He rua parau pāpaꞌi e Pauro ki a
Timoteo
He rua parau nei i pāpaꞌi e Pauro ki a Timoteo, ꞌe e tuꞌu rō ꞌā pa he parau raꞌe era. ꞌI te ai o te nuꞌu e hāpī ꞌā i te hāpī reo-reo ki te nuꞌu ⌊haka moe i te manaꞌu⌋ ꞌi ruŋa i a Ietū, he ꞌata haka aŋi-aŋi e Pauro ki a Timoteo i te meꞌe mo hāpī ki te nuꞌu taina. ꞌI ruŋa takoꞌa nei e hatu ꞌā e Pauro ki a Timoteo mo taꞌe haꞌamā ꞌo te maꞌu i te parau ꞌāpī riva-riva o ruŋa i a Ietū Kiritō, ꞌe mo topa tāꞌue ꞌi ruŋa i a ia te ꞌati ꞌo te haka ꞌite ki te nuꞌu i rā parau ꞌāpī, e haꞌaoromaꞌi hai pūai pa he vaꞌehau haka kē ꞌa Ietū Kiritō (1.6–8; 2.3).
Te nuꞌu o te noho iŋa nei o Timoteo e manaꞌu rahi rō ꞌana o ruŋa i te paꞌo o te ao. ꞌO ira i haka ꞌite ai e Pauro ki a Timoteo pē nei ē: ꞌi te ŋā mahana hopeꞌa ena e ai rō te mahana taparahi-taꞌata. He ꞌino te taŋata, he haŋa ki te moni nō, he haka meꞌe i a rāua, he manaꞌu i a rāua mau nō te tano, he vānaŋa taꞌe tano mo te ꞌAtua, e ko haꞌatura ki te rāua matuꞌa, e ko ꞌite mo māuru-uru ꞌe ꞌina takoꞌa e ko moꞌa i te hāpī o te ꞌAtua. He hatu ia e Pauro mo taꞌe haŋa ki te nuꞌu pē rā mo repahoa ōꞌona (3.1–5).
E ai takoꞌa rō ꞌana ꞌi ruŋa nei te hāpī ko haka poto ꞌā ꞌe ko pāpaꞌi ꞌā pa he pātaꞌu-taꞌu mo maꞌuꞌaꞌau e te taina. Te hāpī nei e haka manaꞌu ꞌana i te parautiꞌa nei: a Ietū he kope aŋa i tāꞌana meꞌe kī (2.11–13).
Mo haka oti o te parau nei he haka ꞌite e Pauro ki a Timoteo i te parau ꞌāpī o te tētahi taina māhani takoꞌa e Timoteo ꞌe he haka maꞌu i te ꞌaroha ki te tētahi atu taina. E tuꞌu rō ꞌana pa he meꞌe ena ē: ko aŋi-aŋi ꞌana e Pauro ko hāhine ꞌana a ia mo mate (4.6).
1He ꞌaroha
1A au, a Pauro, ⌊ꞌāpōtoro⌋ ꞌa Ietū Kiritō, uŋa e te ꞌAtua mo haka ꞌite ki te taŋata o ruŋa o te ora ꞌāpī hōrea mai e ia ravaꞌa hai Ietū Kiritō mau nō 2he ꞌaroha atu hai haŋa ki a koe, e Timoteo ē. A koe pa he poki parautiꞌa mau ꞌā ꞌāꞌaku. Ka ai ꞌi ruŋa i a koe te riva rahi, te haka ꞌaroha ꞌe te haumārū o te ꞌAtua Matuꞌa, ꞌe o Ietū Kiritō, he Pūꞌoko Haka Tere o tātou.
He māuru-uru
3E Timoteo, hai māhatu maꞌitaki a au e aŋa nei ki te ꞌAtua, pa he meꞌe aŋa e tōꞌoku tupuna. ꞌE ꞌi tōꞌoku pure iŋa ꞌi te pō ꞌe ꞌi te ꞌōtea, e māuru-uru nei a au mōꞌou. 4E haŋu, e manaꞌu rō ꞌana a au ꞌi ruŋa i tuꞌu matavai taŋi era mōꞌoku; ꞌo ira a au e haŋa nei mo takeꞌa mai i a koe. ¡Ko te koa ꞌō i a au mo ai pē ira! 5E manaꞌu takoꞌa rō ꞌana a au i tuꞌu haka moe iŋa parautiꞌa i te manaꞌu ꞌi ruŋa i a Ietū, he meꞌe ai ꞌi tuꞌu māmārūꞌau era ko Rōira ꞌe ꞌi tuꞌu matuꞌa vahine era ko Eunite. ꞌE ko ꞌite riva-riva ꞌana e au nā i a koe takoꞌa.
ꞌIna ko haꞌamā
6ꞌĪ au he kī atu: pa he niꞌo iŋa i te ahi, ana haka pūai ana oho koe i te meꞌe vaꞌai atu era e te ꞌAtua ꞌi te hora haka topa atu era ōꞌoku i te rima a ruŋa i tuꞌu pūꞌoko. 7Te ⌊Vārua Maitai⌋ vaꞌai mai era e te ꞌAtua taꞌe he Vārua haka ꞌaka-ꞌaka i te manaꞌu; he Vārua pūai, haka haŋu, haka poreko i te haŋa ki te rua, ꞌe haka ꞌite i te haka topa riva-riva i te manaꞌu.
8ꞌIna koe ko riꞌa-riꞌa mo vānaŋa o ruŋa i te tātou Pūꞌoko Haka Tere ko Ietū Kiritō, ꞌe ꞌina koe ko haꞌamā ꞌo tōꞌoku puru ꞌi roto i te hare maꞌuꞌaurī. Hai pūai o te ꞌAtua, mai ki haꞌaoromaꞌi ki oho i te ꞌati mo topa mai ꞌo te haka ꞌite i te roŋo riva-riva o ruŋa i a Ietū.
9Te ꞌAtua ko haka eꞌa ꞌā i a tātou mai roto i te ūtuꞌa o te hara mo riro o tātou he nuꞌu ꞌāꞌana. I aŋa ai pē ira, taꞌe he huru riva o tātou, he haŋa mau ꞌā ōꞌona, ꞌe mai te hora era ꞌā kai aŋa ꞌana i te ao i haŋa rō ai mo haka takeꞌa mai i tōꞌona riva rahi hai Ietū Kiritō. 10ꞌE, ko haka takeꞌa mai ꞌā e te ꞌAtua hai tuꞌu mai era o Ietū Kiritō, kope haka eꞌa i a tātou mai roto i te ūtuꞌa o te hara. Ko haka kore ꞌā, paꞌi, e Ietū i te pūai o te mate, ꞌe ko haka ꞌite ꞌā ki te nuꞌu: mo haka noho o rāua i te manaꞌu ꞌi ruŋa i te ⌊roŋo riva-riva o te ꞌAtua⌋ he ravaꞌa i te ora ꞌāpī ꞌina he hopeꞌa raꞌa.
11Te ꞌAtua ko kī mai ꞌana mo haka ꞌite ōꞌoku i te roŋo nei, ꞌe ko uŋa ꞌana i a au pa he ꞌāpōtoro ꞌe pa he maꞌori. 12ꞌO ira te ꞌati e topa mai nei ki a au. Ka ai atu pē ira, ꞌina a au he riꞌa-riꞌa. Ko ꞌite ꞌana, paꞌi, e au ꞌi ruŋa i a ai a au e haka noho nei i tōꞌoku manaꞌu, ꞌe ko aŋi-aŋi riva-riva ꞌana e au e ai rō ꞌana tōꞌona pūai mo hāpaꞌo ꞌe mo hāꞌūꞌū mai i te aŋa vaꞌai mai e ia ꞌātā ki te mahana o tōꞌona hoki iŋa mai.
13Ana hāpī koe, e uꞌi e haka tano ki te hāpī iŋa parautiꞌa haka ꞌite atu era e au koia ko te haka moe ko te oho i te manaꞌu ꞌi ruŋa i a Ietū, ꞌe ko te haŋa ko te oho ki te rua ꞌo te ai ōꞌou ꞌa Ietū Kiritō. 14E Timoteo, hai hāꞌūꞌū o te Vārua Maitai noho ꞌi roto i a tātou, ka hāpaꞌo i te hāpī parautiꞌa vaꞌai atu era mo haka ꞌite ki te nuꞌu.
15Ko ꞌite ꞌana koe: te nuꞌu taꞌatoꞌa o ꞌĀtia ko hoa ꞌana i a au, ꞌe ꞌi roto i rā nuꞌu a Fīkero ꞌe a ꞌEremōhene. 16ꞌE mo ꞌOnetiforo ꞌe mo te nuꞌu taꞌatoꞌa o tōꞌona hare, ka ai ꞌi ruŋa i a rāua te riva rahi o te ꞌAtua. I rahi rō, paꞌi, te mahana i haka haŋu ai i tōꞌoku manaꞌu, ꞌe ꞌina kai haꞌamā ꞌo tōꞌoku puru ꞌi roto i te hare maꞌuꞌaurī. 17I tuꞌu mai era a ꞌOnetiforo ki Roma, te meꞌe raꞌe i aŋa he kimi i a au ka ravaꞌa rō. 18ꞌO ira a au e pure nei mo haka ꞌaroha o te ꞌAtua i a ia ꞌi te mahana o te ture hopeꞌa. Ko ꞌite riva-riva ꞌana, hoꞌi, koe, e Timoteo ē, pē hē a ia i hāꞌūꞌū mai ai ꞌi Ēfeto.
2He haꞌaoromaꞌi iŋa i te ꞌati hai pūai
1E haŋu, e haka pūai koe hai riva rahi o te ꞌAtua vaꞌai atu hai Ietū Kiritō. 2E kimi koe hai ŋāŋata haka tano i te rāua meꞌe kī, ŋāŋata ꞌite takoꞌa mo hāpī i te rua. Ki a rāua koe ana haka ꞌite mo hāpī e rāua ki te tētahi i te hāpī parautiꞌa o ruŋa i a Ietū Kiritō haka ꞌite atu era e au ꞌi te hora hāpī ōꞌoku i te nuꞌu.
3E haꞌaoromaꞌi koe i te ꞌati ka topa atu ena pa he vaꞌehau haka kē ꞌa Ietū Kiritō. 4ꞌIna e tahi vaꞌehau oꞌo ki te aŋa o te nuꞌu taꞌe he vaꞌehau. Te meꞌe haŋa o te vaꞌehau he aŋa riva-riva i te aŋa mo koa o te kape. 5Pē ira takoꞌa ꞌā te kope ꞌāꞌati, ꞌina e ko haka hei mo taꞌe haꞌatura ki te haka tere iŋa era o rā ꞌāꞌati. 6Te kope ꞌoka kai, māꞌana e kai raꞌe i tāꞌana kai ꞌoka. 7E manaꞌu koe i te meꞌe nei e kī atu ena e au, ꞌe mo te ꞌAtua e ꞌata haka aŋi-aŋi atu i te meꞌe taꞌatoꞌa.
8ꞌIna ko rehu i a koe te roŋo riva-riva haka ꞌite e au pē nei ē: te ꞌAtua i haka ora rō mai te mate i a Ietū Kiritō, hakaara o te ꞌariki era ko ⌊Tāvita⌋. 9ꞌO te haka ꞌite ꞌo te oho ōꞌoku i te roŋo ena i topa mai ai te ꞌati, ꞌātā ki te roa ko here-here ꞌana i a au hai vivi pa he taparahi-taꞌata. ꞌE, ka ai atu ko here-here ꞌana i a au, te vānaŋa o te ꞌAtua e ko ravaꞌa mo haka noho. 10ꞌO ira a au e haꞌaoromaꞌi nei i te taꞌatoꞌa nō ꞌati mo te riva-riva o te nuꞌu haꞌataꞌa e te ꞌAtua māꞌana, mo eꞌa takoꞌa o rāua mai roto i te ūtuꞌa o te hara hai Ietū Kiritō ꞌe mo ravaꞌa mo noho ꞌi muri i a ia ꞌina he hopeꞌa raꞌa pe muꞌa ka oho ena.
11He parautiꞌa te meꞌe nei:
Mo ai ko mā-mate ꞌā a tātou ꞌi muri i a Ietū Kiritō,
ꞌi muri i a ia a tātou ka no-noho ena.
12Mo haꞌaoromaꞌi o tātou i te ꞌati hai pūai,
he haka tere a tātou ꞌi tōꞌona ao ꞌi muri i a ia.
Mo kī o tātou kai ꞌite a tātou ko ai a ia,
pē ira takoꞌa ꞌā ka kī ena e ia mo tātou.
13Ka taꞌe aŋa atu a tātou i te tātou meꞌe kī,
ko te aŋa iŋa ꞌana a ia i tāꞌana meꞌe kī;
e ko aŋa, paꞌi, a ia e tahi meꞌe ꞌina he tano ki tōꞌona huru.
Te noho iŋa tano mo Timoteo
14E haka manaꞌu koe ki te nuꞌu, e Timoteo ē, i te ŋā meꞌe kī atu era e au, ꞌe ꞌai ka kī rō hai ꞌīŋoa o te ꞌAtua: ꞌina a rāua ko tātake o ruŋa i te auraꞌa o te vānaŋa; ꞌina, paꞌi, e tahi hauhaꞌa. Te meꞌe mau nō mo ravaꞌa he haka kore i te haka moe iŋa o te manaꞌu ꞌi ruŋa i a Ietū o te nuꞌu haka roŋo i rā vānaŋa. 15E aŋa riva-riva koe i taꞌa aŋa, ki ai ai koe he taŋata tano ꞌe aŋa i te meꞌe tī-tika ꞌi muꞌa i te ꞌAtua, pa he taŋata ꞌina ōꞌona hape mo haꞌamā iŋa ꞌe, takoꞌa, hāpī riva-riva oho i te roŋo parautiꞌa o te ꞌAtua.
16ꞌIna koe ko haka roŋo ki te vānaŋa tahaŋa o te nuꞌu taꞌe ⌊haka moe i te manaꞌu⌋ ꞌi ruŋa i a Ietū. Te nuꞌu vānaŋa, paꞌi, pē ira pe te ꞌava-ꞌava pe te oho nō mai muri i te ꞌAtua, 17ꞌe te rāua hāpī taꞌe tano he ꞌata rahi he oho, pa he māui-ui kai i te hakari. He meꞌe nei te meꞌe i topa ki a Hīmēneo ararua ko Fireto. 18A rāua ko haka tapa ꞌana mai roto i te parautiꞌa hai kī o rāua: te ora iŋa haka ꞌou o tātou mai te mate ko ai era ꞌā, ꞌe pē ira e haka mira-mira e oho era i te manaꞌu o te tētahi nuꞌu haka moe i te manaꞌu ꞌi ruŋa i a Ietū.
19Ka ai atu pē ira, te nūnaꞌa taŋata haka moe parautiꞌa i te rāua manaꞌu ꞌi ruŋa i a Ietū e hio-hio rō ꞌana pa he kona mekerā ꞌi ruŋa e haka tuꞌu ena i te hare, ꞌe ꞌi ruŋa takoꞌa i pāpaꞌi ai: «Te ꞌAtua e aŋi-aŋi rō ꞌā i tāꞌana taŋata», ꞌe, «Te nuꞌu taꞌatoꞌa haꞌamuri ki te ꞌAtua e haka tapa mai roto i te meꞌe taꞌe tano».
20ꞌI roto i te hare o te ꞌono, taꞌe nō he meꞌe aŋa hai piru ꞌe hai parata te meꞌe o roto. E ai takoꞌa rō ꞌana te meꞌe aŋa hai miro ꞌe hai ꞌōꞌone. Te ŋā meꞌe riva-riva era he haꞌataꞌa mo te mahana ŋoŋoro, ꞌe te tētahi meꞌe era mo te mahana taꞌe ŋoŋoro. 21Te kope haka tapa i a ia mai roto i te meꞌe taꞌe tano pa he ŋā meꞌe piru era ꞌā, meꞌe haꞌataꞌa mo te meꞌe riva-riva haŋa e te ꞌAtua mo aŋa.
22E Timoteo, e uꞌi koe e te meꞌe haka hara i te nuꞌu ꞌāpī. E aŋa mo riro ōꞌou ꞌe o te nuꞌu taꞌatoꞌa haꞌamuri hai māhatu maꞌitaki ki te ꞌAtua, he nuꞌu aŋa i te meꞌe tano ki te mata o te ꞌAtua, haka moe i te manaꞌu ꞌi ruŋa i a ia, haŋa ki te rua ꞌe haumārū. 23ꞌIna koe ko haka roŋo ki te vānaŋa tahaŋa o te nuꞌu taꞌe haka moe i te manaꞌu ꞌi ruŋa i a Ietū; ko ꞌite ꞌana, paꞌi, koe: te meꞌe nō mo ravaꞌa he tātake. 24Te tāvini o te ꞌAtua ꞌina ko tātake; e riva ki te taꞌatoꞌa, e ꞌite mo hāpī i te rua ꞌe mo haꞌaoromaꞌi i te meꞌe hai haumārū.
25E ꞌite takoꞌa i te kī, hai māhatu maꞌitaki, i te hape o te nuꞌu taꞌe haka roŋo, koiꞌite ꞌi te riva rahi o te ꞌAtua, he huri i te rāua manaꞌu ki a ia, ꞌe he ꞌite i te parautiꞌa o ruŋa i a Ietū Kiritō, 26ki veveri ki tere ai mai te rima o Rukifero. ꞌĀꞌana, paꞌi, te puru i a rāua mo aŋa o nei nuꞌu i tāꞌana meꞌe nō era i haŋa.
3Te huru o te nuꞌu ꞌi te ŋā mahana hopeꞌa era
1E ꞌite takoꞌa koe: ꞌi te ŋā mahana hopeꞌa ena e ai rō te mahana taparahi-taꞌata. 2He ꞌino te taŋata, he haŋa ki te moni nō, he haka meꞌe i a rāua, he manaꞌu i a rāua mau nō te tano, he vānaŋa taꞌe tano mo te ꞌAtua, e ko haꞌatura ki te rāua matuꞌa, e ko ꞌite mo māuru-uru ꞌe ꞌina takoꞌa e ko moꞌa i te hāpī o te ꞌAtua. 3E ko haka ꞌaroha ꞌe e ko haŋa ki te rua taŋata. He riro nuꞌu haꞌaꞌino, taꞌe hāito i te meꞌe kī ꞌe i te meꞌe aŋa, tōtōā i te rua ꞌe taꞌe haŋa ki te meꞌe tano. 4E riro takoꞌa rō a rāua he taŋata hoꞌo i te rua, aŋa i te meꞌe ꞌina he manaꞌu hia, ꞌe haka paka i a rāua. ꞌE te meꞌe mau nō ka kimi era he reka, taꞌe he ꞌAtua. 5E haka tuꞌu rō i a rāua pa he taŋata moꞌa ꞌe haꞌatura ki te ꞌAtua; ꞌe, hai haka tere iŋa o rāua, ka takeꞌa era ꞌina mau ꞌā he haꞌatura.
ꞌIna e tahi aꞌa meꞌe mo aŋa ꞌi muri i te nuꞌu tuꞌu pē rā, e Timoteo ē. 6O rāua, paꞌi, te nuꞌu oho ki hare era ki hare era ꞌe hai reo-reo e ravaꞌa ena mo haka tere i te ŋā viꞌe ꞌina he pūai o te manaꞌu, ꞌamo meꞌe rahi hara, ꞌe pohe ki te meꞌe taꞌe tano. 7He haka roŋo nō te aŋa o te ŋā viꞌe nei ki nuꞌu era ki nuꞌu era, ꞌe ꞌina he aŋi-aŋi, ki te hora hopeꞌa, ꞌi hē mau te hāpī parautiꞌa o te ꞌAtua. 8Te nuꞌu hāpī era i te ŋā viꞌe hai reo-reo he nuꞌu manaꞌu taꞌe tano, haka tapa i te rāua manaꞌu mai ruŋa i te ꞌAtua. Pa he taꞌe haka roŋo iŋa era ꞌā o Hane ararua ko Hampere ki a ⌊Mōtē⌋ te taꞌe haka roŋo o rā nuꞌu i te hāpī parautiꞌa o te ꞌAtua. 9Te nuꞌu nei e ko ravaꞌa mo haka roŋo mo oho nō e te nuꞌu ki a rāua ka ꞌite rō ena e te taꞌatoꞌa pē nei ē: he nuꞌu maꞌa-maꞌa. He meꞌe nei te meꞌe i topa takoꞌa ki a Hane ararua ko Hampere.
He hatu iŋa ki a Timoteo
10ꞌE a koe, e Timoteo ē, ko ꞌite riva-riva ꞌana i tāꞌaku meꞌe hāpī, i te huru o tōꞌoku noho iŋa, i tāꞌaku meꞌe haŋa mo aŋa, i tōꞌoku haka moe iŋa i te manaꞌu ꞌi ruŋa i a Ietū, i tōꞌoku haumārū, i tōꞌoku haŋa ki te rua ꞌe i tōꞌoku haꞌaoromaꞌi iŋa i te ꞌati hai pūai 11e tute mai era i a au mo tōtōā ꞌi te ŋā kona era ko Antiokia, ko Īkōnio ꞌe ko Rītara. ¡Meꞌe huru kē te rahi o te ꞌati a au i haꞌaoromaꞌi ai! ꞌE o te ꞌAtua au i hāꞌūꞌū mai mo eꞌa mai roto i rā ŋā ꞌati. 12ꞌĪ a au he kī atu: te nuꞌu taꞌatoꞌa ⌊haka moe i te manaꞌu⌋ ꞌi ruŋa i a Ietū Kiritō, haŋa mo riro o rāua he nuꞌu moꞌa ꞌe haꞌatura ki a ia, e ꞌite: he tute i a rāua e te nuꞌu taꞌe haŋa ki te ꞌAtua mo tōtōā. 13ꞌE te ŋāŋata aŋa i te meꞌe taꞌe tano ꞌe te nuꞌu haka tuꞌu i a rāua pa he nuꞌu haka moe i te manaꞌu ꞌi ruŋa i a Ietū pe te ꞌata taꞌe riva-riva ka oho ena; te aŋa he reo-reo he oho nō ki te taŋata ꞌe, ꞌina he aŋi-aŋi, e reo-reo takoꞌa rō ꞌana ki a rāua.
14ꞌE a koe, e maꞌu hio-hio te ŋā meꞌe hāpī atu era. Ko ꞌite ꞌana, paꞌi, e koe he parautiꞌa ꞌe ꞌa ꞌai i hāpī atu. 15Mai tuꞌu ꞌiti-ꞌiti haŋa ꞌā i ꞌite rō ai a koe i te meꞌe o ruŋa i te ⌊Pāpaꞌi Moꞌa⌋, he meꞌe haka ꞌite ꞌe haka aŋi-aŋi atu pē nei ē: mo eꞌa mai roto i te ūtuꞌa o te hara e haka moe i te manaꞌu ꞌi ruŋa i a Ietū Kiritō. 16Te meꞌe taꞌatoꞌa kī ꞌi ruŋa i te Pāpaꞌi Moꞌa he meꞌe haka ꞌite mai e te ꞌAtua. Tōꞌona hauhaꞌa: he hāpī mai, he ture mai, he haka tī-tika mai i te manaꞌu ꞌe he hāpī mai i te noho iŋa tano ki te mata o te ꞌAtua, 17ki ai ai te nuꞌu aŋa ki a ia e tano riva-riva rō ꞌana mo aŋa rauhuru meꞌe riva-riva haŋa ꞌāꞌana.
41ꞌI muꞌa o te ꞌAtua ꞌe o Ietū Kiritō, kope ka oho mai ena pa he ꞌAriki nui-nui mo haka ūtuꞌa i te nuꞌu ora ꞌe i te nuꞌu mate, ka kī atu ena a au: 2e haka ꞌite e oho koe, e Timoteo ē, i te roŋo o te ꞌAtua, ka haŋa ꞌe ka taꞌe haŋa e te nuꞌu mo haka roŋo atu. Hai haumārū ana hāpī ꞌe ana haka ꞌite i te rāua hape, ana ture, ꞌe ana haka haŋu i te rāua manaꞌu. 3Nā e tuꞌu rō te mahana e ko haŋa haka ꞌou te taŋata ki te hāpī parautiꞌa. Te meꞌe ka aŋa era he kimi i te maꞌori hāpī i te meꞌe haŋa nō o rāua mo haka roŋo, 4he hārui hai tuaꞌivi i te parautiꞌa, ꞌe he haka roŋo ki te rauhuru nō atu ꞌaꞌamu. 5ꞌE a koe, e ꞌite i te hāito i taꞌa meꞌe kī ꞌe i taꞌa meꞌe aŋa, e haꞌaoromaꞌi hai pūai i te ꞌati, e haka ꞌite e oho i te ⌊roŋo riva-riva o ruŋa i a Ietū Kiritō⌋, ꞌe e aŋa riva-riva taꞌa aŋa.
6E Timoteo, ko hāhine ꞌana a au mo mate; ko tuꞌu ꞌana a au ꞌi te hora nei pa he tūtia mo te ꞌAtua. 7Ko vaꞌai tahi ꞌana a au i a au mo tāvini ki te ꞌAtua, pa he vaꞌai iŋa o te vaꞌehau i a ia ki te mate ꞌi te hora o te tamaꞌi, ꞌe pa he kope ꞌāꞌati, ko tuꞌu ꞌana a au ki te hopeꞌa. ꞌIna kai haka tapa, ki te hora hopeꞌa, mai te hāpī parautiꞌa o te ꞌAtua. 8Te meꞌe toe nō he vaꞌai mai i tōꞌoku hei, hei vaꞌai ki te nuꞌu aŋa i te meꞌe tī-tika ki te mata o te ꞌAtua ka vaꞌai mai ena ꞌi te mahana o te ture hopeꞌa e Ietū Kiritō, kope ture hai parautiꞌa i te hape o te taŋata. ꞌE taꞌe ki a au nō ka vaꞌai mai ena, ki te nuꞌu taꞌatoꞌa tiaki hai māhatu ki tōꞌona hoki iŋa mai.
He parau ꞌāpī
9E Timoteo, ka uꞌi te rāveꞌa mo hōrou ōꞌou mo oho mai. 10A Rema, ꞌi te haŋa rahi ki te meꞌe o te ao nei, ko hoa ꞌana i a au ꞌe ko oho ꞌana ki Tētārōnika. A Keretene ꞌai Karatia, ꞌe a Tito ꞌi Raramatia. 11Ko Ruka mau nō te meꞌe ꞌi muri i a au.
E uꞌi e kimi mai a Marko ꞌe ꞌai ka maꞌu rō mai ꞌi muri i a koe mo hāꞌūꞌū mai ꞌi tāꞌaku aŋa. 12A Tīkiko ko haka uŋa ꞌana e au ki Ēfeto.
13Ki oho mai koe, e maꞌu mai te paratoa haka rē e au ki a Karapō ꞌi Toroare. E maꞌu takoꞌa mai te puka, ꞌe te meꞌe mo taꞌe rehu i a koe he puka aŋa era hai kiri.
14A Arehantaro, taŋata aŋa ꞌaurī era, ko aŋa mai ꞌana i te meꞌe taꞌe tano ki a au; mo te ꞌAtua e haka ūtuꞌa i a ia. 15E hāpaꞌo koe e ia; ꞌina, paꞌi, he haŋa ki te roŋo haka ꞌite e tātou.
16ꞌI te mahana maꞌu raꞌe era i a au mo ture ꞌi muꞌa o te nuꞌu ra-rahi o te rōmano, ꞌina e tahi kope i mataꞌite mōꞌoku; taꞌatoꞌa nō i hoa ai i a au. Pē hiva ꞌana te ꞌAtua ana taꞌe tapa atu, ꞌo haka ūtuꞌa i a rāua. 17ꞌĀꞌana mau nō i hāꞌūꞌū mai ꞌe i vaꞌai mai i te pūai mo haka ꞌite ōꞌoku i te roŋo riva-riva o ruŋa o Ietū Kiritō, ꞌe, takoꞌa, mo haka roŋo tahi mai o te nuꞌu taꞌe he hūrio. Pē ira te ꞌAtua i toꞌo ai i a au mai roto i te haha o te reone, 18ꞌe pē ira takoꞌa ꞌā ka haka eꞌa ena i a au mai roto i te ꞌati taꞌatoꞌa ꞌe ka maꞌu ena i a au ki te raŋi ki te ao haka tere e ia. ¡Ki haꞌahana-hana tahi tātou ki a ia ꞌātā ki te hopeꞌa raꞌa! ⌊ꞌĀmene⌋.
He ꞌaroha
19Ka ꞌaroha ki a Pirika ararua ko ꞌĀkira, pē ira ꞌā ki a ꞌOnetiforo ꞌe ki tōꞌona huaꞌai.
20A Erato ko noho ꞌana ꞌi Kōrinto, ꞌe a Torofimo, ꞌi te māui-ui, ko haka rē ꞌana e au ꞌi Mīreto.
21E Timoteo, e hōrou mai koe mai taꞌe tuꞌu mai te toŋa. A Euvuro, a Purenete, a Rino, a Karauria ꞌe te taina taꞌatoꞌa ꞌī e ꞌaroha atu ena.
22Ka ai i a koe te hāꞌūꞌū o te tātou Pūꞌoko Haka Tere ko Ietū Kiritō, ꞌe te riva rahi o te ꞌAtua ꞌi ruŋa i a kōrua taꞌatoꞌa.