa e rāua.

⁹E a kōrua, e te nuꞌu haka aŋa ē, e uꞌi e hāpaꞌo riva-riva te kōrua ꞌekaravo, ꞌe ꞌina ko haka riꞌa-riꞌa. E manaꞌu: a Ietū Kiritō ꞌi te raŋi he Pūꞌoko Haka Tere o kōrua ꞌe o rāua takoꞌa, ꞌe mōꞌona pē tū huru tahi ꞌā te taŋata.

He meꞌe vaꞌai mai ꞌo ravaꞌa tātou e Rukifero

¹⁰E te taina, te vānaŋa hopeꞌa ꞌāꞌaku ka kī atu ena: ꞌi te hora taꞌatoꞌa e haka rē mā Ietū e haka haŋu atu hai pūai nui-nui ōꞌona. ¹¹E uꞌi e hāpaꞌo kōrua hai meꞌe taꞌatoꞌa vaꞌai atu e ia mo haka hio-hio, ꞌo reo-reo atu kōrua e Rukifero. ¹²Taꞌe a tātou e moto ꞌā ki te taŋata; e moto ꞌana ki te tātane, te auraꞌa, ki a Rukifero ꞌe ki tāꞌana vaꞌehau taꞌatoꞌa ꞌina he takeꞌa mai haka tere i te nuꞌu noho ꞌi roto i te pōhāhā. ¹³E hāpaꞌo kōrua hai meꞌe taꞌatoꞌa vaꞌai atu e te ꞌAtua mo haka hio-hio ꞌi te hora moto atu e Rukifero. Pē ira e ko ravaꞌa i a kōrua.

¹⁴E maꞌu hio-hio te parautiꞌa o te ꞌAtua pa he vaꞌehau e haratuꞌa ena i te pena mo haka noho i tōꞌona kahu ꞌi te hora oho ki te tamaꞌi. E tano te kōrua noho iŋa ki te mata o te ꞌAtua, ki riro ai rā noho iŋa he meꞌe mo hāpaꞌo atu i a kōrua pa he kahu aŋa hai ꞌaurī e hāpaꞌo ena i te uma o te vaꞌehau. ¹⁵E noho ꞌi roto i te haumārū vaꞌai atu e te ⌊roŋo riva-riva o ruŋa i a Ietū⌋, mo hio-hio o kōrua a te ara o te ꞌAtua, pa he vaꞌehau e uru ena i te kirivaꞌe mo haka hio-hio i tōꞌona rei iŋa ꞌi te hora oho ki te tamaꞌi. ¹⁶E haka moe e oho te kōrua manaꞌu ꞌi ruŋa i a Ietū. Pē ira kōrua ka hāpaꞌo ena i a kōrua ꞌo hara ꞌi te hora haka ꞌatu atu e Rukifero, pa he vaꞌehau e maꞌu ena ꞌi te rima i te meꞌe ꞌaurī mo puru i te teꞌa pu-puhi ki a ia ꞌi te hora o te tamaꞌi. ¹⁷ꞌE ꞌina ko rehu ki te hora hopeꞌa pē nei ē: ko eꞌa ꞌana a kōrua mai roto i te ūtuꞌa o te hara ꞌe ko ravaꞌa ꞌana i te ora ꞌāpī ꞌina he hopeꞌa raꞌa vaꞌai e te ꞌAtua. Pē ira kōrua ka hāpaꞌo ena mai te reo-reo ꞌa Rukifero, pa he vaꞌehau e puꞌa ena hai haꞌu ꞌaurī mo hāpaꞌo i tōꞌona pūꞌoko. ꞌE e ꞌite kōrua mo moto ki a Rukifero hai vānaŋa o te ꞌAtua, he hoe vaꞌai atu e te ⌊Vārua Maitai⌋, pa he moto iŋa o te vaꞌehau hai hoe ꞌi te hora o te tamaꞌi.

¹⁸E te taina, ꞌina kōrua ko haka rē i te pure; e ani e oho ki te ꞌAtua hai pūai o te Vārua Maitai. E uꞌi ꞌo hōriŋa rō ꞌe ꞌo oho kē rō te manaꞌu. E pure mo te nuꞌu taꞌatoꞌa haꞌataꞌa e te ꞌAtua māꞌana. ¹⁹E pure takoꞌa mōꞌoku, ki vaꞌai mai ai e te ꞌAtua i te vānaŋa tano mo kī ꞌi te hora ka vānaŋa era au o ruŋa i te roŋo riva-riva ꞌāꞌana, he parautiꞌa taꞌe haka ꞌite mai era ꞌi muꞌa ꞌā, ꞌe ki vaꞌai takoꞌa mai ai i te pūai ꞌo riꞌa-riꞌa a au ꞌi rā hora. ²⁰ꞌO te haka ꞌite ōꞌoku i te ⌊roŋo riva-riva o te ꞌAtua⌋, he aŋa i vaꞌai mai e ia, e puru atu ena a au. E pure kōrua mōꞌoku mo taꞌe riꞌa-riꞌa ōꞌoku ꞌi te hora haka ꞌite o ruŋa i a Ietū Kiritō.

He ꞌaroha

²¹Mo te tātou taina haŋa rahi nei ko Tīkiko e maꞌu atu i te parau ꞌāpī o ruŋa i te meꞌe taꞌatoꞌa topa mai ki a au. E hāꞌūꞌū rō mai ꞌana a Tīkiko, ꞌe he tāvini takoꞌa pē au o te ꞌAtua ꞌite i te haka tano i tāꞌana meꞌe kī. ²²ꞌO ira i uŋa atu ena e au mo haka ꞌite atu pē hē a mātou. Pē ira he koa a kōrua ꞌe he pūai te manaꞌu ꞌi ruŋa i a Ietū.

²³Mo te ꞌAtua Matuꞌa ꞌe mo te tātou Pūꞌoko Haka Tere ko Ietū Kiritō e vaꞌai atu i te haumārū ꞌe i te haŋa koia ko haka pūai i te kōrua manaꞌu ꞌi ruŋa i a rāua. ²⁴Ka ai te riva rahi o te ꞌAtua ꞌi ruŋa i te nuꞌu taꞌatoꞌa haŋa hai māhatu ki a Ietū Kiritō, Pūꞌoko Haka Tere o tātou.