ME HAPACKRE XÀ

Xarômãw Te

ME HAPACKRE XÀ

Jõ Kàhhôc

Ỹhỹ, Tawi xwỳ kra krã kreti japrỳ te Xarômãw xwỳ pê Ixaher catêjê jõ pahhiti catia, ne cute ihkrã kreti kôt ihkàhhôc to incrê ne ihhôc. Ne mam ita japrỳ te Xarômãw Te Me Hapackre Xà Jõ Kàhhôc (Me Hapackre Xà). Ne kaam ri Pahpãm jarkwa kôt, cute me pamã, pahte amji to me pahhimpej to me papa to hahkre. Ne pahte amji mã me Pahpãm cupa to me pamã hahkre.

Ne ihkôt ihkàhhôc nõ ita ri Xarômãw te ramã ihwejtu kam, cute me pamã ihhôc. Ne me pamã me pahkam Pahpãm nare kam, ihcunea na me pahkôt hamreare na to hahkre. Cwỳrjapê ri ihkàhhôc ita japrỳ te Xarômãw Te Ampo To Hahkre Xà Jõ Kàhhôc (To Hahkre Xà).

Ne ihkàhhôc crê ita kam ri cute me hikwa tuw jõ increr na ihhôc, cwỳrjapê ri ihkàhhôc ita japrỳ te Xarômãw Crer Xà Jõ Kàhhôc (Xarômãw Crer Xà).

Pê Pahpãm Xarômãw mã cute amji jahkre pej catia ne cugõ, cute ihkên ton xwỳjrea na. Ne ita caxuw Me Hapackre Xà ita kwỳ mã he.

Me hapackre xà itajê ri ampo cunea caxuw impej

Me Hapackre Xà 1.1-19

¹Pê pahhi Xarômãw xwỳ pê pahhi Tawi xwỳ kra, ne cupê Ixaher catêjê jõ pahhiti. Ne pê ihkrã krea to ihkrã kre, mehcunea jirôa pê, ne ajco cute me hapackre xà jarẽ, ne ahna ihhôc. ²Ne cute me pajapackre xà itajê, ihtỳj me pahkrã kreti me, cute me pajapackre xà impejti itajê jahkre pej na me pahtehcajpa, ne hanea ne cute me pajapackre xà kam me pajapac jahkre kêatre atajê jahkre pej na, me pahtehcajpa. ³Ne cute me pajapackre xà itajê, ihtỳj ihcunea na catyt kam pahte amji to me papijapar pejti to me pamã hahkre. Ne hanea ne me pahkwỳ to me pahhêj xi nare kam, catyt kam pahte me to papipẽnti to me papa to me pamã hahkre. Ne pê Xarômãw xwỳ mã, cute me amji kam me hapac xà impejti to me ipa na me to prãm, na pê me hapackre to hane he.

Xarômãw mã ampo cunea jahkre pej na me to prãm

⁴Imã me cupê ampo jahkre kêatre atajê te me ampo cunea jahkre pej na me to prãm. Ne imã cormã mentuwre, mehkà to me ipa atajê jũpar pejti na me to prãm to, wa me cumã mehkrã kên cawpa to ipa. Ne imã catyt kam, cute amji kam me hapac xà to, amji to me ipijapar na me to prãm. ^5-6Ne por ramã mehkrã kre atajê ri, cute mehkrã kreti to me amji mã me ipicamẽn na, imã me to prãm. Ne imã cormã cute mehkrã kre itajê to me hahkre, ne caxwãm catia mã me hũpar na, imã me to prãm, cwỳrjapê wa itajê cunea na me cumã ihhôc.

Cu ha amji mã me Pahpãm cupahti to me papa

⁷Ỹhỹ, ca ha akrã kre to prãm, ne mam cati mã Pahhiti pê Pahpãm to amji mã ahimpej to apa, ne amji mã hũpahti to apa. Ne nee apê, por cute me amji jahkre kêatre te ma ame hũpar pejti caca atajê pyràc nare.

^8-9Ne anã me apãm te amã ampo to hahkre xà atajê na, ca impar to impeaj ne. Quê ha mehcunea ahna me apupu, ne me gahkre pej, ne apejti na amji mã me garẽ.

¹⁰Quê ha jũmjê krã kêanre atajê kwỳ me acapi prãmte, cute me amji kam hapac xà kêanre ton xà ata wỳr me gato, ca ha ma apu gitõt. ^11-15Quê te me amã:

— Hacme ne amji kĩn ata na ame jũmjê cura, ne ame cupê ampo kwỳ to ahkĩ, ne amji mã ame to ajcrà, ne ahnaa me pajũrkwa to amji mã me hakràj — hajỹr cakrô, ca ha nee mempar nare, ne nee mehkôt amji ton nare. Ca ha me cupê ampỳa mã apu apa. ¹⁶Ne pom mehkêanre itajê mã me hũjarêan kam, cute ampo kên to mehcuran to prãm, ne ihtỳj toa mehcura.

¹⁷Quê ha pryjara nõ te, ate cumã to catêc xà inxôr na apupun na, quê ha nee hỹrmã ihtẽm nare, ne ma tẽ ne hawrya ne apu kwỳ. ¹⁸Ne me hũmre itajê te ihtỳj mehkwỳ mã me catêtêc xà jaxôr na amji to me hane, ne aracri cute amji mãa me to haxôr. ¹⁹Ne por amji to me hakràj prãmte mehcuran to me ipa itajê, quê ha ihtỳj jũm me hipej xà kêanre to me hipej.

Mentuwjê japackre xà

Me Hapackre Xà 3.1-18

¹Ỹhỹ me ikra, nee ca ite me gapackre xà ita to amji pê me gapac kêt nare, ne ite me amã ijarkwa jirên itajê, ca ha amji mã me huwahi. ²Ampo na? He quê ha ihtỳj ate amji to me apijapar to me caku jàhtôa na, me atehcajpa. Na ca ha ate ihkôt me ampo ton to me hahkre na, quê ha ihtỳj ihkôt me amã ampo. ³Ne quê hõtpê amã mehcunea kĩnti ne, ne hanea ne jũm mã ampo to awjahkre, ne atỳj ate amji ton xà ata na amji jarkwa na amji par to apa. Ne hõtpê ita to apa to, nee amji pê gapac kêt nare. ⁴Hõ, ca ha ate hajỹr to apa na, quê ha Pahpãm ihtỳj ato impej. Ne Pahpãm me, mehcunea, quê ha me garẽn pejti to me ipa.

⁵Ca ha gĩ cunea to Pahpãm tĩr rohnỳtti mã ata kam gapac to impeaj to apa, ne nee ca amjia kôt akrã kre na amji ton to apa nare. ⁶Ne ca ha ate ampo ton xà atajê cunea kam amji caxuw Pahpãm cukij na, quê ha ihtỳj amã hõ prya jahkre.

⁷Ne nee ca ate amji jahkre pejti na apu amji to hajỹr nare, ne cama amji mã Pahpãm tĩr rohnỳtti mã ata cupa to apa. Ne nee ate ampo to ihcupan xà atajê nõ ton nare.

⁸Ca gõtpê mehxêt cahê xà pejti to amji mã axêt cahhê, mãr quê amã to incri, ca quêt acapẽnti na apu apa, ita jĩkjê na, ca ha ite amã ate ampo ton xà na ijũjahkre itajê kôt ate apa na, quê ha ihtỳj amã, ate amji kam gapac xà kêanre to impej.

⁹Ne Pahpãm mã ca ha impejti to acakôc to apa. Ne cumã mam gõ pjê kam gàprà kam gõ atajê jõr to apa. ¹⁰Ca ha ate itajê to hajỹr na, quê ha gũrkwa kam amã arỳjhy hipu tu ne, ne ampeaj kam gõ pur kam amã pĩxô hàhtôa to hàhtô, quê ihhêaj to gũrkwa nee amã cahuc nare.

¹¹Ikra, quê hãn ne Pahpãm pê Pahhiti ata gũpar pejti xà caxuw, amji mã ato ihhimpej xà to, ca ha ate kam gapac nare na, quê ha ihtỳj akàj xà na ato, ca ha akàj xà. Ne akàj xà ata kôt ca ha ampeaj kam amji mã kampa, ne cute amji to amã hahkre na amji mã to hane. ¹²Nãmri Pahpãm pê Pahhiti ata mã mehkĩnti atajê to ihtỳj hàpên xà ton to ipa, ahnaa mã me hũmjê amji mã mehkra to impejti prãmte, hãn ne mehkra to me hàpên to me ipa he, me hũpar prãmte. Ampo na? He cumã mehkĩnti na ri ihtỳj me to hajỹr to ipa.

¹³Ne por mehkrã kreti atajê ri me hakryti, ne ihtỳj me cumã ampo cunea kôt hakop jahkre pejti. ¹⁴Ne pom mehkrã kreti itajê mã ri ihpore cati ata me, kẽn prà tepti pê ôr atajê jirôa pê cati ne impej, ne ahna hĩ jàhwỳrti. ¹⁵Ne pom me hũpar te amji jahkre pejti itajê ri me hõkre xê xà pràti itajê jirôa pê impej. Ne pom cu amjia kôt ame ampo pejti na prãm itajê, nee impej te me pahte amji kam me pajapac xà impejti ita cahuc, ne to ipipẽn nare.

¹⁶He me pahkrã kreti ita ihtỳj caku jàhtôa kam, pahte amji to papijapar na me pahto, ne hanea ne me pajakràj na me pahto, ne mehcunea te me pampejti na me pahpupun na me pahto. ¹⁷Ne me pahkrã kreti ita ihtỳj me pamã pahte amji mã, pahte amji kam me pajapac xà kĩnti ata na me pahto, ne ihtỳj catyt kam, me pahcarĩcti kam, me pahte ampo cunea ton xà atajê na me pahtehcajpar to ipa. ¹⁸Ne por ampeaj kam me hũpar te amji jahkre pej krã kre atajê ri me hakrya to me hakry, mã ihtỳj mehkrã kre ita me cumã cute amji kam me hapac xà jõr to ipa.

Pyjê xyre pijapit tête mentuwjê japackre xà

Me Hapackre Xà 7.1-27

¹Ỹhỹ ikra, ite amã ampo jarẽn itajê to amji japackrea ne, ne nee jũ caxuw ite gapackre xà itajê to gapac kêt nare. ²Ne pom wa amã ampo jarẽ itajê, ca ha to, ne atĩar na amji to apijapar ita na. Ne ite amã ampo to hahkre itajêa kôt, ca ha amji to guphê to hanea, pom ca ato to guphê he. ³Wa amã ampo jarẽ itajê, ca ha akrãa kam amji mã anõ, ne ma gĩ cunea to, amcro cunea kam, gàpên xà cunea kam to amji japackre. ⁴Ne ate ampo jahkre pejti ita to, ca ha ihhêj rũm amji mã atõj, ne cahi na apu apa. Ne ate ampo par pejti ita to, ca ha amji mã akwỳ nõ to impeaj ne, ne cume ajwar apu apa. ⁵Quê ha pyjê inxyre kêanre atajê pê ampỳa mã ato ajrõ. Ne pyjê te mehhêj xi to me hũmre mã amji to hàkjêr prãmti atajê pê, ampỳa mã ato ipa.

Cahãj xyre pijapit te amji kam hapac xà kên

⁶Pê wa jũ ata caxuw ijũrkwa jarkwa mã xa, ne apu rĩt. ⁷Ne mentuwjê jàhtôa ne me hõmpu, por cormã mehkrã kre nare atajê kwỳ. Ne ite mehnõ pyxit krã nare ata mã icator ne hahkre pej, ne ampeaj kam ri ihkrã nare. ^8-9Pê mentuwjê nõ ita apu krĩ cape na mõ, pry japôj na, ne ma, por jũm cahãj ihkrĩ ata jũrkwa cahi na mõ, mã ramã ahna caxwa to mõ. ¹⁰Mã pyjê nõ inxyre pijapit te amji kam hapac xà kêanre ata te ihkà impejti nõ ata mã amji jaxàr, ne ma cuna mã mõ, ne cute me ajpẽn cajpar. ¹¹Ne cahãj xyre pijapit ata pê amji wỳr me hũmre na hàhwỳr catê, na pê nee ihpahàm nare, ne ihkrãhhia kam ajco me hũmre cukij, ne ma ajco krĩ cape na apu ipa. ¹²Ne hãn ne ajco pry japôaj na hirãa pê ame hikaj to ipa, ne por jũ ri me hũmre me cuprõ ata ri, hirãa pê ame hikaj to ipa.

¹³Ne mentuwjê nõ ita cator, mã cute impỳn ne cahôr, ne ihcakôc xà na ihpahàm nare ata to cumã:

¹⁴— Ita caxuw imã amji kĩn jõ catia ne hàhhuc, ne imã hĩa to hĩ. ¹⁵Cwỳrjapê wa ajpên apu gapên to mõ. Ne wa tee apu acajpar to prãm to ipa. Ne hamre, ita caxuw pahte ajpẽn cajpar! ¹⁶Ne ramã ite, por ihneat rũm cupẽhkà impejti krorti cator ata to panõr xà cahty. ¹⁷Ne ite ampo cacô cuxwati ata to panõr xà ita cuxwa. ¹⁸Ajpên ikôt mõ, cu ha ita kam amji to pahpahàm nõa to apẽ, ne ajwar ajpẽn pyrên pajakryti ne. ¹⁹Ipjê nee ijũrkwa kam apu mõr nare, ne ma ihtẽm xà jũwrya wỳr amũ tẽ. ²⁰Ne cute ihpore catia ne ipyr ne amũ to tẽ, ne quê ha jũ mã amji to amcro to, ne cormã hacpỹ ne amji jaxà — hajỹr.

²¹Ne cute ihhêj xi xà atajê to ihcajpẽar prãmte cama cumã ihhêj xi. Mã pea cute ahna amji caxàr. ²²Ne ahna ahtũm nare mã ma ihkôt mõ, ne ihhêj rũm cupê pryti te apu ihcuran xà wỳr ipa, ne ihhêj rũm cupê ampo pry te catêtêc xà wỳr apu ipicahur. ²³Por curi ampo te hapôc tu xà ata wỳr. Ne ihhêj rũm cupê cuwênre te ihpro xà na, nee amji jahkre pej nare kam apu imprar ata na, pê wa hõmpun to hane.

²⁴Ikra, ita caxuw ikam gapac to impeaj ne, ne ma ihkôt hakop, pom wa amã ampo jarẽ itajê kôt. ²⁵Ne nee amji na pyjê nõ te hajỹr ata jamãr quê apê gĩ te amji kam hapac xà pyr nare, ne nee apu pyjê te hajỹrjê kôt apa prãm nare. ²⁶Ramã me hũmre kwỳ te pyjê nõ ata cwỳrjapê amji na mehpahàm catia incwỳr. Ne ramã incwỳrjapê mehtyc atajê jàhtôa, ca nee me hàhtô na me cahyt par nare. ²⁷Ca ha ate pyjê te hajỹrjê jũrkwa wỳr apa na, ca ha ramã mehtyc jõ pjê wỳr, ca ha apa, ne amã gõ pry hatujre ne.

Pahpãm te amji jahkre pej catia

Me Hapackre Xà 9.1-18

^1-2Pahpãm pyxit peaj ne cute amji jahkre pej catia to cati. Ne cumãa ri jũ mã pahte amji kam me pajapac xà ata na me pajahkre pej. Ne cupêa ri me pahkrã kreti to cute me pamã hahkre catê, na cu catyt kam ihkôt me papa jahkre pej.

Pahpãm te amji jahkre pej catia ata pê me hũmre nõ te hũrkwati catia ton, ne kam amji kĩn nõ ton ata pyràac. Ne cute me hõ jàhtôa to cuprõn, ne hàpàn xà na me cumã hãm. ^3-6Ne hanea ne cute cumã me hàpên catêjê kwỳ kujahêc, krĩ cape na, mã ame cumã me hàkjêr to me pra, mã cute me to cuprõn xà caxuw me cumã:

— Me amã prãm, ne me amã kôr atajê! Ajpên ijũrkwa wỳr ame pra ne ame apà ne ame ikõ! — hajỹr.

Ita jĩkjê na mã Pahpãm te me pamã ampo to hahkre xà itajê pê me pajõ pyràac. Ne ihtỳj me pamã to hàkjêr to ipa ne me pamã:

— Ate me amji jahkre kêatre ne me akrã nare atajê! Ajpên iwỳr me apkjê, ne ite me amã ikrã kreti to hahkre xà ita na me ikampa, ne ate me amji jahkre kêt itajê mã me hikra. Ne catyt kam amji to me ajpa. Ne me akrã kreti itajê to me hahkre, ne me hahkre pej. Ampo na? Me akrã kreti itajêa kôt ca ha quêt me apej pêa mã me apa — hajỹr.

⁷Ỹhỹ me ikwỳ, ca ha mehkêanre nõ to ate impejti to prãmte cumã, cute amji kam hapac xà pejti to hahkre, quê ha cama ajte apu akam incryc, ne ihtỳj apu ato kên prãm. Ca ha ate jũm te hajỹr to impej prãm to apu amõr na, ca ha caa apu amji to akên japên to mõ, ne apu apahàm. ⁸Cwỳrjapê ca ha cute me hajỹr catêjê to tojnõ, ne nee apu catàtkre na me acjêj nare. Ampo na? Nee mã ampo na nare, ca ha ate ampo kên tête cumãn jahpan xà na, quê ha ihtỳj apu acurê.

Ne mehkrã kreti te nee me hajỹr nare. Ca ha ampo kên tête cumã, quê ha ate ampo kên tête cumãn xà ita jahpan xà na, ihtỳj cumã akĩn. ⁹Ne me hũpar pejti catêjê ca ha me jũm japackre, quê ha hipêr me hũpar krã kreti ata to amji mã me ajcamẽ. Ne me hũmre catyt kam me ipa atajê quê ha hipêr me hũpar to me ajcamẽ, ne catyt kam ame ipa.

¹⁰Ne quê ha jũmjê amji to ihkrã kreti to prãm, ne mam cati mã amji mã Pahpãm cupahti to ipa. Ỹhỹ, por jũm amji mã Pahpãm pejti cupa ata, quê ha ihtỳj cute amji kam hapac xà impejti te Pahpãm cajpuaw ata to amji to ajpa. ¹¹Ne mehkrã kreti atajê, mehkrã kre atajêa mehtehcajpa, mã amji to me ipijapar to me irya to me iry.

¹²Ca ha ate amji mã Pahpãm krã kre te amji jahkre pejti ata pyr na, ca ha atỳj to amji mã ampo pejti jàhtôa ne to. Nãmri ca ha ate amji pê Pahpãm krã kreti ita caca na, ca ha me pahcurê xwỳn pê Xatanaj te amji kam hapac xà kêanre ata py ne caa akên mã amji jaxà.

¹³Ne Xatanaj ata pê ihhêj rũm jũm cahãj xyre ata pyràac, mã me hũmre to hapactu to pit mã amji kampa, ne ma apu Pahpãm kôt ampo pej krã kreti itajê to amji kam hapac caca. ¹⁴Ne hãn ne ikre jarkwa mã ihkrĩ to ipa, ne krĩ cape te amji jacjên kam ipa. ¹⁵Ne hãn ne me hũmre, cute amji kam me hapac xà wỳr me pra atajê jator to me cumã hàkjêr to ipa. ¹⁶Ne cute me amji cajpẽr, krã kre nare atajê mã harkwa to:

— Ajpên ijũrkwa wỳr ikôt mõ, ne ipjê pê ina gũhkra! ¹⁷He, ampo to me pajàhkĩj itajê ri quêt impej! Ne kwỳr te pro to me pajàhkĩj itajê ri quêt papimxuar pê pahte mehkur xà, ne ampeaj kam cuxwa! — hane. ¹⁸Mã me hũmre jàhtôa ne hãn ne ihtỳj me kampa, ne amji mã me to hane, ne ma mehtyc xà wỳr me pra, cute me amji jahkre pej nare kam. Ne ramã me hàhtôa te amji mã mehkên xà ita capi, na quê ha ma jũ caxuw cuhy tyc xà nare ata wỳr me pra.

Ampo kwỳ jàhtôa to me hapackre xà

Me Hapackre Xà 10.1-32

¹Ỹhỹ, jũm xũmre mã ihkra krã kreti ata pê, hũm me inxi mã amji kĩnti ton catê.

Ne ihkĩnte jũm kra krã kêanre, jũpar nare ata pê ri hũm me inxi mã amji kĩn nare ton catê.

²Ne por mehhêj xi xà jàhkĩj kôt amji to me hakràj atajê, mã nee me hakryti xà nare.

Ne quêt catyt kam me ipa xà ata pê ri me hakryti me, me caxwãm pê me carĩcti ton xà.

³Ne Pahpãm pê Pahhiti ata nee hãn ne prãm te mempejti curan na me hamãr nare.

Ne mehkên catêjê te amji mã ampo na mehprãmti atajê ri, Pahpãm ma ame cupê intê, ne intête ame to jũa mã, mempejti atajê kĩnte.

⁴Ne cute me xuwcacati atajê pê ri ampo hamreare.

Ne quêt me hàpên prãmti catêjê mã ri, ampeaj kam ampo mã me to hakràj.

⁵Ne por jũm ampeaj kam amji kampa ata ri, hãn ne hàprà kẽhkẽn xàa jõ amcro na ihkẽhkẽ.

Mã hàprà kẽhkẽn xà jõ amcro kam hãn ne hõtxwaa to hõtxwa mã gõr ata ri, cama ihkĩnte amji na ihpahàm rẽ.

⁶Pahpãm hãn ne ihcunea na mempejti catêjê to impej.

Ne mehkêanre catêjê ri mempejti kĩnte me harkwa pejti kam, cute amji kam me hapac xà jàprêhti itajê to me amxu.

⁷Ne mempejti catêjê to, nee me hapac kêt xà nare.

Kĩntee mã ri mehkêanre catêjê to, ihtỳj me hapac kêt xà.

⁸Me hũmre krã kreti atajê ri, ihtỳj me hakrya kam amji mã, cute me hapackre xà atajê incwa.

Kĩntee mã, quê ha jũmjê amji to mehkrã kreti pyrentu prãm atajê me amji jarẽn to:

“Wa ramã ite itajê impar jahkre pejtu” hajỹr na, quê ha taa ramã amjia pê, cute amji kam hapac xà caca to mõ.

⁹Ne por jũm mã cute amji kam hapac xà impejti jahkre pejti ata, quê ha nee apu amji mã ampo cupa to hajỹr nare.

Kĩntee mã quê ha jũm apu ihhêj xi to mõ ata, quê ha ihtỳj ihkên mã me axà.

¹⁰Quê ha jũm te ampo kên na jũm pupun, ne nee intête cumãn nare na, quê ha ihtỳj jũm ata cama amji mã ihkên to ajcamẽ.

Ne quêt quê ha jũm ampo kên tête me cumãn kam incrà, quê ha cama mehkwỳ to impejti japên to ipa.

¹¹Ne por catyt kam me hũmre cakôc xà impejti ata, ihtỳj mehkwỳ te catyt kam me ipa na mehtehcajpa.

Kĩntee mã ri me hũmre cakôc xà kêanre atajê, cama mehkwỳ to kêanre to prãm to me ipa, ne cumã hàwxũn me, me to kên pit jahkre pej.

¹²Me pancryc me, pahte me pahkwỳ curê me, pahte me ajpẽn par nare ita, ihtỳj me papijapu na me pahto.

Ne me pahte me ajpẽn kĩnti ata pê ri quêt pahte me pahkên cunea to me pajapac kêt xà.

¹³Ne mehkrã kre cakôc xà atajê cunea kam ri quêt me pamã amji jahkre pej pit.

Ne mehcakôc xà krã kêanre atajê pê ri mehkĩnte cama mehkên mã me irẽn xà.

¹⁴Ne cute me amji jahkre pejti atajê ri, hãn ne amji mã, cute mempejti atajê pupun xà cunea kôt amji mã me nõr to me ipa.

Ne mehkrã kêanre catêjê ri, mehkĩnte nee me harkwa kôt hakop nare kam, hãn ne me to ihcakôc to me ipa, ne toa amji mã mehpahàmti ton to me ipa.

¹⁵Ne me hakràjti atajê ri, me hakràj te amji kam hapac xàa to me amji kampa.

Ne me cupê hamreare atajê ri, mehkĩnte hãn ne me cupê hamreare te amji kam hapac xàa to me amji kampa.

¹⁶Ne mempejti jàpên xà atajêa, hãn ne me to ajcamẽ.

Ne mehkêanre atajê ri mehkĩnte, pom mam mehkên xà itajê jirôa pê, amji mã mehkên to me ajcamẽ.

¹⁷Ne por ampo kên tête mehkwỳ mã, mã ahnaa me ampo jicu atajê, quê ha me hõ pry pejti kôt me ipa.

Ne por ampo tête me cumã, mã nee me hũpar nare atajê, quê ha mehkĩnte me hõ pry cupa ne mehkên mã me acjêj.

¹⁸Ne mehhêj xiti atajê ri hãn ne me harkwa hêj xia to mehkwỳ kam incryc to me amxu.

Ne hãn ne ampo kên na mehkwỳ jarẽn pa, ne amjia kôt hãn ne me to cati to mencràn to ipa atajê ri mehkrã nare.

¹⁹Ca ha acakôc xà to ihcupan to cati, ca ha amji mã akên xà to cati.

Nãmri ca ha ate akrã kre na, ca ha ma garkwa kên to acakôc na amji jamã, ne garkwa cakôc xà impej to pit mã acakôc to apa.

²⁰Ne mempejti cakôc xà kôt ihtỳj ampo pejti hapôj, ne cupê ihhêj rũm wakỳre prà pejti ata, ne cupê ahna hĩ jàhwỳrti ata pyràac.

Ne mehkên catêjê cakôc xà ri ihkĩnte ihkôt hamreare.

²¹Ne mempejti cakôc xà ri me hàhtôa ne me to impej.

Ne mehkêanre catêjê cakôc xà ri mehkĩnte, ma mehtyc xà wỳr me to ipa.

²²Ne me Pahpãm tĩr rohnỳtti mã ata, ihtỳj caku cunea kam amã ate amji kam me gapac xà to ipicamẽn to ihcuhhê tu.

Ne jũ wỳr quê iràn xà na, ampo me amã acaca xà te hajỹr xà ita to.

²³Ne me hàprêhti atajê mã, me hàprê xà ata pê ihhêj rũm me hapactu xà, ne me cumã ihkĩn.

Jĩkjê na ri, mehkrã kreti atajê mã cute amji kam me hapac xà impejti atajê, mã hũrên ame hakry.

²⁴Mehkên catêjê mã ihtỳj ampo cupaa to hũpa, ne cumã hũpahti ata quê ha ihtỳj to hanea to, to hane.

Ne mempejti atajê ri quêt ihtỳj cute me amji kam hapac xà impejti na me hapôj.

²⁵Quê ha kôc pahtỳjti ajpên mõ ne cato, ne mehkên to hamre tu.

Ne quêt mempejti krã kreti atajê, quê ha ihtỳj amehcuhhê, quê ha nee kôcti ata jũmjê atajê rẽn, ne me to ihtẽm nare.

²⁶Ca ha nee jũ caxuw ampo ton xà ata wỳr jũm te xuwcacati ata kujahêc nare.

Ampo na? He cute me hajỹr catêjê pê ihhêj rũm ampo cacô te me wa cahhêc xà, nare, me cupê ihhêj rũm me panto kam cuhy kũm, ne ihtỳj ihhahac.

²⁷Ne por jũm amji mã Pahpãm tĩr rohnỳtti mã cupahti ata mã, cute amji to ipijapar xà japjêa to hapjê.

Ne por mehkrã kêanre, ne nee amji mã Pahpãm cupa nare atajê, quê ha mehkĩnte, cute amji mã me to amcro hyr xà ata japyre mã me ty.

²⁸Ne por mempejti atajê ri ihtỳj cute me ampo pejti cwỳr xà atajê jikaj, ne ihtỳj hãn ne me cucwa.

Ne mehkên catêjê te nee me hajỹr nare, na quê ha nee jũ caxuw me ampo pyr nare.

²⁹Pahpãm tĩr rohnỳtti mã ata ihtỳj mempej pytà.

Ne mehkĩnte mehkên catêjê mã ihtỳj mehpahàmti gõ.

³⁰Ne por catyt kam me ipa atajê mã ri ihtỳj mehkrĩ xà.

Ne mehkĩnte mehkêanre atajê pê ri mehkrĩ xà hamreare, ne nee mehkrĩ kam mencrà xà hamreare.

³¹Ne por mehkrã kre te amji jahkre pejti atajê mã ri, ihtỳj mehcakôc xà krã kreti to me hapackre xà.

Ne por mehkêan kam ampo kêanre to me hapackre to me ipa atajê, quê ha ihtỳj mehkên xà kêanre atajê mã me amji gõ.

³²Me hũmre krã kreti atajê, ihtỳj hãn ne mehcakôc xà kam me hapac prãmti atajê to, me cumã mehcakôc.

Ne mehkrã kêanre atajê ri ihkĩnte cama me harkwa kêanre to mehkwỳ kên mã curẽ.

Xarômãw te mehkwỳ japackre xà te trĩnta itajê

Me Hapackre Xà 22.17-29

¹⁷Me ikampa. He wa ha me amã mehkrã kreti te me hapackre xà itajê to hahkre. Ca ha ampeaj kam, cute me hapackre xà impejti itajê to me hahkre, ne ate me hahkre pej na, ca ha ihkôat me amji jahkre pej. ¹⁸Ne ate to amji japackre xà ata kam, quê ha ampeaj kam amã mehkĩn na, ca ha atỳj ihkôat me apa, ne toa me acakôc to me apa. ^19-20Wa ha ita kam me amã me hapackre xà itajê to hahkre, mãr ca Pahpãm to pit mã amji mã me ahimpej, ne toa amji mã me ahimpej to me apa. Ne wa ha, ite me gapackre xà te trĩnta itajê na, me amã ihhôc. Quê ha taa amji to me amã hahkre, ne ihtỳj me gapackre xà impejti to me gapackre. ²¹Ata quê ha ihtỳj catyt kam ate amji kam gapac xà impejti to me apa jahkre pej na, me atehcajpa. Quê ha jũm te ahna me acukij na, quê ha ihtỳj amã catyt kam, ate me cumã harẽn xà atajê hahkre pej.

^22-23Nee ca ha me cupê hamreare atajê pê hamreare na harẽn xà kôt ame to kêanre nare. Ne nee cute mehcukij xà kam, cute me amji pytàr xà caxuw me cupê hamreare atajê to, ame amji to pejpej nare. Côt mã Pahpãm ihkrĩ rohnỳtti mã ata me hũtà, ne mencwỳrjapê cute me cupê hamreare atajê mã amji cawpa catêjê atajê to kêanre ne.

^24-25Ne nee me hũmre jàprêhti incryc xiti atajê to ame amji kwỳ nõ prãm nare. Côt ca ihhêaj to amji mã cute amji kam hapac xà atajê incwa, ne ihkôt apu apa, ne nee jũ caxuw cupê acator nare.

^26-27Ca ha nee jũm jũ jahpan xà na, gàmjõr na amji ton nare. Ampo na? Ca ihhêaj to gàmjõr nare, quê ha ihtỳj cute to new ata jahpan xà na, amji mã apê gikwa xà cunea to cutor tu.

²⁸Ca ha nee me aquêtjê te me amã pjê rer ata hyr xà jirô pê to apỳm nare, ne nee acahê na jũm jõ pjê ata to cupê incri nare.

²⁹Xà ajkĩ jũm te hàpên xà to impejti ata na amã hahkre pej? Quê ha ahtũm nare, quê ha hàpên xà impejti to cute hàpên xà ton ata na, me hõmpu. Quê ha pahhi cati impej nõ amji mã to cumã hàpên catê, quê ha cumã apê.

Me Hapackre Xà 23.1-35

^1-3Quê ha jũm jàmkrã cati te amji cahê na gàpên xà na gator na, ca ha ma hàmkrã cati ata na to amji japackrea ne. Ca ha ate gàpàn cati na, ca ha nee cuna mã gàpàn cati nare. Ca ha nee cupê cute hõ kur xà ata kur to gũjarên nare. Ampo na? Quê ihhêaj to cute amã ihhêj prãmte quê gato.

^4-5Nee ca amji to gakràj prãmte, gàpên xà to amji curan prãm nare, ne nee to pit mã, amji mã ahimpej to apa nare. Ampo na? Quê ihhêaj to gõ pore ita ihtỳj kam hara to hanea, pom quê hàcti kam hara mã to he. Ne ma to, ne apê ampỳa mã apu ipa.

^6-8Ne nee ca cute me hakràj cati to pit mã me amji kam hapac atajê cahê na gàpàn to prãm nare. Ca ihhêaj to ate cahê na gàpàn na, ca ha nee cumã hõ impejti ata kur to gũjarên prãm nare. Côt mã amã:

— Hipêr incrire ne krẽ — hane, ne cama apu amã ihhêj. Cute hõ ata jahpan xà na apê ampo catia pyr prãmte ri amã ihhêj. Ca ha ate ihkôt amji kam gapac, ne atỳj garte cati na, quê ha pea hõ ata jahpan xà na ana ahwỳ. Ca ha ate hacpỹa mã cumã hõ ata jõr xà na, atỳj to gõjahĩr prãm. Quê ha ampeaj kam cama akam incryc, ne nee ate cumã acakôc xà ata na apar nare.

⁹Nee ca apu cute me amji mã hamãr nare atajê me, nee catyt kam me ipa to prãm nare atajê mã, acakôc xà krã kreti atajê to acakôc nare, cute me apar to mã apu.

^10-11Ne nee ca me huwatĩ atajê pê me hõ pur to gàhkĩj prãmte, gõ pur hyr xà to apintuw, ne me hõ pur kam hãm nare. Ampo na? He por ihtỳj Pahpãm me huwatĩ to ajpa, ne me hamã, ata quê ihtỳj mehtehcajpa, quê me ahna apupu ne ate me to amji kam gapac xà ata to ana apkjê, ne to akên mã amẽ.

¹²Ampeaj kam cute me amji jahkre pej catêjê te me amã ampo to hahkre xà atajê na me kampa, ne hahkre pej ne amji mã anõ, ca ha quêt mã ca, amji krã krea japê.

^13-14Ne nee ca akra japackre jicu nare. Nãmri quê ha cute apar nare na, ca ha atỳj hũhcatêtêc. Quê ha ate hũhcatêtêc ita nee ihcuran nare. Quê ha cama to ihtyc xà jahpa.

^15-16Ỹhỹ, ikra xũmre. Ca ha ate akrã kreti na, wa ha ampeaj kam apyrên ijakry, ate acakôc xà krã kreti to acakôc ata pyrên. Ne wa ha itỳj ijakryti na amji cajpẽ.

^17-18Nee ca mehkên ton catêjê jũ na, cute amehkên ton xà atajê kĩn nare. Ate amji mã Pahpãm cupahti na, ca ha amcro cunea kam amji to ahcukij. Ita na quê ha acumam amã ate amji kam gapac xà impejti ne, ne por ca ampo pejti jikaj atajê, ca ha atỳj acwa.

^19-21Ỹhỹ, ikra xũmre ikampa. Ca ha ate amji jahkre pej na, ca ha atỳj caxwãm catia mã amji kampa. Ne nee apu cute me côxỳhti xenti catêjê kôt apa nare, ne nee ame hõ to mehtũm prãmti jàpàn catihti atajê kôt me apa na me amji to prãm nare. Ampo na? Pom cute me côxỳhti xenti atajê me, caxuw me hàpàn catihti atajê, ampeaj kam me hõtxwa, mã cama me hikwa ne ame gõr. Ne me cupê ampo hamreare, mã mehkà kêanre kam ame ipa.

^22-25Apãm kampa, cute gapackre xà atajê cunea na. Ampo na? Ate impar na ri amã impej. Ne anã krã kreti ata, ca ha atỳj kampa, ne nee ca ramã ihwej kam apu impar caca nare. Ne por ampeaj kam ampo pejti to hahkre xà atajê, ca ha kampa, ne amji mã huwahi, ne catyt kam apejti na apa, ne nee jũ caxuw amji pê to gapac kêt nare. Por me hũmjê nõ mã ihkra xũmre te catyt kam ipa, ne ihkrã kre ata, quê ha ampeaj kam hũrên hakry. He apyrên apãm jakryti na to, quê gũrên hakryti ne. Ne anã to hanea, ne cumã amji kĩnti jakryti to.

^26-28Ỹhỹ ikra xũmre, acaxwỳn cunea to, ite gapackre xà itajê kôt ca amji to, ne ampeaj kam ahna ikampa. Ne mempijapit pê ampỳa mã apu apa. Nãmri me cupê me gõ pry tête me akên mã me arẽn catêjê. He me cupê ihhêj rũm aracri cute me apê ampo to hàhkĩj catêjê pyràac. Ne cute me hũmre jàhtôa ne ramã me cumã ihhêj, côjkwa kam Pahpãm me, mehprõ mã cute mehhêj prãmte.

^29-35Jũm mõrmõ hĩ kam cute amji pupun xà kêanre me, ihkàj xà te cumã hipu? Mẽr jũm mã ihtỳj ame ipijapu xà mã incjêj to ipa, ne mehkên mã incjêj to ipa? Ne mẽr jũm mã hõtpê me haxôp, mã ihkàj xàa na ipa? Ne mẽr jũm mã hõtpê into kàhtuhti ita na apu ipa? He jũm nare, por me hũmre nõ me hàkrun xà kam apu ipa, ne cormã mã ihtỳj ajpẽn caxuw côxỳhti to ajcacwa, ne to ikõ ata te ri hajỹr.

Ne nee acuhhê ne mehkõm xà kam ampo cacô xỳre jiwrỳhti ata pupun nare, nãmri ampeaj kam hỳ pahtỳj. Ampo na? Quê ha ihtỳj itajê cunea jicu xàa kam hacpỹa mã cupê cagã kêanre ata pyràc, ne ihtỳj axa ne acura!

Ca ha ampo te jũa na ata pupu, ne atỳj garkwa te amji jahkre kêatre ata nõ to acakôc. Ne ato kam waj akam tẽ, ca ha apê ihhêj rũm cô harô to imprar kam, pàr kre kam me ipa atajê pyràac, ne atỳj ampo kam garij to apa, ne to amji jahyr to apa, ne atỳj apu apỳpỳm to mõ. Ne ampo na mã ca ha apy ne ahna amji juwahi?

Ne ana ahtũmre, ca ha cormã jũm ata te acahhyr na amji cajpẽ, ne amji mã garkwa to:

— Mõrmõ jũm aracri apu icahhy, wa nee ite ikàj xà nõ na amji cajpẽr nare — hane. Ne cormã akrã ajrõ, ca ha amji mã garkwa to:

— Jũ caxuw wa ha ajte ikrã impej ne xa? Wa tee apu ixãm to hahkre. Wa ha to xa ne itỳj hipêr ihkwỳ incrire ne to ikõm prãm — hane.

Me Hapackre Xà 24.1-22

^1-2Nee apu mehkên catêjê jũ na mehkên kĩn nare, ne nee ame to amji kwỳ prãm nare. Ne mehkên catêjê me hàprê to pit mã ame amji kam me hapac to me ipa, ne mehcakôc xà kên to pit mã mehcakôc to me ipa.

^3-4Ca ha ate ampo pejti to acukrêj to prãm na, ca ha xa akrã kreti to gakràj, ne cormã ampo pejti pê acukrêj atajê to gakràj. Hõhõ, ita na ca ha me akra te me amã ampo na prãm xà atajê cunea to me cumã, ne me cumã agõ.

^5-6Ne quêt mehkrã kreti ita ri mehhi tỳj jirôa pê impej. Ca ha jũ caxuw apijapu prãmte me ipijapu catêjê wỳr axà, ne nee amji pê cute me amã ihkrã kreti to hahkre catêjê atajê to gapac kêt nare, mãr quê me amã akrã kreti to hahkre. Quê me amã ampo to hahkre catêjê me hàhtôa to me hàhtô, ca ha cute me ampo to hahkre xà itajêa kôt atỳj me hirô pê xa.

⁷Ne por amjia kôt ame ipa to prãm atajê, quê ha jũ caxuw mehkrã kre nare, cwỳrjapê ca ha nee cute amã ate catyt kam ampo to hahkre xà na ihwỳr nare. Ampo na? Ampo to quê amã hahkre?

^8-9Por me hũmre hãn ne mehkwỳ cuna mã amji mã, cute amji kam me hapac xà kêanre capô, mã ahna me hahkre pej, atajê ri hãn ne mehcunea kam mencryc, ne me cupê ampo kên cunea xakat. Ne por mehkrã nare atajê cakôc xà kêanre, mã hãn ne ihtỳj mehkên mã me curẽ. Ne por mehcunea ihtỳj ame cumãn to, me cumã me hàhcahhõn to me ipa atajê kam ri, mencryc pit.

¹⁰Quê ha akam ampo kên te cator xà ata kam, ate kam akrã pictor tu na, ca ha apê jũm peacre caprĩ xàre ata.

^11-12Ne por cute me jũm curan xà caxuw me cupjê ata, ca ha ajte mehtehcajpar ne me hũtàr to hahkre xà kaj na, ca ha ajte ahna me amji jarẽn to:

— Xà aracri ite amji kam ijapac xà, wa ajte ihcote na axà? — hajỹr na, ca ha atỳj Pahpãm te me pahcunea mã, me pahte amji kam me pajapac xà pupun na, me to amji japackrea ne. Ampo na? He quê ha ihtỳj Pahpãm te ampo kên na me pahpupun xà atajêa jahpan xà na, me pamã me pahkên atajêa to amgõ.

^13-14Ỹhỹ ikra, pen ca ku, ne inxôti ita na ihcajpẽ, quê ha acajpuaw. Ahnaa mã ca me pen cajpẽ mã garkwa kam inxôti he. Jĩkjê na mã, ate me amji jahkre pej krã kreti ita me acaxwỳn mã impeaj to impej. Ca ha ate to hamãr na, quê ha acumam amã ate amji kam gapac xà cunea amã ihkênre nare. Na ca ha nee amji pê ate hikaj ata to apictor prãm nare.

¹⁵Ne ca, me hũmre nõ kêanre ita! Nee ca apu hũmre krã kre te amji jahkre pejti ata jũrkwa wỳr arĩt nare, ca ate cupê ampo pytàr, ne cupê ipyr prãmte, ca apu hỹrmã rĩt. ¹⁶He mehkrã kre catêjê ihtỳj me hipy mã me acjêj, ne hõtpê hacpỹa mã mempej mã me acjêj, ne mehcuhhê. Ne mehkên catêjê, quê ha mehkĩnte mehkên kam mehpahàmti atajêa kam me hamre.

^17-18Pahpãm ihtĩar ihkrĩ rohnỳtti mã ata mã mehkêanre catêjê to hamre prãm nare, ne quêt cama cumã cute mehkên ton jicu na to prãm. Na ca ha nee ame acurê xwỳn kên xà kam mehpahpahàmti atajêa kam me hamre atajê pyrên ame gakry nare. Mã Pahpãm ahna me gahkre pej, ne ahna cumã me akĩn nare ne, quê ihhêaj to cute gahpan xà na acurê xwỳn to kên xà ata jicu.

^19-20Ne nee cute ame to kên xà kôt, cute amji to me cati atajê jũ na apu akrihkrit nare. Ne nee me hũ na amehkên to atajê kĩn nare. Ne cute mehkên ton catêjê cumam me cumã, nee cute me amji kam hapac xà impejti hamreare. Ne ihhêj rũm me cupê ramã ihpôc xà tyc xàa wỳr, ne ihpôc crire ne.

^21-22Ỹhỹ ikra, he amji mã, por Pahpãm tĩar rohnỳtti mã ata cupaa ne, ne amji mã pahhi catêjê cupa. Ne nee, por ame pahhi cuna mã, ame kam incryc atajê mã acjêj nare. Ampo na? He Pahpãm pê Pahhiti, quê ha cute me hajỹr catêjê to hamre, me mõr pejti kam.

Me hirôa pê me pahprõ pejti ita

Me Hapackre Xà 31.10-31

¹⁰Ỹhỹ ikra, ita caxuw wa ha aprõ na ato ihimpej, ne amã to hahkre. Pyjê jàhtôa to hàhtô, ne jũ wỳr ca ha uu ne me catàtkre na aprõ nõ impejti ata mã acator pyrentu. Nãmri ca ha ate me catàtkre na cumã acator na, ca ha amji mã huwahi to impeaj ne, nãmri ihpore jakôtti ita jirôa pê impej. He me pahprõ pejti te hajỹr, pom quê ite me amã ampo jarẽn itajê he.

¹¹Mã ramã impjên te hĩxi pejti ita pupun pejtu ihcunea na, na ri nee jũ caxuw cupê ampo hamreare nare.

¹²Mã amcro cunea kam, cute amji kam hapac xà cunea kam to impejti to ipa, rỳ jũ caxuw cute apu amji pê to kên nare.

¹³Ne hõtpê ampo cunea to hàpên to catia to ipa, ne mehkra mã cupẽhkà te mehkà ton to ipa.

¹⁴Ne cupê, pom hãn ne pàr kre hũwry catia pĩn ampo to ipa atajê pyràac, ne hũwry catia pĩn hãn ne hũrkwa wỳr amji mã hõ to hapôj, mehkra wỳr.

¹⁵Ne hãn ne awcahti xà wỳr ihkrĩ, ne mehkra mã apu hõ ton to ipa. Ne ma cumã hàpên catê pupu, ne hamãr to ipa, ne ma cumã harkwa jirê, ne to ihhimpej to ipa.

¹⁶Ne por hàpên to ipa ita jõ porea to, me cupê amji mã hõ pjê jũhkà, ne kam amji mã pĩxô pejti kre to ipa.

¹⁷Ne hàpên xà cunea caxuw ihcuhtỳjre.

¹⁸Ne cumã hàmjixur pejti na hahkre pej. Na ri ihtỳj to hĩ to ahwỳa to ahwỳ. Ne ampo pej pit japrôr to ipa, ne hãn ne hàpên to caxwa rytu.

¹⁹Ne taa amji mã to cupẽhkà hy, ne amji mã to ihkà.

²⁰Ne hãn ne me cupê ampo jamreare atajê tehcajpa, ne me cumã ampo jõr to ipa, ne ame hàhwỳr to ipa atajê mã ampo jõr to ipa.

²¹Quê ha krya to kry, quê ha nee apu amji mã hũpa nare. Ampo na? Ihtỳj mehkra mã mehkà.

²²Ne ihtỳj amji mã me hàhpro xà to, na ri ihtỳj taa amji mã ihkà hẽrhẽtre tỳjre ata to, ne to ihkà.

²³Mã mehcunea amji mã mempjên pejti na harẽ, ne ihtỳj amji mã me hũpa to me ipa. Ne ampeaj kam me cumã cati, hõ krĩ ata kam.

²⁴Ne ihtỳj ahhy, ne cute me hũhkàr catêjê mã ihpore na to ahpa.

²⁵Ne catyt kam ipa. Ne nee cumã cute amji to ipijapar cupa nare, ne cumã ahna mehpahàmti xà.

²⁶Mã ihcakôc xà te amji jahkre pejti, jàhcaprĩhti to ihcakôc to ipa.

²⁷Ne jũ caxuw apu xuwcaca nare, ne ihtỳj mehkra jamãr to ipa.

²⁸Mã mehkra amji mã me harẽn pejti to me ipa. Mã impjên ihtỳj amji mã hĩxia jarẽ, ne amji mã harẽn to:

²⁹— Mehprõ kwỳ kên nare cakrô, ca me hirôa pê apê iprõ impejti — hane.

³⁰Ỹhỹ, ikra, pyjê jĩ cunea na impeaj to mempej cakrô, quê ha impejti ita ihtỳj jũ caxuw ihwej, ne ihcunea na impejti ita hamre.

Ne por pyjê kwỳ quêt amji mã Pahpãm tĩar cupahti atajê, quê ha ihtỳj quêt amji mã mempejti na me harẽn rohnỳtti mã.

³¹Ỹhỹ ikra, ca ha ate amji mã aprõ te hajỹr nõ mã acator na, ca ha amji mã to impeaj ne, ne hãn ne cumã garkwa to:

— Ihcunea na imã akênre nare gàpên xà me, acakôc xà cunea kam. Mã mehcunea amji mã me garẽn to impejti to me ipa — hane. Hamre.