Krãhtare Jõ Pahhi Pê
JOJUW
Ỹhỹ, pê Mojxe ty jakàn pê Jojuw pê Ixaher catêjê to ihhimpej catê. Cwỳrjapê ri ihkàhhôc ita japrỳ te Jojuw Jõ Kàhhôc (Jojuw). Ne ihkàhhôc ita, Ixaher catêjê te Canãn jõ pjê pê mam menquêtti pê Aprãw xwỳ ata jõ pjê to cute me amji pytàr, ne kam me ipicràn na, me pamã harẽ.
2Pê me hũcapi catêjê me Krĩcuxwati pupu
Ỹhỹ, pê Canãn jõ pjê kam Krĩcuxwati ata quê ha mam me hũtà. Mã pahhi pê Jojuw te me hũmre to ipijakrut ne mehkujahêc, cute me, por pjê to Pahpãm te me cumã hũjahkre ata pupun prãmte. Mã me hũmre itajê ma hỹr xà ata pê me cator, ne ma me pra. Ne Côpijapjêr jõ cô na me irêr, ne ma Krĩcuxwati ita wỳr me cator, ne ma harkwa na me hàr, krĩ wỳr, ne ma pyjê nõ inxyre japrỳ te Rapekwỳj ata wỳr me tẽ, curi me hõt prãmte. Mã jũm te Krĩcuxwati jõ pahhi mã Ixaher catêjê xũmre pijakrut te pjê pupun prãmte me cator na harẽn.
Mã krĩ jõ pahhi te me hỹrmã krãhtare kwỳ kujahêc, cute me hũmre itajê pro, ne me hacjên prãmte.
Mã Rapekwỳj te ikre jimoac ri me to ipimxur. Ne cute krãhtare kwỳ atajê mã ihhêj, ne cumã:
— Ita ri me hũmre pijakrut ne me cator, ne ma ramã me tẽ. Wa nee ite jũ ri me mõr xà na me hahkre pej nare ita kam, atỳj ame hapê. Ca ha jũ ri me cumã me acato — hajỹr.
Mã ma krãhtare kwỳ, ihcaprỳ na mehkôt me pra. Ne harkwa na me cator me ajkaam mã krĩ mã mencjêj xà jõ harkwa te amji jihê. Mã ma Côpijapjêr jõ cô ri ihcaprỳ na ame hapê.
Mã Rapekwỳj me hũmre pijakrut atajê nõr xàa kam me hỹrmã hàpir ne jỹ, ne ame cumã amji to ihhimpej, ne cute me cumã:
— Ỹhỹ, he wa ite me Apãm Cati te me amã pjê ita jõr na ramã me gahkre pejtu. Ne ampeaj kam ri ame acupa. Ampo na? Pê wa Ejit jõ pjê pê me acator na me garẽn pa, ne hanea ne me Apãm Cati te me amã cô jahkjên, ca ahna me arêr na me garẽn pa. Ne hanea ne ramã ite, me ate Amorit catêjê jõ pahhi to me ipijakrut ne mehcuran na me garẽn par. Cwỳrjapê ri ampeaj kam me imã me acupa. Ampo na ri ame acupa? He me Apãm Cati pê côjkwa jõ Pahpãm, ne hanea ne cupê pjê jõ Pahpãm, na ri ame acupa.
— Ne ita caxuw ca ha me imã amji ton xà nõ to me amji ton hiahpuro, me Apãm Cati japrỳa na. Quê ha jũ caxuw me akwỳ me ijõ pjê ita pytà, ca ha atỳj ite me ato me atyc jahpan xà na me ijamã. Wa ha me acahê na ame ipa, inxũ me, inxê me, pa me, me ikjêjê cunea me. Ampo na? Wa ha me atehcajpa, ca ha hanea ne jũ caxuw me itehcajpa — hajỹr.
Mã me hũmre itajê te me amji kam hapac, ne me cumã harkwa to:
— Ca ha ate ita ri me ipimxur na me ijarẽn nare na, wa ha itỳj me acunea pytà. Ne ite gũrkwa jahkre pej prãmte ca ha harkwa krare na pàr cuxê tepti nõ ata xô — hajỹr.
Mã Rapekwỳj te me cumã harkwa to:
— Pom wa me amã ita. Me tẽ ne kẽnti atajê nõ na ca me amxu, ne curia amji to me amcro to incrê, quê ha xa krãhtare kwỳ atajê hacpỹ ne me amji jaxà, ca ha cormã me akwỳ wỳr me tẽ — hajỹr. Pê hũrkwa kẽn te krĩ tête kwỳc ata jipya xa. Na ri cute põ rũm harkwa krare nõ ata na pàr cuxêti xôr, ne ahna me iwrỳc na me ton. Mã ma krĩ pê ahna me iwrỳc, põ wỳr. Ne ma kẽnti nõ ita wỳr me tẽ, ne curia cute amji to me amcro to incrê. Jirô pê mã ri ma cô na me irêr, ne ma Ixaher catêjê jỹr xà ata ri me hỹrmã me cator. Ne cute me hõ pahhi Jojuw mã ihcunea na me amji jarẽn par, ampo te jũ mã me ton xà atajê na.
3Pê ame Côpijapjêr jõ cô na rê
Mã Jojuw te Ixaher catêjê cunea to Côpijapjêr jõ cô na hàhhuc, ne curia ame ipa. Mã me ahna amcro incrê, mã me to ihhimpej catêjê atajê te ame to ihhimpej, ne me cumã:
— Quê ha Pahpãm mã mehcajrẽn catêjê Pahpãm jàmcjên xà to me mõ, ca ha me hõmpu, ne atỳj me hũnãr pyrentu — hajỹr.
Ne pê ma ajco me pĩ po te Pahpãm jàmcjên xà ata pupu, ne Pahpãm me cute me ajpẽn par xà ata to me amji japackre pyrentu. Mã Jojuw te me cumã harkwa to:
— Quê ha apẽ, quê ha Pahpãm carôt tỳjti ata to me pamã ajpẽ. Cwỳrjapê ca ha caxuw ame amji cũmpej to mempeaj ne, ate me amji kam gapac xà mea mã, mãr ca Pahpãm to pit mã me amji kampa — hajỹr.
Ne me ahna apẽ mã Jojuw te Pahpãm mã mehcajrẽn catêjê to ihhimpej, mam cute Pahpãm jàmcjên xà ata to cô wỳr me mõr prãmte. Jirô pê mã ri Jojuw te mehcunea mã hàkjêr ne me cumã:
— Ajpên me mõ ne Pahpãm te ihcakôc xà ton ata na me kampa. Ne ita kam ca ha me Pahpãm tĩar te me pahcahê na apu ipa na me hahkre pej. Por Pahpãm pê pjê cunea Pãm Cati ata jàmcjên xàa ri hãn ne me acumam ipa, cô na me parêr xà na. Na ca ha me Pahpãm jàmcjên xà ata pupu, ne me Pahpãm te me pahpytàr na amji ton xà ata to me amji japackre pyrentu. Quê ha me hàmcjên xà to me ipa catêjê par cô kam ahtwỳ, me ajkaam quê ha cô ata me amã ajcapô — hajỹr.
Ne ta kam pê ita hane. Mã Côpijapjêr jõ cô tàm te hipu tu, ne ihtu. Mã por me Pahpãm jàmcjên xà to me mõ atajê te cormã cô kam mehpar xãm, mã pea cô kỳj rũm ajpjê ata cunea pinkrên, mã ahpar mã ihcahhur cunea pijapjêr par, ne ihcajpuw amcrà.
Mã Pahpãm mã mehcajrẽn catêjê atajê te hàmcjên xà ata to cô jipôc ri amcrà ata kam me hàhhuc, ne me to xa. Mã mehcunea rêr partu, hĩkjê mã, Krĩcuxwati wỳr. Mã Pahpãm mã mehcajrẽn catêjê hapu na me irêr, me ajkaam mã cô te ipijapjêr kam ihtẽm, ne ipijapjêr ta to ajpjê, ne cute hipu tu.
6Pê Ixaher catêjê Krĩcuxwati to hamre
Pê ramã Ixaher catêjê cupate, Krĩcuxwati jõ harkwati hihê, na pê nee jũm hàr nare, ne nee pê hanea ne jũm cator nare. Ampo na? He ramã ajpên Ixaher catêjê me hàhtêp to mõ, cute me krĩ ata pytàr, ne me to hamre xà caxuw. Mã Pahpãm te Jojuw mã hũjarẽn, ne cumã:
— Imãa ramã Krĩcuxwati me, me hõ krãhtare me, hõ pahhi me, ramã me hamre tu. Ampo na? He wa ha me gũhkra mã me haxà.
— Ne ca ha ita caxuw me hane he. Quê ha me gõ krãhtare catêjê cunea, amcro cunea kam krĩ ita pu na me ipixêr to pyxit, ne ma hacpỹ mã me amji jacjê, me gỹr xà wỳr. Quê ha hanea ne imã mehcajrẽn catêjê te xet itajê, ijàmcjên xà cumam me hàkôr xà atajê to me ipa. Ne ca ha me hajỹr ita to me amcro to xêj.
— Ne amcro te xet ita kam, ca ha me apixêr cahhur to krĩ pu na me ajxê to me xet. Quê ha imã mehcajrẽn catêjê me hàkôr xà itajê cakôr to me ipa, ne cute mehcakôr jicu xà wỳr, quê ha mehcakôr kam me to incrà tune, quê ha Ixaher catêjê cunea kỳj cati pêa mã ame caràr. Me ajkaam quê ha krĩ tête kwỳc ata cunea apu ajxwỳ. Ca ha me acunea krĩ ata mã me axà, ne me hipej tu ne — hajỹr.
Mã Jojuw te Pahpãm mã mehcajrẽn catêjê me mehcunea to cuprõn, ne me to ihhimpej, ne me cumã:
— Ca ha nee cormã ne me anõ acaràr nare, ne nee acakôc nare. Wa ha pa me acaràr na me amẽ, ca ha cormã ame acaràr — hajỹr.
Ne me hõ krãhtare catêjê cunea me, Pahpãm mã mehcajrẽn catêjê kwỳ Pahpãm jàmcjên xà ata to hãn ne krĩ pu na me ipixêr to pyxit, ne ma hacpỹ mã me to ipa, me hỹr xà wỳr. Ne iràrà na Krĩcuxwati pu na cute me ipixêr to me pyxit, ne ma me amji jaxàr, me hỹr xà wỳr. Cute me ita to hajỹar to amcro to xêj.
Ne me ahna amcro te xet ata kam ri, cute krĩ ata pu na me ipixêr to xet. Ne me ipixêr jicu xà ata kam ri Pahpãm mã mehcajrẽn catêjê te kỳj cati pêa mã ame hàkôr xà atajê cakôr. Mã Jojuw te me cumã harkwa to:
— Ame acaràr! Pahpãm te me pamã krĩ ita jõr! — hajỹr. Me ajkaam, mã kỳj cati pêa mã ame caràr, mã krĩ tête kwỳc ita cunea apu ipijaxwỳr, mã Ixaher catêjê cunea xàr, krĩ ata wỳr.
Ne cute mehcunea jipej, me hũmre me, pyjê me, me ahkrare me, me hõ parxare mea mã.
Ne cute me hipej xwỳjrea na Jojuw te, por pê mentuw me ajkrut ne me krĩ pupun to me tẽ ata mã:
— Mãr ca me jũm cahãj pê Rapekwỳj pijapit xyre ata to me amji japackre, por ate mehkên pê me hũtàr xà na me cumã amji ton ata na. Me tẽ ne me haprô, me hũmjê me, me hũkjê mea mã — hajỹr.
Mã ma mentuw itajê ajwar me tẽ, ne cute me pàr cuxê tepti te harkwa krare na harij ata pupun, ne cute me jũm cahãjre ata me, me hũkjê me, mehcunea japrôr ne amji cahê na me cumã ampo kà te hũrkwa pyxwỳr.
Mã Ixaher catêjê te krĩ kam ampo atajê cunea to caxàr, ne kẽn pràti me, wakỳre pràti me, wakỳre te ampo run xà atajê ri, nee cute jũ na me ton nare, ne Pahpãm jarkwa kôt, ma ampo kà te Pahpãm to me amji japackre xà jũrkwa wỳr, ampo atajê cunea to me mõ.
Hõ, ita na ri Jojuw te pyjê nõ inxyre ita me, me hũkjê cunea pytàr, pê mentuwjê me krĩ pupun to pra, pê mehtehcajpa na pê.
10Pê Jojuw Pahpãm wỳ, pyt me putwrỳ to ipinkrên prãmte
Pê Jojuw na mehkwỳ Krĩcuxwati na kjêjê jipej jirô pê mã, hanea ne krĩ nõ ita to me hamre. Na pê Krĩpinkrên jõ pahhi, Jojuw te krĩ atajê jipej na harẽn pa, ne hanea ne cute Gipõm jõ krĩ me, me ajpẽn mã me hõ cô xãm na me harẽn pa, ne ampeaj kam cumã me hũpaa to me hũpa. Mã cute Amorit catêjê jõ pahhi kwỳ wỳr harkwa kujahêc, ne me cumã harkwa to:
— Ajpên me pra ne ite me Gipõm catêjê jipej na me itehcajpa. Ampo na? Cute Ixaher catêjê pê me pahcurê xwỳn atajê me, me ajpẽn mã me hõ cô xãm jahpan xà na, cu ha me hipej — hajỹr. Mã pahhi te xĩc te Gipõm catêjê jipej na me amji par.
Mã Gipõm catêjê te amji na mempar, ne Jojuw wỳr me harkwa kujahêc to:
— Ajpên gũjarêan kam tẽ, ne me ipê amã me ijàpên catêjê tehcajpa! Nãmri Amorit catêjê jõ pahhi catêjê kwỳ ihtỳj me icuna mã me ipijapu prãm, ne ramã ajpên me hõ krãhtare to me iwỳr me mõ — hajỹr. Mã Jojuw ma Ixaher catêjê jõ krãhtare to mõ, cute Gipõm catêjê tehcajpar prãmte.
Mã Pahpãm te Jojuw mã harkwa to:
— Apu pa nare, wa ramã ite gũhkra mã mehcunea jaxàr, na ca ha atỳj mehcunea tohjê ne me hirô pê xa — hajỹr. Mã ma caxwari Jojuw hõ krãhtare to mõ, iràràtia na, ne cama cute me curê xwỳn itajê mã me ipikrar, ne amehpro. Mã Pahpãm te jũ mã ame curê xwỳn itajê ton, mã ampeaj kam cumã me hũpaa to me hũpa. Mã Ixaher catêjê jõ krãhtare te me hàhtôa ne me hipej, ne ma pry kôt mehkwỳ jahê, ne ihtỳj mehcuran to me mõ. Mã Pahpãm te kẽnti te ta catia ne ihkujahêc, mã cute Ixaher catêjê jõ krãhtare jirôa pê me curê xwỳn atajê jipej. Ne cute mehcuran to pyt.
Ne cormã Jojuw jõ krãhtare ame curê xwỳn itajê jahêar kam, mã ramã pyt to mõ. Mã caxwari ma jũ kam, jũm tẽm cupate, Jojuw te Ixaher catêjê mã Pahpãm na hàhwỳr to hajỹr he:
— Me ijõ Pahhiti, pyt me putwrỳ to ankrê, côjkwa kam, mãr quê nee awcapàtkô nare — hajỹr.
Mã pyt me putwrỳ curia côjkwa kam ajwar ipinkrên ne ajêt, mã ahnaa Ixaher catêjê jõ krãhtare te me curê xwỳn catêjê cunea jipej tu. Mã pyt ipinkrên itaa na ajêt.
Rỳ jũ caxuw amcro nõ pê amcro ita pyràc nare. Ampo na? Côjkwa kam pyt me putwrỳ ita pinkrên ne ajêt, me hũmre nõ pyxit peaj ata te Pahpãm na hàhwỳr na ri. Ampeaj kam Pahpãm pê Pahhiti te Ixaher catêjê tehcajpar crire nare. Mã Jojuw me, mehkwỳ te me curê xwỳn jipej jirô pê mã, ma me amji jaxàr, mehkrĩ xà wỳr.
Pê Jojuw mehkwỳ to ihhimpej to caku to hàhtôa. Na pê pjê ata cunea pytà ne to hõ tekjê, mehkwỳ caxuw. Na ri Ixaher catêjê te amji mã Canãn jõ pjê kwỳ pytàr ne me cumã haprỳ to Ixaher jõ pjê. Mã ahpỹanre na me hakrã cunea te amji mã pjê ata to ipicokjêr par.
Pê Rewi kra nee mehkjêjê cuxà me amji mã pjê nõ pyr nare. Ampo na? Me cupê Pahpãm te amji kam hapac xà jũrkwa kam me hàpên catêjê, mehkjêjê cunea jaxà kam. Na pê mehkjêjê cunea ihtỳj me hõ to Rewi kra tehcajpar xà. Pê Rewi kra jaxà kam, Joje kra pijakrut pê Manaxê me Eprĩ me amji mã pjê kwỳ cwa. Na pê ahpỹanre na me hakrã te tôxi atajê amji mã pjê ata to ipicokjêr par to hane: Ximãw jõ pjê me, Juta jõ pjê me, Rupẽn jõ pjê me, Pẽnjamĩ jõ pjê me, Tã jõ pjê me, Eprĩ jõ pjê me, Manaxê jõ pjê pijakrut me, Cate jõ pjê me, Ixaca jõ pjê me, Xepurõ jõ pjê me, Naptar jõ pjê me, Axer jõ pjê.
Ne pê cormã Jojuw me, me cupê prohti kam mehtĩar ajco me to ihhimpej to me ipa, na pê ihtỳj mehkwỳ mehkôt Pahpãm to me amji japackre. Ne pê Jojuw ihwej ne ty, pê pjê pê hõ pjêa kam me harêt.