He rua parau pāpaꞌi e Pauro ki te taina o
Tētārōnika
ꞌI te parau pāpaꞌi raꞌe ki te taina o Tētārōnika i vānaŋa ai te ⌊ꞌāpōtoro⌋ nei ko Pauro o ruŋa i te hoki iŋa mai o te ⌊Kiritō⌋. ꞌI te rua parau nei, e vānaŋa haka ꞌou ꞌā a Pauro o ruŋa ꞌe, hora nei, ꞌātā rahi te meꞌe kī o ruŋa o te hoki iŋa mai o Ietū. Tētahi nuꞌu o rā noho iŋa kī a rāua he ⌊kiritiano⌋ e hāpī e oho ꞌā pē nei ē: ko tuꞌu haka ꞌou mai ꞌā te Kiritō (2.1–3), ꞌe taꞌe he parautiꞌa rā vānaŋa. ꞌO ira a Pauro i pāpaꞌi ai ki te taina o Tētārōnika mo kī pē nei ē: he reo-reo te hāpī era.
He haka manaꞌu e Pauro ki te hāpī haka ꞌite era e ia o muꞌa ꞌā pē nei ē: ꞌi raꞌe ki te tuꞌu iŋa mai o te Kiritō e ai rō te tētahi tāpaꞌo mo haka aŋi-aŋi i tōꞌona hoki iŋa mai. Te nuꞌu taꞌe haŋa ki te ꞌAtua e haka takeꞌa rō i te rāua taꞌe haŋa ki a ia, e eꞌa rō mai e tahi taŋata taparahi-taꞌata, e reo-reo rō ki te taŋata ꞌe meꞌe rahi atu nuꞌu ka haka roŋo ena. ꞌE ꞌātā e kī rō e te taŋata taparahi-taꞌata nei he ꞌAtua a ia. Ka hopeꞌa ena he haka kore e te ꞌAtua i te kope nei (2.3–12). ꞌO ira a Pauro e haka pūai nei i te taina o Tētārōnika mo haka rē ꞌe mo taꞌe haka roŋo i te hāpī reo-reo nei, ꞌe mo haka noho mo oho nō i te rāua manaꞌu ꞌi ruŋa i te ꞌAtua. ꞌE he ani takoꞌa e Pauro mo taꞌe haka tapa mai te hāpī haka ꞌite e ia (2.15).
ꞌI roto o te kiritiano o Tētārōnika e ai rō ꞌā te taina hupe-hupe taꞌe haŋa mo aŋa, ꞌe hai meꞌe ravaꞌa mai te tētahi taina e ora era. He haka manaꞌu ia e Pauro ki rā ŋā nuꞌu pē hē a ia e noho era ꞌi muri i a rāua. ꞌIna, paꞌi, a ia he tiaki ki te rua mo vaꞌai i te meꞌe; ꞌāꞌana mau ꞌā te uꞌi i tōꞌona ora. ꞌO ira i pāpaꞌi ai hai pūai: «Te kope taꞌe haŋa mo aŋa, ꞌina ko kai» (3.6–12).
1He ꞌaroha
1A au, a Pauro, a Tirivano ꞌe a Timoteo he ꞌaroha atu ki a kōrua ki te nuꞌu taꞌatoꞌa o Tētārōnika haꞌamuri ki te ꞌAtua Matuꞌa ꞌe ki te Pūꞌoko Haka Tere ko Ietū Kiritō. 2Ka ai ꞌi ruŋa i a kōrua te riva rahi ꞌe te haumārū o te ꞌAtua, Matuꞌa o tātou, ꞌe o te Pūꞌoko Haka Tere o tātou ko Ietū Kiritō.
He māuru-uru ꞌe he pure
3E te taina, te meꞌe tano mo aŋa e mātou he māuru-uru he oho ki te ꞌAtua mo kōrua ꞌo te ai te haka moe iŋa o kōrua i te manaꞌu ꞌi ruŋa i a Ietū pe te ꞌata pūai e oho ena, ꞌe te haŋa o kōrua mo te rua pe te ꞌata rahi nō e oho ena. 4ꞌO ira a mātou e vānaŋa nei hai koa o ruŋa i a kōrua ꞌi roto i te nuꞌu ⌊haka moe i te manaꞌu⌋ ꞌi ruŋa i a Ietū ꞌi te kona taꞌatoꞌa tuꞌu o mātou. E ꞌaꞌamu rō ꞌā e mātou pē hē kōrua e haka moe e oho nō ena i te manaꞌu ꞌi ruŋa i a Ietū, ꞌina he ꞌaka-ꞌaka te kōrua manaꞌu, ka ai atu e rahi rō ꞌana te ꞌati topa atu ꞌe e ai rō ꞌana te nuꞌu tute i a kōrua mo tōtōā.
5Hai haꞌaoromaꞌi iŋa o kōrua i te meꞌe taꞌatoꞌa ena, e ꞌite nei a mātou: a kōrua ko haka moe mau ꞌana i te manaꞌu ꞌi ruŋa i a Ietū ꞌe he nuꞌu mau ꞌā ꞌāꞌana. ꞌE, ꞌi te ꞌite o tātou pē nei ē: te ꞌAtua, he ꞌAtua aŋa i te meꞌe tī-tika, e ꞌite takoꞌa nei: pe muꞌa ka oho ena, e aŋa takoꞌa rō te ꞌAtua i te ŋā meꞌe nei: e kī rō he nuꞌu tano kōrua mo noho, ꞌina he hopeꞌa raꞌa, ꞌi tōꞌona kona haka tere, ꞌo te haka moe i te manaꞌu ꞌi ruŋa i a Ietū, 6e haka ꞌamo rō hai ꞌati i te nuꞌu tōtōā i a kōrua, 7ꞌe e vaꞌai rō mai i te ora ki a tātou, ki te nuꞌu ꞌamo i te ꞌati. Te meꞌe nei ka topa ena ꞌi te mahana o te hoki iŋa mai o te tātou Pūꞌoko Haka Tere ko Ietū Kiritō ananake ko tāꞌana merahi pūai mai te raŋi e haka vari tahi rō ꞌā e te ura o te ahi.
8Ka tuꞌu mai ena mo haka ūtuꞌa i te nuꞌu hārui hai tuaꞌivi i te ꞌAtua ꞌe taꞌe haꞌatura ki te roŋo riva-riva o ruŋa o Ietū, Pūꞌoko Haka Tere o tātou. 9-10Te ūtuꞌa mo te nuꞌu era he ūtuꞌa ꞌina he hopeꞌa raꞌa. ꞌI te mahana ka tuꞌu mai ena mai te raŋi te tātou Pūꞌoko Haka Tere e toꞌo rō i rā nuꞌu e haka ꞌava-ꞌava rō, ꞌo oꞌo ki roto i tōꞌona pūai nui-nui ꞌana-ꞌana.
ꞌE a tātou, te nuꞌu haꞌataꞌa taꞌatoꞌa e te ꞌAtua māꞌana, nuꞌu haka moe i te manaꞌu ꞌi ruŋa i a Ietū, e haꞌahana-hana tahi rō ki a ia ꞌe e māere rō ꞌi te meꞌe taꞌatoꞌa aŋa e ia mo tātou. ꞌE, ꞌi te haka moe o kōrua i te manaꞌu ꞌi ruŋa i te meꞌe hāpī atu era e mātou, a tātou taꞌatoꞌa o roto o te nuꞌu haꞌahana-hana ki a ia.
11ꞌO ira, ꞌi roto i te mātou pure, e pure takoꞌa rō ꞌana a mātou mo kōrua paurō te mahana. E ani nei mātou ki te tātou ꞌAtua mo hāꞌūꞌū atu, ki ai ai te kōrua noho iŋa tano o te nuꞌu haꞌataꞌa e ia māꞌana, ꞌe ki ravaꞌa ai kōrua, hai pūai ōꞌona, mo aŋa i te meꞌe riva-riva taꞌatoꞌa manaꞌu e kōrua mo aŋa ꞌo te ai o kōrua he nuꞌu haka moe i te manaꞌu ꞌi ruŋa i a Ietū. 12E pure nei mātou pē ira mo kōrua ki haꞌahana-hana ai te taŋata i te tātou Pūꞌoko Haka Tere ko Ietū Kiritō hai kōrua, ꞌi te takeꞌa i te kōrua noho iŋa tano ꞌe i te kōrua meꞌe riva-riva aŋa, ꞌe ki koa ai a Ietū mo kōrua. Te meꞌe taꞌatoꞌa nei ka topa ena hai riva rahi mau nō o te tātou ꞌAtua ꞌe o te tātou Pūꞌoko Haka Tere ko Ietū Kiritō.
2Te hoki iŋa mai o Ietū
1E te taina, hora nei ko haŋa ꞌana a mātou mo vānaŋa atu o ruŋa i te hoki iŋa mai o te tātou Pūꞌoko Haka Tere ko Ietū Kiritō, ꞌe o ruŋa i te taka-taka iŋa o tātou mo noho ꞌi muri i a ia. 2Mo tuꞌu tāꞌue atu e tahi kope e kī rō ꞌā: ko haka takeꞌa ꞌana ki a ia e te ⌊Vārua Maitai⌋ e tahi meꞌe, ꞌo ko tuꞌu ꞌana te hāpī mai i a mātou, ka ai atu i vānaŋa ꞌo i pāpaꞌi, pē nei ē: ko hoki mai era ꞌā te tātou Pūꞌoko Haka Tere ko Ietū, he ani atu a mātou: ꞌina kōrua ko haka roŋo ꞌe ꞌina ko riꞌa-riꞌa. 3Te meꞌe nei ꞌāꞌaku e kī atu ena: e uꞌi kōrua ꞌo haka roŋo rō ki te reo-reo kī atu e te nuꞌu. ꞌI raꞌe, paꞌi, ki te hoki iŋa mai o Ietū, e rahi rō te nuꞌu riri mo te ꞌAtua ꞌe haka tumu i te ture ki a ia. ꞌI rā hora ka eꞌa mai ena e tahi taŋata riri taparahi-taꞌata mo te ꞌAtua, kope mōꞌona ko ai era ꞌana te ūtuꞌa he pōꞌauahi. 4Te taŋata nei he riri nō te aŋa mo te ꞌAtua ꞌe mo te meꞌe taꞌatoꞌa haꞌamuri e te taŋata pa he ꞌatua. E kī rō e nei taŋata: i a ia te pūai ꞌe te tōroꞌa ꞌata hau rō atu ki te pūai ꞌe ki te tōroꞌa o te ŋā meꞌe taꞌatoꞌa nei, ꞌe ꞌātā e uru rō ki roto i te Kona Haꞌamuri ꞌAtua, e noho rō ꞌe e kī rō ko ia te ꞌAtua.
5Ko rehu ꞌana ꞌō pēaha i a kōrua pē nei ē: i vānaŋa rō atu a au o ruŋa i te ŋā meꞌe nei ꞌi te hora era ōꞌoku ꞌi muri i a kōrua. 6ꞌE ko ꞌite ꞌā e kōrua ko ai te kope haka noho i rā taŋata, ꞌo tuꞌu mai ꞌi raꞌe ki te hora kī e te ꞌAtua. 7A Rukifero, paꞌi, ko haꞌamata ko aŋa mai era ꞌā ꞌi ruŋa i te taŋata, mā te taꞌe ꞌite e rāua, ꞌo haŋa ꞌe ꞌo haꞌatura ki te roŋo o te ꞌAtua. ꞌE te kope ꞌāꞌana te haka noho i te taŋata ꞌo riri ꞌo haka tumu i te ture mo te ꞌAtua, he aŋa he oho mau rō ꞌai i te meꞌe nei ꞌātā ki te mahana ka toꞌo ena i a ia e te ꞌAtua.
8Ki toꞌo, ka takeꞌa iho ena e te nuꞌu i rā taŋata riri taparahi-taꞌata era mo te ꞌAtua, kope ka haka kore ena e te tātou Pūꞌoko Haka Tere hai reꞌo ōꞌona ꞌe hai ꞌana-ꞌana o tōꞌona mana ꞌi te hora ka hoki mai ena. 9Te taŋata riri taparahi-taꞌata nei mo te ꞌAtua hai hāꞌūꞌū o Rukifero ka tuꞌu mai ena. ꞌE ka haka takeꞌa ena i tōꞌona pūai hai mana tuꞌu pa he meꞌe aŋa e te ꞌAtua. 10Hai rauhuru nō atu meꞌe taꞌe tano ka reo-reo ena ki te nuꞌu ꞌi ruŋa i a rāua te ūtuꞌa o te ꞌAtua ꞌo te taꞌe haŋa mo haka moe i te rāua manaꞌu ꞌi ruŋa i te parautiꞌa o ruŋa i a Ietū Kiritō, mo eꞌa mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa.
11ꞌI te taꞌe haŋa o rā nuꞌu ki rā parautiꞌa, he haka rē e te ꞌAtua i te reo-reo iŋa era o rā taŋata mo riro he parautiꞌa mo nei nuꞌu, 12ki haka ūtuꞌa ai e te ꞌAtua i te nuꞌu taꞌatoꞌa taꞌe haŋa mo ⌊haka moe i te manaꞌu⌋ ꞌi ruŋa i te roŋo parautiꞌa, nuꞌu haŋa mau nō mo aŋa i te meꞌe taꞌe tano.
He manaꞌu tano mo te ⌊kiritiano⌋
13Te meꞌe tano mau o mātou mo aŋa he māuru-uru he oho ki te ꞌAtua mo kōrua, e te taina haŋa rahi o te tātou Pūꞌoko Haka Tere ē. Te ꞌAtua, paꞌi, ko haꞌataꞌa era ꞌana i a kōrua, ꞌi raꞌe ki te aŋa iŋa o te ao, ki ai ai kōrua he nuꞌu haka eꞌa e ia mai roto i te ūtuꞌa o te hara ꞌe vaꞌai i te ora ꞌāpī ꞌina he hopeꞌa raꞌa ꞌi te haka moe o kōrua i te manaꞌu ꞌi ruŋa i te roŋo parautiꞌa o ruŋa i a Ietū Kiritō, ꞌe ꞌi te aŋa o te Vārua Maitai ꞌi roto i a kōrua mo riro o kōrua he taŋata ꞌina e tahi hara. 14Hai hāpī haka ꞌite atu era e mātou, te ꞌAtua i aŋa ai mo haka moe mo oho nō kōrua i te manaꞌu ꞌi ruŋa i a Ietū, ki oꞌo ai kōrua ki roto i te nui-nui ōꞌona, te auraꞌa, ki ai takoꞌa ai i a kōrua tōꞌona huru riva.
15ꞌO ira, e te taina ē, e haka noho e oho te kōrua manaꞌu ꞌi ruŋa i a Ietū ꞌe ꞌi ruŋa i te meꞌe hāpī atu era e mātou, ka ai i vānaŋa ꞌo i pāpaꞌi atu. 16ꞌE mā Ietū Kiritō mau ꞌā, Pūꞌoko Haka Tere o tātou, ꞌe mo te ꞌAtua, Matuꞌa o tātou, haŋa mai ꞌe vaꞌai mai hai riva rahi ōꞌona i te koa ꞌina he hopeꞌa raꞌa ꞌe i te ꞌite pē nei ē: pe muꞌa ka oho ena e vaꞌai rō mai i te meꞌe hōrea mai era e ia, 17e haka pūai atu i te māhatu ꞌe e vaꞌai atu i te pūai mo aŋa ꞌe mo kī mo oho i te meꞌe riva-riva mau nō.
3He ani iŋa ki te taina mo pure
1Te meꞌe hopeꞌa, e te taina ē, e pure kōrua mo mātou, ki tuꞌu ai te roŋo parautiꞌa o te tātou Pūꞌoko Haka Tere ki te kona taꞌatoꞌa, ꞌe, takoꞌa, mo toꞌo ꞌe mo haꞌatura e te nuꞌu hai koa pē kōrua. 2E pure takoꞌa kōrua mo hāpaꞌo mai i a mātou e te ꞌAtua, ꞌo raveꞌino mai e te nuꞌu taꞌe haŋa ki a ia; taꞌe, paꞌi, taꞌatoꞌa taŋata ŋaroꞌa i te ⌊roŋo riva-riva o ruŋa i a Ietū⌋ e haka moe ena i te manaꞌu ꞌi ruŋa i a ia. 3Ka ai atu pē ira, te tātou Pūꞌoko Haka Tere ko Ietū e ko taꞌe haka tano i tāꞌana meꞌe kī, ꞌe māꞌana e haka pūai ꞌe e hāpaꞌo atu ꞌo haka hara i a kōrua e Rukifero. 4ꞌO ira mātou e ꞌite riva-riva nei pē nei ē: hai hāꞌūꞌū ōꞌona e aŋa e oho mai ena kōrua i te meꞌe hāpī atu era e mātou ꞌe pē ira ka aŋa ka oho ena. 5ꞌE mo te tātou Pūꞌoko Haka Tere ko Ietū e hāꞌūꞌū atu mo aŋi-aŋi i te rahi o te haŋa o te ꞌAtua ki a kōrua ꞌe mo ꞌite o kōrua mo haꞌaoromaꞌi hai pūai ꞌi te hora o te ꞌati, pa he oho iŋa era ōꞌona.
ꞌIna ko hupe-hupe
6E te taina, he kī atu a mātou hai ꞌīŋoa o te tātou Pūꞌoko Haka Tere ko Ietū Kiritō: mo ai ꞌi roto i a kōrua e tahi taina hupe-hupe taꞌe haka tere i a ia hai meꞌe hāpī atu era e mātou, e haka tapa kōrua mai muri. 7Ko ꞌite ꞌana a kōrua pē hē kōrua ana haka tere, mo tano o te kōrua noho iŋa ki te mātou noho iŋa. ꞌIna, paꞌi, mātou kai hupe-hupe ꞌi te hora era ꞌi muri i a kōrua, 8ꞌe ꞌina mātou kai kai i te haraoa i taꞌe ꞌauhau e mātou. Te meꞌe nō, ka pō ka ꞌōtea e aŋa era mo ravaꞌa moni, ꞌo ai mātou he meꞌe paŋahaꞌa e tahi mo ꞌamo e kōrua, 9ka ai atu e tano rō ꞌā a mātou mo kī atu mo hāꞌūꞌū mai. ꞌE i aŋa a mātou mo haka takeꞌa atu ki a kōrua pē hē kōrua ana haka tere i a kōrua.
10Hora era o mātou ꞌi muri i a kōrua i haka rē rō atu i te roŋo nei: Te kope taꞌe haŋa mo aŋa, ꞌina ko kai. 11ꞌE, hora nei, ko ŋaroꞌa ꞌana e mātou pē nei ē: tētahi o kōrua e hupe-hupe rō ꞌā; te rāua meꞌe aŋa nō he haka mira-mira i te aŋa o te tētahi. 12Te roŋo o mātou mo te ŋā nuꞌu nei hai ꞌīŋoa o te tātou Pūꞌoko Haka Tere ko Ietū Kiritō: ꞌina ko haka mira-mira haka ꞌou i te aŋa o te tētahi, ꞌe e aŋa mo ai o te rāua rāveꞌa.
13ꞌE a kōrua, e te taina ē, ꞌina ko haꞌumani ꞌi te aŋa iŋa i te meꞌe riva-riva. 14ꞌE mo ai e tahi taina taꞌe haꞌatura ki te meꞌe kī atu e mātou ꞌi ruŋa i te parau nei, e uꞌi ko ai, ꞌe ꞌai ka haka tapa rō kōrua mai muri, ki haꞌamā ai. 15ꞌIna kōrua ko tāpūfētī i a ia. Te meꞌe o kōrua mo aŋa, he ture, pa he taina, mo haka tī-tika ōꞌona i tōꞌona ara.
He ꞌaroha
16ꞌE mo te tātou Pūꞌoko Haka Tere, i a ia te haumārū, e vaꞌai atu ki a kōrua i te haumārū ꞌi te taꞌatoꞌa nō hora. Ka ai a ia ꞌi muri i a kōrua taꞌatoꞌa. 17A au, a Pauro, e pāpaꞌi atu ena i te ꞌaroha nei hai rima mau nei ꞌā ōꞌoku. Pē ira a au e tāpaꞌo tahi nei i tāꞌaku parau pāpaꞌi. 18Ka ai ꞌi ruŋa i a kōrua taꞌatoꞌa te riva rahi o te tātou Pūꞌoko Haka Tere ko Ietū Kiritō.