MACÔ JÕ KÀHHÔC
13Pê Jeju me, ihkôt me ipa catêjê Hĩpôjajo jõ pjê kam me ipa
7Mã Jeju me, ihkôt me ipa catêjê ma Hĩpôjajo jõ pjê wỳr me pra ne me cator, ne hĩpô tohkà na ame ipa. Mã krĩ kwỳ kôt cute me Jeju te curi apu mõr na me harẽn par, ne cute ahna me cuprõn tu. 8Mã Hĩpôjajo catêjê jàhtôa te me cuprõn. Ne hanea Juta jõ pjê me, Krĩpinkrên me, Côpijapjêr jõ cô jĩkjê pĩn hanea ne cute me cuprõn, Pjêhcaprêcti me, Kẽn jõ krĩ me, Teppro jõ krĩ me. Ne pê mehcunea, cute me Jeju cajpar prãmte, hỹrmã me mõ. Ampo na? Pê ajco me Jeju te ampo ton xà atajê cunea na me harẽn pa na pê. 9Mã Jeju ma ame hàhtôti te me ahna ihtỳj ita na ihcaca, na ri cute ihkôt me ipa catêjê nõ mã harkwa, quê pàr kre nõ na ahwỳ, quê kam jỹ ne me cupê to ajcamẽ crire ne. Mã harkwa kôt cute me ton.
10Ne pê Jeju ajco me hà jàhtôa ne me caprã. Na pê me hà catêjê jàhtôa ne cute Jeju tàt ne me amji caprãr prãmte, me hĩ to intête hỹrmã me amji pê amtà. 11Ne me kam me pahcurê xwỳn carõ kên atajê pê ajco me Jeju pupu, ne ajco cuna mã me ajhu, ne me caràr to:
— Apêa ri Pahpãm kra — hane. 12Pê Jeju ita tête incryac kam me cumã:
— Nee hipêr ipê Pahpãm kra na me ijarẽn nare — hane. Ne pê mehcahpêrta.
4Hũmre te pjê kam ampo hy kre jarẽn xà
26Pê Jeju me cumã harkwa to:
— He Pahpãm himpej xà pê ihhêj rũm me hũmre te pjê kam ampo hy kre. 27Ne ma tẽ ne ihtỳj apu ipa. Mã pjê krac ri ampo hy ata aracri huprãj to mõ, cute huprãj to mõr xà ata na hahkre pej nare kam. 28He pjê ita ri cumã hô gõ, quê ha mam hiprãj cato, jirô pê mã, quê ha kam ihhy krekà cato, ne ahna ahtũm nare quê ha kam ihhy, 29ne intep, quê ha caxuw wapo py ne to hakep. Ampo na? Ramã intep ne hakep xàa kam na ri — hane.
6Jowãw pê me cumrãr catê tyc xà
17Pê ramã putwrỳ nõ na pahhi Heroti ita Jowãw pê me cumrãr catê ata pro na to awjahkre. Pê me hũhkra cajpre ne hacjên xà mã me haxà. Ne ampo na mã pê me to hane? Nee mã ampo na nare. Pê pahhi Heroti tõ japrỳ pê Pirip ata prõ japrỳ Herotijkwỳj. Pê Heroti mã ihtõ prõ ata kĩnti, mã cute cupê caxàr ne cume hikwa. Mã ihtõ pê Pirip ata ahte apu ipa. 18Mã Jowãw pê me cumrãr catê ata te me hõmpun, ne ma pahhi pê Heroti ata wỳr tẽ ne cumã:
— Ampo na mã ate atõ pê ihprõ caxàr? He ate Mojxe xwỳ te me pajapackre xà kaj na ton — hajỹr.
19Mã pahhi prõ pê Herotijkwỳj te harẽn xà ita par, ne ahna cupê ihkaj na. Na ri ma apu Jowãw curê ne ihtỳj cumã ihcuran prãm. 20Mã jũ wỳr quê ihcura. Ampo na? He Jowãw pê hũmre impeaj ne ajco catyt kam ipa, na pê Heroti mã hũpa, ne ihtỳj ihkên pê hũtàr to prãm. Pê ajco Jowãw pahhi japackre, pê kampa ne cupê amji jahkre kêatre cakrô, ihtỳj kam hapac to prãm.
21Ne pê amcro nõ na pê pahhi ata pỳm xà jõ amcro cator, cwỳrjapê ri cute amji kĩn catia ton, ne cute me cupê pahhi cati catêjê cunea na me hàhwỳr. Ne hanea ne krãhtare jõ pahhi kwỳ me, Hĩpôjajo jõ pjê catêjê jõ pahhi kwỳ na me hàhwỳr, cahê na cute ame amji kĩn prãmte. Mã mehcunea te amji kĩn ata wỳr mehcuprõn, ne ihtỳj cute ame ampo kur catia ne ame ikõm catia to prãm to, cute mehcuprõn.
22Ne ihprõtpê Herotijkwỳj kra cahãj cuprỳ japrỳ te Xarõmkwỳj ata me amji kĩn ata wỳr hàr, ne me cuna mã hàkrun to mõ. Mã pahhi Heroti me pahhi cati kwỳ atajê cunea mã Xarõmkwỳj jàkrun xà ita kĩn, ne ahna me hakry. Ne pea pahhi te cuprỳ ata mã harkwa to:
— Wa ite me gàkrun xà ata kĩnti jahpan xà na, gapacta ne ampo na ihprãm xà ata na iwỳ, wa ha itỳj me akampa ne amã cugõ — hajỹr. 23Mã cuprỳ ata xa ne kampa. Mã pahhi te hipêr cumã amji ton ne amji ton tu ne cumã:
— He ampeaj kam! Ca ha ijàhcukrêj jĩkjê na ahwỳ, wa ha itỳj amã cugõ! — hajỹr.
24Mã cute impar ne ma inxi pê Herotijkwỳj ata wỳr tẽ ne cumã:
— Ampo na mã wa ha ahwỳ? — hajỹr. Mã inxi cumã:
— Ca ha cumã: “Ajpên ca ha imã Jowãw pê me cumrãr catê krã to tẽ, crat kam” hane — hajỹr. 25Mã hacpỹ ma mã hũjarêan kam, cute amji jaxàr ne pahhi mã:
— Ajpên ca ha imã Jowãw pê me cumrãr catê krã to tẽ, crat kam — hajỹr. 26Mã Heroti te impar ne cumã amji kĩn nare, ne nee cumã Jowãw curan to prãm nare. Ne cute me kam mare mã amji ton ita kam, ihpahàm cupate, cute ihcuran na harkwa hyr. 27-28Mã pyt jỹr xà ata kam, cute krãhtare pê hamãr catê ata kujahêc ne cumã:
— Hacjên xà wỳr tẽ ne ajpên cumã Jowãw krã jakep, ne crat kam to tẽ — hajỹr. Mã krãhtare ata wrỳc ne ma hacjên xà wỳr tẽ, ne cute Jowãw krã jakep, ne crat kam to tẽ ne cahãjre mã hõr. Mã cute inxi mã hõr. 29Mã Jowãw kôt me ipa catêjê atajê te ihtyc xà ata jarẽn par, ne ma me hacjên xà wỳr me pra, ne cute me hĩ pỳn ne cute me harêt. Hõhõ, pê Jowãw pê me cumrãr catê tyc xà ita hane. Cwỳrjapê pê Heroti Jeju to amji mã Jowãw xwỳ te hacpỹ mã ihtĩr na ihcãmjĩ.
Pê me hà me Jeju kà jahkà cyt atajê cunea impej pyrentu
53Mã cute Hũm carôt kôt hàpên xà pihho ata ton, ne ame harte jirô pê Jeju me, ihkôt me ipa catêjê me, ma Hĩpôjajo jĩkjê rũm, pjê japrỳ te Pĩrã jõ pjê ata wỳr me irêr, ne curia cute me pàr kre mã hê, cô tohkà na. 54Mã pàr kre pê Jeju cator, mã me hàhtôti atajê te me Jeju pupun pyrentu. 55Mã pea curia pjê ata kam cute me amji rẽc, ne ihtỳj krĩ cunea kôt me hà catêjê kôt ame pra. Ne ma me hà jikwa xà kam me cunõ, ne me ahna ahwỳ ne ma curi, por cute me Jeju jàhhuc xà na, jũ ri me hahkre pej xà ata wỳr me to pra. 56Pê krĩ jacot me krĩ cunea kôt ipa xà ata ri pê ajco hãn ne prya kam, cumã me hà nõ, ne me cumã Jeju na ahwỳ, ne ajco me cumã:
— Cama amji na me ijamã, wa akà jahkà cyt — hane. Ne por mehcunea te me Jeju kà jahkà cyt atajê cunea mempej pyrentu.
7Pê Jeju curê xwỳn catêjê ihkên mã me mẽn prãmte, mehcukij
1-4Pê Parixêw catêjê kwỳ me, cute me cumã Mojxe xwỳ jõ kàhhôc to me hahkre catêjê atajê me, Krĩpinkrên pĩn me cato. Pê Parixêw catêjê ajco Juta catêjê cunea mã mam cute ampo to me hahkre xà atajêa to ihhimpej. Na quê ha menquêtjê te me to amji pyràc xà te me amji ton xàa kôt, me hàpàn curê, ne mam me amji mã ampi ne hũhkra cuhhõ, ne cormã me apà. Ne por me hõ japrôr xà pĩn cute me ampo xô japrôr atajê, quê ha cute mehkur xwỳjrea na cuhhõ. Ne cormã, rỳ pêa mã cute ampo to me amji pyràc xà atajê ton to me ipa, ne mehkõm xà cuhhõn xà ata na mehcuhhõ, ne me pjê te pot cuhhõ, ne wakỳre te me hàwmrõ xà atajê cuhhõ. Parixêw catêjê atajê kwỳ te me Jeju kôt me ipa catêjê nõ ata te menquêtjê te me amji pyràc xà ata kôat nee hũhkra cuhhõn pej nare kam, ahnaa hàpàn na me hõmpun. Por pê Parixêw catêjê ajco ahna me cumã awjahkre ata kaj na, cute ton. Mã cute Jeju na me cuprõn ne mehkrã.
5Mã pea Mojxe xwỳ jõ kàhhôc to me cumã hahkre catêjê nõ te Jeju mã harkwa to:
— Ampo na mã ajte akôt me ipa catêjê nee me panquêtjê te ampo to me amji pyràc xà atajê kam me hapac, ne ihkôat me hũhkra cuhhõn nare, ne ahnaa me apà? Jũ wỳr quê ha cute me hajỹr xà ita kam me Pahpãm cajpuaw me — hajỹr.
6Mã Jeju te me cumã harkwa to:
— Põ rũm ri ihhêj ne ate amji kam me gapac xà impej, ne me acaxwãm pê me akêanre! Xãmte ampeaj kam pê Pahpãm jarkwa to ihcakôc catê japrỳ te Ixaj xwỳ me ate amji kam me gapac xà ita na me garẽ, ne me ana ihhôc to hane he:
“Mehkwỳ Pahpãm mã me harkwa to:
‘Pahpãm, apeaj to apej, ne imã akĩn’ hane,
ne ajte cute amji kam me hapac xà to,
ampỳa mã cupê me ipa.
7Ne cute me Pahpãm to mehcakôc xà impejti ita kôt hamreare.
Ampo na?
He me cumã me hũmre te amji kam hapac xà to pit mã hahkre to hãn ne me ipa,
ne cute me cumã to hahkre xà ata kam,
quê ha ihtỳj mehkwỳ mã mehhêj xia jarẽn to:
‘Pom wa me amã ampo to hahkre itajê pê Pahpãm te amji kam hapac xà’ hane”.
Hõ, pê Ixaj xwỳ me ato hũjarẽn to hane.
8— Ca ma ame ihimpej xà caca, ne ajte me aquêtjê te amji kam me hapac xà to pit mã, cute me hahkre xà ata na ca me prãm. 9Ca gõtpê jũ mã me, ne amji tête me Pahpãm jarkwa himpej xà to ne me hũrê, ne amji tête me hajo, me ate me aquêtjê te amji kam hapac xàa kôt me apa prãmte.
10-11— Pê Mojxe harkwa hyr to:
“Amji mã me apãmjê cupa,
ne amji mã me axyrxwỳ cupa,
quê ha ihtỳj cute me hũmxwỳ mãn catêjê curan partu”
hajỹr cakrô, ca ate me amji kam me gapac xà to me amji pyràc xà ata kôt, ajte ajteare mã me cumã to hahkre, ne me cumã: “Quê ha jũm mã ampeaj kam hàhcukrêj, quê ha ihtỳj to hũm me inxi tehcajpa. Nãmri quê ha cute Pahpãm jũrkwa jamãr catêjê mã, cute hũm me inxi mã ampo jõr xà atajê jõr na, amji to hũjahkre na, quê ha xwahna nee hũm me inxi mã ampo jõr xà atajê nõ nare. Ne cama me cumã harkwa to: ‘Wa ramã me Pahpãm mã ite ijàhcukrêj ita to ijũjahkre, na wa ha nee amã ampo ata jõr nare’ ” hajỹr. 12Ne me ate amji kam me gapac xà ita kam quê ha nee hipêr me hũmjê me, menxyrxwỳ tehcajpar to prãm nare.
13— Ca ha ate me hajỹr na, ca ha ma amji tête ame Pahpãm te amji kam hapac xà curê, ate me aquêtjê te amji kam hapac xàa to ate me amji kam me gapac, ne me cumã to hahkre prãmte. Ne ramã ate amji to me hajỹr to me amji pyràc tu, na ca atỳj me ampo itajê cunea ton to me apa — hane.
Pê Jeju ampo te me pahto kên xà cawpa
14Na pê hipêr Jeju me hàhtôa na ahwỳ, ne me cumã harkwa to:
— Ampo to icakôc xà ita na me ipar mã hamãa ne, mãr ca me kampa. 15-16He xà cu me pajõ ku itajê, ihtỳj pahte me pahkên ton na me pahto? Hãpà! Pom hãn ne põ rũm me pajarkwa wỳr me pajõ pra ne acjêj itajê, nee me pahto kên nare. Ne pom me pahte amji kam me pajapac xà pĩn hapôj itajê ri ihtỳj me pahto kên. Xà me gũpar xà caxuw me amã me gapackre nare? Me ikampa ne ite me amã ampo to icakôc xà atajê kôt hakop to mempeaj ne — hane.
17Mã Jeju te me hàhtôti atajê mã ihcakôc jicu, ne me huwahi, ne ma ikre mã hàr. Mã ihkôt me ipa catêjê te hũjarẽn xà ata na mehcukij. 18-19Mã cute me cumã harẽn to:
— Pỳhàpà, me hũmre itajê! Xãmte nee cormã ate me icakôc xà ita na me ipar nare. Me apê me ikwỳ kwỳa cakrô, ca ajte nee ijũjarẽn xà atajê na me ipar nare. Pom ampo me garkwa mã acjêj ca me ku itajê, quê nee ame ato kên nare. Ampo na? Quê ha nee ate amji kam me gapac xà mã hàr nare, ne atu mã quê ha axà, jirô pê mã quê ha gĩ pê cato — hajỹr. Por pê Jeju me pajõ to hũjarẽn to hane ata kôt, cu pahtỳj me pajõ itajê cunea ku, ne nee ampo itajê nõ ihkên nare na, ramã me pamã hahkre pej. Ne cormã Jeju me cumã:
20-21— Ne por quê ha jũm te amji kam hapac xà pĩn ampo cato ata, quê ha jũm ata to kêanre ne. Ampo na? Cute amji kam me hapac xà ata pĩn, quê ha cute ampo to amji kam hapac xà kêanre ata cato. Atajê pê ri cute amji kam hapac xà kên me; ampo kam me pahpahàm kêanre ata me; me hàhkĩj me; me hàhcuran me; amji pê mehprõ caxun me; 22cute mehpore me, me hàhcukrêj kĩn me; mehkwỳ to kên xà caxuw me hũ na hàhtàt nare me; mehhêj xi me; mehpahàm nare me; hũ na amji mã ampo kĩn me; mehkwỳa mã mehkwỳ to mehcakôc kên me; amji to me hàmra me; mehkrã nare me. 23Ne ampo itajê quê ihtỳj ate amji kam me gapac xà cunea pĩn hapôj, ne quê ihtỳj me ato kêanre ― hane.
Pê cahãj cahkrit nõ amji tehcajpar xà na Jeju na ahwỳ
24Jirô pê, pê ma Jeju krĩ pê cato ne mõ, Kẽn jõ krĩ pu na pjê ata wỳr. Ne pea ikre nõ ita mã hàr, ne tee ame hàhtôti atajê pê amji to ipimxur to hahkre, ne jũ wỳr quê amji mã hamã ne amxu. 25Pê cahãj nõ pê ihkra cahãj kam, me pahcurê xwỳnti carõ kên ata te Jeju jarẽn par. 26Cupê krĩxàre pê côxwa cahê na Xiri jõ pjê catêjê nõ, ne nee cupê Juta catêjê nõ nare cakrô, mã ma hỹrmã tẽ, ne cuna mã ihkõn krã na hỹr ne ahna hàhwỳr ne cumã:
— Ikra intête ampo carõ kên ita capa — hane.
27Mã Jeju te cahãj ata capi prãmte cumã:
— Ite ato hajỹr xà ita na ihkaj na. Ampo na? Nee apê Juta catêjê nare, ne acahkrit, cwỳrjapê ri apê roap pyràc. Ne wa ite mam mehkra mã harte xà caxuw wa ajpên me hỹrmã mõ, ne nee rop mã mam ite harte xà caxuw wa ajpên me hỹrmã imõr nare — hajỹr.
28Mã cahãj cumã:
— Ỹhỹ pahhi, he ampeaj kam ri icahkrit ne Juta catêjê kĩnte ipê roap pyràac cakrô, wa itỳj hanea ana prãam to prãm. Pom quê hãn ne ahkrare hàpàn xà pê ampo krut cupa mã ajhu, mã rop krare cuku, ita jĩkjê na ite hajỹar. Na wa ate itehcajpar xà kênre ita na ahna awỳ — hane. 29Mã Jeju cumã:
— Ate acakôc xà ita ton, cwỳrjapê gapacta ne amji jaxà gũrkwa wỳr, ne ramã me pahcurê xwỳn carõ kên, akra cahãj ita pê cator — hane.
30Mã ma pyjê nõ ata te amji jaxàr, ikre wỳr, ne cator. Ne cute me hikwa xà kam ihkra pupun, mã ihtỳj nõ, mã ma cupê me pahcurê xwỳn carõ kên cator.
Pê Jeju jũm xũmre japac tu caprã
31Jirô pê mã ri ma Jeju krĩ pê cator ne mõ. Ne ma Kẽn jõ krĩ jõ pjêa na mõ, krĩ atajê kôt, ne Teppro jõ krĩ na mõ. Ne cute Krĩtetej jõ pjê jakren, ne ma Hĩpôjajo jõ pjê na cator. 32Mã jũmjê itajê te Jeju wỳr me jũm xũmre japac tu, ne nee ihcakôc pej nare ata to me cator. Ne cute Jeju na me hàhwỳr, quê ahna hũhkra xi ne to impej.
33Mã Jeju te me hàhtôti ata pê to cator, ne pea cute hũhkrahhi to ajpẽn cuna mã hapac jũjê. Ne cute hũhhi kam harcô mẽn, ne cute harcô ita to hũmre ata jõhto cupên. 34Jirô pê mã ri kàj mã, côjkwa wỳr irĩt ne cute higẽc mẽn, ne Juta catêjê jarkwa to cumã:
— Epata! — hajỹr. Ita jũjarẽn xà te: “Amji jihê mẽ, ne akre!” 35Me ajkaam mã, hapackre ne hõhto jirot, mã cute ihcakôc kam ihtẽm pyrentu, ne nee hipêr ihcakôc kên nare.
36Mã Jeju te amji jarẽn tête me cumã harkwa to:
— Nee ame cumã ijarẽn nare — hajỹr cakrô mã tàkamrỳ cute me harẽn to cati to mõ. 37Ne por pê ajco me harẽn pa atajê to pê ajco me amji mã ajkra, ne ajpẽn mã me harẽn to:
— He cumã ampo pej cunea ton jahkre pej, na ri ihtỳj to, ne me to impej! Ne ihtỳj hacpỹa mã me hapactu jũpar na me to, mã me awpa, ne jũ mã me ipẽrkêt to, mã hacpỹa mã mehcakôc! — hane.
8Pê Jeju hipêr me cumã harte
1Mã me ahna amcro jàhtô nare, mã ma põ kam, mũhũràn me hàhtôa ne cute Jeju na me cuprõn. Ne me hàpàn xà caxuw ampo hamreare xà ata kam, mã Jeju te ihkôt me ipa catêjê mã:
2— Ampeaj kam imã me caprĩ xà. Ampo na? Ramã ikôt ame ipa ita to cute me amcro to incrê, ne põti ita kam me cupê me hàpàn xà caxuw ampo hamreare. 3Wa me hàpàn nare kam me hũrkwa wỳr ame cucrà, quê ha pry cahti ri prãm ame curẽ, nãmri mehkwỳ hũwrya pĩn me hapôj — hajỹr.
4Mã ihkôt me ipa catêjê te mehcukij ne me cumã:
— Jõ ri wa põ ita kam, me hamreare ita kam me hàhtôti itajê mã harte xà caxuw me hõ nõ mã me icato? — hajỹr. 5Mã Jeju me cumã:
— Jũ mã ri me amã kwỳr te pro jàhtô na cute? — hane. Mã me cumã:
— Imã kwỳr te pro te xet — hane.
6Mã cute pjê kam me hàhtôti atajê jỹr na me cumã hũjahkre, mã me hỹr. Mã cute kwỳr te pro te xet ata cwỳr, ne to Pahpãm mã hũrên hakryti to ihcakôc. Jirô pê mã ri cute me cumã ihkryj par, ne ihkôt me ipa catêjê mã hõr, mã cute me cumã to ipicràn par. 7Ne hanea ne caxuw tep xêt nõ atajê, mã Jeju te to Pahpãm mã hũrên hakryti to ihcakôc, ne ihkryj ne ihkôt me ipa catêjê mã hõr. Mã hanea ne cute me cumã to ipicràn.
8Mã mehcunea jàpàn kênre nare, ne ame harte. Mã cormã ihkôt me ipa catêjê te ihcahhur jàhhuc itajê to me kàhà to xet ne me to hipu partu. 9-10Ne pê me apà atajê pê me hàhtô na me mir to cwat. Mã ma Jeju te mehkujahêc par, jirô pê mã ri pàr kre mã hàr, ihkôt me ipa catêjê me, ne ma Tarman jõ pjê wỳr cô ita na me irêr, ne me cator.
Pê Pariêw catêjê kwỳ me Jeju te ampo pihho catia ton ne me ahna ahwỳ
11Mã Parixêw catêjê kwỳ hỹrmã cator, ne cute me Jeju te ampo pihho catia ton na me ahna hàhwỳr kam ihtẽm. Ne nee mã cute amji mã me to ihhimpej xà caxuw amehcukij nare. Ne cama cute mehkên mã mẽn prãmte ri amehcukij, ne me cumã:
— Mẽr me imã côjkwa pĩn ampo pihho catia to, wa ha me hõmpu, ne cormã me Pahpãm te me iwỳr akujahêc na me gahkre pej — hajỹr. 12Mã Jeju te caxwãm catia mã incaca mẽn, ne me cumã harkwa to:
— Ampo na mã ca me akwỳ mea mã, ite ampo pihho catia ton na me ina gàhwỳr to ame apa? Wa ramã ite, me ate amji mã me ito ahimpej nare na me gahkre pej. Cwỳrjapê wa ha nee me amã, ate ampo pihho catihti na me gàhwỳr xà itajê nõ ton nare — hajỹr.
Pê Jeju apu ihkôt me ipa catêjê mã
13Ne ihkôt me ipa catêjê me pàr kre mã me hàr, ne ma hacpỹ mã hĩpô jĩkjê wỳr me to tẽ. 14Mã ihkôt me ipa catêjê te me kwỳr te pro to me hapac kêt, ne pyxit peaj ne pàr kre mã me to hàr. 15Mã Jeju te me cumã mehcawpa to:
— Co he, ma amji na me Parixêw catêjê me, pahhi Heroti jõ kwỳr te pro to me guphêa ne! — hajỹr.
16Mã ihkôt me ipa catêjê te ita to ajpẽn mã mehcakôc kam ihtẽm, ne me ajpẽn mã:
— Pahte me kwỳr te pro nõ pyr nare, na ri apu hũjarẽn xà ita to hane — hajỹr.
17Mã Jeju te mehcakôc xà ita na me hahkre pej, ne mehcukij to:
— Ampo na mã ca me apê kwỳr te pro nare ata na ame ajpẽn cukij to ame apa? He xà ajkĩ me apê ijũjarẽn xà ita par kôt hakop jahkre kêatre? Xà wa ajkĩ amji jarte to pit mã amji japackre to ipa prãm? Ampeaj kam ate me ampo par xà itajê cunea na me akrã tỳj. 18Xà nee me arĩt xà caxuw me ato nare? Ne nee me gapac nare, me gũpar xà caxuw? 19He xà ca nee ajte me kwỳr te pro te xĩc to, ite me hàhtôa mã harte xà ata na, me ito amji japackre nare? Jũ mã ca ate mehcahhur to me kàhà to me hipu ton? — hajỹr. Mã me cumã:
— Kàhà te tôxi — hane.
20Mã hipêr cute mehcukij to:
— Ne por wa ite mam me hàhtôti te me mir te cwat mã kwỳr te pro te xet kryj xà ata, jũ mã ri ihcahhur na kàhà jàhtô na cute, ca ate me to hipu? — hajỹr. Mã me cumã:
— Kàhà te xet — hane. Mã Jeju me cumã:
21— Mẽr hõhõ, xà ca ajte cormã nee ite me amã Parixêw jõ kwỳr te pro jarẽn xà ita jahkre pej nare? — hane. Mã cormã ihkôt me ipa catêjê te Parixêw te amji kam me hapac xà kên pê kwỳr te pro cawpa xà ata na me hahkre pej.
Pê Jeju into tũm caprã
22Jirô pê mã ri Jeju me, ihkôt me ipa catêjê me, ma krĩ jacot pê Tep jõ krĩ mã me cator. Mã curi catêjê te me jũm to tũm japrôr ne hỹrmã me to cator, Jeju te ihcupên prãmte. 23Mã Jeju te into tũm ata jũhkra na ipyr, ne ma krĩ pê to cator. Ne cute hũmre ata to na harcô to ihtẽm, ne ahna hũ xir ne cumã:
— Xà ca atỳj ita caxuw ampo pupu? — hajỹr. 24Mã hũmre ita rĩt ne apu rĩt, ne cute cumã harkwa to:
— Wa itỳj me hõmpu, ne cama me hõmpun xà ita pê ihhêj rũm me hũmre pê pĩ pàr te ipa pupun — hajỹr.
25Mã hipêr Jeju te into na hũ xir. Mã pea hũmre ata rĩt pej, ne caprãr, ne ihtỳj ihcunea na irĩt pej. 26Ne ma cute krĩ pê hũmre ata kujahêc, hũrkwa wỳr, ne cumã:
— Tẽ ne nee hacpỹ ne Tep jõ krĩ wỳr amji jaxàr nare — hajỹr.
10Pê Jeju curê xwỳn catêjê ihkên mã me mẽn prãmte hipêr ihcukij
2Mã ma Parixêw catêjê kwỳ Jeju wỳr me mõ, cute ampo na mehcukij prãmte. Ne nee mã cute me ampo jahkre pej prãmte hỹrmã me mõr nare, ne cute me Jeju te ihcakôc xà nõ to ihcupan na me ton to prãmte ri, hỹrmã me mõ. Ne hỹrmã me cator, ne me cumã:
— Xà cu ha ajkĩ Mojxe xwỳ te me pajapackre xà ata kôt, pahtỳj me pahprõ mã me hikra? — hane.
3Mã Jeju te mehcukij to:
— Jũ mã pê Mojxe ita na ihhôc to? — hajỹr.
4Mã me cumã:
— Pê Mojxe me pamã to hahkre to hane he: “Ca ha aprõ mã hikran prãm, ne ate cumã hikran xà na cumã ihkàhhôc to, ne cumã agõ, ne atỳj jũ kam ihkujate” — hane.
5Mã Jeju me cumã:
— He me akrã tỳj, ne me gũpar nare kam pê Mojxe me gapackre xà ita to hane. 6-8Ne rỳ pêa mã, mam Pahpãm te pjê ton xà ata kam, pê mam hũmre to ne ihkôt cahãj to, ne ajteare mã quêt harẽn to hane he: “Quê ha ita caxuw me hũmre menxyrxwỳ me, me hũmjê jicu, ne me hikwa tuw, ne ma mehprõ wỳr me rê, ne mehprõ me, me ajcaxê, ne ajpẽn kam me pyxit peaj” hane. Cwỳrjapê ri nee ita caxuw Pahpãm mã ajpẽn kam me ipijakrut nare, ne ajpẽn kam me pyxit peaj. 9Cwỳrjapê quê nee Pahpãm te ajkam me to cuprõn ne me to pyxit peaj ata to, hipêr ajpẽn pê me ipicapôn xà nare — hane.
10Ne Jeju te me cumã hũjarẽn to hajỹr jirô pê mã, ma hacpỹ mã ikre wỳr, ihkôt me ipa catêjê me, me mõ. Ne ikre mã me hàr, mã ihkôt me ipa catêjê te me hahkre pej prãmte ahna mehcukij. 11Mã Jeju me cumã:
— Ỹhỹ, quê ha jũm xũmre hĩxi mã hikra, ne ajteare mã cahãj nõ me hikwa na, quê ha ramã hĩxi ata cuna mã ihkên xà ton ata kôt, Pahpãm mã cupê cute amji kam hapac xà kam inxyre kêanre atajê ton catê. 12Nare quê ha jũm cahãj te impjên mã hikran, ne ajteare mã jũm xũmre me hikwa na, quê ha ramã impjên ata cuna mã ihkên xà ton ata pê Pahpãm mãa, cupê cute amji kam hapac xà kam inxyre kêanre atajê ton catê — hane.
Pê Tijac me Jowãw me amji to cati prãmte amji mã Jeju na ahwỳ
35Jirô pê mã ri Tijac me Jowãw pê Xeptew kra atajê mehkwỳ pê ampỳa mã, ahte Jeju wỳr me hàhtêp, ne me cumã:
— Me ijõ Pahhi, ate amji kam gapac xà na, ite me ana ijàhwỳr xà kampa, ne nee me ipê jũ mãn nare ajco — hane.
36Mã Jeju me cumã:
— Ampo to wa ha me amã? — hane.
37Mã me cumã:
— Ca ha amcro nõ na ate pjê cunea to ahimpej xà caxuw gỹr xà catia carôt tỳjti ata kam jỹ, ne ca ha pijamã amji na me inõ jamã, wa ha me inõ acahê na awpôc rũm jỹ, ne me inõ awke rũm jỹ, ne acahê na me ihimpej! — hane.
38Mã Jeju me cumã:
— Pom ca ate ampo na me gàhwỳr xà ita, ca ate nee me hahkre pej nare kam, atỳj ahna me iwỳr. Xà ca ha ajkĩ atỳj icuxà me ikên xà itajê mã me awcanã? Ỹhỹ, wa ha ihimpej xwỳjrea na itỳj amji pupun xà kêanre to amji pupu. Ne por ite amji pupun xà kêanre ata pê ihhêj rũm ite ampo kêanre te ito kên xà to ite ikõm, ne kam amji cumrãr xà ata — hane.
39Mã me cumã:
— Wa ha itỳj me awcanã — hane. Mã Jeju me cumã:
— Ampeaj kam ca ha atỳj icuxà me amji pupun xà kêanre to me amji pupu. 40He wa nee pa me amã jũ mãn nare, nãmri ramã Pahpãm te amji mã icahê na mehkrĩ ne mehhimpej catêjê atajê capi, ne por cute amji mã jũmjê capi atajê mã quê ha ihkrĩ xà itajê jahkre, quê ha kam mehkrĩ — hane.
41Mã ihkôt me ipa catêjê kwỳ te me ita par, ne ame Tijac me Jowãw kam mencryac to amencryc. 42Mã Jeju te amji wỳr mehcunea to cuprõn ne me cumã:
— He me amã pjê ita kam krĩxàre jõ pahhi catêjê te kypê mehkwỳ to ihhimpej nare na, me hahkre pej. 43Na wa ha intête me amã, mãr quê nee jũ caxuw me akam ampo itajê nõ hajỹr nare. Nãmri quê ha me anõ mã amji to acati to prãm na, ca ha me akwỳ cunea mã gàpên to apa. 44Ne por quê ha mam jũmjê mã amji to prãm atajê, quê ha nee pahhiti na me amji to prãm nare, ne quêt amji to cama mehcunea mã hàpên catêjê.
45— He nee jũm xũmre te ito impejti xà caxuw wa ajpên pjê ita wỳr, ipê me Ahàkà cati te me hũmre na amji ton, ne iwrỳc nare. Ne quêt ite me atehcajpar prãmte wa ite amji to me akritxwỳ, ne me gaxà kam ityc xà caxuw, wa icator, mãr wa me hàhtôa ne me hũtà ne me to impej — hajỹr.
11Pê Jeju pĩxô pàr nõ ata crô
12Ne jũ mã me ahna amcro te, mã ma hacpỹ mã Mehkênpupunxà jõ krĩ pĩn cute me amji jaxàr ne me mõ, mã ramã Jeju mã prãm. 13Mã ampỳa mã cute pĩxô pàr nõ hôncoti pupun, ne ma hỹrmã mõ ne cator, cute ahna hô japên prãmte, mã ahna hô nare. Pê cormã hô xà kaj na, na pê nee hô nare. 14Mã Jeju te harkwa to pĩxô pàr ata crôn to:
— Quê ha nee hipêr jũ caxuw jũm apàr xô nõ krẽr nare — hajỹr. Mã ihkôt me ipa catêjê te incrôn xà ita na mempar.
Pê Jeju pĩxô pàr crôn ata incrà tu ne xa
20Mã apẽ mã iràrà na, ma hacpỹ mã Jeju me ihkôt me ipa catêjê pry ata kôt me mõ, pĩxô pàr ata na, ne cute me hõmpun, mã harê mea mã incrà tu ne xa. 21Mã Petrô te pĩxô pàr crà ata pupun, ne Jeju te cumã harkwa hyr na to amji japackre ne Jeju mã:
— Ijõ Pahhi, hõmpu he, mãr ca ate pĩxô pàr crôn ta, incrà tu ne xa he — hajỹr.
22-23Mã Jeju cumã:
— Ita to amji japackrea ne he, ca ha ate ampeaj kam Pahpãm to amji mã ahimpej na, ca ha hàhkà jakôtti ita mã garkwa to: “Amji capa, ne côxwa kam amji to awcapê” hane, quê ha hàhkà jakôtti ata ihtỳj akampa, ne garkwa kôt amji capa ne amji to awcapê. Ỹhỹ, ca ha ate gũjarẽn xà ata kam ramã amji caxwãm pê amji mã: “Wa ramã ite Pahpãm te ita to hajỹr to prãm na hahkre pej” hajỹr na, quê ha ihtỳj garkwa kôt amji to awcapê. Nãmri ca ha ate gũjarẽn xà ata kam, amji mã: “Mõrmõ Pahpãm mã ajkĩ ita na to prãm nare, mõrmõ ajkĩ ahna cumã to prãm” hajỹr na, quê ha nee apar nare.
24— Cwỳrjapê wa me amã awjarẽ, ca ha me Pahpãm mã acakôc ne ampo na me wỳ, ne atỳj cute me amã hõr na amji mã me to hajỹr pyrentu, mãr quê ihtỳj me amã cugõ, ca ha me acwa. 25Ca ha hãn ne Pahpãm mã me acakôc kam pra, ne atỳj jũm te me anõ to kên xà atajê jicu, ne to tojnõ, mãr quê côjkwa kam Inxũ Cati jỹ ata hanea ne, me acuxà, ate me akên ton atajê cunea jicu, ne to tojnõ. 26Nãmri ca ha ate me jũm te me anõ to kên ata to tojnõ nare na, quê ha Inxũ Cati, côjkwa kam ihkrĩ ata, me acuxà, nee ate me to kên atajê to tojnõ nare — hane.
13Pê Pahpãm ampo cunea jamre xà jõ amcro jahkre pej
32Jeju te pjê jamre na harẽn jicu xà to:
— Nee jũm mã amcro me, caxwa me, pyt jỹr xà nõ jahkre pej nare, Inxũ te amji mã ihhyr xà ata na. Ne nee côjkwa kam cumã me hàpên catêjê nõ me, ipê ikra mã, cute amji mã amcro hyr xà ata jahkre pej nare. Ne Inxũ pyxit peaj mãri cute amji mã amcro hyr xà ata jahkre pej. 33Cwỳrjapê ca ha me guphêa rũm me apa, ne nee ca atỳj ame apa nare, ne ma me amji jamãr to me apa. Ampo na? He nee me anõ mã hõ amcro ata cator xà jahkre pej nare.
34-35— Quê ha ihhêj rũm me Ahàkà cator xà ata pê jũa kam, hũwrya kam me hũmre nõ tẽ, ihtẽm xà ata to ihtẽm pyràac. Ne ihtẽm xà ata wỳr, quê ha ahpỹanre na cumã me hàpên catêjê mã, me hàpên xà jõr partu. Ne pea hũrkwa jamãr catê mã harkwa to: “Ma ijũrkwa ita jamã, nãmri me apê hacpỹ ne icator xà na ijahkre kêatre, mõrmõ wa ha pyt kam icato, nare, wa ha caxwa picapôn kam icato, nare wa ha awcapàtkô cahtiri icato, nare, wa ha iràràtia na ajkĩ icato” hane.
— He me apê ikre jamãr catêjê atajê pyràac, ne ipê ikre jõ pahhi ata pyràac. Cwỳrjapê ca ha me gũjamãr pejti to me apa, ne ma me ijikaj. 36Ca ihhêaj to me ijikaj nare kam, wa ha krãa me awỳr icato, ne nee me gõt na icator, ne me gõt na me apupun nare! 37Ne pom wa amã awjarẽ ita, wa nee apyxit peaj mã harẽn nare, wa mehcunea mã harẽ, ca ha nee atỳj ame apa nare, ne ma me amji jamãa ne! — hane.