2 KŌRINTO

He rua parau pāpaꞌi e Pauro ki te taina o

Kōrinto

I haꞌamata ai te parau nei ꞌa Pauro e vānaŋa ꞌana ki te taina o Kōrinto o ruŋa o tōꞌona haŋa mo hipa mo uꞌi i a rāua ꞌi tōꞌona ara ki Mātērōnia, he meꞌe, i hopeꞌa ai, kai ravaꞌa mo aŋa (1.12–24), ꞌe he ani mo taꞌe riri mōꞌona ꞌo tōꞌona taꞌe tuꞌu.

E tahi o roto i te nūnaꞌa taŋata ⌊haka moe i te manaꞌu⌋ ꞌi ruŋa i a Ietū o Kōrinto i haka māui-ui rō i te māhatu o Pauro hai meꞌe aŋa e ia. Ka ai atu pē ira, i haka ꞌite nō e Pauro ki rā kope ko haka rehu ꞌana e ia i rā meꞌe, ꞌo te ai ko haka tapa ꞌana mai rā meꞌe taꞌe tano aŋa era e ia, ꞌe he ani ki te taina taꞌatoꞌa o Kōrinto mo haka rehu takoꞌa (2.5–11).

Ki oti he vānaŋa a Pauro o ruŋa i te haka tere iŋa ꞌāpī o te ꞌAtua ananake ko te taŋata, he meꞌe ꞌata hau rō atu ki te haka tere iŋa raꞌe. ꞌI te haka tere raꞌe era, paꞌi, e haꞌatura ki te ⌊haka tere iŋa ꞌa Mōtē⌋ mo tano ki te mata o te ꞌAtua. ꞌI te haka tere iŋa ꞌāpī nei, e haka moe i te manaꞌu ꞌi ruŋa i a Ietū ꞌe e haka rē mo te ⌊Vārua Maitai⌋ vaꞌai mai e te ꞌAtua e haka tere mai (3.6–18). I oti era he haꞌaauraꞌa mai e Pauro i te tātou hakari pa he karapā taꞌe hio-hio. Hai meꞌe nei e haka manaꞌu mai ꞌā pē nei ē: e ai rō ꞌā te hare hio-hio mo tātou ꞌi te raŋi aŋa e te ꞌAtua, te auraꞌa, he hakari e ko mate ki te hora hopeꞌa (5.1–2).

ꞌE ꞌi te meꞌe era e ai rō ꞌana ꞌi Kōrinto te nuꞌu kī pē nei ē: a Pauro taꞌe he ⌊ꞌāpōtoro⌋ parautiꞌa, he vānaŋa ꞌiti-ꞌiti a Pauro o ruŋa i te ꞌati taꞌatoꞌa ꞌamo e ia ꞌo te aŋa ōꞌona mo te ꞌAtua. He haka oti i tāꞌana parau nei e no-noꞌi ꞌana ki te ꞌAtua mo te nuꞌu haka moe i te manaꞌu ꞌi ruŋa i a Ietū o Kōrinto. Tāꞌana pure: mo pūai o rāua ꞌi te ara parautiꞌa o te ꞌAtua (13.9), mo ai o rāua e tahi nō manaꞌu ꞌe mo noho ananake ꞌi roto i te haumārū (13.11).

He ꞌaroha

¹A au a Pauro, ⌊ꞌāpōtoro⌋ ꞌa Ietū Kiritō hai haŋa o te ꞌAtua, ꞌe te tātou taina nei ko Timoteo he ꞌaroha atu ki a kōrua ki te nūnaꞌa taŋata ⌊haka moe i te manaꞌu⌋ ꞌi ruŋa i a Ietū o Kōrinto, ꞌe ki te tētahi atu taina o te ŋā kona taꞌatoꞌa ena o Ākāia. ²Ka ai ꞌi ruŋa i a kōrua te riva rahi ꞌe te haumārū o te ꞌAtua, Matuꞌa o tātou, ꞌe o Ietū Kiritō, Pūꞌoko Haka Tere o tātou.

He māuru-uru

³Ki haꞌahana-hana tātou ki te ꞌAtua, Matuꞌa o te tātou Pūꞌoko Haka Tere ko Ietū Kiritō. A ia he Matuꞌa haka ꞌaroha i a tātou, ꞌe he ꞌAtua haka koa ꞌe haka pūai mai. ⁴ꞌI roto i te tātou ꞌati taꞌatoꞌa he haka koa ꞌe he haka pūai nō mai te aŋa e ia, mo ꞌite takoꞌa o tātou mo haka koa ꞌe mo haka pūai i te nuꞌu e ai rō ꞌana te rāua ꞌati hai hāꞌūꞌū vaꞌai mau mai era ꞌā e ia. ⁵Pa he rahi ena ꞌā, paꞌi, o te ꞌati ꞌamo e tātou ꞌo te ai o tātou o te ⌊Kiritō⌋, pē ira takoꞌa ꞌā te rahi o te haka koa ꞌe o te haka pūai mai e te ꞌAtua ꞌo te ai o tātou o te Kiritō.

⁶Hora ena o mātou o te ꞌāpōtoro e ꞌamo ena i te ꞌati, he meꞌe mo te kōrua riva-riva, ꞌe, takoꞌa, mo ravaꞌa e kōrua i te ora ꞌāpī ꞌina he hopeꞌa raꞌa. ꞌE, hora ena o te ꞌAtua e haka koa e haka pūai mai ena i a mātou, he meꞌe mo kōrua takoꞌa. Pē ira mātou e ꞌite nei mo haka koa ꞌe mo haka pūai atu i a kōrua, mo haꞌaoromaꞌi o kōrua hai pūai i te ꞌati ꞌamo e tātou ꞌo te ai o tātou o te Kiritō. ⁷ꞌE, ko ꞌite riva-riva ꞌana e mātou: pa he ꞌamo iŋa takoꞌa ena ꞌā o kōrua i te ꞌati, ka haka koa ꞌe ka haka pūai takoꞌa atu ena i a kōrua e te ꞌAtua.

⁸E te taina, e haŋa rō ꞌā a mātou mo ꞌite o kōrua i te rahi o te ꞌati topa mai ki a mātou ꞌi ꞌĀtia. He ꞌati taparahi-taꞌata e tahi, ꞌati ena mo taꞌe haꞌaoromaꞌi, ꞌe ꞌātā i manaꞌu rō e mātou he mā-mate a mātou. ⁹I tuꞌu mau rō pa he meꞌe ena ē: he mā-mate mau ꞌā a mātou ꞌi ira. I topa mai ai te meꞌe nei mo ꞌite o mātou: ꞌi ruŋa i te ꞌAtua mau nō, kope haka ora i te taŋata mai te mate, ana haka moe mātou i te manaꞌu, ꞌe taꞌe ꞌō ꞌi ruŋa i a mātou mau ꞌā. ¹⁰ꞌE te ꞌAtua i haka eꞌa rō i a mātou mai rā ꞌati, ꞌe ko ꞌite ꞌā e mātou pē ira ka aŋa ka oho ena. ꞌĒ-ē, ko ꞌite riva-riva ꞌana e mātou pē ira ka aŋa ka oho mai ena. ¹¹Te meꞌe haŋa he hāꞌūꞌū he pure mai o kōrua mo te mātou aŋa. ꞌE mo rahi o te nuꞌu pure mo mātou, he rahi takoꞌa ia te nuꞌu māuru-uru ki te ꞌAtua o tōꞌona haꞌamaitai mai i a mātou.

He aha a Pauro i taꞌe oho ai ki Kōrinto

¹²E te taina, e koa nei a mātou ꞌi te meꞌe era e haka ꞌite rō mai ꞌana e te mātou māhatu pē nei ē: te noho iŋa o mātou ꞌi roto i a kōrua ꞌe ꞌi roto i te taŋata taꞌatoꞌa hai moꞌa ꞌe hai parautiꞌa o te ꞌAtua. A mātou e haka tere nei hai haka moe i te manaꞌu ꞌi ruŋa i te riva rahi o te ꞌAtua, ꞌe taꞌe ꞌō hai mārama-rama o te taŋata. ¹³ꞌE te meꞌe pāpaꞌi atu e mātou taꞌe he meꞌe mo taꞌe aŋi-aŋi e kōrua ana taiꞌo, he meꞌe mo aŋi-aŋi. Te meꞌe haŋa he aŋi-aŋi riva-riva e kōrua ¹⁴i te mātou māhatu ꞌe i te mātou meꞌe aŋa, ki koa ai kōrua mo mātou, ꞌe pē ira takoꞌa ꞌana a mātou mo kōrua ꞌi te hora o te hoki iŋa mai o te tātou Pūꞌoko Haka Tere ko Ietū.

^15-16ꞌE he ꞌite ōꞌoku e koa rō ꞌana a kōrua mo mātou, i topa mai ai te manaꞌu mo hipa atu mo uꞌi i a kōrua ꞌi tōꞌoku ara ki Mātērōnia ꞌe, takoꞌa, ꞌi tōꞌoku hoki iŋa mai; pē ira e rua tātou koa iŋa. ꞌE ꞌi tōꞌoku hoki iŋa mai takoꞌa, e tano nō kōrua mo hāꞌūꞌū mai hai rāveꞌa mo tōꞌoku ara ki Hūrea, ana haŋa kōrua. ¹⁷ꞌI te taꞌe oho atu ōꞌoku, kai haŋa a au mo manaꞌu o kōrua pē nei ē: a au he taŋata huri tahaŋa o te manaꞌu, ꞌo he taŋata kī, pa he nuꞌu o te ao nei, «ꞌē-ē», ꞌe te parautiꞌa o te rāua manaꞌu «ꞌina».

¹⁸Te ꞌAtua he kope aŋa i tāꞌana meꞌe kī ꞌe he mataꞌite pē nei ē: a mātou takoꞌa. Mo kī atu o mātou «ꞌē-ē», ꞌē-ē mau ꞌā; ꞌe mo kī atu «ꞌina», ꞌina mau ꞌā. ¹⁹A Ietū Kiritō, Poki era o te ꞌAtua, haka ꞌite atu era e au, e Tira ꞌe e Timoteo, kope taꞌe kī «ꞌē-ē» mo ꞌina, ꞌe «ꞌina» mo ꞌē-ē. A ia he ꞌē-ē mau ꞌā o te ꞌAtua; ²⁰hai ia, paꞌi, e haka tano tahi ena e te ꞌAtua i tāꞌana meꞌe hōrea. ꞌO ira, ꞌi te hora haꞌahana-hana o tātou ki te ꞌAtua e kī nei: «⌊ꞌĀmene⌋». ²¹ꞌĀꞌana, paꞌi, te haka pūai i te tātou haka moe iŋa i te manaꞌu ꞌi ruŋa i te Kiritō, ꞌe te haꞌataꞌa i a tātou māꞌana. ²²Te ꞌAtua ko vaꞌai mai ꞌana i te ⌊Vārua Maitai⌋ pa he tāpaꞌo haka ꞌite mai: a tātou ꞌāꞌana. ꞌE, ꞌi te ai o te Vārua Maitai ꞌi roto i a tātou, e ꞌite nei: te meꞌe taꞌatoꞌa hōrea mai era e te ꞌAtua e haka tano tahi rō.

²³He ꞌAtua te meꞌe i ꞌite, e te taina ē, pē nei ē: a au i taꞌe tuꞌu atu ai mo uꞌi i a kōrua ꞌo ture atu a au o ruŋa i te meꞌe taꞌe tano aŋa e kōrua ꞌo mamae te kōrua māhatu ꞌi tāꞌaku vānaŋa. ²⁴Taꞌe, paꞌi, i a mātou te kī pē hē kōrua ana maꞌu i te kōrua haka moe iŋa i te manaꞌu ꞌi ruŋa i a Ietū. Te meꞌe i a mātou he hāꞌūꞌū atu mo ꞌata koa o kōrua. E ꞌite rō ꞌana, paꞌi, mātou e pūai rō ꞌana te kōrua haka moe iŋa i te manaꞌu.

¹ꞌO ira a au i taꞌe oho atu ai mo uꞌi i a kōrua ꞌo ture atu a au ꞌe he mamae te kōrua māhatu, pa he meꞌe topa era ꞌi te hora tuꞌu raꞌe atu era ōꞌoku. ²ꞌE mo mamae o te kōrua māhatu i a au, ¿pē hē ia a au ana tiaki mo haka koa mai i a au e te nuꞌu haka mamae era e au i te māhatu? ³Te meꞌe pāpaꞌi atu era e au ꞌi ruŋa i te parau raꞌe era i pāpaꞌi atu ai ꞌo tuꞌu atu a au ꞌe he māui-ui tōꞌoku māhatu ꞌi te takeꞌa i a kōrua, nuꞌu i a rāua a au ana koa, e aŋa ꞌana i te meꞌe taꞌe tano. Ko ꞌite ꞌana, paꞌi, e kōrua: mo koa o kōrua he koa takoꞌa a au. ⁴ꞌE, hora pāpaꞌi atu era ōꞌoku i rā parau, i manaꞌu rahi rō atu a au ki a kōrua ꞌe i rahi rō te mamae o tōꞌoku māhatu, ꞌātā i taŋi rō a au. Ka ai atu pē ira, taꞌe i pāpaꞌi atu ai mo haka māui-ui i te kōrua māhatu; mo haka ꞌite atu i te rahi o tōꞌoku haŋa mo kōrua.

He haka rehu iŋa i te meꞌe taꞌe tano

^5-7Hora nei e haŋa ꞌana a au mo pāpaꞌi atu o ruŋa i te kope o roto o kōrua aŋa era i te meꞌe taꞌe tano. Te kope nei ko ⌊huri ꞌana te manaꞌu ki te ꞌAtua⌋ ꞌe ko haka rē ꞌana i te meꞌe taꞌe tano aŋa era e ia. ꞌE, ka ai atu i māui-ui rō tōꞌoku māhatu ꞌe te kōrua māhatu takoꞌa ꞌi rā meꞌe, te meꞌe o tātou mo aŋa ꞌi te hora nei he haka rehu i te meꞌe taꞌe tano aŋa era e ia ꞌe he hāꞌūꞌū i a ia, ꞌo rahi rō te māui-ui ꞌamo ꞌi roto i tōꞌona māhatu ꞌe ꞌo haka tapa rō mai te ara o te ꞌAtua. Ko tano ko oti ꞌana, paꞌi, te ūtuꞌa vaꞌai era e te rahi raꞌa o kōrua ki a ia. ⁸ꞌO ira, he ani atu a au mo haka ꞌite o kōrua ki a ia i te rahi o te kōrua haŋa mōꞌona.

⁹ꞌI ruŋa i tāꞌaku parau raꞌe era i pāpaꞌi atu ai a au o ruŋa i rā kope ꞌe o ruŋa i te kōrua meꞌe mo aŋa ki a ia, mo uꞌi hoki e haꞌatura rō mai kōrua. ¹⁰Te meꞌe haŋa ꞌi te hora nei he haka rehu e kōrua i te meꞌe taꞌe tano aŋa era e rā kope. Rā meꞌe ko haka rehu ꞌana e au, ꞌe ko ꞌite ꞌana e te ⌊Kiritō⌋: hai māhatu a au i haka rehu ai. I aŋa ai a au pē ira mo te kōrua riva-riva, ¹¹ꞌo rē a Rukifero; ko ꞌite ꞌana, paꞌi, e tātou he aha tāꞌana meꞌe haŋa.

ꞌI Toroare a Pauro

¹²I tuꞌu era a au ki Toroare, meꞌe rahi te ꞌōpani i mātaki mai e te tātou Pūꞌoko Haka Tere mo haka ꞌite ōꞌoku ꞌi ira i te roŋo riva-riva o te Kiritō. ¹³ꞌE, ꞌi te taꞌe takeꞌa e au i te tātou taina era ko Tito, kai riva-riva a au mo noho ꞌi ira. He haka rē ia a au i te nuꞌu taina o ira ꞌe he eꞌa he oho rō ꞌai a au ki Mātērōnia.

He māuru-uru

¹⁴He māuru-uru a au ki te ꞌAtua. ꞌĀꞌana, paꞌi, te vaꞌai mai i te pūai mo rē ki te meꞌe taꞌatoꞌa ꞌo te ai o mātou o te Kiritō. ꞌE ꞌāꞌana takoꞌa te hāꞌūꞌū mai mo haka ꞌite i te ⌊roŋo riva-riva o ruŋa i a Ietū⌋, roŋo pa he manoꞌi ꞌeo tuꞌu ki te kona taꞌatoꞌa. ¹⁵Hora ena o mātou e haka ꞌite e oho ena i te roŋo riva-riva o ruŋa i a Ietū a mātou pa he ꞌeo incienso tūtia e te Kiritō haka koa i te ꞌAtua, ꞌe tuꞌu ki te nuꞌu eꞌa mai roto i te ūtuꞌa o te hara, ꞌe ki te nuꞌu taꞌe eꞌa. ¹⁶Te ꞌeo nei, mo te nuꞌu taꞌe eꞌa mai roto i te ūtuꞌa o te hara, pa he hauꞌa o te mate; ꞌe mo te nuꞌu eꞌa mai roto i te ūtuꞌa o te hara, pa he ꞌeo vaꞌai ki a rāua i te ora. Te aŋa nei, aŋa nui-nui. ¿E ai rō hō te kope tano mo te aŋa nei? ¹⁷ꞌIna a mātou he haka ꞌite i te ⌊roŋo riva-riva o te ꞌAtua⌋ mo ravaꞌa moni, pa he meꞌe aŋa e te tētahi. Te mātou meꞌe aŋa he vānaŋa hai parautiꞌa, pa he tāvini o te ꞌAtua ꞌo te ai o mātou o te Kiritō, ꞌe he ꞌAtua te mātou mataꞌite.

He haka tere iŋa ꞌāpī o te ꞌAtua

¹Taꞌe te mātou vānaŋa nei e haka paka atu ꞌana i a mātou. Taꞌe, paꞌi, mo mātou e vaꞌai atu i te parau vānaŋa riva-riva o ruŋa i a mātou, pe he tētahi atu nuꞌu, ꞌo mo ani atu ki a kōrua mo pāpaꞌi mai i te parau pē ira o ruŋa i a mātou mo ꞌite e te nuꞌu pē nei ē: te meꞌe aŋa e mātou he meꞌe tī-tika. ²Ko kōrua, paꞌi, te mātou parau haka ꞌite ko ai a mātou pāpaꞌi ꞌi roto i te māhatu, te auraꞌa: hai uꞌi i te kōrua noho iŋa tano, e ꞌite ena e te taŋata taꞌatoꞌa: te meꞌe aŋa e mātou meꞌe riva-riva. ³A kōrua he parau pāpaꞌi e te ⌊Kiritō⌋ hai mātou, parau taꞌe hai ꞌārahu i pāpaꞌi ai, hai ⌊Vārua Maitai⌋ o te ꞌAtua, ꞌe taꞌe ꞌi ruŋa i te māꞌea pa he roŋo pāpaꞌi e ⌊Mōtē⌋; i pāpaꞌi ai ꞌi roto i te māhatu o te taŋata.

⁴E tano nei mo kī pē ira he ꞌite o mātou: o te ꞌAtua te hāꞌūꞌū mai hai Ietū Kiritō. ⁵E ko tano mātou mo kī: hai mārama-rama mau ꞌā o mātou e aŋa nei; ko ꞌite riva-riva ꞌana, paꞌi, e mātou: o te ꞌAtua te vaꞌai mai i te mārama-rama mo aŋa i nei aŋa. ⁶Hai hāꞌūꞌū mau nō ōꞌona e tano nei mātou mo haka ꞌite o ruŋa i te haka tere iŋa ꞌāpī ōꞌona ananake ko te taŋata, ꞌe te oho iŋa nei taꞌe hai haꞌatura ki te ⌊haka tere iŋa ꞌa Mōtē⌋ ana tano ki tōꞌona mata, hai ai o te Vārua Maitai ꞌi roto i te māhatu. Te meꞌe mo ravaꞌa hai haꞌatura ki te haka tere iŋa ꞌa Mōtē he mate, ꞌe te meꞌe vaꞌai e te Vārua Maitai he ora ꞌāpī ꞌina he hopeꞌa raꞌa.

⁷Hai pūai nui-nui te ꞌAtua i haka ꞌite mai ai i te haka tere iŋa tuai ōꞌona ananake ko tātou ko te taŋata i pāpaꞌi ꞌi ruŋa i te māꞌea pararaha. Te auraꞌa: hora turu mai era o Mōtē mai ruŋa i te maꞌuŋa e maꞌu rō ꞌana i nei māꞌea, e ꞌana-ꞌana rō ꞌā tōꞌona ꞌāriŋa ꞌi te pūai o te ꞌAtua ki te roa ꞌina he itaraera he tano mo uꞌi a ruŋa, ka ai atu ꞌai e ŋaro e oho era te pūai o rā ꞌana-ꞌana. Mo ai ia hai pūai nui-nui pē ira i haka ꞌite mai ai e te ꞌAtua i rā haka tere iŋa tuai era ōꞌona, he meꞌe mo maꞌu i a tātou ki te mate, ⁸¿e ko ai hō hai pūai ꞌata hau rō atu ꞌi te nui-nui te haka ꞌite iŋa mai o te haka tere iŋa ꞌāpī ōꞌona ananake ko tātou ko te taŋata vaꞌai mai i te Vārua Maitai?

⁹Mo ai he meꞌe pūai ꞌe nui-nui te haka tere iŋa tuai o te ꞌAtua ananake ko te taŋata maꞌu mai i te ūtuꞌa, ¿e ko ai hō te ⌊haka tere iŋa ꞌāpī o te ꞌAtua ananake ko te taŋata⌋ haka tano i te taŋata ki te mata o te ꞌAtua he meꞌe ꞌata hau rō atu ꞌi te pūai ꞌe ꞌi te nui-nui? ¹⁰Hora nei ꞌina e tahi pūai ꞌe nui-nui toe o te meꞌe raꞌe era; ko mono ꞌana hai haka tere iŋa ꞌāpī ꞌata nui-nui ꞌe ꞌata pūai ki rā meꞌe. ¹¹Mo ai ia he meꞌe pūai ꞌe nui-nui te haka tere iŋa raꞌe era, haka tere iŋa era mo ŋaro, ꞌata hau rō atu ia te pūai ꞌe te nui-nui o te haka tere iŋa ꞌāpī nei, he meꞌe e ko ŋaro ki te hora hopeꞌa.

¹²ꞌE, ꞌo te ꞌite o mātou e ko ŋaro te haka tere iŋa ꞌāpī nei, ꞌina e tahi mātou meꞌe naꞌa e haka ꞌite e oho nei o ruŋa. ¹³A mātou taꞌe pē Mōtē, puru i tōꞌona ꞌāriŋa hai kahu ꞌo takeꞌa e te itaraera te ŋaro iŋa o te ꞌana-ꞌana mai ruŋa. ¹⁴ꞌE te itaraera, ꞌātā ki te hora nei, ꞌina he haŋa mo aŋi-aŋi pē nei ē: te haka tere iŋa tuai o te ꞌAtua ananake ko te taŋata he meꞌe mo ŋaro. E taiꞌo ena i rā haka tere iŋa, e tuꞌu rō ꞌā pa he meꞌe ena ē: e ai rō ꞌā te meꞌe puru i te rāua manaꞌu ꞌo aŋi-aŋi i te parautiꞌa. ꞌE te meꞌe mau nō mo kume i te meꞌe puru i te rāua manaꞌu ꞌo aŋi-aŋi he ⌊haka moe i te manaꞌu⌋ ꞌi ruŋa i a Ietū. ¹⁵ꞌĀtā ki ꞌaŋarīnā, e taiꞌo ena i te puka pāpaꞌi e Mōtē, e ai rō ꞌā te meꞌe puru i te rāua manaꞌu ꞌo aŋi-aŋi. ¹⁶Ka ai atu pē ira, ꞌi te hora haka moe o te kope e tahi i tōꞌona manaꞌu ꞌi ruŋa i te tātou Pūꞌoko Haka Tere ko Ietū Kiritō, he kume e te ꞌAtua i te meꞌe puru i tōꞌona manaꞌu.

¹⁷Te tātou Pūꞌoko Haka Tere e haka tika ena i te tātou māhatu hai Vārua Maitai. ꞌE te kope haka tika e te Vārua Maitai ko eꞌa ꞌā mai te pūai o te hara ꞌe ko eꞌa takoꞌa ꞌā mai te manaꞌu pē nei ē: hai haꞌatura ki te haka tere iŋa ꞌa Mōtē he tano ki te mata o te ꞌAtua. ¹⁸Hora nei a tātou taꞌatoꞌa, te nuꞌu haka moe i te manaꞌu ꞌi ruŋa i a Ietū, kume o te meꞌe puru o te ꞌāriŋa, e haka takeꞌa ena i te pūai ꞌe i te nui-nui o te tātou Pūꞌoko Haka Tere, pa he ꞌata ꞌi roto i te hiꞌo, ꞌe a ia hai Vārua Maitai e aŋa e oho ena ꞌi roto i te tātou māhatu mo haka riro mo oho i te tātou huru pa he huru riva mau ꞌā ōꞌona.

He nuꞌu haka ꞌite o ruŋa i a Ietū

¹Te ꞌAtua i vaꞌai mai ai i te aŋa nei, he riva rahi ōꞌona. ꞌO ira a mātou e taꞌe hōriŋa nei. ²A mātou e hārui rō ꞌana hai tuaꞌivi i te meꞌe taꞌe tano taꞌatoꞌa aŋa e te taŋata e naꞌa rō ꞌana ꞌo haꞌamā, ꞌe, takoꞌa, ꞌina a mātou he reo-reo ꞌe he huri i te vānaŋa o te ꞌAtua. Te ꞌAtua ko ꞌite ꞌana he parautiꞌa mau nō te meꞌe haka ꞌite e mātou o ruŋa i a ia, ꞌe taꞌatoꞌa taŋata manaꞌu riva-riva e ꞌite takoꞌa rō ꞌā: te mātou meꞌe kī he parautiꞌa.

³ꞌE mo ai o te meꞌe puru i te manaꞌu ꞌo aŋi-aŋi i te auraꞌa parautiꞌa o te roŋo riva-riva haka ꞌite e mātou, mo te nuꞌu taꞌe eꞌa mau nō mai roto i te ūtuꞌa o te hara ka ai ena. ⁴Te nuꞌu nei, ꞌi te taꞌe haka moe i te rāua manaꞌu ꞌi ruŋa i a Ietū, ko haka pōhāhā ꞌā i te rāua manaꞌu e Rukifero, ꞌatua o te ao nei, ꞌo aŋi-aŋi, ꞌo takeꞌa i te māꞌeha o te mōrī o te roŋo riva-riva o ruŋa i te pūai ꞌe i te nui-nui o te ⌊Kiritō⌋, ꞌāriŋa ora o te ꞌAtua.

⁵ꞌIna a mātou he haka ꞌite he oho o ruŋa i a mātou. E haka ꞌite nei o ruŋa i a Ietū Kiritō, he Pūꞌoko Haka Tere o te taꞌatoꞌa. Te meꞌe mau nō haka ꞌite e mātou o ruŋa i a mātou: he tāvini mātou o te taꞌatoꞌa ꞌi te haŋa o mātou ki a Ietū. ⁶O te ꞌAtua kī era pē nei ē: «Ka ai te mōrī ꞌi roto i te pōhāhā», te haka māꞌeha i te mātou manaꞌu mo haka māꞌeha takoꞌa e mātou i te manaꞌu o te tētahi nuꞌu hai haka ꞌite i te pūai ꞌe i te nui-nui o te ꞌAtua takeꞌa ꞌi ruŋa i a Ietū Kiritō.

Hai pūai o te ꞌAtua

⁷Te aŋa vaꞌai mai nei e te ꞌAtua, he haka ꞌite i te ⌊roŋo riva-riva o ruŋa i a Ietū⌋, he meꞌe hopeꞌa o te hauhaꞌa. ꞌE a mātou, te nuꞌu i a rāua nei hauhaꞌa, pa he pani aŋa hai ꞌōꞌone. Pē ira te ꞌAtua i aŋa ai mo ꞌite e te taꞌatoꞌa: te pūai nui-nui nei i a mātou o te ꞌAtua, taꞌe ꞌō o mātou mau ꞌā. ⁸He topa nō mai te ꞌati, ꞌe ꞌina a mātou he haka tapa i te mātou manaꞌu mai ruŋa i te ꞌAtua; e ai rō ꞌā te mahana e tuꞌu rō ꞌā pa he meꞌe ena ē: ꞌina he rāveꞌa toe mo eꞌa mai roto i te ꞌati, ꞌe ko te haka moe iŋa ꞌana te mātou manaꞌu ꞌi ruŋa i te ꞌAtua mo hāꞌūꞌū mai. ⁹He tute nō mai te aŋa i a mātou mo tōtōā e te nuꞌu taꞌe haŋa mai, ꞌe ꞌina te ꞌAtua he haka rē i a mātou; e tiŋaꞌi rō mai ꞌā e te nuꞌu ki te piꞌi-piꞌi, ꞌe e eꞌa haka ꞌou nō ꞌā a mātou ki ruŋa. ^10-11ꞌI te kona taꞌatoꞌa tuꞌu o mātou, he takeꞌa nō te aŋa e te nuꞌu pē nei ē: e oho rō ꞌana a mātou mo mate ꞌi te rima o te nuꞌu taꞌe haŋa mai, pa he meꞌe topa ki a Ietū. ꞌE, hai hāꞌūꞌū mai ōꞌona ꞌo mate a mātou, e takeꞌa takoꞌa ena: e ora nō ꞌā a Ietū. ¹²A mātou e oho mau rō ꞌā mo mate ꞌo te haka ꞌite i te roŋo riva-riva o ruŋa i a Ietū, ꞌe a kōrua, hai nei meꞌe mau ꞌā, e ravaꞌa ena i te ora ꞌāpī ꞌina he hopeꞌa raꞌa.

¹³A mātou pa he kope kī ꞌi ruŋa i te ⌊Pāpaꞌi Moꞌa⌋ pē nei ē: «E haka moe rō ꞌana a au i tōꞌoku manaꞌu ꞌi ruŋa i te ꞌAtua, ꞌo ira a au e vānaŋa nei o ruŋa i a ia». ꞌE, pa he oho iŋa era ꞌā o rā kope, a mātou takoꞌa, ꞌi te haka moe iŋa i te manaꞌu ꞌi ruŋa i te Kiritō, e haka ꞌite e oho nei o ruŋa i a ia. ¹⁴E ꞌite rō ꞌana, paꞌi, a mātou: te ꞌAtua haka ora era i a Ietū mai te mate, pe muꞌa ka oho ena he haka ora takoꞌa i a mātou, ꞌe pē ira ꞌana i a kōrua, ꞌo te ai o tātou ꞌāꞌana. ꞌE ananake tātou ka maꞌu ena e te ꞌAtua ki muri i a ia. ¹⁵Te haꞌaoromaꞌi o mātou i te ꞌati taꞌatoꞌa he meꞌe mo te riva-riva o kōrua, ꞌe mo ꞌata rahi mo oho o te nuꞌu ⌊haka moe i te manaꞌu⌋ ꞌi ruŋa i a Ietū, he ꞌite o ruŋa i te riva rahi o te ꞌAtua. Pē ira ka rahi ka oho ena te nuꞌu māuru-uru ꞌe haꞌahana-hana ki te ꞌAtua.

¹⁶ꞌO ira a mātou e taꞌe hōriŋa nei ꞌi te mātou aŋa. Te mātou hakari, pe te rehe-rehe pe te oho nō, ꞌe, ka ai atu pē ira, te mātou haka moe iŋa i te manaꞌu ꞌi ruŋa i a Ietū pe te pūai pe te oho nō te mahana te mahana. ¹⁷E haka topa nei i te manaꞌu o ruŋa i te meꞌe ka ai ena mo tātou pe muꞌa ka oho ena: he noho iŋa riva-riva ꞌina he hopeꞌa raꞌa ꞌi te raŋi, te ꞌati ꞌamo e mātou ꞌi te ao nei ꞌina e mātou he tapa atu; e tuꞌu rō ꞌana, paꞌi, pa he meꞌe taꞌe paŋahaꞌa ꞌe e ko roa he ŋaro. ¹⁸ꞌO ira, te meꞌe manaꞌu o mātou taꞌe he meꞌe o te ao nei, pa he ꞌati topa mai. Te mātou manaꞌu e haka noho nei ꞌi ruŋa i te meꞌe o te raŋi. Te meꞌe takeꞌa, paꞌi, o te ao nei e ko roa he ŋaro, ꞌe te meꞌe taꞌe takeꞌa vaꞌai mai e te ꞌAtua e ko ŋaro ki te hora hopeꞌa.

¹Te hakari pa he hare ꞌā, ꞌe e ꞌite rō ꞌā e tātou, hora era mo marere, te auraꞌa, hora era mo mate, e ai rō ꞌā te hare ꞌāpī e tahi ꞌi te raŋi aŋa e te ꞌAtua mo tātou, he hakari e ko mate ki te hora hopeꞌa. ²E noho nei tātou hai hakari nei he ꞌu-ꞌū nō te aŋa ꞌi te ꞌati ꞌamo e tātou. Te meꞌe haŋa he tuꞌu hōrou mai te hora mo kamiare o te hakari nei ki te hakari ꞌāpī o te raŋi. ³Ka ai atu he mate te hakari nei ꞌe he eꞌa te tātou vārua mai roto, e ko noho te vārua ꞌina ōꞌona hakari. ⁴ꞌĒ-ē, e noho nei tātou hai hakari nei he ꞌu-ꞌū nō te aŋa ꞌi te ꞌati ꞌamo e tātou. Ka ai atu pē ira, taꞌe he mate te tātou meꞌe haŋa mo kore o te hakari, te meꞌe haŋa he mono o te hakari nei ki te hakari e ko mate ki te hora hopeꞌa. ⁵I haka tano ai i a tātou e te ꞌAtua mo rā meꞌe mau ꞌā, ꞌe ko vaꞌai mai ꞌā i te ⌊Vārua Maitai⌋ pa he tāpaꞌo: he haka tano tahi e ia i tāꞌana meꞌe hōrea mai era.

⁶ꞌO ira a mātou e taꞌe ꞌaka-ꞌaka nei te manaꞌu ꞌi ruŋa i te ꞌAtua. ꞌE, ko ꞌite ꞌana e mātou: e noho e oho nō nei mātou ꞌi roto i te hakari nei, ko te roa-roa iŋa ꞌana mātou mai te kona era ꞌi ira te tātou Pūꞌoko Haka Tere. ⁷E haka tere nei a mātou ꞌi te ao nei hai ⌊haka moe i te manaꞌu⌋ ꞌi ruŋa i a ia ꞌe ꞌi ruŋa i tāꞌana meꞌe hōrea mai era, ka ai atu ꞌina he takeꞌa mai. ⁸ꞌE ꞌina he ꞌaka-ꞌaka te mātou manaꞌu ꞌi ruŋa i a ia. Ka ai atu pē ira, te meꞌe haŋa mau o mātou he noho o mātou ꞌi te kona era ꞌi ira te tātou Pūꞌoko Haka Tere. ⁹ꞌO ira, te meꞌe haŋa o mātou he aŋa i te meꞌe haŋa e te ꞌAtua, ka ai atu ꞌi te ao nei ꞌo taꞌe ꞌi te ao nei. ¹⁰A tātou taꞌatoꞌa, paꞌi, hoko tahi hoko tahi ka māroa ena ꞌi muꞌa o te ⌊Kiritō⌋, mo kī mai e ia i te tano ꞌe i te taꞌe tano o te tātou meꞌe aŋa, ꞌe mo vaꞌai mai e ia i te meꞌe tano ki te huru o te meꞌe i aŋa ꞌi te hora e noho nō ꞌā hai hakari nei, ka ai atu he meꞌe riva-riva ꞌo he meꞌe taꞌe tano te meꞌe i aŋa.

Pē hē ana riva-riva ki te ꞌAtua

¹¹He moꞌa o mātou i te Kiritō ꞌe he haŋa mo haꞌatura ki a ia, e kimi nei a mātou i te rāveꞌa taꞌatoꞌa mo aŋi-aŋi e te nuꞌu i te roŋo parautiꞌa o te ꞌAtua, mo haka moe o rāua i te manaꞌu ꞌi ruŋa i a Ietū. Te ꞌAtua e ꞌite rō ꞌana e aŋa nei a mātou i te meꞌe nei hai māhatu maꞌitaki, ꞌe a mātou e haŋa rō ꞌā mo ꞌite takoꞌa e kōrua. ¹²Taꞌe e haka paka haka ꞌou atu ꞌā a mātou. E vaꞌai atu ꞌana i te rāveꞌa mo koa o kōrua mo mātou, ki ai ai te kōrua vānaŋa mo pāhono ki te nuꞌu uꞌi i te tōroꞌa mau nō o te taŋata ꞌe taꞌe ꞌō i te meꞌe o roto i te māhatu.

¹³Mo kī o te nuꞌu e maꞌa-maꞌa rō ꞌā a mātou, ꞌina kōrua ko tapa atu; te meꞌe taꞌatoꞌa aŋa o mātou mo te ꞌAtua. ꞌE mo kī o te nuꞌu e haka topa riva-riva rō ꞌā a mātou i te manaꞌu, ko ꞌite ꞌana e kōrua e aŋa nei mātou mo te kōrua riva-riva. ¹⁴Te meꞌe haka tere, paꞌi, i a mātou he haŋa o te Kiritō mo tātou mo te taŋata mai te hora aŋi-aŋi: he kope mau nō e tahi te meꞌe i mate mo te taꞌatoꞌa ꞌe e tuꞌu rō ꞌā pa he meꞌe ena ē: taꞌatoꞌa nō i mate ai. ¹⁵Te Kiritō i mate ai mo te taꞌatoꞌa, ki aŋa ai e tātou e te nuꞌu ora i tāꞌana meꞌe haŋa, ꞌe taꞌe ꞌō i te tātou meꞌe haŋa. A ia, paꞌi, i mate ai ꞌe i ora haka ꞌou mai ai mo tātou.

¹⁶ꞌO ira a mātou e taꞌe uꞌi haka ꞌou ena i te taŋata hoki a rāua he nuꞌu hōnui ꞌo he nuꞌu taꞌe hōnui, pa he manaꞌu iŋa o te taŋata o te ao nei. Pē ira mātou e uꞌi era i te Kiritō ꞌi muꞌa ꞌā, ꞌe, hora nei, ꞌina he uꞌi haka ꞌou pē ira. ¹⁷Kope nō era o te Kiritō ꞌi te haka moe i te manaꞌu ꞌi ruŋa i a ia, he kope ꞌāpī e tahi; te manaꞌu ꞌe te noho iŋa raꞌe ōꞌona ko ŋaro ꞌā, ꞌe ko haꞌamata ꞌana tōꞌona noho iŋa ꞌāpī. ¹⁸Te meꞌe taꞌatoꞌa nei he aŋa o te ꞌAtua haka riva-riva i a tātou ki a ia hai Ietū Kiritō, ꞌe vaꞌai mai i te aŋa he haka ꞌite pē hē te taŋata ana riva-riva ki a ia. ¹⁹Hai mate era, paꞌi, o Ietū Kiritō ꞌi ruŋa i te tātaurō i aŋa ai e te ꞌAtua i te rāveꞌa mo haka riva-riva i te taŋata ki a ia ꞌe mo taꞌe tapa atu i te rāua hara. ꞌE ki a mātou i vaꞌai mai ai i te aŋa he haka ꞌite he oho i te roŋo nei. ²⁰He nuꞌu vānaŋa mātou hai ꞌīŋoa o te Kiritō, ꞌe hai mātou te ꞌAtua e vānaŋa atu ena ki a kōrua. ꞌO ira, hai ꞌīŋoa o te Kiritō he ani atu mātou: e haka moe kōrua i te manaꞌu ꞌi ruŋa i te roŋo parautiꞌa o ruŋa i te Kiritō mo riva-riva o kōrua ki te ꞌAtua.

²¹Te Kiritō ꞌina e tahi meꞌe taꞌe tano i aŋa, ꞌe, ka ai atu pē ira, te ꞌAtua i haka ūtuꞌa rō i a ia mo te tātou hara, ki tano ai mo kī: a tātou, te nuꞌu haka moe i te manaꞌu ꞌi ruŋa i a Ietū, he nuꞌu tano ki tōꞌona mata.

¹Hora nei, pa he nuꞌu hokorua mātou ꞌi te aŋa o te ꞌAtua, he ani atu: ꞌina kōrua ko haka māuꞌa i te riva rahi o te ꞌAtua vaꞌai atu era e ia. ²I kī rō, paꞌi, e ia ꞌi ruŋa i te ⌊Pāpaꞌi Moꞌa⌋:

«ꞌI te hora mo haka takeꞌa i tōꞌoku riva rahi,

i haka roŋo atu ai au i te kōrua pure;

ꞌi te mahana mo haka eꞌa i te taŋata mai roto i te ūtuꞌa o te hara,

i hāꞌūꞌū atu ai au».

E te taina, ko te hora nei rā hora, he mahana mo eꞌa mai roto i te ūtuꞌa o te hara.

He ꞌati topa ꞌi ruŋa i a Pauro

³A mātou e hāpaꞌo rō ꞌā i te mātou meꞌe aŋa, ꞌo aŋa i te meꞌe taꞌe tano haka ꞌaka-ꞌaka i te manaꞌu o te taŋata ꞌo ⌊haka moe i te manaꞌu⌋ ꞌi ruŋa i a Ietū, ꞌe ꞌo tuhi tāꞌue mai i te taꞌe tano o te mātou aŋa. ⁴Hai meꞌe taꞌatoꞌa aŋa e mātou e takeꞌa ena he tāvini parautiꞌa mātou o te ꞌAtua. E haꞌaoromaꞌi rō ꞌana, paꞌi, mātou hai haumārū i te ꞌati, i te meꞌe kore, ⁵i te tiŋaꞌi, i te puru ꞌi roto i te hare maꞌuꞌaurī, i te haka tumu i te ture, i te aŋa paŋahaꞌa, i te taꞌe haꞌuru ꞌe i te maruaki. ⁶E takeꞌa takoꞌa ena he tāvini mātou o te ꞌAtua hai noho iŋa taꞌe hara o mātou, hai ꞌite i te parautiꞌa o ruŋa i a ia, hai riva o mātou, hai haꞌaoromaꞌi o mātou i te rua, hai ai o te ⌊Vārua Maitai⌋ ꞌi roto i a mātou, hai haŋa parautiꞌa ki te rua, ⁷hai hāpī i te roŋo parautiꞌa, ꞌe hai pūai o te ꞌAtua ꞌi roto i a mātou. Te noho iŋa tano nei o mātou ki te mata o ꞌAtua, ꞌi te hora taꞌatoꞌa, pa he meꞌe e rua maꞌu e te vaꞌehau ꞌi te rima ꞌi te hora o te tamaꞌi, e tahi o rā meꞌe mo moto ꞌe te rua mo puru i a ia ꞌo pū.

⁸E ai rō ꞌā te nuꞌu haka nui-nui i a mātou, ꞌe te nuꞌu parauꞌino mai. E ai rō ꞌā te nuꞌu vānaŋa riva-riva ꞌe te nuꞌu vānaŋa rake-rake o ruŋa i a mātou. A rāua he kī nō mai te aŋa i te mātou reo-reo, ka ai atu he parautiꞌa te mātou meꞌe kī. ⁹E uꞌi mai ena i a mātou pa he nuꞌu taꞌe māhani e rāua, ka ai atu e ꞌite riva-riva rō ꞌā ko ai a mātou. He oho nō te aŋa o mātou mo mate i a rāua, ꞌe ko te ora iŋa ꞌana. He tōtōā nō mai te aŋa, ꞌe, ka ai atu pē ira, ꞌina a mātou he mate. ¹⁰E tuꞌu rō ꞌā a mātou pa he nuꞌu e mamae rō ꞌā te māhatu, ꞌe, ka ai atu pē ira, ko te koa iŋa ꞌā. E uꞌi mai ena i a mātou pa he nuꞌu veve, ꞌe, ka ai atu pē ira, e rahi rō ꞌā te nuꞌu haka ꞌono e mātou. E tuꞌu rō ꞌā pa he meꞌe ena ē: ꞌina e tahi mātou meꞌe, ꞌe te parautiꞌa e ai tahi rō ꞌā.

¹¹E te taina o Kōrinto ē, taꞌatoꞌa meꞌe manaꞌu e mātou ko haka ꞌite tahi atu ꞌana. Ko vaꞌai tahi atu ꞌā a mātou i te mātou māhatu. ¹²Mo ai o te hihi-hihi ꞌi roto o tātou, taꞌe ꞌo te kore o te mātou haŋa ki a kōrua, he kore o te haŋa o kōrua mo mātou. ¹³He ani atu ia a au, pa he ani iŋa o te matuꞌa ki tāꞌana ŋā poki: e haŋa mai kōrua, pa he haŋa iŋa atu ena o mātou.

E haka tapa mai te meꞌe taꞌe tano

¹⁴E te taina, ko ꞌite ꞌana e tātou taꞌatoꞌa e ko tano mo here ꞌi ruŋa i tū iuko ꞌā e tahi hoi ꞌe e tahi ꞌuei. Pē ira ꞌā e ko tano mo ⌊hāipo-ipo⌋ ꞌo mo haꞌaꞌau i te aŋa e tahi mo aŋa te kope haka moe i te manaꞌu ꞌi ruŋa i a Ietū ararua ko te kope ꞌina he haka moe i te manaꞌu ꞌi ruŋa i a Ietū. ¿Pē hē, paꞌi, ana tano te meꞌe riva-riva ki te meꞌe rake-rake? ꞌE ¿pē hē te māꞌeha ana hokorua i te pōꞌuri? ¹⁵¿Hoki e haꞌaꞌau mau rō te ⌊Kiritō⌋ ararua ko Rukifero? ¿Hoki e haꞌaꞌau mau rō te nuꞌu haka moe i te manaꞌu ꞌi ruŋa i a Ietū ꞌe te nuꞌu taꞌe haka moe i te manaꞌu ꞌi ruŋa i a ia? ¹⁶ꞌE te ꞌītoro, ¿e tano mau rō ꞌi te kona haꞌamuri ꞌAtua? E kī atu ena a au i te meꞌe nei ꞌo te ai a tātou pa he kona haꞌamuri ꞌAtua. ꞌI ruŋa i te Pāpaꞌi Moꞌa e kī ena, paꞌi, e te ꞌAtua:

«Ka noho nei a au ꞌi roto i a rāua,

a au mo ꞌAtua o rāua,

ꞌe a rāua mo taŋata ꞌāꞌaku».

¹⁷ꞌE ꞌi te rua kona o te Pāpaꞌi Moꞌa e kī takoꞌa ena:

«E eꞌa kōrua mai roto i te nuꞌu aŋa i te meꞌe taꞌe tano

ꞌe ꞌina ko noho haka ꞌou ꞌi muri;

ꞌina kōrua ko aŋa i te meꞌe taꞌe tano pē rāua.

Pē ira he toꞌo a au i a kōrua māꞌaku,

¹⁸ꞌe he riro au he Matuꞌa mo kōrua,

ꞌe a kōrua mo ŋā poki ꞌāꞌaku.

Pē ira te ꞌAtua, i a ia te pūai taꞌatoꞌa, i kī ai».

¹E te taina haŋa rahi ōꞌoku ē, te ŋā meꞌe nei he hōrea o te ꞌAtua mo tātou. ꞌO ira, e haka tapa tātou mai te meꞌe haka ꞌōꞌone hai hara i te hakari ꞌe i te vārua. ꞌE, ꞌi te moꞌa o tātou i a ia, e uꞌi mo tano o te tātou noho iŋa ki tōꞌona mata ki te roa ꞌina e tahi hara.

He koa iŋa o Pauro mo te nuꞌu o Kōrinto

²¡E mātaki mai te kōrua māhatu! ꞌIna, paꞌi, a mātou kai aŋa atu e tahi meꞌe taꞌe tano, kai aŋa atu e tahi meꞌe mo haka tapa e tahi o kōrua mai te ara parautiꞌa o te ꞌAtua, ꞌe kai reo-reo atu mātou mo ravaꞌa moni. ³Taꞌe he riri mo kōrua e kī atu ena i te ŋā meꞌe nei. ꞌI muꞌa ꞌā, paꞌi, i kī rō atu au e maꞌu rō ꞌana a au i a kōrua ꞌi roto i tōꞌoku māhatu; ka ora ꞌo ka mate a au, e ko kore kōrua mai roto. ⁴E koa rō ꞌana a au mo kōrua, ꞌe e vānaŋa atu ena taꞌe hai riꞌa-riꞌa. Ka ai atu e ꞌamo rō ꞌana a mātou i te ꞌati, ko te pūai iŋa ꞌana tōꞌoku manaꞌu ꞌe ko te koa iŋa ꞌana a au.

⁵I tuꞌu era a mātou ki Mātērōnia, ꞌina a mātou he ravaꞌa mo haka ora ꞌi te haka tātake nō mai e te nuꞌu taꞌe haŋa mai, ꞌe ꞌi te ŋaroꞌa i te riꞌa-riꞌa ꞌi roto i a mātou. ⁶ꞌE, o te ꞌAtua, haka pūai i te nuꞌu ꞌina he haŋu toe, i haka pūai mai i a mātou hai tuꞌu iŋa mai o Tito. ⁷ꞌE taꞌe nō hai tuꞌu iŋa mai era ōꞌona, takoꞌa hai ꞌite mai e koa rō ꞌana ꞌi a kōrua. Ko ꞌaꞌamu mai ꞌana e ia i te rahi o te kōrua haŋa mo takeꞌa i a mātou, ꞌe ko ꞌaꞌamu takoꞌa mai ꞌana i te māui-ui e maꞌu ena ꞌi roto i te kōrua māhatu he manaꞌu rahi mai o kōrua ki a au. He ꞌata koa rō atu ꞌai a au ꞌi te ŋā meꞌe taꞌatoꞌa nei.

⁸I ꞌite era e au i māui-ui rō te kōrua māhatu ꞌi te parau pāpaꞌi atu era e au, tē rā ia au ka manaꞌu: ko te ꞌaroha ꞌō i haka maꞌu atu ai. ꞌE hora nei, ka ai atu ꞌi rā parau i māui-ui ai te kōrua māhatu, ko kore ꞌana te haka ꞌaroha era ōꞌoku mo kōrua ꞌo te ai kai māuꞌa a au i pāpaꞌi atu ai. ⁹ꞌE, ko koa ꞌana a au, taꞌe ꞌō ꞌo te māui-ui o te kōrua māhatu, ꞌo te ai hai rā māui-ui i hārui haka ꞌou ai te kōrua manaꞌu ki te ꞌAtua. Te meꞌe ŋaroꞌa era e kōrua he meꞌe haŋa o te ꞌAtua mo tāꞌana nuꞌu. ꞌI te ai pē ira, ꞌina ia a mātou kai aŋa atu i te meꞌe taꞌe tano ki a kōrua hai rā meꞌe pāpaꞌi atu era e au. ¹⁰Ko rā māui-ui te māui-ui māhatu haŋa o te ꞌAtua, he meꞌe haka hārui i te manaꞌu o te taŋata ki a ia, maꞌu i a rāua mo eꞌa mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa. ꞌE te māui-ui māhatu pē ira taꞌe he ꞌati. Te māui-ui māhatu o te taŋata taꞌe haŋa ki te ꞌAtua, taꞌe haka hārui i te manaꞌu o te taŋata ki ruŋa i te ꞌAtua, he meꞌe maꞌu i te taŋata ki te mate, te auraꞌa, he haꞌataꞌa mau rō ꞌāvai mai muri i te ꞌAtua.

¹¹Ka uꞌi rā he aha he aha te meꞌe riva-riva poreko mai te meꞌe ŋaroꞌa era e kōrua: ko haŋa ꞌana kōrua mo haka tī-tika i te meꞌe hape o roto i te nūnaꞌa taŋata ⌊haka moe i te manaꞌu⌋ ꞌi ruŋa i a Ietū o Kōrinto, ko riri ꞌana kōrua mo te meꞌe taꞌe tano aŋa era e rā kope, ꞌe ko riꞌa-riꞌa ꞌana ꞌo haka ūtuꞌa atu i a kōrua e te ꞌAtua ananake ko rā kope. Ko haŋa takoꞌa ꞌana a kōrua mo oho atu ōꞌoku mo uꞌi i a kōrua, ko ꞌata haꞌatura ꞌana a kōrua i tāꞌaku meꞌe kī atu era ꞌe ko haka ūtuꞌa ꞌā i rā kope. Hai ŋā meꞌe nei e takeꞌa ena: ꞌina e tahi hape o kōrua o rā meꞌe topa era. ¹²Hora pāpaꞌi atu era ōꞌoku i rā parau, tōꞌoku manaꞌu taꞌe ꞌi ruŋa i te kope hara era, ꞌo ꞌi ruŋa i te kope māui-ui era o te māhatu ꞌi rā hara. Ko ꞌite ꞌana e te ꞌAtua: tōꞌoku manaꞌu i pāpaꞌi atu ai mo aŋi-aŋi e kōrua i te rahi o te haŋa o kōrua mo mātou. ¹³He ꞌite o mātou ko haka tano tahi ꞌana e kōrua i te meꞌe pāpaꞌi atu era i ꞌata haŋu ai a mātou.

Ka ai atu pē ira, ꞌata hau rō atu te mātou koa ꞌi te takeꞌa i a Tito e koa rō ꞌā mo kōrua. Hai meꞌe aŋa era e kōrua i ꞌata haka haŋu ai i a ia. ¹⁴Ko haka paka era ꞌana e au ki a Tito: a kōrua nuꞌu haꞌatura, ꞌe ꞌina kai hape rā vānaŋa era ꞌāꞌaku. Ko takeꞌa ꞌā, paꞌi, e Tito, he parautiꞌa, pa he meꞌe taꞌatoꞌa kī atu e mātou ki a kōrua. ¹⁵E topa nei te manaꞌu o Tito ki te moꞌa ꞌe ki te haꞌatura iŋa era o kōrua ki a ia, he ꞌata rahi rō atu ꞌai tōꞌona haŋa mo kōrua. ¹⁶¡ꞌE hora nei, ko ꞌata koa ꞌana a au he ꞌite ōꞌoku: a kōrua nuꞌu haka tano i te kōrua meꞌe kī!

E riva ki te rua

¹E te taina, e haŋa rō ꞌā a mātou mo ꞌaꞌamu atu he aha te meꞌe riva-riva i poreko ꞌi roto i te nūnaꞌa taŋata ⌊haka moe i te manaꞌu⌋ ꞌi ruŋa i a Ietū o te kona era ko Mātērōnia ꞌo te toꞌo mo rāua i te riva rahi o te ꞌAtua. ²Ka ai atu i topa rō te ꞌati taparahi-taꞌata ki te nuꞌu nei, ko te koa iŋa ꞌana, ꞌe, ka ai atu he nuꞌu veve, ꞌi te rāua riva, pa he ꞌono e vaꞌai era i te moni. ³He mataꞌite a au e vaꞌai era hai māhatu e haka tano ki te meꞌe ai o rāua, ꞌe ꞌātā ꞌata rahi rō atu. Te nuꞌu nei, hai manaꞌu mau ꞌā o rāua, ⁴i haka koni mai ai mo haꞌatiꞌa o mātou i a rāua mo hāꞌūꞌū takoꞌa hai tara mo te nuꞌu haka moe i te manaꞌu ꞌi ruŋa i a Ietū o Hērutarema. ⁵ꞌE taꞌe he moni nō te meꞌe i vaꞌai mai e te nuꞌu nei, pa he meꞌe manaꞌu era e mātou. ꞌI raꞌe i vaꞌai ai i a rāua mo tāvini ki te ꞌAtua, ꞌe ki oti ki a mātou, pa he meꞌe haŋa o te ꞌAtua.

⁶ꞌI te nehe-nehe o rā meꞌe aŋa era e te taina o Mātērōnia, ꞌī mātou ko ani ꞌā ki a Tito mo oho atu ōꞌona mo haka mao i te aŋa haꞌamata era e ia ꞌi muꞌa ꞌā he haka taka-taka, mai i a kōrua, i te moni mo te taina o Hērutarema. ⁷A kōrua he nuꞌu haka kē ꞌi te meꞌe taꞌatoꞌa: ꞌi te haka moe i te manaꞌu ꞌi ruŋa i a Ietū, ꞌi te ꞌite mo vānaŋa, ꞌi te ꞌite i te hāpī parautiꞌa o te ꞌAtua, ꞌi te haŋa mo hāꞌūꞌū, ꞌe ꞌi te haŋa mo te rua, he meꞌe i ꞌite e kōrua mai i a mātou. Pē ira takoꞌa ꞌana kōrua ana haka kē ꞌi te aŋa riva nei: he haꞌaputu i te moni ꞌi roto i a kōrua mo te taina veve o Hērutarema.

⁸Taꞌe a au e kī atu ena i te meꞌe nei pa he meꞌe mo haꞌatura mau ꞌā e kōrua. Mo riva o kōrua mo haꞌatura, ko tano ꞌā. Tōꞌoku haŋa mau mo uꞌi hoki he parautiꞌa mau ꞌana te kōrua haŋa mo te rua, pa he meꞌe i takeꞌa e au ꞌi te taina o Mātērōnia. ⁹Ko ꞌite ꞌana, paꞌi, kōrua: te tātou Pūꞌoko Haka Tere ko Ietū Kiritō, ka ai atu he ꞌono ꞌi te raŋi, ꞌi tōꞌona riva rahi, i haka veve nō i a ia mo te kōrua riva-riva, ki ꞌono ai kōrua ꞌi te meꞌe o te ꞌAtua hai rā haka veve iŋa era ōꞌona.

¹⁰Mo te kōrua riva-riva he haka ꞌite atu a au i tōꞌoku manaꞌu o ruŋa i tū meꞌe haꞌamata aŋa era e kōrua hai koa ꞌi tū matahiti oti ena, he haka taka-taka i te moni mo te nuꞌu veve o Hērutarema. ¹¹Te meꞌe haŋa: he haka mao i rā aŋa hai meꞌe tara o kōrua hai koa takeꞌa mau era ꞌā e au i a kōrua ꞌi muꞌa ꞌā hora manaꞌu era mo aŋa i rā meꞌe. ¹²Mo ai ꞌi roto i te kōrua māhatu te haŋa parautiꞌa mo vaꞌai, ꞌe te meꞌe vaꞌai e kōrua e tano rō ꞌā ki te meꞌe ai o kōrua, he koa te ꞌAtua. ꞌIna, paꞌi, a ia he no-noꞌi mai ꞌata rahi te meꞌe ki te meꞌe ai o tātou mo vaꞌai.

¹³Taꞌe a au e kī atu ena mo vaꞌai tahi i te meꞌe ai o kōrua, ꞌo kore te kōrua meꞌe hai hāꞌūꞌū ki te rua. Te meꞌe haŋa he haka tano-tano mo te taꞌatoꞌa. ¹⁴ꞌI te hora nei e ai rō ꞌā i a kōrua te meꞌe ꞌina i te nuꞌu o Hērutarema. Pe muꞌa ka oho ena, pēaha, he ai i a rāua te meꞌe e hape rō ꞌā i a kōrua, ꞌe mo hāꞌūꞌū o te taina ꞌi roto i a rāua, e ko hape te meꞌe. ¹⁵Mo aŋa o kōrua pē ira, he topa pa he meꞌe kī ꞌi ruŋa i te ⌊Pāpaꞌi Moꞌa⌋ o ruŋa i te itaraera, hora vaꞌai era e te ꞌAtua i te ⌊mānā⌋ mai te raŋi: «Te kope haꞌaputu rahi, ꞌe te kope taꞌe haꞌaputu rahi, ko tū mākona iŋa ꞌana ararua».

He uŋa iŋa i a kuā Tito ki Kōrinto

¹⁶Māuru-uru ki te ꞌAtua ꞌo te haka poreko ꞌi roto i te manaꞌu o Tito te haŋa mo hāꞌūꞌū atu ki a kōrua pē au. ¹⁷I kī era e mātou mo oho atu mo uꞌi i a kōrua, ꞌina kai pātoꞌi mai. Te parautiꞌa, ko koa atu ꞌā ꞌi te haŋa mo oho atu mo uꞌi ꞌe mo hāꞌūꞌū atu i a kōrua.

¹⁸ꞌI muri i a Tito i uŋa atu ai a au i te taina e tahi. E vānaŋa riva-riva rō ꞌā o ruŋa i a ia te taina taꞌatoꞌa o Mātērōnia, he tano o tāꞌana aŋa he haka ꞌite i te ⌊roŋo riva-riva o te ꞌAtua⌋. ¹⁹Te kope nei o te ŋā taina mau nei ꞌā i haꞌataꞌa mo hokorua takoꞌa mai ꞌi te mātou ara ki Hērutarema maꞌu i te moni mo te taina veve o ira. Te meꞌe nei he rāveꞌa e tahi mo haꞌahana-hana o te taŋata ki te ꞌAtua ꞌe mo takeꞌa i te haŋa o mātou mo hāꞌūꞌū. ²⁰I uŋa atu ai mātou i te kope nei ꞌi muri i a Tito ꞌo ai tāꞌue te vānaŋa mo kī i te hape o te haka tere iŋa o mātou i te moni ena. ²¹Te meꞌe haŋa o mātou he aŋa riva-riva i te aŋa nei ki te mata o te ꞌAtua, ꞌe pē ira takoꞌa ꞌana ki te mata o te taŋata.

²²ꞌI muri i a kuā Tito i uŋa takoꞌa atu ai a au i te taina haka ꞌou e tahi. Te kope nei hai rauhuru atu meꞌe aŋa e takeꞌa ena i te rahi o tōꞌona haŋa mo hāꞌūꞌū ꞌi te aŋa o te ꞌAtua. ꞌE hora nei, ko ꞌata haŋa ꞌana a ia mo hāꞌūꞌū ꞌo te ꞌite e ko taꞌe vaꞌai kōrua hai māhatu mo te taina veve o Hērutarema. ²³ꞌE o ruŋa i a Tito he kī atu a au: a ia he hokorua ōꞌoku ꞌe e aŋa nei a māua mo te kōrua riva-riva. ꞌE te ŋā taina haka ꞌou ena e rua o muri he nuꞌu moꞌa ꞌe haꞌatura ki te ⌊Kiritō⌋ uŋa atu e te nuꞌu haka moe i te manaꞌu ꞌi ruŋa i a Ietū o te ŋā kona nei. ²⁴E kuā taina, e hāpaꞌo kōrua i a rāua hai haŋa, ki takeꞌa ai e tū ŋā nuꞌu uŋa atu ena i a rāua, he parautiꞌa mau ꞌā te mātou meꞌe kī o ruŋa i a kōrua.

¹ꞌE o ruŋa i te meꞌe he haꞌaputu i te moni mo te taina veve o Hērutarema, ¡¿mo aha atu ꞌā a au ana pāpaꞌi haka ꞌou atu?! ²Ko ꞌite riva-riva ꞌana, paꞌi, e au e haŋa rō ꞌana a kōrua mo hāꞌūꞌū. ꞌE tāꞌaku aŋa he ꞌaꞌamu nō hai koa ki te nuꞌu o Mātērōnia pē nei ē: mai tū matahiti oti era ꞌā, a kōrua, te nuꞌu o Ākāia, e haŋa rō ꞌana mo hāꞌūꞌū. ꞌE te rahi raꞌa o te nuꞌu o ira ko haŋa takoꞌa ꞌā mo hāꞌūꞌū i te aŋa nei, he ꞌite i te rahi o te haŋa o kōrua mo hāꞌūꞌū.

³ꞌE, kai ai atu pē ira, he uŋa atu a au i te ŋā taina nei mo hāꞌūꞌū atu, ꞌo taꞌe tano tāꞌaku vānaŋa kī era o ruŋa i a kōrua. Te meꞌe haŋa: ka tuꞌu atu ena a au, ko taka-taka ꞌā te moni i a kōrua, ⁴ꞌo oho tāꞌue atu te nuꞌu o Mātērōnia ꞌi muri i a au he takeꞌa kai taka-taka ꞌā i a kōrua, ꞌe he haꞌamā a au. ꞌE, ¡¿mo aha atu ꞌā ana kī atu pē hē kōrua ka haꞌamā takoꞌa ena?! E ꞌaꞌamu rō ꞌana, paꞌi, mātou: a kōrua e haka tano tahi rō ꞌana i te kōrua meꞌe kī. ⁵ꞌO ira a au i manaꞌu ai mo vānaŋa ki te ŋā taina nei mo oho atu mo uꞌi i a kōrua ꞌi raꞌe ki a au, mo hāꞌūꞌū atu mo haka mao i rā meꞌe kī era e kōrua. Pē ira ka tuꞌu atu ena a mātou, he takeꞌa e te taina taꞌatoꞌa i vaꞌai ai a kōrua hai māhatu, taꞌe ꞌō ꞌo te ai ko kī atu ꞌā.

E hāꞌūꞌū hai māhatu

⁶E manaꞌu kōrua ki te vānaŋa nei: «Te kope taꞌe ꞌoka rahi, meꞌe taꞌe rahi te meꞌe ka kato era; ꞌe te kope ꞌoka rahi, meꞌe rahi ka kato era». ⁷Taꞌatoꞌa o kōrua ana vaꞌai i te meꞌe manaꞌu ꞌi roto i te māhatu hai haŋa, ꞌe taꞌe ꞌō ꞌo te ai ko kī atu ꞌā e te rua. Te ꞌAtua, paꞌi, e haŋa rō ꞌā ki te kope vaꞌai i te meꞌe hai koa. ⁸ꞌE i a ia te pūai mo haꞌamaitai hai rauhuru nō atu meꞌe ꞌo hape e tahi meꞌe o kōrua, ꞌe, ꞌi te rahi, he topa ꞌātā mo hāꞌūꞌū ki te tētahi. ⁹E kī rō ꞌana, paꞌi, ꞌi ruŋa i te ⌊Pāpaꞌi Moꞌa⌋ mo te kope riva:

«E rahi rō ꞌā te vaꞌai iŋa ki te nuꞌu veve,

ꞌe tōꞌona riva era e ko rehu ki te hora hopeꞌa».

¹⁰O te ꞌAtua te vaꞌai i te karu ki te nuꞌu ꞌoka, ꞌe i te kai ki te taŋata. ꞌĀꞌana takoꞌa te vaꞌai ꞌe te haka rahi i te meꞌe ai o kōrua, mo ꞌata rahi o te kōrua hāꞌūꞌū ki te rua. ¹¹Pē ira ka ai ena rauhuru nō atu kōrua hauhaꞌa ꞌe he tano mo hāꞌūꞌū ki te rua hai māhatu. Te moni haka taka-taka ena e kōrua ka maꞌu ena e mātou he rāveꞌa haka ꞌou e tahi mo māuru-uru o te tātou ŋā taina era o Hērutarema ki te ꞌAtua. ¹²Te maꞌu i te hāꞌūꞌū nei ki te ŋā taina era o ira taꞌe nō e maꞌu ꞌā i te meꞌe hape o rāua, e aŋa takoꞌa ꞌā i te meꞌe mo ꞌata māuru-uru o rāua ki te ꞌAtua. ¹³Hai hāꞌūꞌū ena o kōrua he haꞌahana-hana te taina o Hērutarema ki te ꞌAtua ꞌi te ꞌite e maꞌu ꞌe e haꞌatura rō ꞌana kōrua ki te ⌊roŋo riva-riva o te ꞌAtua⌋ o ruŋa i a Ietū Kiritō, ꞌe ꞌi te rahi o te kōrua hāꞌūꞌū iŋa ki a rāua ꞌe ki te taŋata taꞌatoꞌa. ¹⁴ꞌE ꞌātā he pure hai māhatu mo kōrua ꞌi te takeꞌa i te riva rahi o te ꞌAtua ꞌi ruŋa i a kōrua. ¹⁵¡Ki māuru-uru tahi tātou ki te ꞌAtua ꞌo te vaꞌai mai i te hauhaꞌa hopeꞌa o te nui-nui, hauhaꞌa ꞌina he vānaŋa mo haꞌaauraꞌa, he Poki ena ꞌāꞌana!

He pāhono iŋa o Pauro ki te taina o Kōrinto

¹E te taina, nā ꞌi roto i a kōrua te nuꞌu e haꞌaꞌino rō ꞌā i a au pē nei ē: ꞌi te hora ōꞌoku ꞌi muri i a kōrua, ꞌina a au he kī atu ki te kōrua ꞌāriŋa i te kōrua hape, ꞌe, ꞌi te hora mo pāpaꞌi atu, he ture nō atu tāꞌaku aŋa. ꞌO ira, a au, a Pauro, he ani atu hai haŋa ꞌe hai riva rahi o te ⌊Kiritō⌋: ²Ka uꞌi ka haka tī-tika rō ꞌai te ŋā nuꞌu ena, nuꞌu manaꞌu: a mātou e haka tere nei hai manaꞌu taŋata mau nō, ꞌo tuꞌu atu au, he ture atu ki a kōrua ananake ko nā ŋā nuꞌu. ³Ka ai atu a mātou he taŋata noho ꞌi te ao nei, taꞌe pa he taŋata o te ao nei e moto nei. ⁴ꞌE te mātou meꞌe maꞌu mo moto taꞌe he meꞌe o te ao nei, he pūai o te ꞌAtua mo rē ki te manaꞌu taꞌatoꞌa poreko mai i a Rukifero taꞌe haka rē i te taŋata mo haka hāhine ki te ꞌAtua. Hai pūai nei o te ꞌAtua e rē nei mātou ki te manaꞌu o te nuꞌu taꞌe haŋa mai, ⁵ꞌe pē ira takoꞌa ꞌā ki te manaꞌu o te nuꞌu teꞌo-teꞌo taꞌe haꞌatiꞌa i a rāua mo māhani ki te ꞌAtua. Pē ira e hāꞌūꞌū nei a mātou ki te nuꞌu mo huri ki te ꞌAtua ꞌe mo manaꞌu o rāua pa he meꞌe haŋa o te Kiritō. ⁶ꞌE ki takeꞌa ia e mātou i te rahi raꞌa o kōrua e haꞌatura parautiꞌa mau rō ꞌā ki te meꞌe taꞌatoꞌa haŋa o te Kiritō, ꞌi rā hora he uꞌi mātou he haka ūtuꞌa i te nuꞌu o roto i a kōrua taꞌe haꞌatura ki a ia.

⁷E haka topa te kōrua manaꞌu o ruŋa i te meꞌe ko ꞌite riva-riva ꞌā e kōrua o ruŋa i a mātou. Nā, paꞌi, ꞌi roto i a kōrua te nuꞌu kī: a rāua he tāvini parautiꞌa o te Kiritō. E ꞌite e te nuꞌu era: a mātou takoꞌa he tāvini o te Kiritō. ⁸ꞌE mo ai tāꞌue i rahi rō tōꞌoku teꞌo-teꞌo iŋa atu: i a au te parau mo haka tere i a kōrua a te ara parautiꞌa o te ꞌAtua, e ko haꞌamā a au. O te tātou Pūꞌoko Haka Tere, paꞌi, i vaꞌai mai mo haka pūai atu i te kōrua haka moe iŋa i te manaꞌu ꞌi ruŋa i a ia, taꞌe ꞌō mo haka tapa i te kōrua manaꞌu mai ruŋa. ⁹ꞌIna kōrua ko manaꞌu e haŋa ꞌana ꞌō a au mo haka riꞌa-riꞌa i a kōrua hai parau pāpaꞌi atu e au. ¹⁰ꞌĪ a au e kī atu ena: nā ꞌi roto i a kōrua te nuꞌu kī: pūai riꞌa-riꞌa tāꞌaku vānaŋa ꞌi te hora pāpaꞌi atu, ꞌe, ꞌi te hora ꞌi muꞌa i a kōrua, e tuꞌu rō ꞌā pa he kope taꞌe pūai ꞌe taꞌe ꞌite mo tātara. ¹¹Te nuꞌu kī i te vānaŋa nei e ꞌite: pa he pūai ena ꞌā o te mātou huru ꞌi ruŋa i te parau pāpaꞌi atu ena, pē ira te mātou pūai ka takeꞌa ena e rāua ka tuꞌu atu ena a mātou, ka haka tano tahi ena i te mātou meꞌe kī.

¹²Taꞌe mātou o roto o te nuꞌu teꞌo-teꞌo. Te nuꞌu nei, ꞌi te hora uꞌi hoki e tano rō ꞌā te rāua aŋa mo te ꞌAtua, e hāito ena hai meꞌe aŋa ꞌe manaꞌu e rāua mau ꞌā, taꞌe ꞌō hai manaꞌu o te ꞌAtua. ¡Te oho iŋa nei he meꞌe maꞌa-maꞌa e tahi! ¹³A mātou, taꞌe pa he nuꞌu nei. ꞌI te hora vānaŋa o mātou o ruŋa i te mātou aŋa mo te ꞌAtua, e hāito rō ꞌana te mātou meꞌe kī ki te meꞌe haꞌatiꞌa nō mai e te ꞌAtua. ꞌE o te ꞌAtua te kī mai ꞌātā ki kona hē ana tuꞌu te mātou aŋa, ꞌe ꞌāꞌana te haꞌatiꞌa mai i a mātou mo tuꞌu atu ꞌātā ki a kōrua ena ꞌi Kōrinto. ¹⁴ꞌO ira ꞌina a mātou he eꞌa mai te meꞌe haꞌatiꞌa mai e te ꞌAtua ꞌi te hora kī atu: i a mātou te parau mo haka tere i a kōrua a te ara o te ꞌAtua. ꞌĀhani mātou i taꞌe ai ꞌi roto i a kōrua ꞌi muꞌa ꞌā, ko eꞌa era ꞌā ia a mātou mai rā roa haꞌatiꞌa mai era e te ꞌAtua. ꞌE te parautiꞌa, ko mātou te nuꞌu raꞌe i haka ꞌite atu i te ⌊roŋo riva-riva o ruŋa i a Ietū Kiritō⌋. ¹⁵ꞌE ꞌina takoꞌa a mātou he teꞌo-teꞌo ꞌi te aŋa o te rua, ꞌo eꞌa a mātou mai rā roa. Te mātou meꞌe haŋa he pūai he oho te kōrua haka moe iŋa i te manaꞌu ꞌi ruŋa i a Ietū, mo ꞌata rahi mo oho te mātou aŋa ꞌi roto i a kōrua.

¹⁶E haŋa takoꞌa rō ꞌā a mātou mo oho mo haka ꞌite i te ⌊roŋo riva-riva o te ꞌAtua⌋ ꞌi te kona ꞌata roa mai te kona ena ꞌi ira a kōrua, hai kona ꞌina he kope raꞌe i hāpī, ꞌo teꞌo-teꞌo a mātou ꞌi te aŋa o te rua. ¹⁷E kī rō ꞌā, paꞌi, ꞌi ruŋa i te ⌊Pāpaꞌi Moꞌa⌋: «Te kope haŋa mo haka paka i tāꞌana meꞌe aŋa, te tano mau: e haka paka i te meꞌe aŋa e te tātou Pūꞌoko Haka Tere». ¹⁸Te kope koa o te ꞌAtua taꞌe he kope teꞌo-teꞌo kī pē nei ē: a ia e aŋa riva-riva rō ꞌā mo te ꞌAtua; he kope o ruŋa e kī ena e te ꞌAtua: «E koa rō ꞌana a au mōꞌona».

Ko Pauro ꞌe he ⌊ꞌāpōtoro⌋ reo-reo

¹¡Pē hiva ꞌā a kōrua ana haꞌaoromaꞌi mai i te vānaŋa tuꞌu pa he meꞌe maꞌa-maꞌa ka kī atu ena! E uꞌi e haꞌaoromaꞌi mai. ²ꞌIna kōrua ko rehu: e haŋa rō atu ꞌana a au ki a kōrua pa he haŋa iŋa ena ꞌā o te ꞌAtua ki tōꞌona taŋata. A kōrua ko haka haꞌamoꞌa-moꞌa era ꞌana e au mo hāipo-ipo ki te kenu mau nō e tahi, he ⌊Kiritō⌋, ꞌe ko haŋa ꞌana a au mo maꞌu i a kōrua ki muꞌa i a ia pa he viꞌe ꞌina kai noho ꞌā ki te taŋata ꞌe hāpaꞌo i a ia mo tāꞌana kenu mau nō. ³ꞌE, e riꞌa-riꞌa rō ꞌā a au ꞌo kore te kōrua haŋa parautiꞌa ki te Kiritō, pa he meꞌe topa ki a ⌊Eva⌋ ꞌi te hora haka roŋo ki te reo-reo o tū kōreha era ko Rukifero. ⁴ꞌE, nā kōrua e haka roŋo ꞌā hai koa ki te nuꞌu vānaŋa atu o ruŋa i te Ietū kē ki te Ietū haka ꞌite atu era e mātou. E haka roŋo takoꞌa ꞌana hai koa ki te roŋo kē taꞌe hāpī atu e mātou, ꞌe ki te vārua kē taꞌe ki te ⌊Vārua Maitai⌋ noho ꞌi roto i a kōrua. ⁵ꞌIna a au he ŋaroꞌa pē nei ē: kope taꞌe hōnui a au ꞌi muri i tū ŋā ꞌāpōtoro reo-reo tuꞌu atu ena ki a kōrua manaꞌu ena pē nei ē: ꞌata hau rō atu ꞌō a rāua ꞌi te hōnui ki a au. ⁶He aŋi ꞌana, pēaha, kope taꞌe haka kē a au mo vānaŋa. Ka ai atu pē ira, e ꞌite rō ꞌana a au i te hāpī parautiꞌa o ruŋa i te ꞌAtua, ꞌe ko haka takeꞌa ko oho atu ꞌā hai meꞌe taꞌatoꞌa aŋa e mātou.

⁷ꞌI te hora haka ꞌite atu ōꞌoku i te ⌊roŋo riva-riva o te ꞌAtua⌋, ꞌina a au he kī atu mo ꞌauhau mai; i aŋa a au mo ravaꞌa o tāꞌaku rāveꞌa. Ki te kōrua manaꞌu, ¿he kope taꞌe hōnui au ꞌo te meꞌe ōꞌoku pē ira? I aŋa ai a au pē ira mo te kōrua riva-riva. ¿Ka kī ꞌō te meꞌe nei he hara e tahi? ⁸Te parautiꞌa, i tano ai a au mo aŋa atu ki a kōrua taꞌe e ꞌauhau mai ꞌi te meꞌe era i haka maꞌu rō mai e te tētahi taina o te tētahi atu kona hai meꞌe tara mōꞌoku. ^9-10ꞌE, ꞌi rā hora era ōꞌoku ꞌi muri i a kōrua, e hape era tāꞌaku meꞌe, ꞌina a au he no-noꞌi atu. O te taina tuꞌu mai mai Mātērōnia i hāꞌūꞌū mai. A au, paꞌi, e uꞌi rō ꞌana ꞌo riro a au he meꞌe paŋahaꞌa e tahi mo kōrua, ꞌe pē ira a au e aŋa e oho nei ꞌi te kona taꞌatoꞌa o Ākāia. ꞌO ira, ꞌina e tahi kope o rā ŋā kona mo kī i tōꞌoku reo-reo ana teꞌo-teꞌo a au o ruŋa i te taꞌe no-noꞌi i te moni mo haka ꞌite i te roŋo riva-riva o te ꞌAtua. ꞌE tāꞌaku vānaŋa nei e kī atu ena pa he parautiꞌa ena ꞌā o tāꞌaku vānaŋa taꞌatoꞌa kī atu o ruŋa i te Kiritō. ¹¹Te taꞌe no-noꞌi atu ōꞌoku mo hāꞌūꞌū mai, ¿e taꞌe haŋa atu ꞌana a au ki a kōrua? ¡He ꞌAtua te meꞌe i ꞌite e haŋa rō atu ꞌana a au!

¹²ꞌE, e ko haka kore a au i tōꞌoku haka tere iŋa nei he taꞌe no-noꞌi atu hai moni, ꞌo teꞌo-teꞌo tū nuꞌu tuꞌu atu ena ki a kōrua pē nei ē: e aŋa rō ꞌana a rāua pa he aŋa iŋa nei ꞌā o mātou. ¹³A rāua he ꞌāpōtoro reo-reo e haka tuꞌu rō ꞌana i a rāua pa he ꞌāpōtoro o te Kiritō. ¹⁴Te meꞌe nei taꞌe he meꞌe mo māere; a Rukifero mau ꞌā e haka tuꞌu rō ꞌana i a ia pa he merahi ꞌana-ꞌana o te ꞌAtua. ¹⁵ꞌE mo aŋa o Rukifero i te meꞌe tuꞌu pē ira, taꞌe ia he meꞌe mo māere te haka tuꞌu o te nuꞌu aŋa ki a ia pa he nuꞌu tano aŋa ki te ꞌAtua. Te meꞌe ka topa ena ki te nuꞌu pē nei he ūtuꞌa tano ki te rāua meꞌe aŋa.

He haka paka iŋa o Pauro

¹⁶ꞌĪ a au he kī haka ꞌou atu: ꞌina kōrua ko manaꞌu e maꞌa-maꞌa rō ꞌana a au. ꞌE mo ai pē ira e manaꞌu ena, ka haka rē mai ia mo vānaŋa atu ōꞌoku pa he maꞌa-maꞌa, ki tano takoꞌa ai au mo teꞌo-teꞌo ꞌiti-ꞌiti atu o ruŋa i a au mau ꞌā, ¹⁷ka ai atu te teꞌo-teꞌo nei he meꞌe maꞌa-maꞌa e tahi ꞌe taꞌe ꞌō he meꞌe mo koa o te ꞌAtua. ¹⁸Nuꞌu riꞌa-riꞌa, paꞌi, te nuꞌu, hai manaꞌu taŋata, e teꞌo-teꞌo ena o ruŋa i a rāua ꞌe o ruŋa i te rāua meꞌe aŋa. ¿He aha ia a au ana taꞌe teꞌo-teꞌo takoꞌa atu? ¹⁹¡A kōrua e manaꞌu ena he nuꞌu mārama-rama kōrua, ꞌe te aŋa he haꞌaoromaꞌi hai haŋa i te nuꞌu maꞌa-maꞌa! ²⁰Mo tuꞌu atu, paꞌi, o te nuꞌu haꞌariro i a kōrua he ꞌekaravo o rāua, te nuꞌu toꞌo i te kōrua meꞌe, te nuꞌu reo-reo atu, te nuꞌu taꞌe haka au atu, ꞌe te nuꞌu vā-vā atu he haꞌaoromaꞌi e kōrua. ²¹¡Ko te haꞌamā ꞌō ꞌi te pūai kore o mātou mo meꞌe takoꞌa atu pē rāua!

ꞌE, ꞌi te meꞌe era ꞌina a rāua he riꞌa-riꞌa mo teꞌo-teꞌo, ꞌina takoꞌa ia a au e ko riꞌa-riꞌa, ka ai atu pa he kope maꞌa-maꞌa a au e vānaŋa atu ena. ²²¿He ⌊ꞌevereo⌋ a rāua? Pē ira takoꞌa ꞌana a au. ¿He itaraera a rāua? Pē ira ꞌana a au. ¿He hakaara a rāua o ⌊ꞌAparahama⌋? Pē ira takoꞌa ꞌana a au. ²³¿He tāvini a rāua o te Kiritō? ꞌAta hau rō atu tōꞌoku tāvini iŋa ki te Kiritō ki a rāua, ka ai atu ꞌi tōꞌoku kī i te meꞌe nei, e vānaŋa ꞌana a au pa he maꞌa-maꞌa. ꞌAta rahi rō atu tōꞌoku aŋa mōꞌona ki a rāua, ꞌata rahi rō atu tōꞌoku puru iŋa ꞌi roto i te hare maꞌuꞌaurī ꞌo te aŋa ki te Kiritō ki a rāua, ꞌata rahi rō atu te tiŋaꞌi iŋa mai i a au, ꞌe i rahi rō te mahana i oho rō a au mo mate. ²⁴E rima tiŋaꞌi iŋa mai e te ⌊hūrio⌋ e toru ꞌahuru mā iva ꞌuaka ki te tuaꞌivi. ²⁵E toru puꞌa-puꞌa iŋa mai hai miro, ꞌe e tahi tamaꞌi iŋa mai hai māꞌea. E toru oho iŋa ōꞌoku ꞌi ruŋa i te pahī i emu ai te pahī. E tahi pō, e tahi ꞌōtea i noho ai a au ꞌi roto i te vaikava.

²⁶ꞌI tōꞌoku ara taꞌatoꞌa i piri rō mai meꞌe rahi nō atu ꞌati: he rio ko ꞌata rahi ꞌā e te vai, he toke-toke, he haŋa o tōꞌoku taŋata he hūrio ꞌe o te nuꞌu o te rua henua mo tōtōā mai. I piri mai ai te ꞌati nei ꞌi te kona noho taŋata, ꞌi ꞌuta, ꞌi roto i te vaikava, ꞌe ꞌi muri i te nuꞌu kī e haka moe rō ꞌana a rāua i te manaꞌu ꞌi ruŋa i a Ietū ꞌe, te parautiꞌa, taꞌe pē ira. ²⁷ꞌI rā ŋā ara takoꞌa i rahi rō tāꞌaku aŋa ꞌe i rohi-rohi rō a au; i rahi rō te mahana ꞌina a au kai haꞌuru; ꞌi tōꞌona mahana i maruaki rō ꞌe i pohe rō ki te vai. I ai rō te mahana ꞌina a au kai kai, ꞌe kē mahana i takeꞌo rō ꞌi te kahu kore mo puꞌa.

²⁸ꞌE taꞌe nō ꞌō he ŋā meꞌe nei te meꞌe i topa mai ki a au; takoꞌa paurō te mahana he manaꞌu nō tāꞌaku aŋa ki te nuꞌu taꞌatoꞌa ⌊haka moe i te manaꞌu⌋ ꞌi ruŋa i a Ietū, ²⁹ꞌo viri tāꞌue e tahi o rāua ki roto ꞌi te hara ꞌo te taꞌe pūai o tōꞌona haka moe iŋa i te manaꞌu ꞌi ruŋa i a Ietū ꞌe ꞌo te haka hara i a ia e te kope e tahi. Ka meꞌe era, he riri ia a au mo rā kope era ꞌāꞌana i haka hara.

³⁰Meꞌe taꞌe haŋa ꞌāꞌaku he teꞌo-teꞌo o ruŋa i a au; ꞌe mo teꞌo-teꞌo atu, he teꞌo-teꞌo atu ia a au ꞌi tōꞌoku taꞌe pūai. ³¹Te ꞌAtua, Matuꞌa o te tātou Pūꞌoko Haka Tere ko Ietū, kope ki a ia ana haꞌahana-hana ꞌātā ki te hora hopeꞌa, ko ꞌite ꞌā e kī atu ꞌana a au i te parautiꞌa. ³²¡ꞌĀ! ꞌI te hora era ōꞌoku ꞌi Rāmako, te suerekao aŋa ki te ꞌariki ko ꞌĀreta i haka ꞌauario rō i te ꞌōpani o ira mo ꞌa-ꞌaru i a au. ³³Ka ai atu pē ira, i ai rō te nuꞌu i haka topa i a au ki haho o Rāmako ꞌi roto i te kānato. Pē ira a au i tere ai mai te rima o rā suerekao.

He meꞌe haka takeꞌa ꞌe haka ꞌite ki a Pauro

¹ꞌIna e tahi meꞌe mo ravaꞌa e te kope e tahi mo teꞌo-teꞌo o ruŋa i a ia mau ꞌā. ꞌE, ka ai atu pē ira, ꞌī a au he vānaŋa atu o ruŋa i te meꞌe haka takeꞌa ꞌe haka ꞌite mai e te tātou Pūꞌoko Haka Tere. ²Ka hoꞌe ꞌahuru mā maha matahiti a tuꞌa i maꞌu ai e te ⌊Kiritō⌋ i a au, kope ⌊haka moe i te manaꞌu⌋ ꞌi ruŋa i a ia, ki te raŋi. Kai ꞌite riva-riva mai hoki hai hakari mau ꞌā ꞌo i toꞌo vārua nō; he ꞌAtua te meꞌe i ꞌite. ^3-4Te meꞌe nō ꞌāꞌaku i ꞌite: ko tuꞌu ꞌana a au ki te raŋi (ka ai hai hakari ꞌo hai vārua, he ꞌAtua mau nō te meꞌe i ꞌite). ꞌI ira i ŋaroꞌa ai e au i te meꞌe ꞌina he vānaŋa o te ao nei mo haꞌaauraꞌa atu, ꞌe ꞌina takoꞌa he haꞌatiꞌa e te ꞌAtua mo haka ꞌite ki te taŋata. ⁵E tano nō a au mo haka paka atu ꞌo te topa mai o te meꞌe nei ki a au; ka ai atu pē ira, ꞌina nō a au he haŋa mo haka paka atu. ꞌE, mo haka paka atu, he haka paka atu ia a au i a au pē hē te ꞌAtua e haka takeꞌa ena i tōꞌona pūai ꞌi ruŋa i te kope taꞌe pūai pē au. ⁶ꞌE, ka haŋa atu a au mo haka paka atu o ruŋa i rā meꞌe, e ko riro he meꞌe maꞌa-maꞌa e tahi ꞌi te meꞌe era e kī atu ꞌana a au i te parautiꞌa. ꞌE ꞌina a au he aŋa pē ira, ꞌo manaꞌu tāꞌue rō e te nuꞌu: te meꞌe haka nui-nui i a au he toꞌo iŋa o te Kiritō i a au ki te raŋi, ꞌe taꞌe ꞌō he noho iŋa tano ꞌe he hāpī iŋa parautiꞌa ōꞌoku, he meꞌe takeꞌa ꞌe ŋaroꞌa e rāua.

⁷ꞌE, ꞌo manaꞌu au i hau rō atu a au ki te rua ꞌo te haka takeꞌa mai ꞌe ꞌo te haka ꞌite mai e te ꞌAtua i te meꞌe hopeꞌa o te nui-nui ꞌi ruŋa i te raŋi, he haꞌatiꞌa e te ꞌAtua i a Rukifero mo tōtōā mai i a au hai māui-ui. ⁸E toru ōꞌoku ani iŋa ki tōꞌoku Pūꞌoko Haka Tere mo toꞌo i te ꞌati nei mai ruŋa i a au. ⁹ꞌE pē nei i kī mai ai: «ꞌIna. Ko haꞌatiꞌa ꞌana, paꞌi, e au mo māui-ui ōꞌou, mo aŋi-aŋi e koe pē nei ē: hai riva rahi nei ōꞌoku ꞌina aꞌu meꞌe haŋa toe mo haꞌaoromaꞌi i te ꞌati taꞌatoꞌa piri atu, ꞌe mo aŋi-aŋi takoꞌa ōꞌou: te pūai ōꞌoku e ꞌata takeꞌa ena ꞌi te hora hāꞌūꞌū ōꞌoku ki te nuꞌu pūai kore». Pē ira a Ietū i kī mai ai. ꞌO ira e koa rō ꞌana a au ꞌe e teꞌo-teꞌo rō ꞌana o tōꞌoku taꞌe pūai, mo ꞌite e te nuꞌu pē nei ē: hai pūai mau nō o te Kiritō a au e tāvini nei ki a ia. ¹⁰ꞌĒ-ē, e koa rō ꞌana a au ꞌo tōꞌoku taꞌe pūai, ꞌo te vā-vā mai, ꞌo te kore o tāꞌaku meꞌe, ꞌo te tute mai mo tōtōā ꞌe ꞌo te ꞌati taꞌatoꞌa topa mai ꞌi ruŋa i a au ꞌi te ai ōꞌoku ꞌa Ietū Kiritō; ꞌi te hora taꞌe pūai ōꞌoku, paꞌi, ꞌi rā hora mau ꞌā e ꞌata pūai ena a au hai pūai ōꞌona.

¹¹He hape o kōrua i vānaŋa maꞌa-maꞌa atu ai a au o ruŋa i a au; mo kōrua, paꞌi, e vānaŋa riva-riva o ruŋa i a au. Taꞌe te ŋā ⌊ꞌāpōtoro⌋ reo-reo ena ꞌata hau ki a au, ka ai atu taꞌe a au he kope hōnui. ¹²Te meꞌe tāpaꞌo i te taŋata pa he ꞌāpōtoro parautiꞌa, pa he aŋa i te mana ꞌe he tētahi atu meꞌe mo māere e te taŋata aŋa hai pūai o te ꞌAtua, i aŋa tahi rō a au ꞌi roto i a kōrua hai haꞌaoromaꞌi. ¹³Te meꞌe mau nō ꞌāꞌaku i taꞌe aŋa ꞌi roto i a kōrua, aŋa e au ꞌi roto i te tētahi nūnaꞌa taŋata haka moe i te manaꞌu ꞌi ruŋa i a Ietū, he taꞌe no-noꞌi atu e tahi meꞌe, ꞌo ai a au pa he meꞌe paŋahaꞌa e tahi o kōrua mo ꞌamo. ꞌE mo taꞌe au atu o rā meꞌe, ¡ka haka rehu atu!

He manaꞌu o Pauro mo hoki ki Kōrinto

¹⁴Hora nei ko rito ꞌana a au mo oho atu i tōꞌoku toru ara uꞌi i a kōrua, ꞌe, ki tuꞌu atu a au, e ko haŋa a au mo riro he meꞌe paŋahaꞌa e tahi mo kōrua. Taꞌe he meꞌe o kōrua tāꞌaku meꞌe haŋa, ko kōrua mau ꞌā. He matuꞌa, paꞌi, te meꞌe mo haꞌaputu i te moni mo tāꞌana poki, taꞌe ꞌō he poki mo te matuꞌa. ¹⁵ꞌE hai koa a au ka haka pau tahi atu ena i tāꞌaku meꞌe mo kōrua, ꞌe ꞌātā i a au mau nei ꞌā mo te kōrua riva-riva. Mo ꞌata haŋa atu ia ōꞌoku ki a kōrua, ¿he rehe he oho hō te kōrua haŋa iŋa mai?

¹⁶Ko ꞌite riva-riva ꞌana a kōrua pē nei ē: ꞌi te hora era ōꞌoku ꞌi muri i a kōrua ꞌina a au kai ai pa he meꞌe paŋahaꞌa e tahi mo kōrua mo ꞌamo. Ka ai atu pē ira, tētahi o kōrua nā e haꞌaꞌino rō ꞌā pē nei ē: hai mārama-rama ꞌe hai reo-reo a au i toke ai i a kōrua. ¹⁷¿Ka kī ꞌō i haka toke rō mai a au i te kōrua meꞌe māꞌaku hai nuꞌu uŋa atu e au? ¹⁸Ki a Tito a au i uŋa atu ai mo oho atu mo uꞌi i a kōrua, ꞌe ꞌi muri i a ia e tahi taina haka ꞌou. ¿Ka kī ꞌō i toꞌo rō a Tito i te kōrua moni hai reo-reo? ꞌIna. A māua, paꞌi, pē tū haka tere iŋa ꞌā ꞌe e tahi mau nō māua manaꞌu.

¹⁹E manaꞌu ena pēaha a kōrua: te tumu o te meꞌe taꞌatoꞌa pāpaꞌi atu ena e au e kimi ꞌā i te mātou ora ꞌo te reo-reo taꞌatoꞌa tuhi mai e tū ŋā ꞌāpōtoro reo-reo era, ꞌe taꞌe, paꞌi, pē ira. Te tumu mau o te meꞌe taꞌatoꞌa nei, e te taina haŋa rahi ē, mo haka pūai i te kōrua haka moe iŋa i te manaꞌu ꞌi ruŋa i a Ietū. E vānaŋa atu ena, paꞌi, a mātou hai parautiꞌa ꞌi muꞌa o te ꞌAtua, ꞌe pa he nuꞌu o te Kiritō. ²⁰E riꞌa-riꞌa rō ꞌana a au, ka oho atu ena a au uꞌi i a kōrua, te kōrua noho iŋa taꞌe pa he meꞌe haŋa ꞌāꞌaku. ꞌE, mo ai pē ira, taꞌe ia toe tōꞌoku huru pa he meꞌe haŋa e kōrua. Tōꞌoku riꞌa-riꞌa ꞌo ai te tātake ꞌi roto i a kōrua, te mākota, te riri, te ꞌino, te haꞌaꞌino, te vānaŋa taꞌe tano mo te tētahi, te manaꞌu i hau rō atu ki te rua, ꞌe te hihi-hihi o te kōrua noho iŋa. ²¹E riꞌa-riꞌa takoꞌa rō ꞌana a au ꞌo haꞌamā a au i a kōrua ꞌi muꞌa i te ꞌAtua ꞌi tōꞌoku ara oho uꞌi atu i a kōrua, ꞌe he taŋi a au ꞌi te rahi o kōrua mai muꞌa ꞌā e hara e oho mai ena ꞌina he haka rē i te meꞌe taꞌe tano pa he moe i te viꞌe ꞌe i te taŋata taꞌe he kenu ꞌe he viꞌe ꞌāꞌana, ꞌe he tētahi atu meꞌe taꞌe tano pohe e te hakari.

¹He toru ara nei ōꞌoku ka oho atu ena uꞌi i a kōrua. ꞌIna ko rehu: mo ai tāꞌue o te tātake ꞌi roto i a kōrua i te taina mo haka tī-tika ka tuꞌu atu ena a au, e ai e rua ꞌo e toru mataꞌite, pa he meꞌe kī ꞌi ruŋa i te ⌊Pāpaꞌi Moꞌa⌋. ²ꞌI tōꞌoku rua oho iŋa atu era, i kī rō au ki te nuꞌu o roto i a kōrua noho ꞌi roto i te hara ꞌe ki te taꞌatoꞌa pē nei ē: e uꞌi e eꞌa mai roto i te meꞌe taꞌe tano ꞌo haka ūtuꞌa. ꞌE hora nei, ꞌi raꞌe ki tōꞌoku tuꞌu iŋa haka ꞌou atu, he haka ꞌite atu a au: ka tuꞌu atu ena a au, ꞌina a au e ko taꞌe haka ūtuꞌa i te nuꞌu ko te noho iŋa ꞌana ꞌi roto i te hara. ³Pē ira ka ꞌite ena e kōrua: hai parau mau ꞌā o te ⌊Kiritō⌋ a au e vānaŋa atu ena. A ia, paꞌi, kope taꞌe haka rehe-rehe i a ia ꞌi te hora haka tī-tika i a kōrua; kope haka takeꞌa i tōꞌona pūai ꞌi roto i a kōrua. ⁴Ka ai atu i tuꞌu rō a ia pa he kope ꞌina e tahi pūai hora veo era ꞌi ruŋa i te tātaurō, hora nei, hai pūai o te ꞌAtua Matuꞌa e ora ena. Pē ira ꞌana a mātou. E tuꞌu rō ꞌana pa he nuꞌu pūai kore, ꞌe, ꞌi te ai o mātou o te ꞌAtua, hai pūai ōꞌona mātou e ora nei mo tāvini atu ki a kōrua.

⁵E uꞌi kōrua hoki e haka moe parautiꞌa mau rō ꞌana kōrua i te manaꞌu ꞌi ruŋa i a Ietū. Mo ŋaroꞌa e kōrua nā a Ietū Kiritō ꞌi roto i a kōrua, e haka moe parautiꞌa rō ꞌā ia kōrua i te manaꞌu ꞌi ruŋa i a ia ꞌe, takoꞌa, e tano rō ꞌana kōrua ki te mata o te ꞌAtua. ⁶ꞌE, pē hiva ꞌā, ana aŋi-aŋi kōrua: a mātou e tano rō ꞌā ki te mata o te ꞌAtua, ꞌe he ⌊ꞌāpōtoro⌋ parautiꞌa ꞌāꞌana. ⁷E ani rō ꞌana a mātou ki te ꞌAtua ꞌo aŋa a kōrua i te meꞌe taꞌe tano. Te tumu o mātou e ani nei mo aŋa o kōrua i te meꞌe riva-riva taꞌe ꞌō pē nei ē: mo takeꞌa e te nuꞌu e tano rō ꞌana ꞌō te mātou aŋa pa he ꞌāpōtoro. E ani nei mo aŋa o kōrua i te meꞌe riva-riva ka ai atu mo te nuꞌu taꞌe a mātou he ꞌāpōtoro parautiꞌa o te Kiritō. ⁸Mo haꞌatura o kōrua ki te meꞌe parautiꞌa, ꞌina e tahi mātou meꞌe mo ture atu pa he ꞌāpōtoro. Te meꞌe mau nō mo aŋa he hāꞌūꞌū atu. ⁹He koa a mātou mo pūai o kōrua ꞌi te ara parautiꞌa o te ꞌAtua ka ai atu e ai rō ꞌana te nuꞌu manaꞌu ꞌina mātou pūai pa he ꞌāpōtoro. ꞌE he pure he oho a mātou mo kōrua mo tuꞌu ki te roa ena ꞌina e tahi hape.

¹⁰E pāpaꞌi atu ena a au i te parau nei ꞌi raꞌe ki tōꞌoku oho iŋa atu, ꞌo ai, hora ena ōꞌoku ka tuꞌu atu ena, he haka ūtuꞌa atu au i a kōrua hai parau vaꞌai mai e te tātou Pūꞌoko Haka Tere, parau vaꞌai mai mo haka pūai i te nuꞌu haka moe i te manaꞌu ꞌi ruŋa i a ia, taꞌe ꞌō mo haꞌataꞌa i a rāua mai muri i a ia.

¹¹Mo haka mao atu, e kuā taina ē, e koa kōrua ꞌe e noho ꞌina e tahi hape. E haka haŋu kōrua i a kōrua ꞌā, e ai kōrua e tahi mau nō manaꞌu ꞌe e noho ꞌi roto i te haumārū. Pē ira te ꞌAtua, vaꞌai i te haŋa ꞌe i te haumārū, ka haꞌamaitai ena i a kōrua. ¹²E ꞌaroha kōrua ki a kōrua ꞌā hai haŋa. Te taina taꞌatoꞌa ⌊haka moe i te manaꞌu⌋ ꞌi ruŋa i a Ietū ꞌī e ꞌaroha atu ena.

¹³Ka ai ꞌi ruŋa i a kōrua te haŋa o te ꞌAtua ꞌe te riva rahi o te tātou Pūꞌoko Haka Tere ko Ietū Kiritō ꞌi te hora taꞌatoꞌa. ꞌE ka hokorua ka oho nō atu i a kōrua taꞌatoꞌa e te ⌊Vārua Maitai⌋.