He rua parau pāpaꞌi e
Pētero
Te kī o te kope ꞌāꞌana te parau nei: tōꞌona ꞌīŋoa ko Tīmona Pētero. I pāpaꞌi ai i te parau nei mo te nuꞌu taꞌatoꞌa ⌊haka moe i te manaꞌu⌋ ꞌi ruŋa i a Ietū. E toru hāpī pūai o ruŋa nei: he hatu iŋa mo maꞌu hio-hio mo oho i te hāpī parautiꞌa o ruŋa i a Ietū (1.1–21), he vānaŋa o ruŋa i te maꞌori hāpī reo-reo (2.1–22), ꞌe he vānaŋa o ruŋa i te hoki iŋa mai o te ⌊Kiritō⌋ (3.1–13).
ꞌI te hāpī raꞌe he kī mai e Pētero: «Te ꞌAtua, hai pūai ōꞌona, e hāꞌūꞌū mai ena hai rauhuru rāveꞌa mo riva o tātou mo haꞌatura ki a ia ꞌe mo tano o te tātou noho iŋa ki tōꞌona mata. Te meꞌe nei e ravaꞌa ena hai māhani o tātou ki a ia» (1.3). ꞌO ira, e haka rē tātou mo haka tika mai e te ꞌAtua ꞌe e maꞌu hio-hio i te hāpī parautiꞌa o ruŋa i a ia.
ꞌI te rua hāpī he vānaŋa mai a Pētero o ruŋa i te maꞌori hāpī reo-reo. Ki tāꞌana kī, ko hārui ꞌana a rāua hai tuaꞌivi i te tātou Pūꞌoko Haka Tere ko Ietū Kiritō, ꞌe e haka tere ena hai meꞌe taꞌe tano pohe nō e te hakari. He kī mai pē nei ē: ko ai era ꞌana te ūtuꞌa o te ꞌAtua mo rāua, ꞌe e ko taꞌe haka ūtuꞌa. ꞌE he hatu mai: e hāpaꞌo tātou te nuꞌu haka moe parautiꞌa i te manaꞌu ꞌi ruŋa i a Ietū, ꞌo haka tapa mai te ara parautiꞌa, ꞌe ꞌo ꞌata ꞌati a tātou ki te hora raꞌe era, hora kai haka moe hia ꞌana i te manaꞌu ꞌi ruŋa i a ia (2.20).
ꞌI roto i te hāpī o ruŋa i te hoki iŋa mai o Ietū he kī mai pē nei ē: e ai rō, ꞌi te ŋā mahana hopeꞌa era, te nuꞌu manaꞌu taꞌe he parautiꞌa te vānaŋa o ruŋa i te hoki iŋa mai o Ietū ꞌe o ruŋa i te ture hopeꞌa, nuꞌu haka meꞌe-meꞌe o ruŋa i rā ŋā meꞌe. Ka ai atu pē ira, te meꞌe mo taꞌe rehu i a tātou: te ŋā meꞌe nei ꞌa Ietū ꞌe o tāꞌana ꞌāpōtoro i hāpī. ꞌO ira e ꞌite nei e tātou: rā ŋā meꞌe e ko taꞌe topa. ꞌE he haka haŋu mai hai ŋā vānaŋa nei: «Taꞌe he ŋeꞌi o te ꞌAtua e taꞌe topa ena te meꞌe kī e ia, pa he meꞌe manaꞌu e te tētahi nuꞌu. Te parautiꞌa, e tiaki ꞌana ki a kōrua hai haumārū ꞌi te meꞌe era ꞌina he haŋa mo mate e tahi nuꞌu. Tāꞌana meꞌe haŋa he huri o te manaꞌu o te taŋata taꞌatoꞌa ki a ia» (3.9).
1He ꞌaroha
1A au, a Pētero, kī takoꞌa ko Tīmona, tāvini ꞌe ⌊ꞌāpōtoro⌋ ꞌa Ietū Kiritō, he ꞌaroha atu ki a kōrua ki te nuꞌu i a rāua takoꞌa te hauhaꞌa he ⌊haka moe i te manaꞌu⌋ ꞌi ruŋa i a Ietū, pa he haka moe iŋa nei o te mātou manaꞌu, he meꞌe ravaꞌa hai riva rahi o te ꞌAtua ꞌe o Ietū Kiritō, kope haka eꞌa i a tātou mai roto i te ūtuꞌa o te hara ꞌe vaꞌai mai i te ora ꞌāpī ꞌina he hopeꞌa raꞌa. 2Ka rahi ka oho te riva rahi ꞌe te haumārū o te ꞌAtua ꞌi ruŋa i a kōrua ꞌi te hora taꞌatoꞌa ꞌite oho o kōrua o ruŋa i a ia ꞌe o ruŋa i a Ietū, Pūꞌoko Haka Tere o tātou.
Te meꞌe haŋa o te ꞌAtua i a tātou
3Te ꞌAtua, hai pūai ōꞌona, e hāꞌūꞌū mai ena hai rauhuru rāveꞌa mo riva o tātou mo haꞌatura ki a ia ꞌe mo tano o te tātou noho iŋa ki tōꞌona mata. Te meꞌe nei e ravaꞌa ena hai māhani o tātou ki a ia, kope haꞌataꞌa i a tātou mo huaꞌai ꞌāꞌana hai haka ꞌite mai i tōꞌona huru riva ꞌe i tōꞌona pūai nui-nui. 4Hai ŋā meꞌe nei i vaꞌai mai ai i te meꞌe nui-nui ꞌe hauhaꞌa hōrea mai era mo tātou. ꞌE hai rā ŋā meꞌe hōrea mai era e riva nei tātou mo eꞌa mai roto i te manaꞌu taꞌe tano o te ao nei ꞌe mo riro o tātou pē ia, te auraꞌa, mo ai i a tātou takoꞌa tōꞌona huru riva.
5ꞌO ira, e vaꞌai tahi kōrua i a kōrua mo aŋa i te meꞌe nei: ki te kōrua haka moe iŋa i te manaꞌu ꞌi ruŋa i a Ietū, e ꞌāmui te noho iŋa tī-tika ki te mata o te ꞌAtua, ꞌe ki te noho iŋa tī-tika, te ꞌite i te haka topa riva-riva i te manaꞌu, 6ꞌe ki te ꞌite i te haka topa riva-riva i te manaꞌu, te ꞌite i te haka noho ꞌo hara, ꞌe ki te ꞌite i te haka noho ꞌo hara, te ꞌite i te haꞌaoromaꞌi hai haumārū, ꞌe ki te ꞌite i te haꞌaoromaꞌi hai haumārū, te moꞌa ꞌe te haꞌatura ki te ꞌAtua, 7ꞌe ki te moꞌa ꞌe haꞌatura ki te ꞌAtua, te haŋa ki te taina haka moe i te manaꞌu ꞌi ruŋa i a Ietū, ꞌe ki te haŋa ki te taina, te haŋa mo te taŋata taꞌatoꞌa.
8ꞌE mo ai nā i a kōrua te ŋā meꞌe nei ꞌe e haka pūai e oho rō ꞌana, ꞌina ia te kōrua noho iŋa e ko māuꞌa, ꞌe te māhani o kōrua ki te tātou Pūꞌoko Haka Tere ko Ietū Kiritō e ko māuꞌa takoꞌa. 9ꞌE te ŋā taina ena ꞌina he ŋā meꞌe ena i a rāua, pa he nuꞌu matakeva ꞌā, ko rehu ꞌana i a rāua: te hara o rāua o muꞌa ꞌā ko haka kore ꞌana.
10ꞌO ira, e te taina ē, e vaꞌai tahi kōrua i a kōrua mo tano o te kōrua noho iŋa ki te mata o te ꞌAtua, ki takeꞌa ai e te nuꞌu: he parautiꞌa mau ꞌā a kōrua he nuꞌu haꞌataꞌa e te ꞌAtua māꞌana mo haka moe i te manaꞌu ꞌi ruŋa i a Ietū. Mo aŋa o kōrua pē ira, e ko haka tapa kōrua mai te ara parautiꞌa ki te hora hopeꞌa, 11ꞌe te ꞌAtua, hai koa, ka haka uru ena i a kōrua ki roto i te ao ꞌina he hopeꞌa raꞌa, he ao haka tere e te tātou Pūꞌoko ko Ietū Kiritō, kope haka eꞌa i a tātou mai roto i te ūtuꞌa o te hara ꞌe vaꞌai mai i te ora ꞌāpī ꞌina he hopeꞌa raꞌa.
Te hāpī nei he parautiꞌa
12ꞌO ira a au, e te taina ē, ka haka manaꞌu ka oho atu ena o ruŋa i te meꞌe taꞌatoꞌa ena, ka ai atu, nā e maꞌu hio-hio mai ena kōrua i nā parautiꞌa. 13ꞌĒ-ē, mai ora atu ꞌana a au, tāꞌaku meꞌe ka aŋa nei he haka manaꞌu he oho atu o ruŋa i te ŋā meꞌe hatu atu era e au. 14Te tātou Pūꞌoko Haka Tere, paꞌi, ko Ietū Kiritō ko haka ꞌite mai ꞌana: e ko roa he haka rē a au i te ao nei. 15ꞌO ira a au e vaꞌai tahi atu ena i a au mo hāpī atu i te ŋā meꞌe nei, ki te kona, ka mate ena a au, e ko rehu i a kōrua ki te hora hopeꞌa.
16Te hāpī haka ꞌite atu era e mātou o ruŋa i te pūai nui-nui o te tātou Pūꞌoko Haka Tere ko Ietū Kiritō ꞌe o ruŋa i tōꞌona hoki iŋa mai, taꞌe he ꞌaꞌamu e tahi. Hai mata mau nei ꞌā o mātou i takeꞌa ai i tōꞌona pūai nui-nui. 17I takeꞌa rō, paꞌi, e mātou i te pūai ꞌana-ꞌana ōꞌona hora haka paka era e te ꞌAtua Matuꞌa mai te raŋi pē nei ē: «A ia he poki haŋa rahi ꞌāꞌaku, ꞌi ruŋa i a ia tōꞌoku koa». 18O mātou mau ꞌā i ŋaroꞌa i rā reꞌo e vānaŋa mai ꞌana mai te raŋi ꞌi ruŋa i te maꞌuŋa moꞌa era; ꞌi rā hora, ananake mātou ko te tātou Pūꞌoko Haka Tere.
19Pē ira a mātou e ꞌite nei: te meꞌe taꞌatoꞌa kī era e te perofeta o muꞌa ꞌā o ruŋa i a Ietū he parautiꞌa mau ꞌā, ꞌe te meꞌe tano o kōrua mo aŋa he haka roŋo takoꞌa ki rā ŋā meꞌe kī era e rāua ꞌo te ai rā ŋā meꞌe pa he hakariꞌi pura ꞌi te kona pōhāhā, ꞌātā ki te ꞌōtea ꞌe ki te eꞌa iŋa o te hetuꞌu popohaŋa mo haka māꞌeha i te kōrua māhatu, te auraꞌa, ꞌātā ki te hoki iŋa mai o Ietū Kiritō, hora ka haka aŋi-aŋi mai ena i te meꞌe taꞌatoꞌa. 20ꞌE hora nei, te meꞌe hopeꞌa o te nui-nui mo aŋi-aŋi e kōrua: ꞌina e tahi meꞌe pāpaꞌi e te perofeta ꞌi ruŋa i te ⌊Pāpaꞌi Moꞌa⌋ mo haꞌaauraꞌa hai manaꞌu o kōrua ꞌā. 21Te perofeta, paꞌi, ꞌina kai vānaŋa hai manaꞌu taŋata; i vānaŋa ai hai manaꞌu o te ꞌAtua, ꞌe o te ⌊Vārua Maitai⌋ i haka vānaŋa.
2Te maꞌori reo-reo
1I ai rō te perofeta reo-reo ꞌi roto i te itaraera. Pē ira takoꞌa ꞌana ka ai ena te maꞌori reo-reo ꞌi roto i a kōrua. ꞌĒ-ē, e oꞌo rō atu ki roto i a kōrua, mā te taꞌe ꞌite e kōrua, ꞌe e hāpī e oho rō i te hāpī taꞌe parautiꞌa maꞌu i te taina mo haka tapa mai te ara parautiꞌa o te ꞌAtua. ꞌE te ŋā maꞌori reo-reo nei ꞌātā e hārui rō hai tuaꞌivi i te tātou Pūꞌoko Haka Tere ko Ietū Kiritō, kope ꞌauhau hai toto era ōꞌona mo haka eꞌa i a tātou mai roto i te hara. ꞌE, ꞌi te aŋa pē ira, e ko roa hia ka ravaꞌa ena e rāua i te ūtuꞌa o te ꞌAtua. 2Ka ai atu pē ira, e rahi rō te nuꞌu ka aŋa takoꞌa ena i te meꞌe taꞌe tano aŋa e te ŋā maꞌori reo-reo era, ꞌe hai noho iŋa taꞌe tano o rā nuꞌu ka ai ena te vānaŋa taꞌe tano mo te ara parautiꞌa o te ꞌAtua. 3ꞌI te nou-nou o te ŋā maꞌori reo-reo era, he uꞌi i te rāveꞌa mo ꞌata toꞌo i te moni mai i a kōrua hai hāpī reo-reo o rāua, hāpī poreko ꞌi roto i te rāua manaꞌu mau nō era. ꞌE mo te nuꞌu ena, ko ai era ꞌana te ūtuꞌa o te ꞌAtua mai muꞌa ꞌā, ꞌe a ia e ko taꞌe haka ūtuꞌa i a rāua.
4Te ꞌAtua ꞌina kai haka rehu i te hara o te merahi aŋa i meꞌe taꞌe tano. Te meꞌe i aŋa: he ava i rā ŋā merahi ki roto i te pōꞌauahi, ꞌe i haka rē ai ꞌi roto i te pōꞌuri e here-here rō ꞌana hai vivi mo te mahana o te ture. 5ꞌE ꞌina kai haka rehu takoꞌa i te hara o te nuꞌu aŋa i te meꞌe taꞌe tano o muꞌa ꞌā. Te meꞌe i aŋa: he uŋa mai ki ruŋa i te ao nei i te ꞌua taꞌe mo mahana haka ꞌou ꞌātā ki te roa mo emu o te meꞌe taꞌatoꞌa, ꞌe te taŋata i haka ora ko Nōē, he kope haka ꞌite o ruŋa i te noho iŋa tī-tika ki te mata o te ꞌAtua, ꞌe he nuꞌu haka ꞌou hoko hitu. 6ꞌE te ŋā kona era ko ⌊Tōroma⌋ ꞌe ko ⌊Kōmora⌋ i haka ūtuꞌa rō e te ꞌAtua hai ahi ꞌātā ka topa rō he ꞌeo-ꞌeo, mo haka takeꞌa he aha te meꞌe mo topa ki te nuꞌu aŋa i te meꞌe taꞌe tano. 7Te taŋata i ora o rā ŋā kona ko ⌊Rota⌋, he taŋata aŋa i te meꞌe tī-tika ki te mata o te ꞌAtua. A ia e taꞌe au rō ꞌana ꞌi te noho iŋa taꞌe tano o te nuꞌu taparahi-taꞌata o ira. 8Te taŋata nei e māui-ui rō ꞌana te māhatu paurō te mahana e noho era ꞌi muri i rā nuꞌu e ŋaroꞌa era ꞌe e takeꞌa era i te meꞌe taꞌe tano aŋa e rāua.
9Hai ŋā haꞌaauraꞌa nei e ꞌite ena e ai rō ꞌana te pūai o te ꞌAtua mo haka eꞌa mai roto i te ꞌati i te taŋata aŋa i te meꞌe tī-tika, ꞌe mo haka ūtuꞌa i te nuꞌu aŋa i te meꞌe taꞌe tano, nuꞌu e tiaki e oho ꞌā ki te mahana o te ture hopeꞌa. 10Te nuꞌu ka ꞌata haka ūtuꞌa ena e te ꞌAtua he nuꞌu taꞌe moꞌa i a ia ꞌe he nuꞌu aŋa oho i te meꞌe pohe nō o te hakari. ꞌE te ŋā maꞌori reo-reo nei he nuꞌu pūꞌoko hio-hio, taꞌe raku i te rāua vānaŋa, ꞌe taꞌe riꞌa-riꞌa mo kī i te vānaŋa taꞌe tano mo te kope ꞌata hau rō atu ki a rāua. 11ꞌE, ka ai atu i te merahi te parau ꞌe te pūai ꞌata hau rō atu ki te ŋā maꞌori reo-reo nei, ꞌina he vā-vā ꞌe he kī i te vānaŋa taꞌe tano ꞌi muꞌa o te ꞌAtua mo rā ŋā maꞌori.
12Te nuꞌu nei pa he ꞌanimare taꞌe aŋi-aŋi e tahi meꞌe, ꞌanimare noho hai meꞌe ŋaroꞌa nō o te hakari, poreko mo ꞌa-ꞌaru mo tiŋaꞌi mo haka mate. Te nuꞌu nei he vānaŋa taꞌe tano nō te aŋa mo te meꞌe ꞌina he aŋi-aŋi e rāua ꞌe ka mate ena pa he ꞌanimare 13koia ko ꞌamo i te ꞌati, he ꞌauhau o te meꞌe taꞌe tano i aŋa ki te tētahi. E koa rō ꞌana i te vaꞌai i a rāua ki te noho iŋa taꞌe tano ꞌātā ꞌi te ꞌōtea, ꞌe ꞌina he haꞌamā haka ꞌou. A rāua, ꞌi te hora hokorua atu ꞌi te kōrua ŋoŋoro, he ꞌati ꞌe he haꞌamā e tahi ꞌi te meꞌe taꞌe tano ꞌe reo-reo aŋa oho e rāua mo reka.
14ꞌIna e tahi viꞌe taꞌe pohe e rāua mo moe; e ko rohi-rohi mo hara. Te aŋa nō he reo-reo ki te nuꞌu māhatu rehe-rehe; he ꞌaito mo te meꞌe he nou-nou; e ko taꞌe haka ūtuꞌa rāua e te ꞌAtua. 15Ko oho ꞌana, paꞌi, a te ara kē mai te ara tī-tika o te ꞌAtua. Te meꞌe aŋa oho he meꞌe aŋa e te perofeta era ko ⌊Vārama⌋, poki ꞌa Vōtoro, ꞌi te hora haŋa mo aŋa i te meꞌe taꞌe tano mo ravaꞌa moni. 16I ture rō ꞌo tōꞌona hara: o te muni mau ꞌā ōꞌona i ture i vānaŋa pa he taŋata, ꞌe ꞌina kai haka rē mo aŋa i tāꞌana meꞌe maꞌa-maꞌa manaꞌu era mo aŋa.
17Te ŋā maꞌori reo-reo ena pa he pū vai ꞌina he vai o roto, pa he raŋi ena ꞌā e puhia ena ꞌi te tokerau, ꞌe te ūtuꞌa mo rāua he noho mau rō ꞌāvai ꞌi roto i te kona hopeꞌa o te pōꞌuri. 18He teꞌo-teꞌo te aŋa o ruŋa i a rāua hai vānaŋa ꞌina e tahi auraꞌa. Hai meꞌe rake-rake mo te hakari ꞌe hai meꞌe taꞌe tano pohe nō o te hakari e aŋa ena mo haka huri i te manaꞌu o te nuꞌu aŋa riꞌa-riꞌa i eꞌa ai mai roto i te meꞌe taꞌe tano. 19He kī nō te aŋa e tū ŋā maꞌori reo-reo ena: «Te nuꞌu oho mai a te ara o mātou ꞌina he kope mo kī pē hē a rāua ana haka tere». ꞌE te parautiꞌa, te ŋā maꞌori reo-reo nei he ꞌekaravo o te meꞌe taꞌe tano aŋa e rāua. Te taŋata taꞌatoꞌa, paꞌi, he ꞌekaravo o te meꞌe taꞌatoꞌa haka tere i a rāua. 20Te nuꞌu eꞌa mai roto i te meꞌe taꞌe tano o te ao nei hai ⌊haka moe i te manaꞌu⌋ ꞌi ruŋa i te tātou Pūꞌoko Haka Tere ko Ietū Kiritō, kope haka eꞌa i a tātou mai roto i te ūtuꞌa o te hara, mo haka rē i a rāua mo haka tere haka ꞌou e rā ŋā meꞌe, ka hopeꞌa ena ꞌata peore ki tū roa raꞌe era. 21I hau rō atu ꞌi te tano ꞌāhani i taꞌe ꞌite o ruŋa i te ara tī-tika o te ꞌAtua, ki te māhani ꞌe ꞌai ka hārui hai tuaꞌivi i te roŋo moꞌa o te ꞌAtua vaꞌai ki a rāua. 22ꞌI ruŋa i a rāua i haka tano ai te parautiꞌa o te kī iŋa era pē nei ē: «He hoki he kai te paiheŋa i tōꞌona rua», ꞌe, «Te oru haka hopu iho he hoki he tū ꞌi roto i te rare-rare».
3Te hoki iŋa mai o Ietū
1E te taina, he rua parau nei ꞌāꞌaku e pāpaꞌi atu ena. ꞌE hai ŋā parau nei i haŋa ai a au mo haka tī-tika atu i te kōrua manaꞌu. 2E manaꞌu kōrua ki te meꞌe kī e te perofeta ꞌi muꞌa ꞌana ꞌe ki te meꞌe hāpī atu e te ⌊ꞌāpōtoro⌋ o ruŋa i te roŋo o te tātou Pūꞌoko Haka Tere ko Ietū Kiritō, kope haka eꞌa i a tātou mai roto i te ūtuꞌa o te hara ꞌe vaꞌai mai i te ora ꞌāpī ꞌina he hopeꞌa raꞌa.
3Te meꞌe raꞌe mo taꞌe rehu i a kōrua ko te meꞌe nei: ꞌi te ŋā mahana hopeꞌa era e ai rō te nuꞌu, te rāua noho iŋa hai meꞌe pohe nō e te hakari, ꞌe pa he haka meꞌe-meꞌe 4ka ꞌui era: «¿Ko aha ꞌana rā te hōrea kī era pē nei ē: e hoki haka ꞌou rō mai te ⌊Kiritō⌋? Ko mā-mate tahi ꞌana te tātou matuꞌa, ꞌe ko te noho iŋa ꞌana ꞌō te meꞌe taꞌatoꞌa pa he hora aŋa era ꞌā e te ꞌAtua i te ao». 5Te nuꞌu era e haka rehu rō ꞌā pē nei ē: ko ai era ꞌana te raŋi ꞌe te henua, ꞌe o te ꞌAtua i haka eꞌa mai roto i te vai ꞌe i haka noho ꞌi tōꞌona kona hai kī mau nō e ia. 6ꞌE hai vai i haka kore ai e te ꞌAtua i te henua o muꞌa ꞌā. 7Te raŋi ꞌe te henua o te hora nei ko haka rē ꞌā e te ꞌAtua mo tutu hai ahi. ꞌI te mahana era o te ture hopeꞌa ꞌe o te haka ūtuꞌa i te nuꞌu aŋa i te meꞌe taꞌe tano ka tutu ena hai nei ahi.
8E te taina, ꞌina takoꞌa ko rehu: te mahana e tahi, mo te ꞌAtua, pa he matahiti e hoꞌe taꞌutini, ꞌe te hoꞌe taꞌutini matahiti, pa he mahana e tahi mōꞌona. 9Taꞌe he ŋeꞌi o te ꞌAtua e taꞌe topa ena te meꞌe kī e ia, pa he meꞌe manaꞌu e te tētahi nuꞌu. Te parautiꞌa, e tiaki ꞌana ki a kōrua hai haumārū ꞌi te meꞌe era ꞌina he haŋa mo mate e tahi nuꞌu. Tāꞌana meꞌe haŋa he huri o te manaꞌu o te taŋata taꞌatoꞌa ki a ia.
10Ka ai atu pē ira, te mahana o te hoki iŋa mai o te tātou Pūꞌoko Haka Tere ko Ietū Kiritō pa he toke-toke ꞌā ka tuꞌu mai ena. E ŋaroꞌa rō i te heruru taparahi-taꞌata, ꞌe e ŋaro rō te raŋi. ꞌE te raꞌā, te hetuꞌu, te māhina, ꞌe te henua koia ko te meꞌe taꞌatoꞌa o ruŋa he vera tahi ꞌi te ahi.
11ꞌI te ai pē ira te meꞌe taꞌatoꞌa ka haka kore ena, e tano te kōrua noho iŋa ki te mata o te ꞌAtua koia ko haꞌatura ꞌe ko moꞌa i a ia 12e tiaki ena kōrua ki te tuꞌu iŋa mai o te mahana era o te ꞌAtua, koia ko haŋa mo tuꞌu hōrou mai o rā mahana. ꞌI rā mahana he haka kore tahi e te ahi i te raŋi ꞌe i te meꞌe taꞌatoꞌa o ruŋa pa he raꞌā, hetuꞌu ꞌe māhina; he tehe tahi ꞌi roto i te ura o te ahi. 13Ka ai atu pē ira, a tātou ꞌī e tiaki ꞌana ki te henua ꞌe ki te raŋi ꞌāpī hōrea mai era e te ꞌAtua, ꞌe te nuꞌu mau nō ka noho era ꞌi ira he nuꞌu aŋa i te meꞌe tī-tika ki te mata o te ꞌAtua.
14ꞌO ira, e te taina ē, e tiaki ꞌana kōrua ki nā meꞌe, e uꞌi te kōrua noho iŋa, ꞌo ai te hape mo tuhi iŋa atu, ꞌe e ai te haumārū ꞌi roto i a kōrua, ki koa ai te tātou Pūꞌoko Haka Tere ko Ietū Kiritō ꞌi te hora o tōꞌona hoki iŋa mai. 15E manaꞌu takoꞌa kōrua: te haumārū ena o te tātou Pūꞌoko Haka Tere ko Ietū Kiritō mo tiaki nō mai he rāveꞌa e tahi ꞌāꞌana mo eꞌa o tātou o te taŋata mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa. ꞌE o ruŋa i te meꞌe mau nei ꞌā i pāpaꞌi atu ai e Pauro, taina haŋa rahi ena o tātou, hai mārama-rama vaꞌai e te ꞌAtua. 16ꞌI ruŋa i tāꞌana parau pāpaꞌi taꞌatoꞌa i pāpaꞌi ai o ruŋa i te meꞌe nei ꞌe, takoꞌa, o ruŋa i te meꞌe aŋa riꞌa-riꞌa mo aŋi-aŋi, meꞌe e huri rō ꞌana tōꞌona haꞌaauraꞌa e te nuꞌu taꞌe ꞌite ꞌe taꞌe hio-hio o te rāua manaꞌu ꞌi ruŋa i te ꞌAtua, pa he huri iŋa ena e rāua i te tētahi meꞌe o ruŋa i te ⌊Pāpaꞌi Moꞌa⌋. ꞌE e haka ūtuꞌa rō e te ꞌAtua i te nuꞌu nei ꞌo te aŋa i te meꞌe tuꞌu pē ira.
Te meꞌe hopeꞌa
17ꞌO ira, e te taina ē, ꞌi te ꞌite o kōrua o ruŋa i te ŋā meꞌe ena, e hāpaꞌo kōrua, ꞌo viri ki roto i te reo-reo o te nuꞌu taparahi-taꞌata ꞌe ꞌo haka tapa kōrua mai roto i te hāpī parautiꞌa e maꞌu hio-hio mai ena. 18Te meꞌe mau o kōrua mo aŋa he uꞌi mo māhani riva-riva ki te tātou Pūꞌoko Haka Tere ko Ietū Kiritō, kope haka eꞌa i a tātou mai roto i te ūtuꞌa o te hara ꞌe vaꞌai mai i te ora ꞌāpī ꞌina he hopeꞌa raꞌa, ꞌe ꞌai kōrua ka noho ka oho rō ꞌi roto i tōꞌona haŋa.
¡Ki haꞌahana-hana tātou ki a ia ꞌi te hora nei ꞌe ꞌi te hora taꞌatoꞌa! Ka ai pē ira.