1 KŌRINTO

He parau raꞌe pāpaꞌi e Pauro ki te taina o

Kōrinto

Te parau nei i pāpaꞌi ai e Pauro mo te nuꞌu taina o Kōrinto. I pāpaꞌi ai ꞌi te meꞌe era e rahi rō ꞌana te meꞌe taꞌe tano aŋa e tētahi o rā ŋā taina. He hatu ia e Pauro pē hē te haka tere iŋa tano mo rāua mo te nuꞌu he ⌊kiritiano⌋. Te meꞌe raꞌe i kī: e ai rāua e tahi mau nō manaꞌu ꞌi te meꞌe o te ꞌAtua (1.10–17).

Te kona nei ko Kōrinto, e māhani era e te nuꞌu ꞌi rā noho iŋa, he kona ꞌi ira e rahi rō ꞌā te nuꞌu aŋa i te meꞌe hano-hano pohe nō e te hakari, ꞌātā e ai rō ꞌana te rāua vānaŋa pē nei ē: «e kōrinto ꞌana», he kī iŋa mo te nuꞌu aŋa i te meꞌe hopeꞌa o te hara. ꞌE te ꞌati o te nūnaꞌa taina ⌊haka moe i te manaꞌu⌋ ꞌi ruŋa i a Ietū o rā kona, te kope e tahi o roto o rāua ko moe ꞌana i te viꞌe o tōꞌona matuꞌa (5.1), he meꞌe ꞌina he aŋa korohaŋa e te nuꞌu taꞌe he kiritiano.

Te meꞌe taꞌe tano takoꞌa i aŋa e te taina o Kōrinto he horo i te rāua taina haka moe i te manaꞌu ꞌi ruŋa i a Ietū ꞌi muꞌa o te huē taꞌe he kiritiano, he meꞌe ꞌina ko aŋa e te nuꞌu haka moe i te manaꞌu ꞌi ruŋa i a Ietū. He ture e Pauro ꞌe he kī mo taꞌe aŋa haka ꞌou pē ira. E ai rō ꞌana, paꞌi, te nuꞌu o roto o rāua mo haka tī-tika i te rāua ture.

Tētahi ia nuꞌu taina o Kōrinto e manaꞌu era: meꞌe taꞌe tano te meꞌe he ⌊hāipo-ipo⌋, te auraꞌa, te noho pa he kenu pa he viꞌe, ꞌe he haka ꞌite e Pauro taꞌe he parautiꞌa te manaꞌu era o rāua. Ka ai atu pē ira, i haka rē nō ki te rāua manaꞌu, ꞌe pē nei i haka mao i kī ai: te kope haŋa mo hāipo-ipo, ko tano ꞌana, ꞌe te kope haŋa mo noho taureꞌa-reꞌa ꞌina ko piri tane, ꞌata hau rō atu i te riva-riva (7.38).

I ai takoꞌa rō te taina o Kōrinto e ꞌaka-ꞌaka rō ꞌana te manaꞌu o ruŋa i te ora iŋa haka ꞌou mai te mate (15.12). ꞌE ꞌi ruŋa nei i haka manaꞌu haka ꞌou ai e Pauro: he parautiꞌa mau ꞌana ko ora ꞌā a Ietū mai te mate (15.3–8). ꞌE he haka ꞌite pē nei ē: «Pa he ai iŋa o te mate hai taŋata mau nō e tahi, pē ira takoꞌa ꞌana hai taŋata mau nō e tahi ka ai ena te ora iŋa mai te mate» (15.21).

I haꞌaauraꞌa rō e Pauro ki te ŋā taina nei o Kōrinto: te nūnaꞌa taŋata haka moe i te manaꞌu ꞌi ruŋa i a Ietū he hakari o Ietū (12.12–30). I haka ꞌite takoꞌa rō: ꞌina e tahi hauhaꞌa te ꞌite meꞌe rahi meꞌe, te ꞌite mo vānaŋa meꞌe rahi nō atu ꞌarero, ꞌe te haka moe o te manaꞌu ꞌi ruŋa i a Ietū mo taꞌe haŋa ki te rua. ꞌO ira i kī ai pē nei ē: «E toru meꞌe ꞌina e ko kore ki te hora hopeꞌa: he haka moe iŋa i te manaꞌu ꞌi ruŋa i te ꞌAtua, he ŋatu o te haŋu ꞌi ruŋa i tāꞌana meꞌe hōrea mai era, ꞌe he haŋa ki te rua. ꞌE te meꞌe hopeꞌa o te hauhaꞌa o te ŋā meꞌe nei e toru he haŋa ki te rua» (13.13).

He ꞌaroha

^1-2A au, a Pauro, haꞌataꞌa mo ⌊ꞌāpōtoro⌋ ꞌa Ietū Kiritō hai haŋa o te ꞌAtua, he ꞌaroha atu māua ko te taina nei ko Tōtene ki a kōrua ki te nūnaꞌa taŋata ⌊haka moe i te manaꞌu⌋ ꞌi ruŋa i a Ietū o Kōrinto, haꞌataꞌa e ia mo nuꞌu ꞌāꞌana ꞌina e tahi hara ananake ko te nuꞌu o te kona taꞌatoꞌa haka moe i te manaꞌu ꞌi ruŋa i a Ietū, Pūꞌoko Haka Tere o tātou o te nuꞌu taꞌatoꞌa haꞌataꞌa e te ꞌAtua māꞌana. ³Ka ai ꞌi ruŋa i a kōrua te riva rahi ꞌe te haumārū o te ꞌAtua he Matuꞌa, ꞌe o te tātou Pūꞌoko Haka Tere ko Ietū Kiritō.

He māuru-uru

⁴He māuru-uru nō tāꞌaku aŋa ki te ꞌAtua mo kōrua ꞌi te riva rahi vaꞌai atu e ia hai Ietū Kiritō. ⁵Hai ia, paꞌi, te ꞌAtua i haꞌamaitai ai i a kōrua mo aŋi-aŋi riva-riva e kōrua i tāꞌana vānaŋa ꞌe mo ꞌite mo hāpī i te nuꞌu, ⁶ꞌi te meꞌe era e maꞌu hio-hio rō ꞌana kōrua ꞌi roto i te māhatu i te ⌊roŋo riva-riva o ruŋa i a Ietū Kiritō⌋. ⁷ꞌO ira, e tiaki nō ena kōrua ki te mahana o te hoki iŋa haka ꞌou mai o te tātou Pūꞌoko Haka Tere ko Ietū Kiritō, e ko hape mai i a kōrua e tahi meꞌe o te meꞌe taꞌatoꞌa vaꞌai e te ꞌAtua ki tāꞌana nuꞌu mo aŋa i tāꞌana aŋa. ⁸Mo te ꞌAtua e haka pūai i te kōrua haka moe iŋa i te manaꞌu ꞌi ruŋa i a Ietū ꞌātā ki te hopeꞌa, ꞌo ai te hape mo tuhi iŋa atu ꞌi te hora o tōꞌona hoki iŋa mai. ⁹ꞌE te ꞌAtua e ko taꞌe haka tano i tāꞌana meꞌe kī. ꞌĀꞌana, paꞌi, i haꞌataꞌa i a kōrua mo nuꞌu o tāꞌana Poki ko Ietū Kiritō, Pūꞌoko Haka Tere o tātou.

He haka topa-topa iŋa o te taina

¹⁰E te taina, hai ꞌīŋoa o te tātou Pūꞌoko Haka Tere ko Ietū Kiritō he ani atu a au mo ai o kōrua taꞌatoꞌa e tahi mau nō manaꞌu, ꞌe ꞌina ko haka topa kē-kē. E noho kōrua taꞌatoꞌa ꞌi roto i te haumārū, e tahi mau nō manaꞌu ꞌe e tahi mau nō meꞌe haŋa mo aŋa.

¹¹E kī atu ena a au i te meꞌe nei, e te taina ē, he ꞌite ōꞌoku, mai te huaꞌai o Kōroe, e tātake rō ꞌana kōrua ꞌi roto i a kōrua ꞌā. ¹²E ai rō ꞌā te nuꞌu o kōrua kī: «A au ꞌa Pauro»; ꞌe tētahi te kī: «A au ꞌa ꞌĀporo»; tētahi atu: «A au ꞌa Tefa»; ꞌe tētahi haka ꞌou atu te kī: «A au o te ⌊Kiritō⌋». ¹³¿Ka kī ꞌō e topa-topa rō ꞌana a Ietū? ¿I veo rō ꞌō a Pauro ꞌi ruŋa i te tātaurō mo te riva-riva o kōrua? ¿I ⌊papatito⌋ rō ꞌō kōrua hai ꞌīŋoa ōꞌona? ¹⁴¡He māuru-uru a au ki te ꞌAtua ꞌi te meꞌe era ꞌina e tahi o roto i a kōrua i papatito e au, ko Kīripo mau nō ararua ko Kāio! ¹⁵Pē ira ꞌina e tahi kope mo kī i papatito ai a ia hai ꞌīŋoa ōꞌoku. ¹⁶¡ꞌĀ! I papatito takoꞌa rō a au i te huaꞌai ꞌa Etefana, ꞌe ko rehu atu ꞌana i a au hoki i papatito rō a au i te tētahi nuꞌu. ¹⁷Te Kiritō ꞌina kai uŋa mai i a au mo papatito i te taŋata; mo haka ꞌite i te parau ꞌāpī riva-riva o ruŋa i a ia i uŋa mai ai, ꞌe taꞌe ꞌō hai vānaŋa nehe-nehe mo haka takeꞌa i tōꞌoku mārama-rama, pa he meꞌe aŋa e te taŋata o te ao, ꞌo taꞌe hauhaꞌa te mate o Ietū ꞌi ruŋa i te tātaurō.

He mārama-rama o te ꞌAtua ꞌe o te taŋata

¹⁸Te roŋo o te mate o Ietū ꞌi ruŋa i te tātaurō he meꞌe maꞌa-maꞌa nō atu e tahi mo te nuꞌu ꞌi ruŋa i a rāua ka topa ena te ūtuꞌa o te ꞌAtua. ꞌE mo tātou mo te nuꞌu eꞌa mai roto i te ūtuꞌa o te hara he pūai o te ꞌAtua. ¹⁹Pa he meꞌe hāꞌaki ꞌi ruŋa i te ⌊Pāpaꞌi Moꞌa⌋:

«E haka takeꞌa rō e au ꞌina e tahi hauhaꞌa te manaꞌu mārama-rama o te taŋata.

ꞌE te nuꞌu manaꞌu e ꞌite rahi rō ꞌana a rāua he haka mira-mira e au i te manaꞌu».

²⁰¿ꞌI hē i hopeꞌa ai te nuꞌu mārama-rama, te ⌊maꞌori o te haka tere hūrio⌋ ꞌe te kope haka kē mo vānaŋa i te meꞌe o te ao nei? Ko haka ꞌite mai ꞌā e te ꞌAtua: mōꞌona ꞌina e tahi hauhaꞌa te mārama-rama o te taŋata. ²¹Te ꞌAtua, paꞌi, ꞌi tōꞌona mārama-rama ꞌAtua i kī ai: te taŋata e ko riva mo ꞌite ko ai a ia hai mārama-rama taŋata mau nō. ꞌE, ꞌi tōꞌona riva rahi, i manaꞌu ai mo haka eꞌa i te taŋata mai roto i te ūtuꞌa o te hara ꞌe mo vaꞌai i te ora ꞌāpī ꞌina he hopeꞌa raꞌa hai haka moe o rāua i te manaꞌu ꞌi ruŋa i tāꞌana roŋo o ruŋa i a Ietū Kiritō, roŋo haka ꞌite e mātou, ka ai atu he meꞌe maꞌa-maꞌa nō atu e tahi mo te nuꞌu taꞌe haka moe i te manaꞌu ꞌi ruŋa i a Ietū.

²²Te ⌊hūrio⌋, mo haka moe iho i te rāua manaꞌu ꞌi ruŋa i rā roŋo, e takeꞌa ꞌi raꞌe i te mana, ꞌe te ⌊kirieko⌋, e vānaŋa e te taŋata hai mārama-rama. ²³ꞌE a mātou ꞌina he aŋa i te ŋā meꞌe era. Te mātou meꞌe aŋa he haka ꞌite he oho o ruŋa i te Kiritō veo era ꞌi ruŋa i te tātaurō. Te meꞌe nei he parauꞌino e tahi mo te hūrio, ꞌe mo te kirieko he meꞌe maꞌa-maꞌa nō atu e tahi. ²⁴ꞌE mo te nuꞌu haꞌataꞌa e te ꞌAtua māꞌana, ka hūrio ꞌe ka taꞌe hūrio, he haka takeꞌa iŋa o te ꞌAtua i tōꞌona pūai ꞌe i tōꞌona mārama-rama. ²⁵Te meꞌe aŋa e te ꞌAtua tuꞌu pa he meꞌe maꞌa-maꞌa e tahi mo te taŋata, he meꞌe ꞌata hau rō atu ꞌi te mārama-rama ki te manaꞌu mārama-rama taꞌatoꞌa o te taŋata. ꞌE te meꞌe o te ꞌAtua tuꞌu pa he meꞌe taꞌe pūai, he meꞌe ꞌata hau rō atu i te pūai ki te pūai taꞌatoꞌa o te taŋata.

Te taina o Kōrinto

²⁶E te taina, ꞌina ko rehu pē hē te taŋata e manaꞌu era o ruŋa i a kōrua ꞌi te hora haꞌataꞌa e te ꞌAtua i a kōrua māꞌana. Ki te rāua kī: nuꞌu taꞌe rahi te nuꞌu mārama-rama, te nuꞌu tōroꞌa ra-rahi ꞌe te nuꞌu te rāua huaꞌai nuꞌu hōnui o roto i a kōrua. ²⁷I haꞌataꞌa ai e te ꞌAtua i te taŋata māꞌana hai nuꞌu taꞌe hāpī ꞌe taꞌe mārama-rama rahi, ki te manaꞌu taŋata, mo haka haꞌamā i te nuꞌu hāpī rahi. I haꞌataꞌa takoꞌa rō i te nuꞌu taꞌe pūai, ki te kī o te taŋata, mo haka haꞌamā i te nuꞌu pūai.

²⁸Te nuꞌu taꞌe haka au ꞌe taꞌe haŋa e te taŋata, te auraꞌa, te nuꞌu ꞌina e tahi hauhaꞌa, ki te rāua kī, ko te nuꞌu nei te nuꞌu i haꞌataꞌa e te ꞌAtua māꞌana, mo haka takeꞌa: te nuꞌu e hauhaꞌa rō ꞌā ki te mata o te taŋata, ki te mata o te ꞌAtua taꞌe pē ira.

²⁹ꞌO ira, ꞌina e tahi kope mo haka paka i a ia ꞌi muꞌa i te ꞌAtua. ³⁰Hai ia, paꞌi, e ai nei tātou ꞌa Ietū Kiritō. ꞌE hai Ietū Kiritō e haka tere nei a tātou hai manaꞌu ꞌAtua ꞌe e tano nei ki tōꞌona mata. Hai ia takoꞌa e ai nei tātou he nuꞌu haꞌataꞌa māꞌana ꞌina e tahi hara ꞌe he nuꞌu eꞌa mai roto i te pūai o te hara. ³¹E kī rō ꞌana, paꞌi, ꞌi ruŋa i te Pāpaꞌi Moꞌa: «Te kope haŋa mo haka paka i a ia, te tano mau: e haka paka i te ꞌAtua, Pūꞌoko Haka Tere o tātou, ꞌo te meꞌe aŋa e ia».

He haka ꞌite iŋa o Pauro o ruŋa i te Kiritō

¹E te taina, hora oho vānaŋa atu era ōꞌoku o ruŋa i te meꞌe manaꞌu e te ꞌAtua mo aŋa taꞌe haka ꞌite mai era e ia ꞌi muꞌa ꞌā, taꞌe hai vānaŋa nehe-nehe mo haka takeꞌa atu ꞌō i tōꞌoku mārama-rama a au i haka ꞌite atu ai. ²E noho atu era a au ꞌi muri i a kōrua te meꞌe mau nō ꞌāꞌaku i manaꞌu he hāpī atu o ruŋa i a Ietū Kiritō ꞌe o ruŋa i tōꞌona mate iŋa ꞌi ruŋa i te tātaurō. ³I māroa atu ai a au ꞌi muꞌa o kōrua ꞌina e tahi ōꞌoku pūai e ŋaroꞌa era e au ꞌe e rurū rō ꞌā ꞌi te riꞌa-riꞌa, ꞌo taꞌe haka tano au i te meꞌe haŋa o te ꞌAtua. ⁴E vānaŋa atu era a au o ruŋa i te roŋo o te ꞌAtua, taꞌe hai vānaŋa mārama-rama e haka ꞌite atu era; o te ⌊Vārua Maitai⌋ te haka ꞌite atu he parautiꞌa rā vānaŋa era ꞌāꞌaku, ⁵ꞌo ai hai mārama-rama o te taŋata te haka moe iŋa ena o kōrua i te manaꞌu ꞌi ruŋa i a Ietū ꞌe taꞌe ꞌō hai pūai o te ꞌAtua.

Te meꞌe o te ꞌAtua e ꞌite ena hai Vārua Maitai

⁶Te parautiꞌa, ꞌi roto i te nuꞌu e hio-hio rō ꞌā te rāua haka moe iŋa i te manaꞌu ꞌi ruŋa i a Ietū e hāpī nei a mātou hai vānaŋa mārama-rama, ꞌe rā mārama-rama taꞌe he mārama-rama o te taŋata ꞌo he mārama-rama o te nuꞌu pūꞌoko haka tere o te ao nei. Te pūai, paꞌi, o te rāua mārama-rama pe te ŋaro pe te oho nō. ⁷Te meꞌe nei o mātou e vānaŋa nei: o ruŋa i te mārama-rama o te ꞌAtua taꞌe ꞌite e te taŋata: he meꞌe i manaꞌu e ia mo aŋa mo te tātou riva-riva pe muꞌa ka oho ena taꞌe haka ꞌite mai e ia ꞌi muꞌa ꞌā. Te meꞌe nei i manaꞌu ai mai te hora era kai aŋa ꞌā i te ao. ⁸Rā meꞌe manaꞌu era e te ꞌAtua mo aŋa ꞌina kai aŋi-aŋi e te nuꞌu pūꞌoko haka tere o te ao nei. ꞌĀhani, paꞌi, a rāua i aŋi-aŋi, e ko veo ꞌi ruŋa i te tātaurō i te tātou Pūꞌoko Haka Tere, kope i a ia te parau o te meꞌe taꞌatoꞌa. ⁹E kī rō ꞌana, paꞌi, ꞌi ruŋa i te ⌊Pāpaꞌi Moꞌa⌋:

«Te ꞌAtua ko haka riva-riva ꞌā mo te nuꞌu haŋa ki a ia

i te meꞌe ꞌina he kope raꞌe i takeꞌa, i ŋaroꞌa ꞌe korohaŋa i manaꞌu».

¹⁰Rā meꞌe taꞌe haka ꞌite mai era ꞌi muꞌa ꞌā ko haka aŋi-aŋi mai ꞌā e te ꞌAtua hai Vārua Maitai ꞌi te hora nei; a ia, paꞌi, e ꞌite rō ꞌā i te meꞌe taꞌatoꞌa, ꞌātā i te manaꞌu hopeꞌa o te ꞌAtua.

¹¹¿Ko ai te kope ꞌite i te manaꞌu o te taŋata mo taꞌe ai ko rā taŋata mau ꞌā? Pē ira takoꞌa te manaꞌu o te ꞌAtua, he Vārua Maitai mau nō te meꞌe ꞌite. ¹²ꞌIna i a tātou i te nuꞌu ⌊haka moe i te manaꞌu⌋ ꞌi ruŋa i a Ietū, te manaꞌu iŋa ena o te taŋata o te ao. Te meꞌe i a tātou he Vārua Maitai vaꞌai mai e te ꞌAtua, mo aŋi-aŋi he aha te meꞌe taꞌatoꞌa vaꞌai mai e ia ꞌi tōꞌona riva rahi.

¹³ꞌO ira, hora ena o mātou e hāpī ena o ruŋa i te ꞌAtua, e vānaŋa nei hai vānaŋa haka ꞌite mai e te Vārua Maitai, taꞌe hai vānaŋa mārama-rama hāpī mai e te taŋata. Pē ira e haꞌaauraꞌa nei i te meꞌe o te ꞌAtua hai vānaŋa vaꞌai mai e te Vārua Maitai.

¹⁴Te kope taꞌe haka moe i te manaꞌu ꞌi ruŋa i a Ietū ꞌe kore o te Vārua Maitai o roto i a ia ꞌina he toꞌo mōꞌona i te hāpī haka ꞌite e te Vārua Maitai; te hāpī nei he meꞌe maꞌa-maꞌa e tahi mōꞌona. ꞌE ꞌina e ko aŋi-aŋi, ꞌi te meꞌe era o te Vārua Maitai mau nō te haka aŋi-aŋi i te auraꞌa parautiꞌa o rā hāpī. ¹⁵Te kope ꞌi roto i a ia te Vārua Maitai e aŋi-aŋi rō ꞌana i te meꞌe taꞌatoꞌa haka ꞌite e te Vārua Maitai. ꞌE te kope ꞌina he Vārua Maitai o roto i a ia, ꞌina he aŋi-aŋi i te manaꞌu o te nuꞌu e ai rō ꞌā ꞌi roto i a rāua te Vārua Maitai. ¹⁶E kī rō ꞌana, paꞌi, ꞌi ruŋa i te Pāpaꞌi Moꞌa: «¿Ko ai te kope ꞌite i te manaꞌu o te ꞌAtua? ¿Ko ai te kope mo hāpī i a ia?». ꞌE, he manaꞌu o te ⌊Kiritō⌋ te meꞌe i a tātou.

Te manaꞌu taꞌe paꞌari o te taina o Kōrinto

¹E te taina, hora era ꞌā ōꞌoku ꞌi muri i a kōrua, kai tano a au mo hāpī atu i a kōrua pa he hāpī iŋa ōꞌoku i te nuꞌu haka tere e te ⌊Vārua Maitai⌋ paꞌari ꞌi te meꞌe o te ꞌAtua. I hāpī atu ai pa he nuꞌu taꞌe haka moe rahi i te manaꞌu ꞌi ruŋa i a Ietū, maꞌu oho i te manaꞌu o te ao nei, pa he ŋā poki ꞌi te meꞌe o te ⌊Kiritō⌋. ²ꞌE, pa he ŋā poki ꞌomo-ꞌomo ū hai ū e vaꞌai ena ꞌe taꞌe hai kai paŋahaꞌa, pē ira tāꞌaku meꞌe hāpī atu era, he hāpī taꞌe aŋarahi mo aŋi-aŋi e kōrua. Kai tano riva-riva ꞌana, paꞌi, a kōrua mo aŋi-aŋi i te hōhonu o te hāpī o te ꞌAtua, ꞌe ꞌātā ki te hora nei, ko te ai iŋa ꞌā pē ira. ³Ko te manaꞌu iŋa ꞌana kōrua pa he taŋata o te ao taꞌe ⌊haka moe i te manaꞌu⌋ ꞌi ruŋa i a Ietū. Hai mākota ꞌe hai tātake e takeꞌa ena ko te manaꞌu iŋa ꞌana kōrua hai manaꞌu taŋata, ꞌe o rā manaꞌu te haka tere i a kōrua. ⁴Hora ena o te kope e tahi e kī ena: «ꞌA Pauro a au» ꞌe o te rua te kī: «ꞌA ꞌĀporo a au», e haka tere ꞌana hai manaꞌu taŋata mau nō.

⁵Ka haka topa rā te kōrua manaꞌu. ¿Ko ai a Pauro ꞌe ko ai a ꞌĀporo? He tāvini nō o te ꞌAtua, ꞌe mai i a rāua a kōrua e haka moe ena i te manaꞌu ꞌi ruŋa i a Ietū. Te meꞌe aŋa nō o māua he meꞌe kī mai e te ꞌAtua. ⁶A au pa he kope pī i te karu ꞌe a ꞌĀporo pa he kope pī-pī vai, ꞌe o te ꞌAtua te haka tupu ꞌe te haka nui-nui. ⁷ꞌO ira, taꞌe ki te ŋā kope era o rāua i pī ꞌe pī-pī hai vai ana haꞌahana-hana, ki te ꞌAtua, kope era ꞌāꞌana i haka tupu ꞌe i haka nui-nui i rā meꞌe ꞌoka era. ⁸Te kope pī i te karu ꞌe te kope pī-pī hai vai ko tū tōroꞌa ꞌā, ꞌe mo te ꞌAtua e ꞌauhau i te rāua aŋa. ⁹He tāvini nō māua o te ꞌAtua, ꞌe a kōrua pa he ꞌāua ꞌoka kai ꞌi ira a māua e aŋa ena, ꞌe, takoꞌa, pa he hare aŋa e te ꞌAtua mōꞌona.

¹⁰Hai riva rahi o te ꞌAtua, ꞌāꞌaku i haꞌamata i hāpī atu ki a kōrua i te parau ꞌāpī riva-riva o ruŋa i a Ietū Kiritō; ꞌe, takoꞌa, i hāꞌūꞌū i te nuꞌu raꞌe o kōrua mo haka moe i te rāua manaꞌu ꞌi ruŋa i a Ietū, pa he kope ꞌāꞌana i aŋa i te mekerā ꞌi ruŋa ka haka tuꞌu era te hakari o te hare. ꞌE, hora nei, o te tētahi te hāpī te oho atu o ruŋa i a Ietū mo haka hio-hio o kōrua ꞌi te ara o te ꞌAtua, pa he nuꞌu o rāua te haka tuꞌu i te hakari o te hare ꞌi ruŋa i te mekerā. Te meꞌe nō, e uꞌi e aŋa riva-riva te hare.

¹¹Te hare aŋa e te ꞌAtua e tahi mau nō mekerā ꞌi ruŋa e haka tuꞌu ena te hare, ko Ietū Kiritō, ꞌe ꞌina e tahi kope mo mono i te mekerā nei.3.11 Te auraꞌa o te vānaŋa nei: ꞌina e tahi kope mo kī atu e ai rō ꞌā te rua rāveꞌa mo eꞌa o te taŋata mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa mo taꞌe ai hai Ietū Kiritō mau nō.¹²ꞌI ruŋa i te mekerā nei te hare ana haka tuꞌu hai meꞌe hio-hio pa he piru, pa he parata, pa he māꞌea hopeꞌa ena o te nehe-nehe ꞌe o te hauhaꞌa, ꞌe taꞌe ꞌō hai meꞌe e vera nō pa he miro, pa he mauku, ꞌe pa he ꞌohe.

¹³Te huru o te aŋa o te taꞌatoꞌa ka takeꞌa riva-riva ena ꞌi te mahana o te ture hopeꞌa, mahana ka uꞌi era e Ietū hai ahi hoki i aŋa riva-riva rō ꞌo ꞌina. ¹⁴Mo taꞌe vera o rā meꞌe aŋa era, he vaꞌai e te ꞌAtua hai meꞌe mo koa. ¹⁵ꞌE mo vera, e ko vaꞌai; ꞌe, ka ai atu pē ira, ko te eꞌa iŋa ꞌana rā kope mai roto i te ūtuꞌa o te hara ꞌe ko te ravaꞌa iŋa ꞌana i te ora ꞌāpī ꞌina he hopeꞌa raꞌa, pa he taŋata ravaꞌa tere mai roto i te hare e vera rō ꞌā ꞌina he meꞌe maꞌu ꞌi te rima.

¹⁶¿ꞌIna hō kōrua he ꞌite: pa he ⌊Kona Haꞌamuri ꞌAtua⌋ ꞌā a kōrua, ꞌi te meꞌe era ꞌi roto i a kōrua e noho ena te Vārua Maitai? ¹⁷Te kope tōtōā i te Kona Haꞌamuri ꞌAtua, te auraꞌa, te kope haka tumu i te ture mo haꞌataꞌa o kōrua, he haka ūtuꞌa e te ꞌAtua. Te Kona Haꞌamuri ꞌAtua, paꞌi, meꞌe moꞌa, ꞌe rā Kona ko kōrua.

¹⁸E uꞌi ꞌo reo-reo ki a kōrua ꞌā hai manaꞌu ena pē nei ē: nuꞌu mārama-rama kōrua ki te mata o te taŋata o te ao nei. I hau rō atu ꞌi te tano mo riro o kōrua pa he nuꞌu taꞌe mārama-rama, ki riro iho ai kōrua mo te ꞌAtua he nuꞌu mārama-rama mau ꞌā. ¹⁹Te manaꞌu mārama-rama o te taŋata o te ao nei he meꞌe maꞌa-maꞌa nō atu e tahi mo te ꞌAtua. Pa he meꞌe kī ꞌi ruŋa i te ⌊Pāpaꞌi Moꞌa⌋: «Te nuꞌu manaꞌu he nuꞌu mārama-rama a rāua e haka ꞌite rō ꞌā e te ꞌAtua taꞌe pē ira hai taꞌe haꞌatiꞌa mo tano o te rāua meꞌe manaꞌu mo aŋa». ²⁰E kī takoꞌa rō ꞌana: «Te ꞌAtua ko ꞌite ꞌā: te manaꞌu o te nuꞌu manaꞌu pē nei ē: nuꞌu mārama-rama a rāua, he meꞌe maꞌa-maꞌa nō atu e tahi». ²¹ꞌO ira ꞌina e tahi o kōrua mo teꞌo-teꞌo ꞌa ꞌai i hāpī. Te meꞌe taꞌatoꞌa, paꞌi, o kōrua ꞌe mo te kōrua riva-riva: ²²a Pauro, a ꞌĀporo, a Tefa, te ao, te ora, te mate, te hora nei, pe muꞌa ka oho ena; taꞌatoꞌa meꞌe o kōrua, ²³ꞌe a kōrua ꞌa Ietū Kiritō, ꞌe a Ietū o te ꞌAtua.

Te aŋa o te ⌊ꞌāpōtoro⌋

¹E manaꞌu kōrua i a mātou i te nuꞌu haka ꞌite i te ⌊roŋo riva-riva o te ꞌAtua⌋ pa he tāvini nō o te ⌊Kiritō⌋ uŋa mo haka ꞌite i te meꞌe manaꞌu e te ꞌAtua mo aŋa taꞌe haka ꞌite mai ꞌi muꞌa ꞌā. ²Ko ꞌite ꞌana e kōrua: te taŋata ki a ia e vaꞌai ena i te aŋa e haka tano tahi i te meꞌe kī mo aŋa. ³ꞌE a au, ꞌina he tapa atu i te vānaŋa kī e kōrua ꞌe e te tētahi nuꞌu hoki ko tano ꞌā ꞌo kai tano tāꞌaku meꞌe aŋa. ꞌĀtā a au mau nei ꞌā ꞌina he kī i te tano ꞌe i te taꞌe tano o tāꞌaku meꞌe aŋa. ⁴ꞌE, ka ai atu ꞌina he manaꞌu ōꞌoku he tuhi mai ko aŋa ꞌana a au i te meꞌe taꞌe tano, te haꞌaauraꞌa o te meꞌe era taꞌe ꞌō pē nei ē: ꞌina mau ꞌana pēaha ōꞌoku hape. Te kope mau nō, paꞌi, mo kī i te tano ꞌe i te taꞌe tano o tāꞌaku meꞌe aŋa he Pūꞌoko Haka Tere o tātou ko Ietū Kiritō.

⁵ꞌO ira, e haka kore te kōrua kī i te tano ꞌe i te taꞌe tano o te meꞌe aŋa e te rua. Ki tiaki tātou ki te hoki iŋa mai o te Kiritō. Māꞌana e haka ꞌite mai i te manaꞌu o te taŋata taꞌe ꞌite e te rua ꞌe he haka aŋi-aŋi mai he aha i manaꞌu ai pē ira. ꞌI rā hora e ture rō ꞌe e haꞌahana-hana rō e te ꞌAtua i te taꞌatoꞌa tano ki te rāua meꞌe i aŋa.

⁶E te taina, mo te kōrua riva-riva i vānaŋa i haꞌaauraꞌa atu ai au o ruŋa i a māua ko ꞌĀporo mo ꞌite o kōrua mo haka tere nō i a kōrua hai meꞌe hāꞌaki ꞌi ruŋa i te ⌊Pāpaꞌi Moꞌa⌋, ꞌo haka paka kōrua i te kope e tahi ꞌe ꞌo taꞌe haka au i te rua. ⁷¿ꞌA ꞌai koe i kī i hau rō atu koe ki te rua? ꞌIna e tahi meꞌe ena ꞌāꞌau i taꞌe ai o te ꞌAtua i vaꞌai atu. ꞌE ꞌi te ai pē ira, ¿he aha ia koe e teꞌo-teꞌo ena ꞌe e haka tuꞌu ena pa he meꞌe ena ē: te meꞌe i a koe hai koe mau ꞌā e ai ena?

⁸Te huru, e manaꞌu ena kōrua ꞌina he meꞌe toe mo ꞌite o ruŋa i te ꞌAtua ꞌe i a kōrua te meꞌe taꞌatoꞌa vaꞌai e te ⌊Vārua Maitai⌋ mo aŋa i tāꞌana aŋa. Te huru takoꞌa, e manaꞌu ena kōrua a kōrua he ꞌariki ꞌe ꞌina e tahi meꞌe haŋa toe mo vaꞌai atu e mātou. ¡Pē hiva ꞌana ꞌō he parautiꞌa he ꞌariki a kōrua mo haka tere o tātou ananake! ⁹E tuꞌu takoꞌa rō ꞌana pe he meꞌe ena ē: te ꞌAtua ko haka rē ꞌana i a mātou i te ꞌāpōtoro, pa he meꞌe hopeꞌa, haka ūtuꞌa mo mate ꞌi roto i te koro nui-nui e tahi mo mātaꞌi-taꞌi o te merahi ꞌe o te taŋata taꞌatoꞌa. ¹⁰E manaꞌu ena te nuꞌu o te ao nei he maꞌa-maꞌa a mātou ꞌo te aŋa ki te Kiritō, ꞌe a kōrua e manaꞌu ena: ꞌo te ai a kōrua o te Kiritō he nuꞌu mārama-rama. Ki te manaꞌu takoꞌa o te nuꞌu o te ao nei he nuꞌu taꞌe pūai a mātou, ꞌe a kōrua e manaꞌu ena he nuꞌu pūai kōrua. Te nuꞌu o te ao e taꞌe haka au rō ꞌana i a mātou, ꞌe ki a kōrua e moꞌa atu ena. ¹¹ꞌĀtā ki ꞌaŋarīnā e ŋaroꞌa rō ꞌana e mātou te maruaki ꞌe te pohe ki te vai. E kore rō ꞌana te mātou kahu mo uru, e tōtōā rō mai ꞌana e te nuꞌu, e kore rō ꞌā te mātou kona mo noho ¹²ꞌe e rohi-rohi rō ꞌana ꞌi te aŋa iŋa. E taro-taro mai ena e te nuꞌu, hai haꞌamaitai e haka hoki nei e mātou; ꞌe e tute mai ena mo tōtōā, he haꞌaoromaꞌi e mātou. ¹³E reo-reo ena o ruŋa i a mātou, hai vānaŋa riva-riva e mātou e pāhono ena. ꞌE ꞌātā ki ꞌaŋarīnā, e haꞌariro ena i a mātou e te nuꞌu pa he iŋo-iŋo ꞌe pa he meꞌe hopeꞌa o te taꞌe hauhaꞌa.

¹⁴Te meꞌe nei e au e pāpaꞌi atu ena taꞌe mo haka haꞌamā i a kōrua, mo haka tī-tika i te kōrua manaꞌu, pa he ŋā poki haŋa rahi ꞌāꞌaku. ¹⁵Ka rahi atu te nuꞌu hāpaꞌo ꞌe hāpī i a kōrua pa he ⌊kiritiano⌋, e tahi mau nō kope pa he matuꞌa tane o kōrua ko au. ꞌĀꞌaku, paꞌi, i haka ꞌite raꞌe atu i te ⌊roŋo riva-riva o ruŋa i a Ietū Kiritō⌋, ꞌe i kī atu mo ⌊haka moe i te manaꞌu⌋ ꞌi ruŋa i a ia mo ai o kōrua ꞌāꞌana. ¹⁶ꞌO ira ꞌī a au he ani atu: e haka tano te kōrua manaꞌu ꞌe te kōrua noho iŋa pē au.

¹⁷Mo te ŋā meꞌe nei i uŋa atu ena au i a Timoteo mo hāꞌūꞌū atu i a kōrua. A ia pa he poki haŋa rahi ꞌāꞌaku taꞌe haka rē ki te hora hopeꞌa i te aŋa o te ꞌAtua. Māꞌana e haka manaꞌu atu i tōꞌoku haka tere iŋa pa he kope haka moe i te manaꞌu ꞌi ruŋa i a Ietū Kiritō. Tōꞌoku haka tere iŋa, paꞌi, e tano rō ꞌā ki tāꞌaku meꞌe mau nei ꞌā e hāpī e oho nei ki te nūnaꞌa taŋata haka moe i te rāua manaꞌu ꞌi ruŋa i a Ietū o te kona taꞌatoꞌa vari ōꞌoku.

¹⁸Ko ꞌite ꞌana a au: tētahi o roto i a kōrua nā e haka paka ꞌana i a rāua ꞌi te meꞌe era e manaꞌu ena e ko hoki atu au e ko uꞌi i a kōrua. ¹⁹ꞌE, mo haŋa o te ꞌAtua, e ko roa hia he tuꞌu atu a au. ꞌI rā hora ka uꞌi nei a au: e pūai rō ꞌana a rāua ꞌo he haka kē nō mo vānaŋa te rāua meꞌe. ²⁰Te haka tere iŋa o te ꞌAtua ꞌi roto i te tātou māhatu e ꞌite ena taꞌe hai vānaŋa, hai pūai mau era ꞌā ōꞌona haka huri i te tātou manaꞌu ꞌe i te tātou noho iŋa mo aŋa i tāꞌana meꞌe haŋa. ²¹¿He aha ia te kōrua meꞌe haŋa: he oho atu ōꞌoku haka ūtuꞌa i a kōrua, ꞌo he oho atu he uꞌi i a kōrua hai koa ꞌe hai haŋa?

He taŋata aŋa i te meꞌe taꞌe tano

¹E te taina, ko ŋaroꞌa ꞌana a au i te vānaŋa: te kope e tahi o roto i a kōrua ko noho ꞌā ki te viꞌe o tōꞌona matuꞌa tane. Te meꞌe tuꞌu pē nei meꞌe taꞌe tano, ꞌe he hara taparahi-taꞌata ꞌina kai takeꞌa ꞌā korohaŋa ꞌi roto i te nuꞌu kai ꞌite ko ai te ꞌAtua parautiꞌa mau. ²Ka ai atu pē ira, ko te teꞌo-teꞌo iŋa ꞌā a kōrua pē nei ē: ko ꞌite riva-riva ꞌana a kōrua i te meꞌe o te ꞌAtua. Te tano mau: e māui-ui te kōrua māhatu ꞌi te meꞌe tuꞌu pē nā. Te taŋata aŋa i te meꞌe tuꞌu pē nei e haka eꞌa mai roto i a kōrua.

³ꞌE, ka ai atu taꞌe a au ꞌi te hora nei ꞌi muri i a kōrua, he haka ꞌite atu a au i tōꞌoku manaꞌu pa he meꞌe ena ē: nā a au ꞌi muri i a kōrua. Te kope aŋa i te meꞌe tuꞌu pē nā e ai rō ꞌana te ūtuꞌa tano mōꞌona. ⁴Hora ena o kōrua ka taka-taka tahi ena mo haka eꞌa i a ia, a au takoꞌa ꞌi muri i a kōrua, ꞌe pē ira takoꞌa ꞌana te pūai o Ietū Kiritō Pūꞌoko Haka Tere o tātou. ꞌI rā hora, hai ꞌīŋoa ōꞌona, ⁵he haka rē kōrua i te taŋata ena ki te rima o Rukifero mo haka ꞌamo hai ꞌati, ki huri haka ꞌou ai i te manaꞌu ki te ꞌAtua ꞌe, ꞌi te mahana era o te hoki iŋa mai o te ⌊Kiritō⌋, he eꞌa tōꞌona vārua mai roto i te ūtuꞌa o te hara ꞌe he ravaꞌa i te ora ꞌāpī ꞌina he hopeꞌa raꞌa ꞌo te huri haka ꞌou o tōꞌona manaꞌu ki te ꞌAtua.

⁶E ko tano kōrua mo teꞌo-teꞌo. E kī rō ꞌana, paꞌi: «E tahi ꞌapa ꞌiti-ꞌiti o te revaura he ahu tahi te haraoa». Pē ira takoꞌa ꞌana hai taŋata mau nō e tahi e hara nō meꞌe rahi nō atu nuꞌu. ⁷Te meꞌe haŋa he toꞌo mai roto i a kōrua i te revaura ena, ki ai ai a kōrua he nūnaꞌa taŋata ꞌina e tahi kope hara o roto, pa he haraoa aŋa iho taꞌe hoa hai revaura. A kōrua, paꞌi, he haraoa kai ꞌi te ⌊Pakate⌋ ꞌina he hoa hai revaura, he nuꞌu ꞌina e tahi hara ꞌo te ⌊haka moe i te manaꞌu⌋ ꞌi ruŋa i a Ietū. E manaꞌu: a Ietū he māmoe o te Pakate tūtia mo haka eꞌa i a tātou mai roto i te hara. ⁸ꞌO ira, e ai te tātou noho iŋa, paurō te mahana, pa he haraoa ꞌina kai ꞌānoꞌi hai revaura, noho iŋa ꞌina e tahi meꞌe taꞌe tano aŋa, pa he meꞌe aŋa o muꞌa ꞌā, ꞌe noho iŋa haꞌatura parautiꞌa ki te ꞌAtua hai māhatu maꞌitaki.

⁹ꞌI ruŋa i tāꞌaku meꞌe pāpaꞌi raꞌe atu era i hāꞌaki atu ai a au: ꞌina kōrua ko ai he repahoa o te nuꞌu moe i te viꞌe ꞌo i te taŋata taꞌe he kenu ꞌāꞌana. ¹⁰Te kī nei ꞌāꞌaku: taꞌe ka haka tapa mau ꞌā a kōrua mai te nuꞌu taꞌatoꞌa o te ao nei moe i te viꞌe ꞌo i te taŋata taꞌe he kenu ꞌāꞌana, ꞌe mai muri i te nuꞌu nou-nou, toke-toke ꞌe haꞌamuri ki te ꞌītoro. Mo ravaꞌa, paꞌi, e kōrua mo aŋa i te meꞌe nei, e taꞌe ai mau nō kōrua ꞌi te ao nei. ¹¹Tāꞌaku kī: nuꞌu nō era mo kī atu he taina rāua o kōrua ꞌi te haka moe iŋa i te manaꞌu ꞌi ruŋa i a Ietū, ꞌe te rāua meꞌe aŋa he moe i te viꞌe ꞌo i te taŋata taꞌe he viꞌe ꞌo he kenu ꞌāꞌana, he nou-nou, he haꞌamuri ki te ꞌītoro, he vānaŋa taꞌe tano mo te rua, he rava taꞌero, ꞌo he toke, ꞌina kōrua ko ai he repahoa o rāua, ꞌe ꞌina ko kai ꞌi muri. ^12-13Taꞌe he meꞌe o tātou te kī i te meꞌe tano ꞌe i te meꞌe taꞌe tano o te nuꞌu taꞌe haka moe i te rāua manaꞌu ꞌi ruŋa i a Ietū; mo te ꞌAtua a rāua e kī. Ki te nuꞌu haka moe i te manaꞌu ꞌi ruŋa i a Ietū a tātou ana ture. ꞌO ira, e haka eꞌa mai roto i a kōrua te kope hara.

ꞌIna ko horo ki te hare ture i tuꞌu taina

¹Mo ai o te taina e ai rō ꞌana tāꞌana ture mo te rua taina, ꞌina ko maꞌu i rā taina ki muꞌa o te nuꞌu pūꞌoko haka tere o te hare ture o te ao nei. Te meꞌe mau mo aŋa he ani ki te tētahi taina haꞌataꞌa e te ꞌAtua māꞌana mo hāꞌūꞌū i a ia. ²¿Kai ꞌite ꞌana ꞌō kōrua: pe muꞌa ka oho ena, mo tātou mo te nuꞌu haꞌataꞌa e te ꞌAtua e ture i te nuꞌu o te ao nei? ꞌE, mo ai pē ira, ¿e ko ravaꞌa mau ꞌō e kōrua ꞌi te hora nei mo haka riva-riva i te ture ꞌiti-ꞌiti e tahi? ³¿Kai ꞌite takoꞌa ꞌana ꞌō kōrua: pe muꞌa ka oho ena ꞌātā ki te merahi ka ture ena e tātou? ¿Pē hē ia ana taꞌe tano i a tātou mo ture i te meꞌe ꞌiti-ꞌiti o te ao nei?

⁴Mo ai tāꞌue o te kōrua ture, e ko tano mo maꞌu o kōrua i te kōrua taina ki muꞌa o te nuꞌu taꞌe haka moe i te manaꞌu ꞌi ruŋa i a Ietū mo haka kore o te ture. ⁵Te vānaŋa nei e kī atu ena mo haꞌamā o kōrua. E tuꞌu rō ꞌana, paꞌi, pa he meꞌe ena ē: ꞌina he kope mārama-rama o roto i a kōrua mo haka kore i te kōrua ture. ⁶ꞌE ko te horo ko te oho iŋa ꞌana kōrua i a kōrua ꞌā ki te pūꞌoko haka tere o te hare ture taꞌe haka moe i te manaꞌu ꞌi ruŋa i a Ietū.

⁷Te ai te oho nō o te ture ꞌi roto i a kōrua e takeꞌa ena ko rē atu ꞌana ki a kōrua te manaꞌu taꞌe tano. Te meꞌe mau o kōrua mo aŋa he haꞌaoromaꞌi i te kope aŋa atu i te meꞌe taꞌe tano ꞌe toke atu i a kōrua. ⁸ꞌE te meꞌe aŋa oho nō e kōrua he meꞌe taꞌe tano ꞌe he toke, ꞌātā i te meꞌe o te kōrua taina.

^9-10¿Kai ꞌite ꞌana hō kōrua: te nuꞌu aŋa i te meꞌe taꞌe tano ki te mata o te ꞌAtua e ko oꞌo ki roto i te nūnaꞌa taŋata haka tere e ia? ꞌIna kōrua ko reo-reo ki a kōrua ꞌā. ꞌIna, paꞌi, o roto i te nūnaꞌa taŋata haka tere e te ꞌAtua te nuꞌu moe i te viꞌe i te taŋata taꞌe he viꞌe ꞌo taꞌe he kenu ꞌāꞌana, ꞌina he nuꞌu haꞌamuri ki te ꞌītoro, he nuꞌu taiꞌata, he ŋāŋata haꞌariro i a rāua pa he viꞌe, he hiku, he toke-toke, he nuꞌu nou-nou, he nuꞌu rava taꞌero, he nuꞌu vānaŋa taꞌe tano mo te rua, ꞌe he nuꞌu toke i te rua hai reo-reo. ¹¹Tētahi o kōrua i aŋa rō i te ŋā meꞌe nei ꞌi muꞌa ꞌā. ꞌE, hora nei, ꞌi te ai o te tātou Pūꞌoko Haka Tere ko Ietū Kiritō hai haka moe i te manaꞌu ꞌi ruŋa i a ia, te ꞌAtua ko haka kore ꞌana i te kōrua hara, ko haꞌataꞌa ꞌana i a kōrua māꞌana, ꞌe ko haka riro ꞌana he nuꞌu tano ki tōꞌona mata ꞌi te ai o te ⌊Vārua Maitai⌋ ꞌi roto i a kōrua.

Te tātou hakari mo tāvini ki a Ietū

¹²Mo kī o te kope e tahi o roto i a kōrua pē nei ē: «A mātou, te nuꞌu haka moe i te manaꞌu ꞌi ruŋa i a Ietū, ꞌina e tahi meꞌe taꞌe haꞌatiꞌa i a mātou mo aŋa i te meꞌe nō era o mātou i haŋa ꞌo te ai taꞌe hai haka tano ki te ⌊haka tere iŋa ꞌa Mōtē⌋ e tano nei mātou ki te mata o te ꞌAtua», he aŋi mau ꞌana tāꞌana meꞌe kī. Ka ai atu pē ira, taꞌe taꞌatoꞌa meꞌe mo aŋa e tātou he meꞌe mo te tātou riva-riva. A au mau nei ꞌā, ka ai atu ꞌina he meꞌe taꞌe haꞌatiꞌa i a au mo aŋa i tāꞌaku meꞌe haŋa, ꞌina a au he aŋa e tahi meꞌe mo ai ka hopeꞌa era he haka tere mai i a au e rā meꞌe.

¹³ꞌE mo kī o te rua kope pē nei ē: «Te ꞌAtua i aŋa ai i te tātou kōpū mo te kai ꞌe te kai mo te kōpū», he aŋi takoꞌa ꞌā tāꞌana vānaŋa, ka ai atu pe muꞌa ka oho ena e ko ai haka ꞌou pē ira. Te meꞌe nō, ꞌina kōrua ko manaꞌu: pē ira takoꞌa ꞌana te hakari. Te ꞌAtua, paꞌi, kai aŋa i te hakari mo moe i te viꞌe ꞌo i te taŋata taꞌe he kenu taꞌe he viꞌe; i aŋa ai e te ꞌAtua mo tāvini ki te tātou Pūꞌoko Haka Tere ko Ietū Kiritō, ꞌe tāꞌana meꞌe haŋa he hāpaꞌo o tātou i te hakari. ¹⁴ꞌE pe muꞌa ka oho ena, he haka ora e te ꞌAtua i a tātou mai te mate hai pūai ōꞌona, pa he haka ora iŋa era e ia i a Ietū, Pūꞌoko Haka Tere o tātou.

¹⁵A kōrua ko ꞌite ꞌana: te kōrua hakari he ŋā kona ena o te hakari o Ietū. Iā. ¿E toꞌo mau rō ia a kōrua i te kona e tahi o te hakari o te ⌊Kiritō⌋ ꞌe he haka riro he kona o te hakari o te viꞌe taiꞌo? ¡ꞌIna! ¹⁶Hora ena o te taŋata e piri ena ki te taiꞌo, he riro ararua e tahi mau nō hakari, pa he meꞌe kī ꞌi ruŋa i te ⌊Pāpaꞌi Moꞌa⌋: «Ararua he riro e tahi mau nō hakari». ¹⁷ꞌIna ko rehu, te kope o te Kiritō e tahi mau nō vārua ararua.

¹⁸ꞌO ira, e hāpaꞌo kōrua e te hara he moe i te viꞌe i te kenu taꞌe o kōrua. Te kope moe i te viꞌe i te kenu taꞌe ꞌāꞌana e hara ꞌana ki tōꞌona hakari ꞌe ki tōꞌona vārua. ꞌE ꞌina he rua hara hopeꞌa o te taparahi-taꞌata tōtōā i te taŋata pa he hara nei. ¹⁹ꞌIna ko rehu, te tātou hakari pa he Kona Haꞌamuri o te Vārua Maitai vaꞌai mai e te ꞌAtua, ꞌe ꞌi roto e noho ena a ia. A tātou taꞌe o tātou ꞌā, o te ꞌAtua. ²⁰Ko ꞌauhau ꞌana, paꞌi, e ia i a tātou māꞌana ꞌi te hora mate era o Ietū ꞌi ruŋa i te tātaurō. ꞌO ira, te meꞌe taꞌatoꞌa aŋa e tātou hai hakari e takeꞌa e moꞌa rō ꞌana tātou i te ꞌAtua.

He hāpī mo te nuꞌu hāipo-ipo

¹Hora nei he pāhono atu au i te meꞌe pāpaꞌi ꞌui mai era e kōrua. I hau rō atu i te tano mo taꞌe ⌊hāipo-ipo⌋. ²Te ꞌati nō, ꞌo hara i te hara he moe i te viꞌe i te kenu taꞌe o kōrua, e ai te kōrua viꞌe ꞌe te kōrua kenu. ³Te nuꞌu hāipo-ipo e moe i te rāua kenu ꞌo i te rāua viꞌe. E ko tano mo taꞌe moe e te kenu i tāꞌana viꞌe ꞌe e te viꞌe i tāꞌana kenu. ⁴Te hakari o te viꞌe hāipo-ipo taꞌe ōꞌona nō, o tāꞌana kenu takoꞌa, ꞌe te hakari o te kenu o tāꞌana viꞌe. ⁵ꞌO ira, ꞌina e tahi o rāua mo kī ki te rua ꞌina he haŋa mo piri tane, mo taꞌe ai ꞌi raꞌe i haꞌaꞌau ai ararua mo taꞌe piri ꞌi te tētahi mahana mo pure ki te ꞌAtua. Ki oti rā ŋā mahana he piri haka ꞌou, ꞌo taꞌe ravaꞌa rō mo haka noho i te hakari ꞌe he haka hara e Rukifero.

⁶Taꞌe e kī atu ꞌā ka tapu kōrua. Tāꞌaku kī: mo haŋa o kōrua mo tapu e tano nō mo aŋa pē ira. ⁷ꞌĀhani ꞌō kōrua pē au ꞌā takoꞌa: ꞌina he viꞌe. ꞌE, ka ai atu pē ira, e ꞌite rō ꞌana a au: te ꞌAtua i aŋa ai i te taŋata taꞌe pē tū huru tahi ꞌā: tētahi i aŋa ai mo hāipo-ipo ꞌe tētahi mo taꞌe hāipo-ipo.

He hāpī mo te tētahi nuꞌu

⁸He kī atu a au ki te nuꞌu taureꞌa-reꞌa ꞌe ki te nuꞌu hove: i hau rō atu i te tano mo taꞌe hāipo-ipo o kōrua pē au. ⁹ꞌE, mo taꞌe ravaꞌa mo haka noho i te meꞌe pohe e te hakari, e hāipo-ipo. I hau rō atu, paꞌi, i te tano mo hāipo-ipo ki te noho pa he taureꞌa-reꞌa pohe nō te aŋa ki te viꞌe ꞌo ki te taŋata.

¹⁰Ki te nuꞌu hāipo-ipo he kī atu a au i te roŋo nei o te tātou Pūꞌoko Haka Tere: ꞌina he viꞌe hāipo-ipo ko haꞌataꞌa mai tāꞌana kenu. ¹¹ꞌE, mo haꞌataꞌa, ꞌina ko hāipo-ipo haka ꞌou ki te rua taŋata, ꞌo, mo haŋa ōꞌona, he hoki ki tāꞌana kenu. Pē ira takoꞌa ꞌana te kenu, ꞌina ko haꞌataꞌa mai tāꞌana viꞌe.

¹²ꞌE ki te tētahi nuꞌu he kī atu a au, pa he meꞌe ꞌāꞌaku, taꞌe pa he vānaŋa o te tātou Pūꞌoko Haka Tere ko Ietū Kiritō: mo ai e tahi taina o roto i a kōrua tāꞌana viꞌe ꞌina he haka moe i tōꞌona manaꞌu ꞌi ruŋa i a Ietū, ꞌe ko te haŋa iŋa ꞌana rā viꞌe mo noho mo oho nō ararua, ꞌina rā taina ko haꞌataꞌa mai rā viꞌe. ¹³ꞌE mo ai he viꞌe ko hāipo-ipo ꞌā ki te taŋata ꞌina he haka moe i tōꞌona manaꞌu ꞌi ruŋa i a Ietū, ꞌe ko te haŋa iŋa ꞌana rā taŋata mo noho mo oho nō ararua, ꞌina rā viꞌe ko haꞌataꞌa mai rā taŋata. ¹⁴Te taŋata taꞌe haka moe i tōꞌona manaꞌu ꞌi ruŋa i a Ietū hāipo-ipo ki te viꞌe e haka moe rō ꞌā i te manaꞌu ꞌi ruŋa i a Ietū, he hāpaꞌo takoꞌa e te ꞌAtua ꞌo te ai ko hāipo-ipo ꞌā ki rā viꞌe; ꞌe te viꞌe taꞌe haka moe i tōꞌona manaꞌu ꞌi ruŋa i a Ietū he hāpaꞌo takoꞌa e te ꞌAtua ꞌo te ai ko hāipo-ipo ꞌana ki te taŋata e haka moe rō ꞌana i te manaꞌu ꞌi ruŋa i a Ietū. ꞌE he hāpaꞌo takoꞌa e te ꞌAtua i te rāua ŋā poki pa he ŋā poki ꞌāꞌana ꞌo te ai e tahi o rā ŋā matuꞌa o te ꞌAtua.

¹⁵Te taŋata ꞌe te viꞌe taꞌe ⌊haka moe i te manaꞌu⌋ ꞌi ruŋa i a Ietū taꞌe haŋa mo noho mo oho nō ararua ko tāꞌana viꞌe ꞌo ko tāꞌana kenu haka moe i te manaꞌu ꞌi ruŋa i a Ietū, e haka rē mo oho. Mo topa o te meꞌe nei ki a kōrua ꞌina he ꞌati. Te meꞌe haŋa, paꞌi, o te ꞌAtua, he haumārū ꞌi roto i a kōrua. ¹⁶Ka ai atu pē ira, te tano mau: ꞌina ko haꞌataꞌa mai te viꞌe mai te kenu, koiꞌite hai rā viꞌe ꞌo hai rā kenu haka moe era i te manaꞌu ꞌi ruŋa i a Ietū he eꞌa mai roto i te ūtuꞌa o te hara ꞌe he ravaꞌa i te ora ꞌāpī ꞌina he hopeꞌa raꞌa.

¹⁷Huru kē huru kē te tātou noho iŋa i vaꞌai mai ai e te tātou Pūꞌoko Haka Tere ko Ietū Kiritō: kē mo taureꞌa-reꞌa, kē mo hāipo-ipo, kē mo ꞌekaravo, mo taꞌe ꞌekaravo, mo ⌊hūrio⌋ ꞌe mo taꞌe hūrio. ꞌE tāꞌana meꞌe haŋa: he noho he oho taꞌatoꞌa o tātou pa he hora kī mai era e ia ꞌi roto i te tātou māhatu mo haka moe i te manaꞌu ꞌi ruŋa i a Ietū. Ko te meꞌe nei te meꞌe hāpī e au ꞌi roto i te nūnaꞌa taꞌatoꞌa o te taŋata haka moe i te manaꞌu ꞌi ruŋa i a Ietū.

¹⁸Pē nei te auraꞌa: te kope ko hore ꞌā te kiri o te kinoŋa ꞌi te hora kī e te ꞌAtua mo haka moe i tōꞌona manaꞌu ꞌi ruŋa i a Ietū, ꞌina ko kimi i te rāveꞌa mo naꞌa i rā meꞌe. ꞌE te kope kai hore te kiri o te kinoŋa ꞌi te hora kī e te ꞌAtua mo haka moe i tōꞌona manaꞌu ꞌi ruŋa i a Ietū, ꞌina te kope nei ko uꞌi mo hore i te kiri o tōꞌona kinoŋa. ¹⁹Te meꞌe hauhaꞌa, paꞌi, mo te ꞌAtua, taꞌe he hore ꞌo he taꞌe hore o te kiri o te kinoŋa; he haꞌatura ki tāꞌana roŋo te meꞌe hauhaꞌa. ²⁰ꞌO ira, e noho e oho a tātou taꞌatoꞌa pa he hora kī mai era e te ꞌAtua ꞌi roto i te tātou māhatu mo haka moe i te manaꞌu ꞌi ruŋa i a Ietū.

²¹Mo ai ōꞌou he ꞌekaravo ꞌi te hora haka moe i tuꞌu manaꞌu ꞌi ruŋa i a Ietū, nōatu. ꞌE, mo ai tāꞌue o te rāveꞌa mo eꞌa ōꞌou mai te rima o te taŋata haka aŋa atu, e eꞌa. ²²Te kope, paꞌi, he ꞌekaravo ꞌi te hora haka moe i te manaꞌu ꞌi ruŋa i a Ietū, hora nei, ko eꞌa ꞌana mai te pūai o te hara mo tāvini takoꞌa ki a Ietū, Pūꞌoko Haka Tere o tātou. ꞌE te kope taꞌe he ꞌekaravo ꞌi te hora haka moe i te manaꞌu ꞌi ruŋa i a Ietū, hora nei pa he ꞌekaravo o te ⌊Kiritō⌋. ²³Te ꞌAtua, paꞌi, hai mate iŋa era o tāꞌana Poki ko Ietū Kiritō ꞌi ruŋa i te tātaurō i ꞌauhau ai i a tātou māꞌana. ꞌO ira, ꞌina ko haꞌatiꞌa mo haka riro i a kōrua e te taŋata he ꞌekaravo o rāua. ²⁴E te taina, e noho e oho nō kōrua ꞌi muꞌa o te ꞌAtua pa he hora kī mau atu era ꞌā e ia ꞌi roto i te kōrua māhatu mo haka moe i te manaꞌu ꞌi ruŋa i a Ietū.

²⁵ꞌE, te nuꞌu taꞌe hāipo-ipo, ꞌina e tahi ꞌāꞌaku roŋo mo haka ꞌite ki a rāua vaꞌai mai e Ietū, Pūꞌoko Haka Tere o tātou. ꞌE, ka ai atu pē ira, a au pa he taŋata aŋa i tāꞌana meꞌe kī hai riva rahi o te ꞌAtua, he kī atu au i tōꞌoku manaꞌu. ²⁶Mōꞌoku, ꞌi te taꞌe au o te noho iŋa o te hora nei, i hau rō atu i te riva mo taꞌe hāipo-ipo o kōrua. ²⁷Te kope ai o tāꞌana viꞌe, ꞌina ko haꞌataꞌa mai muri i a ia. ꞌE mo taꞌe ai o tāꞌana viꞌe, ꞌina ko hāipo-ipo. ²⁸ꞌE, mo hāipo-ipo, taꞌe e hara ꞌā; ꞌe mo hāipo-ipo te viꞌe taureꞌa-reꞌa e tahi, taꞌe takoꞌa e hara ꞌā. Te meꞌe nō, mo hāipo-ipo he ꞌati taŋata te rāua meꞌe ka ꞌamo era, he meꞌe taꞌe haŋa ꞌāꞌaku mo topa atu ki a kōrua.

He manaꞌu tano mau mo te nuꞌu ⌊kiritiano⌋

²⁹E te taina, tāꞌaku meꞌe haŋa mo kī atu: hora taꞌe rahi te hora toe o tātou mo aŋa ki te ꞌAtua. ꞌO ira, te nuꞌu hāipo-ipo e haka topa te hora mo aŋa ki te ꞌAtua, ka ai atu he nuꞌu hāipo-ipo a rāua. ³⁰Pē ira takoꞌa ꞌana te nuꞌu ꞌamo i te ꞌati, te nuꞌu koa ꞌi te rāua noho iŋa, te nuꞌu haꞌaputu i te taoꞌa mo rāua, ³¹ꞌe te nuꞌu aŋa oho mo ravaꞌa moni ꞌi te ao nei. Taꞌe hai ŋā meꞌe taꞌatoꞌa nei o te ao ana taꞌe topa te kōrua hora mo aŋa ki te ꞌAtua. Te ŋā meꞌe taꞌatoꞌa nei, paꞌi, e ŋaro tahi rō koia ko te ao.

³²Te meꞌe haŋa ꞌāꞌaku: ꞌina ko ai te meꞌe o te ao nei mo manaꞌu rahi o kōrua. Te taŋata taureꞌa-reꞌa, ꞌi te ai hoko tahi nō, ꞌina e tahi meꞌe taꞌe haꞌatiꞌa i a ia mo aŋa ki te tātou Pūꞌoko Haka Tere, ꞌe, takoꞌa, mo haka koa. ³³ꞌE, te taŋata hāipo-ipo, te meꞌe manaꞌu rahi he meꞌe o te ao nei, ꞌe pē hē a ia ana haka koa i tāꞌana viꞌe. ³⁴Tōꞌona manaꞌu taꞌe e tahi mau nō he aŋa ki te ꞌAtua. Te viꞌe taureꞌa-reꞌa, ꞌi te ai takoꞌa ōꞌona hoko tahi nō, te meꞌe manaꞌu mau nō he vaꞌai i tōꞌona hakari ꞌe i tōꞌona vārua mo aŋa ki te ꞌAtua. ꞌE te viꞌe hāipo-ipo, he meꞌe o te ao te meꞌe manaꞌu rahi ꞌe pē hē a ia ana haka koa i tāꞌana kenu.

³⁵Taꞌe a au e kī atu ꞌā ꞌina kōrua ko hāipo-ipo. E kī atu ena a au i te meꞌe nei mo hāꞌūꞌū atu mo aŋa o kōrua i te meꞌe tī-tika ꞌe mo tano o kōrua mo tāvini ki te tātou Pūꞌoko Haka Tere hai manaꞌu mau nō e tahi.

³⁶Nā ꞌi roto i a kōrua te ŋāŋata ꞌina he aŋi-aŋi he aha te rāua meꞌe tano mo aŋa, ꞌi te meꞌe era ko haꞌamoꞌa-moꞌa era ꞌā i a rāua e te rāua matuꞌa e ŋā poki nō ꞌana. Mo manaꞌu e tahi o te ŋā nuꞌu nei: te meꞌe tano ꞌāꞌana mo aŋa he hāipo-ipo ki te viꞌe haka haꞌamoꞌa-moꞌa era ki a ia, ꞌo aŋa a ia i te meꞌe taꞌe tano ki rā viꞌe, ꞌe rā viꞌe ia ko tano ꞌā tōꞌona matahiti mo hāipo-ipo, e hāipo-ipo; taꞌe e hara ꞌana. ³⁷ꞌE mo ꞌite e tahi o te nuꞌu nei mo haka noho i te meꞌe pohe o te hakari, ꞌe he manaꞌu: tāꞌana meꞌe tano mo aŋa he taꞌe hāipo-ipo ꞌo te ai ꞌina a ia kai haŋa, ꞌe mo te viꞌe haka haꞌamoꞌa-moꞌa era ki a ia taꞌe he ꞌati te taꞌe hāipo-ipo o rāua, e tano nō ꞌā mo taꞌe hāipo-ipo. ³⁸Tāꞌaku kī: te taŋata manaꞌu mo hāipo-ipo ki tāꞌana viꞌe haka haꞌamoꞌa-moꞌa, e aŋa ꞌā i te meꞌe riva-riva, ꞌe te kope manaꞌu mo taꞌe hāipo-ipo, ꞌata hau te riva-riva.

³⁹Te viꞌe hāipo-ipo o tāꞌana kenu ꞌi te hora e ora nō ꞌā. ꞌE, mo mate o rā kenu, e tano nō rā viꞌe mo hāipo-ipo haka ꞌou. Te meꞌe nō, e hāipo-ipo ki te taŋata haka moe takoꞌa i tōꞌona manaꞌu ꞌi ruŋa i a Ietū. ⁴⁰Ka ai atu pē ira, ki tōꞌoku manaꞌu, i hau rō atu a ia ꞌi te koa mo taꞌe hāipo-ipo. E manaꞌu rō ꞌana a au: te meꞌe nei he meꞌe i haka manaꞌu mai e te ⌊Vārua Maitai⌋.

Te kai tūtia ki te ꞌītoro

¹ꞌĪ a au he vānaŋa atu o ruŋa i te ꞌui era o kōrua o te kai tūtia ki te ꞌītoro. Taꞌatoꞌa o tātou e ꞌite rō ꞌā ꞌina e tahi pūai o te ꞌītoro ꞌi ruŋa i a tātou. Ka ai atu pē ira, ka haka topa te manaꞌu: mo haka tere o tātou hai ꞌite, he manaꞌu tātou i hau rō atu tātou ki te rua. ꞌE, mo haka tere hai haŋa, he aŋa tātou i te meꞌe riva-riva mo te rua. ²Te kope manaꞌu e ꞌite rahi rō ꞌana a ia o ruŋa i te meꞌe e tahi ꞌina kai aŋi-aŋi riva-riva i rā meꞌe pa he meꞌe haŋa e te ꞌAtua mo aŋi-aŋi e ia. ³ꞌE te kope kī e te ꞌAtua ꞌāꞌana, he kope haŋa rahi ki a ia.

⁴ꞌE te meꞌe ena he kai i te kai tūtia ki te ꞌītoro, e ꞌite rō ꞌana e tātou: te ꞌītoro taꞌe he ꞌatua parautiꞌa, ꞌe e ꞌite takoꞌa rō ꞌana: e tahi mau nō ꞌAtua. ⁵Ki te kī o te nuꞌu taꞌe ꞌite ko ai te ꞌAtua parautiꞌa mau meꞌe rahi nō atu ꞌatua ꞌe pūꞌoko haka tere ꞌi te raŋi ꞌe ꞌi ruŋa i te henua. ⁶ꞌE, a tātou, te nuꞌu ⌊haka moe i te manaꞌu⌋ ꞌi ruŋa i a Ietū, e ꞌite riva-riva rō ꞌana: e tahi mau nō ꞌAtua, he Matuꞌa, ꞌāꞌana i aŋa i te meꞌe taꞌatoꞌa, ꞌe māꞌana a tātou e ai nei. ꞌE e tahi mau nō tātou Pūꞌoko Haka Tere ko Ietū Kiritō, hai ia te meꞌe taꞌatoꞌa i ai ai, ꞌe ꞌātā a tātou mau nei ꞌā.

He haka tere iŋa hai haŋa

⁷Te ꞌati nō, tētahi o tātou kai aŋi-aŋi riva-riva ꞌana ꞌina he pūai o te ꞌītoro o ruŋa i a tātou, ꞌi te meꞌe era ꞌi muꞌa ꞌā e haꞌamuri rō ꞌana e rāua. ꞌE hora nei, mo kai i te kai tūtia ki te ꞌītoro, he manaꞌu ko hara ꞌana a rāua. ⁸ꞌE a tātou ko ꞌite ꞌā: taꞌe hai kai ꞌo hai taꞌe kai i te meꞌe e tahi e tano nei a tātou ki te mata o te ꞌAtua; mo kai, ꞌina he ꞌati; ꞌe mo taꞌe kai, pē ira takoꞌa ꞌana.

⁹ꞌIna ko ai hai ꞌite o kōrua ꞌina e tahi meꞌe taꞌe haꞌatiꞌa e te ꞌAtua mo kai, he viri tuꞌu taina taꞌe aŋi-aŋi riva-riva i te meꞌe o te ꞌAtua ki roto i te hara. ¹⁰Pē nei te auraꞌa: mo ai o te taina taꞌe aŋi-aŋi riva-riva i te meꞌe o te ꞌAtua he takeꞌa i a koe e kai ꞌana i te kai tūtia ki te ꞌītoro, ¿e ko taꞌe pohe mau hō rā taina mo kai takoꞌa tāꞌana? ¹¹Pē ira, hai ꞌite era ōꞌou tuꞌu taina ka taꞌe haka moe haka ꞌou era i tōꞌona manaꞌu ꞌi ruŋa i a Ietū mate takoꞌa era mōꞌona. ¹²Mo aŋa o tātou i te meꞌe taꞌe tano tuꞌu pē nei ki te tātou taina, e hara ꞌā tātou ki a Ietū. ¹³ꞌO ira, mo ai tāꞌue hai kai ōꞌoku i te kiko ana taꞌe haka moe haka ꞌou tōꞌoku taina i tōꞌona manaꞌu ꞌi ruŋa i a Ietū, ꞌina ia a au e ko kai haka ꞌou.

¿E hāꞌūꞌū te taina ki te ⌊ꞌāpōtoro⌋?

¹Taꞌe a au he ꞌekaravo o te manaꞌu taŋata. A au he ꞌāpōtoro. Ko takeꞌa ꞌana, paꞌi, e au i a Ietū, Pūꞌoko Haka Tere o tātou, ꞌe hai aŋa nei i haka moe ai kōrua i te manaꞌu ꞌi ruŋa i a Ietū. ²Ka ai atu a au taꞌe he ꞌāpōtoro mo te tētahi, mo kōrua ꞌē-ē. Hai kōrua, paꞌi, e takeꞌa ena he parautiꞌa mau ꞌā he ꞌāpōtoro a au.

³He vānaŋa nei ꞌāꞌaku mo te nuꞌu kī i te tano ꞌo i te taꞌe tano o tāꞌaku aŋa pa he ꞌāpōtoro: ⁴Te ꞌāpōtoro e tano rō ꞌā mo no-noꞌi hai meꞌe mo kai ꞌe hai meꞌe mo unu, ⁵ꞌe mo maꞌu ꞌi muri i a rāua i te rāua viꞌe ⌊kiritiano⌋, pa he meꞌe aŋa e Tefa, e te ŋā taina era o Ietū ꞌe e te tētahi ꞌāpōtoro. ⁶¿Pē nei hō te kī o kōrua: ko māua ko Verenāvē mau nō te meꞌe mo taꞌe hāꞌūꞌū mai e te nūnaꞌa taŋata ⌊haka moe i te manaꞌu⌋ ꞌi ruŋa i a Ietū?

⁷¿Ko ai hō te kope aŋa pa he vaꞌehau ꞌauhau i a ia ꞌā? ¿Ko ai te kope ꞌoka vino taꞌe kai i tāꞌana vino ꞌoka? ꞌE ¿ko ai te kope hāpaꞌo vato-vato taꞌe unu i te ū o tāꞌana vato-vato ana tatau? ⁸ꞌIna kōrua ko manaꞌu: te meꞌe nei he meꞌe taŋata mau nō; e kī takoꞌa rō ꞌana, paꞌi, e ⌊te haka tere iŋa era ꞌa Mōtē⌋. ⁹E pāpaꞌi rō ꞌana ꞌi ruŋa i rā puka pē nei ē: «ꞌIna ko here te ŋutu o te ꞌuei tiŋi-tiŋi tariko». Taꞌe te ꞌAtua i kī ai i te meꞌe nei e manaꞌu ꞌā ꞌi ruŋa i te ꞌuei; ¹⁰i manaꞌu ai mo tātou.

Te haka tere iŋa era ꞌa Mōtē, paꞌi, i pāpaꞌi ai mo te tātou riva-riva. Te auraꞌa: te kope ꞌārote i te henua ꞌe te kope tiŋi-tiŋi i te karu tariko e aŋa ꞌā i te rāua aŋa koia ko manaꞌu e ai takoꞌa rō to rāua o rā kai ꞌoka era. ¹¹A mātou ko ꞌoka ꞌana i te meꞌe o te ⌊Vārua Maitai⌋ ꞌi roto i te kōrua māhatu. ꞌE ki te kōrua kī, ¿e ko tano a mātou mo no-noꞌi atu e tahi meꞌe ki a kōrua? ¹²Mo ai e tano rō ꞌā mo hāꞌūꞌū o kōrua ki te tētahi, ꞌata hau rō atu ia i te tano mo hāꞌūꞌū mai ki a mātou. ꞌE, ka ai atu pē ira, ꞌina ꞌā a mātou kai no-noꞌi atu ꞌā e tahi meꞌe. Te meꞌe aŋa e mātou he haꞌaoromaꞌi i te taꞌatoꞌa nō ꞌati ꞌo taꞌe haŋa te nuꞌu mo haka roŋo i te roŋo riva-riva o ruŋa i te ⌊Kiritō⌋.

¹³A kōrua e ꞌite rō ꞌana: te nuꞌu aŋa mo te ⌊Kona Haꞌamuri ꞌAtua⌋ mai ira e ravaꞌa era i te meꞌe mo rāua mo kai. Te auraꞌa: te kope aŋa ꞌi te kona tūtia ꞌanimare e kai era hai kiko o rā tūtia. ¹⁴Pē ira te kope haka ꞌite o ruŋa i te ⌊roŋo riva-riva o te ꞌAtua⌋. ꞌĀꞌana mau ꞌā, paꞌi, i kī: hai rā meꞌe ana ravaꞌa mo kai. ¹⁵ꞌE, ka ai atu e tano rō ꞌana a au mo no-noꞌi atu, ꞌina e tahi ōꞌoku mahana i no-noꞌi atu ki a kōrua, ꞌe taꞌe a au e pāpaꞌi atu ena mo vaꞌai mai o kōrua e tahi meꞌe. Mo vaꞌai mai o kōrua hai tara, e ko tano haka ꞌou a au mo kī pē nei ē: e haka ꞌite nei a au i te roŋo o te ꞌAtua taꞌe e ꞌauhau mai, ꞌe i hau rō atu i te tano mōꞌoku mo mate ꞌi te maruaki ki te taꞌe kī haka ꞌou pē ira.

¹⁶Taꞌe he meꞌe mo teꞌo-teꞌo e haka ꞌite e oho nei o ruŋa i te roŋo o te ꞌAtua; he meꞌe mau ꞌā mo aŋa e au. ꞌE, ¡ko te ꞌaroha mo taꞌe aŋa ōꞌoku pē ira! ¹⁷ꞌĀhani hai manaꞌu mau ꞌā ōꞌoku e aŋa nei, he tano ia mo ꞌauhau mai. ꞌE, mo ai he meꞌe mau ꞌā ꞌāꞌaku mo aŋa, e haꞌatura ꞌana ia a au ki te meꞌe kī mai e te ꞌAtua. ¹⁸ꞌE i ai era pē nei, te ꞌauhau mōꞌoku he koa o te haka ꞌite o te oho i te roŋo riva-riva o te ꞌAtua taꞌe e ꞌauhau mai, te auraꞌa, ꞌina e tahi ꞌāꞌaku meꞌe no-noꞌi atu, ka ai atu e tano rō ꞌana a au mo aŋa pē ira.

¹⁹A au ka taꞌe ꞌekaravo o te kope e tahi, ko haka ꞌekaravo ꞌana au i a au ki te taꞌatoꞌa mo ꞌata rahi o te taŋata haka moe i te manaꞌu ꞌi ruŋa i a Ietū. ²⁰E noho nei a au ꞌi roto i te ⌊hūrio⌋, he haka tere a au i a au pa he hūrio, ki ravaꞌa ai mo haka huri i te rāua manaꞌu ki ruŋa i a Ietū; te auraꞌa: mo hāpī ōꞌoku i te nuꞌu maꞌu i te haka tere iŋa ꞌa Mōtē, e haka tere takoꞌa a au i a au pē rāua, ka ai atu e ꞌite rō ꞌana a au: taꞌe hai haka tano ki te haka tere iŋa era o rāua e tano nei a au ki te mata o te ꞌAtua. ²¹ꞌE mo ai ōꞌoku ꞌi roto i te nuꞌu taꞌe he hūrio taꞌe maꞌu i te haka tere iŋa ꞌa Mōtē, he haka tere takoꞌa a au i a au pē rāua, ki ravaꞌa ai i te rāveꞌa mo haka huri i te manaꞌu ki ruŋa i a Ietū. Ka ai atu pē ira, taꞌe a au e taꞌe haꞌatura ꞌā ki te roŋo o te ꞌAtua; e haka tano e oho ꞌana i te roŋo o te Kiritō. ²²ꞌE ꞌi te hora ōꞌoku ꞌi roto i te nuꞌu kai hio-hio ꞌā te rāua haka moe iŋa i te manaꞌu ꞌi ruŋa i a Ietū, he haka tere takoꞌa a au i a au pē rāua, mo haka hio-hio i te rāua manaꞌu ꞌi ruŋa i a Ietū. Te roa: e haka tere nei a au i a au pa he taꞌatoꞌa nō, he rāveꞌa e tahi mo haka eꞌa i te tētahi o rāua mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa vaꞌai e te ꞌAtua. ²³E aŋa nei a au i te meꞌe taꞌatoꞌa nei mo rahi mo oho o te nuꞌu haka moe i te rāua manaꞌu ꞌi ruŋa i te ⌊roŋo riva-riva o ruŋa i a Ietū⌋, ꞌe mo ai i a au ꞌe i te tētahi nuꞌu te meꞌe hōrea mai era e te ꞌAtua.

²⁴Ko ꞌite ꞌana a kōrua: ꞌi te ꞌāꞌati tahuti, taꞌatoꞌa e tahuti ena, ꞌe ki te kope mau nō e tahi e topa ena te meꞌe vaꞌai ꞌo te tuꞌu raꞌe. Pē ira kōrua ana meꞌe ꞌi te ara o te ꞌAtua: e haka ꞌuhu e oho mo aŋa i te meꞌe haŋa o te ꞌAtua, pa he kope haka ꞌuhu mo rē i te ꞌāꞌati, ki topa atu ai ki a kōrua te meꞌe vaꞌai e ia. ²⁵Te nuꞌu ꞌāꞌati e hāpaꞌo rō ꞌana i a rāua mo te hora o te ꞌāꞌati. E aŋa ena pē ira mo rē i te hei, ꞌe rā hei e hopeꞌa era he mae-mae. ꞌE, a tātou e aŋa nei mo ravaꞌa i te meꞌe te hauhaꞌa e ko kore ki te hora hopeꞌa. ²⁶ꞌO ira a au e aŋa nei i tāꞌaku aŋa pa he kope ꞌāꞌati te meꞌe manaꞌu mau nō he tuꞌu ki te kona haka mao o te ꞌāꞌati, ꞌe, takoꞌa, pa he kope moto ꞌina he haka māuꞌa i tōꞌona rima ana ava ki te rua. ²⁷ꞌIna a au he haꞌatiꞌa mo haka tere mai i a au e tōꞌoku hakari; ꞌāꞌaku te haka tere ꞌo viri a au ki roto i te meꞌe taꞌe tano pohe e tōꞌoku hakari ꞌe ꞌo taꞌe ravaꞌa e au, e te kope hāpī i te rua, i te meꞌe vaꞌai e te ꞌAtua.

Ki te ꞌAtua mau nō tātou ana haꞌamuri

¹E te taina, ꞌina ko rehu te meꞌe topa era ki te tātou tupuna: taꞌatoꞌa o te nuꞌu nei i haka tika rō e te ꞌAtua hai raŋi e tahi, taꞌatoꞌa i haka eꞌa rō ki te rua pāꞌiŋa o te vai era ko Vaikava Mea-mea. ²Hai ŋā meꞌe nei i tuꞌu ai pa he meꞌe: ko ⌊papatito⌋ tahi ꞌana a rāua pa he nuꞌu hāpī ꞌa ⌊Mōtē⌋. ³ꞌE taꞌatoꞌa i vaꞌai rō e te ꞌAtua hai meꞌe mo kai ⁴ꞌe i haka unu rō hai vai haka eꞌa mai roto i te māꞌea. Te māꞌea nei ko Ietū hokorua i a rāua ꞌi te ara. ⁵ꞌE, ka ai atu pē ira, ꞌina he ꞌAtua kai koa mo te rahi raꞌa o te nuꞌu nei ꞌi te meꞌe era he hara nō te aŋa o rāua. ꞌO ira i mā-mate ai ꞌi te kona ꞌone taꞌe noho taŋata.

⁶Te meꞌe topa era ki a rāua e toꞌo pa he hāpī mo tātou, ꞌo haŋa ki te meꞌe taꞌe tano, pa he haŋa iŋa era o rāua. ⁷ꞌIna ko haꞌamuri kōrua ki te ꞌītoro, pa he meꞌe i aŋa e rāua. E kī rō ꞌana, paꞌi, ꞌi ruŋa i te ⌊Pāpaꞌi Moꞌa⌋: «He noho ananake, he kai ꞌe he unu, ꞌe i oti era he eꞌa ki ruŋa, he haꞌamuri hai ꞌori ki te ꞌītoro». ⁸ꞌIna tātou ko moe i te viꞌe i te taŋata taꞌe he viꞌe ꞌo he kenu hāipo-ipo, pa he meꞌe aŋa e te tētahi o te nuꞌu era. ꞌI te aŋa o rāua i te meꞌe nei i mā-mate ai e piti ꞌahuru mā toru taꞌutini taŋata ꞌi te mahana mau nō e tahi. ⁹ꞌE ꞌina tātou ko haka ꞌatu i te ⌊Kiritō⌋, ꞌina ko uꞌi ꞌātā ki hē tōꞌona roa mo haꞌaoromaꞌi i te tātou hara, pa he meꞌe aŋa e te tētahi o te nuꞌu era. He aŋa i te meꞌe nei i mā-mate ai i ŋau e te kōreha veneno. ¹⁰ꞌIna takoꞌa ko hēŋuꞌi-ŋuꞌi mo te ꞌAtua, pa he meꞌe aŋa e te tētahi o te nuꞌu era. He aŋa o te nuꞌu era i te meꞌe era i tiŋaꞌi ai e te merahi o te mate.

¹¹Te meꞌe taꞌatoꞌa topa era ki te tupuna e toꞌo pa he hāpī mo tātou. ꞌE te ŋā meꞌe nei ko pāpaꞌi ꞌana ꞌi ruŋa i te Pāpaꞌi Moꞌa mo ꞌite o te nuꞌu noho o te hora nei hāhine ki te paꞌo iŋa o te ao: te ꞌAtua e haka ūtuꞌa rō i te nuꞌu aŋa i te meꞌe tuꞌu pē nei. ¹²ꞌO ira, te kope manaꞌu e haka moe riva-riva rō ꞌana a ia i te manaꞌu ꞌi ruŋa i a Ietū e uꞌi ꞌo hara. ¹³E manaꞌu tātou: te meꞌe haka ꞌatu i a tātou mo hara ko te meꞌe ena ꞌā e haka ꞌatu ena i te taꞌatoꞌa nō taŋata mo hara. ꞌIna ko rehu ꞌi te hora o te haka ꞌatu: te ꞌAtua ꞌina e ko taꞌe haka tano i tāꞌana meꞌe kī. Ko kī ꞌana, paꞌi: ꞌina e ia e ko haꞌatiꞌa mo haka ꞌatu mai i a tātou hai meꞌe e ko ravaꞌa e tātou mo haꞌaoromaꞌi, ꞌe, takoꞌa, e vaꞌai rō mai e ia i te rāveꞌa mo eꞌa o tātou ꞌina kai hara mai rā meꞌe era mo haka ꞌatu mai.

¹⁴ꞌO ira, e tōꞌoku taina haŋa rahi ē, e uꞌi kōrua ꞌo haꞌamuri ki te ꞌītoro. ¹⁵A kōrua he nuꞌu ꞌite mo haka topa riva-riva i te manaꞌu; mo kōrua mau ꞌā e uꞌi hoki e tano rō ꞌā ꞌo e taꞌe tano rō ꞌā tāꞌaku vānaŋa pāpaꞌi atu ena. ¹⁶Hora ena o tātou o te nuꞌu ⌊haka moe i te manaꞌu⌋ ꞌi ruŋa i a Ietū e piri ena mo haka manaꞌu o ruŋa i tōꞌona mate, e ai rō ꞌana te tātou meꞌe unu, ꞌe mo rā meꞌe e māuru-uru nei tātou ki te ꞌAtua. He tāpaꞌo ko maꞌitaki ꞌana tātou ꞌi te toto o te Kiritō. ꞌE te haraoa mo-more kai e tātou he tāpaꞌo pē nei ē: mo tātou takoꞌa te meꞌe riva-riva ravaꞌa hai mate era o te Kiritō. ¹⁷Mai te haraoa mau nō e tahi e kai ena tātou taꞌatoꞌa, he tāpaꞌo pē nei ē: a tātou, te nuꞌu taꞌatoꞌa ꞌa Ietū, he hakari mau nō e tahi.

¹⁸Te itaraera kai i te ꞌanimare tūtia ki te ꞌAtua, e haꞌamuri ꞌana ki te ꞌAtua. ¹⁹Mo ai pē ira, ¿ko tū meꞌe ꞌana hō mo te nuꞌu kai i te kai tūtia ki te ꞌītoro? ꞌIna. Te ꞌītoro, paꞌi, ꞌe te kai tūtia ki a ia ꞌina e tahi ōꞌona hauhaꞌa. ²⁰Te ꞌati nō, hora ena e tūtia ena ki te ꞌītoro, e tūtia ꞌana ki te tātane, taꞌe ki te ꞌAtua, ꞌe ꞌina a au kai haŋa mo ai e tahi meꞌe o kōrua o te tātane. ²¹E ko tano, paꞌi, a au mo unu ꞌe mo kai i te meꞌe haka manaꞌu i te mate o te tātou Pūꞌoko Haka Tere ko Ietū Kiritō ꞌe, ꞌi ruŋa ꞌā, mo unu ꞌe mo kai i te meꞌe tūtia ki te tātane. ²²¿E haŋa ꞌana hō tātou mo haka mākota i te tātou Pūꞌoko Haka Tere? ꞌIna ko rehu: i hau rō atu a ia i te pūai ki a tātou.

Te kōrua meꞌe aŋa, e aŋa mo koa o te ꞌAtua

²³He parautiꞌa te vānaŋa ena e kī ena: «ꞌIna he meꞌe taꞌe haꞌatiꞌa i te taŋata mo aŋa i tāꞌana meꞌe haŋa». Ka ai atu pē ira, taꞌe taꞌatoꞌa meꞌe he meꞌe riva-riva mo te taŋata, ꞌe taꞌe taꞌatoꞌa meꞌe he meꞌe haka hio-hio i te manaꞌu ꞌi ruŋa i a Ietū. ²⁴ꞌIna koe ko manaꞌu ki te meꞌe mo te riva-riva mau nō ōꞌou; e manaꞌu ki te meꞌe mo te riva-riva o te tētahi.

²⁵E kai kōrua i te meꞌe taꞌatoꞌa nō hoꞌo o roto i te hare hoꞌo kiko ꞌina ko ꞌui hoki ko tūtia ꞌā ꞌo ꞌina kai tūtia ki te ꞌītoro, ²⁶ꞌi te meꞌe era te henua ꞌe te meꞌe taꞌatoꞌa o ruŋa o te ꞌAtua.

²⁷Mo kī atu o te kope e tahi taꞌe haka moe i te manaꞌu ꞌi ruŋa i a Ietū mo oho ōꞌou ki tōꞌona hare mo kai ꞌe he oho koe, e kai i te meꞌe nō era ka vaꞌai atu era, ꞌina ko ꞌui hoki he kai tūtia ki te ꞌītoro ꞌo he kai taꞌe tūtia. ²⁸ꞌE, mo kī atu e te kope e tahi o ira: «Te kiko nei ko tūtia ꞌā ki te ꞌītoro», mo te riva-riva o te kope era, ꞌina koe ko kai, koiꞌite mōꞌona ꞌe mo te tētahi nuꞌu o ira te kai i rā kiko he hara. ²⁹E kī atu ena a au i te meꞌe nei taꞌe o ruŋa i te manaꞌu o kōrua kī atu he aha te meꞌe tano ꞌo taꞌe tano mo aŋa, o ruŋa i te manaꞌu o tētahi a au e kī atu ena.

E kī rō pēaha te kope e tahi: «¿He aha a au ana taꞌe aŋa i te meꞌe e haꞌatiꞌa rō ꞌana mo aŋa ꞌo te ai nō mo te rua he hara, ꞌi te taꞌe aŋi-aŋi riva-riva i te meꞌe o te ꞌAtua?». ³⁰ꞌE e kī takoꞌa rō pēaha: «Mo māuru-uru a au i te kai ki te ꞌAtua, ¿he aha ia te nuꞌu ana tuhi mai i tōꞌoku hape ꞌo te kai ōꞌoku i te meꞌe ko māuru-uru era ꞌā e au ki te ꞌAtua?».

³¹E te taina, te tano mau: te meꞌe taꞌatoꞌa ena o kōrua mo aŋa, ꞌātā mo kai ꞌe mo unu, e aŋa tahi mo koa o te ꞌAtua ꞌe mo ꞌata moꞌa o te taŋata i a ia. ³²ꞌIna kōrua ko aŋa i te meꞌe mo haka riri i te rua, ka ai he ⌊hūrio⌋, he taꞌe hūrio ꞌo he nuꞌu haka moe i te manaꞌu ꞌi ruŋa i a Ietū. ³³E meꞌe kōrua pē au. Te meꞌe aŋa, paꞌi, ꞌāꞌaku he uꞌi i te rāveꞌa mo haka koa i te taꞌatoꞌa. ꞌIna a au he uꞌi i te meꞌe mo tōꞌoku riva-riva nō, mo te riva-riva takoꞌa o te rua a au e uꞌi nei, mo eꞌa o rāua mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa vaꞌai e te ꞌAtua.

¹E te taina, e haka tere kōrua pē au, pa he haka tere iŋa nei ōꞌoku i a au pa he ⌊Kiritō⌋.

ꞌI te hora e taka-taka ꞌā mo pure ki te ꞌAtua

²E koa rō ꞌana a au ꞌo te rava manaꞌu mai o kōrua ki a au ꞌe, takoꞌa, ꞌo te maꞌu ꞌo te oho nō o kōrua i te hāpī haka ꞌite atu era e au. ³E haŋa rō ꞌana a au mo aŋi-aŋi riva-riva e kōrua i te meꞌe nei: te Kiritō he pūꞌoko haka tere o te ŋāŋata, te ŋāŋata he pūꞌoko haka tere o te ŋā viꞌe, ꞌe te ꞌAtua he pūꞌoko haka tere o te Kiritō.

⁴Mo puꞌa o te taŋata i tōꞌona pūꞌoko ꞌi te hora pure ꞌo ꞌi te hora haka ꞌite i te roŋo vaꞌai ki a ia e te ꞌAtua, e taꞌe moꞌa ꞌana i te Kiritō. ⁵ꞌE te viꞌe, mo taꞌe puꞌa i tōꞌona pūꞌoko ꞌi te hora pure ꞌo ꞌi te hora haka ꞌite i te roŋo vaꞌai ki a ia e te ꞌAtua, e haka haꞌamā ꞌā i tāꞌana kenu pa he meꞌe: ko varu māreŋo ꞌana i te pūꞌoko. ⁶Mo taꞌe puꞌa o te viꞌe i tōꞌona pūꞌoko, i hau ꞌi te tano mo varu māreŋo i a ia. ꞌE mo manaꞌu o te viꞌe he meꞌe haꞌamā e tahi te varu i te pūꞌoko ꞌo te varu māreŋo i a ia, e puꞌa ia te pūꞌoko.

⁷Te taŋata ꞌina ko puꞌa i te rāua pūꞌoko. ꞌI ruŋa i a ia e takeꞌa ena te pūai ꞌe te nui-nui o te ꞌAtua. ꞌE te meꞌe takeꞌa mai te viꞌe he pūai ꞌe he hōnui o te taŋata. ⁸Te taŋata taꞌe mai te viꞌe i aŋa ai; he viꞌe te meꞌe i aŋa mai te taŋata. ⁹ꞌE te taŋata taꞌe mo hokorua o te viꞌe i aŋa ai; he viꞌe te meꞌe i aŋa mo hokorua o te taŋata. ¹⁰ꞌO ira te viꞌe e puꞌa i tōꞌona pūꞌoko hai kahu pa he tāpaꞌo mo takeꞌa ꞌātā e te merahi e haꞌatura rō ꞌā ki te kenu.

¹¹ꞌI te haka tere iŋa o tātou o te nuꞌu ⌊haka moe i te manaꞌu⌋ ꞌi ruŋa i a Ietū, te taŋata ꞌe te viꞌe e ai ena mo hāꞌūꞌū ki a rāua, te viꞌe ki te taŋata ꞌe te taŋata ki te viꞌe. ¹²He parautiꞌa te meꞌe ena: te viꞌe raꞌe i aŋa ai mai te taŋata, ꞌe he parautiꞌa takoꞌa, te taŋata e poreko ena mai roto i te viꞌe. ꞌE te meꞌe taꞌatoꞌa mai te ꞌAtua e ai ena.

¹³E te taina, mo haka topa riva-riva i te manaꞌu he ꞌite e kōrua pē nei ē: e ko tano te ŋā viꞌe mo pure ki te ꞌAtua ꞌina he puꞌa i te rāua pūꞌoko. ¹⁴Ka manaꞌu kōrua: ki te tātou haka tere iŋa te haka roa-roa o te taŋata i tōꞌona rauꞌoho pa he viꞌe he meꞌe haꞌamā e tahi. ¹⁵ꞌE mo te viꞌe he meꞌe nehe-nehe e tahi te rauꞌoho ro-roa vaꞌai ki a ia e te ꞌAtua pa he meꞌe mo ꞌapi o tōꞌona pūꞌoko. ¹⁶Mo manaꞌu o te kope e tahi e hape rō ꞌana tāꞌaku meꞌe vānaŋa atu ena, he kī atu a au: he meꞌe nei te meꞌe hāpī e mātou e te ⌊ꞌāpōtoro⌋, ꞌe he meꞌe maꞌu e te nuꞌu haka moe i te manaꞌu ꞌi ruŋa i a Ietū ꞌi te kona taꞌatoꞌa.

Te kai haka manaꞌu ki te mate o Ietū

(Māteo 26.26-29; Marko 14.22-25; Ruka 22.14-20)

¹⁷Te meꞌe nei ꞌāꞌaku ka pāpaꞌi atu ena taꞌe mo koa o kōrua. I ꞌite ai a au e taka-taka ena kōrua mo haꞌamuri ki te ꞌAtua, he meꞌe rake-rake te meꞌe ai, taꞌe he meꞌe riva-riva. ¹⁸Te meꞌe ꞌāꞌaku i ŋaroꞌa: e taka-taka ena a kōrua, he tātake nō te aŋa ꞌe he haka topa-topa kē-kē, ꞌe ki tōꞌoku manaꞌu e ai rō ꞌā te parautiꞌa o te vānaŋa nei. ¹⁹¡E topa-topa kē-kē mau ꞌā pēaha kōrua ki takeꞌa ai ko ai te kope tano ki te mata o te ꞌAtua! ²⁰E taka-taka ena, paꞌi, kōrua mo kai i te kai haka manaꞌu i te mate o te tātou Pūꞌoko Haka Tere, e hopeꞌa ena taꞌe toe mo manaꞌu ki a ia, ²¹ꞌi te meꞌe era ꞌi te hora o te kai, e ai rō ꞌā te nuꞌu kai raꞌe, ꞌina he tiaki ki te tētahi nuꞌu. Pē ira e ai ena te nuꞌu oho mai te kona taka-taka o kōrua e maruaki rō ꞌā, ꞌe tētahi e taꞌero rō ꞌana. ²²¿Ka kī ꞌō ꞌina kōrua hare mo kai ꞌe mo unu ꞌi ira? ¿He aha kōrua e taꞌe moꞌa ena i te nūnaꞌa taŋata haka moe i te manaꞌu ꞌi ruŋa i a Ietū? ¿He aha e haka haꞌamā ena i te nuꞌu ꞌina rāua meꞌe? ¿He aha tāꞌaku meꞌe mo kī atu? ¿Ko koa ꞌana a au? ꞌIna a au kai koa.

²³E te taina, te meꞌe nei ꞌāꞌaku ka kī atu ena mai te tātou Pūꞌoko Haka Tere mau ꞌā i ꞌite mai ai, ꞌe i haka ꞌite rō atu e au ki a kōrua: A Ietū, te tātou Pūꞌoko Haka Tere, ꞌi te pō hoꞌo mau era ꞌā i a ia, i toꞌo ai i te haraoa e tahi ki tōꞌona rima, ²⁴ꞌe, ki oti te māuru-uru ki te ꞌAtua, he mo-more he kī: «Te meꞌe nei he hakari ōꞌoku ka mate ena mo te riva-riva o kōrua. E aŋa i te meꞌe nei pa he meꞌe mo manaꞌu ki a au». ²⁵ꞌE pē ira takoꞌa ꞌana, i oti era te kai, he toꞌo i te hapaina vino ki tōꞌona rima ꞌe he kī: «Te meꞌe nei he toto ōꞌoku ka pariŋi ena mo kōrua, he tāpaꞌo o te ⌊haka tere iŋa ꞌāpī o te ꞌAtua ananake ko te taŋata⌋. E aŋa i te meꞌe nei pa he meꞌe mo manaꞌu ki a au». Pē ira i kī ai e Ietū. ²⁶ꞌO ira, e te taina ē, ꞌina ko rehu: taꞌatoꞌa hora kai o kōrua i te haraoa ꞌe unu i te vino pa he meꞌe mo manaꞌu ki a ia, e haka ꞌite e oho ꞌā, ꞌātā ki te hoki iŋa mai o te tātou Pūꞌoko Haka Tere, o ruŋa i tōꞌona mate iŋa mo tātou.

Pē hē mau te kai haka manaꞌu ki te mate o Ietū

²⁷Kope nō era mo kai i te haraoa ꞌe mo unu i te vino haka manaꞌu i te mate o te tātou Pūꞌoko Haka Tere ꞌe ꞌina he moꞌa ꞌe ꞌina he manaꞌu i te haꞌaauraꞌa parautiꞌa o rā meꞌe, e hara ꞌana ki te hakari ꞌe ki te toto mau era ꞌā o te tātou Pūꞌoko Haka Tere. ²⁸ꞌO ira, ꞌi raꞌe ki te kai ꞌe ki te unu i rā meꞌe, e haka topa te manaꞌu hoki e tano mau rō ꞌana tuꞌu māhatu ki te ꞌAtua. ²⁹ꞌE mo kai ꞌe mo unu tahaŋa nō ꞌina kai manaꞌu hia, e kimi ꞌana koe i toꞌu ūtuꞌa. ³⁰ꞌO te aŋa i te meꞌe nei meꞌe rahi o kōrua ko māui-ui ꞌā, ko rehe-rehe ꞌana te hakari ꞌe tētahi ko mā-mate ꞌā. ³¹Mo haka topa riva-riva i te tātou manaꞌu ꞌi raꞌe ki te kai i rā kai, e ko haka ūtuꞌa mai e te ꞌAtua. ³²ꞌE mo haka ūtuꞌa mai, he meꞌe mo aŋi-aŋi e tātou, ꞌo haka ūtuꞌa rō i a tātou ꞌi muri i te nuꞌu o te ao taꞌe haka moe i te manaꞌu ꞌi ruŋa i a ia.

³³ꞌO ira, e te taina ōꞌoku ē, hora taka-taka o kōrua mo kai mo manaꞌu ki a Ietū, e tiaki ki te tētahi nuꞌu. ³⁴ꞌE mo maruaki o te kope e tahi o roto i a kōrua, ka kai rō ꞌai ꞌi tōꞌona hare, ꞌo haka ūtuꞌa i a kōrua e te ꞌAtua, he taꞌe tano o te kōrua haka tere iŋa ꞌi te hora haka taka-taka mo manaꞌu i te mate o te tātou Pūꞌoko Haka Tere.

ꞌE te tētahi meꞌe ꞌui mai era e kōrua, ki tuꞌu atu a au ana haka ꞌite atu.

Te meꞌe vaꞌai e te ⌊Vārua Maitai⌋ mo aŋa i te aŋa o te ꞌAtua

¹E te taina, e haŋa rō ꞌana a au mo aŋi-aŋi riva-riva e kōrua o ruŋa i te meꞌe vaꞌai mai e te Vārua Maitai ki a tātou, ki te nuꞌu ⌊haka moe i te manaꞌu⌋ ꞌi ruŋa i a Ietū, mo aŋa i te aŋa o te ꞌAtua.

²A kōrua ko ꞌite riva-riva ꞌana: hora era kai haka moe ꞌana i te manaꞌu ꞌi ruŋa i a Ietū, e haka rē nō ꞌana a kōrua i a kōrua mo haꞌamuri ki te ꞌītoro, ki te meꞌe reꞌo kore. ³ꞌO ira e haŋa ꞌana a au mo ꞌite o kōrua: ꞌina e tahi kope haka tere e te Vārua Maitai tohu i a Ietū, ꞌe ꞌina e tahi kope taꞌe o te Vārua Maitai te haka tere kī: a Ietū he Pūꞌoko Haka Tere ōꞌona.

Rauhuru te meꞌe vaꞌai mai e te Vārua Maitai

⁴ꞌI roto i a tātou i te nūnaꞌa taŋata haka moe i te manaꞌu ꞌi ruŋa i a Ietū e ai rō ꞌā huru kē huru kē te meꞌe vaꞌai mai mo aŋa i te aŋa o te ꞌAtua. Ka ai atu pē ira, o te kope mau nō e tahi te vaꞌai mai, o te Vārua Maitai. ⁵E ai takoꞌa rō ꞌā rauhuru rāveꞌa mo tāvini. Ka ai atu pē ira, ki te kope mau nō e tahi e tāvini ena, ki a Ietū Kiritō, he Pūꞌoko Haka Tere o tātou. ⁶ꞌE, huru kē huru kē te meꞌe aŋa e tātou hai pūai o te ꞌAtua. Ka ai atu pē ira, o te kope mau nō e tahi te vaꞌai mai i rā pūai, o te ꞌAtua. ⁷Hai meꞌe vaꞌai mai mo aŋa i te aŋa o te ꞌAtua e takeꞌa ena: o te Vārua Maitai te haka tere i a tātou. ꞌE nei ŋā meꞌe i vaꞌai mai ai ki a tātou e tahi e tahi mo te riva-riva o te nuꞌu taꞌatoꞌa haka moe i te manaꞌu ꞌi ruŋa i a Ietū.

⁸O te Vārua Maitai te vaꞌai ki te tētahi taŋata i te pūai mo vānaŋa i te vānaŋa mārama-rama; ꞌe o te Vārua Maitai takoꞌa ꞌā te vaꞌai ki te rua i te pūai mo haka ꞌite i te meꞌe hōhonu o te ꞌAtua haka ꞌite e ia mau ꞌā ki rā taŋata. ⁹O te Vārua Maitai te vaꞌai ki te tētahi taŋata i te pūai mo ꞌata haka moe i tōꞌona manaꞌu ꞌi ruŋa i a Ietū, ꞌe ki te tētahi haka ꞌou atu i te pūai mo haka ora i te māui-ui. ¹⁰E ai rō ꞌā te nuꞌu i a rāua te pūai vaꞌai e te Vārua Maitai mo aŋa i te mana, ꞌe te nuꞌu i a rāua te pūai mo vānaŋa i te meꞌe haka ꞌite e te ꞌAtua. Ki te tētahi nuꞌu i vaꞌai ai e te ꞌAtua i te pūai mo ꞌite hoki te meꞌe vānaŋa e te rua he roŋo mau ꞌā o te ꞌAtua ꞌo he meꞌe o te tātane. ꞌE ki te tētahi haka ꞌou nuꞌu i vaꞌai ai i te pūai mo vānaŋa hai ꞌarero kē taꞌe ꞌite e rāua, ꞌe ki te tētahi haka ꞌou atu te pūai mo haka ꞌite i te auraꞌa o te vānaŋa kī hai rā ꞌarero. ¹¹O te Vārua Maitai mau ꞌā e tahi mau nō te vaꞌai i te ŋā meꞌe taꞌatoꞌa nei, ꞌe ꞌāꞌana te vaꞌai ki te kope nō era ꞌāꞌana i haŋa.

¹²Te hakari, ka ai atu e rahi rō ꞌā te kona, he meꞌe mau nō e tahi. Pē ira takoꞌa te Kiritō koia ko te nuꞌu taꞌatoꞌa haka moe i te manaꞌu ꞌi ruŋa i a ia he meꞌe e tahi mau nō. ¹³Taꞌatoꞌa o tātou ko ⌊papatito⌋ tahi ꞌana hai tū Vārua ꞌā mo riro he hakari mau nō e tahi, ka ⌊hūrio⌋, ka taꞌe hūrio, ka ꞌekaravo, ꞌe ka taꞌe ꞌekaravo. ꞌE ki te taꞌatoꞌa o tātou ko vaꞌai mai ꞌana i tū Vārua Maitai ꞌā.

¹⁴Te hakari meꞌe rahi nō atu kona, taꞌe e tahi mau nō. ¹⁵Mo kī o te vaꞌe pē nei ē: «ꞌI te taꞌe ai ōꞌoku he rima, taꞌe ia a au he kona o te hakari», taꞌe ꞌo te kī pē ira ana taꞌe ai o te hakari. ¹⁶ꞌE mo kī o te tariŋa pē nei ē: «ꞌI te taꞌe ai ōꞌoku he mata, taꞌe a au o te hakari», taꞌe ꞌo te kī takoꞌa pē ira ana taꞌe ai o te hakari. ¹⁷ꞌĀhani te hakari taꞌatoꞌa he mata, e ko ŋaroꞌa e tātou te vānaŋa. ꞌE ꞌāhani i ai he tariŋa, e ko ŋaroꞌa e tātou te hauꞌa. ¹⁸Te ꞌAtua meꞌe rahi nō atu kona o te hakari i aŋa ai ꞌe i haka rē ai i rā ŋā kona ꞌi te kona manaꞌu e ia e tano rō ꞌā. ¹⁹ꞌĀhani e tahi mau nō kona o te hakari, taꞌe ia he hakari. ²⁰Ka ai atu meꞌe rahi kona o te hakari, te hakari he meꞌe e tahi mau nō.

²¹Te mata e ko tano mo kī ki te rima: «¿Mo aha koe ꞌāꞌaku?», ꞌe mo kī takoꞌa pē ira e te pūꞌoko ki te vaꞌe. ²²Te parautiꞌa, te ŋā kona ena o te hakari e tuꞌu rō ꞌana pa he kona rehe-rehe, taꞌe hauhaꞌa, he kona hopeꞌa o te hauhaꞌa mo te hakari. ²³Te kona o te hakari manaꞌu e tātou e ko tano mo takeꞌa, he ꞌapi riva-riva hai kahu; ²⁴ꞌe te kona ꞌina he ꞌati mo takeꞌa, ꞌina he hāpaꞌo pē ira. Te ꞌAtua ko popo ꞌana i te kona taꞌatoꞌa o te hakari ꞌi te rāua kona ꞌe ko vaꞌai mai ꞌana ki a tātou i te haŋa mo moꞌa ꞌe mo hāpaꞌo riva-riva i te kona manaꞌu e tātou ꞌina e tahi hauhaꞌa. ²⁵I aŋa ai pē ira mo aŋa tahi o rā ŋā kona pa he meꞌe mau nō e tahi ꞌe mo hāpaꞌo i a rāua. ²⁶E ꞌati ena e tahi kona o te hakari, taꞌatoꞌa nō kona o te hakari e maꞌu ena i rā ꞌati, ꞌe e moꞌa ena, taꞌatoꞌa nō e koa ena.

²⁷Te meꞌe nei ꞌāꞌaku e haŋa nei mo haka aŋi-aŋi atu: te nūnaꞌa taŋata haka moe i te manaꞌu ꞌi ruŋa i a Ietū he hakari o te ⌊Kiritō⌋, ꞌe e tahi e tahi o te nuꞌu nei he kona o rā hakari koia ko tāꞌana aŋa. ²⁸ꞌE te meꞌe haŋa o te ꞌAtua mo te hakari nei: he nuꞌu mo ⌊ꞌāpōtoro⌋, te raꞌe; he nuꞌu mo vānaŋa i te meꞌe haka ꞌite e ia, te rua; ꞌe te toru he maꞌori hāpī; takoꞌa he nuꞌu mo aŋa i te mana, he nuꞌu mo haka ora i te māui-ui, he nuꞌu mo hāꞌūꞌū ki te rua, he nuꞌu mo haka tika i te taŋata ꞌi te aŋa, ꞌe he nuꞌu mo vānaŋa i te ꞌarero kē taꞌe ꞌite e rāua. ²⁹ꞌE taꞌe taꞌatoꞌa o te nuꞌu haka moe i te manaꞌu ꞌi ruŋa i a Ietū he ꞌāpōtoro, ꞌe he nuꞌu vānaŋa i te meꞌe haka ꞌite e te ꞌAtua. Taꞌe taꞌatoꞌa he maꞌori hāpī ꞌe he nuꞌu aŋa i te mana. ³⁰Taꞌe taꞌatoꞌa e ai rō ꞌā te pūai mo haka ora i te māui-ui. ꞌE, takoꞌa, taꞌe taꞌatoꞌa e vānaŋa rō ꞌā i te ꞌarero kē taꞌe ꞌite e rāua, ꞌe taꞌe taꞌatoꞌa e ꞌite rō ꞌana mo haꞌaauraꞌa i te vānaŋa kī hai rā ꞌarero. ³¹ꞌO ira, e haŋa tātou mo ai i a tātou te meꞌe hopeꞌa o te hauhaꞌa o te meꞌe vaꞌai e te Vārua Maitai mo aŋa i te aŋa o te ꞌAtua. ꞌE, hora nei, ꞌī a au he haka ꞌite atu i te meꞌe ꞌata hau rō atu i te hauhaꞌa ki tū ŋā meꞌe taꞌatoꞌa ena.

Te haŋa ki te rua i hau rō atu ki te meꞌe taꞌatoꞌa

¹Mo vānaŋa ōꞌoku rauhuru ꞌarero o te ao nei, ꞌe ꞌātā i te ꞌarero vānaŋa e te merahi, ꞌe ꞌina o roto i a au te haŋa mo te rua, te meꞌe nō era ꞌāꞌaku mo kī he pōŋeha nō atu e tahi pa he pahu e tiŋi-tiŋi ꞌā.

²ꞌE mo vānaŋa ōꞌoku ki te nuꞌu i te meꞌe haka ꞌite mai e te ꞌAtua, ꞌe mo aŋi-aŋi ōꞌoku i te meꞌe taꞌatoꞌa, ꞌātā i te meꞌe manaꞌu e te ꞌAtua mo aŋa taꞌe haka ꞌite mai ꞌi muꞌa ꞌā, ꞌe mo riva ōꞌoku mo haka tapa i te maꞌuŋa mai tōꞌona kona ꞌi te pūai o tōꞌoku haka moe iŋa i te manaꞌu ꞌi ruŋa i a Ietū, ꞌe ꞌina o roto i a au te meꞌe he haŋa ki te rua, ꞌina ia e tahi ōꞌoku hauhaꞌa.

³ꞌE mo tuhaꞌa ōꞌoku ki te nuꞌu veve i te meꞌe taꞌatoꞌa ꞌāꞌaku, ꞌe ꞌātā he vaꞌai a au i tōꞌoku hakari mo tutu ꞌi roto i te ahi, ꞌe ꞌina a au he haŋa ki te rua, ꞌina ia e tahi hauhaꞌa o rā meꞌe.

⁴Te kope haka tere i a ia hai haŋa parautiꞌa e ꞌite rō ꞌā i te haꞌaoromaꞌi. A ia he taŋata riva, taꞌe fiꞌiꞌi, taꞌe teꞌo-teꞌo, taꞌe manaꞌu i hau rō atu a ia ki te rua, ⁵taꞌe ꞌite i te parauꞌino; ꞌina he ꞌōhumu, ꞌina he riri ꞌe ꞌina he maꞌu i te riri mo te rua ⁶ꞌe, takoꞌa, ꞌina he koa o ruŋa i te meꞌe taꞌe tano. E koa ena ꞌi te meꞌe tano ꞌe ꞌi te meꞌe parautiꞌa.

⁷Te kope haka tere i a ia hai haŋa e ꞌite rō ꞌā mo ꞌamo i te ꞌati, e haka moe e oho rō ꞌā i te manaꞌu ꞌi ruŋa i a Ietū, ꞌina he haka tapa i tōꞌona manaꞌu mai ruŋa i te ꞌAtua ki te hora hopeꞌa ꞌe e ꞌite rō ꞌā mo haꞌaoromaꞌi i te meꞌe taꞌe tano aŋa e te rua ki a ia.

⁸Te ŋā meꞌe ena he vānaŋa i te meꞌe haka ꞌite e te ꞌAtua, he vānaŋa i te ꞌarero taꞌe ꞌite, ꞌe he ꞌite o ruŋa i te meꞌe hōhonu o te ꞌAtua, e tano rō te mahana he ŋaro, ꞌe te meꞌe ena he haŋa e ko ŋaro ki te hora hopeꞌa. ⁹Ka ai atu ꞌi te hora nei e vaꞌai rō mai ꞌana e te ⌊Vārua Maitai⌋ i te pūai mo vānaŋa i te meꞌe haka ꞌite mai e te ꞌAtua, ꞌe i te pūai mo ꞌite o ruŋa i te ꞌAtua, ko te toe iŋa ꞌana te meꞌe mo ꞌite e tātou o ruŋa i a ia. ¹⁰ꞌE, ki tuꞌu mai te kope ena ꞌina ōꞌona hape, he ꞌite tahi e tātou, ꞌe he kore te ŋā meꞌe nei.

¹¹Hora era ōꞌoku e ŋā poki nō ꞌā, e vānaŋa era, e manaꞌu era ꞌe e haka topa era i te manaꞌu pa he ŋā poki ꞌana; ꞌe hora nei ko paꞌari ꞌā, ko haka rē atu ꞌā e au i rā ŋā meꞌe. ¹²Te meꞌe ꞌite o tātou ꞌi te hora nei o ruŋa i te ꞌAtua pa he meꞌe ꞌehu-ꞌehu e tahi ꞌi roto i te hiꞌo; ꞌe, ka tano ena te mahana, he takeꞌa riva-riva mai. Hora nei e ai rō ꞌā te meꞌe taꞌe aŋi-aŋi e au o ruŋa i a ia; ꞌe, e tano rō te mahana, he māhani a au i a ia, pa he māhani iŋa mai ōꞌona i a au.

¹³E toru meꞌe ꞌina e ko kore ki te hora hopeꞌa: he haka moe iŋa i te manaꞌu ꞌi ruŋa i te ꞌAtua, he ŋatu o te haŋu ꞌi ruŋa i tāꞌana meꞌe hōrea mai era, ꞌe he haŋa ki te rua. ꞌE te meꞌe hopeꞌa o te hauhaꞌa o te ŋā meꞌe nei e toru he haŋa ki te rua.

He haka tere iŋa tano mo te taꞌatoꞌa

¹ꞌO ira, te meꞌe raꞌe mo ai i a kōrua he haŋa ki te rua; ꞌe, takoꞌa, e haŋa ki te meꞌe vaꞌai e te ⌊Vārua Maitai⌋ mo aŋa i te aŋa o te ꞌAtua. ꞌE, o te ŋā meꞌe vaꞌai ena e te Vārua Maitai, te meꞌe ꞌata hauhaꞌa he vānaŋa i te meꞌe haka ꞌite e te ꞌAtua hai ꞌarero aŋi-aŋi e te nuꞌu. ²Te kope ki a ia te meꞌe i vaꞌai ai he vānaŋa hai ꞌarero kē taꞌe ꞌite e ia taꞌe ki te taŋata e vānaŋa ena; e vānaŋa ꞌā ki te ꞌAtua, ꞌe ꞌina he nuꞌu he aŋi-aŋi i tāꞌana meꞌe kī. ³ꞌE te kope ki a ia i vaꞌai ai i te meꞌe he vānaŋa i te meꞌe haka ꞌite e te ꞌAtua e vānaŋa ꞌana ki te nuꞌu mo haka pūai i te rāua haka moe iŋa i te manaꞌu ꞌi ruŋa i a Ietū, mo haka haŋu ꞌe mo haka koa i a rāua. ⁴Te kope vānaŋa i te ꞌarero kē taꞌe ꞌite e ia mōꞌona mau nō te riva-riva, ꞌe te kope vānaŋa i te meꞌe haka ꞌite e te ꞌAtua, mo te nūnaꞌa taꞌatoꞌa o te taŋata ⌊haka moe i te manaꞌu⌋ ꞌi ruŋa i a Ietū te riva-riva.

⁵Mo vānaŋa o kōrua taꞌatoꞌa i te ꞌarero kē taꞌe ꞌite e kōrua, he koa a au. Te meꞌe nō, mo te riva-riva o te taꞌatoꞌa, i hau rō atu ꞌi te tano te vānaŋa o kōrua i te meꞌe haka ꞌite e te ꞌAtua hai ꞌarero mo aŋi-aŋi e te nuꞌu ki te vānaŋa i te ꞌarero kē taꞌe ꞌite e kōrua, mo kore o te kope mo haꞌaauraꞌa i rā vānaŋa. ꞌO ira ꞌata hau rō atu tōꞌoku koa mo vānaŋa o kōrua i te meꞌe haka ꞌite atu e te ꞌAtua.

⁶E te taina: ꞌina, paꞌi, e tahi hauhaꞌa mo oho atu ōꞌoku mo uꞌi i a kōrua ꞌe he vānaŋa atu hai ꞌarero kē taꞌe ꞌite e au ꞌe taꞌe aŋi-aŋi e kōrua. I hau rō atu, paꞌi, i te tano mo vānaŋa atu i te meꞌe haka aŋi-aŋi mai e te ꞌAtua, i te parautiꞌa ōꞌona, i te vānaŋa haka ꞌite mai e ia, ꞌe i te hāpī mo te kōrua riva-riva hai ꞌarero aŋi-aŋi e kōrua.

⁷Pē ira takoꞌa te meꞌe haka taŋi e te taŋata pa he puhi ꞌe pa he arpa: mo taꞌe tano o te rei iŋa, e ko aŋi-aŋi e te nuꞌu i te peho ka haka taŋi era. ⁸ꞌE mo taꞌe puhi riva-riva i te koneta ꞌi te hora o te tamaꞌi, ꞌina e tahi vaꞌehau mo haka rito i a ia mo te tamaꞌi. ⁹Pē ira takoꞌa a kōrua: mo taꞌe vānaŋa hai ꞌarero ꞌite e te taŋata, ¿pē hē ia ana aŋi-aŋi i te kōrua meꞌe kī? ¡E vānaŋa ꞌana ia a kōrua ki te tokerau!

¹⁰Te parautiꞌa, meꞌe rahi ꞌarero e vānaŋa ena ꞌi te ao, ꞌe e ai rō ꞌā te nuꞌu aŋi-aŋi i rā ŋā ꞌarero. ¹¹Mo taꞌe aŋi-aŋi e au i te ꞌarero vānaŋa e te kope e tahi, he tuꞌu a au pa he taŋata o te rua henua mo rā kope ꞌe a ia takoꞌa mōꞌoku. ¹²E tano rō ꞌā, e te taina ē, te haŋa mo ai i a kōrua te meꞌe vaꞌai e te Vārua Maitai mo aŋa i te aŋa o te ꞌAtua. Te meꞌe nō, e ani ki a ia mo vaꞌai atu hai ŋā meꞌe ena mo hāꞌūꞌū ki te nuꞌu taꞌatoꞌa haka moe i te manaꞌu ꞌi ruŋa i a Ietū mo pūai o te rāua manaꞌu ꞌi ruŋa i a ia.

¹³Te kope ki a ia te meꞌe i vaꞌai ai he vānaŋa i te ꞌarero kē taꞌe ꞌite e ia e ani ki te ꞌAtua mo vaꞌai i te pūai mo haꞌaauraꞌa i tāꞌana vānaŋa era. ¹⁴Mo pure ōꞌoku hai ꞌarero kē taꞌe ꞌite e au, e pure ꞌana a au i te meꞌe i haka pure mai e te Vārua Maitai, taꞌe ꞌō hai meꞌe i manaꞌu e au. ¹⁵¿He aha ia te tātou meꞌe mo aŋa? He pure hai pūai o te Vārua Maitai, ꞌe he pure takoꞌa mo aŋi-aŋi e te taꞌatoꞌa. He hīmene hai pūai o te Vārua Maitai, ꞌe he hīmene takoꞌa hai hīmene mo aŋi-aŋi e te taꞌatoꞌa. ¹⁶Mo haꞌahana-hana ōꞌou ki te ꞌAtua hai ꞌarero vaꞌai atu e te Vārua Maitai, ꞌe he ŋaroꞌa e te kope e tahi, e ko riva te kope era mo hokorua atu ꞌi taꞌa pure ꞌi te meꞌe era ꞌina he aŋi-aŋi i taꞌu vānaŋa. ¹⁷Ka ai atu e riva rō ꞌā taꞌa pure mo māuru-uru ki te ꞌAtua, mo te rua ꞌina e tahi hauhaꞌa.

¹⁸E māuru-uru rō ꞌana a au ki te ꞌAtua ꞌo te ai ꞌata rahi tōꞌoku vānaŋa ꞌi te ꞌarero kē taꞌe ꞌite e au ki a kōrua taꞌatoꞌa. ¹⁹Ka ai atu pē ira, ꞌi roto i te nuꞌu haka moe i te manaꞌu ꞌi ruŋa i a Ietū, i hau rō atu tōꞌoku haŋa mo kī e rima vānaŋa aŋi-aŋi e te nuꞌu mo hāpī i a rāua ki te kī e hoꞌe ꞌahuru taꞌutini vānaŋa hai ꞌarero kē.

²⁰E te taina, ka haka rē te manaꞌu ŋā poki o ruŋa i te ŋā meꞌe nei. Mo haŋa o kōrua mo manaꞌu pa he ŋā poki, e manaꞌu ia pa he ŋā poki poreko iho mo te meꞌe taꞌe tano. ²¹E kī rō ꞌā e te ꞌAtua ꞌi ruŋa i te ⌊Pāpaꞌi Moꞌa⌋:

«E vānaŋa rō a au ki te nuꞌu o te henua nei

a roto i te haha o te nuꞌu o te rua henua ꞌe hai ꞌarero kē,

ꞌe, ka ai atu pē ira, ꞌina e ko haka roŋo mai».

²²Te vānaŋa hai ꞌarero kē taꞌe ꞌite he meꞌe mo haka takeꞌa ki te nuꞌu taꞌe haka moe i te manaꞌu ꞌi ruŋa i a Ietū i te pūai o te ꞌAtua. ꞌE te vānaŋa i te meꞌe haka ꞌite e te ꞌAtua hai ꞌarero aŋi-aŋi e te taŋata he meꞌe mo te riva-riva o te nuꞌu haka moe i te manaꞌu ꞌi ruŋa i a Ietū, taꞌe mo te nuꞌu taꞌe haka moe i te manaꞌu ꞌi ruŋa i a ia.

²³Pē nei te auraꞌa: mo ai ko taka-taka ꞌā a kōrua mo haꞌamuri i te ꞌAtua, ꞌe he tuꞌu atu ki roto i a kōrua te nuꞌu taꞌe haka moe i te manaꞌu ꞌi ruŋa i a Ietū ꞌe te nuꞌu taꞌe aŋi-aŋi o ruŋa i te ŋā meꞌe nei, ꞌe he ŋaroꞌa i a kōrua taꞌatoꞌa e vānaŋa ꞌā ꞌi te ꞌarero huru kē huru kē, he manaꞌu ko maꞌa-maꞌa tahi ꞌana kōrua. ²⁴ꞌE mo vānaŋa tahi o kōrua i te vānaŋa haka ꞌite atu e te ꞌAtua hai ꞌarero aŋi-aŋi e te taŋata ꞌe he tuꞌu atu ki muri i a kōrua te nuꞌu taꞌe haka moe i te manaꞌu ꞌi ruŋa i a Ietū ꞌe te nuꞌu taꞌe aŋi-aŋi o ruŋa i te ŋā meꞌe nei, ka ŋaroꞌa era i te kōrua vānaŋa, he haka topa riva-riva i te manaꞌu: a rāua he nuꞌu hara ꞌe e ai rō ꞌā te ūtuꞌa mo rāua mo taꞌe huri o te manaꞌu ki te ꞌAtua, ²⁵ꞌe, takoꞌa, te meꞌe taꞌatoꞌa taꞌe tano o roto i te rāua māhatu taꞌe ꞌite e te nuꞌu e ꞌite tahi rō ꞌā e te ꞌAtua. ꞌI rā hora he ⌊huri te manaꞌu ki te ꞌAtua⌋, he tū-turi ꞌe he haꞌamuri ki a ia koia ko aŋi-aŋi: he parautiꞌa mau ꞌā te ꞌAtua ꞌi roto i a kōrua.

Hai tī-tika ana haꞌamuri ki te ꞌAtua

²⁶Tāꞌaku kī, e te taina ē: ꞌi te hora taka-taka o kōrua mo haꞌamuri ki te ꞌAtua, e tano nō te tētahi nuꞌu mo hīmene i te hīmene haꞌahana-hana, ꞌe te tētahi atu mo hāpī ꞌo mo haka ꞌite i te meꞌe haka aŋi-aŋi e te ꞌAtua, ꞌo mo vānaŋa hai ꞌarero kē taꞌe ꞌite e ia, ꞌo mo kī i te haꞌaauraꞌa o rā vānaŋa. Te meꞌe taꞌatoꞌa nei e aŋa mo te riva-riva o te nūnaꞌa taꞌatoꞌa o te taŋata haka moe i te manaꞌu ꞌi ruŋa i a Ietū. ²⁷Hora era mo vānaŋa i te ꞌarero kē taꞌe ꞌite, hoko rua ꞌo hoko toru mau nō ana vānaŋa ꞌe e tahi e tahi, ꞌe e ai takoꞌa te kope mo haꞌaauraꞌa i rā vānaŋa. ²⁸ꞌE mo kore o te kope mo haꞌaauraꞌa, ꞌina ko vānaŋa hai ꞌarero kē taꞌe ꞌite ꞌi muꞌa o te nūnaꞌa taŋata taꞌatoꞌa haka moe i te manaꞌu ꞌi ruŋa i a Ietū. Hoko tahi nō ana vānaŋa i rā vānaŋa ꞌe mo te ꞌAtua nō.

²⁹Pē ira takoꞌa ꞌana, mo ai o te nuꞌu vānaŋa i te meꞌe haka ꞌite e te ꞌAtua, hoko rua ꞌo hoko toru ana vānaŋa, ꞌe mo te tētahi e uꞌi hoki rā vānaŋa o te ꞌAtua mau ꞌā. ³⁰ꞌE mo haka ꞌite e te ꞌAtua e tahi meꞌe ki te kope e noho rō ꞌā ꞌi rā kona, te kope vānaŋa he mou mo vānaŋa o rā rua kope era. ³¹Mo aŋa o kōrua pē ira, taꞌatoꞌa nō ka ai era te hora mo vānaŋa i te meꞌe haka aŋi-aŋi e te ꞌAtua, he ꞌite te taꞌatoꞌa ꞌe he ꞌata pūai te manaꞌu ꞌi ruŋa i a Ietū. ³²Te kope vānaŋa i te meꞌe haka ꞌite e te ꞌAtua e ꞌite mo tiaki ki tōꞌona hora, ꞌo vānaŋa hoko rua ꞌi tū hora ꞌā. ^33-34Te ꞌAtua, paꞌi, taꞌe he ꞌAtua o te meꞌe mira-mira; tāꞌana meꞌe haŋa he meꞌe tī-tika ꞌe he haumārū.

ꞌI te hora taka-taka mo haꞌamuri ki te ꞌAtua, ꞌina ko haꞌatiꞌa i te ŋā viꞌe mo vānaŋa. Pē ira te haka tere iŋa o te nūnaꞌa taŋata taꞌatoꞌa haka moe i te manaꞌu ꞌi ruŋa i a Ietū. Te ŋā viꞌe e haꞌatura ki te rāua kenu, pa he meꞌe hāꞌaki ꞌi ruŋa i te ⌊haka tere iŋa ꞌa Mōtē⌋. ³⁵Mo haŋa mo ꞌite e tahi meꞌe, ꞌi te hare ana ꞌui ki te kenu; ꞌina, paꞌi, he ŋā viꞌe e ko tano mo vānaŋa ꞌi te hora e taka-taka rō ꞌana mo haꞌamuri ki te ꞌAtua.

³⁶Te vānaŋa o te ꞌAtua taꞌe mai i a kōrua i ꞌite raꞌe ai, ꞌe taꞌe ko kōrua mau nō te meꞌe i ꞌite o ruŋa. ³⁷Mo manaꞌu o te kope e tahi e vānaŋa ꞌana a ia i te meꞌe haka ꞌite e te ꞌAtua, ꞌe he kope haka tere a ia e te Vārua Maitai, e ꞌite pē nei ē: tāꞌaku meꞌe nei e pāpaꞌi atu ena he roŋo o te tātou Pūꞌoko Haka Tere ko Ietū Kiritō. ³⁸ꞌE mo taꞌe moꞌa i te roŋo nei, ꞌina takoꞌa ia kōrua ko haka roŋo ki tāꞌana meꞌe haka ꞌite atu.

³⁹E te taina ōꞌoku ē, e haŋa kōrua ki te meꞌe he vānaŋa i te meꞌe haka ꞌite atu e te ꞌAtua vaꞌai e te Vārua Maitai mo aŋa i te aŋa o te ꞌAtua. ꞌE ꞌina ko taꞌe haꞌatiꞌa i te nuꞌu mo vānaŋa hai ꞌarero kē taꞌe ꞌite e rāua haka vānaŋa e te Vārua Maitai. ⁴⁰Te meꞌe haŋa mau nō: te ŋā meꞌe nei ana aŋa a roto i te haumārū ꞌe a roto i te tī-tika.

Te ora iŋa mai o Ietū mai te mate

¹Hora nei, e te taina ē, e haŋa rō ꞌana a au mo manaꞌu o kōrua ki te ⌊roŋo riva-riva o te ꞌAtua⌋ haka ꞌite atu e au, maꞌu hio-hio e kōrua ꞌi roto i te kōrua māhatu. ²Hai roŋo nei i eꞌa ai kōrua mai roto i te ūtuꞌa o te hara ꞌe i ravaꞌa ai i te ora ꞌāpī ꞌina he hopeꞌa raꞌa vaꞌai e te ꞌAtua, ana maꞌu hio-hio kōrua pa he meꞌe haka ꞌite atu era e au. Mo taꞌe ai pē ira, ꞌina e tahi hauhaꞌa o te haka moe iŋa ena o kōrua i te manaꞌu ꞌi ruŋa i a Ietū.

³Te roŋo raꞌe i hāpī atu e au he meꞌe haka ꞌite mai: a Ietū Kiritō i mate ai mo te tātou hara, pe he meꞌe hāꞌaki ꞌi ruŋa i te ⌊Pāpaꞌi Moꞌa⌋; ⁴he tanu ꞌe, ꞌi te toru mahana, he ora haka ꞌou mai te mate, pe he meꞌe hāꞌaki takoꞌa ꞌi ruŋa i te Pāpaꞌi Moꞌa; ⁵ꞌe i haka takeꞌa rō i a ia ki a Pētero ꞌe ki oti ki te hoꞌe ꞌahuru mā piti ⌊ꞌāpōtoro⌋. ⁶I haka takeꞌa takoꞌa rō i a ia ki te nuꞌu ꞌata rahi ki te pae hānere e taka-taka rō ꞌā, he nuꞌu ⌊haka moe i te manaꞌu⌋ ꞌi ruŋa i a ia. Te rahi raꞌa o rā ŋā nuꞌu ko te ora iŋa ꞌana ꞌātā ki te hora nei ꞌe tētahi ko mā-mate ꞌā. ⁷He haka takeꞌa i a ia ki a ⌊Tanatiako⌋, ꞌe ki oti he haka takeꞌa haka ꞌou ki te nuꞌu ꞌāpōtoro taꞌatoꞌa. ⁸I hopeꞌa i haka takeꞌa mai ai ki a au, ka ai atu ko rahi atu ꞌā te ꞌāvaꞌe a tuꞌa o te haka takeꞌa i a ia ki te tētahi atu ꞌāpōtoro, ꞌe i haka moe era a au i tōꞌoku manaꞌu ꞌi ruŋa i a ia, i tuꞌu rō pa he nono e tahi, pa he poki haka poreko kai tano ꞌā te ꞌāvaꞌe.

⁹E kī atu ena a au i te meꞌe nei ꞌo te ai he kope hopeꞌa o te taꞌe hōnui a au o roto i te ꞌāpōtoro, ꞌātā e ko tano mo raŋi mai he ꞌāpōtoro ꞌi te tute ōꞌoku i te nūnaꞌa taŋata haka moe i te manaꞌu ꞌi ruŋa i a Ietū mo tōtōā. ¹⁰ꞌE, hai riva rahi o te ꞌAtua e tuꞌu nei a au pē nei, ꞌe ꞌina kai taꞌe hauhaꞌa rā riva rahi era ōꞌona. Te parautiꞌa, ꞌata hau tōꞌoku aŋa ki te tētahi ꞌāpōtoro, ka ai atu, taꞌe ko au mau ꞌā rā meꞌe, he ꞌAtua, ꞌi tōꞌona riva rahi, e hāꞌūꞌū mai era. ¹¹Taꞌe he meꞌe hauhaꞌa te kope haka ꞌite atu, ka ai atu ko au ꞌo he tētahi ꞌāpōtoro. Te meꞌe hauhaꞌa ko rā roŋo mau era ꞌā o ruŋa i a Ietū, he meꞌe haka ꞌite oho e mātou taꞌatoꞌa, ꞌe he meꞌe o ruŋa kōrua e haka moe ena i te manaꞌu.

Te ora iŋa mai te mate

¹²ꞌE mo ai te meꞌe hāpī o mātou pē nei ē: ko ora ꞌā a Ietū Kiritō mai te mate, ¿he aha ia tētahi o kōrua e kī ena: te nuꞌu mate e ko ora haka ꞌou? ¹³Mo ai ꞌina he ora haka ꞌou te nuꞌu mate, ꞌina takoꞌa ia te ⌊Kiritō⌋ kai ora haka ꞌou mai. ¹⁴ꞌE mo ai ꞌina he Kiritō kai ora mai, te meꞌe haka ꞌite e mātou ꞌina e tahi hauhaꞌa, ꞌina takoꞌa e tahi hauhaꞌa o te haka moe iŋa o te kōrua manaꞌu ꞌi ruŋa i a ia, ¹⁵ꞌe he riro mātou he mataꞌite reo-reo o te ꞌAtua. Ko kī ꞌana, paꞌi, a mātou ko haka ora ꞌana e ia i a Ietū mai te mate. ꞌE mo ai ꞌina te nuꞌu mate he ora haka ꞌou, taꞌe takoꞌa ia he parautiꞌa ko haka ora ꞌana e te ꞌAtua i te Kiritō.

¹⁶Mo ai ꞌina he nuꞌu he ora haka ꞌou mai te mate, ꞌina takoꞌa ia te Kiritō kai ora mai. ¹⁷ꞌE mo ai ꞌina he Kiritō kai ora mai, te haka moe iŋa ena o te kōrua manaꞌu ꞌi ruŋa i a ia ꞌina e tahi hauhaꞌa, te kōrua hara ko te ai iŋa ꞌana, ¹⁸ꞌe te nuꞌu mate haka moe i te manaꞌu ꞌi ruŋa i te Kiritō e ko eꞌa mai roto i te ūtuꞌa o te hara ꞌe e ko ravaꞌa i te ora ꞌāpī ꞌina he hopeꞌa raꞌa vaꞌai e te ꞌAtua. ¹⁹ꞌE mo ai mo te ao nō nei e ŋatu ena te tātou haŋu ꞌi ruŋa i te Kiritō, he haka ꞌaroha mau nō ia te meꞌe mo tātou.

²⁰ꞌE te parautiꞌa, te Kiritō ko ora ꞌā mai te mate. A ia he raꞌe o te meꞌe mo kato, te auraꞌa, he kope raꞌe mo ora mai te mate. ²¹Pa he ai iŋa o te mate hai taŋata mau nō e tahi, pē ira takoꞌa ꞌana hai taŋata mau nō e tahi ka ai ena te ora iŋa mai te mate. ²²Te auraꞌa: hai ⌊ꞌĀtamu⌋ te taŋata taꞌatoꞌa e mate ena, ꞌe hai Ietū Kiritō ka ora ena mai te mate, ²³ꞌe taꞌatoꞌa ꞌi tōꞌona hora: ꞌi raꞌe te Kiritō, ꞌe ki hoki mai a ia, he nuꞌu ꞌāꞌana. ^24-25Ki oti he tuꞌu mai te hora hopeꞌa o te ao nei, hora ka haka tere ena e te Kiritō ꞌe ka haka kore ena i te pūai o te meꞌe taꞌatoꞌa taꞌe takeꞌa taꞌe haŋa ki a ia haka tere i te ao nei, ꞌātā ka haka hēpiꞌi tahi rō i a rāua ꞌi raro i tōꞌona vaꞌe. ꞌAi era ka vaꞌai iho i te ao nei ki te ꞌAtua Matuꞌa mo haka tere e ia. ²⁶ꞌE te meꞌe hopeꞌa ka haka kore ena he mate.

²⁷E hāꞌaki rō ꞌana, paꞌi, ꞌi ruŋa i te Pāpaꞌi Moꞌa: te ꞌAtua ko haka rē ꞌana i te meꞌe taꞌatoꞌa mo te Kiritō e haka tere. ꞌE ko ꞌite ꞌā e tātou: te meꞌe taꞌe haka tere mau nō e ia he ꞌAtua; ꞌāꞌana, paꞌi, i vaꞌai i te parau mo haka tere i te meꞌe taꞌatoꞌa. ²⁸ꞌE ki haka tere a Ietū Kiritō, te Poki, i te meꞌe taꞌatoꞌa, ꞌi rā hora, māꞌana mau ꞌā e haka rē i a ia mo te ꞌAtua e haka tere, he kope ꞌāꞌana i vaꞌai ki a ia i te parau mo haka tere. Pē ira te ꞌAtua ka haka tere iho ena i te meꞌe taꞌatoꞌa.

²⁹Ki manaꞌu haka ꞌou rā tātou i te ora iŋa o te nuꞌu mai te mate. Mo ai taꞌe he parautiꞌa, ¿he aha ia te nuꞌu e haka ⌊papatito⌋ ena i a rāua mo te rāua nuꞌu mate? Mo ai, paꞌi, ꞌina he ora te nuꞌu mai te mate, ꞌina e ko aŋa i te meꞌe era. ³⁰ꞌE a mātou mau nei ꞌā, ¿he aha e haꞌaoromaꞌi e oho nei, paurō te mahana, i te ꞌati mo taꞌe ai he ora haka ꞌou te taŋata mai te mate?

³¹E te taina, paurō te mahana e oho nei a au mo mate ꞌi te rima o te nuꞌu taꞌe haŋa ki te ꞌAtua. Te meꞌe nei he parautiꞌa pa he parautiꞌa mau ena ꞌā o te koa ꞌi roto i a au ꞌo te ai o kōrua ꞌa Ietū Kiritō, Pūꞌoko Haka Tere o tātou. ³²ꞌE mo ai he parautiꞌa ꞌina he nuꞌu he ora haka ꞌou mai te mate, ¿e ai rō hō te manaꞌu o te ao nei tano mo haka moto i a au ki te nuꞌu o Ēfeto tuꞌu pa he ꞌanimare taehae pa he meꞌe aŋa e au? Mo taꞌe ora ia o te nuꞌu mai te mate, i hau ꞌi te riva mo aŋa o tātou pa he meꞌe kī e te nuꞌu: «¡Ki kai, ki unu; āpō, he mate ꞌe he oti mau rō ꞌai!».

³³ꞌIna kōrua ko haka rē mo reo-reo atu e te rua. Pa he vānaŋa kī e te kope e tahi: «Te hokorua aŋa i te meꞌe taꞌe tano he haka riro i a koe pē ia takoꞌa». ³⁴E haka topa riva-riva haka ꞌou te manaꞌu, ꞌe ꞌina ko hara. Te tētahi, paꞌi, o kōrua ꞌina he ꞌite i te hāpī parautiꞌa o te ꞌAtua. E kī atu ena a au i te meꞌe nei mo haꞌamā o kōrua.

Pē hē ka ora haka ꞌou ena te taŋata mai te mate

³⁵E ꞌui rō pēaha te kope e tahi: «¿Pē hē te taŋata ka ora haka ꞌou ena mai te mate? ꞌE ¿pē hē te huru o tōꞌona hakari ka ai era?». ³⁶Te kope ꞌui tāꞌue pē ira ꞌina kai haka topa i te manaꞌu. E manaꞌu kōrua he aha te meꞌe topa ki te karu e ꞌoka ena: e ko tupu mo taꞌe kōpiro ꞌe mo taꞌe ŋaꞌaha ꞌi raꞌe te haho. ³⁷Te karu, ka ai atu he karu tariko ꞌo he tētahi atu karu, e ai rō ꞌā tōꞌona huru, ꞌe te meꞌe tupu mai roto i te karu taꞌe he huru karu toe. ³⁸Te huru o te tumu e tupu ena o te ꞌAtua te vaꞌai, ꞌe huru kē huru kē e tupu ena mai te rauhuru o te karu.

³⁹Pē ira takoꞌa ꞌā te huru o te tētahi meꞌe aŋa e te ꞌAtua. Taꞌe taꞌatoꞌa pē tū huru tahi ꞌā; e ai rō ꞌā te huru o te taŋata, o te ꞌanimare, o te manu ꞌe o te ika. ⁴⁰Meꞌe rahi nō atu huru o te meꞌe i aŋa e te ꞌAtua ꞌi te raŋi ꞌe ꞌi ruŋa i te henua, ꞌe te nehe-nehe o te ŋā meꞌe nei, taꞌe pē tū huru tahi ꞌana. Te nehe-nehe o te meꞌe o ruŋa i te raŋi taꞌe pa he nehe-nehe o te meꞌe o ruŋa i te henua. ⁴¹Te māꞌeha iŋa o te raꞌā taꞌe pa he māꞌeha iŋa o te māhina ꞌe o te hetuꞌu. ꞌE te pura-pura iŋa o te hetuꞌu taꞌe pē tū huru tahi ꞌā.

⁴²Pē ira takoꞌa ꞌana te hakari o tātou o te hora nei taꞌe pa he hakari ka ora ena mai te mate ꞌo te ai te hakari nei he mate ꞌe he piro. ꞌE te hakari ora mai te mate ꞌina e ko mate ki te hora hopeꞌa. ⁴³Te hakari mate o te hora nei he meꞌe rake-rake ꞌe ꞌina e tahi pūai. ꞌE te hakari ora mai te mate meꞌe nehe-nehe ꞌe pūai. ⁴⁴Te hakari mate o te hora nei, he hakari tano mo noho ꞌi te ao nei. ꞌE te hakari ora mai te mate he hakari tano mo noho ꞌi te raŋi. ꞌE mo ai o te hakari tano mo te ao nei, he ai takoꞌa ia te hakari tano mo te raŋi.

⁴⁵Pē nei e hāꞌaki ena ꞌi ruŋa i te Pāpaꞌi Moꞌa: «Ki te taŋata raꞌe era ko ꞌĀtamu i vaꞌai ai e te ꞌAtua i te ora ki tōꞌona hakari mo noho ꞌi te ao nei»; ꞌe ki a ꞌĀtamu hopeꞌa ena, ko Ietū Kiritō, i vaꞌai ai i te parau mo vaꞌai i te ora ꞌāpī ꞌina he hopeꞌa raꞌa mo noho ꞌi te raŋi. ⁴⁶Te ora ꞌāpī mo noho ꞌi te raŋi taꞌe he meꞌe raꞌe. Te meꞌe raꞌe he ora mo noho ꞌi te ao nei, ꞌe ki oti te ora ꞌāpī mo noho ꞌi te raŋi. ⁴⁷Te taŋata raꞌe era ko ꞌĀtamu hai ꞌōꞌone i aŋa ai, ꞌi te meꞌe era o te ao nei a ia. ꞌE te rua ꞌĀtamu ko Ietū Kiritō, ꞌe a ia o te raŋi. ⁴⁸Te hakari o te taŋata o te ao nei pa he hakari o te taŋata aŋa era hai ꞌōꞌone. ꞌE te hakari o te nuꞌu ka noho ena ꞌi te raŋi pa he hakari o te taŋata era o te raŋi. ⁴⁹ꞌE pa he tuꞌu iŋa nei o tātou pa he taŋata aŋa era hai ꞌōꞌone, pē ira takoꞌa ꞌana ka tuꞌu ena a tātou pa he kope era o te raŋi.

⁵⁰Te kī, e te taina ē: te hakari mate nei o tātou e ko tano ꞌi te ao haka tere e te ꞌAtua, he kona taꞌe ai o te mate. ⁵¹ꞌE, ꞌī a au he vānaŋa atu o ruŋa i te meꞌe manaꞌu e te ꞌAtua mo aŋa taꞌe haka ꞌite mai e ia ꞌi muꞌa ꞌā: e ko mate taꞌatoꞌa tātou te nuꞌu haka moe i te manaꞌu ꞌi ruŋa i a Ietū; nā e tuꞌu rō te mahana te hakari mate nei o tātou he riro he hakari taꞌe mate. ⁵²Te meꞌe nei ka topa ena ꞌi te hora o te puhi iŋa hopeꞌa o te koneta, ꞌe te hōrou pa he mine iŋa ena ꞌā o te mata. He puhi te koneta, te nuꞌu mate he ora tahi mai, ꞌe ꞌina e ko mate haka ꞌou. ꞌE a tātou te nuꞌu ora o rā hora, he mono te hakari, ⁵³ꞌi te meꞌe era te hakari mate nei o tātou o te hora nei e riro rō he hakari ꞌina e ko mate ki te hora hopeꞌa. ⁵⁴Ki topa te meꞌe nei, he tano te meꞌe hāꞌaki ꞌi ruŋa i te Pāpaꞌi Moꞌa pē nei ē:

«E ko ai haka ꞌou te mate,

ko haka kore ꞌana e te ꞌAtua».

⁵⁵ꞌO ira e tano nō tātou mo kī:

«E te Mate, ¿e rē mau rō mai koe?

¿E ai mau nō ꞌā tuꞌu pūai ꞌi ruŋa i a mātou?».

⁵⁶Te pūai o te mate mai te hara e ai ena, ꞌe te hara e pūai ena he taꞌe haꞌatura ki te roŋo o te ꞌAtua. ⁵⁷E te taina, ¡ki māuru-uru tātou ki te ꞌAtua ꞌo te vaꞌai mai i te pūai mo rē ki te hara ꞌe ki te mate hai meꞌe aŋa era e Ietū Kiritō, he Pūꞌoko Haka Tere o tātou!

⁵⁸Te meꞌe haŋa ia, e te taina haŋa rahi ōꞌoku ē: he haka hio-hio he oho te kōrua manaꞌu ꞌi ruŋa i a Ietū, ꞌo haka tapa kōrua mai te hāpī parautiꞌa o te ꞌAtua. ꞌE, ka aŋa ka oho nō i te aŋa haŋa o te ꞌAtua mo aŋa e kōrua. E ꞌite rō ꞌana, paꞌi, e kōrua: te aŋa ki a ia e ko taꞌe hauhaꞌa.

Te moni mo te taina o Hērutarema

¹Te haka taka-taka i te moni mo te nuꞌu haꞌataꞌa e te ꞌAtua māꞌana o Hērutarema, e aŋa pa he meꞌe haka ꞌite e au ki te nūnaꞌa taꞌatoꞌa ⌊haka moe i te manaꞌu⌋ ꞌi ruŋa i a Ietū o te ŋā kona taꞌatoꞌa era o Karatia. ²ꞌI te mahana tāpati taꞌatoꞌa, e haꞌataꞌa ꞌi te kōrua hare e tahi ꞌapa o te tara ai o kōrua ꞌe ꞌai ka hāpaꞌo rō, ki tuꞌu atu a au, ko haꞌataꞌa era ꞌā, ꞌo haka taka-taka iho kōrua ꞌi rā hora. ³ꞌE, ki tuꞌu atu a au, he haka maꞌu i rā moni ki Hērutarema hai nuꞌu nō era o kōrua i haŋa. Ki a rāua ka vaꞌai nei e au i te parau ꞌi ruŋa e hāꞌaki rō ꞌā ko ai a rāua ꞌe ki te aha ꞌi Hērutarema. ⁴ꞌE mo uꞌi ōꞌoku e tano nō a au mo oho ꞌi muri, he oho tahi a mātou.

He manaꞌu iŋa o Pauro mo oho ki Kōrinto

⁵ꞌI tōꞌoku ara ki a kōrua ꞌi Kōrinto ꞌi raꞌe a au ka vari nei ki Mātērōnia, ꞌe ki oti ka tuꞌu iho atu ena a au ki a kōrua. ⁶E rahi ꞌiti rō pēaha tōꞌoku noho atu ꞌi muri i a kōrua, korohaŋa ꞌāvaꞌe taꞌatoꞌa era o te toŋa. Pē ira, ki oho haka ꞌou a au ꞌi tōꞌoku ara ki te rua kona, e tano rō pēaha kōrua mo hāꞌūꞌū mai hai meꞌe mo tōꞌoku ara. ⁷ꞌIna a au e ko haŋa mo hipa ꞌiti-ꞌiti nō atu mo uꞌi i a kōrua; e haŋa rō ꞌana mo roa ꞌiti o tōꞌoku noho iŋa atu, ana haŋa te ꞌAtua. ⁸ꞌĪ a au ꞌi Ēfeto ꞌe ka noho nei a au ꞌātā ki oti te ⌊ŋoŋoro o te Peneketote⌋, ⁹ꞌo te ai e rahi rō ꞌana te nuꞌu o nei haŋa mo haka ꞌite ōꞌoku ki a rāua i te ⌊roŋo riva-riva o te ꞌAtua⌋, ka ai atu e rahi takoꞌa rō ꞌana te nuꞌu taꞌe haŋa mai.

¹⁰ꞌE mo tuꞌu atu o Timoteo, e uꞌi e haka naho-naho; a ia e aŋa takoꞌa rō ꞌana pē au ꞌi te aŋa o te tātou Pūꞌoko Haka Tere. ¹¹ꞌIna kōrua ko uꞌi taꞌe au ki a ia; e hāꞌūꞌū i tōꞌona ara mo oho mai mo uꞌi i a au. ꞌĪ a au e tiaki atu ena ki a ia ꞌe ki te ŋā taina hokorua ena i a ia.

¹²ꞌE te tātou taina a ꞌĀporo, i kī rō e au mo oho atu ꞌi muri i te taina oho atu uꞌi i a kōrua, ꞌe, mo te hora nei, ꞌina e ko tano mo oho atu. Ki tano tōꞌona hora ka oho atu ena.

Te meꞌe mo aŋa

¹³E uꞌi kōrua e hāpaꞌo ꞌe e haka hio-hio i te kōrua manaꞌu ꞌi ruŋa i a Ietū. E kiahio kōrua, ꞌina ko haꞌamā ꞌi te haka moe iŋa i te manaꞌu ꞌi ruŋa i a ia. ¹⁴ꞌE te meꞌe taꞌatoꞌa o kōrua mo aŋa, e aŋa hai haŋa.

¹⁵E te taina, ko ꞌite ꞌana a kōrua: te huaꞌai o Etefana he nuꞌu raꞌe o te kona era o Ākāia i haka moe i te manaꞌu ꞌi ruŋa i a Ietū, ꞌe ꞌi te hora nei te meꞌe rava aŋa o rāua he hāꞌūꞌū ki te taina haka moe i te manaꞌu ꞌi ruŋa i a Ietū. ¹⁶He ani atu a au mo haka rē i a kōrua mo te nuꞌu era ꞌe mo te nuꞌu tuꞌu pē rāua hāꞌūꞌū ꞌi te aŋa o te ꞌAtua e haka tere atu.

¹⁷Meꞌe huru kē te rahi o tōꞌoku koa i tuꞌu mai ai a Etefana, a Forotunato, ꞌe a Akaiko mai i a kōrua ena. ꞌI te kore, paꞌi, o kōrua, ¹⁸o rāua te haka koa ꞌe te ꞌata haka pūai mai i a au, pa he meꞌe ka aŋa atu ena ki a kōrua ki hoki haka ꞌou atu. Te nuꞌu pē nei e moꞌa.

He ꞌaroha

¹⁹Te nūnaꞌa taŋata taꞌatoꞌa haka moe i te manaꞌu ꞌi ruŋa i a Ietū o te ŋā kona nei o ꞌĀtia ko ꞌaroha mai ꞌā mo kōrua. A ꞌĀkira ꞌe a Pirika, ꞌe te nuꞌu taina taka-taka i te rāua hare ko ꞌaroha takoꞌa mai ꞌā mo kōrua hai ꞌīŋoa o te tātou Pūꞌoko Haka Tere, ²⁰ꞌe pē ira ꞌā te taina taꞌatoꞌa o muri i a au. ꞌE ꞌi roto i a kōrua takoꞌa e ꞌaroha hai haŋa.

²¹A au, a Pauro, e pāpaꞌi atu ena i te ꞌaroha nei hai rima mau nei ꞌā ōꞌoku.

²²Mo taꞌe haŋa o te kope e tahi ki te tātou Pūꞌoko Haka Tere ko Ietū Kiritō, mo te ꞌAtua e haka ūtuꞌa. ¡E te mātou Pūꞌoko Haka Tere ē, ka hōrou koe ka hoki mai!

²³E te taina, ka ai ꞌi ruŋa i a kōrua taꞌatoꞌa te riva rahi o te tātou Pūꞌoko Haka Tere. ²⁴E haŋa rahi rō atu ꞌana a au ki a kōrua ꞌo te ai ꞌa Ietū Kiritō tātou taꞌatoꞌa.