TITO WỲR
Pawrô Jõ Kàhhôc
Ỹhỹ, pê Pawrô pê Jeju jarkwa na memprar catêjê nõ, ne Tito mã hõ kàhhôc kujate. Na pê hõ kàhhôc ita japrỳ pê Tito Wỳr, Pawrô Jõ Kàhhôc (Tito). Ne pê Tito ajco Pawrô kôt apu ipa. Jirô pê mã pê Pawrô Kẽnpojre jõ pjê kam Jeju na mehkwỳ mehkrĩ atajê to ihhimpej catê na hãm. Ne pom cu me hõ kàhhôc cahyt ita kam, pê Pawrô Tito mã, jũ caxuw jũmjê te me cupê Jeju na mehkwỳ na cumã amji jarẽn, ne ajteare mã cute amji kam me hapac xà ton atajê cawpa. Ne hanea ne cute cumã, cute me hũmre impejti pê catyt kam atajê to, Jeju na mehkwỳ jamãr catê nõ xãm na hũjahkre. Mãr quê me cumã Jeju na mehkwỳ te ajpẽn kam mehcarĩcti kam, amji to me ipijapar to hahkre na, cumã hũjahkre.
1Pê Pawrô Tito mã amji jarẽ
1-2Hàpà Tito, ipê Pawrô, ne ipê Pahpãm mã ijàpên catê, ne hanea ne ipê Jeju Crixtô jarkwa na iprar catê, ne pa wa ha amã ihkàhhôc ita to. Pê Pahpãm icapi, ne mehkwỳ wỳr ikujate. Pom pê ramã mam amji mã mehkwỳ capi atajê, wa ite mehtehcajpar, mã cute me hũnãr to ihtỳaj prãmte, pê me hỹrmã ikujate. Ne hanea ne cute Jeju to amji mã mehhimpej kam me to incrà tu to prãm to pê mehwỳr ikujate. Ne hanea ne caxwãm catia mã, catyt kam me papa prãmte, me cumã Pahpãm te amji kam hapac xà to hahkre. He nee Pahpãm apu ihhêj nare, ne rỳ pêa mã, pê cormã pjê ton nare kam, me pamã cute amji cahê na me pahto ipijapar rohnỳtti mã xà na amji to, cu pahtỳj me hikaj. 3Pê rỳ pêa mã ramã me pamã amji to. Ne ramã cute me pamã amji ton xàa kam hàhhuc, na ri ihtỳj ita caxuw apu cahê na me pancjêj xà to me pamã hahkre. Ne pom cute me pamã ampo to hahkre xà ita pê imã cugõ, ne ite mehcunea mã to icahkũm xà na harkwa ta. Ne Pahpãm te me pahkên kêanre catihti ata pê me pahto hapôj ata jarkwa kôt, wa mehcunea mã harẽn xà impejti itajê jarẽn to ipa.
4Ỹhỹ Tito, itea wa amã ihkàhhôc ita ton. Ampo na? Cu ajwar Jeju to amji mã pahhimpej ita kam, wa itỳj ato amji kra. Ne Pahpãm pê me pajõ Inxũ Cati, ne ihcãmter Jeju Crixtô te ri me pahkên kêanre pê me pahto hapôj, na wa ijõtpê me cumã acajrẽn to ipa, ne me cumã:
— Tito to impeaj ne, ne caprĩ, ne caxwãm pê me cumã me acarĩcti jõr to me apa — hane.
Tito te mehkwỳ to mehhimpej catêjê pyxwỳr xà
5Cwỳrjapê pê wa cô jipôc ri, Kẽnpojre jõ pjê ata kam guwahi, ne amã ijarkwa hyr to:
— Tito, cormã nee jũm te krĩ cunea kôt Jeju na mehkwỳ mã me to ihhimpej catêjê pyxwỳr nare. Cwỳrjapê ca ha ahpỹanre na me akwỳ cunea mã, me to ihhimpej catêjê ton partu — hajỹr. 6Cwỳrjapê wa ha ato ihimpej. Ca nee Jeju na mehkwỳ to ihhimpej catê na, atỳj jũm xãm nare. Ne quêt cute me hajỹr catêjê nõ, ca ha hãm he. Quê ha hũmre nõ pê catyt kam ipa catê, quê nee jũm ihkôt harẽn nõ to kên nare, ata pê quê ha me to ihhimpej catê. Ne cumã hĩxi pyxit peaj, ne ajpẽn na me ajkrut peaj. Quê ha mehkra xwỳjê pê catyt kam Jeju na mehkwỳ. Mãr quê nee jũm, me hũpar nare, krã kêanre na, amehkra to ihcakôc nare.
7Ne Jeju na mehkwỳ to mehhimpej catêjê pupun catêjê atajê, quê ha Pahpãm jàpên xàa to me hàpên to me ipa. Cwỳrjapê quê ha mehkwỳ nõ te, cute ampo to kên nõ na harẽn na, quê ha nee cupê mehkwỳ to ihhimpej catê nare. Ne me cumã, cute amji kam me hapac xà impejti cajcucre to me amji jarẽc jahkre pej. Ne hanea ne me cumã cute amji kam hapac xà pytĩti to amji jarẽc jahkre pej. Ne por quê ha me cupê mehkwỳ to ihhimpej catêjê atajê, quê ha nee amji to ame cati prãm nare, ne nee amencryc xi nare, ne nee côxỳhti to ame amji to ipipãn to me ipa nare, ne nee ame hàprê nare, ne nee ihtỳj ahti na hàpên xà kêanre atajê to amji to me hakràj prãm nare. 8Ne quêt ihcunea na, me hũrkwa to me hàhcajrẽnti ne, ne me cumã ampo pej pit kĩn. Ne caxwãm catia mã amji to mehhimpej to mempej, ne ampo kên cunea tête me amji jiprõn to me ipa. Ne mehcunea to me amji kam hapac to me ipipẽnti to me ipa. Ne catyt kam me Pahpãm jarkwa kôt ame ipa. Hõhõ, quê ha Jeju na mehkwỳ to mehhimpej catêjê pupun catêjê atajê cute amji kam me hapac xà to me hane. 9Ne ihtỳj me caxwãm pê amji mã me Jeju jarẽn pejti itajê to me ipijarõ to impejti to me ipa. Ampo na? Pom harẽn xà ita, nee mã ihhêj xi nare, ampeaj kam ri. Ne ihtỳj hũjarẽn xà ita to me cumã me hakryti to ihtỳj to ipa. Ne hanea ne hũjarẽn xà ita, cute cuna mã ame ampo to ihcupan catêjê mã harẽn to ipa.
Tito te Kẽnpojre catêjê mãn xà
10Ỹhỹ, Tito, ca ha ma amji to guphê to apa, nãmri ampeaj kam cute me Mojxe xwỳ jõ kàhhôc to me cumã hahkre to mehkêanre to me ipa catêjê jàhtô. Ne xwahna cumã me ate Juta catêjê kôt me Mojxe xwỳ jõ kàhhôc cunea kôt me amji ton na, me cumã me ato prãm. Na ri hõtpê me amã hũjarẽn to hane he:
— Gapacta ne Jeju to amji mã me ahimpej to me apa, ne hanea ne hĩkjê na, Mojxe te me hapackre xà cunea kôt me amji ton to me apa — hane. Ne amehhêj xia jarẽn to me ipa. Ne ame to ihhimpej catêjê pejti atajê cunea cuna mã, mehkên to pit mã ame amji kampa. 11Cwỳrjapê ri imã ate cute me hajỹrjê mãn na ato prãm. Na ca ha me cumãn prãm, ne me cumã garkwa to hane he:
— Me kêt! Ne aracri ame apa! Ca cama apu krĩ kam ikre jàhtôa kam mehkrĩ atajê cunea te me Pahpãm jarkwa pejti ata kôt me ipa xà kaj na mehcahpêrkàr to me apa. Ne ate ampo to me cumã hahkre xà kêanre itajê to, nee ate me cumã hahkre xà nare. Ne ate amji mã mehpore incwỳr prãmte, ca ame hajỹr to me apa. Xà nee ajte ita na me apahàm nare? — Hõ, ca ha me cumã hane. 12Ne Kẽnpojre jõ pjê ata kam mehkwỳa nõ te Pahpãm jarkwa to ihcakôc catê ata te amji jarẽn to:
— Me ipê Kẽnpojre catêjê hõtpê me ihêj xia to me ihêj xi, ne ihhêj rũm me ipê ampo kên jàprêa to hàprê atajê, ne ampeaj kam ite me xuwcaca, ne cama ampeaj kam me ijàpàn cati — hane. 13Ne pom cute ampo na me amji jarẽn xà ita, ampeaj kam ri. Cwỳrjapê ca ha ma cute amji kam me hapac xà ita tête me cahpêrkàr to ihtỳaj to apa, quê catyt kam caxwãm catia mã Jeju to amji mã mehhimpej to me ipa. 14Nee ca ha hipêr mam Juta catêjê quêtjê jũjarẽn xà to mehcakôc catêjê me, mehkrãa kam, cute me caxuw amji mã mehcakôc xà to mehhimpej atajê to me amji japackre nare. Ampo na? Atajê te ri ramã Pahpãm jarkwa pejti caca ne me hicu. Nãmri mehcakôc xà itajê nee Pahpãm pĩn me caxuw me cumã hapôj nare. Ne por Juta catêjê te Jeju kôt me amji ton jicu atajê krã pĩn ri me caxuw itajê japôj.
15Ne Pahpãm te ri me pahcaxwãm pê ame pahcũmpej, mã me pampej. Cwỳrjapê cu ampo pejti na pit mã me prãm. Ne por me Pahpãm par nare, ne ampeaj kam me caxwãm pê, mehtũmti atajê mã ri, ampo kên itajê cunea na prãm. Ne me cumã ampo pejti itajê ihkêanre, ne ampo kên ri me cumã impej. 16Ne ihtỳj Pahpãm kôt me ipa catêjê na me amji jarẽ. Mã nee me hàpên xà itajê Pahpãm kôt me ipa catêjê na me harẽn nare. Ne me hũpar nare, mã ihtỳj ame hàhcurê to ame ipa. Na ri nee ampo caxuw mempej nare.
2Tito te catyt kam mehkwỳ to ihhimpej xà
1Ne quêt ca nare, ca ha catyt kam ampeaj kam me cumã ate ampo to hahkre xà atajê to hahkre. 2Ne mehkà atajê mã gũjarẽn to hane he:
— Ame amji mã quêt nare, ne me amji mã ampejti ne. Ne catyt kam, caxwãm catia mã me apa. Ne ampo kên cunea tête me amji jiprõn to me apa. Ne Jejua to amji mã me ahimpej tỳaj to me apa. Ne amji mã me akwỳ kĩnti to me apa. Ne me gũcanãar kam me apa — hane.
3Ne hanea ne pyjê kà atajê mã gũjarẽn to hane he:
— Ca ha Jeju mã me amji gõ, ne catyt kam, ate amji kam me gapac xà impejti to amji mã me apijapar to me apa ata na. Ne nee mehkwỳ to ame akwỳ mã ihkôt harẽn kên to me apa nare. Ne nee côxỳhti to akõm to amji mã ahimpej to me apa nare. Ne ampo pejti to, ca ha quêt me hahkre to me apa. 4Mãr quê amji cuxà mehkwỳ cahãj tuwre atajê mã awjarẽ, quê ha cute catyt kam ame ipa na, quê ha ramã amji mã mempjê me, mehkra kĩn to me hahkre. 5Ne amji mã me ampejti ne, ne ampo kên cunea tête me amji jiprõ, ne catyt kam me ipa, ne nee apu mehkwỳ pê mempjê caxun to me ipa nare. Mãr quê catyt kam me hũrkwa jàpên xà to amji mã me hàpên pejti to me ipa, ne ihtỳj amji caxuw mempjê kam me hapac to me ipa. Ne me hàhcajrẽn jàhcaprĩhti ne. Quê ha cute amji to me hàpên to hajỹr to me ipa na, quê ha nee jũm Pahpãm te me pamã ita to hahkre xà ita cuna mã ihcakôc kên nare — hane. Hõhõ, ca ha pyjê kà mã ahimpej xà to hahkre to hane, mãr quê mentuw kwỳ mã to hahkre.
6Ne mentuwjê to hanea ne me hapackre. Mãr quê caxwãm catia mã, catyt kam amji to mehhimpej, ne ampo kên cunea tête me amji jiprõn to me ipa. 7Ne ate hajỹar, ca ha catyt kam apa ne ampo pejti ton to apa, mãr quê amji mã me apupun xà kôt, hanea ne catyt kam me ipa. Na ca ha me cumã ampo to hahkre kam pra, ne acryac kam, catyt kam me cumã ampo to hahkre. Ne ampo pejti to hahkre to, ca hirãa pê me cumã amji pro rẽn to apa, ne nee ca ampo kên ton, ne amji cwỳrpê ahêj nare. Ne quêt caxwãm catia mã ampo pejti to me cumã hahkre to apa. 8Ne garkwa pej to pit mã me cumã acakôc to apa, mãr quê nee jũm apar caca, ne amã ahêj xi na hacjên nare. Ne imã ate amji kam gapac xà impejti itajê na pit mã me ato prãm, mãr quê nee me pahcurê xwỳn nõ apu akôt harẽn to kên nare. Ne cama me pahkam ihpahàmti ne.
9Ita caxuw ri imã ate cama me cumã hàpên to me ipa catêjê japackre to hajỹr na, imã ato prãm he:
— Amji caxuw me gõ pahhi kampa, ne catyt kam me cumã gàpên pejti to me apa, mãr quê me gàpên xà impejti atajê kôt, amji mã me akĩn to impejti to me ipa. Quê me gàpên xà na me arẽ, ca nee xuwcaca te me cumã ampo jarẽn nare, ne aracri cute ampo na me arẽn atajê to me. 10Ne nee ame gõ pahhi pê me gàhkĩj nare. Ne quêt ita to ca ha me he, catyt kam me apejti na me apa. Ne me amji jarkwa par pejti to me apa. Quê ha mehcunea amji mã me Pahpãm te me pahkên kêanre ata pê me pahto hapôj ata cupa, ne hanea ne amji mã cute ampo to hahkre xà itajê cupa — hane. Hõhõ, ca ha cama me cumã hàpên catêjê japackre to hane.
Pê Pahpãm me pamã amji to ajpẽ
11Pê Pahpãm me pahto impejti prãmte, me pamã cute amji kam hapac xà itajê na amji to ajpẽ, ne amji pro mẽ. Mãr quê mehcunea me hõmpu, ne me hahkre pej, nãmri cupêa ri me pahkên pê me pahto hapôj catê, ne ihtỳj cute amji kam hapac xà ita to me pahcunea kampa, pjê cunea kam. 12Ne ihtỳj pahte mam amji kam me pajapac xà kêanre atajê jicu to me pamã hahkre. Por pahte amji kam me pajapac xà te Pahpãm pê ampỳa mã me pahto ipa atajê mã he:
— Ca ha nee amji to acati prãm nare, ne nee ahti na pyjê caxun nare, ne nee amji to gakràj cati prãm nare — hane. Mãr cu quêt ampo kên cunea tête me amji jiprõn to me papa. Ne catyt kam, caxwãm catia mã ame papa. Ne Pahpãm mã me amji jõr to me papa.
13Ne quê ha amcro nõ na, jũ caxuw, Jeju Crixtô pê Pahpãm kra pê me Pahpãm catia ata, ihtỳj pjê ita wỳr amji jaxà, na cu ha pahtỳj hõ amcro kam me pajakryti ata na me hikaj. Quê ha mehcunea, cute me pahkên kêanre pê me pahto hapôj na me hõmpu, ne me hahkre pej. 14Nãmri taa mã pê me pahcunea kritxwỳ na amji to, ne me pahcunea jahpan xà na caprô jaxwỳ, ne ampo itajê cunea mã amji gõ, ne amji mã huwahi ita to pê me pahcunea kên pê me pahto hapôj pa. Me pahte ampo pej to pit mã ame amji kam pajapac to me papa prãmte ri, cute me pamã amji kam hapac xà to ihtetetti. Ne me pahto amji kwỳa to prãmte, pê me pantête me pahkên itajê mã amji gõ.
15Ỹhỹ, Tito, ca ha atỳj ampo itajê cunea to me cumã hahkre. Ne Pahpãm jarkwa kôt, ampo na mehpeacre atajê tehcajpa, ne hacpỹa mã me to ihtỳj. Nãmri quê ha jũm ampo to kên na, ca ha kam atẽm pyrentu, Pahpãm jarkwa kôt, ne intête ihcahpêrta. Ne nee amji na jũm te, ate Pahpãm jarkwa kôt ampo to hahkre nare na, cute garẽn na hamãr nare.
3Cu ha catyt kam me pajõ pahhi atajê kampa
Roman 13.1-10; Epet 2.1-10; Tito 1.10-16
1Ỹhỹ Tito, ca ramã ate me pahkwỳ mã gũjarẽn xà itajê to gũjarẽn, ne hipêr to me hapackre, ne me cumã:
— Por me gõ pahhi atajê me, me ato ihhimpej catêjê atajê, ca ha amji caxuw me kampa, ne mehhimpej xà krac ri me apa. Quê ampo pejti ton na me amã awjahkre, ca ha me gũjarêan kam, hãn ne me ampo to. 2Ne atỳj jũmjê kôt ame harẽn kên to me apa nare, ne nee ame gàprê nare, ne cama me amji to impejti ne. Ne amji mã me aprĩa kam, me gàhcaprĩa kam me cumã acakôc to me apa, ne amji to me akryjre prãm to me apa, ne nee me hirôa pê amji to me acati prãm to me apa nare — hane.
3Pê mam me papê Jeju na mehkwỳ itajê me, me papê amji jahkre kêatre, na pê cu nee ajco me pajũpar nare, ne me pajõ pry kaj na ajco ame papa. Ne me pahcurê xwỳn caca xà kôt pit mã ame papa, ne ihkôat amji to me pahhimpej to me papa. Ne ampo kên kĩn itajê mã pit mã me amji jõr to me papa, por me pamã ihkĩnti atajê mã. Ne pahtỳj ajco ame ajpẽn curê to me papa, ne ajpẽn jũ na ame amji to prãm to ame papa. Ne ampo itajê ton to pit mã, ajco me amji pyràc to ame papa. Pê ajco mehkwỳ, ahna ame pahkam incryc, pê cu hanea ne amji jahpan xà na ajco kam ame pancryc.
4Pê Pahpãm amji mã me pahkĩnti ita na me pamã amji to ajpẽ he. Na pê amji mã me pahto impejti prãmte, me pahkên kêanre pê me pahto hapôj. 5Ne me pahkên pê me pahto hapôj partu. Xà pê cu ajkĩ me ampo pejti to na mã, pê ihkôt me pahto hane? Hãpà! He pê cumã me pahcaprĩ, na pê me pahto hane. Ne Pahpãm Carõ Pejti kôt me pahcaxwãm pê, me pahtetetti ita pê ihhêj rũm curmã ame pahpỳpỳm, ne cormã pahte amji kam me pajapac xà na amencwỳr. 6Pahpãm jàhcajrẽan to hàhcajrẽn, na pê me pamã Jeju Crixtô te me pahkên pê me pahto hapôj xà caxuw ihkujate. Pê me pahtyc xà jahpan xà na ty, ne me Pahpãm wỳr me pamã pry jahkjê, pê cormã Pahpãm me pamã Carõ Pejti gõ. 7Cwỳrjapê cu Pahpãm kam mare mã, cuna mã, catyt kam ame papa ita na, ne ahnaa jũ caxuw cahê na pahte amji to me papijapar rohnỳtti mã xà ata mã ame acjêj.
8Ne ijũjarẽn xà itajê ri quêt ampeaj kam. Tito, pom ite amã ampo to hahkre itajêa to, ca ha ate ampeaj kam me cumã hahkre na, imã ato prãm. Ne cute me apar atajê, quê ha me taa ahpỹanre na me amji jarẽn to:
— Wa Jeju to amji mã ihimpej to ipa, mã Pahpãm te icaprĩ, ne ito kênre nare, ne imã Carõ Pejti jõr, cwỳrjapê wa ha cumã amji gõ, ne cumã ijàpên pejti to catia to ipa — hane. Cu ha me pahte me ita to hajỹr na, quê ha ahna me pahcunea mã ihkênre nare.
Pê Pawrô Tito mã amji krac ri mehcakôc kên catêjê cawpa
9Ne pom cute me hajỹr xà atajê pê, ca ha ampỳa mã me apa he. Cute amji krac ri ihcaprỳ na amehcakôc catêjê kêanre atajê me, mam menquêtjê japrỳ to pit mã cute ame hahkre prãm catêjê me, cute Juta catêjê incaca xà cwỳrjapê tee ame ipijapu prãm catêjê atajê pê, ca ha ampỳa mã apu apa. Ampo na? He ampo itajê kôt hamreare. 10Ne por cute me ato ipicokjêr prãm to ipa atajê, ca ha me hapackre. Quê ha me hũpar nare, ne hipêr me ato ipicokjêr prãm, ca ha me hapackre to ajkrut. Quê ha hũpar nare, ne cute to incrê xà ita kam, ca ha me cumã hikra, ne nee hipêr me to amji japackre nare. 11Ne por cute me ita ton catêjê, ca ha ramã me hõmpu, ne me hahkre pej, ramã me caxwãm pê amehkêanre na, na quê ha ihtỳj ame amji kên mã me amji rẽ.
Pê Pawrô Tito mã amji jarẽ
12Ne wa ite Metohjêxà jõ krĩ kam amji to pahhàjê kujahêc na amji kam ijapac. Na wa ha ma me awỳr Artima me, Tiquicô pijakrut itajê nõ kujate. Quê ha curi me awỳr cato, ne me amã ijarẽ, ca ha jũ na me amji to, ne ma Metohjêxà jõ krĩ wỳr atẽm pyrentu. Ne curia cu ha ajpẽn cajpa. 13Me pahkwỳ nõ Xena pê Roman catêjê caca xà to cute me amji pyràc xà ata jahkre pej catê ata, me Apôr, quê ha amũ me anaa me tẽ. Atajê ca ha mehtẽm xà ata na mehtehcajpa, mãr quê nee me cupê ampo hamre nare. 14Ne imã me pahkwỳ te ampo pejti ton to me amji pyràc na imã me ato prãm. Ne cute ame ampo na prãm to me ipa atajê na mehtehcajpa. Hõhõ, ca ha me ate amji kam me gapac xà ita ton na, quê ha nee me apê cute me amji kam hapac xà kôt hamreare atajê nare.
15Ne pom icahê na mehcunea me ipa itajê te me amã amji jarẽn kujahêc, ne me pahkjêjê pê Jeju na mehkwỳ mã me ikĩnti atajê na ite me to amji japackre na me cumã ijarẽ. Nãmri Pahpãm te me ato impejti na imã me ato prãm.