RUC

RUC

Te Jeju Jarẽn Xà Impejti

JÕ KÀHHÔC

Ỹhỹ, pê rỳ pêa mã Pahpãm pjê ita wỳr cumã ihkra pyxit peaj ata kujate, pê côjkwa pĩn wrỳ, ne ita ri, pjê ita kam apu ipa, ne haprỳ pê Jeju.

Mã me hũmre te cwat itajê te ahna me ihhôc. Ne cute me ihpỳm xà me, ihkà to mõr na me ahna ihhôc. Ne hanea ne cute me cumã ampo to hahkre xà me, cute me hapackre xà me, cute ampo cunea ton atajê na, ahna mehhôc. Ne me hicu xà kam, cute me ihtyc xà me, hacpỹa mã ihtĩr xà me, hacpỹa mã côjkwa wỳr hàpir xà na me ahna ihhôc par.

Ne cute me cwat te me ahna ihhôc itajê japrỳ te, Matew me, Macô me, Ruc me Jowãw. Ne caku crê kam Matew me Jowãw Jeju kôat ame ipa. Ne cute mento jĩa to me Jeju te ampo ton atajê cunea na me hõmpun. Ne cute me hapackre xà atajê cunea na me kam hapac par, ne ahpỹanre na, me hõ kàhhôc kam, me Jeju te amji kam hapac xà pejti na mehhôc par.

Ne Macô pê Petrô pê Jeju kôt ipa catêjê nõ ata jõ ikwỳ nõ. Ne cormã intuwre ita kam, nee cupê Jeju kôt ipa catê nare cakrô, ihtỳj ampỳa mã cumã hahkre pej. Mã Petrô te hõtpê catyt kam ihcunea na cumã Jeju jarẽn par, mã cute harẽn par xà atajêa kôt, cute hõ kàhhôc kam ahna ihhôc par.

Pê mehkĩnte Ruc nee into jĩa to me cuxà Jeju pupun nare cakrô, pê ihtỳj ajco Jeju jahkre pej pejtu catêjê atajê cukij, ne cute me cumã Jeju jarẽn xà kôt, hõ kàhhôc kam ahna ihhôc.

Ne Ruc me Jowãw te hõ kàhhôc kam me Jeju na ihhôc itajê cunea, wa ramã me ite mehĩ jarkwa wỳr ihcunea to me ipintuw partu, cwỳrjapê ca ha gapacta ne atỳj me cahyt pa.

Ne Matew me Macô jõ kàhhôc, wa nee me ite ihcunea to me ipintuw nare. Ampo na? He Matew me Marco te me Jeju jarẽn xà itajê jàhtôa me, Ruc me Jowãw te harẽn xà itajê pipẽn pit, na wa ite nee hipêr to ipintuw nare. Ne quêt ajteare mã cute me harẽn xà atajê, wa ite catyt kam ihkàhhôc ita kam me to ipintuw par. Ne catyt kam Ruc jõ kàhhôc kam me to ipicacwỳr. Ne ihkàhhôc japrỳ pê Ruc Te Jeju Jarẽn Xà Pejti Jõ Kàhhôc (Ruc).

Ruc te amji jarẽn xà

¹Taamã Tejopir, ipê Ruc, pa wa Jeju na amã ihhôc. Pê ampeaj kam me hàhtô ne hãn ne Jeju na, ame ampo pupu atajêa na mehhôc to me ipa. ²Pê mam cumã kat kam jũmjê itajê ampo cunea pupu, ne ajco mehcunea mã ampo itajê jarẽn to me ipa. Ne cute me imã ampo itajê cunea jarẽn. Na wa ite ampo itajê cunea na amã ihhôc.

³Ỹhỹ, pahhi Tejopir, wa ite amji mã iprĩa ne ampo itajê to hahkre. Ne ampo itajê ri, cute mam, cumã kat kam, mam me hõmpun xà. Ita cwỳrjapê ri ahna imãa impejti, na wa catyt kam ite ihcunea na amã ihhôc to impejti. ⁴Ihhêj ne ramã jũm te amã ampo itajê to hahkre. Na wa ite ita kam ahna amã ihhôc, ca ampo itajê cunea pupu ne hahkre pej pêa ne, nãmri ampeaj kam ri.

Me cumrãr catê pê Jowãw pỳm xà to hũjahkre xà

⁵Ỹhỹ, pê cormã Heroti pê pjê jõ pahhi, Juta jõ pjê kam, pê curi Pahpãm mã mehcajrẽn catêjê nõ ita japrỳ pê Xacarij. Pê cupê Apij xwỳ kwỳ kwỳ nõ. Ne hĩxi japrỳ pê Ixapewkwỳj, ne cupê Arãw xwỳ tàmxwỳ tàmxwỳ nõ. ⁶Ne pê ajwar catyt kam me ipa, ne mempejti to me amji kampa, Pahpãm cuna mã. Ne ajco me Pahpãm jarkwa cunea kampa. ⁷Ne pê Ixapewkwỳj ita ihkra nare. Ampo na? Pê hahũm ita na ipa, ne ramã ajwar mehwejtu.

⁸Mã hamre, Apij xwỳ kwỳ jàpên xà jõ amcroa kam hàhhuc, mã Xacarij Pahpãm cuna mã apu hàpên to mõ, Pahpãm to amji kam hapac xà jũrkwa kam. ⁹Mã jũm ita te Xacarij capi, hàr ne cute Pahpãm cuna mã ampo kũm cuxwati ita mã haxàr, mã cute caxàr prãmte. Ata to pê Pahpãm mã mehcajrẽn catêjê kwỳ hãn ne ame. Mã hamre, ma hàr, Pahpãm to amji kam me hapac xà jũrkwa caxwãm pê. ¹⁰Mã jũmjê atajê jàhtôa ne cute me cuprõn, ne põ pê me xa, ne Pahpãm mã mehcakôc. Mã Xacarij xàr ne xa, ne apu ampo kũm cuxwati ata to capa.

¹¹Mã ihprõt pê, Pahpãm jarkwa to memprar catêjê nõ côjkwa pĩn cator, ne ampo kũm cuxwati te caxàr xà ata cuna mã awpôc rũm xa. ¹²Mã Xacarij te hõmpun, ne ampeaj kam cumã hũpa, ne cupê amji jahkre kêatre, ampo to mõrmõ quê ha ajte. ¹³Mã Pahpãm jarkwa to imprar catê cumã:

― Xacarij, nee ca apu icupa nare, ca ate Apãm Cati mã acakôc, mã cute apar. Na quê ha gĩxi mã ihkra xũmre nõ, ca ha me cumã haprỳ to Jowãw. ¹⁴Quê ha ihpỳm xà ata kam ca ha gakry, ne amã amji kĩn. Quê ha hanea ne jũmjê hàhtôa ne ame hakry.

¹⁵― Ampo na? Quê ha Pahpãm cuna mã cupê hũmre catia. Quê ha nee ampo te ame to ipipãn xà ata to apu ihkõm nare. Ne quê ha ihpỳm ata caxuw, quê ha Pahpãm Carõ Pejti cumã amji gõ, ne to hipu tu ne, ne to carôt tỳj. ¹⁶Ne quê ha Pahpãm wỳr, Juta catêjê jàhtôa ne to amji jaxà, quê ha hipêr Pahpãm to me amji japackre.

¹⁷― Ne quê ha Pahpãm Erij xwỳ cuxà to ihtỳj, quê ha cupê Pahpãm jarkwa to imprar catê, ne ampo to impej pa, Pahpãm kra cator xà jahkà na. Pom pê Pahpãm jarkwa to ihcakôc catê Erij xwỳ ata mã mam carôt tỳjti gõ ata cuxà, quê ha cumã hĩ cunea kam carôt tỳjti gõ. Ne hacpỹa mã ajpẽn na me cumẽ, quê ha me hũmjê me, mehkra hacpỹa mã me cumã ajpẽn kĩn. Ne mehkrã kên atajê, quê ha hacpỹa mã catyt kam me ipa catêjê atajê krã kre te amji jahkre pejti kôt me to impej, quê ha mempej pynã. Ne quê ha hanea ne Pahpãm na mehkwỳ mã, quê me amji to impeaj ne, nãmri quê ha côjkwa pĩn, Pahhiti cato ata ri, hãn ne me hõmpu ― hane.

¹⁸Mã Xacarij te Pahpãm jarkwa to imprar catê cukij, ne cumã:

― Pỳhàpà, jũ mã wa ha ajte, ne ate imã harẽn xà ita to amji mã hane? Jũ mã wa ha ajte ne hahkre pej, mõrmõ ajkĩ gũjarẽn xà ita ampeaj kam? Ramã iwej, ne iprõ te hajỹar ne ramã ihwej, nõ na mã ca imã ikra pỳm na ijarẽ ― hajỹr.

¹⁹Mã Pahpãm jarkwa to imprar catê cumã:

― Pỳhàpà, Ipê Caprer. Wa ijõtpê Pahpãm capi na apu ipa, ne cutea ri ikujahêc, wa xa ne amã icakôc, ne amã ampo pejti te hajỹr xà ita jarẽ. ²⁰Ca ate nee ite amã harẽn xà ata na ipar nare, ne quê ha ihtỳj hane, amcro ata kam. Ca nee ate ipar nare, incwỳrjapê ca ha apẽrkêt, ne ahnaa apa, quê ha ahnaa amã akra ihpỳm ― hane. Ne ma tẽ.

²¹Mã cormã apu ihkên, mã põ pê me xa atajê cormã me xa ne me Xacarij jikaj, ne me amji mã:

― Pỳhàpà, ampo to mã apu, ne apu ihkên? ― hane. ²²Mã cator, ne ipẽrkêt ita kam, jũ wỳr quê ihcakôc. Mã ipẽrkêt ita kôt cute me Xacarij te irĩat kam Pahpãm to me amji kam hapac xà jũrkwa kam, cute ampo pupun ata na me hahkre pej pyrentu, ne jũ wỳr quê amji mã hamã ne ihcakôc, ne cama hũhkra to ame cumã ihhimpej.

²³Ne Xacarij te hàpên xà jipêj, mã hamre, ne hõ amcro jamre, mã cute amji jaxàr ne ma tẽ. ²⁴Mã ahna ahtũm nare mã hĩxi mã ihkra ajêt, mã nee põ mã to hapôj nare, ne ahnaa cute amji to putwrỳ to xĩc. Mã Ixapewkwỳj amji jarẽn to:

²⁵― Hamre, ramã ijahũm ita na iwej, ne ityc xàa wỳr ajte ikra. Ne Pahpãm te ri itehcajpar ne imã ikra jõr. Ne hamre, ita caxuw, quê ha hipêr nee jũm imãn nare ― hane.

Pahpãm kra pê Jeju pỳm xà to hũjahkre xà

²⁶Mã cormã Ixapewkwỳj mã ihkra ajêt, ne ramã ahna putwrỳ te xêj, mã Pahpãm te hipêr côjkwa pĩn harkwa to imprar catê pê Caprer kujahêc, mã ma Hĩpôjajo jõ pjê kam, krĩ nõ japrỳ te Naxare jõ krĩ ata wỳr tẽ.

²⁷Ỹhỹ, pê curia cahãj nõ japrỳ te Marijkwỳj ita ihkrĩ, ne cormã increcrer, ne ramã Joje me ajpẽn pa, cume hikwa xà caxuw. Pê Joje pê pahhi Tawi xwỳ tàmxwỳ tàmxwỳ nõ. Mã Pahpãm jarkwa to imprar catê te Marij mã Pahpãm jarkwa par. ²⁸Ne côjkwa pĩn hỹrmã to cator ne cumã:

― Hàpà Marij! Gakry! Ampo na? He Pahpãm te apej mã amẽn. Xãmte ihtỳj Pahhiti acahê na apu ipa ― hane.

²⁹Mã Marij te ita par, ne hamre, ihkrã pictor tu, ne amji mã:

― Pỳhàpà, ampo na mã apu imã hane? ― hajỹr. ³⁰Mã cormã Caprer cumã:

― Nee apu pa nare, Marij. Apyrên Pahpãm jakry, na ri cute ato impejti. ³¹Ne quê ha amã akra xũmre gõ, quê ha harij ne amã ihpỳm, ca ha cumã haprỳ to Jeju. ³²Quê ha cupê hũmre catia, quê ha me cumã haprỳ krut gõ, ne me cumã “Pahpãm Catia Kra” hane. Quê ha Pahpãm acãmter to pahhi, quê ha cupê mam aquêt xwỳ Tawi pê pahhi ata pyràac. ³³Ne quê ha hõtpê cupê Juta catêjê jõ Pahhiti ita na. Ne cupê Pahhiti rohnỳtti mã, ne nee jũ caxuw cute ihhimpej xà ita cupê hamre nare ― hane.

³⁴Mã Marij Caprer mã:

― Mẽr jũ mã wa ha ajte? Nãmri wa cormã itỳj apu ipa, ne cormã icunĩ ― hane.

³⁵Mã cumã:

― Pom Pahpãm me hirôa pê cati ita Carõ Pejti quê ha amã axà. Ne carôat kôt, quê ha akra. Ita cwỳrjapê quê ha acãmter ita pê Pahpãm kra impeaj, ne ajtea mã, ne impej, ne cupê catyt kam ipa catê.

³⁶― Mẽr hõhõ Marij, pom Ixapewkwỳj pê gũkjê wej ita, mehcunea me harẽ, xwahna hahũm na ipa. Ne ramã ihkra, ne ramã ahna putwrỳ te xêj mã ihkra cumã harij ita. ³⁷Ampeaj kam Pahpãm mã ampo cunea ton jahkre pej, quê ihtỳj me hũmre nare kam jũm cunĩ mã ihkra to ― hane.

³⁸Mã hamre, Marij cumã:

― Ỹhỹ, ipê Pahpãm mã ijàpên catê. Quê ha Pahpãm ito hane, wa ha ahnaa mã ― hane. Mã ma Pahpãm jarkwa to imprar catê tẽ.

Pê Marij Ixapewkwỳj pupu

³⁹Ita jirô pê mã amcro nõ na, Marij te amji cũmpej, ne ma hũjarêan kam tẽ, Juta jõ pjê kam kẽnti jõ pjê ata wỳr. ⁴⁰Ne Xacarij jũrkwa wỳr cator ne hàr, ne cute Ixapewkwỳj cukij ne cumã:

― Hàpà, hàpà ― hajỹr. ⁴¹Mã hamre, Ixapewkwỳj te Marij jõkre par me ajkaam mã ihtu kam ihkra jàhcujrõn. Mã Pahpãm Carõ Pejti te Ixapewkwỳj mã amji jõr, mã cute kỳj cati pêa mã ihcakôc kam ihtẽm. ⁴²Ne Marij mã:

“Ỹhỹ, quê ha pyjê kwỳ cunea jirôa pê Pahpãm quêt ato impejti ne.

Ne pom akra ita, quê ha hanea ne Pahpãm mehkwỳ jirôa pê quêt to impejti ne.

⁴³Ne akĩnte icrire. Ampo na?

Quêt apê ijõ Pahhiti menxi cakrô,

ca ahnaa iwỳr tẽ ne ate ipupun,

ne ampeaj kam apyrên ijakry.

⁴⁴Ne ca ate icukij, mã ikra ita hakryte itua kam hàhcujrõn.

⁴⁵Ca ate Pahpãm to amji mã ahimpej, cwỳrjapê quê ha ihtỳj amã to,

pom cute amã amji jarẽn xà ita na,

ca ha hũrên gakryti ne” hane.

Marij crer xà

⁴⁶Mã Marij te Pahpãm pejti na harẽn to:

“Ỹhỹ, wa ha ite amji kam ijapac xà cunea to Pahpãm jarẽ.

Pahpãm ri quêt cati ne impej.

⁴⁷Ne Pahpãm pê ikên pê ito cator catê,

na ri hũrên ampeaj kam ijakry.

⁴⁸Mã cute ito amji japackre,

ihkĩnte icrire na,

ne ipê cumã ijàpên catê wa.

Ne ita caxuw quê ha mehcunea,

pjê cunea kam, Pahpãm mã ikĩn,

mã cute ito impej na, me ito awjarẽ.

⁴⁹Pahpãm carôt tỳjti,

na ri cute imã ampo catia ne ton.

Ne Pahpãm quêt ajteare mã,

ne impej.

⁵⁰Pahpãm hõtpê me pahcunea caprĩ,

pom cu ampeaj kam me kampa atajê ri, ihtỳj me caprĩ.

Mam me panquêtjê me,

hapu na me pajĩ itajê me,

ne quê ha hapua na me pahtàmxwỳ to hanea

ne cumã mehcunea te kam me hapac atajê caprĩ.

⁵¹Pahpãm te hũhkra to hàpên xà catia ne ton.

Pahpãm te, cute amji to me cati prãm catêjê atajê cunea incràn.

Cute hirôa pê amji to me cati prãm catêjê atajê te

me amji kam hapac xà mea mã,

Pahpãm te mencràn.

⁵²Pahpãm te me hõ pahhi carôt catihti atajê jũrên partu,

ne me to ihkryjre.

Ne amji to me cati prãm nare atajê ri, cute me to ihkà.

⁵³Pahpãm te me cupê hamreare atajê me,

me cumã prãmti atajê mã harte,

ne me cumã harte kam to incrà tu.

Ne me hakràj catêjê atajê,

Pahpãm te hũ kam amencràn.

⁵⁴Ne Pahpãm pê me panquêtjê mã,

mehtehcajpar xà to awjahkre.

Ne hamre, ihtỳj cute me cumã ton,

quê ha ihtỳj Juta catêjê tehcajpa.

⁵⁵Ne cute Aprãw xwỳ me,

ihtàmxwỳ tàmxwỳ caprĩ na amji to amji japackre,

por pê ramã ahna amji jarẽ ata na” hajỹr.

Hõ, Marij te Pahpãm to hũjarẽn to hajỹr.

⁵⁶Ne cute Ixapewkwỳj cahê na amji to putwrỳ to incrê jirô pê ma amji jaxàr, hũrkwa wỳr.

Jowãw pê me cumrãr catê pỳm xà

⁵⁷Mã hamre, Ixapewkwỳj mã ihkra pỳm xà jõ amcro kam hàhhuc, mã cumã ihkra pỳm. ⁵⁸Mã cahê na amehkrĩ catêjê me, me hũkjê me, cute Pahpãm te Ixapewkwỳj to amji kam hapac xà impejti na me harẽn par. Mã hamre, mehcunea ame hakry, Ixapewkwỳj mea mã.

⁵⁹Mã ihkra xũmre ita na amcro te ôjtô, mã hamre cute me cumã haprỳ jõr xàa kam hàhhuc, ne hanea ne cute mempy kà incrire ne me hitep xàa kam hàhhuc. Pê me cupê Juta catêjê incaca xà ita ajteare mã me cumã. Pê ajco me cumã ihkra xũmre ajhu, pê ajco me cumã impy kà jakep, mehcunea te me cupê Juta catêjê na me hahkre pej prãmte, nãmri ajteare mã me. Mã hamre, me cumã hũm japrỳ pê Xacarij xãm prãm. ⁶⁰Mã inxi me cumã:

― Hamreare, hamreare, quê ha haprỳ Jowãw ― hane.

⁶¹Mã me cumã:

― Hamreare, gũkjê nõ japrỳ te Jowãw nare ― hane.

⁶²Mã cute hũhkra to hũm cukij, haprỳ jũ ri cumã hõr prãm. ⁶³Mã Xacarij te ihhôc xà na hàhwỳr, ne cute kam ihhôc to hajỹr he: “Ỹhỹ, haprỳ te Jowãw” hane. Mã hamre, mehcunea krã pictor. ⁶⁴Me ajkaam mã hacpỹa mã Xacarij te ihcakôc kam ihtẽm, ne Pahpãm mã ihcakôc, ne cute Pahpãm peaj na cumã harẽn. ⁶⁵Mã cahê na mehkrĩ catêjê cunea mã ampeaj kam pa cati. Mã hamre, apu harẽn xà ita cahkũm, Juta jõ pjê kam, kẽnti jõ pjê ata cunea kôt. ⁶⁶Mã mehcunea te me ita par atajê, ita to pit mã ame amji kampa, ne ahna me amji cukij, ne me amji mã:

― Pỳhàpà, jũ mã mõrmõ quê ha hũmre krare ita ajte? ― hajỹr. Ampo na mã ame amji cukij to hane? Pê hirã pê hũmre krare ita kam Pahhiti carôt catia na pê.

Pê Xacarij Pahpãm jarkwa kôt harẽ

⁶⁷Mã Xacarij pê hũmre krare ata me hũm, hacpỹa mã ihcakôc. Ne Pahpãm Carõ Pejti jarkwa kôt cute hacpỹa mã Pahpãm to hũjarẽn kam ihtẽm, ne harẽn to:

⁶⁸“Hacme, ne me pajõ Pahhiti to me awjarẽ,

por Pahhiti catihti ne impejti pê me papê Juta catêjê Pãm Catihti ata to me awjarẽ.

Ỹhỹ, Pahpãm te me pahtehcajpar prãmte cator,

ne cute pahte me to ihcupan xà pê me pahto cator.

⁶⁹Pê Tawi xwỳ pê Pahpãm mã hàpên catê,

mã Pahpãm te ihtàmxwỳ tàmxwỳ nõ,

cute me pahkên pê me pahto hapôj catê na hãm,

mã ampeaj kam carôt tỳj.

⁷⁰Ne pê ramã rỳ pêa mã Pahpãm ita jarẽ.

Pê Pahpãm jarkwa to me cumã ihcakôc catêjê impejti atajê

harkwa na ahna mehhôc pa.

Ne pê Pahpãm jarkwa na mehhôc catêjê ajco ita to me hane.

⁷¹Pê Pahpãm me pahcurê xwỳn pê me pahto cator xà to hane,

ne me pahcurê xwỳn carôt pê me pahto hapôj pa.

⁷²Pê Pahpãm me panquêtjê mã

jũ caxuw cute me caprĩ to cator xà ata to awjahkre.

Ne me cumã awjarẽ,

mãr quê me to amji japackrea rũm me ipa,

ne nee jũ caxuw me to hapac kêt nare.

^73-74Pê Pahpãm me panquêtti Aprãw xwỳ mã ita to awjahkre,

ne to awjahkre tu.

Ne ampeaj kam cumã harẽ,

quê ha me pahcurê xwỳn tête me pahto pôj pa.

Cu ha me Pahpãm mã me apê,

ne nee ame pahcurê xwỳn cupa nare.

⁷⁵Ne cu ha Pahpãm mã me pajàpên catêjê na ame papa.

Ne catyt kam ame papa,

ne me pancaca xà impeaj to amji kam me pajapac to me papa,

ne ahnaa Pahpãm krac ri me pajamre.

⁷⁶Ỹhỹ ikra, hamre,

ca ha jũ caxuw Pahpãm me hirôa pê catia ita jarkwa kôt acakôc catê na apa,

ne ca ha tẽ ne me pajõ Pahhiti cator xwỳjrea na apu carã pa.

⁷⁷Ca ha me Pahpãm krac ri me ipa atajê mã me awjarẽ,

quê ha Pahpãm nee mam cute ame to kên xà ton ata to amji japackre nare,

ata kôt quê ha Pahpãm mehkên pê me to pôj pa.

^78-79Me Pahpãm jàhcaprĩ cati, ne cupê me pamã impej pit ton catê,

cwỳrjapê quê ha me pamã hàhcujro gõ.

Cu ha me pahte amji kam me pajapac xà impejti pupu,

ne catyt kam me papa,

ne me pampej pêa mã me papa.

Ne me pamã pahtyc cupa itajê,

quê ha Pahpãm me pahpupu ne me pamã incaca xà gõ,

cu ha nee ame pahtyc xà ita cupa nare, ne cama me pahcaxwãm pê me pahcarĩcti na me papa” hane.

⁸⁰Mã hamre, Xacarij kra xũmre ita ihkà to mõ, ne carôt tỳj to mõ. Ne pê hanea ne cute amji kam hapac xà cati ne impej to mõ. Ne ramã ihkàa kam pê põti kam me hamreare ata kam ihkrĩ. Ne cormã Juta catêjê mã amji to ajpẽ.

Jeju pỳm xà

¹Caku ata kam, putwrỳ atajê nõ na, pê pjê cunea jõ pahhiti japrỳ te Xexa Aguxô ita harkwa ta, mehcunea mã, por hõ pjê kam krĩ atajê cunea kôt, quê mehcunea me amji japrỳ nõr pa, ne me amji cahyt, ne me hàhtô na me amji jahkre pej. ²Ne pê mam ramã me amji cahyt, pê Xiren pê Xiri jõ pjê to ihhimpej catê ata kam, pê mam me amji cahyt pyxit, ne me hàhtô na me amji jahkre pej. ³Mã hamre, mehcunea te me amji japrỳ nõr partu, ahpỹanre na me hõ krĩa kam, menquêtjê ihpỳpỳm xàa kam.

⁴Ita cwỳrjapê ri Joje pê Hĩpôjajo jõ pjê kam, Naxare jõ krĩ kam, ihkrĩ catê, na ri ma Juta jõ pjê wỳr, Pãw jõ krĩ ata wỳr tẽ. Ampo na? Pê curia inquêt xwỳ pê pahhi Tawi xwỳ ihpỳm, ne cupê ihtàmxwỳa, na ri ma Pãw jõ krĩ wỳr tẽ, hĩxi Marijkwỳj me. ⁵Ne cute me amji japrỳ xir. Ne pê ramã me hikwa na me ajpẽn pa. Mã ramã Pahpãm Carõ Pejti to Marij tictu. ⁶Ne pê cormã Pãw jõ krĩ kam ame mõr reria mã, ramã cumã ihkra pỳm xàa kam hàhhuc. ⁷Ne cumã ihcãmter pỳm, mã cute cupẽhkà to ihcupu, ne pĩ po te crat kam ampo jàpàn xà ata kam hir. Ampo na? Ramã me hàhhuc xà cunea te hipu partu, ita kam, jũ ri quê me ahtwỳ? Cwỳrjapê ri ampo jũrkwa kam me hõt.

Pê carà cahàcre jamãr catêjê Jeju pupu

⁸Mã pjê ata kam, carà cahàcre jamãr catêjê hõtpê ame hamãr to me ipa. Ne amcro me caxwa kam, hõtpê ame to ipa. Ne caxwa ri, pjê ata kam, põ pê ame hamãr to ame ipa. ⁹Mã ihprõt pê Pahpãm jarkwa to imprar catê cator, côjkwa pĩn. Mã hàhcujro pê Pahhiti jàhcujro impejti ata hàhcujro pyrentu, ne ipu na hàhcujrohti, ne ihpràti. Mã cute me hõmpun ne me cumã hũpaa to hũpa. ¹⁰Mã Pahpãm jarkwa to imprar catê me cumã:

― Nee ame icupa nare.

Wa ite me amã ijũjarẽn pejti to prãm to, wa me awỳr icator.

Ne wa ha me amã awjarẽ, ca ha me ijũjarẽn xà ita kôt, ca ha me gakry, quê ha ampeaj kam mehcunea mã amji kĩan to amji kĩn, me cati me, mehkryjre me, quê ha mehcunea mã amji kĩan to amji kĩn.

¹¹Ỹhỹ, ita kam, caxwa ita kam, me gõ Pahhiti pê me akên pê me ato hapôj catê pỳm, Tawi xwỳ jõ krĩ kam.

Ne cupê, por pê Pahpãm me amã to awjahkre ata.

¹²Ne ampeaj kam ca ha ita kam me hõmpu.

Quê ha ahkrare xũmre nõ cupẽhkà ihcupu, ne ampo jàpàn xà kam nõ, ca ha hỹrmã me acato ne me hõmpu, ne me hahkre pej ― hane.

¹³Mã hamre, ihprõt pê côjkwa rũm Pahpãm jarkwa to memprar catêjê jàhtôa ne hipêr me iwrỳc, ne me hỹrmã me cator. Ne côjkwa kam mehkrĩ catêjê pê me pajõ Pahhiti jarkwa to memprar catêjê itajê te me Pahpãm na mencrer kam mehtẽm, ne increar kam me harẽn to:

¹⁴“Quê ha côjkwa kam mehcunea jirôa pê Pahpãm pejti ne cati na me harẽ.

Ne pjê kam, quê ha Pahpãm me to impej atajê, quê ha me caxwãm pê mehcarĩcti ne” hajỹr.

¹⁵Mã hamre, Pahpãm jarkwa to memprar catêjê hacpỹa mã cute me amji jaxàr, ne me hàpir, côjkwa wỳr. Mã carà cahàcre jamãr catêjê, hakàn pê ame amji mã harẽ, ne me amji mã:

― Hacme, Pãw jõ krĩ wỳr, ne Pahpãm te me pamã ampo jarẽn xà ita pupu ― hane.

¹⁶Ne ma me hũjarêan kam me pra, ne ame hapê, ne Joje me Marij wỳr me cator, ne cute mehkrare pupun, mã ampo jàpàn xà kam nõ. ¹⁷Mã cute me hõmpun, ne ma me pra ne mehcunea mã, Pahpãm jarkwa to memprar catêjê te me cumã ahkrare jarẽn xà ata jarẽn to me mõ. ¹⁸Mã hamre, mehcunea te mempar atajê te amji mã me ipikrar, ne me amji mã:

― Pỳhàpà? ― hajỹr. ¹⁹Mã Marij apu carà cahàcre jamãr catêjê atajê te cumã ampo jarẽn xà atajê cunea to apu amji japackre, ne to amji japackre ita na. ²⁰Mã ma carà cahàcre jamãr catêjê te amji jaxàr, ne ma me Pahpãm pejti, ne catihti na me harẽn to me mõ. Pom Pahpãm jarkwa to imprar catê te me cumã hũjarẽn xà atajêa na, cute me hõmpun, mã ahnaa. Na ri ame hakry ne ma Pahpãm pejti na me harẽn to me mõ.

Pê Jeju mã me haprỳ gõ

²¹Mã ramã ihkrare ata na amcro te ôjtô, mã cute mempy kà incrire ne me hitep xàa kam hàhhuc, mã cute me cumã haprỳ jõr, ne me cumã Jeju. Ne haprỳ ita pê Pahpãm jarkwa to imprar catê cormã jêt nare kam, Marij mã harẽ.

Pê Pahpãm mã me Jeju gõ

²²Ne ita jirô pê mã ri ahna putwrỳ pyxit, mã cute me ipijacri xà to hamre xà jõ amcro kam hàhhuc. Mã caxuaw ma Krĩpinkrên wỳr me ihkrare ata to me mõ, Pahpãm to cute me amji kam hapac xà jũrkwa wỳr. Ne me to cator, ne cute Pahpãm mã me ihkrare xũmre ata pẽr ne me cumã:

― Atea ri me imã me ikra ita jõr, ne cupê atekjêa ― hajỹr. ²³Ampo na ri cute me to hajỹr? Pê rỳ pêa mã Pahpãm Mojxe xwỳ kôt Juta catêjê mã harkwa ta, ne me cumã:

“Mam me akra xũmre me hapôj atajê cunea pê itekjê” hane.

Pê Pahpãm jarkwa na mehhôc catêjê me ita pa, ne ahna mehhôc pa. ²⁴Mã cute me Pahpãm mã me ihkra pẽr, ne harkwa kôt me ipijacri xà to me hamre xà caxuw, cute me Pahpãm mã tutti into to me ipijakrut ne me hõr.

²⁵Ỹhỹ, pê Krĩpinkrên kam hũmre japrỳ te Ximãw ita ihkrĩ. Ne ampeaj kam impej, ne ihtỳj ajco Pahpãm kampa, ne to amji mã ihhimpej. Ne ajco Pahpãm te Juta catêjê kên tête me to pôj xà jõ amcro ata jikaj. ²⁶Mã Pahpãm Carõ Pejti apu Ximãw cahê na mõ, ne pê ramã Ximãw mã ihtyc xà nare to awjahkre ne cumã:

― Ca ha xaa, por pê Pahpãm Juta catêjê mã mehkên pê me to hapôj catê to awjahkre ata pupu, jirô pê ca ha cormã ty ― hane. ²⁷Ne Pahpãm Carõ Pejti te Ximãw japrôr ne ma to mõ, Pahpãm to me amji kam hapac xà jũrkwa wỳr. Mã Joje me Marij hanea ne ma curi me ihkra pê Jeju to me mõ, cute me Pahpãm jarkwa kôt me ipijacri xà to me hamre xà wỳr, ata wỳr. ²⁸Mã Ximãw te me hõmpun, ne ihpa kam ihkrare ita pỳn, ne Pahpãm mã harẽn pejti, ne cumã:

^29-30“Hamre, ijõ Pahhiti,

pê ca ito gũjahkre xà ata ramã kaam hàhhuc.

Ne pê ca ito gũjahkre xà ata na ate ton, wa ite hõmpun.

Ne atea ca me iwỳr me ikên pê me ito hapôj catê ita kujahêc,

wa ite ito jĩa to hõmpun.

Ỹhỹ, ipê amã ijàpên catê,

ne hamre, ramã iwej, ne icaxwãm pê icarĩcti,

ne gapacta ne ityc na ito tojnõ, wa ty.

^31-33Ne ca ate mehcunea kam mare mã

me ikên catia pê me ipytàr catê ita me iwỳr ihkujahêc.

Na quê ha pjê kam mehcunea mehkrĩ atajê mã hàhcujro catê na ipa.

Ne quê ha me cumã mempejti to hahkre,

quê ha mehcahkrit atajê,

por me cupê Ixaher catêjê nare atajê mã hanea ne ato ajpẽ,

mãr quê me hanea ne me gahkre pej.

Ne quê ha hanea ne me akwỳ pê Juta catêjê pê Ixaher catêjê mã impejti ne.

Quê ha mehcunea me akwỳ jarẽn pejti to me harẽ” hajỹr.

Mã inxi me hũm te Ximãw te ihkra to ihcakôc xà ata na mempar, ne to amji mã me ipikrar. ³⁴Mã Ximãw te mehcajrẽn, ne Marij pê Jeju menxi mã:

― Pahpãm te akrare incrire ita capi.

Ne quê ha akra ita Juta catêjê jõ pjê kam me hàhtôa to hõkre nõ, ne me to hamre, ne hanea ne me hàhtôa kwỳ to ihkà, ne me to impejti ne, ne ma mehkên pê me to hapôj.

Ne Pahpãm te ri akra ita kujahêc, mãr quê me cumã Pahpãm cawpa.

Ne quê ha me hàhtôa ne ahna amehcakôc kên, ne ame curê.

³⁵Ita kôt quê ha me hàhtôa mã cute amji kam hapac xà pẽ.

Pom amji caxwãm pê cute me amji kam hapac xà to me ipimxur to ipa prãmti atajê to, quê ha mehkwỳ mã ajpẽ.

Ne ca, quê ha amã apec xà catia to cati, ne ajkam gapac xà hyre nare.

Quê ha amã hà pê ihhêj rũm wapo xwahhihti te ana cuhkõnre jitep, ne hà.

Hõhõ, ita na quê ha ana cuhkõnre kam amã hà ― hajỹr.

^36-37Ỹhỹ, pê hanea ne curi cahãj wejti japrỳ te Anakwỳj ita apu ipa. Ne Pahpãm to me amji kam hapac xà jũrkwa kam apu ipa. Ne cupê Paner xwỳ kra, ne cupê menquêtti Axer xwỳ tàmxwỳ tàmxwỳ nõ. Pê hikwa tuw ne ahna caku xet, pê cupê impjên ihhi. Hamre, pê apu increcrer ipa, ne cormã ahnaa apu ipa, pê ramã ahna caku ôjtẽnta ne ihkôt cute cwat, ne ramã ihwejtu. Ne pê cupê Pahpãm jarkwa to me cumã ihcakôc catê, ne rỳ jũ caxuw Pahpãm to me amji kam hapac xà jũrkwa pê cator nare. Ne amcro me, caxwa me, pyt cunea kam ipijacri to ipa. Ne ajco ipijacri kam, Pahpãm to amji kampa ne cumã ihcakôc to ipa. ³⁸Mã Ximãw cormã apu Marij mã ihcakôac kam, mã me hỹrmã Anakwỳj ata cator, ne cute mehkra ata pupun, ne Pahpãm mã hũrên hakryti na amji jarẽn pyrentu. Ne ihtỳj cute, por Krĩpinkrên kam mehkrĩ ne me Pahpãm te mehkên tête me to pôj catê to me cumã hũjahkre, mã me hikaj atajê mã, harẽn kam ihtẽm.

Pê Naxare jõ krĩ wỳr me amji jaxà

³⁹Mã hamre, Joje me Marij te me Pahpãm te amji kam hapac xà cunea ton partu, ne ma ihkra me, cute me hũrkwa wỳr me amji jaxàr, Hĩpôjajo jõ pjê wỳr, Naxare jõ krĩ kam. ⁴⁰Mã ihkra ita ihkà to mõ, ne carôt tỳj to mõ. Ne ampeaj kam cute amji jahkre pej cati. Mã Pahpãm te to impejti.

Pê Hũm Cati jũrkwa kam Jeju ahtwỳ

⁴¹Ỹhỹ, pê caku cunea kam Jeju hũm me inxi ajco Krĩpinkrên wỳr me ipa, me Hakren xà jõ amji kĩn wỳr. Ne me hõ amji kĩn ita pê, por pê Pahpãm Ejit jõ pjê pê mam menquêtjê to cato ata.

⁴²Mã hamre, ramã Jeju na caku te tôxi, mã hanea ne mehkôt amji kĩn ata wỳr mõ, ne cator. ⁴³Ne ramã amji kĩn jamre jirô pê, cute me amji jaxàr, me hũrkwa wỳr. Mã xãmte aracri Krĩpinkrên kam Jeju jàhhuc. Mã nee hũm me inxi te hàhhuc xà ita na me hahkre pej nare. ⁴⁴Ne ihtỳj me hàhtôti atajê kôt cute amji jaxàr na amehcãmjĩ. Ne ihtỳj cute me mõr to pyt, ne cormã ne, nee me hapên nare, ne ma me hũkjê me, me hõ ihkwỳ nõ catêjê kôt ame hapê. ⁴⁵Ne nee cute me cumã cator nare, na ri ma cute me amji jaxàr, Krĩpinkrên wỳr, cute curi me hapên prãmte.

⁴⁶Ne me ahna amcro incrê jirô pê mã ri cute me Jeju cajpar, Pahpãm to me amji kam hapac xà jũrkwa kam. Mã Jeju ihtỳj me cumã ampo to hahkre catêjê jipôc ri jỹ, ne ame kampa, ne amehcukij. ⁴⁷Mã mehcunea te Jeju te amji jahkre pejti to me cumã ihcakôc atajê to amji mã me ipikrar. ⁴⁸Mã inxi me hũm te me hõmpun, mã inxi cumã:

― Ikra, ampo na mã ate me ito hajỹr? Ate me ijigẽc hyr, na wa apãm me apu gapên to mõ ― hajỹr.

⁴⁹Mã Jeju me cumã:

― Ampo na mã ca ame ijapê? Pom wa ita ri Inxũ Cati to me amji kam hapac xà jũrkwa kam jỹ, ne hàpên xà to apu cumã apê ita? ― hane. ⁵⁰Mã nee hũm me inxi te me hũjarẽn xà ita kam hapac, ne kam me amji jahkre pej nare, ne me cupê hahkre kêatre.

⁵¹Mã ma Jeju te mehkôt amji jaxàr, Naxare jõ krĩ wỳr. Ne pê ihtỳj ajco hũm me inxi kampa. Na pê inxi ihtỳj ampo itajê cunea to amji japackre to ipa.

⁵²Pê Jeju hĩ to ipicamẽn to mõ, ne ajco ihkà to mõ, ne hanea ne ihkrã kre te amji jahkre pej to amji kà to mõ. Ne pê mehcunea mã ihkĩn, ne hanea ne côjkwa kam Pahpãm jỹ ita mã ihkĩn.

Pê Jowãw pê mehcumrãr catê awjarẽ

¹Ỹhỹ, caku jàhtôa jirô pê, pê Tiperij ata pê Roman catêjê jõ pahhiti, ne pê ramã ahna caku quĩxi, pê hanea ne Juta jõ pjê kam Pirat pê pahhi. Pê hanea ne Hĩpôjajo jõ pjê kam Heroti pê pahhi. Pê hanea ne Heroti tõ pê Pirip pê Iturij jõ pjê me Taconiti jõ pjê kam pahhi, ne Rixin pê Apirẽn jõ pjê jõ pahhi. ²Pê hanea ne Anati me Cajpa pê me Pahpãm mã cute mehcajrẽn catêjê kwỳ jõ pahhi.

³Ỹhỹ, pê cormã Jowãw pê Xacarij kra ata, ahkêt kam ihkrĩ, põti kam me hamreare ata ri. Pê amcro ata na, Pahpãm Jowãw mã harkwa ta, quê Côpijapjêr jõ cô kôt cute me ihcajpar atajê mã harkwa jarẽ. Pê Pahpãm jarkwa kôt harẽn to hane he, ne me cumã:

― Me akên mã hikra, ne amji tête me ate amji kam me gapac xà kên jũrê, wa ha ahna cute me gahkre pej xà na cô kam me acumrã, quê ha Pahpãm me akên to hapac kêt, ne to tojnõ ne me amã to impej ― hane.

^4-5Ne pê hanea ne Jowãw me cumã Ixaj xwỳ pê Pahpãm jarkwa na ihcakôc catê ata jõ kàhhôc cahyt. Ne me cumã cahyt to hane he:

“Ỹhỹ, põti kam me hamreare ata ri jũm apu caràr to mõ, ne apu hũjarẽn to hane he:

‘Pom ca me pry kên to impej prãm

ne atỳj me hituw cunea to me hipu pa,

ne me hakôt cunea pên pa,

ne pry jikôtti atajê,

ca ha hanea ne me to ihcuhtac pa,

ne pry kên kam kre atajê,

ca ha me to impej ne me to increcrer pa.

Ita jĩkjê na,

ca ha me ate amji kam me gapac xà kên to mempej,

ne intête me ampo kên cunea to pôj pa.

⁶Quê ha mehcunea Pahpãm te me akên pê me ato hapôj xà ita na,

me gahkre pej’ ” hane.

^7-8Mã hamre, me hàhtôa ne cute me Jowãw cajpar, cute cô kam mehcumrãr prãmte. Ne cute mehcunea mã harẽn to hajỹr he:

― Ỹhỹ, me apê cagã kên kra kwỳ pyràac! Mã ihhêj ne jũm te me amã ite cô kam me acumrãr xà na ijarẽn. Wa xwahna ite me acumrãr xà ita kôt, ca ha xwahna Pahpãm te ame ato kên xà ata pê me acato. Hamreare, cute ahna hajỹr xà nare! Ca ha xa me akên ton jicu, jirô pê mã wa ha cormã cô kam me acumrã. Ne me apê pĩxô pàr kam hô impej nare ata pyràac, ne ca ha xaa me amji kampa, ne me apej wỳr me apkjê, ne me kam mare mã me akên jicu, ne atỳj me akên pê me acato. Hõhõ, quêt cute hajỹr. Ne nee ca me amji mã: “Aprãw pê me panquêtti, incwỳrjapê ri hũne mã me papê Pahpãm na mehkwỳ, ne jũ wỳr quê Pahpãm mehkwỳa nõ to kên” hajỹr nare. Ampeaj kam wa me amã awjarẽ. Nãmri nee Pahpãm me ana prãm nare, he quê tee me apê Aprãw tàmxwỳ tàmxwỳ cakrô, quê ihtỳj ame ato kêanre ne. Quê Pahpãm Aprãw tàmxwỳ tàmxwỳ na prãm na mã, quê ha ramã kẽn apu krĩ itajê nõa to Aprãw tàmxwỳ na mehkwỳ. Cwỳrjapê ca nee me amji mã hajỹr nare.

⁹― Ỹhỹ, he me apê pĩxô xỳhti atajê pàr pyràac. Co he! He ramã ihhêj ne wakỳ te harê jakep xà ata na hàhtêp. Ne pĩxô pàr kêanre atajê cunea kam hô impej nare atajê, quê ha hitep ne cuhy kam me haxwỳ ― hane.

¹⁰Mã cute me Jowãw cukij, ne me cumã:

― Mẽr hõhõ, ampo to wa ha ajte me? ― hajỹr.

¹¹Mã Jowãw me cumã:

― Me anõ mã hitô kà pijakrut ata, ca ha jũm pê hamreare ata mã ihnõ. Ne hanea ne me anõ mã gõ ata, ca ha me cupê hamreare atajê mã to ajcokjê ― hane.

¹²Mã hanea ne pahhi mã me hũhkra kam me hàmcwỳr catêjê cator, ne cute me Jowãw cukij, ne me cumã:

― Hàpà, me to ihhimpej catê, ne me pa, ampo to wa ha me? ― hajỹr.

¹³Mã Jowãw me cumã:

― Ca ha nee gõ pahhi jarkwa jirôa pê me hũhkra kam me gàmcwỳr nare ― hane.

¹⁴Mã hanea ne krãhtare kwỳ cator, ne cute mehcukij, ne me cumã:

― Ne me pa, ampo to wa ha me? ― hajỹr. Mã Jowãw me cumã:

― Hã, ca ha me hane he, ca ha nee me gàprêa kam me cupê ihpore to pôj nare. Ne nee ca ha mehcukij catê cuna mã jũm to ame ahêj nare. Ne ca ha me gàmcwỳr xà ata pyrên me gakry ― hane.

Pê Jowãw nee cupê Mexij na me cumã amji jarẽn nare

¹⁵Mã mehcunea ramã me Pahpãm te jũm catihti impejti ata kujahêc prãm ata jikaj, na ri ihtỳj ame Jowãw cãmjĩ, ne me amji mã:

― Pỳhàpà, côt mã pê Jowãw ita to Pahpãm awjahkre? ― hane. ¹⁶Mã Jowãw mehcunea mã amji jarẽ ne me cumã:

― Hamreare, quê ha cormã jũm ita cato, ne jũm ata ri ijirôa pê cati, ne ihkĩnte icrire. Jũ wỳr wa icrire ita kam cupê hõ par kà to pôj. Ỹhỹ, wa ha cô cakrô to me acumrã, quê ha cormã jũm catihti cato ata, quê ha quêt cormã Pahpãm Carõ Pejti me, cuhy kam me acumrã. ¹⁷Co he, nãmri me apê arỳjhy pyràac. Na quê ha ihtỳj ajpẽn pê me ato haprã. He ihhêj ne ramã hũhkra kam cumã crat cute kam arỳjhy ata carêr xà caxuw. Quê ha kam ihcarê, ne ihhy caxwỳn to cuprõ, ne huwahi, ne ihkrekà to cuprõ ne cuhy kam haxwỳ, quê ha to capa. Ne cuhy te to caxàr xà ata, quê ha jũ caxuw ihtyc nare. Ne quê ha ihtỳj me ato hane ― hane. ¹⁸Hõhõ, pê Jowãw hane, ne ajco me hapackre ne me cumã awjarẽ. Ne me cumã hũjarẽn xà itajê jàhtôa to hàhtô, pê ajco me cumã harẽ. Ne ajco me cumã mehkên pê me hapôj xà to hahkre.

Pê Heroti Jowãw pro

¹⁹Ỹhỹ, pê hanea ne Jowãw pjê jõ pahhi pê Heroti ita mãn kêanre. Ampo na? Pê Heroti ihkên ton to hàhtôa, ne ihtõ pê hĩxi capa, ne cume hikwa, cwỳrjapê pê Jowãw cumãn to kêanre. ²⁰Pê hamre ita cwỳrjapê Heroti mam cute to kên xà ata jirôa pê to kên, ne Jowãw na harkwa ta, pê me Jowãw pro, ne me hacjên xà mã me haxà.

Pê Jowãw Jeju cumrã

²¹Ỹhỹ, cormã cute me Jowãw jaxàr nare kam ri mehcunea mã awjarẽ, ne cô kam me cumrã. Mã hanea ne Jeju hỹrmã cator, mã Jowãw te cô kam ihcumrãr. Mã cute ihcumrãr xà ata ri xa, ne Pahpãm mã ihcakôc. ²²Mã hamre, côjkwa te amji jihê mẽn, mã Pahpãm Carõ Pejti te tutti na amji ton, ne cupê tuttia pyràc, ne ajpên ahpar mã tẽ, ne Jeju na hãm. Mã hamre, côjkwa rũm Pahpãm Jeju mã ihcakôc, ne cumã cupê Hũm Cati na amji jarẽn to:

― Ỹhỹ, apê ikraa to ikra, ne apê ikra impeaj to impej ata, ne imã akĩnti, ne apyrên ijakryti ― hane.

Jeju quêtjê japrỳ

²³Ỹhỹ, pê ramã Jeju na caku trĩnta pê hàpên xà kam to tẽ, ne Joje kôt Jeju mã menquêtjê japrỳ te hajỹr he, ne ahpỹanre na mehkra itajê japrỳ partu. Pê mehcunea ihtỳj Jeju pê Joje kra na amehcãmjĩ. Ỹhỹ, pê Joje pê Eri kra, ²⁴ne Eri pê Matat kra, pê Rewi kra, pê pahhi Merqui kra, pê Jana kra, pê Joje kra, ²⁵pê Matatij kra, pê Amoti kra, pê Nahũm kra, pê Eti kra, pê Naca kra, ²⁶pê Mate kra, pê Matatij kra, pê Xemi kra, pê Joje kra, pê Juta kra, ²⁷pê Jowanakwỳj kra, pê Rexa kra, pê Xoropapew kra, pê Xarati kra, pê Neri kra, ²⁸pê Pahhi Merqui kra, pê Ati kra, pê Coxam kra, pê Ermatãw kra, pê Er kra, ²⁹pê Jojuw kra, pê Erixê kra, pê Jorim kra, pê Matat kra, pê Rewi kra, ³⁰pê Ximãw kra, pê Juta kra, pê Joje kra, pê Jonã kra, pê Eriquim kra, ³¹pê Merej kra, pê Mena kra, pê Matat kra, pê Natã kra, pê Tawi kra, ³²pê Jexê kra, pê Opet kra, pê Powa kra, pê Xara kra, pê Naxon kra, ³³pê Aminati kra, pê Atmin kra, pê Arni kra, pê Exom kra, pê Pere kra, pê Juta kra, ³⁴pê Jaco kra, pê Ixac kra, pê Aprãw kra, pê Tera kra, pê Naco kra, ³⁵pê Xeruque kra, pê Racaw kra, pê Parec kra, pê Epew kra, pê Xara kra, ³⁶pê Cana kra, pê Arpaxat kra, pê Xẽm kra, pê Nowe kra, pê Ramec kra, ³⁷pê Matuxarem kra, pê Enoc kra, pê Jaret kra, pê Marer kra, pê Cana kra, ³⁸pê Enotti kra, pê Xet kra, pê Atãw kra, pê Pahpãm kra. Hõhõ, Joje quêtjê itajê pê me haprỳ itajê hane.

Pê me pajõxwỳn pê Xatanaj Jeju cajpẽ

¹Mã hamre, Pahpãm Carõ Pejti te Jeju mã amji jõr, ne to ihhimpej, mã ma cute Côpijapjêr jõ cô pĩn amji jaxàr, ne põ kam me hamreare ata wỳr mõ. Ne Pahpãm Carõ Pejti pê põ mã Jeju to mõ, Xatanaj te ihcajpẽr prãmte. ²Ne pom Xatanaj pê me pahcurê xwỳn ita pê Jeju to kên prãm. Mã ramã Jeju te hàpàn nare na amji to amcro to cwarẽnta, jirô pê mã ramã cumã prãam to prãm.

³Mã hỹrmã me pahcurê xwỳn cator, ne cute capi. Ne cute Jeju kên mã mẽn prãmte cumã:

― Quê ha ampeaj kam apê côjkwa kam Apãm Cati ihkrĩ ita kra na, ca ha atỳj kẽn itajê mã, quê amã pãw na amji to, ca ha krẽ ― hajỹr.

⁴Mã Jeju cumã:

― Jũ wỳr wa akampa ne ita to hane. Ampo na? Inxũ Cati jarkwa na, hõ kàhhôc kam harẽn te hajỹr he:

“Ỹhỹ, ca ha atỳj me apà,

ne nee me gõ to pit mã me amji japackre nare.

Jũ wỳr quê jũm hõ pit to amji to ajpa” hajỹr.

Hõ, cute harẽn to hajỹr, cwỳrjapê wa ha nee akôt amji kam ijapac nare ― hane.

⁵Mã me pahcurê xwỳn te Jeju japrôr, ne ma kẽn kàhti ata na to hàpir. Ne cute cumã pjê cunea kam, krĩ cunea jahkre, ne cumã:

⁶― Pjê itajê cunea itekjê pit, ne wa itỳj jũm mã cugõ. Na ca ha xa icuna mã akõn krã na jỹ ne ipejti na ijarẽ, wa ha amã ampo pejti itajê cunea gõ. ⁷Ca ha ate ito hajỹr na, wa ha amã pjê ita kam krĩ itajê cunea jahkre, ca ha ihcunea to ahimpej to apa, quê ha cupê atekjêa ― hajỹr.

⁸Mã Jeju Xatanaj mã:

― Jũ wỳr wa ha ato hane. Ampo na? Inxũ Cati jarkwa jõ kàhhôc kam harẽn te hajỹr he:

“Ca ha apu Pahpãm pit kĩn,

ne amji mã taa pit cupa,

ne impejti na me harẽ,

ne to pit mã me amji kampa,

ne cumã me apê” hajỹr.

Hõ, cute harẽn to hajỹr, cwỳrjapê wa ha nee akôt amji kam ijapac nare ― hane.

⁹Jirô pê mã ri me pahcurê xwỳn te Jeju japrôr ne ma Krĩpinkrên wỳr to mõ, ne me kam mare mã, kỳaj pê Pahpãm to me amji kam hapac xà jũrkwa cwỳrpê hãm, ne cumã:

― Krãa caxi, quê ha ampeaj kam apê côjkwa kam Apãm Cati ata kra na, ca ha ita ri ahpar mã amũ amji to awcapê, ne nee atyc nare. ^10-11Ampo na? Apãm Cati jarkwa jõ kàhhôc kam, cute ihkra jarẽn to hajỹr he:

“Quê ha côjkwa kam ijarkwa to memprar catêjê ikra jamãr to mõ,

ne ma me hũhkra to ihpỳm cupate me to huphê to ipa,

mãr quê nee kẽn nõ ihpar tõc nare” ― hane.

¹²Mã Jeju cumã:

― Jũ wỳr wa ha hane. Ampo na? Inxũ Cati jarkwa jõ kàhhôc kam harẽn te hajỹr he:

“Ca ha nee gõ Pahhiti cajpẽr nare,

ne nee Apãm Cati capi nare” hajỹr.

Hõ, cute harẽn to hajỹr, cwỳrjapê wa ha nee akôt amji kam ijapac nare ― hane.

¹³Pê me pahcurê xwỳn pê Xatanaj tee apu Jeju to hahkre, ne apu ihcajpẽr pa jirô pê mã, ma cure ne tẽ, ne quê ha ihtỳj jũ caxuw hipêr capi.

Pê Jeju hàpên xà kam to tẽ

¹⁴Pê Pahpãm Carõ Pejti Hĩpôjajo jõ pjê wỳr hacpỹa mã Jeju to amji jaxà. Pê Jeju jarẽn pjê ita cunea kôt apu ihcahkũm. ¹⁵Pê Juta catêjê te cuprõn xà jũrkwa kam ajco me cumã ampo to hahkre. Pê mehcunea ajpẽn mã me Jeju jarẽn to:

― Ampeaj kam Jeju te amji kam hapac xà ita pej ― hane.

Pê Jeju Naxare jõ krĩ kam apu mõ

¹⁶Pê Jeju ma Naxare jõ krĩ wỳr mõ, por pê curi ihkà ata ri. Ne mehkôt xà jõ amcro kam, ma Juta catêjê te cuprõn xà jũrkwa wỳr mõ. Ampo na? Pê ramã ita ton to amji pyràc na pê mõ, ne axà ne jỹ. Ne cute Pahpãm jarkwa jõ kàhhôc cahyt prãmte hãm. ¹⁷Mã cute me cumã, por Pahpãm jarkwa to ihcakôc catê ata pê Ixaj xwỳ jõ kàhhôc jõr. Mã cute ihkàhhôc ita capô, ne por kam ihhôc te hajỹr ata mã cator ne me cumã cahyt to:

¹⁸“Ỹhỹ, Pahpãm Carõ Pejti icahê na ipa,

ne cute icapi,

mãr wa me cupê hamreare atajê cunea mã

Pahpãm jũjarẽn xà impejti itajê jarẽ.

Ne me hacjên xà kam mehkrĩ atajê japôj,

quê ha amjia kôt põ pê ame ipa.

Ne mento tũm atajê mã mento to impej, quê me rĩt.

Ne mehkwỳa te ame to kêanre atajê tehcajpa,

quê cute ame to kên itajê pê me cato.

¹⁹Wa ha itỳj me cumã ijũjarẽn xà impejti itajê to awjarẽ.

Ampo na?

He caku ita kam quê ha me pajõ Pahhiti mehkwỳ tehcajpa” hane.

²⁰Ne Jeju te cahyt jicu, ne hacpỹa mã ihkàhhôc ita krã ne hacpỹa ne hamãr catê mã hõr, ne hỹr. Mã cuprõn xà kam me jỹ atajê cunea ampeaj kam me Jeju pupu. ²¹Mã Jeju te me cumã harẽn kam ihtẽm, ne harẽn to:

― Ỹhỹ, me ikampa. Pom ite ita kam ihkàhhôc cahyt ita, Pahpãm te ita kam amji jarkwa kôt ton ― hajỹr.

²²Mã mehcunea te amji mã me ipikrar ne me amji mã:

― Pỳhàpà, ampeaj kam hũjarẽn xà ita pej, ne Jeju pê hũmre impej. He cupê Joje kra cakrô, ahnaa hũjarẽn xà itajê impej ― hajỹr.

²³Mã Jeju me cumã:

― Mõrmõ ca me imã: “Por hà caprãr catê ata ihtỳj mehcunea caprã, ne quê ha jũ caxuw hà, quê ha ihtỳj hanea ne taa amji caprã. Ata cuxà ca ha ita ri, gõ pjêa kam me akwỳ mã ampo pihhoti to, quê me hõmpu. Por ate amji jahkre pejti kôt ramã Capernam jõ krĩ kam ampo ton, wa ite ahna me garẽn par, ata cuxà” hane. Hõhõ, mõrmõ ca me imã garkwa to hane.

²⁴― Ne ampeaj kam wa ha me acunea mã amji jarẽ. He ihtỳj pjê cunea kam Pahpãm jarkwa to mehcakôc catêjê na me amji to pôj, mã ajte mehkĩnte, hõ krĩa kam mehkwỳa mã nee ahna me amji caxàr prãm nare. ^25-26Me ikam gapac to impeaj ne he. Ampeaj kam pê Erij jõ amcro ata kam, Juta jõ pjê kam me cahãj pijapit wej atajê me hàhtô. Pê hanea ne nee ta iwrỳc nare to caku to incrê ne ihkôt hĩkjê jirô pê mã, pê pjê ata kam prãm catia cato. Pê nee Pahpãm mempijapit wej cunea tehcajpar na Erij mẽn nare. Ne por pê Xarep jõ krĩ me, Teppro jõ krĩ kam ihkrĩ ata, pyxit peaj ne ihtehcajpar na Pahpãm cumẽ. ²⁷Ne pê hanea ne Erixêw xwỳ jõ amcro kam, Juta jõ pjê kam, mehkà xêtti atajê jàhtôa ne ame ipa. Pê Erixêw nee mehkwỳ cunea caprãr nare. Pê hũmre nõ japrỳ te Namã xwỳ ata pyxit peaj ne ihkà xêtti, ne Xiri jõ pjê catêjê ata rũm cato. Pê Erixêw pyxit peaj ne caprã, pê impej. Ata cuxà wa ha nee ita ri, ijõ krĩa kam ampo pej catia ton nare ― hane.

²⁸Mã cute me cuprõn xà kam me jỹ atajê cunea te Jeju cakôc xà na mempar, ne ame kam incryc. ^29-30Ne me hãm, ne cute me Jeju pro, ne põ mã me cupjê. Ne krĩ pê, põ mã me to cator, ne krĩ cahê na hàpkàjti ata wỳr me cupjê, cute ahna me mẽn, mã ihpỳm ne ihtyc prãmte. Mã me hàhtôa jipôc ri me hũhkra pê cator, ne ma jũ kam tẽ.

Pê hũmre nõ kam me pahcurê xwỳn carõ

³¹Mã ma Jeju Hĩpôjajo jõ pjê ata kam, Capernam jõ krĩ ata wỳr mõ, ne cator ne ame cumã ampo to hahkre, mehkôt xà jõ amcro kam. ³²Ne ampo to hahkre xà impejti to me cumã hahkre. Mã mehcunea te Jeju catia to cati na me to amji mã me ipikrar. Ne pê Jeju carôt tỳj, ne Pahhiti jarkwa kôt ipa, ne harkwa kôt ihcakôc.

³³Mã cute me cuprõn xà ata kam, hũmre nõ ata kam, me pahcurê xwỳn carõ kên nõ hĩ mã axà, ne caxwãm pê ihkrĩ, na pê cupê to ipijapar catê.

³⁴Mã caràr, ne Jeju mã:

― Pỳhàpà, Jeju pê Naxare jõ krĩ kra ita, ampo wỳr mã ca ita ri mõ? Ampo to mã ca ha ita ri apu? Côt mã ca ita ri me ijipej prãmte mõ? Wa ite ramã apê côjkwa kam Apãm Cati kra, ne acati, ne apejti, mã Apãm Cati te rĩn wỳr akujahêc na, gahkre pej ― hane.

³⁵Mã Jeju cumã:

― Mẽr kêt! Ne hũmre ita pê acato! ― hane. Mã me kam mare mã me pahcurê xwỳn carõ kên ata te hũmre ita mẽn, mã pjê kam ihpỳm. Ne hamre, me pahcurê xwỳn carõ kên nõ ata te hũmre ata jaxôp nare kam cupê cator. Mã hũmre ata pej pyrentu.

³⁶Hamre, mã mehcunea te amji mã me ipikrar, ne me amji mã:

― Pỳhàpà, Jeju te amji jahkre peaj to amji jahkre pej, cama ihcakôc, mã hũmre ita pej pyrentu. Mõrmõ hũmre ita carôt catia to cati, ne ihtỳj cama hãn ne ihcakôc, mã me pahcurê xwỳn carõ kên ita hapôj pyrentu ― hajỹr. ³⁷Ne Jeju jarẽn ita pjê cunea kam apu ipicràn.

Pê Jeju me hàhtôa caprã

³⁸Mã Jeju ma cute me cuprõn xà pê cator, ne hũmre nõ japrỳ te Ximãw ata jũrkwa wỳr mõ, mã hũpãn cacroa to cacro. Mã cute Jeju mã harẽn, ne me ahna hàhwỳr quê cahãj ita caprã. ³⁹Mã Jeju hỹrmã mõ, ne hikwa xà ata jĩkjê rũm xa, ne cute cacro ita mã harkwa cator ne cumã:

― Cahãj ita pê acator pyrentu! ― hajỹr. Mã cacro ita cupê cator pyrentu, mã cahãj ita xãm, ne cute me cumã harte kam ihtẽm pyrentu.

⁴⁰Ne ramã pyt xàr xàa kam, cute Hũm Cati carôt kôt hàpên xà pihho ton. Mã mehcunea Jeju wỳr me hà cunea na me to pra. Mã cute mehcunea na hũ xir, ne mehcunea caprãr. ⁴¹Mã me pahcurê xwỳn carõ kên me hàhtôa pĩn hapôj, ne hãn ne me cupê hapôj xàa kam mã me caràr to:

― Apê côjkwa kam Apãm pejti kra ― hane. Pê me pahcurê xwỳn carõ mã Jeju pê Pahpãm kra na hahkre pej. Ne cumã Jeju pê Crixtô, por pê Pahpãm me cumã hũmre to awjahkre ata na hahkre pej. Cwỳrjapê ri Jeju te mehcakôc tête me cumã harkwa hyr, quê nee me to ihcakôc nare.

Pê Jeju me cumã Hũm Cati jarkwa jarẽ

⁴²Mã apẽ, mã ma Jeju krĩ pê cator, ne põ kam me hamreare ata wỳr tẽ. Mã cute me huwahi prãmte, me hapên kam ihtẽm, ne cute me cumã cator. Ne ma ame huwahi, quê nee jũ kam ihtẽm nare, ne curia ame cahê na ipa. ⁴³Mã Jeju me cumã:

― Wa ha hanea ne krĩ nõ kam, Pahpãm te ampo cunea to ihhimpej xà na harẽn xà impejti to harẽn to mõ. Ne wa ite mehcunea mã ita jarẽn to ipa xà caxuw ri cute ikujahêc ― hane.

⁴⁴Ne hũjarẽn xà ita kôt, cute Juta jõ pjê kam, cute me cuprõn xà cunea kam, me cumã Pahpãm jarẽn pejti jarẽn par.

Pê Jeju ihkôt me ipa catêjê capi

¹Ỹhỹ, pê amcro nõ na Jeju Hĩpôjajo tohkà na xa, ne ampo to ame cumã hahkre. Pê me hàhtôa ne ahna me cuprõn tu, ne me hĩ to ajpẽn wỳr mehkujahêc to me mõ, cute me Pahpãm jarkwa par prãmte. ²Pê Jeju pàr kre pijakrut caprỳ pupu, pê cô tohkà na ajêt. Pê ramã tep pro catêjê cupê me cato ne jũ ita ri ame hõ kryhti cuhhõn to mehcuhkwỳr. ³Mã Jeju te Ximãw jõ pàr kre pupun ne cumã hàr, ne cute ahna hàhwỳr, quê pàr kre to ipicamẽn crire ne, cô tohkà pê. Mã to ipicamẽn. Mã pàr kre kam hỹr, ne cute me hàhtôti atajê mã ampo to hahkre kam ihtẽm.

⁴Ne cute ampo to me cumã hahkre partu, ne cute ihcakôc to ihhi, ne Ximãw mã:

― Ca ha côhtu wỳr me akwỳ me, me to pàr kre cakrỳ ne cô kam me gõ kryhti mẽ, ate me to tep nõ pro xà caxuw ― hajỹr.

⁵Mã Ximãw cumã:

― Pahhi, ita kam, caxwa ita kam, ite me ijàpêan to me apẽ, ne nee ite me to tep ita nõ ihpro nare. Wa ha pijamã amcroa kam me to tep ita nõ mẽ? Wỳr wa ha me ihnõ mẽ! Cakrô ca ha caa me ikujate, wa ha itỳj me mõ, ne mũhũràn me ijõ kryhti mẽ ― hane.

⁶Ne cute harkwa kôt me ampo na mẽn xà atajê ton to hajỹr, ne me to tep jàhtôa na kryhti to me ipixêr, ne me to pro. Mã ampeaj kam hũtĩ, ne ajmãr cute ame cupê hõ kryhti cokjêr. ⁷Mã cute mehkwỳ mã hũ to hàpêr, quê me hỹrmã pàr kre nõ to me tẽ, ne tep na me to ihtehcajpa. Mã ma hỹrmã me to tẽ. Mã tep jàhtôa to hàhtô, ne hũtĩ te ajmãr cô mã pàr kre ajwar to mrõr. ⁸Mã Ximãw te ita pupun, ne Jeju cuna mã ihkõn krã na hỹr, ne cumã:

― Me ijõ Pahhi, imã acupa hyre nare. Ampo na? Acatia to acati ne akĩnte icrire, ne ikêanre ― hajỹr.

⁹Ampo na ri cute cumã harkwa ton to hajỹr? Cute me tep jàhtôa ne me to pro na ri, ne cute to amji mã ame ipikrar crire nare. Mã mehkwỳ te me hajỹar, ne me to tep jàhtôa ne me to pro, na ri cute amji mã ame to ipikrar. ¹⁰Mã Jeju Ximãw mã:

― Apu pa nare. Ita caxuw ca ha quêt mehĩ to pit mã cuprõn kam tẽ ― hane. Mã cute mempar.

¹¹Ne ma pàr kre atajê to me hàpir amcrà wỳr, ne ampo cunea to me tojnõ, ne ma Jeju kôt me pra.

Pê Jeju ihkà xêtti nõ caprã

¹²Mã ma Jeju krĩ nõ wỳr mõ, ne curia apu ipa. Mã curi me hũmre kà xêtti nõ ita ihkrĩ. Ne cute Jeju pupun, ne pjê kam ihpỳm, ne cute pjê na ihkuc xir ne amji na cumã awjahkre, ne cumã:

― Pahhi, ca ha icaprãr prãm, ne atỳj icaprã ― hajỹr.

¹³Mã Jeju te hũhkra curor ne ahna hir ne cumã:

― Ỹhỹ, imã acaprãr prãm, cwỳrjapê wa ite ramã acaprãr ― hajỹr. Mã hamre, ihkà xêt ita hũmre ita pê cator pyrentu.

¹⁴Mã Jeju cumã:

― Ca ha nee mõ ne apu jũm mã ite acaprãr ita na ijarẽn to amõr nare, ne ma Pahpãm mã mehcajrẽn catê wỳr tẽ, ne cumã amji jarẽ, ne cumã amji to ajpẽ, quê apupu ne akôpĩr to impej. Jirô pê mã ca ha Pahpãm mã ampo gõ. Por pê Mojxe xwỳ ramã me panquêtjê mã Pahpãm mã ampo jõr xà na ihkàhhôc juwahi ata na, ca ha cumã ampo gõ. Jirô pê quê ha mehcunea ramã acaprãr ita na me gahkre pej ― hane.

¹⁵Pê pjê ata cunea kôt Jeju te Hũm carôt kôt hàpên xà pihho ton xà jarẽn apu ihcahkũm. Pê me hàhtôa ne mehkrĩ atajê ajco Jeju wỳr me pra, cute mempar prãmte. Ne hanea ne me hà hỹrmã me pra, cute me caprãr prãmte. ¹⁶Pê Jeju ma ajco põ mã hapôj, me hamreare ata wỳr, ne ahte ajco Hũm Cati mã ihcakôc.

Pê Jeju cukrã xà peacre nõ caprã

¹⁷Pê amcro nõ na Jeju ikre kam jỹ, ne ame cumã ampo to hahkre. Pê Parixêw catêjê me, me cumã Mojxe xwỳ jõ kàhhôc to hahkre catêjê hanea curi me jỹ. Pê Hĩpôjajo jõ pjê me, Juta jõ pjê pĩn, krĩ cunea me hỹrmã cutor tu. Pê Pahpãm Jeju mã carôt to ihtỳj, ne cumã cute amji jahkre pejti gõ, cwỳrjapê ri ihtỳj me hà caprã. ¹⁸Mã me hũmre cukrã xà peacre nõ pàrkwỳc kam nõ. Mã hũmre kwỳ pê me hõ kwỳ nõ atajê te me to cator, ne tee ame to hàr to hahkre, Jeju cuna mã cute me hir prãmte. Ne jũ wỳr quê harkwa na me to axà, cute me hipu tu, ne me hahêr tu ita kam. ¹⁹Cwỳrjapê ri tee Jeju wỳr ame to hàr to hahkre. Ne ma me to hàpir, ikre jimoc na. Ne cute me kẽn po te ikre ton ata nõr par, ne me to ihkre, ne pàrcuxê to me hũmre nõr xà ata na hê, ne ma me to iwrỳc, me hàhtôti atajê jipôc ri, ne Jeju cuna mã me hir.

²⁰Mã Jeju te ampeaj kam, cute amji mã me Pahpãm to ihhimpej na me hõmpun, na ri cute hũmre cukrã xà peacre nõ ata mã:

― Ikwỳ nõ, wa ha ita kam ate Pahpãm to kên xà ita to tojnõ, ne nee hipêr to amji japackre nare ― hajỹr.

²¹Mã hamre, Parixêw catêjê me, me cumã Mojxe xwỳ jõ kàhhôc to hahkre catêjê me, me amji mã:

― Pỳhàpà, Jeju ita apu ihcakôc to kêanre. Ne ihtỳj Pahpãm to ihcakôc kêanre. Xà ajkĩ cupê Pahpãm, quê hũmre te ihkên ton xà ita to tojnõ? Pahpãm quê ha quêt ihtỳj jũm te ihkên ton xà nõ to tojnõ, ne me paxũmre nõ te ita ton xà nare ― hane.

²²Mã Jeju te me hahkre pej pyrentu, cute amji kam me hapac xà ata na, ne me cumã:

― Pỳhàpà, ampo na mã ca ame amji cajpẽr xà ita to me acaxwãm pê ame amji cajpẽ? ^23-24Ikam me gapac peaj ne he. Ipê me Ahàkà, wa itỳj jũm te Pahpãm to kên xà ata to tojnõ. He me ikampa, ne me ipupu, ne me ijahkre pej to impeaj ne. Harẽn xà jũ ri amji jirôa pê ihtỳj? Xà wa ha ajkĩ hà ita mã: “Ate Pahpãm to kên xà ita, wa ha to tojnõ?” nare, wa ha ajkĩ cumã: “To xa ne anõr xà py ne atẽm pyrentu?” hane. Harẽn xà itajê nõ ri amji jirôa pê ihtỳj? He pom harẽn xà te: “To xa ne tẽ” ata ri, ite harẽn xà nõ ata jirôa pê ihtỳj ita? Ne hamre, ita caxuw ca ha me ijahkre pej to impej, wa itỳj jũm te Pahpãm to kên xà ata to tojnõ ― hane. Ne cute cukrã xà peacre ata mã harkwa to:

― To xa ne anõr xà py, ne atẽm pyrentu, gũrkwa wỳr ― hajỹr.

²⁵Mã hà ita me kam mare mã hãm pyrentu, ne cute nõr xà pyr, ne ma hũrkwa wỳr tẽ. Ne ampeaj kam Pahpãm te cumã ampej pyrên hakryti na cumã amji jarẽn to tẽ. ²⁶Mã mehcunea te ita to amji mã me ipikrar, ne mehcunea mã hũpaa to hũpa. Mã cute me Pahpãm to amji kam hapac pyrentu, ne me amji mã:

― Pỳhàpà, rỳ jũ caxuw me pahnõ te ampo pejti itajê nõ pupun nare, ne ita kam mã rỳ pahte me hõmpun ― hajỹr.

Pê Jeju Rewi to ihkôt ipa catê

²⁷Ita jirô pê mã ri ma Jeju cator, ne cute, por Rewi pê pjê jõ pahhi jarkwa na me hũhkra kam hàmcwỳr catêjê nõ ata pupun. Mã me hũhkra kam hàmcwỳr xà kam jỹ, mã Jeju te hõmpun ne cumã:

― Ajpên ikôt mõ ― hajỹr. ²⁸Mã Rewi xãm ne cute ihcunea jicu, ne ma ihkôt mõ.

²⁹Ne cute hũrkwa kam, Jeju mã amji kĩn catia ton. Mã pahhi mã me hũhkra kam me hàmcwỳr catêjê jàhtôa ne me cahê na me jỹ. Pê mehkwỳ hanea ne mehkrĩ. ³⁰Mã me cumã Mojxe caca xà to hahkre catêjê me, Parixêw catêjê te me amji kĩn ita pupun. Ne ame Jeju kôt me ipa catêjê kam mencryc, ne ame hũn, ne me cumã:

― Pỳhàpà, ampo na mã ca ame cahê na ame apà, ne ame ikõ? Pom me hàmcwỳr catêjê pê mehkrã kên catêjê ita? Pom hõtpê pahhi jarkwa jirôa pê ame hàmcwỳr to me ipa ita? Pom me cupê mehkên ton catêjê ita? Ampo na mã ca me cahê na ame hane? ― hane.

³¹Mã Jeju Parixêw catêjê kwỳ mã:

― Ỹhỹ, me ikampa! Me capẽn catêjê me, mempej catêjê, nee mehcahhê catê na prãm nare. Ne me hà catêjê ri quêt ihtỳj mehcahhê catê na mehprãm. Na ri ita pê hũràc ne ipê mehcahhê catê pyràac. ³²Na wa ite mehkrã kên catêjê to impej prãam to wa ajpên mõ, mãr quê mehkên pê amji to me antuw, ne mempej. Wa nee mempej catêjê to impej to icator nare ― hane.

Pê Jeju ipijacri kôt harẽ

³³Mã amcro nõ na jũmjê itajê Jeju wỳr pra, ne me cumã:

― Ỹhỹ, Jowãw kôt me ipa catêjê ihtỳj me ajcri to ame ipa, ne hõtpê me ipijacri to me ipa xà ata kam, ihtỳj Pahpãm mã mehcakôc to me ipa. Mã hanea ne Parixêw catêjê kôt me ipa catêjê ihtỳj me ajcri. Ne akôt me ipa catêjê, mã ajte nee mehkĩnte me ipijacri nare. Ne mẽr ampo na mã akôt me ipa catêjê nee itajê cuxà ame ipijacri to me ipa nare? ― hane.

³⁴Mã Jeju me cumã:

― Ỹhỹ, amji kĩn catia kam, quê ha pijamã jũm ipijacri to ipa? Jũ wỳr quê jũm amji kĩn kam hàpàn nare ne apu ipa. Quê ha ihtỳj mehcunea me hàpàn to me ipa. ³⁵Ne quê ha amji kĩn jõ pahhi ma jũ kam tẽ, quê ha amji kĩn hamre, jakàn pê quê ha ihtỳj me ipijacri to ame ipa ― hane.

³⁶Ne hanea ne Jeju te me cumã, cute amji kam me hapac xà capô to impej partu, mãr quê me hahkre pej pej, ne me cumã:

― Ỹhỹ, jũ wỳr quê jũm cupẽhkà wej to impej prãmte, cupẽhkà tuw kwỳ jakep, ne ihwej ita na cuxô ne to ajpỳ. Quê ha to hane, quê ha intuw ita ihwej ita to kên nare ne hipô, jũ wỳr quê ha cupẽhkà wej ita intuw ita mã awcanã. ³⁷Ne jũ wỳr quê ha jũm pryti kà te ampo cacô cjên xà wej ita kam ampo cacô tuw ru. Quê ha jũm te incjêj xà wej kam irun na, quê ha incjên xà wej ita ajcahte, quê ha ampo cacô ita acto. ^38-39Ne jũ wỳr quê jũm ampo itajê nõ to hane, ramã me pahcunea te me hahkre pej. Cu ha ampo cacô incjên xà intuw pit kam ame ampo cacô tuw ru. Pê mã nãm ampo cacô wej ata, ampo cacô tuw jirôa pê impej. Na ri jũ wỳr quê jũm ampo cacô tuw ita na prãm, cormã intuw na ri, ne quêt ampo cacô wej ata ri ramã impejtu ― hajỹr. Ita jĩkjê na mã, ramã cute me amji kam hapac xà tũm wej to me amji pyràc xà ata pit kĩn, nare, nee cumã to ipintuw prãm nare.

Pê Jeju mehkôt xà jõ amcro kôt harẽ

¹Ne amcro nõ na, mehkôt xà jõ amcroa kam, Jeju na mehkwỳ te pur nõ ita cajpuw me arỳjhy cahàc ata jakren to me mõ. Mã ihkôt me ipa catêjê te mehkẽhkẽn ne me caxwỳn kur kam me to ihtẽm. ²Mã Parixêw catêjê kwỳ te me hõmpun, ne me cumã:

― Ampo na mã ca ajte ame gàpên to me apa to hane? Ca ihhêj ne ate me pancaca xà kaj na, hirô pê me apỳm, ne ma ame pahkôt xà jõ amcro caca. Pom pê me panquêtti pê Mojxe xwỳ me pamã Pahpãm jarkwa jõ kàhhôc gõ ne hõ amcro ata juwahi ata kam, me gàpên xà ita na ihkaj na, me pahkôt xà jõ amcro kam ― hajỹr.

³Mã Jeju me cumã:

― Nee ite Pahpãm jarkwa jirô pê me to ipỳm nare. Atea ca me hirô pê me to apỳm. Xà ate me panquêtti pê Tawi xwỳ jõ kàhhôc cahyt nare? Pê Tawi xwỳ me, mehkwỳ itajê mã prãm. ⁴Pê me Pahpãm to me amji kam me hapac xà jũrkwa mã me axà. Pê curi Pahpãm mã hõ pyxwỳr xà na pãw pejti itajê hikwa. Ne por pãw hikwa atajê quê nee jũm pê Pahpãm mã mehcajrẽn catêjê nare ihnõ krẽr xà nare. Cakrô pê ihtỳj Tawi cucwa ne mehkwỳ atajê mã cugõ, pê me cukrẽ.

⁵― Ỹhỹ, ipê me Ahàkà, na pê wa ixũmre na amji to. Na wa Pahhiti jarkwa kôt ipa, ne taa mã pê ite me pahkôt xà jõ amcro to ihimpej catê na ixãm ― hane.

Pê Jeju hũmre jũhkra te xwỳ caprã

⁶Mã mehkôt xà jõ amcro nõ na, ma Jeju Juta catêjê te cuprõn xà mã hàr, ne cute me cumã ampo to hahkre kam ihtẽm. Pê hanea ne curi hũmre nõ awpôc rũm hũhkra kên ita jỹ. ⁷Mã hanea ne Parixêw catêjê kwỳ me, me cumã Mojxe xwỳ caca xà to hahkre catêjê kwỳ curi amehkrĩ, ne ame Jeju pupu, ne ihtỳj amehkôpĩr to me ipa, cute ihkên mã me mẽn prãmte. Quê ihhêaj to Jeju mehkôt xà jõ amcro kam jũm caprã, quê ha hàhcaprãr xà ata kôt me to ihtỳj tu ne, cute mencaca xà jirô pê ihpỳm cwỳrjapê.

⁸Pê Jeju ramã amji na cute me amji kam hapac xà ita na me hahkre pej partu cakrô, cute hũmre jũhkra kên ata mã:

― To xa, ne me hipôc ri ca xa ― hajỹr. Mã hũmre ata xãm, ne me hipôc ri xa.

⁹Mã Jeju te, por ame hõmpu atajê cukij, ne me cumã:

― Ỹhỹ, me pahkôt xà jõ amcro kam, por ihkàhhôc kam me pancaca xà jõ amcro ata, ampo pê Mojxe xwỳ Pahpãm jarkwa kôt me pamã to hahkre? Xà cu ha pahtỳj amcro ita kam ame ampo pej to? Nare, xà cu ha me pahtỳj amcro ita kam ame ampo kên to? Xà cu ha pahtỳj amcro ita kam me jũm tehcajpa ne me to ihtyc xà jahpa? Nare, xà cu ha pahtỳj amcro ita kam me jũm cura? ― hajỹr.

¹⁰Ne Jeju mehcunea kôt into to amji jacjê, ne cute hũmre jũhkra kên ita mã:

― Gũhkra curor ― hajỹr. Mã hamre, hũmre ita te hũhkra curor, ne hũhkra impej pyrentu. ¹¹Mã Parixêw catêjê kwỳ atajê ame Jeju kam mencryc, ne cute Jeju to amehkên na me ajpẽn par.

Pê Jeju ihkôt me ipa catêjê te tôxi capi

¹²Ne pê amcro atajê nõa kam Jeju kẽn na api, Pahpãm mã ihcakôc prãmte. Ne curia Pahpãm mã ihcakôc to apẽ. ¹³Ne cute ihkôt me ipa catêjê mã hàkjêr, ne me to tôxi ne me to caprãr. Ne cute me tôxi atajê to ri cute amji mã harkwa na memprar catêjê. ^14-16Ne Jeju mã memprar catêjê japrỳ itajê pê Ximãw, por pê Jeju cumã haprỳ krut pê Petrô gõ ata me, Ximãw tõ pê Antre ata me, Tijac me, Jowãw me, Pirip me, Partômew me, Matew me, Tome me, Tijac pê Arpew kra me, Ximãw, por cumã hõ pjê kĩnti ata me, Juta pê Tijac kra me, Juta Carijot pê Jeju curê xwỳn ata me.

Pê Jeju me hà caprã

¹⁷Ne Jeju te kẽn pĩn mehcunea to iwrỳc, ne me to mõ, ne pjê impejti pipẽnti ata kam me to hàhhuc. Mã curi pjê cunea rũm cute me cuprõn, ne me hàhtôa ne ame ipa. Juta jõ pjê pĩn me cator, ne Krĩpinkrên pĩn me cator. Ne côxwa cahê na krĩ pijakrut pê Kẽn jõ krĩ me, Teppro jõ krĩ ata pĩn me cator. Ne krĩ jàhtôa pĩn cute me cuprõn. ¹⁸Ampo na? Cute Jeju kam me hapac ne me amji caprãr prãmte me cuprõn. Mã Jeju ihtỳj ame caprãr to mõ. Ne ihtỳj cute me pahcurê xwỳn carõ kên atajê mã, me hĩ tête harkwa japôj to mõ. Mã mentête hapôj, mã amempej pyrentu. ¹⁹Cwỳrjapê ri mehcunea ame Jeju tàt to prãm. Ampo na? He ihtỳj Jeju jĩ pê Pahpãm carôt hapôj, ne mehcunea caprã.

Pê Jeju amji kĩn me amji kĩn nare kôt harẽ

²⁰Mã Jeju te ihkôt me ipa catêjê pupun, ne me cumã harkwa to:

― Ỹhỹ, me akwỳ pê ampo hamreare atajê,

ame gakry!

Ampo na?

He me caa, ca ha quêt Pahhiti pê Pahpãm himpej xà ata kam ame akrĩ, na ca ha ame gakrya ne!

²¹― Me akwỳ mã prãm atajê,

ame gakry!

Ampo na?

He me caa, ca ha quêt me garte tu ne,

na ca ha ame gakrya ne.

Ne ca me akwỳ ame amrã atajê, me gakry!

Ampo na?

He me caa, ca ha me hirôa pê ame acxa,

na ca ha ame gakrya ne.

²²― Ne ca me akwỳ ampo kêanre kam me amji pupu atajê,

ame gakry!

Ampo na?

He ma ame acurê, ne ma ame acaca, ne ame axũn,

ne akên na ame garẽn cakrô,

Inxũ mã nee me akên nare.

Ca ipê me Ahàkà kôt ame apa, ita cwỳrjapê ri ame ato hane,

ne ame ato kêanre.

²³Ne cute ame ato kên jõ amcro itajêa kam,

ca ha ame gakry!

Gapacta ne me gakryte ame atoj.

Ampo na?

He quê ha jũ caxuw Pahpãm hahpan xà na,

côjkwa kam me amã hàmjõr catia,

ne me amã impejti gõ.

Na ca ame gakrya ne!

Ampo na?

He me cupê menquêtjê pyràac,

ne ihtỳj me ato kên to me ipa,

pom pê mam menquêtjê ajco me Pahpãm to mehkên to me ipa

ata na ri me ato he.

²⁴― Pỳj me hêj xi,

me akwỳ pê me gakràj atajê,

ca ha atỳj ame amrã!

Ampo na?

He amcro ita pyxit peaj kam ri me gakryti ita.

Na ca ha atỳj ame amrã!

²⁵― Pỳj me hêj xi,

me akwỳ mã ampo cunea atajê,

ca ha atỳj ame amrã!

Ampo na?

Quê ha cormã jũ caxuw me amã prãm catia me awỳr cato,

na ca ha atỳj ame amrã!

― Pỳj me hêj xi,

me akwỳ ame acxa atajê,

ca ha atỳj me apicxar jicu ne cama ame amrã!

²⁶― Pỳj me hêj xi,

me akwỳ pê, pom mehcunea me apejti na ame garẽn catêjê atajê,

ca ha me amrã!

Ampo na?

He me cupê menquêtjê pyràac.

Pom pê mam menquêtjê ajco mehhêj xi catêjê pejti na ame harẽ,

ata cuxà ri ihtỳj me apejti na me garẽn to me ipa.

Na ca ha atỳj ame amrã!

Pê Jeju me curê xwỳn kĩn na me cumã harkwa

²⁷― Ỹhỹ, ampeaj kam wa ha me amã Pahpãm jarkwa jarẽ. Ca ha me amã me acurê xwỳn kĩn. Ne ame acaca atajê, ca ha me to impeaj ne.

²⁸― Ca ha cute me acrôn atajê jahpan xà na, me to impejti to prãm, ne Pahpãm mã mehcajrẽn. Ne cute me ato kên atajê, ca ha Pahpãm mã mehcajrẽn, quê me to impeaj ne.

²⁹― Quê jũm apahàm prãmte akuc kam acakwĩ, ca ha hĩkjê to cumã apkjê, quê hanea ne kam cakwĩ. Ne quê jũm apê gitô kà capa, ca ha hanea ne akat kà caxàr na to tojnõ, quê amji mã capa ne to tẽ.

³⁰― Ne atỳj me cumã, por ampo na me awỳ atajê gõ. Ne quê jũm apê ampo capa, ca nee hacpỹ ne ahna gàhwỳr nare.

³¹― Ne quê ha amã cute me ato amji kam hapac to impejti to prãm na, ca ha atỳj me to amji kam gapac to impejti to apa.

³²― Quê ha amã cute me acurê atajê kĩn na, quê ha Pahpãm ihtỳj ate mehkĩn jahpan xà na amã amgõ. Nee quê ate amji mã mehkĩnti atajê pit kĩn jahpan xà na, quê Pahpãm me amã hàmjõr nare. Quê ha amã cute me akĩn catêjê atajê pit kĩn na, ca ha me apê mehkên catêjê jõ ikwỳ nõ pyràac, ne me cuxà akêanre ne.

³³― Ca ha cute me ato kên atajê to impejti na, quê ha Pahpãm ihtỳj hahpan xà na me amã amgõ. Ne jũ wỳr quê ha Pahpãm ate, cute me ato impej catêjê pit to impejti jahpan xà na, me amã amgõ. Ca ha cute me ato impej catêjê pit to impejti na, ca ha me apê mehkên catêjê jõ ikwỳ nõ pyràac, ne me cuxà akêanre ne.

³⁴― Ca ha atỳj mehcunea mã ampo gõ, por ampo na me ahwỳ atajê, ca ha me cumã agõ. Ne nee hacpỹa ne cute me amã ampo jõr catêjê mã pit mã ame ampo jõr nare. Ca ha jũmjê te jũ caxuw hacpỹa ne amã ampo jõr nare atajê mã ampo jõr na, quê ha Pahpãm ihtỳj hahpan xà na me amã amgõ. Ne jũ wỳr quê ha Pahpãm hõtpê hacpỹa ne cute me amã ampo jõr atajê jahpan xà na me amã amgõ. Ca ha ate hajỹr na, ca ha me apê mehkên catêjê jõ ikwỳ nõ pyràac, ne me cuxà akêanre ne.

³⁵― Ne ca ha atỳj amã me acurê xwỳn catêjê kĩn, ca ha me to impej. Ne ampo cunea na me ahwỳ atajê, ca ha atỳj agõ, ne nee hacpỹa ne cute amã ampo jõr na amji mã to hajỹr nare. Ca ha me ate ite me amã ampo jarẽn itajê cunea to hajỹr na, quê ha Pahpãm hũrkwa kam, me acunea mã hàmjõr xà impejti to hàmjõr to catia, ca ha me to amcwa, ne ca ha apê Pahpãm me hirôa pê cati ata kra impeaj. Pahpãm mã mehcunea kĩn, ne hàhcajrẽn cati, ne ihtỳj cute me to kên catêjê caprĩ, ne ihtỳj cumã cute me ampo cwỳr atajê jahpan xà na me hakryti na me amji jarẽn nare atajê caprĩ.

³⁶― Na ca ha Pahpãm cuxà me gàhcajrẽnti ne, ne mehcunea caprĩ to me apa. Hõhõ, ita to ca ha me hajỹr to me apa.

Pê Jeju me ajpẽn to impej na harkwa

³⁷― Ca ha ate nee ampo na amehpro rẽn nare na, quê ha Pahpãm me acuxà nee ame apro rẽn prãm nare. Ca ha nee ame curê mã me irẽn nare na, quê ha Pahpãm me acuxà nee me acurê mã me arẽn nare. Ca ha ate cute ame ato kên ita to tojnõ ne hicu na, quê ha ihtỳj Pahpãm me acuxà, ate me to kên ita to tojnõ ne hicu.

³⁸― Ca ha gõtpê me cumã ampo jõr to apa na, quê ha ihtỳj Pahpãm hõtpê me acuxà me amã ampo jõr to ipa. Ne ampeaj kam ca ha atỳj me amcwa. Quê ha Pahpãm me amã me acrat to hipu, ne to hipu tu ne, ne ampeaj kam quê ha me acrat kam me amã cucjê, ne kam me amã curua to curu. Ne pom ca ampo kam me akwỳ mã ampo to ajpẽn ata kam, quê ha Pahpãm hanea ne me amã ampo to ajpẽn ne cunõ. Ca ha jũm mã ampo crire ne agõ, quê ha Pahpãm ate ton xà ita na, acuxà hanea ne amã ampo crire ne cugõ. Nãmri ca ha ate jũm mã ampo catia ne hõr na, quê ha Pahpãm hanea ne acuxà amã ampo catia ne cugõ.

³⁹― Ỹhỹ, jũ wỳr quê jũm to tũm, amji kôt into tũam nõ to mõ. Quê ha mento tũam me ajpẽn to mõ, ne ajwar ihtỳj kre nõ mã mehpỳm.

⁴⁰― Ne por me cumã ampo to hahkre atajê ri cute ampo to hahkre catêjê japyre mã me. Na quê ha xa ampo to hahkre ne hahkre pej jirô pê, quê ha cormã cute cumã to hahkre catê ata me ajpẽan.

⁴¹― Ca me akwỳ jirôa pê akên ton to me apa cakrô, ca atỳj me akwỳ te ampo kên kryjre ton atajê to me cumã acakôc to me apa. Ne ca ihhêj ne me akjêjê into kam me ahhi kryjre pupu, ne nee mehkĩnte amji toa kam pĩ kwỳcti ata pupun nare. ⁴²Ne jũ mã ca me akjêjê mã harẽn to, ne ajte ne me cumã: “Ikjê, cama amji na ijamã, wa ato kam amã ahhi kryjre ita to pôj” hane. Ne mẽr ampo na ca caa, atoa kam amji mã pĩ kwỳcti ita caxàr nare? Ne ihcaprỳ na amji pej na ame amji jarẽn to me apa, ne mehkĩnte me akêanre. Ca ha mam me ato kam amji mã pĩ kwỳcti itajê to pôj, ne me arĩt pej, ne cormã me akjêjê into kam ahhi kryjre ita pupu, ne me cumã to pôj.

Pahte amji kam me pajapac xà ihtỳj me pahcakôc xà to ihhimpej

⁴³― Ỹhỹ, jũ wỳr ca ha pĩxô impejti pàr nõ intête, pĩxô kên nõ capa, ne jũ wỳr ca ha pĩxô kên pàr tête, pĩxô impejti nõ capa. ⁴⁴Ca ha ampo pĩxô pàr cahkrit nõ pupu, ne ramã hahkre pej pyrentu, xà pĩxô pàr ita ajkĩ impej, nare, mõrmõ ihkêanre. Ne jũ wỳr ca ha hômjĩ pàr kam ahkrỳt nõ ta, ne jũ wỳr ca ha ahkrô kam crowkwỳj xô nõ ta. ⁴⁵Jĩkjê na, jũm xũmre impejti ata hõtpê amji caxwãm pê cute amji kam hapac xà pĩn ampo pejti to hapôj, mã ihkĩnte jũm xũmre kên ata hõtpê amji caxwãm pê cute amji kam hapac xà pĩn ampo kên to hapôj. Ỹhỹ, ampeaj kam pahte amji kam me pajapac xà me, me pahcakôc xà te hipu, cu ihkôat me pahcakôc ― hane

Ikre mã ihcuhhê xà pijakrut

⁴⁶Ne Jeju me cumã:

― Ampo na mã ca ame imã: “Me ijõ Pahhiti” hane, ne nee ijarkwa kôt ame apa nare? ⁴⁷Wa ha me amã ijũjarẽn xà ita jarẽ, mãr ca me amã ahna icaca xà jahkre pej. ⁴⁸Ỹhỹ, quê ha jũm te ijarkwa kam hapac ne ijarkwa kôt ipa na, quê ha cupê ihhêj rũm hũmre te pjê tỳjti kam ikre xãm ata pyràac. Mã cô te hipu, ne ma ikre wỳr cô tẽ, ne cute ikre ata cakwĩn, mã nee hàhcujrõn nare, ne hãm peaj na ihtỳj xa. ⁴⁹Mã ihkĩnte jũm te cama ijarkwa kam hapac, ne nee to amji japackre, ne ihkôt ipa nare, ata pê ihhêj rũm hũmre nõ te pjênxôm cràre kam ikre xãm pyràac. Mã cô te hipu ne ma ikre wỳr tẽ, ne cute ikre ata cakwĩn, mã ihpỳm pyrentu, ne ikre ata jamre ― hane. Hõ, pê Jeju hũjarẽn to hane.

Pê Jeju pahhi mã hàpên catê nõ caprã

¹Mã Jeju te me cumã ampo itajê jarẽn jicu, ne ma Capernam jõ krĩ wỳr mõ. ²Ne pê curi Roman catêjê nõ ihkrĩ, ne cupê krãhtare te xẽj jõ pahhi. Pê pahhi mã hàpên catê hà, ne ramã ihtyc xàa kam nõ. ³Mã pahhi ata te Jeju jarẽn par, ne ihwỳr Juta catêjê pê pahhi kwỳ kujahêc, cute me Jeju japrôr, mã cute hà ata caprãr prãmte. ⁴Mã cute me Jeju cajpar, ne me ahna hàhwỳr crire nare, ne me cumã:

― Ỹhỹ, Roman catêjê nõ ita peaj to impej, cwỳrjapê ca ha ihtehcajpa. ⁵Nãmri cumã me papê Juta catêjê kĩan to ihkĩn, ne cutea ri me imã ite me cuprõn xà jũrkwa ton. Cwỳrjapê ca ihtehcajpa, ne me ikôt mõ, ne hà ata caprã ― hajỹr.

⁶Mã ma Jeju mehkôt mõ. Ne ramã cute ikre têp, mã krãhtare jõ pahhi te hõ ikwỳ nõ catêjê kujahêc, cute me Jeju mã hũjarẽn prãmte. Mã cute mehcajpar ne me cumã:

― Me ikwỳ nõ te amã harkwa kujahêc to hajỹr he: “Pahhi, akĩnte icrire ne ikêanre ita kam, wa nee acahpêrkàr prãm nare. Cwỳrjapê ca ha nee ijũrkwa mã axàr nare. ⁷Ne jũ wỳr wa ijĩa kam amã icakôc, nãmri apê Pahhiti ne akĩnte jũ na xà na ijamreare, ne ipahàm crire nare. Ca ha cama hà ata mã garkwa ta, quê ha imã hàpên catê ita impej pyrentu, ne capẽn. ⁸Ne wa hanea ne me ijõ pahhi jarkwa kôt ipa, ne wa ha ijõ krãhtare catêjê mã ijarkwa ta, quê ha ihtỳj me ikampa ne ijarkwa kôt me ipa. Ne wa ha jũm mã, ‘Tẽ!’ hane, quê ha ihtỳj tẽ. Ne wa ha mehnõa mã, ‘Ajpên tẽ!’ hane, quê ha ihtỳj ajpên iwỳr tẽ. Ne hanea ne wa ha imã hàpên catê mã, ‘Ca ha to hane!’ hane, quê ha ihtỳj to. Ne ijirôa pê acati ita kam, ca ha cama hà ata mã garkwa ta, quê ha imã hàpên catê ita impej, ne capẽn pyrentu” ― hajỹr.

⁹Mã Jeju xa, ne cute hũpar xà ita to hũpar, ne to amji mã ipikrar. Ampo na? Cumã hũpar xà ita peaj to impej. Na ri cute amji mã ipikrar, ne me hàhtôa ne ihkôt me mõ atajê wỳr ipipkjêr, ne me cumã:

― Ỹhỹ, ampeaj kam wa me amã awjarẽ, Roman jõ krĩ kra ita ihtỳj ikampa, ne ihtỳj amji mã ito ihhimpej. Wa rỳ Juta jõ pjê kam jũ caxuw, ampeaj kam jũm te amji mã ito ihhimpej to hajỹr nõ na, impar nare ― hane.

¹⁰Mã Roman jõ krĩ kra ita jõ ikwỳ nõ itajê, hacpỹa mã me hũrkwa wỳr cute me amji jacjên, mã hamre ramã cumã hàpên catê ata pej, ne capẽn pyrentu.

Pê Jeju impijapit kra tyc to ihtĩr

¹¹Ỹhỹ, pê nee curi Jeju na amcro hàhtô nare, pê ma Põre jõ krĩ wỳr mõ. Pê ihkôt me ipa catêjê me, me hàhtôa ne ihkôt me mõ. ¹²Pê Jeju ramã krĩ jõ harkwa têp, pê cute me harêt catêjê krĩ jarkwa na, jũm tyc jarêt to me cato. Por pê cahãj pê ihkra ty ata pê ihcãmter cumã pyxit peaj. Ne iràn xà na cumã mehkjêjê nõ hamreare. Ne pê rỳ pêa mã ramã impjên cupê ty. Pê cute me ihkra jarêt catêjê kôt incwỳr to mõ. Pê hanea ne me hàhtôa ne krĩ pĩn, mehkôt me mõ. ¹³Mã Jeju te cahãj ita cwỳr na hõmpun, ne ampeaj kam cumã caprĩ xà, mã cumã:

― Apu acwỳr nare ― hajỹr.

¹⁴Ne ihkra jarĩj xà ata na hàhtêp, ne cute me to hàhhuc prãmte ahna hũ xir, mã me to hàhhuc, mã Jeju ihtyc ata mã:

― Hũmre, wa ha amã ijarkwa ta. To xa! ― hajỹr.

¹⁵Mã hũmre ita jỹr pyrentu, ne cute ihcakôc kam to ihtẽm. Mã Jeju te inxi mã hõr. ¹⁶Mã mehcunea mã hũpaa to hũpa. Ne ame hakry pyrên ajpẽn mã Pahpãm to me hàmnãn to me mõ, ne me ajpẽn mã:

― Me pamã Pahpãm jarkwa to ihcakôc catê catia nõ ita cator! Me Pahpãm mõrmõ cator, cute me pahtehcajpar xà caxuw ― hane.

¹⁷Pê Jeju jarẽn pejti ita pjê ata cunea kam apu ajcrà. Pê hanea ne cahê na pjê atajê kôt harẽn apu ajcrà.

Jowãw te me cumrãr catê jarkwa jarẽn catêjê

¹⁸Ỹhỹ, por Xacarij me Ixapewkwỳj kra pê Jowãw ata, cormã apu ipa, ne ihtỳj mehcunea mã Pahpãm cator xà caxuw ame amji cũmpej to hũjarẽn to ipa. Ne por Jowãw kôt me ipa catêjê na cute me amji ton to prãm atajê ri, Jowãw te amji caxuw cô kam mehcumrãr. Cwỳrjapê ri cute me cumã haprỳ krut jõr, ne me cumã: “Jowãw te me cumrãr catê” hajỹr. Mã hamre, Jowãw kôt me ipa catêjê nõ te Jeju pupun, ne ma amji jaxàr ne cumã Jeju jarẽn. ¹⁹Mã Jowãw te ihkôt me ipa catêjê to ipijakrut ne me cumã hàkjêr, ne me cumã harkwa hyr to:

― Jeju wỳr me tẽ ne mehcukij, ne me cumã: “Xà apê hũmre cator xà ata mã ca? Xà Jowãw te me imã garẽn ata mã ca ramã acator? Nare xà wa ha pijamã ajkĩ cormã me jũm xũmre nõ ata jikaj?” hane ― hajỹr.

²⁰Mã hamre, ma Jeju wỳr me pra, ne me cumã:

― Ỹhỹ, Jowãw te me cumrãr catê te me imã harkwa hyr, wa me acukij: “Xà apê hũmre cator xà ata mã ca? Xà Jowãw te me imã garẽn ata mã ca ramã acator? Nare xà wa ha pijamã ajkĩ cormã me jũm xũmre nõ ata jikaj?” ― hane.

²¹Mã amcro ata kam Jeju te me kam mare mã me hà catêjê jàhtôa ne me caprãr. Ne hanea ne cute me pahcurê xwỳn carõ kên jàhtôa mã me hĩ tête hapôj na harkwa hyr, mã me cupê hapôj. Ne hanea ne cute mento tũm jàhtôa ne me caprãr, mã ihtỳj me irĩt. ²²Ne Jeju te ame to hajỹr jirô pê mã ri, cute Jowãw kôt me ipa catêjê mã:

― Ỹhỹ, me amji jaxà, ne ate mempar atajê me, ate me hõmpun atajê to Jowãw mã me awjarẽ. Pom mento tũm catêjê ihtỳj me irĩt he, ne mehkjê te xwỳ catêjê ihtỳj me capẽn, ne me hapactu catêjê ihtỳj me awpa, ne mehtyc catêjê hacpỹa mã mehtĩr, ne me cupê hamreare atajê ihtỳj me Pahpãm himpej xà jarẽn xà impejti kampa. ²³Quê ha jũmjê ikampa, ne cute ikam hapac mã hũcanãr, ne nee ito amji pê hapac kêt nare na, quê ha hakrya to hakry ― hajỹr.

Pê Jeju Jowãw te me cumrãr catê jarẽ

²⁴Mã ma Jowãw kôt me ipa catêjê te me amji jaxàr ne me pra. Mã Jeju te me hàhtôti atajê mã Jowãw jarẽn kam ihtẽm, ne me cumã:

― Ỹhỹ, pê ca me Jowãw cajpar prãmte ma põ kam me hamreare ata wỳr me pra. Ne ampo pupun prãm to mã, pê ca ame pra? He pê ca nee me hũmre nõ pê kôc te apu pĩhhô to tertet pyràcti ata pupun nare. ²⁵Ne mẽr ampo pê ca me hõmpu? Pê ca nee me hũmre ata na cupẽhkà impejti nõ pupun nare. Ne por mehkà impejti kam ame ipa atajê, ihtỳj quêt ampo pejti cunea jipôc ri, pahhi jũrkwa pejti ne catihti ata kam mehkrĩ. ²⁶Ne me imã amji jarẽ, ampo pupun prãm to mã pê ca me pra ne me hõmpu? Xà Pahpãm jarkwa to mehcakôc catê nõ pupun prãmte pê ca ajkĩ me pra? Ỹhỹ, ampeaj kam ri Jowãw pê Pahpãm jarkwa to ihcakôc catêjê nõa, ne mehkwỳ jirôa pê cati. ²⁷He pê rỳ pêa mã ramã Pahpãm jõ kàhhôc Jowãw jarẽn to hane he:

“Ỹhỹ, pê Pahpãm ihkra mã:

‘Wa ha acumam ijarkwa na ipa catê kujate,

quê ha amã gõ pry to impej’ ” hane.

Hõhõ, pê Pahpãm ramã Jowãw jarẽn to hanea, na ri cator.

²⁸― Ne ampeaj kam wa ha me amã awjarẽ. Jowãw ri catia to cati, ne taa mã ri quêt me aquêtjê jirôa pê cati cakrô, quê ha jũm crire ramã Pahpãm himpej xà krac ri ipa ata, quê ha Jowãw jirôa pê cati ― hane.

²⁹Ne pê mehcunea me ampo ita kampa. Pê ihtỳj hanea ne pahhi jarkwa na me hàmcwỳr catêjê atajê me Pahpãm jarkwa kampa ne hỹrmã me apkjê. Cwỳrjapê pê ramã Jowãw caxuw, cô kam mehcumrã. ³⁰Pê mehkĩnte Parixêw catêjê me, cute me Mojxe xwỳ jõ kàhhôc to me cumã hahkre catêjê me, ma ame Pahpãm te me to ihhimpej xà ita caca, na pê nee amji na me Jowãw to tojnõ, pê cô kam me cumrãr nare. Na pê Jeju me cumã:

³¹― Ỹhỹ, me atoa wa ha me amã icakôc. Pom ca amcro ita kam, pjê kam ame apa itajê, me apê ahkrare te xuwcacati atajê pyràac. ³²Ne me apê me ahkrare te ame hàkrun pyràac. Ne me akwỳ amji mã me acaràr to: “Wa ite me amji kĩn jõ increr to me icrer, ca ajte nee me icuxà me acrer nare. Ne ite me harêt japête mencwỳr to me icwỳr, ca ajte nee me icuxà me acwỳr nare, ne cama ame xuwcaca to ame apa”. ³³Ỹhỹ, me apê ahkrare kwỳ te xuwcacati atajê pyràac. Ampo na? Pê Jowãw cato ne ihtỳj ajco ipijacri to ipa, ne nee ampo cacô to ihkõm nare. Cakrô, ca nee ajte ate mempar ne me hũnãr nare, ne cama me to gũjarẽn to: “Cupê me pahcurê xwỳn carõ kên to ipijapar catê” hane. ³⁴Wa quêt ipê me Ahàkà, itỳj ampo cunea ku, ne ampo cunea to ikõm to ipa cakrô, ca ajte nee hanea ne ate me ipar ne me ipynãr nare, ne cama me ito gũjarẽn to: “Hõmpu he, hũmre ita jàpàn cati, ne ihkõm cati, ne me cupê pahhi jarkwa na me hàmcwỳr catêjê me, jũmjê kêanre itajê jõ ikwỳ nõ nõ” hajỹr. ³⁵Ỹhỹ, he Pahpãm te amji kam hapac xà cunea impej pit, quê ha jũm Pahpãm te amji kam hapac xàa kôt ipa na, quê ha cumã amji jahkre pej pejti ne ― hane. Hõ, pê Jeju me cumã hũjarẽn to hane.

Pê Jeju Parixêw catêjê nõ jũrkwa kam apà

³⁶Mã Parixêw catêjê nõ japrỳ te Ximãw te, Jeju te hũrkwa kam cahê na ampo krẽr prãmte, hator. Mã ma Jeju hũrkwa wỳr ihkôt mõ. ³⁷Pê krĩ ata kam cahãjre inxyre nõ ihkrĩ, ne cumã Jeju te Parixêw catêjê nõ jũrkwa kam apu mõr na hahkre pej. Ne cute ampo cacô incjên xà kam, ampo cacô cuxwati ata to hipu tu, ne ipyr ne ma hỹrmã to tẽ. ³⁸Ne cute Jeju na hàhtêp, ne ihkõn krã na hỹr, ne cute ihkên ton xà atajê jũ na ihpahàm te incwỳr kam to ihtẽm, ne into cacôa to Jeju par co, ne ihkĩa to cumã incrà. Ne ma hõtpê ihpar pã, ne cute kam ampo cacô cuxwa pejti ata jaxwỳr.

³⁹Mã Ximãw te ita pupun, ne amji caxwãm pê amji mã:

― Pỳhàpà, xà mõrmõ ajkĩ hũmre ita pê ampeaj kam Pahpãm jarkwa to ihcakôc catê? Quê cupê Pahpãm jarkwa to ihcakôc catê na mã, quê ha ihtỳj cahãj ita kêanre na hahkre pej. Wỳr quê cupê Pahpãm jarkwa to ihcakôc catê quê amji na cahãj kêanre inxyre ita jamã, quê ihtêp ne ihcupê ― hajỹr.

⁴⁰Mã Jeju te Ximãw caca xà ita na hahkre pej pyrentu, ne cumã:

― Ỹhỹ, Ximãw, wa ha amã ampo jarẽ ― hajỹr. Mã cumã:

― Hã, gapacta ne imã harẽ, pahhi ― hane.

⁴¹Mã Jeju cumã:

― Ỹhỹ, pê hũmre ajkrut ne ihpore to jũm jakràjti ata to new. Pê ita to new cati to quĩjẽnta, ne ita hapyre mã to new to xĩncwẽnta. ⁴²Ne pê ajwar me cupê ihpore hamreare, me cumã hàmjõr xà caxuw. Ne ampo to quê me hũhkra kam hàmcwỳr catê ita mã amgõ? Mã me hũhkra kam hàmcwỳr catê mã me caprĩ, mã cute ajwar me to tojnõ. Mẽr hõhõ, wa ha me ahna acukij, mẽr jũm quê ha amji jirôa pê hakry, ne cumã to new catê ata kĩn? ― hane.

⁴³Mã Ximãw cumã:

― Imãa, pom cute to new catihti ata ri hakry ― hane. Mã cumã:

― Ỹhỹ, ate to hamãar ne harẽn ― hane.

⁴⁴Ne Jeju cahãj ita wỳr ipipkjêr ne Ximãw mã:

― Cahãj ita pupu he. Wa ixàr, ca ate ihkĩnte nee imã cô kwỳ nare, ite to ipar tũm cuhhõn xà caxuw, mã quêt cahãj ita te into cacôa to imã ipar cuhhõn, ne ihkĩa to imã incrà. ⁴⁵Wa icator, ca nee ate ihkĩnte ijũhkra na ipyr nare, ne nee ate ipãr nare. Mã quêt cahãj ita te nee ipar pãr jicu nare. ⁴⁶Ne nee ate ihkĩnte imã ikrã caxuw ampo cacô cuxwati nõ jõr nare. Ne cutea ri quêt ipar kam ampo cacô cuxwati jaxwỳr. ⁴⁷Ỹhỹ, he ampeaj kam wa me amã awjarẽ, Pahpãm te cahãj ita to impej ne cute to kên catihti ita to tojnõ, ne hicu, cwỳrjapê ri ampeaj kam cumã Pahpãm kĩn. Ne jũm te Pahpãm to kên crire ata, quê ha cute cumã to tojnõ na, quê ha kyre pê cumã Pahpãm kĩn ― hane.

⁴⁸Ne Jeju cahãj ita mã:

― Ite ramã ate ampo to Pahpãm to kên ita to tojnõ ne hicu ― hane.

⁴⁹Mã me hàpàn xà na mehkrĩ atajê te me amji mã harẽn kam mehtẽm, ne me amji mã:

― Pỳhàpà, jũm xũmre mã ajte, mã ihtỳj cute jũm te Pahpãm to kên ita to tojnõ ne hicu? Côt mã cupê Pahpãm? ― hajỹr.

⁵⁰Mã Jeju cahãj ita mã:

― Ampeaj kam ate ito amji mã ahimpej, cwỳrjapê ri Pahpãm te apytàr. Na ca ha apej pêa mã mõ ― hane.

Pê pyjê kwỳ Jeju kôt ipa

¹Pê amcro nõ na, ma Jeju krĩ jàhtôa kôt mõ, ne ma krĩ wên kôt me hapôj to me mõ, ne Pahpãm pê Pahhiti na harẽn xà impejti atajê jarẽn to mõ. Pê ajco ihkôt me ipa catêjê te tôxi atajê ihkôt me mõ. ²Pê hanea ne pyjê kwỳ cahãj tête Jeju me pahcurê xwỳn carõ kên kwỳ japôj atajê me, hà kwỳ na me caprã atajê me, ihkôt me mõ. Atajê japrỳ pê hane he: Marij Matarkwỳj, pom pê Jeju cupê me pahcurê xwỳn carõ kên te xet japôj ata me, ³Jowanakwỳj pê Cuxa pê pahhi Heroti mã hàpên catê ata me hĩxi me, Xuxankwỳj me. Mehkwỳ jàhtôa itajê pê ihtỳj ajco me Jeju tehcajpa, ne pyjê atajê pê ihtỳj Jeju kôt me ipa catêjê ajco me hamãr to me ipa, ne me hàhcukrêj to mehtehcajpar to me ipa.

Ampo hy kre catê jarẽn xà

⁴Ỹhỹ, pê krĩ jàhtôa pĩn, cute me Jeju pupun prãmte, me cuprõ. Mã Jeju ame cumã ampo to hahkre, ne me cumã hũjarẽn xà jarẽ, quê mempar to impeaj ne, ne me cumã:

⁵― Ỹhỹ, ampo hy kre catê ma hõ pur wỳr tẽ. Ne hỹrmã cator, ne ampo hy kre to mõ. Ne pê ihkre xà ata hane he, pê cama ihcahkũm to mõ. Mã hamre, ampo hy itajê kwỳ prya kam ipijaxwỳr, mã incwỳar pê me pra, mã hanea ne pryjara te ihkwỳ krẽr, mã hamre. ⁶Mã ampo hy ita kwỳ pjê kam kẽnti ata kam ipijaxwỳr, ne huprãj pê incrà pyrentu. Ampo na? Kẽnti kam pjê ita pururure, ne incràre, ne nee inco nare, na ri incrà ne hamre. ⁷Ne ampo hy ita kwỳ hômjĩ me hipe kam ipijaxwỳr itajê, hipe me ajkaam huprãj. Mã hipe te hipej, mã hamre. ⁸Mã hõtpê ampo hy ita kwỳ pjê impejti kam ipijaxwỳr, ne huprãj, ne cati to mõ, ne ipicamẽn to mõ, ne apu ihkà, ne hàhtôa to hàhtô. Ỹhỹ, ca ha me ikam gapac to impejti na, ca ha atỳj me hahkre pej ― hane.

Ampo hy kre catê jarẽn kôt harẽn xà

⁹Mã me cumã hũjarẽn jirô pê, ihkôt me ipa catêjê te mehcukij, ne me cumã:

― Ỹhỹ, ampo to mã ca ame imã hahkre? Gũjarẽn xà jũjê to mã ca ame imã awjarẽ? ― hajỹr. ¹⁰Mã Jeju me cumã:

― Ỹhỹ, quê ha catyt kam Pahpãm me amã ampo cunea to hahkre, ne me amã to capô to impej partu ne. Ne pom Pahpãm me apê ampo cunea jarẽn to amxu atajê, quê ha me amã harẽn to capô partu ne. Na wa ha nee jũmjê atajê mã hirã pê ampo itajê to hahkre nare, wa ha cama me cumã hũjarẽn xà itajê incwỳrpê harẽn to ipa, mãr quê ha cama me ikampa, ne nee me hahkre pej pej nare, ne me rĩt, ne nee me ampo pupun pej nare.

¹¹― Ỹhỹ, wa ha me amã côjkwa kam Inxũ Cati himpej xà jũjarẽn xà pê ampo hy kre catê jarẽn xà itajê capô pa. Ne pom ampo hy itajê pê ihhêj rũm Pahpãm jarkwa pyràac, ne pom pjê kam ipijaxwỳr itajê pê ihhêj rũm, mehĩ pyràac.

¹²― Ne pom pry kam ampo hy pijaxwỳr itajê pê ihhêj rũm jũmjêa pyràc, ne cute me Pahpãm jarkwa par pyrentu. Ne me ahna ahtũm nare mã me pahcurê xwỳn te mentête Pahpãm jarkwa to pôj. Ne ampo na ri cute me to hajỹr? Quê nee hipêr me Pahpãm jarkwa kôt ame ipa nare to prãm to ri, cute me to hajỹr.

¹³― Ne pom pjê kam kẽnti atajê pê jũmjê pyràac, ne cute me Pahpãm jarkwa par, ne kam me hapac to impejti, ne hũrên ame hakry, ne me hũpar kam mehtẽm. Ne me ahna ahtũm nare mã me pahcurê xwỳn te me capi, ne ame to kên, mã cute ahna ame amji jicu, ne me hamre.

¹⁴― Hanea ne, pom hipe kam hômjĩ kam ipijaxwỳr atajê pê jũmjê pyràac, ne cute me Pahpãm jarkwa par pyrentu, ne me hũpar kam mehtẽm. Ne hanea ne me ahna ahtũm nare, mã me caxwãm pê mehkrihkrit te me kam ihtẽm, mã ihtỳj amji to me hakràj cati prãm, ne me hakràj atajêa to hãn ne amji mã me amji kĩn ton to me ipa to prãm. Ne cute me hajỹr itajê te me to hamre. Cwỳrjapê, quê nee jũm ata ihkà ne ampo pejti ton nare.

¹⁵― Ne pom pjê impejti kam ipijaxwỳr itajê pê jũmjê pyràac, ne cute me Pahpãm jarkwa par, ne me hũpar pyrentu, ne Pahpãm jarkwa kôt me mõ. Ne ihtỳj harkwa kôt me hũcanãr to me mõ, ita kam cute me ampo pej jàhtôa ne me ton ― hane. Hõ, Jeju te hũjarẽn to hajỹr.

Hàhcujro xà jarẽn xà

¹⁶Pê cormã Jeju me cumã:

― Ỹhỹ, jũ wỳr quê ha jũm ihpôc xà nõ jàhcujro xà caxuw ihpôc, ne paraj krac ri hãm, nare pàrkwỳc krac ri hãm. Quê nee jũm ihpôc xà nõ to hajỹr nare. Quê ha quêt hàhcujro xà ata pôc ne hãm xàa kam hãm, cute mehcujro mã mencjêj, ne me hàhcujro pupun prãmte. ¹⁷Ne por jũ ri ampo pimxur atajê, quê ha ihtỳj mehpro mẽ, ne me hõmpu. Ne hanea ne awcapàtkô kam ampo pimxur atajê, quê ha ihtỳj me hõmpu, ne me hahkre pej. Ampo na? Ramã hàhcujro xà ata te ihcujro na ri, cute me hõmpun.

¹⁸― Cwỳrjapê ca ha me ikampa, ne ikam me gapac peaj ne. Pom ramã jũm mã ampo ata, quê ha Pahpãm cumã ata jirôa pê, hipêr cumã cugõ, ne por ramã jũm pê ampo kryjre, ne cupê hamreare ata, quê ha ihtỳj hacpỹa mã Pahpãm cupê to pôj pa ― hane.

Pê Jeju menxi me, mehkjêjê ahna me ahcukij

¹⁹Mã hamre, Jeju menxi me, mehkjêjê me, hỹrmã me mõ. Ne jũ wỳr quê cute ahna me hipu tu ita kam hỹrmã me axà. ²⁰Mã jũm te Jeju mã me harẽn to:

― Ỹhỹ, ihmat xà põ pê anã me, me akjêjê me, mehcuhhê ne me gikaj, cute me amã mehcakôc prãmte ― hajỹr.

²¹Mã Jeju mehcunea mã:

― He quêt Pahpãm jarkwa kam me hapac catêjê me, me hũpar to me ipa atajê pê ri ijõ inxê me, me ikjêjê ― hane.

Pê Jeju kôcti to ankrê

²²Ne amcro nõ na Jeju pàr kre mã hàr, ihkôt me ipa catêjê me, mã me cumã:

― Hacme, ne hĩpô jĩkjê mã me rê ― hane. Ne ma me mõ. ²³Ne cormã me irêr to me mõ, mã Jeju jõt, mã kôc pahtỳjti te hàpêr kam ihtẽm, mã ramã cô harô to pra, ne ihtu to pra, ne ihtỳj pàr kre mã incjêj to mõ. Ne tàkam ry cute pàr kre to hipu to mõ, ne ramã mehkên mã me hàr xàa kam me mõ.

²⁴Mã Jeju kôt me ipa catêjê ma hỹrmã me tẽ, ne cute mehcujrõn, ne me cumã:

― Me ijõ Pahhi, cu ramã me papictor xàa kam me mõ ― hajỹr. Mã Jeju jỹr, ne cute kôc me cô mã harkwa to:

― Me ankrê! ― hajỹr. Mã pea kôc me cô pinkrên pyrentu, ne ihcunea pinkrên. ²⁵Mã ihkôt me ipa catêjê mã:

― Ampo na mã ca nee amji mã me ito ahimpej nare ― hane. Mã cute amji mã me ipikrar crire nare, ne ame hũpa, ne me amji mã:

― Pỳhàpà, jũm xũmre mã ajte? Mã ihtỳj ajte kôc me cô te impar ― hajỹr.

Pê Jeju hũmre nõ kam me pahcurê xwỳn carõ kên kwỳ caprã

²⁶Ne ma, Querat catêjê jõ pjê kam, Hĩpôjajo jõ pjê jĩkjê kam me cator. ^27-29Mã Jeju pàr kre pê cator pêê mã hũmre nõ hỹrmã cator, ne cute ihcajpar. Ne pê kam me pahcurê xwỳn kwỳ carõ kên jàhtôa ne cumã acjêj ne kam ihkrĩ. Cwỳrjapê pê ihcakrô apu ipa, ne nee ihkà kam apu ipa nare, ne nee ikre nõ kam ihkrĩ nare, ne ma me harêt xà, pê kẽn kre kam pê ihkrĩ. Ne pê ramã me pahcurê xwỳn carõ kên itajê, hũmre ita mã incjêj to hàhtôa to hàhtô, ne ihtỳj ajco cute amji to kên na cumã hũjahkre to ipa. Pê amji caprỳ to me hũkjê atajê ajco mehpro, ne wakỳre te me huwapre xà to me hũhkra me, mehpar juwapre. Pê ajco ampo carõ kên atajêa me cumã hirên pa, ne ma põ mã haprô ne ajco to ipa. Mã Jeju te hũmre nõ ata kam me pahcurê xwỳn carõ kên pupun, ne cupê cator na cumã harkwa hyr. Mã hamre, hũmre ita te Jeju pupun, ne cute caràr kam ihtẽm, ne cuna mã ihpỳm, ne kỳj cati pêa mã cumã:

― Pahhiti me hirôa pê cati kra pê Jeju, ampo to ca ha me imã? Wa ha me awỳ, ca nee ame ito kên nare ― hajỹr.

³⁰Mã Jeju te ihcukij, ne cumã:

― Jũ mã mã gaprỳ te? ― hajỹr. Mã Jeju mã:

― Ijaprỳ te Me Hàhtôti ― hane. Ne ampo na pê amji jarẽn to hane? Pê ramã me pahcurê xwỳn carõ jàhtôa ne hũmre ita mã acjêj, na pê amji jarẽn to hane. ³¹Mã me pahcurê xwỳn carõ kên itajê kwỳ Jeju na ahwỳa to ahwỳ, mãr quê nee pjê ata tête ihkãkãnti kam cuhyhti ata wỳr mehkujahêc nare.

³²Ne pê curia hàhkà jakôt na crô hàhtôa ne apu hàpàn to ipa. Mã ampo carõ kên atajê te cumã incjêj prãmte ahna Jeju wỳr, quê me to tojnõ, quê crô atajê mã ame acjêj. Mã Jeju te ahna me cumã harkwa, ne me to tojnõ. ³³Mã me pahcurê xwỳn carõ kên jàhtôti atajê cunea me hũmre nõ ata pê cator, ne ma crô mã incjêj. Mã ma cô mã ihprõt, ne hàpkàjti pĩn hĩpô kam ihpỳpỳm, mã cô te hipej tu.

³⁴Mã crô jamãr catêjê te ita pupun, ne ampeaj kam me cumã hũpa. Mã ma hũpate me pra, ne pry me, pur me, krĩ kôt ame harẽn to me ipa. ³⁵Mã cute mempar catêjê ma Jeju pupun prãmte, ma hỹrmã mehprõt. Ne me cator, ne ahna me hàhtêp, ne cute me Jeju te hũmre intête me pahcurê xwỳn carõ kên to pôj ata pupun, ne hõmpun xà ata to amji mã me ipikrar crire nare, ne me cumã hũpa. Ampo na? He hũmre ita aracri ihkàa kam ihcarĩcti jỹ, Jeju cahê na. ³⁶Mã cute me ampo ata pupun atajê te mehcunea mã Jeju te hũmre caprãr ata na harẽn. ³⁷Mã Querat catêjê jõ pjê kam mehcunea mehkrĩ atajê mã Jeju jũpaa to hũpa, mã cute me hõ pjê pê cator na hàhwỳr. Mã Jeju pàr kre mã hàr.

³⁸Mã hũmre pê ampo carõ kên japôj ata te Jeju na hàhwỳr, ne cumã:

― Ito tojnõ, wa akôt mõ ― hajỹr.

³⁹Mã Jeju cumã:

― Hãpà, ca ha amji jaxà, ne ma gũrkwa wỳr tẽ, ne me akwỳ wỳr acato, ne me cumã Pahpãm te ato impej na amji jarẽ ― hane. Ne ma ihkôt me ipa catêjê me, me mõ. Mã ma hũmre ita krĩ cunea kôt Jeju te cumã ampo pejti ton xà ata na me cumã amji jarẽn to mõ.

Pê Jajrô ihkra caxuw Jeju mã akij

⁴⁰Mã ma Jeju te hĩpô jĩkjê wỳr amji jaxàr. Mã curi mehcunea jàhhuc. Ne por curi ame Jeju jikaj to me ipa atajê, cute amji jaxàr xà pyrên ame hakry. ⁴¹Mã hũmre nõ japrỳ te Jajrô hỹrmã cator, ne cupê Juta catêjê te me cuprõn xà kam me to ihhimpej catê, krĩ ata kam. Ne Jeju wỳr cator, ne cuna mã ihpỳm ne cute ahna hàhwỳr, mãr quê hũrkwa wỳr mõ. ⁴²Ampo na ri cute to hajỹr? Nee mã ampo na nare, cumã ihkra cuprỳre pyxit peaj na caku te tôxi ata caxuw ri, cute to hajỹr. Pê cupê hà ne ramã ihtyc xàa kam nõ na pê. Mã ma Jeju ihkôt mõ. Mã me hàhtôa ne ihkôt me mõ, ne me hĩ to amji wỳr me Jeju kujahêc to me mõ.

⁴³Mã me hàhtôti ata catàtkre na cahãj nõ ata cator, ne pê cahãj ata ramã hà ita na ahna caku tôxi, mã hà ita na ipa. Pê ajco caprô ajxwỳ, pê ramã amji na caj jàhtôa ne cumẽ, pê tee ame caprã, pê nee impej nare. Pê cama amji na ramã hõ pore cunea rẽn pa, ne nee impej nare. ⁴⁴Ne Jeju kôt mõ, ne cute ahna hàhtêp tu, ne hõ kôt ahna hitô kà cyt. Mã caprô crà pyrentu.

⁴⁵Mã Jeju te mehcukij to:

― Jũm te mã ikà cyt? ― hajỹr. Mã mehcunea amji na me hàprãr pit, mã Petrô cumã:

― Pỳhàpà me ijõ pahhi, pom mehcunea apu ajpẽn wỳr me hĩ to me akujahêc to me ipa ita? ― hane.

⁴⁶Mã Jeju me cumã:

― Jũm te icyt, mã ipê icarôt cator, wa ite amji cajpẽr ― hane.

⁴⁷Mã cahãj ata te cupê amji to ipimxur nare na amji jahkre pej, ne ma Jeju wỳr ihtertet to mõ, ne mehcunea jipôc ri, cuna mã ihpỳm, ne cute ihcyt na cumã amji jarẽn. ⁴⁸Mã Jeju cumã:

― Ikra, ca ate ito amji mã ahimpej to hajỹr, cwỳrjapê ri ramã apej. Na ca ha apej pêa mã mõ ― hane.

⁴⁹Ne cormã Jeju apu cumã ihcakôac kam, mã Jajrô wỳr cumã hàpên catê ata cator, ne cumã:

― Ijõ pahhi, hamre, ramã akra cuprỳre ata tyc, na ca ha nee hipêr apu Jeju cahpêrkàr to amõr nare ― hane.

⁵⁰Mã Jeju te kam hapac, ne Jajrô mã:

― Apu pa nare, ne cama ito pit mã amji mã ahimpej, quê ha ihtỳj amã akra impej ― hajỹr.

⁵¹Ne ma curi Jeju cator, ne amji kôt Petrô me Jowãw me Tijac me, me to hàr, mã nee mehkôt hũm me inxi me, jũmjê xàr nare. ⁵²Pê mehcunea ikre kam ame amrã, ne me hàhkrihkrit catia to cati, pê ramã cuprỳre ata ty na pê ame amrãhti. Mã Jeju te me cumã:

― Hamre, me acwỳr jicu, he nee cuprỳ ita tyc nare, ne cama nõ ne gõr ― hajỹr.

⁵³Mã mehcunea, cute me cuprỳ ata tyc na me hahkre peaj xà na ame cumã. ⁵⁴Mã Jeju hỹrmã mõ, ne cute hũhkra na ipyr, ne kỳj cati pêa mã cumã:

― Cuprỳ ita, to xa! ― hajỹr.

⁵⁵Mã cuprỳ ita hacpỹa mã ihtĩr, ne hãm pyrentu. Mã Jeju te cumã harte na me cumã harkwa. ⁵⁶Mã hũm me inxi te amji mã ipikrar, ne me cumã paa to pa, mã Jeju te me cumãn, quê nee jũm mã hacpỹa mã cuprỳ ita tĩr na me harẽn nare.

Jeju kôt me ipa catêjê te tôxi jàpên xà

¹Amcro nõ na Jeju te ihkôt me ipa catêjê mã hàkjêr, ne cute me cumã harkwa hyr to:

― Ca ha ma krĩ kôt me ajcrà, ne me kam me pahcurê xwỳn carõ kên atajê, ca ha mentête mehcunea japôj, ne me hà catêjê cunea caprã ― hajỹr. Ne cute ampo na me cumã hũjahkre ata caxuw carôt tỳj catia ne hõr. ²Ne cute me cumã harkwa, quê mehcunea mã Pahpãm pê Pahhiti na me harẽn to me mõ, ne hanea ne me hà catêjê caprãr to me mõ.

³Ne cute me cumã harẽn to hajỹr he:

― Ỹhỹ, ca ha nee amji mã ampo catia tur nare. Ne nee pĩ cajrer to ame aprar nare, ate ahna me amji cajpar xà caxuw. Ne nee akàhà me, me gõ me, ihpore to me aprar nare. Ca ha me akatkà pyxit peaj to me pra, ne nee amehkwỳ incwỳr nare. ⁴Ne ca ha jamã ne krĩ mã me gapôj, ne jũ ri ikre kam, cute me guwahi xà ata ri ame apa, ne ahnaa krĩ ata pê me gapôj. ⁵Quê ma krĩ nõ kam ame acurê, ca ha cupê me gapôj pyrentu. Ne me gapôj xà wỳr hãn ne me apar tête me pro jacrô capĩ, ne me hũrê. Ne me hũrêan kam me cumã gũjarẽn to hane he: “Ỹhỹ, ca nee me gũpar nare, ne nee me ipar nare ijũjarẽn xà ita na, cwỳrjapê wa ha nee hipêr ita ri ame imõr nare!” hane ― hajỹr.

⁶Mã ma ihkôt me ipa catêjê cahkũm, ne ame pra, krĩ kryjre cunea kôt, ne me Pahpãm jarkwa pejti jarẽn to ame ipa. Ne pjê cunea kam me hà caprãr to me ipa.

Pahhi pê Heroti pê amji jahkre kêatre

⁷Pê Heroti pê Hĩpôjajo jõ pjê jõ pahhi, ne ajco Jeju te Pahpãm carôt kôt ampo pihho jàhtôa ne ton atajê na harẽn pa. Ne hũpar xà atajê na, cupê amji jahkre kêatre. Pê ajco ame cumã hũjarẽn to hane he:

― Ỹhỹ, Jowãw xwỳ te me cumrãr catê ri hacpỹa mã ihtĩr ― hane.

⁸Pê ajco mehkwỳ me hũjarẽn to, quê Erij xwỳ te ri amji pẽr, nare, mam Pahpãm jarkwa to ihcakôc catê nõ ata mõrmõ hacpỹa mã ihtĩr. ⁹Pê pahhi Heroti ajco taa amji mã:

― Pỳpỹn, pê wa pa Jowãw xwỳ krã jakep na ijarkwa ta, pê me hakep ta? Ne mẽr jũm xũmre mã ajte? Pom wa ampo itajê na harẽn pa ita? ― hane. Ne tee pahhi Heroti apu Jeju pupun prãm.

Pê Jeju me hàhtôa mã harte

¹⁰Mã ma Jeju kôt me ipa catêjê te me amji jaxàr, ne Jeju mã cute me ampo cunea ton atajê na me amji jarẽn partu. Mã ma Jeju te me haprôr, krĩ jacot japrỳ te Tep jõ krĩ ita wỳr, ne ahte curi ame ipa xà. ¹¹Mã me hàhtôti atajê te mempar, ne ma me hũnãr. Mã Jeju te ihtỳj me ahna amji caxàr, ne me cumã Pahpãm pê pjê cunea jõ Pahhiti na harẽn, ne cute me amji caprãr prãm catêjê atajê caprãr.

¹²Mã ramã caxwa xàa kam, mã ihkôt me ipa catêjê te tôxi atajê ma hỹrmã me pra, ne me cumã:

― Ỹhỹ, ca ha me cumã quê ame ajcrà ne ihtỳj ame pra, me pahcahê na krĩ kryjre apu ihcuhhê itajê kôt, ne curia quê ha ame apà, ne curia ame ahtwỳ, nãmri ita ri põ pê ampo hamreare ― hane.

¹³Mã Jeju me cumã:

― Ca ha me caa me cumã harte ― hane. Mã me cumã:

― Pỳhàpà, ampeaj kam me hàhtôa to me hàhtô, ne me pamã kwỳr te pro te xĩc peaj ne tep pijakrut peaj ita kam, jũ wỳr quê me catwỳ. Ca ha pijamã me hàhtôti itajê mã ite ihpore to me hõ japrôr na me ito? ― hane.

¹⁴Pê curi me hũmre me hàhtô na me mir to xĩc, mã Jeju te ihkôt me ipa catêjê mã harkwa hyr, ne me cumã:

― Ame cumã, quê ame amji jakrã ne amehkrĩ. Quê ahpỹanre na ame xĩncwẽnta partu ne amehkrĩ ― hajỹr.

¹⁵Mã ihkôt me ipa catêjê te mempar, ne cute me cumãn, mã cute ahpỹanre na me amji jakrã ne amehkrĩ. ¹⁶Mã Jeju te kwỳr te pro te xĩc itajê, me tep pijakrut atajê incwỳr, ne kàj mã côjkwa wỳr to irĩt, ne Hũm Cati mã to ihcakôc. Jirô pê mã ri cute kwỳr te pro kryj, ne tep pijakrut ita kryj, ne ihkôt me ipa catêjê mã hõr, mãr quê ame cumã me cugõ. Mã cute ame cumã me hõr. ¹⁷Mã amehcunea jàpàn, ne ame harte partu. Mã ihkôt me ipa catêjê te me hõ cahhur to me kàhà to tôxi ne me to hipu.

Pê Petrô Jeju jarẽ

¹⁸Ne amcro nõ na Jeju ahte mehkwỳ to pit mã cator, ne apu Hũm mã ihcakôc, mã ihkôt me ipa catêjê te me hàhtêp. Mã cute mehcukij, ne me cumã:

― Jũ mã mã me hàhtôti atajê ito amji kam me hapac to? ― hajỹr.

¹⁹Mã me cumã:

― Mehkwỳ me garẽn to, apê Jowãw xwỳ te me cumrãr catê ata, ne mehkwỳ me garẽn to, apê Erij pê rỳ pêa mã Pahpãm ihtĩar to api ata, ne mehkwỳ me garẽn to, apê mam Pahpãm jarkwa to mehcakôc catêjê nõ, ca hacpỹa mã atĩr ― hane. Mã Jeju me cumã:

²⁰― Ne me ca? Jũ mã mã ca ito amji kam me gapac to? ― hane. Mã Petrô cumã:

― Apê Crixtô, ne apê, pom pê Pahpãm me panquêtjê mã jũm to awjahkre ata mã ca ― hane.

Pê Jeju ihtyc xà me hacpỹa mã ihtĩr xà na amji jarẽ

^21-22Mã Jeju te me cumã harkwa hyr, ne me cumãn, quê nee cormã ne jũm mã ita na me harẽn nare, ne hanea ne me cumã:

― Ỹhỹ, wa ha ipê me Ahàkà cati, cormã jũmjê jũhkra kam amji pupun xà kêanre to amji pupu. Quê ha Juta catêjê pê prohkam atajê ma ame ipê Ahàkà curê. Quê ha hanea ne me cuxà Pahpãm mã mehcajrẽn catêjê jõ pahhi kwỳ me, me cumã Mojxe xwỳ jõ kàhhôc to hahkre catêjê me, ma ame icurê. Quê ha me Ahàkà ty, ne ahna amcro incrê jirô pê hacpỹa mã ihtĩr. Na wa me amã awjarẽ.

²³― Ỹhỹ, quê ha jũm mã ikôt amji ton to prãm na, quê ha amjia kôt apu ipa jicu, ne ikôat amji kampa, ne icuxà amji mã ihtyc cupa nare to ipa. Quê ha jũm ata pê ihhêj rũm cute amcro cunea kam hõ pĩ na ihtyc xà ata japjêr to ipa.

²⁴― Ỹhỹ, quê ha jũm te amji to ipijapar prãm to, cama apu amji jamãr to ipa na, quê ha ihtỳj ty. Ne por quê ha quêt jũm icwỳrjapê ty ata, quê ha icahê na ihtĩr na ipa rohnỳtti mã.

²⁵― Xà quê ajkĩ jũm pjê cunea kam amji mã ampo pejti atajê cunea to hõ tekjê xà caxuw to cuprõ, ne nee iràn xà na Pahpãm to amji kam hapac nare, ne ihkaj na apu ipa ne ahnaa ty, quê ha pijamã cute ampo pejti to cuprõn atajê cunea, ihtyc jirô pê ihtehcajpa? Hãpà, quê ha cama amji to acto, ne nee Pahpãm cahê na amji to ipijapar nare.

²⁶― Ne por quê ha jũm ijũ na apu ihpahàm, ne hanea ne ite ampo to hahkre xà ita jũ na apu ihpahàm na, quê ha ipê me Ahàkà hanea ne jũm ita jũ na apu ihpahàm. Por côjkwa pĩn me Ahàkà te Pahpãm pê Pahhiti mã me ipijapu catêjê jàhcujro impejti ata to cute amji jaxàr xà ata kam, quê ha hanea ne apu jũm ita jũ na ihpahàm.

²⁷― Ỹhỹ, me ikampa, ne me ipar xà ita to amji japackrea ne, he wa nee me amã ihêj xi xàa jarẽn nare. He ca ha me anõ atỳj atĩar kam Pahpãm te ihhimpej xà ata na hõmpu ne cormã ty ― hajỹr.

Jeju me Mojxe xwỳ me Erij

²⁸Ne amcro te xet jirô pê, Jeju te Petrô me Jowãw me Tijac me, me haprôr. Ne ma kẽn nõ ita wỳr me to mõ, ne cute Pahpãm mã ihcakôc prãmte, hàhkà jakôtti nõ na me to hàpir. Ne curia Hũm Cati mã ihcakôc, mã ihkôt me ipa catêjê jõtxwa te me kam ihtẽm, mã ihtỳj me hikwa ne ame gõr.

²⁹Mã cormã Pahpãm mã ihcakôac kam, Jeju kuc pintuw ne ihkà te amji to hakati, ne ihpràti. ³⁰Mã côjkwa pĩn me hũmre pijakrut pê Mojxe xwỳ me Erij te amji to me ipipẽ, ne me cumã ihcakôc kam ihtẽm. ³¹Ne pê ajwar mempeaj to mempej, ne me ipu na côjkwa pĩn hàhcujrohti ita impejti. Ne ame Jeju mã, por quê ha putwrỳ nõ na Krĩpinkrên kam ihtyc xà ata to mehcakôc.

³²Mã Petrô na mehkwỳ ramã ame hõtxwa mã ame hikwa, ne amentohkà to ipijapỳn, ne ihprõt pê ame ipimprar, ne cute me Jeju jàhcujrohti ata pupun, ne hanea ne cahê na ajwar me xa atajê pupun. ³³Mã me hũmre pijakrut atajê te me Jeju mã ihcakôc jicu xàa wỳr, mã Petrô te Jeju mã:

― Me ijõ Pahhi, ita ri me pahkrĩ na ri imãa impejti, na wa ha me amã ikrere nõ xãm, ne Mojxe xwỳ mã mehnõ xãm, ne Erij mã mehnõ xãm ― hajỹr. Ne pê Petrô ihtỳj xa ne apu ihcakôc, ne nee ihcakôc xà ata na amji par nare.

³⁴Ne cormã Petrô apu ihcakôc kwỳa kam, mã ahcakrã cator, mã ihkôt me ipa catêjê mã ampeaj kam ahcakrã te mehpro ata cupa. ³⁵Mã ahcakrã pĩn cute me jũm jõkre ata par, mã me cumã:

― Hũmre ita pê ikra. Pom pê wa amji mã capi ata. Ne quê hãn ne ihcakôc, ca atỳj me kampa ― hajỹr.

³⁶Ne ihkêt, mã mehcarĩcti, mã ihkôt me ipa catêjê te me Jeju pit pupun, ne nee cute me amcro atajê nõ na, jũm mã cute me ampo pupun xà ata jarẽn nare.

Pê Jeju ahkrare nõ caprã

³⁷Ne amcro nõ na, hàhkà jakôt pê me iwrỳc, mã me hàhtôa ne cute me Jeju cajpar. ³⁸Mã me hàhtôti atajê jipôc ri me hũmre nõ ata te caràr kam ihtẽm, ne kỳj cati pêa mã Jeju mã:

― Pahhi! Wa ha icãmter caxuw ana ahwỳ! ³⁹Nãmri ampeaj kam ikra pyxit peaj ata kêan to kên. Pê me pahcurê xwỳn carõ kên nõ ihpro, pê mõr pejti kam, ihprõt pê caràr kam tẽ, ne amji rẽn kam tẽ, ne ajco ihhàr to ipa, ne apu catàt tỳj, ne harkwa na hàmprô. Ne ampo carõ kên nõ ita apu to kêanre, mã amji cahhy, ne nee jũ caxuw rỳ cute to tojnõ nare. ⁴⁰Ne wa ramã amji caprỳ to ite akôt me ipa catêjê mã harẽn ne me ahna ijàhwỳr, cute ampo carõ kên ita to pôj prãmte, mã nee cute me to pôj nare. Ne jũ wỳr quê ame amji mã hamã, ne intête me cator ― hajỹr.

⁴¹Mã Jeju me cumã:

― Pỳhàpà, ampeaj kam ri pjê ita kam, me acunea kêanre. Ca nee ajte ito amji mã me ahimpej nare ita kam, xà wa ha itỳj ajkĩ me amã awcanã? Jũ mã wa ha ajte ne awcanã, ne me acahê na jũ mã amji to amcro to? ― hane. Ne cute hũmre ata mã:

― Ajpên acãmter to mõ ― hajỹr.

⁴²Mã cute Jeju wỳr me haprôr, mã me pahcurê xwỳn carõ kên ita te hipêr pjê kam ihkra ita mẽn. Mã Jeju te carõ kên ita mã harkwa hyr, quê cupê cato. Mã hamre, cupê cator pyrentu, mã ihkra ita capẽn pyrentu. Mã Jeju te hũm mã hõr. ⁴³Mã mehcunea te Pahpãm carôt catia ata to amji mã me ipikrar.

Pê Jeju hipêr ihtyc xà na amji jarẽ

Ne ma cormã Jeju te ampo ton xà ata to me amji mã me ajkra, mã Jeju te ihkôt me ipa catêjê mã hũjarẽn to hajỹr he:

⁴⁴― Ỹhỹ, ikam me gapac to impeaj ne. Quê ha jũ caxuw jũmjê ihtỳj Ahàkà cati curê xwỳn jũhkra mã me cugõ ― hajỹr.

⁴⁵Mã nee cute me ita par pej nare, ne nee me hahkre pej nare. Cute me hahkre pej xà ita me cupê ipimxur tu ne nõ ita kam, jũ wỳr quê me hahkre pej. Ne mehpahàm cupate nee cute ampo ata na me Jeju cukij nare.

Pê Jeju amji jirôa pê jũm cati kôt harẽ

⁴⁶Mã ihkôt me ipa catêjê te ajpẽn jirôa pê me cati to ajpẽn mã mehcakôc kam mehtẽm. ⁴⁷Mã Jeju te ramã, por ampo to ame amji kampa ata na me hahkre pej. Na ri cute ahkrare nõ ita pỳn, ne amji cape na hãm, ne me cumã:

⁴⁸― Ỹhỹ, me ahkrare nõ ita pupu he, incrire ne capônỹre. Ne imã quêt ahkrare ita cati, ne ihkĩnte me acunea kryjre. Ne quê ha jũm te icwỳrjapê ahkrare nõ ita na amji caxàr na, quê ha hanea ne ina amji capa. Ne quê ha jũm te ina amji caxàr na, quê ha hanea ne cute ajpên ikujahêc catê ata na amji capa. Ne por me akam me gapyre mã mehkryjre atajê ri, imã me catia to me cati ― hajỹr.

Jeju tehcajpar catê nõ

⁴⁹Mã Jowãw Jeju mã:

― Ỹhỹ, me ijõ Pahhi, wa ite me hũmre nõ ita pupun, mã ihtỳj gaprỳa to ame pahcurê xwỳn carõ kên to pôj to mõ. Wa ite ahna me hõmpun ne me cupê ihcahpêrhyr. Ampo na? Nee cupê me pahkwỳ nare na ri ― hane.

⁵⁰Mã Jeju me cumã:

― Nee ca me jũm ita cahpêrhyr nare. Ampo na? Quê ha jũm nee ame ato kên nare na, quê ha ihtỳj me atehcajpar to ipa ― hane.

Pê jũmjê itajê nee Jeju na me amji caxàr nare

⁵¹Mã ramã côjkwa wỳr Jeju jàpir xà jõ amcro na hàhtêp to mõ. Cwỳrjapê ri Jeju te Krĩpinkrên wỳr amji kràr. ⁵²Ne cute mam ihkôt me ipa catêjê nõ kujahêc. Ne ma me mõ ne Krĩrĩtpej jõ pjê kam, krĩ jacot ata na me cator, cute me hàhhuc xà to me hàhcuprõn prãmte. ⁵³Mã xãmte curi mehkrĩ catêjê atajê ma ame Jeju na amji caxàr caca. Ampo na? He cute me Jeju te Krĩpinkrên wỳr ihkràr na me hahkre pej na ri. Pê ajco Krĩrĩtpej jõ pjê kam mehkrĩ catêjê atajê ma ame Juta catêjê curê, na pê ma ame Jeju na me amji caxàr caca. ⁵⁴Mã Tijac me Jowãw te ita na mempar, ne me Jeju cukij to:

― Xà ajkĩ amã ite côjkwa pĩn cuhy pỳm na ijàhwỳr, mã cute krĩ ita kam mehcunea to caxàr na me ito prãm? ― hajỹr. ⁵⁵Mã Jeju ihkôt me ipa catêjê wỳr ipipkjêr, ne hõtpê me kam incàcàcre, mã me cumã:

― Me apê ite amji kam ijapac xà na ijahkre kêatre. Ampo na? He nee me Ahàkà ita me hipej xà caxuw mehwỳr cator nare, ne me hũtàr xà caxuw ri mehwỳr cator ― hane. ⁵⁶Ne ma krĩ jacot nõ ita wỳr me mõ.

Pê Jeju kôt mehkwỳ ame ipa prãm

⁵⁷Mã Jeju ihkôt me ipa catêjê me, me mõ, mã mam jũm xũmre nõ me hỹrmã cator, ne Jeju mã:

― Ỹhỹ, wa ha itỳj ma akôt mõ, ca ha jũ ri tẽ, wa ha ma akôt tẽ ― hane.

⁵⁸Mã Jeju cumã:

― Xà ca ha pijamã awcanã? He hõtpê xore mã ihkre, mã kam ihkrĩ, ne hõtpê cuwênre mã hahê, mã kam hikwa, ne ihkĩnte ipê me Ahàkà pê hũrkwa kam hàhhuc xà caxuw hamreare ― hane.

⁵⁹Ne ihkôt Jeju te ihnõ cator ata pupun ne cumã:

― Mẽr ikôt mõ ― hajỹr. Mã cumã:

― Wa ha itỳj akôt mõ, mẽr ito tojnõ wa ha ma amji jaxà, ne inxũ tyc xà na hõmpu ne harêt, ne cormã me akôt mõ ― hane.

⁶⁰Mã Jeju cumã:

― Quêt taa ty, quê ha mehtyc catêjê kwỳa me harêt. Ne ca nare, ca ha quêt ikôt tẽ, ne me cumã Pahpãm pê pjê cunea jõ Pahhiti na harẽn to mõ ― hane.

⁶¹Mã jũm xũmre nõ mehkôt Jeju wỳr cator ne cumã:

― Ỹhỹ, wa ha ma amji jaxà ne tẽ, ne inxê me inxũ mã amji jarẽ, ne me akôt imõr pyrentu ― hane.

⁶²Mã Jeju cumã:

― Quê ha jũm hàpên xà kam apu pjê to ipipkjêr to ihcuhtacti to mõ, ne hacpỹ mã amji jahpan xà rĩt, ne amji pê to hikôt, ne ahna cupê ihkaj na. Jĩkjê na quê ha jũm te Pahpãm pê Pahhiti ata mã hàpên kam ihtẽm, ne cumã hàpên cahtiri cute hicu na, quê ha nee jũm xũmre ata Pahpãm mã hàpên xà caxuw impej nare ― hane.

Jeju kôt me ipa catêjê kwỳ jàpên xà

¹Ita jirô pê mã pê Jeju me hũmre to xetẽnta ne ihkôt me to ajkrut ne me capi, cute amencràn xà caxuw. Ne cute me hũmre to ipijakrut partu ne amehkujahêc par, quê mam ame pra ne krĩ cati me krĩ jacot cunea kôt, por jũ ri Jeju apu ipa prãm ata wỳr, cute amji cumam amehkujahêc. ²Ne me cumã:

― Ỹhỹ, pom me gàpên xà pê Pahpãm wỳr ate me to apipkjêr xà ita pê arỳjhy intep to cuprõn xà pyràac. Ne pur catia to cati, ne ramã inteptu, ne cute me to cuprõn catêjê ri cormã mencrêre. Cwỳrjapê ca ha me pur catihti to hõ tekjê ata na ahwỳ, quê hipêr me amã me to cuprõn catêjê kwỳ kujate. ³Ne wa ha me ato ampo pryre capônỹre atajê kra pyràac, ne rop cahàc jàprêhti atajê cajpuw me akujate. ⁴Ca ha nee ame kàhà cwỳr nare, ne nee amehpore incjên xà me, ihpar kà incwỳr nare. Ne me acatyatre na krĩ wỳr me pra, pom ite me amã krĩ to ihimpej xà atajêa wỳr. Ne nee pry kôt ame gàhhuc, ne cama ame acakôc to me apa nare.

⁵― Ne ca ha krĩ ata kam ikre nõ mã axà, ne mehcajrẽn, ne me cumã: “Hàpà, quê ha Pahpãm ikre ita kam me ato impejti ne, ne me acaxwãm pê me ato acarĩcti ne” hane. Quê ha jũmjê nee cumã amji caxwãm pê amji carĩcti na prãm nare na, quê ha ate mehcajrẽn xà ita hacpỹa ne me awỳr amji jacjê. ⁶Ne por curi me gàhhuc xà nõ ata ri, quê ha jũmjê mã amji caxwãm pê amji carĩcti na prãm na, quê ha Pahpãm ihtỳj jũmjê itajê to mehcarĩcti ne. ⁷Ca ha ikre ata kam me ahtwỳ, ne kaam me apà, ne kaam me ikõ, ne por cute me amã me hõ jõr atajê, ca ha atỳj me ku. Me apê me gàpên catêjê, ne me hàpên catêjê cunea hõtpê ihtỳj me hàpên jahpan xà na me apà, ne me ikõ. Ne ikre kam me gàhhuc xà ata ca ha kam me gàhhuc tu, ne nee atỳj ihkwỳ kôt ame gapôj to me apa nare.

⁸― Ne hãn ne krĩ atajê mã me gapôj, quê me ana me amji to pôj, ne me amã ampo gõ atajê, ca ha atỳj me ku. ⁹Ne curia krĩ kam me hà atajê, ca ha atỳj me caprã, ne krĩ kam atajê cunea mã atỳj gũjarẽn to hane he: “Ỹhỹ, por Pahpãm pê Pahhiti te pjê to ihhimpej xà ata ri, ramã hàhtêp” hane. ¹⁰Ne ca ha jũ ri krĩ nõ kam me acato, quê jũmjê mehkĩnte curi mehkrĩ catêjê ma ame acaca, ne nee me ana amji caxàr nare na, ca ha krĩ cape wỳr me gapôj, ne me cumã gũjarẽn to hane he: ¹¹“Me amã me ipar prãm nare ita kam, wa ha itỳj me ipar tête pro jacrô jũrê, ne me acunaa mã me gõ krĩ ita jacrô capĩ. Quê ha te me amã me ipar prãm nare cakrô, ca ha atỳj Pahhiti te pjê to ihhimpej xà ata te me awỳr cator xà ata to me amji japackrea ne” hane.

¹²― Ỹhỹ, ampeaj kam wa ha me amã awjarẽ, quê ha cute me acukij ne me ato ipicokjêr xàa jõ amcro kam ahtwỳ, quê ha Pahpãm nee krĩ ata caprĩ nare. Ne quê ha krĩ ata jirôa pê cumã Krĩhpôc jõ krĩ wej ata caprĩ ― hane.

Pê Jeju krĩ krã nare atajê kên mã hàr na harẽ

¹³― Pỳj me hêj xi Coraxim jõ krĩ, me Tep jõ krĩ ata, ca ha atỳj amji kên mã me amji jaxà. Ne wa ha me amã mam krĩ wej itajê jarẽ. Pê krĩ wej itajê japrỳ pê Kẽn jõ krĩ me Teppro jõ krĩ. Pê ajco cama ame Pahpãm to kên, pê Pahpãm cute ame to kên jahpan xà na, me hipej tu. Ỹhỹ, ampeaj kam wa ha me amã awjarẽ, quê ha mam krĩ wej atajê kam, pom curmã me akam ame hàpên xà pihho impejti ton to ipa itajê to me apê na mã, quê ha rỳ pêa mã ihkên jicu, ne quêt catyt kam, impejti na ipa, ne caxuw hihô na ipa, ne hipro na ipa, ne ihkà kên na ipa. ¹⁴Ne mehcukij ne me to ipicokjêr xà jõ amcro kam, quê ha Pahpãm mã me girôa pê Kẽn jõ krĩ me, Teppro jõ krĩ caprĩ. ¹⁵Ne ca Capernam jõ krĩ ita, ca atỳj kàj mã, côjkwa wỳr gàpir na amji cãmjĩ cakrô, quê ha Pahpãm ahpar mã akujate, ne mehtyc jaxà kam amẽ ― hane.

¹⁶Ne Jeju ihkôt me ipa catêjê mã:

― Ne por jũmjê me akampa atajê, quê ha hanea ne me ikampa, ne por jũmjê ame acurê atajê, quê ha hanea ne ma ame icurê. Ne por jũmjê me icurê atajê, quê ha hanea ne ma ame Inxũ Cati te ikujahêc ata curê ― hane.

Pê mehkwỳ me amji jaxà

¹⁷Mã ma ihkôt me ipa catêjê te me xetẽnta ne ihkôt me ipijakrut itajê me cutor, ne ma pjê cunea kôt ame ipa. Ne amcro nõa na cute me amji jacjên, ne me hakrya to me hakry, mã cute Jeju mã me amji jarẽn to:

― Ỹhỹ, me ijõ Pahhi, wa me gaprỳ to pôj, mã me pahcurê xwỳn carõ kên kwỳ ihtỳj me ikampa ― hajỹr.

¹⁸Mã Jeju me cumã:

― Ỹhỹ, wa ite me pahcurê xwỳn jõ pahhiti pê Xatanaj ata pupun. Mã côjkwa pĩn ihpỳm xà ita pê ihhêj rũm pahhàjê cuxê pyràac ne ihpỳm. ¹⁹Me ikam gapac to impeaj ne he. Wa ite me amã icarôt catia me, ite amji jahkre pej catia jõr, na ca atỳj gapacta ne cagã me, pacti kam ame gàhhuc to me apa, ne ate atỳj me pahcurê xwỳn pê me carôt to ihpec. Na quê ha nee jũ caxuw ampo itajê nõ me anõ to kên nare. ²⁰Nee ca me pahcurê xwỳn carõ kên te me apar xà pyrên ame gakry nare. Ne quêt Pahpãm te mehkwỳ caxuw me acapi, ne amji mã côjkwa kam hõ kàhhôc kam me gaprỳ nõr pyrên, ca ame gakry ― hane.

Ampeaj kam Jeju jakry

²¹Mã pyt jỹr xà ata kam, Pahpãm Carõ Pejti kôt Jeju jakrya to hakry, mã cute harẽn to hajỹr he:

― Inxũ, apê côjkwa me pjê kam Pahhiti. Ne ate me cupê hahkre kêatre atajê mã ampo pimxur atajê cunea capô, ne me cumã to apipẽ. Ne mehkĩnte ate me cumã hahkre pej catêjê me, cute me amji jahkre pej catêjê pê ampo itajê to apimxur. Ỹhỹ Inxũ, pom ite ampo na garẽn par itajêa to, pê ca ramã amji to ahimpej. Ne imã acaca xà ita cunea impej pit.

²²― Inxũ, ca ramã ate imã ampo cunea jõr. Ne amã pit mã ijahkre peaj to ijahkre pej, ne nee aràn xà na jũm mã ijahkre pej nare. Ne hanea ne imã pit mã gahkre peaj to gahkre pej. Na wa ha jũm mã ato hahkre, quê ha hanea ne jũm ita mã gahkre pej pejti ne ― hajỹr.

²³Ne cute ihkôt me ipa catêjê mã pit mã harẽn, ne me cumã:

― Me gakry, hamre me apej mã me apỳm. Por ate me ampo pupun ata pyrên ca ame gakry. ²⁴Ampeaj kam wa me amã harẽ, Pahpãm jarkwa to ihcakôc catêjê jàhtô, ne pjê jõ pahhi catêjê jàhtô, ne tee ame ampo itajê pupun prãm cakrô, quê me hõmpun nare. Ne me ca nare, ca atỳj me hõmpu ne me kampa. Mã me akĩnte tee ame ampo ita par prãm cakrô, nee cute mempar nare ― hajỹr.

Hũmre pê me hàhkĩj na ihtehcajpar catê

²⁵Mã amcro nõ na me cumã Mojxe xwỳ jõ kàhhôc to hahkre catêjê nõ xãm, cute Jeju capi ne ihkên mã mẽn prãmte ihcukij, ne cumã:

― Ỹhỹ, Pahhi, wa ha acukij, jũ mã wa ha ajte ne Pahpãm cahê na itĩr rohnỳtti mã na ipa? ― hajỹr.

²⁶Mã Jeju cumã:

― Ỹhỹ, pom pê Pahpãm Mojxe xwỳ mã harẽ, pê harkwa kôt ahna ihhôc ita? Ne mẽr ampo ca ate hõ kàhhôc kam cahyt ne kam gapac? ― hane.

²⁷Mã hũmre ita cumã:

― Ỹhỹ, wa ite cahyt, mã harẽn to: “Ca ha ate gĩ cunea me, acarôt cunea me, acaxwỳn cunea me, ate amji kam gapac xà cunea to, amã Pahpãm pê Pahhiti ata ihkĩn. Ne hanea ne amã amji kĩnti ita na, quê amã me akwỳ kĩn” hajỹr ― hane.

²⁸Mã Jeju cumã:

― Ỹhỹ, ca ate to hamãr, ca ha ate ampo itajê cunea ton to apa na, ca ha Pahpãm cahê na atĩr rohnỳtti mã na apa ― hane.

²⁹Mã me cumã Mojxe xwỳ jõ kàhhôc to hahkre catê ita te cute amji mã ihpahàm hi prãmte, hipêr Jeju cukij, ne cumã:

― Mẽr jũmjê mã me ikwỳ itajê? ― hajỹr.

³⁰Mã Jeju te cumã jũmjê pê mehkwỳ atajê to hahkre to impejti prãmte, cumã hũjarẽn xà ita jarẽn, mã cumã:

― Ỹhỹ, hũmre nõ ma Krĩpinkrên pĩn, Krĩcuxwati wỳr iwrỳc. Mã pry cahtiri me hàhkĩj xi catêjê te me kam ihtẽm, ne amehcahhy, ne me cupê ihkà caxàr, ne ma me to mõ. Ne curia cute me hicu mã ihtyc cahàc ne nõ.

³¹― Mã ahna ahtũmre mã hũmre nõ ita pry ata kôt mõ, ne por me hũmre nõ pry kôt mõ ita pê Pahpãm mã mehcajrẽn catêjê nõ. Ne cute hũmre ata pupun, mã pry kam ihcujpàt ne ihtyc cahàc ne nõ. Mã ajte nee cute ihtehcajpar nare, ne cute pry hyr, ne pry jĩkjêa rũm tẽ ne hakren, ne ma mõ.

³²― Mã ahna ahtũm nare, mã ihkôt me hũmre nõa cator. Ne por hapu na cator ata pê Pahpãm jũrkwa jamãr catêjê nõ. Mã ma mõ ne cute hũmre ata pupun, mã ihtyc cahàc ne nõ. Mã cupê mam ihnõ ita pyràac, ne ajte nee cute ihtehcajpar nare, ne cute pry hyr, ne pry jĩkjêa rũm tẽ ne hakren, ne ma mõ.

³³― Mã ahna ahtũm nare, mã me hũmre nõa pry ata kôt mõ, ne curi cator. Ne cupê nee Juta catêjê nõ nare mehkĩnte, ne cupê Krĩrĩtpej jõ pjê catêjê jõ xũmre nõ, ne ihcahkrit. Mã cute hõmpun, ne ampeaj kam cumã caprĩ. ³⁴Mã ahna hàhtêp, ne cute ihtehcajpar pyrentu. Ne cumã inxec ata cuhhõn, ne ampo cacô xỳhti ata to cumã ihcahhê. Ne hanea ne ampo twỳm to cumã ihcahhê, ne cupẽhkà to cumã ihcupu, ne hõ cawrô cahàcre kam hỹr, ne ma to mõ. Ne me hàhhuc xà wỳr to cator, ne curia cute hamãr to apẽ.

³⁵― Ne apẽa kam, cute ikre jõ pahhi mã ihpore hy pijakrut ata to hàmjõr, ne cute cumã: “Hamre, ca ha hamã, ne ahna gõ pore kwỳ rẽ, wa ha hacpỹ ne amji jaxà, ne itỳj amã amgõ” hajỹr ― hajỹr.

³⁶Ne Jeju te me cumã Mojxe xwỳ jõ kàhhôc to hahkre catê ita cukij ne cumã:

― Mẽr hõhõ, imã amji jarẽ, mencrê atajê nõ te mõrmõ jũm xũmre ihtyc cahàc ne nõ ita to amji kwỳ? ― hajỹr.

³⁷Mã cumã:

― Por cumã caprĩ ata te ri hũmre ata to amji kwỳ ― hane. Mã Jeju cumã:

― Mẽr hõhõ, ca ha tẽ, ne cuxà ate amji kam gapac xà to hanea, ne amã me akwỳ kĩn ― hane.

Pê Jeju Martakwỳj me Marijkwỳj pupu

³⁸Ita jirô pê mã pê ma Jeju ihkôt me ipa catêjê me pry kôt me mõ, ne ma krĩ jacot ita mã me cator. Mã curi cahãj japrỳ te Martakwỳj ata te hũrkwa kam me ahna amji caxàr, mã me hàhhuc. ³⁹Mã Marta tõj japrỳ te Marijkwỳj ita Jeju cape na hỹr ne jỹ, ne apu cute ampo to hahkre xà na kampa. ⁴⁰Mã ihkĩnte Marta ikre kam hàpên xà jàhtôti atajê to apu amji to ahtwỳ, ne apu ihkrihkrit, na ri Jeju na hàhtêp ne cumã:

― Xà ca nee ito amji kam gapac nare, pom wa itõj kĩnte ahte ijàpên xà jàhtôti to apu apê ita? Na ca ha ijàpên xà ita caxuw imã itõj kujate, quê itehcajpa ― hane.

⁴¹Mã Jeju cumã:

― Marta, Marta, ampeaj kam ca apu amji to ahtwỳa to amji to ahtwỳ, ne apu akrihkrit, ne to apu amji cahpêrkà. Ne ca atõj kĩnte, gàpên xà to pit mã amji kam gapac to apa. ⁴²He quêt atõj te amji mã ampo pyxit peaj catihti ata capi ata pê ina hỹr, ne cute ikam hapac. Ne jũ wỳr quê jũm cupê ihkrã kam, cute ipar xà itajê to pôj ― hane.

Pê Jeju Pahpãm mã mehcakôc to me cumã hahkre

¹Amcro nõ na Jeju apu Hũm mã ihcakôc, ne cute cumã ihcakôc jicu, mã ihkôt me ipa catêjê nõ te Jeju mã:

― Pahhi, Jowãw xwỳ cuxà me imã Apãm Cati mã me icakôc to hahkre. Pê ajco ihtỳj ihkôt me ipa catêjê mã to hahkre ― hajỹr.

²Mã Jeju me cumã:

― Ỹhỹ, ca ha Inxũ Cati mã me acakôc prãm, ne me gũjarẽn to hane he:

“Me ijõ Inxũ, wa me icunea quêt acatihti ne apejti na, me gahkre pej to prãm.

Ne wa ate pjê kam mehcunea to ahimpej na me prãm.

³Ne ahpỹanre na, amcro cunea kam, me imã me ijõ gõ.

⁴Ne ite me ato kên itajê, ca ha me icuxà to tojnõ ne hicu, ahnaa mã wa ite ramã cute me ito kên atajê to tojnõ ne me hicu.

Ne me ipytà me pahcurê xwỳn pê, quê nee me imã incaca xà kêanre to hahkre nare.

Hamre” ― hane.

⁵Ne Jeju te ihkôt me ipa catêjê mã hũjarẽn xà ita jarẽn, mãr quê cute Pahpãm mã mehcakôc, mã ihtỳj me kampa na me hahkre pej, ne me cumã:

― Me ita to amji kampa, ne ihkôt me hakop. Quê ha me anõ mã gõ ikwỳ nõ nõ, ca ha caxwa cahtiri ahna gàhwỳr xà na hũrkwa wỳr tẽ, ne cumã: “Ikwỳ nõ, imã kwỳr krã to incrê ne agõ, wa ha amcro nõ na hacpỹa mã amã cugõ. ⁶Curmã ihmat pĩn, iwỳr ikwỳ nõ cator, ne ipê cumã ampo jõr xà jamreare, na ca ha imã ihnõ, wa cumã cugõ” hane.

⁷― Quê ha akwỳ nõ ita ikre caxwãm pê amã: “Quê, hamreare, nee ca ame icahpêrkàr nare, wa ramã ite to harkwa jihê, ne ramã me ikra mea mã ame ijikwa, jũ wỳr wa to xa ne amã kwỳr krã itajê nõ gõ” hane.

⁸― Ne ampeaj kam wa me amã awjarẽ, quê ha ate cupê hõt cahpêrkàr cupate, ihtỳj to xa ne amã ate ampo cunea na prãm atajê gõ. Ne nee mã apê hõ ikwỳ nõ cwỳrjapê quê ha amã hõr nare.

⁹― Cwỳrjapê wa me amã awjarẽ, ca ha ate me gàhwỳr na, ca ha atỳj me acwa, ne ate me hapên na, ca ha atỳj me cumã gapôj, ne ate me harkwa cahhyr na, quê ha ihtỳj me amã amji jihê mẽ.

¹⁰― Ỹhỹ, mehcunea ame ampo na ahwỳ atajê, quê ha ihtỳj me cucwa, ne mehcunea ame hapê atajê, quê ha ihtỳj me cumã hapôj, ne ame harkwa cahhy atajê mã, quê ha ihtỳj amji jihê mẽ.

¹¹― Mẽr hõhõ, xà quê me anõ kra tep na ahwỳ, ca ha tep kaj na ajkĩ cumã cagã nõ gõ? ¹²Nare quê akra hĩ xêt kwỳ na ahwỳ, ca ha ajkĩ ihkaj na cumã pacti nõ to irô ne agõ? Jũ wỳr ca me anõ akra to hane. ¹³He me apê me hũmre pit, ne Pahpãm kĩnte me akêanre cakrô, ca atỳj hõtpê me akra mã me ampo pej pit gõ. Mẽr hõhõ, quê ha quêt Pahpãm côjkwa kam ihkrĩ ata, ihtỳj me amã, por ca Carõ Pejti na me ahwỳ ata gõ ― hane.

Jeju me, me pahcurê xwỳn carõ kên jõ pahhi

¹⁴Ne amcro nõ na Jeju ame hũmre nõ pẽrkêt ita pê me pahcurê xwỳn carõ kên to pôj. Pê ampo carõ kên nõ ata nee ajco hũmre ata cakôc na hamãr nare, na pê nee ihcakôc nare. Pê Jeju cupê cator pêê, pê ihcakôc kam ihtẽm pyrentu. Mã me hàhtôti atajê te ahna me hõmpun, ne hõmpun xà ata to cute amji mã me ipikrar. ¹⁵Ne mehkwỳ ajpẽn mã me harẽn kên to:

― Ỹhỹ, Jeju ihtỳj ame pahcurê xwỳn carõ kên to pôj to ipa. He nee me Pahpãm carôt to ame hapôj nare. Ampo carõ kên jõ pahhiti japrỳ pê Perxep pê Xatanaj te ri Jeju mã me caxuw carôt jõr ― hane.

¹⁶Ne cute Jeju kên mã me mẽn prãmte mehkwỳ ihtỳj hipêr mehcukij, cute me kam mare mã ampo pihho catia ton, mã mehcunea te me hõmpun, ne cormã quêt Pahpãm te cumã carôt jõr na me hahkre pej prãmte. ¹⁷Mã ramã Jeju te cute amji kam me hapac xà ata na me hõmpun, ne me cumã ihkôt harẽn to hajỹr he:

― Ỹhỹ, quê pjê nõ kam amehkrĩ catêjê atajê me amji jakrã, ne me taa me ajpu ne ihtỳj me amji jipej. Ne quê ikre ry nõ kam mehkjêjê atajê me, me amji jakrã, ne taa me ajpu, ne hanea ne ihtỳj me amji jipej. ¹⁸Ita pyràc pej ne, quê Perxep pê Xatanaj, pê me pahcurê xwỳn atajê me mehkwỳ me, me amji jakrã, ne taa ame ajpu, ne ihtỳj me taa me amji jipej. Ca me pahcurê xwỳn carõ kên jõ pahhi te imã icarôt jõr, wa carôt kôt ampo carõ kên to pôj na, ame ijarẽ. ¹⁹Ne mẽr jũm te ri me akôt me ipa catêjê mã me carôt jõr, cute ampo carõ kên to pôj xà caxuw? Xà Xatanaj te ri ajkĩ me cumã carôt jõr? He quê ha taa me amã amji jarẽ, ca ha me caa ate me to ihcupan xà ita na me amji jahkre pej. ²⁰Ne ampeaj kam, wa quêt Pahpãm carôat to ampo carõ kên japôj to ipa, cwỳrjapê ri ihkôat ramã me acunea te me Pahpãm pê Pahhiti himpej xà te me awỳr cator na me hahkre pej.

²¹― Ỹhỹ, quê ha jũm xũmre tỳjti mã hàprê xà cunea, quê ha hàprê xà atajêa to amji jamãr to impeaj to ipa, quê ha nee jũm cupê hõ tehkrêj nõ caxàr nare. ²²Nãmri quê ha me hũmre nõ te jũm xũmre ata jirôa pê ihtỳjti na, quê ha kam tẽ, ne to apkjê, ne cupê hàprê xà itajê cunea pytà, ne amji mã cupê hõ tehkrêj cunea pytà, ne ma to tẽ.

²³― Ỹhỹ, quê ha jũmjê te itehcajpar to prãm nare na, quê ha me cupê icuna mã hàprê catêjê. Ne quê ha jũmjê imã ampo to cuprõn nare na, quê ha me cupê ito me ipicràn catêjê.

Ampo carõ kên te amji jaxàr jarẽn xà

²⁴― Quê ha jũm pê me pahcurê xwỳn carõ kên nõ te cator na, quê ha carõ kên ata ma amcràti kam apu ipa, ne apu ihkôt xà japên to ipa. Ne nee ihkôt xà nõ na cator nare, ne taa amji mã: “Wa ha ma, por hũmre jĩ pê ijũrkwa pê icator ata wỳr amji jaxà” hane. ²⁵Ne amji jaxà, ne ihhêj ne ikre caprỳ, ne ihcapõn pejti te hãm na hõmpu. ²⁶Ne ma tẽ, ne cute hirôa pê me pahcurê xwỳn carõ kên te xet atajê japrôr, ne mehcunea ikre pê hĩ ata mã me acjêj, ne curia amehkrĩ. Mã hũmre mã mam ampo carõ kên xàr ata kam, cute amji cajpẽr xà ata jirôa pê kam cute amji cajpẽr xà, ne ihkêanre ― hane.

Pahpãm jarkwa kôat ipa catêjê ri ampeaj kam me hakryti

²⁷Ne Jeju te itajê jarẽn jirô pê mã ri me cahãj nõ te me hàhtôa jipôc ri kỳj cati pêa mã, cumã harkwa to:

― Jeju ampeaj kam apej. Ne mõrmõ pê ca anã kam apỳm ata ihtỳj ajco ato pijahô, ne ampeaj kam apejti ita kam apyrên hakry ― hajỹr.

²⁸Mã Jeju cumã:

― He cute me Pahpãm jarkwa par ne me hũpar tu, ne ihkôat me ipa catêjê atajê ri, inxê jirôa pê me hakry ― hane.

Pê Jeju ampo pihho catihti na me hàhwỳr catêjê mã cawpa

²⁹Mã me hàhtôa te Jeju pu na me cuprõn tu, mã cute me cumã ihcakôc kam ihtẽm, ne me cumã:

― Ỹhỹ, amcro ita kam me apê Juta catêjê, ca pjê kam ame akrĩ atajê cunea kêanre. Na ca ajte me ina gàhwỳr to me hane he: “Me imã ampo pihho catihti me ampo pejti to, wa ha me hõmpu, ne cormã Pahpãm te akujahêc na me gahkre pej” hane. Cakrô wa ha nee me amã ampo pihho catihti, impejti atajê nõ ton nare. Ne wa ha cama amji to irô, ne me amã Jona xwỳ jarẽn xà ita jarẽ. Ampo na? He ipê hũràac, na wa ha me amã harẽ.

³⁰― Ỹhỹ, pê me cumã Pahpãm jarkwa to ihcakôc catê na Jona xwỳ ata ipa, ne ma Ninew jõ krĩ catêjê wỳr tẽ. Ne curi mehkrĩ catêjê mã Pahpãm jarkwa jarẽ, por pê Pahpãm Jona mã harẽn xà atajêa na me cumã harẽn pa. Na quê ha me Ahàkà Jona xwỳ cuxà ita kam amehkrĩ itajê mã Pahpãm jarkwa jarẽ. ^31-32Ne Pahpãm te mehcukij ne me to ipicokjêr xà jõ amcro kam, quê ha Ninew jõ krĩ kam mehkrĩ catêjê me acuna mã me hãm pyrentu, ne ame ana mehcakôc kêanre ne, ne ihtỳj me acurê mã me amẽ. Ampo na? Pê Ninew jõ krĩ catêjê atajê ihtỳj me ampo kên ton jicu, pê Jona xwỳ me cumã Pahpãm jarkwa jarẽn xà atajê kôt, pê me hicu. Ne wa ampeaj kam me amã amji jarẽ. He ipê me Ahàkà, wa amcro ita kam, pjê ita kam apu ipa, ne me Ahàkà ita ri Jona xwỳ jirôa pê cati. Ne ihnõ xwỳjê, pê Juta catêjê jõ pahhi pê Xarômãw xwỳ ita, me cupê pahhi catêjê kwỳ jirôa pê amji jahkre pej. Mã me cupê pahhi catêjê jàhtôa ne hỹrmã me cator, cute cukwa kam ame ampo jahkre pej prãmte. Ne pê cô cati jĩkjê rũm pjê xa ata jõ pahhikwỳj cahãj, ne ma Xarômãw wỳr tẽ, cute krã kre te amji jahkre pejti to hahkre xà atajê na impar prãmte. Ne Pahpãm te mehcukij ne me to ipicokjêr xà jõ amcro ata kam, quê ha pahhikwỳj cahãj ata, ihtỳj me acuna mã ihcakôc kêanre, ne me acurê mã me amẽ. Ampo na? He amcro ata kam, pjê ita kam, ipê me Ahàkà ihtỳj me amã ampo itajê to hahkre to ipa, ne pa wa Xarômãw xwỳ jirôa pê icati cakrô, ca nee me ipar prãm nare.

Pahte amji kam me pajapac xà pejti pê hàhcujro xà

³³― Ne ihnõ xwỳjê, jũ wỳr quê jũm hàhcujro xà nõ pôc ne hãm xà kam hàhcujro impejti kaj na hãm, ne jũ wỳr quê paraj krac ri hãm. Quê ha quêt hàhcujro xà ata xãm xàa kam hãm, quê ha mehcunea me acjêj atajê hàhcujro kam me irĩt pejti ne.

³⁴― He me panto pê me pajĩ mã hàhcujro xàa. Quê ha me panto irĩt pejti, ne ampeaj kam me pajĩ kam me pamã me pajàhcujro hipu. Nãmri quê ha me panto te ihkêanre na, quê ha me pajĩ cunea kam awcapàtkô. Jĩkjê na ca ha ite amji kam ijapac xà pejti pupu, ne mehkôpĩ ne ihkôat me apa na, ca ha atỳj kam me gapac to me apa. Nãmri ca ha ate me hajỹr nare na, ca ha atỳj ame apa, ne me apê amji jahkre kêatre ne.

³⁵― Cwỳrjapê ca ha ma me amji jamã, ne ma ihhêj rũm me gĩ kam me gàhcujro xà ita jamã, côt mã ca gàhcujro xà ata to amji pê kam awcapàtkô. ³⁶Quê ha me gĩ cunea kam hàhcujro xà ita te me ato hipu na, quê ha nee me gĩ kam awcapàtkô nare, ne me gĩ cunea kam hàhcujro ita ihpràti ne. Ne ihhêj ne me acaxwãm pê hàhcujro xà nõ xa ne ahcujro ― hane.

Pê Jeju Parixêw catêjê nõ jũrkwa kam apà

³⁷Mã Jeju te ihcakôc jicu, mã Parixêw catêjê nõ te hũrkwa ri hàpàn prãmte hator. Mã ma Jeju ihkôt mõ, ne hõ pyxwỳr xà na hỹr. ³⁸Pê nee Jeju Parixêw catêjê te me amji ton xà ata kôt, hũhkra cuhhõn nare. Mã Parixêw catêjê nõ ita te, cute nee hàpàn xà wỳr hũhkra cuhhõn nare ita na hõmpun, ne to amji mã ipikrar.

³⁹Mã Jeju te me cumã:

― Ỹhỹ, me apê Parixêw catêjê, ca nee ampo caxwãm pê me to amji japackre nare, ne põ rũm pit mã me to amji japackre. Ca põ rũm me gõ cuhkõn me, me gõ incrat catut cuhhõn to pit mã me amji japackre. Ne me caa, põ rũm pit mã me ate me gàhcukrêj cuhhõn ata kĩnte, me acaxwãm pê me akên te me ato hipu tu. Cakrô ca ajte nee me acaxwãm pê ate amji kam me gapac xà kên itajê to me amji japackre nare.

⁴⁰― Ne ampeaj kam ca ame ato kam waj, ne pom Pahpãm te põ rũm aton ita te ri hajỹar ne acaxwãm pê aton. ⁴¹Ne gapacta ne me gõ incrat caquẽc cuhhõn to me gapac kêt, me akõm xà me. Ne impejti ita ri quêt me amã impej he, ca ha me gõ incrat kam ampo itajê me, me akõm xà kam ampo itajê, ca ha me cupê hamreare atajê mã me agõ. Ca ha ate me cupê hamreare atajê caprĩ na, quê ha põ rũm ampo itajê cunea me amã ihtetetti ne.

⁴²― Pỳj me hêj xi Parixêw catêjê kwỳ! Ca ha atỳj me akên mã me axà ne me gamre! He pê ihtỳj Pahpãm me amã ampo cati me ampo kryjre ton na awjahkre. Na ca gõtpê Pahpãm mã, por ca ihcunea to me ajpa atajê jĩkjê kryjre ne me agõ. Pom ca pàrhyre me, ampo kwỳ na kyre pê hĩ jàhwỳr atajê pyxit ne hãn ne me cumã agõ, ne icahhur to me gõ tekjê na ri Pahpãm mã impej. Cakrô, ca nee me akwỳ to impej nare, ata pê me amã Pahpãm kĩn nare. Na ri Pahpãm mã, me ate amji kam me gapac xà itajê na me akam, cupê ihkaj na. Ampo na? He cumã ampo ita catia to cati, ihkryjre itajê jirôa pê. Na ri cumã me ate ajwar me ton na, me ato prãm.

⁴³― Pỳj me hêj xi Parixêw catêjê kwỳ! He ca gõtpê me hũjamãr catêjê catia krĩ xà ata kam me cahê na me akrĩ prãm, ate me cuprõn xà kam. Ne ca gõtpê krĩ cape na cute me apejti na me garẽn na me to prãm.

⁴⁴― Pỳj me hêj xi! He me apê mehtyc kre kam me hikwa, mã nee me hõmpun ne me hahkre pej nare kam, incwỳrpê me pra atajê pyràac. Ne ihhêj ne põ rũm me apejti, ne me acaxwãam pê ate amji kam me gapac xà kên pit apu hikwa ― hajỹr.

⁴⁵Mã me cumã Mojxe xwỳ jõ kàhhôc to hahkre catêjê nõ hanea ne curi jỹ, ne cute Jeju jũjarẽn xà ita kam hapac, ne cumã:

― Pỳhàpà, Pahhi, ca acakôc xà ita to ate acakôc ne hanea ne me ixũn ― hajỹr.

⁴⁶Mã Jeju cumã:

― Pỳj me hêj xi me apê me cumã Mojxe xwỳ jõ kàhhôc to hahkre catêjê! Ca hãn ne mehcunea mã harẽn to hajỹr to me apa ne me cumã: “Ỹhỹ, ca ha atỳj Pahpãm jarkwa cunea kôt me apa. Nãmri ca ha nee ihcunea na, catyt kam ihkôt me apa nare, quê ha ihtỳj Pahpãm me ato kêanre ne” hane. Me gũjarẽn xà itajê ihtỳaj to ihtỳj, ne cupê ihhêj rũm ate me kam me hõ kàhà pytĩa pyxwỳr. Jũ wỳr quê jũm awcanã, quê jũm hũcanãr nare. Ne por ca ihhêj ne nee me to ipa xà caxuw gũhkrahhi pyxit to mehtehcajpar prãm nare ata pê nee ate Pahpãm jarkwa na mehtehcajpar, mã catyt kam ihkôt me ipa xà nare.

⁴⁷― Pỳj me hêj xi! He ca ha atỳj me akên mã me apỳm! Ne ca gõtpê Pahpãm jarkwa to mehcakôc catêjê tyc atajê jarêt xà caxuw me cumã kre pejti to. ⁴⁸He ca atỳj me aquêtjê japua na ita to me hajỹr to me apa, ahnaa mã pê me aquêtjê me acumam ajco me Pahpãm jarkwa to mehcakôc catêjê cura he. Pê taa mehcura, pê ca me caa ajco me harêt.

⁴⁹― Cwỳrjapê pê Pahpãm, cute amji jahkre pejti te hajỹr romã mã, ramã harkwa to: “Wa ha me cumã me ijarkwa to mehcakôc catêjê me, me imã memprar catêjê kujate. Quê ha me jũm cura, ne ame jũm to kên” hane. ⁵⁰Hajỹr cwỳrjapê quê ha amcro ita kam, cute harkwa to mehcakôc catêjê curan jahpan xà na, ame ipa itajê cunea to hanea, ne ame to kêanre ne. ⁵¹Pê mam pjê intuw kam me Aper xwỳ cura, ne caxuaw ajpên me amji curan na me cupy, ne ajpên me amji curan to me mõ. Ne Pahpãm to amji kam me hapac xà jũrkwa kam, cute me amji curan jicu xà to me Xacarij xwỳ curan. He ampeaj kam wa me amã awjarẽ. Na quê ha Pahpãm, cute mehcuran jahpan xà na, pom ita kam mehtĩar ame ipa itajê to apu ihkêanre ne.

⁵²― Pỳj me hêj xi me apê me cumã Mojxe xwỳ jõ kàhhôc to hahkre catêjê! Ca ha me akên mã me apỳm! Ampo na? Ca nee me Pahpãm jarkwa jahkre pej prãm nare, ne nee me amã jũmjê te hahkre pej na me to prãm nare. Na ri ihhêj rũm me apê cute me ikre jihê rẽn xà incwỳr, ne ma amentê, mã nee me to incjêj nare, ne nee jũm mã me hõr, mã cute to hihê mẽn, ne hàr na me amã to prãm nare ― hane.

⁵³Ne ma Jeju me cupê mõ, mã Parixêw catêjê me, me cumã Mojxe xwỳ jõ kàhhôc to hahkre catêjê me, cama ame cumãn to mehcyt to amencrôn to me ipa. Ne mencryac kam ampo jàhtôa na mehcukij. ⁵⁴Ne tee Jeju jarkwa nõ to me to ipipkjêr, ne cute mehpro prãmte ame to hahkre.

Mehkrã kên caca xà

¹Ne pê me hàhtôa ne me cuprõ, ne me hàhtô kam, ihtỳj ajco amji kam mehcuhhê. Mã Jeju te ihkôt me ipa catêjê mã mam harẽn, ne me cumã:

― Co he, ma amji na me Parixêw catêjê to me guphêa ne, nãmri ihhêj ne ampeaj kam põ rũm mempej, ne me caxwãm pê mehkêanre. Ne amehhêj xia jarẽn to me ipa, ne me cupê pàrhyre xỳ pahtỳjti to me hõ cunea to hỳ ita pyràac. ²Ne hanea ne ihtỳj ampo cunea to me ipimxur to ipa. Quê ha amcro nõ na cute ampo to me ipimxur itajê cunea pro mẽ, ne ampo cunea pupu. ³Ỹhỹ, ca ate awcapàtkô kam me ampo cunea jarẽn atajê, quê ha ihtỳj amcroa kam me kampa. Ne ca ate ikre caxwỳn kam ampo cunea to me apimxur, ne ahna me to hihê ne caxwãm pê me harẽn atajê, quê ha ihtỳj cà pê mehcunea me harẽ, ne me kampa.

Cu ha amji mã me Pahpãm pit cupa

⁴― Me ijõ ikwỳ nõ, ampeaj kam wa ha me amã awjarẽ, nee ame, por me gĩ pit cura atajê cupa nare. He quê ha nee hipêr me ato kên nare. ⁵Ne Pahpãm ca ha quêt amji mã me hũpa. Pahpãm quê ha ihtỳj quêt jũm jĩ cura, ne cormã hipêr apu to kên, ne ma ihkãkãnti kam cuhy kam cumẽ. Cwỳrjapê wa ha hipêr me amã harẽ, na ca ha quêt amji mã me Pahpãm pit cupa.

⁶― Ỹhỹ, por hãn ne cuwênre te xĩc to ihpore pijakrut peaj na me hàhpan cakrô, quê ha nee Pahpãm cuwênre ata nõ to hapac kêt nare. ⁷Ne hanea ne Pahpãm te ahpỹanre na me akĩ cunea cahyt par. Ne me caa ri cuwênre jàhtôti itajê jirôa pê me acati. Cwỳrjapê ca ha nee amji mã ampo cupa nare.

Cu ha Jeju na amji jarẽ

⁸― Ỹhỹ, he ampeaj kam wa me amã awjarẽ, quê ha jũm me akam mare mã cute ijahkre pej na amji jarẽn na, quê ha me Ahàkà hanea ne côjkwa kam Pahpãm jarkwa to imprar catêjê kam mare mã, cute jũm ata jahkre pej na amji jarẽ. ⁹Ne por quê ha me kam mare mã, ma ame icaca atajê, quê ha me Ahàkà hanea ne côjkwa kam Pahpãm jarkwa to imprar catêjê kam mare mã, ma apu jũm ata caca.

¹⁰― Ỹhỹ, he quê ha jũmjê ipê me Ahàkà na ihcakôc kên na, quê ha Pahpãm ihtỳj ihkên ata to tojnõ ne hicu. Nãmri quê ha jũmjê te Pahpãm Carõ Pejti na ihcakôc kên na, quê ha nee Pahpãm ihkên ata to tojnõ ne hicu nare.

¹¹― Ne quê ha amcro nõ na me acukij xà caxuw, cute me cuprõn xà jũrkwa wỳr me gaprô. Ne cute me akên mã me amẽn prãmte, pahhi catêjê me, me cupê pahhiti catêjê cuna mã me apyxwỳ, ne me acukij. Ne amcro ata na, ca ha nee ame akrihkrit nare, ne nee amji caxwãm pê me amji mã: “Jũ mã wa ha ajte amji jarẽn to, ne pahhi catêjê itajê pê amji pytà?” hajỹr nare. ¹²He Pahpãm Carõ Pejti quê ha amcro ata kam, me amã me ate me amji jarẽn xà to hahkre, cwỳrjapê ca ha nee ame akrihkrit nare ― hane.

Hakràjti krã cunĩ jarẽn xà

¹³Mã me hàhtôa jipôc ri hũmre nõ xãm, ne Jeju mã ihcakôc ne cumã:

― Ỹhỹ, Pahhi! Ca ha itõ mã garkwa ta, quê imã hũm xwỳ jàhcukrêj to ajcapô ― hane.

¹⁴Mã Jeju cumã:

― Pỳhàpà, xà ajkĩ jũm te me amã ampo to ipicràn catê na ixãm? Hãpà. Nee ipê ampo to ipicràn xà caxuw me acukij catê nare ― hane.

¹⁵Ne me hàhtôti atajê japackre, ne me cumã:

― Krãa, me ikampa! Ca ha nee ame hàhcukrêj to me acukrêj to prãm to me apa nare. Gapacta ne ampo to amji mã me cuprõ, ne nee me acukrêj itajê to pit mã ame amji japackre nare. He ampeaj kam ri me pahcukrêj itajê pê nee pahte amji kam me pajapac xà to ihhimpej catê nare.

¹⁶― Ỹhỹ, wa ha me amã jũm jakràjti nõ jarẽ, ca ha me hahkre pej, ite me amã harẽn xà ita kôt.

― Ỹhỹ, hakràj cati ita mã hõ pur catia, ne hõ pur ita kam cumã ampo jàhtôa to hàhtô. ¹⁷Mã cute pur kam ampo itajê cunea pupun, ne to amji kam hapac pyrentu, ne amji mã: “Pỳhàpà, ampeaj kam ipur kam ampo jàhtô, ne ipê caxuw nõr xà cati nare ita kam, jũ mã wa ha ajte to?

¹⁸“Ỹhỹ, wa ha to hane he. Wa ha nõr xà incrire ita hu, ne amji mã nõr xà catia nõ xãm, ne curia wa ha ijõ cunea jaxwỳ. ¹⁹Ne wa ha amji mã, ‘Hamre, ramã imã ijõa to ijõ, ne ijakràj catia, na wa ha nee hipêr pur nõ xir, ne kam ijàpên nare. Ita caxuw wa ha caku jàhtôa kam cama ikrĩ ne cuku, ne apu to ikõm to ipa, ne ijakry ita na apu ipa’ ” hane.

²⁰― Mã côjkwa kam Pahpãm jỹ, ne cute amji kam hapac xà ita na hõmpu, ne cute hakràj cati ita mã: “Ate amji jahkre kêatre. Pê wa amã acaca xà gõ, ne ita kam ca ha caxwa ri ty, ne hacpỹa mã imã agõ. Quê ha jũmjê amji mã gõ jàhtôti ita to me ahtwỳ” hajỹr. Hõhõ, Inxũ te hakràj cati ata mã harkwa to hajỹr.

²¹― He Pahpãm to ate amji kam me gapac to me apa xà ata pê ihhêj rũm côjkwa kam ate amji mã me gàhcukrêj pejti to me cuprõn. Kĩn pej ne, ca ajte pjê ita kam me gàhcukrêj me, me gõ to pit mã me amji kam me gapac to me apa, ne nee hĩkjê na, hõtpê Pahpãm to me amji kam me gapac nare na, ca ha me apê hakràj cati ata pyràac, ne me amji to acto ― hane.

Cu ha pahtỳj Pahpãm to amji mã me pahhimpej to prãm

²²Ne Jeju te ihkôt me ipa catêjê mã, cute ampo kên na ame amji to hàptõ to me ipa nare xà jarẽn, ne me cumã:

― Cwỳrjapê wa ijõtpê me amã harẽ, ca ha nee me gõ me, me gàpàn me, me akà to pit mã me amji to gàptõ to me apa nare. ²³He me pajĩ ri me pahkà jirôa pê cati, ne pahte amji kam me pajapac xà ri me pajõ jirôa pê cati, na ca ha itajê to pit mã me amji kam me gapac to me apa jicu.

²⁴― Ca me wakê pupu, mã nee amji mã pur ton nare, ne nee kam hàhkre nare, ne nee amji mã to cuprõn nare, ne nee caxuw amji mã hõ nõr xà pyxwỳr nare. Cakrô mã Pahpãm hõtpê me cumã harte. Ne mẽr hõhõ, Pahpãm mã wakê itajê jirôa pê me acati. Cwỳrjapê quê ha ate ampo itajê cunea na, amji to me gàhhuc xà nare kam, quê ha me gamã. ²⁵Xà ca ha me atyc nare na, amji to me gàhhuc xà ata to, ajkĩ atỳj amji mã me atĩr jõ caku to ajcamẽ? Hamreare, ca ha nee amji mã me to apicamẽn nare. ²⁶Mẽr hõhõ, he ca ramã nee ampo to ate amji kam me gapac xà atajê to, amji mã me apicamẽn nare ita kam, ampo caxuw mã ca cormã ampo kryjre na me amji to me gàhhuc to me apa?

²⁷― He pĩrã te hajỹar he. Nee hàpên nare, ne nee amji mã ihkà ton nare cakrô, mã ihtỳj ajcamẽ ne impejti. Ỹhỹ, ampeaj kam wa me amã awjarẽ, por pê pahhi xwỳ pê Xarômãw jakràj jàmkrã catia ata, pê te ihkà impejti cakrô, pê pĩrã kà ata Xarômãw kà jirôa pê impej. ²⁸Ne Pahpãm ri, pom ahkêt amcro kam ihcuhhê ne ajcamẽ atajê mã ihkà to. Mã hãn ne ahna apẽ mã cuhy to capa. Mẽr hõhõ, quê ha Pahpãm ihtỳj me amã me akà to. He ca ihhêj ne cormã kyre pê Pahpãm to amji mã me ahimpej, mã Pahpãm ihtỳj me gamãr to prãm.

²⁹― Cwỳrjapê ca nee ame akrihkrit nare, ne nee ate me ampo kur xà me, me akõm xà to pit mã na, ame amji to hàptõ nare. ³⁰Por pjê kam krĩxàre mehkrĩ, Pahpãm to amji kam me hapac nare atajê ri me hõ me, mehkà to pit mã ame amji kam hapac to me ipa. Ne me Apãm Cati mã, ate ampo na me prãm atajê na me gahkre pej. ³¹Ca ha mam cati mã Pahpãm pê pjê cunea jõ Pahhiti to amji kam me gapac to me apa, ne harkwa kôt ame apa, jahpan xà na, quê ha Pahpãm cormã hipêr me amã ampo cunea na, ate me ahna prãm atajê gõ.

Cu ha côjkwa kam me papê pahhi catêjê

³²― Ỹhỹ, tee me acrêre cakrô, ca nee ame hũpa nare. He Pahpãm te amji cahê na, me apê pahhi na me apyxwỳr to amji kam hapac. ³³Gapacta ne me acukrêj to ihpore na me ahpa, ne ihpore ata, ca ha gapacta ne me cupê hamreare atajê mã me agõ. Ca ha ate me ita to hajỹr na, ca ha côjkwa kam amji mã ampo jàhtôa ne me to acukrêj. Ne ihpore incjên xà itajê, quê ha côjkwa kam me gõ pore me amã to hipu tu rohnỳtti mã. Wỳr quê curi me hàhkĩj xi nõ apê ihnõ to ahkĩ, ne nee quê ha krir nõ curi apê ampo pejti ihkrẽr nare. ³⁴Ne côjkwa kam ca quêt me acukrêj pejti itajê to me amji kam gapac to me apa.

Me hàpên catêjê me hàpên xà to mento juphê jarẽn xà

^35-36― He me apê ihhêj rũm me gõ pahhi jikwa tuw mã me gàpên catêjê pyràac. Ne ate hahkà na hõ amji kĩn ata to me gàhcuprõn, ne me amji cũmpej, ne me hikaj na cute me amẽn. Cwỳrjapê ca ha me amji cũmpeaj ne. Ne me atu na hê xà to me akat kà juwahi, ne me gàhcujro xà nõ mã me haxà, ne mehpôc. Quê ha cato ne ikre jarkwa cahhy, ca ha me cumã hihê mẽn pyrentu. ³⁷Ca ha me apê cumã me gàpên catêjê me hikaj, ne nee ame gõt pej nare, ne quêt me arĩat ame apa, ne ampo cunea caxuw ame apa, cwỳrjapê ca ha quêt me apej mã me apỳm. Na quê ha me gõ pahhia, amji tu na, ihtu na hê xà to ihtỳj, ne me apê me cumã hàpên catêjê atajê mã hàpàn xà na me akrĩ na awjahkre, ca ha me akrĩ, quê ha taa me amã me garte. ³⁸Quê ha tee awcahti xà wỳr awcapàtkô picapôn kam, me gõ pahhi me awỳr cator cakrô, me arĩat wỳr cato, ca ha me apej mã me apỳm. Ca ha to hane, ne me apê me gõ pahhi jikwa tuw ata mã me gàpên catêjê impejti pyràac.

³⁹― Ỹhỹ, quê ha ikre jõ pahhi nõ, me hàhkĩj xi catêjê cator xà na me hahkre pej na, quê ha nee ikre mã jũm xàr, ne jũm te cupê ampo pyr na hamãr nare. ⁴⁰Ne me ca xwỳjê, ca ha me arĩat ame apa. Co he, quê ha me Ahàkà cati ate me hikaj xà jahkre pej nare ata kam, ihprõt pê me awỳr cato. Hõhõ, ata to ca ma me amji japackrea ne ― hajỹr.

Hàpên catê impej me ihkên jarẽn xà

⁴¹Mã Petrô Jeju cukij, ne cumã:

― Ijõ pahhi, pom ca ame imã ampo jarẽ ita, xà me imã pit mã, nare, xà ajkĩ mehcunea mã? ― hane.

⁴²Mã nee Jeju te cumã jũ mãn nare, ne cama cumã:

― Ỹhỹ, wa ha amã ikre jamãr catê nõ jarẽ. Por quê ha hõ pahhi ikre jamãr na cumẽ ata, quê ha catyt kam, ahpỹanre na mehkwỳ mã me hõ jõr to ipa. ⁴³Quê ha cute hõ pahhi cator xàa kam, catyt kam cumã hàpên to hajỹr na, quê ha impej mã ihpỳm. ⁴⁴Ỹhỹ, quê ha hõ pahhi ihtỳj cumã hàpên catê ita te ikre me, pjê me, ampo cunea jamãr catê na hãm. Quê ha ihtỳj hũpar pyrentu, ne me hàpên catêjê to kênre nare.

⁴⁵― Nãmri quê ha cute hũpar nare, ne me hàpên catêjê to impejti nare na, quê ha ihkên mã axà. Quê ha ikre jamãr catê ata amji mã: “Pỳhàpà, ijõ pahhi cator xà ita jũwrya to hũwry, ne ramã cator xà jirô pê ihpỳm, cwỳrjapê wa ha ipyxit peaj ne amji to pit mã amji kampa” hane. Ne cute hàpàn ne ihkõm kam ihtẽm, ne ipipãn kam ihtẽm, ne hõ pahhi mã hàpên catêjê kwỳ xũmre me, me cahãj cahhyr kam ihtẽm na, quê ha ihkên mã axà. ⁴⁶Ampo na? Quê ha nee jũ caxuw hõ pahhi te hỹrmã cator xà jõ amcro jahkre pej, ne nee hikaj nare ata kam, quê ha amji jaxà ne cato, quê ha mehpro mẽ. Quê ha ihkên ton jahpan xà na ihcura, ne cute me Pahpãm par nare atajê cuhhê xà kam cumẽ.

^47-48― Ỹhỹ, quê ha me hàpên catêjê nõ mã hõ pahhi jarkwa jahkre pej nare, ne cupê hahkre kêt kam nee cute amji cũmpej nare, ne apu hàpên to kêanre ata jahpan xà na, quê ha hõ pahhi nee ihcahhyr to ihtỳj nare, ne kyre pê ihcahhy. Nãmri quê ha me hàpên catêjê nõ te hõ pahhi jarkwa jahkre pej cakrô, nee amji cũmpej nare, ne nee hàpên xà to impej nare, quê ha hõ pahhi hahpan xà na, ihcahhyr to catia. Ne quê ha jũm, jũm jũhkra kam, ampo catia ne cupy, quê ha hahpan xà na hacpỹ ne ampo catia ne ahna ahwỳ. Ne quê ha jũm ampo crire ne cupy ne hahpan xà na hacpỹ mã incrire ne cugõ. Jĩkjê na mã Pahpãm me ato hanea.

Quê ha Jeju cwỳrjapê ame amji to ajcokjê

⁴⁹― Ỹhỹ, ite pjê ita to cuhôn prãmte wa hỹrmã icator. Ne ramã ihpôc to mõr na ri imã to prãm. ⁵⁰Wa ha cormã amji pupun xà kêanre to amji pupun to hanea, pom quê, cô kam cute me amji cumrãr xà ita na, wa ha ite amji pupun xà kêanre ita kam amji cumrã. Ne imã amji kĩn nõti ita kam ahnaa ikên na amji pupun to ihhi.

⁵¹― Mõrmõ ca atỳj amji mã me ito, ite me amã me acarĩcti jõr, ca nee ame apijapu nare prãmte, mõrmõ wa me awỳr icator na, ca me ito amji kampa. Hamreare, wa nee ita caxuw me awỳr icator nare. He wa ita kaj na, ite me ato ipicokjêr xà caxuw wa quêt icator. ⁵²Ỹhỹ, ita caxuw quê ha icwỳrjapê ikre kam cute me xĩc atajê ame ajcokjê, quê ha mencrê itajê me ipijakrut atajê kam mencryc kam ame ipa. ⁵³Ne quê ha me hũmjê xwỳjê mehkra xũmre kam incryac kam ame ipa. Quê ha mehkra xwỳjê me hũmjê kam mencryac kam ame ipa, ne mehkra cahãj atajê, quê ha menxyrxwỳ kam mencryac kam hanea ne ame ipa. Quê ha me hũprequêj hanea ne me wỳjxwỳ kam mencryac kam ame ipa. Quê ha me wỳjxwỳ hanea ne me hũprequêj kam mencryac kam ame ipa.

Amcro cajpẽr jarẽn xà

⁵⁴― Ỹhỹ, ca ha ita ri Juta catêjê jõ pjê kam pyt cjêj xà rũm me ahcakrã nõ pupu, quê ha hàpir to mõ, ca ha me amji mã harẽn to hane he: “Quê ha ta wrỳ” hane. Quê ha ihtỳj wrỳ. ⁵⁵Ne ca ha hanea ne me crôtre jõ kôc cajpẽ, ne amji mã me harẽn to: “Quê ha ita kam ampeaj kam me pahcacro” hane. Quê ha ihtỳj me pahcacro. ⁵⁶Mẽr hõhõ, pom ihtỳj me amã ampo itajê cunea jahkre pej, ne me amã pjê me, côjkwa jarẽn jahkre pej ita. Ne mẽr ampo na mã me apê amcro ita kam, ite ampo to ijàpên xà itajê jahkre kêatre? He ca cama ame ahêaj to ame ahêj!

Cu ha me pahcurê xwỳn to impejti ne

⁵⁷― Ne mẽr ampo na mã ca catyt kam me apa na me apê amji jahkre kêatre? ⁵⁸Ỹhỹ, quê ha jũ caxuw acurê xwỳn nõ apro mẽn prãmte mehcukij xà wỳr gaprôr prãm, ne gaprô. Ne pry kôt cormã ato mõr kwỳa kam, ca ha cume ajpẽn par peaj ne, ne me acator xàa kam me amji to impej. Nãmri ca ha ate me ita to hajỹr nare, ne nee me amji to impej nare na, quê ha acurê xwỳn nõ ita, mehcukij catê mã agõ, quê ha mehcukij catê ma krãhtare mã agõ, quê ha ma krãhtare me hacjên xà mã gaxà. ⁵⁹He wa ampeaj kam me amã awjarẽ, ca ha me hacjên xà kam akrĩ ita kam ahnaa, por ate acurê xwỳn to new ata to gàmjõr par nare kam, quê nee me acator nare ― hane.

Cu ha me pahkên ton jicu nare, ne me ty

¹Ne amcro ata na jũmjê atajê te Jeju mã Hĩpôjajo catêjê curan xà jarẽn, ne me cumã:

― He ma Hĩpôjajo catêjê kwỳ Krĩpinkrên wỳr me mõ, cute me ampo curan, ne Pahpãm mã me hõr prãmte. Ne cormã Pahpãm mã me ampo jõr prãam kam, mã pahhi Pirat te me hipej na harkwa hyr. Mã cute me hipej ― hajỹr. ²Mã Jeju me cumã:

― Ỹhỹ, Hĩpôjajo catêjê itajê tyc xà kêanre, ne mõrmõ ca me amji mã me to: “Cute mehkwỳ jirôa pê mehkên ton, cwỳrjapê ri cute me amji pupun xà kêanre ita to ame amji pupun, ne amehtyc” hane. ³Hamreare, he nee mehkwỳ jirôa pê mehkrã kên nare. Ampeaj kam wa me amã awjarẽ, ca ha me caa me acunea te me akên ton jicu nare na, ca ha atỳj me cuxà ame ty.

⁴― Ne por Krĩpinkrên cahê na cute me tejôjtô ne mehkrĩ atajê kam kẽn te ikre kàhti ata pỳm, ne cute me hipej atajê, mõrmõ ca amji mã me to: “Krĩpinkrên kam mehkwỳ mehkrĩ atajê jirôa pê cute mehkên ton, cwỳrjapê ri cute me amji pupun xà kêanre ita to ame amji pupun ne amehtyc” hane. ⁵Hamreare, he nee mehkwỳ jirôa pê mehkrã kên nare. Ampeaj kam wa me amã awjarẽ, ca ha me caa me acunea te me akên ton jicu nare na, ca ha atỳj me cuxà amehtyc xà ita to ame ty ― hane.

Pĩxô pàr na hô nare jarẽn xà

⁶Ne hipêr cute me cumã me hũjarẽn xà nõ jarẽn, cute ame hahkre pej prãmte, ne me cumã:

― Ỹhỹ, pê jũm xũmre nõ mã hõ pur kam pĩxô pàr ramã hô xàa kam, ne nee cormã hô nare. Pê ajco hô japê, tee hõmpu, ne nee ihnõ na hõmpun nare. ⁷Ne cute pur jamãr catê mã: “Hõmpu he, ramã pĩxô pàr ita na caku crê, wa tee apu hô japê, ne nee rỳ ite hô nõ pupun nare. Ne hamre, gapacta ne pĩxô pàr ita jakep pyrentu. Cama ihcuhhê ne pjê pytà, ne nee hô nare” hane.

⁸― Mã hamãr catê cumã: “Ijõ pahhi, ca nee ite hakep na imã gũjahkre nare caku ita kam, wa ha xa ipu na hahkwỳ, ne kam ampo jĩn to hipu. ⁹Quê ha ajpên caku mõ ita kam, cute hô na, quê ha ahna impej, nare, quê ha cute hô nare na, ca ha gapacta ne cormã hakep na imẽ, wa ha itỳj hakep” hane. Ne cute to hajỹr. Jĩkjê na mã Pahpãm me ato hanea, ne ihtỳj cormã me ato hamre xà to ipinhuc to mõ ― hane.

Pê mehkôt xà jõ amcro kam Jeju cahãj caprã

¹⁰Ne mehkôt xà jõ amcro nõ na Jeju ame cumã ampo to hahkre, Juta catêjê te cuprõn xà jũrkwa kam. ¹¹Mã curi me cahãj nõ kam me pahcurê xwỳn carõ kên, ne cute apu to kêanre, mã ihkô cajõc ne cumã hà, ne jũ wỳr quê capô. Ne pê ramã ihkô ita capô nare na ahna caku te tejôjtô. ¹²Mã Jeju te hõmpun ne cumã hàkjêr, ne cumã:

― Ỹhỹ, cahãj ita, ramã acaprãr ― hajỹr.

¹³Ne cute ahna hũ xir, mã ihkô capô pyrentu, mã cahãj ita te amji jahpan xà na, côjkwa kam Pahpãm mã impejti jarẽn to mõ, ne cumã:

― Ỹhỹ, me ijõ Inxũ Cati, ampeaj kam apej ne acati, ne ate icaprãr pyrên ijakry! ― hajỹr.

¹⁴Mã cuprõn xà jõ pahhi apu, Jeju te mehkôt xà jõ amcro kam jũm caprãr ata na, apu kam incryac to incryc, cwỳrjapê ri mehkwỳ mã:

― Pỳhàpà, pom me pajàpên xà caxuw amcro te xêj ita? Mẽr hõhõ, amcro te xêj itajê kam, ca ajpên me ate me amji caprãr prãm catêjê me apa, ne nee me pahkôt xà jõ amcro kam ajpên me amji caprãr prãmte me apa nare ― hane.

¹⁵Mã Jeju me cumã:

― Me apê me cumã mehhêj xi catêjê, me ahêj xi hyre nare. Pom ca me acunea me pahkôt xà jõ amcro ita kam atỳj me gõ pryti me, cawrô cahàcre mã me hê pô, ne me to apa, mã ikõ ita? Nõ na mã ca ame hane? ¹⁶Mẽr hõhõ, me cahãj ita pupu he, taa xwỳjê pê me panquêtti Aprãw xwỳ tàmxwỳ tàmxwỳ nõ. Pê Xatanaj pê me pahcurê xwỳn carõ kên ihpro ne huwapre, ne ramã huwapre ita na ahna caku te tejôjtô. Xà wa ha ajkĩ me pahkôt xà jõ amcro kam nee cumã hê pôn, ne caprãr nare? ― hane.

¹⁷Mã Jeju jarkwa ata kam Jeju curê xwỳn itajê amehpahàm. Mã me hàhtôti atajê Jeju te ampo pejti ton ata pyrên quêt ame hakry.

Ampo hy kryjre jarẽn xà

¹⁸Mã Jeju me cumã:

― Wa ha me amã Pahpãm pê Pahhiti te pjê to ihhimpej xà ata to hahkre, ca ha me hahkre pej. He ihhimpej xà ita pê ampo hy pyràac. ¹⁹Ỹhỹ, cupê ampo hy kryjre pyràac. Mã hũmre nõ te ipyr, ne hõ pur kam ihkre. Mã ampo hy kryjre ita hiprãj ne ihkà, ne ipàr pê pĩ catia pàr. Mã pryre jara ihtỳj ihpa atajê kam amji mã hahê to. Hõhõ, ita na quê ha Pahpãm te pjê to ihhimpej xà ata.

^20-21― Ne hanea ne cupê cuhy incrire ata pyràac. Quê ha cuhy incrire ata to me ahkêt mã haxà, quê ha ahna ahtũm nare, quê ha ihtỳj ahkêt apu ihpôc to ipa. Ita na mã Pahpãm himpej xà te hajỹr, ne mam cupê ampo kryjre pyràc, ne ma ihtỳj cati to ipa ― hane.

Harkwa jatàtre jarẽn xà

²²Pê ma Jeju Krĩpinkrên wỳr mõ, ne ajco krĩ atajê cunea kôt me cumã ampo to hahkre to ipa. ²³Pê jũm ata Jeju cukij ne cumã:

― Ỹhỹ, Pahhi, xà mehkên catia ata pê cute me amji pytàr xà atajê incrêre? ― hane.

²⁴Mã Jeju cumã:

― Ỹhỹ, côjkwa kam Pahpãm wỳr harkwa ata jatàtre. Ca ha ate amji mã ame acarôt na, ca ha atỳj harkwa ata na ame acjêj. Wa ampeaj kam me amã awjarẽ, he me hàhtôa ne tee ame hàr to prãm, ne jũ wỳr quê me axà.

²⁵― Quê ha ikre jõ pahhi ikre jarkwa na ahtwỳ ne xa, ne to harkwa jihê. Ca ha põ pê ame apa, ne tee cumã me harkwa cahhy, ne tee me cumã amji jarẽn to: “Pahhi, me imã hihê mẽ, wa me axà” hane. Quê ha me amã: “Jũmjê mã ca me? Ca jũmjê itajê ame apa, ipê me gahkre kêatre” hane.

²⁶― Ca ha me cumã: “Por pê wa ramã me acahê na me apà, ne ame ikõ ata? Por pê ca ramã me ijõ krĩa kam ampo to me imã hahkre ata?” hane.

²⁷― Quê ha hipêr me amã: “Ipê me gahkre kêatre. Wa ite rỳ jũ caxuw jũmjê itajê me apupun nare. Ne me acuto, ate ame ampo to kêanre atajê!” hane.

²⁸― Ca ha me Pahpãm te pjê to ihhimpej xà ata kam, me Aprãw xwỳ me, Ixac xwỳ me, Jaco xwỳ me, pê mam Pahpãm jarkwa to mehcakôc catêjê atajê cunea pê me panquêtjê na me hõmpu. Ne mehkĩnte põ pê ca ha ame acwỳr to ame apa, ne me akàj xàhte me axwa gyj to me apa. ²⁹Quê ha me hàhtôa ne me cato, pjê cunea pĩn, quê ha pyt japôj xà me, pyt cjêj xà me, ne kỳj rũm me cato, ne harã rũm me cato, ne me hàpàn xà na amehkrĩ, Pahpãm te pjê to ihhimpej xà ata ri, ca ha cama ame hõmpun to me apa.

³⁰― Ỹhỹ, ita kam, por hapua na me ipa atajê, quê ha jũ caxuw mam ihkrãa ri amehcuhhê, ne pjê ita kam mam mehcuhhê itajê, quê ha hapua na jũ caxuw me ipa ― hane.

Pê Pahhi Heroti mã Jeju curan prãm

³¹Ne Jeju xa ne apu awjarẽ ata caxuw ri hỹrmã Parixêw catêjê kwỳ cator, ne Jeju wỳr me hàhtêp ne me cumã:

― Atẽm pyrentu, nãmri Heroti apu acuran to prãm ― hane.

³²Mã Jeju me cumã:

― Me pra ne me cagã ata mã me ijarkwa jarẽn to hane he: “Wa ha ita kam ame pahcurê xwỳn carõ kên japôj to mõ, ne ame hĩ caprãr to mõ. Ne amcro incrê kam wa ha cormã ijàpên xà ita jicu” hane. ³³Ne wa ha itỳj ijàpên xà ita kam to icrà, ne cormã ma Krĩpinkrên wỳr ikràr, ne amcro nõ na wa icator to prãm. Nãmri rỳ jũ caxuw Krĩpinkrên kaj na Pahpãm jarkwa to mehcakôc catêjê nõ tyc nare, na wa ha curia me cuxà ty ― hane.

Pê Jeju mã Krĩpinkrên kĩnti

³⁴Ne cute Krĩpinkrên kôt harẽn to hajỹr, ne cumã:

― Krĩpinkrên, Krĩpinkrên, por akam mehkrĩ catêjê atajê hõtpê Pahpãm jarkwa to mehcakôc catêjê cura, por me Pahpãm te me amã ihkujahêc atajê, ca gõtpê ate kẽn to mehcuran prãmte ame to capê. He wa tee ame ato cuprõn prãm to hanea, pom quê hôxãhxãc hãn ne intore to hara krac ri cuprõ he. Ne ipê hôxãhxãc ata pyràac, ca ma ajte ame icaca. ³⁵Ne ita caxuw quê ha gõ krĩ caprỳ, ne kam hamreare ne. Ampeaj kam wa me amã awjarẽ, ca ha hipêr me ipupun nare ita kam, ahnaa jũ caxuw me ijarẽn to: “Por jũm Pahpãm jarkwa kôt me iwỳr tẽ ata pê impejti” ― hane.

Pê Jeju mehkàj xà nõ ita caprã

¹Mã mehkôt xà jõ amcro nõ na Parixêw catêjê nõ te Jeju jator, hũrkwa kam me cahê na hàpàn prãmte. Mã ma Jeju ihkôt mõ, ne cator, ne hàr ne hỹr. Mã me hàhtôa ne me xa atajê ame Jeju kôpĩ. ²Mã hũmre jara me ihkjê tuhti Jeju na hàhtêp. ³Mã Jeju te Parixêw catêjê me, Mojxe xwỳ jõ kàhhôc to hahkre catêjê me, mehcukij ne me cumã:

― Xà quê ha ihtỳj ajkĩ Mojxe xwỳ jõ kàhhôc ata kôt me pahte amji kam me pajapac xà na, me pahkôt xà jõ amcro kam jũm caprãr na me jũm jamã? ― hajỹr. ⁴Mã nee jũm te cumã jũ mãn nare. Mã Jeju te hũmre ata cupên ne caprãr, ne ma ihkujahêc, mã ma tẽ.

⁵Jirô pê mã me cumã:

― Xà quê ha me anõ jõ cawrô cahàcre me, pryti nõ, me pahkôt xà jõ amcro ita kam, kwa mã mrõ, ca ha nee ajkĩ me anõ caxàr nare? ― hane.

⁶Mã nee jũm te cumã ampo jarẽn nare, ne aracri mehkrĩ.

Cu ha me amji to me pahcati prãm to me papa nare

⁷Jirô pê mã ri Jeju jỹ ne apu cute me hator atajê kôpĩ, mã ihtỳj amji mã me hỹr xà impeaj japên to me mõ. Mã Jeju te me hàpàn xà na mehkrĩ atajê japackre, ne me cumã:

⁸― Ỹhỹ, quê jũm me hikwa tuw jõ amji kĩn wỳr gato, ca nee gỹr xà impeaj kam gỹr nare. Quê ihhêaj to me girôa pê jũm catia ata jato, quê ha curi cato. ⁹Quê ha ikre jõ pahhi te gator catê ata amã harkwa to: “Cumã gỹr xà impejti ita jahkre, quê kam jỹ” hane. Hamre, ca ha cama apu apahàm to mõ, ne mõ ne me hõa kam hapua na jỹ. ¹⁰Cupate ca ha nee hajỹr nare, ne quêt hane he. Quê jũm gato, ca ihkôt mõ ne hapua na me hõa kam, gỹr xà ata kam ca jỹ. Quê ha ikre jõ pahhi ata apupu ne amã: “Ikwỳ nõ, ajpên mõ ne ita ri ca gỹr xà impejti ita kam jỹ” hane. Ita na quê ha quêt mehcunea jipôc ri me kam mare mã acati.

¹¹― Ỹhỹ, pom me amji to cati prãm itajê, quê ha Pahpãm me to ihkryjre ne. Ne pom amji to mehkryjre prãm atajê, quê ha quêt me to cati ― hane.

¹²Jirô pê mã ri Jeju te ikre jõ pahhi japackre ne cumã:

― Ỹhỹ, ca ha jũ caxuw me gàpàn xà catia ton to prãm, ne nee me akwỳ nõ catêjê jator, ne me akjêjê me, me gũkjê jator nare. Ne hanea ne nee me acahê na me hakràj catêjê mehkrĩ atajê jator nare. Ca ha ate me hator na, quê ha ate me hator jahpan xà na, cute me amã hàmjõr xà na ihtỳj amcro nõ na me gato. Na ca ha nee ita to me hajỹr nare, ne quêt me to hane he.

¹³― Ca ha jũ caxuw amji kĩn nõ ton to prãm, ne me cupê hamreare atajê ca ha me hato, ne cute me xwỳ jato, ne mehkjê xà jato, ne mento tũm jato. ¹⁴Ca ha ate ita to hajỹr na, quê ha Pahpãm quêt apej mã amẽ. Ne jũ wỳr quê me cupê hamreare atajê, ate ame to hajỹr ata jahpan xà na, me amã amgõ. Cwỳrjapê quê ha Pahpãm, catyt kam ame ipa catêjê te hacpỹa mã mehtĩr xà jõ amcro ata kam, ihtỳj me amã amgõ ― hane.

Amji kĩn catia jarẽn xà

¹⁵Mã por jũmjê me hàpàn xà na me jỹ atajê nõ te ita na Jeju par, ne cumã harẽn to:

― Taamã, por jũ caxuw Pahpãm pê pjê jõ Pahhiti te me hator, mã me hàpàn xà na me jỹ atajê ri mempej mã mehpỳm xà ― hajỹr.

¹⁶Mã Jeju me cumã to hũjarẽn to:

― Ỹhỹ, por me hũmre nõ te me hàhtôa ne me hator, quê me cuprõ, quê me cumã hõ amji kĩn to. ¹⁷Mã ramã amji kĩn jõ amcroa kam hàhhuc, mã cute cumã hàpên catê kujahêc, cute ame hator atajê jator prãmte. Ne me cumã harkwa kujahêc to: “Ajpên ame aprar pyrentu, nãmri ramã ampo cunea te amji jipêj” hane.

¹⁸― Mã xãmte aracri ahpỹanre na cute me cumã amji jarẽn xà atajê. Mã mam pyxit ita te hàpên catê ita mã: “Wa ite pur jũhkàr, ne wa ita kam hõmpun prãm, cwỳrjapê wa ha nee gõ pahhi jõ amji kĩn ita wỳr imõr nare. Na wa ha awỳ, ca nee ikam acryc nare” hane.

¹⁹― Mã ihnõ ita te hajỹar ne cumã: “Wa ite pjê to ipipkjêr xà caxuw pryti to tej ne hũhkàr, ne wa ita kam hàpên xà to capi prãm, cwỳrjapê wa ha nee gõ pahhi jõ amji kĩn ita wỳr imõr nare. Na wa awỳ, ca nee ikam acryc nare” hane.

²⁰― Mã ihnõ ita te hajỹar ne cumã: “Wa curmã ijikwa tuw, cwỳrjapê wa ha nee imõr nare” hane.

²¹― Mã cumã hàpên catê ita te amji jaxàr, ne hõ pahhi mã me harẽn. Mã ame kam incryac to incryc, ne cumã: “Atẽm pyrentu, ijõ amji kĩn ita caxuw, ne pry me krĩ cape kôt ajpên me cupê hamreare atajê japrô, ne cute me xwỳ me, mento tũm me, mehkjê xà me, ca ha ame haprô” hajỹr.

²²― Mã ma tẽ, ne ahna ahtũm nare mã cumã hàpên catê ita hacpỹ ne tẽ ne hõ pahhi mã: “Hamre, wa ite, por ate ampo na imẽn ata ton cakrô, mã cormã nee cute me ikre to hipu nare” hane.

²³― Mã hõ pahhi cumã: “Hipêr tẽ ne krĩ catut na pry atajê kôt ame pra atajê jator to ihtỳaj ne, ne hanea ne pur kam ne ahkêt kam ame ipa atajê jator to ihtỳaj ne, mãr quê ijũrkwa ita to me hipu tu ne. ²⁴Ne ampeaj kam wa amã awjarẽ, quê ha nee mam ite ame hator atajê nõ ipê ijõ ita kwỳ krẽr nare” hane. Jĩkjê na mã quê ha Pahpãm me ato hanea ― hajỹr. Hõ, Jeju te me cumã hũjarẽn to hajỹr.

Pê Jeju ihkôt me ipa catê na, cute me amji ton kôt harẽ

²⁵Mã amcro nõ na hipêr me hàhtôa ne ma Jeju kôt me mõ, mã me hỹrmã ipipkjêr ne cute me cumã hũjarẽn to:

²⁶― Ỹhỹ, ca ha me anõ te ikôt apa prãm na, quê ha ihtỳj me anõ mã ikĩn, ca ha ikôt apa. Ne me apãmjê jirôa pê amã ikĩn, ne me axyrxwỳ me, me aprõ me, me akra me, me akjêjê me, me akjêjê cahãj jirôa pê me amã ikĩn. Nãmri ca ha itajê jirôa pê amã ikĩn nare, ne amji jirôa pê amã ikĩn nare na, ca ha nee apê ikôt ipa catê nare. ²⁷Ne quê ha jũm mã ikôt amji ton to prãm na, quê ha jũm ata ihtỳj amjia kôt ipa jicu, ne ikôt pit mã ipa, ne amcro cunea kam icuxà, hõ pĩ na ihtyc xà ita japjê. Nãmri quê ha amã ita to hajỹr prãm nare na, ca ha nee jũ caxuw apu ikôt apa nare.

²⁸― Ỹhỹ, ca ha me anõ ikre kàhti nõ xãm prãm, ne mam jỹ ne amji kampa, ne gõ pore cahyt, mãr ca hahkre pej, jũ mã quê ha gàpên xà ata hàhwỳr to. Ne jũ mã quê ha apê gõ pore to ne capa. ²⁹Ca ha nee apu amji mã hahkre pej par nare ne kam to tẽ, ne apu ihhê pit pyxwỳ, ne nee hipêj nare. Quê ha mehcunea me ikre ita pupu, ne me ato hapactu kam tẽ, ne me ajpẽn mã, ³⁰“Me hõmpu he, hũmre ita te ikre ton kam ihtẽm, ne nee cute hicu xà mã to mẽn nare” hane. Ca ha atỳj apu apahàam to apahàm.

³¹― Ne ihnõ xwỳjê te hajỹar he. Quê ha krĩ pijakrut jõ pahhiti atajê me ipijapu to prãm, ne ihnõ mã hõ krãhtare jàhtô te mir te tej, ne hirôa pê ihnõ ita mã hõ krãhtare te mir te winti. Quê ha me harẽn pa, ne jỹ ne to amji kampa, ne amji mã: “Pỳhàpà, me ijirôa pê me icatêjê jàhtô, wa ha pijamã me cuna mã mencrêre itajê to ahtwỳ? Jũ wỳr wa ha me to amji mã hamã” hane. ³²Ne ihtỳj me catêjê jõ pahhiti nõ ata mã harkwa kujahêc pyrentu, cormã ampỳre mã apu mõr reria mã, mãr quê nee ame ipijapu nare.

³³― Mẽr hõ, ca ha me amji kampa, ne me gàhcukrêj cunea mã me hikra, ne cormã ikôt me apa catêjê na me amji to. Nãmri ca ha ate me to hajỹr nare na, ca ha nee me apê me ikôt me apa catêjê nare ― hane.

Caaxwa xen nỹre jarẽn xà

³⁴Ne hipêr Jeju me cumã:

― Hõtpê caaxwa pê ampo pejti ata, ne quê ha hàn nõ mã axà, jũ mã cu ha me to, ne hacpỹ mã me to wa? ³⁵Hamre, quê ha ihkên mã axà, ne ampo cunea caxuw ramã ihkêanre, ne nee ampo xô mã cute pjê to caxà xà na impej nare. Na cu ha me pahtỳj caaxwa xen nỹre ata to me awcapê. Por ate me ipar xà na, me akam me gapac ihcuhhê ata, mẽr me to ikam gapac to impeaj ne ― hane.

Carà cahàcre hôhti pictor jarẽn xà

¹Ne amcro nõ na Jeju wỳr me hàhtôa ne me mõ, cute mempar prãmte, mã pahhiti jarkwa na me hũhkra kam me hàmcwỳr catêjê jàhtôa ne ihwỳr me mõ, ne mehkwỳ te amji kam me hapac xà kêanre. ²Mã Parixêw catêjê me, me cumã Mojxe xwỳ jõ kàhhôc to hahkre catêjê me, cute me Jeju te mehkrã kên catêjê mã ampo to hahkre na me hõmpun, ne me ahna xwỳ kam mehtẽm, ne me ajpẽn mã:

― Me hõmpu he, hũmre ita ihtỳj mehkên na amji to pôj, ne me cape na apà ― hajỹr.

³Mã Jeju te me hapackre kam ihtẽm, ne me cumã:

⁴― Ỹhỹ, quê me anõ mã carà cahàcre hôhti te xẽj, ne pyxit ne apê acto, xà ca ha ajkĩ nee hapên nare? Ca ha atỳj cute nowẽntinowi atajê mã põ kam hikra, ne ma pyxit ata japên to mõ, ne cumã acato. ⁵Ne hũrên gakry, ca ha apỳ ne ma to amji jaxà. ⁶Ne ikre mã to acato, ne acahê na gõ ikwỳ nõ mehkrĩ atajê to cuprõ, ne me cumã: “Me gakry, nãmri wa ite carà cahàcre hôhti pictor ata mã icator” hane.

⁷― He me apê carà cahàcre hôhti jàhtô na, cute nowẽntinowi atajê pyràac, ne atỳj amji pej na me amji cãmjĩ. Ne por me anõ pyxit te ihkên jicu, ne hacpỹa mã Pahpãm wỳr amji jaxàr ata pê ri carà cahàcre hôhti pyxit pictor ata pyràac.

― He wa ampeaj kam me amã awjarẽ, ita kôpit na, quê ha côjkwa kam mehkrĩ atajê ihtỳj me apej catêjê pyrên ame hakry. Ne por quê ha jũm pyxit peaj ne ihkên jicu, ne catyt kam ipa kam tẽ, ata pyrên quê ha côjkwa kam mehkrĩ atajê me girôa pê me hakry.

Ihpore hy pictor jarẽn xà

⁸― Ne ihnõ xwỳjê, quê ha cahãj nõ mã wakỳre prà jakare te ihpore hy tej, ne cupê pyxit ne acto, quê ha ihtỳj hapê. Ne cute cumã cator xà caxuw, quê ha hàhcujro xà nõ pôc, ne ikre capõ ne hapên to impeaj to mõ, ne ihtỳj cumã cato. ⁹Ne me hõ ikwỳ nõ catêjê me, me cahê na amehkrĩ atajê to cuprõ, ne me cumã: “Me gakry, ite ihpore hy pictor ata mã icator” hane.

¹⁰― He wa ampeaj kam me amã awjarẽ, ihpore hy pictor ata pê jũm te ihkên ton to ipa ata pyràac. Ata kôpit na, quê ha Pahpãm jarkwa to imprar catêjê côjkwa kam, por jũm pyxit peaj te amji kam hapac xà kên mã hikran, ne hacpỹa mã Pahpãm wỳr amji jaxàr ata pyrên, quê ha ame hakry.

Ihkra xũmti pictor jarẽn xà

^11-12― Ne ihnõ xwỳjê te hajỹar. Ỹhỹ, pê jũm xũmre nõ mã ihkra xũmre ajkrut. Pê amcro nõ na hapu na ihkra intuw ita hũm ita mã: “Inxũ, ita kam imã ate atyc jirô pê imã ampo jõr xà atajê gõ. Jũ wỳr wa ha atyc xà ita jikaj” hane. Mã hũm te cume amji mã ampo to ipicapôn.

¹³― Mã ahna amcro jàhtô nare, mã hapu na ihkra ita te ampo to hõ tekjê ita to cuprõn, ne ma pjê nõ wỳr to mõ. Ne curia ihkrĩ, ne cute ihkên to amji to hipu tu, ne por cute hũm pê ampo cwỳr atajê to ampo kên cunea na hamre partu.

¹⁴― Ne hamre, cute ampo to hamre jirô pê, ampeaj kam pjê ata kam me cumã prãm cati. Mã prãm te kam ihtẽm. ¹⁵Mã cute pjê ata kam jũmjê krĩ atajê na hàhwỳr, cute me cumã hàpên ne amji mã harte prãmte. Mã cute crô to ipijapar xà wỳr mehkujahêc, cute crô mã harte, ne me cumã hamãr xà na. ¹⁶Mã curia apu crô jamãr to ipa, ne ampeaj kam cumã prãm. Mã tee crô jõ ata kwỳ krẽr to prãm cakrô, mã nee jũm te cumã crô jõ ita kwỳ jõr nare.

¹⁷― Mã cute hỹr, ne amji kam hapac ne amji mã: “Ampeaj kam inxũ mã me hàpên catêjê jàhtô, ne me cumã hõ cati, ne cute me hakren tu. Wa mehkĩnte ajte ita ri tee prãm to amji curan prãm. ¹⁸Ne wa ha ma inxũ wỳr amji jaxà, ne cumã amji jarẽn to hane he: ‘Inxũ, wa ite côjkwa kam Pahpãm me, acuna mã ikêanre ton. ¹⁹Na wa nee hipêr ate ito amji kra na ana ijàhwỳr nare. Ca ha ito amji mã cama amã ijàpên catê’ ” hane. ²⁰Ne ma hacpỹ mã hũm wỳr cute amji jaxàr.

― Ne hũm wỳr cator to mõ, mã hũm te pry cãmpun, mã cormã ampỳa mã mõ. Ne cumã caprĩ, mã hỹrmã tẽ ne cute impỳn, ne cahôr.

²¹― Mã cumã: “Inxũ, wa ite côjkwa kam Pahpãm me acuna mã ikêanre ton. Na wa nee hipêr ate ito amji kra na ana ijàhwỳr nare” hane.

²²― Mã hũm te cumã me hàpên catêjê nõ mã harkwa hyr, ne me cumã: “Ame kware ne ajpên me cumã ihkà impeaj nõ to tẽ, ne me cumã haxà, quê to ihkà. Ne hũhhi na hê xà nõ to cumã me hũhkrahhi na hê, ne hanea ne ihpar kà nõ mã me haxà. ²³Ne hanea ne ajpên me pryti krahti nõ jicotti to me mõ, ne mehcura, cume to amji kĩn to. ²⁴Nãmri, wa ikra pictor ita tyc na amji mã to hajỹr cakrô, mã ihhêj ne hacpỹa mã ihtĩr ne mõ ne cator, cwỳrjapê ri hũrên ijakry” hane. Ne cute amji kĩn kam me to ihtẽm.

²⁵― Ne cormã ame amji kĩn ita toan kam, mã ihkra kà ita pur kam apu apê. Ne cute amji jaxàr, ne ramã ikre na hàhtêp to mõ, ne cute me hõkrepôj me, me hàkrun jàhkrihkrit kam hapac. ²⁶Ne cute me hàpên catêjê nõ na hàhwỳr, ne ihcukij ne cumã: “Ampo na mã ame hane?” hajỹr.

²⁷― Mã hàpên catê nõ ata cumã: “Gapyre te amji jaxàr ne impej pêa mã cator. Cwỳrjapê ri apãm te amji kĩn ita caxuw pryti kra jicotti curan na me imẽn, wa ite mehcuran, mã ame to amji kĩn” hane.

²⁸― Mã ihkra kà te ita kam hapac, ne apu kam incryc. Ne ma apu ikre mã hàr caca, ne ma amehkôt amji kĩn ita na amji ton caca. Mã hũm põ mã cator, ne tee apu to hàr to hahkre. ²⁹Mã cute hũm mã: “Rỳ pêa mã wa ipê amã ijàpên catê pyràac, ne amã ijàpên to ipa. Ne nee wa rỳ jũ caxuw ite garkwa par caca nare cakrô, ca rỳ jũ caxuw ate imã carà cahàcre nõ jõr, wa ite ijõ ikwỳ nõ catêjê me, me to amji kĩn nõ ton nare. ³⁰Mã akra kêanre ita te, por me cahãj pijapit xyre atajê na, ate cumã ampo jõr atajê rẽn partu. Ne cute amji jaxàr, ca ate quêt cumã pryti jicotti ita curan, ne ame to amji kĩn” hane.

³¹― Mã hũm te cumã: “Ikra, apu hajỹr nare, ca gõtpê icahê na apu apa. Ne wa ampo cunea to itekjê itajê, pê atekjêa ri. ³²Ne ampeaj kam wa ite amji kĩn ita ton na amji mã prãm, me pajakry prãmte. Ampo na? He me pamã amji kĩn nõti ita na ipê ihkaj na. Ne ampo na wa ite ita ton? He gapyre ita ramã ihhêj ne ihtyc, ne hacpỹa mã ihtĩr, ne hanea ne ipictor ne hacpỹa ne cator cwỳrjapê wa ite ton” ― hajỹr.

Me hũrkwa jamãr catê hêj xi jarẽn xà

¹Ne Jeju te hipêr ihkôt me ipa catêjê mã hũjarẽn, ne me cumã:

― Ỹhỹ, por hakràj cati nõ mã hũrkwa jamãr catê. Mã jũmjê atajê te ikre jõ pahhi mã, cama cute apu cupê hõ tehkrêj rẽn to ipa na harẽn to kêanre. ²Mã cute ahna hàhwỳr ne cumã: “Pỳhàpà, xà ampeaj kam mã me garẽ? Krãa caxi, imã amji jarẽ, ne imã ijõ ampo itajê cunea na ihhôc. Ne cute me ito new catêjê japrỳ atajê cunea na imã ihhôc, wa gàpên xà jahkre pej. Ne ca ha nee hipêr apê imã ijũrkwa jamãr catê nare” hane.

³― Mã hũjamãr catê ita mõ ne hỹr, ne cute amji kam hapac ne amji mã: “Pea hito, wa itea amji pê ijàpên xà ita to ipictor. Ne nee imã icarôt cati nare ite pjê jahkwỳn xà caxuw, ne me ahna ijàhwỳr na ipahàmti ita kam, ampo to mã wa ha ajte? ⁴Ỹhỹ, wa ite hajỹr ita kam, quê ha ijõ pahhi ikujate, wa ha nee hipêr cute me to new catêjê jũhkra kam ijàmcwỳr to ipa nare. Ne wa ha to hane, wa ha mam cute me ijõ pahhi to new catêjê to impeaj ne, mãr quê cute ijàpên xà pê icator jirô pê, ihtỳj me hũrkwa kam me ijuwahi. Ne me taa me itehcajpa” hane.

⁵― Ne cute me hõ pahhi to new catêjê cunea na hàhwỳr. Mã cute me cuprõn, mã cute ahpỹanre na mehcukij par. Ne cute mam ita cukij ne cumã: “Jũ mã ca ate ijõ pahhi to new ton?” hane.

⁶― Mã cumã: “Hàhcujro xà cacô incjên xà te xẽj to wa ite to new” hane. Mã cumã: “Ihnãm ate new na gõ kàhhôc ita he, to jỹ ne cute xĩncwẽnta peaj na, ca ihhôc” hane.

⁷― Ne cute ihnõ ita mã: “Ne ca, jũ mã ca ate new ton?” hajỹr. Mã cumã: “Arỳjhy incjên xà te mir to wa ite to new” hane. Mã cumã: “Cute ôjtôxẽnta peaj na ca ihhôc” hane. Ne cute me to new catêjê cunea to hajỹr partu.

⁸― Mã hõ pahhi te ita par, ne cumã: “Ahêj xi cakrô, ampeaj kam ate amji jahkre pej” ― hajỹr.

Ne Jeju te ihkôt me ipa catêjê mã:

― Ỹhỹ, ihhêj ne catyt kam me ipa nare catêjê atajê te ri, catyt kam me ipa catêjê jirôa pê me amji jahkre pej. ⁹Cwỳrjapê wa me amã: “Gapacta ne amji to me gakràj, ne gapacta ne catyt kam me ipa nare catêjê to me amji kwỳ nõ. Quê ha jũ caxuw amã ampo atajê cunea apê hamre, quê ha me gõ ikwỳ nõ catêjê ihtỳj me hũrkwa kam me ana amji to pôj” hane.

¹⁰― Ỹhỹ, quê ha jũm hõtpê ampo kryjre atajê jamãr to impejti na, quê ha hanea ne ampo catia jamãr to impeaj ne. Quê ha jũm apu ampo kryjre atajê to ihhêj to ipa na, quê ha hanea ne ampo catia to ihhêj to ipa. ¹¹Ỹhỹ, ca ha pjê ita kam me gàhcukrêj to ame ahêj to me apa, quê ha nee jũm me amã Pahpãm jàhcukrêj nõ jõr nare. ¹²Na ca ha jũm jàhcukrêj to ate ame ahêj to me apa na, ca ha nee me gàhcukrêj cwỳr nare.

¹³― Ne jũ wỳr quê jũmjê hõ pahhi pijakrut jarkwa kôt me ipa. Ampo na? Quê ha cumã hõ pahhi pyxit nõ ata pit kĩn, quê ha cumãa apê. Ne ma apu ihnõ ita caca, ne hicu ne cumã hikra. Ita jĩkjê na, ca ha Pahpãm mã me apê, ne nee ate mehpore catia ne ipyr na, me amji cãmjĩ nare. Nãmri ca ha ate ihpore ita to pit mã me amji japackre na, quê ha cupê ihhêj rũm me gõ pahhi, ca ha ihkôat me apa ne atỳj Pahpãm mã hikra ― hajỹr.

Pê Jeju Parixêw catêjê mã ihpore cawpa

¹⁴Mã Parixêw catêjê mã ihpore pit kĩn atajê te me ita par, na ri ame Jeju xũn. ¹⁵Mã Jeju me cumã:

― Ihhêj ne mehcunea cuna mã me apê me hũmre impejti, ne Pahpãm mã ri quêt me ate amji kam me gapac xà cunea jahkre pej. Ỹhỹ, me hũmre mã pjê kam ampo pej ne cati na prãm atajê ri, Pahpãm mã ihkĩn nare, ne ahna cupê ihkêanre.

¹⁶― Pê Jowãw te me cumrãr catê cator xà wỳr, ihtỳj ajco me Mojxe xwỳ jõ kàhhôc kampa, ne me Pahpãm jarkwa na ihcakôc catêjê kampa, ne ajco ihkôat ame ipa. Ata japu na, wa mehcunea mã Pahpãm pê pjê jõ Pahhiti na harẽn to mõ, ne ahpỹanre na Pahpãm himpej xà mã mencjêj prãmte ame amji mã carôt. ¹⁷Xà quê ha pijamã jũ caxuw côjkwa me pjê hamre? He quê ha ihtỳj jũ caxuw hamre, ne Pahpãm jarkwa nare, quê ha quêt jũ caxuw hamre nare. Quê ha nee Mojxe xwỳ jõ kàhhôc kam hàhhôc kryjre hikwa itajê nõ ipictor nare.

¹⁸― Ne quê ha me hũmre nõ apu hĩxi caca ne cumã hikra, ne ma tẽ ne ajteare mã cahãj nõ me hikwa na, quê ha cupê hũmre inxyre ata, ne ihkêanre ne. Quê ha cupê hũmre nõa te cahãj mã hikran ata me hikwa ata, ne hanea ne cuxà inxyre ne, ne ihkêanre ne.

Hakràjti me Raxaro pê hamreare nare ata jarẽn xà

¹⁹― Ỹhỹ wa ha me amã me hakràj te amji kam hapac xà kôt harẽ. Ỹhỹ, pê hũmre nõ jakràj cati, ne ajco ihkà impej to pit mã ihkà, ne ajco amcro cunea kam hõ impej pit kur to ipa, ne ajco amji kĩn catia ton to ipa. ²⁰Pê hanea ne hũmre nõ pê hamreare ata japrỳ Raxaro. Ne ihkà xêt, ne hĩ cunea kam ahna cuhê. Pê Raxaro jũkjê atajê ajco hũmre jakràj cati ata wỳr me to pra, ne hũrkwa jarkwa mã me cunõ. ²¹Pê ajco curia harkwa mã hikwa. Por hakràj catê ata jàpàn xà pê hõ pihur, mã cute to harte prãmte ajco hikwa. Pê hanea ne rop ajco hỹrmã pra ne cumã cuhê atajê cũmtwỳ.

²²― Ne ty, pê me hĩ jarêt, pê Pahpãm mã imprar catêjê côjkwa pĩn, ma mempejti tyc atajê krĩ xà wỳr me caxwỳn to tẽ, ne me panquêtti Aprãw xwỳ kjê kam me hỹr, pê huwahi ne to jỹ. Pê hanea ne hakràj catê ata ty, pê me hĩ jarêt.

²³― Pê Raxaro kĩnte mehtyc kêanre atajê krĩ xà kam, cute me amji pupun xà kêanre xà ata kam amji pupu. Ne irĩt, ne ihmat ri cute Aprãw xwỳ pupun, ne cute hĩkjê rũm Raxaro xwỳ pupun. ²⁴Ne cumã caràr to: “Quêtti Aprãw, icaprĩa ne! Imã Raxaro kujate, quê cô to hũhkrahhi inco ne to ijarkwa jakry! Ampo na? He wa cuhy ita kam amji pupun xà kêanre to amji pupu!” hane.

²⁵― Mã Aprãw cumã: “Itàmxwỳ, he pê ca cormã atĩr reria mã ajco quêt amji mã ampo pejti cunea incwa ata to ca amji japackrea ne. Pê Raxaro ajco akĩnte girôa pê amji mã ihkên pit cwa. Ne ita caxuw ri quêt imã caprĩ, mã apu hakry ne ampo ita cunea to amji mã amji kĩn. Ca ihkĩnte, ita caxuw amji pupu he. ²⁶Ne xwỳjê mã, me pahcote na pjê catacti ita kam, cu nee me pahnõ ajpẽn wỳr parêr nare” hane.

²⁷― Mã hakràj cati ita cumã: “Ỹhỹ, quêtti Aprãw, wa ha awỳ, ca kepê inxũ jũrkwa wỳr Raxaro kujate. ²⁸Quê cormã curi me ikjêjê te xĩc ne me hàhhuc atajê mã mehkên cawpa, mãr quê mehkên ton jicu, ne nee ikrĩ xà kêanre ita wỳr memprar, ne icuxà me amji pupun xà kêanre to hajỹr nare” hane.

²⁹― Mã Aprãw cumã: “Pom ramã me akjêjê mã Mojxe jõ kàhhôc me, Pahpãm jarkwa na mehcakôc catêjê jõ kàhhôc itajê. Ne quê ha taa me cumã ita to hahkre, ne me hapackre ne me cumã ihcawpa. He me cumã ihcawpa xà ita caxuaw ri ihkàhhôc atajê” hane.

³⁰― Mã cumã: “Hamreare quêtti, jũ wỳr quê ha ihkàhhôc itajê kampa. Quê ha quêt jũm tyc ata hacpỹa mã ihtĩr, ne me hỹrmã cato, quê ha ihtỳj me kampa, ne mehkên itajê jicu” hane.

³¹― Mã Aprãw cumã: “Quê ha cute nee Mojxe jõ kàhhôc par nare, ne hanea ne nee me Pahpãm jarkwa na ihcakôc catêjê jõ kàhhôc par nare na, quê ha nee jũm hacpỹa mã jũm tĩr ata kam hapac nare” ― hane. Hõ, Jeju te Parixêw catêjê mã hũjarẽn to hajỹr.

Mehkên cunea jicu kôt harẽn xà

^1-2Ne Jeju te hipêr ihkôt me ipa catêjê mã:

― Ỹhỹ, ampeaj kam quê ha hõtpê mehkwỳ, Pahpãm cuna mã mehkên xà kêanre to. Ne pỳj me xi, por cute me cumã mehkên to hahkre, ne me cumã to mehhimpej atajê, quê ha ame amrãa to ame amrã. Ampo na? He quê ha Pahpãm, por cute jũmjê kryjre mã mehkêanre to hahkre atajê, quê ha Pahpãm mehkên mã me cumẽ. Ne mehkên mã me hàr xà ata ri ihkêanre. Quê rỳ mã mehkên kêanre ata xwỳjrea na memput na kẽn pytĩa nõ mã hê, ne côxwa tua kam ahna me cumẽ, quê cô me hipej. ³Co he, me guphê! Quê ha atõ ampo to ato kên, ca ha intête cumã. Quê ha ihkên ita jicu, ca ha cute ato kên ata to tojnõ, ne nee to amji japackre nare. ⁴Quê ha atõ, amcro pyxit kam, ato kên to xet, ne awỳr pra ne amã: “Wa ha ite ato kên ita jicu. Ne nee hipêr ato hajỹr nare. Ikam acryc nare” hane. Ca ha atỳj cute ato kên ita to tojnõ, ne nee to amji japackre nare ― hane.

Cu ha pahtỳj Jeju to amji mã me pahhimpej to prãm

⁵Mã ihkôt me ipa catêjê te ita na me Jeju kam hapac, cwỳrjapê ri cute ahna me hàhwỳr to:

― Ỹhỹ, me ijõ Pahhi. Wa me hirôa pê amji mã me ato ihimpej na me itehcajpa ― hajỹr.

⁶Mã me cumã:

― Ca nee cormã ito amji mã me ahimpej nare. Kepê ca ito amji mã me ahimpej kryjre to hanea, pom quê ampo hy kryjre ita he, ne atỳj ampo pĩ pàr catia xa ita mã garkwa ta, ne cumã: “Garê mea mã amji capa, ne ma côxwa kam amji kre” hane. Quê ha pĩ pàr ita ihtỳj me akampa, ne me akam hapac to kênre nare, ne ma côxwa kam amji kre ― hane.

Cama me cumã hàpên catê jàpên jarẽn xà

⁷Ne hipêr me cumã:

― Quê jũm cama me anõ mã hàpên catê na ipa, ne amã pur kam apê, ne amã carà cahàcre hôhti jamã, ne pyt xàr xàa wỳr pur pĩn amji jaxà, ca ha ajkĩ cumã: “Hamre, ate gàpên xà jicu ita kam gapacta ne gàpàn xà na jỹ ne apà” hane? ⁸Jũ wỳr ca ha cumã hane. Ca ha ajteare mã cumã garkwa to: “Hamre, ita caxuw ca ha akà pro xà to amji pro, ne imã ijõ nõ to, ne imã agõ, wa ha apà ne ikõ, jirô pê mã ca ha gapacta ne apà” hane. ⁹Nare ca ha ajkĩ amã hàpên catê ata mã: “Ca ate ipar pejti, ne ate itehcajpar to catia, cwỳrjapê ri apyrên ijakry” hane? Jũ wỳr ca ha cumã garkwa to hane.

¹⁰― Mẽr hõhõ, he me apê hàpên catê nõ ata pyràac. Na ca ha ate me, pom ite ampo cunea na me amẽn itajê ton na, ca ha me amji jarẽn to hane he: “Me ipê me amã me ijàpên catêjê kêanre, wa me ite, por ampo na ate me imẽn ata to pit mã me ijàpên, ne nee garkwa jirô pê, amjia kôt hipêr me ijàpên nare” ― hane. Hõ, Jeju te ihkôt me ipa catêjê mã to hahkre to hajỹr.

Pê Jeju mehkà xêt te tej caprã

¹¹Pê ma Jeju Krĩpinkrên wỳr mõ, ne Krĩrĩtpej me Hĩpôjajo jõ pjê te ajpẽn mã ahhyr cajpuw mõ. ¹²Ne ramã krĩ jacot mã hàr xàa kam, pê mehkà xêt catêjê me tej ne hỹrmã me pra. Ne ampỳa mã me ahtwỳ ne me xa. ¹³Ne ame caràr, ne me caràar kam me Jeju na hàhwỳr to:

― Pahhi pê Jeju! Me icaprĩa ne! ― hane.

¹⁴Mã Jeju te me hõmpun, ne me cumã:

― Amũ me pra, ne Pahpãm mã mehcajrẽn catêjê wỳr me axà, quê me gaxàjre ata jakàn pê ame apupu, ne ame akôpĩr to impej, ne ame gakrô ― hajỹr. Mã me hỹrmã memprar kwỳa kam, mã ramã mehcunea impej to mõ.

¹⁵Mã mehkà xêtti atajê nõ te ramã caprãr na amji cajpẽr, ne amji kà pupun, ne Jeju wỳr amji jaxàr pyrentu, ne kỳj cati pêa mã caprãr pyrên hakryti na, côjkwa kam Pahpãm to hàmnãn to mõ. Ne jũm ata pê nee Juta catêjê nõ nare, ne cupê Krĩrĩtpej jõ pjê catêjê nõ. ¹⁶Ne Jeju wỳr cator, ne cuna mã hõ pôrpo ne nõ, ne cumã:

― Ỹhỹ, ikrã tũm ampeaj kam apej, ne ate icaprãr xà ita pyrên ampeaj kam ijakry ― hane.

¹⁷Mã Jeju te ihcukij ne cumã:

― Pỳhàpà, jõ ri mã me akwỳ cahhur? Xà nee ite me acunea caprãr nare na mã apyxit peaj te amji jaxàr? Jõ ri mã me akwỳ kwỳ te me nowi atajê? ¹⁸Ampo na mã apê mehcahkrit pê nee Juta catêjê nõ nare ita te pit mã amji jaxàr, ne Pahpãm mã hũrên gakry na amji jarẽn to mõ? ¹⁹To xa ne mõ. Ca ito amji mã ahimpej, cwỳrjapê ri ramã acaprãr pejtu ― hajỹr, mã ma tẽ.

Pahpãm te pjê to ihhimpej kôt harẽn xà

²⁰Mã amcro nõ na Parixêw catêjê nõ te Jeju cukij, ne cumã:

― Jũ caxuw mõrmõ quê ha Pahpãm pjê cunea to ihhimpej kam tẽ? ― hajỹr. Mã Jeju cumã:

― Quê ha ihtỳj Pahpãm cato, cute pjê ita to ihhimpej xà caxuw. He jũ wỳr ca ha ampo pupu, ne ihkôt amcro nõ na cator xà ata jahkre pej. ²¹Quê ha ihprõt pê cato. Cwỳrjapê jũ wỳr quê ha jũm amã harẽn to: “Hõmpu he, pjê ita to ri Pahpãm himpej xà” hane. Nare, quê ha amã: “Hõmpu he, ihmat ri pjê ata to quê ha ihhimpej” hane. He ramã Pahpãm te me acaxwãm pê, me anõ mã, cute amji kam hapac xà to ihhimpej ― hane.

Jeju te amji jaxàr xà kôt harẽn xà

²²Mã cute mehkôt me ipa catêjê mã:

― Quê ha jũ caxuw ipê me Ahàkà jõ amcro kam ahtwỳ, ca ha amcro atajê pupun prãm cakrô, nee hõmpun nare. ²³Quê ha mehkwỳ me amã: “Ita ri ca Pahpãm pupu he” nare quê ha me amã: “Ihmut ri ca hõmpu he” hajỹr cakrô, quê ha nee cator xà hajỹr nare. Cwỳrjapê ca ha nee me harkwa kôt apu hapên to apa nare. ²⁴Quê ha ipê me Ahàkà jõ amcro ihprõt pê cato. Quê ha me icator xà pê ihhêj rũm pahhàjê cuxê pyràac. Pom pahhàjê cuxê ne côjkwa cunea cujro ita na, quê ha icator xà hane. ²⁵Ne icator xà ita wỳr, quê ha xa me amji pupun xà kêanre to me amji pupu, ne ame icurê.

²⁶― Ne por pê me panquêtti Nowe xwỳ jõ amcro ajco hapôj ata na, quê ha me ijõ amcro hane. ²⁷Ne por ihtỳj ajco mehcunea me apà ne me ikõ to me ipa. Ne nee amji na me ampo cãmjĩ nare kam, me hũmre me pyjê ajco me hikwa tuw to mõr ata kam, pê ahnaa Nowe xwỳ te pàr kreti mã hàr jõ amcro kam ahtwỳ. Ne me hàr jirô pê, pê cô cati cato, ne mehkwỳ jipej tu.

²⁸― Ne menquêtti Ro xwỳ jõ amcro ata kam pê me hanea. Ne nee amji na me ampo cãmjĩ nare kam mehcunea ajco me apà, ne ajco me ikõ, ne ajco ame ampo jũhkàr to me ipa, ne ajco ihpore to ampo na me hàhpan to me ipa, ne ajco pur kam ame ampo hy kre to me ipa, ne ajco amji mã me ikre pyxwỳr to me ipa. ²⁹Ata jõ amcro kam, pê Ro xwỳ Krĩhpôc jõ krĩ pê cato, pê ihprõt pê kẽn te cuhy côjkwa pĩn ihpỳm, ne krĩ me, mehkwỳ cunea to caxàr tu.

³⁰― Hõ, quê ha me Ahàkà cator xà jõ amcroa kam ahtwỳ, quê ha hanea. ³¹Ne amcro ata kam, ca ha me anõ ikre jõ mã ahtyc mã apu mõ, ne ma atẽm pyrentu, ne nee ampo pyr prãmte gũrkwa mã axàr nare. Ne me anõ pur kam apu apê, ne nee hacpỹ ne gũrkwa wỳr atẽm nare. ³²Co he, Ro xwỳ prõ te hacpỹ mã Krĩhpôc jõ krĩ wỳr ihtẽm prãm, cwỳrjapê ri ihtyc, na ca me to amji japackre. Na ca ha nee me hajỹr nare! ³³Quê ha jũm apu ihtĩr prãm, ne ihtỳj amji to acto. Ne jũm te amji to ipictor prãm ata, quê ha Pahpãm cahê na ihtĩr rohnỳtti mã.

³⁴― Ne caxwa ata kam, quê ha me hũmre ajkrut ne me nõ, me hikwa xà kam, quê ha pyxit ne me haprô, quê ha pyxit ne ahtwỳ. ³⁵Quê ha me cahãj me ajkrut ne ame arỳjhy twỳ, quê ha me pyxit ne me haprô, quê ha pyxit ne ahtwỳ. ³⁶Ne me hũmre ajkrut ne pur kam ame apê, quê ha me pyxit ne me haprô, quê ha pyxit ne ahtwỳ ― hane.

³⁷Mã ihkôt me ipa catêjê te mehcukij, ne me cumã:

― Jeju, jõ ri quê ha ita hane? ― hajỹr. Mã Jeju me cumã:

― He me apê xônti pyràc, ne nee cormã ne ate me hahkre pej xà nare cakrô, quê ha jũ ri cumã ampo ty, quê ha ihtỳj ahna cuprõ ― hane.

Mehcukij catê te cahãj tehcajpar prãm nare jarẽn xà

¹Quê hãn ne hõtpê Pahpãm mã mehcakôc, ne nee quê jũ caxuw intête me amji hi kwĩn nare, prãmte ri Jeju te me cumã hũjarẽn xà ita jarẽn. Hõ, cute harẽn to hajỹr he:

²― Ỹhỹ, pê hũmre nõ ata pê mehcukij catê, ne cupê me hõ pahhi. Ne nee ajco amji mã Pahpãm cupa, ne harkwa kôt ipa nare. Ne hanea ne nee cumã jũm cupa nare, ne krĩ nõ ita kam ihkrĩ. ³Pê hanea ne krĩ ata kam jũm cahãj pê impjên ty ata ihkrĩ. Ne ahte ajco apu ipa. Ne ajco mehcukij catê wỳr pra ne cumã: “Itehcajpa, ne icurê xwỳn ata na ahcukij, ne cumã garkwa ta, quê hacpỹa ne imã ampo pê itekjêa atajê gõ” hane.

⁴― Pê amcro jàhtôa kam ma mehcukij catê ita apu cahãj ita tehcajpar caca. Pê ajco mãnea mã cahãj ata amji caxuw ihcukij to ipa. Mã jũ ita caxuw cute amji mã: “He nee imã Pahpãm cupa nare, ne nee imã jũm cupa nare cakrô, wa ha itỳj cahãj ita tehcajpa. ⁵Ampo na? Cahãj ita cama apu icahpêrkàr to ipa, cwỳrjapê wa ha ahcukij ne hũtà. Nãmri wa ha ite to hajỹr nare na, quê ha ihtỳj ito hamre” ― hajỹr.

⁶Ne Jeju ihkôt me ipa catêjê mã:

― He mehcukij catê kêanre ita jarẽn kam me gapac to impeaj ne. ⁷He Pahpãm pê nee mehcukij catê kêanre ata pyràc nare. Ne quêt ihtỳj mehkwỳ, caxwa me, amcro kam amji tehcajpar xà caxuw ame cumã caràr to me ipa atajê tehcajpa ne me hũtà. Xà quê ha ajkĩ cute mehtehcajpar xà ita wỳr apu ihkên? Quê nare! ⁸Ampeaj kam wa me amã awjarẽ, Pahpãm quê ha ihtỳj mehkwỳa pytà, ne mehtehcajpa, mehcukij ne me to ipicokjêr xà jõ amcro kam, ne hũjarêan kam to.

― Ne quê ha pijamã pjê kam jũm ipê me Ahàkà cator xà ata jõ amcro kam, amji mã ito ihhimpej? ― hane.

Me hũmre pijakrut Pahpãm mã mehcakôc jarẽn xà

⁹Ne pê me hũmre kwỳ atajê mehkwỳ jirôa pê mempej na me amji to hane. Cwỳrjapê ri Jeju te me cumã hũjarẽn xà ita to hũjarẽn to hajỹr he:

¹⁰― Ỹhỹ, me hũmre pijakrut ne ma Pahpãm to me amji kam hapac xà jũrkwa wỳr me tẽ, cumã mehcakôc prãmte. Ne ihnõ ata pê ri Parixêw catêjê nõ, ne ihnõ ita pê ri pjê jõ pahhi jarkwa kôt me hũhkra kam hàmcwỳr catê.

¹¹― Mã Parixêw catêjê nõ ita xa, ne hirãa pê Pahpãm mã ihcakôc, ne ampo pyrên hakry na cumã amji jarẽn to: “Ỹhỹ, me ijõ Inxũ, nee mã ipê ijàhkĩj xi catê nare, ne nee ipê me cumã ihêj xi catê nare, ne nee wa apu, por me ikwỳ amji pê mehprõ caxun to ipa atajê cuxà me cupê mehprõ caxun to ipa nare, wa nee hajỹr nare. Nee mã ipê pjê jõ pahhi jarkwa na me hũhkra kam hàmcwỳr catê xa ata pyràc nare pyrên ijakry. ¹²Wa ijõtpê ipijacri impejti to ipa, ne amcro te xet ita kam, amcro pijakrut ita kam, wa nee ampo kur to ipa nare. Ne wa hanea ne ampo cunea to itekjê atajê, quê ha imã ihkrã tej wa ha ijõtpê to ajcrà, ne hãn ne pyxit ne gũrkwa mã hacjê. Cwỳrjapê ca ha ito impejti ne” hane. Hõ, cute Pahpãm mã ihcakôc xà to hajỹr.

¹³― Mã me hũhkra kam hàmcwỳr catê ita ihpahàmte, ihkĩnte ampỳa mã xa, ne nee kàj mã, côjkwa wỳr, ihkuc to irĩt nare. Ne cama apu hitôhkre kam amji cahhy, cumã amji kĩn nõ xàhte, ne ma Pahpãm mã ihcakôc ne cumã: “Ijõ Inxũ, he ipê ikên ton catê, icaprĩa ne” ― hane.

¹⁴Mã Jeju me cumã:

― Ampeaj kam wa me amã awjarẽ. Pom hũmre te Pahpãm mã ihkêanre na amji jarẽn ita ri, cuna mã cumã impej, ne nee ihkên nare. Ne ma quêt impej pêa mã, cute amji jaxàr ikre wỳr. Mã ihkĩnte Parixêw catêjê nõ ata ri Pahpãm mãa ihkêanre, na ri nee impej nare.

― Ỹhỹ, quê ha jũm apu amji to cati prãm to ipa, quê ha ihtỳj Pahpãm to incri. Ne jũm amji to incrire prãm to ipa ata, quê ha ihtỳj Pahpãm to cati ― hane.

Jeju me, me ahkrare

¹⁵Mã krĩ ata kam mehkwỳ te me ahkrare kwỳ japỳn, ne ma Jeju wỳr me to pra, cute me ahna hũ nõr, ne Hũm mã mehcajrẽn prãmte. Mã ihkôt me ipa catêjê te ahna me hõmpun, ne ame kam mencryc, ne ma intête ame huwahi. ¹⁶Mã quêt Jeju te amji wỳr me ahkrare na hàhwỳr, ne ihkôt me ipa catêjê mã harkwa to:

― Quêt taa me ahkrare itajê ajpên iwỳr me mõ, amehcahpêrkàr nare. Quê ha jũmjê itajê pê me ahkrare itajê pyràac, ne ihtỳj jũmjê itajê Pahpãm himpej xà mã me axà. ¹⁷Ita to me amji japackrea ne, quê ha jũm Pahpãm himpej xà na amji caxàr to hanea, pom quê ahkrare te ahna me amji caxàr he, ita na quê ha ihtỳj jũ caxuw Pahpãm krac ri me axà ― hane.

Pê pahhi jakràjti nõ ata Jeju cukij

¹⁸Mã Juta catêjê nõ pê pahhi cator, ne cute Jeju cukij, ne cumã:

― Me imã ampo to hahkre catê, pom quêt apejti ita, jũ mã wa ha ne ityc jirô pê me Pahpãm jõ krĩ kam apu ipa to? ― hajỹr.

¹⁹Mã Jeju cumã:

― Ampo na mã ca apu ipej na ijarẽ? Ampo na? Nee me pahnõ impej nare. Me Pahpãm pyxit peaj ri ne impeaj to impej. ²⁰Pom ramã ate me Pahpãm jarkwa jahkre pej ita, pê me pamã harkwa to hane he: “Nee ame cupê mehprõ caxun nare, ne nee amehcuran nare, ne nee apu gàhkĩj nare, ne nee apu ahêj xi jarẽn nare, ne atỳj me apãmjê me, me axyrxwỳ jarkwa to me amji japackre to me apa” ― hane.

²¹Mã hũmre ita cumã:

― Ỹhỹ, icrire naa mã, wa Pahpãm jarkwa kôt amji to ihimpej to ipa ― hane.

²²Mã Jeju te ita na impar ne cumã:

― Ỹhỹ, ca ha cormã ampo pyxit peaj ata to. Ca ha amũ tẽ, ne amji pê ampo cunea to ihpore na ahpa, ne me cupê hamreare atajê mã ihpore cunea jõr pa. Ca ha ate ampo itajê to hajỹr na, wa ha côjkwa kam ate amji pê ampo jõr atajê jirôa pê amã ampo pej pit gõ. Ỹhỹ, ca ha ate hajỹr ne ampo itajê to amji caprãr na, ca ha ajpên tẽ, ne atỳj amji to ikôt apa catê na ― hajỹr.

²³Mã hũmre ita te ita na impar, ne cumã amji kĩn nare, ne ihpeacre. Ampo na? Cupê hakràj cati na pê cumã hàhcukrêj atajê japê. ²⁴Mã Jeju te cumã amji kĩn nare na hõmpun, ne ihkôt me ipa catêjê mã:

― Hamreare, jũ wỳr quê jũm jakràj cati ihtỳj Pahpãm te ihhimpej xà ata mã axà. ²⁵Ampeaj kam, quê ha nee jũm jakràj cati nõ Pahpãm te ihhimpej xà ata mã hàr nare to hane, pom quê nee cawrô cahàc kô jarôti nõ aguj te kre na cator xà nare he ― hajỹr.

²⁶Mã cute me ita par catêjê ita na me ahcukij, ne me cumã:

― Mẽr, jũ mã quê ha me, ne jũm amji pytà, ne cumã axà? ― hane.

²⁷Mã Jeju me cumã:

― Jũ wỳr quê me hũmre nõ ampo itajê nõ to. Ne quêt me Pahpãm mã ri ihtỳj ampo itajê cunea ton jahkre pej ― hane.

²⁸Mã Petrô cumã:

― Me ipupu he, wa ite me ijũrkwa jicu, ne me apynãr ― hane.

^29-30Mã Jeju cumã:

― Ỹhỹ, ampeaj kam wa ha me amã awjarẽ, quê ha jũm te Pahpãm himpej xà ata cwỳrjapê hũrkwa jicu, ne ihprõ rer, ne mehkjêjê rer, ne me hũmjê rer, ne menxyrxwỳ rer, ne mehkra rer na, quê ha pjê ita kam ampo itajê jirôa pê cucwa, ne ihtyc jirô pê mã Pahpãm cahê na ipa, ne ihtĩr rohnỳtti mã ― hane.

Pê Jeju hipêr ihtyc me hacpỹa mã ihtĩr xà jarẽ

³¹Mã ma Jeju te me hàhtôa atajê intête ihkôt me ipa catêjê te tôxi atajê japrôr ne me to mõ, ne me cumã:

― Me ikampa! Cu ha ma Krĩpinkrên wỳr me mõ, por pê rỳ pêa mã Pahpãm jarkwa to ihcakôc catêjê ahna ihhôc ata wỳr, ne curia quê ha ame ipê Ahàkà to kên. ^32-33Quê ha Roman catêjê jũhkra mã me haxà, quê ha ame cumã, ne ame hũn, ne ame kam harcô rẽ, ne amehcahhy, jirô pê mã quê ha mehcura. Quê ha ahna amcro incrê, quê ha hacpỹa mã ihtĩr ― hajỹr.

³⁴Mã ihkôt me ipa catêjê te me ita par pej nare, ne nee cute me Jeju jũjarẽn xà ata jahkre pej pej nare. Ne cute me hahkre pej xà ita me cupê ipimxur tu.

Pê Jeju into tũm nõ caprã

³⁵Pê Jeju Krĩcuxwati na hàhtêp to mõ, pê hũmre into tũm nõ pry jahkà kam jỹ, ne ajco me ahna ahwỳ. ³⁶Ne cute cahê na amji to me mõr na mempar, ne cute mehcukij, ne me cumã:

― Ampo mã? ― hajỹr.

³⁷Mã me cumã:

― Pom Naxare jõ krĩ pĩn Jeju cator ita ri mõ ― hane.

³⁸Mã into tũm ita jũpar, ne cute caràr kam ihtẽm, ne Jeju mã:

― Jeju! Apê pahhi Tawi xwỳ tàmxwỳ ita, icaprĩa ne! ― hajỹr.

³⁹Mã mam me mõ itajê cama ame kam incryc, ne ame cumã:

― Kêt! Ne aracri jỹ! ― hane. Mã hipêr cute caràr to:

― Pahhi Tawi xwỳ tàmxwỳ ita, icaprĩa ne! ― hajỹr.

⁴⁰Mã Jeju te impar ne hàhhuc, ne cute cumã hàkjêr na me mẽn. Mã ajpên into tũm ata to me mõ, ne Jeju na me to hàhtêp. Mã cute ihcukij ne cumã:

⁴¹― Ampo na ca prãm? Ampo to wa amã? ― hajỹr. Mã cumã:

― Ỹhỹ, Jeju, wa hacpỹa mã irĩt prãm ― hane.

⁴²Mã Jeju cumã:

― Rĩt! Ramã acaprãr. Ate ito amji mã ahimpej, cwỳrjapê wa ite hacpỹa mã ato to amã impej ― hane.

⁴³Mã hũmre ita irĩt pyrentu, ne ma cute Jeju pynãr, ne hacpỹa mã cumã into impej ita jahpan xà na côjkwa kam Pahpãm pejti, ne catihti na harẽn to mõ, ne cumã into impej pyrên hakryti na amji jarẽn to mõ. Mã mehcunea te me ita pupun, ne Pahpãm pejti na cute me harẽn kam mehtẽm.

Jeju me Xaquêw

¹Pê Jeju Krĩcuxwati mã axà ne ma krĩ japôc to mõ. ²Pê curi hũmre nõ japrỳ pê Xaquêw ita ihkrĩ. Ne pê hũmre ata pê hakràj catê. Ne cupê pjê jõ pahhi jarkwa kôt me hũhkra kam hàmcwỳr catêjê jõ pahhi, ne ajco hõ pahhi jarkwa jirôa pê me hũhkra kam amcwa, ne amji mã huwahi. Cwỳrjapê pê mehcunea mã ihkĩn nare ne ma ame curê. ³Pê tee ajco apu Jeju pupun ne hahkre pej prãm, ne jũ wỳr quê hõkre nõre ita kam, ipu na me hàhtôti ita kam hõmpu. ⁴Ne ma cute hõmpun prãmte, hĩpê cumam ipicahur ne pĩxô pàr na hàpir, por pê ihkrac ri mõr xà ata na. ⁵Mã Jeju mõ ne kàj mã irĩt, ne cute Xaquêw pupun, ne cumã:

― Xaquêw, awrỳc pyrentu, wa ita kam gũrkwa kam ijàhhuc to prãm ― hajỹr.

⁶Mã Xaquêw jũjarêan kam iwrỳc, ne cute cumã amji kĩan kam hũrkwa kam ahna amji caxàr. ⁷Mã mehcunea te me ita pupun, ne ahna me cupê ihkaj na, cwỳrjapê ri cute ahna mehcakôc kên kam mehtẽm, ne me amji mã:

― Pỳhàpà, quê ha Jeju ajte ihkrã kên catê ita jũrkwa kam ahtwỳ ― hajỹr.

⁸Ne me hàpàn jirô pê mã ri Xaquêw xãm, ne cute Jeju mã amji jarẽn, ne cumã:

― Ijõ Pahhi, ikampa, wa ha me cupê hamreare atajê mã ijàhcukrêj jĩkjê gõ. Ne me cupê ijàhkĩj atajê, wa ha hacpỹa mã me cupê ijàhkĩj pyxit jahpan xà na, me cumã ijàmjõr to cwat ― hajỹr.

⁹Mã Jeju cumã:

― He ampeaj kam ate amji kam gapac xà ton ita na impej. Ne toa ca ate mehcunea mã hanea ne apê Aprãw xwỳ tàmxwỳ na amji jarẽn. Cwỳrjapê quê ha ita kam, Pahpãm ikre ita kam mehkrĩ catêjê itajê kên catia pê me hũtà. ¹⁰Ỹhỹ, ampo na ri ipê me Ahàkà pjê ita kam cator? He cute me ipictor catêjê japên, ne Pahpãm wỳr me haprôr xà caxuw ― hane, ne ma ihkôt me ipa catêjê me, me mõ.

Ihpore hô catia te tej jarẽn xà

¹¹Ne ramã Krĩpinkrên na hàhtêp, cwỳrjapê ri me cumãa ramã Pahpãm te ihhimpej xà ata cator xà kam hàhhuc xàa kam na amehcãmjĩ. ¹²Cwỳrjapê ri Jeju te me cumã Pahpãm himpej xà to hahkre prãmte me cumã hũjarẽn xà nõ ita jarẽn, ne me cumã:

― Ỹhỹ, pê hũmre ita cati, ne cupê pahhi nõ ita kra. Ne ajco amji to pjê jõ pahhi to prãm, cwỳrjapê pê ma pjê nõ jũwrya kam pahhiti cati ihkrĩ ata wỳr tẽ, cute amji to pjê jõ pahhi prãmte. Ne hỹrmã ihtẽm jirô pê, quê ha cupê pahhi ne amji jaxà. ¹³Ne ihtẽm xà wỳr, cute cumã me hàpên catêjê te tej atajê capi, ne me hahkre pej prãmte me ahna hàhwỳr, ne cute ahpỹanre na me cumã ihpore hô catia pyxit ne hõr par. Ne cute me cumã harkwa hyr, ne me cumã: “Ihpore hô cati ita py ne to tẽ, ne gapacta ne kam me to apixô to mõ. Krãa caxi, jũ mã ca ha me, ne ihpore hô ita kam me to hàhtô to amõr to? Mãr wa amji jaxà, ne cormã me gahkre pej” hajỹr. Ne ma pjê nõ wỳr tẽ.

¹⁴― Pê hõ pjê kam me curê xwỳn kwỳ amehkrĩ atajê ma hũmre ita pê me hõ pahhi na amehcaca. Ne ma ihkôt me jũmjê itajê kujate, cute pahhiti mã me hũjarẽn prãmte, ne me cumã: “Wa ma ame me ijõ pahhi na me hũmre ita caca” hajỹr cakrô, mã hũmre ita ihtỳj amji caxuw hõ pahhiti cukij, mã cute pjê jõ pahhi na ton.

¹⁵― Mã cupê pahhi, ne hũrkwa wỳr cute amji jaxàr. Ne cute me cumã hàpên catêjê mã ihpore hô cati jõr atajê na hàhwỳr, cute me hahkre pej prãmte, jũ mã mõrmõ cute me, ne ihpore ita to me ipicamẽn.

¹⁶― Mã mam ita hỹrmã cator, ne cute hõ pahhi mã: “Ỹhỹ, ijõ pahhi, ate imã ihpore hô pyxit ne hõr ata, hamre, wa ite kam to ipixô, ne hipêr hipy to tej ne kam incwỳr” hajỹr.

¹⁷― Mã cumã: “Ahnaa ri ita! Apê imã gàpên catê impeaj to impej. Ne apê ampo kryjre jamãr pejti catê, na ca ha ita caxuw ampo catia jamã. Wa ha krĩ te tej jõ pahhi na axãm” hane.

¹⁸― Mã cumã me hàpên catêjê nõ ita hỹrmã cator, ne cumã: “Ỹhỹ, ijõ pahhi, ate imã ihpore hô pyxit ne hõr ata, hamre, wa ite kam to ipixô, ne kam to xĩc ne incwỳr” hane.

¹⁹― Mã pahhi ata cumã: “Taamã, ita caxuw wa ha krĩ te xĩc jõ pahhi na axãm” hane.

²⁰― Mã hapua na cumã hàpên catê ita hỹrmã cator, ne cute hõ pahhi mã: “Ỹhỹ, ijõ pahhi, ate imã ihpore hô pyxit ne hõr ata, wa ite cupẽhkà kam harĩj ne ma apu intê. Na wa ha hacpỹa mã amã cugõ. ²¹Ne acupate wa ite nee kam ampo to ipixô nare. Wa ite ramã gahkre pej pejtu, apê hũmre jàprêhti na. Ne ca atỳj me cupê ampo to ate atekjê nare atajê to pôj. Ne ate ampo kre nare atajê, ca gõtpê ame cupê ihkẽhkẽ” hane.

²²― Mã cumã: “Apê imã gàpên catê kêanre, wa ha garkwa ita kôt apu ato kên. Pom ramã ate ijàprêhti ita na ijahkre pej pejtu ita? Pom wa me cupê ampo to itekjê nare atajê incwỳr to ipa, ne pom wa ite ampo kre nare itajê, wa hãn ne me cupê ihkẽhkẽn to ipa ita? ²³Mẽr ampo na mã ate nee me ihpore jamãr catêjê mã ijõ pore ita jõr, mã kam cute me to imã ipicamẽn crire nare? Mẽr ampo na mã ate me cumã hõr nare? Ca ha kepê to hane na mã, wa ha ijõtpê hipêr ihkwỳ incrire ne kam cupy” hane.

²⁴― Ne cute cahê na mehcuhhê atajê mã: “Intête me ijõ pore hô ita capa, ne jũm mã cute tej ata mã, ca me agõ” hajỹr.

²⁵― Mã me cumã: “Pỳhàpà, me ijõ pahhi, pom ramã cumã ihpore hô te tej ita” hane.

²⁶― Mã me hõ pahhi me cumã: “Ampeaj kam wa me amã awjarẽ, por ampeaj kam me cumã hàhtô atajê, quê ha me cumã hàhtô atajê jirôa pê me cucwa. Ne mehkĩnte me cupê ihkryjre atajê, quê ha me cupê capa. ²⁷Ne hamre, ita caxuw, ajpên me icurê xwỳn atajê cunea japrô ne me to mõ, por ma me hõ pahhi na ame icaca atajê, ne icunaa mã, ikam mare mã me hipej tu!” ― hane.

Pê Jeju Krĩpinkrên mã axà

²⁸Ne hamre, Jeju te me cumã hũjarẽn xà ita jarẽn jicu jirô pê, ma Krĩpinkrên wỳr ihkôt me ipa catêjê me, me pra. ²⁹Mã ramã krĩ jacot japrỳ to ame Pĩxô jõ krĩ me, Mehkênpupunxà jõ krĩ na me hàhtêp, por Pĩxô jõ kẽn cahê na krĩ atajê na. Ne ma mam cute ihkôt me ipa catêjê to ipijakrut ne mehkujahêc, ne cute me cumã harkwa hyr to:

³⁰― Mam me tẽ, me pahcumam krĩ jacot ata wỳr, ne ca ha ramã me axàr xàa kam, me cawrô cahàcre kam nee cormã jũm jỹr nare ata pupu, ne ramã cumã hê hiahpuro ne xa. Ca ha me cumã hê pô, ne ajpên me to tẽ. ³¹Quê ha jũm ate me cumã hê pôn na me apupu, ne ahna me acukij, ca ha me cumã: “Pahhi ri apu ahna prãm, ne cute hỹrmã me ikujahêc” ― hane.

³²Mã ma ajwar me tẽ, ne Jeju te hũjarẽn xà atajêa na cute me hõmpun. ³³Ne cormã ame cawrô cahàcre mã hê pôan kam, mã cute me to hõ tekjê catêjê te ahna me hõmpun, ne mehcukij to:

― Ampo na mã ca ame cawrô cahàcre ita mã hê pô? ― hajỹr.

³⁴Mã me cumã:

― Pahhi ri apu ahna prãm, ne cute hỹrmã me ikujahêc ― hane.

³⁵Ne ma Jeju wỳr me to mõ ne to cator. Ne kam cute me cumã cupẽhkà jaxwỳr, ne cute kam hỹr na mehtehcajpar, mã kam hỹr. ³⁶Ne cormã to mõr prãam kam mã, cumam me cumã me hõ cupẽhkà capô, ne pry kôt me cumã nõr to mõ.

³⁷Ne ma ramã Krĩpinkrên na me hàhtêp to mõ, ne ramã Pĩxô jõ kẽn jõ ajpô xà mã me iwrỳc to mõ. Mã ihkôt me ipa catêjê jàhtôa ne ihkôt me mõ. Ne cute me Pahpãm carôt kôt Jeju jàpên xà pihho catia pupun atajê pyrên ame hakrya to ame hakry. Cwỳrjapê ri kỳj cati pêa mã cute me Pahpãm pejti na me harẽn kam me to ihtẽm. ³⁸Ne me caràr to me hane he:

“Me pajõ Pahhiti me pahwỳr cator!

Ne Pahpãm jarkwa kôt hãn ne ipa!

Mã côjkwa kam mehkrĩ catêjê atajê cunea pinkrinti.

Ne mehcunea te ramã cupê Pahpãm catia na me hahkre pej” hane.

³⁹Mã Parixêw catêjê kwỳ me hàhtôa jipôc ri amehcuhhê atajê ame Jeju mã, ne me cumã:

― Me cumã ampo to hahkre catê, akôt me ipa catêjê mã garkwa ta, quê me kêt ― hane.

⁴⁰Mã Jeju me cumã:

― Ampeaj kam wa ha me amã awjarẽ, quê ha me kêt, quê ha ihtỳj kẽn itajê me haxà kam, caràr kam ihtẽm pyrentu ― hane.

Pê Jeju Krĩpinkrên kam amrã

⁴¹Ne Jeju te Krĩpinkrên na hàhtêp, ne cute hõmpun ne apu caprĩ, ne apu kam amrã. ⁴²Ne incwỳar kam cute hũjarẽn to:

― Pỳj me hêj xi!

Krĩpinkrên kam me akrĩ catêjê, he me apê amji jahkre kêatre.

Wa tee me amã, me ate amji kam me gapac xà carĩcti to hahkre, ca ajte nee me amji caxwãm pê me amji to me acarĩcti prãm nare.

Me apê amji jahkre kêatre!

⁴³Ỹhỹ, quê ha amcro nõ na me acurê xwỳn me akrã tu ne, ne me ana ajxê.

Quê ha ame ana pjê hakôt ne ajpẽn wỳr me gagã, ca ha nee ame gapôj nare.

⁴⁴Quê ha me gũrkwa cunea to amehkêanre ne, ne me to hamre tu. Ne por kẽn te kwỳc caxwãm pê amehkrĩ atajê, quê ha mehkrare me, me hamre tu.

Nee quê ha krĩ ita jaxà kam kẽn nõ hàhhuc nare.

Ne nee hakàn pê cumã hãm xà nõ hàhhuc ne hãm nare.

Me apê amji jahkre kêatre to, ca nee ate me ipupun pej nare, cwỳrjapê ca ha me akên mã me axà.

Ne nee me amã Pahpãm jõ amcro cator xà ata na hahkre pej nare.

Ne cute me apytàr xà jõ amcro ata kam, ca ha ma hỹrmã ame apipkjêr caca ― hajỹr.

Pê Jeju me to Hũm Cati jũrkwa caprã

⁴⁵Ne Jeju Pahpãm to me amji kam hapac xà jũrkwa wỳr mõ ne cumã hàr, ne cute kam ihpore to ampo na me hàhpan catêjê japôj kam ihtẽm. ⁴⁶Ne cute me cumã harkwa to:

― Inxũ Cati jõ kàhhôc kam, ihhôc te harẽn xà ata te hajỹr he:

“Ỹhỹ, ijũrkwa pê kam imã mehcakôc xà” hajỹr.

Ca ajte ate harkwa kaj na me to me hàhkĩj xi jũrkwa ― hajỹr.

⁴⁷Ne pê Jeju ajco amcro cunea kam me cumã ampo to hahkre. Pê Parixêw catêjê me, me cumã Mojxe jõ kàhhôc to hahkre catêjê me, me hõ pahhi me, ajco tee ame Jeju curan prãm. ⁴⁸Ne jũ wỳr quê me ita to. Ampo na? Pê mehcunea mã Jeju par prãm na pê.

Pê Jeju Hũm Cati jarkwa kôt apê

¹Ne amcro nõ na, Jeju ame cumã ampo to hahkre, ne ame cumã Pahpãm jarẽn to mõ. Mã mehkwỳ cator, Jeju cukij prãmte. Ne mehkwỳ atajê pê Pahpãm mã mehcajrẽn catêjê jõ pahhi kwỳ me, Mojxe xwỳ jõ kàhhôc to hahkre catêjê kwỳ me, me prohti kam kwỳ. ²Ne hỹrmã me cator, ne cute me Jeju cukij to:

― Ỹhỹ, me imã amji jarẽ, jũm jarkwa kôt mã ca apu ampo itajê to? Ne jũm te mã ahna amã harkwa? ― hajỹr.

³Mã Jeju mã cormã cute mehpro na to prãm nare, na ri me cumã:

― Ỹhỹ, wa ha hanea ne me acukij pyxit, ca ha me imã amji jarẽ, jirô pê wa ha itỳj hanea ne me amã amji jarẽ. ⁴Ỹhỹ, jũm te mã Jowãw mã harkwa, mã cute cô kam me cumrãr? Xà côjkwa kam Pahpãm te mã cumã harkwa? Nare xà ajkĩ pjê kam me hũmre nõ te mã cumã harkwa? ― hajỹr.

⁵Mã cute me ajpẽn cukij kam mehtẽm, ne me ajpẽn mã:

― Ampo cu ha ajte me cumã harẽ? Cu me cumã: “Pahpãm te ri Jowãw mã harkwa” hajỹr na, quê ha hipêr me pahcukij, ne me pamã: “Mẽr hõhõ, ampo na mã ca nee ate amji mã me Jowãw to hajỹr nare?” hane. ⁶Nare, cu ha me cumã: “Me hũmre nõa te ri Jowãw mã harkwa” hajỹr na, quê ha me hàhtôti itajê ma ame pahcaca, ne kẽn to ame pahcapê. Ampo na? Ampeaj kam ri me cumã Jowãw pê Pahpãm jarkwa na ihcakôc catê ― hane.

⁷Cwỳrjapê ri me Jeju mã:

― Wa nee ite me jũm te Jowãw mã harkwa hyr ata na me hahkre pej nare ― hane.

⁸Mã Jeju me cumã:

― Ca ma ame imã amji jarẽn caca, cwỳrjapê wa ha hanea ne nee me amã, por wa jũm jarkwa kôt apu ampo itajê ton to ipa ata na amji jarẽn nare ― hane.

Pur to me hàpên catêjê kên jarẽn xà

⁹Ita jirô pê mã ri Jeju te me cumã hũjarẽn xà itajê nõa jarẽn, ne me cumã:

― Ỹhỹ, hũmre nõ te hõ pur ata cunea kam amji mã pĩxô krô japrỳ te uwa atajê kre. Ne cute pur jamãr catêjê kwỳ mã hõ pur ata jahkre, mãr quê ma me hamã, quê hô ne intep. Ne ma pjê nõ wỳr tẽ, ne curi cute amji to putwrỳ jàhtôa.

¹⁰― Mã cute uwa to cuprõn xà jõ amcroa kam ramã hàhhuc, mã cute me hỹrmã cumã me hàpên catêjê nõ kujahêc, mãr quê pur jõ pahhi mã ihkwỳ ta, ne cute me hamãr catêjê mã cute me to hàpên jahpan xà na ihcahhur cunea juwahi prãmte. Mã ajte pur jamãr catêjê atajê amji mã pĩxô atajê cunea juwahi prãmte, cama amehcahhy, ne ma cute hũre kam mehkujahêc. ¹¹Mã cute hipêr me cumã hàpên catêjê nõ kujahêc, mã cute me to hajỹar ne me cumã ihpahàm catia ton, ne hanea ne amehcahhy, ne ma hũre kam cute mehkujahêc. ¹²Mã hipêr cute cumã me hàpên catêjê nõa kujahêc, mã pur jamãr catêjê te me to hajỹar, ne hanea ne ame to kêanre, ne ma pur pê me to cator.

¹³― Mã pur jõ pahhi ita te amji kam hapac, ne amji mã: “Jũ mã wa ha ajte? Ỹhỹ, wa ha hane, ne ma mehwỳr imã ikra kĩnti ata kujate. Quê ha ihhêaj to amji mã me hũpa, ne nee amehcaxun nare” hane. Ne ma cute me hỹrmã ihkra ita kujahêc.

¹⁴― Mã pur jamãr catêjê itajê te amji wỳr mehkra ata pupun, ne me ajpẽn mã: “Me hõmpu he, pom ihkra xũmre ajpên mõ ita pê pur jõ pahhi kra. Hacme ne mehcura, ne me to hamre, quê ha pur ita pê me pahtekjêa” hane.

¹⁵― Ne cute pur pê mehkra xũmre ata to me cator, ne cute amji mã me mẽn, ne mehcuran ― hajỹr. Hõ, Jeju te me cumã hũjarẽn xà ita to hajỹr jirô pê mã ri cute mehcukij to:

― Jũ mã mõrmõ quê ha pur jõ pahhi ita cute amji kam hapac xà ita to? ¹⁶Ỹhỹ, quê ha me to hane he. Quê ha mehwỳr cato ne me hũjamãr catêjê kêanre atajê cunea jipej tu, ne ajteare mã me hũjamãr catêjê kwỳ mã pur ita jahkre ― hajỹr. Mã cute me ita par ne me cumã:

― An! Ampo na mã cute mehkra ita curan? Quê me pa mã mã, wa ha nee mehcuran nare! ― hajỹr.

¹⁷Mã Jeju me hõmpun tỳjti, ne me cumã:

― He ihhêj ne me caa, ca ha ito me jũm kra ata pyràc ne me icura. Ampo na? Pahpãm jõ kàhhôc kam ramã harẽn xà ita te hajỹr he:

“Pom ikre to me hàpên catêjê ma ame ikre mã hãm xà caxuw

kẽn pejti caca ita te ihkwỳ jirôa pê amji to cati,

ne ihcuhtac tỳjti” hane.

¹⁸Ne ihhêj rũm ipê ikre mã hãm xà caxuw mam kẽn pejti cuhtacti ata pyràac, mã ma ame icaca, ne cute me ijicu. Co he, por quê ha jũm kẽn ata kam ihpỳm ata, quê ha apu hirên tu. Nare, quê ha kẽn ata jũm kam ihpỳm ne to hacrôre ne ― hane.

Pê me curê xwỳn hipêr Jeju cukij, cute ihkên mã me mẽn prãmte

¹⁹Mã me cupê Mojxe xwỳ jõ kàhhôc to hahkre catêjê me, me cupê Pahpãm mã mehcajrẽn catêjê atajê te, Jeju te me to hũjarẽn xà ata na amji na me hahkre pej pyrentu, cwỳrjapê ri ma ame curê, ne cama mehpro ne me haxàr pyrentu to prãm. Mã me hàhtôti te me Jeju par atajê mã ampeaj kam ihkĩn. Ne Jeju curê xwỳn atajê mã ampeaj kam me hàhtôti atajê cupa, cwỳrjapê ri nee cute me Jeju pro nare. ²⁰Ne ihtỳj cama amehkôpĩr to me ipa. Ne cute mehkôpĩr catêjê atajê mã me hàmjõr, mãr quê amehkôpĩ, ne ihtỳj ampo na mehcukij to ipa, ne ampo kênre kôt mehpro, ne krĩ jõ pahhi jũhkra mã me haxàr to prãm to ri ame ipa. Ỹhỹ, ihhêj ne põ rũm kam mempejti, ne me caxwãm pê, kam cute me amji kam hapac xà kêanre.

²¹Mã me hũmre atajê ame Jeju cukij, ne me cumã:

― Ỹhỹ, ampo to hahkre catê, wa ite ramã me acakôc xà me, ate ampo to me imã hahkre xà atajê pê ampeaj kam na me hahkre pej. Ne nee amã jũm cupa nare, na ca mehcunea to amji kam gapac xà to apipẽnti to apa. ²²Ne ampeaj kam caxi me imã awjarẽ. Xà wa ajkĩ itỳj me pjê cunea jõ pahhiti mã pjê jahpan xà na me ijàmjõr xà ata to me amgõ? ― hane. Ne pê cute mehcukij xà ata to, ihkên mã me mẽn prãmte pê amehcukij. Ampo na? Quê ihhêaj to Jeju me cumã: “Ca ha atỳj me amgõ” hane, quê ha me hàhtôti atajê ihtỳj ame kam incryc. Ampo na? He me cumã hàmjõr prãm nare, na quê ha ame kam incryc. Nare, quê ihhêaj to me cumã harkwa to: “Ca ha nee me gàmjõr nare” hajỹr na, quê ha pjê jõ pahhi mã me hàpên catêjê atajê ihtỳj ame kam incryc, na pê amehcukij to hane.

²³Mã Jeju te me cumã, cute amji kam me hapac xà kêanre ita na hũcapi pyrentu, ne me cumã:

²⁴― Ajpên me imã ihpore hy nõ, wa hõmpu ― hajỹr. Mã cute me cumã hõr. Mã cute me cumã:

― Mẽr jũm japrỳ me, ampo carõ mã ihpore hy ita kam nõ? ― hajỹr. Mã me cumã:

― Pjê cunea jõ pahhiti pê Xexa carõ me haprỳ ― hane.

²⁵Mã Jeju me cumã:

― Mẽr hõhõ, ca ha me pjê cunea jõ pahhiti pê Xexa mã me hàhcukrêaj gõ, ne hanea ne Pahpãm mã me hàhcukrêaj gõ ― hane.

²⁶Mã mehcukij catêjê itajê pê ihpro jahkre kêatre mã aracri mehcuhhê ne me ajpẽn mã:

― Pỳhàpà, cu amehpro prãm cakrô, mã cute ihcakôc xà ita to hamãr kênre nare ita kam, jũ mã cu ha me to, ne mehpro? ― hane.

Hacpỹa mã ihtĩr na ihkôt harẽn xà

²⁷Mã Xato xwỳ kôt me ipa catêjê ma apu mehtyc te hacpỹ mã ihtĩr na ame ahna aprã atajê kwỳ Jeju na me hàhtêp. Ne cute hanea ne me hàhcukjêr xà ata to, Jeju kên mã me mẽn prãmte, cute mehcukij to:

²⁸― Ỹhỹ, ampo to me cumã hahkre catê, pê Mojxe xwỳ me pamã incaca xà ita na ihhôc to hane he:

“Quê jũm ihprõ nõ me hikwa, ne nee kam ihkra nare kam ty, quê ha hĩxi ahte apu ipa.

Quê ha impjên tyc ita tõa cahãj pijapit ata me hikwa, ne kam ihkra.

Quê ha ihkra ita to amji mã me mam impjên tyc ata kra” hane.

²⁹Hõ, pê me pamã ahna ihhôc to hane. Ne pê xwahna jũmjê itajê me xet ne ajpẽn to mehkjêjê pit. Pê mam ihtõ kà ita hĩxi ata me hikwa, ne nee kam ihkra nõ juwahi nare kam ty. ^30-31Mã hanea ne ihtõ te amji to hapu te hajỹar ne cume hikwa, ne hanea ne kaam ihtyc. Ne pê me xet itajê cunea mehprõ pyxit ata me, me hikwa partu, ne mehprõ ita kam jũm te mehkra nõ rer nare kam mehcunea mehhi. ³²Mã hapu na mehkôt mehprõ ita te hajỹar ne ihtyc. ³³Ne mehtyc jirô pê, hacpỹa mã amehtĩr jõ amcro kam, cute me xet itajê cunea cume hikwa ita kam, jũm quê ha mehprõ ata to ihprõ? ― hane.

³⁴Mã Jeju me cumã:

― Me amãa, nee hacpỹ mã mehtyc tĩr xà nare, na mã ca ame icukij to hane. Ne ca ihkaj na ame to. He pjê ita kam pyjê me, me hũmre ihtỳj ame hikwa. ³⁵Ne por me Pahpãm kampa, ne catyt kam me ipa, ne me ty, ne hacpỹa mã mehtyc xà jahpa ne mehtĩr, ne Pahpãm wỳr me api, ne cahê na mehkrĩ atajê ri, nee me hikwa tuw xà nare. ³⁶Ne me cupê côjkwa kam Pahpãm jarkwa to memprar catêjê pyràac. Jũ wỳr quê jũm ty, ne jũ wỳr quê hanea ne jũm hikwa tuw. Ne me cupê Pahpãm kra. Ampo na? Hacpỹa mã amehtĩr, cwỳrjapê ri me cupê Pahpãm kra.

³⁷― He pê Mojxe xwỳ hirãa pê me amã hacpỹa mã mehtyc ne mehtĩr na to hahkre. Xà ca nee me aprêj pôc ne nee cute caxàr nare ata jarẽn to me amji japackre nare? Pê aprêj pôc te caxàr nare ata kam Pahpãm jõkre Mojxe mãaw jarẽ, ne cumã:

“Ipê apãm Pãm Cati, ne cormã ipê me aquêtjê Aprãw me, Ixac me, Jaco Pãm Cati wa” hane.

Ne nee pê amji jarẽn to:

“Pê ipê Aprãw me, Ixac me, Jaco Pãm Cati” hajỹr nare.

³⁸Ne cute amji jarẽn xà ita kôt ri me pamã Pahpãm pê mehtĩr jõ Pahpãm na hahkre pej, ne nee cupê mehtyc jõ Pahpãm nare. Pahpãm mã mehcunea tĩr pit, ne nee cumã jũm tyc nare. Cwỳrjapê cu me pahte me Aprãw xwỳ me, Ixac xwỳ me Jaco xwỳ tĩar na me harẽn par ― hane.

³⁹Mã Mojxe jõ kàhhôc to hahkre catêjê nõ kwỳ hanea ne curi mehcuhhê itajê te me cumã:

― Nee ate gũjarẽn xà ita to ihcupan nare. Ne gũjarẽn xà ita peaj to impej ― hajỹr.

⁴⁰Hamre, mã hipêr jũm mã ihcukij xà nõ to ihcukij prãm nare.

Pê Jeju hacpỹa mã mehcukij

⁴¹Mã Jeju cormã me cumã:

― Wa ha por pê Pahpãm jũm pê Crixtô to awjahkre ata na me acukij. He ca ajte Crixtô pê Tawi xwỳ tàmxwỳ tàmxwỳ na me harẽ. ⁴²Ne pê Tawi xwỳa ajco ihkàhhôc kam increr xà kam ihhôc to hane he:

“Ijõ Pahhiti te ijõ pahhi mã harkwa to hajỹr he:

‘Icahê na, Pahhi jỹr xà kam, awpôc rũm jỹ.

⁴³Wa ha apar krac ri me acurê xwỳn atajê cunea nõr na me to, quê ha me nõ, ca ha ate me tohjê na cute me gahkre pej xà na, me hipy apar xãm’ ” hane.

⁴⁴Pom pê Tawi xwỳ Crixtô to hõ pahhi na ihcukij ita kam, jũ mã quê ne cupê ihtàmxwỳ? Ampo na? He cormã Tawi ihtĩar na Pahpãm cahê na côjkwa kam apu ipa ― hane.

Pê Jeju me cumã Mojxe xwỳ jõ kàhhôc to hahkre catêjê cawpa

⁴⁵Mã me hàhtôti atajê ame Jeju kampa, mã Jeju te ihkôt me ipa catêjê mã harkwa to:

⁴⁶― Co he, me cumã Mojxe xwỳ jõ kàhhôc to hahkre catêjê to me guphêa ne, nãmri mehkà impeaj kam hãn ne ame ipa to prãm, ne hãn ne cute me hũpa kam me cumã mehcakôc na me to prãm. Ne ma hãn ne cute me cuprõn xà kam apu pjê kam mehkrĩ caca, ne mehkrĩ xà impeaj kam hãn ne mehkrĩ to prãm. Ne hanea ne me hõ pahhi jõ amji kĩn kam, hãn ne me hõ impeaj na mehprãm. ⁴⁷Ne hãn ne pyjê pê impjên tyc ne impijapit atajê mã amehhêj, ne hãn ne me cupê ampo to ahkĩ. Ne me cupê me hàhkĩj xi na amji to me ipimxur prãmte, hãn ne mehcunea kam mare mã Pahpãm mã mehcakôc to mehkrỹnre nare. Cwỳrjapê quê ha mehkên xà te me kam ipihur xà atajê me cumã ihkêanre ne ― hajỹr.

Pê impijapit Pahpãm mã hõ pore cunea gõ

¹Ne amcro nõ na Jeju, Hũm Cati to me amji kam hapac xà jũrkwa kam hãm ne xa, ne ame hakràj catihti atajê te mehpore jõr na me hõmpu, mã ihpore incjên xà kam me cucjê. ²Ne hanea ne cute jũm cahãj pê impjên tyc ne impijapit ata pupun, mã cute ihpore incjên xà kam ihpore hy to ipijakrut peaj ne hàr. ³Mã Jeju te ihkôt me ipa catêjê mã harkwa to hajỹr he:

― Ampeaj kam wa ha me amã awjarẽ. Cahãj pê hamreare ata te ri mehcunea jirôa pê ihpore jõr. ⁴Ne mehkwỳ jakràjti catêjê te me hõ pore cahhur jàhhuc atajê pit jõr. Ne cahãj ita nare, cute to amji to ipijapar xà ita ri, cute amji pê ihcunea jõr ― hajỹr.

Pê Jeju Hũm Cati jũrkwa jamre na harẽ

⁵Mã mehkwỳ Pahpãm to me amji kam hapac xà jũrkwa to amehcakôc to:

― Ampeaj kam ikre ita pej! Ne ahna kẽn itajê impejti! Ne kam cute ame Pahpãm mã ampo pejti jõr atajê cunea impejti ― hane. Mã Jeju te mempar ne me cumã:

⁶― Ỹhỹ, pom ampo cunea impejti ca ame hõmpu itajê, quê ha ihtỳj jũ caxuw ihcunea hamre tu, ne nee pom ca ame kẽn pupu itajê nõ hàhhuc, ne amji jipy nõr nare ― hajỹr.

Amji pupun kên jõ amcro jarẽn xà

⁷Mã cute me Jeju cukij to:

― Me imã ampo to hahkre catê, jũ caxuw quê ha ita hane? Ampo quê ha jũ na me imã, wa ha ihkôt me ita te hajỹr xà ita jahkre pej? ― hajỹr.

⁸Mã Jeju me cumã:

― Me guphêa ne, quê nee jũm me anõ mã ihhêj nare. Ampo na? He quê ha me hàhtôa ne ijaprỳ na ame amji to mehhêj to me ipa, ne me amã: “Hamre, ramã amcro hyr xàa kam hàhhuc” hane, nare, quê ha me amã: “Ipê Pahpãm te Crixtô to côjkwa pĩn me amã hũjahkre ata mã, wa he” hane. Cakrô, ca nee me anõ ihkôt amji kam gapac nare. ⁹Ca ha jũ ri me ipijapu nõ jarẽn pa, ne nee ame hũpa nare. Nare, quê jũ ri, krĩ nõ kam pahhi na ame ajpẽn jũrê, ca me harẽn pa, ne nee ame hũpa nare. Quê ha ampo itajê cunea hane cakrô, nee cormã me hamre xà kam hàhhuc nare, ne ihtỳj hõtpê ita hapôj to ipa.

¹⁰― Quê ha krĩxàre kwỳ me, mehkwỳa ame ajpu, ne krĩ kwỳ me, krĩ kwỳa me ajpẽn kam pra. ¹¹Ne pjê jàhtôa kam pjê ahcujrõ, ne pjê jàhtôa kam prãam to prãm, ne pjê jàhtôa kam quê ha ame hà catia to cati. Quê ha ihprõt pê côjkwa kam ame ampo kêanre pupu, ne pjê kam cute me ampo kêanre pupun xà ata, quê ha mehcunea mã hũpaa to hũpa.

¹²― Ne ita te hajỹr xwỳjrea na, ca ha ame amji pupun xà kêanre to ame amji pupu. Quê ha ame gahê ne me apro, ne hãn ne ame acahhy, ne me hacjên xà mã me gacjê, ca ha kam me acuhhê. Jirô pê mã quê ha, cute me cuprõn xà jũrkwa kam mehcukij catêjê jũhkra mã me gacjê, quê ha me acukij pa, jirô pê mã quê ha hipêr me hacjên xà kam hãn ne me ato awcapê. Ne icwỳrjapêa quê ha pjê jõ pahhi cuna mã me apyxwỳ. ¹³Ca ha cuna mã me acuhhê, ne me ijarẽn pejti to me cumã ijarẽ. ¹⁴Ne nee me acakôc xà to ate ame amji pytàr xà atajê to cormã ne ame amji japackre nare. ¹⁵Ampo na? He wa ha cormã me amã acakôc xà gõ, ne me amã ate me amji jahkre pejti gõ, quê ha nee me acurê xwỳn atajê ame ato hũràc nare.

¹⁶― Ne quê ha ajte me apãmjêa me, me akjêjêa me, me gũkjê catêjêa me, me gõ ikwỳ nõ catêjêa me, amjia kôt me hacjên xà kam me ato awcapê, ne ihtỳj me anõ cura. ¹⁷Ne icwỳrjapêa quê ha mehcunea ame acurê. ¹⁸Ne me awcanãa ne. Ampo na? Quê ha nee me apê akĩ nõ pyxitre nõ ipictor nare. ¹⁹Na ca ha ampeaj kam me awcanã, ne atỳj me amji pytà.

Pê Jeju Krĩpinkrên jamre na harẽ

²⁰― Ca ha krãhtare me, me hàprê catêjê me, cute me Krĩpinkrên krã na me hõmpu, ne krĩ ata jamre na me to amji japackre pyrentu. ²¹Por ca jũmjê Juta jõ pjê kam ame apa atajê, kẽnti wỳr me aprar pyrentu! Ne Krĩpinkrên jõ krĩa kam ame apa atajê, krĩ pê me gapôj, ne me aprar pyrentu! Ne por ca pur kam ame apa atajê krĩ wỳr me aprar nare! ²²Ampo na? He amcro atajê pê quê ha Pahpãm te Juta catêjê to kên xà jõ amcro. Ne pê ramã Pahpãm hõ kàhhôc kam, amcro atajê na, ampo cunea kên xà te hajỹr na to awjahkre.

²³― Pỳj me hêj xi, pyjê mehkra to tic atajê, ne hanea ne pyjê mã me kra kryjre atajê me, mehkà na kjê catêjê atajê! Ne pjê ita kam, quê ha me ate amji pupun xà kên crire nare me awỳr cator. Quê ha Pahpãm me awỳr me akên xà kêanre kujate, pjê ita wỳr. ²⁴Quê ha me hàhtôa ne wapo xwahhi to mehcura, ne hanea ne me hàhtôa ne mehpro ne pjê cunea wỳr ame to ajcrà. Por krĩxàre pê mehcahkrit te me Pahpãm jahkre kêatre atajê, quê ha ihtỳj Krĩpinkrên kam ame ipa ita na, quê ha ahnaa hõ amcro cahhur kam ahtwỳ.

Pê Jeju pjê wỳr cute amji jaxàr xà jarẽ

²⁵― Ne itajê cunea te hajỹr xà wỳr, ate me hahkre pej xà, quê ha pyt kam hapôj, ne putwrỳ kam hapôj, ne caxêre kam hapôj, na quê ha pjê kam itajê mehkrã acto tu ne. Côxwa jàhkrihkrit kêanre ata cupate, quê ha nee jũm cute amji kam hapac xà nõ na amji jahkre pej nare. ²⁶Ne mehcunea mã, quê ha pjê wỳr ampo kên cator xà ata hũpaa to hũpa. Na quê ha pjê kam me ajhu ne me hikwa. Ampo na? He quê ha côjkwa kam caxêre cunea amji mã ihkrĩ xà to ahpa, cwỳrjapê quê ha hũpate amjia kôt pjê kam ame ajhu.

²⁷― Ata caxuw quê ha côjkwa pĩn ahpar mã ipê me Ahàkà carôt tỳjti me, hàhcujrohti ata mea mã, ahpar mã iwrỳc to mõ, ahcakrã kam. Quê ha mehcunea me hõmpu ne me Ahàkà pê Pahhiti catia na me hahkre pej. ²⁸Quê ha ampo itajê hajỹr kam tẽ, ca me awcanãa ne, ne me amji tỳaj ne, ne côjkwa wỳr, ca kàj mã me rĩt. Ampo na? He ahtũm nare wa ha me apytà. Ne por ite me apytàr xà ata kôt harẽn xà te hajỹr he.

Pĩxô kôt harẽn xà

²⁹― Por pĩxô pàr nõ ata, nare, ampo pàr ata he. ³⁰Quê ha ramã ihhô tetet cato, ca ha me hõmpu, ne me amji jahkre pej pyrentu, ne me amji mã harẽn to: “Ahtũm nare, quê ha ta iwrỳc pyrentu” hane. ³¹Quê ha ampo itajê cunea apu hane, ca ha me hõmpun to hane, ne me to amji japackre pyrentu, nãmri Pahpãm te pjê to ihhimpej xà jõ amcro ata ramã cator xàa kam.

³²― Ne me to amji japackre peaj ne, nãmri quê ha mehtĩr itajê tyc xwỳjrea na ampo itajê cunea hajỹr to hane. ³³He me ijarkwa ita to amji japackrea ne, nãmri quê ha pjê me côjkwa ihtỳj jũ caxuw hamre, ne icakôc xà ita, quê ha quêt hàhhuc rohnỳtti mã, ne nee jũ caxuw hamre nare.

Cu ha me amji jamãr prãm to me papa

³⁴― Ne me ca, me amji kôt hakop to impeaj to me apa. Ne nee amji kĩn na me gàkrun to pit mã me amji japackre to me apa nare. Ne nee côxỳhti to amji to me apipãn to pit mã ame amji japackre nare. Ne nee me ate amji to ame apijapar xà to pit mã ame amji japackre to me apa nare. Ca ha itajê to pit mã ate ame amji japackre to me apa na, quê ha ampo cunea jamre xà jõ amcro awỳr cato, ne amõr pejti kam apro to hane, pom quê ampo pro xà ihpro he. ³⁵Ne quê ha pjê cunea kam amehkrĩ atajê cunea wỳr amcro ata cato. ³⁶Cwỳrjapê ca ha gõtpê me amji kôpĩr peaj to me apa, ne ma Pahpãm mã me amji cajrẽn, mãr ca xwỳ mã ampo itajê pê me amji pytà, ne cupê me gapôj, ne icuna mã me acuhhê tu ― hane.

³⁷Pê Jeju amcro cunea kam ajco me cumã ampo to hahkrea to pyt, Pahpãm to me amji kam hapac xà jũrkwa kam. Ne ahna caxwa, pê ma krĩ pê hapôj, Pĩxô jõ kẽn wỳr, ne curia hãn ne amji to apẽ. ³⁸Pê côjkwa caprêc kôt ajco me hàhtôa ne ma Pahpãm to me amji kam hapac xà jũrkwa wỳr me pra, cute me Jeju kam hapac prãmte.

Pê Jeju curê xwỳn ahna me ajpẽn pa

¹Pê ramã me Hakren xà jõ amji kĩn ata wỳr amcro incrêre ne nõ. ²Pê ajco Pahpãm mã mehcajrẽn catêjê jõ pahhi me, Mojxe xwỳ jõ kàhhôc to me cumã hahkre catêjê me, ihtỳj ame Jeju curan prãm, ne tee ame to hahkre. Ampo na? Pê ampeaj kam ihkôt me cumã me hàhtôti atajê cupa na pê.

Pê Juta ihpore kôt Jeju kên mã mẽn prãm

³Pê me pahcurê xwỳn pê Xatanaj carõ kên ata Jeju kôt me ipa catêjê te tôxi atajê nõ, pê Juta Carijot ata mã axà. ⁴Pê ma Juta tẽ, ne Pahpãm mã mehcajrẽn catêjê jõ pahhi me, Pahpãm to me amji kam hapac xà jũrkwa jamãr catêjê me, Jeju na cute me ajpẽn par. Mã Juta te me hũhkra mã Jeju to hahkre ne haxàr na, me cumã amji ton. ⁵Mã ame hakry, ne cute me Juta mã ihpore jõr na me amji ton. ⁶Mã hamre, Juta te ihpore pyr na ihtỳj cute me cumã Jeju jõr na amji ton. Quê ha nee me hàhtôti atajê nõ Jeju pupun nare kam, cute jũ ri ahte me cumã hõr na, me ajpẽn par.

Pê Jeju me Hakren xà jõ amji kĩn jõ na awjahkre

⁷Mã ramã me Hakren xà to cute ame amji japackre xà jõ amcroa kam hàhhuc. Mã amcro ata kam, amji kĩn ata caxuw Juta catêjê te ahpỹanre na ame carà cahàcre hôhti kra pê mehkritxwỳ ata curan. ⁸Mã Jeju te Petrô me Jowãw kujahêc, ne me cumã:

― Me mõ ne me pamã pyt caxuw me Hakren xà jõ amji kĩn jõ nõ to ― hajỹr.

⁹Mã cute me Jeju cukij ne me cumã:

― Jõ ri wa ha mẽr ame pajõ ita to? ― hajỹr.

¹⁰Mã Jeju me cumã:

― Me ikampa, ca ha ramã krĩ mã me axàr xàa kam, quê ha me hũmre nõ ata cô jacjê ne to ipa, ca ha me ajpẽn cajpa, ne ma me hũnã, ne ihkôt me mõ. Quê ha jũ ri ikre nõ mã axà, ca ha hanea ne ihkôt me axà. ¹¹Ne me ikre jõ pahhi ata cukij, ne me cumã: “Me cumã ampo to hahkre catê te me acukij xà na me ikujahêc, wa me acukij, jũ ri mõrmõ ikre caxwỳn nõ ita, pom quê ha ihkôt me ipa catêjê me kam me me Hakren xà jõ to apà ita?” hane. ¹²Quê ha kỳaj pê me amã ikre caxwỳn cati nõ ata jahkre, ne ramã kam ampo cunea, kam cuhôn xà, ne kam ahna mehkrĩ xà, ne kam ahna me hàpàn xà, quê ha me amã hahkre. Ca ha curia pyt caxuw me me Hakren xà jõ nõ to ― hane.

¹³Mã hamre, ma me pra, ne krĩ mã me hàr, ne Jeju te me cumã ampo cunea jarẽn xà atajê cunea na me cator, ne cute pyt caxuw me hõ ita ton.

Pê Jeju ihtyc xà na amji jarẽn

¹⁴Mã ramã kaam hàhhuc, mã Jeju me, ihkôt me ipa catêjê me, me hàpàn xà na me hỹr, me hàpàn xà caxuw. ¹⁵Mã Jeju me cumã:

― Wa ijõtpê ikên mã ixàr xwỳjrea na, me acahê na me Hakren xà jõ ita kur na amji to prãm. ¹⁶He ampeaj kam wa ha me amã amji jarẽ, wa ha hipêr me Hakren xà jõ ita nõ krẽr nare, quê ha ahnaa Pahpãm pjê kam mehcunea to ihhimpej kam tẽ, wa ha cormã ihnõ krẽ ― hane.

¹⁷Ne cute mehkõm xà pyr, ne cute Pahpãm mã to hũrên hakryti na amji jarẽn, ne ihkôt me ipa catêjê mã:

― Mĩ, me akõm xà ita py, ne me acunea me to akõm pa. ¹⁸Ampeaj kam wa ha me amã amji jarẽ, wa ha hipêr jũ caxuw pĩxô cacô ita kwỳ to ikõm nare, quê ha ahnaa Pahpãm mehcunea to ihhimpej kam tẽ, wa ha cormã ihnõ kwỳ to ikõ ― hajỹr.

¹⁹Jirô pê mã ri cute pãw pyr, ne Pahpãm mã to hũrên hakryti na cumã amji jarẽn, ne ihcokjêr ne ihkôt me ipa catêjê mã hõr par, ne me cumã:

― Pom pãw ita, ijĩa mã he, wa hãn ne me amã cugõ, ca atỳj me ku. Jirô pê mã, ca ha ate me ito amji japackre prãmte, atỳj pĩxô cacô ita to me ikõ, ne me pãw ita kur to me acuhhê tu ― hane.

²⁰Ne me hàpàn jirô pê, cute hajỹar ne pĩxô cacô na me cumã ihkõm xà jõr, ne me cumã:

― Pom pĩxô cacô ita, icaprôa mã he, ne me anaa wa ha haxwỳ. Ata to wa ha me amã ite amji kam ijapac xà intuw to awjahkre.

²¹― He ramã, pom ca me jỹ itajê nõ te icurê xwỳn catêjê jũhkra mã ijaxàr, mã cute me icuran na, imã hahkre pej. ²²Ỹhỹ, wa ha itỳj ipê me Ahàkà cati ityc to prãm. Ampo na? Pê ramã Pahpãm ityc xà ata na amji mã to ihhimpej hiahpuro. Pỳj me hêj xi, por quê ha me ikên mã ijaxà ata, quê ha ijirôa pê amji pupun xà kêanre to amji pupu ― hajỹr.

²³Mã ahpỹanre na, cute me ajpẽn cukij kam mehtẽm, ne me ajpẽn mã:

― Pỳhàpà, jũm mã quê ha ajte me hũhkra mã haxà? ― hajỹr.

Jũm ri amji jirôa pê cati

²⁴Mã me ahna ahtũmre, Jeju kôt me ipa catêjê te ajpẽn jirôa pê me cati na me amji jarẽn kam mehtẽm. ²⁵Mã ahna Jeju pê ihkaj na me kam, mã me cumã:

― Ỹhỹ, pjê ita cunea kam krĩxàre jõ pahhi cati catêjê cunea mã amji to me catia prãm. Ne cumã mehcunea te hàpên na to prãm, na ri ihtỳj me to ihhimpej. Ne por mehcunea tehcajpa atajê te ri amji to me cati prãmte amji mã me haprỳ to: “Mehcunea Tehcajpar Catêjê” hajỹr.

²⁶― Itajê cunea te hajỹr pit, ne me akwỳa kam, quê nee itajê nõ hajỹr nare. Me akwỳa kam, quê ha jũm catihti ata pê curmã jũm tuw ata pyràac. Ne por me gõ pahhi ata, quê ha ihhêj rũm cupê me amã hàpên catê pyràac. ²⁷Mẽr jũm ri, me hũmre mã amji jirô pê cati? Xà ajkĩ hàpàn xà na jỹ ata? Nare, xà ajkĩ me cumã me hõ jõr to pra ata? Ỹhỹ, por hàpàn xà na jỹ ata ri, me hũmre mã me hirôa pê cati. Ne Pahpãm mã ita na ihkaj na. Ne cumãa, por me cumã hõ jõr to pra ata ri quêt cati. Ne ipêa ri me amã hàpên catê ata pyràc. ²⁸Ca gõtpê ikôt me apa, ne icahê na ramã me ate me amji pupun xà kêanre kwỳ to ame amji pupun. ²⁹Cwỳrjapê ri Pahpãm te me acunea to ihhimpej xà na ixãm. Ne pa, wa ha hanea ne me ate me to ahimpej xà na me apyxwỳ. ³⁰Ca ha, por curi ite ihimpej xà kam, ijàpàn xà na me akrĩ xà ata kam me apà, ne ahna me ikõ. Ne ca ha hanea ne me Pahhiti krĩ xàhti catia ata kam me akrĩ, ne Ixaher catêjê kwỳ te tôxi atajê mã cute amji kam me hapac xà na awcapi, ne ahna mehcukij, ne me cumã to ahimpej to me akrĩ ― hane.

Pê Jeju Petrô mã awjarẽ

³¹Ne cute Ximãw Petrô mãn ne cumã:

― Ximãw, Ximãw, nãmri ajco, nãmri ramã me pahcurê xwỳn pê Xatanaj te ato arỳjhy, ne acarêr ne acajpẽr prãmte acaxuw amji mã Pahpãm na hàhwỳr. ³²Wa ramã ite, ca nee ate ito amji mã ahimpej jicu nare na, Pahpãm mã acajrẽn. Na ca ha gõtpê ipê ampỳre mã apu mõ, ne ana ahtũm nare, ca ha hacpỹa ne iwỳr amji jaxà, ne acato, ne me akwỳ mã hũcanãr xà to ihtỳaj ne ajco ― hajỹr.

³³Mã Petrô Jeju mã:

― Ỹhỹ, wa ita kam ihcunea caxuw apu mõ. Quê ha hapacta ne akôt me ijaxà, ne jũ na me ito. Wa ha itỳj awcanã ne akôt ty. Ne nee imã ihnõ na hũpa kênre hamreare ― hane.

³⁴Mã Jeju cumã:

― Petrô, ampeaj kam wa amã awjarẽ. Ca ha caxwa ita kam, hôxãhxãc kàr xwỳjrea na ate ijahkre pej nare na, amji to ahêj to incrê ― hane.

Ihpore cjên xà me wapo xwahhi jarẽn xà

³⁵Jirô pê mã ri Jeju te ihkôt me ipa catêjê cukij, ne me cumã:

― Xà ca gõtpê amcro ata to me amji japackre, mãr pê wa me akujate ata to? Pê wa me apê ihpore cjên xà nare kam me akujate, ne me apê me akà nare kam me akujate, ne me apê ampo hamreare kam me akujate. Xà ca gõtpê ajkĩ ite me apê ampo hamreare kam me akujahêc ata to me amji japackre? Xà pê ajkĩ hõtpê me apê ampo hamreare? ― hajỹr. Mã me Jeju mã:

― Quê, me ipê ampo hamreare nare, pê hõtpê me imã ampo cunea ― hane.

³⁶Mã Jeju me cumã:

― Por me amã ihpore cjên xà atajê me, me gàhcukrêj atajê me, gapacta ne ita caxuw me acwa. Ne por me apê wapo xwahhi nare atajê, atỳj me gitô kà to ihpore na me ahpa, ne amji mã me to wapo xwahhihti japrô. ³⁷Pê ramã Pahpãm jarkwa na mehcakôc catêjê nõ hõ kàhhôc kam, ina ihhôc to hane he:

“Quê ha mehkên catêjê me, me to ajpẽan” hane.

Ampeaj kam wa me amã awjarẽ, por pê ramã ihkàhhôc ina ampo to hũjarẽn xà to awjarẽ ata, quê ha ihtỳj ito hanea to ito hane ― hane.

³⁸Mã ihkôt me ipa catêjê me cumã:

― Me ijõ Pahhi, nãmhã, ramã wapo xwahhihti pijakrut he ― hane. Mã Jeju me cumã:

― Mẽr nãmhã, quê ha taa mã ― hane.

Pê Jeju Pĩxô jõ kẽn wỳr mõ

³⁹Mã hamre, ma caxwa ri Jeju Pĩxô jõ kẽn wỳr mõ. Pê ramã curi ipa to amji pyràac, na pê mõ. Pê ma ihkôt me ipa catêjê ihkôt me mõ. ⁴⁰Ne curi me cator, mã cute amji mã hỹr xà ata mã cator ne kam hỹr, ne ihkôt me ipa catêjê mã:

― Ma Pahpãm mã me acakôc, ne cumã me amji cajrẽn, ne ahna me ahwỳ, mãr quê ma me atête me pahcurê xwỳn to pên to mõ, mãr quê nee me acyt, ca ame cumã me apec nare prãmte ― hajỹr.

⁴¹Ne hãm, ne cute cahi rẽn to trĩnta ne ihkõn krã na hỹr, ne cute Hũm Cati mã ihcakôc kam ihtẽm, ne cumã:

⁴²― Inxũ Cati, pom wa ikên xà na amji pupu ita pê ihhêj rũm ikõm xà pyràac. Wa ma apu ikên ita cunea to ikõm caca. Quê ha amã itête ikên to ikõm xà ita camẽn prãm na, ca ha gapacta ne atỳj itête camẽ, nãmri quê ha amã ite to ikõm na ito prãm na, wa ha itỳj to ikõ. Ampo na? Por ate ampo to amji mã ina prãm xà ata na, wa ha itỳj ahnaa mã akôt amji kampa ― hajỹr.

⁴³Mã côjkwa pĩn Pahpãm jarkwa na imprar catê nõ hỹrmã iwrỳc, cute cumã hũcanãr xà to ihtỳj prãmte. ⁴⁴Mã cumã amji kĩn nare ata te ihcãmxêr, ita pê ihhêj rũm ampo xà ihtỳaj te ihcãmxêr. Mã hũcanãar kam cormã Hũm Cati mã ihcakôc. Mã ahna cô pehpec ita pê ihhêj rũm caprô te pjê kam apu ihpehpec pyràac.

⁴⁵Mã cute cumã ihcakôc jirô pê hãm, ne ma ihkôt me ipa catêjê wỳr mõ. Ne me hõt wỳr cator, mã ihtỳj me hikwa ne ame gõr, ne pê me cumã amji kĩn nare, na pê me hikwa ne ame gõr. ⁴⁶Mã cute me cumã harkwa cator, ne me cumã:

― Ampo na mã ca me gikwa ne ame gõr? Ame ampra ne ame to acuhhê, ne Pahpãm na ame ahwỳ, mãr quê nee me pahcurê xwỳn me amã ampo kên to hahkre nare ― hajỹr.

Pê Jeju cama amji na me hamã, quê mehpro

⁴⁷Ne Jeju cormã ame cumã ihcakôc kwỳa kam, mã me hàhtôa ne hỹrmã me cator. Ne pê Juta Carijot ita pê Jeju kôt me ipa catêjê te tôxi atajê nõa, Jeju wỳr me hàhtôa ne me to mõ, ne ma Jeju wỳr tẽ, ne cute cahôr prãmte ahna hàhtêp. ⁴⁸Mã Jeju cumã:

― Xà ca ha ajkĩ atỳj ipê me Ahàkà cahôr xà ita to kên mã amẽ? ― hane.

⁴⁹Mã Jeju kôt me ipa catêjê te ita na me hõmpun to hajỹr, ne cute me Jeju mã:

― Me ijõ Pahhi, xà wa ha itỳj me ijõ wapo xwahhihti ita to me kam tẽ? ― hajỹr.

⁵⁰Mã mehnõa te wapo xwahhihti to Pahpãm mã mehcajrẽn catêjê jõ pahhi mã hàpên catê nõ ata kam ihtẽm, ne cupê hapac jakep, awpôc rũm. ⁵¹Mã Jeju cumã:

― Ame hajỹr nare! ― hane. Ne cute hapac jakep ita na hũ xir, ne cumã ihcupên, ne cumã to impej pyrentu.

⁵²Jirô pê mã ri Pahpãm mã mehcajrẽn catêjê jõ pahhi me, Pahpãm jũrkwa jamãr catêjê me, prohti kam me, cute mehpro. Mã Jeju te me cumã harkwa to:

― Pỳhàpà, xà ajkĩ ipê cute me pahhi jũhhyr na me to ihhimpej catê jõ pahhi na mã, ca me gõ kôtàre me, me gõ xwapo xwahhihti itajê to me ipro to me mõ? ⁵³Pom wa amcro cunea kam Pahpãm to me amji kam hapac xà jũrkwa kam me acape na apu ipa ita? Ca rỳ jũ caxuw ate me ipro prãm nare. Ne hamre ita kam ri me gõ amcro, ne me pahcurê xwỳn jõ amcro, na ca ha atỳj me pahcurê xwỳn jõ awcapàtkôa kam ame apê ― hajỹr.

Pê Petrô Jeju pupun nare na amji to ihhêj

⁵⁴Ne hamre, cute me Jeju pro, ne ma cute Pahpãm mã mehcajrẽn catêjê jõ pahhi jũrkwa wỳr me to mõ, ne me to hàr. Mã Petrô hapua na Jeju na mehkôt mõ. ⁵⁵Mã ikre jarkwa cahê na, carã ata kam cute me cuhôn, ne ipu na amehkrĩ, mã ma Petrô mehwỳr mõ, ne me cahê na cuhy na hỹr.

⁵⁶Mã ikre kam hàpên catêjê cahãj nõ ata te Petrô pupun, ne xa ne hõmpun tỳjti, ne cumã:

― Pom jỹ ita pê Jeju na mehkwỳ nõa ri ― hajỹr.

⁵⁷Mã Petrô cumã:

― Pỳhàpà, pyjê nõ ita, wa nee ite jũm ita jahkre pej nare ― hane.

⁵⁸Ne ahna ahtũmre mã mehkwỳa xũmre nõ ita tẽ ne cumã:

― Apê mehkwỳ nõa mã ca ― hane. Mã Petrô cumã:

― Hũmre nõ ita, nee ipê mehkwỳ nare, ipê jũmjê itajê jahkre kêatre ― hane.

⁵⁹Ne hamre, ahna ahtũm rya mã mehnõa hỹrmã mõ, ne cute Petrô mã:

― Ỹhỹ, he ampeaj kam ri cupê mehkwỳa nõ mã, pom hanea ne cupê Hĩpôjajo catêjê nõ ita? ― hajỹr.

⁶⁰Mã Petrô amji tête apu cumã ihhêj, ne cumã:

― Hãpà, hũmre nõ ita, pom ca apu ampo jarẽ ita, ipê hahkre kêatre, wa nee ite hahkre pej nare ― hane. Ne cormã jỹ ne apu ihcakôc kwỳa kam mã hôxãhxãc kàr.

⁶¹Mã ikre kam, hacpỹ ne Jeju Petrô wỳr ipipkjêr ne hõmpun tỳjti. Mã cute Jeju te cumã: “Caxwa ita kam, hôxãhxãc kàr xwỳjrea na, ca ha ate ijahkre pej nare na amji to ahêj to incrê” hajỹr na, to amji japackre pyrentu. ⁶²Ne ma hãm ne cator ne mõ. Mã ihpahàm te ihcãmxêr pyrentu, mã amrãa to amrã.

Pê krãhtare Jeju cahhy

⁶³Mã me hũmre ame Jeju jamã atajê ame hũn kêanre, ne amehcahhy. ⁶⁴Ne mento pro ne mehcukij to:

― Mẽr jũm te mã acakwĩn? Harẽ! ― hane. ⁶⁵Mã hamre, me hũmre itajê ame hapactua kam ame ahna xwỳ.

Pê Jeju prohti kam me cuna mã xa

⁶⁶Mã apẽ, mã cute me amji to cuprõn. Prohti kam me, cute Pahpãm mã mehcajrẽn catêjê jõ pahhi me, me cumã Mojxe xwỳ jõ kàhhôc to hahkre catêjê me, cute me amji to cuprõn. Ne cute me cuprõn jirô pê mã ri cute me Jeju na hàhwỳr, prohti kam me hipôc ri hãm prãmte. Mã cute me hãm.

⁶⁷Mã cute mehcukij, ne me cumã:

― Me imã amji jarẽ, xà apê, por pê Pahpãm Crixtô capi ne to awjahkre ata mã ca? ― hajỹr. Mã Jeju me cumã:

― Ỹhỹ, xà wa me amã amji jarẽ, ca me ikampa ne gõtpê amji mã me ito ahimpej? Hãpà. ⁶⁸Xà wa hanea ne me acukij, ca ajkĩ me imã ampo jarẽ? Hãpà. ⁶⁹Ne hamre, quê ha hãn ne ipê me Ahàkà, Pahpãm carôt catia kam, awpôc rũm, hĩkjê rũm jỹ ― hane.

⁷⁰Mã mehcunea me cumã:

― Pỳhàpà, xà ampeaj kam apê Pahpãm kra? ― hane. Mã Jeju me cumã:

― Ỹhỹ, pom ca me caa ipê Pahpãm kra na me ijarẽ ita? ― hane.

⁷¹Mã cute mempar ne ajpẽn mã me harkwa to:

― Ỹhỹ, ita caxuw cu nee jũ rũm me jũm te harẽn xà kên nõ kam me pajapac prãm nare. Ampo na? Ramã harkwa te harẽn xà kêanre to harẽn, cu pahte me pajapac jĩa to mempar ― hajỹr.

Pê Jeju Pirat cuna mã xa

¹Mã prohti kam mehcunea xãm, ne ma Jeju to, por Pirat pê Roman jõ pahhiti jarkwa kôt krĩ to ihhimpej catê ata wỳr me mõ, ne cuna mã cute me hãm. ²Ne cute me Jeju kôt harẽn to me hêj xi xà kêanre kam me to ihtẽm, ne me cumã:

― Ỹhỹ pahhi Pirat, wa ampo na ite me hũmre ita pro ne awỳr me to imõr nare. Wa ite me ijapac jĩa to mempar, mã apu Roman catêjê jõ pahhiti pê Xexa jũhhyr prãm. Ne hanea ne, me ikam mare mã, quê nee pjê jahpan xà na me Roman catêjê jõ pahhiti mã me hàmjõr nare na, me to ihcakôc to ipa. Ne hanea ne apu cupê Crixtô na amji jarẽ, ne quê ha xwahna ihtỳj amji to me ijõ pahhiti ― hajỹr.

³Mã Pirat te Jeju cukij ne cumã:

― Xà ajkĩ apê Juta catêjê jõ pahhiti? ― hajỹr. Mã Jeju cumã:

― Pom ca caa ijarẽ ita? ― hane.

⁴Mã Pirat te Pahpãm mã mehcajrẽn catêjê jõ pahhi me, me hàhtôa atajê mã:

― Ampo cwỳrjapê wa ihcuran na me cumẽ? Wa nee ite hũmre ita kam ampo kên pupun nare ― hajỹr.

⁵Mã hipêr Pirat cunaa mã, cute me harẽn kam mehtẽm ne me harẽn to:

― Krĩ cunea kôt cute ampo to hahkre xà itajê to ajpẽn caxuw me irẽc to ipa. Hĩpôjajo jõ pjê kam ri cute kam to ihtẽm, ne ramã me pajõ krĩ pê Krĩpinkrêan kam, cute ton kam ihtẽm he ― hajỹr.

Pê Jeju Heroti cuna mã xa

⁶Mã Pirat te me kam hapac ne me cumã:

― Pỳhàpà, xãmte hũmre ita pê Hĩpôjajo jõ pjê catêjê nõ mã? ― hajỹr. Mã me cumã:

― Ỹhỹ ― hane.

⁷Mã Pirat te Jeju pê Hĩpôjajo catêjê nõ na hahkre pej, ne ma pahhi Heroti pê Hĩpôjajo jõ pjê jõ pahhi mã ihkujahêc. Pê ramã Krĩpinkrên kam Heroti apu mõ, na pê hỹrmã ihkujate. ⁸Mã curi me to cator, mã Heroti apu hakry. Ampo na? Cumã Jeju pupun prãm, cwỳrjapê ri apu hakry. Ne rỳ pêa mã hãn ne Heroti Jeju te ampo cunea pihho impejti ton xà atajê na harẽn pa. Ne rỳ jũ caxuw cute hõmpun nare, ne cormã cute hõmpun, cwỳrjapê ri apu hakry. Ne apu Jeju cukij, Jeju te kam mare mã cumã ampo pihho pejti ton, mã cute hõmpun prãmte. ⁹Ne cute ampo jàhtôa ne ahna ihcukij, mã nee Jeju te cumã jũ mãn nare, ne aracri cupê xa.

¹⁰Mã hamre, Pahpãm mã mehcajrẽn catêjê jõ pahhi me, me cumã Mojxe xwỳ jõ kàhhôc to hahkre catêjê me, Heroti wỳr me cator, ne Heroti kam mare mã cute me Jeju to mehhêj xi xà kêanre to mehhêj xi kam mehtẽm. ¹¹Mã Heroti jõ krãhtare atajê cama apu Jeju to hapactu xà kêanre to me hapactu. Ne ame ahna xwỳ, ne pea cute me pahhi kà mã haxàr, ne me hapactua kam ame to pahhi. Ne pahhi kà impejti ata mã cute me haxàr, jirô pê mã ri hacpỹa mã cute pahhi Pirat mã mehkujahêc.

¹²Mã hamre, amcro ata kam, Heroti me Pirat te amji to me ikwỳ nõ. Pê mam nee amji to me hõ ikwỳ nõ nare. Pê mam nee me amji cajrẽn nare, ne ajco me ajpẽn curê.

Pê Pirat Jeju curan na harkwa

¹³Mã Pirat te me Pahpãm mã mehcajrẽn catêjê jõ pahhi me, Juta catêjê jõ pahhi me, por curi me hàhtôa ne ahna me xa atajê me, cute me to cuprõn, ne me cumã:

¹⁴― Pom ca iwỳr me hũmre to mõ, ne ate me imã cute pahhi jũhhyr na harẽn ata na, ite ramã ihcukij, ne nee ite kam ampo kên mã icator ne hõmpun nare, pom ca ampo na ame imã to awjarẽ atajê na. ¹⁵Mã hanea ne Heroti te harkwa kên nõ na impar nare, cwỳrjapê ri hacpỹa ne cute imã ihkujahêc. Ne nee me anõ kam mare mã hũmre ita te ampo to kên nare. Ne mẽr ampo cwỳrjapê wa ha ajte ahna me cumẽ, quê mehcura? ¹⁶Wa ha cama pryti kà kam wakỳre to ihcahhyr na me cumẽ, quê ha amehcahhy, jirô pê mã wa ha ma ihkujate, quê ha tẽ ― hajỹr.

¹⁷Ne me Hakren xà jõ amcroa kam ri cute ampo to me amji pyràc xà ata pê hane he. Pê Pirat hãn ne hõtpê me harkwa kôt me cumã me hacjên catêjê pyxit ne hapôj. ¹⁸Mã me hàhtôti atajê te me caràr kam mehtẽm, ne ame caràr to:

― Me imã hũmre ita tyc na to prãm, ne Parapa mã ca ha me imã hikra ― hajỹr. ¹⁹Ne pê Parapa ata pê apu pahhi jũhhyr prãm, pê hanea ne ramã jũm ita cura, cwỳrjapê pê me haxà, pê ajco hikwa.

²⁰Mã hacpỹ ma mã Pirat te me hàhtôa atajê cukij, cute Jeju mã hikran prãmte. ²¹Mã hipêr mehcunea te me caràr to:

― Pĩ kam me axô, quê ty! Pĩ kam me axô, quê ty! ― hajỹr.

²²Mã hamre, Pirat te mehcukij to incrê ita caxuw ri me cumã:

― Nee cute ampo to kên nare, wa ha ajte ihcuran na me cumẽ. Wa ha cama pryti kà to apu ihcahhyr na pit mã me cumẽ, quê ha amehcahhy, wa ha ma cumã hikra, quê ha tẽ ― hajỹr.

²³Hamre, mã kỳj cati pêa mã ame caràr, ne pĩ kam menxôr na awjahkre, me caràar kam. Ne cute me caràr ita to me Pirat hi kwĩn. ²⁴Mã Pirat te Jeju curan na me mẽn. Pom pê ahnaa ajco me to prãm ata na ri cute ahna me mẽn. ²⁵Ne cute Parapa te apu pahhi jũhhyr prãm, ne ramã jũm curan ata mã hikran. Ne me hũhkra mã Jeju jaxàr, quêt taa jũ na me to, por jũ mã cute ame ton prãm xà ata na.

Pê Jeju ma ihcuran xà wỳr mõ

²⁶Mã hamre, ma Jeju to me mõ. Ne me to mõr kwỳa kam cute pry kôt me Xiren jõ krĩ catêjê nõ cajpar, pê haprỳ Ximãw. Pê pur pĩn mõ, pê mehcajpa ne mehpro ne pĩhti ata krac ri me haxà, ne ahna me cumã quêt to mõ, pê ma Jeju kôt to kwỳ.

²⁷Mã me hàhtôa ne hapu na Jeju na me hõmpun to me mõ. Mã pyjê kwỳ Jeju kôt me mõ atajê ahna ame hõmpu, ne cama ame caprĩ ne ame kam amrã. ²⁸Mã hacpỹ mã me hỹrmã pipkjêr, ne cute me cumã harkwa to:

― Krĩpinkrên jõ pyjê itajê, nee ca ikam ame acwỳr nare, ne me akra kam ca quêt ame amrã. ²⁹Ampo na? He quê ha cormã krĩ ita jõ amcro kêanre kam ahtwỳ, quê ame garẽn to:

“Por jũ caxuw pyjê itajê nõ mã ihkra nare,

mã nee cute to pijahôr nare,

ne nee to ipijapar nare atajê,

quê ha ame hakrya to ame hakry” hane.

³⁰Quê ha jũ caxuw amcro ata kam ahtwỳ, quê ha me hũmre kwỳ me kẽnti nõ mã:

“Hã, kẽnti ita me ijipy apỳm” hane.

― Quê ha hanea ne me hũmre kwỳ kẽn jawênre atajê mã:

“Me ito amxu” hane.

³¹Ỹhỹ, me papê cuhy caxuw pĩ pyràac, ne pa ri cormã icoti na wa apu amji pupun xà kêanre to amji pupu. Ne me ca nare, ca ha jũ caxuw me acrà, ne ijirôa pê ame amji pupun xà kêanre nõ to ame amji pupu ― hane.

Pê pĩ na me Jeju xô ne me ahna xwỳ

³²Ne Jeju kôt me hàhkĩj xi pijakrut ne me to mõ, cute mehcuran prãmte. ³³Ne kẽn japrỳ te Corcota ata kôt harẽn xà te “Mehkrãhhi jõ kẽn” ata wỳr me to cator. Ne pĩ na cute wakỳti to me Jeju jũhkra me ihpar cuhhêc, ne ahna me hãm. Ne hanea ne me hàhkĩj xi atajê to cute me hajỹar ne pĩ na me haxôr, ne awpôc rũm me ita xôr, ne awke rũm me ita xôr.

³⁴Mã Jeju te Hũm Cati mã mehcajrẽn to:

― Inxũ Cati, pom ame ito kên itajê pê ijahkre kêatre, cwỳrjapê ri ame ito hane, na ca ha nee ame kam acryc nare, ne cute me ito kên ita to tojnõ ― hajỹr. Mã krãhtare atajê te Jeju kà to ame ipicràn, ne kẽn te amji pê hũhkàr xà to ihkôt ame amji pê hũhkà, jũm mõrmõ quê ha amji pê to ihkà itajê jũhkà.

³⁵Mã me hàhtôa ne ahna me xa, ne ame hõmpu. Mã me kam mare mã, Juta catêjê jõ pahhi kwỳ apu Jeju na xwỳ, ne me cumã:

― Pỳhàpà, pom ca atỳj mehkwỳ pytàr to apa ita? Pom apê Pahpãm kra ita, ca mẽr pĩ ita pê amji capa ne wrỳ ne amji pytà. Me imã nee apê Pahpãm kra nare. Quê ha apê Pahpãm kra na mã, ca ha atỳj pĩ ita pê wrỳ ― hane.

³⁶Mã hamre, krãhtare catêjê ame ahna xwỳ ne ame cumã. Mã mehkwỳ xwỳjê ame cumãn kêanre, ne me hapactua kam ame ahna xwỳ. Mã krãhtare nõa Jeju wỳr pĩxô cacô xỳre ata to tẽ, ne cute to kam hapac, ne cumã:

³⁷― Krãa, pom apê Juta catêjê jõ pahhi ita, mẽr ampo na mã ca pĩ ita pê ate amji caxàr ne awrỳc nare? ― hajỹr.

³⁸Ne Jeju krã incwỳrpê pĩ na ihkàhhôc ajêt ata pê hũjarẽn to hane he: “Cupê Juta Catêjê Jõ Pahhiti” hane.

³⁹Mã me hàhkĩj xi pijakrut ne pĩ na Jeju cahê na me ajêt atajê nõ apu Jeju mã, ne cumãn to:

― Pỳhàpà, pom apê Crixtô ita? Xà ca ha amji pytàr ne amji kôt me ipytàr nare? ― hane.

⁴⁰Mã me hàhkĩj xi catê nõ Jeju jĩkjê rũm ajêt ata apu Jeju cwỳrjapê ihnõ ita kam incryc, ne cumã:

― Pỳhàpà, xà nee amã Pahpãm cupa nare? Ampo na mã ca apu cumã? Pom cu me pancrê itajê cunea me amji pupun xà kêanre to me amji pupu ita? ⁴¹Pahte ri ampo kêanre ton, ne hũmre ita te nee ampo kên ton nare cakrô, ihtỳj me pahcunea kên xà ita mã hàr. Ne pahkên xà ita pê cu ajco amji to hapê, ne hũmre impejti ita pê nee ajco amji to kên xà ita japên nare ― hane.

⁴²Ne cute Jeju mã amji jarẽn, ne cumã:

― Jeju, ca ha jũ caxuw Juta catêjê jõ pahhi na amji to, ne hacpỹ ne ate amji jaxàr xà ata kam, ito amji japackrea ne ― hajỹr.

⁴³Mã Jeju cumã:

― Ỹhỹ, wa ha ampeaj kam amã awjarẽ, ca ha ita kam icahê na, por curi mempejti tyc caxwỳn tĩar ame ipa ata ri, cu ha ajwar apu mõ ― hane.

Jeju tyc xà

^44-45Mã Pahpãm to me amji kam hapac xà jũrkwa kam Pahpãm jũrkwa caxwỳn me, me hũmre tekjê ata te amji mã ahhyr xà na, cupẽhkà pohti ajêt ata te awryc mã amji jipôn, ne ajpẽn wỳr ihkre. ⁴⁶Mã hamre, Jeju hipêr kỳj cati pêa mã caràr, ne caràar kam cute Hũm Cati mã harkwa to:

― Inxũ Cati, hamre, wa ha ty, ne icarõ quê ha ma awỳr api ― hajỹr. Ne cute amji jarẽn jirô pê mã ihtyc.

⁴⁷Mã Roman catêjê nõ pê krãhtare jõ pahhi cati ata te Pahpãm pej na amji mã harẽn, ne taa amji mã:

― Xãmte ampeaj kam hũmre ita peaj to impej ― hajỹr.

⁴⁸Ne por cute mehtyc xà na me hõmpun xà caxuw me cuprõn atajê te me ita pupun, ne ma ame amji jacjên, ne me cumã amji kĩn nõ xàhte, amji jõkôt kam ame amji cahhyr to me ipa. ⁴⁹Mã Jeju jõ ikwỳ nõ catêjê me, pyjê me, por pê Hĩpôjajo jõ pjêa rũm ajpên ihkôt me mõ atajê, ampỳa mã mehcuhhê ne ahna ame hõmpu.

Pê me Jeju jarêt

^50-51Pê me hũmre ihnõ japrỳ pê Joje, ata pê Krĩhkàhti catêjê nõ, ne ajco catyt kam ipa. Ne cupê hũmre impejti, cute amji kam hapac xà cunea to, ne ajco Pahpãm himpej xà kujahêc xà ata japên to hikaj to ipa. Ne nee cupê mehkwỳ, ne Jeju cuna mã harkwa kên nõ to ihcakôc nare, ne catyt kam ahna ihcakôc, ne mehkwỳ te amji kam hapac xà kaj na ajco amji kampa. ⁵²Ne ma Pirat jũrkwa wỳr tẽ, cute Jeju na ihwỳr, ne pĩ pê ihtyc caxàr prãmte. ⁵³Mã Pirat te cumã hahkre, mã ma tẽ ne cute pĩ pê caxàr. Ne cute cupẽhkà jakati impejti ata to Jeju jĩ cunea cupu, ne ma rỳ jũ caxuw jũm te kẽn kre ita kam amji jarêt nare, ne cormã intuwti ata wỳr to kwỳ, ne cute kam hir, ne ahna to hihê. ⁵⁴Ne mehkôt xà jõ amcro xwỳjrea na pê ita hane.

⁵⁵Ne por Hĩpôjajo jõ pjê rũm, pyjê Jeju kôt me mõ atajê te Joje te kẽn kre ata kam Jeju jarêt na me hõmpun. ⁵⁶Ne ma ikre wỳr cute me amji jacjên ne me mõ. Ne cute me to amji pyràc xà ata kôt, cute me Jeju jĩ cuxwa prãmte ame ampo cacô cuxwati, incoti ita cwỳr, ne ame to ipicacwỳr. Ne nee amcro ata kam hacpỹ mã cute me to amji jacjên nare, ne curia amehkôt to ame ipa, mehkôt xà jõ amcro atajê kam.

Pê Jeju hacpỹa mã ihtĩr

¹Ne mehkôt xà jõ amcro atajê jirô pê mã ri, iràrà na, ma Jeju kre wỳr pyjê atajê ampo cacô atajê to me pra. ²Ne ramã kre na me hàhtêp to pra, ne ampỳa mã cute me kre pupun. Mã kre jihê xà pê kẽn te kujti pyràcti ata jũm te ramã hihê mẽn, mã hihê mẽn xa. ³Mã kẽn kre mã me hàr, ne nee cute me Jeju jĩ pupun nare, ne mehkrã pictor tu.

⁴Mã krãa, me hũmre pijakrut ne mehkà jakati pràti kam me cuna mã me xa. ⁵Mã hamre, me hũpate pjê kam ame ipihur. Mã me hũmre itajê te pyjê itajê mã me harkwa to:

― Ampo caxuw mã ca amehtyc cote na ramã hacpỹa mã jũm tĩr ata japê? ⁶He ramã hacpỹa mã ihtĩr, ne nee ita ri apu mõr nare, ne por Hĩpôjajo jõ pjê kam cute me amã amji jarẽn ata na ca me to amji japackre. ⁷Pê me amã amji jarẽn to hane he: “Quê ha ihtỳj jũm mehkên catêjê jũhkra mã, ipê me Ahàkà jaxà, quê ha mehkên catêjê pĩ na me cuxô. Quê ha ty ne ahna amcro incrê, quê ha hacpỹa mã ihtĩr” ― hajỹr.

⁸Mã pyjê itajê te harkwa to me amji japackre pyrentu. ⁹Ne ma ikre wỳr me pra ne me cator, ne Jeju kôt me ipa catêjê te õxi atajê me, mehkwỳ mã, ame awjarẽ. ¹⁰Ne pyjê itajê pê ame awjarẽ he: Marij Matarkwỳj me, Jowanakwỳj me, Tijac menxi pê Marij me, por pê mehkwỳa kwỳ mehkôt me mõ atajê mã, pê ihtỳj hanea ne ame harẽ. ¹¹Mã Jeju kôt me ipa catêjê te nee me pyjê atajê te me cumã hũjarẽn xà itajê na me kam hapac nare, ne ihtỳj cute ame hũjarẽn to ame ipa na, amji mã me to hajỹr.

¹²Ne Petrô nare, pê hãm pyrentu ne ma kẽn kre wỳr ajcahu. Ne kẽn kre ri cator, ne cumã nõr, ne nee Jeju jĩ pupun nare, ne cupẽhkà te hĩ cupu, mã cupê cator ata na, ahnaa hakàn pê nõ. Mã ma hacpỹ mã ikre wỳr cute amji jaxàr ne tẽ, ne ita to cama apu amji kam hapac to amji mã ipikrar to mõ.

Pê Mewỳrcacro jõ krĩ jõ pry kôt me mõ

¹³Mã amcro ata na ma krĩ wên japrỳ te Mewỳrcacro ata wỳr Jeju kôt me ipa catêjê pijakrut ne me mõ. Pê krĩ wên ita hõtpê Krĩpinkrên pê ampỳre mã xa, mõrmõ pê hỹrmã rec pyxit ne ihkôt hĩkjê kam pê xa. ¹⁴Ne pry kôt ihtỳj Jeju pupun xà kêanre atajê to, ajco amji mã me hũjarẽn to me mõ. ¹⁵Ne cormã amji mã me hũjarẽn to me hàhpan to me mõar kam, mã krãa, Jeju me ahna cator ne ma mehkôt mõ. ¹⁶Mã cute me hõmpun, mã jũa mã cute amji tête mehkrã ton, mã nee cute me cupê Jeju na me hahkre pej nare.

¹⁷Mã me cumã:

― Ampo ca pry kôt amji mã me harẽn to me mõ ata? ― hane. Mã me hàhhuc ne me cumã amji kĩn nare. ¹⁸Mã ihnõ japrỳ te Cripa ita cumã:

― Pỳhàpà, xà ca apyxit peaj ne ajte Krĩpinkrên kam akrĩ, ne nee ate cormã amcro incrê cahhur ita kam ampo te hajỹr xà ata na hahkre pej nare? ― hane.

¹⁹Mã Jeju cumã:

― Ampo? ― hane. Mã cumã:

― Por Naxare jõ krĩ pĩn Jeju cator ata pê me pamã hũmre pê Pahpãm jarkwa to ihcakôc catê. Ne ampeaj kam Pahpãm jarkwa to ihcakôc, ne hàpên xà to into hihtỳj, ne me pamã cupê Pahpãam to Pahpãm. ²⁰Mã ajte Pahpãm mã mehcajrẽn catêjê jõ pahhi me, me pajõ pahhi me, cute me hũhkra mã me haxàr, mã cute ame to kêanre. Ne cute pĩ kam me inxôr, ne hũhkra me ihpar kam me wakỳre cuhhêc, ne toa mehcuran. ²¹Ne pê wa ajco cute Juta catêjê to amji pytàr na mehcãmjĩ, ne ahna me hikaj. Ne cormã ampo te hajỹr xà ita na amcro incrê peaj. ²²Ne me ikwỳa kam pyjê nõ ma kẽn kre kam cute me harêt ata wỳr me pra. Ne nee cute hipêr me Jeju jĩ pupun nare. Cwỳrjapê wa me icunea amji mã me to ijapôj to me ipa. ²³Ne pyjê atajê te me amji jaxàr ne ame imã awjarẽ, xwahna cute me côjkwa pĩn Pahpãm jarkwa to memprar catêjê pit pupun. Mã xwahna ramã hacpỹa mã ihtĩr na ame cumã harẽ. ²⁴Mã me ikwỳa kwỳ te me hahpan, ne pyjê te me harẽn xà atajêa na cute me hõmpun, ne nee cute me Jeju jĩ pupun nare ― hajỹr.

²⁵Mã Jeju te me cumã hũjarẽn to:

― Pỳhàpà, mã ajte ca nee uu ne ame pamã Pahpãm jarkwa to mehcakôc catêjê jarkwa kam me gapac nare. ²⁶Pê ihtỳj Crixtô ata kên na amji pupun to prãm. Ne quê ha cute amji pupun xà kêanre na amji pupun ata jahpan xà na, quê ha mehcunea jirôa pê hàmtàr cati na, hãn ne mehcunea me hahkre pej ― hajỹr.

²⁷Ne cute ihkrãa kam me cumã Mojxe xwỳ jõ kàhhôc rũm cahyt kam ihtẽm, ne ihkôt harẽn, ne ihkôt Pahpãm jarkwa to mehcakôc catêjê cunea jõ kàhhôc kwỳ cahyt par. Ne me cumã, por ampo te ihkàhhôc kam jũ mã ton xà atajêa na amji kôt harẽn partu.

²⁸Ne krĩ wên ata na ramã me hàhtêp, ne ramã me cator xàa kam, mã Jeju ma mehhyr ne ihtẽm prãm. ²⁹Mã ma amji na ame huwahi, ne me cumã:

― Atẽm nare, ne ita ri me ina ahtwỳ, nãmri ramã pyttu ― hane. Mã Jeju me ipijakrut atajê cahê na hàhhuc.

³⁰Ne me cahê na hỹr, ne cute pãw pyr ne to Pahpãm mã hũrên hakryti na amji jarẽn jirô pê, cute ihcokjêr ne me cumã hõr. ³¹Ne cute me cumã hõr me ajkaam mã cormã mehkrã kre, mã cute cupê Jeju na me hahkre pej, me ajkaam, mã hãm xà ata kam hamre, ne ma tẽ. ³²Mã ajwar ajpẽn mã me harẽ, ne me ajpẽn mã:

― Pỳhàpà, pry kôt pamã ihkàhhôc krã krutre jarẽn to mõr ata kam, cu ramã pahna cuhkõnrea kam amji mã to hajỹr pyrentu ― hane.

³³Ne me hãm pyrentu, ne ma hacpỹ mã Krĩpinkrên wỳr me pra, ne ihkôt me ipa catêjê kwỳ wỳr me cator, ne ame cumã harẽ. ³⁴Mã mehkwỳ me ipijakrut atajê mã:

― Ampeaj kam ri me pajõ Pahhiti hacpỹa mã ihtĩr! He hanea Petrô te hõmpun! ― hane.

³⁵Mã me ipijakrut itajê te hajỹar ne, por pry kôt cute me hõmpun, ne hanea ne ikre kam me cumã pãw cokjêr na cute me hõmpun ata na, cute me cumã harẽn.

Pê Jeju ihkôt me ipa catêjê mã amji pẽ

³⁶Ne cormã me amji mã harẽn kwaa kam, mã krãa, mehcote na Jeju cator, ne cute me cumã harkwa to:

― Hàpà, mãr me apeaj? Nee ca icupate ame akrihkrit nare ― hajỹr.

³⁷Mã mehcunea pikrar ne mehcunea mã paa to pa. Ampo na? He ihtỳj cute me jũm carõ pupun na ame amji cãmjĩ, na ri ame paa to ame pa. ³⁸Mã Jeju me cumã:

― Ampo na mã ca ito ame amji mã ajkra, ne ame ahkrihkrit? Ampo na mã ca cormã nee me akrã kam amji mã me ito hajỹr nare? ³⁹Me ijũhkra pupu, ne me ipar pupu. He ipê Jeju, pa wa. Me icupê ne me ijahkre pej, pom wa ijĩa xa ita. He me carõ jĩ nare, ne nee mehhi nare ― hane.

⁴⁰Ne cute ita jarẽn jirô pê cute me cumã hũhkra me ihpar jahkre, mã cute ihtỳj me wakỳre te caxwỳr xà xwa kre pupun. ⁴¹Ne me hakryte ma ajmãr cupê Jeju na ame ahna aprã. Ne ihtỳj cormã amji mã me ajkra. Cwỳrjapê ri Jeju te mehcukij ne me cumã:

― Xà ajkĩ ita ri me apê ampo krẽr xà hamreare? Wa ihkwỳ krẽ, ca ihkur na me ipupu ― hajỹr.

⁴²Mã cute me cumã tep xêt nõ ita kwỳ. ⁴³Mã me kam mare mã xa ne cuku. ⁴⁴Ne me cumã:

― Ne por wa ame acahê na imõr kwỳa kam, amji na ite me amã ampo jarẽn atajê te ito hajỹr to prãm, ata na ri cute ito hajỹr. Por pê Mojxe xwỳ jõ kàhhôc me, Tawi xwỳ jõ kàhhôc me, mehkwỳ jõ kàhhôc ito hũjarẽn xà to awjarẽ atajêa na mã, cute ito hajỹr ― hane.

⁴⁵Ne jũa mã cute mehkrã ton, mã ihtỳj me Pahpãm jarkwa par pejti.

Pê Hũm Cati Carõ Pejti jikaj na, Jeju me cumã harkwa ta

⁴⁶Mã hacpỹ mã Krĩpinkrên wỳr cute me amji jaxàr ne me cator. Mã hipêr Jeju te curi me cumã amji to ipipẽ, ne me cumã:

― Por pê Inxũ Cati jõ kàhhôc kam ito hũjarẽn to:

“Quê ha, pê Pahpãm Crixtô cator na me amã to awjahkre ata,

ihtỳj amji pupun xà kêanre to amji pupu ne ty.

Ne amcro incrê kam hacpỹa mã ihtĩr” hane.

― Ne hanea ne ihkàhhôc ata ito hũjarẽn to hane he:

⁴⁷“Hamre, quê ha cute harkwa jarẽn xà itajê cunea,

krĩxàre cunea kôt ajcrà.

Ne Krĩpinkrên kam quê ha ipicràn kam tẽ,

quê ha me harkwa itajê cunea jarẽn pa,

ne me hahkre pej, ne mehkên ton jicu,

ne amji mã me Pahpãm na ahwỳ,

quê ha mehkên to tojnõ ne me to impej” hane.

⁴⁸― Ne me ca, ate me ijarẽn pej xà caxuw ca ate me ato jĩa to me ipupun, ampo atajê cunea na. ⁴⁹Ne me ca, por Inxũ Cati te ate me ijarẽn xà caxuw me amã carôt tỳjti to hũjahkre ata, quê ha ihtỳj me amã cugõ. Ne pa wa ha itỳj hanea ne me amã cugõ, ne ahna me ato ihimpej. Na ca ha ita ri, Krĩpinkrên kam, me hikaj. Quê ha ita ri côjkwa pĩn, me amã me acarôt tỳjti ata wrỳ, ca ha me acwa ― hane.

Pê Jeju côjkwa wỳr api

⁵⁰Ne Jeju te krĩ pê me to cator, ne ma amji kôt Mehkênpupunxà jõ krĩ wỳr me to mõ, ne curia ri cute mencwỳrpê hũhkra curor, ne cute mehcajrẽn. ⁵¹Ne cute mencwỳrpê hũhkra curor me ajkaam, ma côjkwa wỳr hàpir to mõ. ⁵²Mã ame Jeju pejti na harẽ, ne ma Krĩpinkrên wỳr cute me amji jaxàr. ⁵³Ne amcro cunea kam, ma Pahpãm to me amji kam hapac xà jũrkwa wỳr me ipa, Pahpãm mã mempejti to mehcakôc prãmte. Hamre.