MENCRER XÀ

Pahpãm Mã

MENCRER XÀ

Ỹhỹ, pahhi pê Xawrô tyc jakàn pê ri Tawi pê Ixaher catêjê jõ pahhi. Ne pê mam cupê harã catêjê jõ pahhi, ne hanea ne ita caxuw cupê kỳj catêjê jõ pahhi. Ne pê pahhi cunea jirôa pê Tawi mã Pahpãm jahkre pej, na pê ajco Pahpãm mã ihcakôc, ne cumã mencrer xà na ihhôc. Na ri hõ kàhhôc ita japrỳ te Mencrer Xà Jõ Kàhhôc (Mencrer Xà). Ne ita caxuw increr xà kwỳ itajê mã he.

Ampeaj kam me pajakry xà na mencrer

¹Ỹhỹ me ikwỳ, ca hãn ne me icukij to:

“Jũ mã cu ajte ame, ne ame pajakryti,

ne me pamã amji kĩnti ne?” hane.

Ne ite me gapackre xà ita na, me ikampa he:

Ca ha nee mehkrã kên catêjê te me pajapackre xà na,

me amji to pôj nare.

Ne nee mehkrã kên catêjê te amji kam hapac xà kôt,

me amji ton nare.

Ne nee hanea ne,

cute me Pahpãm to me amji japackre prãm nare,

mã cama me ahna xwỳ xi atajê kwỳ mã me acjêj nare.

Ampo na?

Ca ha ate me krã kên kôt me ampo itajê ton to me apa na,

ca ha nee jũ caxuw me amã amji kĩnti nare.

²Ca ha quêt me hane he:

Ca ha atỳj me amã amji kĩan kam,

me amã ihkàhhôc cahyt prãam kam,

me Pahpãm jarkwa pejti ita cahyt, ne ihkôat me apa.

Ne amcro me caxwa cunea kam,

ca ha Pahpãm jarkwa cupahti jõ kàhhôc ita cahyt,

ne ampeaj kam ihkôt me hakop to me apa.

Ne ate ihkôt hakop xà ata kam,

ca ha atỳj me gakry, ne me amã amji kĩnti kam me apa.

³Ne ca ha me apê cô tohkà na pĩxô pàr amji to ajpa ata pyràac.

Por pĩxô pàr hô xà jõ amcroa kam hãn ne hô,

ne ampeaj kam ihrôt,

ne nee jũ caxuw ihhô incrà nare.

Ata jĩkjê na, ca ha Pahpãm jarkwa cahyt ne ihkôt hakop,

ne catyt kam ihkôt apa na,

ca ha ampo cunea to me apê ata,

quê ha ihtỳj ahnaa me amã,

ne nee jũ caxuw me apê ihkôt hamre nare.

⁴Nãmri ca ha ate ma ame amji pê Pahpãm jarkwa curê na,

ca ha me apê mehkrã kên catêjê atajê pyràac,

ne nee me apê pĩxô pàr pejti ata pyràc nare.

Ampo na? He mehkrã kên atajê pê arỳjhy krekà pyràac,

mã ihtỳj kôc mehcarê.

⁵Jĩkjê na, quê ha Pahpãm mehkrã kên atajê kên mã me curẽ,

ne quêt amji mã me to hõ tekjê catêjê juwahi.

⁶Quê ha ihtỳj catyt kam me ipa catêjê atajê jamã,

ne mehkên pê me hũtà.

Ne mehkrã kên catêjê, quê ha mehkĩnte ame to kêanre ne,

quê ha me acto.

Pahpãm te mehkwỳ mã pahhi capi ne hãm na mencrer

¹Ampo na mã amji caprỳ to krĩxàre kôt

ame côjkwa kam Pahhiti pê Pahpãm kam mencryc,

ne cute ame hapu prãmte ame cuprõ?

Jũ wỳr quê ame amji mã hamã.

²Ne ampo na mã me cupê mehcahkrit atajê jõ pahhi kwỳ,

hãn ne Pahhiti te me cumã hõ pahhi xãm ata cuna mã ame cuprõ,

ne ahna ame ajpẽn pa?

Ne me hõ pahhi catêjê me amji to cuprõ,

ne tee ahna me ajpẽn cukij to:

“Jũ mã cu ha ajte me,

ne cute me pahto ihhimpej xà ita pê me pahcato?” hane.

³Ne amji caprỳ to me amji mã:

“Jũ wỳr cu ha me harkwa kôt ame papa!

Ne nee quê ha me cupê me pajõ pahhi nare!

Ne nee cu ha me pahnõ amji mã me hũpa to ame papa nare!

Quê ha pea cute me pahto ihhimpej xà ita caxuw

me cupê me carôt hamre,

na cu ha pahtỳj ame papa” hane.

⁴Mã côjkwa kam Pahhiti,

cute me to ihhimpej xà krĩ xà impejti ata kam jỹ,

ne nee me harkwa ita kam apu amji to hàptõ nare,

ne cama ame ahna acxa, ne ame ahna xwỳ, ne amji mã:

“Me cumã ipar prãm nare catêjê amji caprỳ to ame ijũhhyr prãm,

ne jũ wỳr quê me ito cô, ne me ijũhta” hane.

^5-6Pahhiti te me cumã me hõ pahhi xãm,

mã mehkwỳ ma amehcaca atajê kam ri incryac to incryc.

Na quê ha ihtỳj jũ caxuw incryac kam, ame cumãn kam tẽ,

ne me cumã:

“He itea wa amji mã me gõ pahhi ata capi,

cupê pjê cunea kam me gõ pahhi xà caxuw!

Ne quê ha ihtỳj Xijãw jõ kẽn kam ihkrĩ xà ata kam ihkrĩ,

quê ha pjê cunea kam mehcunea me kampa!” hane.

Quê ha me hũpar nare atajê me kampa,

ne ampeaj kam me cumã hũpaa to hũpa,

ne mehkrã acto tu ne.

⁷Mã Pahhiti te pjê cunea caxuw,

me cumã me hõ pahhi xãm ata te mehkwỳ mã amji jarẽn to:

“Wa ha Pahhiti te ito hũjarẽn xà ata kôt me amã harẽ.

He cute cumã:

‘Apê ikra, ne ita caxuw ipê Apãm Cati.

⁸Na ca ha ate mehcunea to ahimpej xà caxuw ina ahwỳ.

Wa ha amã krĩxàre cunea jahkre ne amã cugõ,

ca ha me to ahimpej to apa, quê ha me akampa.

⁹Ne ca ha acarôt tỳjti ita to me to ahimpej to ihtỳaj to apa.

Ne me hũpar nare atajê, ca ha me to pjê te pot pyràac,

ne cute me amji kam me hapac xà kên mea mã,

me kam acryac kam me gãn partu’ hane”.

Hõ, pê Pahhiti me to hũjarẽn to hane.

¹⁰Cwỳrjapê ca ha me apê pjê jõ pahhi catêjê,

me amji to akrã kre japêa ne me ikampa!

Ne me apê me to ahimpej catêjê cunea, ajco me ikam gapac peaj ne!

¹¹Na ca ha amji mã me Pahhiti cupa to kryjre nare.

Ne ate amji mã hũpahti na cute gahkre pej prãmte,

ca ha cuna mã akõn krã na jỹ, ne cumã amji jarẽn to:

“Wa ha ite amji kam ijapac xà cunea kam,

itỳj ihcunea na akampa” hane.

¹²Hõhõ, ca ha ita to hajỹr nare na,

quê ha ihprõt pê akam incryc pyrentu,

ne ihtỳj akên catia mã amẽ,

ca ha gamre.

Ne por me amji pytàr prãmte,

Pahhiti wỳr me pra atajê,

quê ha quêt ame hakry.

Me pajirôa pê Pahpãm cati cakrô, ihtỳj me pahto amji japackre na mencrer

¹Ỹhỹ côjkwa kam Pahhiti, apê me ijõ Pahhiti.

Ne ampeaj kam pjê cunea kam,

mehcunea mã gaprỳ ita catia to cati, ne impeaj to impej!

Apej cati ita pê ihhêj rũm pyt me côjkwa jàhcujro pyràac,

ne ampo cunea jirôa pê cati ne impej.

²Mã mehcunea acatihti ita na ihtỳj me ana cre,

me ahkrare me, mehkà na kjê kryjre atajê mea mã.

Ca ate me acurê xwỳn mã acarôt tỳjti ita to apipẽ,

mãr quê acuna mã amehcuhhê catêjê atajê cunea carĩcti na me to,

quê mehcarĩc.

He ate me cupê amji tête gàmtàr,

quê nee jũm, jũ mã aton nare.

³Wa hãn ne ate côjkwa ton ita wỳr rĩt,

ne pom pê ca caa putwrỳ me caxêre to,

ne ihkrĩ xàa kam ihkrĩ na me to, mã ihkrĩ atajê pupu.

⁴Wa ampo itajê pupu ne amji mã:

“Pỳhàpà, he Pahpãm kĩnte me ipê me hũmre pit,

ne taa mã ri quêt ampeaj kam cati.

Ne mẽr ampo na mã,

ma me ito amji japackre ne me ijamã?”

Hõhõ, wa amji mã hane.

⁵Pê ca me ijĩa na me ito ixũmre.

Ne ate, cute amji mã me icupahti xà to ate me cumãn to hajỹr,

pom quê amji mã me pahhi cupa he.

Ne apyxit peaj ne me ijirôa pê acati.

⁶Ne ate, ite ampo cunea to me ihimpej xà na me ixãm.

Ne ate ampo cunea ton itajê to ite me ihimpej,

ne hirô pê me icuhhê na me iton.

^7-8Atajê pê carà cahàcti hôhti me, pryti me,

hanea ne ahkêt jõ ampo jàprê itajê me, pryrejara me, tep me,

hanea ne, pom cô kam ampo cunea amji to ajpa itajê cunea jirô pê

me icuhhê xà na,

ate me iton.

⁹Ỹhỹ Pahhiti, apê me ijõ Pahhiti!

Ne ampeaj kam pjê cunea kam mehcunea mã gaprỳ ita catia to cati,

ne impeaj to impej.

Me pahpỳpỳm pêa mã me pahcunea krã kêanre na mencrer

¹Pom me amji mã:

“Pahpãm nee ite amji kam me ijapac xà na,

me ito amji japackre nare” hane.

Itajê krã nare, ne cute amji kam me hapac xà maj pit.

Ne ihcunea na mehkêanre.

Ne nee jũm pyxit ne catyt kam ipa nare.

²Mã côjkwa kam Pahpãm ihkrĩ ne mehkôpĩ,

ne tee apu jũm krã kreti te catyt kam ipa ata japê,

ne nee cute jũm te to amji kam hapac ata mã cator nare.

³Mã mehcunea te me pry cupan,

ne ihcunea na mehcunea kêanre,

ne nee mehnõ pyxitre catyt kam ipa nare.

Ne ampeaj kam ri, nee jũm catyt kam ipa nare!

⁴Ne Pahpãm te mehkrã kên itajê jarẽn to hajỹr he:

“Imãa ihcunea na me cupê amji jahkre kêatre!

Ne ihtỳj cute amji to me ipijapar xà caxuw,

me ikwỳ pê me hàhkĩj to me ipa,

ne nee jũ caxuw ite me to ipijapar xà na,

amji mã me ina hàhwỳr nare” hane.

⁵Ne cute mehkên ton to me ipa xà ata kam,

quê ha ihtỳj jũ caxuw Pahpãm cupate,

amehterteat to amehtertet.

Ampo na?

Pahpãm ihtỳj catyt kam harkwa kôt me ipa catêjê cahê na ipa,

ne ma me hamã.

⁶Mehkrã kên catêjê mã,

ampeaj kam catyt kam me ipa atajê me,

me cupê hamreare catêjê atajê cahpêrkàr prãm,

mã ihtỳj Pahpãm me cupê mempej pytà.

⁷Wa itỳj Pahpãm mã me ikwỳ cajrẽn to hane he:

“Ỹhỹ, ijõ Pahhiti.

Jamã ne ca, ite me ato amji kam ijapac xà jũrkwa ita pĩn,

me ijõ pjê cunea kam,

me cupê me ikwỳ pê Ixaher catêjê te me icurê xwỳn atajê tohjê na,

me itehcajpa” hane.

Ỹhỹ, quê ha ampeaj kam me pajõ Pahhiti te hacpỹ mã

me pampej pêa mã me papa na me pahton na,

cu ha pahtỳj hũrên me pajakryti to me cumã cre,

ne ampeaj kam me pamã amji kĩn.

Pahpãm cahê na mehkrĩ catêjê jõ increr

¹Pahhiti, apê me ijõ Pahpãm!

Mẽr itajê cunea jipôc ri, jũmjê mã ca ha garkwa to:

“Ajpên ijũrkwa wỳr me mõ, ne icahê na ame apa”? hane.

Ne jũmjê mã ca ha garkwa to:

“Ajpên ijõ hàpkàjti pê Xijãw ata na me api,

ne kam me akrĩ, ne ito me amji kampa”? hane.

²Ne cute hajỹr he,

quê ha jũm ihcunea na catyyt kam ipa,

ne hãn ne ihcunea na akam hapac to ipa,

ne ampo pej pit ton to ipa,

ne ampeaj kam caxwãm catia mã, to ihcakôc to ipa ata,

quê ha ma amã axà.

³Ne hanea ne nee amehkwỳ kôt harẽn hêj xi xà atajê jarẽn nare,

ne nee hanea ne mehkwỳ kên mã me irẽn prãm nare,

ne nee jũmjê jarẽn kên cràn to ipa nare ata,

quê ha ma amã axà.

⁴Ỹhỹ ijõ Pahhiti, pom ca ha ma apu jũm kên curê ata,

quê ha hanea ne ma jũm acuxà, apu jũm kên ata curê.

Ne hanea ne, ihtỳj quêt cumã ihcunea na,

catyt kam cute me apar catêjê atajê te amji mã acupahti xà.

Ne quê ha jũm mã cute ampo na, amji to hũjahkre xà ata kam,

ihkên mã hàr cakrô,

ihtỳj cormã cute ahna cumã amji ton xà ata na to,

ata quê ha amã axà.

⁵Ne hanea ne cute me cumã ampo jõr atajê,

quê ha hacpỹ ne cute hõr xà ata na,

taa pit cwa, ne nee hipy kam ihkwỳ mẽn nare.

Ne hanea ne, quê jũm cumã,

cute jũm pejti ata kôt harẽn kêanre to prãmte, cumã ampo gõ,

quê ha nee ahna amji caxàr ne ipyr,

ne hahpan xà na jũm pejti ata kên mã mẽn nare.

Quê ha ma apu ampo jõr xà ata caca.

Ỹhỹ ijõ Pahhiti, he cute me hajỹr catêjê,

quê ha nee akrac ri ampo ihcaxun nare.

Ne quê ha quêt catyt kam acahê na ipa rohnỳtti mã.

Pahpãm te ampo cunea ton atajê me pamã catihti na harẽn na me pancrer

¹Ỹhỹ me ikwỳ,

wa ha me amã ite Pahpãm to amji kam ijapac xà na harẽ.

Cu me côjkwa pupu ita,

ihtỳj hirã pê me pamã Pahpãm catia to cati na harẽ.

Ne Pahpãam te ri kam caxêre me, kam ampo itajê cunea ton.

²Ne cu hãn ne amcro cunea kam,

me pyt japôj xà na me hõmpu, ne amji mã me harẽn to:

“Ampeaj kam ri Pahpãm mã ihtỳj ampo cunea ton xà” hane.

Ne hanea ne cu caxwari côjkwa kam me caxêre me, putwrỳ pupu,

ne hacpỹ ma mã me amji mã:

“Nee Pahpãm mã ampo pyxit ne hahkre pej nare,

ne cumã ampo cunea ton jahkre pej” hane.

³He nee côjkwa kam ampo ihkrĩ itajê me pamã harkwa to ihcakôc nare,

cakrô cu me rĩt ne me hõmpu atajê kôat,

ramã me pamã Pahpãm catia to cati na hahkre pej.

⁴Ne côjkwa kam ampo pejti catihti itajê te amcro me caxwa cunea kam,

ramã pjê cunea kam Pahpãm catia to cati na harẽn cràn.

Ne nee jũ ri me cupê ita jahkre kêatre nare,

ne mehcunea te me hahkre pej xà.

Ne Pahpãm te côjkwa kam pyt mã ihkrĩ xà ton, mã kaam ihkrĩ.

⁵Ne pom cu me pajikwa tuw xà wỳr,

me pamã amji kĩan kam me pahprõ wỳr me pra ita na ri cute,

ne amcro cunea kam, ihkrĩ xà pê hapôj,

ne cumã amji kĩan kam catyatre na ma hàpir to impraar to pra.

⁶Ne me pahnõ imprar tỳjti,

mã ihcuhhê pê cumã ipicahur prãmti, jĩkjê na mã,

hãn ne pyt hapôj pê ma cumã côjkwa cahpêrkàr to prãam kam,

ihtỳj catyatre na ihcahpêrkà.

Ne jũ wỳr quê jũm apu amji mã hamã,

ne cacro pê amji to amxu, quê nee cacro nare.

⁷Ỹhỹ me ikwỳ, pom wa ite me amã harẽn ita jĩkjê na,

cu nee me pahnõ amji mã hamã, ne Pahpãm pê me papimxur nare.

Cwỳrjapê cu ha pahtỳj me pajõ Pahhiti jarkwa pejti,

kam ampo kên nare ata kam,

me pajapac na me amji to prãm.

Ne cute me pajapackre xà ata, ihtỳj me pamã me pahcarôt to intuw.

Ne quê ha me pahnõ pê hahkre kêatre,

quê ha me pajõ Pahhiti te ampeaj kam

me pamã harkwa jirên atajê pictor,

ne ihkôt hamre xà nare atajêa to cumã hahkre,

quê ha hahkre pej,

na cu ha pahtỳj amji mã me to pahhimpej.

⁸Ne me pajõ Pahhiti te me pamã ampo to hahkre xà ata ri

quêt catyt kam ihcuhtacti.

Ne pahte me kam pajapac catêjê ri,

ampeaj kam me pajakry.

Ne cute me pajapackre xà kam ampo kên nare itajê,

ihtỳj pahte ampo cunea jahkre pej na me pahto,

cu me hahkre pej.

⁹Cu ha pahte amji mã Pahhiti cupahti to me papa na,

cu ha kam me pajapac to me papa rohnỳtti mã.

Ne me pajõ Pahhiti ita pê ihhêj xi jahkre kêatre,

ne cumã ampo cunea jahkre pej.

Cwỳrjapê quê ha mehcukij xà jõ amcro kam,

cute jũm pejti na harẽn to:

“Ampeaj kam jũm ita pej” hane.

Ne hanea ne jũm krã kên ata jarẽn to:

“Jũm ita krã kêanre” hane.

¹⁰Ne cu wakỳre prà tepti pê ôr na hĩ jàhwỳrti ata jirôa pê

me Pahpãm jarkwa na prãm.

Ne pen cacô jirôa pê ri Pahpãm jarkwa me pahcajpuaw.

¹¹Ỹhỹ côjkwa kam ijõ Pahhiti pê Pahpãm.

Ate ijapackre xà itajê te ipê ampo kên cunea cawpa,

ne ikên mã ixàr cupate, cute intête ito hũjawry tu.

Ne wa itỳj amji mã acupahti to ipa, ca cormã ita jipy,

hahpan xà na ito impej.

¹²Ne wa hãn ne me to ihcupan xà na

me amji jahkre pej nare kam,

me to ihcupa,

ne hãn ne imã garkwa itajê jahkre pej nare kam,

hirô pê me ipỳpỳm to ipa ata to tojnõ,

ne nee ca hahpan xà na ito kên nare.

¹³Ne hanea ne ite garkwa jirô pê ipỳpỳm,

ne garkwa kaj na ampo kên ton prãmti ata na ijamãr,

wa ton nare.

Ne intête ipê amtà,

mãr quê nee ampo kên itajê ito ihhimpej nare.

Ca ha ito hane, wa ha itỳj amã ipej,

ne nee ampo kên pyxitre nõ ton nare,

ca ha ina amji capa.

¹⁴Ijõ Pahhiti, apê ikên pê itête gàmtàr catê,

na ca atỳj ikên xà cunea pê ipytà.

Imã icakôc xà me,

ite amji kam ijapac xà cunea te acajpuaw na to prãm.

Tawi te amji pupun xà kêanre kam, Pahpãm te ihtehcajpar na hàhwỳr xà na mencrer

¹Inxũ Cati! Inxũ Cati!

Ampo na mã ahte ate irer to hajỹr?

Wa tee ate itehcajpar xà na icagãgãa kam ana ahwỳ,

ca nee ate ipar nare!

Ca ihhêj ne ipê ampỳa mã apu mõ.

²Wa ihcaprỳ na ite amã icwỳr to pyt,

ne ite amã ijàkjêar to apẽ,

ca nee ate imã jũ mãn nare.

Cakrô wa itỳj cormã amã akij,

ne nee wa ha uu ne ijàkjêr jicu nare.

Wa cormã pa xàhte ikrihkrit ita na ikrĩ,

ne ramã ijõt nare na, ina amcro jàhtô.

³Cakrô, wa itỳj ate apejti,

mehcunea na atetetti to Pahhiti krĩ xà catihti ata kam gỹr na,

imã gahkre pej.

Ne Ixaher catêjê cunea acatihti na amji mã me garẽn to me ipa.

⁴Pê me iquêtjê ihtỳj ajco amji mã me ato ihhimpej to me ipa,

cwỳrjapê pê ca atỳj mehkên pê me to acato.

⁵Pê ajco me amã akij,

pê ca ajco atỳj mehkên xà atajê pê me to gapôj.

He nee cute ihcaprỳ na amji mã me ato ihhimpej nare.

⁶Ne mehkĩnte nee ipê me hũmre te ihkên xà pê amji pytàr xà ata nare.

Ne ihhêj rũm ipê ampo cô pyràac, ne icrire, ne icarôt peacre.

Mã mehcunea ame ixũn, ne ma amji tête ame icurê.

⁷Ne ame ipupu atajê cama ame ina xwỳ,

ne ame ina acxa,

ne me imã:

“Gõ Pahhiti ita te ramã amã hikran!

⁸Pom ca ate gõ Pahhiti to amji mã hajỹr ita?

Mẽr ampo na mã nee akên mã axàr xà ita pê cute ato cator nare?

Quê gõ Pahhiti ita mã akĩn na mã,

quê ha rỳ pêa mã atehcajpa,

ne akên mã axàr xà ita pê apytà!” hane.

Hõ, ame ina xwỳ to hane.

⁹Ne cute me ijarẽn to hajỹr cakrô,

pê ca caa, ipỳm pêa mã, ajpên itehcajpar kam tẽ,

ne imã icaca xà gõ, ne icrire naa mã ijamãr kam tẽ,

ne cormã ijamãr to apa.

¹⁰Ne ipỳm pêa mã ri, ipê atekjê,

ne apê ijõ Pahpãm rohnỳtti mã.

¹¹Ne hamre, wa ramã ikêan kam ipa,

na ca nee irer ne ipê gũjawry nare.

Ampo na?

He nee aràn xà na

jũm te itehcajpar xà caxuw hamreare.

¹²Ramã me icurê xwỳn catêjê te me ito kên prãmte me ikrãhtu,

ne me cupê ihhêj rũm

Paxã jõ pjê jõ pryti xũmti jàprêhti te apu ikam imprar atajê pyràac.

¹³Ne me cupê rop tycti hãn ne pryre mã wa japrã,

ne cumã carõrõ,

ne kam intoj ne ihcakê, ne ihcãmxa

ita kôpit na mã,

ihtỳj me ito kên to prãm.

¹⁴Ramã icarôt jamre xà ita pê ihhêj rũm

cô te pjê kam ipijaxwỳr ne hamre.

Ne ajpẽn kam ihi ihcuhhê xà itajê,

ramã apu ajpẽn pê hapôj partu,

ne ihcuhhê xà kaj na apu ihcuhhê.

Ne ina cuhkõnre pê ihhêj rũm

amcro te apu penhê to ihhorhot,

ne ramã ipigãn to mõ.

¹⁵Ne ramã imã kôar to kôr,

ne ijõkre kam ihhêj ne pjê jacrô ne incràre.

Mã ijõhto te ijapto na impỳn ita kam,

ca ihhêj ne ityc na apu icãmjĩ,

ne ihhêj ne ate pjê jacrô ita kam irer.

¹⁶Ne mehkrã kên catêjê te me ito kên prãmte, me ina cuprõn.

Ne me cupê ihhêj rũm rop te apu pryre na cuprõn ne ihkrã,

ne ajpẽn pê ihcyt to ipa atajê pyràac.

Ne ramã cute ame ipê ipar me ijũhkra caxwỳrti.

¹⁷Ne wa icakrô te amji capô, ne ihire ita kam,

quê ha ihtỳj me ihi cunea pupu.

Ne me icurê xwỳn catêjê cama ame ikôpĩr to me ipa,

ne ite amji pupun xà kêanre ita pyrên ame hakry.

¹⁸Ne cute ikà to ajpẽn mã me ipicràn,

ne ihkôt kẽn to ajpẽn pê me hũhkàr.

¹⁹Ijõ Pahhiti!

Nee ca ipê gũjawry nare,

ne apu awjarêa ne itehcajpa!

He apêa ri ikên mã ixàr xà ita pê ipytàr catê!

²⁰Ityc xà ita pê ipytà!

Ne me icurê xwỳn pê me ikwỳ nare pê rop pyràc itajê pê ipytà.

²¹He me cupê ihhêj rũm rop tycti pyràac,

ne me wa te icaxwỳr xà ata pê ipytà!

Ne jũ wỳr wa ahte me cupê ihhêj rũm

pryti xũmti jàprê jĩpàr te icaxwỳr xà ata pê amji pytà!

Ne caa, ca ha atỳj me icurê xwỳn itajê pê ipytà!

²²Ca ha ito hane,

wa ha me ikwỳ cunea mã

ate ikên mã ixàr xà ata pê ito acator na garẽ,

ne itỳj cute me cuprõn xà kam mehcunea mã

apejti na garẽ, ne me cumã:

²³“Me apê Pahhiti kôt me apa catêjê,

ca ha me gõ Pahhiti to me gàmnãn prãmte me cumã:

‘Imã acupa hyre nare, na wa itỳj garkwa kôt ipa!’ hane.

Ne me apê Jaco tàmxwỳ tàmxwỳ atajê,

ate me amji mã Pahpãm cupa prãm to, ca ha me cumã:

‘Apeaj to apej! Ne ampo cunea jirôa pê acati!’ hane.

Ne me apê Ixaher catêjê pê Pahpãm na mehkwỳ atajê,

ca ha Pahpãm to ate me cati prãmte me cumã:

‘Apyxit peaj pê ri me ijõ Pahhiti pê Pahpãm!’ hane” hajỹr.

²⁴Ỹhỹ me ikwỳ,

he Pahpãm nee amji tête

me cupê hamreare atajê curê to ipa nare.

Ne nee cute me amji pupun xà kêanre to

me amji pupun to me ipa atajê to hãn ne hapac kêt nare.

Ne nee me cupê amji to ipimxur to ipa nare.

Na quê ha jũm amji tehcajpar xà na cumã akij,

quê ha ihtỳj jũm ata kampa.

²⁵Ỹhỹ Ijõ Pahhiti, pê wa ikên kam ipa xà ata kam amã:

“Ate itehcajpar jahpan xà na, wa ha itỳj amã ampo gõ” hane.

Cwỳrjapê wa ha cute me cuprõn xà kam,

cute me ato amji kam hapac prãmti atajê cunea kam mare mã,

amã ite ampo na amji ton xà ata to.

²⁶Ne wa ha mehcunea mã amji kĩn nõ to,

ne me cupê hamreare atajê mã harte.

Quê ha me cumã akĩn atajê me amã:

“Mehcunea jirô pê apej ne acati” hane.

Na quê ha hõtpê amji to ipijapar pej rohnỳtti mã.

²⁷Ỹhỹ me ikwỳ,

quê ha pjê cunea kam krĩxàre Pahpãm to amji kampa,

ne to amji japackre.

Quê ha jũa ri amehkrĩ atajê,

ihtỳj Pahpãm wỳr me apkjê.

Ne quê ha ampo kra cunea me hõmpun xà ata kôt,

Pahpãm to cute amji kam me hapac prãmte me cumã:

“Apêa ri me ijõ Pahhiti,

na ri mehcunea jirôa pê me imã me akĩn” hane.

²⁸Pahpãm pê me pajõ Pahhiti,

ne cupê pjê kam mehcunea to ihhimpej catê,

ne ihtỳj ampo kra cunea to ihhimpej.

²⁹Ne cute amji to me cati prãmti atajê,

quê ha ihtỳj cuna mã mehpỳpỳm,

ne mehkryjre na cumã me amji jarẽ.

Ne cu me pahcunea me pahtyc to mõ atajê,

quê ha Pahpãm cuna mã mehkõn krã na me jỹ ne me cumã:

“Wa itỳj amji mã me acupa” hane.

³⁰Na quê ha mehtàmxwỳ tàmxwỳ ihtỳj amji mã me hũpa,

ne me kam hapac to me ipa,

ne ihtỳj mehkra mã me Pahhiti jarẽn to me ipa.

³¹Quê ha me kampa,

ne hanea ne cormã nee mehpỳpỳm nare atajê mã me harẽn to:

“Me pajõ Pahhiti pê Pahpãm

pê ajco mehkwỳ kên mã mencjêj xà atajê pê me hũtà” hane.

Pahpãm pê me pajamãr catê impeaj na mencrer xà

¹Ihhêj rũm ipê carà cahàcre hôhti pyràac,

mã Pahpãm pê ijamãr catê.

Cwỳrjapê ri nee ipê ampo jamre nare.

²Ne pom carà cahàcre hôhti jamãr catêjê

cama hõ ahtu kukũmti rericre kam hikwa na hamã,

mã kam hikwa,

ita na mã Pahpãm ito,

ne ihtỳj imã ite ijikwa ne ikôt xà ita gõ.

Ne pom carà cahàcre hôhti jamãr catêjê cô pinkrinti wỳr,

hõ carà cahàcre hôhti to ipa, mã to ikõ,

ita na mã ihhêj ne Pahpãm ito,

ne ihtỳj ite amji kam ijapac xà kam ikrihkritti ita to imã ihcarĩc,

ne imã to ankrê.

³Ne hõtpê imã, ite amji kam ijapac xà to intuw.

Ne carà cahàcre jamãr catêjê hãn ne pry cuhtacti kôt

catyt kam ipa na to,

mã ihkôt ipa,

ita kôpit na mã, Pahpãm catyt kam ite ipa na ito ipa,

mãr wa ampo pej pit ton to ipa.

Hõ, pê cute ijamãr na amji to awjahkre ata na mã ijamãr to ipa.

⁴Ỹhỹ ijõ Inxũ Cati,

pom hãn ne carà cahàcre hamãr catê cãmtà rũm,

nee cumã awcapàtkô cupa nare,

ita na mã ite.

He apê ijamãr catê,

ne wa itỳj akôt cormã caprũm kôt

ityc xà jõ awcapàtkô jakren to ipa.

Ne ca icumam apa ita kam ri, acãmtà rũm,

nee imã ampo kên te icuran xà ata cupa nare.

Ne pom carà cahàcre jamãr catêjê hõ parxare jamãr caxuw,

hõ kôtàre incwa ne to ipa,

mã curê xwỳn hỹrmã hapôj,

mã kô ata to ihcura,

ita na mã ate, ne ramã ate icurê xwỳn catêjê caxuw

amji mã gàhcuprõn hiahpuro.

Mã ihhêj ne, gõ kôtàre ma icurê xwỳn pê itête hàmtàr to ipa.

Ne ca hanea ne gõ pĩcajrer ita to, prya kôt icapôr to apa.

Na ri ate ijamãr xà ita pyrên,

imã amji kĩnti.

⁵Ne pom carà cahàcre jamãr catêjê,

hãn ne ampo pê curê xwỳn atajê cunea jipôc ri cumã harte,

ita kôpit na mã,

ca ate cute me icurê xwỳn catêjê kam mare mã,

gàpàn xà wỳr ijator.

Ne ate ijator ita kam,

quê nee me icurê xwỳn itajê nõ jũ mã iton nare.

Ca hãn ne ina amji tohpôj to hanea,

pom quê hãn ne me catia na me amji tohpôj he.

Ne gõtpê ikõm xà kam

imã ampo cacô impejti ata to hipu tu, mã ajxwỳ,

ca imã agõ.

⁶Ne quê ha amã ikĩnti itaa na, imã gahkre pej.

Na ca ha imã gàhcajrẽn to axãm itaa na, wa ha ahnaa ty,

ne itỳj gũrkwa kam amji to ipijapar rohnỳtti mã.

Cu ha Pahpãm mã pahte me to kên xà na me amji jarẽ na mencrer

¹Ỹhỹ me ikwỳ!

Ampo pyrên cu ha ame pajakry?

He Pahpãm te me pamã, por pahte harkwa jirô pê me pahpỳm,

ne ihkaj na me pahkên xà ton atajê jicu,

ne to tojnõ ne ihhur ata pyrên,

cu ha ame pajakry.

²Por Pahpãm te ampo kên ton atajê na

me pajarẽn kên nare atajê pyrên,

cu ha ame pajakry.

Por me pahcaxwãm pê

me pahte amji kam me pajapac xà hêj xi nare atajê pyrên,

cu ha ame pajakry.

³Ne pê wa cumã ite ikên ton xà to icakôc nare ri mã,

ajco amcro cunea kam icwỳr to amji pectu, ne ipeacre.

⁴Ỹhỹ, ijõ Inxũ pê Pahpãm,

wa itỳj ite ikên ton jahpan xà na,

ajco amcro me caxwa cunea kam ate ito kên xà atajê cajpẽ,

ne ramã ipê icarôt jamre to mõr te hajỹar,

pom quê pyt cacro atàr to incrà to ipa he.

⁵Jicu xà kam, pê wa amji mã:

“Wa ha Pahpãm mã ite to kên na amji jarẽ” hane.

Pê wa amã ikên xà cunea na amji jarẽ.

Ne nee pê wa ite ampo kên ton xà atajê nõ to apê ipimxur nare.

Ne ite amã ihcunea to icakôc xà ata kam,

pê ca ampo to ite ato kên atajê cunea to tojnõ, ne hicu.

⁶Ne por mehcunea mã akĩn,

mã amji mã me ato ihhimpej atajê te ri,

ihtỳj me amã amji cajrẽn to ipa xà.

Mãr quê jũ caxuw me hỹrmã ampo kên catia te cator xà ata kam,

nee cute me amã amji cajrẽn catêjê wỳr cator nare.

⁷He apêa ri ito apimxur catê.

Ca ampo kên atajê cunea pê ito amxu ne itête amtà.

Wa ate itête me cupê gàmtàr xà ita pyrên ijakry to

kỳj cati pêa mã, amã cre.

⁸Ỹhỹ me ikwỳ, Pahpãm te me pamã amji jarẽn to:

“Wa ha jũ ri me amõr xà ata jõ pry to me amã hahkre,

ca ha ihkôt me mõ.

Wa ha pa me gapackre, ne me gamãr to mõ.

⁹Na ca ha nee me apê cawrô me,

cawrô cahàcre jũpar nare atajê te mempar prãmte,

mehkrã na hê,

ne jũ kam me to mõr xà ata wỳr

mehkjên to me ipa atajê pyràc nare” hajỹr.

¹⁰Ỹhỹ me ikwỳ, ampeaj kam ri,

mehkên catêjê hãn ne me amji pupun kên to ihkryjre nare.

Ne quêt me Pahpãm to amji mã mehhimpej catêjê atajê ri,

Pahpãm te me to ihhêj rũm pryjara pyràc,

ne ma mentête hara to kwỳc to ipa ita na,

ampo kên atajê cupate.

Ne ihtỳj hàhcajrẽan kam, cumã mehkĩan kam,

mentête hàmtàr to ipa.

¹¹Ne pom ca me acunea catyt kam me apa atajê,

me acunea me gakry!

Ne Pahpãm te me ato impejti xà atajê pyrên

hanea ne me amã amji kĩan ne!

Pom ca me amji mã kam gapac pejti,

ne catyt kam me apa itajê,

me gakrya ne,

ne pom me gakryti itajê to, me cumã cre!

Pahpãm to hàmnãn na mencrer

¹Ỹhỹ me ikwỳ, por ca me acunea catyt kam me apa atajê,

Pahpãm pyrên me gakrya ne.

Mempejti catêjê te me Pahpãm mã catihti,

ne impejti jarẽn xà ri quêt ahnaa.

Na ca ha atỳj me cumã cati ne impejti jarẽ.

²Ca ha Pahpãm mã catihti ne impejti jarẽn xà ata kam,

atỳj me cumã cre ne me gàkôr xà cakô,

ne cumã cuhkõnre cakô.

³Ne Pahpãm mã me acrer xà intuwti to

kỳj cati pêa mã, me cumã cre,

ne cuhtõj cajrõn pejti ata to,

ca ha me gakryti to me cumã cre.

⁴Ne mẽr ampo na mã cu ha me to hajỹr to prãm?

Nee mã ampo na nare, he Pahpãm jarkwa pê ri quêt,

ampeaj kam, ne catyt kam,

ne quêt cute ampo cunea ton xà na,

ihtỳj amji jarkwa na amji kampa.

⁵Ne Pahpãm mã, pjê kam mehkrĩ atajê cunea kĩn,

mã me hamãr to impejti.

Ne cumã ihtỳj catyt kam me ipa atajê kĩn,

ne catyt kam, cute mehkwỳ to amji kam hapac na

cumã me to prãm.

⁶Pê Pahpãm ihcakôc xàa to, cama ihcakôc,

ne ramã côjkwa to,

ne kam caxêre me ampo cunea ihkrĩ atajê to.

⁷Pê Pahpãm côxwa cunea to cuprõ, ne hỹr xàa kam hỹr,

mãr quê hàhhuc tu rohnỳtti mã.

^8-9Pê cama Pahpãm pjê ton xà ata to cumã ihcakôc,

pê ramã pjê amji to,

ne ampo cunea te amji ton xà na cumã harkwa,

pê ramã ampo cunea amji to.

Na ca ha pjê cunea kam me akrĩ itajê,

ate atỳj amji mã me Pahpãm cupa xà.

He me pahcunea mã,

pahte amji mã me Pahpãm cupahti kam

me cumã amji jarẽn xà.

¹⁰Ne mẽr ampo na mã pahte me to hajỹr xà?

Nee mã ampo na nare.

Pahpãm ihtỳj krĩxàre te me ajpẽn par xà kêanre atajê to

me cupê hamre,

mãr quê nee ihkôt me ampo kên ton to me ipa nare.

¹¹Ne quêt Pahpãm te ampo na amji ton xà ata ri,

nee ihkôt hamre xà nare,

ne ihtỳj quêt cute ahna amji ton xà, ne ahna to hãm ita na.

¹²Pê Pahpãm cute me pahto hõ tekjê xà caxuw

amji mã me pahcapi,

na ri hũrên me pajakryti.

He ampeaj kam quê ha jũ ri, krĩ nõ kam,

Pahpãm to amji mã me hõ Pahhiti,

ne por toa amji mã mehhimpej atajê,

quê ha ihtỳj hanea ne me hakry.

¹³Ne ampo na mã

cu ha cumã cati me impejti to cumã me cre?

Nee mã ampo na nare.

Côjkwa pĩn Pahhiti pjê kam mehcunea mehkrĩ atajê cunea pupu.

^14-15Ne cutea ri me pamã pahte amji kam me pajapac xà ton,

ne ihtỳj pahte me ampo cunea ton atajê na me pahpupu,

ne kam amji kampa.

Ne ihtỳj ihkrĩ xà ata pĩn pjê kam,

por mehcunea mehkrĩ atajê pupu,

cwỳrjapê cu ha pahtỳj me cumã cre.

¹⁶Ne mẽr ampo na mã cu ha me cumã cre?

Nee mã ampo na nare.

Jũ wỳr quê Pahpãm krãhtare jõ pahhi tehcajpar nare kam,

quê apu amji mã hamã, ne curê xwỳn tohjê.

Ne quê ha tee krãhtare pahtỳj cakrô,

quê Pahpãm cumã carôt jõr nare,

quê nee ihtyc xà ata jahpan nare.

¹⁷Quê me pamã cawrô carôt tỳjti cati cakrô,

jũ wỳr quê Pahpãm ihtehcajpar nare kam,

quê cawrô ata me pahcurê xwỳn pê me pahpytà.

¹⁸Ne Pahpãm ihtỳj quêt amji mã me hũpahti atajê jamã.

Cu ha me Pahpãm jàhcaprĩa kam,

cumã me pahkĩn rohnỳtti mã ata te,

me pahtehcajpar xà na aracri me hikaj,

quê ha ihtỳj me pajamãr to ipa.

¹⁹Ne quê ha ihtỳj pahte me pahtyc xà jahpan na me pahto,

cu ha me hahpa.

Ne prãm catia te cator xà ata kam,

quê ha nee prãm ata te me pajipej na hamãr nare.

Ỹhỹ me ikwỳ,

cu ha Pahpãm te me pahto impejti itajê cunea pyrên

me pajakryti na cumã me amji jarẽ,

ne cumã me cre to hane he.

²⁰“Ỹhỹ me ijõ Pahhiti, apê me itehcajpar catê,

ne apê ampo kên pê itête gàmtàr catê.

Na wa itỳj aracri ahna me gikaj to me ipa ita na.

²¹He apyrêan ri me ijakryti.

Na wa itỳj apejti ita to amji mã me ihimpej to me ipa.

²²Ne wa itỳj cormã aracri me gikaj to ipa ita kam,

ca ha gàhcaprĩa kam, amã me ikĩn ita na” hane.

Mehkrã kên mehkên mã me acjêj, ne mehkrã pej mempej mã me acjêj na mencrer

¹Ỹhỹ me ikwỳ,

nee ca mehkrã kên catêjê jũ na ame akrihkrit to me apa nare.

Ne nee ame hũ na cute mehkên ton atajê kĩn nare.

²Ampo na? He me cupê ahtu te êê ne apu incrà pyràac,

quê ha me ahna ahtũm nare quê ha me hamre.

He ampeaj kam ri me cupê põre pit,

na quê ha ihtỳj me hamre tu.

³Ca ha côjkwa kam me Pahhiti pê Pahpãm to amji mã me ahimpej,

ne me ampo pej pit ton to me apa.

Mã cute me amã pjê jõr, ca kam me akrĩ,

mã kam me atête ampo kên pê amtà.

Ne ca ha hàmtàr xà ata kĩan kam, kam me akrĩ.

⁴Ca ha Pahhiti cukwa kam,

me amã amji kĩnti kam me apa na,

quê ha ihtỳj me amã,

ate amji mã me ampo na prãmti xà atajê cunea gõ.

⁵Ne ca ha Pahhiti mã me ate amji kam me gapac xà cunea gõ,

mãr quê taa, ate amji kam me gapac xà to ihhimpej.

Ne ca ha ate amji mã me to ahimpej to me apa na,

quê ha me ato impejti to hane he.

⁶Pom quê pyt hapôj mã mehcunea me hàhcujro pupu,

ita jĩkjê na,

quê ha Pahhiti mehcunea te me apupun na me to,

mãr quê cutea me ana amji caxàr na me gahkre pej.

Ne me pahkrã jimoc kam pyt ihkrĩ, mã me ihprà pupu,

ita jĩkjê na,

quê ha Pahhiti ihtỳj mehcunea te catyt kam me apa na,

cute me gahkre pej na me to,

quê ha me gahkre pej.

⁷Na ca ha aracri, amji mã me aprĩa kam,

me Pahhiti te me atehcajpar xà na me hikaj.

Ne quê mehkrã kên catêjê

hãn ne me ampo kên ton to me ipa xà ata kôt,

amji to me cati to me ipa,

ca ha nee me hũ na ame akrihkrit to me apa nare.

⁸Ne nee ca ame kam acryc, ne me kam acàcàc nare.

Ne nee ame hũ na ame akrihkrit nare.

Ampo na?

Ca ha ate, cute me ampo kên ton ata kam akrihkrit na,

quê ha ihtỳj ate ampo kên ton wỳr ato mõ.

⁹Ne quê ha Pahhiti mehkrã kên atajê

mõr pejti kam, me to hamre hiahpuro.

Ne por ca quêt

me Pahhiti te mehkên mã me hàr xà pê

me hũtàr xà na me hikaj atajê,

quê ha ihtỳj cute pjê to me cumã hũjahkre ata kam

me amji to ajpa.

¹⁰Ne quê ha mehkrã kên atajê na ahtũm nare,

quê ha me hamre partu.

Ca ha tee ame hapê, ne nee hipêr me jũm mã acator nare.

¹¹Ne quêt cute amji to mehkryjre prãm atajê,

quê ha ihtỳj cute pjê to me cumã hũjahkre ata kam me amji to ajpa.

Ne curia, quê ha mehcarĩcti kam,

nee amji mã me ampo kên cupa nare kam me ipa.

¹²Ne mehkrã kên catêjê tee cute catyt kam me ipa itajê to kên prãmte,

ahna ame ajpẽn kampa.

Ne ihtỳj me kam incryac kam ame wa gyj to me ipa.

¹³Ne Pahhiti mã ramã mehkrã kêanre atajê jamre xà jõ amcro jahkre pej,

na ri cama ame ahna acxa.

¹⁴Ne ramã mehkrã kên catêjê te me hõ wapo xwahhihti tohpôj,

ne ramã me hõ cuhê na cute ame amji cohe,

cute me cupê hamreare atajê me,

catyt kam me ipa atajê jipej prãmte.

¹⁵Cakrô, quê ha nee me to hajỹr nare.

He quê ha me hõ wapo xwahhihti atajêa

me ahna cuhkõnre japôc, ne me hõ cuhê itajê,

quê ha hanea ne me cupê impàt pa.

¹⁶Pahpãm mãa, catyt kam me ipa itajê pê ampo crêre atajê ri,

mehkrã kên mã ampo jàhtôti itajê jirôa pê impej.

¹⁷Ampo na?

He quê ha Pahhiti mehkrã kêanre atajê pê me carôt to hamre,

ne quêt catyt kam me ipa atajê,

quê ha mehtehcajpar to impeaj ne.

¹⁸Quê ha Pahhiti amcro cunea kam,

catyt kam me ipa atajê jamãr to ipa,

quê ha ihtỳj cute me cumã pjê jõr xà ata kam,

amji to me ipijapar to me ipa rohnỳtti mã.

¹⁹Ne quê ha me hỹrmã ampo kên catia te cator xà ata kam,

quê ha nee me to hamre nare.

Ne quê ha me hỹrmã prãm catia cato,

quê ha ihtỳj me cumã hõ.

²⁰Ne mehkrã kêanre catêjê,

quê ha me acto tu.

Ne Pahhiti curê xwỳn atajê,

quê ha me cupê põ kam pĩrã pejti atajê pyràac,

ne êê ne me hamre.

Ne me cupê cuhy kũm te apu hamre pyràac,

ne ma jũ kam me acto.

²¹Ne mehkrã kên catêjê hãn ne mehkwỳ pê ampo cwa,

ne nee hacpỹ mã me hõr na me amji to hũjahkre ata na,

me amji jarkwa par nare.

Ne quêt catyt kam me ipa catêjê ri me hàhcajrẽan kam,

ampo to mehkwỳ tehcajpar to me ipa.

²²Pahhiti te mehkrã kam harcô mẽn atajê,

quê ha pjê to cute me cumã hũjahkre ata kam

me amji to ipijapar rohnỳtti mã,

ne mehkĩnte,

cute mencrôn atajê, quê ha me mõr pejti kam me to hamre.

²³Ne quê ha Pahhiti pry kam jũm mẽ ata,

quê ha catyt kam pry ata kôt ipa,

quê ha jũm ata mã cute amji kam hapac xà kĩn hyre nare.

²⁴Ne Pahhiti me hũhkra na cucwa ita kam, quê ha me ajhu,

ne nee me ipihur tu nare.

²⁵Pê wa ituwre na,

Pahhiti te jũmjê pejti te catyt kam me ipa atajê mã hikran na

me hõmpun nare,

ne ahnaa ramã iwej.

Ne nee hanea ne,

rỳ ite mehkra nõ te apu hõ na hàhwỳr to mõr na hõmpun nare.

²⁶Ne ihtỳj cumã ampo,

mã hàhcajrẽnti kam to mehkwỳ tehcajpar to ipa.

Ne quê ha Pahhiti ihtỳj mehkra itajê to impej,

ne ma me hamã.

²⁷Ne ca ha ate ampo kên ton to apa ata pê amji to awpjê,

ne quêt ate ampo pej pit ton to apa xà ata kam,

quê ha Pahhiti ihtỳj gõ pjê kam me akrĩ rohnỳtti mã na me ato,

ne ampo kên cunea pê atête hàmtàr to ipa.

²⁸Ampo na?

He Pahhiti mã catyt kam, cute mehkwỳ to impejti atajê kĩn,

mã me to impejti to ipa.

Na quê ha nee cute amji mã me to hajỹr to ipa catêjê mã hikran nare,

ne ma mentête ampo kên pê hàmtàr to ipa rohnỳtti mã.

Ne quê ha mehkĩnte

mehkrã kên tàmxwỳ atajê me mõr pejti kam,

mehcunea me hamre.

²⁹Ne catyt kam me ipa atajê,

quê ha Pahhiti te me cumã pjê to hũjahkre ata mã me axà,

ne kam mehkrĩ rohnỳtti mã.

^30-31Ne catyt kam me ipa catêjê kam ri,

ihtỳj hõ Pahpãm te amji kam hapac xà,

na quê ha nee catyt kam ipa xà ita to ihcupan nare.

Ne ihtỳj mehcakôc xà te amji jahkre pejti to mehcakôc to me ipa,

ne cute me hapackre xà atajê, quê ha mehcajpuaw.

³²Ne mehkrã kêanre atajê ri,

ihtỳj pry cahtiri,

catyt kam me ipa atajê jikaj, cute me hipej prãmte.

³³Cakrô, quê ha nee Pahhiti mehkrã kên jũhkra mã,

catyt kam me ipa atajê incjêj na me hamãr nare.

Quê ha ma cute mehcukij catêjê wỳr me to axà,

quê ha Pahhiti, cute mehkên mã me mẽn xà ata na

nee me hamãr nare,

ne taa mentête amtà.

³⁴Ca ha atỳj me Pahhiti jikaj,

ne cute amji kam hapac xàa kôt me apa.

Quê ha ihtỳj jũ caxuw ato acati,

ne cute amã pjê to hũjahkre ata, quê ha ihtỳj amã cugõ,

ca ha to gõ tekjê.

Ne quê ha akam mare mã, mehkrã kên mõr pejti kam me hipej.

³⁵He pê wa ramã ito jĩa to, cute ita ton na hõmpu.

Pê hũmre nõ ata ihkrã kêanre,

ne hàprêa kam ajco mehkwỳ to kên to ipa.

Ne cute me to kên to ipa xà ata kôt,

cute amji to cati to hajỹar,

pom quê pjê impejti kam pĩ ihkà to ipa,

ne catia to cati he.

³⁶Cakrô, mã ahna ahtũm nare, mã hamre,

ata jĩkjê na ri cute hajỹr.

Wa tee apu hũmre ita krĩ xà japê,

mã ramã hamre, wa nee ite hipêr hõmpun nare.

³⁷Ne ca ha catyt kam me ipa catêjê me, mempejti,

ne nee ame ipijapu to ipa nare atajê kôpĩr to me apa.

Quê ha ihtỳj cumã mehtàmxwỳ hàhtôa.

³⁸Ne mehkĩnte, cute mehkên ton to me ipa catêjê atajê,

quê ha ihtỳj me to hamre.

Quê ha mehkĩnte nee me cumã mehtàmxwỳ nare.

³⁹Ne quê ha ihtỳj Pahhiti,

ampo kên pê catyt kam me ipa catêjê pytà,

ne ampo kên te me hỹrmã hapôj xà atajê kam,

quê ha cupê ikre tỳjti ata pyràac, ne ihtỳj mentête amtà.

⁴⁰Ne ma Pahhiti te mentête hàmtàr xà ata wỳr me pra,

quê ha taa mehtehcajpa,

ne mehkrã kêanre atajê pê me hũtà, ne mentête amtà.

Jũm xũmre ita hũrkwa pê ampỳa mã Pahpãm mã amji na increr xà

¹Ỹhỹ, Inxũ Cati, ca ihhêj ne ipê ampỳa mã apa.

Pom côjkwa crà kam, carà mã hatuj xà jõ cô to kôrti,

ita na mã ite,

ne wa apê ampỳa mã apu ipa.

Na wa hacpỹa mã awỳr amji jaxàr to prãam to prãm,

mãr cu hipêr ajpẽn pupu, ne ajpẽn cahi na papa.

²Inxũ tĩr rohnỳtti mã ata, he ihhêj rũm apê cô,

ne imã ato kôar to kôr.

Ne jũ caxuw mã wa ha ajte awỳr icato,

ne ite ato acati prãmte imã akĩnti ita na amã amji jarẽ?

³Me icurê xwỳn catêjê me icukij to:

“Mẽr jõ ri mã côjkwa kam Apãm Cati ita?

Ihhêj ne hamreare” hane.

Cwỳrjapê ri imã amji kĩn nare, ne ipeacre,

ne wa ijàpàn nare kam, amcro me caxwa cunea kam amrã.

Mã ito cacô pit ajxwỳ.

Ne ito cacô pijaxwỳr ita pê ihhêj rũm ijõ,

wa to pit mã apà.

⁴Wa hãn ne ituwre na

mam ite ato amji kam ijapac xà atajê to amji japackre,

ne ijĩ cunea kam ikàj xà pyrentu.

Pê wa me ikjêjê jàhtôa to ajco amji kôt ipa,

ite me ato amji kam ijapac xà jũrkwa wỳr.

Ne me icuhtom pej pêa mã,

me imã amji kĩan kam me ipa,

ne ajco me icrear kam

apê Inxũ Catihti na me ato ijũjarẽn to me ipa.

Ata to wa amji japackre.

⁵Ne mẽr ampo na mã wa imã amji kĩn nare ne ikrihkrit ita na ipa?

Xà quê ha ajkĩ Inxũ Catihti ita hipêr itehcajpar nare?

Hãpà! Quê ha ihtỳj hacpỹa mã imã amji kĩnti na ito.

Cwỳrjapê wa ha hacpỹa mã Inxũ Cati to amji mã ihhimpej,

ne to amji japackre, ne to cati prãmte wa ha cumã:

“Apeaj to apej,

ne apê Inxũ Cati pê Pahpãm

pê ikên pê ipytàr catê rohnỳtti mã” hane.

^6-7Wa Pahpãm jũrkwa me, me ikjêjê pê, ampỳa mã ipa,

ne Côpijapjêr jõ cô jatuj xà na kẽnti itajê kam ikrĩ.

Mã kẽn cati itajê pĩn, cô catia ne ikam ajxwỳ,

ne kypê hàhkrihkrit nare, ne tee icuran prãm.

Ita pê ihhêj rũm imã amji kĩn nare te ikam ipijaxwỳr.

Cwỳrjapê ri imã amji kĩn nare ita pê ihhêj rũm

ijĩ cunea kam ikàj xà,

ne Pahpãam te ri imã amji kĩn nare ita na iton,

na wa itỳj to amji japackre.

⁸Ne amcro cunea kam Pahpãm imã:

“Imã akĩn rohnỳtti mã” hajỹar to pyt.

Ne wa caxwa ri cumã cre, ne cumã:

“Mehcunea jirôa pê apeaj to apej” hane.

Ne itỳj cumã icakôc ne cumã:

“Apê ite amji kam ijapac xà xakat,

na ca ha atỳj ijamãr rohnỳtti mã” hane.

⁹Pahpãm pê ikên pê ipytàr catê, na wa cumã:

“Ca ihhêj ne ate ito gapac kêt!

Mã me icurê xwỳn catêjê ame ito kêanre,

wa imã amji kĩn nare kam ipa” hane.

¹⁰Mã amcro cunea kam me icurê xwỳn catêjê ame ina xwỳ,

ne me imãn to:

“Jõ ri mã Apãm Catihti ita?

Ihhêj ne hamreare ita kam,

jũ wỳr quê ha atehcajpa” hane.

Ne cute me imãn xà ita pê ihhêj ne ramã me icuran to mõ.

¹¹Ne mẽr ampo na mã wa imã amji kĩn nare,

ne ikrihkrit ita na ipa?

Xà quê ha ajkĩ Inxũ Catihti ita hipêr itehcajpar nare?

Hãpà! Quê ha ihtỳj hacpỹa mã imã amji kĩnti na ito.

Cwỳrjapê wa ha hacpỹa mã Inxũ Cati to amji mã ihhimpej,

ne to amji japackre, ne to cati prãmte cumã:

“Apeaj to apej,

ne apê Inxũ Cati pê Pahpãm pê ikên pê ipytàr catê rohnỳtti mã” hane.

Tawi te Pahpãm mã amji cajrẽn na mencrer

¹Ỹhỹ, ijõ Pahhiti pê Inxũ Cati,

me icurê xwỳn itajê kêanre, ne ampeaj kam mehhêj xi,

ne nee me ato amji japackre prãm nare.

Ne cute me ijarẽn to kêanre atajê pê ipytà.

Ne me cumã ijarẽn to:

“Imãa cupê jũm pejti ata” hane.

²He pom apê ampo kên pê ipytàr catê ita?

Nõ na mã ihhêj ne ate imã hikran.

Mã me icurê xwỳn imã amji kĩn nare na me ito,

wa imã amji kĩn nare kam ipa,

ca ihhêj ne nee ita na ito amji japackre nare.

³Pom hãn ne hàhcujro xà,

awcapàtkô kam jũm pictor ata tehcajpa

mã hacpỹa mã pry kam ajhu,

ita kôpit na, ca ha iwỳr garkwa te ijapackre xà nõ hêj xi nare,

pê ihhêj rũm gàhcujro xà nõ ata kujate,

mãr quê hacpỹa mã awỳr ito amji jaxà.

Ne ate ijapackre xà ita kôt,

wa ha hacpỹa ne Xijãw jõ hàpkàjti na

ite ato amji japackre xà jũrkwa kam akrĩ xà ata wỳr amji jaxà.

⁴Ne ate imã amji kĩnti wỳr

ito amji jaxàr xà ata pyrên ijakryti,

ne hahpan xà na wa itỳj amã ampo gõ.

Ne amã ijàkôr xà cakô, ne amã icrer to:

“Apê imã amji kĩnti jõr catê xakat” hane.

⁵Ne mẽr ampo na mã wa imã amji kĩn nare

ne ikrihkrit ita na ipa?

Xà quê ha ajkĩ Inxũ Catihti ita hipêr itehcajpar nare?

Hãpà! Quê ha ihtỳj hacpỹa mã itehcajpa ne imã amji kĩnti na ito.

Cwỳrjapê wa ha hacpỹa mã Inxũ Cati to amji mã ihhimpej,

ne to amji japackre, ne to cati prãmte wa ha cumã:

“Apeaj to apej.

Ne apê Inxũ Cati pê Pahpãm pê ikên pê ipytàr catê rohnỳtti mã” hane.

Tawi te to kên na amji jahkre pej, ne Pahpãm mã cute to tojnõ na hàhwỳr na mencrer

¹Ijõ Inxũ pê Pahpãm, icaprĩa ne.

Wa itea ikên xà pê ampo kên ita to amji tũm.

Ne amã ikĩn ne amã ijapê rohnỳtti mã ita kam,

ca ha imã ikên cunea cuhhõ,

ne nee hipêr to amji japackre nare.

Ite acuna mã ampo kên ton ita kam ri amã ikêanre.

Na ca ha imã ite amji kam ijapac xà kên kam,

ite ikên ton ata to caprã.

²Ne gàhcaprĩa kam, ite ikên ton ata cunea pê icuhhõ,

ne ite garkwa jirô pê ipỳm ata hur pa,

ne to tojnõ, mãr wa hacpỹa mã itetet.

³He ramã imã, ite to ihcupan xà itajê cunea na, amji jahkre pej,

na wa amã ahna amji jarẽ.

Ne ikên xà itajê, ihhêj ne icunaa mã imã hikwa,

na wa hõtpê to amji japackre.

⁴He wa ite nee jũmjê cuna mã ikên xà ita ton nare,

ne acuna mã wa ite ton.

Ne itỳj ate ita cwỳrjapê ito kên xà na ramã gahkre pej.

Ne ca catyt kam apa na ri ate icurê mã imẽn xà ita caxuw,

quêt ampeaj kam apejti.

⁵Pê wa ipỳm pêa mã ramã ite amji kam ijapac xà kêanre.

Ne ampeaj kam pê wa ipỳm pêa mã,

ramã ajpên acuna mã ampo kên itajê ton to mõ.

⁶Ne amã, ate amji kam gapac xà impejti, hêj xi nare ita pyr na

ito prãm,

mãr wa catyt kam, ihêj xi nare to ipa.

Na ca ha imã ate amji kam gapac xà impejti,

krã kreti ita to hahkre,

ne imã agõ.

⁷Ne itête imã, ite amji kam ijapac xà kên tũm ita cuhhõ,

wa itetetti to hanea, pom quê hàcwỳn jaka he.

⁸Ite ato kên jahpan xà na,

ate imã amji kĩn nare ne ipeacre na iton.

Ne ita caxuw ca ha hacpỹa mã imã amji kĩnti na ito.

Mãr wa ate ito impejti ita pyrên ijakryti to amã cre.

⁹Ne ate imã ikên cunea ton itajê to caprãr ne ihhur partu na,

imã ato prãm,

mãr ca nee hipêr hõmpun nare.

Ne ite acuna mã ikên ton ita to tojnõ,

ne nee hipêr to amji japackre nare.

¹⁰Ỹhỹ, ijõ Inxũ Cati,

imã ite amji kam ijapac xà tetetti impejti gõ,

mãr wa ato pit mã hupkre cahkô to ipa ita na.

Ne ite ato amji kam ijapac pejti xà caxuw,

imã ite amji kam ijapac xà tuwti gõ.

¹¹Ne nee amji tête põ mã imẽn nare,

ne nee ipê ikam Acarõ Pejti ita caxàr nare,

ne quêt hipêr ajpẽn kam pahhônco na ito.

¹²Ne cama hipêr imã ate ipytàr pyrên ijakryti na ito,

ne ita caxuw ite akam ijapac prãm na ito,

mãr wa akampa.

¹³Ca ha ito hajỹr jirô pê mã,

wa ha itỳj cute mehkên ton catêjê mã,

ate me imã garkwa jirên itajê to hahkre,

quê ha me gahkre pej,

ne hacpỹa mã awỳr me amji jacjê.

¹⁴Ijõ Inxũ Cati, apê ampo kên pê ipytàr catê,

ne nee ca ite jũm curan xà ata kôt amji mã ihcuhtom nare.

Wa ha imã amji kĩan kam, mehcunea mã,

ca catyt kam apa, ne apejti na garẽn to ipa.

¹⁵Ijõ Pahhiti, mehcunea mã icakôc na itehcajpa,

mãr wa itỳj me cumã acatihti ne apejti na ato ijàmnãn to ipa.

¹⁶Ne ite amã ampo to acajpuaw prãmte,

ite amã ampo pijapar to caxàr xà ata na, nee amã ihkĩn nare.

Ca ha ma apu ite amã ampo jõr xà atajê caca nare na mã,

wa ha ramã amã cugõ ne to capa.

¹⁷Ỹhỹ ijõ Inxũ Cati,

wa ite ampo to acajpuaw prãm xà ata na amã ihprãm nare,

ne quêt amã icrire na ito prãm.

He wa ite ikên ton ita to amji japackre, ne imã amji kĩn nare,

ne ipeacre ata na ri amã ito prãm.

Ne ite ikên ton jicu ne akôt pit mã ipa to prãm ata kôt,

ca ha ina amji capa.

¹⁸Ỹhỹ Pahpãm, ate itehcajpar xà ita na,

ca ha hanea ne me akwỳ cunea tehcajpa.

Ne por ramã Krĩpinkrên tête kwỳc nare,

mã me curê xwỳn te ame to kêanre,

na ca ha hipêr gàhcajrẽan kam

Xijãw jõ kẽn cahê na krĩ ata to impej, ne ihtehcajpa.

¹⁹Ate me itehcajpar jahpan xà na,

wa ha ihcunea na me amã amji gõ.

Ne ahna ate me ijahkre pej xà na,

wa ha me amã pryti krahti xũmti nõ to capa,

ne catyt kam me to akam ijapac to me ipa.

Me hõ kẽhkẽn pyrên me pajakry na mencrer

¹Ỹhỹ, me ijõ Inxũ Cati, me icaprĩa ne,

ne me ikrã kam garcô mẽ, ne me ito impej,

mãr wa me ipej.

²Mãr quê pjê cunea kam, mehcunea, krĩxàre mea mã,

ate amji kam gapac xà impejti na me gõmpu,

ne mehcunea apê me hũtàr catê na me gahkre pej.

³Ỹhỹ, me ijõ Pahpãm,

imã krĩxàre cunea te acatihti na me garẽn na me to prãm.

Ne hanea ne imã ampo kra cunea te apejti na

me garẽn na me to prãm.

⁴Imã mehcunea mã amji kĩn,

ne me hakryte amencrer na me to prãm.

Ampo na?

He caa ca ha quêt catyt kam mehcukij jirô pê

mempej to impej,

ne mehkrã kên to kên,

ne pjê cunea kam mehkrĩ atajê japackre

ne ma me to ahimpej to apa.

⁵Ỹhỹ, imã krĩxàre cunea te acatihti na me garẽn na me to prãm.

Ne hanea ne imã ampo kra cunea te apejti na

me garẽn na me to prãm.

⁶Ỹhỹ me ikwỳ, pê Pahpãm me pamã me pajõ pjê gõ.

Ne ramã cute me pahkrã kam harcô mẽn,

ne me pamã pajàprà cunea jõr.

⁷Pê Pahpãm ramã me pahto impej.

Ne imã pjê cunea kam,

mehcunea te amji mã me hũpa to ipa na me to prãm!

Pahpãm catyt kam mehkrã pej me mehkrã kên to ipicokjêr na mencrer

¹He imã, Ixaher catêjê te amji kam hapac xà cunea kam

mehkên nare, ne mehtetetti atajê caxuw ri,

Pahpãm peaj to impej na,

imã hahkre pej.

^2-3Ne mam pê wa nee hahkre pej to hajỹr nare.

Pê wa mehkrã kên me,

amjia kôt ame ipa catêjê atajê jũ na,

apu cute me amji kam hapac xà pê me hàhcukrêj cati atajê kĩn.

Na pê wa ajmãr Pahpãm kôt ipa xà ita na atij, ne ipỳm,

ne ajmãr ikên mã axà.

⁴Ampo na?

Me cumãa, cute me amji kam hapac xà cunea kam mehcarĩcti.

Ne nee ame hà nare, ne me capẽnti, ne mehtỳjti.

⁵Ne me cumãa, cute me amji pupun xà kêanre nõ hamreare.

Pom ahnaa mã mehkwỳ te me amji pupun xà kêanre to

me amji pupu ita na,

cute me hajỹr nare.

⁶Ne por me hakràj cati na amji to me ipipẽ to me ipa atajê ri,

ihhêj ne me cumã impeaj to impej.

Ne ramã cute me cupê hamreare,

ne me cupê mehkryjre atajê to me hàprê to me ipa to

cute me amji pyràc tu.

⁷Ne cute amji kam me hapac xà kên to pit mã,

cute ame caxwỳn to hipu tu.

Ne ramã amji jirôa pê

cute me amji kam hapac xà kên jàhtôa to

amji to mehhimpej to me ipa.

⁸Ne mehcunea mã xwỳ xà kêanre to me ipa,

ne ampo kên to pit mã mehcakôc to me ipa.

Ne ihtỳj mehcunea jirôa pê amji to me cati prãm to me ipa.

Ne cute me cupê hamreare, ne mehpeacre atajê mã mehhêj,

ne mehkên mã me irẽn to pit mã me amji kampa.

⁹Ne ihtỳj côjkwa kam Pahpãm to mehcakôc kêanre to me ipa.

Ne cute amji to me cati prãmte,

ihtỳj pjê kam mehcunea mã me harkwa jirê,

ne tee ampo cunea to mehhimpej to me ipa prãm.

¹⁰Hõhõ, ata to ri Pahpãm na mehkwỳ to ihcuhhê ne mehhi kẽhkẽ,

mã ma mehkôt me ipa,

ne ihtỳj cute me ampo jarẽn xà atajê kôt me ipa.

¹¹Mã ajpẽn mã ame hũjarẽn to:

“Quê ha nee Pahpãm ampo itajê nõ na me pajahkre pej nare.

Quê ha Carôt Tỳjti ata nee ampo itajê nõ na

me pamã cator nare” hane.

¹²Mehkrã kên catêjê te me hajỹr he.

Me cumã ampo catia,

ne ma hõtpê me ipicamẽn to me ipa,

ne ampeaj kam me hakràj.

¹³Cwỳrjapê wa ajmãr ite amji jarẽn to hajỹr he:

“He wa ihhêj ne amji caprỳ to,

ite ikên ton tête amji jiprõn to ipa.

Ne mẽr ampo caxuw mã wa ikên pê ijũhkra to awpjê,

ne to ihtetetti to prãm?

¹⁴Ne pom ite ipej cwỳrjapê amji cajpẽr xà kêanre itajê to,

ite amji pupuan to pyt ita?

Ne wa ipej ton to ipa cakrô,

amcro cunea kam ajte ihhêj ne ampo kên mã icjêj to ipa” hajỹr.

Hõ, wa ajmãr ite amji jarẽn to hajỹr.

¹⁵Ỹhỹ ijõ Pahhiti, wa ha ampo itajê na amji jarẽ na mã,

wa ha ramã ipê aracri me akwỳ kên mã me irẽn catê hiahpuro.

¹⁶Cwỳrjapê wa ite ampo itajê cunea jahkre pej xà na,

ite amji to hahkre ne hahkre pej.

Na ri imãa ampo itajê jahkre pej xà nee hirã pê nare.

¹⁷Ỹhỹ me ijõ Inxũ Cati,

wa amã icakôc prãmte gũrkwa mã ixàr,

ne ite mehkrã kên catêjê te amji kam me hapac xà jicu xà mã mẽn na,

me hahkre pej pyrentu.

¹⁸Ca ate mehkrã kên catêjê itajê kên mã me irẽn xà itajê pê ihhêj rũm

ate pry cuwrỳhti kôt ame hũxwỳr,

mã me hàtij to me ipa,

ne ma mehkên xà ata mã mehpỳpỳm, ne me hamre ata pyràac.

¹⁹Ne quê ha ihprõt pê, me mõr pejti kam,

por amji mã me ampo cupahti ata pê Pahhiti te me to hamre xà ata,

me hỹrmã cato ne me kam tẽ,

ne me to hamre partu.

²⁰Ỹhỹ me ijõ Pahhiti, he ihhêj rũm mehkrã kên atajê pê,

pom me amti, ne me ahna apẽ,

mã jũ kam me cupê pra ata pyràac.

Wa ha amti ne ampra ne to ijapac kêt,

ita jĩkjê na,

ca ha ma amji cuna mã amehkrã kên catêjê atajê caca.

²¹Ne pa, pê wa ajmãr acuna mã ixãm tỳj pyrentu,

ne ajmãr akêanre na ato amji kampa.

²²Ne pê wa ihhêj rũm ipê ampo jũpar nare ta,

ne ihhêj rũm ipê mehkrã nare ata pyràac,

ne nee ajte ate amji kam gapac xà itajê na

gahkre pej nare.

²³Cakrô ca atỳj icahi na apa,

ne awpôc rũm ate ipa na ijuwahi tu,

na wa ha nee ikên mã ipỳm nare.

Ne ikĩnte nee ate mehkrã kên atajê juwahi nare.

²⁴Na ca ha ate amji jahkre pejti ita to ijapackre to mõ,

ite amji kam ijapac xà itajê cunea kam.

Jirô pê mã, ca ha ma amji wỳr ijaprô,

ne côjkwa kam, amji jĩkjê rũm ijỹr.

Quê ha mehcunea acahê na me ipupu.

²⁵Ne jũm to wa aràn xà na amji mã ijõ Inxũ Cati?

He aràn xà na jũm hamreare!

Ca imã akrĩ ita kam,

wa nee pjê me côjkwa kam imã jũm na prãm nare.

Ne ampo na wa amji cuna mã ihprãam to prãm?

Ampo nare, he ca!

Ana wa ihprãam to prãm!

²⁶Quê icapẽnti xà ita ihtỳj ipê hamre,

quê ha ijĩ cunea ihtỳj ipê hà,

ne apê ri imã ijĩ to ihtỳj catê.

Ne apêa ri côjkwa kam imã,

ite amji kam ijapac xà to impej,

ne to hakràj catê rohnỳtti mã.

²⁷Ne por jũm apu amji tête acurê ne ma apu acaca ata,

quê ha ihtỳj hamre.

Ne por quê ha jũm amã hikra ne apê hawry ata,

ca ha ihkên mã amẽ, ne to hamre.

²⁸Ne wa pa ate amji cahi na ito apijapar ita na ite amji cajpẽr,

ne ahna imã impeaj to impej.

Ỹhỹ me ikwỳ, Pahpãm pê ri me pantête hàmtàr catê,

cwỳrjapê wa mehcunea mã,

cute imã ampo ton itajê cunea na, harẽn to ipa.

Pahpãm jũrkwa to me pajapac xà na mencrer

¹Ỹhỹ Pahpãm, apê ampo cunea jõ Pahhiti,

ne mehcunea jirôa pê ampeaj kam quêt acarôt tỳj.

Ne ampeaj kam imã ite me ato amji kam me ijapac xà jũrkwa kĩn.

²Ne imã gũrkwa ata ri apu imõr prãmti,

ne ampeaj kam to ijapac xà.

Wa ite amji kam ijapac xà cunea to,

wa apê me ijõ Inxũ Cati tĩar ata pyrên ijakryti to amã cre.

³Apê ijõ Pahhiti pê Pahpãm!

Quêt ampeaj kam acarôt tỳjti!

Acatihti cakrô,

mã ihtỳj cute me ato me amji kam hapac xà jũrkwa kam

cuwênre me, xiprôre amji mã hahê to,

cute kam amji mã intore to ipijapar xà caxuw.

⁴Por cute me ato amji kam hapac prãmte,

gũrkwa mã hãn ne me acjêj,

ne me hapôj atajê ri hãn ne ampeaj kam me hakry xà,

ne hõtpê acatihti na me amã cre!

⁵Ne por apĩn amji mã me carôt cwa,

ne ma Krĩpinkrên jõ hàpkàjti pê Xijãw na me to hàpir,

gũrkwa wỳr me to cator prãmte atajê ri,

ampeaj kam me hakry xà.

⁶Ne caprũm cràre nõ kôt me mõr xà ata kam,

ca ha atỳj me cumã ihkôt cô catõc ne ipijapjêr na to,

quê ha ajpjê.

Ne quê ha hanea ne ta cakônĩ nõ wrỳ,

quê ha ampeaj kam hĩpô hàhtô.

⁷Ne me mõr kwỳa kam,

quê ha ihtỳj me carôt ita me cumã ipicamẽn to mõ.

Ne ma Krĩpinkrên kam,

cute me ato amji kam me hapac xà jũrkwa wỳr me cato,

ne me apê pahpãm cahàc krekà cunea jirôa pê acati

ne apê Pahhiti impeaj na me apupu.

⁸Mehcunea jirôa pê ijõ Pahhiti pê Pahpãm carôt tỳjti ita,

ite amã icakôc xà ita na, ikampa.

Apê iquêtti pê Jaco xwỳ jõ Pahpãm ita, ikampa.

⁹Pahpãm, ate amji mã me ijõ pahhi capi ne hãm ata krã kam garcô mẽ,

ne to impeaj ne.

¹⁰Wa ite jũ ri amji to amcro jàhtô to mir romã,

wa ha gũrkwa kam amji to amcro pyxit peaj.

Ne mehkrã kên jũrkwa pejti kam ijàhhuc romã ri,

imã cormã gũrkwa jarkwa mã mencjêj xà kam ixãm na

amji to prãam to amji to prãm.

¹¹Pahpãm, apê me ijõ Pahhiti, ne apê pyt pyràac,

ne ampeaj kam acati ne apràti, ne apê me itête gàmtàr catê.

Ne gàhcajrẽnti to, amã me ikĩnti kam, ca hãn ne me ito impej,

ne mehcunea kam mare mã me ito me icati.

Ne por catyt kam, mempejti to ame ipa atajê pê ri,

nee ate ampo pejti intê xà nare.

¹²Mehcunea jirôa pê apê ijõ Pahhiti carôt tỳjti ita.

He ampeaj kam ri amji mã me ato ihhimpej atajê cunea jakry pit.

Pahpãm pê ampo kên pê me pahpytàr catê na mencrer

¹Ỹhỹ me ikwỳ!

Quê ha me anõ mã, ampo kên pê amji pytàr to prãm na,

ca ha Pahpãm mã amji cajrẽn,

quê ha Pahpãm pê me pahcunea jõ Pahhiti pahtỳjti ata,

ihtỳj atête amtà.

Cwỳrjapê ca ha gapacta ne me pajõ Pahhiti pê mehcunea jirôa pê

ihpahtỳjti ata mã me amji jarẽn to,

²“Apê ipytàr catê,

ne apê ampo kên cunea pê itête gàmtàr catê,

ne apê ijõ Pahpãm,

na wa itỳj ate ijamãr na amji mã ato hane” hane.

³Quê ha Pahpãm ihtỳj

ampo kên pimxur te akên mã amẽn xà ata pê apytà,

ne atête axà te acuran xà ata pê amtà.

⁴Quê ha ihtỳj amji jarkwa pa,

ne ampo te ato kên xà ata pê apytà.

Quê ha ihhêj rũm cupê ampo jara, ne hara to apro,

quê ha nee ihkrac ri ampo acaxun nare.

⁵Cwỳrjapê quê ha nee amã caxwa ri ampo kên awỳr pra atajê cupa nare.

Ne quê ha ihprõt pê amcro kam ampo kêanre ata awỳr cato,

ca ha nee hũpate apu akrihkrit nare.

⁶Ne nee amji mã, por awcapàtkô kam,

hà kêanre picràn ata cupa nare,

ne nee amji mã amcro kam ampo te ame ato hamre xà ata cupa nare.

⁷Ne quê ha me mir ne me ty, ne awke rũm me ajxwỳ,

ne me tej mir ne me ty, ne awpôc rũm me ajhu cakrô,

quê ha nee ampo kên ato kên nare!

⁸Na ca ha cama xa ne ankrêre ne apu rĩt.

Ne ca ha atỳj Pahpãm te me hũpar nare me,

mehkrã kên te ampo kên ton atajê jahpan xà na,

cute ame to kên na me to ihtỳj tu na me hõmpu.

^9-10Ate amji jarẽn to:

“Pahpãm catia pê ijõ Pahhiti ata pê ri,

por curi ipimxur xà ata,

ne cupêa ri itête hàmtàr catê!” hajỹr.

Cwỳrjapê quê ha nee ampo kên gũrkwa wỳr cator

ne jũ mã aton nare.

¹¹He quê ha Pahpãm côjkwa kam cumã me hàpên catêjê mã harkwa ta,

quê ha harkwa kôt,

por ca jũ ri apu amõr xà ata kam me gamã,

ne me atête me hàmtàr to ipa.

¹²Ne quê ha me gamãr to hanea,

pom quê jũm xũmre pry kam kẽn te ihkra par tõc cupate,

ma hũhkra to, to huphê ne hamã he.

¹³Ca ha Pahpãm cãmtàa rũm

atỳj me acurê xwỳn pê rop jõkre hôhti me,

me cupê cagã kêanre pyràc atajê me,

me ajpu, ne me kam acuhhê, ne me tohjê.

Quê ha nee jũmjê itajê nõ ato kên nare.

¹⁴Na quê ha Pahpãm amji mã garẽn to:

“Wa ha itỳj me cumã ikĩnti itajê pytà.

Ne cute amji mã me ito ihhimpej atajê, wa ha itỳj mentête amtà!

¹⁵Ne quê ha kam ampo kên cato, quê ha imã amji cajrẽn,

wa ha kampa ne ramã curia cahê na xa,

ne pa ampo kên pê hũtà,

ne pa mehcunea te amji mã me hũpahti xà na me to,

quê ha amji mã me hũpa.

¹⁶Wa ha cute amji to ipijapar to irya na to,

ne cute amji to ipijapar xà ata kam,

ahnaa mã, wa ha itỳj hũtàr to ipa” hane.

Pahpãm to me hàmnãn na mencrer xà

¹Hacme, ne me pajõ Pahhiti pê Pahpãm to me cati prãmte,

me cumã me pahcakôc!

Ne cupê me pahpytàr catê pyrên me pajakryti to,

cu me cumã cre!

²Hacme, ne Pahpãm to me amji kam hapac xà jũrkwa mã me axà!

Ne curia cu ha cuna mã,

cute me pahto impejti ita pyrên me pajakryti to

cumã me amji jarẽ,

ne pahtỳj me cumã cre!

³Ne mẽr ampo na mã cu ha me to hane?

Nee mã ampo na cu ha me to hajỹr nare.

He me pajõ Pahhiti pê Pahpãm carôt tỳjti ata ri,

pjê cunea kam,

pahpãm cahàc cunea jõ pahhiti carôt tỳjti atajê

jirôa pê cati.

⁴Ne pjê cunea to ihhimpej,

ne ahkre ryti rũm to ihhimpej kam pra,

ne ma kẽn kàhti ata mã to hahê.

⁵Ne taa cute côxwa ton ata to ihhimpej,

ne taa hanea ne cute pjê ton ita to ihhimpej.

⁶Cwỳrjapê cu ha ma me pra ne Pahhiti cuna mã

me pahkõn krã na me jỹ,

ne cumã impejti na me harẽ.

Hacme ne me cumã:

“Apê me ijõ Pahhiti pê me iton catê” hane.

⁷He cupê me pajõ Pahpãam to Pahpãm,

ne me papê mehkwỳ, mã me pajamã.

Ne me papê hõ parxare pyràac,

mã ihtỳj me pamã me pahte ampo pej na prãm xà atajê gõ.

Cwỳrjapê cu ha ita kam

cute me pamã ihcawpa xà atajê na me kampa:

⁸“Nee ca me apê me aquêtjêa ne me gàprãr xi nare.

He pê me aquêtjê me hàprãr xi cwỳrjapê

pê põti kam me hamreare ata kam,

ajco amji caxuw cô na me icyt to me ipa.

⁹Pê wa caku te cwarẽnta kam,

me kam mare mã icarôat kôt

ajco ampo catia pihhoti atajê ton to ipa,

ne ajco me cumã harte,

ne ajco me cumã cô gõ,

ne ajco me curê xwỳn pê mentête amtà.

Pê mento jĩa to ahna me ipupun cakrô,

cute me icapi prãmte amji caxuw me icyt,

ne ajpẽn mã me ijarẽn to:

‘Nee Pahpãm me pajamãr pej nare’ hane.

¹⁰Pê wa caku jàhtôti ita cunea kam me aquêtjê itajê kam icryc,

ne ma amehcaca ne pa amji mã me to icakôc to:

‘Mehkrã kên atajê te amji kam hapac xà kêanre,

ne cama ijarkwa jirô pê mehpỳpỳm to me mõ,

ne ma ame ijarkwa par caca’ hane.

¹¹Ne wa me kam icryac to icryc,

ne ampeaj kam ite me cumã amji jarẽn,

ne me ahna amji jarẽn tu, ne me cumã:

‘He me gũpar nare ita kam,

ite pjê to me amã ijũjahkre ata mã me acunea xàr.

Ne kam me akôt xà ata kam,

ca ha nee jũ caxuw curi me axàr nare.

Na ca ha ita ri põti ita kam me atyc pa,

quê ha me akra pit pjê ata mã me axà’ hane”.

Hõ, me pajõ Pahhiti, amcro ita kam me pamã ihcawpa to hane,

na cu ha pahtỳj me kampa.

Pahpãm te mehkwỳ mã pahhi xãm te me curê xwỳn tohjê na mencrer

¹Pahpãm pê Pahhiti te ijõ Pahhi mã:

“Icahê na, Pahhi jỹr xà kam, awpôc rũm jỹ.

Wa ha apar krac ri me acurê xwỳn atajê cunea nõr na me to,

quê ha me nõ.

Ca ha ate me tohjê na cute me gahkre pej xà na,

me hipy apar xãm” hajỹr.

²Quê ha Pahpãm Krĩpinkrên pĩn, ijõ Pahhi mã,

cute pjê to ihhimpej xà ata caxuw carôt cunea gõ, ne cumã:

“Apê pjê jõ Pahhi ne acarôt tỳj.

Ne acarôt tỳjti ita to,

ca ha acurê xwỳn catêjê cunea jirô pê acuhhê partu,

ne me to ahimpej.

³Ne ca ha me cume apijapu kam me tẽ me ajkaam,

quê ha me acahê na me ipijapu xà caxuw,

me akwỳ me hàhtôa ne me amji to ajpẽ.

Ne me cupê pĩhhô na atàr pyràac,

ne pjê cunea kam me hàhtôa to me hàhtô.

Quê ha mentuwjê, me cumã amji kĩan kam,

Krĩpinkrên jõ kẽn pejti atajê kam me acajpa,

akôt me ipijapu xà caxuw” hane.

⁴Ne Pahpãm pê Pahhiti te ampeaj kam ijõ Pahhi na amji jarẽn to hajỹr,

na quê ha nee jũ caxuw amji pê

cute cumã amji jarẽn xà ata to hapac kêt nare.

Na ri Pahpãm te ijõ Pahhi mã:

“Ca ha gõtpê apê me akwỳ jõ Pahhi.

Ne hanea ne apê imã mehcajrẽn catê rohnỳtti mã.

Ca ha apê mam imã mehcajrẽn catê pê Merquixê pê Pahhi ata pyràac,

ne hapua na apê imã mehcajrẽn catê pê Pahhi” hajỹr.

⁵Ỹhỹ Pahpãm, ca ijõ Pahhi tehcajpar xà caxuw,

cahê na akrĩ ita na.

Ne ca ha jũ caxuw pjê jõ pahhi kwỳ kam acryc,

ne mehcunea to hamre.

⁶Ne quê ha cute jũ caxuw pjê cunea kam ate mehcunea cukij,

ne me to apicokjêr xà jõ amcro kam ahtwỳ,

ca ha mehkên jahpan xà na,

pjê kam me hàhtôa ne mehcura ne me to hakôat to hakôt,

ne pjê cunea kam pahhi catêjê cunea to hamre partu.

⁷Ne quê ha ijõ Pahhi pry cahê na cô ajpjê ata to ikõ,

quê ha cumã carôt catia to cati,

cute me hirô pê ihcuhhê xà caxuw.

Pahpãm jarkwa jõ kàhhôc na mencrer

⁹⁷Ỹhỹ me ijõ Inxũ Cati, wa ha garkwa na amã amji jarẽ.

He ampeaj kam imã acaca xà itajê cunea kĩn!

Wa to amji japackrea to pyt.

⁹⁸Ca gõtpê ate imã, ate ijapackre xà jõr,

wa ite amji mã huwahi ata kôt,

ca ha me icurê xwỳn jirôa pê hãn ne ito amji jahkre pej.

⁹⁹Wa cute me imã ampo to hahkre catêjê jirôa pê

hãn ne imã hahkre pej.

Ampo na?

Wa hãn ne ate imã ampo itajê to hahkre xà impejti

itajê to amji kampa na wa.

¹⁰⁰Wa itỳj acaca xà kampa, ne amji mã hũpahti to ipa,

na ri mehwej jirôa pê imã hahkre pej.

¹⁰¹Itỳj imã garkwa par to prãm,

cwỳrjapê wa nee ampo kên ton to ipa nare.

¹⁰²Ne nee wa ate ampo na garkwa atajê ton jicu nare.

Ampo na?

He caa pê ca imã to hahkre na ri.

¹⁰³Ne ate imã garkwa jirên itajê cunea inxô pit!

Ne imã ihhêj ne pen jirôa pê inxô.

¹⁰⁴He ate imã ampo to hahkre xà kôt ri imã hahkre pej,

na wa ma apu cute me amji kam hapac xà hêj xi xà

atajê cunea impar caca,

ne ma ame curê.

¹⁰⁵Garkwa ita pê ihhêj rũm

hàhcujro xà nõ te imã gõ pry cujro,

ihkôt imõr xà caxuw.

Na wa ihkôat amji kam ijapac xà to impejti to ipa.

¹⁰⁶Na wa ite apar na amã amji to ijũjahkre,

ne wa ha itỳj ampeaj kam,

amji mã ate ito ahimpej xà cuhtacti itajê kampa!

¹⁰⁷Ijõ Pahhiti, imã ite amji pupun xà itajê kêanre!

Ne pom ca ate imã ampo pejti na amji to gũjahkre ita na ca ito,

ne imã icarôt gõ, mãr wa ityc xà jahpa.

¹⁰⁸Ỹhỹ, Pahpãm, ate ito kênre nare ita pyrên wa ijakryti to,

ite amã amji jarẽn xà ita na, ca ha atỳj amji capa,

ne ate ampo to imã ahimpej xà ita to imã hahkre.

¹⁰⁹He ihtỳj hõtpê jũmjê atajê ame icuran prãm cakrô,

wa nee ate amji kam gapac xà to, ite amji pê ijapac kêt nare.

¹¹⁰Ne mehkrã kêanre atajê te me imã ipro xà ton,

ne me imã hãm, cute me to ipro prãmte,

cakrô wa nee ite,

ate ampo na ito ahimpej xà atajê kam ijapac jicu nare.

¹¹¹Ate imã ampo to hahkre xà itajê pê itekjêa.

Na wa ha itỳj amji mã me huwahi, ne amji caxwãm pê me cunõ,

mã ihtỳj ina cuhkõnre kam me imã ijakryti to.

¹¹²Na wa ite amji mã garkwa ita par to ikrĩ,

ne ahnaa to hicu xà mã mẽn na amji ton.

Pahpãm pê me pahpupun catê na mencrer

¹Wa hãn ne rĩt ne hàhkà jakôt pupu ne pa amji cukij to:

“Xà quê ha ajkĩ hàhkà jakôt ita pĩn,

cute itehcajpar catê ata cato?” hane.

²Hãpà!

He quêt Pahpãm pê Pahhiti

pê pjê me côjkwa to ata pê ri itehcajpar catê!

³Ne cupê me pajamãr catê, mã ma me pahto huphê ita kam,

quê nee ampo te me pahnõ mẽn na hamãr nare.

⁴Ne cupê me pahkwỳ pê Ixaher catêjê jamãr catê ita kam,

quê nee jũ caxuw hõtxwa quê nõ ne apu hõt nare.

Ne nee apu hõt nare, ne irĩat na quêt ihkrĩ.

⁵Me pajõ Pahhiti pê me pajamãr catê,

quê ha ihtỳj me pahcahê na ipa ne me pahpytàr to ipa.

⁶Quê ha nee pyt cacro me pahnõ mẽn nare,

ne nee quê ha caxwa ri, putwrỳ na,

ampo xà me pahwỳr cator nare.

⁷Quê ha me pajõ Pahhiti

ampo te me pahto jũ mãn xà atajê cunea pê me pahpytà,

ne nee quê ampo te me pahnõ to jũ mãn na hamãr nare.

⁸Ne cu ha ma jũ kam me pra, quê ha ihtỳj me pajamãr to mõ,

ne cu ha hacpỹ ne me amji jaxà,

quê ha hanea ne ihtỳj me pajamãr to mõ.

Ne quê ha me pahto hajỹr to hãm ita na,

ne nee jũ caxuw me pajicu nare.

Krĩpinkrên to me hàmnãn na mencrer

¹Ijõ krĩ kam cute Pahpãm jũrkwa wỳr me ijator, ne me imã:

“Hacme, Pahpãm to cute me amji kam hapac xà jũrkwa wỳr!” hajỹr,

ata pyrên ijakry, ne imã amji kĩn crire nare.

²Na wa ramã hỹrmã me icator, ne itỳj Krĩpinkrên kam ame ipa.

³Ne ramã hacpỹ mã cute me Krĩpinkrên to impej.

Mã ramã Ixaher catêjê jakrã amehcuhhê atajê te hỹrmã me cuprõn.

Mã jũm te mehcukij to,

⁴“Mẽr ampo na mã me hõ krĩ cunea pĩn,

Krĩpinkrên wỳr, me hàpir to me ipa?” hane.

Wa cumã:

“Nee mã ampo na nare!

He cute ampo pej cunea pyrên me hakryti na,

me Pahhiti pê Pahpãm mã me amji jarẽn prãmte ri me ipa” hane.

Hõ, ita na ri cute mehcunea mẽn,

mã harkwa kôt cute me ton.

⁵Ne ita ri mehcukij xà kam hõtpê me pajõ pjê jõ pahhi.

Ne cute ajpẽn kôt me harẽn catêjê atajê kampa,

ne catyt kam mehcukij,

ne ajkam me to impej.

Ne ita ri me cupê pro kam atajê ihcunea na,

ihtỳj me ajpẽn kampa.

⁶Hacme, ne Pahpãm mã Krĩpinkrên kam amehkrĩ atajê cajrẽn.

Cu ha mehcajrẽn to hane he:

“Ca ha ma me hamã,

mãr quê ajpẽn na mehhôncoti to me ipa.

Ne por krĩ kwỳ mã, Krĩpinkrên kam amehkrĩ catêjê kĩn atajê,

ca ha hanea ne me to impej,

mãr quê me cuxà mempej pêa mã me ipa.

⁷Ne imã Krĩpinkrên tête kwỳc tỳjti me,

cute me hamãr catêjê jũrkwa tỳjti atajê to,

cute me curê xwỳn pê, me amji pytàr pejti na me to prãm,

mãr quê ikre atajê cunea kôt me ankrê,

ne nee ame amji mã ampo cupa nare, ne mehcarĩcti ne.

⁸Ne por krĩ ata kam, me ikwỳ me, me ikjêjê ame ipa atajê,

ca ha hanea ne me to impej, quê mempej pêa mã ame ipa.

⁹Ne mẽr ampo na mã wa ame ana ijàhwỳr to hane?

He apê me ijõ Inxũ Cati pê Pahhiti to

ite amji kam me ijapac xà jũrkwa ita,

ita ri krĩ ita kam ihcuhhê,

na ca ha ipu na amehkrĩ atajê to hanea ne impej,

mãr quê me cumã amji kĩn jakryti kam me ipa” hane.

Pahpãm pyxit peaj pê ampo kên cunea pê me pahpytàr catê na mencrer

¹Ite me ikwỳ cukij to hajỹr he:

“Ỹhỹ, me ikjêjê, wa ha me acukij,

ca ha me imã me amji jarẽ.

Quê ha me parũm Pahpãm hamreare na mã,

jũ mã quê ha ampo te me pahto kên xà ata me pahto?” hajỹr.

^2-5Mã me ikwỳ te imã me amji jarẽn to:

“Quê ha me parũm Pahpãm hamreare na mã,

quê ha me pahcurê xwỳn te me pahkam incryc to

imprar xà ata pê ihhêj rũm,

cute me pahtĩar na me pahkur xà pyràac.

Nare, quê ha cupê ihhêj rũm cô te hipu ne me pahcutor tu,

ne ma ahpar mã hũwrya wỳr me pahto imprar,

ne irorocti pahtỳjti to cute me papĩr pyràac” hajỹr.

⁶Ite mehkwỳ mã harkwa to hajỹr he:

“Pê me pajõ Pahhiti te me pahcurê xwỳn te me pahto hamre na

hamãr nare pyrên me pajakryti to,

cu ha cumã me amji jarẽ.

⁷Pê cu ihhêj ne me papê cuwênre pyràac.

Pê Pahpãm cuwênre jahêr catêjê te me pahpro xà ton atajê pê

me pahpytà.

Ne ihhêj rũm me pahte na hê xà ata ta, pê pàt,

ne hamre, pê cu pahtỳj ame papa.

⁸Me pajõ Pahhiti pê côjkwa me pjê ton catê,

ne cupêa ri me pahtehcajpar catê ata pyrên me pajakryti na,

cu ha me cumã amji jarẽ” hajỹr.

Pahpãm jàhcajrẽnti na amji mã me to hajỹr na mencrer

¹Quê me pajõ Pahhiti pê Pahpãm

ikre xãm na ikre pyxwỳr catêjê ràn nare na mã,

quê nee me amji mã hamãr, ne me hãm nare,

quê tee ame to hahkree, ne me to hàpên jicu.

Quê me pajõ Pahhiti

krãhtare pê krĩ jamãr catêjê te krĩ tête hàmtàr na

mehràn nare na mã,

quê tee ame krĩ tête hàmtàr to hahkree ne me hicu.

Ne jũ wỳr quê apu amji mã hamã ne me hũtàr to impej.

²Jũ wỳr cu me pajàpên pejti to prãm to, iràràa na me pahkrĩ,

ne me pajàpêan pê me pajàpên kam pra,

ne me pajàpên to awcapàtkô rytu ne me cumã hikra ne pra,

ne me pajikwa ne ame amji mã hamã.

Ampo na?

He Pahpãm mã mehkĩnti atajê te me hàpên xà jicu jirô pê

me hikwa ne ame hõt.

Mã cutea me cumã harte xà caxuw ihtỳj me cumã hõ to.

³Ne me pahkra pê ri ihhêj rũm

Pahpãm te me pamã ampo pejti jõr xà atajê,

mã ihtỳj me pamã cugõ.

Cwỳrjapê ri ihtỳj amji kôt me pahwỳr

me pamã ampo pejti jàhtôa ne me to hapôj.

⁴Ne me hũmre, mentuw kwỳa kam

me cumã mehkra hàhtôa to me hàhtô.

Ne hãn ne mehwej mã me taa me hũtà, ne me hamã.

Atajê pê ri ihhêj rũm krãhtare jũhkra kam

cute amji tête hàmtàr xà caxuw me cumã hõ kruw jàhtôa pyràac,

na quê ha mehkra atajêa to amji tête hàmtàr to ihkrĩ.

⁵Por me hũmre mã mehkra jàhtôa to me hàhtô atajê pyrên

ampeaj kam me hakry.

Ampo na?

He me cupê ihhêj rũm krãhtare mã hõ kruw jàhtôa to hàhtô pyràac.

Ne jũ wỳr quê curê xwỳn nõ amji mã hamã ne me tohjê.

Jĩkjê na mã

me hũmre mã mehkra jàhtôa to me hàhtô atajê te me hajỹr.

Quê ha mehcukij xà kam curê xwỳn nõ me ajpẽn kam tẽ,

quê ha cumã hamãr catêjê pê mehkra jàhtôti itajê me hũtà,

quê ha nee jũm tohjê nare.

Pahpãm te me pahtehcajpar na me pajàhwỳr na mencrer

¹Pỳj me hêj xi ijõ Pahhiti!

He ityc xàa wỳr ikrã pictor tu ata kam,

wa itỳj ate itehcajpar prãmte ana ijàhwỳr.

²Ijõ Pahhiti, ite amã icaràr xà ata na ikampa!

Ne ite amji pytàr xà na ijàhwỳr xà ata to, ca ipytà!

³Ca ha ite ato kên xà itajê to,

ate amji japackre prãmte ahna ihkàhhôc to na mã,

jũ mã wa ha, ne ate icurê mã imẽn xà ata pê icato,

ne ma jũ kam tẽ?

Hamreare!

Ca ha atỳj hahpan xà na ikên mã imẽ.

⁴Cakrô, ca nee ate ito hajỹr nare.

Ne quêt cama atỳj, ite ato kên xà itajê to tojnõ,

ne nee hipêr to amji japackre nare,

mãr wa ihkôt amji mã acupahti to ipa.

⁵Ỹhỹ me ikwỳ, wa ite amji kam ijapac xà cunea to

Pahhiti te itehcajpar na hikaj.

Ne ampeaj kam wa itỳj cute ampo na

imã amji to hũjahkre xà ata na

amji mã to hane.

⁶Ne pom krãhtare pê caxwari krĩ jamãr catêjê apẽ xà jikaj ata jirôa pê,

wa itỳj ijõ Pahhiti jikaaj to hikaj.

⁷Me ikwỳ pê Ixaher catêjê atajê,

ca ha atỳj ampeaj kam Pahpãm to me amji mã hanea to me hane.

Ampo na?

He cumã me akĩn rohnỳtti mã,

ne hõtpê ihtỳj cumã me apytàr prãm.

⁸Na quê ha ihtỳj Ixaher catêjê

pê mehkwỳ atajê te ame to kên jahpan xà na,

cute mehkên mã me hàr xà ata pê me hũtà.

Pahpãm mã ihcunea na me pajahkre pej pejtu na mencrer

¹Ijõ Pahhiti, ca ramã ate ipupun pejtu

na ri amã ijahkre pej.

²Ne ramã ite ampo ton xà atajê cunea na amã ijahkre pej.

Ne ampỳa mã amã ite amji kam ijapac xà cunea na ijahkre pej.

³Ca ijàpên xà cunea me, ite apu ikôt xà atajê cunea kam ipupu,

ne ite ampo ton xà atajê cunea na

amã ijahkre pej.

⁴Ne ite jũm mã ampo jarẽn xà ata xwỳjrea na,

ramã ite harẽn xà ata na amã ijahkre pej.

⁵Ne jũ ri apu imõr xà ata ri,

ca atỳj ipu na apa,

ne acarôt to itête gàmtàr to apa,

ne imã ijõ pry to hahkre to apa.

⁶Ne ramã ate ijahkre pej xà ita pupun pejtu,

wa nee ajte akĩnte ite amji pupun pej xà ita na,

ite amji jahkre pej nare.

Ne ite ahna amji jahkre pej xà ita ipê ipimxur tu.

⁷Ne jũ kam wa ha apê tẽ?

Ca pjê cunea kam apa xà ita kam,

jũ mã wa ha ajte ne jũ kam apê hawry?

He wa nee jũ kam, apê ijũjawry nare.

⁸Wa ha ma côjkwa wỳr api,

ca ha curia ramã apu mõ.

Nare, wa ha ma pjê krac ri mehtyc krĩ xà wỳr wrỳ,

ca ha curia ramã apu mõ.

^9-10Wa ha pyt japôj xà wỳr ite itor ne itẽm na,

nare, ampỳa mã pyt cjêj xà kam amji to ipijapar cakrô,

quê ha cormã gũhkra imã ijõ pry to hahkre to mõr ita na.

Ne wa ha jũ ri cormã apu mõ,

ca ha curi atỳj itehcajpa.

¹¹Wa ha awcapàtkô mã ijarkwa to:

“Ito amxu” hane,

ne hanea ne amcro mã ijarkwa to:

“Amji to awcapàtkô” hane,

quê ha kam awcapàtkô cakrô,

wa ha nee apê ipimxur nare.

¹²Ampo na?

He amã awcapàtkô kam ampo pimxur ata pimxur nare.

Ne amã awcapàtkôti ata pê amcro jõ apẽ.

Ne amã awcapàtkô me amcro pipẽan.

¹³Ne caa pê ca ahpỹanre na imã icukrã xà ton pa,

ne inxê cahã xà caxwãm pê ajkam ipyxwỳr pa.

¹⁴Na wa itỳj amji mã apejti na garẽ.

Ampo na?

He ate ampo ton xà atajê cunea pihho

ne hahkre pej xà pimxur tu,

ne ajtea mã, ne quêt impejti.

Wa ite amji kam ijapac xà cunea to gàpên xà ita na,

ite gahkre pej pejtu.

¹⁵Pê ca inxê tu kam ihi ton xà me, ite amji jipêj xà na ipupu.

Pê wa aracri, jũm te ipupun nare kam,

inxê cahã xà kam ipicamẽn to icati to mõ.

¹⁶Ne pê ca ipỳm xwỳjrea na ramã ipupu.

Ne caa ramã imã jũ mã ite amji to ipijapar xà na

amcro atajê na gõ kàhhôc kam ihhôc hiahpuro, mã hikwa,

cormã amcro jamre reria mã.

¹⁷Pỳhàpà ijõ Pahpãm,

ate amji kam gapac xà itajê cunea jahkre pej xà jahkre kêatre!

Ne ampeaj kam hàhtô ne impej pit.

¹⁸Wa ha hàhtô na ite hahkre pej prãmte cahyt xà na mã,

quê ha imã hàhtô pê ihhêj rũm pjênxôm carôt jàhtô.

Wa cahyt, ne cahyt,

ne nee jũ caxuw cahyt jicu xà mã to mẽn nare,

ne kaam gõr.

Ne wa iràrà na ampra, ne hãn ne acahê na ipa,

ne ato amji japackre pyrentu.

¹⁹Ỹhỹ ijõ Pahpãm,

he imã ate atỳj mehkrã kên te ampo kên ton to ipa atajê curan,

ne me to hamre na to prãm.

Ne imã ate me hàprêhti jũhcaprô prãmti atajê to

ipê gũjawry tu na to prãm,

mãr quê me hawry, wa icarĩcti na ipa.

²⁰Ne me acurê xwỳn atajê ato mehcakôc xà kêanre to me ipa,

ne ihcaprỳ na gaprỳ to mehkêanre to me ipa.

²¹Ijõ Pahhiti, pom ma ame acurê,

ne ma ame apynãr caca itajê ri,

ite hajỹar ne ihtỳj imã me curê, wa ma amehcaca!

²²Wa me curê xà cunea to me curê to ipa.

Ampo na?

He acurê xwỳn itajê pê hanea ne icurê xwỳan to icurê xwỳn.

²³Ỹhỹ, ijõ Pahpãm!

Gapacta ne ikôpĩ ne icaxwỳn na awcapi,

ne ite amji kam ijapac xà cunea na ijahkre pej.

²⁴Ne imã, ihhêaj to ite ijõ pry cupan xà nõ ata jarẽ,

ne quêt mehtĩr rohnỳtti mã xà ata jõ pry wỳr ca ito mõ,

ne kam imẽ, wa ihkôt mõ.

Pahpãm to me pajàmnãn na mencrer

¹Ijõ Pahpãm pê ri ijõ Pahhiti,

wa ha mehcunea kam mare mã acatihti ita na ana cre!

Wa ha jũ caxuw acati na garẽn to amji pê ijapac kêt nare,

wa ha quêt garẽn to ipa rohnỳtti mã.

²Ne amcro cunea kam wa apyrên ijakryti na amji jarẽ,

ne ato amji kam ijapac to ipa rohnỳtti mã.

³Ijõ Pahhiti, ampeaj kam acati!

Na wa ite amã acatihti to icakôc xà ata na amã ihkên nare,

ne quêt acajpuaw.

Ne jũ wỳr wa me inõ amji mã hamã ne acatihti ita na gahkre pej.

⁴Ne pom ate ampo pejti carôt tỳjti ton itajê cunea,

quê ha ihtỳj me hũmre mehkra mã me harẽ,

quê ha me kampa.

Ne me taa, hanea ne mehkra mã me harẽ,

ne me to hajỹr to mõr rohnỳtti mã.

⁵Quê ha gàhcujrohti me apê Pahhiti pejti ita to mehcakôc.

Wa ha pa gàpên xà impejti itajê cunea kôt

itỳj ato amji kam ijapac to ipa.

⁶Ne quê ha me taa mehcunea mã

gàpên xà carôt tỳjti atajê cunea kôt harẽn to me mõ.

Na wa ha hanea ne me cuxà gàpên xà catia na garẽ,

ne mehcunea mã ato icakôc pejti ne.

⁷Ne quê ha mehcunea ihtỳj me hirôa pê apejti ita na

me ato amji japackre xà kôt me amji mã,

amji kĩn ton to me ipa.

Ne ihtỳj ate amji kam gapac xà cuhtacti ita na me cre.

⁸Ỹhỹ me ikwỳ, Pahhiti pê jũm peaj to impej ata.

Ne nee cupê ampo kam incryc kam imprar pyrentu catê nare.

Ne cumã me pahkĩan to me pahkĩn, mã ihtỳj me pahcaprĩ.

Ne hãn ne hõtpê pahte me pahkên ton jicu jirô pê mã,

ihtỳj me pahkên to tojnõ, ne hicu.

⁹Ne mehcunea mã impeaj to impej.

Ne cumã cute ampo cunea ton itajê caprĩ xà.

¹⁰Hàpà me ijõ Pahhiti pê Pahpãm!

Wa ha pjê kam me icunea itỳj amji mã me acupa,

ne ato amji kam me ijapac prãmte me ana cre.

Ne me akwỳ cunea, quê ha apyrên me hakryti na me amã amji jarẽ.

¹¹Quê ha me hirôa pê apê Pahhiti ita na

mehcunea amji mã me ato ihcakôc.

Ne ihtỳj acarôt tỳjti ita na amji mã me garẽ.

¹²Mãr quê mehcunea

ate acarôt to gàpên xà ton atajê cunea na me apupu,

ne apê Pahhiti catihti ata na me gahkre pej.

Ne quê ha ihtỳj mehcunea mã

ahimpej xà jàhcujro tetetti carôt tỳjti ata jahkre pej.

¹³Ne ate me ito ahimpej xà ita jamre xà hamreare.

Ne apê Pahhi pê Pahhiti rohnỳtti mã.

Ỹhỹ me ikwỳ, Pahpãm hãn ne ampo to awjahkre,

ne ihtỳj hõtpê harkwa ata to amji japackrea rũm ihkrĩ.

Ne cute ampo ton xà atajê cunea kam, cumã me pahkĩn pit.

¹⁴Ne ihtỳj ampo kên mã mencjêj atajê tehcajpa,

ne ihtỳj hanea ne cute me to ihcupan atajê tehcajpa,

ne hacpỹa mã catyt kam me ipa na me to.

¹⁵Por ampo cunea tĩar atajê,

ihtỳj hõ to hàpàn xà ata kôt Pahpãm pupu.

Ne cute me cumã ampo na me prãmti jõr xà atajê na ihtỳj me hikaj.

Mã hãn ne cute me cumã me hõ jõr xàa jõ amcro na me cumã cugõ.

¹⁶Ne ihtỳj hãn ne hũhkra mã hikra, ne nee apu hũ intê nare,

cute ampo cunea tĩr atajê mã ampo na prãmti atajê jõr prãmte.

¹⁷Pahhiti te ampo cunea ton xà caxuw ihcunea na catyt kam ipa,

ne ampeaj kam hàhcaprĩ.

Ne ampo cunea na cute me pahto impej, ne cumã me pahkĩn.

¹⁸Ne por amji tehcajpar xà na ampeaj kam me cuwỳ atajê cahi na ipa,

cute mehtehcajpar prãmte.

¹⁹Pahhiti ihtỳj cute amji mã me hũpahti atajê mã

ampo na me prãmti atajê gõ.

Ne ihtỳj me caràr kampa, ne hãn ne me hũtà.

²⁰Pahhiti ihtỳj me cumã ihkĩnti atajê tête amtà,

ne mehkĩnte mehkêanre atajê intête nee hàmtàr nare,

ne cama hãn ne me to hamre.

²¹Ne ampo itajê cunea cwỳrjapê,

wa ha ijõtpê Pahhiti catihti na harẽn to ipa rohnỳtti mã.

Ne imã pjê ita cunea kam,

icuxà cute me Pahhiti japrỳ pejti na me harẽn na

me to prãm rohnỳtti mã.