He parau pāpaꞌi e Pauro ki te taina o
Kōrosa
ꞌI te kona nei ko Kōrosa i poreko ai e tahi o te nūnaꞌa ⌊kiritiano⌋ raꞌe o roto o te nuꞌu taꞌe he ⌊hūrio⌋. O te kope e tahi o nei kona te ꞌīŋoa ko Epafara i haka ꞌite raꞌe ki te nuꞌu nei o ruŋa i a Ietū ꞌe i kī ki a rāua mo ⌊haka moe i te manaꞌu⌋ ꞌi ruŋa (1.7). I ŋaroꞌa era e te nuꞌu nei i te parautiꞌa o ruŋa i a Ietū, he toꞌo mo rāua hai koa i te hāpī nei ꞌe he haka moe i te manaꞌu ꞌi ruŋa i a Ietū. Ka ai atu pē ira, pe muꞌa ꞌiti i haꞌamata i haka tapa ai a rāua mai te hāpī nei. ꞌO ira a Pauro, ꞌi ruŋa i te parau nei, i haka manaꞌu haka ꞌou ai ki rā ŋā taina pē nei ē: hai toto tehe era o Ietū ꞌi ruŋa i te tātaurō te ꞌAtua i haka riva-riva haka ꞌou ai ki a ia i te meꞌe taꞌatoꞌa o te ao ꞌe o ruŋa i te raŋi ꞌava-ꞌava mai i a ia hai hara era o ⌊ꞌĀtamu⌋ (1.20).
Te tētahi nuꞌu o Kōrosa e hāpī ꞌā pē nei ē: e ai rō ꞌā te vārua pūai rahi. O ruŋa i te hāpī nei te hatu ꞌa Pauro mo te taina o Kōrosa: mo taꞌe haka roŋo ki te nuꞌu era ꞌe mo manaꞌu pē nei ē: a Ietū Kiritō he ꞌAtua ꞌe ꞌata hau rō atu ꞌi te pūai ki te vārua (2.8–10,15). He hatu takoꞌa mo taꞌe haka rē i a rāua mo reo-reo e te nuꞌu kī e ai rō ꞌana te meꞌe mo ꞌāmui ki te haka moe iŋa o te manaꞌu ꞌi ruŋa i a Ietū, mo tano iho o rāua ki te mata o te ꞌAtua (2.16–17).
Te meꞌe vānaŋa rahi o ruŋa i te parau nei he noho iŋa ꞌāpī tano mo te nuꞌu ꞌa Ietū Kiritō. He haka aŋi-aŋi e Pauro ki te nuꞌu o Kōrosa ꞌe ki te nuꞌu kiritiano taꞌatoꞌa: a rāua ko mate ꞌana, te auraꞌa, ko haka rē ꞌana i te rāua noho iŋa raꞌe. ꞌE hora nei, te rāua noho iŋa pa he meꞌe: ꞌi muri i a Ietū Kiritō a rāua ꞌe ꞌi muꞌa o te ꞌAtua (3.3–4). Pē nei, paꞌi, e kī ena: «ꞌI te noho iŋa ꞌāpī nei, ꞌina te ꞌAtua he tapa atu hoki a koe he hūrio ꞌo taꞌe he hūrio, he kope hore i te kiri o te kinoŋa ꞌo taꞌe hore, he taŋata o te rua henua, ꞌo he kope hāpī kore, he ꞌekaravo ꞌo taꞌe he ꞌekaravo. Te meꞌe hauhaꞌa mau nō ko Ietū, ꞌe a ia ꞌi roto i te nuꞌu taꞌatoꞌa haka moe i te manaꞌu ꞌi ruŋa i a ia» (3.11).
Mo haka mao i te parau nei he ꞌaroha a Pauro ki te nuꞌu taꞌatoꞌa haka moe i te manaꞌu ꞌi ruŋa i a Ietū o Kōrosa hai ꞌīŋoa o te nuꞌu taꞌatoꞌa o muri i a ia, ꞌe he ani mo taiꞌo i tāꞌana parau nei ki te taina o te kona era ko Rāōrītea (4.16).
1He ꞌaroha
1A au, a Pauro, ⌊ꞌāpōtoro⌋ ꞌa Ietū Kiritō hai haŋa o te ꞌAtua, ꞌe te tātou taina ko Timoteo, 2he ꞌaroha atu ki a kōrua ki te nuꞌu taꞌatoꞌa haꞌataꞌa e te ꞌAtua māꞌana o Kōrosa, taina ⌊haka moe i te manaꞌu⌋ ꞌi ruŋa i a Ietū taꞌe haka rē i a ia ki te hora hopeꞌa. Ka ai ꞌi ruŋa i a kōrua te riva rahi ꞌe te haumārū o te ꞌAtua, Matuꞌa o tātou.
He māuru-uru ꞌe he pure iŋa o Pauro
3E pure nei a mātou, te nuꞌu taina o nei, mo kōrua, e māuru-uru rō ꞌana ki te ꞌAtua, Matuꞌa o te tātou Pūꞌoko Haka Tere ko Ietū Kiritō. 4Ko ŋaroꞌa ꞌana, paꞌi, e mātou pē nei ē: e haka moe rō ꞌana kōrua i te manaꞌu ꞌi ruŋa i a Ietū, ꞌe e haŋa rō ꞌana kōrua ki te nuꞌu taꞌatoꞌa haꞌataꞌa e te ꞌAtua māꞌana, 5ꞌo te ai e tiaki takoꞌa rō ꞌana kōrua ki te meꞌe hōrea mai e ia mo tātou ꞌi te raŋi. A kōrua ko ŋaroꞌa era ꞌana o ruŋa i te meꞌe nei hora haka ꞌite atu era i te roŋo parautiꞌa o te ꞌAtua 6tuꞌu atu era ki a kōrua. Te roŋo riva-riva nei o ruŋa i a Ietū nā ko ꞌite ko oho ꞌana ꞌi te kona taꞌatoꞌa o te ao koia ko te haka ꞌāpī ko te oho i te noho iŋa o te nuꞌu haka moe i te manaꞌu ꞌi ruŋa i a ia, pa he meꞌe topa atu ki a kōrua hora aŋi-aŋi era he parautiꞌa mau ꞌā te vānaŋa ŋaroꞌa e kōrua o ruŋa i te riva rahi o te ꞌAtua mo te taŋata. 7Te meꞌe ena ꞌa Epafara, kope haŋa rahi o mātou aŋa takoꞌa ki te ꞌAtua, i hāpī atu. A ia he tāvini parautiꞌa ꞌa Ietū Kiritō. 8ꞌĀꞌana i maꞌu mai i te parau ꞌāpī o ruŋa i a kōrua ꞌe o ruŋa i te kōrua haŋa haka poreko e te ⌊Vārua Maitai⌋ ꞌi roto i a kōrua mo te nuꞌu taꞌatoꞌa haꞌataꞌa e te ꞌAtua māꞌana.
9ꞌO ira, mai te hora ꞌite era o mātou o ruŋa i a kōrua, e pure e oho nō nei ki te ꞌAtua mo vaꞌai atu e ia, hai Vārua Maitai, i te ꞌite ꞌe i te mārama-rama mo aŋi-aŋi riva-riva i tāꞌana meꞌe haŋa mo aŋa e kōrua. 10Pē ira te kōrua noho iŋa ka ai ena noho iŋa tano o te nuꞌu ꞌa Ietū Kiritō, ꞌe ka aŋa ka oho mau nō ena kōrua i te meꞌe mo koa ōꞌona ꞌe i te meꞌe riva-riva mo hāꞌūꞌū ki te rua. ꞌE pē ira takoꞌa ka ꞌata māhani ka oho ena kōrua i te ꞌAtua.
11ꞌI roto i te mātou pure e no-noꞌi rō ꞌana a mātou ki te ꞌAtua mo haka haŋu atu i a kōrua hai pūai nui-nui ōꞌona. Pē ira he ꞌite kōrua mo ꞌamo hai pūai, hai haumārū ꞌe hai koa i te ꞌati taꞌatoꞌa nō era mo topa atu ꞌi ruŋa i a kōrua 12koia ko māuru-uru ki te ꞌAtua Matuꞌa ꞌo te haka riro atu i a kōrua he nuꞌu tano mo ravaꞌa takoꞌa i te meꞌe hōrea era e ia mo te nuꞌu haꞌataꞌa māꞌana, he nuꞌu o tōꞌona haka tere iŋa, haka tere iŋa o te māꞌeha. 13O te ꞌAtua, paꞌi, i haka eꞌa i a tātou mai te rima o te kope te haka tere iŋa ꞌi roto i te pōhāhā, ꞌe he haka noho i a tātou ꞌi roto i te haka tere iŋa o tāꞌana Poki haŋa rahi ko Ietū Kiritō, 14kope hai toto tehe era ōꞌona ꞌi ruŋa i te tātaurō i ꞌauhau ai i te tātou hara mo haka eꞌa i a tātou mai roto i te pōhāhā ꞌe mo haka rehu e te ꞌAtua i te tātou hara.
¿Ko ai a Ietū Kiritō?
15O te ⌊Kiritō⌋ te haka ꞌite mai i te huru o te ꞌAtua, kope ꞌina he takeꞌa e tātou. Te Kiritō ko ai era ꞌana ꞌi raꞌe ki te aŋa i te ao, ꞌe i hau rō atu ki te meꞌe taꞌatoꞌa aŋa e te ꞌAtua. 16O te ꞌAtua i haka aŋa ki te Kiritō i te meꞌe taꞌatoꞌa e ai ena: te meꞌe ꞌi ruŋa i te raŋi ꞌe te meꞌe ꞌi ruŋa i te henua, te meꞌe takeꞌa ꞌe te meꞌe taꞌe takeꞌa koia ko te rāua pūꞌoko haka tere taꞌatoꞌa. Te meꞌe taꞌatoꞌa i aŋa ai e te ꞌAtua hai ia ꞌe māꞌana.
17Ko ai era ꞌana te Kiritō ki te meꞌe taꞌatoꞌa, ꞌe hai ia e noho tahi ena ꞌi tōꞌona kona. 18A ia he Pūꞌoko Haka Tere o tātou o te nuꞌu taꞌatoꞌa haka moe i te manaꞌu ꞌi ruŋa i a ia, ꞌe a tātou pa he hakari ōꞌona. Māꞌana e haka tika mai, pa he pūꞌoko e haka tika ena i tōꞌona hakari. ꞌE a ia takoꞌa he kope raꞌe i haka ora e te ꞌAtua mai te mate, ki ai ai ko ia te raꞌe ꞌi te meꞌe taꞌatoꞌa.
19I a Ietū Kiritō te huru ꞌe te pūai taꞌatoꞌa o te ꞌAtua; pē ira i haŋa ai e te ꞌAtua. 20ꞌE hai Ietū, hai toto tehe era ōꞌona ꞌi ruŋa i te tātaurō, te ꞌAtua i haka riva-riva haka ꞌou ai ki a ia i te meꞌe taꞌatoꞌa o te ao ꞌe o ruŋa i te raŋi ꞌava-ꞌava mai i a ia ꞌi te hara.
He haka riva-riva iŋa o te ꞌAtua i a tātou ki a ia
21E te taina, ꞌi muꞌa ꞌā e ꞌava-ꞌava rō ꞌana a kōrua mai te ꞌAtua, ꞌe hai meꞌe taꞌe tano aŋa e kōrua, e takeꞌa era e hārui rō ꞌana a kōrua i a ia hai tuaꞌivi. 22ꞌE hora nei, te ꞌAtua ko haka riva-riva haka ꞌou ꞌana i a kōrua ki a ia hai mate iŋa era o Ietū Kiritō pa he taŋata. Te meꞌe nei i aŋa ai ki tuꞌu ai a kōrua ki muꞌa o te ꞌAtua e maꞌitaki rō ꞌā ꞌina e tahi hara, ꞌe ꞌina e tahi hape mo tuhi atu. 23Te meꞌe nō, e haka hio-hio e oho te kōrua manaꞌu ꞌi ruŋa i a Ietū ꞌe e tiaki e oho ki te meꞌe taꞌatoꞌa hōrea e te ꞌAtua mo te nuꞌu ꞌāꞌana, meꞌe i ꞌite e kōrua ꞌi te hora ŋaroꞌa era i te ⌊roŋo riva-riva o ruŋa i a Ietū⌋, roŋo haka ꞌite oho a te kona taꞌatoꞌa o te ao, ꞌe roŋo hāꞌūꞌū e au, e Pauro, mo haka ꞌite.
Te aŋa ꞌa Pauro
24E koa rō ꞌana a au ꞌi te meꞌe era ko ꞌite ꞌana e au: te ꞌati nei e ꞌamo atu ena mo te kōrua riva-riva. Ko vaꞌai tahi ꞌana, paꞌi, a au i a au mo ꞌamo i te ꞌati taꞌatoꞌa haŋa e te Kiritō mo ꞌamo e au, mo te riva-riva o te nuꞌu taꞌatoꞌa haka moe i te manaꞌu ꞌi ruŋa i a ia. 25Ko haka riro ꞌana, paꞌi, a au i a au he tāvini o te nuꞌu nei ꞌi te hora vaꞌai mai e te ꞌAtua i te aŋa he haka ꞌite tahi i tāꞌana roŋo ki a kōrua ki te nuꞌu taꞌe hūrio. 26Nei roŋo he parautiꞌa taꞌe haka ꞌite era e te ꞌAtua ꞌi muꞌa ꞌā ki te taŋata ꞌe, hora nei, nā ko haka ꞌite mai ꞌana ki a tātou ki tāꞌana nuꞌu, 27nuꞌu ki a rāua te ꞌAtua i haŋa ai mo haka ꞌite pē nei ē: te hauhaꞌa taꞌatoꞌa o rā parautiꞌa mo te nuꞌu taꞌe hūrio takoꞌa. ꞌE rā parautiꞌa ko te meꞌe nei: a Ietū Kiritō e noho takoꞌa rō ꞌana, hai Vārua Maitai, ꞌi roto i a kōrua i te nuꞌu taꞌe hūrio. ꞌE hai noho atu ōꞌona ꞌi roto i a kōrua he ꞌite kōrua pē nei ē: pe muꞌa ka oho ena a kōrua takoꞌa ꞌi roto i tōꞌona nui-nui, te auraꞌa: i a kōrua takoꞌa tōꞌona huru riva.
28ꞌI te kona taꞌatoꞌa, e hāpī e oho nei mātou o ruŋa i a Ietū Kiritō, ꞌe hai mārama-rama vaꞌai mai e te ꞌAtua, e hatu e hāpī nei ki te nuꞌu mo haka moe i te rāua manaꞌu ꞌi ruŋa i a Ietū. Te meꞌe haŋa, paꞌi, o mātou he maꞌu i te nuꞌu taꞌatoꞌa ꞌa Ietū Kiritō ki muꞌa o te ꞌAtua ko paꞌari ꞌana ꞌi te meꞌe o te ꞌAtua ꞌe ꞌina e tahi hape. 29Mo te meꞌe nei a au e aŋa nei hai haŋu ꞌe hai pūai vaꞌai mai e Ietū.
21E haŋa rō ꞌana a au mo ꞌite o kōrua: ꞌī a au e aŋa e oho nō ꞌā mo kōrua mo te taina o Kōrosa, mo te nuꞌu ⌊haka moe i te manaꞌu⌋ ꞌi ruŋa i a Ietū o Rāōrītea, ꞌe mo te nuꞌu taꞌatoꞌa pē kōrua kai takeꞌa ꞌana i a au. 2Tāꞌaku meꞌe haŋa: he pūai o te kōrua manaꞌu ꞌi ruŋa i te ꞌAtua, he pūai he oho te kōrua haŋa ꞌi roto i a kōrua, mo ai e tahi mau nō manaꞌu, ꞌe he ŋaroꞌa e kōrua i te koa ꞌe i te ora o te nuꞌu aŋi-aŋi riva-riva o ruŋa i te parautiꞌa taꞌe haka ꞌite e te ꞌAtua ꞌi muꞌa ꞌā, ꞌe nei parautiꞌa ko Ietū Kiritō. 3Māꞌana mau nō e hāꞌūꞌū mai mo aŋi-aŋi riva-riva i te roŋo nui-nui nei. 4E kī atu ena a au i te meꞌe nei ꞌo reo-reo atu kōrua e te nuꞌu hai vānaŋa nehe-nehe. 5ꞌE, ka taꞌe ai atu a au ꞌi muri i a kōrua, he manaꞌu nō atu tāꞌaku aŋa ꞌe e koa rō ꞌā a au ꞌo te ai o kōrua e tahi mau nō manaꞌu ꞌe ꞌo te haka hio-hio i te kōrua manaꞌu ꞌi ruŋa i a Ietū.
He noho iŋa ꞌāpī
6A kōrua ko toꞌo ꞌana i a Ietū Kiritō mo Pūꞌoko Haka Tere o kōrua. ꞌO ira, e haka tere kōrua pa he nuꞌu ꞌāꞌana. 7Pa he meꞌe hāpī atu ki a kōrua, e ꞌata hāpī e oho kōrua o ruŋa i a Ietū koia ko haꞌatura ki a ia, mo ꞌata hio-hio o te kōrua manaꞌu ꞌi ruŋa i a ia, pa he hio-hio iŋa ena o te tumu ꞌi te aka e nui-nui e oho ena a raro. ꞌE e māuru-uru e oho kōrua ki te ꞌAtua ꞌi tōꞌona riva rahi mo kōrua.
8E uꞌi kōrua e te nuꞌu ꞌo reo-reo atu hai hāpī taꞌe parautiꞌa, he haka tere iŋa poreko mai te manaꞌu taŋata nō, ꞌo he meꞌe haka manaꞌu e te tātane haka tere i te ao nei. Te hāpī nei taꞌe ꞌa Ietū Kiritō.
9Te huru ꞌe te pūai taꞌatoꞌa, paꞌi, o te ꞌAtua i a Ietū Kiritō, ka ai atu tōꞌona hakari hakari taŋata. 10ꞌE, ꞌo te ai o kōrua ꞌāꞌana, ko ai tahi ꞌana i a kōrua te meꞌe mo tano o kōrua ꞌe o te kōrua noho iŋa ki te mata o te ꞌAtua. A Ietū Kiritō, paꞌi, he Pūꞌoko Haka Tere o te meꞌe taꞌatoꞌa, ꞌātā o te ŋā kope ena ꞌina he takeꞌa mai haka tere i te ao nei.
11ꞌE a kōrua, ka ai atu taꞌe he hūrio, ko tāpaꞌo ꞌana i a kōrua e te ꞌAtua pa he nuꞌu ꞌāꞌana. ꞌE te tāpaꞌo nei taꞌe pa he tāpaꞌo o te ⌊hūrio⌋ ꞌi ruŋa i te hakari, he hore i te kiri o te kinoŋa, he tāpaꞌo aŋa e te ꞌAtua ꞌi roto i te kōrua māhatu. Pē nei te auraꞌa: i haka moe era kōrua i te manaꞌu ꞌi ruŋa i a Ietū, he haka kore e te ꞌAtua mai ruŋa i a kōrua i te pūai o te meꞌe taꞌe tano pohe e te hakari. 12ꞌE, i ⌊papatito⌋ era, e tuꞌu rō ꞌā pa he meꞌe: ko mate ꞌā, ko tanu ꞌā, ꞌe ko ora haka ꞌou ꞌā kōrua mai te mate ꞌi muri i a Ietū ꞌo te haka moe i te manaꞌu ꞌi ruŋa i te parautiꞌa nei: e ai rō ꞌā te pūai o te ꞌAtua mo haka ora i te taŋata mai te mate.
13ꞌI muꞌa ꞌā, a kōrua, te nuꞌu taꞌe he hūrio, pa he nuꞌu mate mo te meꞌe o te ꞌAtua. E noho era, paꞌi, a kōrua ꞌi roto i te hara, ꞌe te meꞌe haka tere atu he meꞌe taꞌe tano pohe e te hakari, meꞌe kai haka kore ꞌana e te ꞌAtua mai ruŋa i a kōrua. ꞌE, hora nei, ko haka ora ꞌana e te ꞌAtua i a kōrua ꞌi muri i a Ietū Kiritō, te auraꞌa, ko vaꞌai atu ꞌana i te noho iŋa ꞌāpī. Te ꞌAtua, paꞌi, i haka kore tahi ai i te tātou hara, 14pa he haka kore iŋa ena i te tārahu ꞌi te hora ꞌauhau. Pē nei te auraꞌa: hai mate era o Ietū ꞌi ruŋa i te tātaurō i ꞌauhau ai i te tātou hara, ꞌe ko tuꞌu ꞌana pa he meꞌe: ko veo takoꞌa ꞌana ꞌi ruŋa i te tātaurō i te parau ꞌi ruŋa e pāpaꞌi tahi rō ꞌā te tātou hara. 15ꞌI rā hora i haka kore takoꞌa ai e te ꞌAtua i te pūai ꞌe i te tōroꞌa mai ruŋa i te ŋā kope ena ꞌina he takeꞌa mai haka tere i te ao nei ꞌe he haka takeꞌa mai ꞌina rāua pūai toe.
16ꞌO ira, ꞌina kōrua ko tapa atu te kī o te nuꞌu i te taꞌe haꞌatura o kōrua ki te rāua haka tere iŋa o ruŋa i te meꞌe mo kai ꞌe mo unu, o ruŋa i te mahana aŋa i te ŋoŋoro mo te ꞌAtua, ꞌo i te ŋoŋoro o te māhina he ꞌōhiro ꞌe o ruŋa i te ⌊mahana haka ora⌋. 17Te meꞌe taꞌatoꞌa nei he ꞌata e tahi o te meꞌe parautiꞌa mo oho mai, ꞌe rā meꞌe ko Ietū Kiritō. 18ꞌIna takoꞌa ko tapa atu i te nuꞌu taꞌe haka au atu i a kōrua ꞌi te taꞌe haꞌamuri pē rāua ki te merahi. E haka tuꞌu rō ꞌana i a rāua pa he nuꞌu haumārū, taꞌe manaꞌu i hau rō atu ki te rua, ꞌe te parautiꞌa mau, he teꞌo-teꞌo nō te aŋa ꞌo te ai, ki te rāua kī, ko takeꞌa ꞌana i te meꞌe i haka takeꞌa e te ꞌAtua. ꞌE te meꞌe aŋa he haka paka ꞌi te manaꞌu taŋata nō. 19Ko haka topa kē ꞌana te nuꞌu nei i a rāua mai i a Ietū Kiritō, Pūꞌoko Haka Tere o tātou. ꞌĀꞌana te haka pūai te oho i te tātou manaꞌu ꞌi ruŋa i a ia, ꞌe te haka riro i a tātou e tahi mau nō manaꞌu, pa he meꞌe haŋa e te ꞌAtua, pa he ua-ua haka piri hakari e haka piri e haka hio-hio ena i te kona taꞌatoꞌa o te hakari.
Te haka tere iŋa taŋata
20ꞌI te haka moe o kōrua i te manaꞌu ꞌi ruŋa i a Ietū ko mate ꞌana kōrua ꞌi muri i a ia, te auraꞌa, ko haka kore ꞌā e te ꞌAtua mai ruŋa i a kōrua i te pūai o te meꞌe taꞌe tano pohe e te hakari ꞌe i te pūai o te ŋā kope ena ꞌina he takeꞌa mai haka tere i te ao nei. ¿He aha ia kōrua e haꞌatura nō ena ki te haka tere iŋa taŋata 21pē nei ē: «ꞌIna ko haka puā i te meꞌe ena», «ꞌina ko kai i te meꞌe era», ꞌe «ꞌina ko toꞌo i te meꞌe ena»? 22Te ŋā roŋo nei he hāpī poreko mai te manaꞌu taŋata mau nō ꞌo te ai nei ŋā roŋo o ruŋa i te meꞌe e ŋaro nō. 23Ki te manaꞌu taŋata, nei roŋo roŋo mārama-rama ꞌo te hāpī pē nei ē: mo koa o te ꞌAtua e aŋa meꞌe rahi meꞌe aŋarahi mo aŋa, mo haka takeꞌa i tuꞌu haŋa ki a ia, e ko manaꞌu, ki te hora hopeꞌa, i hau rō atu koe ki te rua, ꞌe e tōtōā koe i tuꞌu hakari. Ka ai atu pē ira, te ŋā meꞌe nei ꞌina he hāꞌūꞌū ki te taŋata mo haka noho i te meꞌe taꞌe tano pohe e te hakari.
31E te taina, ꞌi te meꞌe era ko haka ora ꞌana e te ꞌAtua i a kōrua ꞌi muri i a Ietū, te auraꞌa, ko vaꞌai atu ꞌana i te noho iŋa ꞌāpī, e haŋa kōrua ki te meꞌe o te raŋi, he kona ꞌi ira a Ietū e noho ena ꞌi te pāꞌiŋa mataꞌu o te ꞌAtua. 2Te kī: e haŋa mo riro o te kōrua noho iŋa, noho iŋa tano o te taŋata ka noho ena ꞌi te raŋi, taꞌe ꞌō pa he noho iŋa o te nuꞌu o te ao nei taꞌe haŋa ki te ꞌAtua. 3A kōrua, paꞌi, ko mate ꞌana, te auraꞌa, ko haka rē ꞌana te kōrua noho iŋa raꞌe era. ꞌE hora nei, te kōrua noho iŋa ꞌāpī ena pa he meꞌe: ꞌi muri i a Ietū Kiritō ꞌi muꞌa o te ꞌAtua. Te noho iŋa nei ꞌina he aŋi-aŋi e te taŋata 4ꞌo te ai mai i a Ietū e ai ena. ꞌE hora ena ōꞌona ka hoki mai ena ki te ao nei, he ai takoꞌa a kōrua ꞌi muri i a ia ꞌi roto i tōꞌona nui-nui, te auraꞌa, he ai takoꞌa i a kōrua te huru riva ōꞌona.
Te noho iŋa tano hai Ietū Kiritō
5E te taina, e haka kore tahi te meꞌe taꞌe tano aŋa ꞌi muꞌa ꞌā. ꞌIna kōrua ko moe i te viꞌe ꞌo i te taŋata taꞌe he viꞌe ꞌo he kenu o kōrua, ꞌina ko aŋa e tahi meꞌe taꞌe tano ꞌe hano-hano haŋa e te hakari, ꞌina kōrua ko haꞌatiꞌa ki te meꞌe taꞌe tano pohe e te hakari mo haka tere atu, ꞌe ꞌina takoꞌa ko nou-nou. (Te nou-nou, paꞌi, e tuꞌu rō ꞌā pa he meꞌe ena: e haꞌamuri ꞌana kōrua ki te ꞌītoro, ꞌe rā ꞌītoro he taoꞌa). 6ꞌI te ŋā meꞌe nei ka topa ena te ūtuꞌa taparahi-taꞌata o te ꞌAtua ꞌi ruŋa i te nuꞌu taꞌe haꞌatura ki a ia. 7ꞌI raꞌe ki te haka moe o kōrua i te manaꞌu ꞌi ruŋa i a Ietū e aŋa rō ꞌana kōrua i te ŋā meꞌe ena. 8ꞌE, ꞌi te hora nei, te meꞌe o kōrua mo aŋa he haka kore mai ruŋa i a kōrua i te riri, i te riri taparahi-taꞌata, i te aŋa iŋa i te meꞌe taꞌe tano, i te vā-vā ꞌe i te parauꞌino. 9ꞌIna kōrua ko reo-reo. Te huru ꞌe te noho iŋa taꞌe tano, paꞌi, o kōrua o muꞌa ꞌā ko haka rē tahi ꞌana.
10Te ꞌAtua ko vaꞌai atu ꞌana i te huru ꞌāpī, ꞌe ꞌāꞌana te aŋa te oho atu ꞌi roto i te kōrua māhatu mo riro o kōrua pē ia, ki ꞌata māhani ai kōrua i a ia. 11ꞌI te noho iŋa ꞌāpī nei, ꞌina te ꞌAtua he tapa atu hoki a koe he ⌊hūrio⌋ ꞌo taꞌe he hūrio, he kope hore i te kiri o te kinoŋa ꞌo taꞌe hore, he taŋata o te rua henua, ꞌo he kope hāpī kore, he ꞌekaravo ꞌo taꞌe he ꞌekaravo. Te meꞌe hauhaꞌa mau nō ko Ietū, ꞌe a ia ꞌi roto i te nuꞌu taꞌatoꞌa ⌊haka moe i te manaꞌu⌋ ꞌi ruŋa i a ia.
12Te ꞌAtua e haŋa rō ꞌana ki a kōrua ꞌe ko haꞌataꞌa ꞌana i a kōrua māꞌana. ꞌO ira, e riro kōrua nuꞌu māhatu ꞌaroha, nuꞌu riva, nuꞌu taꞌe manaꞌu i hau rō atu ki te rua, nuꞌu haumārū, ꞌe nuꞌu ꞌite i te haꞌaoromaꞌi. 13ꞌIna kōrua ko hōrou ko riri mo te rua; e haka rehu te meꞌe taꞌe tano aŋa atu. Pa he haka rehu iŋa e te ꞌAtua i te kōrua hape, pē ira ana haka rehu takoꞌa i te hape o te rua. 14ꞌE ki te ŋā meꞌe taꞌatoꞌa nei e ꞌāmui te haŋa mo te rua. Hai haŋa, paꞌi, e ai ena te taina e tahi mau nō manaꞌu. 15ꞌE mo te haumārū vaꞌai e Ietū Kiritō e hāꞌūꞌū atu mo ꞌite o kōrua he aha te meꞌe tano mo aŋa. Te ꞌAtua ko haꞌataꞌa ꞌana i a kōrua i te nuꞌu haka moe i te manaꞌu ꞌi ruŋa i a Ietū mo riro e tahi mau nō hakari ꞌe mo noho o kōrua taꞌatoꞌa ꞌi roto i te haumārū. ꞌE, e ꞌite kōrua mo māuru-uru mo oho ki te ꞌAtua.
16E te taina, e maꞌu te roŋo ꞌa Ietū Kiritō ꞌi roto i te kōrua māhatu, ki haka tika ai nei roŋo i te kōrua manaꞌu ꞌe i te kōrua meꞌe aŋa. E hāpī ꞌe e hatu ki te rua, hai mārama-rama, mo haꞌatura o rāua ki te ꞌAtua. E hīmene kōrua i te vānaŋa o te ꞌAtua aŋa mo hīmene, i te tētahi hīmene haꞌahana-hana mo te ꞌAtua, ꞌe i te meꞌe haka hīmene e te ⌊Vārua Maitai⌋ koia ko māuru-uru ki te ꞌAtua hai māhatu. 17Te meꞌe taꞌatoꞌa kī ꞌe aŋa e kōrua, e tano o te nuꞌu ꞌa Ietū Kiritō. ꞌE e māuru-uru e oho ki te ꞌAtua Matuꞌa mo te meꞌe taꞌatoꞌa aŋa e Ietū mo kōrua.
Te meꞌe mo aŋa e te huaꞌai ⌊kiritiano⌋
18E te ŋā viꞌe, e haka rē mo te kōrua kenu e haka tere atu, he oho iŋa tano o te ŋā viꞌe haka moe i te manaꞌu ꞌi ruŋa i a Ietū. 19E te kenu, e haŋa ki te kōrua ŋā viꞌe; ꞌina ko tōtōā ki te hora hopeꞌa.
20E te ŋā poki, e haꞌatura ki te kōrua matuꞌa i te meꞌe taꞌatoꞌa, he meꞌe koa o te ꞌAtua. 21E te matuꞌa, ꞌina ko haka riri i te kōrua ŋā poki, ꞌo hōriŋa mo aŋa i te meꞌe riva-riva.
22E te ꞌekaravo, e haꞌatura ki te vānaŋa taꞌatoꞌa o te kope ꞌāꞌana te haka aŋa atu, ꞌe taꞌe nō ꞌō ꞌi te hora ꞌi muri i a kōrua ki koa ai. ꞌI te taꞌatoꞌa nō hora kōrua ana haꞌatura ki rā kope hai māhatu ꞌi te meꞌe era e moꞌa rō ꞌā a kōrua i a Ietū. 23Taꞌatoꞌa meꞌe o kōrua mo aŋa, e aŋa hai māhatu pa he meꞌe: e aŋa ꞌā kōrua ki a Ietū ꞌe taꞌe ki te taŋata. 24A Ietū, paꞌi, he Pūꞌoko Haka Tere parautiꞌa o tātou o te nuꞌu taꞌatoꞌa haka moe i te manaꞌu ꞌi ruŋa i a Ietū, ꞌe ki a ia tātou e tāvini nei. ꞌE ko ꞌite ꞌā e tātou: pe muꞌa ka oho ena te ꞌAtua e vaꞌai rō mai i te meꞌe i hōrea e ia mo tāꞌana nuꞌu, 25ꞌe e haka ūtuꞌa rō i te nuꞌu aŋa i te meꞌe taꞌe tano. ꞌE ꞌi te hora kī o te ꞌAtua i te tano ꞌe i te taꞌe tano o te taŋata, ꞌina he uꞌi hoki he kope ra-rahi ꞌo he kope taꞌe ra-rahi. ꞌO ira, e te ꞌekaravo ē, e aŋa riva-riva kōrua ki te nuꞌu haka aŋa atu.
41ꞌE a kōrua, e te nuꞌu ai o te ꞌekaravo ē, e hāpaꞌo kōrua i a rāua ꞌe e aŋa i te meꞌe tī-tika. ꞌIna ko rehu: e ai takoꞌa rō ꞌana te kōrua Pūꞌoko Haka Tere ꞌi ruŋa i te raŋi.
He hatu mo te taꞌatoꞌa
2ꞌIna kōrua ko haka rē ꞌi te pure. E pure ꞌā, e uꞌi ꞌo oho kē te manaꞌu. E māuru-uru ki te ꞌAtua 3ꞌe e pure takoꞌa mo mātou, ki mātaki ai e te ꞌAtua i te ara mo haka ꞌite mo oho mātou i tāꞌana roŋo, ꞌe mo haka aŋi-aŋi i te parautiꞌa o ruŋa i a Ietū taꞌe haka ꞌite mai era e ia ꞌi muꞌa ꞌā. ꞌO te haka ꞌite ōꞌoku o ruŋa i te meꞌe nei a au e puru atu ena ꞌi roto i te hare maꞌuꞌaurī. 4E pure kōrua mōꞌoku, ki tano ai a au mo haka aŋi-aŋi riva-riva i te roŋo nei, pa he meꞌe haŋa e te ꞌAtua.
5ꞌE ꞌi te hora taꞌatoꞌa e hāpaꞌo te kōrua noho iŋa ꞌi muꞌa o te nuꞌu taꞌe ⌊haka moe i te manaꞌu⌋ ꞌi ruŋa i a Ietū, ꞌo taꞌe haka au rō atu ꞌi te hora haŋa o kōrua mo vānaŋa ki a rāua o ruŋa i a Ietū. 6Ana vānaŋa hai koa ꞌe e reka rō ꞌana, ki haka roŋo atu ai. ꞌE e ꞌite takoꞌa kōrua mo pāhono riva-riva i te rāua ꞌui o ruŋa i a Ietū.
He ꞌaroha
7Mo te tātou taina haŋa rahi nei ko Tīkiko e maꞌu atu i te parau ꞌāpī o ruŋa i te meꞌe taꞌatoꞌa topa mai ki a au. A ia e hāꞌūꞌū rō mai ꞌana, ꞌe he tāvini takoꞌa pē au o te ꞌAtua ꞌite mo haka tano i tāꞌana meꞌe kī. 8ꞌO ira a au i uŋa atu ena i a ia mo haka ꞌite atu pē hē a mātou ꞌe mo haka koa ꞌe mo haka pūai i te kōrua manaꞌu ꞌi ruŋa i a Ietū. 9ꞌE nā ꞌi muri i a ia i uŋa takoꞌa atu ena i a Onetimoro, he taina haŋa rahi o tātou ꞌite takoꞌa mo haka tano i tāꞌana meꞌe kī. A ia o te kona ena o kōrua. Mo rāua e ꞌaꞌamu atu i te meꞌe taꞌatoꞌa o nei.
10ꞌĪ a Aritarako e ꞌaroha atu ena mo kōrua; a ia he hokorua ōꞌoku ꞌi roto i te hare maꞌuꞌaurī. ꞌE a Marko, poki o te taina poreko o te matuꞌa o Verenāvē, ꞌī e ꞌaroha takoꞌa atu ena mo kōrua. ꞌE nā a au ko pāpaꞌi atu ꞌā o ruŋa i a ia; ana tuꞌu atu, e hāpaꞌo riva-riva. 11A Ietū, kī takoꞌa ko Huto, ꞌī e ꞌaroha atu ena mo kōrua. Ko te ŋā kope nō nei a to-toru te taina ⌊hūrio⌋ hāꞌūꞌū mai mo haka ꞌite mo oho o ruŋa i te haka tere iŋa o te ꞌAtua ꞌi roto i te māhatu o te taŋata, ꞌe hai rāua a au e haŋu ꞌe e koa nei.
12A Epafara, tāvini takoꞌa o Ietū Kiritō, ꞌī e ꞌaroha atu ena. A ia takoꞌa o te kona ena o kōrua, ꞌe te aŋa nō ꞌāꞌana he ani ki te ꞌAtua mo kōrua ꞌi roto i tāꞌana pure, mo haka hio-hio atu i te manaꞌu ꞌi ruŋa i a Ietū, ki aŋi-aŋi riva-riva ai e kōrua he aha te meꞌe haŋa o te ꞌAtua mo kōrua. 13E manaꞌu rahi rō atu ꞌana a Epafara ki a kōrua ki te nuꞌu o Kōrosa, ki te nuꞌu o Rāōrītea, ꞌe ki te nuꞌu o Īērāpori takoꞌa, ꞌe ko au te mataꞌite.
14A Ruka, taote haŋa rahi o mātou, ꞌī e ꞌaroha atu ena mo kōrua, ꞌe pē ira takoꞌa ꞌā te taŋata nei ko Rema.
15E ꞌaroha kōrua ki te taina taꞌatoꞌa era o Rāōrītea, ki a Ninfa, ꞌe ki te taina taꞌatoꞌa taka-taka ꞌi tōꞌona hare. 16Ki oti kōrua i te taiꞌo i te parau nei, e haka maꞌu ki te nūnaꞌa taŋata haka moe i te manaꞌu ꞌi ruŋa i a Ietū o Rāōrītea, mo taiꞌo takoꞌa e rāua. ꞌE a kōrua, e taiꞌo i te parau mo tuꞌu atu mai ira. 17E kī te meꞌe nei ki a Arakipo: «E uꞌi e aŋa tahi te aŋa vaꞌai atu era e te ꞌAtua».
18ꞌĀꞌaku, a Pauro, i pāpaꞌi atu i te ꞌaroha nei hai rima mau nei ꞌā ōꞌoku. E uꞌi ꞌo rehu: ꞌī a au ꞌi roto i te hare maꞌuꞌaurī; e pure kōrua mōꞌoku. ꞌE ka ai ꞌi ruŋa i a kōrua te riva rahi o te ꞌAtua.