1 IOVANI

He parau raꞌe pāpaꞌi e

Iovani

Te kope ꞌāꞌana i pāpaꞌi i te parau nei kai haka ꞌite mai ko ai tōꞌona ꞌīŋoa. ꞌE, ka ai atu pē ira, meꞌe rahi te meꞌe o te puka nei tuꞌu pa he ꞌevaneria ena ꞌa ⌊Iovani⌋. ꞌO ira te nuꞌu ⌊kiritiano⌋ e kī ena: ꞌa Iovani te puka nei i pāpaꞌi. Te meꞌe haka ꞌite mai ꞌi ruŋa nei: te ꞌAtua he mōrī (1.5), ꞌe he haŋa (4.8), ꞌe e haka takeꞌa rō mai ꞌana i tōꞌona haŋa hai Ietū Kiritō, Poki ꞌāꞌana (4.9). Te kope pāpaꞌi era i te parau nei e haka aŋi-aŋi rō mai ꞌā: te kope haŋa ki te ꞌAtua ꞌe ki a Ietū, e haŋa takoꞌa ki te taina (4.11–12), ꞌe te kope haka moe i te manaꞌu ꞌi ruŋa i a Ietū, e noho ꞌi roto i te mōrī (1.7), ꞌina ko hara ꞌe ꞌina ko reo-reo (2.3–6).

Mo te kope pāpaꞌi i te puka nei, he parautiꞌa mau ꞌā a Ietū Kiritō he Vānaŋa vaꞌai i te ora, ꞌe nei Vānaŋa ko ai era ꞌana ꞌi raꞌe ki te aŋa i te ao (1.1–4). Te meꞌe haka pūai mai e te kope nei: e hāpaꞌo tātou e te nuꞌu maꞌori reo-reo kī: a Ietū Kiritō kai tuꞌu mai ki te ao nei pa he taŋata (4.2). Ka ai atu pē ira, ko ꞌite ꞌana e ia e aŋi-aŋi nō e te nuꞌu haka moe parautiꞌa i te manaꞌu ꞌi ruŋa i a Ietū i te maꞌori reo-reo ꞌe i te maꞌori taꞌe reo-reo; te kope nō era, paꞌi, mo kī i te vānaŋa tuꞌu pē rā, ꞌina he Vārua o te ꞌAtua ꞌi roto i a ia (4.3).

ꞌI ruŋa i te parau nei e haka haŋu mai ena mo haka moe mo oho nō i te manaꞌu ꞌi ruŋa i a Ietū. ꞌE e haka aŋi-aŋi mai ena ki te nuꞌu ⌊kiritiano⌋ parautiꞌa: i a rāua te ora ꞌāpī ꞌina he hopeꞌa raꞌa hai vānaŋa nei: Te ꞌAtua «ko vaꞌai mai ꞌana... ki a tātou i te ora ꞌāpī ꞌina he hopeꞌa raꞌa, ꞌe nei ora ꞌi tāꞌana Poki. Te kope i a ia te Poki o te ꞌAtua, i a ia te ora ꞌāpī nei, ꞌe te kope ꞌina he Poki o te ꞌAtua i a ia, ꞌina he ora ꞌāpī i a ia» (5.11–12).

I te Vānaŋa te ora ꞌāpī ꞌina he hopeꞌa raꞌa

¹ꞌĪ a au he pāpaꞌi atu o ruŋa i te Vānaŋa i a ia te ora ꞌāpī ꞌina he hopeꞌa raꞌa. A ia ko ai era ꞌā ꞌi raꞌe ki te haꞌamata iŋa o te ao, ꞌe, ka ai atu pē ira, i takeꞌa rō ꞌe i ŋaroꞌa rō e mātou i a ia. He aŋi ꞌā, ko takeꞌa ꞌā ꞌe ko haka puā ꞌā e mātou. ²Te kope nei i a ia te ora ꞌāpī ꞌina he hopeꞌa raꞌa i haka takeꞌa rō i a ia ki te taŋata. I takeꞌa rō e mātou ꞌe he mataꞌite mātou ōꞌona. ꞌO ira e haka ꞌite atu ena o ruŋa i a ia. ꞌI muri i te ꞌAtua Matuꞌa a ia, ꞌe i haka takeꞌa rō mai ki a mātou. ³E haka ꞌite atu ena o ruŋa i tū kope takeꞌa ꞌe ŋaroꞌa era e mātou, mo ravaꞌa takoꞌa e kōrua i te ora ꞌāpī nei i a mātou, he ora i te ꞌAtua Matuꞌa ꞌe i tāꞌana Poki ko Ietū Kiritō, ⁴mo ko-koa tahi o tātou ꞌo te haka moe takoꞌa o kōrua i te manaꞌu ꞌi ruŋa i a ia.

He eꞌa iŋa mai roto i te hara

⁵Te roŋo hāpī mai era e Ietū Kiritō ꞌe e haka ꞌite atu ena e mātou: te ꞌAtua he Mōrī ꞌe ꞌina he meꞌe pōꞌuri ꞌi ruŋa i a ia. ⁶Mo kī o tātou: i a tātou te ora ꞌāpī o te ꞌAtua, ꞌe te parautiꞌa mau ꞌi roto i te pōꞌuri a tātou e noho nei, e reo-reo ꞌana a tātou, ꞌe te noho iŋa o tātou ꞌina he tano ki te roŋo parautiꞌa o te ꞌAtua. ⁷ꞌE mo noho o tātou ꞌi roto i te mōrī, pa he oho iŋa o te ꞌAtua, i a tātou te ora ꞌāpī o te ꞌAtua, ꞌe te toto o tāꞌana poki ena ko Ietū e haka kore rō ꞌana i te tātou hara.

⁸Mo kī o tātou ꞌina a tātou he hara, e reo-reo ꞌana a tātou ki a tātou ꞌā, ꞌe ꞌina kai aŋi-aŋi i te roŋo parautiꞌa o te ꞌAtua. ⁹ꞌE mo kī o tātou ki te ꞌAtua i te tātou hara, he haka kore e ia, ꞌe he haka maꞌitaki i te meꞌe taꞌatoꞌa taꞌe tano o roto i te tātou māhatu, ꞌi te ai ōꞌona he ꞌAtua aŋa i te meꞌe tī-tika ꞌe haka tano i tāꞌana meꞌe kī. ¹⁰ꞌE mo kī o tātou ꞌina a tātou kai hara, e kī ꞌana ia a tātou i te reo-reo o te ꞌAtua, ꞌe ꞌina a tātou he haŋa parautiꞌa ki tāꞌana vānaŋa.

¹E te ŋā poki ꞌāꞌaku ē, e pāpaꞌi atu ena a au i te meꞌe nei ꞌo hara kōrua. ꞌE mo hara tāꞌue e tahi o kōrua, e ai rō ꞌana e tahi kope ꞌi muꞌa o te ꞌAtua mo vānaŋa mo te tātou ora ko Ietū Kiritō, ꞌe a ia he kope aŋa i te meꞌe tī-tika. ²A Ietū i vaꞌai rō i a ia pa he tūtia mo tātou, ki haka kore ai e te ꞌAtua i te tātou hara, ꞌe taꞌe nō i te hara o tātou, i te hara takoꞌa o te nuꞌu taꞌatoꞌa o te ao.

He roŋo o te meꞌe he haŋa

³A tātou e ꞌite nei e māhani rō ꞌana ki te ꞌAtua hai haꞌatura o tātou ki te roŋo o te ꞌAtua. ⁴Te kope kī: «Ko māhani ꞌā a au i te ꞌAtua» ꞌe ꞌina he haꞌatura ki tāꞌana meꞌe kī, he reo-reo e tahi, ꞌe ꞌina he maꞌu i te roŋo parautiꞌa o te ꞌAtua. ⁵ꞌE te kope haꞌatura ki tāꞌana vānaŋa, ko ia te kope haŋa parautiꞌa ki te ꞌAtua. E ꞌite nei: o te ꞌAtua mau ꞌā a tātou hai haꞌatura tātou ki a ia. ⁶Te kope kī: ꞌi muri i te ꞌAtua a ia, e haka tere ia i a ia pē Ietū Kiritō.

⁷E te taina, taꞌe o ruŋa i te roŋo ꞌāpī a au e pāpaꞌi atu ena, o ruŋa i te roŋo tuai, he roŋo ko ꞌite era ꞌana e kōrua mai te hora haka moe era ꞌā i te manaꞌu ꞌi ruŋa i a Ietū: e haŋa ki te rua. ⁸ꞌE, ka ai atu pē ira, e haka ꞌite atu ena ꞌi nei roŋo pa he meꞌe ꞌāpī. Ko takeꞌa ꞌā, paꞌi, ꞌi ruŋa i a Ietū ꞌe ꞌi ruŋa i a kōrua. Hai haꞌatura ki te roŋo nei he ŋaro he oho te meꞌe he pōhāhā, ꞌe he māꞌeha he oho te hāpī parautiꞌa o te ꞌAtua pa he mōrī.

⁹Te kope kī: ꞌi roto i te māꞌeha a ia, ꞌe te parautiꞌa mau e riri rō ꞌana mo tōꞌona taina, ko te noho iŋa ꞌana ꞌi roto i te pōhāhā. ¹⁰Te kope haŋa hai māhatu ki tōꞌona taina, ꞌi roto i te māꞌeha e noho ena, ꞌe ꞌina e tahi meꞌe haka hara i a ia. ¹¹ꞌE te kope riri mo tōꞌona taina ꞌi roto i te pōhāhā e noho ꞌe e haꞌere ena, ꞌe ꞌina he ꞌite ki hē e oho ena, ꞌi te meꞌe era ꞌi te pōhāhā ꞌina he takeꞌa haka ꞌou.

E haŋa ki te ꞌAtua ꞌe taꞌe ki te meꞌe o te ao nei

¹²E te ŋā poki ē, nuꞌu haka moe iho i te manaꞌu ꞌi ruŋa i a Ietū ē,

e pāpaꞌi atu ena a au ꞌo te ai hai Ietū Kiritō te kōrua hara i haka kore ai e te ꞌAtua.

¹³E te matuꞌa ē, nuꞌu paꞌari ꞌi te meꞌe o te ꞌAtua haka moe oho nō i te manaꞌu ꞌi ruŋa i a Ietū ē,

e pāpaꞌi atu ena a au ꞌo te ai ko māhani ꞌana a kōrua i te kope ko ai era ꞌana ꞌi raꞌe ki te haꞌamata iŋa o te ao.

E te ŋā poki ꞌāpī, nuꞌu pūai pa he ŋā poki ꞌāpī ꞌi te ⌊haka moe i te manaꞌu⌋ ꞌi ruŋa i a Ietū ē,

e pāpaꞌi atu ena a au ki a kōrua ꞌo te ai ko rē ꞌana a kōrua ki a Rukifero.

¹⁴I pāpaꞌi atu ai a au, e te nuꞌu haka moe iho i te manaꞌu ꞌi ruŋa i a Ietū ē,

ꞌo te ai ko māhani ꞌā a kōrua ki te ꞌAtua Matuꞌa.

I pāpaꞌi atu ai a au, e te nuꞌu paꞌari ꞌi te meꞌe o te ꞌAtua ē,

ꞌo te ai ko māhani ꞌana a kōrua i te kope ko ai era ꞌana ꞌi raꞌe ki te haꞌamata iŋa o te ao.

I pāpaꞌi takoꞌa atu ai a au, e te nuꞌu pūai pa he ŋā poki ꞌāpī ē,

he hio-hio o te kōrua haka moe iŋa i te manaꞌu ꞌi ruŋa i a Ietū;

e maꞌu rō ꞌana, paꞌi, kōrua i te vānaŋa o te ꞌAtua ꞌi roto i te kōrua māhatu,

ꞌe ko rē ꞌana kōrua ki a Rukifero.

¹⁵E te taina, ꞌina kōrua ko haŋa ki te ao haka tere hai manaꞌu taŋata ꞌe ki te meꞌe vaꞌai mai. Mo haŋa o kōrua, ꞌina ia kōrua he haŋa ki te ꞌAtua Matuꞌa ¹⁶ꞌo te ai pē nei ē: te meꞌe vaꞌai mai e te ao haka tere hai manaꞌu taŋata taꞌe mai te Matuꞌa i oho mai ai, mai te ao mau nei ꞌā. ꞌE ko te ŋā meꞌe nei te meꞌe vaꞌai e te ao: he pohe ki te meꞌe haŋa nō e te hakari, he pohe ki te meꞌe takeꞌa e te mata ꞌe he haka manaꞌu i te taŋata: i a ia mau nō te tano ꞌo te ai ōꞌona he ꞌono. ¹⁷ꞌE te ao haka tere hai manaꞌu taŋata nā e kore e oho ena koia ko tāꞌana meꞌe taꞌatoꞌa taꞌe tano. ꞌE te kope aŋa i te meꞌe haŋa e te ꞌAtua, i a ia te ora ꞌāpī ꞌina he hopeꞌa raꞌa.

ꞌIna ko haka tapa mai muri i a Ietū

¹⁸E ŋā poki ē, ko te hora hopeꞌa era nei. Ko ŋaroꞌa ꞌana e kōrua nā e oho mai ena te kiritō reo-reo. ꞌE ꞌi te hora nei, ko ꞌata rahi mai ꞌana. Pē ira a tātou e ꞌite nei ko te hora hopeꞌa era nei. ¹⁹A rāua mai roto i a tātou i eꞌa ai, ꞌe, ka ai atu pē ira, taꞌe a rāua o tātou. ꞌĀhani, paꞌi, o tātou ko noho mai ꞌana. Te meꞌe nei i topa ai mo takeꞌa riva-riva: taꞌe taꞌatoꞌa nuꞌu o roto i a tātou he nuꞌu o tātou.

²⁰ꞌE a kōrua ko haꞌataꞌa ꞌana e Ietū Kiritō māꞌana hai vaꞌai atu i te ⌊Vārua Maitai⌋. ꞌO ira a kōrua taꞌatoꞌa e ꞌite ena i te hāpī parautiꞌa. ²¹E pāpaꞌi atu ena a au taꞌe ꞌo te taꞌe ꞌite o kōrua i te hāpī parautiꞌa, ꞌo te ai e ꞌite rō ꞌana e kōrua. ꞌE, ko ꞌite takoꞌa ꞌana e kōrua ꞌina e tahi reo-reo eꞌa mai roto i te hāpī parautiꞌa.

²²¿Ko ai ia te kope reo-reo? He kope kī: a Ietū taꞌe he ⌊Kiritō⌋. Ko ia te kiritō reo-reo ꞌo te ai pa he taꞌe haŋa iŋa era ꞌā ōꞌona ki te ꞌAtua Matuꞌa, pē ira ꞌā e taꞌe haŋa takoꞌa ena ki tāꞌana Poki. ²³Te kope taꞌe haŋa ki te Poki, taꞌe a ia o te ꞌAtua Matuꞌa. ꞌE te kope kī: o te Poki a ia, o te ꞌAtua Matuꞌa takoꞌa a ia.

²⁴ꞌO ira, e hāpaꞌo ꞌe e haka tere kōrua hai hāpī ŋaroꞌa mai te hora haka moe era ꞌā i te kōrua manaꞌu ꞌi ruŋa i a Ietū. Mo aŋa pē ira, e ko topa kē a kōrua mai muri i te ꞌAtua Poki ꞌe mai muri i te ꞌAtua Matuꞌa. ²⁵ꞌE te meꞌe hōrea mai era e Ietū Kiritō ko te meꞌe nei: he ora ꞌāpī ꞌina he hopeꞌa raꞌa.

²⁶E pāpaꞌi atu ena a au i te ŋā meꞌe nei, ꞌo haka roŋo kōrua ki te nuꞌu reo-reo atu ꞌe ꞌo haka tapa kōrua mai te hāpī parautiꞌa. ²⁷ꞌIna ko rehu: a kōrua ko haꞌataꞌa ꞌā e Ietū Kiritō māꞌana hai vaꞌai atu i te Vārua Maitai, ꞌe taꞌe i te taŋata te vānaŋa hopeꞌa o ruŋa i te meꞌe o te ꞌAtua. Mo te Vārua Maitai e haka ꞌite atu o ruŋa i te meꞌe taꞌatoꞌa ꞌe tāꞌana hāpī he parautiꞌa, taꞌe he reo-reo. ꞌE, pa he meꞌe haka ꞌite atu e ia, ꞌina kōrua ko haka tapa mai muri i a Ietū Kiritō.

²⁸ꞌĒ-ē, ꞌina kōrua ko haka tapa. Ka haka noho nō kōrua, e ŋā poki ē, ꞌi muri i te Kiritō, ꞌo haꞌamā kōrua ꞌe ꞌo riꞌa-riꞌa ꞌi muꞌa i a ia ꞌi te hora o tōꞌona hoki iŋa mai.

He ŋā poki o te ꞌAtua

²⁹Ko ꞌite ꞌana e kōrua: a Ietū he kope aŋa i te meꞌe tī-tika. ꞌE e ꞌite takoꞌa: te nuꞌu taꞌatoꞌa aŋa i te meꞌe tī-tika he ŋā poki o te ꞌAtua.

¹Ka haka topa rā te kōrua manaꞌu ꞌi te rahi o te haŋa o te ꞌAtua Matuꞌa ki a tātou e kī mai ena e ia he ŋā poki tātou ꞌāꞌana, ꞌe he aŋi ꞌā, ꞌāꞌana mau ꞌā a tātou. ꞌO ira te nuꞌu o te ao haka tere hai manaꞌu taŋata e taꞌe māhani ena ki a tātou, he taꞌe māhani o rāua ki te ꞌAtua.

²E te taina, he ŋā poki tātou o te ꞌAtua. Ka ai atu ꞌina a tātou kai takeꞌa vave ꞌā pē hē te tātou huru pe muꞌa ka oho ena, a tātou e ꞌite rō ꞌana pē nei ē: ka tuꞌu haka ꞌou mai ena a Ietū Kiritō, te tātou huru pē ia ꞌā ꞌi te meꞌe era he takeꞌa iho mau e tātou i a ia. ³ꞌE taꞌatoꞌa nuꞌu tiaki ki te hoki iŋa mai o Ietū Kiritō, e haka tapa rō ꞌana mai roto i te hara, mo riro o rāua pē Ietū Kiritō, he taŋata hara kore.

⁴Kope nō era mo hara, e hape ꞌā ki te haka tere iŋa o te ꞌAtua; te hara, paꞌi, he hape ki te haka tere iŋa o te ꞌAtua. ⁵E ꞌite rō ꞌana e kōrua: a Ietū i oho mai ai ki te ao nei mo haka kore i te hara o te taŋata, ꞌe ko ꞌite takoꞌa ꞌana e kōrua: ꞌina ōꞌona hara. ⁶Te nuꞌu taꞌatoꞌa haka noho nō i a rāua ꞌi muri i a Ietū ꞌina he noho ꞌi roto i te hara. ꞌE te nuꞌu noho ꞌi roto i te hara, kai takeꞌa ꞌe kai māhani ꞌā i a ia.

⁷E te ŋā poki ꞌāꞌaku ē, e uꞌi kōrua ꞌo reo-reo rō atu: te kope aŋa i te meꞌe tī-tika, he taŋata tano ki te mata o te ꞌAtua, pē Ietū. ⁸ꞌE te kope aŋa i te meꞌe taꞌe tano ꞌa Rukifero. Mai te haꞌamata iŋa o te ao, paꞌi, a Rukifero e hara e oho mai ena. ꞌE te Poki o te ꞌAtua i oho mai ai mo te meꞌe mau nei ꞌā: mo haka kore i te meꞌe aŋa e Rukifero.

⁹ꞌIna e tahi poki parautiꞌa o te ꞌAtua noho ꞌi roto i te hara ꞌo te ai ꞌi roto i a ia te manaꞌu o te ꞌAtua; ꞌina he haŋa haka ꞌou mo hara ꞌi te ai ōꞌona o te ꞌAtua.

¹⁰E ꞌite rō ꞌana ko ai te ŋā poki o te ꞌAtua ꞌe ko ai te ŋā poki ꞌa Rukifero: te kope taꞌe aŋa i te meꞌe tano ꞌe taꞌe haŋa ki tōꞌona taina, taꞌe o te ꞌAtua.

He roŋo o te meꞌe ena he haŋa

¹¹He roŋo nei te roŋo ŋaroꞌa e kōrua mai te hora haka moe era i te kōrua manaꞌu ꞌi ruŋa i a Ietū: e here tātou ki a tātou ꞌā. ¹²ꞌIna ko ai tātou pē ⌊Kāiŋa⌋. A ia ꞌa Rukifero, ꞌe i tiŋaꞌi i haka mate ai i tōꞌona taina. ¿ꞌO te aha i tiŋaꞌi ai i tōꞌona taina? ꞌO te ai te meꞌe aŋa o tōꞌona taina he meꞌe riva-riva ꞌe tāꞌana meꞌe aŋa he meꞌe taꞌe tano.

¹³E te taina, ꞌina kōrua ko huru kē ana maꞌu i te riri mo kōrua e te taŋata o te ao nei. ¹⁴E ꞌite nei ko eꞌa ꞌana a tātou mai roto i te mate ꞌe ko oꞌo ꞌā ki roto i te ora he here o tātou ki te tātou taina. Te kope taꞌe haŋa ki tōꞌona taina kai eꞌa ꞌana mai te mate. ¹⁵Te kope maꞌu i te riri mo tōꞌona taina he kope taparahi-taꞌata tiŋaꞌi taŋata, ꞌe a kōrua ko ꞌite ꞌā ꞌina e tahi kope tuꞌu pē rā mo ravaꞌa i te ora ꞌāpī ꞌina he hopeꞌa raꞌa.

¹⁶A tātou e ꞌite rō ꞌā he aha te meꞌe he haŋa ki te rua ꞌo te ai i vaꞌai rō a Ietū i a ia mo mate mo tātou. Pē ira takoꞌa ꞌā a tātou ana meꞌe mo te tātou taina. ¹⁷Kope nō era e ai rō ꞌā tōꞌona hauhaꞌa o te ao nei, ꞌe he takeꞌa i tōꞌona taina e ai rō ꞌana tāꞌana meꞌe hape ꞌe ꞌina he hāꞌūꞌū, ¿e ai mau rō ꞌana hō i a ia te haŋa o te ꞌAtua mo te rua?

¹⁸E te ŋā poki ꞌāꞌaku ē, ꞌina ko ai te tātou haŋa ki te rua hai haha nō; te tātou haŋa e haka takeꞌa hai meꞌe riva-riva aŋa e tātou. ¹⁹Pē ira ka ꞌite nei: o roto i te parautiꞌa a tātou, ꞌe ꞌina e tahi meꞌe mo haka haꞌamā i a tātou ꞌi muꞌa i te ꞌAtua. ²⁰ꞌE mo haka ꞌite mai e te māhatu ko hape ꞌā a tātou, e manaꞌu: te ꞌAtua ꞌata nui-nui ki te tātou māhatu; e ꞌite rō ꞌana, paꞌi, i te meꞌe taꞌatoꞌa.

²¹E te taina, mo taꞌe haka ꞌite mai o te tātou māhatu e hape rō ꞌā a tātou, ꞌina ia he meꞌe mo haꞌamā o tātou ꞌi muꞌa i te ꞌAtua, ²²ꞌe he vaꞌai mai e ia i te taꞌatoꞌa meꞌe o tātou mo no-noꞌi ꞌo te ai e haꞌatura rō ꞌana a tātou ki tāꞌana roŋo ꞌe e aŋa rō ꞌā i tāꞌana meꞌe haŋa. ²³ꞌE te roŋo ꞌāꞌana: he haka moe i te tātou manaꞌu ꞌi ruŋa i tāꞌana Poki ko Ietū Kiritō ꞌe he haŋa a tātou ki te rua, pa he meꞌe haka ꞌite mai era e ia. ²⁴Te nuꞌu haꞌatura ki tāꞌana roŋo, ꞌi roto i a ia e noho ena, ꞌe a ia ꞌi roto i rā nuꞌu. E ꞌite nei a tātou: ꞌi roto o tātou e noho ena hai ⌊Vārua Maitai⌋ vaꞌai mai era e ia.

I a ai te Vārua o te ꞌAtua

¹E te taina, ꞌina kōrua ko manaꞌu he parautiꞌa te vānaŋa o te nuꞌu taꞌatoꞌa kī e vānaŋa ꞌana a rāua i te meꞌe haka vānaŋa e te ꞌAtua. Te meꞌe o kōrua mo aŋa he haka ꞌatu ana ai te vārua era ꞌi roto i a rāua o te ꞌAtua mau ꞌā; e rahi rō ꞌana, paꞌi, te perofeta reo-reo ꞌi te ao.

²¿Pē hē a kōrua ana aŋi-aŋi ko ai te kope i a ia te Vārua o te ꞌAtua? He kope nō era mo kī: a Ietū Kiritō pa he taŋata i oho mai ai, i a ia te Vārua o te ꞌAtua. ³ꞌE te kope taꞌe kī pē ira o ruŋa i a Ietū, ꞌina i a ia te Vārua o te ꞌAtua; he vārua o te kiritō reo-reo te meꞌe i a ia. A kōrua i ŋaroꞌa rō i te vānaŋa e oho rō mai te vārua ena, ꞌe te parautiꞌa mau, ꞌī a ia ꞌi te ao nei.

⁴E ŋā poki, o te ꞌAtua a kōrua, ꞌe ko rē ꞌana ki te ŋā haꞌavare era ꞌo te ai te Vārua ena i a kōrua ꞌata pūai ki te vārua o te ao nei. ⁵A rāua o te ao nei. ꞌO ira e vānaŋa ena i te meꞌe o te ao nō nei, ꞌe te nuꞌu o te ao ki a rāua e haka roŋo ena. ⁶ꞌE a tātou o te ꞌAtua. Te kope māhani i te ꞌAtua ki a tātou e haka roŋo mai ena, ꞌe te kope taꞌe o te ꞌAtua e ko haka roŋo mai. Hai meꞌe nei e ꞌite ena e tātou ko ai te kope i a ia te Vārua kī i te parautiꞌa ꞌe ko ai te kope i a ia te vārua kī i te reo-reo.

Hai haŋa ki te rua e ꞌite ena o te ꞌAtua a tātou

⁷E te taina, e haŋa a tātou ki te rua ꞌo te ai te meꞌe he haŋa, mai te ꞌAtua e oho mai ena. Te nuꞌu taꞌatoꞌa haŋa ki te rua he ŋā poki o te ꞌAtua, ꞌe ko māhani ꞌā i a ia. ⁸ꞌE te kope taꞌe haŋa ki te rua, ꞌina he māhani i te ꞌAtua; te ꞌAtua, paꞌi, he haŋa.

⁹Ko haka takeꞌa mai ꞌana e te ꞌAtua i tōꞌona haŋa hai uŋa mai i tāꞌana Poki mau nō era e tahi ki te ao nei mo ravaꞌa e tātou te ora ꞌāpī ꞌina he hopeꞌa raꞌa hai ia. ¹⁰Ko te meꞌe nei te meꞌe he haŋa parautiꞌa: he uŋa mai o te ꞌAtua i tāꞌana Poki pa he tūtia mo haka kore o te tātou hara, taꞌe ꞌō ko te haŋa nei o tātou ki a ia.

¹¹E te taina, mo ai pē ira te haŋa iŋa mai o te ꞌAtua ki a tātou, e haŋa takoꞌa a tātou ki te rua. ¹²Ka ai atu ꞌina e tahi kope i takeꞌa i te ꞌAtua, mo haŋa o tātou ki te rua, he noho te ꞌAtua ꞌi roto i a tātou, ꞌe tōꞌona haŋa he takeꞌa ꞌi ruŋa i te tātou haka tere iŋa.

¹³Te meꞌe haka ꞌite mai he parautiꞌa mau ꞌana ananake tātou ko te ꞌAtua ko te meꞌe nei: ko vaꞌai mai ꞌana e ia i tōꞌona Vārua. ¹⁴ꞌE o mātou mau ꞌana i takeꞌa ꞌe i haka ꞌite pē nei ē: te Matuꞌa ko uŋa mai ꞌana i tāꞌana Poki mo eꞌa o te taŋata o te ao mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa hai ia. ¹⁵Te kope kī: a Ietū he Poki o te ꞌAtua, ararua ko te ꞌAtua e noho ena.

¹⁶Pē ira a tātou e ꞌite nei: te ꞌAtua e haŋa rahi rō mai ꞌana ꞌe tōꞌona haŋa iŋa mai e ko pau. Te ꞌAtua, paꞌi, he haŋa. Te kope noho ꞌi roto i te haŋa he kope haŋa ki te ꞌAtua ꞌe ki te rua, ꞌe ararua ko te ꞌAtua a ia e noho ena. ¹⁷Hai haŋa ki te rua e takeꞌa ena e maꞌu rō ꞌana a tātou i te haŋa o te ꞌAtua ꞌi roto i te tātou māhatu. Pē ira, ꞌi te mahana o te ture hopeꞌa, e ko haꞌamā tātou ꞌi te meꞌe era te noho iŋa o tātou ꞌi te ao nei pa he noho iŋa era ꞌā o Ietū Kiritō. ¹⁸Te kona ꞌi ira te haŋa, ꞌina he riꞌa-riꞌa. Te taŋata e riꞌa-riꞌa ena ꞌi te manaꞌu he haka ūtuꞌa i a rāua, ꞌe te haŋa parautiꞌa o te ꞌAtua he haka kore i te riꞌa-riꞌa. Te kope riꞌa-riꞌa ia, ꞌina kai aŋi-aŋi riva-riva ꞌā i te pūai o te haŋa o te ꞌAtua mōꞌona.

¹⁹A tātou e haŋa nei ꞌo te ai ꞌi raꞌe te ꞌAtua i haŋa mai ai. ²⁰Mo kī o te kope e tahi: «E haŋa rō ꞌana a au ki te ꞌAtua» ꞌe ꞌina he haŋa ki tōꞌona taina, he reo-reo e tahi. Te taŋata taꞌe haŋa ki tōꞌona taina, he meꞌe takeꞌa e ia, ¿pē hē ia ana haŋa ki te ꞌAtua, he meꞌe taꞌe takeꞌa e ia? ²¹He roŋo haka rē mai era nei e Ietū Kiritō: te kope haŋa ki te ꞌAtua e haŋa takoꞌa ki tōꞌona taina.

Te meꞌe rē ki te ao nei

¹Nuꞌu nō era mo rāua he parautiꞌa mau ꞌā a Ietū he ⌊Kiritō⌋ he ŋā poki rāua o te ꞌAtua. ꞌE te kope haŋa ki te ꞌAtua Matuꞌa e haŋa takoꞌa ki tāꞌana ŋā poki. ²Mo haŋa ia o tātou ki te ŋā poki o te ꞌAtua, he takeꞌa e haŋa parautiꞌa rō ꞌana tātou ki te ꞌAtua ꞌe e aŋa rō ꞌana tātou i tāꞌana meꞌe kī mai. ³Te haŋa ki te ꞌAtua ko te meꞌe nei: he haꞌatura ki tāꞌana roŋo, ꞌe tāꞌana roŋo meꞌe taꞌe paŋahaꞌa.

⁴A tātou, te ŋā poki o te ꞌAtua, e ko ravaꞌa e te ao haka tere hai manaꞌu taŋata mo haka tapa mai te ara o te ꞌAtua. Hai haka moe, paꞌi, o te tātou manaꞌu ꞌi ruŋa i a Ietū, e rē nei a tātou ki te ao nei. ⁵¿Ko ai ia te kope mo rē ki te ao nei? Te kope mōꞌona he parautiꞌa mau ꞌā a Ietū he Poki o te ꞌAtua.

⁶Te ꞌAtua i haka takeꞌa ai pē nei ē: a Ietū Kiritō he Poki ꞌāꞌana, ꞌi te hora ⌊papatito⌋ hai vai, ꞌe ꞌi te hora pariŋi o tōꞌona toto ꞌi ruŋa i te tātaurō. Te ⌊Vārua Maitai⌋ he mataꞌite o te meꞌe nei, ꞌe tāꞌana meꞌe kī he parautiꞌa. ⁷Hoko toru mataꞌite o te meꞌe nei: ⁸he Vārua Maitai, he vai ꞌe he toto, ꞌe ko tū meꞌe ꞌā i mataꞌite ai a to-toru.

⁹Mo haka roŋo o tātou ki te meꞌe kī ꞌe mataꞌite e te taŋata, ¿pē hē ia a tātou ana taꞌe haka roŋo ki te vānaŋa kī e te ꞌAtua o ruŋa i tāꞌana poki era ko Ietū? ¹⁰Te kope haka moe i tōꞌona manaꞌu ꞌi ruŋa i te Poki o te ꞌAtua e ꞌite mau rō ꞌana ꞌi roto i tōꞌona māhatu a Ietū he Poki o te ꞌAtua. ꞌE te kope taꞌe haka moe i tōꞌona manaꞌu ꞌi ruŋa i te meꞌe kī e te ꞌAtua e kī ꞌana i te reo-reo o te ꞌAtua, he taꞌe haka roŋo i te vānaŋa o te ꞌAtua o ruŋa o tāꞌana Poki. ¹¹ꞌE ko te meꞌe nei te meꞌe i kī e te ꞌAtua: ko vaꞌai mai ꞌana e ia ki a tātou i te ora ꞌāpī ꞌina he hopeꞌa raꞌa, ꞌe nei ora i tāꞌana Poki. ¹²Te kope i a ia te Poki o te ꞌAtua, i a ia te ora ꞌāpī nei, ꞌe te kope ꞌina he Poki o te ꞌAtua i a ia, ꞌina he ora ꞌāpī i a ia.

He meꞌe hopeꞌa

¹³E pāpaꞌi atu ena a au i te meꞌe nei mo ꞌite o kōrua, e te nuꞌu ⌊haka moe i te manaꞌu⌋ ꞌi ruŋa i te Poki o te ꞌAtua ē: i a kōrua te ora ꞌāpī ꞌina he hopeꞌa raꞌa.

¹⁴A tātou, te nuꞌu haka moe i te manaꞌu ꞌi ruŋa i a Ietū, ꞌina he riꞌa-riꞌa mo no-noꞌi ki te ꞌAtua, he ꞌite o tātou: te ꞌAtua e haka roŋo rō mai ꞌana i te meꞌe no-noꞌi e tātou ana tano rā meꞌe ki tōꞌona manaꞌu. ¹⁵ꞌE, ꞌi te ꞌite e haka roŋo rō mai ꞌana te ꞌAtua ki te tātou pure, e ꞌite takoꞌa nei: ꞌī i a tātou te meꞌe no-noꞌi era.

¹⁶Mo takeꞌa e tahi taŋata i tōꞌona taina e hara ꞌana, ꞌe rā hara taꞌe he hara mo haka ūtuꞌa i a ia hai mate, e pure mōꞌona, ꞌe mo te ꞌAtua e vaꞌai i te ora ꞌāpī ꞌina he hopeꞌa raꞌa ki rā taina. ꞌE nā e ai rō ꞌā e tahi hara he haka ūtuꞌa i a koe hai mate, ꞌe mo rā hara e ko kī atu e au e pure e kōrua. ¹⁷Te meꞌe taꞌatoꞌa taꞌe tano he hara. Ka ai atu pē ira, e ai rō ꞌana te hara e ko haka ūtuꞌa i a koe hai mate.

¹⁸Ko ꞌite ꞌana, paꞌi, e tātou ꞌina e tahi poki parautiꞌa o te ꞌAtua noho ꞌi roto i te hara. E hāpaꞌo rō ꞌana e te Poki o te ꞌAtua, ko Ietū Kiritō, ꞌe ꞌina e ko ravaꞌa mo haka puā e Rukifero. ¹⁹A tātou ko ꞌite takoꞌa ꞌana: o te ꞌAtua a tātou, ka ai atu ꞌa Rukifero te haka tere i te ao nei. ²⁰ꞌE, ko ꞌite takoꞌa ꞌā e tātou: ko tuꞌu mai ꞌana te Poki o te ꞌAtua, ꞌe ko vaꞌai mai ꞌā i te mārama-rama mo aŋi-aŋi ko ai te ꞌAtua parautiꞌa. ꞌE hora nei, ananake tātou ko nei ꞌAtua ꞌo te ai a tātou o tāꞌana Poki ko Ietū Kiritō. A ia he ꞌAtua parautiꞌa vaꞌai i te ora ꞌāpī ꞌina he hopeꞌa raꞌa.

²¹E ŋā poki, e uꞌi kōrua ꞌo haꞌamuri rō ki te meꞌe taꞌe he ꞌAtua parautiꞌa.