1 PĒTERO

He parau raꞌe pāpaꞌi e

Pētero

Te nuꞌu haka moe raꞌe era i te manaꞌu ꞌi ruŋa i a Ietū o Itaraera i tute rō mo tōtōā e te nuꞌu taꞌe ⌊haka moe i te manaꞌu⌋ ꞌi ruŋa i a ia. ꞌO ira e noho era e maraŋa rō ꞌana ꞌi te tētahi atu henua haka tere e te rōmano. Ki te nuꞌu maraŋa ki Ponotō, ki Karatia, ki Kāpārōtia, ki ꞌĀtia ꞌe ki Vītīnia i pāpaꞌi ai te ꞌāpōtoro era ko Pētero i te parau nei (1.1).

Meꞌe rahi te ꞌati i ꞌamo e te nuꞌu nei ꞌi te rāua kona noho ꞌo te ai o rāua ꞌa Ietū Kiritō. ꞌO ira, ꞌi ruŋa i te parau nei, he haka pūai e Pētero i te manaꞌu ꞌe he hatu mo haꞌahana-hana mo oho nō ki te ꞌAtua, kope vaꞌai mai «i te ora ꞌe i te noho iŋa ꞌāpī, he rahi o tōꞌona haka ꞌaroha mo tātou» (1.3). He hatu takoꞌa e Pētero pē nei ē: te meꞌe mo takeꞌa ꞌi ruŋa i a rāua ꞌo te ai i a rāua te noho iŋa ꞌāpī nei he haka tapa iŋa mai roto i te hara (1.15–16), ꞌe he koa, ka ai atu e topa rō ꞌana ꞌi ruŋa i a rāua te ꞌati (1.6–9). Te ⌊kiritiano⌋ taꞌatoꞌa, paꞌi, he huaꞌai o te ꞌAtua ꞌe he ⌊oromatuꞌa⌋ aŋa ki a ia (2.9).

Te meꞌe vānaŋa rahi ꞌi ruŋa i te parau nei: pē hē te noho iŋa tano mo te nuꞌu kiritiano. Ki te kī ꞌa Pētero: te nuꞌu kiritiano e haꞌatura ki te nuꞌu ra-rahi ꞌe ki te nuꞌu pūꞌoko haka tere o te henua ꞌo te ai he meꞌe haŋa e te tātou Pūꞌoko Haka Tere ko Ietū Kiritō (2.13–15).

ꞌE ki te kī takoꞌa ꞌa Pētero: te paꞌo iŋa o te ao nā ko hāhine mai ꞌana (4.7). ꞌO ira, e haŋa te taina ki te rua, e toꞌo e hāpaꞌo i te nuꞌu kiritiano tuꞌu atu ki te hare, ꞌe e koa ꞌo te topa atu o te ꞌati ꞌo te ai ōꞌou ꞌa Ietū Kiritō (4.8–9,12–16).

He ꞌaroha

¹A au, a Pētero, ⌊ꞌāpōtoro⌋ ꞌa Ietū Kiritō, he ꞌaroha atu ki a kōrua ki te nuꞌu taꞌatoꞌa haꞌataꞌa e te ꞌAtua māꞌana noho ꞌi te henua kē, taꞌe ꞌi te rāua henua mau era, ꞌi te ŋā kona era ko Ponotō, ko Karatia, ko Kāpārōtia, ko ꞌĀtia ꞌe ko Vītīnia. ²Te manaꞌu o te ꞌAtua Matuꞌa i haꞌataꞌa ai i a kōrua: mo haka riro i a kōrua he nuꞌu ꞌina e tahi hara haꞌataꞌa māꞌana hai Vārua Maitai ꞌe haꞌatura ki a Ietū ꞌi te haka kore e te ꞌAtua i te kōrua hara hai toto tehe era o Ietū ꞌi ruŋa i te tātaurō. Ka rahi ka oho nō te riva rahi ꞌe te haumārū o te ꞌAtua ꞌi ruŋa i a kōrua.

He haꞌahana-hana ki te ꞌAtua

³Ki haꞌahana-hana tātou i te ꞌAtua, Matuꞌa o te tātou Pūꞌoko Haka Tere ko Ietū Kiritō. A ia, paꞌi, ko vaꞌai mai ꞌana i te ora ꞌe i te noho iŋa ꞌāpī, he rahi o tōꞌona haka ꞌaroha mo tātou. ꞌE, ꞌi te ai ko haka ora ꞌana e ia i a Ietū mai te mate, e ꞌite nei a tātou e haka ora takoꞌa rō mai i a tātou mai te mate pe muꞌa ka oho ena, ⁴ꞌe e vaꞌai rō mai i te meꞌe hāpaꞌo mo tātou ꞌi ruŋa i te raŋi, he meꞌe e ko kore, e ko tāpau ꞌe e ko mae-mae ki te hora hopeꞌa. ⁵ꞌO te haka moe o tātou i te manaꞌu ꞌi ruŋa i a Ietū, te ꞌAtua e hāpaꞌo e oho mai ena i a tātou hai pūai nui-nui ōꞌona, ki ravaꞌa ai e tātou, ꞌi te mahana hopeꞌa, i te ora ꞌina he hopeꞌa raꞌa hāpaꞌo mo tātou. ⁶ꞌO ira a tātou e koa nei, ka ai atu e ꞌamo rō ꞌā a tātou, mo te hora ꞌiti-ꞌiti, rauhuru atu ꞌati.

⁷Te ꞌAtua, paꞌi, e haꞌatiꞌa rō ꞌā mo topa mai o te ꞌati mo ꞌite hoki te haka moe iŋa nei o tātou i te manaꞌu ꞌi ruŋa i a Ietū e hio-hio rō ꞌā ꞌo ꞌina, pa he piru e tunu ena ꞌi roto i te ahi. ꞌE mo te ꞌAtua te haka moe iŋa o tātou i te manaꞌu ꞌi ruŋa i a Ietū i hau rō atu i te hauhaꞌa ki te piru, he meꞌe e ŋaro nō. Mo hio-hio mo oho nō o te tātou manaꞌu ꞌi ruŋa i a Ietū ka ai atu e rahi rō ꞌā te ꞌati topa mai, ꞌi te hora o te hoki iŋa mai o Ietū Kiritō, he koa te ꞌAtua ꞌe he haka paka he haka nui-nui i a tātou.

⁸A kōrua e haŋa rō ꞌana ki a Ietū Kiritō ka ai atu kai takeꞌa hia i a ia. ꞌE ꞌi te hora nei, ka ai atu ꞌina he takeꞌa, e haka moe rō ꞌana kōrua i te manaꞌu ꞌi ruŋa i a ia, ꞌe e rahi rō ꞌana te kōrua koa, he koa ꞌina he vānaŋa mo haꞌaauraꞌa. ⁹Ko ravaꞌa ꞌana, paꞌi, e kōrua i te meꞌe haŋa mo ravaꞌa hai haka moe o kōrua i te manaꞌu ꞌi ruŋa i a Ietū: he eꞌa mai roto i te ūtuꞌa o te hara ꞌe he ravaꞌa i te ora ꞌāpī ꞌina he hopeꞌa raꞌa.

¹⁰Te perofeta o muꞌa ꞌā i haka ꞌite rō ki te taŋata i te roŋo haka vānaŋa e te ꞌAtua o ruŋa i te haka eꞌa iŋa i te taŋata mai roto i te ūtuꞌa o te hara hai riva rahi ōꞌona ꞌe, ꞌi te taꞌe aŋi-aŋi e te perofeta i nei roŋo, he rara he oho o ruŋa. ¹¹Te meꞌe o rāua i haŋa mo aŋi-aŋi o rā roŋo: a hē ꞌe pē hē ka tano te meꞌe kī era ki a rāua e te Vārua o te ⌊Kiritō⌋ pē nei ē: e topa rō te ꞌati ꞌi ruŋa i te Kiritō ꞌe ki oti he haka nui-nui. ¹²ꞌE te ꞌAtua i haka ꞌite rō ki rā ŋā perofeta pē nei ē: te roŋo haka ꞌite oho era e rāua he meꞌe mo topa pe muꞌa ka oho era, te auraꞌa, ꞌi te noho iŋa nei o tātou, ꞌe taꞌe ꞌō ꞌi te rāua noho iŋa era. ꞌE ko rā roŋo te meꞌe i haka ꞌite atu ki a kōrua e te nuꞌu haka ꞌite oho i te roŋo riva-riva nei o ruŋa i a Ietū hai pūai o te ⌊Vārua Maitai⌋ uŋa mai mai te raŋi. ꞌE ꞌātā te merahi e haŋa rō ꞌana mo aŋi-aŋi o ruŋa i te roŋo nei o te haka eꞌa iŋa o te taŋata mai roto i te ūtuꞌa o te hara.

Te noho iŋa tano mo te nuꞌu ⌊kiritiano⌋

¹³E te taina, e ꞌara te kōrua mata ꞌe e ꞌite i te hāito i te kōrua meꞌe kī ꞌe i te kōrua meꞌe aŋa. E haka hio-hio te kōrua manaꞌu ꞌi ruŋa i te meꞌe o te ꞌAtua ka vaꞌai atu ena hai riva rahi ōꞌona ꞌi te hora o te hoki iŋa mai o Ietū Kiritō.

¹⁴Pa he ŋā poki haꞌatura ki te ꞌAtua, ꞌina ko haka tano haka ꞌou te kōrua noho iŋa ki te meꞌe taꞌe tano haka tere atu i a kōrua ꞌi muꞌa ꞌā, ꞌi te hora kai ꞌite ꞌana o ruŋa i te ꞌAtua. ¹⁵Te tī-tika mau: e noho kōrua ꞌina e tahi hape ꞌi te meꞌe era te ꞌAtua haꞌataꞌa era i a kōrua māꞌana ꞌina e tahi ōꞌona hape. ¹⁶Pē nei e kī ena ꞌi ruŋa i te ⌊Pāpaꞌi Moꞌa⌋: «E ai kōrua he nuꞌu ꞌina e tahi hape, pē au ꞌā».

¹⁷A kōrua e kī rō ꞌana: te ꞌAtua he Matuꞌa o kōrua. ꞌO ira, e moꞌa ꞌe e haꞌatura ki a ia ꞌi te taꞌatoꞌa nō hora o te noho iŋa ꞌi te ao nei. ꞌĀꞌana, paꞌi, te kī i te tano ꞌe i te taꞌe tano o te taŋata hai huru o te rāua meꞌe aŋa, ꞌe mōꞌona te taŋata pē tū huru tahi ꞌā. ¹⁸Te ꞌAtua ko toꞌo ꞌana i a kōrua mai roto i te noho iŋa hauhaꞌa kore ravaꞌa e kōrua mai te kōrua tupuna. ꞌE ko ꞌite riva-riva ꞌana e kōrua: taꞌe hai meꞌe pa he piru, meꞌe tōꞌona hauhaꞌa mo te ao nō nei, i ꞌauhau ai mo toꞌo i a kōrua mai te noho iŋa nei, ¹⁹hai toto hauhaꞌa era o te Kiritō, kope pa he māmoe mo tūtia ꞌina e tahi ōꞌona hape, i toꞌo ai i a kōrua.

²⁰ꞌI te hora kai aŋa hia ꞌā i te ao, i haꞌataꞌa rō ai e te ꞌAtua i te Kiritō mo te meꞌe nei; ꞌe ꞌi te ŋā hora hopeꞌa nei, i tuꞌu mai ai mo te riva-riva o kōrua. ²¹Hai Kiritō kōrua e haka moe ena i te manaꞌu ꞌi ruŋa i te ꞌAtua. ꞌE, ꞌo te haka ora e te ꞌAtua i te Kiritō mai te mate ꞌe ꞌo te haka nui-nui, e taꞌe haka tapa ena te kōrua manaꞌu mai ruŋa i te ꞌAtua ꞌe e ꞌite ena e kōrua e aŋa tahi rō e ia i tāꞌana meꞌe hōrea era.

²²ꞌI te haꞌatura o kōrua ki te roŋo parautiꞌa i haka kore ai e te ꞌAtua i te kōrua hara, ki haŋa parautiꞌa ai kōrua ki te kōrua taina. ꞌO ira, e haŋa e oho ꞌi roto i a kōrua hai māhatu ꞌe hai pūai. ²³A kōrua, paꞌi, ko poreko haka ꞌou mai ꞌana, ꞌe taꞌe mai roto i te taŋata, he meꞌe e mate nō, mai roto i te vānaŋa o te ꞌAtua, he meꞌe ora ꞌe ꞌina e ko mate ki te hora hopeꞌa. ²⁴Pē nei, paꞌi, e kī ena ꞌi ruŋa i te Pāpaꞌi Moꞌa:

«Te taŋata taꞌatoꞌa pa he mauku ꞌana

ꞌe tōꞌona pūai pa he tiare o te mauku;

he paka-paka te mauku, he mae-mae te tiare ꞌe he marere,

²⁵ꞌe te vānaŋa o te ꞌAtua e ko ŋaro ki te hora hopeꞌa».

ꞌE nei vānaŋa he ⌊roŋo riva-riva o ruŋa i a Ietū Kiritō⌋ haka ꞌite atu ki a kōrua.

¹ꞌE hora nei, ꞌi te ai i a kōrua te ora ꞌāpī, e haka kore mai ruŋa i a kōrua te meꞌe taꞌatoꞌa taꞌe tano: te reo-reo, te haka tuꞌu i a kōrua pa he nuꞌu riva ꞌe rā riva a te haho ꞌā, te nou-nou ki te meꞌe o te rua, ꞌe te haꞌaꞌino. ²E riro kōrua pa he ŋā poki poreko iho pohe ki te ū, te auraꞌa: e pohe kōrua ki te ū parautiꞌa mo te kōrua riva-riva, he vānaŋa o te ꞌAtua, mo haka pūai mo oho o te kōrua manaꞌu ꞌi ruŋa i te ꞌAtua ꞌātā ki te mahana ka toꞌo ena i a kōrua ki te raŋi pe muꞌa ka oho ena. ³A kōrua ko ŋaroꞌa ꞌana i te ora o te riva rahi o te tātou Pūꞌoko Haka Tere ko Ietū Kiritō; ꞌo ira, e aŋa kōrua pē ira.

He nuꞌu haꞌataꞌa e te ꞌAtua māꞌana

⁴E haka hāhine kōrua ki a ia, he māꞌea ora taꞌe haŋa era e te taŋata, māꞌea haꞌataꞌa e te ꞌAtua, ꞌe māꞌea hauhaꞌa rahi. ⁵A kōrua takoꞌa pa he māꞌea ora, ꞌe te ꞌAtua, hai ŋā māꞌea ora ena ko kōrua, e aŋa mai ena i te kona mo haꞌamuri ki a ia. ꞌI roto a kōrua pa he ⌊oromatuꞌa⌋ haꞌataꞌa e ia māꞌana tūtia ki a ia i te meꞌe riva-riva haka poreko e te Vārua Maitai ꞌi roto i a kōrua, he tūtia koa ꞌāꞌana ꞌo te ai o kōrua ꞌa Ietū Kiritō. ⁶Pē nei, paꞌi, e kī ena ꞌi ruŋa i te ⌊Pāpaꞌi Moꞌa⌋:

«He haka tuꞌu au i te māꞌea e tahi ꞌi te kona era ko ⌊Tione⌋,

he māꞌea matuꞌa haka noho hare, māꞌea haꞌataꞌa e au ꞌe māꞌea hauhaꞌa rahi.

Te kope ⌊haka moe i te manaꞌu⌋ ꞌi ruŋa,

e ko manaꞌu ki te hora hopeꞌa ko hape ꞌana ꞌō a ia».

⁷Mo kōrua mo te nuꞌu haka moe i te manaꞌu ꞌi ruŋa i a Ietū, te māꞌea ena māꞌea hauhaꞌa rahi. ꞌE mo te nuꞌu taꞌe haka moe i te manaꞌu ꞌi ruŋa i a ia, e kī ena ꞌi ruŋa i te Pāpaꞌi Moꞌa pē nei ē:

«Te māꞌea taꞌe haŋa era e te nuꞌu aŋa hare,

ko riro ꞌana he māꞌea matuꞌa haka noho hare».

⁸ꞌE e kī takoꞌa ena:

«He māꞌea e tahi ꞌi ruŋa ka tu-tuki ena».

Te nuꞌu taꞌe haka moe i te manaꞌu ꞌi ruŋa i a Ietū e tu-tuki ena ꞌo te taꞌe haꞌatura ki te roŋo o te ꞌAtua, he meꞌe mau ꞌana mo topa ki te nuꞌu taꞌe haka roŋo.

⁹ꞌE a kōrua he huaꞌai toꞌo e te ꞌAtua, he oromatuꞌa aŋa ki te ꞌariki, he nuꞌu haꞌataꞌa māꞌana, ꞌe he taŋata haka tere e ia. Te ꞌAtua, kope haka eꞌa i a kōrua mai roto i te pōhāhā o te meꞌe taꞌe tano mo oꞌo ki roto i tōꞌona mōrī nui-nui ena, i haꞌataꞌa ai i a kōrua mo haka ꞌite mo oho o ruŋa i te meꞌe nui-nui aŋa e ia. ¹⁰ꞌI muꞌa ꞌana taꞌe kōrua he nuꞌu o te ꞌAtua, ꞌe hora nei he nuꞌu ꞌāꞌana; ꞌi muꞌa ꞌā kai ŋaroꞌa e kōrua i te riva rahi o te ꞌAtua, ꞌe hora nei e ŋaroꞌa rō ꞌana e kōrua.

E uꞌi te kōrua haka tere iŋa

¹¹E te taina, a kōrua pa he nuꞌu o te kona kē noho ꞌi te ao nei mo te hora ꞌiti-ꞌiti nō e tahi. ꞌO ira, ꞌina ko vaꞌai i a kōrua ki te meꞌe pohe nō o te hakari, he meꞌe haka tapa i a kōrua mai te ara o te ꞌAtua. ¹²E noho kōrua ꞌina e tahi hape ꞌi roto i te nuꞌu taꞌe haŋa ki te ꞌAtua. Mo noho o kōrua pē ira, he takeꞌa e rā nuꞌu i te meꞌe riva-riva aŋa e kōrua ꞌe he haꞌahana-hana ki te ꞌAtua ꞌi te mahana ka kī era e ia i te meꞌe tano ꞌe i te meꞌe taꞌe tano aŋa e te taŋata, ka ai atu ꞌi te hora nei e kī rō ꞌana e rāua pē nei ē: a kōrua he nuꞌu aŋa i te meꞌe taꞌe tano.

E haꞌatura ki te nuꞌu ra-rahi

¹³Pa he moꞌa iŋa i te tātou Pūꞌoko Haka Tere ko Ietū Kiritō ana haꞌatura kōrua i te nuꞌu ra-rahi taꞌatoꞌa. E haꞌatura kōrua ki te ꞌariki rōmano, i a ia te tōroꞌa hopeꞌa o te nui-nui, ¹⁴ꞌe ki te suerekao uŋa e ia mo haka ūtuꞌa i te nuꞌu aŋa i te meꞌe taꞌe tano ꞌe mo haka paka mo haka nui-nui i te nuꞌu aŋa i te meꞌe tano. ¹⁵Te ꞌAtua, paꞌi, e haŋa rō ꞌana mo aŋa o kōrua i te meꞌe riva-riva. Pē ira he ꞌapi i te haha o te nuꞌu maꞌa-maꞌa tuhi atu i te kōrua hape, he taꞌe haŋa mo aŋi-aŋi i te meꞌe o te ꞌAtua.

¹⁶E noho kōrua pa he nuꞌu taꞌe haka tere e te meꞌe o te ao nei; te ꞌAtua, paꞌi, ko haka eꞌa ꞌana i a kōrua mai rā haka tere iŋa. ꞌE, ka ai atu pē ira, e uꞌi ꞌo riro te parautiꞌa nei he ꞌōtohe e tahi mo aŋa o kōrua i te meꞌe taꞌe tano. Te meꞌe haŋa mau: e noho kōrua pa he tāvini o te ꞌAtua. ¹⁷E moꞌa kōrua i te taŋata taꞌatoꞌa. E haŋa ki te taina, e haꞌamuri ki te ꞌAtua ꞌe e moꞌa i te pūꞌoko haka tere o te kōrua henua.

Te meꞌe mo aŋa o te ꞌekaravo

¹⁸E te ꞌekaravo, e haꞌatura ꞌe e moꞌa kōrua i te taŋata haka aŋa i a kōrua ka ai atu he taŋata riva ꞌo taꞌe riva. ¹⁹Te ꞌAtua, paꞌi, e haꞌamaitai rō ꞌana i te kope ꞌamo ꞌe haꞌaoromaꞌi hai pūai i te ūtuꞌa taꞌe tano topa ꞌi ruŋa i a ia ꞌi te haŋa mo aŋa i te meꞌe tī-tika ki te mata o te ꞌAtua. ²⁰Te ꞌamo ꞌe te haꞌaoromaꞌi i te ūtuꞌa ꞌo te aŋa i te meꞌe taꞌe tano, ꞌina e tahi hauhaꞌa. ꞌE mo ꞌamo ꞌe mo haꞌaoromaꞌi hai pūai i te ūtuꞌa ꞌo te aŋa i te meꞌe tī-tika, he koa te ꞌAtua. ²¹Mo nei meꞌe te ꞌAtua i haꞌataꞌa ai i a tātou. Te Kiritō, paꞌi, i ꞌamo rō pē ira i te ꞌati mo tātou, ꞌe pē ira i haka rē mai ai i te haꞌaauraꞌa pē hē a tātou ana haka tere.

²²Kai hara te ⌊Kiritō⌋ ꞌe kai reo-reo ki te hora hopeꞌa. ²³Hora vā-vā era i a ia, ꞌina he pāhono hai vānaŋa taꞌe tano, ꞌe hora tōtōā era, ꞌina kai kī i te vānaŋa mo haka riꞌa-riꞌa i te taŋata. Te meꞌe mau nō i aŋa he haka rē i a ia ki te rima o te ꞌAtua, kope ture hai tī-tika. ²⁴A Ietū i ꞌamo ai i te tātou hara ꞌi ruŋa i te tātaurō, ki haka rē ai a tātou i te aŋa i te meꞌe taꞌe tano, ꞌe ki tano ai te tātou noho iŋa ki te mata o te ꞌAtua. Hai ꞌamo e ia i te ꞌati i ora ai tātou. ²⁵ꞌI muꞌa ꞌā, paꞌi, e haꞌere era a tātou pa he māmoe ko ŋaro ꞌana, ꞌe, hora nei, ko hoki tahi ꞌana ki te Kiritō, kope hāpaꞌo mai i a tātou pa he taŋata hāpaꞌo māmoe.

Te meꞌe mo aŋa o te nuꞌu hāipo-ipo

^1-2ꞌE a kōrua, e te ŋā viꞌe ⌊hāipo-ipo⌋ ē, e haꞌatura ki te kōrua kenu, ka ai atu he kenu taꞌe ⌊haka moe i te manaꞌu⌋ ꞌi ruŋa i te ⌊roŋo riva-riva o ruŋa i a Ietū⌋. Mo aŋa o kōrua pē ira, he huri pēaha te manaꞌu, ꞌe he haka moe takoꞌa i tōꞌona manaꞌu ꞌi ruŋa i a Ietū, ꞌe taꞌe ꞌō ꞌo te meꞌe i kī e kōrua, ꞌo te takeꞌa i te kōrua noho iŋa tano, noho iŋa moꞌa ꞌe haꞌatura ki te ꞌAtua.

³Te meꞌe mo haka nehe-nehe i a kōrua ꞌina ko ai hai meꞌe o te haho nō, pa he ha-hari huru kē i te rauꞌoho, pa he meꞌe piru, ꞌe pa he kahu hopeꞌa o te nehe-nehe. ⁴E ai hai meꞌe o roto i te māhatu, pa he huru riva ꞌe haumārū, he nehe-nehe taꞌe ŋaro ki te hora hopeꞌa. Te nehe-nehe tuꞌu pē nei e hauhaꞌa rahi rō ꞌā ki te ꞌAtua.

⁵Pē ira te ŋā viꞌe moꞌa ꞌe haꞌatura ki te ꞌAtua o muꞌa ꞌā e haka nehe-nehe era. A rāua e haka noho rō ꞌana i te manaꞌu ꞌi ruŋa i te ꞌAtua ꞌe e haꞌatura rō ꞌana ki te rāua kenu. ⁶Pē ira te viꞌe era ko Tara, viꞌe haꞌatura ki tāꞌana kenu ko ⌊ꞌAparahama⌋ kī mōꞌona: «e te pūꞌoko ōꞌoku ē». ꞌE a kōrua, e te ŋā viꞌe hāipo-ipo ē, mo aŋa i te meꞌe riva-riva ꞌe mo taꞌe riꞌa-riꞌa e tahi meꞌe, pē ⌊Tara⌋ ꞌā ia a kōrua.

⁷ꞌE a kōrua, e te kenu hāipo-ipo ē, e haŋa e hāpaꞌo riva-riva i te kōrua ŋā viꞌe. Ka ai atu ꞌata hau rō atu te kōrua pūai ki a rāua, e moꞌa ꞌi te ꞌite pē nei ē: mo rāua takoꞌa te hauhaꞌa ka vaꞌai ena e te ꞌAtua, he ora ꞌāpī ꞌina he hopeꞌa raꞌa. Mo taꞌe aŋa o kōrua pē ira he hihi-hihi te kōrua pure.

Te meꞌe mo aŋa o te ⌊kiritiano⌋ taꞌatoꞌa

⁸Te meꞌe haŋa: e noho kōrua taꞌatoꞌa ꞌi roto i te haumārū ꞌe e tahi mau nō manaꞌu. E here ꞌi roto i a kōrua pa he taina. E riva kōrua, ꞌe ꞌina ko manaꞌu pē nei ē: i hau rō atu kōrua ki te rua. ⁹ꞌIna ko aŋa hai meꞌe rake-rake ki te nuꞌu aŋa atu i te meꞌe rake-rake, ꞌe ꞌina ko parauꞌino ki te nuꞌu parauꞌino atu. Te meꞌe o kōrua mo aŋa he ani ki te ꞌAtua mo haꞌamaitai i rā nuꞌu. Te ꞌAtua, paꞌi, i haꞌataꞌa ai i a kōrua māꞌana mo haꞌamaitai atu e ia. ¹⁰Pē nei e kī ena ꞌi ruŋa i te ⌊Pāpaꞌi Moꞌa⌋:

«Te kope haŋa mo riva-riva ꞌe mo koa o tōꞌona noho iŋa ꞌi te ao nei,

e ꞌite mo haka noho i tōꞌona ꞌarero

ꞌo vānaŋa i te meꞌe taꞌe tano, ꞌe ꞌo kī i te reo-reo.

¹¹E haka tapa mai te meꞌe taꞌe tano

ꞌe e aŋa i te meꞌe tī-tika ki te mata o te ꞌAtua;

e kimi i te ara o te haumārū ꞌe ꞌai ka oho rō a ira.

¹²Te ꞌAtua, paꞌi, e hāpaꞌo rō ꞌana i te nuꞌu aŋa i te meꞌe tī-tika

ꞌe e haka roŋo rō ꞌana i te rāua pure.

ꞌE ꞌina he haka tano i te manaꞌu o te nuꞌu aŋa i te meꞌe taꞌe tano».

¹³Mo aŋa mo oho nō o kōrua i te meꞌe riva-riva, ¿ko ai ia te meꞌe mo aŋa atu i te meꞌe rake-rake? ¹⁴ꞌE mo topa atu o te ꞌati ꞌi ruŋa i a kōrua, ka ai atu e aŋa ꞌana i te meꞌe tī-tika, he haꞌamaitai atu kōrua e te ꞌAtua. ꞌO ira, ꞌina ko riꞌa-riꞌa ꞌi te nuꞌu tōtōā atu. ¹⁵Te meꞌe o kōrua mo aŋa: he haꞌamuri ki a Ietū Kiritō ꞌi roto i te māhatu pa he Pūꞌoko Haka Tere o kōrua i a ia te kī iŋa hopeꞌa o te meꞌe mo topa atu ki a kōrua. ꞌE ꞌi te hora taꞌatoꞌa e ꞌite pē hē kōrua ka pāhono ena ki te nuꞌu ꞌui atu he aha kōrua e haka moe ena i te manaꞌu ꞌi ruŋa i a Ietū. ¹⁶ꞌE ana pāhono, hai haumārū ꞌe hai moꞌa. ꞌIna kōrua ko aŋa i te meꞌe taꞌe tano. Pē ira te nuꞌu vānaŋa taꞌe tano o ruŋa i a kōrua ka haꞌamā ena ꞌi te rāua vānaŋa ꞌi te takeꞌa i te kōrua noho iŋa tano ꞌo te ai o kōrua he nuꞌu haka moe i te manaꞌu ꞌi ruŋa i te ⌊Kiritō⌋.

¹⁷ꞌAta hau rō atu ꞌi te tano mo ꞌamo i te ꞌati topa ꞌi ruŋa i a kōrua ꞌo te aŋa i te meꞌe riva-riva, ana haŋa te ꞌAtua, ki te ꞌamo i te ꞌati ꞌo te aŋa i te meꞌe taꞌe tano. ¹⁸ꞌI te hara, paꞌi, o tātou i mate ai te Kiritō, ꞌe tōꞌona mate era mo te hora taꞌatoꞌa. ꞌIna e tahi ꞌāꞌana meꞌe taꞌe tano i aŋa ꞌe, mo haka riva-riva i a tātou ki te ꞌAtua, i ꞌamo ai i te ūtuꞌa o te mate mo tātou, nuꞌu aŋa i te meꞌe taꞌe tano. Ka ai atu i mate rō tōꞌona hakari taŋata, he vārua ōꞌona te meꞌe i taꞌe mate. ¹⁹Hai vārua era ōꞌona i oho i tātara ai ki te vārua e puru rō ꞌā, ²⁰vārua o te nuꞌu o te noho iŋa era o Nōē taꞌe haꞌatura ki te ꞌAtua, nuꞌu tiaki ꞌe haꞌaoromaꞌi e te ꞌAtua, ꞌi te matahiti taꞌatoꞌa aŋa era e Nōē i te pahī, mo hārui o te rāua manaꞌu ki ruŋa i a ia. ꞌE ꞌi rā hora, hoko vaꞌu nō i uru ai ki roto i te pahī ꞌe i ora ai ꞌi te ꞌati era o te vai. ²¹ꞌE nei meꞌe e tuꞌu rō ꞌā pa he eꞌa iŋa o tātou mai roto i te ūtuꞌa o te hara he mate, meꞌe e haꞌaauraꞌa nei hai ⌊papatito⌋. ꞌE nei papatito taꞌe e haka maꞌitaki ꞌā i te hakari; e kī ꞌā ki te ꞌAtua pē nei ē: e ko haka rē a tātou i a ia ki te hora hopeꞌa ꞌi te ꞌite e tātou ko haka kore ꞌana e ia i te tātou hara hai ora iŋa era o Ietū Kiritō mai te mate. ²²ꞌE hora nei, ꞌai te raŋi ꞌi te pāꞌiŋa mataꞌu o te ꞌAtua, kona mo te kope hopeꞌa o te hōnui, e noho ena ꞌe e haka tere ena i te merahi taꞌatoꞌa ꞌe i te ŋā vārua taꞌatoꞌa ena e ai rō ꞌana te rāua tōroꞌa ꞌe pūai.

¹Ko ꞌite ꞌana e tātou: a Ietū Kiritō i ꞌamo rō i te ꞌati ꞌi te ao nei. ꞌI roto i tōꞌona manaꞌu, paꞌi, ko haka tano era ꞌana i a ia mo aŋa pē ira, ana haŋa te ꞌAtua. ꞌO ira te tātou manaꞌu e tuꞌu pa he manaꞌu mau era ꞌā ōꞌona. Te kope manaꞌu pē ira ko hārui ꞌana hai tuaꞌivi i te hara, ²ꞌe te meꞌe haŋa nō ꞌāꞌana mo te hora toe ōꞌona ꞌi te ao nei he haka tere i a ia e te meꞌe haŋa e te ꞌAtua, ꞌe taꞌe ꞌō e te meꞌe taꞌe tano pohe e te hakari.

³A kōrua, matahiti rahi i aŋa i oho ai i te meꞌe aŋa e te nuꞌu taꞌe haŋa ki te ꞌAtua. Te noho iŋa o kōrua ꞌi rā hora noho iŋa taꞌe tano: e aŋa ꞌana i te meꞌe taꞌe tano pohe e te hakari, i te ŋoŋoro taꞌe hāito i te kai ꞌe i te ꞌava, ꞌe e haꞌamuri ꞌana ki te ꞌītoro, meꞌe hano-hano mo te ꞌAtua. ⁴ꞌE, hora nei, ꞌi te haka tapa o kōrua mai muri i rā nuꞌu ꞌi te rāua noho iŋa taꞌe tano, he māere ꞌe he vānaŋa taꞌe tano mo kōrua. ⁵Ka ai atu pē ira, pe muꞌa ka oho ena, ka taꞌe haŋa atu e rāua, e kī tahi nō i te rāua meꞌe i aŋa ki te kope māꞌana e ture i te nuꞌu ora ꞌe i te nuꞌu mate. ⁶ꞌE ki te taina ko mate ꞌā ꞌi te hora nei i haka ꞌite rō i te ⌊roŋo riva-riva o ruŋa i a Ietū⌋ ꞌi te hora era e ora nō ꞌā, mo ravaꞌa e te rāua vārua i te ora ꞌi muri i te ꞌAtua, ka ai atu ko mate ꞌana te rāua hakari taŋata, he ūtuꞌa mau ꞌā mo te taŋata taꞌatoꞌa.

E hāꞌūꞌū ki te rua hai haŋa ꞌe hai pūai o te ꞌAtua

⁷Te paꞌo iŋa o te ao nā ko hāhine mai ꞌana. ꞌO ira, e ꞌite mo hāito i te kōrua meꞌe kī ꞌe i te kōrua meꞌe aŋa, ki riva ai te kōrua pure.

⁸ꞌI roto i a kōrua te meꞌe mo raꞌe he here he haŋa ki te rua. Mo haŋa, paꞌi, o tātou ki te rua hai māhatu, meꞌe taꞌe aŋarahi ia te meꞌe ena he haka rehu i te meꞌe taꞌe tano aŋa mai e te rua, ka ai atu meꞌe rahi.

⁹E toꞌo e hāpaꞌo te taina tuꞌu atu ki te kōrua hare, ꞌe ꞌina ko hēŋuꞌi-ŋuꞌi mo rāua.

¹⁰Hai meꞌe vaꞌai atu e te ꞌAtua mo aŋa i tāꞌana aŋa, e hāꞌūꞌū ki te rua, pa he nuꞌu ꞌite i te haka tere riva-riva i te rauhuru meꞌe vaꞌai e ia. ¹¹Te auraꞌa: te kope ki a ia i vaꞌai ai e te ꞌAtua i te meꞌe he haka ꞌite i tāꞌana vānaŋa, e haka ꞌite i te vānaŋa mau ꞌā o te ꞌAtua. ꞌE te kope ki a ia i vaꞌai ai i te meꞌe he hāꞌūꞌū ki te rua, e aŋa hai pūai vaꞌai e te ꞌAtua, ki haꞌahana-hana tahi ai ki te ꞌAtua hai Ietū Kiritō, i a ia te nui-nui ꞌe te pūai ki te hora hopeꞌa. Ka ai pē ira.

E koa ꞌi te hora topa atu o te ꞌati

¹²E te taina haŋa rahi ē, ꞌina kōrua ko māere ꞌo te ai ko topa atu ꞌana te ꞌati ꞌi ruŋa i a kōrua, pa he haka ꞌatu iŋa ena i te piru hai ahi, ꞌe ꞌina ko manaꞌu he meꞌe huru kē e tahi. ¹³Te tano mau: e koa kōrua ꞌo te ꞌamo takoꞌa i te mamae tuꞌu pa he mamae ꞌamo e te ⌊Kiritō⌋, ki rahi ai te kōrua koa ꞌi te hora ka haka takeꞌa mai ena i tōꞌona nui-nui.

¹⁴E koa kōrua mo vā-vā atu e te nuꞌu ꞌo te ai o kōrua ꞌa Ietū Kiritō; hai meꞌe nei e ꞌite ena: te ⌊Vārua Maitai⌋ pūai o te ꞌAtua nā ꞌi ruŋa i a kōrua ꞌi te hora taꞌatoꞌa. ¹⁵Mo ꞌamo o kōrua i te ꞌati, pē hiva ꞌā ana taꞌe ai ꞌo te tiŋaꞌi ꞌo te haka mate i te taŋata, ꞌo te toke i te meꞌe o te rua, ꞌo te aŋa i te meꞌe taparahi-taꞌata, ꞌe ꞌo te ꞌāmui ki roto i te ture kē. ¹⁶Meꞌe kē te meꞌe he ꞌamo i te ꞌati ꞌo te ai o kōrua he ⌊kiritiano⌋, ꞌe, mo topa atu, ꞌina ko haꞌamā. Te meꞌe mo aŋa: he haꞌahana-hana i te ꞌAtua ꞌo te ai o kōrua ꞌa Ietū Kiritō.

¹⁷Nā ko tuꞌu mai ꞌana te hora mo haꞌamata o te ture, ꞌe ka haꞌamata ena a te huaꞌai o te ꞌAtua. ꞌE mo haꞌamata o te ture mai i a tātou, ¿pē hē ia te hopeꞌa raꞌa o te nuꞌu ꞌina he haꞌatura ki te ⌊roŋo riva-riva o te ꞌAtua⌋? ¹⁸Mo haꞌatiꞌa o te ꞌAtua mo topa o te ꞌati ꞌātā ꞌi ruŋa i te nuꞌu tano ki tōꞌona mata ꞌi raꞌe ki te toꞌo i a rāua ki te raŋi, ¿he aha rā nei te meꞌe ka topa ena ki te taŋata hara taꞌe moꞌa i a ia? ¹⁹ꞌO ira, te nuꞌu ꞌamo i te ꞌati ꞌo te ai pē ira te ꞌAtua i haŋa ai, e aŋa e oho nō i te meꞌe riva-riva, ꞌe e vaꞌai i a rāua ki tōꞌona rima, kope ꞌāꞌana a rāua i aŋa, ꞌe kope ki te hora hopeꞌa e ko taꞌe aŋa i tāꞌana meꞌe kī.

He hatu mo te nuꞌu pūꞌoko haka tere

¹Hora nei e haŋa rō ꞌana a au mo hatu ki te ŋā pūꞌoko haka tere ena o kōrua o te nuꞌu ⌊haka moe i te manaꞌu⌋ ꞌi ruŋa i a Ietū. A au he pūꞌoko haka tere takoꞌa, pē rāua, ꞌe he mataꞌite o te ꞌati topa era ꞌi ruŋa i te ⌊Kiritō⌋. Pē rāua e oꞌo takoꞌa rō a au ꞌi roto i tōꞌona nui-nui ka haka takeꞌa ena, te auraꞌa, i a au takoꞌa, pe muꞌa ka oho ena, te huru riva ōꞌona.

²E te pūꞌoko haka tere, e hāpaꞌo riva-riva kōrua i te māmoe o te ꞌAtua haka hāpaꞌo atu ki a kōrua. ꞌE ana hāpaꞌo, hai māhatu, pa he meꞌe haŋa o te ꞌAtua, taꞌe ꞌō ꞌo te ai nō ꞌāꞌana i kī atu. E hāpaꞌo hai haŋa, taꞌe ꞌō hai pohe ki te moni. ³ꞌIna ko manaꞌu: o kōrua rā māmoe haka hāpaꞌo atu era. Te meꞌe mo aŋa he haka takeꞌa ki a rāua pē hē a rāua ana haka tere hai haka tere iŋa tano ena o kōrua. ⁴Pē ira, ꞌi te hora o te tuꞌu iŋa haka ꞌou mai o te Pūꞌoko Haka Tere o te ŋāŋata hāpaꞌo māmoe taꞌatoꞌa, he haka hei atu i a kōrua hai meꞌe ꞌina e ko ŋaro ki te hora hopeꞌa, ko te meꞌe ena: he noho mau rō ꞌai kōrua ꞌi muri i a ia ꞌi roto i tōꞌona nui-nui ꞌana-ꞌana.

He hatu mo te taꞌatoꞌa nō taina

⁵ꞌE a kōrua, e te ŋā poki ꞌāpī ē, e haꞌatura ki te kōrua nuꞌu pūꞌoko haka tere. ꞌI roto i a kōrua i te nuꞌu haka moe i te manaꞌu ꞌi ruŋa i a Ietū ꞌina ko ai e tahi kope manaꞌu i hau rō atu a ia ki te rua ꞌo te ai:

«Te ꞌAtua ꞌina he haka tano i te manaꞌu o te nuꞌu manaꞌu i hau rō atu rāua ki te tētahi,

ꞌe ki te nuꞌu taꞌe manaꞌu pē ira, e hāꞌūꞌū ena hai riva rahi ōꞌona».

⁶E haka hauhaꞌa-ꞌore kōrua i a kōrua ꞌi muꞌa i te pūai nui-nui o te ꞌAtua, ki haka nui-nui atu ai i a kōrua ꞌi te hora tano ki a ia. ⁷E haka rē ꞌi te rima o te ꞌAtua te meꞌe taꞌatoꞌa haka mana-manaꞌu atu i a kōrua; e haŋa rō ꞌana, paꞌi, a ia mo hāpaꞌo atu i a kōrua.

⁸E veveri e ꞌara kōrua; te kope taꞌe haŋa atu ena ko Rukifero, nā e kimi e oho ꞌana, pa he reone maruaki, ki te taŋata mo kai. ⁹ꞌIna ko haꞌatiꞌa mo haka tere atu i a kōrua. E haka hio-hio e oho te kōrua haka moe iŋa i te manaꞌu ꞌi ruŋa i te ꞌAtua ꞌi te ꞌite pē nei ē: ꞌi te kona taꞌatoꞌa o te ao, e topa takoꞌa rō ꞌana te ꞌati tuꞌu pē ira ki te kōrua taina. ¹⁰ꞌE ki oti i te haꞌaoromaꞌi tahi i te ꞌati topa atu ꞌi ruŋa i a kōrua, he meꞌe e ko roa rahi, he haka riro e te ꞌAtua i a kōrua he nuꞌu ꞌina e tahi hape, e hio-hio rō ꞌana te manaꞌu ꞌi ruŋa i a ia, nuꞌu pūai mo haꞌaoromaꞌi, ꞌe nuꞌu noho, ki te hora hopeꞌa, ꞌi te ara o te ꞌAtua. A ia, paꞌi, he ꞌAtua kī mai, ꞌi tōꞌona riva rahi, mo noho o tātou ꞌi muri i a ia ꞌina he hopeꞌa raꞌa ꞌi roto i tōꞌona nui-nui ꞌana-ꞌana hai haka moe o tātou i te manaꞌu ꞌi ruŋa i a Ietū Kiritō, ¹¹ꞌe ꞌAtua hopeꞌa o te pūai haka tere i te meꞌe taꞌatoꞌa ꞌina he hopeꞌa raꞌa. Ka ai pē ira.

He ꞌaroha

¹²A Tirivano i hāꞌūꞌū mai mo pāpaꞌi atu i te parau nei. Mōꞌoku a ia he taina taꞌe haka rē i te ꞌAtua ki te hora hopeꞌa.

Tāꞌaku meꞌe ꞌiti-ꞌiti haka pāpaꞌi atu ena he meꞌe mo hatu ꞌe mo haka aŋi-aŋi atu pē nei ē: te riva rahi ꞌe te haŋa o te ꞌAtua ꞌi ruŋa i a kōrua. ꞌO ira, e uꞌi ꞌo hārui rō hai tuaꞌivi i tōꞌona haŋa mo kōrua.

¹³Te nuꞌu haka moe i te manaꞌu ꞌi ruŋa i a Ietū o ⌊Vāvīrōnia⌋,5.13 Te Vāvīrōnia ꞌi te kona nei ko Roma. haꞌataꞌa e te ꞌAtua māꞌana, pa he haꞌataꞌa iŋa ena i a kōrua, ꞌī e ꞌaroha atu ena ꞌe pē ira takoꞌa ꞌana a Marko, he kope pa he poki ꞌā ꞌāꞌaku.

¹⁴E ꞌaroha kōrua ki te kōrua taina hai māhatu.

Ka ai te haumārū ꞌi roto i a kōrua taꞌatoꞌa, e te nuꞌu o te Kiritō ē.