He parau raꞌe pāpaꞌi e Pauro ki te taina o
Tētārōnika
ꞌI te rua ara oho haka ꞌite o Pauro i te roŋo o te ꞌAtua i tuꞌu ai ki Tētārōnika, kona hopeꞌa o te nui-nui o Mātērōnia. He haka ꞌite ki te nuꞌu o ira i te parau ꞌāpī riva-riva o ruŋa i a Ietū. I ŋaroꞌa era e te nuꞌu nei, he toꞌo hai koa i te hāpī nei ꞌe he ⌊haka moe i te manaꞌu⌋ ꞌi ruŋa i a Ietū. Pē ira i poreko ai te nūnaꞌa taina o te kona nei ko Tētārōnika (Aŋa o te ꞌĀpōtoro 17.1–9). Ko ꞌāvaꞌe atu ꞌā he manaꞌu a Pauro mo hoki mo uꞌi i te taina ⌊kiritiano⌋ o ira (1.2–4). ꞌI te taꞌe ravaꞌa i te hora mo oho he uŋa i a Timoteo. I hoki era a Timoteo e maꞌu rō ꞌana i te parau ꞌāpī o ruŋa i rā ŋā taina, he manaꞌu a Pauro mo pāpaꞌi i te parau nei.
ꞌI te haꞌamata iŋa he ꞌaroha a Pauro koia ko māuru-uru ki te ꞌAtua mo te ŋā taina nei o Tētārōnika. Hai rāua, paꞌi, i ꞌite i oho ai o ruŋa i a Ietū a te meꞌe rahi nō atu kona o ira (1.8). He māuru-uru a Pauro ꞌo te toꞌo o te ŋā taina nei o Tētārōnika i te roŋo o ruŋa i a Ietū pa he meꞌe o te ꞌAtua, ꞌe taꞌe ꞌō pa he meꞌe o te taŋata (2.13). ꞌI te ꞌite ia e Pauro pē nei ē: te noho iŋa o te taina o Tētārōnika noho iŋa tano ki te mata o te ꞌAtua, he haka pūai he oho e Pauro i te rāua manaꞌu, ꞌe he kī he aha he aha te rāua meꞌe mo aŋa ki noho ki oho nō ai a rāua pē ira (4.1–12). Te meꞌe haka nui-nui e Pauro ꞌi ruŋa i te parau nei he koa iŋa ōꞌona ꞌo te takeꞌa i te pūai o te ⌊roŋo riva-riva o ruŋa i a Ietū⌋ i te taina o Tētārōnika, ka ai atu e rahi rō ꞌā te ꞌati topa ꞌi ruŋa i a rāua.
Te nuꞌu taꞌatoꞌa kiritiano o Tētārōnika ko ꞌite riva-riva ꞌana: a Ietū i mate rō ꞌe i ora haka ꞌou rō mai te mate, ꞌe e tiaki ꞌana ki tōꞌona hoki iŋa mai. He haka haŋu e Pauro i te nuꞌu nei mo haka noho mo oho nō i te rāua manaꞌu ꞌi ruŋa i a Ietū ꞌātā ki tōꞌona hoki iŋa mai. ꞌE he haka manaꞌu e Pauro pē nei ē: ꞌina e tahi nuꞌu i ꞌite a hē ka hoki mai a Ietū. Ka tuꞌu mai ena, paꞌi, ꞌi te mahana ꞌina e tahi taŋata i ꞌite, pa he tuꞌu iŋa o te toke-toke ꞌi te pō (5.2). ꞌO ira i hatu ai e Pauro ki te nuꞌu o Tētārōnika mo ꞌara o te mata ꞌe mo noho ꞌi te ara tano haŋa e te ꞌAtua, ꞌe taꞌe ꞌō pa he tētahi nuꞌu taꞌe manaꞌu ki te hoki iŋa mai o te ⌊Kiritō⌋ (5.6).
He ꞌaroha ia a Pauro ki te nuꞌu o Tētārōnika koia ko kī pē nei ē: «ꞌI te taꞌatoꞌa nō hora, e koa ꞌe e pure kōrua» (5.16–17).
1He ꞌaroha
1A au, a Pauro, a Tirivano ꞌe a Timoteo he ꞌaroha atu ki a kōrua ki te nuꞌu taꞌatoꞌa o Tētārōnika haꞌamuri ki te ꞌAtua Matuꞌa ꞌe ki te Pūꞌoko Haka Tere ko Ietū Kiritō. Ka ai ꞌi ruŋa i a kōrua te riva rahi ꞌe te haumārū o te ꞌAtua.
He māuru-uru
2He māuru-uru nō te mātou aŋa ki te ꞌAtua mo kōrua ꞌe, ꞌi roto i te mātou pure, e no-noꞌi takoꞌa rō ꞌā mo kōrua. 3E māuru-uru nei ꞌi te meꞌe era he manaꞌu nō te mātou aŋa pē hē kōrua e aŋa ena ki te ꞌAtua, ꞌo te ⌊haka moe i te manaꞌu⌋ ꞌi ruŋa i a Ietū, pē hē e hāꞌūꞌū ena ki te rua, ꞌo te rahi o te kōrua haŋa mo rāua, ꞌe pē hē e haꞌaoromaꞌi ena hai pūai ꞌi te hora o te ꞌati, ꞌo te ai e tiaki e oho rō ꞌā kōrua ki te hoki iŋa mai o te tātou Pūꞌoko Haka Tere ko Ietū Kiritō. 4Ko ꞌite ꞌana e mātou, e kuā taina haŋa o te ꞌAtua ē, ko haꞌataꞌa ꞌana kōrua e te ꞌAtua māꞌana. 5I haka ꞌite atu era, paꞌi, mātou i te ⌊roŋo riva-riva o ruŋa i a Ietū Kiritō⌋, he haka moe rō ꞌai kōrua i te manaꞌu ꞌi ruŋa i a ia, ꞌe taꞌe nō ꞌo te ŋaroꞌa e kōrua i te mātou vānaŋa, ꞌo te takeꞌa takoꞌa, hai meꞌe aŋa e mātou hai pūai o te ⌊Vārua Maitai⌋, te pūai o te ꞌAtua ꞌi ruŋa i a mātou, ꞌe ꞌo te ꞌite e kōrua: mo mātou te meꞌe vānaŋa atu era he parautiꞌa mau ꞌā, he takeꞌa e kōrua pē hē mātou e noho era ꞌi roto i a kōrua mo hāꞌūꞌū atu.
6ꞌE a kōrua ko haka tano ꞌana i te kōrua noho iŋa pa he noho iŋa ꞌana o mātou, ꞌe pa he noho iŋa takoꞌa o te tātou Pūꞌoko Haka Tere ko Ietū Kiritō. ꞌE, ka ai atu e topa rō atu ꞌana te ꞌati ꞌi ruŋa i a kōrua, i toꞌo nō kōrua i te roŋo nei mo kōrua hai koa vaꞌai atu e te Vārua Maitai. 7Pē ira te kōrua noho iŋa i ai ai he meꞌe mo aŋi-aŋi pē hē te noho iŋa tano ki te mata o te ꞌAtua mo te nuꞌu taꞌatoꞌa haka moe i te manaꞌu ꞌi ruŋa i a Ietū o te ŋā kona era o Mātērōnia ꞌe o Ākāia. 8Hai kōrua te roŋo riva-riva o ruŋa i a Ietū Kiritō i ꞌite i oho ai a te kona taꞌatoꞌa o Mātērōnia ꞌe o Ākāia, ꞌe taꞌe nō a te ŋā kona nei, a te kona taꞌatoꞌa. Te nuꞌu o te ŋā kona nei e ꞌite rō ꞌana pē nei ē: e haka moe rō ꞌana kōrua i te manaꞌu ꞌi ruŋa i te ꞌAtua. ¿Mo aha ia a mātou ana vānaŋa haka ꞌou o ruŋa i a kōrua ki a rāua? Taꞌe he parau ꞌāpī mo te nuꞌu era. 9Kona nō era, paꞌi, o mātou e tuꞌu era, e ꞌaꞌamu rō ꞌā te nuꞌu he aha te meꞌe i topa ki a kōrua hora tuꞌu atu era o mātou, pē hē kōrua i hārui ai hai tuaꞌivi i te ꞌītoro mo haꞌamuri mau nō ki te ꞌAtua ora ꞌe parautiꞌa. 10ꞌE e ꞌaꞌamu takoꞌa rō ꞌana rā nuꞌu pē hē kōrua e tiaki ena ki te hoki iŋa mai mai te raŋi o tāꞌana Poki ko Ietū, kope haka ora e te ꞌAtua mai te mate, ꞌe kope haka eꞌa i a tātou mai te ūtuꞌa taparahi-taꞌata, ūtuꞌa nā e tuꞌu rō mai.
2He manaꞌu ki te meꞌe i aŋa ꞌi Tētārōnika
1A kōrua mau ena, e te taina ē, e ꞌite rō ꞌana pē nei ē: kai māuꞌa te noho iŋa atu era o mātou ꞌi muri i a kōrua. 2Ko ꞌite ꞌana e kōrua: ꞌi raꞌe ki te tuꞌu atu o mātou ki a kōrua ena i vā-vā ꞌe i tōtōā rō mai i a mātou ꞌi te kona era ko Fīripo. Ka ai atu pē ira, i hāꞌūꞌū nō mai te ꞌAtua mo haka ꞌite atu ki a kōrua i te ⌊roŋo riva-riva o ruŋa i a Ietū⌋ taꞌe e riꞌa-riꞌa ꞌe taꞌe e tapa atu i te nuꞌu riri mo mātou. 3Te meꞌe haka ꞌite atu era, paꞌi, e mātou, he parautiꞌa, ꞌe taꞌe hai manaꞌu taꞌe tano ꞌo hai manaꞌu mo reo-reo i haka ꞌite atu ai. 4E vānaŋa ena mātou pa he taŋata tano ki te mata o te ꞌAtua ꞌe haꞌataꞌa e ia mo haka ꞌite i tāꞌana roŋo riva-riva o ruŋa i a Ietū, ꞌe taꞌe ꞌō mo koa o te taŋata; mo koa o te ꞌAtua, kope ꞌite i te meꞌe tano ꞌe i te meꞌe taꞌe tano ꞌi roto i te mātou māhatu.
5Ko ꞌite ꞌana e kōrua, kai vānaŋa atu mātou hai vānaŋa nehe-nehe mo haka koa atu ꞌo mo ravaꞌa moni. He ꞌAtua te mataꞌite o te meꞌe nei. 6ꞌE, ki te hora hopeꞌa, ꞌina kai aŋa a mātou e tahi meꞌe hai manaꞌu mo haka paka o kōrua ꞌo o te tētahi atu nuꞌu i a mātou, 7ka ai atu e tano rō ꞌana, pa he ⌊ꞌāpōtoro⌋ ꞌa Ietū, mo haka ꞌite atu ko ai a mātou. Hora era o mātou ꞌi muri i a kōrua e aŋa atu era hai haŋa, pa he matuꞌa vahine e hāpaꞌo ena i tāꞌana ŋā poki. 8Pē ira te haŋa o mātou ki a kōrua. ꞌO ira te meꞌe i aŋa o mātou ꞌi roto i a kōrua taꞌe nō he haka ꞌite atu i te ⌊roŋo riva-riva o te ꞌAtua⌋, i aŋa takoꞌa rō i te meꞌe nō era mo hāꞌūꞌū atu, ꞌi te rahi o te mātou haŋa mo kōrua.
9E te taina, ko ꞌite ꞌana a kōrua pē hē mātou e aŋa era, ka pō ka ꞌōtea, mo ravaꞌa moni mo te mātou meꞌe hape hora era o mātou ꞌi muri i a kōrua, ꞌo ai mātou he meꞌe paŋahaꞌa e tahi mo ꞌamo e kōrua. 10ꞌE a kōrua he mataꞌite, ꞌe pē ira ꞌana te ꞌAtua: te mātou noho iŋa ꞌi muri i a kōrua i te nuꞌu ⌊haka moe i te manaꞌu⌋ ꞌi ruŋa i a Ietū, noho iŋa tī-tika, tano ki te mata o te ꞌAtua, ꞌe ꞌina e tahi hape mo tuhi e te taŋata. 11-12Ko ꞌite takoꞌa ꞌana a kōrua pē hē a mātou i haka haŋu ꞌe i haka koa atu ai i a kōrua pa he meꞌe aŋa e te matuꞌa tane ki tāꞌana ŋā poki. Ko hatu atu ꞌā e mātou mo ai o te kōrua noho iŋa, noho iŋa tano o te nuꞌu o te ꞌAtua, kope kī mai ꞌi roto i te tātou māhatu mo oꞌo ki roto o te nūnaꞌa taŋata haka tere e ia, ꞌe ki roto i tōꞌona nui-nui.
13E māuru-uru rō ꞌā a mātou ki te ꞌAtua ꞌo te ai hora ŋaroꞌa era e kōrua i te roŋo haka ꞌite atu e mātou o ruŋa i a ia, he ꞌite e kōrua pē nei ē: he roŋo ꞌāꞌana, taꞌe ꞌō he roŋo o te taŋata. ꞌE he roŋo parautiꞌa mau ꞌā o te ꞌAtua, roŋo aŋa i te meꞌe haŋa e ia ꞌi roto i a kōrua i te nuꞌu haka moe i te manaꞌu ꞌi ruŋa i a Ietū.
14E te taina, te ꞌati topa atu era, he tute atu mo tōtōā i a kōrua e te nuꞌu o te kōrua henua, i topa takoꞌa rō ki te nūnaꞌa taŋata haka moe i te manaꞌu ꞌi ruŋa i a Ietū o te kona era ko Hūrea. A rāua, paꞌi, i tute takoꞌa rō e te nuꞌu o te rāua henua, he ⌊hūrio⌋, mo tōtōā. 15O te ŋā hūrio nei i tiŋaꞌi i te tātou Pūꞌoko Haka Tere ko Ietū Kiritō, pa he tiŋaꞌi iŋa era ꞌi muꞌa ꞌā i te perofeta, ꞌe o rāua takoꞌa i tute i a mātou mai te ŋā tētahi kona era ꞌi ira e haka ꞌite era e mātou i te roŋo riva-riva o te ꞌAtua. Te ꞌAtua ꞌina he koa mo rāua ꞌo te rava uꞌi i te rāveꞌa mo taꞌe haka tano i te mātou aŋa, ꞌe nei aŋa mo te riva-riva o te taŋata taꞌatoꞌa. 16E haŋa era, paꞌi, mātou mo vānaŋa ki te nuꞌu taꞌe he hūrio o ruŋa i a Ietū, mo eꞌa o rāua mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa, ꞌina he haka rē i a mātou e nei ŋā hūrio mo vānaŋa. Pē ira e haꞌaputu e oho ena i te rāua hara ki te roa hopeꞌa. ꞌE hora nei, te meꞌe toe mo rāua he ūtuꞌa o te ꞌAtua.
He haŋa o Pauro mo hoki ki Tētārōnika
17E te taina, hora tute era i a mātou mai muri i a kōrua, ka ai atu e roa rō ꞌana kōrua mai muri i a mātou, ko te maꞌu iŋa ꞌana mātou i a kōrua ꞌi roto i te mātou māhatu, ꞌe e rahi rō ꞌana te mātou haŋa mo takeꞌa haka ꞌou i a kōrua. 18ꞌO ira a mātou i haŋa ai mo hoki atu ki a kōrua ena. ꞌE a au mau nei ꞌā, a Pauro, i uꞌi rō meꞌe rahi nō atu mahana mo hoki atu ꞌe, ꞌi a Rukifero, a mātou i taꞌe tuꞌu atu ai. 19Ka ai atu pē ira, ko te haŋa iŋa ꞌana a mātou mo hoki atu, he ꞌite o mātou he haka moe he oho mau rō ꞌai kōrua i te manaꞌu ꞌi ruŋa i a Ietū. Te meꞌe nei he koa e tahi mo mātou. ꞌE ꞌi te hora o tātou ka tuꞌu ena ki muꞌa o te tātou Pūꞌoko Haka Tere ko Ietū Kiritō, ꞌi te mahana o tōꞌona hoki iŋa mai, he koa a mātou mo kōrua ꞌe mo te hauhaꞌa o te mātou aŋa ꞌi roto i a kōrua. 20He aŋi mau ꞌā hai kōrua a mātou e koa nei.
3He uŋa iŋa i a Timoteo
1ꞌI te rahi o te mahana taꞌe ꞌite haka ꞌou mai o ruŋa i a kōrua i niva-niva ai a mātou. ꞌO ira i manaꞌu ai mo noho o te tētahi o mātou ꞌi ꞌĀtena 2ꞌe mo uŋa atu i te tātou taina ko Timoteo mo uꞌi i a kōrua. A ia he taŋata hāꞌūꞌū ꞌi te aŋa he haka ꞌite i te ⌊roŋo riva-riva o ruŋa i a Ietū Kiritō⌋. I uŋa atu ai e mātou mo ꞌata haka pūai ꞌe mo ꞌata haka haŋu i te kōrua haka moe iŋa i te manaꞌu ꞌi ruŋa i a Ietū, 3ꞌo haka tapa kōrua mai te ara o te ꞌAtua ꞌo te tute atu i a kōrua e te nuꞌu mo tōtōā. Ko ꞌite riva-riva ꞌana e kōrua: mo tātou mo te nuꞌu ⌊haka moe i te manaꞌu⌋ ꞌi ruŋa i a Ietū, e ꞌamo i te ꞌati tuꞌu pē nei. 4Hora era, paꞌi, o mātou ꞌi muri i a kōrua ꞌā, i haka ꞌite rō atu mātou pē nei ē: e topa rō mai te ꞌati ꞌi ruŋa i a tātou ꞌe, ko ꞌite riva-riva ꞌana e kōrua, pē ira mau ꞌā i topa ai. 5ꞌO ira, ꞌi te niva-niva o mātou ꞌo te taꞌe ꞌite mai hoki e haka moe e oho nō ꞌana kōrua i te manaꞌu ꞌi ruŋa i a Ietū, i uŋa atu ai au i a Timoteo mo ꞌite mai o ruŋa i a kōrua. Tōꞌoku riꞌa-riꞌa: ꞌo hoa kōrua i te kōrua haka moe iŋa i te manaꞌu ꞌi ruŋa i a Ietū ka haka ꞌatu atu ena i a kōrua e Rukifero, ꞌe ꞌo māuꞌa te mātou aŋa ꞌi roto i a kōrua.
6ꞌE hora nei, ꞌī ko hoki mai ꞌā a Timoteo mai Tētārōnika e maꞌu rō mai ꞌana i te parau ꞌāpī riva-riva o ruŋa i a kōrua pē nei ē: ko te haka moe iŋa ꞌana kōrua i te manaꞌu ꞌi ruŋa i a Ietū ꞌe ko te haŋa iŋa ꞌana kōrua ꞌi roto i a kōrua ꞌā. Ko kī mai ꞌā he manaꞌu nō te aŋa o kōrua hai māhatu ki a mātou, ꞌe e rahi rō ꞌana te haŋa mo takeꞌa haka ꞌou i a mātou, pa he haŋa iŋa nei ꞌā o mātou mo takeꞌa i a kōrua.
7ꞌI roto i te ꞌati taꞌatoꞌa ꞌamo e mātou, e te taina ē, te parau ꞌāpī tuꞌu mai nei o ruŋa i a kōrua ko haka pūai ꞌe ko haka koa mai ꞌana i a mātou. 8I ꞌite era, paꞌi, e mātou ko te haka noho iŋa ꞌana a kōrua i te manaꞌu ꞌi ruŋa i a Ietū, he ŋaroꞌa e mātou i te ora. 9E ko pau te māuru-uru o mātou ki te ꞌAtua, ꞌi roto i te mātou pure, mo te rahi o te koa ŋaroꞌa e mātou hai kōrua. 10Ka pō ka ꞌōtea e ani nei ki te ꞌAtua mo haꞌatiꞌa i a mātou mo tuꞌu haka ꞌou atu ki muri i a kōrua, mo ꞌata haka ꞌite atu o ruŋa i a Ietū, ki pūai riva-riva ai te kōrua manaꞌu ꞌi ruŋa i a ia.
He meꞌe no-noꞌi e Pauro ki te ꞌAtua
11E ani nei ki te ꞌAtua, he Matuꞌa o tātou, ꞌe ki te tātou Pūꞌoko Haka Tere ko Ietū Kiritō, mo hāꞌūꞌū mai, mo tuꞌu atu ki a kōrua ena. 12E ani takoꞌa nei ki te tātou Pūꞌoko Haka Tere mo ꞌata haka pūai ꞌe mo ꞌata haka rahi i te haŋa ꞌi roto i a kōrua ꞌe i te haŋa mo te taꞌatoꞌa, pa he haŋa iŋa nei ꞌā o mātou ki a kōrua, 13ꞌe, takoꞌa, mo hāꞌūꞌū i a kōrua mo ꞌata haka hio-hio i te manaꞌu ꞌi ruŋa i a ia, ꞌo ai tāꞌue e tahi meꞌe mo tuhi iŋa atu e te ꞌAtua ꞌi te hora ka tuꞌu ena ki muꞌa i a ia ꞌi te mahana o te hoki iŋa mai o te tātou Pūꞌoko Haka Tere ko Ietū koia ko te nuꞌu taꞌatoꞌa haꞌataꞌa māꞌana. ⌊ꞌĀmene⌋.
4Te noho iŋa tano ki te mata o te ꞌAtua
1E te taina, ko haka ꞌite atu era ꞌā e mātou pē hē ana tano te kōrua noho iŋa ki te mata o te ꞌAtua, ꞌe ko ꞌite ꞌā e mātou, nā kōrua e noho mai ena pē ira. Ka ai atu pē ira, he ani atu a mātou hai ꞌīŋoa o te tātou Pūꞌoko Haka Tere ko Ietū: ka ꞌata haka tano ka oho nō te kōrua noho iŋa pē ira mo koa o te ꞌAtua.
2A kōrua, paꞌi, ko ꞌite ꞌana i te meꞌe kī atu e mātou mo aŋa e kōrua hai ꞌīŋoa o te tātou Pūꞌoko Haka Tere ko Ietū Kiritō. 3Te haŋa o te ꞌAtua: he ai o te kōrua noho iŋa ꞌina e tahi hara, he taꞌe moe e tahi kope i te viꞌe ꞌe i te taŋata taꞌe he viꞌe ꞌo he kenu ꞌāꞌana, 4ꞌe he ꞌite o kōrua taꞌatoꞌa mo haka noho i te meꞌe pohe e te hakari, ki ai ai te kōrua noho iŋa, noho iŋa ꞌina e tahi hara mo moꞌa atu e te taŋata. 5Taꞌe mo te meꞌe taꞌe tano pohe e te hakari e haka tere atu i a kōrua, pa he meꞌe aŋa o te nuꞌu ꞌina kai ꞌite ko ai te ꞌAtua parautiꞌa. 6ꞌIna e tahi o kōrua mo tōtōā i te taina ⌊haka moe i te manaꞌu⌋ ꞌi ruŋa i a Ietū hai toꞌo i tāꞌana viꞌe māꞌana. Ko haka ꞌite atu era ꞌā, paꞌi, e mātou pē nei ē: te ꞌAtua e haka ūtuꞌa rō ꞌā i te nuꞌu aŋa i te meꞌe tuꞌu pē nei hai ūtuꞌa taparahi-taꞌata. 7Taꞌe, paꞌi, mo noho ꞌi roto i te hara i haꞌataꞌa ai e te ꞌAtua i a tātou i te nuꞌu haka moe i te manaꞌu ꞌi ruŋa i a Ietū; i haꞌataꞌa ai mo noho ꞌina e tahi hara. 8ꞌE te taina taꞌe haŋa ꞌe taꞌe haꞌatura ki te hāpī nei e hārui ꞌana i te ꞌAtua hai tuaꞌivi, taꞌe ꞌō i te taŋata; o te ꞌAtua, paꞌi, te hāpī nei ꞌe ꞌāꞌana te uŋa atu i te ⌊Vārua Maitai⌋ mo noho ꞌi roto i a kōrua.
9ꞌE o ruŋa i te meꞌe he haŋa o te taina haka moe i te manaꞌu ꞌi ruŋa i a Ietū ꞌi roto i a rāua ꞌā, ꞌina e mātou e ko pāpaꞌi atu. Ko hāpī atu era ꞌā, paꞌi, e te ꞌAtua mau ꞌā mo haŋa o kōrua ki te rua. 10ꞌE he aŋi mau ꞌā e haŋa rō ꞌana a kōrua ki te taina taꞌatoꞌa o te ŋā kona taꞌatoꞌa ena o Mātērōnia. Ka ai atu pē ira, e te taina ē, ꞌī mātou he ani atu pē nei ē: e ꞌata haŋa e oho kōrua ki te taꞌatoꞌa. 11E noho kōrua ꞌi roto i te haumārū, ꞌe e uꞌi i te kōrua noho iŋa, ꞌo riro he ꞌati mo te rua. E aŋa kōrua mo ai o te kōrua meꞌe, pa he meꞌe kī atu e mātou. 12Mo haka tere o kōrua i a kōrua hai ŋā meꞌe nei, he moꞌa atu te nuꞌu taꞌe haka moe i te manaꞌu ꞌi ruŋa i a Ietū ꞌi te takeꞌa i te kōrua noho iŋa tano, ꞌe ꞌina ia e ko ai kōrua pa he meꞌe paŋahaꞌa mo ꞌamo e te rua, he taꞌe hape o te kōrua meꞌe.
Te hoki iŋa mai o Ietū
13E te taina, e haŋa rō ꞌana a mātou mo ꞌite o kōrua o ruŋa i te meꞌe topa ki te nuꞌu mate, ꞌo māui-ui rahi rō te kōrua māhatu, pa he nuꞌu taꞌe haka moe i te manaꞌu ꞌi ruŋa i a Ietū taꞌe ꞌite: te nuꞌu mate e ora haka ꞌou rō. 14Pa he meꞌe ꞌite e tātou: a Ietū i mate rō ꞌe i ora haka ꞌou rō mai, pē ira takoꞌa a tātou e ꞌite nei: te ꞌAtua e haka ora rō i te nuꞌu mate haka moe i te manaꞌu ꞌi ruŋa i a Ietū, ꞌe e hokorua rō rāua i a Ietū.
15ꞌO ira mātou e kī atu ena, pa he hāpī o te tātou Pūꞌoko Haka Tere: a tātou, te nuꞌu e ora nō ꞌā ꞌi te hora o te hoki iŋa mai o Ietū, e ko iri ꞌi raꞌe ki te nuꞌu mate. 16Pē ira ka topa ena: e ŋaroꞌa rō te reꞌo ohu o te merahi ra-rahi ꞌe te puhi iŋa o te koneta o te ꞌAtua. He topa mai ia a Ietū mai te raŋi, ꞌe te nuꞌu mā-mate haka moe i te manaꞌu ꞌi ruŋa i a ia he ora haka ꞌou. 17ꞌE a tātou, te nuꞌu e ora nō ꞌā ananake ko te nuꞌu nei he maꞌu he iri ꞌi ruŋa i te raŋi tea-tea mo piri ki a Ietū ꞌi roto i te tokerau. Pē ira a tātou ka noho ena ꞌi muri i a ia ꞌina he hopeꞌa raꞌa. 18E haka koa kōrua i a kōrua ꞌā hai ŋā vānaŋa nei.
51Te hora ꞌe te mahana o tōꞌona hoki iŋa mai ꞌina e mātou e ko pāpaꞌi atu. 2Ko ꞌite riva-riva ꞌana, paꞌi, e kōrua: te hoki iŋa mai o te tātou Pūꞌoko Haka Tere ka tuꞌu mai ena pa he toke-toke ꞌi te hora kai manaꞌu hia. 3E kī nō ꞌā e te nuꞌu pē nei ē: «ꞌIna he tamaꞌi ꞌe ꞌina he meꞌe mo riꞌa-riꞌa iŋa», ꞌi rā hora, mā te taꞌe ꞌite, he topa te ꞌati ꞌi ruŋa i a rāua, pa he hora o te huki iŋa o te tūātoto o te hānautama, ꞌe e ko ravaꞌa mo eꞌa mai rā ꞌati.
4ꞌE a kōrua, e te taina ē, taꞌe ꞌi roto i te pōhāhā o te ao nei e noho ena, ki maꞌurima ai i a kōrua pa he toke-toke e te mahana o tōꞌona hoki iŋa mai. 5A tātou, te nuꞌu ⌊haka moe i te manaꞌu⌋ ꞌi ruŋa i a Ietū, he nuꞌu o te māꞌeha, ꞌe o te ꞌōtea, te auraꞌa, he nuꞌu aŋa i te meꞌe riva-riva, taꞌe he nuꞌu o te pōhāhā ꞌe o te pō aŋa i te meꞌe taꞌe tano. 6ꞌO ira, e tiaki e oho tātou ki te hoki iŋa mai o Ietū pa he nuꞌu ꞌite mo hāito i te rāua meꞌe kī ꞌe i te rāua meꞌe aŋa.
ꞌIna a tātou ko riro pa he nuꞌu hāꞌuru, te auraꞌa, pa he nuꞌu taꞌe haka moe i te manaꞌu ꞌi ruŋa i a Ietū taꞌe tiaki ki a ia. 7ꞌI te pō, paꞌi, te nuꞌu e haꞌuru ena ꞌe e taꞌero ena, ꞌe ꞌina he ꞌite he aha te meꞌe mo topa.
8A tātou, te nuꞌu o te ꞌōtea, e ꞌite mo hāito, paurō te mahana, i te tātou meꞌe kī ꞌe i te tātou meꞌe aŋa. ꞌE pa he hāpaꞌo iŋa o te vaꞌehau i a ia hai kahu aŋa hai ꞌaurī, pē ira takoꞌa ꞌana a tātou ana hāpaꞌo i a tātou hai haka moe i te manaꞌu ꞌi ruŋa i a Ietū ꞌe hai haŋa ki a ia ꞌe ki te rua, ꞌo aŋa mai e Rukifero i te meꞌe mo haka hara i a tātou. ꞌE pa he hāpaꞌo iŋa o te vaꞌehau i tōꞌona pūꞌoko e puꞌa i te haꞌu aŋa hai ꞌaurī, pē ira takoꞌa tātou ana hāpaꞌo i a tātou hai maꞌu hio-hio ꞌi roto i a tātou i te parautiꞌa: a Ietū e haka eꞌa rō i a tātou mai roto i te ūtuꞌa o te hara ꞌe e vaꞌai rō mai i te ora ꞌāpī ꞌina he hopeꞌa raꞌa.
9Taꞌe, paꞌi, mo ꞌamo i te ūtuꞌa te ꞌAtua i haꞌataꞌa ai i a tātou; mo eꞌa o tātou mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa hai Ietū Kiritō, Pūꞌoko Haka Tere o tātou. 10A ia i mate ai mo tātou, mo noho o tātou ꞌi muri i a ia, ka ai atu ꞌi te hora era o tōꞌona hoki iŋa mai e ora rō ꞌā ꞌo e mate rō ꞌā a tātou. 11ꞌO ira, ꞌi roto i a kōrua e haka koa, e haka pūai te kōrua manaꞌu ꞌi ruŋa i a Ietū, pa he meꞌe mau ena ꞌā e kōrua e aŋa mai ena.
He manaꞌu tano mo te nuꞌu ⌊kiritiano⌋
12E te taina, he ani atu mātou: e moꞌa kōrua i te nuꞌu taꞌatoꞌa aŋa ꞌi roto i a kōrua, he nuꞌu hatu atu ꞌe he nuꞌu haka tika atu ꞌi te meꞌe o te ꞌAtua. 13E moꞌa ꞌe e haŋa rahi kōrua ki a rāua ꞌo te rāua meꞌe aŋa. ꞌE ꞌi roto i a kōrua e noho hai haumārū.
14He ani takoꞌa atu mātou, e te taina ē: e haka pūai te manaꞌu o te nuꞌu e riꞌa-riꞌa rō ꞌā, e hāꞌūꞌū ki te nuꞌu ꞌina he pūai te rāua haka moe iŋa i te manaꞌu ꞌi ruŋa i a Ietū, e kī ki te nuꞌu hupe-hupe: «e aŋa», ꞌe e ꞌite kōrua mo haꞌaoromaꞌi i te taꞌatoꞌa.
15E uꞌi takoꞌa kōrua ꞌo haka hoki e te kope e tahi hai meꞌe taꞌe tano ki te kope aŋa i te meꞌe taꞌe tano ki a ia. Te meꞌe mau nō, paꞌi, o kōrua mo aŋa he meꞌe riva-riva, ꞌe taꞌe nō ꞌi roto i a kōrua, ki te taꞌatoꞌa nō taŋata.
16ꞌI te taꞌatoꞌa nō hora, e koa 17ꞌe e pure kōrua. 18ꞌE, takoꞌa, e māuru-uru kōrua ki te ꞌAtua ꞌi te taꞌatoꞌa nō hora nōatu te meꞌe topa atu. Ko te ŋā meꞌe nei te meꞌe haŋa ꞌāꞌana mo aŋa e kōrua e te nuꞌu haka moe i te manaꞌu ꞌi ruŋa i a Ietū.
19ꞌIna ko taꞌe haꞌatura ki te vānaŋa kī atu e te ⌊Vārua Maitai⌋ ꞌi roto i a kōrua. 20ꞌIna ko taꞌe haka au i te vānaŋa haka ꞌite atu e ia hai rua kope. 21E uꞌi riva-riva hoki rā vānaŋa kī atu era he parautiꞌa mau ꞌā o te Vārua Maitai ꞌe, mo ai pē ira, e maꞌu e kōrua. 22ꞌE e haka tapa kōrua mai te meꞌe taꞌe tano taꞌatoꞌa.
23Mo te ꞌAtua, kope vaꞌai mai i te haumārū, e haka maꞌitaki i te kōrua huru ꞌe i te kōrua noho iŋa ki te roa ꞌina e tahi hara mo tuhi atu. ꞌE māꞌana takoꞌa e hāpaꞌo i a kōrua ꞌina e tahi hape, mai te hakari ki te vārua, ꞌātā ki te hoki iŋa mai o te tātou Pūꞌoko Haka Tere ko Ietū Kiritō. 24ꞌE, ꞌo te ai o te ꞌAtua i haꞌataꞌa i a kōrua māꞌana ꞌe a ia kope haka tano i tāꞌana meꞌe kī, e ꞌite ena e kōrua pē ira mau ꞌā ka meꞌe ena.
He ꞌaroha
25E te taina, e pure takoꞌa kōrua mo mātou.
26E ꞌaroha atu kōrua hai haŋa ki te tātou taina taꞌatoꞌa haka moe i te manaꞌu ꞌi ruŋa i a Ietū.
27He ani atu a au, hai ꞌīŋoa o te tātou Pūꞌoko Haka Tere, e taiꞌo kōrua i te meꞌe nei ki te taina taꞌatoꞌa o tātou.
28Ka ai ꞌi ruŋa i a kōrua te riva rahi o te tātou Pūꞌoko Haka Tere ko Ietū Kiritō.