He parau raꞌe pāpaꞌi e Pauro ki a
Timoteo
ꞌI te ŋā ara oho era o te ⌊ꞌāpōtoro⌋ nei ko Pauro mo haka ꞌite i te roŋo o te ꞌAtua, nuꞌu kē nuꞌu kē te nuꞌu i hokorua i a ia. E tahi o rā ŋā hokorua he kope ꞌāpī e tahi ko Timoteo, poki o te viꞌe ⌊hūrio⌋ ꞌe o te taŋata ⌊kirieko⌋ (Aŋa o te ꞌĀpōtoro 16.1–3; Rōmano 16.21; 2 Kōrinto 1.1; Fīripo 1.1). ꞌI ruŋa i te parau nei (1.3), e no-noꞌi ꞌā a Pauro ki a Timoteo mo noho ꞌi te kona era ko Ēfeto mo haka kore i te hāpī reo-reo vānaŋa ꞌi roto i te taina o ira (1.6–7; 4.1–5).
ꞌI ruŋa takoꞌa nei e haka manaꞌu ꞌana e Pauro ki a Timoteo i te parautiꞌa nei: te parau ꞌāpī riva-riva o ruŋa i a Ietū mo te taŋata taꞌatoꞌa nō. He hatu ia e Pauro: e pure ki te ꞌAtua mo te taŋata taꞌatoꞌa o te ao ꞌe mo te nuꞌu ra-rahi taꞌatoꞌa. Pē ira he ai te noho iŋa haumārū, ꞌe te nuꞌu ⌊kiritiano⌋ he tano mo noho riva-riva e haꞌatura rō ꞌana ki te ꞌAtua ꞌina he tātake ananake ko te tētahi taŋata (2.1–2).
He haka ꞌite e Pauro ki a Timoteo pē nei ē: mo te riva-riva o te nūnaꞌa taŋata ⌊haka moe i te manaꞌu⌋ ꞌi ruŋa i a Ietū, e ko tano mo pūꞌoko haka tere o rāua te taina nō era i haŋa mo pūꞌoko haka tere. ꞌE he haka aŋi-aŋi e Pauro pē hē te huru o te kope mo pūꞌoko haka tere ꞌe o te nuꞌu taꞌatoꞌa aŋa mo te nūnaꞌa taina (3.1–13). He vānaŋa takoꞌa e Pauro o ruŋa i te haka tere iŋa tano o te taina ꞌi roto i a rāua ꞌā (5.1–6.2). ꞌI ruŋa i te puka nei e ai rō ꞌana te tētahi hāpī kiritiano ko haka poto ꞌā ꞌe ko pāpaꞌi ꞌā pa he pātaꞌu-taꞌu mo maꞌuꞌaꞌau e te taina (2.5–6; 3.16).
I haka mao ai a Pauro i te parau nei e hatu ꞌana ki a Timoteo hai vānaŋa e riva nō mo toꞌo takoꞌa e te nuꞌu taꞌatoꞌa haka moe i te manaꞌu ꞌi ruŋa i a Ietū. Pē nei a Pauro i hatu ai: ꞌE a koe, e te taŋata o te ꞌAtua ē, e tere mai te meꞌe taꞌatoꞌa taꞌe tano. E ai tuꞌu noho iŋa noho iŋa tī-tika, moꞌa ꞌe haꞌatura ki te ꞌAtua. E haka moe e oho koe i te manaꞌu ꞌi ruŋa i a Ietū, e haŋa ki te rua, e ꞌite i te haꞌaoromaꞌi i te ꞌati hai pūai, ꞌe te meꞌe taꞌatoꞌa kī ꞌe aŋa e koe e aŋa hai haumārū (6.11).
1He ꞌaroha
1A au, a Pauro, ⌊ꞌāpōtoro⌋ ꞌa Ietū Kiritō, uŋa e te ꞌAtua, kope toꞌo i a tātou mai roto i te ūtuꞌa o te hara, ꞌe e Ietū Kiritō, kope ꞌi ruŋa i a ia e ŋatu ena te tātou haŋu, 2he ꞌaroha atu ki a koe, e Timoteo ē. A koe pa he poki parautiꞌa mau ꞌana ꞌāꞌaku ꞌi te haka moe iŋa i te manaꞌu ꞌi ruŋa i a Ietū. Ka ai ꞌi ruŋa i a koe te riva rahi, te haka ꞌaroha ꞌe te haumārū o te ꞌAtua, he Matuꞌa o tātou, ꞌe o Ietū Kiritō, he Pūꞌoko Haka Tere o tātou.
E hāpaꞌo kōrua e te hāpī taꞌe tano
3E Timoteo, ka noho nō koe ꞌi Ēfeto, pa he meꞌe ani atu era e au ki a koe ꞌi te hora oho era ōꞌoku ki Mātērōnia, mo kī ōꞌou ki tū nuꞌu kī atu era e au mo taꞌe hāpī o rāua i te meꞌe reo-reo, 4ꞌe mo taꞌe haka roŋo haka ꞌou ki te ꞌaꞌamu taꞌe parautiꞌa o ruŋa i te hakaara. Te meꞌe nō, paꞌi, mo ravaꞌa mai te ŋā meꞌe era he tātake. He māuꞌa ia te hora mo haka ꞌite i te ara parautiꞌa o te ꞌAtua, he meꞌe ana aŋi-aŋi mau nō e ⌊haka moe i te manaꞌu⌋ ꞌi ruŋa i a ia.
5E kī atu ena i te vānaŋa nei ꞌi te haŋa ōꞌoku mo ai o te haŋa ꞌi roto i a tātou, he haŋa eꞌa mai roto i te māhatu maꞌitaki, mai roto i te manaꞌu riva-riva ꞌe mai te haka moe iŋa parautiꞌa i te manaꞌu ꞌi ruŋa i te ꞌAtua. 6ꞌE nā ko oho kē ꞌana te tētahi taŋata mai te ara parautiꞌa, ꞌe ꞌi roto i te tātake tahaŋa i ŋaro ai. 7E haŋa rō ꞌā a rāua mo riro he maꞌori hāpī o te ⌊haka tere iŋa ꞌa Mōtē⌋, ka ai atu ꞌina he aŋi-aŋi riva-riva o ruŋa i te meꞌe kī ꞌe hāpī e rāua pa he nuꞌu ꞌite.
8E ꞌite rō ꞌā e tātou: te haka tere iŋa ꞌa Mōtē, haka tere iŋa riva-riva, ana haka topa a tātou i te manaꞌu mo te aha rā roŋo i vaꞌai mai ai e te ꞌAtua. 9ꞌE ko ꞌite takoꞌa ꞌā e tātou ꞌina kai pāpaꞌi e tahi roŋo mo te nuꞌu aŋa i te meꞌe riva-riva. Te roŋo i pāpaꞌi ai mo te nuꞌu haka ꞌāriŋa, mo te nuꞌu taꞌe haka roŋo, mo te nuꞌu taparahi-taꞌata, mo te nuꞌu hara, mo te nuꞌu taꞌe ꞌite i te moꞌa i te ꞌAtua ꞌe i tāꞌana hāpī parautiꞌa, mo te nuꞌu tiŋaꞌi haka mate i tōꞌona matuꞌa tane ꞌe matuꞌa vahine, mo te nuꞌu taꞌatoꞌa tiŋaꞌi haka mate i te taŋata, 10mo te nuꞌu taiꞌata ꞌe mo te nuꞌu aŋa i te tētahi atu meꞌe pē ira, mo te nuꞌu hiku, mo te nuꞌu hoꞌo i te taŋata, mo te nuꞌu reo-reo, mo te nuꞌu hōrea hai reo-reo, te kī, mo te nuꞌu taꞌatoꞌa aŋa i te meꞌe taꞌe tano ki te hāpī parautiꞌa o te ꞌAtua. 11He hāpī nā o te roŋo riva-riva hopeꞌa o te nui-nui mo haka ꞌite e au, uŋa mai e te ꞌAtua, ki a ia ana haꞌahana-hana.
Te haka ꞌaroha iŋa o te ꞌAtua i a Pauro
12He māuru-uru au ki te kope vaꞌai mai i te haŋu, ko Ietū Kiritō, he Pūꞌoko Haka Tere o tātou, ꞌo te uꞌi mai i a au pa he taŋata e ko haka rē i a ia ki te hora hopeꞌa ꞌe ꞌo te haꞌataꞌa i a au mo aŋa ki a ia, 13ka ai atu ꞌi muꞌa ꞌā e kī rō ꞌana e au i te vānaŋa taꞌe tano mōꞌona, e tute rō ꞌana a au mo tōtōā i tāꞌana nuꞌu, ꞌe e vā-vā takoꞌa rō ꞌana i a rāua. ꞌE te ꞌAtua i haka ꞌaroha nō i a au ꞌo te ai ꞌi rā hora kai haka moe ꞌana a au i te manaꞌu ꞌi ruŋa i a Ietū, ꞌe kai ꞌite ꞌana a au he aha tāꞌaku meꞌe e aŋa era. 14ꞌE i haka ꞌite rō mai e ia i tōꞌona riva ꞌe i tōꞌona haŋa ki a au hai haka poreko ꞌi roto i a au i te haŋa mo haka moe ōꞌoku i te manaꞌu ꞌi ruŋa i a Ietū, ꞌe i te haŋa mo te rua taŋata hai Ietū Kiritō.
15Te vānaŋa ena e kī ena: a Ietū Kiritō i tuꞌu mai ai ki te ao mo haka eꞌa i te nuꞌu mai roto i te ūtuꞌa o te hara, he parautiꞌa, ꞌe te taŋata taꞌatoꞌa e haka noho i te rāua manaꞌu ꞌi ruŋa. ꞌE o te nuꞌu hara, ko au te ꞌata taparahi-taꞌata. 16ꞌE te ꞌAtua i haka ꞌaroha nō mai, ki haka takeꞌa ai e Ietū Kiritō ꞌi ruŋa i a au, kope hara taparahi-taꞌata, i te roa o tōꞌona huru haumārū mo tiaki ki te nuꞌu hara mo huri i te rāua manaꞌu ki a ia. Pē ira a au i ai ai pa he haꞌaauraꞌa mo haka moe o te nuꞌu i te manaꞌu ꞌi ruŋa i a Ietū, mo ravaꞌa e rāua i te ora ꞌāpī ꞌina he hopeꞌa raꞌa vaꞌai e te ꞌAtua. 17¡Ki moꞌa ꞌe ki haꞌahana-hana tahi tātou, ꞌātā ki te hopeꞌa raꞌa, ki te ꞌAriki, he ꞌAtua ꞌina ōꞌona haꞌamata, ꞌina ōꞌona hopeꞌa, ꞌina he mate, ꞌina he takeꞌa, ꞌe e tahi mau nō! Ka ai pē ira.
18-19E Timoteo, e te poki ꞌāꞌaku ē, ꞌī a au he haka rē atu i te roŋo nei: pa he vaꞌai iŋa o te vaꞌehau i a ia ꞌi te hora o te tamaꞌi, ana vaꞌai takoꞌa koe i a koe mo haka ꞌite mo oho o ruŋa i te roŋo parautiꞌa o te ꞌAtua hai pūai o tuꞌu haka moe iŋa i te manaꞌu ꞌi ruŋa i a ia ꞌe hai manaꞌu riva-riva takoꞌa ōꞌou tano ki te meꞌe kī era e te perofeta o ruŋa i a koe ꞌi muꞌa ꞌā. ꞌE nā tētahi nuꞌu, ꞌi te taꞌe haka roŋo ki te rāua manaꞌu riva-riva, ko oho kē ꞌana mai roto i te ara o te ꞌAtua. 20I topa ai te meꞌe nei ki a Hīmēneo ararua ko Arehantaro, ꞌe ko haka rē atu ꞌana e au ki a Rukifero mo aŋi-aŋi e rāua ararua: ꞌina ko kī haka ꞌou i te vānaŋa taꞌe tano mo te ꞌAtua.
2Te pure mo te taŋata taꞌatoꞌa
1ꞌĪ a au he kī atu: e no-noꞌi, e ani, e pure ꞌe e māuru-uru ki te ꞌAtua mo te taŋata taꞌatoꞌa o te ao. 2E pure mo te nuꞌu haka tere i te henua ꞌe mo te nuꞌu ra-rahi taꞌatoꞌa, ki noho riva-riva ai a tātou ꞌina e tahi ture, ki moꞌa ai ꞌe ki haꞌatura ai ki te ꞌAtua. 3Te meꞌe nei he meꞌe riva-riva ꞌe he meꞌe haŋa o te ꞌAtua, kope toꞌo i a tātou mai roto i te ūtuꞌa o te hara ꞌe vaꞌai mai i te ora ꞌāpī ꞌina he hopeꞌa raꞌa. 4A ia e haŋa rō ꞌana mo eꞌa o te taŋata taꞌatoꞌa mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa. E haŋa takoꞌa rō ꞌana te ꞌAtua mo ꞌite o te taŋata i te hāpī parautiꞌa pē nei ē:
5Te ꞌAtua e tahi nō, ꞌe e tahi nō kope haka riva-riva i te taŋata ki te ꞌAtua, ko Ietū Kiritō.
6ꞌO haka ūtuꞌa e te ꞌAtua i te taŋata, i vaꞌai ai a Ietū i a ia mo mate mo ꞌamo e ia i te ūtuꞌa o te hara.
Te meꞌe nei i topa ai ꞌi te hora kī e te ꞌAtua, ꞌe i haka ꞌite rō mai ki a tātou:
a ia e haŋa rō ꞌana mo eꞌa o te taŋata taꞌatoꞌa mai roto i te ūtuꞌa o te hara.
7Mo haka ꞌite mo oho i te roŋo nei i uŋa ai i a au e te ꞌAtua, pa he taŋata maꞌuroŋo ꞌe pa he ⌊ꞌāpōtoro⌋, ꞌe i kī rō mai mo hāpī ki te nuꞌu taꞌe he hūrio o ruŋa i te haka moe iŋa i te manaꞌu ꞌi ruŋa i a Ietū ꞌe o ruŋa i te hāpī parautiꞌa o te ꞌAtua. Te meꞌe nei ꞌāꞌaku e kī atu ena he parautiꞌa, taꞌe he reo-reo.
Te noho iŋa tano mo te taŋata ꞌe mo te viꞌe
8Te meꞌe haŋa ꞌāꞌaku: e pure te ŋāŋata ꞌi te kona taꞌatoꞌa, e maꞌu te rima a ruŋa mo pure ki te ꞌAtua hai māhatu maꞌitaki, taꞌe hai riri ꞌe taꞌe hai ꞌaka-ꞌaka o te manaꞌu.
9ꞌE tāꞌaku meꞌe haŋa mo te ŋā viꞌe: e hāito e haka tano te uru iŋa o te kahu, te ha-hari iŋa o te rauꞌoho, ꞌe te huki iŋa o te piru ana vati-vati i a rāua, ꞌo taꞌe moꞌa rō e te taŋata. 10Te haka tau iŋa mau hai huru o te meꞌe riva-riva aŋa, he meꞌe tano o te ŋā viꞌe haŋa mo moꞌa ꞌe mo haꞌamuri ki te ꞌAtua.
11Te ŋā viꞌe e haka roŋo kiva-kiva i te hāpī o ruŋa i te vānaŋa o te ꞌAtua hai haŋa mo haꞌatura. 12ꞌE ꞌina e au he haꞌatiꞌa i a rāua mo hāpī ꞌe mo haka tere i te ŋāŋata ꞌi roto i te nūnaꞌa taŋata haka moe i te manaꞌu ꞌi ruŋa i a Ietū. Te meꞌe haŋa he haka roŋo kiva-kiva nō o rāua. 13ꞌI raꞌe, paꞌi, a ⌊ꞌĀtamu⌋ i aŋa ai e te ꞌAtua ki a ⌊Eva⌋. 14ꞌE taꞌe ko ꞌĀtamu te meꞌe i haka roŋo ki te reo-reo ꞌa Rukifero, ko Eva; ꞌe, ꞌi te haka roŋo ki rā reo-reo, he hara rō ꞌai. 15Te tano mau: e haka tere te ŋā viꞌe hai manaꞌu o te ꞌAtua ki moꞌa ai e te taŋata. E noho e hāpaꞌo i te rāua ŋā poki, e haka moe e oho i te rāua manaꞌu ꞌi ruŋa i a Ietū, e haŋa e oho ki te rua, ꞌe e haꞌatura e oho ki te ꞌAtua. Pē ira he haka eꞌa e te ꞌAtua mai roto i te ūtuꞌa o te hara.
3Te nuꞌu mo pūꞌoko haka tere
1He parautiꞌa te meꞌe nei: Mo haŋa o te kope e tahi mo riro ōꞌona he pūꞌoko haka tere o te nūnaꞌa taŋata ⌊haka moe i te manaꞌu⌋ ꞌi ruŋa i a Ietū, e haŋa ꞌā ki te aŋa riva-riva. 2Te kope mo pūꞌoko haka tere ꞌina ko ai ōꞌona hape. E ai he kope kai oho ki te rua viꞌe ꞌi tōꞌona hāipo-ipo, ꞌite i te hāito i tāꞌana meꞌe kī ꞌe i tāꞌana meꞌe aŋa, ꞌite mo ture hai meꞌe tano, ꞌe e moꞌa rō ꞌana e te taŋata. E ai he kope toꞌo i te nuꞌu kē ki tōꞌona hare mo hāpaꞌo, ꞌe e ꞌite riva-riva rō ꞌana mo hāpī i te nuꞌu. 3ꞌIna ko ai he kope taꞌero ꞌava ꞌe rava moto. E ai he taŋata māhatu riva ꞌe haumārū, taꞌe nou-nou moni, 4ꞌite mo haka tere riva-riva i tōꞌona hare, ki haꞌatura ai ꞌe ki moꞌa ai e tāꞌana ŋā poki, ꞌe rā ŋā poki ꞌina ko ai e tahi hape. 5Mo taꞌe ꞌite, paꞌi, i te haka tere riva-riva i tōꞌona hare, ¿pē hē ia ana ꞌite mo haka tere i te nūnaꞌa taŋata haka moe i te manaꞌu ꞌi ruŋa i a Ietū?
6ꞌO ira, te taŋata mo pūꞌoko haka tere ꞌina ko ai e haka moe iho ꞌana i te manaꞌu ꞌi ruŋa i a Ietū, ꞌo haka paka rō ꞌe he topa ꞌi ruŋa i a ia te ūtuꞌa vaꞌai era ki a Rukifero. 7E ai takoꞌa he taŋata e moꞌa rō ꞌana e te nuꞌu taꞌe haka moe i te manaꞌu ꞌi ruŋa i a Ietū. Pē ira e ko vānaŋa taꞌe tano o ruŋa i rā kope ꞌe e ko ravaꞌa e Rukifero.
Te ŋāŋata mo ⌊taina hāꞌūꞌū⌋
8Te ŋāŋata toꞌo mo taina hāꞌūꞌū o te nūnaꞌa taŋata haka moe i te manaꞌu ꞌi ruŋa i a Ietū e ai takoꞌa he ŋāŋata e moꞌa rō ꞌā e te nuꞌu, ŋāŋata haka tano i te rāua meꞌe kī, taꞌe he taꞌero, ꞌe taꞌe nou-nou moni. 9Te nuꞌu nei e haka hio-hio i te rāua manaꞌu ki te roŋo parautiꞌa o te ꞌAtua haka ꞌite mai era e ia, ꞌe e ai e maꞌitaki rō ꞌā te rāua māhatu. 10Te meꞌe raꞌe, e uꞌi ana ai te rāua hape, ꞌe mo ai ꞌina, he toꞌo mo taina hāꞌūꞌū o te nūnaꞌa taŋata haka moe i te manaꞌu ꞌi ruŋa i a Ietū.
11ꞌE te rāua ŋā viꞌe, e ai e moꞌa takoꞌa rō ꞌana e te taŋata, he ŋā viꞌe taꞌe haꞌaꞌino, hāito i te rāua meꞌe kī ꞌe i te rāua meꞌe aŋa, ꞌe he ŋā viꞌe haka tano i te rāua meꞌe kī. 12Te kope mo taina hāꞌūꞌū e ai takoꞌa he kope kai oho ki te rua viꞌe ꞌi tōꞌona hāipo-ipo, haka tere riva-riva i tōꞌona hare ꞌe i tāꞌana ŋā poki. 13ꞌE mo aŋa riva-riva o te taina hāꞌūꞌū i tāꞌana aŋa, he ꞌata moꞌa e te taŋata, ꞌe he ꞌata pūai mo haka ꞌite mo oho o ruŋa i te haka moe iŋa i te manaꞌu ꞌi ruŋa i a Ietū Kiritō.
He parautiꞌa haka ꞌite mai e te ꞌAtua
14-15E Timoteo, ko haŋa ꞌana a au ꞌina ko roa hia mo oho atu mo uꞌi i a koe. ꞌO ŋeꞌi tāꞌue, e pāpaꞌi atu ena au i te meꞌe nei, mo ꞌite ōꞌou pē hē te noho iŋa tano o te huaꞌai o te ꞌAtua ora, he nūnaꞌa taŋata haꞌataꞌa e ia māꞌana. O te nuꞌu nei te maꞌu ꞌe te hāpaꞌo i te parautiꞌa. 16He meꞌe nui-nui mau ꞌana te parautiꞌa haka ꞌite mai era e te ꞌAtua pē nei ē:
Te Kiritō i tuꞌu mai ai pa he taŋata,
i haka ꞌite rō mai e te ⌊Vārua Maitai⌋ he Poki o te ꞌAtua,
ꞌe he merahi te mataꞌite.
Te roŋo riva-riva o ruŋa i a ia i haka ꞌite rō ki te hau taꞌatoꞌa,
i haka moe rō te manaꞌu o te taŋata ꞌi ruŋa i a ia,
ꞌe i toꞌo rō e te ꞌAtua ki muri i a ia.
4Te hāpī taꞌe parautiꞌa
1Ko haka ꞌite riva-riva ꞌā e te ⌊Vārua Maitai⌋ pē nei ē: ka hāhine ena te ŋā mahana hopeꞌa era, tētahi taŋata e ko haŋa haka ꞌou mo haka roŋo ki te hāpī parautiꞌa o te ꞌAtua. Ka haka roŋo ena ki te hāpī reo-reo o te tātane 2hāpī e te nuꞌu reo-reo riva a te haho ꞌā ꞌe taꞌe ŋaroꞌa haka ꞌou i te mamae ꞌi roto i a rāua ꞌo te aŋa i te meꞌe taꞌe tano. 3Te nuꞌu nei ꞌina he haꞌatiꞌa i te taŋata mo ⌊hāipo-ipo⌋ ꞌe mo kai i te tētahi kai aŋa e te ꞌAtua. Te nuꞌu ꞌite i te parautiꞌa ⌊haka moe i te manaꞌu⌋ ꞌi ruŋa i a Ietū ko aŋi-aŋi ꞌana pē nei ē: taꞌatoꞌa kai māuru-uru ki te ꞌAtua e tano nō mo kai. 4Taꞌatoꞌa meꞌe aŋa e te ꞌAtua meꞌe riva-riva; mo māuru-uru ki a ia, ꞌina e tahi kai mo taꞌe kai. 5ꞌĀꞌana, paꞌi, i kī, ꞌe o tātou te māuru-uru ki a ia.
6E Timoteo, mo hāpī ōꞌou ki te taina i te ŋā meꞌe nei, he tāvini riva-riva ia koe o Ietū Kiritō. ꞌE te roŋo parautiꞌa o te ꞌAtua ꞌe te maꞌu ōꞌou i te hāpī riva-riva haka ꞌite atu he haka haŋu he oho i a koe.
7ꞌIna koe ko haka roŋo ki te ꞌaꞌamu maꞌa-maꞌa o te taŋata. Ka aŋa ka oho nō koe mo ꞌata pūai ōꞌou pa he taŋata moꞌa ꞌe haꞌatura ki te ꞌAtua. 8Te haka aŋa i te hakari mo haka hio-hio e hauhaꞌa rō ꞌā, ꞌe te ꞌite mo moꞌa ꞌe mo haꞌatura ki te ꞌAtua ꞌata hau rō atu i te hauhaꞌa, ꞌe taꞌe mo te noho iŋa ꞌi te ao nō nei, pē ira ꞌana mo te noho iŋa ka oho mai ena. 9He parautiꞌa te meꞌe nei; e haka roŋo te taŋata taꞌatoꞌa. 10Mo ira, e Timoteo ē, e aŋa ꞌe e haka ꞌuhu e oho nei a tātou ꞌi te aŋa o te ꞌAtua ora, ꞌo te ꞌite e tātou e haka tano tahi rō i tāꞌana meꞌe kī. ꞌĀꞌana, paꞌi, te haka eꞌa i te taŋata taꞌatoꞌa mai roto i te ūtuꞌa o te hara ꞌe te vaꞌai i te ora ꞌāpī ꞌina he hopeꞌa raꞌa ana haka moe i te manaꞌu ꞌi ruŋa i a Ietū.
11He ŋā meꞌe nei te meꞌe ꞌāꞌau mo hāpī ꞌe mo kī mo aŋa e te taina. 12E uꞌi ꞌo taꞌe haka au rō atu ꞌo te ai ōꞌou he taŋata ꞌāpī. Hai huru o tuꞌu vānaŋa ꞌe o tuꞌu noho iŋa, hai haŋa ōꞌou ki te rua, hai huru o tuꞌu haka moe iŋa i te manaꞌu ꞌi ruŋa i te ꞌAtua ꞌe hai noho iŋa hara kore ana haka takeꞌa ki te tētahi nuꞌu haka moe i te manaꞌu ꞌi ruŋa i a Ietū pē hē takoꞌa a rāua ana ai.
13ꞌI tuꞌu tiaki iŋa mai, e taiꞌo koe ki te taŋata i te ⌊Pāpaꞌi Moꞌa⌋, e hāpī ꞌe e haka haŋu koe i te taina. 14E Timoteo, e haka hio-hio e oho koe ꞌi te aŋa o te ꞌAtua hai meꞌe hauhaꞌa vaꞌai atu era e ia ꞌi te hora haka topa atu era i te rima a ruŋa i tuꞌu pūꞌoko e te ŋā kope pūꞌoko haka tere era koia ko kī atu i tāꞌana roŋo hai Vārua Maitai.
15E uꞌi e aŋa riva-riva te ŋā meꞌe kī atu ena e au, ki takeꞌa ai e te nuꞌu taꞌatoꞌa pē hē e aŋa e oho ena koe i te meꞌe haŋa o te ꞌAtua. 16E uꞌi riva-riva te huru o tuꞌu noho iŋa ꞌe te huru o tuꞌu hāpī iŋa i te rua; e haka hio-hio e oho nō koe i te ŋā meꞌe taꞌatoꞌa ena. Mo aŋa ōꞌou pē ira, taꞌe ko koe nō te meꞌe ka eꞌa ena mai roto i te ūtuꞌa o te hara, pē ira ꞌana te nuꞌu haka roŋo atu.
5He haka tere iŋa tano
1Ana kī tāꞌue koe i te hape o te taŋata paꞌari, e kī hai moꞌa, pa he kī iŋa ōꞌou ki tuꞌu matuꞌa tane. Ki te ŋāŋata ꞌāpī e kī pa he kī iŋa ōꞌou ki tuꞌu taina. 2Ki te ŋā viꞌe paꞌari e moꞌa koe pa he matuꞌa vahine ōꞌou; ꞌe ki te ŋā viꞌe ꞌāpī e moꞌa ꞌe e haŋa pa he taina vahine ōꞌou.
3E hāꞌūꞌū ki te viꞌe hove ꞌina he huaꞌai ōꞌona mo hāpaꞌo i a ia. 4ꞌE mo ai tāꞌue te poki ꞌe te makupuna mo hāpaꞌo i rā hove, ko rāua te meꞌe raꞌe mo hāꞌūꞌū i a ia. Pē ira he haka hoki ki rā matuꞌa te haŋa vaꞌai era e ia ki a rāua. He meꞌe nei te meꞌe haŋa o te ꞌAtua.
5Te viꞌe hove o roto i te taina kope kore mo hāpaꞌo i a ia he ŋatu nō te haŋu ki te ꞌAtua mo hāꞌūꞌū. ꞌO ira ka pō ka ꞌōtea e pure e ani ena. 6ꞌE te viꞌe hove haŋa ki te meꞌe o te ao nō nei pa he viꞌe mate ka ai atu e ora nō ꞌā. 7E kī ki te taina taꞌatoꞌa: e hāpaꞌo te rāua huaꞌai, ꞌo tuhi e te nuꞌu ꞌi te taꞌe hāpaꞌo i a rāua. 8Te parautiꞌa, te taŋata taꞌe hāpaꞌo i tōꞌona huaꞌai ꞌe i tāꞌana huaꞌai mau ꞌā e hārui ꞌana hai tuaꞌivi i te hāpī parautiꞌa o te ꞌAtua, ꞌe tōꞌona māhatu ꞌata hau ꞌi te rake-rake ki te nuꞌu ꞌina he ⌊haka moe i te manaꞌu⌋ ꞌi ruŋa i te ꞌAtua; te nuꞌu era, paꞌi, e hāpaꞌo rō ꞌana i te rāua huaꞌai.
9Te viꞌe hove mo haka pāpaꞌi ꞌi ruŋa i te parau o te ŋā viꞌe hove mo hāpaꞌo e te taina haka moe i te manaꞌu ꞌi ruŋa i a Ietū he viꞌe mai te ono ꞌahuru matahiti pe ruŋa, ꞌe he viꞌe, ꞌi tōꞌona hāipo-ipo, kai taiꞌata. 10Te viꞌe nei he viꞌe ko ꞌite tahi ꞌana e te taŋata i tōꞌona huru riva, hāpaꞌo riva-riva i tāꞌana ŋā poki, hāpaꞌo i te nuꞌu tuꞌu ki tōꞌona hare, haka hopu i te vaꞌe o te nuꞌu haka moe i te manaꞌu ꞌi ruŋa i a Ietū, ꞌe hāꞌūꞌū ki te nuꞌu taꞌatoꞌa ai o te ꞌati. He viꞌe aŋa mau ꞌā a ia i te meꞌe haŋa o te ꞌAtua.
11ꞌE te viꞌe hove matahiti taꞌe rahi he viꞌe mo taꞌe haka pāpaꞌi ꞌi ruŋa i rā parau, ꞌo topa pē nei ē: pe muꞌa ka oho ena, ꞌata pūai tōꞌona haŋa ki tāꞌana o te tane ki tōꞌona haŋa mo tāvini ki te ⌊Kiritō⌋, ꞌe he haŋa mo ⌊hāipo-ipo⌋ haka ꞌou. 12Mo hāipo-ipo tāꞌue, he hape ki te hōrea aŋa ꞌi te hora haka pāpaꞌi i a ia. 13ꞌE taꞌe ꞌo ira nō, ꞌo māhani i te hupe-hupe, ꞌo oho ki hare era ki hare era, ꞌo haꞌamata ꞌo haꞌaꞌino i te rua, ꞌe ꞌo ꞌāmui ki roto i te ture kē koia ko kī i te vānaŋa taꞌe tano.
14ꞌO ira a au e haŋa nei ki te ŋā viꞌe ꞌāpī hove mo hāipo-ipo, mo ai o te ŋā poki ꞌe mo ai he ŋā viꞌe maꞌu riva-riva i te rāua hare ꞌe i te rāua huaꞌai, ꞌo ai te meꞌe taꞌe tano mo kī o ruŋa i a rāua e te nuꞌu taꞌe haŋa ki te ꞌAtua. 15Te tētahi ŋā viꞌe hove, paꞌi, ko haka tapa ꞌā i a rāua mai te ara o te ꞌAtua ꞌe ko oho ꞌana a roto i te ara o Rukifero.
16Mo ai ꞌi roto i te huaꞌai o te viꞌe haka moe i te manaꞌu ꞌi ruŋa i a Ietū te ŋā viꞌe hove, e hāꞌūꞌū ꞌe e hāpaꞌo e rā viꞌe i rā ŋā hove, ꞌo ai he paŋahaꞌa haka ꞌou e tahi mo ꞌamo e te nūnaꞌa taŋata haka moe i te manaꞌu ꞌi ruŋa i a Ietū, ki topa ai te hora o te nuꞌu era mo hāꞌūꞌū ki te viꞌe hove ꞌina he kope mo hāpaꞌo i a ia.
17Te nuꞌu pūꞌoko haka tere o te nūnaꞌa taŋata haka moe i te manaꞌu ꞌi ruŋa i a Ietū aŋa riva-riva i te rāua aŋa e moꞌa ꞌe e ꞌauhau riva-riva e te taina. ꞌE te nuꞌu raꞌe mau mo moꞌa ꞌe mo ꞌauhau riva-riva ko te ŋā pūꞌoko haka tere ena te rāua aŋa he haka ꞌite i te vānaŋa o te ꞌAtua. 18Pē nei, paꞌi, te ⌊Pāpaꞌi Moꞌa⌋ e kī ena: «ꞌIna ko here te ŋutu o te ꞌuei haka rei-rei tariko». ꞌE e kī takoꞌa rō ꞌā: «E ꞌauhau te taŋata aŋa».
19ꞌIna koe ko haka roŋo ki te meꞌe taꞌe tano kī atu o ruŋa i te nuꞌu pūꞌoko haka tere. Ana haka roŋo iho koe e ai e rua ꞌo e toru mataꞌite.
20ꞌE mo ai ko hara ꞌana ꞌe ꞌina he haka tapa mai roto i rā meꞌe, e ture ꞌi muꞌa o te nuꞌu taꞌatoꞌa haka moe i te manaꞌu ꞌi ruŋa i a Ietū, ki riꞌa-riꞌa ai te tētahi nuꞌu pūꞌoko haka tere.
21ꞌĪ a au he kī atu: e aŋa koe i te meꞌe hatu atu ena o ruŋa i te nuꞌu pūꞌoko haka tere. Ana haka tī-tika koe e tahi o rāua, ꞌina ko uꞌi ko ai a ia ana ture iho i tōꞌona hara. ꞌIna ko rehu i a koe: nā e uꞌi atu ena te ꞌAtua, a Ietū Kiritō ꞌe te merahi. 22ꞌIna koe ko veve-veve mo haꞌataꞌa ꞌe mo haꞌamaitai i te kope mo te aŋa o te ꞌAtua hai haka puā i tuꞌu rima a ruŋa, ꞌo ai e hara rō ꞌā kai ꞌite hia koe; pē ira he hara takoꞌa a koe. E hāpaꞌo koe ꞌo hara.
23E Timoteo, ꞌi te ai meꞌe rava māui-ui manava koe, ꞌina ko unu i te vai nō, e unu ꞌiti-ꞌiti takoꞌa hai vino.
24Ana haꞌataꞌa koe i te taŋata mo te aŋa o te ꞌAtua, ꞌina ko rehu i a koe: te hara o te tētahi nuꞌu e ꞌite rō ꞌana e tātou ka ai atu kai ture ia, ꞌe te hara o te tētahi atu nuꞌu e ture e ꞌite iho ena e tātou. 25Pē ira takoꞌa ꞌā e ai rō ꞌana te meꞌe riva-riva aŋa e te nuꞌu e ꞌite rō ꞌana e te taꞌatoꞌa, ꞌe e ai rō ꞌana te meꞌe riva-riva aŋa ꞌina he ꞌite e te nuꞌu. Pe muꞌa ka oho ena he ꞌite.
61E Timoteo, e haka ꞌite ki te nuꞌu ꞌekaravo ⌊haka moe i te manaꞌu⌋ ꞌi ruŋa i a Ietū: e moꞌa i te taŋata haka aŋa i a rāua. Mo taꞌe moꞌa o rāua, he kī e te nuꞌu i te vānaŋa taꞌe tano o ruŋa i te tātou hāpī ꞌe o ruŋa i te ꞌAtua. 2ꞌE mo ai te taŋata haka aŋa i a rāua he kope haka moe i te manaꞌu ꞌi ruŋa i a Ietū, ꞌina ko taꞌe moꞌa ꞌo te ai he taina haka moe i te manaꞌu ꞌi ruŋa i a Ietū. Te tano mau: e ꞌata aŋa riva-riva ꞌo te ai te kope era ki a ia e tāvini era he taina haŋa rahi.
Te hauhaꞌa parautiꞌa
E Timoteo, ka hāpī te meꞌe pāpaꞌi atu ena e au ꞌe ka kī ki te taina: hai meꞌe nei a rāua ana haka tere. 3Mo hāpī o te kope e tahi i te meꞌe kē ꞌe ꞌina he haŋa ki te hāpī parautiꞌa o te tātou Pūꞌoko Haka Tere ko Ietū Kiritō ꞌe ki te hāpī maꞌu e tātou, 4te kope nei ia he kope manaꞌu i a ia nō te tano, ꞌe te parautiꞌa mau, ꞌina e tahi ꞌāꞌana meꞌe i ꞌite. Pa he māui-ui e tahi ōꞌona te haka tumu i te tātake o ruŋa i te meꞌe hauhaꞌa-ꞌore. Pē ira he poreko te mākota, te taꞌe au, te vā-vā, te manaꞌu ꞌino, 5ꞌe te rava ture ꞌi roto i te nuꞌu ꞌina he manaꞌu riva-riva toe ꞌe ꞌina he aŋi-aŋi haka ꞌou he aha te meꞌe he parautiꞌa ꞌe he aha te meꞌe he reo-reo. Mo rāua te hāpī o ruŋa i te ꞌAtua he rāveꞌa e tahi mo ꞌono. 6Te parautiꞌa, e ai mau rō ꞌana te ꞌono o te hāpī o ruŋa i te ꞌAtua, ꞌe rā ꞌono mo te taŋata e koa rō ꞌana ꞌi tāꞌana meꞌe ai. 7ꞌIna, paꞌi, e tahi meꞌe maꞌu e tātou ꞌi te rima e poreko ena, ꞌe ꞌina e tahi meꞌe maꞌu ka mate ena. 8Mo ai o te tātou meꞌe mo kai ꞌe o te kahu mo uru, e koa ꞌo te ai i a tātou te ŋā meꞌe nei. 9ꞌE te nuꞌu haŋa mo ꞌono e haka ꞌatu rō e te rauhuru meꞌe mo hara. Pē ira he ravaꞌa riva-riva i a rāua e te pohe ki te meꞌe taꞌe tano ꞌe maꞌa-maꞌa, he meꞌe mo maꞌu i a rāua ki roto i te ꞌati ꞌe ki roto i te ūtuꞌa. 10Te nou-nou ki te moni he tumu o te rauhuru atu meꞌe taꞌe tano. ꞌE nā e ai rō ꞌana te nuꞌu, ꞌi te pohe rahi ki te moni, ko haka tapa ꞌana i te manaꞌu mai ruŋa i te ꞌAtua, ꞌe ko ꞌamo ꞌana meꞌe rahi nō atu ꞌati i kimi e rāua ꞌā.
Te haka tere iŋa tano mo Timoteo
11ꞌE a koe, e te taŋata o te ꞌAtua ē, e tere mai te ŋā meꞌe taꞌatoꞌa nei. Tuꞌu noho iŋa e ai noho iŋa tī-tika, moꞌa ꞌe haꞌatura ki te ꞌAtua. E haka moe e oho koe i te manaꞌu ꞌi ruŋa i a Ietū, e haŋa ki te rua, e ꞌite i te haꞌaoromaꞌi i te ꞌati hai pūai, ꞌe te meꞌe taꞌatoꞌa kī ꞌe aŋa e koe e aŋa hai haumārū. 12E vaꞌai tahi koe i a koe mo hio-hio mo oho nō o tuꞌu manaꞌu ꞌi ruŋa i te ꞌAtua ꞌe mo aŋa ki a ia, pa he vaꞌai iŋa ena o te vaꞌehau i a ia ki te mate ꞌi te hora o te tamaꞌi. ꞌIna ko haka pakoꞌo mai tuꞌu rima te ora ꞌāpī ꞌina he hopeꞌa raꞌa vaꞌai atu e te ꞌAtua. Mo ravaꞌa i rā meꞌe i toꞌo ai i a koe e te ꞌAtua ꞌi te hora kī ōꞌou, ꞌi muꞌa i te rahi o te mataꞌite, i tuꞌu haka moe i te manaꞌu ꞌi ruŋa i a Ietū.
13E Timoteo, he kī atu au ꞌi muꞌa i te ꞌAtua, i a ia te ora o te meꞌe taꞌatoꞌa, ꞌe ꞌi muꞌa i a Ietū Kiritō, kī i te parautiꞌa ꞌi muꞌa o Pontio Pirato: 14e aŋa tahi koe i tāꞌaku meꞌe kī atu ena, ꞌe e noho e oho koe ꞌina e tahi hape ꞌātā ki te hoki iŋa mai o te tātou Pūꞌoko Haka Tere ko Ietū Kiritō 15ꞌi te hora kī e te ꞌAtua.
Te ꞌAtua e tahi mau nō. Ki a ia ana haꞌahana-hana; i a ia, paꞌi, te parau o te meꞌe taꞌatoꞌa. A ia he ꞌAriki o te ꞌariki, ꞌe he Pūꞌoko Haka Tere o te pūꞌoko haka tere taꞌatoꞌa. 16ꞌIna o ruŋa i a ia te mate; ꞌi roto i te mōrī ꞌana-ꞌana e noho ena ꞌe ꞌi te pūai o rā mōrī e ko hāhine e tahi kope. ꞌIna ꞌā e tahi taŋata i takeꞌa ꞌe mo takeꞌa takoꞌa i a ia. Ki haꞌamuri ꞌe ki haꞌahana-hana tātou i te ꞌAtua; i a ia, paꞌi, te parau ꞌe te pūai mo haka tere i te meꞌe taꞌatoꞌa ꞌātā ki te hora hopeꞌa. ⌊ꞌĀmene⌋.
17Ki te nuꞌu ꞌono o te ao nei e kī: ꞌina ko manaꞌu i a rāua mau nō te tano, ꞌe ꞌina ko haka noho i te rāua manaꞌu ꞌi ruŋa i te hauhaꞌa; te hauhaꞌa, paꞌi, e ko roa he pau tahi. Te meꞌe o rāua mo aŋa he haka noho i te manaꞌu ꞌi ruŋa i te ꞌAtua. ꞌĀꞌana, paꞌi, te vaꞌai mai ki a tātou i te meꞌe taꞌatoꞌa hai mau mo koa o tātou. 18E kī takoꞌa: e haka rahi te rāua meꞌe riva-riva aŋa ki te rua, mo ꞌono takoꞌa o rāua ꞌi te aŋa iŋa i rā ŋā meꞌe, ꞌe e vaꞌai hai riva to te tētahi o te hauhaꞌa. 19Pē ira he haꞌaputu ꞌi ruŋa i te raŋi te hauhaꞌa parautiꞌa mo te rāua noho iŋa pe muꞌa ka oho ena, ꞌe te rāua noho iŋa ꞌi te ao nei he tano ki te noho iŋa haŋa e te ꞌAtua.
He hatu iŋa hopeꞌa ꞌe he ꞌaroha
20E Timoteo, e maꞌu riva-riva te meꞌe vaꞌai atu e te ꞌAtua. ꞌIna koe ko haka roŋo ki te vānaŋa hauhaꞌa-ꞌore o te ao nei ꞌe ki te vānaŋa ꞌina he tano ki te hāpī parautiꞌa o ruŋa i te ꞌAtua hāpī e te tētahi pa he parautiꞌa. 21Nā e ai rō ꞌana, paꞌi, te nuꞌu, ꞌi te haka roŋo ki rā hāpī, ko haka tapa ꞌana i a rāua mai roto i te hāpī parautiꞌa.
Ka ai ꞌi ruŋa i a kōrua taꞌatoꞌa te riva rahi o te ꞌAtua.