ROMAN

ROMAN JÕ KRĨ WỲR

Pawrô Jõ Kàhhôc

Pê Pawrô pê Jeju jarkwa na memprar catêjê nõ, ne hanea ne cupê cupẽhkà te ikre cahyr catê, ne hàpên xà ata to pê ajco amji to ajpa. Ne pê Jeju na mehkwỳ jakrã Roman jõ krĩ kam mehkrĩ atajê wỳr, pom cu me hõ kàhhôc cahyt ita kujate. Na pê hõ kàhhôc ita japrỳ pê Roman Jõ Krĩ Kam Jeju Na Mehkwỳ Jakrã Mehkrĩ Atajê Wỳr, Pawrô Jõ Kàhhôc (Roman).

Ne hõ kàhhôc ita kam cute me pamã harẽn to hajỹr he. Pahpãm mãa me pahcunea kêanre, me panquêt xwỳ pê Atãw cukwa kam. Na pê me pahcunea me pahtyc xà wỳr me pamprar xà. Ne pê Jeju amji to me pahkritxwỳ, ne me pajaxà kam ty. Ne ihtyc xà ata to, cu ha ampeaj kam amji mã me pahhimpej, quê ha ihtỳj Pahpãm me pahna amji capa. Ne hanea ne Jeju kam me pahhônco xà ita me, hanea ne Pahpãm Carõ Pejti te me pamã, pahte amji kam me pajapac xà intuw impejti jõr xà ita kôt, quê ha Pahpãm me pahna amji capa.

Pê Pawrô me cumã amji jarẽ

Me Hàpên Xà 13.32-33; 22.14-15, 21

^1-7Hàpà Roman jõ krĩ kam, me apê me ikwỳ pê, Jeju kam, pahte ajpẽn to me pahkjêjê atajê. Pê Pahpãm mã me akĩn, na pê me ato hõ tekjê. Ipê Pawrô pê Jeju Crixtô mã ijàpên catê, ne hanea ne ipê harkwa na cumã iprar catê. Ne itea wa me amã ihkàhhôc ita kam ihhôc ne ihkujahêc. Ne wa ijõtpê Pahpãm me Pajõ Pahhiti pê Jeju Crixtô mã me acajrẽn to hane he:

— Ỹhỹ, me ijõ Inxũ Cati, ca ha Roman jõ krĩ kam, me akwỳ mehkrĩ atajê caprĩ, ne me caxwỳn caxwãm pê me cumã me acarĩcti gõ, mãr quê nee ame amji mã ampo cupa nare — hane. Ne Pahpãm pê mehcunea mã, ite Jeju pê me pahkritxwỳ, ne cupê me pahkên pê me pahpytàr catê na harẽn xà impejti itajê caxuw icapi ne ixãm. Ne pê rỳ pêa mã, Pahpãm ramã me pamã Jeju to hũjarẽn xà impejti ita to awjarẽ, ne to awjahkre. Pê harkwa na cute mehcakôc catêjê Pahpãm jarkwa jõ kàhhôc kam, Jeju pê me pajõ Pahhiti pê Pahpãm kra jũjarẽn xà impejti ata na mehhôc. Ne Jeju pê me paxũmrea pyràc na, me pamã hahkre pej. Ampo na? Cupê Tawi xwỳ pê pahhi tàmxwỳ tàmxwỳ nõ na, me pamã hahkre pej. Ne hanea ne me pamã, cupê Pahpãm kraa to Pahpãm kra, ne curũam cator, ne nee cute jũ caxuw ampo kên ton nare, ne impej pit na, me pamã hahkre pej. Ne hanea ne carôat tỳjti te ihtyc jirô pê hacpỹa mã to ihtĩr xà ata kôt, me pamã cupê Pahpãm kraa to ihkra na hahkre pej. Quê Jeju hamreare na mã, wa nee ipê harkwa na cumã iprar catê nare. Ne ihcãmtàa rũm, pê Pahpãm ito cumã harkwa na iprar catê, ne imã harkwa hyr to hane he:

— Ỹhỹ, Pawrô, ca ha pjê cunea kam, krĩxàre cunea mã, ijarẽn to apa, ne ito amji mã mehhimpej na me to, quê ito amji mã mehhimpej, ne me ikampa — hane. Pê wa harkwa kôt to, pê ca hanea ne me awpa, na pê Pahpãm Jeju Crixtô tekjêa na amji mã me acapi. Na ri me apê mehkwỳa.

Pê Pawrô mã ihtỳj me cumã Pahpãm jarkwa jarẽn prãm

Roman 15.22-29; Me Hàpên Xà 28.15

⁸Ỹhỹ, pê wa hõtpê ajco Pahpãm mã me acunea pyrên ijakryti na amji jarẽ. Ampo na? He pjê cunea kam Jeju Crixtô cãmtàa rũm ate amji mã me Pahpãm to hajỹr, ne ate amji mã me to ahimpej na, cumã me gahkre pej. ^9-10Ne wa ijĩ me ite amji kam ijapac xà cunea to Pahpãm mã apê, na wa mehcunea mã ihkra pê Jeju pê me pahpytàr catê na harẽn xà impejti atajê jarẽn to ipa. Ne Pahpãm mã, ite me acajrẽn to ipa na ijahkre pej, na quê ihtỳj ahna ijarẽ. Ne wa hõtpê hãn ne cumã amji cajrẽn to hane he:

— Me ijõ Inxũ Cati, ate amji kam gapac xàa na Roman jõ krĩ kam me akwỳ mehkrĩ atajê wỳr itẽm, ne ite me hõmpun na ito — hane.

¹¹Ne ampo na wa apu cumã amji cajrẽn to hane? Nee mã ampo na nare. He imã me apupun prãam to me apupun prãm. Ne me amã Pahpãm Carõ Pejti te mehkwỳ to impej xà caxuw, me cumã cute amji kam hapac xà te amji jahkre pejti nõ jõr xà ata nõ gõ, mãr quê Carõ Pejti carôat kôt me acaxwãm pê me ato impej, ne me ato ihtỳj. Mãr ca xwỳ kam amji mã me to ahimpej to me apa nare. ¹²Ne pom jũ caxuw pahte me ajpẽn pupun xà ata caxuw, cu ha me pahcunea me ajpẽn pupun kam tẽ. Ne me ajpẽn pupun xà ata kam, cu ha pahte Jeju to amji mã me pahhimpej xà ata na me ajpẽn tehcajpar to me mõ.

¹³Ỹhỹ, Jeju kam me ikjêjê, wa rỳ pêa mã me awỳr hãn ne amji kràr to ipa na, ate me ijahkre pej na, me ato prãm. Mã hãn ne hõtpê ampo, ma me atête icahpêrkàr to ipa. Ne wa ramã ite krĩxàre kwỳ pê mehcahkrit, ne nee me cupê Juta catêjê nare atajê kôt, me cumã, por ite me amã Pahpãm jarẽn to ijũjarẽn atajêa to, wa hãn ne me cumã ijũjarẽn to ipa. Ne nee ijũjarẽn xà atajê kôt hamre nare. He ihtỳj ite me cumã ijũjarẽn xà itajê kôt Pahpãm wỳr me apkjê. Na wa itỳj cormã me cuxà me awỳr icator, ne me amã, por me acahê na me cupê Jeju jahkre kêatre, mã nee amji mã me to ihhimpej nare atajê mã harẽn prãm.

¹⁴Ne mẽr ampo na mã wa ame ato hane? Nee mã wa ampo na ame ato hajỹr nare. He ipê pjê cunea kam mehcunea mã Pahpãm jarẽn catê, na quê ha jũm pê krĩ cati kam mehkrĩ catêjê nõ, nare, cupê ahkêt kam ihkrĩ catêjê nõ, nare, cupê mehkrã kre te amji jahkre pej catêjê nõ, nare, cupê ampo jahkre kêatre catêjê nõ cakrô, wa ha itỳj cumã Pahpãm jarẽn xà impejti itajê jarẽ. ¹⁵Na wa itỳj me awỳr itẽm, ne Roman jõ krĩ kam me akrĩ catêjê mã, Jeju pê me pahkritxwỳ ne me pajaxà kam ihtyc, ne hacpỹa mã ihtĩr na harẽn xà impejti itajê jarẽn to ipa to prãm.

Nee Pahpãm jarkwa jũ na Pawrô pahàm nare

Roman 3.21-24

¹⁶Ne nee wa Jeju pê me pahkritxwỳ na me amã harẽn ita na amji jũ na ipahàm nare. Ampo na? He Pahpãm carôt tỳj na ri cupê, cute amji mã me to ihhimpej catêjê cunea kên pê me hũtàr catê. Na ri cupê mam me cupê Juta catêjê pytàr catê, ne hanea ne cupê mehcahkrit, pê Juta catêjê nare atajê pytàr catê. ¹⁷Pê rỳ pêa mã Pahpãm jarkwa na ihkàhhôc kam, mehhôc ata kam, hũjarẽn to hane he:

“Quê ha jũm ito amji mã ihhimpej, wa ha, cupê jũ caxuw icuna mã, cute ampo kên ton catê nare ata to amji kam ijapac. Na wa ha itỳj ahna amji capa, quê ha icahê na ihtĩr na ipa rohnỳtti mã” hane.

Hõhõ, Jeju jũjarẽn xà impejti ita te ri me pamã ita jarẽn.

Mehcunea mã Pahpãm ipa na, hahkre pej

Me Hàpên Xà 14.17; 17.22-29; Ipipẽ Xà 9.20-21

¹⁸Ne ramã Pahpãm te me pamã pjê ita kam mehkrã kêanre kam incryc xà ata jarẽn, cu pahte me hahkre pej. Ne pom mehkrã kêanre itajê te amji kam me hapac xà cunea tũmti, ne ihkêanre. Ne nee ampo pejti, hêj xi nare to me amji kam hapac to me ipa prãm nare. Ne atajê ri Pahpãm te ame to kên xà na, ramã me pamã hahkre pej. Ampo na? Mehkên xà itajê, ma cute me Pahpãm jahkre pej xà ata to me cupê amxu. ¹⁹Ne pê ramã hanea ne Pahpãm me cumã amji to ajpẽ, cute me kam hapac, ne me hahkre pej prãmte. Mã nee xãmte cute mempar, ne amji mã me to ihhimpej nare. ²⁰Ne pê ramã jũm te Pahpãm pupun xà nare ata, pjê me côjkwa ita ton pêa mã, kam ampo itajê cunea to. Ne hàpên xà atajêa kôt, quê ha cupê Pahpãam to Pahpãm, ne ihtỳj na me hahkre pej. Ne hanea ne cutea ri carôt tỳjti to hàpên xà itajê ton na me hahkre pej. Cwỳrjapê quê ha nee jũm, cute ampo pupun xà itajê na hàprãr to amji jarẽn to:

— Wa nee ite xãmte Pahpãm te ihkrĩ na hahkre pej nare — hajỹr nare.

Nee mehcunea mã Pahpãm to amji mã mehhimpej prãm nare

²¹Ne cute me Pahpãm jahkre pej cakrô, nee amji mã me to cati prãmte me harẽn to:

— Ampeaj kam ri apê Pahpãam to Pahpãm — hajỹr nare. Ne cute me hàpên xà pejti ton atajê pyrên me hakryti na cumã me amji jarẽn xà kaj na, ajte ampo kên to pit mã me amji kam hapac to me ipa. Ne cute me amji kam hapac xà kôt hamreare atajêa to pit mã me amji kam hapac to me ipa. Ne mehkrã kam ampo kên to cute me amji kam hapac xà itajê pê ihhêj rũm awcapàtkôti kam amõr xà na, ate amji pupun xà nare ata pyràac, na quê ha nee me cumã me cute amji kam hapac xà impej hamreare ne. ²²Ne me cupê amji jahkre kêatre, na ri ihtỳj mehkrã kreti na ame amji to mehhêj to me ipa.

²³Ne nee ajte cute me Pahpãm tĩr rohnỳtti mã ata to amji mã me hàmnãn to ipa nare, ne ihcunea na me harẽn pejti to ipa xà kaj na, ihtỳj me hõ pahpãm cahàc pê, ampo cunea krekà atajê to amji mã me hàmnãn to me ipa. Atajê pê me hũmre krekà me, pryjara krekà me, ampo pry krekà me, cagã krekà carĩcti, cakôc nare atajê, ne mempar nare cakrô, mã ajte me harẽn to impejti to me ipa, ne toa amji mã mehhimpej.

²⁴Ampo na? He me hũmre itajê te amji jahkre kêatre, na ri ihtỳj me ampo kên ton to me ipa, cwỳrjapê ri Pahpãm te mehkên itajê mea mã me hicu, ne me cumã harkwa to:

“Hamre, ca ha amjia kôt, ate amji kam me gapac xà kên itajê ton to ame apa, wa ha nee hipêr me ato ihimpej nare” hajỹr.

Na ri ramã me hũmre ame ajpẽn to kêanre, mã hanea ne pyjê ame ajpẽn to kêanre, cute me ampo kên kam me pahpahàmti atajê ton to ame ipa incwỳrjapê. ²⁵Ne cute me Pahpãm hêj xi nare ata jicu, ne ma me hõ Pahpãm cahàc krekà kêanre hêj xiti ata wỳr me hàr. Ne nee ajte me amji mã Pahpãm te pjê ton, ne kam ampo ton catê ata kĩn nare. Ne hanea ne, nee me cumã harkwa to:

— Apeaj to apej, ne apê me ijõ Inxũ Cati pê me ijõ Pahpãm — hajỹr nare. Ne ajte cute pjê kam me ampo ton atajê mã me harkwa to:

— Apê me ijõ inxũ cati pê me ijõ pahpãm, na wa ato pit mã, me amji japackre, ne atoa me amji mã me ihimpej to me ipa — hajỹr. Ne pjê kam pahte ampo itajê mã me pahcakôc to hajỹr xà na ihkaj na, ne ihkêanre, ne quêt Pahpãm mã ri me pahcakôc xà te hajỹr na impejti.

Mehcunea te amji kam hapac xà kên pit

Ipipẽ Xà 22.11

²⁶Mã mehcunea mãnea mã mehkên xà kêanre kam me pahpahàmti atajê ton to me ipa, kam ajte cute me to incrà tu. Cwỳrjapê ri Pahpãm te me kam incryc xà to me cumã harkwa to:

“Gapacta ne, ate me ampo kên ton to prãm atajê cunea ton to me apa” hajỹr.

Cwỳrjapê ri pyjê me, me hũmre te me ajpẽn caxun jicu, ne pyjêa me ajpẽn caxu. Ne Pahpãm mã cute me ajpẽn to hajỹr xà ita na ihkaj na. ²⁷Mã me hũmre te me hajỹar ne cute mehprõ caxun jicu, ne me hũmrea me ajpẽn caxun prãam kam ame ipa. Ne ihtỳj ajpẽn caxuw me ampo kên itajê ton to me ipa, na quê ha Pahpãm me ahna mehkên xà ata to ihtỳj tu, quê ha ame to kêanre ne.

²⁸Pê Pahpãm me cumã amji to ajpẽ cakrô, mã nee mempar, ne me hahkre pej prãm nare. Cwỳrjapê ri Pahpãm te me hicu, mã cute mehkên ton xà atajêa me to ihhimpej to ipa. Cwỳrjapê ri jũ caxuw cute me ton jicu nare. Mã tee intête me hapackre, mã nee me hũpar nare. ²⁹Ne cute me ampo kên ton xà itajêa te ramã me to hipu tu, na ri ihtỳj me ajpẽn caxun prãam kam ame ipa. Ne mehkwỳ pê, ampo cunea to amji mã ihtũm prãm to me ipa. Ne jũ wỳr quê mehkên ton tête me amji jiprõ, ne ihtỳj ajpẽn jũ na me cumã ampo kĩn. Mã ihtỳj me ajpẽn curan to me ipa. Ne ihtỳj me harkwa to me ajpẽn cujtên to me ipa, ne ihtỳj ame ajpẽn mã ihhêj to me ipa. Ne mehkwỳ te jũ mã me ton nare kam, cama me cupê ame ampo to ipictor to me ipa. Ne ihtỳj mehhêj xi to me xwahna to me ipa. ³⁰Ne ihtỳj ajpẽn na mehcakôc kêanre to me ipa. Ne ma ame Pahpãm curê, ne nee me hõ pahhi kam mare mã, ahna mehcakôc kên na me hàhtàt nare, ne me cumã amji to cati prãm to pit mã, mehcakôc to:

— Pa ri me acunea jirôa pê icati — hane. Ne ahpỹanre na cumã, cute ampo kên ton xà jàhtôa ton to, to ipipẽ to me ipa, ne nee me hũmjê me, menxyrxwỳ impar nare. ³¹Ne me cupê ampo pejti ton jahkre kêatre, na ri ihtỳj me ampo kên pit ton to me ipa. Ne nee cute mehcakôc xà to mehcakôc atajê na, me amji par nare. Ne ihtỳj mehkwỳ to me hàprê to me ipa, ne nee me cumã jũm caprĩ xà nare. ³²Ne ramã cute me hajỹr catêjê caxuw Pahpãm te me to ihhimpej xà ton, mã cute ahna mehhôc ne me hahkre pej, ata jarẽn xà te:

“Por ampo kên ton to me ipa atajê ri mehtyc xà, ne nee Pahpãm cahê na ame ipa xà nare.

Ampo na?

Quê ha ihtỳj mehkên mã me cumẽ” hajỹr.

Na me cumã hahkre pej cakrô, mã ihtỳj cormã me ampo itajê ton to me ipa, ne mehkwỳ me, me ajpẽn mã:

— Ate me ampo kên ton itajê kôt, imã me apeaj to me apej — hajỹr to me ipa.

Cute me to kên jahpan xà na Pahpãm mã me hàmjõr xà

¹Ỹhỹ me ikwỳ, ca ihhêaj to mehkên itajê na me harẽn pa, ne nee me amji mã harẽn to:

— Jũmjê itajê kêanre, ne pa nare, nee quêt ikên nare — hajỹr nare. Ampo na? Ca ihhêaj to hanea ne me akên itajêa ton to me apa. Cwỳrjapê ca atỳj ate me amji jarẽn xà ata to me caa, me amji curê capa. ²Ne me pamã, quêt catyt kam Pahpãm te ipa na hahkre pej. Na quê ha catyt kam mempej catêjê me, mehkên catêjê to ajcapô, ne mempej catêjê impej mã me cumẽ, ne mehkên catêjê mã:

— Ramã ite me amã ampo kên jarẽn, ne me amã ihcawpa, ca mãnea mã ate me ton, na wa ha me akên mã me amẽ — hane.

³Ne me ca, ca ha ate catyt kam me apa nare na, nee ca ha me jũmjê kên jarẽn pa, ne me harẽn to:

— Jũmjê itajê catyt kam me ipa nare, ne mehkêanre, cwỳrjapê quê ha Pahpãm mehkên mã me cumẽ — hajỹr nare! Ampo na? He ate me hajỹar ne me akêanre ita kam, ca ha nee Pahpãm te ato kên xà ita pê jũ kam atẽm nare. ⁴Ne ca ihhêaj to me anõ garkwa to:

— Pahpãm pej ne hàhcaprĩ, cwỳrjapê quê ha nee ite ikên ton itajê jahpan xà na ikên mã imẽn nare — hajỹr nare! Ampo na? He Pahpãm jàhcaprĩ na ri incaca xà amji mã ampeaj ne hapôj to ipa. Na quê nee akên mã amẽn pyrentu nare, ne ihtỳj hipêr amji mã ampi ne akôpĩr to mõ, ca ihhêaj to akên ton jicu, quê ha nee akên mã amẽn nare.

Quê ha Pahpãm me pajàpên xà jahpan xà na me pamã amgõ

^5-6Ne quê ha jũ caxuw Pahpãm te me pahcukij, ne me pahto ipicokjêr xà jõ amcro cato, quê ha incryac kam, ahpỹanre na mehkên catêjê kên mã me curẽ, mehkên jahpan xà na. Na ca ha me anõ te akrã kêanre, mã Pahpãm jàhcaprĩhti te me amã me akên itajê cawpa cakrô, ca ha mãnea mã akên ton to apa na, ca ha me ca ramã amji caxuw Pahpãm mã mencryc to apicamẽn to me mõ. Ne ahpỹanre na pjê kam, cute ampo ton to me ipa xà na Pahpãm te me hõmpun, ne me hahkre pej xà atajêa kôt, quê ha me cumã hàmjõr to mõ. ⁷Ne por catyt kam, cute amji kam me hapac xà impejti to me ipa kam me to incrà atajê ri, Pahpãm mã me amji cajrẽn to me hane he:

— Me ijõ Inxũ, ca ha ca me ito me icati, ne ipejti na me ijarẽ. Ne nee jũmjê te me ito icati, ne ipejti na me ijarẽn na imã me to prãm nare. Wa cama acahê na me ikrĩ rohnỳtti na me amji to prãm — hane. Atajê mã quê ha Pahpãm mehtĩr rohnỳtti mã na me to, mãr quê cahê na me ipa rohnỳtti mã.

⁸Ne mehkwỳ te nee me hajỹr nare, ne mehkên to pit mã me amji kampa. Ne cute ampo ton to me amji cajpuaw xà atajê to pit mã me to me ipa. Ne ma ame catyt kam ampo pejti atajê caca, ne ampo cupan xà kên atajê to pit mã me amji jahôt to me ipa. Ne cute me hajỹr catêjê, quê ha Pahpãm me kam incryac kam, me ahna cute mehkên ton atajêa to ihtỳj tu. ⁹Ne por pjê cunea kam me ampo kên ton to me ipa atajê, quê ha me amji pupun xà kêanre to me amji pupu. Quê ha xa mam me cupê Juta catêjê me amji pupun xà kêanre to me amji pupu, jirô pê quê ha cormã mehcahkrit atajê hanea ne me amji pupun xà kêanre to me amji pupu.

¹⁰Ne quêt catyt kam, cute me amji kam hapac xà impejti to me hàpên to me ipa atajê, quê ha Pahpãm me cumã ampo pej pit gõ, ne me cumã harkwa to:

— Wa ha me acati na me ato, ca ha mehcunea kam mare mã me acatia to me acati, quê ha me apupu, ne mehcunea me apejti na me gahkre pej. Ne wa ha me amã icarĩcti gõ, quê ha nee hipêr me amã ampo hũpa nare — hane. Quê ha mam me cupê Juta catêjê to hane, ne hapu na mehcahkrit to hanea.

Pahpãm mã pjê cunea kam ampo krĩxàre cunea pipẽn pit

¹¹Ne Pahpãm pjê cunea kam, mehcunea to amji kam hapac xà to ajpẽn pit. ¹²Ne mehcahkrit pê Pahpãm te me to ihhimpej xà jahkre kêatre. Ampo na? Nee me cumã Mojxe xwỳ jõ kàhhôc hamreare. Cakrô, hõtpê me caxwãm pê cute amji to me ihhimpej xàa kôt, hajỹar ne, nee ihkôat me ipa nare. Na quê ha ihtỳj Pahpãm, cute mehkên ton jahpan xà na, mehkên mã me cumẽ. Ne pê rỳ pêa mã me cupê Juta catêjê, Pahpãm te me to ihhimpej xà jahkre pej cakrô, nee me to amji japackre nare, ne ihtỳj mehkên xà cunea ton to me ipa. Jahpan xà na quê ha Pahpãm me cumã harkwa to:

— Me amã, ite me ato ihimpej xà cunea na, ijahkre pej cakrô, ca nee me ito amji japackre nare, cwỳrjapê wa ha Mojxe xwỳ jõ kàhhôc kam, ite me ato ihhimpej xà atajê kôt, me akam icryc xà kêanre to me ato apê — hane. ¹³Ne nee mã catyt kam jũmjê atajê te me Mojxe xwỳ te me to ihhimpej xà cunea jahkre pej xà atajê kôt, Pahpãm te jũmjê atajê na amji caxàr nare. Ne quê ha xa me hahkre pej, ne ihkôat cute amji kam me hapac xà to me hàpên to me ipa na, quê ha Pahpãm cormã jũmjê atajê na amji capa.

¹⁴Quê ha mehcahkrit te Mojxe xwỳ jõ kàhhôc cukwa kam me Pahpãm te me to ihhimpej xà jahkre pej nare cakrô, ne amjia kôt me caxwãm pê, me hĩa kam cute amji kam me hapac xà impejti ton to me mõr na, quê ha ihhêj ne ramã me kam, me caxwãm pê Pahpãm te me to ihhimpej xà ata kôt ame ipa. ¹⁵Ne quê ha catyt kam, cute amji kam me hapac xà impejti ton to me ipa atajê, quê ha ramã caxwãm pê Pahpãm te me to ihhimpej xà na me harẽ. Ne quê ha hanea ne ampo pej to, ne ihtỳj ahna amji jarẽn to:

— Wa ite ampo pejti ton — hane. Ne hanea ne jũm te cute ampo kên ton na hõmpun nare kam, me taa ahna amji jahkre pej, ne ihtỳj amji mã:

— Mã ajte, ite ampo kêanre ita ton — hane. Hajỹr xà ita ihtỳj caxwãm pê cumã Pahpãm jarkwa na harẽ.

¹⁶Hõhõ, pom wa ite me amã ijũjarẽn xà to ijũjarẽn xà ita kôt, quê ha jũ caxuw me pajõ Pahhiti pê Jeju Crixtô, Hũm jarkwa kôt me pahcunea cukij, ne me pahto ajcokjê. Ne cumã me pahcaxwãm pê pahte amji kam me pajapac xà cunea jahkre pej, cwỳrjapê ri hãn ne catyt kam me pahto ajcokjê.

Cu ha nee jũmjê jirôa pê me pampejti na, amji to me pajàmnãn nare

Roman 3.19-20

¹⁷Ne wa ha ita caxuw Pahpãm na mehkwỳ kam me apê Juta catêjê mã, wa ha ita na ihhôc. Pom ca me apê Juta catêjê me amji to me gàmnãn to:

— Me ipê Juta catêjê, cwỳrjapê ri Pahpãm mã jũmjê atajê jirôa pê me ikĩn. Ne pê Pahpãm me imã Mojxe xwỳ jõ kàhhôc kam, cute me ito ihhimpej xà cunea gõ, ne wa ite me Pahpãm te me ito ihhimpej xà pupun, na ri me imã amji jahkre pej. Ne me ite Pahpãm te me ito ihhimpej xà cunea to amji mã me hajỹr to ipa, cwỳrjapê quê ha ito impejti ne — hane. ¹⁸Ne me amã Pahpãm te ampo ton xà na amji mã me ato prãm xà ata na hahkre pej. Ne ramã ate me hõ kàhhôc to hahkre, ne me amã catyt kam, ate me ampo pej pit ton xà na, amji mã me capi na, me amã amji jahkre pej. ¹⁹Na ca atỳj me amji jarẽn to:

— He me ipê hàhcujro xà pyràac, na wa itỳj awcapàtkô pĩn, jũmjê impejti xà ata wỳr me hajo to me mõ. Ampo na? He jũmjê itajê pê mento tũm pyràac, ne nee catyt kam cumã Pahpãm te me to ihhimpej xà impejti ata jahkre pej nare, na wa itỳj amji kôt me to mõ. ²⁰Ne me ipê, mehkà te amji jahkre kêt catêjê atajê mã, amji jahkre pej japôj catêjê. Ne hanea ne me ipê ahkrare mã ampo to hahkre catêjê, mãr quê catyt kam me ipa — hane. Ne ca ame amji caprỳ jarẽn to me apa. Ca hanea ne me amji jarẽn to:

— Ampeaj kam ri ramã me imã Pahpãm te me ito ihhimpej xà cunea jahkre pej partu, ne ite me ampo cunea jarẽn xà atajê pê ampeaj kam, ne nee ihhêj xi nare — hane.

²¹He pom me apê me cumã ampo to hahkre catêjê ita? Ne mẽr ampo na mã ca ajte nee me amji mã ampo to hahkre nare? Ne ca me hapackre to:

— Nee ame gàhkĩj nare — hajỹr cakrô, mõrmõ ca atỳj me cuxà me ahkĩ. ²²Ne me hũmre japackre to:

— Ca ha nee me aprõ kaj na, ahti na, jũm cahãj caxun nare — hane. Ne hanea ne pyjê japackre to:

— Ca ha nee me apjê kaj na, ahti na, jũm xũmre caxun nare — hajỹr cakrô, mõrmõ ca atỳj ate me cuxà ahti na jũm caxun. Ne cama apu pahpãm cahàc krekà caca cakrô, mõrmõ ca atỳj hũrkwa mã me acjêj, ne kam ampo to me cupê ahkĩ. ²³Ne ca me amji jarẽn to:

— Pê rỳ pêa mã Pahpãm me imã cute me ito ihhimpej xà gõ — hajỹr cakrô, mõrmõ ca atỳj me cuxà, ate harkwa jirô pê me apỳm, ne me cumã ihpahàm catia ton to me apa. ²⁴Ne pê Pahpãm jõ kàhhôc ramã me ato hũjarẽn to hane he:

“Me apê Juta catêjê pê Pahpãm na mehkwỳ.

Ne me amã cute amji kam hapac xà jahkre pej cakrô, ca nee ihkôt me hakop, ne me ton nare.

Cwỳrjapê ri mehcahkrit atajê ihtỳj me akôt Pahpãm japrỳ to mehcakôc kêanre to me ipa” hane.

²⁵Ỹhỹ, ipê Pawrô, ne ipê hanea ne Juta catêjê kwỳa nõ wa. Cwỳrjapê ri imã pahte amji kam me pajapac xà cunea jahkre pej. Ne pê rỳ pêa mã Pahpãm me panquêtjê mã harkwa to:

“Me apê itekjêa na, cute me gahkre pej xà na, ca ha amji mã me apy kà kwỳ kryjre ne me hakep, me akra xũmre mea mã” hane.

Cu ha me Pahpãm te me pahto ihhimpej xà cunea kôt me papa, ne hanea ne amji mã me pampy kà kwỳ jakep, ne ahnaa cu ha me Pahpãm cajpuaw, ne cumã me papê Juta catêjê impej pit, ne me papê mehkwỳa. Nãmri cu ha pahte cama me amji kà kwỳ jakep, ne nee amji mã me Pahpãm te me pahto ihhimpej xà kôt me papa nare na, jũ wỳr cu ha Pahpãm cajpuaw. Ampo na? Pahpãm mã pahte cama me amji kà kwỳ jakep, ne nee cute amji kam hapac xà kôt me papa nare ita kôt, cumã hamreare. ²⁶Quê ha jũm pê Juta catêjê nare, ne nee amji pê ihkà kwỳ jakep nare cakrô, ihtỳj Pahpãm te me to ihhimpej xà kampa, ne ihkôt ipa na, quê ha Pahpãm mã cupê ramã cute amji mã mehkà kwỳ jakep atajê nõa, ne cupê hõ tekjêa. ²⁷Cwỳrjapê quê ha mehcahkrit atajê me ana ihcakôc to me hane he:

— Por Juta catêjê atajê mã ihkàhhôc kam Pahpãm te me to ihhimpej xà cunea jahkre pej, ne mempy kà jakep cakrô, mã ajte nee kam me hapac, ne ihkôat me ipa nare — hane. He me cupê Juta catêjê nare, pê nee mempy kà kwỳ jakep nare cakrô, ihtỳj Pahpãm te me to ihhimpej xàa kôt me ipa, ata na ri me Pahpãm cajpuaw.

^28-29Ne mẽr hõhõ, me pahkà kwỳ jakep ata me, pahte amji kam me pajapac xà to me pahte amji pyràc xà atajê kôt, Pahpãm mã hamreare. Ne quêt, por Pahpãm Carõ Pejti kôt, Pahpãm te me pahto ihhimpej xàa kôt me papa na ri cumã impej, ne cumã me papê mam, mehkwỳ pê Juta catêjê impeaj. Ne quê ha pjê kam me hũmre me pahkà jakep nare na me pahpupu, ne nee amji mã, me papê Pahpãm kôt me ipa catêjê na me pahto hajỹr nare. Ne Pahpãm nare, quêt cumã me papê mehkwỳa, na quê ha taa me pahto ihcakôc to impejti ne.

Jũ wỳr quê Pahpãm me pahnõ mã ihhêj

Roman 9.4-5

¹Ỹhỹ me ikwỳ, ca ihhêaj to Juta catêjê to ite me amã icakôc xà ita kampa, ne nee ca me anõ amji mã garkwa to:

— Mẽr jũ na xà caxuw mã me cupê Juta catêjê? Ne me haprỳ pê Juta, ne jũ na xà na mã amji mã mehkà jakep? Imã ihhêj ne Pahpãm te mam me to ihhimpej xà itajê kôt hamreare — hajỹr nare. ²Ampo na? Por cute mencaca xà to me amji pyràc xà itajê cunea impej pit. He Pahpãm pê ramã rỳ pêa mã amji mã me capi, ne me cumã haprỳ ita gõ, ne me cumã cute amji kam hapac xà cunea pê harkwa ita gõ. Ne ihkôt me cumã:

“Ca ha ite me amã ijarkwa jirên xà itajê cunea to, ma me amji jahôt to me apa, ne ma me to amji kampa, ne ihkôat me apa” hane.

³Mã mehkwỳ kwỳa te ihhêj ne, nee mempar nare. Ne mehkwỳ nee me harkwa to mehcakôc xà na me amji par nare ita kam, xà ajkĩ Pahpãm te hajỹar me caxuw, ne ampo na ihcakôc xà to, ne nee amji jarkwa na amji par nare? ⁴Hãpà! He Pahpãm catyt kam ihkrĩ, ne ihhêj xi nare, ne ihtỳj mehcunea hêj xi xà jipôc ri harkwa na amji kampa. Ne pê ramã rỳ pêa mã Pahpãm jõ kàhhôc kam, cute me to hũjarẽn to hajỹr he:

“Quê ha jũm te, Pahpãm te apu ihhêj xi na harẽn na, quê ha ramã mehcunea mã apu ihhêj to ipa na me hahkre pej.

Quê ha cute catyt kam me Pahpãm to ihcakôc na,

quê ha ramã mehcunea catyt kam, cute to ihcakôc na me hahkre pej” hajỹr.

Ihcunea na Pahpãm pejti, na ri ma amji tête amehkên catêjê curê

⁵Mã mehkrã kên catêjê kwỳ me to hũjarẽn xà impejti kaj na me to hũjarẽn to:

— Wa itỳj Pahpãm kĩnte ampo kên jikôtti cunea ton to ipa, mãr quê ahna me ipupu, ne cormã me Pahpãm caca xà me, itekjê to me ajpẽn, ne me hõmpu, ne amji mã me ijarẽn to: “Jũmjê itajê kêanre, ne Pahpãm ri quêt impeaj to impej” hane. Ita kam, jũ mã quê, ne ajte Pahpãm ite me ikên xà ton ita kôt me ito tỳj tu? He me icaca xà kêanre ita kôt, ramã mehcunea te me Pahpãm pejti na me hahkre pej. Ne ite me hajỹr xà ita kam, ihhêj ne nee Pahpãm catyt kam me ito impejti nare — hane. ⁶Ne por jũm apu hũjarẽn to hajỹr to mõ ata kêanre. Ampo na? He Pahpãm ri quêt catyt kam ipa. Ne quê catyt kam ipa nare ita kam, jũ mã quê, ne ajte pjê ita kam ajpẽn pê mehkên me, mempej to caprãr pa?

⁷Mã mehkrã kên catêjê kwỳ hanea ne me hũjarẽn to:

— Wa itỳj Pahpãm kĩnte ame ihêj xia jarẽn to me ipa, mã me ikampa, ne me Pahpãm cakôc xà me, me icakôc xà to me ajpẽn, ne me amji mã me harẽn to: “Pahpãm cakôc xà ri quêt impej” hane ita kam, jũ mã quê, ne ajte Pahpãm me ikên mã me imẽ? He me icakôc xà hêj xi xà ita kam, ramã mehcunea te me Pahpãm pejti, hêj xi nare na me hahkre pej — hane. ⁸Ne mehcakôc xà to cute me hajỹr xà na impej nare. Mã mehkrã kên kwỳa mehcakôc xà to:

— Hã, cu ha pahte amji kam me pajapac xà to me kêanre to me papa, mãr quê ihkêanre ata kôt, me Pahpãm jàhcaprĩhti na me hahkre pej — hane. Ne Pahpãm mã mehcakôc xà te hajỹr na ihkaj na. Ne hanea ne ramã mehkwỳa kwỳ nõ te ito ihcakôc to hajỹar. Ne ihtỳj ame ito ihhêj to me ipa. Ne cute ame ito ihhêj jahpan xà na, quê ha Pahpãm ame to kêanre ne. Ne mehcakôc xà kêanre te hajỹr catêjê ri, ihtỳj mehkên mã me hàr xà.

Nee pjê ita kam jũm pê catyt kam ipa catê nare

Carati 3.11-22

⁹He xà ajkĩ mehcahkrit atajê jirôa pê, me cupê Juta catêjê mã me cute amji kam hapac xà impej? Hãpà! He Pahpãm mã mehcunea pipẽn pit. Ampo na? He mehcunea ihtỳj ajpẽn jĩkjê na mehkên ton to me ipa. Ne ramã mehcunea te ajpẽn jĩkjê na, cute mehkên ton to me amji pyràc tu, ita kam, jũ mã quê me, ne mehkên ton to me ipa jicu, ne me to hapactu? ¹⁰Ne pê ramã ihkàhhôc kam Pahpãm jarkwa me to hũjarẽn to hane he:

“Pahpãm mã, nee jũm te ampo pejti ton nare.

¹¹Ne nee jũm Pahpãm na hàhcukjêr, ne catyt kam cumã ipa jahkre pej nare.

¹²Ne ramã mehcunea Pahpãm pê me ipipkjêr, ne ihkaj na ampỳa mã ame ipa, ne me ipictor.

Na ri nee jũm catàt kam, ampo pejti ton to ipa nare.

¹³Ne me harkwa pê ihhêj rũm kre kam, cute me harêt xà.

Ne mehcakôc xà atajê kro, ne ihkêanre, ne ihtỳj ihpĩn mehhêj xi xà kêanre hapôj.

Ne mehcakôc xà itajê jàhcurê pê ihhêj rũm patti xwa cacô jàhcurê, ne ihtỳj mehcura. ¹⁴Ne ihtỳj mehcunea incrôn xà kêanre to mencrôn to me ipa.

¹⁵Ne ihtỳj me hũjarêan kam me jũm jaxôp, ne mehcuran pyrentu to prãm.

¹⁶Ne por jũ ri me ipa xà ata ri, hãn ne me hakàn pê ampo kêanre ahtwỳ.

Mã me hakàn pê me cumã amji kĩn nare na amehkrĩ.

¹⁷Ne nee me cumã ajpẽn to impejti to mehkrĩ jahkre pej nare.

Mã cama ame ajpẽn mã, ne ihtỳj me ajpu.

¹⁸Ne nee amji mã me Pahpãm cupa nare” hane.

¹⁹Hõhõ, pê Pahpãm Mojxe xwỳ mã Juta catêjê caxuw cute me to ihhimpej xà jõr to hane. Ne pê Pahpãm te me to ihhimpej xà ita, nee me cupê Juta catêjê caxuw pit mã nare, ne me pahcunea caxuw pê Pahpãm Mojxe mã cugõ. Na cu ha catyt kam pahte me cahyt ne mempar na, cu ha pahte me ampo to kên xà atajê na me amji jahkre pej pyrentu. Cwỳrjapê cu nee me pahnõ Pahpãm mã me pajarkwa to:

— He wa nee me ite ampo pejti ton xà itajê na me amji jahkre pej nare. Ne nee hanea ne ite me ampo kêanre itajê jahkre pej nare kam me ton — hajỹr nare. Cwỳrjapê quê ha Pahpãm amcro nõ na mehcunea mã harẽn to:

— He me amã ite me ato ihimpej xà cunea jahkre pej cakrô, ca nee ate mempar nare, cwỳrjapê wa ha hahpan xà na me ato tỳj tu ne — hane.

²⁰Ne nee rỳ jũ caxuw jũm te, Pahpãm te me to ihhimpej xà kam hapac, ne catyt kam ihkôt ipa nare. Cwỳrjapê jũ wỳr cu Pahpãm te me to ihhimpej xàa kôt me papa kam me to pancrà. Ampo na? He cu me pajõtpê ampo to mehcupa. Ne jũ wỳr quê ha jũ caxuw Pahpãm me pamã:

— Ca ijarkwa cunea kôt me apa, cwỳrjapê ri ihcunea na imã me apej pit, na wa ha itỳj ana amji capa — hajỹr nare. Ne por ihkàhhôc kam Pahpãm jarkwa ata, cute cumã me paxũmre kên na me pajarẽn xà caxuw ri.

Jeju te ri Hũm te me pahna amji caxàr na ton

Me Hàpên Xà 17.30-31; Roman 1.17; Pirip 3.7-9; Carati 2.15-21

²¹Ne ita kam, mõrmõ ca ha me anõ amji mã:

— Pỳhàpà, jũ mã wa ha ajte me, ne Pahpãm cuna mã me ipej, quê me ina amji capa? — hane. He Pahpãm te ita caxuw ajteare mã me pamã, cute amji kam hapac xà intuw ita to hahkre, ne nee Mojxe xwỳ jõ kàhhôc kam Pahpãm te mam me to ihhimpej xà kôt me papa xà nare. Ne pê rỳ pêa mã ramã Pahpãm jarkwa jõ kàhhôc kam, cute harkwa na mehcakôc catêjê te me ita jarẽn. ²²Ne Jeju Crixtô pê ri curmã Pahpãm te amji kam hapac xà intuwti ata. Na quê ha jũm krã kêanre, ne ihkên ton jicu, ne Jejua to amji mã ihhimpej to ipa, quê ha Pahpãm cumã:

— Ate ikra to ihcunea na amji mã ahimpej, mã cute me ato amji kritxwỳ, cwỳrjapê ri imã ihcunea na me apej pit. Cwỳrjapê wa ha me ana amji capa, ne nee ate ito kên xà atajê to amji japackre, ne hahpan xà na akên mã amẽn nare — hane. Ne Pahpãm te, mehcunea te Jeju Crixtô to me amji kritxwỳ atajê cunea na, amji caxàr, atajê pê me cupê Juta catêjê me, mehcahkrit atajê. Ne cumã me ipipẽn pit, ne nee cumã jũm pê ajteare mã nare. Pahpãm mã mehcunea te, cute amji kam hapac xà to pit mã, amji mã mehhimpej na me to prãm.

²³Ne mehcunea hõtpê mehkên ton to me ipa ita kam, quê ha nee me Pahpãm te me cumã cute amji kam hapac xà impejti to hũjahkre xà ata wỳr me cator, ne kam me hàhhuc nare. ²⁴Mã quêt Pahpãm jàhcaprĩa na amjia kôt cute me pahte ame to kên itajê to tojnõ, ne hicu, ne me pahna amji caxàr, na cu hacpỹa mã me ajpẽn to ikwỳ nõ. Ne ampo na ri cute me pahto hajỹr? Nee mã ampo na nare, Jeju Crixtô te amji to me pahkritxwỳ, na ri cute Hũm te me pahna amji caxàr na ton, mã cute me pahna amji caxàr, mã pea me pahkên catia pê me pahto cator.

Pahpãm te me pahkritxwỳ na me pamã Jeju xãm

²⁵Mã Pahpãm te catyt kam ipa na me pahte me hahkre pej prãmte ri, cute pjê ita wỳr me pahwỳr ihkra pê Jeju kujahêc, mã iwrỳc. Ne cute amji to me pahkritxwỳ, ne me pahkên xà mã me paxàr xà atajê cunea mã cute amji jõr, ne pĩ kam ihtyc. Ne pahte Jeju to me amji kwỳ xà ata pê ri, Pahpãm te ame pahto kên xà ata pê, me pahpytàr xà. Na quê ha jũm te Jeju pê ihkritxwỳa to ihkritxwỳ na amji mã to hajỹr na, quê ha nee ihkên xà kêanre ata mã hàr nare. Ne Pahpãm te, me cumã catyt kam ihkrĩ, ne impejti na amji jarẽn prãmte ri, cute me pahkritxwỳ na me pamã Jeju xãm. He pê mam Pahpãm nee cormã ne, cute ame to kên catêjê kam incryc tỳj to imprar pyrentu nare. Ne cama ahna me hamã, mãr quê ihhêaj to xwỳ mã amjia kôt amehkên ton jicu, ne hỹrmã me apkjê. ²⁶Ne ita caxuw Jeju cator xà ata me ajkaam, mã Pahpãm mã ihkôt mehcunea te mehkên jicu pyrentu na me to prãm, mãr quê me ahna amji capa. He Jeju te amji to me pahkritxwỳ. Ne me pajahpan xà na ihtyc xà ata kôt, cu ha pahte cume mãa mã me pahkên jicu, ne to amji mã me pahhimpej. Na quê ha Pahpãm pejti, ne catyt kam ihkrĩ ata, me pahna amji capa. Ita na quê ha pjê kam, mehcunea me Pahpãm te catyt kam ipa, ne catyt kam me pahto impejti na me hahkre pej.

²⁷Cwỳrjapê cu ha nee me pahnõ amji to pajàmnãn to:

— Ampo na ri Pahpãm te ina amji caxàr? He wa ite, cute ampo cunea na, cute me pamẽn atajê ton par, na ri cute ina amji caxàr — hajỹr nare. Ampo na? He me pahte ampeaj kam Jeju pê me pahkritxwỳ na amji mã me to hajỹr xà ata kôt, quê ha Pahpãm me pahna amji capa. Ne jũ wỳr cu me pahnõ pahcakôc xà to hane. ²⁸He cu nee me pahnõ Pahpãm te me to ihhimpej xà cunea ton nare. Ampo na? He cu tee ramã ame ton to me hahkre ita kam, jũ wỳr quê Pahpãm me pahna amji capa. Ne quêt Jeju to amji mã me pahhimpej, mã cute amji to me pahkritxwỳ ata kôt ri, Pahpãm te me pahna amji caxàr.

²⁹Mã ihtỳj Juta catêjê kwỳ kwỳa me hũjarẽn to:

— Nee me Pahpãm pê mehcahkrit atajê Pãm Cati nare — hane. Ne cama amehhêj to me ipa. He Pahpãm pê hanea ne, mehcahkrit Pãm Cati, ne cupê me pahcunea Pãm Cati. ³⁰He Pahpãm pyxit peaj, ne cute amji kam hapac xà pyxit peaj. Ne hanea ne, Jeju pyxit peaj to mehcunea te amji mã me hajỹr xà ata kôt, quê ha ihtỳj mehcunea na amji capa, ne amji wỳr me cupê Juta catêjê me, mehcahkrit atajê mea mã me to cuprõ. ³¹Na quê nee jũm ihcakôc to:

— Mẽr hõhõ, wa ha nee hipêr ihkàhhôc kam Pahpãm te me to ihhimpej xà ata kôt ipa nare. Ampo na? He ramã Jeju te ite ampo ton xà itajê cunea ton par, ijaxà kam — hajỹr nare. He cu ramã Jeju to amji mã me pahhimpej, cwỳrjapê cu ha pahtỳj mehkàhhôc kam Pahpãm te me to ihhimpej itajê, amji mã me hũpahti to me kam pajapac pejti to me papa.

Pê Aprãw Pahpãm to amji mã ihhimpej, na pê ahna amji capa

Carati 3.6-18

¹Ne ita caxuw wa ha me amã me iquêt xwỳ pê Aprãw xwỳ kôt harẽ. Ne pê Pahpãm mã, cuna mã hũmre ita pejti, ne catyt kam ajco ihkrĩ. Ne jũ mã mõrmõ pê ajte ne Pahpãm cuna mã impej ita hane? He xà pê ajkĩ Pahpãm ampo cunea na cumã harkwa atajê ton cwỳrjapê mã, pê ahna amji capa? Hãpà! ²Quê hane na mã, quê ha ramã taa amji to hàmnãn to:

— He wa amjia kôt ite ampo itajê cunea ton par, cwỳrjapê ri Pahpãm mã ipejti na, quê ha ihtỳj ina amji capa — hane. ³He quê nee amji to hàmnãn to hajỹr nare. Ata na pê Pahpãm jarkwa jõ kàhhôc kam ramã harẽ he:

“Pê nee Aprãw amjia kôt, hàpên xà to atajê kôt Pahpãm ahna amji caxàr nare.

Ne pê kypê Pahpãm to amji mã ihhimpej nare, na pê cumã impej, pê ahna amji capa” hane.

⁴Ne por jũm apê ata ri, ihtỳj hàmcwỳr xà. Ne jũ wỳr quê hõ pahhi amjia kôt cama cumã ampo gõ. Ne por cute hàmcwỳr xà ton ata, hõ tekjêa ri, ne nee mã amjia kôt hõ pahhi te cumã hõr nare. ⁵Ne Pahpãm te nee hajỹr nare, ne quêt amjia kôt, cute amji kam hapac xàa na, ihtỳj cumã me pajàpên nare catêjê mã ampo gõ. Na cu ha Pahpãm mã me amji jarẽn to hane he:

— He wa tee ramã apu ate me ito ahimpej xà ita cunea kôt me ipa to me hahkre ita kam, jũ wỳr wa ha me to. Cwỳrjapê wa ha cama Jeju to amji mã me ihimpej, quê ha taa amji to me ikritxwỳ, ne taa me ijaxà kam ate me ito ahimpej xà itajê cunea ton to amã ipa — hane. Quê ha Pahpãm me pahto hũjarẽn to hane he:

— Ate ikra to amji mã me ahimpej to hajỹr, cwỳrjapê ri imã me apej. Ne me apê catyt kam me apa catêjê, na wa ha itỳj me ana amji capa, ne nee ate me ito kên jahpan xà na, me akên mã me amẽn nare — hane.

⁶Ne pê ramã pahhi xwỳ pê Tawi ata jũmjê jakryti na, Pahpãm jarkwa kôt, hõ kàhhôc kam, me ahna ihhôc to hane he:

⁷“Jũ mã cu ha me, ne ame pajakry?

He pahte Pahpãm jarkwa jirô pê me pahpỳm, ne ihkaj na me pahkên xà ton, mã cute hicu, ne to tojnõ, ne ihhur, ata pyrên ri ame pajakry.

⁸Por Pahhiti te pahte me ampo kên ton atajê kôt me pahkôt harẽn kêanre nare, ata pyrên ri ame pajakry” hane.

⁹He xà ajkĩ me hakryti xà ita me cupê Juta catêjê te amji mã mempy kà jakep catêjê atajê mã pit mã? Hãpà! He hanea ne mehcahkrit atajê te amji mã me amji kà jakep nare atajê mã, ihtỳj me hakry xà ita. He wa ramã ite me amã Pahpãm jõ kàhhôc kam, cute Aprãw xwỳ to ihcakôc to hajỹr na, harẽn he:

“Pê nee Aprãw amjia kôt hàpên xà to atajê kôt, Pahpãm ahna amji caxàr nare.

Ne pê kypê Pahpãm to amji mã ihhimpej nare, na pê cumã impej, pê ahna amji capa” hane.

¹⁰Mẽr hõhõ, xà pê ajkĩ Aprãw xwỳ amji mã impy kà kwỳ jakep jakàn pê mã, pê harẽn to hane? Hãpà! He pê amji mã ihkà kwỳ jakep xwỳjrea na, pê Pahpãm cumã harkwa to hane. ¹¹Aprãw te amji mã ihkà kwỳ jakep xwỳjrea na, pê ramã Pahpãm ahna amji capa. Ampo na? He cute amji mã Pahpãm to hajỹr cwỳrjapê. Na ri cute amji kà kwỳ jakep xà ata te ramã Pahpãm mã Aprãw xwỳ pejti na harẽn. Na pê Pahpãm cumã harkwa to:

“Ca ate kypê ito amji mã ahimpej nare,

cwỳrjapê ri imã apê ihhêj rũm rỳ jũ caxuw jũm te ampo to ihcupan nare ata pyràac.

Na wa ha itỳj ana amji capa” hane.

Ne pê ramã Pahpãm Aprãw te amji mã ihkà jakep xwỳjrea na, harẽn to hane. Cwỳrjapê ri Aprãw pê, por nee cute amji mã mehkà jakep nare, ne ihtỳj amji mã me Pahpãm to ihhimpej atajê cunea xakat. Mã Pahpãm te atajê cunea na amji caxàr. ¹²Ne hanea ne Aprãw pê, cute amji mã cuxà mehkà kwỳ jakep, ne Pahpãm to amji mã mehhimpej atajê cunea xakat. Ne xà ajkĩ cute amji mã ihkà jakep cwỳrjapê mã cupê me hakat? Hãpà! He Pahpãm to amji mã ihhimpej cwỳrjapê ri cupê, por mehcunea Pahpãm to amji mã mehhimpej atajê xakat.

Jeju to amji mã pahhimpej xà ita kôt, cu ha me amcwa

¹³Pê Pahpãm Aprãw mã pjê to hũjahkre to hane he:

— Ỹhỹ Aprãw, he pê ca nee ite me ato ihimpej xà cunea kôt apa nare cakrô, ca atỳj ate ito amji mã ahimpej, cwỳrjapê wa ite ana amji caxàr. Na wa ha amã pjê ita cunea gõ, mãr ca me atàmxwỳ mea mã me to ahimpej — hane. Pê Aprãw kampa ne amji mã:

— Pỳhàpà, pom cormã ikra nare ita, mã ajte ramã me itàmxwỳ to Pahpãm te imã hũjarẽn. Wa itỳj cute imã hũjarẽn xà itajê na to amji mã hane — hane.

¹⁴He pê nee Pahpãm Aprãw mã harkwa to:

— Ca ha xaa ite amã ihimpej xà itajê cunea to, ne ihkôt apa, wa ha cormã hahpan xà na, amã pjê ita cunea gõ — hajỹr nare. Ne pê quêt Pahpãm cumã:

— Wa ha amjia kôt amã pjê ita gõ. Ca ate, ite amã apê pjê ita jõ pahhi na ato ijũjahkre xà ata na to, amji mã ahimpej, cwỳrjapê wa ha amã cugõ — hane. Ne Pahpãm me pahto amji kam hapac to hanea, pom quê pê Aprãw to amji kampa he. Ne quê ha me pamã ampo to awjahkre, cu ha cute ampo to hũjahkre xà ata na amji mã me to pahhimpej. Cwỳrjapê quê ha me pamã cugõ. He pahte me Pahpãm te me pamã harkwa jirên xà ton ata kôt pit mã, me pamã cute to hũjahkre xà ata jõr nare. Quê hane na mã, cu mempar nare ita kam, jũ wỳr cu ha me cupê cupy. ¹⁵Ne quê ha jũm mã Mojxe xwỳ jõ kàhhôc kam Pahpãm te me to ihhimpej xà jahkre pej cakrô, nee me ton nare, quê ha ihtỳj Pahpãm ahna kypê kam incryc nare. Quê Pahpãm jõ kàhhôc kam, cute me to ihhimpej xà ita hamreare na mã, quê nee jũm hahkre pej, ne kam hapac nare ita kam, quê ha nee me cumã harkwa to:

— Ca ate ijarkwa jirô pê apỳm na ri me akam icryc — hajỹr nare.

Aprãw pê mehcunea te Pahpãm to amji mã mehhimpej catêjê atajê xakat

¹⁶Mẽr hõhõ, cu ha Aprãw xwỳ cuxà, me pahte Pahpãm to amji mã me pahhimpej na, quê ha me pamã ampo pej cunea jõr xà ata caxuw, pê Aprãw mã cugõ. Ne me pahte Mojxe xwỳ jõ kàhhôc kam Pahpãm te me pahto ihhimpej xà atajê cunea kôt me papa nare cakrô, quê ha Pahpãm hàhcaprĩa kam ihtỳj me pamã ampo pej cunea gõ. Ne mẽr ampo na mã quê ha me pamã ampo pej itajê gõ? Nee mã ampo na nare. He me papê Aprãw tàmxwỳa, ne me papê hũràac. Ampo na? He cu pahtỳj, cuxà Pahpãm to amji mã me pahhimpej. Na ri Aprãw pê me pahcunea te Pahpãm to amji mã me pahhimpej catêjê xakat, ne me papê mehtàmxwỳa pyràc. ¹⁷Ne pê ramã Pahpãm, hõ kàhhôc kam cormã Aprãw ihkra nare kam to hũjarẽn to hane he:

“Imãa, ramã apê me hàhtôa pãm” hane.

Pê kampa ne ihtỳj amji mã me to hane, ne amji mã:

“He cormã ikra nare cakrô, mã ahnaa Pahpãm te imã me itàmxwỳ jàhtôa to hũjahkre, na quê ha ihtỳj imã cugõ.

Ampo na? He ihtỳj Pahpãm hacpỹa mã mehtyc to ihtĩr.

Ne hanea ne ihtỳj harkwa kôt ampo amji to ita kam, quê ihtỳj cormã jũm kra nare ata mã ihtỳj ihtàmxwỳ gõ.

Na wa itỳj amji mã to hane” hane.

^18-19Ne por pê Pahpãm Aprãw mã ihtàmxwỳ jàhtôa ne to awjahkre ata caxuw, pê ramã ahna caku xẽj, ne ramã ihweaj to ihwej. Ne amji mãa ramã cupê jũm tyc, ne cupê ihkra nare ata pyràac, ne hanea ne hĩxi pê Xarakwỳj ata pê ihkre crà, ne ramã ihwejtu cakrô, mã ihtỳj Aprãw Pahpãm te cumã ampo cunea to hũjahkre ata na hikaj. Ne cute ampeaj kam amji mã Pahpãm to ihhimpej, cwỳrjapê ri cupê mehcunea te Pahpãm to amji mã mehhimpej catêjê xakat. Na ri cute Aprãw cuxà Pahpãm to amji mã mehhimpej atajê pê ramã mehtàmxwỳa pyràc. Ne Pahpãm te cumã to hũjahkre xà ata, na ihtỳj cute cumã ton. ²⁰Ne nee Aprãw xwỳ te jũ caxuw Pahpãm to amji mã ihhimpej jicu nare, ne nee cute ampo to cumã hũjahkre xà atajê na to amji kam hapac to ipicokjêr to ipa to:

— Pỳpỹn, mõrmõ quê ha Pahpãm imã ikra nõ gõ, nare, quê ha nee imã ihnõ jõr nare — hajỹr nare. Cwỳrjapê ri Pahpãm te cute amji mã to ihhimpej xà caxuw cumã carôt jõr, na ri Aprãw te Pahpãm pejti na harẽn to:

²¹— Ampeaj kam apej, ne ate imã ampo to gũjahkre xà atajê jõr xà caxuw, ampeaj kam acarôt tỳj, cwỳrjapê wa itỳj ate imã hõr na amji mã ato hane — hane.

²²Pê Pahpãm mã, Aprãw te ihhêj ne nee ampo to ihcupan nare, ne catyt kam ipa, na pê hacpỹa mã to amji kwỳ, ne ahna amji capa. Ampo na? He Aprãw te Pahpãm te ampo to cumã hũjahkre xà atajê na, ampeaj kam to amji mã ihhimpej na pê. Ne pê Pahpãm jõ kàhhôc kam ramã ita na ihhôc to hane he:

“Ite Aprãw mã ampo to ijũjahkre, mã ihtỳj ijarkwa ita to amji mã ihhimpej. Cwỳrjapê ri imã cupê jũm te nee ampo to ihcupan nare ata, ne catyt kam ipa.

Na wa ite hacpỹa mã to amji kwỳ, ne ahna amji caxàr” hane.

^23-24He Pahpãm te hõ kàhhôc kam Aprãw xwỳ to hũjarẽn xà ata, nee mã Aprãw pit caxuw nare, ne me pahcunea caxuw pê harkwa ita to. Ne por Pahpãm carôt tỳjti te hacpỹa mã Jeju to ihtĩr ata, pahcunea te to amji mã me pahhimpej catêjê caxuw ri. He pahte Pahpãm to amji mã me pahhimpej, cwỳrjapê ri cumã me papê catyt kam me papa catêjê. ²⁵Jeju te amji to me pahkritxwỳ, ne me pajaxà kam ihtyc xà mã amji jõr, me pahkên jahpan xà na. Mã Pahpãm te hacpỹa mã to ihtĩr, mãr quê me pahna amji capa, ne me pamã:

— Ate ikra tĩar pê me akritxwỳ ata to amji mã me ahimpej, cwỳrjapê ri imã me apê catyt kam me apa catêjê pit, na wa ha me ana amji capa — hajỹr.

Pahte amji pupun kêanre to me amji pupun xà kam me pajakry

Tijac 1.2-4

¹Me pajõ Pahhiti pê Jeju Crixtô te amji to me pahkritxwỳ, ne me pajaxà kam ihtyc. Na cu ita kam, amcro ita kam, pahtỳj cute amji kam hapac xà ita na amji mã me to me pahhimpej. Cwỳrjapê ri Pahpãm te me pahna amji caxàr, ne hacpỹa mã hipêr me pahto amji kwỳ. ²Ne Jeju to pahte amji mã me pahhimpej xà ata kôt ri, cutea Pahpãm te amji kam hapac xà impejti ita na me panxôr. Cwỳrjapê cu mãnea mã, amji mã me to me pahhimpej ita na. Na quê ha jũ caxuw, amcro nõ na, Pahpãm carôt jàhcujro ata to, me pahcunea to impejti ne. Ne me pampejti ata kam, quê ha mehcunea me papê Pahpãm pyràc, ne me pampejti na me pahpupu. Na wa me ijakry mea mã me amcro ita jikaj to me ipa.

³Ne wa ha hanea ne me pahte me amji pupun xà kêanre xà kam, me ijakry pej pêa mã me ipa. Ampo na? He wa me pahte amji pupun xà kêanre xà ata pĩn, hacpỹ ne me pahwỳr ampo cunea na pahte me pajũcanãar kam amji mã me pahprĩa ne, me papa xà ata cator na, me imã hahkre pej. ⁴Ne quê ha Pahpãm me pahte amji pupun xà kêanre ita kam, me pahte me pajũcanãar kam, amji mã pahprĩa na me pahpupu, ne me pamã harkwa to:

— Pom ate amji kam me gapac xà na, ite me apupun ita na ri imã me apej pit — hane. Cu ha me kampa, ne impar xà ita kôt, cu ha cormã cute me pamã ampo pejti to hũjahkre xà ata na me hikaj. ⁵He xà cu ha ajkĩ ihcaprỳ na, cormã Pahpãm te me pamã ampo to hũjahkre xà ata na me hikaj? Hãpà. He quê ha ihtỳj me pahwỳr cato. Ampo na? Nee mã ampo na nare. He Pahpãm mã me pahkĩan to me pahkĩn. Cwỳrjapê ri cute me pamã Carõ Pejti kujahêc, mãr quê Carõ Pejti ita cumã me pahcaxwãm pê me pahkĩnti na, to awjarẽ.

Pê me pancwỳrjapê Jeju ihtyc mã amji gõ

⁶He ampeaj kam Pahpãm mã me pahkĩn, na pê cormã me pahkêanre xà ata kam, pê Jeju me pancwỳrjapê ty. Pê cu tee me pampejti na ame amji to hahkre to me papa xà ata kam ri, Jeju Crixtô te amji to me pahkritxwỳ, ne me pahcunea kên jahpan xà na, me pajaxà kam ihtyc. Ne pê ramã Pahpãm mã, cute ihkra tyc na amji mã amcro hyr xà ata hahkre pej, na pê ahnaa hane. ⁷Ca ha pijamã jũm te mehkwỳ jahpan xà na ihtyc prãm ata na me acato? Quê! Ca ha ame hapêê ne ihhêaj to cormã jũm mã me acato. Ne ca atỳj ihhêaj to me jũm te ihnõ impejti cwỳrjapê ihtyc prãm ata mã me acato. Hamreare, jũ wỳr ca me jũm te ihnõ kêanre jahpan xà na, haxà kam ihtyc ihprãm ata na me acato. ⁸He me pahcunea kêanre cakrô, mã Pahpãm mã me pahkĩan to me pahkĩn, na ri cute ihcãmter pê Jeju Crixtô kujahêc, mã me pahcunea jaxà kam ihtyc.

⁹Ne ita caxuw pĩ kam Jeju tyc xà ata kôt ri hacpỹa mã Pahpãm te me pahna amji caxàr. Cwỳrjapê cu ha me pa, me amji mã:

— He Jeju cukwa kam, quê ha Pahpãm nee cute ame pahkam incryc xà ata to ame pahkam incryc nare. Ne me pahcukij, ne me pahto ipicokjêr xà jõ amcro kam, cu ha quêt pahtỳj ame papa — hane. ¹⁰He pê mam me papê Pahpãm curê xwỳn. Cakrô mã ihcãmter tyc xà ita kôt, cute hacpỹa mã me pahto amji kwỳ nõ. Ne hamre, ita caxuw me papê Pahpãm jõ ikwỳ nõ ita kam, cu ha me papê, pom Jeju tyc, ne hacpỹa mã ihtĩr ata na cu ha me, ne me ty, ne hacpỹa mã me pahtĩr, ne Pahpãm cahê na me pahtĩr rohnỳtti mã na me papa. ¹¹Jipy me pajõ Pahhiti pê Jeju Crixtô te hacpỹa mã me pahto Hũm jõ ikwỳ nõ ita kam, cu ha me pajakrya to me pajakry.

Pê Atãw me pahcunea me pahkên mã me pamẽ

¹²Ne ca ihhêaj to me anõa amji cukij to:

— Jũ rũm mã ajte me pahkên xà ita cator? — hane. He nee jũ rũm cator nare, ne me pahcunea quêtti pê Atãw xwỳ ata pê Pahpãm jarkwa jirô pê ihpỳm, ne cute pĩxô intête cumãn ata krẽr. Cwỳrjapê ri mehkên ata pjê cunea kam ipicràn. Na cu me papê hũràac, ne me pahcunea kêanre, cwỳrjapê cu ha me pahcunea me pahtyc pa. ¹³Ne Pahpãm te Mojxe xwỳ mã cute me to ihhimpej xà cunea jarẽn. Mã cute ahna ihhôc xà ata cumam ri ramã mehcunea kêanre, ne ihtỳj cute me ampo kên jahkre pej nare kam, me ton to me ipa. Mã Pahpãm te, cormã me cumã cute me to ihhimpej xà jõr nare ita kam, jũ mã quê me cumãn to:

“Ate me ijarkwa jirô pê apỳm, na ri me acunea kêanre” hane.

Pê Crixtô quêt me pahcunea me pampej mã me pajaxà

^14-15Ne Pahpãm te pĩxô intête Atãw mãn, mã cute ihkrẽr, ne ramã me pahcunea kên mã me pamẽn, ne me pamã to hahkre. Ne me pahnõ te ihkôt pĩxô ata krẽr nare cakrô, cu pahtỳj me pahte me pahtyc kam me pahtẽm, ne me pahtyc to mõ. Ne me pahtyc to me pamõr itaa kam, mã ahnaa Mojxe xwỳ jõ amcro kam hàhhuc. Ne Atãw pê me pahcunea mã me pahkên to hahkre jakàn pê mã ri Jeju Crixtô cator, pjê wỳr. Pê cupê Atãw pyràac cakrô, cute nee me pamã ampo kên to hahkre nare, ne quêt me pamã ampo pej to pit mã hahkre, ne cute me pampej mã me pamẽn xà wỳr ri cator. Ne Atãw xwỳ te amji kam hapac xà kên ata kôt ri me hàhtôa ne mehtyc, ne mehtyctu. Ne Jeju Crixtô te amji kam hapac xà pejti kôt ri, quêt nee jũm tyc nare. Ne Pahpãm te amji kam hapac xà pejti ata ri Atãw tekjê jirôa pê cati. Na quê ha me hàhtôa ne mehtyc xà pê me hũtà. Ne nee cute me hũtàr jahpan xà na hàhwỳr nare, ne cama me hũtàr to ipa.

¹⁶Ne Atãw te ihkên xà ton ata kôt ri mehcunea te mehkên xà jàhtôa ne me ton. Mã Pahpãm me cumã:

— Imã me akêanre, na wa ha itỳj me acurê mã me amẽ — hane. Ne quêt Jeju te amjia kôt amji to me pahkritxwỳ, ne me pajahpan xà na ihtyc xà ata kôt ri, Pahpãm mã me pahcunea impej pit. Mã Pahpãm me pamã:

— Imã me apeaj, na wa ha me apej mã me amẽ — hane. Hõ, pê amjia kôt, cama me pamã pahte me hajỹr xà ita gõ.

Cu ha me Jeju kôt me ampo kên cunea tohjê

¹⁷He ampeaj kam ri me hũmre pyxit peaj te ihkên xà ton ata jahpan xà na me hàhtôa ne mehtyc. Ne ita caxuw mam hũmre ata jirôa pê, hũmre nõ pyxit peaj pê Jeju ata te ri, quêt ampo pej pit ton ata kôt ri me pahwỳr ampo pej pit japôj. Ne Pahpãm te me pahcunea mã cute amji kam hapac xà intuw jõr, cu pahte ahna me amji to pôj xà caxuw. Na cu ha me Jeju Crixtô kôt me ampo kên cunea tohjê, ne pahtỳj catyt kam me papa.

¹⁸Ne pom Atãw pyxit peaj te ihkên pyxit peaj ton xà ata to ri, cute me pahcunea curê mã me pamẽn. Ita na ri hanea ne Jeju pyxit peaj te ampo pejti pê catyt kam ata ton, ne cute to me pahtyc pê me pahcunea pytàr, mãr cu me Pahpãm cahê na me pahtĩr rohnỳtti mã. Ne hanea ne me pamã cute amji kam hapac xà intuw jõr, mãr cu catyt kam ame papa, ne nee ame pahkên ton to prãm to ame papa nare. ¹⁹Ne pom hũmre pyxit peaj pê Atãw xwỳ, nee cute Pahpãm jarkwa par nare, ne hirô pê ihpỳm, ne cute me pahte me pahkên ton to me pamã hahkre. Ita na ri Jeju pyxit peaj te Pahpãm jarkwa kam hapac, ne hacpỹa mã Pahpãm wỳr cute me pahto amji jaxàr, mã ihtỳj Hũm te me pahna amji caxàr.

²⁰Ne pê Pahpãm Mojxe xwỳ mã, cute me to ihhimpej xà jarẽ, pê ahna ihkàhhôc to, mãr quê me cahyt, ne cute me ampo kên ton xà atajê na me amji jahkre pej. Ne ampeaj kam ri ampo kên jàhtôa to hàhtô, ne cati. Ne Pahpãm peaj to impej, ne hàhcaprĩ catia ita, ma cumã ipicamẽn to mõ, ne cati. Ne cute to kên itajê jakren tu, ne hirôa pê cati. ²¹Na ri me pahkên xà pahtỳjti atajê cama me pahtyc xà mã me pagõ, mã me pahcura ita kam, jũ kam cu me pahnõ cupê tẽ. Mã Pahpãm jàhcajrẽn, ne hàhcaprĩa na ri catyt kam hãn ne me pamã cute amji kam hapac xà intuwti jõr to ipa, mãr quê ihkôat me pahna amji capa. Ne me pajõ Pahhiti pê Jeju Crixtô ata kôt, cu ha hacpỹa mã me pahtĩr rohnỳtti mã na, cahê na ame papa.

Ihhêj ne ramã mam pahte amji kam me pajapac xà kên tũm ata tyc

Carati 2.19-20; 5.24; Epet 4.17-24; 1 Petrô 4.1-6

¹Pahpãm jàhcaprĩa na mã, cu pahte cuna mã me pahkên ton cakrô, mã ihtỳj cormã me pamã ampo pej pit ton to ipa. Na ri ramã mehcunea te me pahna Pahpãm jàhcaprĩ na me hõmpun ita kam, xà cu ha ajkĩ mãnea mã me pahkên ton kam me to pancrà, mãr quê Pahpãm te me pahcaprĩ na hipêr me hõmpu? ²Hãpà! Xà ca ha jũm tyc mã acakôc, quê ha ajkĩ ihtỳj akampa? Quê! He jũ wỳr quê akampa. Ne ramã me papê jũm tyc pyràac. Ampo na? He quê ha me pahcurê xwỳn pê Xatanaj te akên mã amẽn to prãmte awỳr tẽ, ne amã akên ton na awjahkre, ca ha apê mehtyac pyràc, ne nee kam gapac, ne cumã acakôc, ne ihkôt amji kam gapac, ne ampo kên ata ton nare. Ata pê ihhêj ne ramã me pahtyc, na quê nee hipêr jũm me pahte ampo kên ton na me pahton nare. Cwỳrjapê cu nee hipêr amjia kôt me ampo kên ton nare.

Cô kam cute me pahcumrãr xà ata pê me pajapac xà kên jarêt xà pyràc

^3-5He ramã me amã, ate me hajỹr xà na, me amji jahkre pej tu. Pê cu me pahkên ton jicu, ne Pahpãm wỳr me apkjê, ne me Jeju Crixtô pê me pahkritxwỳ na ahna me amji capa, ne pea mehcunea mã to ajpẽ to harẽn to me papa, ita na pê cu me to prãm. Cwỳrjapê ri jũm te mehcunea kam mare mã cô kam me pahcumrãr. Ne me pahna cô pijapỳn ata te ramã me pantête, pahte amji kam me pajapac xà kên tũm cunea juwahi na harẽn. Ne huwahi xà ata pê ihhêj rũm me pahte me pahkên jarêt xà ata, ne cupê cute me Jeju Crixtô jĩ jarêt xà ata pyràac. Ne me pahte me pahkên jarêt xà ita pê Jeju Crixtô me ajpẽn kam me pahpyxit peaj. Na ri cô pê me pajapôj xà ata pê ihhêj rũm cute me Jeju Crixtô jarêt, mã hacpỹa mã ihtĩr, ne cator pyràac. Ne pahte amji kam me pajapac xà to me papintuw, ne catyt kam me papa xà ita te ri ihcunea na me pajarẽn xà. Ne ramã Jeju Crixtô kam me pahte me ajpẽn hônco, mã ihtỳj pahte me pahkên ton xà nare na me pahtehcajpa, ne ihtỳj catyt kam me pahtehcajpar to ipa. Pê Pahpãm carôt tỳjti impejti to hacpỹa mã ihkra pê Jeju Crixtô to ihtĩr, na quê ha me pahtyc jirô pê mã, hacpỹa mã me pahto ihtĩr.

Xatanaj nee hipêr me pahto ihhimpej nare

⁶Ne mam pahte amji kam me pajapac xà tũm kên xakat pê Xatanaj pê me pajõ pahhi, na ri ihtỳj me pahto ihhimpej, cu cumã me apê. Ne Jeju te pĩ kam ihtyc xà ata me ajkaam, pahte amji kam me pajapac xà tũm kên ata to hamre, mãr quê Xatanaj nee hipêr me pahto ihhimpej nare. Cwỳrjapê quê ha nee hipêr cupê me pajõ pahhi nare, cu ha me pa xwỳjê nee hipêr cumã me pajàpên to mehprãm nare. ⁷Ca ha ate atyc na, ca ha nee hipêr akên xà nõ ton nare. Ampo na? Jũ wỳr quê jũm ty, ne hipêr ampo kên to. Ne me pajaxà kam Jeju tyc ita kam, jũ wỳr quê jũm pê me pajõ pahhi, ne hipêr me pahnõ te ampo kên ton na me pahto.

⁸Ne ramã ihhêj ne Jeju Crixtô kôt ame pahtyc ita kam ramã hacpỹa mã ihkôt ame pahtĩr na pahte amji mã me to hajỹr. ⁹Ne Pahpãm te hacpỹa mã Jeju Crixtô to ihtĩr ita kam, jũũ caxuw hipêr ihtyc xà te to ihhimpej xà nare na, me pamã hahkre pej. ¹⁰Ne me pahte me pahkên ton jahpan xà na ri ihtyc. Ne ihtyc pyxit peaj, na quê ha nee hipêr jũũ caxuw ihtyc nare. Ne ita caxuw Jeju ihtĩar na apu ipa, ne cama me pamã Hũm carôt tỳjti to ajpẽ, ne harkwa kôt ipa.

Cu ha nee hipêr me ampo kên ton to me papa nare

¹¹Cwỳrjapê ca ha me amji jarẽn to hajỹr to me apa he:

— Ramã Jeju Crixtô tyc, mã cute me harêt, ata kôt ri ramã cute pahte amji kam me pajapac xà tũm kên cunea jarêt. Cwỳrjapê cu ha nee hipêr pahte amji kam me pajapac xà kên ita kôt ame papa to prãm nare. Ne quêt Jeju Crixtô kam me pahte ajpẽn hônco, ne ajpẽn kam me pahpyxit peaj, ne cume mãa mã pahte Pahpãm cajpuaw xà caxuw ame pahtĩar na ame papa — hane.

¹²Cwỳrjapê ca ha nee hipêr ate amji kam me gapac xà tũm ita to me amji mã me ahimpej nare, ne me ate amji mã ampo na prãm xà kêanre ata kôt ame apa nare. ¹³Ne ca ha nee me anõ akên ton xà nõ mã acukrã xà nõ jahkre, quê ton nare. Ne Pahpãm mã, ca ha quêt me amji jõr to me apa. Ne Pahpãm te me atyc xà pê me apytàr, ne me amã me ate amji kam me gapac xà tuw jõr ata kam, ca ha atỳj cumã me amji jõr to me apa. Ne quê ha me ate catyt kam ampo pejti ton to me apa xà na, me atehcajpar to ipa. ¹⁴Ne Pahpãm mã, ramã me apê catyt kam me apa catêjê, mã cute me ana amji caxàr. He xà ajkĩ me amã Pahpãm te me ato ihhimpej xà jõr atajê cunea kôt hakop jahkre pej na mã, cute me ana amji caxàr? Hãpà! He amjia kôt, me akên xà kam, Pahpãm mã me acaprĩ, mã cute me ana amji caxàr. Cwỳrjapê ca ha nee hipêr amji na ate amji kam me gapac xà tũm kên jamãr, quê me ato ihhimpej nare.

Cu ha ampo pej ton to pit mã amji mã me pahhimpej to me papa

Jowãw 8.34

¹⁵Ne ca ihhêaj to me anõ amji jarẽn to:

— He nee mã pahte me Pahpãm te me pahto ihhimpej xà cunea kôt me hakop jahkre pej cwỳrjapê mã, cute amji wỳr me pahto ipipkjêr, ne me pahna amji caxàr nare, ne ihtỳj amjia kôt cute me pahna amji caxàr. Cwỳrjapê wa itỳj Pahpãm jarkwa jirô pê ipỳm prãm, ne itỳj hirô pê ipỳm — hane. Co he! Acakôc xà ita to hajỹr nare! ¹⁶Ampo na? He ca ha me anõ gõ pahhi mã amji gõ, hamre quê ha taa ato ihhimpej na, me amã hahkre pej pejtu. Ita kôpit na, ca ha me anõ te akên mã amji jõr na, quê ha ihtỳj taa ato ihhimpej to ipa. Na quê ha gàpên xà ata jahpan xà na gàmcwỳr xà ata pê atyc xà. Nare, ca ha me anõ te Pahpãm mã amji jõr na, quê ha ihtỳj taa ato ihhimpej to ipa. Na quê ha cumã gàpên jahpan xà na ana amji capa, ne amji kôat ato, ca ha me atyc xà jirô pê, hacpỹa mã atỳj me atĩr.

¹⁷Na ca ha Pahpãm te me ato impejti xà ita pyrên me gakryti na cumã me amji jarẽ. Ne pê mam me ate amji kam me gapac xà tũm kêanre ata, pê ajco me ato ihhimpej to ipa. Ne ita caxuw nee cute hajỹr nare, ne quêt Pahpãm te me amã ampo to hahkre atajê to, ca ha me gĩ cunea kam, me amã amji kĩan kam, amji mã me to ahimpej to me apa. ¹⁸Quê ha pahhi kêanre te me pajàpên xà kam me pamã quêt ata te ihtyc, quê ha cute me harêt na, cu ha nee hipêr cumã me pajàpên to prãm nare. Ita jĩkjê na mã Pahpãm te pahte amji kam me pajapac xà kên tũm ata to hamre, na quê ha hipêr me pahto ihhimpej nare. Cwỳrjapê cu ha pahtỳj ame papa, ne Pahpãm mã me apê.

Cu ha Pahpãm mã me amji jõr to me papa

¹⁹He pê ca mam me akên xà atajê me, ahti na ate me axy kên to me apa xà tũmti atajêa mã, ajco me amji jõr to me apa, ne amji mã me to ahimpej to me apa. Ne ita caxuw, ca ha catyt kam, ampo pej tetetti to pit mã me gàpên to me apa xà caxuw, ca ha Pahpãm mã me amji jõr to me apa. ²⁰Pê ca mam ajco me akên to pit mã, amji mã me ahimpej to me apa, ne nee Pahpãm mã ampo na prãmti atajê ton to me apa nare. ²¹Ne mẽr ampo pej mã, ca ate amji kam me gapac xà kam me pahpahàmti ata jahpan xà na ate me ipyr? Hamreare! Ne pom ate amji kam me gapac xà ita pê ri me atyc xà. ²²Ne ramã Pahpãm te, ate me akên ton jicu xà caxuw me amã carôt jõr. Na ca ha ita caxuw cumã pit mã me gàpên to me apa. Cwỳrjapê ca ate Pahpãm mã ramã me amji jõr, ne me amji jõrtu, ne cutea ri catyt kam me apa na me aton, ne cupêa ri me gõ Pahhiti. Ne quê ha hacpỹa mã me ato me atĩr, ca ha me atĩr rohnỳtti mã na, cahê na ame apa.

²³Mẽr hõhõ, me pahkên mã me pajàpên to me papa, mã cute me pamã hàmjõr xà ata pê me pahtyc xà. Ne Pahpãm nare, quêt cama cute me pamã pahtyc nare xà jõr ata pê ri hacpỹa mã cute me pahto me pahtĩr xà, cu ha cahê na ame papa rohnỳtti mã. Na cu ha me pajõ Pahhiti pê Jeju Crixtô kam me amji hônco, quê ha ihtỳj me pamã jũ caxuw me pahtyc xà nare gõ.

Jeju te pahte amji kam me pajapac xà kên ata pê me pahpytàr

Roman 10.4

¹Ỹhỹ, Jeju kam me ikjêjê, he ca atỳj me acunea te, pom ite me amã cormã ampo jarẽn xà itajê kam me gapac to kênre nare. Ampo na? He me akwỳa kwỳ pê Juta catêjê, na ri me amã Pahpãm te Mojxe xwỳ mã, cute me ato ihhimpej xà juwahi ata cunea jahkre pej. Ỹhỹ, quê ha cormã jũm ihtĩar na ipa, quê ha ihtỳj Mojxe xwỳ jõ kàhhôc kam, cute me hapackre xà ita jũm ata to ihhimpej to ipa. Ne jũ caxuw ty, quê ha nee hipêr Mojxe te me hapackre xà ita to ihhimpej to ipa nare.

²Mẽr hõhõ, quê ha pyjê nõ mã cormã impjê ihtĩar na ipa, quê ha nee amji mã iràn xà na impjê nõ ton nare. Nãmri quê ha cute ihtyc na, quê ha ihtỳj me pancaca xà to pahte me amji pyràc xà ita to ihhimpej to ipa jicu, ne ihtỳj jũm me hikwa na to tojnõ, quê ha cume hikwa. ³Nãmri quê ha cormã impjê ihtĩar na ipa na, quê ha hĩxi te iràn xà na impjê nõ me hikwa na, quê ha me pancaca xà to pahte me amji pyràc xà ata kôt cupê cahãj xyre ata, ne ihkêanre ne. Nãmri quê ha impjê cupê ty, quê ha hakàn pê impjê nõ me hikwa na, quê ha nee me pancaca xàa kôt cupê jũm cahãj xyre ata pyràc nare.

Cu ha ita caxuw Jeju pit mã me pajàpên to me papa

⁴Ne me ikjêjê, ate me hajỹar. Ampo na? He Jeju Crixtô kam ate me ajpẽn hônco ata kam, ihhêj ne ramã ihkôt me atyc. Na quê ha nee Mojxe te me ato ihhimpej xà ata hipêr me ato ihhimpej nare. Ne hacpỹa mã Jeju Crixtô ihtĩr na ri cupê me gõ Pahhiti. Na ca ha atỳj cute me amã harkwa to ihcakôc xà itajê cunea na me kampa, ne me cumã apê. Ne por jũm cahãj pê impjê ihtyc, mã hipêr hikwa tuw ata, quê ha nee hipêr impjê tyc ata kam hapac nare. Ne por impjên tuw me hikwa ata, quê ha amji caxuw kam hapac to ipa. Ita na ri me pahte amji kam me pajapac xà te hajỹar. Na cu ha mam pahte amji kam me pajapac xà wej tũmti ita jicu, quê ha nee hipêr me pahto ihhimpej nare, ne Jeju quê ha quêt me pahto ihhimpej to ipa. ⁵Ne pê cormã me pahte amji kam me pajapac xà tũm ata me pahto ihhimpej reria mã, pê cu amjia kôt ajco pahte me amji mã ampo kên ton to prãm atajê ton to pit mã me papa. Ne pê Mojxe xwỳ jõ kàhhôc kam, cute me hapackre xà ajco ampo kên itajê ton tête me pamãn cakrô, pê cu pahtỳj ajco mãnea mã me ton to me papa. Cwỳrjapê ri me pahte ampo kên kĩnti xà ata te me pahtyc xà mã me pajõr. ⁶Ne hamre, ita caxuw cumam Mojxe xwỳ jõ kàhhôc kam me pancaca xà ata cunea pê me pahcator. Ampo na? He ihhêj ne ramã ame pahtyc. Ne ita caxuw cu ha me Pahpãm tĩar Carõ Pejti ata kampa, ne ihkôat me papa, ne nee hipêr me pancaca xà tũm jõ kàhhôc kam ihhôc ata to me amji japackre nare, ne pahtỳj ame papa.

⁷Ne mõrmõ ca ha me anõ amji mã:

— He por Mojxe xwỳ jõ kàhhôc kam, Pahpãm te me pahto ihhimpej xà wej ata pej nare — hajỹr na. Co he! Ca ha nee garkwa ita to acakôc to hajỹr nare. Ampo na? He cute me pahto ihhimpej xà ata te ri, me pahte ampo to mehcupan xà atajê pupun na iton, cu pahte me hõmpun, ne me hahkre pej. Ne cute me pahto ihhimpej xà ata te hũjarẽn to hajỹr he:

— Ca ha nee amji jũ na ame ampo kĩn nare — hajỹr. Quê hũjarẽn to hajỹr nare na mã, wa ha hahkre pej nare kam, pa ramã amji mã:

— Wa itỳj me hũ na imã ampo kĩn, ata te nee ito ikên nare, ne cormã ipeaj — hane. ⁸Me ajkaam wa ijũpar pyrentu, ne tee ame amji jũ na ampo kĩn ita jicu to ame hahkre, ne jũ wỳr wa me hicu. Ampo na? Ite amji kam ijapac xà tũm ita, ma ite me hũ na ampo kĩn ita na ito, ita kam jũ wỳr wa me hicu. Ne Mojxe xwỳ jõ kàhhôc te ri imã ikên ita to ipipẽ, wa ite hahkre pej. Quê ha Pahpãm nee me pamã Mojxe te me pajapackre xà jõr nare na mã, quê ha pahte amji kam me pajapac xà kên tũm ata nee me pahkên na me pahton nare.

Mojxe jõ kàhhôc ata ampỳare mã Pahpãm pê ame papa na me pajarẽ

Roman 3.20; Carati 3.23-24

^9-10He pê wa icrire naa mã nee Mojxe jõ kàhhôc kam Pahpãm te me pahto ihhimpej xà itajê impar, ne hahkre pej nare. He pê wa ajco ampo kên pit ton to ipa, ne nee kam imã amji kĩn nõ nare. Ne wa ite Mojxe jõ kàhhôc kam, cute me pahto ihhimpej xà itajê kam ijapac, ata caxuw wa ite ampo kên ton to ipa ita na amji pupun, ne ahna amji jahkre pej. Ne ihhêj rũm ipê mehtyc, ne imã amji kĩn nare. Ne cu ha catyt kam cute me pahto ihhimpej itajê kôt me hakop, ne ihkôat me papa na mã, cu ha ramã me pamã amji kĩn. Ne me pamã amji kĩn xà kaj na, pom pahte amji kam me pajapac xà ata cama ajte me pahtyc xà wỳr me pajagã.

¹¹He wa mam itỳj, pom Mojxe jõ kàhhôc te ampo kên ton tête imãn atajê cunea ton to ipa. Mã ite amji kam ijapac xà tũm kên ata pê imã ihhêj, ne imã:

— Gapacta ne ampo itajê cunea ton to apa, he nee akên nare, ne apeaj — hajỹr cakrô, pê cute ipej na ijarẽn xà ata kaj na, ite ikên itajê ton to ipa itajê ityc xà mã igõ. Na wa ihhêj ne ramã ityc. ¹²Cwỳrjapê cu me pahte Mojxe xwỳ jõ kàhhôc tetetti, impejti ne ihcuhtacti na me hahkre pej, Pahpãm te ahna me pahto ihhimpej xàa na.

¹³He xà ajkĩ Pahpãm te me pahto ihhimpej xà impejti ita mã me pamã amji kĩn nare na me pahto, ne me pahtyc xà wỳr me pajagã? Hãpà. He pahte amji kam me pajapac xà tũm kêanre atajêa te, Pahpãm te me pahto ihhimpej xà impejti atajê kôt, me pamã amji kĩn nare na me pahto, ne me pahtyc xà wỳr me pajagã. Pê wa mam ikên xà ton to ipa atajê te cama ikên mã irẽn to mõr na hahkre pej. Na pê wa amji mã:

— Wa ite Pahpãm te intête me cumãn xà kam ijapac, ne ite ampo kêanre itajê ton na amji jahkre pej. Ne ita caxuw ite mam ite amji kam ijapac xà tũm ita kêanre na hahkre pej, ne hõmpun — hane.

Pê cu mam cormã amji mã me ampo kên capi

¹⁴Ne Pahpãm Carõ Pejti pĩn ri Mojxe jõ kàhhôc kam, cute me pahto ihhimpej xà atajê cator. Ne Carõ Pejti ita te ri catyt kam harkwa kôt me papa xà caxuw, me pamã carôt jõr. Ne pa nare. Ihkĩnte ipê hũmre, ne icarôt peacre, na wa ite amji kam ijapac xà tũm kêanre itajê kôt ampo kên cunea ton to ipa. ¹⁵He wa nee ajte pa icaca xà te ajpẽn jĩkjêhti ita na amji jahkre pej nare, ne hãn ne ikrã acto tu. He xà wa ha ite itỳj imã ampo ton prãmti atajê to? Hãpà! Wa nee ton nare. Ne ajte imã ampo ton prãm nare, ne imã ihkĩn nare atajê, wa itỳj to. ¹⁶Ne nee wa ajte ampo pejti ton to amji kam ijapac to ipa nare, ne tee intête amji mãn to:

— Wa ha nee hipêr ampo kên ata ton nare — hajỹr cakrô, itỳj to, me ajkaam mã Pahpãm te me pahto ihhimpej xà, ikêanre na ijarẽ. Ne ampeaj kam ri cute ijarẽn na imã hahkre pej. ¹⁷Wa nee ikên xà ton xà itajê intête amji jiprõn nare na, ramã imã amji jahkre pej. Ne icaxwãm pê icaca xà kêanre itajê xakat ri hãn ne, ite ampo kêanre ton xà itajê na imã awjahkre, wa hãn ne to.

¹⁸He ite amji kam ijapac xà tũmti ita kam, nee imã ampo pejti ton xà hamreare. Ampo na? He wa tee apu ampo pejti ton na amji to prãm cakrô, wa nee ajte amji mã hamãr ne ton nare. ¹⁹He ampo pejti atajê ri imã ton prãm cakrô, wa nee ajte ton nare. Ne ampo kêanre itajê ri imã ton prãm nare cakrô, wa itỳj to. ²⁰He wa nee amjia kôt ampo kên ton nare, ne ite amji kam ijapac xà tũmti ata ri, ite ampo kên ton na imã awjahkre, wa ajte nee intête amji jiprõn nare ne itỳj to.

²¹Hõhõ, pê wa mam hane he, pê wa ajco ite ampo pejti ton xà caxuw amji mã capi cakrô, nee ajte ton nare, ne cama amji mã ampo kên pit capi. ²²He ite amji kam ijapac xà impejti kam ri, Pahpãm te me pahto ihhimpej xà kam ijapac pejti xà atajê pyrên ri, icaxwãm pê ijakry. ²³Cakrô pê wa nee ajte kam ijapac ne ihkôat ipa nare, ne ajco ampo kên pit ton to ipa. Cwỳrjapê ri ite amji kam ijapac xà ita tuw pejti me, ite amji kam ijapac xà tũm kêanre ita ihhêj ne ihtỳj apu ajpu. Ne ite ampo kên ton to ipa ita pê ihhêj rũm, me hacjên xà pê icator xà nare ata. ^24-25Ne wa icaxwãm pê itỳj Pahpãm te amji kam hapac xà kôt ampo pej pit ton to prãm cakrô, mã ite amji ton xà itajê kôt hamreare. Pê wa ajco ampo kêanre atajê ton to ipa intête, nee ajte amji jiprõn nare. Ne pê imã amji kĩn nare, pê wa pa amji mã:

— Jũm mã quê ha ajte ite ampo kên ton xà itajê te, ityc mã ijõr xà ata pê ipytà? — hane. Nee mã jũm nare. He me pajõ Pahhiti pê Jeju Crixtô te ri ampo kên cati ita cunea pê ipytàr!

Quê ha Pahpãm Carõ Pejti me pahtĩr ita na me pahto ipa

Carati 5.16-26

^1-2Hamre, ita caxuw quê ha, por Jeju Crixtô kam me ajpẽn hônco to me ipa atajê, quê ha nee Pahpãm jũm curê mã mẽn nare. Ampo na? He Pahpãm Carõ Pejti ita te ri Jeju Crixtô kam pahte me ajpẽn hônco na me pahton, ne me pamã pahte amji kam me pajapac xà intuw pejti ita jõr. Me ajkaam, cute mam me pahte amji kam me pajapac xà kên tũmti ata te, me pahto ihhimpej xà pê me pahto cator. Na cu ha nee Pahpãm kaj na, ampỳa mã cupê ame papa, ne ihkên catia ata mã me pancjêj nare.

Quê ha nee hipêr pahte ampo kên ton xà atajê me pahto ihhimpej nare

^3-4Ne pê Pahpãm Mojxe xwỳ mã cute me to ihhimpej xà gõ atajê cunea impej pit. Cu nee mempar nare. Ampo na? Jũ wỳr cu apu amji mã me hamã, ne me kampa. Cwỳrjapê ri Pahpãm te me pahna amji ton to:

— Tee ame ite me to ihimpej xà ton to me hahkre ita kam, quê ha nee curê mã cute me mẽn xà ata pê me amji pytàr nare. Cwỳrjapê wa ha mehwỳr ikra kujate, quê ha mehkritxwỳ na amji to, ne taa mehkên xà ita pê me hũtà — hajỹr. Ne ma cute me pahwỳr Jeju kujahêc, mã cute me hũmrea na amji ton, ne ita ri pjê kam apu ipa. Ne ihtỳj Hũm te, Mojxe xwỳ mã cute me to ihhimpej xà atajê na, me pajaxà kam amji mã impar kên to ipa nare. Jicu xà kam, nee ampo cwỳrjapê ihtyc prãm nare kam, cupê me pahkritxwỳ te hajỹr romã mã, cama cute amji na me hamãr, mã cute me pajaxà kam mehcuran, mã ihtyc. Ata to ri cute me pahkên xà catia ata pê me pahpytàr. Ne cute me pamã carôt jõr na, cu pahte amji kam me pajapac xà kên tũm ata kôt me papa jicu, ne pahte amji kam me pajapac xà tuw pejti, Pahpãm Carõ Pejti pĩn ajpên cator ata kôt, cu me papa.

⁵Ne por mam cute amji kam hapac xà tũm me to ihhimpej to ipa atajêa kôt me ipa. Ne Pahpãm Carõ Pejti quêt me to ihhimpej to ipa atajê ri, ihkôat me ipa. ⁶Ne quê ha jũm te, cute amji kam hapac xà tũm ata kôt ipa na, quê ha ihtỳj jũ caxuw ty, ne ihtyc tu. Ne quê ha quêt jũm te Pahpãm Carõ Pejti kôt ipa na, quê ha nee cumã ampo cupa nare, ne ihtỳj ihcarĩcti kam, ihtĩar na ipa rohnỳtti mã. ⁷Ne por jũm cute amji kam hapac xà tũam kôt ipa ata pê Pahpãm curê xwỳn. Ampo na? He hũpar nare, na ri nee Pahpãm te to ihhimpej xà ata kam hapac nare. Ita kam tee apu ihkôt amji ton to hahkre, ne jũ wỳr quê apu amji mã hamã ne to. ⁸Ne por amjia kôt cute amji kam me hapac xà tũam kôt me ipa atajê ri, nee me Pahpãm cajpuaw nare.

Pahpãm Carõ Pejti ri, me pahcaxwỳn me, me pajĩ tĩr rohnỳtti mã na to

Carati 4.1-7

⁹Quê ha Pahpãm Carõ Pejti te nee me akam ihkrĩ nare na, ca ha nee me apê hõ tekjê nare. Na ca ha nee mam, ate amji kam me gapac xà tũm ata kôt me apa nare, ne quêt Carõ Pejti jarkwa kôt me apa, mãr quê me akam ihkrĩ. ¹⁰Ne quê ha Jeju Crixtô, Carõ Pejti kôt, me akam ihkrĩ cakrô, quê ha ihtỳj jũ caxuw me gĩ apu ty, me ate Pahpãm te me ato ihhimpej xà atajê jirô pê me apỳpỳm cwỳrjapê. Ne me acaxwỳn nare, quê ha ihtỳj ihtĩr rohnỳtti mã. Ampo na? He ihtỳj Pahpãm te me ana amji caxàr. ¹¹Pê Pahpãm Carõ Pejti hacpỹa mã Jeju Crixtô to ihtĩr, ata ri me akam ihkrĩ. Ne taa mã quê ha hacpỹa mã, me amã me gĩ to ihtĩr.

¹²Ita kam me ikjêjê, cu ha nee me pahte amji kam me pajapac xà tũam ata kôt me papa nare. ¹³Nãmri ca ha me ate amji kam me gapac xà tũam kôt ame apa na, ca ha ramã me atyc xà wỳr ame pra. Ne ca ha me ate Pahpãm Carõ Pejti carôt kôt me akên ton jicu na, ca ha Pahpãm cahê na me atĩr rohnỳtti mã na, me apa. Ne nee jũ caxuw me akên catia pê, cuhy cati ata wỳr me aprar, ne kam me apỳpỳm nare.

Pahpãm Carõ Pejti ri, ihkra na me pahto

¹⁴Ne por Pahpãm Carõ Pejti amji kôt me to ipa atajê cunea pê mehkraa to mehkra. ¹⁵Mẽr ampo na mã Pahpãm te me amã Carõ Pejti jõr? Xà ajkĩ ate cama me cumã gàpên xà caxuw, nare, ajkĩ cute me gigẽc rên xà caxuw mã? Hãpà. He cute me ato ihkra xà caxuw ri, cute me amã Carõ Pejti ita jõr. Na ca ha atỳj Carõ Pejti carôt kôt cumã:

— Inxũ — hane. ¹⁶Pahpãm Carõ Pejti me, me pahcaxwỳn ajkam ihhônco, ne me pamã:

— Me apê Apãm Cati kraa to ihkra — hane.

Cu ha jũ caxuw, Jeju me, me ajpẽan, ne me pampejti ne

1 Petrô 1.3-9

¹⁷Ne pom hãn ne me hũmjê tyc jakàn pê, mehkra te me hàhcukrêj cwỳr xà, ita kôpit na mã, cu ha Jeju Crixtô mea mã, Hũm te cumã ampo jõr xà to hũjahkre atajê cwa. Cu ha Jeju Crixtô me, me pahcunea te cute amji pupun xà kêanre atajê na ihkôt me amji pupun na, cu ha hanea ne jũ caxuw, Jejua kôt me pahcarôt tỳjti, capẽnti, impejti kam ame papa. ¹⁸Ne wa pjê ita kam, pahte me amji pupun xà kêanre kênre atajê to amji kampa, ne hanea ne ampo pejti to me pajàmcwỳr xà atajê me to ajpẽn mã hapyre mã. Ne pahte ampo pejti to me pajàmcwỳr xà ata ri, pahte me amji pupun xà kêanre atajê jirôa pê catia to cati. Ne pahte me ampo pejti to me pajàmcwỳr xà ata kam, cu ha nee hipêr ampo kên itajê to me amji japackre nare. ¹⁹Ne pê Pahpãm pjê kam ampo cunea to, itajê pê me hũmre me, pryre me, ampo jara me, tep me, ampo cunea. Quê ha ampo itajê cunea ihtỳj jũ caxuw, Pahpãm te me pahto ipipẽ xà ata kam, me papê ihkra na cute me pahpupun na, me pajikaj.

Quê ha jũ caxuw Pahpãm ampo cunea to impej

²⁰Ne mẽr ampo na mã ame amcro ata jikaj? Nee mã ampo na ame amcro ata jikaj nare. He pê mam Atãw xwỳ Pahpãm cuna mã ihkên xà to, na ri ihkôt ampo cunea kên mã hàr. Ne nee mã amjia kôt ihkên mã hàr nare. Ampo na? Pê Pahpãm ramã cute ita ton xà to amji kampa. ²¹Ne quê ha ihtỳj jũ caxuw amcro ata na, Pahpãm te ampo cunea ton atajê hacpỹa mã impej pa. Ne cute me pahto ihkra ita kam, quê ha hacpỹa mã me pahto impej pa. Me ajkaam, quê ha hanea ne cute ampo cunea ton itajê impej partu, quê ha nee hipêr ihcacu, ne ihkên nare. ²²Ne me pamã, pjê kam ampo cunea kàj xà, mã amrã na, hahkre pej. Ata pê ihhêj rũm pyjê mã mehkra xà, mã me ihcajpẽ ita na mã ampo cunea kàj xà.

Cu cormã Pahpãm te me pamã me pajĩ to ipintuw xà ata jikaj

²³Ne pê Pahpãm mam me pamã Carõ Pejti jõr cakrô, mã cormã me pahkàj xà, cu me amrã, pahte amji to me papintuw xà jikaj xà cahhur to, pahte me hikaj xà ita kam. ^24-25Ne cu me pahte amji mã me Pahpãm to hajỹr, ne amji mã me pahprĩa kam me hikaj, ne me amji mã:

— Wa nee cormã ite me, por wa me hikaj ata pupun nare cakrô, wa itỳj Pahpãm te ampo cunea to impej, ne imã ijĩ to ipintuw na amji mã me to hane. Cwỳrjapê, wa ha itỳj me hikaj — hane.

Carõ Pejti Pahpãm mã me pahcakôc na me pahtehcajpa

Epet 1.3-5

²⁶Ne jũ caxuw, pahte me hikaj to hicu prãm xà ata kam, quê ha Pahpãm Carõ Pejti pahte me hikaj jicu nare na me pahtehcajpa. He me papê Pahpãm mã amji cajrẽn jahkre kêatre, cwỳrjapê quê ha Carõ Pejti ihtỳj ihcakôc nare kam ihcarĩcti kam, aracri Pahpãm mã me pahcajrẽn. ²⁷He Pahpãm te me pahcaxwãm pê me pahte amji kam me pajapac xà pupun pejtu. Ne hanea ne cumã Carõ Pejti te amji kam hapac xà jahkre pej. Quê ha Carõ Pejti Pahpãm te me pamã ampo jõr to prãm xà ata na, quê ha me pamã ahwỳ.

²⁸Me pamã, mehcunea mã Pahpãm kĩnti, mã cute amji kam hapac xà mã me hacjên xà caxuw ri, amji mã me capi atajê wỳr ampo kên te imprar, ne ame to jũ mãn xà atajê pĩn impejti te amji to ipixô, ne me hỹrmã imprar na, me pamã hahkre pej.

Jeju pê me Pahhàkà cati

²⁹Ne Pahpãm te amji mã me pahcapi, ne taa amji mã:

— Pom itajê quê ha me cupê ikra pê mehtõ kà pê Jeju pyràac, na quê ha me to “Ihàkà” — hane. ³⁰Ne pê Pahpãm ramã me pahto amji kam hapac xà to amji kampa ata to ri, me pahto amji kampa. Ne hanea ne cute amji mã me pahcapi. Ne hanea ne cute catyt kam me papa catêjê na amji caxàr, ne quê ha hanea ne me pamã me pahcarôt tỳjti, impejti, capẽnti gõ, cu ha me papê hũràac ne kam me papa.

Quê ha nee me pahcurê xwỳn ame pahto jũ mãn nare

Roman 5.1

³¹Ne pom Pahpãm te me pamã ampo pejti cunea jõr itajê kôt ri, ramã me pamã Pahpãm pê me pajamãr catê na hahkre pej. He ramã Pahpãm me pahcahê na ipa ita kam, xà quê ha ajkĩ ihtỳj ampo me pahtohjê? Hãpà! ³²Ne hanea ne me pajaxà kam, ihkra tyc xà caxuw, cute hõr to xuwcaca nare, ne ihtỳj ihtyc mã hõr ata kam, xà quê ha ajkĩ nee me pamã ihkôt ampo pejti itajê nõ jõr nare? Hãpà, quê ha ihtỳj me pamã cugõ!

Jũ wỳr quê pahte ampo kên ton itajê, cupê cumã me pahkĩnti ita cahpêrta

³³Ne Pahpãm te ri ramã me pahto hũjarẽn to:

— He imãa, pom itajê pê catyt kam me ipa catêjê, na wa ha me ahna amji capa — hajỹr xà ata kam, jũm quê ampo kên na me pajarẽ? ³⁴He me pajõ Pahhiti pê Jeju Crixtô ramã me pajaxà kam ihtyc, ne ihtyc xà ata jipy, ramã hacpỹa mã ihtĩr, ne ma Pahpãm jĩkjê rũm awpôc rũm, me to ihhimpej xà krĩ xà kam jỹ, ne cumã me pahcajrẽn to ihkrĩ. Ata kam, jũ mã quê ha ajte jũmjê me papê ampo kên ton catêjê na me pamã hacjê? Quê, hamreare!

Jũ wỳr quê ampo kên Pahpãm pê cumã me pahkĩnti ita cahpêrta

³⁵Me pajõ Pahhiti pê Crixtô mã me pahkĩan to me pahkĩn.

Ne ampo quê cumã me pahkĩnti ita tête ihcahpêrta, quê hicu?

Hamreare, wỳr quê ampo ihcahpêrta!

Cu ha me amji pupun xà kêanre to me amji pupu, quê ha cormã cumã me pahkĩn ita na.

Ne quê ihhêaj to ampo te me pahto jũ mãn xà ata kam, quê ha cormã cumã me pahkĩn ita na.

Me papê Pahpãm tekjê cwỳrjapê ri Pahpãm curê xwỳn te ame pahto kêanre ata kam, quê ha cormã cumã me pahkĩn ita na.

Quê ha ampeaj kam me pamã prãm cakrô, quê ha cormã cumã me pahkĩn ita na.

Quê ha me papê hamreare cakrô, quê ha cormã cumã me pahkĩn ita na.

Quê ha jũmjê ame pahcuran prãm to ame ipa cakrô, quê ha cormã cumã me pahkĩn ita na.

Ne jũm me pahcuran cakrô, quê ha cormã cumã me pahkĩn.

³⁶Ne pê ramã rỳ pêa mã Tawi xwỳ Pahpãm jõ kàhhôc kam me pahto hũjarẽn to:

“Me ijõ Inxũ Cati, he acurê xwỳn acwỳrjapê amcro cunea kam me icuran to prãm.

Ne me ito ihhêj rũm carà cahàcre hôhti curan xà caxuw, ne ihtỳj me icuran prãm” hane.

³⁷Ne xà cu ha ajkĩ ampo kên itajê cunea cupate me pajõ Pahhiti mã me pahkĩnti xà ata to, amji mã me pahhimpej jicu? Hãpà, nee cu amji mã me to pahhimpej jicu nare! He taa mã quê ha quêt me pahte ampo cunea tohjê na me pahto!

Ampo quê Pahpãm pê cumã me pahkĩnti ita cahpêrta

³⁸Ne nee ampo te Pahpãm mã me pahkĩnti xà ita cahpêrhyr xà nare na, me pamã hahkre pej.

Cu ha me pampeaj na me papa, nare, cu ha me ty, quê ha cormã Pahpãm mã me pahkĩn.

Quê ha ampo carõ me, cupẽ jarôti me, me hõ pahhi kwỳ atajê nee me Pahpãm mã me pahkĩnti ita tête mehcahpêrhyr nare.

Ne pom amcro ita kam ampo cator ata me, nare, quê ha jũa caxuw, cormã ampo cato ata, quê ha nee Pahpãm mã me pahkĩnti ita tête ihcahpêrhyr nare.

³⁹Quê nee côjkwa me pjê krac ri jũa rũm, ampo cator itajê nõ Pahpãm mã me pahkĩnti ita tête ihcahpêrhyr nare.

He nee ampo te Pahpãm mã me pahkĩnti xà ata tête ihcahpêrhyr xà hamreare.

Cu Jeju Crixtô pê me pajõ Pahhiti kam pahte me ajpẽn hônco cwỳrjapê, quê ha Pahpãm mã me pahkĩn rohnỳtti mã.

Pê Pahpãm Juta catêjê mã ampo pej jàhtôa ne cugõ

Roman 3.1-2

¹Ita caxuw wa ha me amã, me ikwỳ pê Juta catêjê pê Ixaher catêjê to, ite amji cajpẽr xà na amji jarẽ. Wa Jeju Crixtô kam ite amji hônco ita kam, wa nee Pahpãm Carõ Pejti kôt ame amã ihêj nare, ne quêt ampeaj kam me amã harẽ. Ne hanea ne icaxwãm pê imã, wa ampeaj kam ame amã amji jarẽn na, imã amji jahkre pej. ²He me ikwỳ pê Juta catêjê pê me ikwỳa kwỳ, ne nee Jeju to amji mã mehhimpej prãm nare ita kam ri, me hũ na ipeacre, ne imã amji kĩn nare. ³Ita kam wa itỳj, pa mencwỳrjapê Pahpãm te icurê mã imẽn ne ito kêanre na, amji to prãm. Ne hanea ne Jeju Crixtô kam ite amji hônco xà ita pê icapa, ne ampỳa mã Pahpãm pê ixãm, quê ijaxà kam me hàhhuc, ne mempej mã me hàr na, imã me to prãm cakrô, mã nee Pahpãm te me to hajỹr nare.

⁴Ỹhỹ, por me ikwỳ pê Juta catêjê atajê ajteare mã me, ne quêt me ipihho te hajỹr he. Pê ramã Pahpãm me to hõ tekjê xà caxuw amji mã me capi, ne me to amji kra, ne me cumãa Carôt jàhcujrohti impejti ata to ajpẽ. Pê hanea quêt Pahpãm ajco Ixaher catêjê mãa amji jarẽ, pê me kampa, ne me ajpẽn pa, ne hanea ne me cumã ihhimpej xà gõ. Ne pê hanea ne Pahpãm me cumã, cute me to amji kam hapac xà to impejti xà to hahkre, ne quêt me cumãa ampo pej jàhtôa to awjahkre. ⁵Ne menquêtjê xakat pê ihtỳj Pahpãm kôt me ipa, atajê pê Aprãw xwỳ me, Ixac xwỳ me, Jaco xwỳ pê Ixaher catêjê xakat. Na ri me ikwỳ pê Juta catêjê pê mehtàmxwỳa to mehtàmxwỳ. Jirôa pê ri Jeju Crixtô pê Pahpãm kra te mehĩa na amji ton, ne cupê mehkwỳa nõ. Na cu ha me cumã, Pahpãm pê ri pjê cunea to ihhimpej catê na to pajàmnãn to me papa. Ampeaj kam!

Pê Pahpãm harkwa to ihcakôc ata na ihtỳj cute amji par

Roman 2.25-29

⁶Mẽr hõhõ, Pahpãm te Juta catêjê to kênre nare, ne me to hõ tekjê. Mã cute me cumã me to Inxũ Cati na amji to hũjahkre xà ata na, nee ajte mehcunea mã ihkĩn, mã ihkôt me ipa nare. Ne hõtpê mencrêre ne ihkôt me ipa. Ita kam, xà ajkĩ Pahpãm te nee me cumã amji ton xà ata na amji par nare? Hãpà! He ihtỳj cute harkwa to ihcakôc xà ata na, cute amji par. Ne mẽr ampo na mã nee mehcunea pê Pahpãm tekjê nare? Nee mã ampo na nare. He Pahpãm te nee amji mã mehcunea capi nare, ne hõtpê me pyxitre ne amji mã me capi. ⁷Ne nee mã Aprãw tàmxwỳ kwỳ cunea pê Pahpãm tekjê nare. Ne mehkwỳa kwỳ pê hõtpê Pahpãm tekjê. Ampo na? He pê Pahpãm Aprãw xwỳ mã:

“He pê akra pê Ixac tàmxwỳ tàmxwỳ kwỳ pê itekjêa to itekjê.

Ne mehkĩnte akra nõ pê Ixamar tàmxwỳ tàmxwỳ kwỳ pê, nee itekjê nare” hane.

⁸Cwỳrjapê ri Pahpãm te amji mã Aprãw tàmxwỳ tàmxwỳ kwỳ capi na, cute amji to hũjahkre xà ata na. Cute amji mã me capi atajê pê ri hõ tekjêa to hõ tekjê. Ne cute amji mã mehkwỳ capi nare, ne amji to hũjahkre nare atajê pê ri, nee me hõ tekjê nare. ⁹Ne pê Pahpãm Aprãw xwỳ mã ihkra xũmre to hũjahkre to hane he:

“Wa ha jũ caxuw hacpỹ ne me awỳr amji jaxà, quê ha Xarakwỳj pê gĩxi mã ihkra xũmre nõ ihpỳm” hane.

¹⁰Hanea na pê Xara mã ihkra xũmre pê Ixac ita ihpỳm, ne ihkà. Ne apu ipa, ne Repecakwỳj me hikwa tuw, ne kam ihkra xũmre cumã ajkrut hiahpuro ne ihpỳm. Ne mam ita japrỳ te Exaw, ne hapu na ita japrỳ te ri Jaco pê Ixaher catêjê quêtti, ne cupê me Juta catêjê xakat. ^11-12Pê Pahpãm Repecakwỳj mã:

“Pom hapu na akra xũmre pỳm ita pê quê ha mam ita jõ pahhi” hane.

Ne pê cormã ihtua kam ajwar me harij, ne nee cormã me ampo kên me, impej nõ ton, pê ahna me hõmpun nare cakrô, mã Pahpãm te amjia kôt, amji mã ihnõ ita capi, ne ma apu ihnõ ita caca. ¹³Ne pê ramã Pahpãm, hõ kàhhôc kam, me ahna amji jarẽn to hane he:

“Jaco ri imã ihkĩn, ne Exaw ri imã kĩn nare” hane.

Hõ, pê cormã ajwar mehpỳm nare kam, pê Pahpãm me ahna amji jarẽn to hane, ne pyxit ne amji mã capi.

Quê ha Pahpãm mã jũm caprĩ to prãm na, quê ha ihtỳj caprĩ

Roman 3.5-8

¹⁴Ne cu ihhêaj to me pahnõ amji mã me pajarkwa to:

— He Pahpãm te amjia kôt amji mã jũm capi, ne ma apu ihnõ ita caca ita kam, imã Pahpãm ita nee catyt kam ipa nare — hajỹr nare. He Pahpãm pejti, ne quêt catyt kam ipa. ¹⁵Na pê rỳ pêa mã Mojxe xwỳ mã amji jarẽn to hane he:

“Quê ha imã jũm caprĩ to prãm na, wa ha itỳj caprĩ.

Nãmri quê ha imã jũm caprĩ prãm nare na, wa ha nee jũm caprĩ nare” hane.

¹⁶Pahpãm te ihtỳj mehkwỳ na amji caxàr, ne ma amehkwỳ caca. He xà ajkĩ me hàpên xà to me hàpên to ipa atajê kôt mã, Pahpãm te me ahna amji caxàr? Nare, xà ajkĩ hũmre ata mã, Pahpãm te ahna amji caxàr na to prãm na mã, cute ahna amji caxàr? Hãpà! He Pahpãm te amjia kôt, hàhcaprĩa kam, me ahna amji caxàr. ¹⁷Ne pê Pahpãm, hõ kàhhôc kam ramã ita na amji jarẽn to hane he:

“Ỹhỹ Paro, itea wa Ejit jõ pjê jõ pahhi na axãm.

Ne ite gũpar nare me, akrã tỳjti na aton.

Ampo na?

He akôt ite mehcunea mã icarôt to ipipẽ xà caxuw, wa ite pahhi na axãm.

Ne akôat quê ha mehcunea, pjê cunea kam me ijahkre pej” hane.

¹⁸Hajỹr xà ita kôt, cu ha me Pahpãm te amjia kôt jũm caprĩ, ne ahna amji caxàr na me hahkre pej. Ne hanea ne amjia kôt, cute jũm caca xàa to amji tête cumã ihkrã to ihtỳj na, me pamã hahkre pej.

¹⁹Ne ca ihhêaj to me anõ ita na icukij to:

— Ne mẽr ampo na mã quê ha Pahpãm jũm mã hũpar nare to, quê ha hũpar nare xà ata kam, jũ mã quê ha ajte Pahpãm te ahna mẽn, mã cute ton ata jahpan xà na, ihkên mã cumẽ? Imãa Pahpãm te jũm to hajỹr xà ita na ihkaj na. Jũ wỳr quê ha ajte jũm, Pahpãm te amji mã ampo na prãm, ne ahna mẽn xà ata kaj na ihnõ to — hane. ²⁰Co he! He nee ate Pahpãm na me amji cukij xà hamreare! Quê ha pjê te pot ata ihcakôc na mã, xà quê ha ajkĩ ihtỳj jũm te ton catê ata mã harkwa to:

— Ampo na mã ate iton to hajỹr? — hane. He cute amji na cute ton catê cukij xà hamreare. ²¹Ne por jũm xũmre pot to ata te ihtỳj pjê ata kam, amjia kôt to ipijakrut ne hipêj xà. Ne ajteare mã ampo pej pit caxuw, ita to impejti ne. Ne ajteare mã cute ampo kên pit caxuw ton ata te, nee cute ton catê na, ihcakôc xà hamreare.

Pê Pahpãm rỳ pêa mã amji mã me pahcapi

²²Ata pyràc pej na mã, Pahpãm te me pahton xà kam, cute me pahto amji kam hapac xà te hajỹar, pom quê pjê te pot to cute amji kam hapac xà he. Ita na mã mehkwỳ to amji kam hapac to impejti, ne mehkwỳ to amji kam hapac xà to kêanre. Ne Pahpãm mã mehcunea mã carôt tỳjti to ipipẽ to prãm, mãr quê mehcunea Pahpãm te ma apu ampo kên caca atajê na, me hahkre pej. Cwỳrjapê ri hàhcaprĩa kam, cute mehkên ton prãmti ton atajê na me hamãr to ipa, ne jũa caxuw mehkên mã me curẽ. ²³Ne hanea ne Pahpãm mã mehcunea mã hàhcaprĩhti na amji to ipipẽ to prãm. Cwỳrjapê ri cute rỳ pêa mã amji mã me pahcapi, ne me pamã carôt tỳjti jàhcujro impejti ata jõr, me papê hũràac to prãm to, na ri ramã cute me pahto impej. Na quê ha mehcunea me pahpupu, ne me Pahpãm pejti na me hahkre pej.

Pahpãm mã mehcahkrit me, me cupê Juta catêjê atajê caprĩ

²⁴Pahpãm te me pahto hõ tekjêa prãmte ri, me cupê Juta catêjê kam cute amji mã me pahkwỳ capi, ne hanea ne mehcahkrit atajê kam, amji mã mehkwỳ capi. ²⁵Pê Pahpãm ramã Hôxêj xwỳ pê harkwa na ihcakôc catê ata jõ kàhhôc kam, amji jarẽn to hane he:

“He por pê mam me cupê me ikwỳ nare atajê, wa ha ita caxuw me cumã:

‘Me ikwỳ’ hane.

Ne pê mam imã mehkĩn nare atajê, wa ha ita caxuw me cumã:

‘Imã me akĩnti itajê’ hane. ²⁶Ne por pê wa pjê ita kam me cumã:

‘Nee me apê me ikwỳ nare’ hane, atajê mã, wa ha ita caxuw:

‘Me apê, ipê me Apãm tĩr rohnỳtti mã ata kra’ ” hane.

Hõhõ, pê Hôxêj xwỳ Pahpãm jarkwa na, hõ kàhhôc kam, mehcahkrit atajê na ihhôc to hane.

²⁷Pê hanea ne Ixaj xwỳ Pahpãm jarkwa na Ixaher catêjê na ihhôc to hane he:

“Ixaher catêjê jàhtô pê ihhêj rũm côxwa jõ pjênxôm jàhtô cakrô, wa ha me pyxitre ne mehkên pê me hũtà.

²⁸Wa ha ipê me gõ Pahhiti, ne pjê cunea kam me hàhtôa te mehkên ton jahpan xà na, me to ihtỳj tu ne.

Ne wa ha me mõr pejti kam, ita cwỳrjapê mehcunea to hajỹr hiahpuro” hane.

²⁹Ne pê Ixaj xwỳ hõ kàhhôc kam, hanea ne ihhôc to hane he:

“Quê ha me hirôa pê me pajõ Pahhiti carôt tỳjti ata, nee me pamã ihtàmxwỳ nõ juwahi nare na mã,

cu ha rỳ pêa mã me papê Krĩhpôc jõ krĩ me, Krĩhcumrãrti pyràac,

ne ramã me pajamre tu ne” hane.

Hõhõ, Ixaj xwỳ te harẽn xà ita kôt, cu ha Pahpãm te amjia kôt jũm capi, ne ma apu ihnõ caca ata na me pamã hahkre pej.

Juta catêjê pyxitre te hõtpê Jeju to amji mã ihhimpej

Roman 10.1-4

³⁰He ca ihhêaj to me anõ me harkwa itajê na icukij to:

— Ampo to mã Pahpãm jarkwa na mehcakôc catêjê itajê ame pamã hahkre to prãm? — hane. Ỹhỹ, cute hajỹr he. Mehcahkrit atajê, nee Pahpãm wỳr me mõr na amji to me hahkre nare cakrô, mã ihtỳj Pahpãm te amji mã me capi. Ampo na? He cute Jeju to amji mã mehhimpej xà ata kôt ri, Pahpãm te me ahna amji caxàr. ³¹Ne Juta catêjê nare. He Mojxe xwỳ te me to ihhimpej xà kôt, ihtỳj Pahpãm wỳr me ipa na amji to me hahkre cakrô, quê nee jũm hỹrmã mõr nare. ³²Ampo na? He Mojxe xwỳ te me to ihhimpej xàa kôt ri Pahpãm wỳr mehkràr, ne nee Jeju to cute amji mã mehhimpej xà kôt, hỹrmã mehkràr nare, cwỳrjapê ri nee hỹrmã jũm cator xà nare. Ampo na? He me cumã Jeju pê Pahpãm wỳr pry kôt kẽnti nõ ata pyràac, na ri pry ita kôt me pra, mã mehtõtõc, mã me ajhu. Pom cu pry kôt me pra ne amji mã me parĩt nare, mã kẽnti me parẽ, ita jĩkjê na mã Juta catêjê ma apu Jeju curê. Ampo na? He nee amji mã me to mehhimpej prãm nare. ³³Pê Ixaj xwỳ jõ kàhhôc kam, Pahpãm ita na amji jarẽn to hane he:

“Wa ha Xijãw jõ hàpkàjti cahê na Krĩpinkrên kam me ikwỳ mehkrĩ atajê wỳr, jũm kujate.

Quê ha cupê pry kam kẽnti catia pyràc ne jỹ, ne pry kôt me pra atajê jàhtôa ne mehtõtõc, quê ha me ajhu.

Hõhõ, quê ha cute me to hajỹr xà ita kam, quê ha me cupê Ixaher catêjê jàhtôa mã ihkĩn nare ne, quê ha ma amehcaca.

Ne quê ha mehkwỳ te amji mã me to ihhimpej catêjê atajê, quê ha ihtỳj mempej mã mehpỳm, ne ampeaj kam hũrên me hakry” hane.

Pê Pawrô ajco Pahpãm mã mehkwỳ pê Juta catêjê cajrẽ

Roman 1.16-17; Carati 3.24-27

¹Ỹhỹ, Jeju kam me ikjêjê. Imã me ikwỳ pê Juta catêjê kĩan to kĩn. Imã Pahpãm te, pom cormã kam me hapac nare atajê mea mã, mehkên pê me hũtàr na me to prãm. Ne wa ijõtpê Pahpãm mã mehcajrẽn to hane he:

— Inxũ Cati, ca ha amji wỳr Juta catêjê pipkjêr na me to, quê me apkjê — hane.

²He ampeaj kam wa me amã harẽ. Cute amji to me Pahpãm cajpuaw prãm to, ihtỳj me cumã amji jõr to prãm, ne cama me cupê, cute me cumã amji jõr xà ata cunea jahkre kêatre, mã ihkaj na ame to. ³Ne me cumã Pahpãm te amji mãa, me cute amji kam hapac xà jikôtti tũmti to ihcuhtac, ne to impej, ne me ahna amji caxàr na, me cupê hahkre kêatre. Ne tee amjia kôt ahte ame amji cuhtac, ne ame amji to impej to me hahkre. Ne ma ame Pahpãm te Jeju kôt amji caxuw me to ihcuhtacti, ne me to impejti xà ata na me to ihcaca. ⁴He ihtỳj Mojxe xwỳ jõ kàhhôc ata kôt, tee ame amji kên tũmti, jikôtti atajê to ihcuhtac, ne me to impej to hahkre. Ne Pahpãm te ramã Mojxe xwỳ jõ kàhhôc ata jaxà kam Jeju Crixtô xãm. Na quê ha cute amji mã me to ihhimpej catêjê atajê catyt kam, Jejua kôt cute amji kam me hapac xà cuhtacti to me ipa, mãr quê Pahpãm hõ tekjêa na me ahna amji capa.

Pahte Pahpãm caca xà intuw ita mã me paxàr xà jahkre kêt nare

⁵Pê ramã Mojxe xwỳ ampo itajê na Pahpãm te amji jarẽn xà na ihhôc to hane he:

“Quê ha jũm te, ite me cumã ijarkwa jirên xà itajê cunea to amji kam hapac to ipa, ne nee jũ caxuw ihnõ to hapac kêt nare na,

wa ha itỳj ahna amji capa, quê ha icahê na ihkrĩ rohnỳtti mã” hane.

⁶Ne jũ wỳr quê jũm ita to, quê nee jũm ton nare. He pê mam Mojxe xwỳ, ma kẽnti na api, pê kẽn po kam Pahpãm cumã harkwa jirên xà atajê cunea na ihhôc, pê cupy ne to wrỳ, ne me cumã cugõ. Ne pê cute amji mã Pahpãm jarkwa to iwrỳc xà ita, cumã ihtỳaj to ihtỳj. Ne ita kam nare. Xà quê ha ajkĩ Mojxe xwỳ cuxà, jũm ma Jeju Crixtô kôt côjkwa wỳr api, ne amji mã to wrỳ, cupê me pahkritxwỳ xà ita caxuw? Hãpà! He ramã amjia kôt me pahwỳr iwrỳc, ne cator. ⁷Ne hanea ne, nee pjê krac ri mehtyc cahê na Jeju Crixtô wỳr jũm wrỳc, ne cute to ihtĩr xà hamreare. Ampo na? He pê ramã Pahpãm to ihtĩr ita kam, quêt nee me pamã pahte me cumã me pahcator xà ita tỳj nare. Ne pê Mojxe xwỳ hanea ne Ixaher catêjê mã:

⁸“He ramã me pahcaxwãm pê me pamã Pahpãm jarkwa na,

me amã hahkre pej” hane.

Ne cu ramã Jeju pê me pahkritxwỳ te me pahpytàr catê na, me to amji kampa, ne amji mã me harẽ. Ne harẽn xà ita to wa hãn ne me cumã harẽn to ipa he:

⁹— Ca ha me anõ te garkwa to gũjarẽn to: “Jeju pê mehcunea jõ Pahhiti” hajỹr, ne acaxwãm pê, ate amji kam gapac xà kam, Pahpãm te hacpỹa mã to ihtĩr na amji mã to hajỹr na, quê ha ihtỳj ampo kên kêanre ata pê apytà, ne ana amji capa — hane. ¹⁰Ampo na? He cu me pahcaxwãm pê Jeju pê Pahhiti to amji mã me pahhimpej na, quê ha ihtỳj Hũm me pahna amji capa. Ne cu ha me pajarkwa to me Jeju jarẽn na, quê ha ihtỳj Hũm Cati pahkên pê me pahpytà. ¹¹Ne pê ramã Ixaj xwỳ Pahpãm jarkwa na, hõ kàhhôc kam, Jeju na ihhôc to hane he:

“Ne por mehcunea Pahpãm te me pamã jũm kujahêc ata to amji mã me hajỹr atajê,

quê ha nee mehkên pê cute me hũtàr nare na, amji na amehcãmjĩ nare.

Ampo na?

Quê ha ihtỳj me hỹrmã cato ne me hũtà” hane.

¹²Ne cute harẽn xà ita ri, pjê cunea kam, mehcunea caxuw impej. Ampo na? He Juta catêjê me, mehcahkrit atajê pê nee ajteare mã, me cupê ajpẽn pê ajropê nare. Ne Pahpãm mã me ipipẽn pit. Ne cupêa ri mehcunea jõ Pahhiti, ne ihtỳj mehcunea te amji tehcajpar xà caxuw, ahna me hàhwỳr catêjê tehcajpar to kryjre nare, ne me to impejti. ¹³Ne pê ramã Jôwer xwỳ Pahpãm jarkwa na, hõ kàhhôc kam, ihhôc to hane he:

“Por ihkên pê cute me amji pytàr xà na me Pahhiti na ahwỳ atajê,

quê ha ihtỳj me amji pytà” hane.

Cute me cumã Jeju jarẽn nare ita kam, jũ wỳr quê amji mã me to hane

¹⁴Ne jũ mã quê ha cormã amji mã me Jeju to hajỹr nare ita kam, cute ihkên pê me amji pytàr xà na ahna me hàhwỳr to?

Jũ wỳr quê me to.

Ne cormã nee cute me harẽn par nare ita kam, jũ mã quê ha me, ne amji mã me to hane?

Jũ wỳr quê me to.

Ne cormã nee cute me cumã harẽn, mã cute me kam hapac nare ita kam, jũ mã quê ha me, ne kam me hapac to?

Jũ wỳr quê me kampa.

¹⁵Ne cormã nee cute me cumã harẽn catê na, me jũm kujahêc nare ita kam, jũ mã quê ha jũm me cumã harẽn to?

Jũ wỳr quê me cumã harẽ.

Pê ramã Ixaj xwỳ Pahpãm jõ kàhhôc kam, me cumã harẽn catêjê to hũjarẽn to hane he:

“Me pamã hũjarẽn pejti to me cator xà ita pyrên ri ame pajakry” hane.

¹⁶Mã Juta catêjê mã me hũjarẽn catêjê cator, ne me cumã Jeju pê me pahkritxwỳ jarẽn xà impejti to me hũjarẽn, mã cute mempar. Ne nee mehcunea te me harẽn par xà ata kôt, amji mã me to hajỹr nare. Ne pê hanea ne Ixaj xwỳ ahna ihhôc to hane he:

“Pahhiti! He ihhêj ne nee jũm te ijũjarẽn xà ita to amji mã hajỹr nare” hane.

¹⁷Hõhõ, cu ha me pahte me Jeju Crixtô pê Pahpãm kra, ne amji to me pahkritxwỳ ita na, jũmjê mã harẽ, quê ihhêaj to me pahkampa, ne por amji mã me ahna prãm catêjê atajê, quê ha ihtỳj to amji mã mehhimpej.

Juta catêjê mã Jeju jarẽn par prãm nõ tũam

¹⁸He xà ajkĩ me cupê Juta catêjê te me Pahpãm kra jarẽn kam me hapac nare na mã, nee cute amji mã me to hajỹr nare? Hãpà! Ihtỳj cute me kam hapac, ne cama nee kôt me amji ton nare. Pê Tawi xwỳ ramã ita to, Pahpãm jarkwa na, hõ kàhhôc kam hũjarẽn to hane he:

“Me hũjarẽn catêjê atajê cakôc xà ata, pjê cunea kam cute me kam hapac xà.

Ne ma pjê jicu xà mã me harkwa ata cator” hane.

¹⁹Xà ajkĩ Juta catêjê te nee me Jeju jarkwa jahkre pej nare cwỳrjapê mã, nee cute amji mã me to hajỹr nare? Hãpà. He cute kam me hapac, ne me hahkre pej, ne me cumã impar prãm nõ tũam na ri, nee cute amji mã me to hajỹr nare. Ne quêt mehcahkrit itajê, ihtỳj amji mã me to hajỹr to me ipa. Ne pê ramã Mojxe xwỳ, Pahpãm jarkwa na, hõ kàhhôc kam, me ahna ihhôc to hane he:

“Ỹhỹ, ipê me Apãm Cati, ne wa ha itỳj jũmjê cahkrit me, krĩxàre krã te amji jahkre kêatre atajê tehcajpa.

Ne wa ha mehtehcajpar xà ata kôt, ca ha ame hũ na mempej mã me hàr ata kĩn, ne me kam me acryc na me ato” hane.

²⁰Ne pê Ixaj xwỳ amji na hàhtàt nare kam me ahna, Pahpãm jarkwa na, ihhôc to hane he:

“Por pê nee ame ijapên nare atajê pê me imã cato.

Ne pê nee ame ina hàhcukjêr nare atajê mã, pê wa amji to ajpẽ” hane.

²¹He pê hanea ne Ixaj xwỳ Juta catêjê na ihhôc to hane he:

“Ne pê amcro cunea kam, Pahpãm tee ajco me cupê Ixaher catêjê jũpar nare, ne ma amehcaca atajê mã ihhêj ne, hũ to apê, ne me cumã hũhkra pẽ, cute amji wỳr me to ipipkjêr prãmte” hane.

Nee mã Ixaher catêjê cunea ame Jeju curê nare

¹Xà ajkĩ Pahpãm ma amehkwỳ pê Ixaher catêjê atajê cunea caca? Hãpà! He pom ipê Ixaher catêjê nõa ita? Ne hanea ne me cuxà, ipê Aprãw xwỳ tàmxwỳ nõa ita? Ne me iquêtti pê Pẽnjamĩ cukwa kam ri, nee Pahpãm te amji pê icaca xà nare ita? ²Pahpãm nee apu cute mam pjê te amji ton pê mã, amji mã mehkwỳ capi atajê caca nare. He me amã, Pahpãm jõ kàhhôc kam, Erij xwỳ pê me cumã Pahpãm jarkwa to ihcakôc catê ata te ahna ihcakôc xà ata jahkre pej. Ne Erij xwỳ te Pahpãm cunaa mã, cumã Ixaher catêjê kôt harẽn to kêanre to hajỹr he:

³“Ijõ Pahhiti, ramã cute me cumã garkwa to mehcakôc catêjê jipej.

Ne hanea ne, ma ame ato amji japackre caca, na ri curi cute me amã ampo to caxàr xà atajê to, cute me hamre tu.

Wa ipyxit peaj ne ijàhhuc, mã ita caxuw ihtỳj me cuxà, ame icuran to prãm” hane.

⁴Mã Pahpãm Erij mã:

“Amãa ri, ca ahte apu apa, ne imã cute hajỹr nare.

Ampo na?

He cormã imã pjê ita kam, me hũmre te mir te xet

wa ite amji mã me capi, ne me huwahi, mã ame ipa itajê,

ma ame hũm cahàc krekà pê Pahar ata caca, ne nee amji mã ame hũpa nare,

ne quêt ikôat ame ipa” hane.

⁵He ita caxuw Pahpãm te amji kam hapac xàa na, amjia kôt, hàhcaprĩa kam me cupê Ixaher catêjê kwỳa kwỳ capi, ne amji mã me huwahi. ⁶He xà ajkĩ cute me hàpên xà impejti ton cwỳrjapê mã, Pahpãm te amji mã me capi? Hãpà. He amjia kôt, hàhcaprĩa kam, cute me capi. Quê ha Pahpãm te me hàpên xà atajê kôt amji mã me capi na, quê ha nee cute amji kam hapac xàa na hàhcaprĩa kam amji mã me capi nare.

⁷Pê Ixaher catêjê amjia kôt, cute me amji kam me hapac xàa na, Pahpãm wỳr me ipipkjêr to prãm, cute me ahna amji caxàr prãmte, ne nee hỹrmã me cator nare. Mã Pahpãm te amji mã mencrêre ne me capi atajê ri, hỹrmã me cator, mã cute me ahna amji caxàr. Mã ihhêj ne mehcahhur cunea japactu, ne nee Pahpãm te me cumã hàkjêr xà ata na, me kam hapac nare. ⁸Pê Mojxe xwỳ me, Ixaj xwỳ, ajwar ahpỹanre na me hõ kàhhôc kam, me ahna mehhôc to hane he:

“Pahpãm te me cupê mehkrã kam, me cute amji kam hapac xà cunea to ihcunĩ ita na,

mã nee ita kam ihhêj ne me Pahpãm kam hapac, ne me hõmpun nare” hane.

⁹Pê hanea ne Tawi xwỳ me ahna ihhôc to hane he:

“Pom hãn ne ampo pry mã mehhêj ne mehpro, ne me curẽ, mã ajhu ita jĩkjê na ri

Pahpãm te, me hõ amji kĩn ata kam mehkên mã me mẽn na, imã me to prãm.

¹⁰Ne imã ate me cupê mehkrã cunea to ihcunĩ na me to prãm,

mãr quê nee ampo kam hapac nare.

Ne imã mehkên xà te me hirô pê ihpỳpỳm tu na,

me to prãm” hane.

Quê ha nee cute me to ihcupan xà itajê me cumã irohnỳtti mã nare

Me Hàpên Xà 13.46; 28.23-28; Epet 2.11-22

¹¹He xà ajkĩ Juta catêjê te ampo to ihcupan xà itajê me cumã irohnỳtti mã? Hãpà. Quê ha ihtỳj jũ caxuw hacpỹa mã Pahpãm wỳr me apkjê. Mã Pahpãm te mehcahkrit atajê wỳr amji to irô, ne mam atajê jicu. Ne mam atajê te to ihcupan xà kôt, mehcahkrit atajê te ampo pej pit na, me amji caxàr. Ata kôt quê ha me cupê Juta catêjê atajê, me hõmpu, ne ame hũ na mempej mã me hàr xà ata kĩn, ne ihhêaj to hacpỹa ne Pahpãm wỳr me apkjê, ne me amji jaxà. ¹²He Juta catêjê te to ihcupan xà atajê jahpan xà na ri, mehcahkrit atajê te Pahpãm pĩn, ampo pej pit hapôj atajê incwỳr. Ne quê ha jũ caxuw Juta catêjê te hacpỹa mã Pahpãm wỳr ipipkjêr, ne me amji jaxàr na, quê ha me hirôa pê Pahpãm pĩn amji mã me ampo pej catia ne me to amcwa.

Juta catêjê pê pĩxô pàr pyràac

¹³Ita caxuw wa ha me apê mehcahkrit atajê mã amji jarẽ. Ipê me amã Jeju jarkwa na iprar catê. Ne ite amji kam ijapac xàa na, imã ijàpên xà ita peaj to impej, na wa xwỳ kam to ijàpên nare. ¹⁴Ne wa Pahpãm wỳr me ato ipipkjêr to imõr xà ita kam, quê ihhêaj to me ikwỳ kwỳa nõ, ame gũ na me apej mã me acjêj xà ita kĩn, ne hacpỹa mã Pahpãm wỳr amji jaxà, mãr quê ahna amji capa. ¹⁵Ne Pahpãm te mehkwỳa kwỳ pê Juta catêjê atajê jicu, ne me apê mehcahkrit atajê wỳr ipipkjêr, ne me ana amji caxàr, na ca hacpỹa mã ajpẽn to me gõ ikwỳ nõ. Na quê ha jũ caxuw me cupê Juta catêjê hacpỹa mã Pahpãm wỳr me amji jaxà, ne ampeaj kam me hakry to hanea, pom quê ihhêj rũm me cupê me hũkjê ty, ne hacpỹa mã me kôt ne mehtĩr, mã hũrên ame hakry ata to, quê ha ame hakry.

Me papê pĩxô pàr jarê pyràc

¹⁶Ita caxuw wa ha me amã ampo itajê kôt harẽn to incri. Quê ha me anõ mã gõ pur kam ampo pĩxô pàr na, xà ca ha ajkĩ harê to pit mã gõ tekjê? Hãpà, ca ha hanea ne ipàr kam ihpa itajê cunea to gõ tekjê. Mẽr hõhõ, he mam me cupê Juta catêjê atajê pê pĩxô pàr jarê ata pyràac, ne me cupê Pahpãm tekjê, ne mehtàmxwỳ itajê pê pĩxô pàr pa atajê pyràac, na ri hanea ne me cupê Pahpãm tekjê.

¹⁷Ne me apê mehcahkrit atajê pê, ihhêj rũm ahkêt kam pĩxô pàr te ihcuhhê, ne cupê jũm te to hõ tekjê nare ata pyràac. Ne por pur kam jũm pĩxô pàr to hõ tekjê ata, quê ha hõ pĩxô pàr ata pa kên nõ jakep, ne cumẽ. Ne ma cute mõr ne ahkêt kam ihnõ xa ata pa jakep, ne pur kam cute hõ pĩxô pàr pa jakep ata wỳr to amji jaxàr, ne cute hakep, ne mẽn ata jaxà kam to caxwỳr. Mã cute ahna impỳn, ne ihkat kam mam harê ata kôt ri, ihtỳj ipicamẽn to mõ. Ita jĩkjê na mã, Pahpãm te me apê mehcahkrit to hajỹar, ne cute Juta catêjê kêanre atajê jicu, ne me ana ipyr ne me haxà kam amji wỳr me gacjên. Ca menquêtjê pê pĩxô pàr jarê pyràcti ata kam, atỳj me apicamẽn to me mõ. ¹⁸Cwỳrjapê ca ha nee me cupê Juta catêjê pê pĩ pàr pa, mã cute me hakep ne me irẽn atajê na ame acakôc kên nare. Ampo na? He cute me hakep xà ata kôt, nee ate amji to me acati prãmte, cute me hakep nare. Ampo na? He me apê pĩxô pàr pa ata pyràac, ne jũ wỳr quê pĩxô pàr pa nõ harê to ihhimpej, ne harê ri quêt ipàr pa cunea to ihhimpej. Cwỳrjapê ca nee jũmjê jaxà kam me gàhhuc ata to amji to ame acati prãm nare.

Pahte Jeju to amji mã me pahhimpej, na ri me haxàr xà kam me paxàr xà

¹⁹Na ca ihhêaj to me anõ imã garkwa to:

— Juta catêjê itajê jaxà kam me ixãm prãmte ri, Pahpãm te me hicu, ne põ mã me cator, wa me haxà kam me ijàhhuc ita kam, mõrmõ ma ramã Pahpãm amehcaca — hane. ²⁰Ne Jeju to cute amji mã mehhimpej nare cwỳrjapê ri, cute põ mã me cator, ca me haxà kam me axàr. Ampo na? He ate Jeju to amji mã me ahimpej, na ri me haxà kam me axàr xà ata to, ca me amji japackrea ne. Cwỳrjapê ca ha nee cute me ato hajỹr xà ata pyrên amji to ame acati prãm to me apa nare, ne quêt cama amji mã me hũpahti to me apa. ²¹Ne por jũm te pĩxô pàr to hõ tekjê ata te ipàr tête kam ihpa kên jakep, ne cute mẽn ata pyràc pej na mã, Pahpãm te Juta catêjê kêanre atajê jicu. Na ca ha me guphêa ne. Ampo na? He nee me apê mam Pahpãm na mehkwỳ pê Juta catêjê atajê nare, ne me apê mehcahkrit. Na ca ha me apê me hũràac, ne me akên xà kêanre nõ to, quê ha ihtỳj me gicu.

²²Ita na cu ha Pahpãm jàhcaprĩhti na me hõmpu, ne hanea ne cu ha, cute ampo kên cwỳrjapê me to kêanre xà na, me hahkre pej. Ne ate Jeju to amji mã me ahimpej catêjê mã ri, ihcunea na Pahpãm pej. Ne ma ame Jeju caca, ne mehkrã kêanre atajê mã ri, hanea ne Pahpãm kêanre. Quê ha cute me acaprĩ kam to incrà ita na, ca ha me apej ita na ame apa. Nãmri quê ha cute me acaprĩ jicu na, quê ha hanea ne, me gicu ne me akên mã me arẽ.

²³Ne quê ha hanea ne Juta catêjê te Jeju caca jicu, ne hacpỹa mã cumã me amji jõr na, quê ha ihtỳj mehkwỳ mã me haxà. Ampo na? He quê ihtỳj Pahpãm ita to hane. ²⁴Me apê mehcahkrit atajê pê ahkêt kam pĩxô pàr pa, mã cute hakep, ne pur kam ihnõ ata kam hãm ata pyràac. Ne me cupê Juta catêjê atajê pê ri, por cute me pĩxô pàr pa jakep, ne me ihnõ mã to hãm xà caprãr ata pyràac. Na quê ha to hõ tekjê ata mã hacpỹa mã ihkwỳ kam hãm to prãm na, quê ha ihtỳj hacpỹa mã ihkwỳ kam hãm. Ampo na? He pĩ pa ata pê ri quêt ihpaa to ihpa. Na ri hacpỹ mã cute kam hãm xà na cumã ihcacure. Ata pyràc pej na, quê ihtỳj Pahpãm hacpỹa mã Juta catêjê kwỳ mã mehkwỳ jaxà. Ampo na? He me cupê mehkwỳa to mehkwỳ, na quê ihtỳj hacpỹa ne mehkwỳ mã me haxà.

Quê ha jũ caxuw Juta catêjê cute me amji kam hapac xà to antuw

Ruc 21.24; Jowãw 10.16; Carati 3.22

²⁵Ỹhỹ me ikjêjê, ca ihhêaj to me anõ te, hahkre kêt kam amji krã kreti na, ate amji cãmjĩ cupate, wa ha me amã Pahpãm te imã ampo to hahkre xà ata jarẽ, ca ha me hahkre pej to impeaj ne. He pê mam, nee jũm ampo itajê nõ jahkre pej nare. He quê ha me cupê Juta catêjê, Pahpãm cuna mã mehkrã tỳjti ita na me to hãmtu nare. Ampo na? He quê ha Pahpãm mehcahkrit atajê te hỹrmã me ipipkjêr atajê cahyt, ne me to hàhtô xà ata mã hahê, ne me hicu. Ne hacpỹa mã me cupê Juta catêjê wỳr apkjê, ne me ahna cupy. ²⁶Ata to, quê ha mehkên pê, me cupê Juta catêjê cunea pytà. Ne pê Ixaj xwỳ ramã Pahpãm jarkwa na, hõ kàhhôc kam, me ahna ihhôc to hane he:

“Quê ha jũ caxuw Xijãw jõ kẽn cahê na Krĩpinkrên pĩn me pahkên pê me pahpytàr catê ata cato, ne Jaco pê Juta pãm ata tàmxwỳ catêjê intête, cute amji kam me hapac xà kên to pôj partu.

²⁷Quê ha Pahpãm me cumã amji jarẽn to hane he:

‘Pê wa rỳ pêa mã me amã ite me akên to pôj xà ata na, me amã amji jarẽa na, wa ramã me atête to pôj to mõ he’ ” hane.

²⁸Ne ita caxuw, cormã me cupê Juta catêjê ma ame Jeju pê mehkên pê me hũtàr catê na me harẽn par caca xà ata to ri, cute amji to me Pahpãm curê xwỳn. Na ri me apê mehcahkrit atajê te Jeju to amji mã me ahimpej atajê pê Pahpãm na mehkwỳa. Ne pê rỳ pêa mã Pahpãm ramã amji mã menquêtjê capi, ne me cumã amji to ata na, cormã to amji japackre. Cwỳrjapê ri cormã cumã mehtàmxwỳ catêjê atajê kwỳ kĩn rohnỳtti mã. ²⁹Quê ha Pahpãm te amji mã jũm capi, ne cute to impejti na amji ton na, quê ha nee jũ caxuw jũm ita to hapac kêt nare, ne ihtỳj to amji japackre rohnỳtti mã. Ne nee cute ahna amji ton xà ata kaj na, ihnõ na to ipintuw nare.

³⁰He pê ramã rỳ pêa mã, me apê mehcahkrit atajê inquêtjê ajco me Pahpãm jarkwa kam hapac nare to me ipa. Na pê ajco nee me caprĩ nare. Ne ita kam nare. Ihtỳj cute me cupê Juta catêjê jũpar nare atajê jaxà kam me acaprĩ, ne me ato amji kwỳ. ³¹Ne quê ha ihtỳj jũ caxuw Pahpãm me cupê Juta catêjê jũpar nare atajê caprĩ to hanea, pom quê cute me acaprĩ he. He Pahpãm te me caprĩ prãmte ri, ihhêj ne amehkên ton to me ipa. ³²He me pahcunea jũpar nare kam ri, Pahpãm te me pahcunea pro, ne ihhêj rũm me pahto me hacjên catêjê pyràac. Ne mẽr ampo na mã cute me pahto hajỹr? Nee mã ampo na nare. He cute me pahcunea caprĩ prãm to ri, cute me pahto hajỹr.

Pahpãm te amji jahkre pejti ita rya to iry

³³Ỹhỹ, ampeaj kam Pahpãm mã hàhcaprĩ ita catia to cati! Ne cumã cute amji jahkre pejti ita rya to iry! Ne me hirôa pê ihkrã kre cati! Ne quê cute ampo to ihhimpej xà na to ihhimpej na, quê nee jũm ihkôt hahkre pej nare. He hũ na cute ton xà ata jahkre kêatre. Quê ha hõtpê cumã hahkre peaj xà na ihtỳj to. Ne jũm mã quê ha ajte, cute amji mã Pahpãm te amji kam hapac xà to, cute amji mã ihhimpej xà atajê nõ kôt hakop ne hahkre pej? Hamreare, he caxuw jũm jamreare. ³⁴Pê ramã Ixaj xwỳ hõ kàhhôc kam, ita to hũjarẽn to hane he:

“Jũm mã quê ha ajte me pajõ Pahhiti mã ihkrã kam, cute amji kam hapac xà ita jahkre pej?

Hamreare!

He nee jũm te me pajõ Pahhiti jahkre pej xà caxuw hamreare” hane.

³⁵Ne pê me iquêtjê nõ japrỳ te Jo ita, hõ kàhhôc kam Pahpãm na ihhôc to hane he:

“Xà ramã ajkĩ Pahpãm te jũm to new xà caxuw, cute cumã ampo jõr?

Hãpà!

He ampo itajê cunea Pahpãm tekjê pit ita kam,

jũ mã quê ne jũm cumã ampo gõ, quê to new?

Hamreare!” hane.

³⁶Hõ, he pê Pahpãm amji mãa, ampo itajê cunea ton partu. Ne nee ihkaj na, iràn xà na, jũm te amjia kôt ampo itajê nõ ton nare. Mã nee hanea ne ampo te, amjia kôt amji ton nare. Ne Pahpãm ri ampo cunea to ihhimpej. Na cu ha amcro cunea kam me pahcunea Pahpãm cati na amji mã me to, me pajũjarẽn to me papa! Ampeaj kam!

Pahpãm ihtỳj me pamã me pahte amji kam me pajapac xà to ipintuw partu

Pirip 4.8-9; 1 Texarõn 4.1-3

¹Ỹhỹ me ikjêjê, pom ramã Pahpãm te ampo jàhtôa na me pahcaprĩ hyre nare ita? Cwỳrjapê wa ate me cumã amji jõr xà caxuw me ana ahwỳ. Ate amji to me Pahpãm cajpuaw xà na, ca ha cumã me amji gõ, ne cumã pit mã ate me gàpên to me apa na, ca ha atỳj amji mã me to cati to me mõ. ²Ne nee ca ha amji na pjê ita kam, Pahpãm curê xwỳn catêjê te mehkên ton catêjê jamãr, quê amji kôt me aton nare. Ne quêt cama amji na Pahpãm jamã, quê amã ate amji kam gapac xà to ipintuw partu. Quê ha me ato hane, ca ha me Pahpãm te ampo pej cunea, kam ampo kên jamreare, ne ihcajpuaw atajê jahkre pej.

³Pahpãm te amjia kôt ito, ite me amã harkwa jarẽn catê ne ahna ixãm. Cwỳrjapê wa ha itỳj me gapackre, ne me ato ihimpej to ipa, ca ha me ikampa. Ne nee ca amji peaj to apej na, amji to ame gàmra nare. He Pahpãm te ri ate amji mã to ahimpej xà ita na cute aton. Na ca me akwỳ, xwỳ kam amji mã me to ahimpej nare, ne me akwỳ kwỳ, cormã kyre pê amji mã me to ahimpej. Ca ha ate kyre pê Pahpãm to amji mã ahimpej na, ca ha nee ahna amji jarẽn to:

— Wa ramã xwỳ kam Pahpãm to amji mã ihimpej to ipa nare — hajỹr nare.

Me papê Jeju jĩa pyràc

⁴Ne me pajĩ pyxit peaj ne kam, ahpỹanre na, me pahcukrã xà itajê mã hàpên xà. ⁵Ita jĩkjê na mã Jeju Crixtô kam pahte me ajpẽn hônco catêjê, ajpẽn kam me pahpyxit peaj. Ne ahpỹanre na me pamã me pajàpên xà ita pê me pajĩ kam ahpỹanre na me pahcukrã xà atajê pyràac.

Pahpãm te ahpỹanre na me pamã me pajàpên xà jõr

⁶Mã Pahpãm te amjia kôt ahpỹanre na me pamã pahte amji kam me pajapac xà te amji jahkre pej jõr partu, ahpỹanre na me pahte cumã me pajàpên xà ton xà caxuw. Na quê ha Pahpãm te harkwa to ihcakôc catêjê na me pahkwỳa kwỳ pyxwỳr na, cu ha pahtỳj cute to ihhimpej xà ata na mehcunea mã harkwa to me pahcakôc to me papa.

⁷Ne quê ha cute me pahte mehtehcajpar catêjê na me pahkwỳa kwỳ pyxwỳr na, cu ha pahtỳj mehtehcajpar to me papa. Ne quê ha cute ampo to me cumã hahkre catêjê na me pahkwỳa kwỳ pyxwỳr na, cu ha pahtỳj me cumã ampo to hahkre to me papa.

⁸Ne quê ha cute, me pahte cumã me hũcanãr ton xà caxuw me pahkwỳa kwỳ pyxwỳr na, cu ha pahtỳj me cumã me apô ne me cumã hũcanãr ton to me papa. Ne quê ha Pahpãm te, me pahte me cumã me hàhcukrêj to me papicokjêr catêjê na me pahkwỳa kwỳ pyxwỳr na, cu ha me pajàhcajrẽn jõxỳ nare kam, me pahtỳj me cumã me to me papicokjêr to me papa. Ne quê ha Pahpãm te me to pahhimpej catêjê na me pahkwỳa kwỳ pyxwỳr na, cu ha pahtỳj me pahkrã kreti kam me pajuphêa rũm me to me pahhimpej to me papa. Ne quê ha Pahpãm te me pahte me caprĩ catêjê na me pahkwỳa kwỳ pyxwỳr na, cu ha pahtỳj me pamã amji kĩan kam ame caprĩ, ne mehtehcajpar to me papa.

Cu ha caxwãm catia mã me ajpẽn kĩn to me papa

Epet 4.25–5.2; 1 Petrô 3.8-12

⁹Ca ha nee apu amji krãhky na me akwỳ kĩn nare, ne quêt caxwãm catia mã amehkĩn to me apa. Ne ma apu amji pê mehkên caca, ne quêt impejti ca me hũnãr to me apa. ¹⁰Por ca Jeju kam ajpẽn to me akjêjê atajê, ca ha me apeaj kam, me ajpẽn kĩn to me apa. Ne amji mã me akjêjê to me catia to me apa, ne ajpẽn cupahti to prãmti to me apa. ¹¹Ne nee ca me gàpên xà kam ame xuwcaca to ame apa nare, ne quêt ampeaj kam me gàpên prãam kam me pajõ Pahhiti mã me gàpên to me apa. ¹²Ne me gakrya kam, Pahpãm pĩn me amã ampo pejti cator xà ata jikaj to me apa. Ne atỳj ampo te me ato jũ mãn xà atajê mã me gũcanãr to me apa. Ne nee jũ caxuw Pahpãm mã me acakôc jicu nare, ne nee me cumã amji cajrẽn jicu nare. ¹³Ne quê Jeju kam ajpẽn to me akjêjê pê ampo jamreare ata me amã, ca ha atỳj me cumã to ajcokjê. Ne atỳj me gũrkwa kam jũa rũm me akjêjê me ipa atajê jamã, quê me acahê na ame ipa.

¹⁴Quê ha cute me ato kên prãmte, ame acapôr to me ipa atajê mã, ca Pahpãm na ahwỳ, quê me to impej, ne quê nee gahpan xà na ame to kên nare. ¹⁵Ne me cumã amji kĩnti atajê cahê na me amã amji kĩnti ne. Ne ame amrã atajê cahê na atỳj ame amrã.

¹⁶Ne me acunea hãn ne me acaca xà na, me acapẽnti to me apa, ne nee ame ajpẽn rên nare. Ne amji mã mehcunea cupa to me apipẽnti to me apa. Ne nee apu amji to me acati prãm to me apa nare. Ne ca ha atỳj me amã ihcunea na me akwỳ pê mehkryjre atajê kĩnti ne. Ne nee ca me hirôa pê amji krã kreti na amji to gàmnãn to me apa nare.

Cu ha nee amji jahpan xà na jũm to kên nare

¹⁷Ne quê jũm ato kên, ca nee amji jahpan xà na to kên nare. Ne mehcunea mã ampo pejti atajê to pit mã gàpên to me apa. ¹⁸Ne quê jũm apu amãn kêanre, ca ha nee amji jahpan xà na cumãn, ne apu cume apijapu nare. ¹⁹Me ikjêjê, quê jũm ame ato kên, ca nee Pahpãm pê gàmtàr, ne amji jahpan xà na ame kam acryc nare. Mãr quê Pahpãm me gahpan xà na ame kam incryc. Ampo na? He ramã Pahpãm te hõ kàhhôc kam me ahna amji jarẽn to:

“He pa wa ha cute ame ato kên atajê jahpan xà na amcwa,

ne ijàmcwỳr xà ita pê ite ame to kêanre xà” hane.

²⁰Ne Pahpãm mã cute mehhôc catêjê te ramã hõ kàhhôc kam, harkwa na ihhôc to:

“Quê acurê xwỳn mã prãm, ca ha atỳj cumã harte, nare, quê cumã kôr, ca ha atỳj ihkõm.

Ampo na?

Ca ha ate to hajỹr na, quê ha cama apu akam ihpahàm, ne cute apu ato kên xà ata jũ na ihpeacre ne, ne nee hipêr amji to cupê acurê xwỳn to prãm nare”

hajỹr xà ata kôt, ca ha to.

²¹Na quê ha jũm te apu ato kên na, ca ha nee amji jahpan xà na apu kam acryc nare, ne cama to impejti ne. Hõ, ca ha ate ita to me hajỹr na, quê ha nee hipêr cupê acurê xwỳn nare, ne cama cupê gõ ikwỳ nõ rohnỳtti mã.

Cu ha pahtỳj amji caxuw me pajõ pahhi kwỳ kampa

Tito 3.1; 1 Petrô 2.13-17

¹Ne ca ha me acunea me cupê pahhi catêjê kam me gapac to me apa. Ampo na? Nee mã ampo na nare. He Pahpãm te ri pahhi na, pahhi catêjê itajê pyxwỳr, cute me ato ihhimpej xà caxuw. Jũ wỳr quê Pahpãm te pahhi na jũm xãm prãm nare kam, quê amjia kôt cupê pahhi. ²Cwỳrjapê quê ha jũm te hõ pahhi par nare, ne ma apu ihcaca na, quê ha ma ramã apu Pahpãm te pahhi xãm ata par caca, ne ma apu Pahpãm caca na, quê ha ihtỳj jũ caxuw amji kên mã amji mẽ.

³He xà ajkĩ catyt kam me ipa catêjê mã me hõ pahhi cupa? Hãpà! Ne por mehkên ton to me ipa atajê mã ri ihtỳj me hõ pahhi cupa. Nãmri quê ha amã gõ pahhi cupa nare to prãm na, ca ha nee apu akên ton to apa nare, ne quêt catyt kam apejti na apa. Quê ha ramã pahhi me apupu, ne me garẽn pejti to me ipa. ⁴He me apejti to prãm to ri, Pahpãm jarkwa kôt pahhi ata hàpên xà ata to apê. Nãmri ca ate akên ton to apa na, ca ha atỳj amji mã pahhi ata te ato kên xà ata cupa to apa. Ampo na? He pahhi ata te ihtỳj akên jahpan xà na me ato kêanre xà. He Pahpãm mã ri pahhi ata apê, cwỳrjapê quê ha ihpĩan ajpên cumã cute akên mã amẽn xà caxuw harkwa cato. ⁵Cwỳrjapê ca ha atỳj pahhi catêjê cunea kampa. He xà ajkĩ Pahpãm te me pahkam incryc, ne ame pahto kên xà ata cupate pit mã, cu ame pahhi catêjê kampa? Hãpà. He ramã pahte mempar xà na me amji jahkre pej.

Cu ha nee ampo to jũm to new nare

⁶Cwỳrjapê ca ha hanea ne pahhi catêjê atajê te Pahpãm krac ri cumã hàpên to me ipa ata jahpan xà na, atỳj hãn ne me cumã gàmjõr to me apa. ⁷Nãmri ca ha me anõ te cormã cumã gàmjõr nare na, ca ha atỳj cumã amgõ. Nare, ca ha ate cumã me gàpên xà na, ca ha atỳj cumã apê. Ne amji mã me hũpahti to me apa, ne amji mã me harẽn pejti to me apa. ⁸Ne ca ha ate jũm to new na, ca ha atỳj cumã amgõ, mãr ca nee ate to new ata na apa nare. Ne ampo ita pyxit peaj, ca ha atỳj me ton to me apa he. Ca ha atỳj me amã ajpẽn kĩnti ne. Ne ate ajpẽn to mempejti to apa xà ata pê ri ihhêj rũm ate me ajpẽn to new. Ca ha ate me ajpẽn kĩnti to me apa na, ca ha ramã me Pahpãm te me amã harkwa jirên atajê cunea kam me gapac to me apa.

Cu ha pahtỳj me ajpẽn kĩn to me papa

⁹Ata pê ramã rỳ pêa mã Pahpãm me pamã harẽn to:

“Ne por ramã me amã me aprõ, ne me amã me apjê atajê,

ca ha nee ahti na me iràn xà na, jũm me ajpẽn caxun nare.

Ne nee jũm curan nare.

Ne nee ajpẽn pê ame gàhkĩj nare.

Ne nee ajpẽn jũ na ame ampo kĩn to me apa nare” hane.

Ne Pahpãm te me pamã harkwa jirên itajê cunea pipẽn pit. Ne ihnõ ita pê ri ihhêj rũm ihcunea pyràc, ata te hajỹr he:

“Ca ha me amã me akwỳ kĩn hanea, pom quê amãa amji kĩn he” hane.

Cu ha pahte ihkôat me ton to me papa na, cu ha ramã ihkôt ihkwỳ cunea ton to me papa. ¹⁰Quê ha jũm mã mehkwỳ kĩn na, quê ha nee jũ caxuw ame to kên nare. Hõhõ, cu ha ame pahkwỳ kĩn to me papa xà ata pê, ramã pahte me Pahpãm te me pamã harkwa jirên xà ata cunea kam me pajapac to me papa xà.

Cu ha Jeju te amji kam hapac xà impejti to me amji tỳj

Epet 5.14-21

¹¹Ne ampo na mã cu ha ame amji to hane? Nee mã ampo na nare. He me pahkwỳa kwỳ, nee hacpỹ ne Jeju te amji jaxàr, ne ampo kên cunea pê me pahto cator xà ita to, me amji japackre nare, ata pê ihhêj rũm ihtỳj cute ame hikwa ne ame hõt pyràac. He me pahpytàr xà jõ amcro ramã ajpên hàhtêp to mõ, cwỳrjapê cu ha me pahte me amji kam me pajapac xà cujrõ, quê apu ampra. He maam pahte Jeju to amji mã me hajỹr xà jõ amcro ata japyre mã ri, ramã cute me pahpytàr xà jõ amcro ajpên hàhtêp to mõ, ne ramã hàhtêp. ¹²Ne caxwa jõ awcapàtkô kam, jũ wỳr ca apu amji mã hamã ne apu mõ. Ne apẽ kam, ca ha atỳj amji wỳr ampo te ato kên xà ata pupu, ne cupê amji pytà. Ita jĩkjê na, quê ha akam Jeju te amji kam hapac xà tuw pejti hamreare, ca ha nee akên catia nõ pê amji pytàr nare. Ne quê ha Jeju me awỳr cato, ne ihtỳj me akên xà catia pê me apytà. Ne mehkêanre catêjê ri hõtpê caxwa ri ame ampo kêanre ton to me ipa, quê ha apẽ, quê ha me ton to hicu. Ne nee me apê cute me hajỹr catêjê atajê pyràc nare, na ca ha me akên ton jicu, ne catyt kam me apa rohnỳtti mã. Ne pom krãhtare ipijapu xà caxuw hàprê xà to amji tỳj, ita jĩkjê na, ca ha Jeju te amji kam hapac xà tuw pejti to me amji tỳj, ne ihkôat catyt kam me apa. Mãr ca ate to ihcupan xà pê me akên catia ata pê me to amji pytà. ¹³Ne catyt kam me pahpahàmti to me papa to me hanea, pom quê amcro jàhcujro kam mehpahàmti to me ipa he. Ne nee ajpẽn kam mare mã amji to ame axy to me apa nare. Ne nee côxỳhti to ame amji to apipãn to me apa nare. Ne nee ame cahãj xyre atajê caxun nare, ne nee ame to apahàm nõ to me apa nare. Ne nee ame apijapu to me apa nare. Ne nee amji jũ na ame ampo kĩn nare. ¹⁴Ne nee ca ha mam ampo kêanre atajê to me amji cajpuaw to prãm to, ame amji kam gapac to me apa nare. Ne quêt me pajõ Pahhiti pê Jeju Crixtô te amji kam hapac xà tuw pejti ita to, cu ha ampo kên cunea pê me amji pytà.

Cu ha pahtỳj ihcunea na ajpẽn na me amji to pôj to me papa

¹Ỹhỹ, he ca ha, por kyre pê cormã Jeju to amji mã mehhimpej atajê, ca ha atỳj me akwỳ kam, ahna me amji capa. Ne nee ame acaca xàa na, ahpỹanre na ame hũn, ne ame ahna xwỳ nare, ne quêt hipêr Jeju kôt me ipicamẽn na, ca mehtehcajpa. ²Ampo na? He ramã me akwỳ xwỳ kam Jeju to amji mã mehhimpej nare, na quê ha ihtỳj me hõ itajê cunea ku. Ne nee me akwỳ kwỳ te me hajỹr nare, ne cormã kyre pê Jeju to amji mã mehhimpej. Na ri ihtỳj me amji mã me hõ to me hàpàn xà atajê cunea cawpa to:

— Jũ wỳr wa ijõ ita krẽ, kôt mã ikam tẽ, nare, quê me ikra kam tẽ — hane. ³Ne por ca atỳj me gõ cunea ku atajê, nee ca ame akwỳ te ihcaca catêjê mãn kên nare, ne aracri me hõmpu. Ne por ca nee ame hõ ata kur nare atajê, ca ha nee kam ate me cumãn xà ata to me curê mã me irẽn nare. Ampo na? He ramã Pahpãm te me ahna amji caxàr. ⁴Ne cupêa ri me hõ Pahhiti, ne nee me apê me hõ pahhi nare. Ne taa mã quê ha mehkwỳ na ihcakôc to kêanre to prãm, ne me to ihcakôc to kêanre, nare, quê ha me to ihcakôc to impejti ne. Me hõ Pahhiti quê ha cute me hàpên to hamãr na me to, quê ha me to hamã, quê ha ihtỳj mempej.

⁵Ne me gakrã kam me akwỳ, ma ame amji mã me amcro kên na me aprã. Ne mehkwỳ ihtỳj me amcro kên me, impej picacwỳr na me harẽ. Ne ita caxuw ca ha ahpỹanre na, ate me amji kam gapac xà jahkre pejti xà atajêa kôt me apa. ⁶Ne me gakrã kam, me akwỳ te Pahpãm to amji japackre xà caxuw, ramã amji mã me amcro capi. Ne me gakrã kwỳ kam, me akwỳ te Pahpãm to amji japackre xà caxuw, ihtỳj me hõ cunea ku, ne hũrên me hakryti na, cumã me amji jarẽ. Ne me gakrã kam me akwỳ te Pahpãm to amji japackre xà caxuw, nee me hõ cunea kur nare, ne ihtỳj me ajcri. Ne me ipijacri xà ata kôt ri Pahpãm te me to impejti na me amji jarẽ.

Cu me pahte Pahpãm cajpuaw prãmte ame papa

^7-8He nee cu amji mãa, me pahnõ apu papa nare. Ne me pahte me Pahpãm cajpuaw prãmte, cu ame papa. Ne nee cu amji mãa me pahnõ pahtyc nare. Ne me pahte me Pahpãm cajpuaw prãmte, cu ame ty. Ne me pahtĩar kam cupê me pajõ Pahhiti, ne hanea ne me pahtyc xà jirô pê, cupêa ri me pajõ Pahhiti. ⁹Ampo na? He me pajõ Pahhiti pê Crixtô tyc, ne hacpỹa mã ihtĩr, mãr quê cupê mehtyc me, mehtĩr jõ Pahhiti. ¹⁰Ita kam, jũ mã ca ha ajte, ne me akjêjê kwỳ te amji kam hapac xà pê ajteare mã ita kôt, ca ame cupê cute to ihcupan catê na me cumã hacjê? Ne me ca, me ca xwỳjê? Jũ mã ca ajte ame, ne me akjêjêa kwỳ to mehkryjre to prãm to ame apa? Hãpà! Ahna cute hajỹr nare! Ampo na? He cu ha jũ caxuw me pahcunea Pahpãm cuna mã me pahcuhhê, quê ha taa me pahcukij xà kêanre ata to me pahcukij, ne me pahkwỳ cukij xà impejti xà ata to me pahcukij, ne ma ajpẽn pê me pahto ajcokjê. ¹¹He pê ramã me Pahpãm hõ kàhhôc kam me pahna amji jarẽn to:

“He ipê itĩr rohnỳtti mã ata catê wa,

na ca ha jũ caxuw me acunea me akryjre na ate me imã amji jarẽn prãmte,

icuna mã me akõn krã na me jỹ, ne me imã: ‘Quêt apê Pahpãam to apê Pahpãm’ ” hane.

¹²Hajỹr xà ita kam, jũ mã cu ha me? Cu ha ahpỹanre na Pahpãm mã pahte amji to me pahhimpej xà atajê me, me pajàpên xà cunea na me amji jarẽn partu.

Cu ha nee me pahkjêjê nõ Pahpãm pê ipictor na hamãr nare

¹³Cwỳrjapê cu ha ajpẽn pê me pajõ me, pahte amji kam me pajapac xà na me pahcakôc jicu. Ne jũ to ca ha quêt me? Ca ha me ate amji kam gapac xà cunea to catyt kam me apa. Ne nee ca me ate amji kam gapac xà kên ton to me apa xà ata to, me akjêjê te cormã kyre pê Jeju to amji mã mehhimpej atajê te mehkên ton na me ton, quê mehkên mã mencjêj nare. ¹⁴Pajõ Pahhiti Jeju kam me pahte amji hônco xà ita kam, ramã pahte me pajõ te me pahto kên xà nare na, hahkre pej pejtu. Nãmri quê ha jũm te amji mã hõ kêanre na harẽn, ne hanea ne Pahpãm mã ihkêanre na harẽn na, quê ha ihtỳj hõ ata cumã ihkêanre ne. Ne cute Pahpãm mã hõ ata kên na harẽn jipy ihkrẽr na, quê ha Pahpãm mã jũm te hajỹr ata kêanre ne.

¹⁵Quê ha me akjêjê nõ te cormã kyre pê Jeju Crixtô to amji mã ihhimpej ata te gõ ata kur na gõmpun, ne amã ihcawpa to:

— Ca ate gõ ita krẽr na ihkaj na — hajỹr na, ca ha nee gõ ata krẽr nare. Nãmri ca ha ate gũpar nare, ne mãnea mã ihkrẽr na, quê ha nee amã akjê ata kĩn nare. Quê ihhêaj to akjê ata akôt hũpa kam cukrẽ, ita na Pahpãm pê me akam ihkaj na. Ne hanea ne Jeju te akjê ata kritxwỳ na amji ton, ne haxà kam ihtyc na, ca to amji japackre. Ne nee gàpàn xà ata cwỳrjapê apê akjê ata Pahpãm pê ipictor na hamãr nare. ¹⁶Quê jũm mã ate ampo ton xà itajê na akam ihkaj na, ca ha hicu, ne nee hipêr ton nare, mãr quê nee ampo pejti ita kên na harẽn nare. ¹⁷Ampo na? He Pahpãm himpej xà nee me pajõ me, me pahkõm xà to amji kam hapac to ipa nare. Ne quêt Pahpãm Carõ Pejti kôt, catyt kam me papa me, me pahcarĩcti kam, me pamã amji kĩnti to ri amji kam hapac to ipa. ¹⁸Ne jũm te Jeju Crixtô mã hàpên xà to hàpên to impejti to ipa to hajỹr te ri Pahpãm cajpuaw. Mã hanea ne mehkwỳ jũm ata jarẽn pejti to me ipa.

Me pamã, nee me pajõ cawpa xà hamreare

¹⁹Cwỳrjapê cu ha ajpẽn kam me pahcapẽn pej pêa mã me papa na, cume amji to prãm. Ne hanea ne pahte me ajpẽn tehcajpar to me papa na, me pahtehcajpar xà ata to, cu ha me. ²⁰Me papê Jeju tekjê catêjê mã, nee me hõ cawpa xà nare. Na cu ha pahtỳj me pajõ cunea ku. Quê nee me pajõ nõ me pahnõ to kên, ne jũm to kên nare. Nãmri quê ha jũm te hõ ata kuar kam amji mã cute mehcawpa xà ata cupa na, quê ha Pahpãm mã jũm ata pê ampo to kên catê. Cwỳrjapê ca ha nee cumã, Jeju wỳr jũmjê incjêj ne cormã kyre pê amji mã me to ihhimpej atajê mã, me akôt me cumã me hõ cunea to hahkre nare. Quê ihhêaj to cute ampo krẽr xà ata kam ihcawpa xà ata to amji japackre, ne cumã hũpa na, quê ha ihtỳj ihkên mã axà. ²¹Na quê ha me pajàpàn xà me, me pahkõm xà me, ampo kwỳ te Pahpãm pê me pahkjêjê kwỳ to kên, ne cupê me to hũjawry na, cu ha mehcunea jicu, ne nee hipêr mehcaxun nare.

²²Quê ha amã gõ cunea kur xà caxuw impej na hahkre pej na, ca ha ate ihkur xwỳjrea na Pahpãm mã ahna amji cajrẽn to hane he:

— Ca ate, ite ampo itajê cunea kur xà na imã ton, cwỳrjapê wa ha itỳj cukrẽ, ne nee ihcawpa xà nõ na to amji japackre, ne apu hũpa nare — hane. Ne nee me akwỳ kwỳ mã ate ihkrẽr xà ita na amji jarẽn nare. Ne aracri amji mã:

— Wa Pahpãm mã ampo pejti itajê pit ton to ipa, mãr quê nee ihkôt ikên mã imẽn nare, ata pyrên ri ijakry — hane. ²³Nãmri quê ha jũm ata te ampo ata krẽr xà ata kam, amji mã ihcawpa to:

— Pỳpỹn, mõrmõ ajkĩ ite ijõ krẽr xà ita na Pahpãm mã ipej, nare, mõrmõ ajkĩ ipej nare — hajỹr jipy, cute ihkrẽr na, quê ha ramã amji kên mã amji mẽ. Hõ, quê ha jũm te Pahpãm jarkwa kôt cute ihkrẽr na amji jahkre pej nare kam ihkrẽr na, quê ha ahna Pahpãm pê kam ihkaj na. Hõ, cu ha amjia kôt, me pahte Pahpãm jarkwa jahkre pej nare kam, ampo ton na, quê ha Pahpãm pê ahna me pahkam ihkaj na.

Cu ha nee pahte amji to amji cajpuw prãm to pit mã me papa nare

Pirip 2.3-5

¹Ne pom cu ramã xwỳ kam Jeju to amji mã me pahhimpej nare itajê, cu ha, pom cormã kyre pê amji mã me to ihhimpej itajê tehcajpa, mãr quê hanea ne me pahcuxà, xwỳ kam amji mã me to ihhimpej nare. Ne cu ha nee pahte amji to amji cajpuaw prãmte ame papa nare. ²Ne quêt ita to cu ha me he. Cu ha pahtỳj me pahkjêjê impejti xà wỳr me mõr na mehtehcajpa, quê me mõ, mãr quê Jeju to amji mã mehhimpej xà to me ajcamẽ. ³Ne mẽr ampo na mã cu ha me ita to? Nee mã ampo na nare. Pê me pajõ Pahhiti pê Jeju Crixtô nee cute amji to amji cajpuaw prãm to, pjê kam apu ipa nare. Ne ihtỳj cute amji pupun xà ata caxuw apu mõ. Pê ramã Pahpãm jõ kàhhôc to hũjarẽn to hane he:

“Inxũ, por cute me acrôn xà kêanre to me acrôn atajê te me ato tojnõ, ne ma iwỳr me ipipkjêr, ne ame icrôn xà kêanre to ame icrô” hane.

Pahpãm jarkwa jõ kàhhôc pê me pamã ampo to hahkre catê

⁴He pê nee Pahpãm ihcaprỳ na mam hõ kàhhôc tũm ata kam harkwa na, ihhôc na me mẽn nare. Ne cute me pahcunea mã ampo jàhtôa to hahkre xà caxuw, pê harkwa kôt hõ kàhhôc ata kam mehhôc. Ne Pahpãm jarkwa ihtỳj ampo kên mã me pajũcanãr na me pahto, ne hanea ne me pajakryti na me pahto. Na cu ha pahtỳj me, por jũ caxuw Pahpãm cahê na ame papa xà ata na, me hikaj. Ampo na? He jũ caxuw cute me pahto catia, mã me papê hũràac xà na me pamã hahkre pej.

⁵Wa ijõtpê Pahpãm mã me acajrẽn to hane he:

— Ỹhỹ me ijõ Inxũ Cati pê Pahpãm, he ca ihcunea caxuw me imã me ijũcanãr xà pê me ijõ katcrà gõ, wa itỳj me awcanã. Ne ma akra pê Jeju Crixtô kam me akwỳ itajê te ajpẽn hônco na me to, mãr quê ihkôat cute amji kam hapac xà pyxit peaj to amji kam me hapac to me ipa. ⁶Ne me harkwa pyxit peaj to me garẽn pejti to me ipa, ne me amã: “Apê me ijõ Inxũ Cati pê Pahpãm, ne apê me ijõ Pahhiti pê Jeju Crixtô Pãm, ne ihcunea na ampeaj kam apej” — hane.

Quê ha mehcahkrit atajê, hanea ne me cupê Jeju na mehkwỳ mã axà

⁷Ne me pajõ Pahhiti pê Jeju Crixtô te me ana amji caxàr xà ita na, ca ha me akwỳ na me amji to pôj to me apa. Hõ, ate me to hajỹr xà ata to, ca ha me amji mã Pahpãm to cati. ⁸He pê rỳ pêa mã Pahpãm ramã me cupê Juta catêjê quêtjê mã cute Jeju Crixtô kujahêc na amji to awjahkre, mãr quê cato ne cupê mehtehcajpar catê. Mã Jeju cator xà ata te, Pahpãm te ampeaj kam to hũjahkre xà na amji par na harẽn. ⁹Ne hanea ne cator xà te, mehcahkrit atajê te Pahpãm jàhcaprĩhti na harẽn na me ton. Ne pê Tawi xwỳ ramã hõ kàhhôc kam, ita na me to hũjarẽn to hane he:

“Ỹhỹ, wa ha mehcahkrit atajê jipôc ri gaprỳ na icrer to impejti ne,

ne wa ha itỳj me cumã ato ijàmnãn to ipa” hane.

¹⁰Ne hõ kàhhôc kwỳ kam hanea ne to hũjarẽn to hane he:

“Me apê mehcahkrit me, me apê Ixaher catêjê pê Pahpãm na mehkwỳ atajê mea mã,

Pahpãm pyrên me gakry!” hane.

¹¹Ne hanea ne to hũjarẽn to hane he:

“Ne por me apê mehcahkrit cunea pê Ixaher catêjê nare atajê,

ca ha atỳj me pajõ Pahhiti to amji mã me gàmnãn to me apa” hane.

¹²Ne hanea ne Pahpãm jarkwa to ihcakôc catê pê Ixaj xwỳ jõ kàhhôc kam, pê to hũjarẽn to hanea he:

“Quê ha jũ caxuw menquêtti pê Jexê tàmxwỳ tàmxwỳ nõ cato.

Ne cupê mehcahkrit atajê jõ Pahhiti.

Quê ha ihtỳj cupê me hõ Pahhiti na amji mã me to ihhimpej to me ipa” hane.

Pê Pawrô pjê cunea kam, mehcunea mã Pahpãm jarkwa jarẽn to ipa

Epet 3.1-9; 1 Petrô 1.12-13

¹³Ne Pahpãm ri pahte me hikaj, mã me pajũcanãr na me pahto, cu me hikaj. Ata kôt imã, cute me amã amji kĩnti me, me acarĩcti jõr na, to prãm, mãr ca nee amji mã ampo cupa nare. Ne hanea ne imã Pahpãm Carõ Pejti carôt kôt me gũcanãr, ne me hikaj xà ata te me amã ipicamẽn to mõr na, me ato prãm.

¹⁴Ỹhỹ me ikjêjê, he me apejti, ne me akrã kreti to atỳj me ajpẽn japackre to me apa na, imã me gahkre pej. ¹⁵Cakrô wa amji mã ijàhkyaj kam, hirãa pê ite me amã ampo itajê na ihhôc, mãr ca me cahyt, ne me to amji japackre. Ne mẽr ampo na wa ite amji mã ijàhkyaj kam me amã ihhôc? Nee mã ampo na nare. ¹⁶He Pahpãm te ito icati, ne mehcahkrit atajê jipôc ri, cute ihcãmter Jeju Crixtô mã ipê cumã ijàpên catê na ixãm. Por pê Pahpãm mã mehcajrẽn catêjê ajco cute amji to me Pahpãm cajpuaw prãmte me cumã ampo gõ, ata jĩkjê na, wa itỳj ite amji to Pahpãm cajpuaw prãmte, hỹrmã mehcahkrit atajê to ipipkjêr to ipa, mãr quê Pahpãm me cumã Carõ Pejti gõ.

¹⁷Ne Jeju Crixtô kam ite amji hônco xà ita kôt ri, imãa Pahpãm mã ijàpên xà cunea impej pit. ¹⁸He xà itea ijàpên xà impejti ita na, amji to ijàmnãn xà caxuw mã, wa apu amji jarẽn to ipa? Hãpà. He Jeju Crixtô te ri ite mehcahkrit te Pahpãm jarkwa kam hapac na itehcajpar, mã cute mempar. Mã cutea, ite me cumã ijũjarẽn xà na iton, ne caxuw imã ite amji jahkre pejti jõr. ¹⁹Ne cute imã Carõ Pejti carôt jõr, mãr wa carôt ata kôt me cumã ampo pihho pejti to, quê me hõmpu, ne me Pahpãm to me amji japackre. Ne ita kam wa ma Krĩpinkrên pĩn, Iririj jõ pjê wỳr imõr xà ata kam, wa itỳj mehcunea mã Jeju Crixtô pê me pahkritxwỳ na harẽn xà impejti atajê cunea na harẽn to mõ. ²⁰Wa ijõtpê, por nee rỳ jũ ri jũm te me cumã Jeju Crixtô pê me pahpytàr catê na harẽn nare ata wỳr, wa ikràr. Ne nee wa ramã jũ ri jũm te me cumã harẽn ata wỳr ikràr nare. ²¹Ne pê ramã Pahpãm jõ kàhhôc kam Ixaj xwỳ ita to hũjarẽn to hane he:

“He por rỳ jũ caxuw jũm te me cumã Pahpãm kra jarẽn nare atajê,

quê ha ita caxuw me kampa, ne me hõmpu.

Ne por rỳ jũ caxuw cute me Pahpãm kra jarẽn par nare atajê,

quê ha me kampa, ne me hahkre pej” hane.

Pê Pawrô Jeju na mehkwỳ pupun prãmte me hỹrmã ihkràr

Roman 1.8-15

²²He wa tee me awỳr ikràr, ne me apupun to prãm. Mã ma ijàpên xà icahpêrkàr to ipa ita kam, jũ wỳr wa apu amji mã hamã. ^23-24Ne rỳ pêa mã, wa caku jàhtôa kam me awỳr ikràr, ne me apupun to prãm, ne hamre, ramã ita caxuw ite pjê itajê kam ijàpên xà jipêj partu. Cwỳrjapê wa ha ma Cra jõ pjê wỳr imõr xà ita kam, wa ha me anaa mõ, ne me apupun to ramã ite amji kam ijapac. Ne wa ha me awỳr icator xà kam, quê ha ampeaj kam me pamã amji kĩn. Wa ame acahê na imõr xà ata kam, ca ha ampo to me itehcajpa, ite to Cra jõ pjê wỳr imõr xà cahhur krã curan xà ata caxuw. ²⁵Ne wa ha xa me awỳr imõr xà ita kam, mam Krĩpinkrên kam Jeju na mehkwỳ atajê tehcajpar prãmte, me hỹrmã icato. ²⁶Ampo na? He Maxeton jõ pjê me, Crec jõ pjê kam Jeju na mehkwỳ pê mehcahkrit atajê te, Krĩpinkrên kam me cupê hamreare atajê tehcajpar prãmte, amjia kôt me imã ihpore to cuprõn, mãr wa curi to icato, ne Jeju na mehkwỳ pê Juta catêjê pê hamreare atajê mã to ajcrà. ²⁷Me cutea ri me ita to me hajỹr to me amji kam hapac. Na ri ihhêj rũm ramã mehcahkrit itajê te, me cupê Juta catêjê to new, na quê ha ihtỳj me amgõ. Ampo na? He pê mam me cupê Juta catêjê itajê, mehcahkrit atajê wỳr, ihtỳj me Pahpãm jarkwa kujahêc to me ipa. Mã me harkwa kôt Pahpãm wỳr me ipipkjêr, ne mempej mã me hàr, ata jahpan xà na ri, hacpỹa ne cute me cumã ampo itajê kujahêc. ²⁸Ne ite curi to icator, ne me cumã me hũhkra kam me hõ pore ata cunea to icahkũm jirô pê mã, wa ha Cra jõ pjê wỳr imõr xà ata jõ pry kôt me awỳr mõ. ²⁹Ne me awỳr icator xà ata kam, quê ha Jeju Crixtô cukwa kam ampeaj kam me pamã ampo pej cunea hàhtô, na ramã imã hahkre pej.

³⁰Me ikjêjê, cu me pajõ Pahhiti pê Jeju Crixtô to amji mã me pahhimpej, ne Carõ Pejti ata kôt ri me pamã ajpẽn kĩn ata kôt, wa me ana ahwỳ, mãr ca icuxà xwỳ kam Pahpãm mã me icajrẽn nare. ³¹Ne cumã me icajrẽn to hane he:

— Me ijõ Inxũ Cati, ca ha Juta jõ pjê kam amji mã me ato ihhimpej nare atajê pê Pawrô pytà. Ne hanea ne cute me akwỳ mã ihpore jõr xà ata kam, quê nee ihpore ata to me amji na ampo kên cãmjĩ, ne amehcaca nare, ne quêt ihtỳj me hakrya kam, ihpore ata na me amji capa — hane.

³²Hõ, ca ha Pahpãm mã me icajrẽn to hane, ne quê ha Pahpãm mã ito hajỹr to prãm na, wa ha icator xà ata kam, quê ha me pamã amji kĩn jakryti ne. Ne pahte me ajpẽn pupun xà ata kam, quê ha Pahpãm ajpẽn pyrên me pajakryti na me pahto. ³³Ne imã Pahpãm pê me pamã me pahcarĩcti jõr catê ata te me acahê na ipa rohnỳtti mã na, me ato prãm. Hamre.

Pê Pawrô me cumã amji jarẽn kujate

Me Hàpên Xà 18.1-3

¹Ỹhỹ, ita caxuw, wa ha me amã hàpà, ne me amã me pahkjê cahãj pê Pepkwỳj kujate, ne me amã ihkôt harẽ. He cupê Ampohy jõ krĩ kam Jeju na mehkwỳ tehcajpar catêjê nõ. ²Na ca ha ahna me amji caxàr to hanea, pom quê ate Jeju na me amji caxàr he. Hõhõ, Jeju na mehkwỳ to pahte amji kam me pajapac to hajỹr xà pit. Ramã cute me hàhtôa tehcajpar, ne hanea ne itehcajpar, na ca ha atỳj ampo to mehtehcajpa.

³Ne hanea ne Prixirakwỳj me Aquira pê mam ajco icahê na Jeju Crixtô mã me apê atajê mã ite me amji jarẽn kujahêc. ⁴Ne pê Jeju jàpên xà kam, cute me itehcajpar xà ata kam, cute amji to mehtyc xà jàhtôa jakren. Cwỳrjapê wa me cumã me hũrên ijakryti na amji jarẽ, ne nee wa ite ahte ijakryti na me cumã amji jarẽn nare. Ne hanea ne me cupê Jeju na mehkwỳ pê mehcahkrit atajê te me cumã hakryti na amji jarẽn.

⁵Ne wa hanea ne Jeju Crixtô na mehkwỳ te me hũrkwa kam me cuprõn catêjê mã, ite amji jarẽn kujahêc. Ne wa hanea ne ite imã ikwỳ nõ kĩnti pê Epet te Axij jõ pjê kam, cupê mam Jeju to amji mã ihhimpej catê ata mã, ite amji jarẽn kujahêc.

⁶Ne hanea ne Marij te ramã me amã hàpên crire nare ata mã, ite amji jarẽn kujahêc.

⁷Ne hanea ne Antrôn me Juna pê me ipyràac, ne me cupê Juta catêjê pê mam icahê na me hacjên xà kam mehcuhhê atajê mã, ite me amji jarẽn kujahêc. Ne me cupê Jeju jarkwa na memprar catêjê na, ramã ite me hõmpun pejtu, ne pê mam ramã icumam Jeju to amji mã mehhimpej to me ipa.

⁸Ne hanea ne, por me pajõ Pahhiti pê Jeju kam, cupê ijõ ikwỳ nõ pê Amprij ata mã, ite amji jarẽn kujahêc.

⁹Ne hanea ne Rupan pê me icahê na Jeju Crixtô mã hàpên catê ata me, me imã ikwỳ nõ kĩnti pê Xaqui mã, ite amji jarẽn kujahêc.

¹⁰Ne wa hanea ne Aperti te mehcunea kam mare mã Jeju Crixtô to amji mã ihhimpej, ne cumã hàpên catia ata me, Arixô me, mehkjêjê mã, ite amji jarẽn kujahêc.

¹¹Ne wa hanea ne Herotãw pê ipyràac, ne cupê Juta catêjê nõ me, Narqui me, mehkjêjê pê Jeju na mehkwỳ atajê mã, ite amji jarẽn kujahêc.

¹²Ne wa hanea ne Tripenkwỳj me, Triponkwỳj pê me pajõ Pahhiti mã hàpên catêjê atajê me, Penxikwỳj pê imã me ijõ ikwỳ nõ cahãj kĩnti te Pahpãm mã hàpên catia ata mã, ite amji jarẽn kujahêc.

¹³Ne hanea ne wa Rupo pê me pajõ Pahhiti mã hàpên catê catia ata me, inxi te ihhêj rũm ito ihkraa, ne ito impejti ata mã, ite amji jarẽn kujahêc.

¹⁴Ne hanea ne, wa Axin me, Precon me, Mecurij me, Patropa me, Herma me, me pahkjêjê cunea apu ihkôt me ipa atajê mã, ite amji jarẽn kujahêc.

¹⁵Ne hanea ne wa Piror me, Jurijkwỳj me, Nerew me, ihtõj me, Orimpa me, Jeju na mehkwỳ cunea cahê na ame ipa atajê mã, ite amji jarẽn kujahêc.

¹⁶Ne me amã ajpẽn kĩan kam me ajpẽn mã me hàpà. Ne ita ri me cupê Jeju Crixtô na mehkwỳ cunea te me amã amji jarẽn kujahêc.

Quê ha cute me pahto ipicapôn prãm atajê to amji na me pajuphêa ne

1 Jowãw 3.10; 4.1-6; Epet 5.6-7

¹⁷Me ikjêjê wa ha cormã me gapackre to incrire ne, ihkàhhôc ita jicu xà kam. Ỹhỹ, ca ha ma amji na, cute me Jeju to, ate amji mã me ahimpej tête me acahpêrkàr, ne ite me amã ampo to hahkre atajê tête me girên ne me ato ipicapôn prãm catêjê to, amji na me guphêa ne. Ne ampỳa mã ame cupê me apa. ¹⁸Ampo na? He cute me hajỹr catêjê, me pajõ Pahhiti pê Crixtô pê ampỳa mã ame ipa, ne nee me cumã hàpên nare, ne amji cajpuaw cute ampo na mehprãmti xà ton to me ipa. Ne me harkwa cakôc xà hêj xi xà picre to, cute me amji jahkre kêatre catêjê mã mehhêj to me ipa. ¹⁹Ne me ca nare, ca quêt atỳj me gũcanãar kam Jeju to amji mã me ahimpej to me apa. Cwỳrjapê ri me apyrên me ijakry pit. Ne imã me ate, me ampo pejti ton na ate amji jahkre pejti na, imã me ato prãm, ne me apê ampo kên ton jahkre kêatre na imã me ato prãm.

Pahpãm kôt me papa xà ita kôt, cu ha Xatanaj tohjê

²⁰Ne Pahpãm pê me pamã me pahcarĩcti jõr catê xakat, ne quê ha me amã me acarĩcti gõ, mãr ca nee ame pahcurê xwỳn pê Xatanaj ata cupa nare. Ampo na? He quê ha me pahcurê xwỳn ata curan pej to hàhtũm nare to hanea, pom ca me apar kàhtỳjti to me cagã krã gã he. Ne imã me pajõ Pahhiti pê Jeju Crixtô te ihcunea na me ato impej na to prãm.

Pê Pawrô cahê na mehkwỳ krĩ atajê me cumã amji jarẽn kujate

²¹Ne Timot pê icahê na hàpên catê ita te hanea ne me amã amji jarẽn kujahêc. Ne hanea ne Ruxô me, Jaxãw me, Xôpat pê me ipyràac, ne hanea ne cupê Jeju na mehkwỳ kam Juta catêjê kwỳa kwỳ atajê te me amã amji jarẽn kujahêc.

²²Ne ipê Tertur pê Pawrô kôt ihkàhhôc ton catê te hanea ne me amã amji jarẽn kujahêc, Jeju jarkwa na.

²³Ne wa Cajo jũrkwa kam ikrĩ, mã hũrkwa kam Jeju na mehkwỳ me cuprõ atajê te hajỹar, ne me amã amji jarẽn kujahêc. Ne Eraxô pê krĩ jõ pahhi mã ihpore jamãr catê me, Jeju kam me pahkjê pê Cwatro te me amã amji jarẽn kujahêc.

²⁴Ne imã me pajõ Pahhiti pê Jeju Crixtô te ihcunea na me ato impejti na me ato prãm. Ỹhỹ, he ampeaj kam.

Cu ha hõtpê Pahpãm to me pajàmnãn to me papa

Epet 3.20-21; Juta 24-25

^25-26Imã me acunea mã, Pahpãm jàhcaprĩ mã me pahtehcajpar na, me ate me hahkre pej na, me ato prãm. Ampo na? Nee mã ampo na nare. He pê rỳ pêa mã Pahpãm Jeju Crixtô pê me pahkritxwỳ na, to amji kampa. Mã rỳ jũ caxuw jũm te, Pahpãm te Jeju Crixtô to me pahkritxwỳ na hahkre pej nare, ne me cupê ipimxur tu. Ne pê ramã rỳ pêa mã Pahpãm jarkwa na, cute mehhôc catêjê ita na mehhôc, ne cute me ahna ihhôc xà ata, pê nee hirã pê hũjarẽn nare, ne harẽn xà incwỳrpê harẽ. Ne ita caxuw Pahpãm tĩr rohnỳtti mã ata te nee to ipimxur nare, ne hirãa pê to ipipẽ xà caxuw, ahna harkwa hyr, mãr quê pjê kam, mehcunea me hahkre pej, ne amji mã me to ihhimpej, ne ihkôat me ipa. Ne Jeju pê me pahkritxwỳ ita to, pê wa Pahpãm jarkwa kôt, me amã icakôc. Ne Jeju to ate amji mã me ahimpej xà ita kam, quê ha Pahpãm ihtỳj me atehcajpa, mãr ca jũ caxuw me hicu nare.

²⁷Ne Jeju Crixtô cukwa kam, quê ha pjê kam mehcunea me Pahpãm pyxit peaj, ne ihkrã krea to ihkrã kre na me hahkre pej, na cu ha me cumã:

— Quêt apyxit peaj ne ampeaj kam akrã kre rohnỳtti mã. Ỹhỹ, he ampeaj kam — hane. Hamre, ijõ kàhhôc ita pit.