RUTIKWỲJ
Ỹhỹ, ihkàhhôc ita ri jũm cahãj cuprỳ japrỳ te Rutikwỳj pê Ixaher cahãj nare cakrô, ihtỳj Ixaher catêjê jõ xũmre nõ me hikwa na, me pamã harẽ. Ne cupê pahhi pê Tawi tocatyjre. Ne mehhimpej catêjê jõ caku kam pê ita hane. Ne ihkàhhôc ita japrỳ te Rutikwỳj Jõ Kàhhôc (Rutikwỳj).
1Rutikwỳj jarẽn xà
Pê Ixaher catêjê xũmre nõ ita Pãw jõ krĩ kam, Juta jõ pjê kam ihkrĩ. Pê caku atajê kam, Ixaher jõ pjê cunea kam, me cupê hõ hamreare. Cwỳrjapê pê ma Mowap jõ pjê wỳr mentuw nõ ita me hĩxi japrỳ te Nomikwỳj ita me, mehkra xũmre pijakrut itajê mea mã, me antuw. Ne curia mehkrĩ to me caku to hàhtôa ne ihtyc.
Ne pê ihtyc jirô pê, pê mehkra xũmre itajê ajwar me hikwa tuw. Ne mehprõ atajê japrỳ pê Orpakwỳj me Rutikwỳj, ne me cupê Mowap jõ pjê catêjê cahãj, na pê nee me cupê Ixaher catêjê cahãj nare. Ne pê me ahna caku jũũ mãn jirô pê mã ri, mempjê itajê ajwar mehtyc. Jakàn pê mã ri Nomikwỳj pijapit te hacpỹa mã Ixaher catêjê jõ pjê pê Canãn jõ pjê wỳr amji jaxàr na amji kam hapac. Ampo na? Pê ramã hacpỹa mã me cumã hõ na me harẽn pa, na pê apu amji jaxàr prãm. Ne Nomikwỳj te me wỳjxwỳ itajê mã harkwa to:
— Wa ha ma ijõ pjê wỳr amji jaxà, ne me ca, ca ha ma hacpỹa mã me akwỳ wỳr me amji jaxà. Ne ramã iwej ita kam, ikra jũ wa hipêr me amã cugõ? Wa ha ate me ito impejti ita jahpan xà na, Pahpãm mã me acajrẽn, quê me ato impejti ne — hajỹr.
Ne cute me cumã amji jarẽn. Ne pea mencrê itajê cunea amji to me hapac xà te ame amji kam amrã. Mã Orpakwỳj te Nomikwỳj cahôr ne cumã amji jarẽn, ne ma hũm me inxi jũrkwa wỳr amji jaxàr.
Mã curia quêt Rutikwỳj hũprequêj na hàhhuc, mã cumã:
— Hõmpu he, ma ramã me anõ te mehkwỳ me, me hõ pahpãm cahàc krekà wỳr amji jaxàr. Ne ca, xà ca ha nee cuxà mehwỳr amji jaxàr nare? — hane.
Mã Rutikwỳj cumã:
— Nee ite gicu na apu iton nare. Ampo na? He wa ha jũ ri amõr xà ata wỳr, hanea ne ikràr. Ne ca jũ ri akrĩ prãm ata ri, wa hanea ne ikrĩ to prãm. Ne me akwỳ itajê pê me ikwỳa, ne me gõ Pahpãm ita pê ijõ Pahpãam ri, na wa ha itỳj amji mã to ihimpej to ipa. Ne curi atyc xàa ta ri, wa ha hanea ne ityc prãm, quê ha curia me ijarêt — hane.
Mã Nomikwỳj cumã:
— Tahnaa, mẽr hacu — hane.
Ne ma ajwar Ixaher jõ pjê kam, Pãw jõ krĩ ata wỳr, cute me amji jaxàr, ne me cator. Mã mehcunea te amji mã me to ipikrar, cute caku jàhtôa kam me Nomikwỳj pupun nare na ri.
2Pê Powa me Rutikwỳj hikwa
Ne pê Nomikwỳj pê impjê ty ata jũkjê xũmre nõ ita Pãw jõ krĩ kam ihkrĩ, ne pê ampeaj kam hakràj cati, ne haprỳ pê Powa. Mã amcro nõ na Rutikwỳj te hũprequêj mã amji jarẽn to:
— Ito tojnõ wa mõ, ne jũm jõ pur kam, cute ame arỳjhy cupan mã pjê kam apu hikwa atajê to cuprõ — hajỹr. Mã hũprequêj te to tojnõ, mã ma mõ, ne nee cute Powa te pur to hõ tekjê na hahkre pej nare kam hỹrmã cator, ne kam apu arỳjhy to cuprõn to mõ.
Mã krĩ pĩn Powa cator, ne cute me cumã me hàpên catêjê jõ pahhi cukij, ne cumã:
— Mẽr jũm cuprỳhti mã apu mõ ita? — hajỹr.
Mã cumã me hàpên catêjê jõ pahhi cumã:
— Por Mowap jõ pjê pĩn, Nomikwỳj kôt jũm cator ata ri apu pjê kam arỳjhy pỳpỳm atajê to cuprõn to mõ. Ne nee rỳ ihkôt nare, ne cute hàpên ita kam to incrà tu — hane.
Mã ma Powa hỹrmã mõ ne cute cumã ihcakôc ne cumã:
— Ỹhỹ, gapacta ne apu mõ. Quê ha ma me imã me hàpên catêjê me gamã, quê ha nee jũm apu acaxun nare. Quê amã kôr, ca gapacta ne mõ, ne imã me hàpên catêjê kõm xà kam côkwỳ jaxà ne to ikõ — hajỹr.
Mã cute Powa mã harkwa to:
— He ipê ampo kwỳj cakrô, ca ate ito kênre nare, wa ha ahnaa mã — hajỹr.
Mã Powa cumã:
— Wa ite, ate apjên tyc jakàn pê aprequêj to impejti na garẽn par. Ne quê ha Pahpãm, ate aprequêj to impejti ita jahpan xà na, ato impejti ne — hajỹr. Ne ramã Powa jàpàn xàa kam hàhhuc, mã cute cumã hàkjêr ne cumã:
— Ajpên mõ ne me icahê na apà — hajỹr. Mã ma mõ ne cumã me hàpên catêjê cahê na hỹr. Mã cute ihtu jirôa pê hàpàn xà kam me cumã hõ xãm. Mã hàpàn jirô pê, ma cute pur wỳr amji jaxàr, ne cute hàpêan to pyt.
Ne ma krĩ mã cute amji jaxàr, ne hũprequêj wỳr arỳjhy to mõ, ne cute cumã hõr. Ne hanea ne cute cumã me hõ to ihhi, ne to mõ ata jõr. Ne cute hũprequêj mã ihcunea na amji jarẽn, mã hũprequêj hũrên apu hakry, ne cute Pahpãm pejti kĩnti na harẽn.
Pê Powa na ahtũm nare pê Rutikwỳj me hikwa. Pê Pahpãm me cumã ihkra xũmre japrỳ pê Opet ita gõ. Pê Opet ata pê Tawi quêtti. Hamre.