PIRIP

PIRIP JÕ KRĨ WỲR

Pawrô Jõ Kàhhôc

Ỹhỹ, pê Pawrô pê Jeju jarkwa na memprar catêjê nõ, ne Roman jõ krĩ kam me hacjên xà kam ihkrĩ, ne pê Pirip jõ krĩ kam, Jeju na mehkwỳ mehkrĩ atajê mã hõ kàhhôc ita kujate. Na pê hõ kàhhôc ita japrỳ pê Pirip Jõ Krĩ Kam Jeju Na Mehkwỳ Jakrã Mehkrĩ Atajê Wỳr, Pawrô Jõ Kàhhôc (Pirip).

Ne pom cu me hõ kàhhôc cahyt ita kam, Pawrô te me cumã amji jarẽn to hajỹr he. Me hacjên xà kam cute amji pupun kêanre cakrô, cormã cumã amji kĩn. Mã Pirip jõ krĩ kam Jeju na mehkwỳ te me Pawrô tehcajpar prãmte me cumã ihpore kujahêc, mã cute ipyr, ata pyrên ri hakryti na amji jarẽ. Ne me hacjên xà kam ihkrĩ cakrô, ihtỳj me hàhtôa mã Jeju pê me pahpytàr catê na harẽ. Ne hanea ne ihtỳj Jeju te amji kam hapac xà tuw pejti kôt kypê ipa nare na me cumã harẽ.

Pawrô te amji jarẽn xà

Me Hàpên Xà 16.12-40; 20.6

¹Hàpà me ikwỳ, pom me apê Jeju na mehkwỳ, ca Pirip jõ krĩ kam ame akrĩ atajê. Ipê Pawrô, ne ipê Jeju Crixtô mã ijàpên catê. Ne itea wa Timot me, pom ca ramã Jeju na ate me ajpẽn hônco tu atajê mã ihkàhhôc ita ton. Ne pom ihkàhhôc ita te hajỹar ne me akwỳ to mehhimpej catêjê pupun catêjê atajê me, me akwỳ tehcajpar catêjê mã, wa ite mehkujahêc. ²Imã Pahpãm pê me pajõ Inxũ Cati me, me pajõ Pahhiti pê Jeju Crixtô te me ato impejti na me ato prãm. Ne cute me acaprĩ, ne me acaxwãm pê me acaxwỳn kam, me amã me acarĩcti impejti jõr to ipa na, imã me ato prãm.

³Ne wa hãn ne me ato amji japackre, ne me ana Pahpãm mã icakôc, ne cumã me ate amji kam me gapac xà pyrên ijakryti na amji jarẽ. ⁴Ne wa hãn ne me acajrẽn kam pra, ne imã amji kĩan kam me acajrẽn.

Cute me Pawrô tehcajpar pyrên hakry

⁵Ampo na mã me apyrên ijakry? Nee mã ampo na nare! He pê ca mam me icahê na, Jeju to me gũjarẽn pejti to me harẽn na me itehcajpa, ne ahnaa cormã me to xa. ⁶Ne imãa, quê ha Pahpãm me amã me ate amji kam me gapac xà to ipintuw to mõr ita na, ne ahnaa to xa ita kam, quê ha ahnaa jũ caxuw Jeju Crixtô te hacpỹ ne amji jaxàr xà jõ amcro kam ahtwỳ, quê ha me pahto impej pa, to wa pa apu amji kampa.

⁷Imã me akĩnti incwỳrjapê, wa itỳj amcro cunea kam me ato amji japackre. Ne jũ na ri ampeaj kam imã impej? Nee mã jũ na nare. Ca gõtpê hãn ne icahê na me gàpên to me apa, ate me itehcajpar prãmte. Na wa Pahpãm jarkwa kôt mehcunea mã Jeju pê me pahkritxwỳ jarẽn xà impejti to harẽn to ipa, mãr quê me kampa ne me hũnã. Ne quê ha jũm te apu Jeju te amji kam hapac xà cuna mã ihcakôc kên to mõr na, wa ha itỳj intête cumã awjarẽ ne cupê hũtà. Na ca ramã me hacjên xà kam, ijỹr xà ata kam, me itehcajpar to me apa. ⁸Imã me akĩan to me akĩn te hajỹar, pom quê Jeju Crixtô mã me pahkĩan to me pahkĩn he. Ne Pahpãm mã ri ijahkre pej, por wa ampeaj kam ite me ato ijapac xàhti na amji jarẽn ata na.

Pê Pawrô Pahpãm mã mehcajrẽn

^9-10Ne wa ijõtpê Pahpãm mã me acajrẽn to hane he:

— Me ijõ Inxũ, Pirip jõ krĩ catêjê mã ajpẽn kĩnti to, quê me cumã ajpẽn kĩnti ita, ma me cumã ipicamẽn to mõ. Ne me cumã mehkrã kre te amji jahkre pejti gõ, mãr quê amji mã me ampo pej pit capi to me ipa ata to, ma me cumã apicamẽn to mõ — hane. Ita to wa ijõtpê Pahpãm mã me acajrẽn to amji kam ijapac to ipa. Hõ, ita na quê ha jũ caxuw Jeju te amji jaxàr xà jõ amcro kam ahtwỳ, ca ha me akên pê me apejti ne, ne me apahàm pê me acato, quê nee jũmjê me ato ihcakôc kên nare. ¹¹Quê ha Jeju Crixtô me acaxwãm pê me amã me acaxwỳn to ihtỳj. Ca ha Jeju cuxà amji kam me gapac xà impejti to me apa, quê ha mehcunea ahna me gõmpu, ne me amji mã:

— Pỳhàpà! Ampeaj kam ri Pahpãm me cumã ampo to hahkre, ne mehtehcajpa, mã ita caxuw mehkênre nare, ne catyt kam me amji to ajpa. Ne Pahpãm ita ri catia to cati ne impej — hane.

Pawrô me hacjên xà kam ihkrĩ ita na, nee cute cumã jũ mãn nare

Me Hàpên Xà 28.30-31; Epet 6.19-20

¹²Jeju kam ajpẽn to me ikjêjê atajê, nee apu ijũ na me akrihkrit nare, ne nee ampo na amji mã me ito põ mã quê nare. Cute me ito kên catêjê te me ito kên crire nare, me hacjên xà itajê kôt. Cakrô wa itỳj mehcunea mã Jeju jarẽn pejti jarẽn to ixãm ita na. Mã ramã me hàhtôa te me hahkre pej to mõ. ¹³Ne Roman jõ pjê jõ pahhiti jũrkwa kam cute me hamãr catêjê me, kam mehkrĩ catêjê me, mehcunea te ramã me ijahkre pejtu. Ampo cwỳrjapê? Nee mã ampo cwỳrjapê nare. He ipê Jeju mã ijàpên catê, na ri ma ame icurê, ne cute me ijaxàr, cwỳrjapê wa me hacjên xà ita kam ikrĩ, mã mehcunea te me ijahkre pej. ¹⁴Ne Jeju kam me pahkjêjê kwỳ jàhtôa ne me hacjên xà ita kam me ipupu, ne xwỳ kam Jeju to amji mã mehhimpej to me ipa nare. Hõ, ita cãmtà rũm ri nee me cumã jũm cupa nare, mã ihtỳj Jeju to mehcakôc kam pra, ne nee amji na me ampo cãmjĩ nare.

^15-18Ne me pahkjêjê kwỳa kwỳ mã ikĩn nare cakrô, mã ihtỳj icuxà me Jeju to hũjarẽn to me ipa. Ampo na? Nee mã ampo na nare. Pom jũmjê itajê te ito ipipẽan prãm to ri, ihtỳj hãn ne Jeju to me hũjarẽn to me ipa. He ijũ na me cumã amji to prãm, na ri ame hane. Ne ampeaj kam me ipijapu xi, ne cama me hacjên xà ita kam imã ite amji pupun xà kêanre to me ipicamẽn to prãm. Ne ampeaj kam cama ita jũ na imã amji kĩan to amji kĩn. Ampo na? Ihtỳj Jeju Crixtô to me hũjarẽn to me ipa na ri. Ne mehkwỳ nare, quêt me cumã ikĩn, cwỳrjapê ri ihtỳj Jeju to me hũjarẽn to me ipa. Ampo na? Por wa ite me cumã Pahpãm jarkwa cràn ata, nee mã ihhêj xi nare. Ne ampeaj kam ite me cumã ihêj xi jarẽn nare na, cute me ijahkre pej. Ne Pahpãm te ri ijàpên xà ita caxuw ixãm.

¹⁹Ne ampeaj kam me gũ na ijakry. Ampo na? Wa itỳj me ate Pahpãm mã ina me acakôc na, amji mã me ato hane. Na wa apu ijakry, ne itỳj jũ caxuw, Jeju Carõ Pejti kôt, ite me hacjên xà ita pê icator na, amji to hane.

Pawrô nee hũ na Jeju pahàmti xà atajê nõ ton prãm nare

²⁰Pê Pahpãm imã, ite amji kam ijapac xà ita mã cato, ne imã ijàpên xà ita gõ, wa ikrĩ ne to pit mã apê. Ne imã jũ caxuw ijàpên xà ita kam ipec prãm nare, ne cama kam itỳjti, ne imã ijũcanãr to prãm pit. Ne ite amji kam ijapac xà ita kam, imã ijũcanãr tỳjti to prãm, pom ahnaa mã wa ita kam ton to mõ, ita na wa ton to imõr to prãm. Ne imã itĩar kam, amji mã Jeju japrỳ to ipicamẽn to prãm, ne hanea ne ityc xàa kam, imã amji mã to ipicamẽn to prãm.

²¹Ne imãa itĩar na ipa ita na impej. Ampo na? Wa hãn ne hõtpê itỳj Jeju to amji mã ihimpej to ipa. Ne ityc na ri itĩr jirôa pê imã impej. Ampo na? Wa ha jũ caxuw ty, ne ma Jeju wỳr api, ne curia cahê na ikrĩ rohnỳtti mã. ²²Nãmri wa ha ite itĩr ita na ipa na, wa ha itỳj cormã ijàpên xà impejti ita kwỳ to ijàpên cri. Ne itỳj hipêr Jeju wỳr mehkwỳ to apkjê. Ne jũ wa ha ajte amji mã capi? ²³Nãmri imã pry pijakrut na wa ha amji mã ihnõ capi. Ne imã, ite amji kam ijapac xà ita jicu ne ityc, ne ma Jeju wỳr ijàpir, ne cahê na ikrĩ na, imã amji to prãm. He ita na ri imã impeaj to impej. ²⁴Ne ite me atehcajpar to prãm to ri, cormã ita ri imã ipa to prãm. ²⁵Cwỳrjapê wa itỳj cormã pjê kam me acahê na ipa na ite amji jahkre pej. Ite me atehcajpar, ca ate me apicamẽn to me amõr, ne Pahpãm to amji mã me ahimpej kam me gakryti na, ca me amji to mehprãm. ²⁶Wa ha cormã me awỳr amji jaxà, ca ha me ipupu, ne ampeaj kam me gakry. Ca ha ate me Jeju Crixtô japrỳ to apicamẽn to prãmte me to gũjarẽn to:

— Ampeaj kam Jeju cati ne carôt tỳj ne impej, cwỳrjapê ri hacpỹa ne cute me pamã Pawrô kujahêc — hane.

Cu ha pahtỳj me pahte amji pupun xà kêanre ata kam awcanã

Juta 3

²⁷Nare, wa ha nee me awỳr icator nare cakrô, wa itỳj me garẽn par to prãm. Ne pom ite me amã harẽn itajê cunea jirôa pê impej catia ata na ri, imã me ato prãm he. Ca ha me acunea catyt kam, me apejti kam, me Jeju pê me pahkritxwỳ jarẽn pejti itajê to pit mã, amji to me apijapar to me apa. Ne imã me acuhtom pej pêa mã, ate me gàpên xà pê Jeju jarẽn pejti to, ate me amji cujtên to me apa na imã me garẽn par prãm. ²⁸Ne nee ca amji mã me acurê xwỳn te Jeju cuna mã mehcakôc xiti itajê cupa nare, ne cama me cuna mã amji to mehtỳaj ne. Quê ha amji na me acajpẽ, ne amji mã me garẽn to:

— Co he! Quê ha me cumã me pahcupa nare ita kam ame hane, ne ihtỳj me pajirô pê xa — hane. Ampo na? Quê ha ihtỳj Pahpãm ate me hirô pê axãm xà caxuw me amã me acarôt gõ, ca ha atỳj me mentête hahê ne hirô pê xa, quê ha me hamre. ²⁹Ne Pahpãm te, ate Jeju Crixtô mã me gàpên xà na, me apyxwỳr. Cwỳrjapê ca ha me kampa, ne ma amji mã me to ahimpej to me apa kam, me to acrà tu ne. Ne hanea ne icuxà cumã me amji pupun xà kêanre to me amji pupun to me apa.

³⁰Pê ca ramã me pahcurê xwỳn pê, ite Jeju te amji kam hapac xà pytàr na, me ipupu. Pê wa ite amji pupun xà kêanre ita me ajco amji cujtên to ipa, pê ca ahna me ijarẽn pa he. Na ca ha ita kam icahê na ate me hũtàr prãmte, cu ha pahtỳj me amji cujtên to me papa rohnỳtti mã. Na ca ha hanea ne, icuxà ikôt me amji pupun xà kêanre to me amji pupun to me apa.

Me pahte amji kam me pajapac xà pyxit peaj kôt, cu ha me amji kampa

Roman 15.5-6; Epet 4.1-6

¹Imã me acunea te cuprõn ne amji na me ahônco tu na, me ato prãm. Ca ramã Jeju Crixtô to amji mã me ahimpej, cwỳrjapê ri ampo cunea caxuw me amã me acarôt tỳj. He ramã Jeju mã me akĩn na ri cumã me acaprĩ. He ramã Pahpãm Carõ Pejti te amji mã me ato cuprõn, ne ate amji kam me gapac xà to me amã pyxit peaj. Cwỳrjapê ri me acaxwãm pê me amã ajpẽn kĩn, na ca atỳj me ajpẽn caprĩ to me apa. ²Pom wa ramã me apyrên ijakryti na amji cajpẽ ita na, wa ha hipêr me ana ahwỳ, ca me imã ijakryti ita to ajcamẽ. Ne imã me ate amji kam me gapac xà pyxit peaj to, ate amji kam me gapac na me ato prãm. Ne mam me amã ajpẽn kĩn ita jirôa pê, quê me amã ajpẽn kĩn, ne quê me acaxwỳn cunea ajpẽn kam pyxit peaj. ³Ne nee ca me gàpên xà to me amji cajpuaw prãmte ame gàpên nare, ne nee amji pejti na me amji jarẽn nare, ne nee amji to me acati to me apa prãm nare. Ne quêt cama me amji mã:

— Mõrmõ ijirôa pê mehcunea cati — hane. ⁴Ne nee apyxit peaj ne ate amji kam me gapac xà ata to amji mã me ahimpej to me apa nare, ne quêt atỳj me akwỳ te amji kam hapac xà to me hanea, ne me amji mã me ahimpej to me apa.

Pê Jeju me hirôa pê cati cakrô, nee amji to cati prãm nare

Jowãw 13.12-17; Epet 1.20-23; Ipipẽ Xà 5.1-14

⁵Ne quê ate amji kam me gapac xà pê, Jeju Crixtô te amji kam hapac xàa. Ne Jeju jarẽn xà ita ca ha me kampa, ne ihkôat me ton to me mõ.

^6-7Ne Jeju me Pahpãm pipẽan,

ne catia to cati cakrô,

pê nee cumã amji jarẽn to:

“Wa papipẽan rohnỳtti mã na amji to prãm” hajỹr nare.

Ne quêt cama cumã amji cuprãr tu,

ne côjkwa jicu, ne pjê wỳr wrỳ,

ne me paxũmrea na amji to,

ne cama amji to me pamã hàpên catê.

⁸Ne nee amji to cati prãm nare,

ne quêt pjê kam Hũm jarkwa kôt apu ipa,

ita kam ahnaa pĩ kam ihtyc.

⁹Cwỳrjapê pê Pahpãm hipêr to ajcamẽ,

ne to catia to cati,

ne mehcunea jõ Pahhiti na hãm.

¹⁰Ne cute Jeju japrỳ to me cati prãm to,

quê ha côjkwa kam me ipa catêjê me,

pjê kam me ipa catêjê me,

pjê krac ri cute me harêt catêjê me,

Jeju cuna mã mehkõn krã na me jỹ,

mehcunea kam mare mã,

ne me harẽn to hane he:

¹¹“Jeju Crixtô pê ri quêt mehcunea jirô pê Pahhiti cati” hane.

Ita na quê ha mehcunea Pahpãm pê Jeju Pãm peaj na me hahkre pej,

ne mehkwỳ mã harẽ.

Pê Pahpãm ri me pamã me pahcarôt to ihtỳj

^12-13Pê ca atỳj, imã me ijõ ikwỳ nõ kĩnti catêjê atajê, ajco me ikampa, ne wa ha ita caxuw ite ame acahê na imõr nare cakrô, ca ha atỳj ampỳa mã amji mã me ikam gapac to me prãm. Ne Pahpãm mã catyt kam me apa, ne ajpẽn na me ahônco tu na, cumã me ato prãm. Cwỳrjapê ri me acaxwãm pê me ato ihhimpej, ne ate mempar prãmti na me atehcajpa, ne ate ihkôt me amji ton na me atehcajpa. Ne me gĩkjê kam me ato ihhimpej, ca me gĩkjê kam, hanea ne me kampa ne amji mã me hũpa, me gàpên xà me, me ate amji kam me gapac xà kam. Hõhõ, ca ha me hane, ne me gĩ cunea kam me apejti ne.

Cu ha catyt kam me papa, mãr quê me pahkôt hanea ne catyt kam me ipa

¹⁴Ca ha ate amji kam me gapac xà cunea kam, nee ajpẽn mã me gàhcahhõn nare, ne nee ajpẽn krac ri me acakôc nare. ¹⁵Ca ha ate me hajỹr na, ca ha ampo kên cunea na me gamreare ne, ne nee me ate amji kam me gapac xà tũm nare, ne quêt ihtetetti ne. Ne me apê Pahpãm kra impejti cwỳrjapê ca ha me hane. Ca atỳj mehkên me, cute me amji kam hapac xà kêanre tũm, kam awcapàtkôti atajê jipôc ri ame akrĩ. Ne atỳj me cumã Pahpãm te amji kam hapac xà kôt harẽn to me akrĩ. Mãr quê hanea ne me acuxà, ate amji kam me gapac xà itajê mã me acjêj. Ca me gàpên xà ita kam, me apê ihhêj rũm côjkwa kam awcapàtkôti kam caxêre prà tetetti atajê pyràac, ne me apràti ne. ¹⁶Wa ha me apyrên ijakryti ne, por jũ caxuw Jeju Crixtô te amji jaxàr xà jõ amcro ata kam. Ampo na? Nee mã ampo na nare. Curi quê ha mehcunea me ijahkre pej, por pê wa ramã me amã ijàpên xà tỳaj to, ata na, ne nee me apê kôt hamreare nare na.

Pawrô mã hakryti ita to, me hakryti na me to prãm

¹⁷Pê ca ramã Pahpãm mã me gàpên to catia to cati, ne kam me amji pupun xà kêanre to me amji pupu. Ne me apê gàhcukrêj crêre cakrô, ca atỳj me imã ampo gõ, ate Pahpãm mã ijàpên xà ita tehcajpar prãmte. Ne ate itehcajpar prãm ita pê ihhêj rũm ate Pahpãm mã me ampo jõr. Ne Pahpãm to ate amji to me ahimpej prãmte, ca ame itajê to hane. Ne ate me ampo itajê ton xà kam, ajco ampeaj kam me gakry. Wa ha hanea ne ipê me apyràac, ne itỳj amji pupun xà kêanre to amji pupun to ipa, Pahpãm jàpên xà ita cwỳrjapê. Ne quê ha ihtỳj jũ caxuw amcro nõ na me icura, wa ha ipê me apyràac ne Pahpãm mã icaprô gõ ne ty. Ne wa ha ipê me apyràac ne ampeaj kam ita pyrên ijakry to hanea, pom quê ca mam ame gakry ita na he. ¹⁸Quê ha jũ caxuw me ito hane, wa ha ijakrya ne nõ. Ca ha me ca xwỳjê icuxà atỳj me gakrya to me gakry.

Quê ha Pawrô Timot te me hõmpun prãmte, ihtỳj me hỹrmã ihkujate

¹⁹Quê ha ihhêaj to me pajõ Pahhiti pê Jeju mã me amã Timot kujahêc pyrentu to prãm na, wa ha me amã ihkujahêc pyrentu. Quê me apupu ne me gahkre pej, ne hacpỹ ne amji jaxà ne imã me garẽ, mãr wa me garẽn pejti impar xà kôt, ma amji mã icarôt to ihtỳj. ²⁰Ne Timot pê ipyràac ne pyxit peaj, ne ihtỳj me ato amji kam hapac to ipa. Ne ihtỳj me ate Jeju kôt amji to me apicamẽn na cumã me ato prãm. ²¹Ne ihkĩnte mehkwỳ cunea te nee me hajỹr nare, ne cute me amji kam hapac xà to pit mã me amji kam hapac to me ipa, ne nee Jeju Crixtô te amji kam hapac xà to me amji kam hapac nare. ²²Ne nee Timot te hajỹr nare, ne ihhêj rũm cupê ikraa, ne ihtỳj icahê na mehcunea mã Jeju jarẽn pejti jarẽn to ipa na, ramã mehcunea te me hahkre pej. ²³Wa ha ita ri cute ame ito amji kam hapac xà na me hahkre pej jirô pê mã, wa ha amũ me awỳr ihkujahêc pyrentu. ²⁴Ne wa hanea ne itỳj me awỳr ikràr. Na wa itỳj me pajõ Pahhiti pê Jeju te me awỳr itẽm na ijamãr na, amji mã to hane.

Quê ha Pawrô ma hacpỹ mã me cumã Epaprôti kujate

²⁵Ne pê ca me imã me pahtõ pê Epaprôti kujate, cute ite amji mã ampo na prãmti xà itajê na itehcajpar prãmte. Ne ramã cute icahê na hàpên xà ita me, ajpẽn cujtên crire nare. Na wa itỳj hacpỹ mã me amã ihkujahêc prãm. ²⁶Ne ampeaj kam ri ramã Epaprôti mã me apupun prãam to me apupun prãm. Ne ihtỳj hà na ate me hahkre pej na amji mã me ato hane. Ne hà ita na, ate amji mã me to põ mã quê na, amji mã me ato hane. ²⁷Ne ampeaj kam pê hàa to hà, ne ajmãr ty. Pê Pahpãm mã caprĩ pê caprã, pê hacpỹa mã impej. Ne hanea ne Pahpãm mã ramã ite me to ijapac xàhti ita na icaprĩ, na wa nee hipêr kam icwỳr nare to prãm. ²⁸Cwỳrjapê wa itỳj hacpỹa mã me amã ihkujahêc to prãm, ate me hĩa pupun ne hacpỹ mã me amã amji kĩn prãmte. Wa ha pa xwỳjê imã amji kĩn nõti ita jũa kam ipê tẽ. ²⁹Na ca ha Epaprôti pê Jeju kam me pahto ihkjê ita to me gakrya kam me amji pytà. Ca ha atỳj amji mã me hũmre atajê cupa. ³⁰Ne cute Jeju Crixtô jàpên xà kam amji mã ihtyc cupa nare, cwỳrjapê ri ihkên mã hàr, ne ajmãr ihtyc. Ampo na? Ca ampỳa mã ipê ame apa, ne jũ wỳr ca me itehcajpa, mã me gaxà kam cute itehcajpar. Na ca ha atỳj amji mã me hũmre ata cupa, ne catia na amji mã me to hane.

Pê Pawrô amji caprỳ to Pahpãm te ahna amji caxàr prãmte ampo cunea to

Pirip 2.18; 4.4

¹Ne ijàhhôc ita jicu xà kam, me ikjêjê, imã me ate Jeju kam me gakryti na me ato prãm. Xãmte, cormã imã me amã ihnõ ata jarẽn xà. Ne pê wa ramã amã harẽan xà na, wa ha hipêr amã ahna ihhôc. Ne hipêr ite ahna me amã ihhôc xà ita te me amã jũ mãn nare, ne nee hanea ne imã cute ahna jũ mãn nare.

²Co he! Ma amji na me hũmre kên pê rop na hamreare pyràc atajê to me guphê! Nãmri ihtỳj me apê me akà kwỳ jakep to prãm to, me amã hũjarẽn to hane he:

— Gapacta ne Jeju to amji mã me ahimpej, ne hanea ne me ipê Juta catêjê quêtjê te amji to me icaca xàa kôt me apy kà kwỳ to kryjre ne me hakep. Hõ, me acaca xà pijakrut itajê to, ca ha me, quê ha Pahpãm ihtỳj me amã amji capa ne me apytà — hane. ³Ne ame amã ihhêj xia jarẽ. Ampo na? He cu ha me amji kà kwỳ jakep ita nee me pahto Pahpãm kra impej nare. Ne quêt Pahpãm Carõ Pejti ri me pamã Pahpãm to hahkre, mãr cu me hahkre pej ne amji mã me hũpa, ne me pamã ihkĩnti ne, quê ha taa me pahto amji kra, cu ha Jeju kam me amji hônco ne ampeaj kam me pajakry. Ne pom xwahna Juta catêjê jõ amji kĩn me, cute me amji kam hapac xà itajê kôt mã Pahpãm mã me pahkĩn. Hãpà! Nee mã ampo itajê kôt Pahpãm mã me pahkĩn nare. Ne quêt ita na ri Pahpãm mã me pahkĩn, mã me pahpytà he. Pom pê Jeju me pajaxà kam ty, cu toa amji to me pahhimpej xà ata to, quê ha Pahpãm quêt me pahkên pê me pahpytà. ⁴Ne pê wa Pahpãm te ipytàr prãmte, amji caprỳ to, me hirôa pê ampo itajê ton partu.

⁵Ne pê xwahna cormã icrire na, ina amcro te ôjtô kam, pê me ipy kà kwỳ jakep, Juta catêjê te amji to incaca xà ata kôt. Ne me ipãmjê pê Juta catêjê impeaj kra, ne me cupê me iquêtjê nõ, pê Pẽnjamĩ xwỳ tàmxwỳ tàmxwỳ nõ ata kra. Ipê Juta catêjê impeaj nõ wa. Ne pê wa Juta catêjê te amji kam hapac xà cunea kôt amji ton pa. Ne me ikwỳ pê Parixêw catêjê atajê pê catyt kam ajco me ipa. ⁶Na pê wa ajco me hàpên xà ita to ijàpên catia to ipa. Ne Pahpãm te ikĩn prãmte itỳj ajco Jeju na mehkwỳ to pên to ipa. Mã xãmte Pahpãm pê ita na ihkaj na, ikam. Hõ, pê wa ajco Juta catêjê te amji kam hapac xà cunea ton to hajỹr to ipa, Pahpãm mã ikĩn prãmte. Pê Juta catêjê cunea mã ihhêj ne ipeaj to ipej. Ne pê wa pa hanea ne ajco amji pejti na amji to hane. Ne pê xãmte Pahpãm mã nee ita na ikĩn nare, ne ahna cupê ihkaj na.

Pawrô ita caxuw Jeju Crixtô te amji kam hapac xàa kôt ipa to prãm

^7-8Na wa quêt ita caxuw Jeju to amji mã ihimpej to ipa. Ne mam ampo pejti itajê to ite amji mã ihimpej to ipa xà atajê ri, nee hipêr imã ampo caxuw impej nare ne ihkêanre. Ne Jeju Crixtô pê ijõ Pahhiti ata, wa quêt ite hõmpun ne hahkre pej ne ampeaj kam quêt imã ihkĩn, ne mam ampo itajê ri imã ihkĩn nare. Na ri imã cupê ahhi, ne imã ihkĩn nare, wa ite põ mã ihcunea to ijũcapêr, ne nee hipêr ihnõ to amji japackre nare, ite Jeju kam amji hônco tu to prãm to. ⁹Na ri Pahpãm te ito impej, wa ipejti, cwỳrjapê ri cumã ipejti. Ampo na? Wa nee ita caxuw cumã ipejti prãm to Juta catêjê te amji kam hapac xà atajê to amji jahôt prãm nare. Ne quêt Jeju Crixtô to, wa ha amji mã ihimpej to ipa, ne ma to amji jahôt to ipa. ^10-11Na wa ita caxuw Jeju Crixtô pit pupun pejti to prãm, ne carôat kôt amji to ipijapar to prãm. He Pahpãm mã carôt ata to ri cute hacpỹa mã Jeju to ihtĩr. Na wa ha itỳj hanea ne cuxà, cute amji pupun xà kêanre ata to amji pupun to prãm, ne cuxà ityc to prãm, mãr wa ipê hũràac ne hacpỹa mã itĩr.

Pawrô nee cormã catyt kam Crixtô te amji kam hapac xà cunea kôt ipa nare

¹²He wa nee pa amji jarẽn to ihimpej to:

— He ramã ite amji kam ijapac xà cunea na ipeaj to ipej, ne nee jũ kam ijõ nuwre nõ kam, ikên kênre nõ hamreare — hajỹr nare. Ne cama quêt amji jarẽn to hane he:

— Wa ramã Jeju Crixtô kôt ipa ita to, ite amji jĩ tỳj tu, ne cormã ipej ita kôt ipicamẽn to imõr to prãm — hane. Ne cormã ipejti wỳr icator xà ita pê ihhêj rũm ijàhcukren xà, wa hỹrmã amji mã icarôt to ijũhcajhê to mõ, ite hicu xà mã icator to prãm to, ne nee cormã hỹrmã icator nare. He pê ramã Jeju Crixtô amji mã ito prãmti xà ata caxuw ipro. ¹³Cwỳrjapê wa ha nee hipêr mam icaca xà itajê nõ to amji japackre nare, ne quêt icumam itajê to pit mã, wa ha amji japackre. ¹⁴Ne icatàatre na, pry jicu xàa kam ipicahur catê te amji mã hàmcwỳr xà ata pyr prãmte, hỹrmã ihtẽam to tẽ. Ita jĩkjê na wa apêa to apê, ite amji mã Pahpãm te imã hàmjõr xà ata pyr prãmte. Mã Pahpãm imã hàpôr to mõ, ite Jeju Crixtô kôt ipej pêa mã, cahê na ikrĩ rohnỳtti mã xà caxuw.

¹⁵Hõhõ, ite amji kam ijapac xà ita to wa amji kam ijapac to ipa. Ne pom Jeju kôt ramã me pahte me papa to me amji jĩ tỳj tu itajê cunea te amji kam hapac xà ita ri me pamã. Ne ca ihhêaj to me anõ te amji kam gapac xà ita to hajỹr nare na, quê ha Pahpãam me anõ mã to hahkre, ca ha hahkre pej pej. ¹⁶Ne me pahcunea te hajỹr pit, cu ha me hajỹr to me pamõr mã mã, ma me pamõr ita kam me to pancrà tu. Pom pê catyt kam ramã ampeaj kam me pamã to hahkre xà ata na. ¹⁷Me ikjêjê, pom wa me akam mare mã ampo ton to mõ ita na, ca me ipynãr kam me to acrà tu ne. Ne ma hanea ne amji caxuw mam ikôt me ipa catêjê atajê te amji kam me hapac xà atajê na mehkôpĩr to me apa, ne me gàhkôpĩr xà atajêa kôt me amji ton to me apa.

Me hàhtôa pê Crixtô curê xwỳn kêanre

Carati 6.12-13

¹⁸He pê wa ramã me amã awjarẽa, na wa ha hipêr icwỳar kam me amã harẽ. Ne mehkwỳ te amji kam me hapac xà kêanre, ne me cupê Jeju curê xwỳn, na ri me to hũjarẽn to:

— Por pê pĩ kam Jeju ty ata, ampo na hamreare, ne nee jũ na xà caxuw impej nare — hane. ¹⁹Atajê quê ha amjia kôt amji to me hamre to mõ, ne me hamre. Ampo na? Nee mã ampo na nare. Cute me hajỹr xà atajê, quê ha me to hamre. He me hàpàn pê ri ihhêj rũm me hõ Pahpãm. Ne mehcunea mã cute ampo ton xà kam mehpahàmti atajê ton to me ipa. Ne cormã mehcunea mã, cute ampo kam mehpahàmti ton xà ata pyrên me amji jakryti na me amji jarẽn to ipa, ne nee ajte amji jũ na amehpahàm nare. Ne pjê kam ampo itajê to pit mã amji kam me hapac to me ipa, ne nee Pahpãm to ajte amji kam me hapac to me ipa nare.

Me papê côjkwa te amji kam hapac xà catêjê

²⁰Ne me pa, cu ha nee ame hajỹr nare. Ampo na? Côjkwa kam quêt me pahkrĩ xà, to cu ha me amji japackre to me papa. Ne cu pahtỳj, cute me pahkên pê me pahpytàr catê pê me pajõ Pahhiti pê Jeju Crixtô te curũam ajpên ihtẽm na me hikaj. ²¹Quê ha Jeju jũ caxuw me pajĩ peacre, ne ihtyc atajê to antuw. Quê ha me pajĩ pê Jeju jĩa pyràc, ne ampeaj kam impej ne ihtỳj. Na cu ha jũ caxuw me pahnõ pahtyc nare. Ampo na? He mehcunea jirôa pê Jeju carôt tỳj, na ri pyxit peaj ne mehcunea to ihhimpej.

Cu ha pahtỳj me pahcunea Jeju na me pahhônco kam me to pancrà

Coroxo 3.15

¹Imã me ikjêjê kĩnti atajê, ampeaj kam me ato ijapac xà! Pê wa ajco me amã Jeju jarkwa jarẽn pejti to ipa, pê ca me awpa ne ihkôat me amji ton to me apa, na ri me apê me imã ijakryti ton catêjê. Na wa itỳj me pajàpên xà itajê kôt mehcunea mã me apejti na me ato ijàmnãn to ipa. Ne imã me gũcanãar kam me ate Jeju na me ajpẽn hônco tu kam me to acrà tu na, me ato prãm.

²Ỹhỹ me ikjêjê cahãj pê Ewotikwỳj me, Xintikwỳj ata, he ca ihhêj ne atỳj ajpẽn krac ri ame acakôc to me apa, na wa ha me awỳr xà ita to me awỳ he:

— Nee ca me ajpẽn mãn to me acuhhê tu nare. Ampo na? Me apê Pahpãm kra impeaj. Ne mẽr ampo na mã ca ajte ame ajpẽn mã? Hipêr me hajỹr nare — hane. ³Ne ca, ikwỳ nõ Xixic, he apê ijõ ikwỳ nõ peaj, na wa ha awỳ, mãr ca ajpẽn caxuw pyjê atajê japackre, ne hacpỹ mã ajpẽn na me axô. Pê wa pyjê atajê me, Cremẽnti me, por icahê na me hàpên catêjê atajê me, pê wa ajkaam me apê, ite me Jeju pê me pahkritxwỳ jarẽn xà impejti incràn xà caxuw, pê wa me to ijàpên catia. Atajê japrỳ ramã Pahpãm jõ kàhhôc kam hikwa, cute cahê na amji to me ipijapar rohnỳtti mã xà caxuw.

⁴Ne imã me acunea te Jeju kam me ajpẽn hônco tu kam me gakryti na me ato prãm. Na wa me amã:

— Me gakrya ne — hane!

Quê ha Pahpãm me pamã amji carĩcti gõ

⁵Ca ha ajpẽn pê me akrã to arêr nare, ne quêt mehcunea kam mare mã me gàhcajrẽnti, jàhcaprĩhti to me apa. Ampo na? Quê ha ahtũm nare, quê ha me pajõ Pahhiti amji jaxà. ⁶Ne nee ate amji mã ampo na prãmti xà ata na apu amji to põ mã quê to apa nare, ne quêt cama amji na Pahpãm wỳ. Quê amã ampo itajê gõ, ca nee hahpan xà na cumã gakryti na amji jarẽn to gapac kêt nare. ⁷Ca ha ate me ite me amã ampo jarẽn xà itajê cunea ton na, quê ha Pahpãm me amã amji carĩcti jõr to hanea, pom quê ihcarĩcti he, ne me amã ampej partu, Jeju kam ate me ajpẽn hônco tu ita kam. Quê ha jũmjê me apupu ne me amji mã:

— Jũ mã mã ajte cute me, ne mehkên xà atajipôc ri mehcarĩcti? — hane. Hõhõ, quê ha cute me ana Pahpãm caca xà jahkre pej nare kam, me ato ihcakôc to hane.

Cu ha ampo pej to pit mã amji kam me pajapac to papa

Roman 12.1-2

⁸Ne ite me amã ihhôc xà ita jicu xà kam wa ha cormã me amã ampo to ihimpej. He mõrmõ ca amji kam me gapac xà na me amji cukij to:

— Ampo to mã wa ha ajte amji kam ijapac to ipa? — hane. He, ampo te ôjtô itajê to, wa ha me amã hahkre he:

Mam ita pê ri ampo pejti, kam ampo kên nare ata to, ca ha me amji kampa.

Ne ihkôt ita ri he, jũm jàpên xà impejti na pajàhtàtti xà ata to, ca ha me amji kampa.

Ne ihcote na ita ri he, ampeaj kam ampo to mehhêj xi xà nare ata to, ca ha me amji kampa.

Ne ihkôt jũm caca xà impejti tũm nare ata to, ca ha me amji kampa.

Ne hapu na ita ri he, por Pahpãm mã ampo cunea impejti atajê to, ca ha me amji kampa.

Ne ihkôt ita ri he, por ampo na nee jũm cakôc xà kên nare ata to, ca ha me amji kampa.

Ne hapua na ita pê ri, por ampo me pahcajpuaw ata to, ca ha me amji kampa.

Ne ihcahhur ita pê ri, ampo to me pahcakôc xà impejti ata to, ca ha me amji kampa.

Hõ, ampo itajê to ri ate amji kam me gapac xà he. ⁹Na pê ca me ijarkwa ita pa, ne me ite amji kam ijapac xà ita pupu, ne me hahkre pej, ne ihkôat ca ha catyt kam me apa. Hõ, Pahpãm te me pamã me pahcarĩcti jõr xà ata quê ha me amã cugõ, ne ihtỳj me acahê na ipa rohnỳtti mã.

Pawrô te amji kam hapac xà kam hakrya to hakry

¹⁰Pajõ Pahhiti cãmtà rũm ri, ite amji kam ijapac xà kam ijakrya to ijakry. Ampo na? He pê ca rỳ pêa mã ajco gõ pore to me ijamã. Jirô pê mã ca nee hipêr ate gõ pore to me ijamãr nare. Ne corpej mã ca ate hacpỹa mã me gõ pore to me ijamãr kam me atẽm. Ne atỳj ate me ito amji kam gapac na imã me gahkre pej, ne jũ wỳr ca ha cama me amji mã hamã. ¹¹Wa nee, jũm te imã hikran na, to amji kam ijapac nare, ne nee ipê ampo hamreare na amji to icakôc nare. Ampo na? Wa ite ramã ita ton to amji pyràc tu, ampo cunea kam. ¹²Ampo na? He pê wa ramã amji na ite amji kam ijapac xà itajê cunea pãjpãj partu. Ne imã ite amji kam ijapac xàa na ipê ampo hamreare na, imã amji kĩn nare nare, ne hanea ne imã ampo catia na ite jũ mãn nare. He pê wa amji na ijaquêc xà pãjpãj itajê kam, wa ihcunea to amji tekjê. ¹³Ne pom ite amji kam ijapac xà itajê cunea kam, wa Jeju carôat kôt ijũcanãr to ipa.

¹⁴Ne ate ite amji pupun xà kêanre itajê na me itehcajpar ata na ri, imã ihkênre nare. ¹⁵Ne pê wa mam ite me amã Jeju jarẽn pejti jarẽn xà ata jõ amcro cakônĩ na, pê ca me, me gõ pore to ajco me itehcajpa. Pê wa me gõ pjê pê amji to icator xà ata kam, pê ca cormã ampỳa mã ajco me itehcajpa. He me gakrã ata pyxit peaj te me itehcajpar na, ihtỳj me amãa amji jahkre pej. Ne ate me itehcajpar xà ata na, pê hanea ne Pahpãm ajco me atehcajpa.

¹⁶Taa mã xãmte cormã ihnõ he. Pê wa Texarõn jõ krĩ kam apu ipa, pê ca ajco atỳj ite ampo na prãm xà ata to me itehcajpar to me apa. ¹⁷Nee mã hipêr ate me Timot me imã ampo jõr xà na, wa me amã ita jarẽn nare, ne hipêr Pahpãm pê ate amji mã me ampo cwỳr, na ri quêt imã me ato prãm. ¹⁸Mã ita ri Epaprôti cator ne cute me imã, ate me imã ampo jõr atajê jõr. Ne pom ihkàhhôc ita pê ate imã ampo jõr xà atajê jõ kàhhôc.

Pawrô mehkwỳ pyrên hakrya

Ne ampeaj kam ca ate imã ampo na ijàhwỳr xà itajê jirôa pê hõr. Na ri ampeaj kam imã amji kĩn ne ijakry. Ne Pahpãm mã ate me imã ampo jõr xà itajê impej te hajỹar, pom quê cumã ampo kũm cuxwati pãr prãm he. Ne me pahte me cupê ampo jamreare atajê mã ampo jõr xà atajê pê ihhêj rũm Pahpãam mã pahte me hõr xà, ne ampeaj kam cumã ita na ihkĩn. ¹⁹Ne imã me pajõ Inxũ Cati pê Pahpãm ihtỳj me amã ampo na ate mehprãmti atajê jõr na, me ato prãm. Ne nee quê ha amã ihkênre ne hõr nare, ne amã catia ne cugõ. Ne quêt Pahpãm catia to cati, ne hanea ne Jeju Crixtô mã hàhcukrêj to hakràaj to hakràj, na ca ha ampo na me wỳ, quê ha nee amã ihkênre ne hõr nare, ne amã hàhcukrêj to me hakràj to ipipẽan xà atajê gõ.

²⁰Ne imã mehcunea te me pajõ Inxũ pê Pahpãm catia to cati na, cute me hahkre pej ne amji mã me harẽn na imã me to prãm, rohnỳtti mã. He ampeaj kam!

Pê Pawrô me cumã amji jarẽn kujate

²¹Hàpà, me apê Jeju Crixtô tekjê, wa me ato amji kjê atajê. Ne pom ita ri me pahkjêjê icahê na ame ipa itajê te hajỹar ne me amã amji jarẽn kujahêc. ²²Ne por Pahpãm tekjê na me ipa atajê cunea te me amã amji jarẽn kujahêc. Mã hanea ne ita ri Roman catêjê jõ pahhiti jũrkwa kam mehkrĩ atajê te me amã amji jarẽn kujahêc.

²³Ne imã me pajõ Pahhiti pê Jeju Crixtô te me amã ampejti na me ato prãm. Hamre, ita pit.