Me Cahyt Xà Jõ Kàhhôc
Pê Caku Te Cwarẽnta
PÕTI KAM AME IPA XÀ
Ỹhỹ, ihkàhhôc to incrê ita kam ri, Ixaher catêjê mã, Pahpãm te amji kam hapac xà intuw to me cumã hahkre xà. Cwỳrjapê ri ihkàhhôc ata japrỳ te Me Cumã Ampo To Hahkre Catêjê Jõ Kàhhôc (Ampo To Hahkre Catêjê).
Ne ihkàhhôc te cwat ita kam ri, Mojxe te me pamã Ixaher catêjê te Ejit jõ pjê pĩn, Canãn jõ pjê wỳr, põti ata kam me mõr na caku te cwarẽnta na me harẽn. Ne hanea ne cute Ixaher catêjê cahyt ne me hàhtô na me hahkre pej. Cwỳrjapê ri ihkàhhôc ita japrỳ te Me Cahyt Xà Jõ Kàhhôc (Me Cahyt Xà).
Jaco japrỳ nõ pê Ixaher ata kra xũmre te tôxi atajê tàmxwỳ tàmxwỳ ramã me hàhtô to mõ ne me hàmtàr tu. Ne ahpỹanre na menquêtjê pê me hakat japrỳ kôt me hakrã pit, ne cute me amji mã haprỳ jõr par to: Rupẽn kra me, Ximãw kra me, Rewi kra me, Juta kra me, Ixaca kra me, Xepurõ kra me, Joje kra me, Pẽnjamĩ kra me, Tã kra me, Naptar kra me, Cate kra me, Axer kra. Ne me hakrã te tôxi atajê cunea pê Ixaher catêjê pit.
13Pê me hũcapi catêjê me Canãn jõ pjê pupu
Mã Pahpãm pê Pahhiti te Mojxe mã harkwa mẽn ne cumã:
— Jũmjê xũmre kujate, quê ite me amã Canãn jõ pjê jõr xà ata pupu. Ne ca ha ahpỹanre na me aquêtjê te me amji jakrã te tôxi atajê kam, ajpẽn caxuw mehtàmxwỳ pê me hõ pahhi to caprã ne mehkujate — hajỹr.
Mã cute me to cuprõn, ne me cumã harkwa to:
— Me pra ne me pjê pupu, jũ mã mõrmõ cute. Ne ma curi mehkrĩ catêjê atajê pupu, mõrmõ ajkĩ mehtỳj, nare, ajkĩ mehpeacre, ne mõrmõ ajkĩ me hàhtô, nare, mõrmõ ajkĩ mencrêre. Ne me pjê pupu, mõrmõ ajkĩ impej, kam me pajàpên xà caxuw. Ne me krĩ pupu, mõrmõ intête kwỳc ne ajkĩ hihê, nare, mõrmõ ajkĩ hamãr xà atajê nõ hamreare. Ne me pjê ata pupu, mõrmõ ajkĩ ampeaj kam hõ to hakràj, ne kam pĩ jàhtô. Ca ha amji to mehtỳaj, ne atỳj ajpên me pjê ita jõ pĩxô nõ to me mõ, wa cukrẽ ne ihcajpẽ — hajỹr.
Mã ma me mõ, ne cute me Canãn jõ pjê pupun, ne cute kam ame ipa to me amcro to cwarẽnta. Ne ramã me mõr xàa kam, cute me pĩxô jàhtôa ne me hirên. Ne ma me to amji jaxàr, ne me to cator. Ne cute Mojxe me, Arãw me, Ixaher catêjê mã ampo itajê cunea jarẽn par. Ne cute me cumã pjê jõ pĩxô atajê jõr. Ne me cumã harẽn to:
— Wa Canãn jõ pjê mã me icator, ne ite me hõmpun, mã impeaj to impej. Ne ampeaj kam, kam me cumã me hõ, ne hanea ne kam pen ne kam pryti kà cacô jàhtô, ne kam me pĩxô itajê pupu he.
— Ne ampeaj kam curi mehkrĩ catêjê tỳj, ne ampeaj kam krĩ itajê cati, ne ipu na kwỳcti itajê kàa to ihkà. Wa ite kam mehĩ to cute me krĩ mã hikreti atajê kwỳ pupun, mã ampeaj kam mehkà, ne me catia to me cati — hajỹr.
Mã cute me hũmre kujahêc atajê nõ japrỳ te Carep ata te mehcunea mã Mojxe mã ihhi cuxêc na me ton, me kam mare mã, ne me cumã harkwa to:
— Hacme, ne me pjê ita pytà! Ampo na? Cu ha pahtỳj me tohjê, ne me hirô pê xa, ne me hipej — hajỹr.
Mã mehkwỳ te me cumã, ne ahna me amji ton kam me cumã:
— Wỳr cu apu amji mã me hamã! Ampo na? He me pajirôa pê curi catêjê mehhi tỳj, ne me cati. Ne pjê ata kam ampeaj kam me hàprê catêjê jàhtô, ne cute me hipu tu. Na ri me imãa me ipê xycxycre pyràac, ne hanea ne me cumã me ipê xycxycre pit, ne me cumã me ikryjre — hajỹr.
14Pê Ixaher catêjê ma ame Pahhiti par caca
1Mã Ixaher catêjê cunea mehpec xà to cute mencwỳr kam mehtẽm. Ne kỳj cati pêa mã ame amrã, ne cute mencwỳar to me apẽ. 2Ne mehcunea te me Mojxe me Arãw cuna mã me cumã amji capẽr kam mehtẽm, ne me cumã:
— Wa nee pjê mã me paxàr xà ita kam ame ityc prãm nare. Wa rỳ mã curia Ejit jõ pjê kam ame ty. Nare, wa põti kam me hamreare ata kam ame ty. 3Ihhêj ne me pajõ Pahhiti te pjê ita kam mehkrĩ catêjê jõ krãhtare te me pajipej na, cama me hamãr xà caxuw ri cute me pahto cator. Ne quê ha me pahto hajỹr jirô pê mã, quê ha cama me pahkra me, me pahprõ amji to me cumã me hàpên catêjê. Na cu ha pahtỳj ma hacpỹ mã Ejit jõ pjê wỳr me amji jaxà — hajỹr. 4Ne me ajpẽn mã harkwa to:
— Cu ha amji mã me pajõ pahhi tuw nõ xãm, quê ha hacpỹa mã me pahto amji jaxà, Ejit jõ pjê wỳr — hane.
Pê Jojuw me Carep tee mehkwỳ mã apô
5Mã Mojxe me Arãw, Ixaher catêjê kam mare mã pjê kam mehpỳm, ne me hõpôrpo ne me nõ, mehpec xàhte. 6-7Mã cute me pjê pupun catêjê pijakrut itajê japrỳ pê Jojuw, me Carep atajê me cute amji pê mehkà cokjêr, mehpec xàhte, ne mehkwỳ mã hũjarẽn to:
— Pom wa ite me pjê pupun ita peaj to impej. 8Cu ha me pajõ Pahhiti cajpuaw na, quê ha ihtỳj me pamã pjê pejti ata gõ, cu ha pahtỳj amji mã me hũtà. Ne pjê ata kam me hõa to me hõ, ne ampeaj kam, kam pryti to ipijapar xà me, pur caxuw impej. 9Nee ca amji tête ame Pahpãm jarkwa curê nare. Ne nee cuna mã ame acryc nare, ne nee ame, por curi amehkrĩ atajê cupa nare. Ampo na? Cu ha me pahtỳj me to cô, ne me hipej ne me hirô pê xa. He me pajõ Pahhiti ihtỳj ame pahkôt ipa, ne cute me pahpãm cahàc krekà pê me pahcurê xwỳn pytàr catêjê atajê cunea rẽn. Cwỳrjapê wa me amã, ca ame hũpa nare — hajỹr.
Pê Pahpãm mã Ixaher catêjê jipej prãm
10-11Mã me hàhtôti atajê ajwar kẽn to ame capêr, ne to mehcuran prãm to pit mã amehcakôc. Mã Pahpãm carôt cati jàhcujrohti ata ampo kà te hũrkwa mã Ixaher catêjê cunea te cuprõn ata wỳr iwrỳc, ne Pahhiti te Mojxe mã harkwa to:
— Me hàhtôti itajê ma ame icurê! Ne cute me hajỹr ita kam ri ihtỳj amji caxuw me icyt to me ipa. Ne jũ caxuw mã quê ha ajte, ite me kam ampo to amji to ipipẽ xà ita kôt me ijahkre pej, ne ikôt me amji to? 12Wa ha hà kên cunea to me kam icryc, ne ame to kên, ne ite me cumã ampo jõr xà to ijũjahkre ata xwỳjrea na me hipej. Ne akam wa ha quêt me to hàhtô, quê ha mam itajê jirôa pê me atàmxwỳ itajê cunea me carôt tỳj — hajỹr.
Pê Mojxe Pahpãm mã mehkwỳ cajrẽn
13Mã Mojxe te Pahhiti pê Pahpãm mã harkwa to:
— Jũ mã quê ha Ejit catêjê cahhur me ita jarẽn pa, ne kam me amji cajpẽr to? Ne ramã Ejit catêjê te acarôt tỳjti to me akwỳ to acator ata na me gõmpun, ne me gahkre pej. 14Ne ma cute pjê ata kam me ipa catêjê mã me garẽn. Ne hanea ne Ixaher catêjê kôt apê me hõ Pahhiti te amõr na, ne hũ na pire mã ajpẽn mã me acakôc na me cumã me garẽn. Ne ihtỳj me cumam ahcakrã kam apê me hõ Pahhiti te amõr na, cute me gõmpun. Ne ihtỳj amcro me caxwa ri ahcakrã ata te cuhy na amji jahkre ne harij na, cute me hõmpun. 15Ne ca ha ate me akwỳ jipej pyrentu na, quê ha pjê ata kam, krĩxàre kwỳ me ahna me garẽn pa, ne me ahna amji mã me garẽn kên to, 16“He pê ihtỳj me hõ Pahhiti me cumã pjê to awjahkre ata wỳr me to mõr cakrô, nee cute amji mã hamãr, ne me to hàr nare. Cwỳrjapê ri cute ahkêt me põti jipôac ri mehcunea jipej” hane.
17-18— Na ca ha acarôt jàhcaprĩhti to me cumã ajpẽ, ne cute mehkên ton xà itajê to tojnõ, ne cama amã mehkĩnti ne. Ne pê ca ramã amji jarẽn to: “Imã me akĩnti ita kam, wa nee me akam icryc pyrentu nare, ne ca hame ate me ito kên, ne amji tête me ijarkwa curê jicu na, wa ha itỳj me ate ito kên ita to tojnõ ne hicu. Nãmri ca ha me ate amji tête me icurê to me axãm ita na, wa ha itỳj hahpan xà na me akên mã me amẽ, me akra me, me atàmxwỳ mea mã” hane.
19— Na ite apar xàa na wa awỳ, pom hõtpê amã me ikĩnti rohnỳtti mã, ca atỳj cute mehkên ton itajê cunea to tojnõ ne hicu to hanea, pom ahnaa mã ca ajpên Ejit jõ pjêa rũm mehkên na me to tojnõ to mõ he, ita na ca ha ita kam me ito — hajỹr.
Pê Pahpãm Ixaher catêjê incrôn xà kêanre to me cucrô
20-23Mã Pahhiti te Mojxe mã amji jarẽn to:
— Hã, wa ha itỳj, pom ate iwỳr xà ita na me ato, ne cute me ito kên itajê to tojnõ. Ne wa ha pa amji japrỳa na me ahna amji to. Quê ha nee jũ caxuw, por pê wa me hũmjê mã pjê to ijũjahkre xà ata mã me hàr nare. Ne põti kam me hamreare ata kam, quê ha mehtyc pa.
— Ampo na wa ha me to hane? Nee mã ampo na nare. He pê ramã me icarôt tỳjti jàhcujro itajê kwỳ na me ipupu. Pê wa ramã me cumã me hõ japrỳ te mana ita gõ, ne me cumã cô gõ, mã ajte nee ite Ejit jõ pjê me põti ita kam me cumã ampo ton xà itajê na, ito me amji japackre nare. Ne ajte cormã cute me icapi prãmte, icuna mã me ampo kên ton to me tej to me ipa, ne nee me ijarkwa par nare. Ne por me ijarkwa par nare atajê, quê ha nee, por pê wa me hũmjê mã pjê to awjahkre ata mã, me hàr nare. Ne pom ma ame icurê itajê nõ, quê ha nee mehnõ pjê ata pupun nare.
24— Ne pom imã hàpên catê pê Carep ita nare, ajteare mã quêt amji kampa, ne quêt cute ihtỳj ipar xà cunea to ipar. Na quê ha ihtỳj cute pjê pupun ata wỳr axà, quê ha mehtàmxwỳ ihtỳj hakàn pê pjê ata kam me ipa, ne kam me amji to ajpa.
25— Ne apẽ quê ha ajte ma Amarec catêjê me, Canãn catêjê, por caprũm kam mehkrĩ atajê japy, hacpỹ mã põ kam hamreare ata wỳr me amji jaxà. Ne Côxwatepti cajpuw quê ha me mõ — hajỹr.
26-27Jirô pê mã ri Pahhiti te hipêr Mojxe me Arãw mã hũjarẽn to:
— Jũ caxuw mã quê ha ajte cute me imã amji kôt harẽn jàhcahhõn xiti itajê mã me hikra? Wa ite ramã cute imã me hàhcahhõn na mempar, ne ahna imã mehkĩn nare. 28Na ca ha me cumã ijarẽn to: “Ipê me gõ Pahhiti pê Pahpãm. Wa ha itỳj me amã, por me amã ampo cupahti na, ate me amji jarẽn ata to. 29-30Na ca ha me acunea põti kam me hamreare ata kam me atyc pa, por ramã me ana caku te winti jirô pê atajê, ca ha me atyc pa. Ampo na? Me acunea te imã me gàhcahhõn par, na ca ha me atyc pa, quê ha me ahkrare pit ite me cumã pjê to ijũjahkre xà ata mã me axà. Ne mehkà pijakrut japrỳ te Carep me Jojuw itajê, quê ha mehkà na me ajkrut peaj ne mehkôt pjê ata mã me axà.
31“Ne me acunea te me akra pê, por Canãn jõ pjê kam me xa atajê mã, cama me hàpên catêjê na ate me harẽn cakrô, wa ha itỳj me hamã, ne pjê ata wỳr me to icato, quê ha quêt kam me ipa. Ne ate me pjê kêanre na me harẽn ata kam, quêt ihcunea na me amji pupun pejti to me ipa. 32Ne me ca nare. Quê ha me gĩ itajê ajhu ne ty, põti kam me hamreare ata kam. 33Ne quê ha me apê amji jahkre kêt, ca ha atỳj me akra me, põti kam me hamreare ata kam me apa to me caku to me cwarẽnta. Ne me akôt quê ha me akra me amji pupun xà kêanre to me ipa, ne ate amji mã me ito ahimpej nare ita kam, ca ha xa me acunea me atyc pa, jirô pê mã quê ha cormã me akra me, me atàmxwỳ pit pjê ata mã me axà.
34-35“Ne ca ha me apê, por pê me pjê pupun catêjê atajê pyràac, pê me mõar to me amcro to cwarẽnta, jĩkjê na ca ha põti kam me hamreare ita kam ame apa to me caku to cwarẽnta. Ampo na? He wa ha ita caxuw me ato impej jicu, ca ha ame akên xà pytĩti atajê to ame acuhkwỳr. Quê ha ahpỹanre na ate me ina ajpẽn par xà atajêa me gipej, põti kam me hamreare ata kam. He ipê me gõ Pahhiti, na wa itea me amã icakôc xà ita ton, na ca ha atỳj põti ita kam ame ty” — hajỹr.
36-38Mã cute me tej te me pjê pupun catêjê atajê te me mõr tête mehcunea hi kwĩn, ne mehcunea to me hàhcahhõn xi, na ri mehtyc xà kêanre kam mehcunea tyc pyrentu, me pajõ Pahhiti kam mare mã. Mã Carep me Jojuw pijakrut peaj ne mehtĩar na me hàhhuc.
Pê Mojxe tee mehkwỳ mã me curê xwỳn cawpa
39Mã Mojxe te mehkwỳ mã Pahpãm jarkwa ita jarẽn, mã me hũpar xà ita kam amehpeacre, ne me cumã amji kĩn nare. 40Mã amcro nõ na iràrà na mehcunea jỹr, ne ma, por pjê kam awjarô to cute me cumã hũjahkre ata wỳr, cute me mõr na me ipyr. Ne cute me Mojxe mã me harkwa to:
— Wa itỳj ite me Pahpãm cuna mã me ikêanre na me amji pupun, na wa ha itỳj ita caxuw, por me pajõ Pahhiti te me pamã pjê to hũjahkre ata wỳr me ikràr — hajỹr.
41Mã Mojxe te me cumã harkwa to:
— Ca rỳ mã mam me hane na mã, ca nee ajte ate me Pahpãm par nare. Mã ramã ahna ahtũm rytu, ne ramã hõ amcro jirô pê ihpỳm ita kam, jũ wỳr ca ha curi me mõ. Ca ha ita kam me ate me amõr na, ca ramã ate me pajõ Pahhiti pê Pahpãm jarkwa par nare. 42Ne pom curmã ate amji kam me gapac xà jarẽn itajê, ca nee kam me to acrà nare, ne me hicu. Nãmri ca ha ate pjê kam awjarô ata pytàr prãm kam me to acrà na, quê ha me acurê xwỳn me ato hamre. Ampo na? He me pajõ Pahhiti pê Pahpãm nee me akôt mõr nare ita kam, quê ha ihtỳj me gipej. 43Xà ca nee me Amarec catêjê me, Canãn catêjê to me amji japackre nare? He cormã me pahcumam me xa! Ca ate me pajõ Pahhiti pê Pahpãm mã hikran, cwỳrjapê quê ha hanea ne me amã hikra, ne nee me apijapu xà kam me atehcajpar nare, quê ha me acurê xwỳn ihtỳj me acura — hajỹr.
44Ne tee Mojxe te me cumã me cawpa cakrô, mã ajte ma me mõr kam mencrà, pjê kam kẽnti atajê cajpuw. Mã curia me hakàn pê Mojxe me Pahpãm jàmcjên xà jàhhuc, mã me hàhtôa ne amũ me pra. 45Mã kẽnti na Amarec catêjê me, Canãn catêjê mehkrĩ atajê mehwỳr me iwrỳc, ne cute me Ixaher catêjê curan kam mehtẽm, ne ma mehcuran to mõ. Mã ma me hũpate mehprõt. Mã ihtỳj mehcuran to me mõ, ne cute mehcuran itaa to, ma Horma jõ krĩ mã me cator. Ne Ixaher catêjê cahhur te ma Mojxe kôt põti kam me hamreare wỳr me amji jaxàr, ne kam ajco ame ipa.
16Pê Ixaher catêjê kwỳ Mojxe jũhhyr prãm
Caku te cwarẽnta atajê nõ kam, amcro atajê nõ na me hũmre atajê japrỳ te Côre me, Tatã me Apirãw te Ixaher catêjê jõ pahhi te me xẽj pijakrut ne ihkôt xĩncwẽnta me, me ajpẽn par, cute me pahhi tête me Mojxe jũhhyr prãmte. Ne ma Mojxe me Arãw wỳr me cator, ne cute me cumã me harkwa to hajỹr he:
— Nee mã me ijirôa pê acati nare. Pahpãm te Ixaher catêjê cunea capi, cute me to amji kwỳ prãmte, ne me pahcunea kam ihkrĩ. Ne mẽr ampo na mã ca atỳj ite me apar ita na, hãn ne me imã garkwa jirê? — hajỹr.
Mã Mojxe me cumã:
— Xãmte icaxuw ate me amji kam me gapac xà te hajỹr? Hã, quê ha apẽ, quê ha Pahpãm iràrà na me gõ ikwỳ nõ itajê mea mã, me amã cute amji mã jũmjê capi atajê jahkre, ca ha me hõmpu. Ca ha apẽ na ajpên me Pahpãm wỳr me mõ, wa ha hanea ne Arãw me hỹrmã mõ, cu ha curia me ajpẽn cajpa — hane.
Mã apẽ mã Côre me, mehkwỳ te xẽj pijakrut ne ihkôt xĩncwẽnta atajê me mõ, ne ampo kà te Pahpãm jũrkwa na cute me cuprõn. Mã hanea ne Mojxe me Arãw me, mehkwỳ hajỹar ne harkwa ata jĩkjê rũm cute me cuprõn. Mã me hàhtôa te me cuprõn ne cama amehcuhhê, ne ame ampo te me to jũ mãn xà ata na ame hõmpu.
Mã pea Pahpãm carôt jàhcujrohti te mehcunea mã amji to ipipẽ, ne cute Mojxe me Arãw mã harkwa to:
— Me cupê me hawry, ne me haprã, nãmri wa ha mehcunea jipej hiahpuro! — hajỹr.
Mã Mojxe me Arãw te Pahpãm cuna mã mehkõn krã na me hỹr, ne me cumã mehcajrẽn to:
— Me ijõ Inxũ Cati, pê ca me icunea mã ite amji kam ijapac xà ita gõ. Xà ca ha me hũmre kên incrê peaj atajê kôt mehcunea jipej? — hajỹr.
Mã Pahpãm Mojxe mã harkwa to:
— Me cumã awjarẽ, quê me Côre me, Tatã me Apirãw jõ pryre kà te ikre ita pê me ajcamẽ — hane.
Mã Mojxe xãm ne ma me hũmre itajê jũrkwa wỳr tẽ, ne cute mehkwỳ mã caràar kam hũjarẽn to:
— Me hũmre kêanre itajê jũrkwa pê me ajcamẽ, ne me hawry! Ne nee ame hàhcukrêj caxun ne amehcupên nare! — hajỹr. Mã pea mehcunea cator, ne me cupê me hũjawry.
Mã Côre me Tatã me Apirãw me hũrkwa jarkwa mã mehkra me, mehprõ mea mã amehcuhhê. Mã Mojxe te mehcunea mã harkwa to:
— Ca ha ita caxuw me Pahpãm te pahhi na ixãm na me ijahkre pej to hane he. Quê ha pjê te catac ne me cumã ipicapôn, mã kam me hũmre itajê te me ipijaxwỳr, mã cute mehkrẽr na, ca ha cormã Pahpãm te me gõ pahhi na ixãm na me ijahkre pej — hajỹr.
Ne cormã cute ihcakôc jicu me ajkaam mã Côre me, mehkwỳ krac ri pjê catac ne me cumã ipicapôn, ne kre catia. Mã kam Côre me, mehkjêjê me, me kôt cute me Mojxe jũhhyr prãm catêjê me, mehpỳm. Ne hanea ne kam ampo cunea to me hõ tekjê atajê cunea pỳpỳm, ne mehtyc partu. Mã me ahna pjê pijapỳn. Mã ma Ixaher catêjê mehkôt kre ata mã mehpỳpỳm cupate, ma me pra.
Mã kỳj rũm Pahpãm jõ cuhy wrỳc, ne me hõ pahhi kwỳ te me xẽj pijakrut ne ihkôt xĩncwẽnta te Mojxe jũhhyr na me ajpẽn par atajê cunea to caxàr tu, mã me hamre.
21Pê cagã me hàhtôa jipej
4Mã ma Ixaher catêjê te me mõr kam mencrà, ne cute me Côxwatepti jõ pry kôt, me Hôr jõ kẽnti jakren. Ne ma Etõ jõ pjê pu na me ipijarõ prãmte me mõ. 5Mã amehpec ne nee hipêr cumã me hikaj prãm nare, mã ajpẽn mã ame Pahpãm jarẽn to amehkêanre, ne cute me Mojxe to me hajỹar, ne ajpẽn mã ame harẽn to kêanre, ne me cumã harkwa to:
— Ampo na mã ate põti ita mã, Ejit jõ pjê pê me ito acator, ita ri me ityc xà ita caxuw? Ita ri ite me ampo krẽr xà hamreare, ne nee me ikõm xà hamreare. Ne ramã me imã kwỳr pê mana ita kĩn nare — hajỹr.
6Mã Pahpãm te me hàhcahhõn xà kêanre ata jahpan xà na, mehwỳr cagã jàhtôa ne kujahêc, cute mehcãmxar prãmte. Mã ramã cute ame hàhtôa ne amehcãmxar, mã amehtyc. 7Cwỳrjapê ri ma Mojxe wỳr mehprõt, ne cute me cumã me amji jarẽn to:
— Wa ame amji pupun kêanre! Wa ite Pahpãm me, me acuna mã me ikên xà kêanre itajê ton, cwỳrjapê ri me ikêanre. Na ca ha Pahpãm mã acakôc, ne cumã me icajrẽn, quê me itête cagãti itajê to hawry — hajỹr. Mã Mojxe te Pahpãm mã mehcajrẽn.
8Mã Pahpãm te Mojxe mã harkwa to:
— Wakỳre nõ to cagã, quê ha cagã xàhti itajê mehcãmxa, quê ha me wakỳre te cagã ita pupu, ne nee amehtyc nare — hajỹr.
9Mã Mojxe te Pahpãm jarkwa na wakỳre to cagã, ne me hipôc ri inxôr. Mã cagã xàhti atajê mehcãmxa, mã me wakỳre te cagã ita pupu, ne hacpỹa mã mempej. Hamre.
22Pê cawrô cahàcre Parãw mã ihcakôc
Jirô pê mã pê Ixaher catêjê ramã Mowap jõ pjê na me ahtêp. Mã Mowap jõ pjê jõ pahhi catêjê mã ampeaj kam me hũpa, mã cute me ahna hũxy xiti japrỳ te Parãw ata mẽn, mãr quê mencrôn xà kêanre to me cucrô. Ne cute mencrôn xà kêanre to mencrôn jahpan xà na, ihtỳj cute me cumã ihpore to hũjahkre.
Mã Pahpãm te Parãw mã hũjarẽn, quê nee me hỹrmã ihtẽm nare. Mã Parãw ihtỳj apu Pahpãm ihtẽm xà na ahwỳ. Mã apu kam incryc, ne cute mehwỳr mõr xà ita na to tojnõ. Mã cute apu hõ cawrô cahàcre to hàhcuprõn, ne ma kam hỹr ne to tẽ, me hỹrmã.
Mã Pahpãm apu kam incryc, ne cute hỹrmã côjkwa pĩn cumã ipijapu catê nõ kujahêc, cute cupê pry jahêr xà caxuw. Mã ma tẽ ne xa.
Mã cawrô cahàcre te mam Pahpãm mã ipijapu catê ata te pry kam wapo to hãm na hõmpun, ne hũpate cute pry hyr. Mã Parãw te nee ihkĩnte hõmpun nare, ne apu cawrô cahàcre cahhy, cute pry wỳr to amji jaxàr prãmte. Mã hipêr Pahpãm mã me ipijapu catê te kẽn te pry to ihkre pucre ata wỳr ipicamẽn.
Mã cawrô cahàcre te hipêr hõmpun, ne tee apu hĩpê hahpan to hahkre, ne cute kẽn to Parãw par jaxôp. Cwỳrjapê ri hipêr apu ihcahhy. Mã hipêr hỹrmã me ipijapu catê ita picamẽn, pry kre pucre ata wỳr. Ne cute hahêr. Mã catàtkre jamreare ita kam, jũ na quê cawrô cahàcre ata mõ.
Ne cawrô cahàcre te hipêr me ipijapu catê ata pupun, ne hũpate Parãw to ihpỳm. Mã Parãw apu kam incryc ne hipêr pĩ cajrer to ihcahhy. Mã Pahpãm te cawrô cahàcre cakôc na mẽn, mã ihcakôc, ne cute Parãw cukij ne cumã harkwa to:
— Ampo to mã ite apê jũ mãn, mã ca ajte ate icahhyr ita to incrê? — hajỹr.
Mã pea Parãw caràr ne cute harkwa to:
— Ampo na mã ca apu imã? Quê imã wapo na mã, wa ha ramã acuran hiahpuro — hajỹr.
Mã cawrô cahàcre cumã:
— Pom ipê gõ cawrô cahàcre ita, ne ramã ite ato impej crire nare ita. Xà ita kam ite ijàpên xà ton ita to ramã ajkĩ ite amji pyràc tu? — hajỹr.
Mã cumã:
— Quê — hane.
Mã pea Pahpãm te Parãw mã into jahkjên. Mã cute amji cumam côjkwa pĩn me ipijapu catê nõ ata pupun. Mã ramã wapohti to cute caxwỳr xàa kam xa. Mã Parãw hũpate pjê kam ihpỳm.
Mã Pahpãm mã ipijapu catê ata te ihcukij ne cumã:
— Ampo na mã ate cawrô cahàcre cahhyr to incrê? Wa ita ri ite amji to acurê xwỳn ne xa, ne apu gahkre. Ampo na? Por ca jũ ri amõr xà wỳr mõ ata, nee Pahpãm mã impej nare. Ca cama ate ame to kên prãmte, ca mõ. Mã quêt mam cawrô cahàcre te ipupun ne ato hàhhuc, ne cute ato atyc xà jahpan — hajỹr.
Mã Parãw te cumã amji jarẽn to:
— Wa ajmãr itea amji kên mã amji mẽn, wa nee ite pry kôt amji cuna mã gahkre pej nare. Ne quê imõr xà ita na Pahpãm pê ihkaj na, ca imã awjarẽ, wa ha nee imõr nare, ne ita ri ijũrkwa wỳr amji jaxà — hajỹr.
Mã cumã:
— Gapacta ne atỳj me hỹrmã mõ, ne Pahpãm te amã ampo jarẽn itajêa to me cumã awjarẽ — hane.
Mã ma Parãw Mowap catêjê wỳr tẽ, ne curi cator. Mã me hõ pahhi Parac te cumã harkwa to:
— Ỹhỹ Parãw, Ixaher catêjê jàhtôa to me hàhtô, ne imã me hũpaa to me hũpa. Cwỳrjapê ca ha Apãm Cati te me to hy xàa kôt me to hy, wa ha itỳj ate me to hy jahpan xà na amã ihpore catia ne cugõ — hajỹr.
Mã Parãw cumã:
— Wa ha caxi, pa me to hahkre, ne ijõ Inxũ Cati te me ahna imẽn xà kôt pit mã, wa ha me to hy — hane.
23Pê Parãw tee mencrôn kêanre to hahkre
Mã ma Mowap catêjê jõ pahhi pê Parac te Parãw japrôr ne to mõ, ne kẽn na to hàpir. Mã ahpar mã, caprũm kôt, cute Ixaher catêjê jàhtôa ne me hõmpun. Mã cumã:
— Hamre, ca ha me hàhtôti itajê incrôn kam tẽ, ne mencrôn xà kêanre to me acrô. Ne me hũn xà kêanre to ame hũn, quê ha ate me hũn xà kêanre atajêa me to hy, ne ame to kêanre ne. Ne hanea ne côjkwa kam gõ Pahhiti wỳ, quê ha ame to kêanre ne, ne me to hamre — hane.
Mã Parãw te harkwa to me cumãn kam ihtẽm, ne me cumã:
— Mowap catêjê jõ pahhi pê Parac te imã ihcakôc,
ne me ahna imẽn to:
“Ixaher catêjê itajê to kên kam tẽ” hajỹr.
Ne jũ mã wa ha ajte,
ne por Pahpãm mehkwỳ to impejti atajê to apu ihkên?
He ajteare mã me, ne ampeaj kam me hàhtô,
ne ihtỳj me ipicamẽn to me mõr ita na.
Na wa itỳj mehkôat amji ton to prãm — hajỹr.
Mã Parac apu Parãw kam incryac to incryc ne cumã:
— Nãmri! Xà wa aracri ite amã ijarkwa to hajỹr? Mãr wa ite amã me to kêanre na ijarkwa hyr ta! Nõ na mã ca ate me to impejti ita to apu acakôc! — hane.
Mã Parãw cumã:
— Jũ wỳr wa amjia kôt ampo to icakôc, por me ijõ Inxũ Cati te ijarkwa to icakôc xà na imẽn atajêa to, wa ha icakôc — hane.
Mã Parac te hipêr ihcajpẽr to ipijakrut xà ata wỳr to hàpir, ne hipêr cute me to kên xà caxuw cumã harkwa hyr. Mã Parãw te amencrôn kên to hahkre, ne nee cute mencrôn xà kên nõ to mencrôn nare, ne cama harkwa pejti to me ahna ihcakôc. Mã Parac apu kam incryac to incryc, ne cute cumã hàmjõr nare, ne ma hũrkwa wỳr, hũre kam ihkujahêc.
35Pê Mojxe me amji pytàr jõ krĩ to mehhimpej
Pê Pahpãm Mojxe mã harkwa ta, quê Ixaher catêjê mã harẽ ne cumã:
— Ahtũmre quê ha, por ite me cumã Canãn jõ pjê jahkre ata mã me cato. Ne wa ha cormã me hàhcuran catêjê kôt amã harẽ, ne amã me to hahkre. Ne ate me to amji pyràc xà ata kôt, quê ha jũm amji pê hũkjê nõ cura, quê ha ihtỳj ihtyc ata jũkjê hanea ne cute ihcuran catê ata cura. Ne quê ihhêaj to cute ihcuran prãm nare kam ihcuran na, quê nee hahpan xà na mehcuran nare.
— Cwỳrjapê ca ha me cumã garkwa ta, quê me krĩ to xêj ne me capi, mãr quê cute mehcuran prãm nare kam mehcuran catêjê atajê krĩ itajêa mã me acjêj, ne kam me amxu. Jũ wỳr quê cute ihcuran ata jũkjê krĩ kam ipimxur ata ri me pro, ne mehcura. Ne quê ha me cute mehcukij catêjê mehkrĩ, ne mehcukij ne mehkôpĩr peaj ne, xà ajkĩ amjia kôt cute ihcuran, nare, cute ihcuran prãm nare kam ihcuran. Mõrmõ ajkĩ cute ampo to jũm jixôn prãm nare kam to hixôn. Quê cute nee jũm curan prãm nare kam ihcuran na, quê ha ihtỳj mehcunea, cute ihcuran ata jũkjê pê, amji pytàr xà na mehtehcajpa.
— Ne quê ha curia cute apu ipa na, quê ha ahnaa imã mehcajrẽn catêjê jõ pahhi ihwej ne ty. Jirô pê mã quê ha ihtỳj hapacta ne hõ krĩ wỳr amji jaxà. Ne por amjia kôt mehcuran prãam kam mehcura atajê, quê ha cute me harẽn catêjê me ajkrut, ne ajpẽan kôt me harẽn na, quê ha ihtỳj mehcura, cute jũm curan jahpan xà na — hane.