JO JÕ KÀHHÔC
1Pê Pahpãm Jo capi na Xatanaj jamã
Ne pê me ahna caku jàhtôa jirô pê mã ri hũmre nõ ita japrỳ te Jo, ne pjê nõa kam ihkrĩ. Ne cupê hũmre krã impejti, ne ampeaj kam cumã Pahpãm kĩn, ne nee ajco apu ihkên ton to ipa nare, ne quêt catyt kam ajco ipa. Pê cumã ihkra xũmre xet, ne cahãj incrê, ne hakràaj to hakràj. Ne pê ampeaj kam ihparxare to hakràj cati, me hũkjê kwỳ jirôa pê.
Pê mehkra ajco me amji mã amji kĩn to, ne ajco mehkjêjê kwỳ na ahwỳ, hũrkwa wỳr. Pê ajco me cuprõ, ne me apà, ne ajco me ikõ, me hõ amji kĩn ata na. Ne pê me hõ amji kĩn ita na ajco jũ mã amji to me amcro to. Ne ajco mehkra me amji kĩn itajê jicu, pê Jo mehkra na ahwỳ, ne Pahpãm mã mehcajrẽn. Ne ajco iràrà na ihkrĩ, ne Pahpãm mã ampo pry to capa, mehkra kên xà itajê jahpan xà na. Ampo na? Pê ajco taa amji mã:
— Quê ihhêaj to me ikra Pahpãm mã mehkên xà nõ to, ne nee me hĩ cunea kam me cumã Pahpãm kĩn nare, cwỳrjapê wa ha pa, me hahpan xà na, Pahpãm mã ampo pry to capa — hane. Hõhõ, pê Jo ajco ita ton to hajỹr to ihcuhhê.
Mã amcro nõ na Pahpãm te me pahcurê xwỳn pê Xatanaj ita cukij ne cumã:
— Xà ca ajkĩ atỳj me imã hàpên catê pê Jo ata pupu? Pjê kam me hũmre kwỳ jirôa pê cupê hũmre impejti, ne ihtỳj amji mã icupa, ne ma apu ampo kên cunea caca — hajỹr.
Mã me pahcurê xwỳn Pahpãm mã:
— Ca gõtpê ma hamã, ne ma hũrkwa jamã, ne ma cumã ampo atajê cunea jamã, na ri cumã akĩn. Ca cupê ampo itajê cunea to pôj, ne cupê to hamre, quê ha hipêr cumã akĩn nare. Quê ha ihtỳj akuc ri acrôn xà kêanre nõ to acrô — hane.
Mã Pahpãm cumã:
— Xatanaj, hã gapacta ne cupê hakràj itajê cunea to kên, ne hĩ ca nee caxun nare — hane.
Jirô pê mã ri me pahcurê xwỳn te Jo to kên prãmte hỹrmã tẽ. Mã ahna ahtũm nare mã Jo kra te hipêr me hũrkwa kam, amji mã me amji kĩn nõ ton. Mã pea Jo jũrkwa ri jũm jũjarẽn catê ita hỹrmã cator, ne cute cumã hũjarẽn to:
— Wa ame gõ pryti to pur kam pjê to apkjê, mã cawrô cahàcre ihtỳj apu ipa. Mã Xapêw catêjê kwỳ cator, ne cute me amã hàpên catêjê jipej, ne ma me ampo itajê cunea to mõ. Wa ipyxit peaj ne itĩr ne awỳr icator — hajỹr.
Ne cormã apu hũjarẽn kwỳa kam, mã ramã ihnõ ita tẽ, ne cute Jo mã hũjarẽn to:
— Côjkwa pĩn cuhy pỳm, ne cute gõ carà cahàcti me, cute me hamãr catêjê cunea to caxàr. Wa ipyxit peaj ne itĩr ne awỳr icator — hajỹr.
Ne cormã hũjarẽn kwỳa kam, mã ita xwỳjê cator ne cumã:
— Cartêj catêjê kwỳ cator, ne cute me amã hàpên catêjê cunea jipej, wapo xwahhihti to, ne ma me gõ cawrô kô jarôti pê camer atajê to me cutor tu. Wa ipyxit peaj ne itĩr ne awỳr icator — hane.
Ne cormã apu hũjarẽn kwỳa kam, mã ita xwỳjê cator, ne cumã:
— Me akra te me hũrkwa kam amji mã me amji kĩn ton, ne cormã ame ahna akrua kam, mã kôc pahtỳjti ita cator, ne cute ikre kwĩn. Mã me kam ihpỳm, ne cute me hipej tu — hane.
Pê Jo nee Pahpãm kên jarẽn nare
Mã Jo jũpar par, ne ihtỳj Pahpãm to amji japackre, ne hãm ne xa. Ne cute amji pê ihkà jipôn, ne to ihkĩ cunea mẽn, cumã amji kĩn nõ xàhte. Ne cute harkwa to:
— Pê wa icakrô ipỳm, ne wa ha icakrô ty. Me ijõ Pahhiti, ca ate imã ampo atajê cunea jõr, ne hacpỹa mã ate ipê ihcunea incwỳr. Ne ijõ Inxũ Cati, imãa, cormã apejti — hajỹr.
Ne pê Jo cute amji kam hapac xà ita kam, nee Pahpãm cuna mã ihkên xà nõ ton nare, ne nee pê Pahpãm cuna mã ihcakôc xà kên nõ to ihcakôc kên nare.
Jirô pê mã ri Xatanaj te hipêr Pahpãm na hàhwỳr, cute hanea ne Jo jĩ to kên prãmte. Mã Pahpãm te ahna to tojnõ.
Mã ahna ahtũm nare, mã Jo jĩ cunea kam ihkà xêt, ne ihrôt ne ampeaj kam cumã hà. Na pê amji pupun xà kêanre to amji pupun cakrô, pê nee Pahpãm cuna mã ihcakôc kên nõ to ihcakôc nare.
3Pê Pahpãm hacpỹa mã Jo to impej
Mã Jo jõ ikwỳ nõ catêjê te ahna me cuprõn, cute mehtehcajpar prãmte. Ne xãmte nee ihtehcajpar prãmte ahna cute me cuprõn nare, ne cama apu ihkên mã me mẽn prãm, ne me cumã:
— Jo, me ikampa. Akêanre, na ri Pahpãm te akên jahpan xà na apu ato kêanre. Jũ wỳr quê Pahpãm jũm pejti to kên — hajỹr. Ihtỳj cute ampo kên ton na amehcãmjĩ, na pê ame cumãn to hane.
Mã tee Jo me cumã cute ampo kên ton nare na amji jarẽ. Mã hõ ikwỳ nõ atajê te hapackrea to jũ mã me amcro jàhtô ton. Mã Jo te me cupê amji pytàr prãmte hajỹar, ne me cumã ampo jàhtôa jarẽn.
Jirô pê mã ri Pahpãm apu Jo jõ ikwỳ nõ catêjê kam incryc, ne me cumã:
— Me apê amji jahkre kêatre, na ca ame Jo to acakôc kêanre to hane. Ne Jo ri me girôa pê impej. Ne cama Jo na me ahwỳ, quê imã me acajrẽn, wa me ato impejti ne — hajỹr. Mã Jo te Pahpãm mã mehkwỳ cajrẽn, quê nee me kam incryc nare.
Mã Pahpãm te Jo kam hapac, ne cumã hõ ikwỳ nõ te to kên xà ita to tojnõ. Ne hanea ne cute Jo mã mam cumã ampo itajê jirôa pê hõr to ipijakrut partu. Mã hanea ne Jo kjêjê xũmre me, mehkjêjê cahãj me, me hõ ikwỳ nõ catêjê me, cute ame cumã ampo jõr xà atajê to hỹrmã me mõ. Ne ame Jo caprĩ, cute amji pupun xà kêanre ata cwỳrjapê.
Mã Pahpãm te Jo mã ampej, ne to hakràj catia to cati, ne hipêr cumã ihkra xũmre to xet, ne ihkra cahãj to incrê, ne ihkra cahãj itajê ri, pjê cunea kam mempej atajê jirôa pê mempej. Pê Jo caku jàhtôa kam amji to ajpa, ne ajco mehtàmxwỳ pupu. Hamre.