JOWÃW

JOWÃW

Te Jeju Jarẽn Xà Impejti

JÕ KÀHHÔC

Ỹhỹ, pê Jowãw ihkàhhôc ita to, ne Jeju na mehkwỳ cunea mã ihkujate. Ne pê cupê Jeju jarkwa na memprar catêjê nõ. Ne pê mam cupê tep pro catê, pê Jeju amji kôt ipa catê na ahna ahwỳ. Pê caku crê kam ajco Jeju kôt apu ipa, ne pê Jeju te amji kam hapac xà cunea na hõmpu. Ne pê Jeju mã mehkwỳ jirôa pê Jowãw kĩn. Ne hõ kàhhôc kam cute pjê ita kam Jeju te mõr reria mã cute ampo kwỳ ton, ne ihkwỳ jarẽn xà itajê kwỳ na ihhôc. Ne hõ kàhhôc ita kam cute, me pahte ampeaj kam Jeju to amji mã me pahhimpej to me pamã hahkre. Ne ampeaj kam ri cupê Pahpãm kraa to Pahpãm kra, ne taa mã ri Pahpãm cahê na me papa rohnỳtti mã na me pamã to hahkre. Ne hõ kàhhôc japrỳ pê Jowãw Te Jeju Jarẽn Xà Impejti Jõ Kàhhôc (Jowãw).

Jeju pê Pahpãm

^1-2Mam, ampo cunea cumam, pê ramã me pajõ Pahhiti ipa. Ne me pamã cupê Pahpãm cakôc xà me harkwa. Ampo na? Taa mã ri me pamã Pahpãm te amji kam hapac xà me, incaca xà to ipipẽ to ipa. Ne pê Pahpãm cahêa na maam ajco apu ipa ne me ajpẽan. ³Na pê me pajõ Pahhiti Hũm Cati jarkwa kôt ampo cunea ton partu, pê nee iràn xà na, ampo hũhkra kaj na, amjia kôt amji ton nare.

Pê Jeju me pamã Hũm Cati jahkre

⁴Na ri cupê me pahte amji kam me pajapac xà cunea xakat. Ne pom hãn ne pyt pjê cunea cujro, cu hàhcujro kôt me ampo cunea pupu, ita na mã me pajõ Pahhiti me pahcunea mã pahte me hahkre pej xà gõ, mãr cu ihcunea na me Pahpãm pê Hũm na me hahkre pej ne me hõmpu, ne cahê na me papa rohnỳtti mã. ⁵Pyràc pej na mã me pajõ Pahhiti pê me pahcujro xà, ata kôt cu me Hũm Cati jahkre pej ne me hõmpu. He jũ wỳr quê mehkên ton catêjê nõ, pê ihhêj rũm awcapàtkô kam mehkrĩ catêjê atajê kwỳ, me pahte me Pahpãm pupun nare prãmte, me papê cute me pahcujro xà ita pro ne cupĩ.

⁶Ne pê me pajõ Pahhiti cator xwỳjrea na, mam Pahpãm me pamã harkwa na imprar catê pê Jowãw te cô kam me cumrãr catê ata kujate, cute me pamã me pahcujro xà pê me pajõ Pahhiti ita to hũjarẽn, ne to hahkre xà caxuw. ^7-9Ne pê Jowãw xwỳ pê me cumrãr catê ata nee ihcakôc xà to:

— Ipê ihhêj rũm me acujro xà — hajỹr nare, ne cama harkwa to:

— Quê ha cormã me pamã me pajõ Pahhiti cato, ata pê ri ihhêj rũm me pahte amji kam me pajapac xà cunea cujro xà, pjê cunea kam. He cupêa ri quêt me pahcujro xàa to me pahcujro xà — hane. Ne pê Jowãw me pamã me pajõ Pahhiti to hahkre, pahte me hahkre pej ne to amji mã me pahhimpej xà caxuw, pê me pahwỳr cato.

Quê ha jũm te Jeju to amji mã ihhimpej na, quê ha cupê Pahpãm kra

¹⁰Ne me pajõ Pahhiti pê Hũm cakôc xà me harkwa ata pê mam ampo cunea to, ne taa mã pê pjê ita wỳr wrỳ ne apu ipa. Mã xãmte pjê kam mehcunea te nee cupê ampo cunea ton catê na me hahkre pej nare. ¹¹Ne ma Juta catêjê jõ pjê wỳr cator, mã nee ajte cute ahna me amji caxàr nare. ¹²Mã mencrêre pyxitre te ahna me amji caxàr, ne cumã me amji jõr, ne toa amji mã mehhimpej to me ipa, ne me cumã:

— Apê Pahpãm kraa to ihkra — hajỹr. Cwỳrjapê ri Hũm te ihtỳj ihkôt me to amji kra.

¹³Cu me paxũmre nee ame pahkra ton to hajỹr nare, ne ajteare mã me. Quê ha me paxũmre nõ mã ihkra prãm, quê ha xa ihprõ nõ me hikwa, ne ajpẽn kam mehkra, quê ha cormã me cumã ihkra. Ne Pahpãm te nee hajỹr nare. Quê ha cama, por jũmjê me pajõ Pahhiti to amji mã mehhimpej atajê mã harkwa to:

— Imã me ato amji kra to prãm. Na wa ha amã Icarõ Pejti kôt, ate amji kam gapac xà tuw pejti gõ, mãr ca apê ikra — hane. Pea quê ha jũmjê atajê amji to Pahpãm kra pyrentu.

¹⁴Ne pê me pajõ Pahhiti pê Hũm Cati cakôc xà me harkwa ata, me pahwỳr wrỳ, ne me pajĩa na amji to, ne ajco apu ipa. Pê wa me hõmpu. Pê cupê Hũm mã ihkra pyxit peaj ata. Cwỳrjapê ri carôt tỳj me Hũm carôt tỳj pipẽan, ne impej me Hũm pej pipẽan. Na ri cute Hũm cuxà amji mã me pajapêti to cator, ne cute me pahpytàr catê na amji ton. Ne cupê Hũam, ne nee apu ihhêj xi jarẽn nare, ne quêt catyt kam, ampeaj kam mehcunea mã Hũm Cati jarkwa to hũjarẽn to ipa.

¹⁵Ne pê Jowãw pê me cumrãr catê ramã ita na me cumã to hũjarẽn to hane he:

— Pom Jeju ita pê Pahhiti, pê wa ramã me amã to icakôc ne harẽn to: “Taa mã quê ha hapu na ikôt cator cakrô, ijirôa pê cati. Ampo na? He pê ramã ipỳm xwỳjrea na ajco apu ipa, na ca ha ijirôa pê amji mã me hũpa” — hane.

¹⁶Ne Jeju mã ri ampeaj kam me pahcunea caprĩ, ne cumã me pahkĩn. Cwỳrjapê ri hõtpê me pamã ampo pej cunea ton to ipa rohnỳtti mã. ¹⁷Ne pê rỳ pêa mã Mojxe xwỳ ramã me cumã Pahpãm harkwa jirên xà atajê gõ, ne pyxit peaj to me cumã hahkre. Ne Jeju nare, quêt ihtỳj cumã me pahcaprĩ, mã me pahtehcajpa. Ne me pamã Pahpãm jarkwa pejti pê ampeaj kam ata to hahkre. ¹⁸Ne rỳ jũ caxuw jũm te pjê kam Pahpãm pupun nare. Mã ihkra pejti pyxit peaj ata pê Hũam pyràc ne cume ipipẽan. Na pê cu hĩa na me hõmpu, ne taa mã ri Hũm cahê na amji kôt me pamã Hũm to hahkre, ne ihkôat cu ha me hahkre pej.

Pê Jowãw pê me cumrãr catê, ramã Jeju cator xwỳjrea na mehcũmpej

¹⁹Mã Krĩpinkrên kam Juta catêjê jõ pahhi kwỳ te Jowãw te me cumrãr catê wỳr, Pahpãm mã mehcajrẽn catêjê me, Rewi catêjê pê Pahpãm jũrkwa jamãr catêjê me, mehkujahêc, cute me Jowãw cukij prãmte. Mã cute mehcukij to:

— Me anõ mã ca? — hajỹr. ²⁰Mã Jowãw te hirãa pê me cumã amji jarẽn to:

— Nee ipê, por pê Pahpãm mehkwỳ mã me hũtàr catê to awjahkre ata nare — hajỹr.

²¹Mã hipêr cute mehcukij ne me cumã:

— Ne mẽr me anõ mã ca? Xà ajkĩ apê Erij xwỳ mã ca hacpỹa mã atĩr? — hajỹr. Mã Jowãw te me cumã harkwa to:

— Quê, ipê jũm ata nare — hajỹr. Mã me cumã:

— Xà apê, por pê Pahpãm me imã harkwa to ihcakôc catê to awjahkre, wa me hikaj ata mã ca? — hane. Mã Jowãw me cumã:

— Quê! Pa nare! — hane.

²²Mã hipêr cute me Jowãw mã harkwa to:

— He me anõ mã ca? Me imã amji jarẽ. Wa me gahkre pej ne ma hacpỹ mã cute awỳr me ikujahêc atajê wỳr me pra, ne me cumã garẽ — hajỹr.

²³Mã Jowãw te me cumã Ixaj xwỳ jõ kàhhôc kôt harẽn to:

“Ipê, por põ kam me hamreare kam me cumã ijũjarẽn to hajỹr to ipa catê ata he:

‘Me pajõ Pahhiti mã me hõ pry to ihcuhtac ne, mãr quê ihtỳj ihkôt mõr pejti ne’ hajỹr.

Jĩkjê na quê ha mehcunea cator xà ata caxuw cute me amji kam hapac xà to impejti to me ipa, ne catyt kam me ipa” hajỹr.

²⁴Ne por pê ame Jowãw cukij atajê pê Parixêw catêjê kwỳ. ²⁵Ne hipêr cute mehcukij to:

— Pom nee apê, por pê Pahpãm me pamã jũm to awjahkre ata nare, ne nee apê Erij xwỳ ata nare, ne nee apê Pahpãm jarkwa to ihcakôc catê wa me hikaj ata nare, nõ na mã ca atỳj cô kam me cumrã? — hajỹr.

²⁶Mã Jowãw te me cumã harkwa to:

— He wa cô cakrô kam me cumrã, ne por me acote na quêt jũm apu ipa ata, ca nee rỳ ate me hahkre pej nare. ²⁷Ne taa mã quê ha ijakàn pê cator cakrô, wa nee ite hũpa cahi ne cupê hõ par kà tũm caxàr xà caxuw ipej nare. Ampo na? He taa mã ri ijirôa pê cati — hajỹr.

²⁸Hõhõ, ita pê hane, ma Côhnameirêrxà jõ krĩ kam, Côpijapjêr jõ cô jĩkjê rũm. Por pê curi Jowãw ajco apu cô kam me cumrãr to ipa ata ri.

Pê Jowãw pê mehcumrãr catê me cumã Jeju jahkre

²⁹Mã amcro nõ na Jowãw te amji wỳr Jeju mõr na hõmpun, ne me cumã harẽn to:

— Me Pahpãm jõ Caràcahàcre Kra ca me hõmpu he, ramã ajpên mõ he. Ne taa mã quê ha pjê kam me pahcunea kên jũhta ne to hamre! To hanea, pom cu pahte amji kam me pajapac xàa na, me pahkên jahpan xà na, Pahpãm mã me pajàmjõr xà caxuw me ampo pê me pahkritxwỳ cura, ne me cumã to amgõ he. Ita jĩkjê na, quê ha me pajaxà kam ty, ne me pahkên cunea to hamre. ³⁰Wa ite ramã catyt kam me amã to icakôc to: “Quê ha cormã ikôt hapua na jũm xũmre cato ata, quê ha ijirô pê cati. Ne ampo na mã ijirôa pê cati? Nee mã ampo na ijirôa pê cati nare. He pê quêt ramã ixwỳjrea na apu ipa, cormã ipỳm nare kam” hajỹr. ³¹Pê wa nee cupê jũm te hajỹr xà ata na hahkre pej nare cakrô, pê wa itỳj cô kam ihcumrã. Ne nee mã pê wa ampo na apu to hajỹr nare. Ite Juta catêjê mã cupê jũm te hajỹr xà ata na to ipipẽ to hajỹar prãmte, pê wa to hane.

^32-33— Ne pê wa nee cute hajỹr xà ata na hahkre pej nare, mã Pahpãm te cô kam mehcumrãr catê na imẽn ata te imã harẽn to: “Ca ha Icarõ te tutti na amji jahkre, ne côjkwa pĩn ahpar mã pjê wỳr tẽ, ne jũm xũmre cwỳrpê hàhhuc na hõmpu ata, quê ha cupê me cumã Icarõ Pejti jõr catê. Mãr quê Icarõ Pejti ata me cumã ite amji kam ijapac xà to hahkre” hajỹr. Wa irĩt, ne ite côjkwa pĩn Pahpãm Carõ Pejti te tutti na amji jahkre ne ajpên ihtẽm, ne Jeju cwỳrpê hàhhuc na hõmpun. ³⁴Ne ite hõmpun xà ata kôt wa ite hirãa pê me amã Jeju pê Pahpãm kra na harẽn — hajỹr.

Pê Jowãw pê mehcumrãr catê kôt me ipa catêjê me Jeju pynã

³⁵Mã hipêr amcro nõ na Jowãw curia apu ihkôt me ipa catêjê pijakrut atajê me, ame ipa. ³⁶Mã hipêr cute me ahnaa Jeju mõr na hõmpun, ne me cumã harẽn to:

— Nãmhã, Pahpãm jõ Caràcahàcre Kra apu mõ he! Cupêa ri me pahkritxwỳ, ne taa mã quê ha me pahkên jahpan xà na ty — hajỹr.

³⁷Mã ihkôt me ipa catêjê pijakrut atajê te mempar, ne ma me Jeju pynãr ne ihkôt me mõ. ³⁸Mã hacpỹ mã Jeju rĩt, ne cute me hõmpun, ne mehcukij to:

— Ampo japên to mã ca ikôt ame mõ? — hajỹr. Mã me cumã:

— Ikrã tũmti, jõ ri mã ca akrĩ? — hane.

³⁹Mã Jeju me cumã:

— Ajpên ikôt me mõ, ne imã me ikrĩ xà pupu — hane. Mã ma ihkôt me mõ, ne cute me cumã ihkrĩ xà pupun. Ne curia pyt xà wỳr, cahê na ame mõ, pê ramã me ahna pyt to mõ.

⁴⁰Pê me ajkrut ne Jowãw te Jeju jarẽn na me kampa, ne me Jeju pynã atajê nõ pyxit ata japrỳ pê Antre, ne cupê Ximãw Petrô tõ te amji to hapu na kjê. ⁴¹Ne ma Antre ihtẽm pyrentu, ne mam ihtõ kà Ximãw wỳr cator ne cumã hũjarẽn to:

— Wa ite, por pê Pahpãm me pamã me pajõ Pahhiti pê Mexij to awjahkre ata na icator — hane.

Por pê Juta catêjê jarkwa na haprỳ Mexij, ne Crec catêjê jarkwa na me cumã haprỳ to Crixtô ata. Ne pê haprỳ pijakrut itajê kôt harẽn xà pê “Cute capi ne ahna hãm” hane.

⁴²Ne ma Antre te ihtõ kà japrôr ne to mõ, Jeju wỳr. Mã Jeju te Ximãw pupun ne cumã:

— Gaprỳ te Ximãw, ne apê Jona kra, ne hamre ita caxuw quê ha gaprỳ pê Xepa — hajỹr. Pê Crec jarkwa na Xepa ita pê Petrô, ne ihkôt harẽn xà te “Kẽn”.

Pê Jeju Pirip me Natanew te ihkôt me ipa xà na me cumã akij

⁴³Ne amcro nõ na Jeju te ma Hĩpôjajo jõ pjê wỳr mõr to amji kam hapac. Ne mõr xwỳjrea na cute hũmre nõ japrỳ te Pirip ita cajpar ne cumã:

— Ajpên ikôt mõ! — hajỹr.

⁴⁴Ne Pirip ata pê Tep jõ krĩ kam mehkwỳ nõ, por pê curi Antre me Petrô ihkrĩ atajê kwỳ nõ. ⁴⁵Mã Pirip apu hõ kwỳ nõ pê Natanew japê, ne cute ihcajpar ne cumã:

— Wa ite, por pê Mojxe xwỳ me pahte amji kam me pajapac xà jõ kàhhôc kam, jũm na ihhôc ata na icator. Ne cupê, por pê hanea ne Pahpãm jarkwa na mehhôc catêjê ahna mehhôc ata! Ne cupê Jeju, ne cupê Naxare jõ krĩ kam, Joje ihkrĩ ata kra — hajỹr.

⁴⁶Mã Natanew te ahna ihcukij to:

— Xà quê ajkĩ ihtỳj Naxare jõ krĩ pĩn ampo pejti cato? Jũ wỳr quê ampo pej cato! — hajỹr. Mã Pirip cumã:

— Ajpên mõ ne hõmpu mã — hane. Mã ma ihkôt Jeju wỳr tẽ.

⁴⁷Mã Jeju te ajpên Natanew te hỹrmã mõr na hõmpun, ne mehkwỳ mã to hũjarẽn to:

— Me hõmpu he! Ajpên hũmre pê quêt catyt kam ipa catê nõ ata mõ he. Ne nee quêt ihhêj xi nare, ne cupê Ixaher catêjê nõa, ne impejti! — hajỹr.

⁴⁸Mã Natanew te impar ne cumã:

— Jũ mã mã ate ne ijahkre pej? — hajỹr. Mã Jeju cumã:

— Wa Pirip te gaprôr xwỳjrea na ite apupun, ca ihmat ri pĩxô pàr krac ri jỹ — hane.

⁴⁹Mã Natanew Jeju mã:

— Ikrã tũmti, apê Pahpãm kraa to ihkra! Ne wa itỳj apê Juta catêjê jõ Pahhiti na amji mã ato hane! — hane.

⁵⁰Mã Jeju cumã:

— Xà wa ite ihmat ri pĩxô pàr krac ri ajỹr na apupun ne garẽn xà ita kôt mã ca cormã ate ito amji mã ahimpej? Ca ha cormã jũ caxuw quêt ampo ita jirôa pê ihnõ catia ata pupu — hane. ⁵¹Ne cute mehkwỳ mã harẽn to:

— Wa ha ampeaj kam me amã awjarẽ, ca ha atỳj côjkwa te amji jihê mẽn na me hõmpu, ne ajpên iwỳr Pahpãm mã hàpên catêjê te me irôrôc, ne hacpỹ mã me hàpir na me hõmpu. Ampo na? He ipê côjkwa kam me Ahàkà cati ata wa, ne cama ite me hũmre na amji ton ne me awỳr iwrỳc — hajỹr.

Pê Jeju cô kam pĩxô cacô xỳre to

^1-2Ne ahna amcro pijakrut jirô pê mã ri cute me hikwa tuw catêjê nõ jõ amji kĩn jarẽn par, Têtêc jõ krĩ wên kam, Hĩpôjajo jõ pjê kam. Mã cute amji kĩn ata caxuw me Jeju me, me ipê ihkôt me ipa catêjê jator. Wa ma ihwỳr me mõ ne me icator. Mã ramã curia Jeju menxi apu mõ. ³Mã amji kĩn ita cahti ri ampo pĩxô cacô xỳre ata jamre. Mã Jeju menxi te pĩxô cacô jamre na hõmpun, ne ma ihcãmter wỳr tẽ ne cumã:

— Ikra, hamre, me cupê pĩxô cacô jamre — hajỹr.

⁴Mã Jeju te impar ne cumã:

— Ampo caxuw mã ca inxê apu imã ita jarẽ? Nee ate imã ita jarẽn xà hamreare, wa ramã ite hahkre pej. Ne cuna mã cormã nee ite ampo itajê nõ ton xà kam hàhhuc nare — hajỹr.

⁵Mã ma inxi amji kĩn jõ pahhi mã me hàpên catêjê wỳr tẽ, ne cute me cumã:

— Ca ha atỳj ikra te ampo na me amã hũjahkre xà atajê to me cumã — hajỹr.

⁶Pê curia kẽn te pot catia to cati te xêj atajê ihcuhhê. Ne ihkwỳ ihtỳj cô to rit to ôjtẽnta ne cucwa, ne ihkwỳ ihtỳj cô to rit to xẽj ne cucwa. Pê Juta catêjê ihtỳj ajco cô ata to me amji cuhhõ, cute to me amji pyràc xà ata kôt.

⁷Mã ahtũmre mã, Jeju amji kĩn jõ pahhi mã me hàpên catêjê atajê wỳr tẽ, ne cute me cumã harkwa to:

— Cô to me pot itajê to me hipu partu — hajỹr. Mã ihtỳj harkwa kôt cute me to hipu partu. ⁸Jirô pê mã ri cute me cumã harkwa to:

— Caxi me cô ita crire ne me haxà, ne amji kĩn jõ pahhi wỳr me to tẽ, ne me cumã agõ, quê capi — hajỹr.

⁹Mã jũm ita te ihkwỳ jaxàr, ne hỹrmã to ihtẽm kwỳa kam, mã ramã cute pĩxô cacô na amji ton. Mã cute amji kĩn jõ pahhi mã hõr, mã cute capi, ne nee cute cô te ampo pĩxô cacô xỳre na amji jahkre ata na hahkre pej nare. Ne nee cute jũ rũm cator xà ata na hahkre pej nare. Ne cumã me hàpên catêjê mã ri quêt hahkre pej. ¹⁰Na ri amji kĩn jõ pahhi te hikwa tuw catê ata na hàhwỳr ne cumã:

— Pỳhàpà, ajte ihhêj ne mam ate me cumã kyre pê pĩxô cacô impej ata jõr, mã cute ame to ihkõm. Jirô pê mã ca ate cormã me cumã impeaj ita jõr. Ne ihhêj ne ate pahte me to amji pyràc xà ata to gàhpan, ne ate hicu xà caxuw impejti ata juwahi — hajỹr.

¹¹Hõhõ, pê Jeju carôt kôt ampo pihho ton kam to tẽm to hane, ne ajco carôt to ipipẽ to ipa, Têtêc jõ krĩ kam, Hĩpôjajo jõ pjê kam. Ne pê carôt tỳjti impejti ata to me cumã ajpẽ. Pê wa me ipê ihkôt me ipa catêjê, itỳj amji mã me to ihimpej, ne mempar pyrentu.

¹²Ita jirô pê mã wa me ipê ihkôt me ipa catêjê me, Jeju me, inxi me, mehkjêjê me, ma Capernam jõ krĩ wỳr me mõ, ne curia wa ite ijõtpê me amji to amcro kwỳ kujahêc.

Pê Jeju Hũm Cati jũrkwa pê ihpore to me hàhpan catêjê cato

¹³Ne Juta catêjê jõ amji kĩn japrỳ te, me Hakren xà jõ amji kĩn jõ amcro ata, pê ramã cator xàa kam, ne ramã hũ na pire mã. Ne amji kĩn ata pê, por pê Ejit jõ pjê kên pĩn, menquêtjê cator xà atajê jõ amji kĩn. Na wa ma Jeju me Krĩpinkrên wỳr mõ. ¹⁴Ne Pahpãm to me amji kam hapac xà jũrkwa kam, Jeju te jũmjê te carà cahàcre hôhti me, pryti me, tutti to ihpore na ame hàhpan na me hõmpun. Ne hanea ne cute jũmjê atajê te mehkrĩ ne me hàhtôa mã ihpore to hàhpan na me hõmpun. ¹⁵Ne ame kam incryc, ne me caxuw cute pàrcuxê to mehcahhyr xà ton, ne põ mã mehcunea to cator, ampo atajê mea mã. Ne cute ihpore to me hàhpan catêjê pê ihpore pyxwỳr xà mẽn, ne pjê kam hõ pore jaxwỳr partu. ¹⁶Ne cute, por ihpore na me tutti to hàhpan to me ipa atajê mã harkwa to:

— Ikre ita pê ampo itajê cunea to me gapôj partu! Ne nee ca Inxũ jũrkwa kam apu amji mã ampo itajê to ihpore na me gàhpan to me apa nare. Xà aracri Inxũ jũrkwa ita pê ampo to ihpore na kam me hàhpan xà? — hajỹr.

¹⁷Cwỳrjapê wa me ipê ihkôt me ipa catêjê te Pahpãm jõ kàhhôc kam ita to hũjarẽn na me to amji japackre, pê ramã harẽn to:

“Imã Pahpãm to amji kam me hapac xà jũrkwa ita kĩan to ihkĩn.

Na wa nee kam ampo kên xãm na hõmpun prãm nare, ne wa ampo pej to pit mã kam me amji japackre” hajỹr.

Pê pahhi catêjê Jeju te ampo pihho catia ton na mehcukij

¹⁸Mã Juta catêjê jõ pahhi kwỳ te ita na harẽn par ne mehcukij to:

— Jũm te mã, ate ame to hajỹr xà ita na, amã harkwa? Jũm te mã ahna amẽn? Xà ajkĩ Pahpãm te mã ahna amẽn? Mẽr hõhõ, acarôt cati pahtỳjti ita to me imã ajpẽ, wa ha ahna me apupu, ne cormã Pahpãm te ahna amẽn na me gahkre pej — hajỹr. Mã Jeju te me cumã amji jarẽn to:

¹⁹— Ca ha me Pahpãm jũrkwa ita hu, wa ha hacpỹa mã amcro incrê peaj kam hãm, ca ha cormã ihkôt Pahpãm te ahna imẽn na me ijahkre pej — hajỹr.

²⁰Mã cute me Jeju mã ikre jarẽn to:

— Pê me Pahpãm to pahte me amji kam me pajapac xà jũrkwa ita to me hàpêan to me caku to cwarẽnta ne ihkôt xêj, ne me hipêj, nõ na mã ca ajte amcro incrê peaj kam hacpỹa mã ate hãm na amji jarẽ? — hajỹr.

²¹Por pê Pahpãm jũrkwa to Jeju ihcakôc ata pê nee kẽn te ikre ata nare, ne amji jĩa to pê me cumã ihcakôc. ²²Ne pê hacpỹa mã ihtĩr, pê wa cormã hũjarẽn xà ata to me amji japackre, ne itỳj me ihkàhhôc kam Pahpãm jarkwa kampa, ne Jeju cakôc xà na me kampa.

Pê Jeju nee amji mã me hàhtôti atajê to hajỹr nare

²³Pê Jeju me Hakren xà jõ amji kĩn na Krĩpinkrên kam apu ipa xà ata kam, pê me hàhtôa ne ihtỳj cupê Pahpãm kra na amji mã me to hane. Ampo na? Nee mã ampo na nare. Pê ajco Jeju ihtỳj Hũm carôt kôt, rỳ jũ caxuw, jũm te ampo cupahti pihho pupun nare atajê to na pê. ²⁴Cakrô pê nee Jeju cormã amji mã me hàhtôti atajê to taa mã nare. Ampo na? Pê ajco mehcunea mã cute me amji kam hapac xà pupu, ne me hahkre pej to ipa na pê. ²⁵Ne pê jũm te cumã me harẽn nare kam, pê ajco taa cute me amji kam hapac xà na me hahkre pej.

Pê Pahpãm te me pahto ipintuw xà pê hacpỹa mã me pahpỳpỳm xà pyràac

¹Ne pê hũmre nõ japrỳ te Nicotem ata pê Juta catêjê jõ pahhi na mehkwỳ nõa, ne cupê Parixêw catêjê kwỳ nõ, ne cupê Mojxe xwỳ jõ kàhhôc to me cumã hahkre catêjê nõa. ²Ne ma caxwa ri Jeju wỳr mõ, cute hõmpun, ne cumã ihcakôc prãmte. Ne hỹrmã cator ne cumã:

— Ỹhỹ Jeju, wa ite, Pahpãm te me imã apê ampo to hahkre catê na akujahêc na gahkre pej. Ampo na? Ca atỳj Pahpãm carôat to ampo pihhoti jàhtôa ton to apa atajê, ihtỳj Pahpãm carôt tỳjti to ipipẽ to mõ. Jũ wỳr quê Pahpãm jũm kujahêc nare, quê jũm ampo itajê nõ to — hajỹr.

³Mã Jeju cumã:

— Ỹhỹ, wa ha nee amã ihêj xi jarẽn nare. Quê ha jũmjê mã Pahpãm himpej xà mã mencjêj to prãm na, quê ha xa hacpỹa mã amehpỳpỳm — hajỹr.

⁴Mã Nicotem cumã:

— Pỳhàpà, jũ wỳr quê ha ramã jũm kàhtu ata amji mã hamã, nehacpỹa mã inxi tu mã axà ne hipêr ihpỳm — hane. ^5-6Mã Jeju te cumã ihkôt harẽn to:

— Ỹhỹ, wa nee apu amã ihêj xi jarẽn nare. Quê ha jũmjê te Pahpãm himpej xà mã incjêj prãm na, quê ha xa hacpỹ mã amehpỳpỳm, jirô pê mã quê ha cormã me acjêj. Pê ca mam gĩ to, anã tu kam cô ata kôt apỳm, ne apê anã kra. Jĩkjê na, ca ha hipêr Pahpãm Carõ Pejti kôt, acaxwỳn carõ to amji mã intuw, ne apê Pahpãm kra.

⁷— Nee ca ite amã hacpỹa mã, me acunea pỳpỳm na me garẽn ita to amji mã ame apikrar nare. ⁸Ampo na? He Pahpãm Carõ Pejti kôt amehpỳpỳm xà ata pê ihhêj rũm kôc pyràac. Jũ wỳr ca ha jũ kam kôc te hàpêr xà na amji mã prãm xà ata wỳr hàpêr na hõmpu. Ca ha me hàmcoco pit kampa, ne nee hõmpun nare. Ne nee ca ha jũ pĩn cator xà me, jũ kam ihtẽm xà ata na hahkre pej nare. Jĩkjê na mã, Pahpãm Carõ Pejti jàpên xà pê hũràac. Ne nee quê ha jũm Pahpãm Carõ Pejti te jũm to amji mã ihkra xà ata na hahkre pej ne hõmpun nare — hajỹr.

⁹Mã Nicotem cumã:

— Jũ mã quê ajte ita, ne hane? — hane.

¹⁰Mã Jeju cumã:

— Pỳhàpà, pom apê Juta catêjê mã ampo to hahkre catê ita! Nõ na mã apê ampo ita jahkre kêatre? ¹¹Wa ha nee amã ihêj xi jarẽn nare. He wa amcro cunea kam me akwỳ mã, ite ampo jahkre pej itajê to hahkre to ipa. Ne hanea ne ite ito jĩa to ampo pupun atajê pupun xàa kôt, wa me amã harẽn to ipa cakrô, ca ajte nee cormã ate me ipar nare. ¹²Ne wa ramã ite me amã pjê ita kam ampo te jũ mãn xà ata na harẽn, ca nee ajte ate ikam me gapac nare. Ita kam, ca ha pijamã ite me amã côjkwa kam ampo jarẽn xà atajê cunea na me ikampa? Me gũpar nare ita kam, ca ha nee me ikam gapac nare. ¹³Ne rỳ jũ caxuw côjkwa wỳr jũm jàpir ne hacpỹ ne cute amji jaxàr nare. Ne pa nare, he ipê kỳj pê, côjkwa kam me Ahàkà, cwỳrjapê wa curũam ite me hũmre na amji ton ne iwrỳc.

Cu ha amji mã Jeju to pahhimpej na, cu ha Pahpãm cahê na amji to me ajpa

¹⁴— Ne pê Mojxe xwỳ mat ri, põ kam me hamreare ata ri, wakỳre te cagã to, ne pĩ na cuxô. Ampo na? Nee mã pê ampo na wakỳre te cagã ata xôr nare. Pê cagã ajco me cãmxa, pê me wakỳre te cagã ata pupu, ne hacpỹa mã mempej. Ita jĩkjê na wa ha hanea. Quê ha jũ caxuw me ito wakỳre te cagã ata pyràac, ne me icuran xà caxuw, pĩ na me ixô. ¹⁵Quê ha jũm ito cagã ata ne ipupu, ne ito amji mã ihhimpej, quê ha ihtỳj ihtyc xà jirô pê ampo kên catia ata pê amji pytà, ne Pahpãm cahê na amji to ipijapar rohnỳtti mã.

¹⁶— He ampeaj kam Pahpãm mã pjê kam mehcunea ame ipa itajê kĩn, mã cute me cumã, ipê cumã ihkra pyxit peaj kĩnti ata to hũjahkre ne hõr, ne pjê wỳr ajpên ikujahêc. Mãr quê cute ito amji mã mehhimpej atajê me ty, ne nee mehtyc tu ne Pahpãm kaj na ame ipa nare, ne quêt hacpỹa mã mehtĩr, ne Pahpãm cahê na me ipa rohnỳtti mã. ¹⁷Pê nee Inxũ imã harkwa to: “Cute mehkên ton jahpan xà na, pjê wỳr wrỳ ne curê mã me amẽ” hajỹr nare. Ne quêt cama imã: “Ca ha wrỳ ne mehkên pê me hũtà” hane.

¹⁸— Na quê ha jũmjê te, ipê Pahpãm kra na amji mã ito mehhimpej na, quê ha nee Inxũ cute cuna mã ihkên ton xà atajê to me cumã ihcakôc, ne curê mã me irẽn nare. Ne por nee amji mã me ito mehhimpej nare atajê ri, ramã curê mã cute me mẽn na, me ahna me amji ton. Ampo na? Nee cute amji mã me ito ihhimpej nare, na quê ha curê mã me cumẽ.

Pê Jeju me hàhtôa atajê mã mehkên jarẽn na cumã to prãm nare

¹⁹— Cu ha ampo kên tũmti ata wỳr me pajàhcujro xà nõ, pôc pejti ata to mõ, ne me to ihtũmti ata pupun pyrentu. Jĩkjê na ri ipê pjê kam mehcunea jàhcujro xà. Ampo na? He wa itỳj me cumã cute mehkên ton xà atajê jarẽ, mã me hõmpu, ne cute me hahkre pej xà ita caxuw wa me hỹrmã iwrỳc, ne amehcujro to mõ. Mã ma mehkwỳ apu ite mehcujro ita na mehcaca, ne me cumã amji kam awcapàtkôti ita na pit mã me to prãm. Ampo na? Awcapàtkô ita kam ri hãn ne ihtỳj ame ampo kên ton to me ipa, cwỳrjapê ri ma ame icaca. Ne quê ha, cute me icaca catêjê cute me ampo kên ton atajê jahpan xà na, Pahpãm ame to kêanre ne.

²⁰— Ỹhỹ, por awcapàtkô kam ame ampo kên ton to me ipa atajê mã amji cujro prãm nare. Ampo na? Cute ampo kên ton atajê na me hahkre pej cupate ri ma ame amji cujro caca. Cwỳrjapê ri mehkên catêjê ipê ampỳa mã ame ipa. ²¹Ne por catyt kam Pahpãm jarkwa kôt me ipa atajê ri, ijàhcujro impejti ata kam ihtỳj ame ipa xà. Mãr quê mehcunea catyt kam, Pahpãm jarkwa kôt me ipa na me hõmpu, quê nee ame ampo kên ton nare, na ri ihtỳj ame ipa. Na ri hanea ne ihtỳj mempejti catêjê atajê ikôt me ipa — hane.

Jowãw te mehcumrãr catê pê Jeju jarkwa to imprar catê

²²Ita jirô pê mã, wa ma Jeju me, me ipê ihkôt me ipa catêjê me, Krĩpinkrên pê me icator, ne ma põ pê Juta jõ pjê kam ame ipa. Ne curia me cahê na ite jũ mã amji to me amcro ton, wa itỳj harkwa kôt cô kam amehcumrãr to me ipa. ²³Pê hanea ne ihtỳj Jowãw, cô japrỳ te Enõ pê Xarim jõ krĩ na pire mã xa ata kam, cô kam amehcumrãr to mõ. Ampo na? Ampeaj kam quêt curi cumã cô cati. ²⁴Ne pê caxuw cormã nee me Jowãw jaxàr nare.

²⁵Mã amcro nõ na Jowãw kôt me ipa catêjê kwỳ atajê me, Juta catêjê jõ pahhi kwỳ te ajpẽn mãn kam mehtẽm, Pahpãm mã cute me amji cũmpej xà na cô kam me amji cumrãr xà ata ri. Ne nee jũmjê te me ajpẽn par pej nare. ²⁶Cwỳrjapê ri ma Jowãw te mehcumrãr catê pê me hõ pahhi ata wỳr, me amji to mõ, ne cute me cumã amji jarẽn to:

— Me ijõ pahhi, wa ite me amji cũmpej xà ita kam, nee ite me ampo par pej nare, ne me ikrã pictor tu. Ne por pê ca jũm xũmre to me imã awjarẽ ata, ihtỳj mehcũmpej prãmte, acuxà Côpijapjêr jõ cô kam ame cumrãr to mõ, mã quêt mehcunea ihtỳj hỹrmã me pra! Ne jũ mã mã cu ha ajte me? — hajỹr.

²⁷Mã Jowãw te me cumã harkwa to:

— Nee ca ita to ame amji kam gapac nare. Côjkwa kam Pahpãm te ahpỹanre na me hũmre mã me hàpên xà jõr par. ²⁸He ijàpên xà ita pê Jeju pê hũmre ata mã ite pry to impej xà, mãr quê pry ata kôt me hàhtôa ne ihwỳr me apkjê. Ne nee ipê, por pê Pahpãm me pamã to awjahkre ata nare, ne ite amji jarẽn xà na ramã ate me ipar. Ne hõ pry to ite cumã impej xà caxuw pê wa mam icato. ²⁹Ne quê ha jõ ri me hàhtôa mã jũm pyxit peaj ne me hirôa pê impej, quê ha hỹarmã me pra. Ita jĩkjê na, quê ha jũm hikwa tuw, quê ha hĩxi impjên ata wỳr pit mã tẽ, ne nee impjên jõ ikwỳ nõ atajê wỳr ihtẽm nare cakrô, quê ha ihtỳj hũ na hõ ikwỳ nõ atajê ame hakry. Ita jĩkjê na wa itỳj Jeju jũ na ijakry. ³⁰Na quê ha ihtỳj quêt Jeju ipicamẽn to mõ, ne cati to mõ, ne pa nare, wa ha ihkĩnte cama hacpỹa mã icri to mõ.

³¹— Ne Jeju quêt côjkwa pĩn cator ata ri ijirôa pê cati. Ne pa nare, pê wa ihkĩnte pjê ita kam icato, ne imã pjê kam ampo itajê to pit mã icakôc jahkre pej. ³²Ne taa mã nare, quêt cute côjkwa kam ampo par ne hõmpun atajêa to hãn ne ihcakôc to ipa cakrô, mã ajmãr nee jũm te ahna amji caxàr nare. ^33-34Ne mencrêre te cute ampo jarẽn xà atajê na me kam hapac, ne ihtỳj ampeaj kam cute me Pahpãm catyt kam ihcakôc ata kam me hapac. Ne Pahpãam te ri ihkujahêc na, cute me hahkre pej. He ampeaj kam ri Pahpãm cakôc xàa to Jeju ihcakôc to ipa. Ampo na? Nee mã ampo na nare. Pahpãm Carõ Pejti catia te cumã amji jõr na ri, ne nee kam Pahpãm Carõ Pejti ata crire nare.

³⁵— Ne Hũm mã ihkra ita kĩan to ihkĩn, mã cute cumã hõ tekjêa na ampo atajê cunea jõr, ne taa mã ri ita caxuw to hõ tekjê, ne ihcunea jamã. ³⁶Na quê ha jũmjê te amji mã Pahpãm kra te me hũtàr catê na me to amji mã hajỹr na, quê ha quêt Pahpãm cahê na mehtĩr rohnỳtti mã na ame ipa. Ne por nee me kam hapac nare, ne nee amji mã me harkwa cupa nare atajê, quê ha nee côjkwa wỳr me hàpir, ne me Pahpãm pupun nare. Quê ha cama me kam Pahpãm cryc ata me hỹrmã apkjê, ne ame to kêanre ne — hajỹr. Hõhõ, Jowãw te ihkôt me ipa catêjê mã hũjarẽn to hajỹr.

Krĩrĩtpej kam me cahãj nõ te amji to ipintuw xà

¹Jeju te Jowãw jirôa pê mecumrãr, ne hirôa pê cumã ihkôt me ipa catêjê jàhtô. Mã Parixêw catêjê te ahna harẽn par. ²Ne nee pê Jejua ajco me cumrãr nare, me ipê ihkôt me ipa catêjê pê wa ajco me cumrã. ³Mã Jeju te ita na Parixêw catêjê jahkre pej, ne me harẽn par, ne ma Juta jõ pjê pê cator, ne ma Hĩpôjajo jõ pjê wỳr ihkôt me ipa catêjê me, me mõ. ⁴Ne Krĩrĩtpej jõ pjê cajpuaw pry nõ ata kôt pê me imõr xà.

⁵Ne ma Krĩrĩtpej jõ pjê kam krĩ japrỳ te Xica ita mã me icator, por pê Jaco xwỳ ihkra pê Joje xwỳ mã pjê jahkre ata cahi na. ^6-8Mã curia cormã Jaco jõ côhkre ata ihcuhhê. Mã pyt ramã me pahkrã jimoac kam jỹ, wa curi Jeju me, me icator, mã ramã mõr mã ihpeacre, mã côhkre ata cahê na hỹr. Wa ma me ikwỳ me krĩ ata kam ite me ampo krẽr xà japrôr to me pra, mã ahte hàhhuc.

Mã pyjê nõ pê Krĩrĩtpej jõ pjê catêjê nõ ata, cute cô jaxàr prãmte hỹrmã tẽ, mã Jeju cumã:

— Ate amji kam gapac xàa na, imã cô ita kwỳ incrire ne, wa to ikõ — hane. Mã jũm cahãj ata Jeju mã:

⁹— Apê Juta catêjê nõ, ne ipê Krĩrĩtpej jõ pjê catêjê nõ, ne mẽr ampo na mã ca apu cô ita na iwỳ? — hane. Ne ampo na pê cumã ihcakôc xà ita to? Nee mã ampo na nare, pê ajco Krĩrĩtpej jõ pjê catêjê me, Juta catêjê me ajpẽn kaj na me amji kampa, na pê cumã hane.

¹⁰Mã Jeju cumã:

— Ca ate côjkwa kam Pahpãm te amã ampo jõr xà ata na hahkre pej na mã, ca ha ahna iwỳ. Ca ate ite cô na awỳr xà ata na ijahkre pej na mã, ca ha mehtĩr xà rohnỳtti mã xà jõ cô na iwỳ, por ca ha cô to ikõ ne atĩr rohnỳtti mã na apa xà ata na iwỳ — hane.

¹¹Mã pyjê nõ ata cumã:

— Amã cô jacjên xà hamreare, ne côhkre ita rya to iry. Ne mẽr jũ mã ca ha, ne mehtĩr rohnỳtti mã xà ita jõ cô ita kwỳ py, ne imã ihkwỳ? ¹²Xà ajkĩ gõ cô ita me panquêt xwỳ pê Jaco jõ cô jirôa pê impej? He pê me panquêtti Jaco me imã côhkre ita jahkwỳ, ne mehkra me, cute me ampo to ipijapar xà mã hahkre, mã ihtỳj me to ikõ. Ne xà ajkĩ Jaco xwỳ jirôa pê acati, mã ca ha ajte imã cô impejti nõ ita gõ? — hane.

¹³Mã Jeju cumã harkwa to:

— Quê ha jũm, pom cô ita kwỳ to ikõ, ne hacpỹ ma mã cumã kôr. ¹⁴Ne por wa ha jũm mã cô kwỳ, quê ha to ikõ ata, quê ha quêt nee hipêr cumã kôr nare. Ampo na? Quê ha jũm kam cô ata ipijapjêr rohnỳtti mã xà ata pê ihtĩar na ipa xà ata, na quê ha nee jũ caxuw ihtyc nare — hane.

¹⁵Mã cahãj ita cumã:

— Mẽr imã cô ita kwỳ, mãr wa imã kôr nare ne, nãmri wa nee hipêr hacpỹ ne cô ita jaxàr to imõr prãm nare — hane. Mã Jeju cumã:

¹⁶— Mõ ne apjên japrô, ne hacpỹ ne to amji jaxà mã — hane. Mã cahãj ata Jeju mã:

¹⁷— Ipê ipjê nare — hane. Mã ramã Jeju te hahkre peaj xà na cumã harkwa to:

— Ampeaj kam ca apjê nare na ate imã amji jarẽn. ¹⁸Ne pom ramã ate apjê to xĩc, ne cumã hikran ita. Ne pom cute ihkwỳ to xêj ca apu cume apa ita te hajỹar, ne nee cupê apjên nare. Wa nee ato ahêj xi nare — hajỹr.

¹⁹Mã cahãj ita Jeju mã:

— Ampeaj kam ca ate ijarẽan to ijarẽn. Ne ita caxuw wa ite apê Pahpãm jarkwa to acakôc catê na gahkre pej. ²⁰Ne caxi imã awjarẽ. Jõ ri mõrmõ cu ha ajte ame Pahpãm to ame amji kam pajapac to me papa? Wa me ipê Krĩrĩtpej jõ pjê catêjê Pahpãm to amji kam me ijapac, ne catihti to me cumã icakôc prãmte, ma hàhkà jakôtti ita wỳr ijõtpê me pra. Ca ajte me apê Juta catêjê Krĩpinkrên kam ajte, me pahte Pahpãm to amji kam pajapac xà na me harẽ. Ne amãa, jũ ri mõrmõ Pahpãm to pahte amji kam me pajapac xà? — hane. Mã Jeju cahãj ita mã:

^21-22— Ikam gapac to impeaj ne he. Ca me apê Krĩrĩtpej jõ pjê catêjê ate Pahpãm to amji kam me gapac xà atajê na, me amji jahkre pej nare kam me to amji kam gapac to me apa. Ne me pa nare, wa itỳj quêt ite me Pahpãm to amji kam me ijapac xà ita na, me imã amji jahkre pej. Ampo na? Nee mã ampo na nare. He pê me apytàr catê ita, me ipê Juta catêjê pĩn me awỳr cato. Na cu ha nee jũ caxuw hipêr hàhkà jakôtti ata me, Krĩpinkrên kam, ame Pahpãm kĩnti na jũm te cumã me amji jarẽn xà hamreare. ²³Ne hamre, ramã pahte Pahpãm to amji kam me pajapac xà cunea pintuw. Na quê ha ita caxuw jũm ampeaj kam Pahpãm to amji kam hapac na, quê ha Pahpãam amji caxuw cumã cute to amji kam hapac xà to hahkre, mãr quê ha harkwa kôt to amji kampa. Hõhõ, cute me hajỹr catêjê ri Pahpãm amji mã me hapê, cute me to amji kam hapac xà caxuw. ²⁴Inxũ pê Pahpãm ata nee hĩa na ipa nare, ne quêt cupê Carõ Pejti ata, ne pjê cunea kam ipa. Na quê ha hanea ne cute me to amji kam hapac catêjê me carõ caxwỳn cunea to me to amji kampa, pjê cunea kam — hane. Mã cahãj ata te cumã harkwa to:

²⁵— He imã, por jũm pê me pahpytàr catê japrỳ te Crixtô ata to Pahpãm te hũjahkre ata cator xà na imã hahkre pej. Ne quê ha cato, ne me pamã ampo cunea to hahkre partu ne — hajỹr. Mã Jeju te cumã amji jarẽn to:

²⁶— He ipê jũm ata, ne ipê Crixtô, ne pa wa amã icakôc — hajỹr.

Pê Jeju kôt me ipa catêjê amji mã me ajkra

²⁷Wa caxuaw ramã curi me ipê ihkôt me ipa catêjê cator, ne ite amji mã ame ipikrar kryjre nare. Ampo na? Ite me Jeju te Krĩrĩtpej jõ pyjê nõ mã apu ihcakôc na me hõmpun, na wa ite amji mã me ipikrar. Ne nee ajte me inõ te ampo ata na cahãj ata cukij to:

— Ampo na mã ca prãm? — hajỹr nare. Ne nee me inõ te Jeju cukij to:

— Ampo na mã ca apu jũm cahãj ita mã acakôc? — hajỹr nare, ite me hahkre pej xà na.

²⁸Mã ma cahãj ata te hõ pot rer, ne krĩ kam mehkrĩ atajê wỳr tẽ, ne cator ne cute me cumã hũjarẽn to:

²⁹— Ajpên me mõ ne me hũmre nõ ita pupu, cute ite ampo ton xà atajê cunea na ijarẽn partu. Ne mõrmõ ajkĩ cupê, por pê Pahpãm Crixtô to awjahkre ata? — hajỹr.

Jeju mã Pahpãm mã hàpên xà ata pê hõ

³⁰Mã ma me hàhtôa ne krĩ pĩn, por curi Jeju apu mõ ata ri, ihwỳr me mõ. Ne cormã ajpên me iwỳr me mõr kwỳa kam, wa ite me Jeju mã:

³¹— Me ijõ Pahhi, ampo krẽ! — hajỹr. Mã Jeju te me imã harkwa to:

³²— Imã ijõ, wa cuku, ca nee ite ihkur xà na me ijahkre pej nare — hajỹr.

³³Wa ite mempar, na wa ahna ite me ajpẽn cukij to:

— Xà ramã ajkĩ jũm te cumã hõ nõ rer? — hajỹr. ³⁴Mã Jeju te me ipar ne me imã:

— Por Inxũ te ikujahêc ata te amji mã ampo kĩnti ata to wa cumãn to mõ, ne ata pê ri ihhêj rũm ijõ, wa to amji mã ijarte, mã itỳj. Ne wa ha itỳj cute imã ijàpên xà jõr ata to cumã ihkrã cura, cupêa ri ihhêj rũm ijõ.

³⁵— Ca ramã ate me harẽn to hajỹr to me amji pyràc tu he: “Cormã pahte me pajõ kẽhkẽn xà wỳr putwrỳ te cwat ne nõ” hane. Ne mẽr me hàhtôti itajê pupu he. He me cupê ijõ pur pyràac. Ne ihhêj rũm me cupê ramã ampo hy inteptu, ne ramã ihkẽhkẽn xàa kam hàhhuc atajê to ri pahte amji mã me cuprõn xà. ³⁶Quê ha jũm te, jũm mã pur to hàpên na, quê ha ihtỳj amji mã ampo cwa. Ita jĩkjê na, quê ha jũm te imã me to cuprõn to ipa na, quê ha ihtỳj, cumã cute me to cuprõn to ipa jahpan xà na, hàmcwỳr xà. Na quê hame hàhtôa ne mehtĩr ita na ame ipa, Pahpãm cahê na. Ne quê ha imã me hàpên catêjê hakrya to me hakry to hanea, pom quê cute me ampo hy kre catêjê me, cute mehkẽhkẽn catêjê he, ne ajwar me hakry. ³⁷Ampo na? He hũjarẽn xà ita nee ihhêj xi jarẽn nare, ne ampeaj kam ri awjarẽ: “Quê ha mam jũmjê te hàhkre na, quê ha ihtỳj ihkôt cormã ihkẽhkẽn catêjê ihkẽhkẽ” hane. ³⁸Wa ite ramã me ate iwỳr me to apipkjêr na me amẽn. Ne pê mam rỳ pêa mã, Pahpãm jarkwa to mehcakôc catêjê pê me hàhkre catêjê atajê pyràac, ne ramã me cumã Pahpãm jarkwa jarẽ. Na ca ha mehkôt cama iwỳr me to apipkjêr to me apa — hajỹr.

Pê Krĩrĩtpej jõ pjê catêjê cute amji kam me hapac xà to me antuw

³⁹Mã Krĩrĩtpej jõ pjê catêjê kam me hàhtôa ne, ampeaj kam cute Jeju to amji mã me hajỹr tỳj pyrentu. Ampo na? Por cahãj te harẽn to: “Cute imã ite ampo cunea ton atajê to ihcakôc partu” hajỹr, na ri mehcunea te amji mã me to hajỹr pyrentu. ⁴⁰Mã Krĩrĩtpej jõ pjê catêjê kwỳ cator, ne cute me Jeju wỳr, quê me cahê na amji to jũ mã amcro to. Wa curia me cahê na me ijàhhuc, ne ite me amji to amcro to me ipijakrut.

⁴¹Mã hũjarẽn xà atajê kôt, me hàhtôa ne cute Jeju mã me amji jõr, ne mempar pyrentu. ⁴²Ne cute me cahãj ata mã harkwa to:

— Wa itỳj ita caxuw me kampa. Ampo na? Wa ramã ite me hĩa kam ijapac, ne nee mã ate me imã harẽn xà ita kôt pit mã, ite mempar nare. He ampeaj kam ri me imãa Jeju pê me pahkên catia pê me pahto hapôj catê, pjê cunea kam — hajỹr.

Pê Jeju cama ihcakôc xàa to pahhi kra caprã

⁴³Ne wa ite amji to me amcro to ipijakrut jirô pê mã, wa ma ite Jeju me, Hĩpôjajo jõ pjê wỳr me iprar kam me itẽm. ⁴⁴Ne pê Jejua ajco me imã amji jarẽn to:

— Ipê Pahpãm jarkwa to mehcakôc catêjê nõ. Ne ipê me ikwỳ pyràac, mã ijõ krĩ kaj na ihtỳj me ikampa. Ne ijõ pjêa kam, nee amji mã me icupa, ne nee ikam me hapac prãm nare — hane. ⁴⁵Wa curi me icator, ne curia me cahê na me ijàhhuc. Mã curi mehkrĩ catêjê te meito kênre nare. Ampo na? Pê ramã Krĩpinkrên kam Hĩpôjajo catêjê mam me Hakren xà jõ amji kĩn ata na me Jeju te ampo pejti atajê ton na me hõmpu na pê.

⁴⁶Jirô pê mã wa ma Têtêc jõ krĩ wỳr Jeju me, me pra, por pê curi cô to ampo cacô xỳre na ata ri. Mã curi pahhi mã hàpên catê nõ catia, Capernam jõ krĩ kam ihkrĩ ata pê ihkra xà, hũrkwa kam. ⁴⁷Ne cute Jeju te Juta jõ pjê pĩn mõr na harẽn par, ne ma Jeju wỳr Têtêc jõ krĩ wỳr tẽ, cute ahna hàhwỳr mã ihkôt Capernam jõ krĩ wỳr mõr. Ne cute cumã ramã ihkra ihtyc xàa kam ata caprãr prãmte. ⁴⁸Mã Jeju te pahhi mã hàpên catê ata mã:

— Xà wa icarôt to ampo pihho catia to, ca ahna me ipupu ne cormã ihkôt me ikampa? — hajỹr.

⁴⁹Mã Jeju mã:

— Ijõ Pahhiti, ikra tyc xwỳjrea na, ajpên gũjarêan kam atẽm pyrentu! — hane.

⁵⁰Mã Jeju cumã:

— Gapacta ne ikre wỳr amji jaxà! Hamre, ramã akra caprãr, ne quê ha ihtỳj amã impej, nee quê ha ihtyc nare — hane. Mã cute Jeju par pyrentu, ne ma tẽ. ⁵¹Mã ikre wỳr pry cahtiri cumã me hàpên catêjê kwỳ te mehcajpar, ne me cumã ihkra jarẽn to:

— Hamre, hacpỹa mã akra impej — hane. ⁵²Mã cute pyt jỹr xà jũ kam ri ihkra te amji cajpẽr na, mehcukij. Mã me cumã harẽn to:

— Ihnõ kam ri, ramã pyt te ihcahpa crire kam ri, akra mã kry jamre — hane.

⁵³Mã pyt jỹr xà ata kam hũm te, Jeju te cumã harkwa to:

— Quê ha ihtỳj akra amã impej — hajỹr na to amji japackre pyrentu. Cwỳrjapê ri curi ikre kam cahê na mehkrĩ atajê cunea te ihtỳj Jeju to amji mã me hajỹr pyrentu.

⁵⁴Pê Jeju ramã carôt to ampo pihho catia ton to ajkrut, Hĩpôjajo jõ pjê pĩn mõr xà ata kam.

Pê Jeju cô cahê na cukrã xà peacre hikwa ata caprã

¹Ne ita jirô pê mã ri Juta catêjê te amji mã me amji kĩn nõ ata ton, wa ma me hỹrmã Jeju me, me ikwỳ me, Krĩpinkrên wỳr me mõ. ²Ne krĩ ata pê kẽn to mehcunea intête kwỳc, ne mencjêj xà na hõtpê me harkwa jàhtôa ne me to. Atajê nõ na pê carà cahàcre hôhti jamãr catêjê ajco hapôj ne me to acjêj. Cwỳrjapê ri cute me cumã haprỳ to Caràcahàcre Hôhti Jõ Harkwa. Ne cahi na kẽn te kwỳc kam cô ata ri me ijarkwa na haprỳ te Krĩjàhcaprĩ. Mã ipu na hàhpykrã xà na kẽn po te ikre po atajê te xĩc ne ihcuhhê. ^3-4Mã me hà cunea cô ata pu na me nõ, ne me Pahpãm mã imprar catê te côjkwa pĩn iwrỳc, ne cô ata to ipicwrỳc na me hikaj. Pê ajco hãn ne hõtpê jũa mã ahna amcro pê ajco irôrôc, ne cô ata to acwrỳc. Ne pê ampo na me hikaj nare. Quê ha cô ata acwrỳc, quê ha me hà atajê nõ mam cumã mrõ, ne impej pyrentu. Na pê ipu na mento tũm me, cute me xwỳ me, me cukrã xà pec me, me nõ. ⁵Mã curia me cahê na jũm xũmre xà na, ramã ahna caku te trĩnta ne ihkôt ôjtô ata nõ. ⁶Mã Jeju curi cator ne cute ramã hà ita na ahna caku jàhtôa na hõmpun, ne hahkre pej. Ne cute ihcukij to:

— Xà amã amji caprãr na amji to prãm? — hajỹr.

⁷Mã cute Jeju par ne cumã:

— Hewhỹ, jũm te cô ita kam ito mrõr xà caxuw hamreare. Cwỳrjapê ri hãn ne acwrỳc, wa tee hỹrmã icuhkwỳr, mã ma mam me ikwỳ kwỳ me ire ne kam me mrõ. Ne quêt mempej ne ma me pra, wa ita ri mehkĩnte ijikwa xà ita kam ijikwa — hajỹr.

⁸Mã Jeju cumã:

— Hã to xa, ne anõr xà ata py ne to amõr pyrentu — hane. ⁹Me ajkaam mã hũmre ata pej ne hãm, ne cute nõr xà ata pyr ne ma to ihtẽm pyrentu. Ne mehkôt xà jõ amcro pê xap na, pê ita hane.

¹⁰Mã Juta catêjê jõ pahhi catêjê kwỳ te jũm ata te nõr xà pyr ne to ihtẽm na me hõmpun, ne me cumã harkwa to:

— Pỳhàpà, he ita kam me pahkôt xà jõ amcro pê xap, nõ na mã ca ajte ate anõr xà ita pyr ne to tẽ? He ate amji kam gapac xà ita nee me pahte amji kam me pajapac xà cajpuaw nare, ne ihkaj na! — hajỹr.

¹¹Mã cute mempar ne me cumã:

— Por hũmre te icaprãr ata te imã harkwa to: “Anõr xà py ne to amõr pyrentu” hajỹr. Wa harkwa kôt tẽ — hajỹr.

¹²Mã cute mempar ne mehcukij to:

— Jũm te mã anõr xà ita pyr ne to atẽm na amẽn, mã ca apu to tẽ? — hajỹr.

¹³Mã me cumã:

— Pỳhàpà, nee cute icaprãr catê ata te imã amji japrỳ jarẽn nare, ne ite hõmpun pej nare kam, ma me hàhtô mã hàr — hajỹr.

¹⁴Mã ramã ahna ahtũm ryre mã Jeju te Pahpãm to me amji kam hapac xà jũrkwa kam ihcajpar ne cumã:

— Ramã acaprãr ne apej ita na amji pupun peaj ne he. Ne hipêr mõ ne amji caxuw ampo kên nõ ton nare. Nãmri ca ha ate ihnõ ton na, quê ha mam ata jirôa pê acaxuw ihkêanre ne — hajỹr, ne ma tẽ.

¹⁵Mã hũmre ata xwỳjê cator ne ma tẽ, ne cute me cupê Juta catêjê jõ pahhi kwỳ mã amji jarẽn to:

— Xãmte nee jũm te icaprãr nare, Jeju te ri icaprãr — hajỹr.

Pê Jeju cupê Pahpãm na amji jarẽ

¹⁶Ne cute me Jeju te mehkôt xà jõ amcro na, cute hàhcaprãr na me harẽn par ne me ajpẽn mã:

— Cute me pahkôt xà jõ amcro kam hàhcaprãr, ne apu to kên, cwỳrjapê cu ha hanea ne ame to kêanre ne — hajỹr. Ne ma Jeju wỳr me pra, ne cute me cumãn kam mehtẽm.

¹⁷Mã Jeju me cumã:

— Me ikampa, rỳ jũ caxuw côjkwa kam Inxũ Cati te ihkôt xà caxuw hàpên xà impejti atajê to hàpên jicu nare. Na wa ha hanea ne cuxà hàpên xà ita to ijàpên to ipa kam to icrà tu — hane.

¹⁸Pê me cupê pahhi catêjê kwỳ harkwa ita na me kampa ne ame kam incryac to ame kam incryc, na pê me cumã ihcuran prãam to ihcuran prãm. Ampo na? Nee mã ampo na nare, pê mehkôt xà jõ amcro kam hà ata caprã, ne cormã hipy cupê Pahpãm kraa to ihkra na me cumã amji jarẽ, ne Hũm me ipipẽan na amji jarẽ. Na pê ihtỳj cupê Pahpãm kra na cute amji jarẽn to apu ihhêj na amehcãmjĩ, cwỳrjapê pê kam amencryac to amencryc.

Pahpãm kra himpej xà

¹⁹Mã Jeju cormã me cumã:

— Ikam me gapac to impeaj ne he. Ipê Pahpãm kra, na wa ha nee amjia kôt ampo itajê nõ ton nare. Ne por Inxũ ampo to, wa ahna hõmpu atajêa to wa ijàpên to ipa. Ne por Inxũ ampo cunea to atajê, wa itỳj hanea ne to. ²⁰Ampo na? Inxũ mã ikĩnti, na ri ihtỳj imã cute ampo cunea ton xà itajê to ipipẽ to ipa, wa hõmpu. Ne quê ha cormã imã cute ampo ton xà itajê jirôa pê cute ton xà atajê to ajpẽ, wa ha to, ca ha ahna me ipupu. Ne atỳj hõmpun xà ata to me amji mã ajkra. ²¹Ne pom Inxũ hacpỹa mã mehtyc to ihtĩr, ita na wa ha ipê hũràac ne ite amji mã jũm tyc to ihtĩr prãm ata to, itỳj hacpỹ mã ihtĩr. ²²Ne nee Inxũ Cati pê mehkên me, mempej to ipicokjêr catê nare. Ampo na? He ite ita to ijàpên xàa caxuw ri cute imã hõr. Ne pa wa ha cute mempejti ton atajê jahpan xà na, me cumã ijàmjõr xà impejti atajê to amgõ. Ne cute mehkên ton atajê jahpan xà na, wa ha me cumã ijàmjõr xà kêanre atajê to amgõ, ne cama mehkên mã ame curẽ. ²³Quê ha icati na me ipupu, ne amji mã me icupa to hanea, pom quê amji mã me Inxũ cupa he. Ne por jũm amji mã ipê Pahpãm kra na icupa nare ata ri, hanea ne nee amji mã, por Inxũ te ikujahêc ata cupa nare.

²⁴— He ampeaj kam wa ha me amã awjarẽ. Por quê ha jũm icakôc xà itajê cunea to amji mã ihhimpej ne kampa, ne Inxũ te ajpên ikujahêc na amji mã ito ihhimpej ata, quê ha ihtỳj ihtĩr rohnỳtti mã. Ampo na? He wa nee ite jũm ata kên mã mẽn nare, ne cama quêt to ihtyc xà jahpan, na quê ha ihtĩr rohnỳtti mã na ipa, Inxũ cahê na. ²⁵He ampeaj kam wa ha me amã awjarẽ. Quê ha ita caxuw, por cormã mehtĩar na ame ipa, mã ramã Inxũ mã mehtyc itajê, jũ caxuw ipê ihkra na me ijõkre kampa, ne hacpỹ mã ihcunea na amehtĩr pyrentu. ²⁶Ne pom Inxũ pê mehcunea mã, cute me amji kam hapac xà jõr catê xakat ata te ri imã hõr. Na wa itỳj hacpỹ mã mehtyc to ihtĩr. ²⁷Ne ampeaj kam ri ipê Pahpãm kra, ne hanea ne ipê me Ahàkà, cwỳrjapê ri hajỹar ne Inxũ Cati te ito mempej me, mehkên catêjê cukij ne me to ipicokjêr catê.

²⁸— Ne nee ca ite icakôc xà to icakôc itajê impar xà to ame amji mã me apikrar nare. Ampo na? He ramã amehtyc catêjê te me ijõkre par, ne hacpỹa mã amehtĩr ne kre pê me hapôj xàa kam ri ramã hàhhuc to mõ. ²⁹Ne por mempejti ton to me ipa atajê, quê ha mehtyc xà jirô pê hacpỹa mã mehtĩr, ne Pahpãm cahê na amji to me ipijapar rohnỳtti mã. Ne por mehkĩnte mehkêanre ton to me ipa atajê, quê ha mehtĩr, ne cama mehkên mã me axà, ne ampỳa mã, Pahpãm pê amji to me acto.

³⁰— Ne pa wa nee amjia kôt jũm kên mã mẽn nare, ne Inxũ te catyt kam amji jahkre pejti te me hahkre pej xà ata kôt, wa ha me to ajcokjê. Na wa nee apu ampo itajê to ihcupan nare. Ampo na? He wa nee ite amji kam ijapac xàa na jũm kên mã mẽn nare. Ne por Inxũ te ikujahêc ata te amji kam hapac xàa kôt wa hãn ne mehkên catêjê kên mã me curẽ, ne mempejti catêjê atajê impej mã me curẽ.

Pê Jeju hàpên xà ton atajê, ihtỳj cupê Pahpãm na harẽ

³¹— Ne wa ha pa ipyxit peaj ne me amã amji kôt harẽ na mã, quê ha ite amji jarẽn xà itajê kôt hamreare ne. ³²Ne nee mã ipyxit peaj nare, ne ihtỳj icaxuw jũm ata, ne cupê ijõ Inxũ. Ne por ito ampo na awjarẽ atajê, ampeaj kam ri, nee mã Inxũ apu ihhêj xi jarẽn nare na, ramã imã hahkre pej. Inxũ te ijarẽn xà ata ampeaj kam ri, ne nee ihkôt hamre xà nare.

³³— Ne ate me ina gàhcukjêr ne me ijarẽn par prãmte, Jowãw te me cumrãr catê wỳr me jũmjê kujahêc, mã cute me cumã ito hũjarẽn par atajê ri nee ihhêj xi xà nare, ne ampeaj kam ri. ³⁴Ne nee imã pjê ita kam, cute me cumã me ito hũjarẽn xà ita na prãm nare, ne quêt Inxũ te ito hũjarẽn xà atajê ri imã impej, ne nee ihkôt hamre nare. Ne mẽr ampo na ri Jowãw te me cumrãr catê te me amã ijarẽn to hajỹr? He ca ihhêaj to ijarẽn par xà atajê kôt me ikampa, ne ate amji mã meito ahimpej na, ca ha nee me akên mã me axàr nare, ne atỳj me atyc xà jahpa.

³⁵— Ne pom ihpôc xà hãn ne amji na ampo jarare jàhtôa ne to cuprõ, ita jĩkjê na ri Jowãw te me cumrãr catê ata amji na me ato cuprõ. Ne cupê ihpôc xà pyràac ne me amã ahcujro, ca atỳj ahna ate me cuprõn to amcro to incrêre xà, mãr quê me amã ampo to hahkre. Ca hũrên ame gakry cakrô, ca ajte nee ate me hũjarẽn xà atajê cunea na me kam gapac nare. ³⁶Ne ampeaj kam pê Jowãw hirãa pê me amã ijarẽ. Mã cormã Inxũ Cati te ijàpên xà catia ita na imẽn, wa to ijàpên to ipa, atajê ri Jowãw jirôa pê, hirãa pê ijarẽ, ne hanea ne ihtỳj ajpên Inxũ te ikujahêc na ijarẽ. ³⁷Ne hanea ne Inxũ te ikujahêc ata, ihtỳj ito me amã awjarẽ cakrô, ca rỳ jũ caxuw ate me hõkre par ne me hõmpun nare. ³⁸Ca nee ajte icakôc xà itajê na me ipar, ne amji mã me ito ahimpej nare. Ne ca rỳ jũ caxuw ate me Inxũ te ajpên ikujahêc ata jõkre me, cute me amã harkwa jirên atajê nõ impar nare. ³⁹Ne cormã ihnõ xwỳjê, he ca atỳj me Inxũ pê Pahpãm jarkwa na ihkàhhôc to hahkre to me apa. Ne ate me to hahkre xà atajê kôt atỳj nee jũ caxuw ate ame atyc nare na, ame amji cãmjĩ. Ne por ihkàhhôc ata ihtỳj ito awjarẽ. ⁴⁰Cakrô ca ma ajte ite me amã me atĩr rohnỳtti mã xà ata jõr xà wỳr ame gitõt.

⁴¹— Ne imã Inxũ te ito ihcakôc to impejti naa pit mã to prãm. Cwỳrjapê ri imã pjê kam me hũmre te ikôt me harẽn to impejti na me to prãm nare. ⁴²Ne wa ite ramã me akrãhky na me amã Pahpãm kĩn na me gahkre pej, ne nee me amã caxwãm catia mã Pahpãm kĩn nare. ⁴³Ne wa Inxũ te amji kam hapac xàa na ajpên me awỳr icator cakrô, ca ajte ma ame icaca. Ne quê ha pjê ita kam, ita ri, ajte jũm xũmre amjia kôt cute amji kam hapac xàa na me awỳr cato, ca ha atỳj ahna me amji capa, ne ihkôat me amji to. ⁴⁴Ne ate pjê kam me hũmre te me apejti na me garẽn na ri, me amã impar prãm. Ne Pahpãm te me apejti na me garẽn na ri, nee amji to me amã gàhcukjêr to prãm nare, ita kam jũ mã ca ha ne ito amji mã me ahimpej? Wỳr ca ha amji mã hamã ne me to.

⁴⁵— He xà pa wa ha ajkĩ Inxũ cuna mã me garẽn to kêanre ne? Hãpà. Ne pom ca me Mojxe xwỳ te me hapackre xà to me amji kampa, ne cute me atehcajpar xà na amji mã me to hane ita, quê ha Pahpãm mã me apê mehkên ton catêjê na me amã hacjê. ⁴⁶Nãmri ca ha me ate caxwãm catia mã amji mã me Mojxe kam gapac na, ca ha atỳj hanea ne ito amji mã hane. Ampo na? Taa mã pê ina ihhôc. ⁴⁷Ca nee ramã Mojxe to amji mã me ahimpej nare ita kam, jũ wỳr ca ha ito amji mã me ahimpej — hajỹr. Hõ, Jeju te Juta catêjê jõ pahhi kwỳ mã harkwa to hajỹr.

Pê Jeju hõ incrire to me hàhtôa mã harte

¹Ita jirô pê mã, wa ma Jeju me, me ikwỳ me, Hĩpôjajo jõ cô na me irêr, ata japrỳ nõ te Tiperij jõ cô. ²Mã me ikôt me hàhtôa ne me mõ. Ampo na? Cute me Jeju te me hà caprãr, ne me to impej pyrentu na me hõmpun na ri. ³Wa hàhkà jakôt nõ na Jeju me, me ipê ihkôt me ipa catêjê me, me ijàpir ne me ijỹr. ⁴Pê caxuw ramã me Hakren xà jõ amji kĩn me Pãwtỳjre jõ amji kĩn na ahtipre.

⁵Mã Jeju te amji wỳr, por ihkôt me hàhtôa ne me mõ atajê pupun, ne cute Pirip mã harkwa to:

— Jõ ri cu ha ajte me hàhtôti itajê mã me hõ nõ mã me pahcato, ne me hũhkà? — hajỹr.

⁶Ne pê ramã cute me cumã pãw kryj ata kam to hàhtô to amji kampa, ne cama cute Pirip cajpẽar prãmte pê cumã hane.

⁷Mã Pirip cumã:

— Ahpỹanre na me pyxit te me pãw kryjre ne mencwỳr xà caxuw, cu ha me putwrỳ te ôjtô jàpên xà jõ pore jirôa pê ahna me cumẽ cakrô, quê ha nee me cahuc nare — hane.

^8-9Mã Antre pê Petrô tõ te cumã harkwa to:

— Ihnãm hã ahkrare xũmre nõ ita mã pãw kryjre te xĩc, ne caxuw cumã tep pijakrut ne hàr hiahpuro mã to jỹ he, ne jũ wỳr quê me hàhtôti itajê catwỳ! — hajỹr.

¹⁰Mã Jeju te me imã harkwa to:

— Me cumã, quê mehcunea pjê kam me to jỹ — hajỹr. Ne pê ampeaj kam pjê ata kam põre. Mã mehcunea jỹr, pjê kam, ne por me hũmre me hỹr atajê pê me hàhtô na me xĩc mir, me hũmre pit. ¹¹Mã Jeju te pãw kryjre atajê incwỳr ne hũrên hakryti na Hũm pê Pahpãm mã to amji jarẽn. Ne cute ihcokjêr ne me imã hõr, wa ite me cumã hõr par, mã cute tep pijakrut atajê to hajỹar. ¹²Mã ajte me hõ pãw kryjre itajê to mehcunea jarte partu. Ne cute me hàpàn tohhi jirô pê mã ri, Jeju te me imã harkwa to:

— Cute ame cahhur tohhi itajê to kàhà kam me cuprõ, quê nee ihnõ ipictor nare — hajỹr. ¹³Wa ite me to cuprõn, ne me to kàhà to tôxi ne me to hipu par, por pãw kryjre te xĩc atajê cahhur to.

¹⁴Mã cute Jeju te ampo pejti ton xà ita na me hõmpun, ne amji mã me harẽn to:

— He ampeaj kam ri hũmre ita pê me pamã Pahpãm jarkwa to ihcakôc catê, por pê Pahpãm me pamã cator xà na to awjahkre ata mã he — hajỹr. ¹⁵Mã Jeju te, cute me hàprêa kam amji mã me to hõ pahhi na me hahkre pej, ne ma ahte tẽ, ne kẽnti kàa nõ na hàpir.

Pê Jeju cô incwỳrpê mõ

¹⁶Mã ramã me ina caxwa, wa curia ite me Jeju rer, ne ma me iwrỳc, hĩpô tohkà wỳr. ¹⁷Ne pàr kre mã me icjêj, ne ma Capernam jõ krĩ wỳr ite me to irêr na me amji to hajỹr. Ne ramã ihcajpuaw pàr kre to me mõ, mã ramã awcapàtkô, mã nee cormã me iwỳr Jeju cator nare. ¹⁸Mã kôc pahtỳjti ata te hàpêr kam ihtẽm, ne cô to harô to pra. ¹⁹Wa ramã ite me imõr jũwry to me rec pyxit, cô kam, ne ma me to cakrỳn to mõ. Ne me ite amji wỳr ajpên cô jipy Jeju te mõr na me hõmpun, ne ampeaj kam me imã hũpa.

²⁰Mã pea me ina hàhtêp, ne cute me imã harkwa to:

— Ame icupa nare, pa wa mõ, nee mã ipê me carõ nare — hajỹr. ²¹Wa ite me hahkre pej, ne hacpỹa mã hũrên ame ijakry, ne itỳj ite ahna me amji caxàr. Mã me iwỳr hàr, ne jũ mã cute pàr kre ton, mã cyt ne me imõr xà ata wỳr me ito icator.

Pê me hàhtôti atajê ame Jeju japê

²²Ne pê Jeju curi me cumã harte xà ata ri, wa ahte ite pàr kre pyxit peaj mã me icjêj na cute me ipupuan na, curia cormã me ahtwỳ, ne me Jeju jikaj. Ne nee pê ramã me iwỳr Jeju cator na me hahkre pej nare. ²³Mã ma me ijakàn pê Tiperij jõ krĩ jõ pàr kre kwỳ cator, por curi Jeju te Hũm mã pãw pyrên hakryti jarẽn, ne me cumã kryj, mã cute ame to harte tu ata ri. ²⁴Ne cute me ijapên, ne curia ame Jeju jikaj atajê kwỳ te pàr kre kwỳ mã mencjên, ne ma me ikôt Capernam jõ krĩ wỳr me to cator, cute me Jeju japên prãmte.

Jeju pê me pahto ihtĩr rohnỳtti mã catê

²⁵Ne curia ri me hàhtôti atajê te me Jeju mã cator ne me cumã:

— Hàpà me Ikrã tũm! Jũ caxuw mã ca ita ri acator? Wa ihcaprỳ na curi ame gikaj, ca ate jũ mã ajte ne ramã ita ri acator? — hajỹr. Mã Jeju me cumã:

²⁶— Ampeaj kam wa ha me garẽ! Ca ate ijàpên xà catia na me ipupun, ne Pahpãm kra na ate amji mã me ito hajỹr to, ca ikôt me acator nare. Ne ame garte prãm ita to pit mã, ca ikôt me acator. ²⁷He ame hajỹr nare! Nee ca pjê ita kam, ate amji to me apijapar prãmte, me gàpàn to pit mã ame amji kam gapac nare. Ne quêt Pahpãm cahê na ate amji to me apijapar rohnỳtti mã xà ata to, ca ha me amji kampa. Ampo na? He ate me to amji kam me gapac ata pê ihhêj rũm me gõ te me ato me atĩr rohnỳtti mã xà. He ipê me Ahàkà, na wa ite me axũmrea na amji ton, ne me amã Inxũ Cati to hahkre, ca ate cahê na amji to me apijapar rohnỳtti mã xà caxuw. Mã ihtỳj Inxũ pê Pahpãm te, ite to ijàpên xà caxuw imã carôt jõr. Ampo na? He cumã ipej na ri — hajỹr.

²⁸Mã cute ita na mehcukij to:

— Ampo ton na ri Pahpãm mã me ito prãm, wa me cumã to? — hajỹr.

²⁹Mã Jeju te me cumã harkwa to:

— Ate ito amji mã me ahimpej na ri, Pahpãm mã me ato prãm, cwỳrjapê ri cute me awỳr ikujahêc — hajỹr.

³⁰Mã me cumã:

— Ca ha hipêr acarôat to ampo pihho pejti to! Wa ha ahna me apupu, ne itỳj amji mã me ato ihimpej! ³¹He pê me panquêtjê põ kam me hamreare ata kam ajco me hõ pê mana ata pit kur to me ipa, ata pê Pahpãm jõ kàhhôc kam harẽn to: “Cute côjkwa pĩn me cumã me hõ jõr, mã cute mehkrẽr” hajỹr. Na ca ha pijamã ajkĩ cuxà me imã to? Wa ha me hõmpu, ne me cukrẽ, ne itỳj amji mã me ato ihimpej — hane.

^32-33Mã Jeju me cumã:

— Ỹhỹ, ampeaj kam wa ha me amã côjkwa jõ ata kôt harẽ. Pê rỳ pêa mã Mojxe xwỳ jõ caku kam, cute pjê kam amji to me ipijapar xà caxuw pit mã, pê Pahpãm me cumã me hõ japrỳ te mana ata gõ. Ne nee mã pê Mojxe me cumã hõ ata jõr nare, Pahpãm pê me cumã cugõ. Ne pom curmã côjkwa pĩn Pahpãm jõ intuwti cator ita pê ri côjkwa kam Pahpãm cahê na ate amji to me apijapar rohnỳtti mã xà caxuw impej — hane.

³⁴Mã me cumã:

— Me Ikrã tũmti, gõtpê amcro cunea kam, mẽr me imã Pahpãm jõ intuwti ita gõ! — hane.

³⁵Mã me cumã:

— He ipê ri ihhêj rũm côjkwa pĩn Pahpãm jõ intuwti ata, na wa ha me to ihtĩr rohnỳtti mã. Quê ha jũm ty, ne ihtyc jirô pê hacpỹa mã ihtĩr, ne nee hipêr jũ caxuw ihtyc nare. Quê ha prãm na jũm te apu ipa na, quê ha apà ne hacpỹa mã ihtỳj, ne cumã amji kĩn, ne harte pyrên hakry. Ne quê ha hanea ne jũm kôr na apu ipa ne ikõ, ne hacpỹa mã ihtỳj ne cumã amji kĩn. Jĩkjê na, quê ha jũm te Pahpãm jahkre pej ne cumã amji jõr, ne ahna mehkwỳ mã hàr to prãm na, quê ha iwỳr apkjê ne ito amji mã ihhimpej, ne Pahpãm jahkre pej, ne ahna mehkwỳ mã hàr pyrên hakry.

³⁶— Wa ramã ite me amã me atoa icakôc to, ca atỳj me ipupun cakrô, ca nee cormã me ikam gapac nare. ³⁷Ne por Inxũ te ijũhkra mã me hacjên xà atajê, quê ha ihtỳj ijũhkra mã me acjêj, wa ha itỳj amji mã me huwahi, ne jũ caxuw põ mã, amji pê, jũm to ijũcapêr, quê ha ipictor nare. ³⁸Ne por Inxũ te ampo na amji mã ito prãmti xà ata wỳr pê wa côjkwa pĩn wrỳ. Ne nee amjia kôt ite amji mã ampo na prãmti ata wỳr, iwrỳc nare. ³⁹Ne ite, cute ijũhkra mã me hacjên atajê to hajỹr xà caxuw ri, cute me awỳr ikujahêc he. Quê ha nee jũm ipê ipictor nare. Wa ha jõ ri pjê jamre xà ata kam, me to ipicokjêr xà jõ amcro kam, itỳj amji kôt hacpỹa mã mehcunea to ihtĩr. Hõhõ, ita caxuw ri Inxũ te ikujahêc. ⁴⁰Ita na ri Inxũ ito prãm he. Quê ha ihtỳj ipê Pahpãm kra te hajỹr romã mã iwỳr me apkjê. Ne por quê ha ito amji mã mehhimpej atajê, wa ha jũ caxuw, pjê jamre xà ata kam, hacpỹa mã me to ihtĩr. Quê ha me to ipicokjêr xà jirô pê Inxũ cahê na mehtĩr rohnỳtti mã na ame ipa — hajỹr.

⁴¹Mã Juta catêjê kwỳ te ajpẽn mã me Jeju to ihcakôc kên kam mehtẽm. Ampo na? Cute côjkwa pĩn cupê me hõ tuaw pyràc ne iwrỳc na amji jarẽn, na ri ame ajpẽn mã harẽn to hane he:

⁴²— Pom cupê Joje me Marij kra ita? He wa ramã ite me hõmpun pejtu, nõ na mã ajte côjkwa pĩn iwrỳc na amji jarẽ? — hane.

⁴³Mã Jeju te mempar ne me cumã:

— Nãmhã ne apu ihêj xi na amji mã me ito hajỹr jicu. ⁴⁴Jũ wỳr quê jũm amjia kôt amji to ikôt ipa catê. Nãmri quê ha Inxũ te jũm pê ikôt ipa catê na ton na, quê ha ihtỳj cupê ikôt ipa catê. Na wa ha itỳj hacpỹa mã to ihtĩr, ampo cunea jamre xà ata kam. ⁴⁵Ne Pahpãm jarkwa to mehcakôc catêjê jõ kàhhôc kam hũjarẽn xà te hajỹr he: “Quê ha Pahpãm pê mehcunea mã ampo to hahkre catê” hane. Quê ha cute me kam hapac, ne amji mã me to ihhimpej atajê, quê ha ajpên iwỳr me apkjê, ne iwỳr me pra, ne ihtỳj amji mã me ito ihhimpej. ⁴⁶Ne rỳ jũ caxuw ita ri, pjê kam catêjê nõ te Inxũ pupun nare, ne pa nare. Wa ipyxit peaj ne itỳj quêt hõmpu. Ampo na? He curũam wa icator, na ri imã hahkre pej.

⁴⁷— He wa ampeaj kam me amã awjarẽ, quê ha jũm te amji mã ito ihhimpej na, quê ha ihtyc jirô pê hacpỹa mã ihtĩr, ne ihtĩr ita na apu ipa rohnỳtti mã. ⁴⁸Na ri ipê me gõ te me ato atĩr rohnỳtti mã xà ata. ⁴⁹Ne pê mam me panquêtjê põ kam me hamreare ata kam ame hõ pejti japrỳ te mana ata pit ku cakrô, pê ihtỳj amehwej ne amehtyc partu, ne nee cama hacpỹa mã jũm tĩr nare. ⁵⁰Ne por mehwỳr côjkwa pĩn me hõ tuwti wrỳc ata, quê ha jũm te ihkwỳ krẽr na, quê ha Pahpãm cahê na ihtĩr ita na apu ipa rohnỳtti mã. ⁵¹Ne ipêa ri côjkwa pĩn me cumã me hõ tĩar wrỳc ata. Ne ipêa ri me to ihtĩr rohnỳtti mã xà. Wa ha pa, pjê kam mehcunea mã amji gõ. Na quê ha jũm te ihhêj ne ikwỳ krẽr na, quê ha Pahpãm cahê na ihtĩr ita na apu ipa rohnỳtti mã — hajỹr.

⁵²Mã Juta catêjê kwỳ ame kam incryac to ame kam incryc, na ri cute me ajpẽn mã harẽn kên kam ihtẽm, ne me harẽn to:

— Jũ mã quê ajte hũmre ita ne me pamã amji jĩa gõ, cu ame cuku? — hajỹr.

⁵³Mã Jeju me cumã:

— He ampeaj kam wa ha me amã amji jarẽ, ca ha me ate ame ipê Ahàkà jĩ kur nare, ne nee ame icaprô ita to ame akõm nare na, ca ha nee Pahpãm cahê na amji to ame apijapar kam me to acrà nare, ne atỳj ame atyc pa, ne me akôt hamre rohnỳtti mã. ⁵⁴Ne quê ha jũm te ijĩ kwỳ krẽr, ne icaprô ita kwỳ to ihkõm na, wa ha itỳj jũm ata to hacpỹa mã ihtĩr, por jũ caxuw me to ipicokjêr xà jõ amcro pê ampo cunea jamre xà ata kam. ⁵⁵Quêt ijĩ ita ri pjê kam me hõ itajê jirôa pê impej. Ampo na? He ijĩ ita pê ri quêt me hàpàn xà impejti ata, ne icaprô ita pê ri quêt mehkõm xà impejti ata, me to ihtĩr rohnỳtti mã xà caxuw. ⁵⁶Na quê ha jũmjê te ijĩ kwỳ krẽr, ne icaprô to mehkõm na, wa ha ramã me ajcacwa, ne ajpẽn kam me ihônco tu ne. Quê ha ramã Icarõ Pejti me cumã acjêj, quê ha Icarõ Pejti ata carôat kôt me ipa. ⁵⁷Ne por Inxũ pê mehtĩr xà cunea xakat ata te ri ajpên ikujahêc, na wa itĩar na ipa. Na quê ha jũm te ijĩ kwỳ krẽr na, quê ha hanea ne ihtĩr ita na apu ipa. ⁵⁸Hõhõ, pê mam me panquêtjê me hõ pejti pê mana krẽr cakrô, ihtỳj amehwej pa, ne amehtyc partu. Ne pom curmã côjkwa pĩn ipê me hõ intuwti wrỳc ita caca xà te nee hajỹr nare, ne ajteare mã, wa quêt mehtĩr rohnỳtti mã na me to — hane.

⁵⁹Pê Capernam jõ krĩ kam, cute me cuprõn xà jũrkwa kam Jeju me cumã hũjarẽn xà ata to awjarẽ to hane. Ne nee pê cormã ne Jeju me cumã amji to ipipẽ nare, mehcunea te me hahkre pej cupate. Cwỳrjapê pê ajco cute me cumã amji jarẽn xà itajê cwỳrpê me cumã amji jarẽn to ipa. Ne Jeju jĩ kur xà ata kôt harẽn xà te hajỹr he. Quê ha ihtỳj jũm amji mã Jeju to ihhimpej, ne ihkôat ipa, ne ihkôt ipa xà ata pê ri cute hĩ kur xà.

Pê me hàhtôa ne me Jeju mã hikra

⁶⁰Mã Jeju kôt me ipa catêjê jàhtôa ne cute me ita par, ne ajpẽn mã me harẽn to:

— Pom me pamã ampo to hahkre itajê impar kôt hakop jahkre kêatre! Ne jũ mã quê ha jũm kam hapac to, ne hahkre pej ne ahna amji capa? — hajỹr.

⁶¹Ne nee jũm te Jeju mã me harẽn nare kam, mã cutea ramã me ahna ihcakôc xà ata jahkre pej, cwỳrjapê ri cute mehcukij to:

— Xà ita cwỳrjapê mã ca ame icaca, ne ame imã hikran prãm? ⁶²He ca ha atỳj jũ caxuw côjkwa wỳr ipê me Ahàkà te hacpỹa mã hàpir na me hõmpu. Jirô pê mã ca ha cormã me ijũjarẽn xà itajê kôt me hakop, ne me hahkre pej. ⁶³Ne Pahpãm Carõ Pejti ata ri cahê na me ato ipijapar rohnỳtti mã. Ne jũ wỳr ca me anõ amjia kôt amji mã hamã ne ca amji to ajpa, ne me ca ajpẽn to me ajpa. Ne ca ha ate me icakôc xà ita na ikam me gapac na, quê ha Pahpãm Carõ Pejti me amã acjêj, ne me ato ipijapar rohnỳtti mã. Hõhõ, ita pê ri ate me ijĩ kur xà ata, pom wa me amã harẽ ita. Ne wa ampeaj kam me amã ampo itajê jarẽn cakrô, ca ajte nee me akwỳ ito amji mã me ahimpej nare — hajỹr. ⁶⁴Ampo na pê Jeju me cumã ita jarẽ? Nee mã ampo na nare. He pê ramã rỳ pêa mã, mam jũmjê atajê te to amji mã mehhimpej xà nare na me hahkre pej, ne hanea ne jũm te ihkên mã mẽn xà ata na hahkre pej.

⁶⁵Ne cute me cumã:

— Cwỳrjapê wa ite ramã me amã harẽn xà ata na, quê ha Inxũ te ikôt jũm te ipa catê na hãm nare na, quê ha nee cupê ikôt ipa catê nare — hajỹr. ⁶⁶Na ri Jeju kôt me ipa catêjê jàhtôa ne cute ihkôt me ipa jicu, ne nee hipêr ihkôt me ipa nare.

Pê Jeju kôt me ipa catêjê te tôxi atajê nee me cumã hikran nare

⁶⁷Mã cute me ipê ihkôt me ipa catêjê te tôxi itajê cukij to:

— Xà ca ha hanea ne me ijicu, ne ma me aprar prãm? — hane. ⁶⁸Mã Ximãw Petrô te cumã harkwa to:

— Jũm wa ha ajte me hũnã? Me ijõ Pahhiti, pom acakôc xà itajêa ri quêt me imã ite amji to me ipijapar rohnỳtti mã xà to hahkre. ⁶⁹Wa ite me Pahpãm te apê jũm pejti ata kujahêc na me gahkre pej, na wa itỳj ite amji mã me ato hajỹr — hajỹr.

⁷⁰Mã Jeju me imã harkwa to:

— Ỹhỹ ita cwỳrjapê wa ite amji mã me ate tôxi itajê capi cakrô, mã me anõ pyxit ne kam me pahcurê xwỳn carõ kên jõ pahhi — hane.

⁷¹Ne pê Jeju, Juta Carijot pê Ximãw Carijot kra ata to, pê me imã ihcakôc. Ampo na? Juta ata pê ihkôt me ipa catêjê te tôxi atajê nõa cakrô, quê ha ihtỳj jũ caxuw Jeju curê xwỳn tehcajpa, ne ihkên mã cumẽ.

Pê Jeju kjêjê intuwre atajê ame cumã xwỳ

¹Ita jirô pê mã ri ma Jeju ame ito mõ, Hĩpôjajo jõ pjê kam, ne pê nee Juta jõ pjê kam ajco apu ipa nare. Ampo na? Pê curi me hõ pahhi catêjê apu mehcuran prãm na pê. ²Mã ramã caxuaw Juta catêjê jõ amji kĩn nõ japrỳ te Ikrere jõ amji kĩn ata to me cator xàa kam. Pê ajco me hõ amji kĩn ton xàa na, ihtỳj ikrere atajê kam amehkrĩ, ne nee me hũrkwa pej kam amehkrĩ nare. ^3-5Mã cormã hapu na Jeju kôt mehkjêjê atajê te ihtõ kà pê Pahpãm kra na amji mã me to hajỹr nare, na ri cute me hapactua kam cumã harkwa to:

— Juta jõ pjê wỳr atẽm pyrentu, ne curi acato, ne acarôat to me cumã ampo pihho catihti itajê cunea to, quê me hàhtôti atajê me hõmpu! Quê ha jũm mã amji to cati prãm na, quê ha nee apu ipimxur to ihcuhkwỳr nare. Ne mẽr ampo na quê ate ampo jahkre pej xà itajê na me apupun nare? Me cumã to, quê ahna mehcunea me apupu! — hajỹr.

⁶Mã Jeju me cumã:

— He cormã nee ite mehcunea mã amji to ipipẽ xà jõ amcro kam hàhhuc nare! Ne me amã amji kĩn wỳr me aprar xà caxuw amcro cunea impej. ⁷Mã pjê kam catêjê itajê nee quêt ame acurê nare. Ne pa nare, me ikam incryc kam ame ipa. Cwỳrjapê ri ma ame icurê, ne ma ame icaca! Ampo na? Wa itỳj me cumã, cute me ampo to kên atajê jarẽn to ipa na ri, ma ame icurê. ⁸Ne me ca nare, gapacta ne amji kĩn ita wỳr me mõ. Waha ita ri apu mõ. Ampo na? He cormã amji kĩn wỳr imõr xà caxuw nee ijõ amcro kam hàhhuc nare — hane. ⁹Hõ, Jeju te me cumã amji jarẽn to hajỹr, ne curia Hĩpôjajo jõ pjê kam hàhhuc, ne apu mõ, me hakàn pê. ¹⁰Wa me hakàn pê ame ipa, mã me ina jũ mã amcro te, wa ma me ipimxuar pê Jeju me, me mõ. Mã nee jũm te me imõr xà na me ipupun, ne me ijahkre pej nare.

Me hàhtôti atajê mã Jeju to cute amji kam me hapac xà pijakrut

¹¹Mã tee Juta catêjê jõ pahhi kwỳ amji kĩn ata na, me hàhtôti atajê catàtkre na ame Jeju japê. Ne ame hapên to me ahna hàhcukjêr to hajỹr to me ipa he:

— Jõ ri mõrmõ Jeju apu mõ? — hajỹr.

¹²Mã me hàhtôti atajê kwỳ kàjpej pê, ajpẽn mã me Jeju jarẽn to:

— Ampeaj kam jũm ita pej — hane. Ne mehkwỳ ajpẽn mã me harẽn to:

— Quê, he jũm ita ihtỳj mehkwỳ mã ihhêj xi to ipa — hane.

¹³Mã Juta catêjê jõ pahhi kwỳ mã Jeju kĩn nare na, cute me hahkre peaj xà na, nee jũm me kam mare mã ajpẽn mã Jeju kôt harẽn nare, me hõ pahhi kwỳ te ame kam incryc, ne ame to kên cupate.

Pê Jeju me cuprõn xà kam me cumã ampo to hahkre

¹⁴Ne ramã cute me to amji kĩn ata krã curan xà wỳr, ihcahti na cute me to hajỹr. Mã ma Jeju Pahpãm to me amji kam hapac xà jũrkwa wỳr mõ ne hàr, ne curia hỹr ne ame cumã ampo to hahkre. ¹⁵Mã Juta catêjê kwỳ te mehcakôc xà atajê na mempar, ne me amji mã harẽn to:

— Pỳhàpà! Pê nee ihkàhhôc to hahkre cati nare cakrô, ampeaj kam cute amji jahkre pej — hajỹr.

¹⁶Mã Jeju me cumã amji jarẽn to:

— Pom wa me amã ampo to hahkre itajê, wa nee amjia kôt hahkre pej, ne me amã to hahkre nare, ne nee cupê itekjê nare. Ne cupê Pahpãm te ikujahêc ata tekjê. Ne curũam ri ajpên ampo itajê pra, wa cama me amã to hahkre. ¹⁷Ne quê ha jũm mã Pahpãm te amji kam hapac xà jahkre pej, ne ihkôt amji ton to prãm na, quê ha ite ampo to hahkre xà itajê na ikampa, ne hahkre pej pyrentu, Pahpãm pĩn hapôj na, ne nee ikrã pĩn hapôj nare.

¹⁸— Ne quê ha mehcunea te amji mã me jũm cupa to prãm to, quê ha ihtỳj amjia kôt, ihkrãa kam me cumã ampo jarẽn to ipa. Ne pa nare, wa nee ite hajỹr nare. Ampo na? Imã ate amji mã me icupa ita na me ato prãm nare, quêt ate me amji mã me Pahpãm te ikujahêc ata cupahti na ri, imã me ato prãm. Na wa itỳj catyt kam me amã ijũjarẽn xà, hêj xi nare ita to ijũjarẽn to ipa, ne nee wa ame amã ihêj xi jarẽn to ipa nare. ¹⁹Ne pê ramã Mojxe xwỳ me panquêtjê mã Pahpãm jarkwa gõ cakrô, ca ajte nee amji mã me kam gapac nare, ne mẽr ampo cwỳrjapê mã ca tee ame icuran to hahkre? — hane.

²⁰Mã mehcunea te Jeju mã me harkwa to:

— Mõrmõ ca apu akrã kam waj, na mã ca apu amji na me ikraj! Jõ ri mã jũm apu acuran prãm ita? — hajỹr.

²¹Mã Jeju me cumã:

— Por wa ite me pahkôt xà jõ amcro na icarôat to ampo pihho pyxit peaj ton, ne ite jũm xà ata caprãr, ne to me amã ipikrar ata to, wa ite amji na me amẽn, ca ajte ame ikam acryc. ²²Ne ca hanea ne atỳj me pahkôt xà jõ amcro na me apê. Ampo na? Quê ha me pahkôt xà jõ amcro na jũm cahãj mã ihkrare ihpỳm, ca ha atỳj ajte me pahkôt xà jõ amcro itajê nõ na me cumã impy kà kwỳ jakep, pê Mojxe xwỳ me amã to hahkre xàa na. Ne nee mã pê Mojxea ita to ipipẽ nare, ne mam Mojxe quêtti pê Aprãw xwỳ ata mã pê ita to me amã ajpẽ. ²³Ne Mojxe xwỳ te me hapackre xà ita kôt, mã ca atỳj me pahkôt xà ita na me ahkrare mã mempy kà jakep. Ne nee ipê me apyràc, wa ite jũm ita pê ihkà kwỳ jakep nare, ne quêt cumã ihkà cunea na to impejti, ca ajte ita na ame ikam acryc? ²⁴Ne ca hãn ne ajte ampo na me hõmpun pyxit peaj kam, ramã ihkêanre na me harẽ. Ahna cute hajỹr nare, ca ha xa ate hõmpun xà ata kôt to amji kampa, ne ihkôt hakop, ne impejti na hahkre pej, nare, ihkêanre na hahkre pej jirô pê, ca ha cormã atỳj harẽ — hane.

Jeju pê ri Mexij pê me to awjahkre ata

²⁵Mã Krĩpinkrên catêjê kwỳ Jeju na me ajpẽn cukij to:

— Xà Jeju ita mã me pajõ pahhi catêjê amehcuran prãm? Ne mẽr ampo na mã cute mehpro nare? ²⁶Pom me pahcunea jipôc ri xa ne ame pamã ihcakôc ita? Mã nee ajte jũm te cumã ampo jarẽn nare? Nare, mõrmõ me pajõ pahhi catêjê, por pê Crixtô toPahpãm me pamã awjahkre ata na, mõrmõ amji mã me to hane? ²⁷He me imãa, nee cupê Crixtô nare! Quê ha jũ caxuw me pahwỳr Crixtô ata cato, cu ha nee jũ rũm cator xà na me hahkre pej nare. Ne pom jũm xũmre ita ri ihtỳj jũ rũm cator xà ata na me pamã hahkre pej, he cupê Naxare jõ krĩ catêjê nõ — hane.

²⁸Mã cormã Jeju Pahpãm to me amji kam hapac xà jũrkwa kam xa, ne cute me cumã ampo to hahkre xà ata kam, ihkrãhhia kam me cumã:

— Xà ajkĩ ampeaj kam me amã jũ rũm icator xà ita na ijahkre pej? Hãpà! Wa nee amjia kôt icator nare, ne me apê, por ajpên cute ikujahêc ata jahkre kêatre. Ne por jũm te ikujahêc catê ata pê ri amji jarkwa par catê, ne catyt kam ipa! ²⁹Ne imãa ri quêt hahkre pej. Ampo na? He ihpĩan wa icator, ne cutea ri ajpên ikujahêc — hane.

³⁰Mã cute mempar, ne tee amehpro to hahkre, ne nee jũm te ihcupên nare. Ampo na? He nee cormã cute mehpro, ne ihkên mã me mẽn xà kam hàhhuc nare na ri. ³¹Mã me hàhtôti atajê jipôc ri me hàhtôa te ihtỳj Pahpãm te Jeju to me cumã hũjahkre na amji mã meto ihhimpej. Na ri me ajpẽn mã harẽn to:

— He ihhêj ne me imãa, cupê, por pê Crixtô to Pahpãm me pamã awjahkre ata! Ne quê ha jũ caxuw ajkĩ Crixtô cato, ne ajkĩ, pom Jeju te ampo ton xà itajê jirôa pê ajkĩ to? Hãpà. Taa mã ri ramã cator — hane.

Pê krãhtare amji caprỳ to Jeju pro to, hỹrmã pra

³²Mã Parixêw catêjê kwỳ te kàjpej pê cute amji mã me harẽn to hajỹr na mempar, cwỳrjapê ri cute Pahpãm mã mehcajrẽn catêjê jõ pahhi kwỳ me, cute Jeju pro na me ajpẽn par. Ne cute hỹrmã me hõ krãhtare kwỳ kujahêc, cute mehpro ne me haxàr prãmte. Mã hỹrmã me cator ne cama mehcuhhê ne me kampa.

³³Mã cormã Jeju me hàhtôti atajê jipôc ri xa ne me cumã:

— Wa ha itỳj cormã ijõtpê ame acahê na imõr crire ne, ne quê ha ina ahtũm nare, wa ha ma hacpỹ mã cute ajpên ikujahêc ata wỳr amji jaxà ne tẽ. ³⁴Ca ha me ipupun prãmte, tee ame ijapê ne nee me ipupun nare. Ampo na? Jũ wỳr ca me anõ, por wa curi apu mõ ata ri ikôt acato! Na ca ha nee me imã acator nare! — hane.

³⁵Mã Juta catêjê te ajpẽn mã me harẽn kam mehtẽm, ne me ajpẽn mã harẽn to:

— Jũ kam mã quê ha ajte tẽ, cu ha ajte nee cumã me pahcator nare? Xà quê ha ajkĩ ma me cupê Crec catêjê jõ pjê wỳr tẽ, ne curia me cupê Juta catêjê kwỳ mã apu ampo to hahkre to ipa? ³⁶Ne mẽr ampo mã hãn ne harẽn kam pra ne harẽn to: “Wa ha ma tẽ, ca ha tee ame ijapê, ne nee hipêr me imã acator nare”, ne “Jũ wỳr ca me anõ curi itẽm xà ata wỳr ikôt tẽ” hane? — hajỹr. Hõhõ, pahhi catêjê te ajpẽn mã harẽn to hajỹr.

Pahpãm Carõ Pejti ata pê cô te me pahto ihtĩr xà rohnỳtti mã ata pyràac

³⁷Ne pê me hõ amji kĩn cahhur ata, cute kam me to ihtẽm xà jirôa pê impej, na pê Jeju me hipôc ri xa, ne ihkrãhhia kam me cumã hũjarẽn to:

— Quê ha me anõ mã, Pahpãm jahkre pej xà pê amã kôr pyràcti ata na prãm na, ca ha iwỳr tẽ, wa ha amã Pahpãm to ajpẽ, ca ha hahkre pej pyrên gakry. ³⁸He pê ramã Pahpãm jarkwa ita jarẽn to hane he:

“Quê ha jũm te amji mã ito ihhimpej na, quê ha cute amji kam hapac xà tuw pejti atakôt me hàhtôa ne Pahpãm wỳr me apkjê,

quê ha taa mehtĩr rohnỳtti mã na me to.

Quê ha cute amji kam hapac xà tuw pejti ata pê cô catia pijapjêr ata pyràac, ne ipijapjêr ita na” — hane.

³⁹Ne por cô to mehkõm xà to Jeju te me cumã ihcakôc ata pê Pahpãm Carõ Pejti incwỳr xà. Ampo na? Por quê ha jũmjê amji mã me Jeju to mehhimpej atajê, quê ha ihtỳj me Pahpãm Carõ Pejti ata cwa. Ne ampo na pê cormã ne nee ame Pahpãm Carõ Pejti ita cwỳr nare? Pê cormã Jeju nee hacpỹ mã ihtĩr ne Hũm wỳr amji jaxàr, ne hacpỹa mã amji to cati nare na pê.

Pê me hàhtôti atajê ahpỹanre na Jeju na cute me amji to hajỹr xà

⁴⁰Ne pê me hàhtôa ne cute cô to mehkõm to me cumã ihcakôc na me kampa, atajê ajco ajpẽn mã me harẽn to:

— Ampeaj kam ri hũmre ita pê me pamã Pahpãm jarkwa to ihcakôc catê catia, cu me hikaj ata, ne taa mã ri cator — hane.

⁴¹Ne pê mehkwỳ ajpẽn mã me harẽn to:

— Me imã cupê Crixtô to Crixtô, ne toa pê Pahpãm me pamã awjahkre — hane. Ne mehkwỳ ajco ajpẽn mã me harẽn to:

— Pom Jeju pê Hĩpôjajo catêjê nõ ita? Xà quê ha ajkĩ ihtỳj Crixtô jũ caxuw Hĩpôjajo jõ pjê pĩn cato? Jũ wỳr quê ha curũm cato! ⁴²Ampo na? Pê ramã Pahpãm jõ kàhhôc kam to hũjarẽn to hane he:

“Quê ha ihtỳj jũ caxuw pahhi pê Tawi xwỳ tàmxwỳ nõ kam Crixtô cato,

ne por pê curi Juta jõ pjê kam, Pãw jõ krĩ kam Tawi xwỳ ihkrĩ ata kam, quê ha ihpỳm” — hane.

⁴³Mã pea me hàhtôti atajê te Jeju to me amji kam hapac xà to me ipicapôn. ⁴⁴Ne pê mehkwỳ ihtỳj me pro ne ihkên mã me mẽn prãm, ne me hacjên xà mã me haxàr prãm. Ne pê nee jũm ajte ihcupên nare.

Pê krãhtare nee me Jeju pro nare

⁴⁵Na ri ma hacpỹ mã krãhtare atajê te me amji jaxàr, ne me hũ kam me pra, Pahpãm mã cute mehcajrẽn catêjê jõ pahhi kwỳ me, Parixêw catêjê atajê wỳr. Mã cute me Jeju japên ne ahna mehcukij to:

— Ampo na mã ca nee ate mehpro ne ajpên iwỳr me to amõr nare, ne ajpên gũ kam me pra? — hajỹr.

⁴⁶Mã krãhtare atajê me cumã harẽn to:

— Wa rỳ jũ caxuw ite me jũm te ihcakôc xà nõ to ihcakôc to hajỹr na mempar nare, ne ihcakôc xà itajê ajteare mã — hane.

⁴⁷Mã Parixêw catêjê atajê krãhtare atajê mã:

— Pỳhàpà? Xà hanea ne ajte cute me amã ihhêj? ⁴⁸Xà ajkĩ me ipê pahhi catêjê kwỳ me Parixêw catêjê kwỳ nõ te mã amji mã Jeju to ihimpej? Hãpà! ⁴⁹He por Jeju to amji mã mehhimpej to me ipa atajê pê me pahte amji kam me pajapac xà jõ kàhhôc jahkre kêatre! Cwỳrjapê quê ha Pahpãm ame to kêanre ne, ne mehkên mã me cumẽ — hane.

Pê Nicotem Jeju tehcajpar prãm to prohti kam ihcakôc

⁵⁰Pê Nicotem ramã jũ caxuw caxwa ri Jeju mã ihcakôc ata pê mehkwỳa nõ, ne cute mehkwỳ mã harkwa to:

⁵¹— He cu nee me pajõ kàhhôc kam pahte amji kam me pajapac xà ata rer, ne me jũm ata cukij ne mempar nare kam ihkên mã me mẽn nare. Cu ha xa mehcukij, ne me kampa, ne ihkên na me hahkre pej, ne cormã ihkên mã me cumẽ — hajỹr.

⁵²Mã mehkwỳ me cumã harkwa to:

— Pỳhàpà, xà ajkĩ apê Hĩpôjajo jõ pjê catêjê nõa, mã ca atỳj apu Hĩpôjajo jõ pjê pĩn Crixtô ata cator na amji mã to hane? Apu hajỹr nare, ne cama Pahpãm jõ kàhhôc to ca hahkre ne hahkre pej, he nee rỳ jũ caxuw Pahpãm jarkwa to mehcakôc catêjê nõ te Hĩpôjajo jõ pjê pĩn cator nare — hane.

Pê Jeju cahãj xyre ata te hipêr ampo kên ton nare xà caxuw hũtà

¹Jirô pê mã ri ikre wỳr mehcunea cutor, mã ma Jeju Pĩxô jõ kẽn wỳr mõ. ²Mã amcro nõ na, awcahti xà wỳr, Jeju te amji jaxàr, Pahpãm to me amji kam hapac xà jũrkwa wỳr, ne hàr ne jỹ. Mã me hàhtôa ne ahna me ipixêr, ne me xa, ne cute ampo to me cumã hahkre xà atajê na ame kampa. ³Mã cute me cumã Mojxe xwỳ jõ kàhhôc to hahkre catêjê me, Parixêw catêjê te me pyjê nõ te ahti na impjê kaj na jũm me nõ ata pro, ne ma me to mõ. Ne cute Jeju cuna mã me hãm xà caxuw, ame cumã quêt. Mã mehcunea jipôc ri hãm ne xa. ⁴Mã cute Jeju mã me harẽn to:

— Me Ikrã tũm, pom cahãjre ita ihtỳj ahti na mõ ne hũmre ita to nõ, impjên kaj na. Mã jũm te ajpẽn kam me hõmpun, wa ite mehpro, ne ajpên awỳr me to mõ. ⁵Ne pê Pahpãm jõ kàhhôc kam Mojxe xwỳ me pamã pyjê te hajỹrjê atajê kẽn to curan to hajỹr na, awjahkre he: “Quê ha pyjê nõ apu hajỹr to mõ ata ri kẽan to cute mehcuran xà” hane. Ne ca? Jũ mã ca ha cute hajỹr xà ita na me imã ihkôt harẽn to? — hane.

⁶Ampo na pê pyjê nõ ata kôt ame Jeju mã harẽn to hane? Nee mã ampo na nare. Jeju te me hapackre xà nõ to ihcupan, mã cute mempar ne mehpro prãmte, pê tee ame to hahkre. Mã Jeju te cama hỹr ne me kam hapac, ne pjê na hikôt ne hũhkrahhi to kam ihhôc to mõ. ⁷Mã mehcukij ita na. Mã cute amji capô ne hỹr pej, ne me cumã harkwa to:

— Por rỳ jũ caxuw me anõ te Pahpãm cuna mã ampo kên ton nare ata, ca ha mam kẽn nõ to cahãjre ita kam awcapê, ate to ihcuran xà caxuw — hajỹr.

⁸Jirô pê mã ri hacpỹa mã pjê na hikôt, ne ihtỳj jỹ ne kam ihhôc. ⁹Mã cute me Jeju te me cumã hũjarẽn to hajỹr na kam me hapac atajê, ma me pyxit ne me pra. Ne por mam jũm kàhtu ata ri ma mam me cumã tẽ. Ne ahnaa me pyxit ne ajkôt memprar ita kam me cutor. Mã ahte Jeju me jũm cahãjre ata pit jàhhuc. ¹⁰Mã Jeju te amji capô ne hỹr pej, ne jũm cahãjre ata mã:

— Hàpà? Ne mẽr jõ ri mã kẽn to cute ame acapêr prãm atajê? Ne mẽr jõ ri mã ame akôt harẽn to kêanre atajê? — hajỹr.

¹¹Mã jũm cahãjre ata Jeju mã:

— Hamreare, nee jũm jàhhuc nare — hane. Mã cumã:

— Wa nee pa xwỳjê ato kên nare. Mẽr gapacta ne tẽ, ne nee hipêr mõ ne ampo kên ton nare — hane.

Jeju pê hàhcujro xà pyràac, ne me pamã ampo cunea to ajpẽ

¹²Jeju te hipêr me hàhtôa mã ampo to hahkre kam ihtẽm, ne me cumã amji jarẽn to hajỹr he:

— Ipê, pom hàhcujro xà ampo cunea cujro, ca me hõmpu ne me hahkre pej ita pyràac. Ipê Pahpãm wỳr me amã ijàhcujro catê. Na ca ha ate me amji mã ito me ahimpej na, ca ha jũ caxuw awcapàtkôti kam, me apê amji jahkre kêatre kam, mePahpãm pê apictor xà ata kam ame apa nare — hajỹr.

¹³Mã Parixêw catêjê kwỳ te me Jeju kam hapac ne me cumã:

— Ca ramã ca apu amji to acakôc, na ri acakôc xà itajê kôt hamreare — hajỹr.

¹⁴Mã Jeju me cumã:

— Pom wa ampeaj kam me amã amji jarẽn to ipa itajê kôt nee hamre nare. Ampo na? He ampeaj kam, wa nee apu ihêj xi nare. Ne pa ri quêt imã, por jũ rũm icator xà ata na amji jahkre pej, ne hanea ne imã hacpỹ mã ite amji jaxàr xà ata na amji jahkre pej. Ne me ca nare, me apê jũ rũm icator xà ata na ijahkre kêatre, ne hanea ne jũ kam itẽm xà ata na me apê ijahkre kêatre. ¹⁵Na ca me ate amji kam me gapac xàa kôt, amji mã me ikêanre na me ito hane, nare, mõrmõ ca amji mã me ipej na me ito hane. Ne imãa, ate me ijarẽn xà itajê cunea kôt hamreare. Ne nee cormã ite mehkên me, mempejti cukij ne me to ipicokjêr xà jõ amcro cator nare. ¹⁶Wa ha ite ramã me ato ipicokjêr xà na mã, wa ha itỳj catyt kam me akên me, me apejti to ipicokjêr to ipa. Ampo na? He wa ha ite ton xà ata kam, nee ahte ton nare. Quê ha hanea ne, por Inxũ te ikujahêc ata icahê na jỹ, ne ite me ato hajỹr xà to imã hahkre. ¹⁷Ne Mojxe xwỳ te me amã incaca xà te hajỹr ata rer, na quê ha jũmjê ajkrut ne jũm te ampo ton xà ata na me hõmpu, ne cute me hõmpun xà ata na ajwar ajpẽan kôt me harẽn na, quê ha me amã ampeaj kam ri cute ton. ¹⁸Ita jĩkjê na wa Inxũ te ikujahêc ata me ajwar me ijũjarẽn xà caxuw me ipijakrut, cwỳrjapê ca ha atỳj ite amji jarẽn xà itana me ikampa — hane.

¹⁹Mã me cumã:

— Jõ ri mã apãm ita? — hane. Mã Jeju me cumã:

— He me apê Inxũ jahkre kêatre, ne hanea ne me apê ijahkre kêatre, quê ha me amã ijahkre pej na mã, quê ha hanea ne me amã Inxũ jahkre pej — hane.

²⁰Ne por cute Pahpãm to amji kam me hapac xà jũrkwa kam, cute me cumã ihpore to cuprõn xà ata cahê na, pê Jeju me cumã hũjarẽn xà itajê to awjarẽ. Mã nee cute mehpro ne me haxàr nare, me hacjên xà kam. Ampo na? Pê cormã nee cute mehpro xà jõ amcro hỹrmã cator nare, na pê.

Pê Jeju pahhi catêjê cunea mã amji jarẽ

²¹Mã Jeju te hipêr me cumã amji jarẽn to:

— He wa ha ma tẽ, ca ha ate me ipupun prãmte, tee ame ijapê, ne nee me ipupun nare. Ampo na? Jũ wỳr ca me anõ, por wa ha curi tẽ ata ri, ikôt acato. Na ca ha ita ri ame apa, ne ca ha atỳj me akên itajêa kam ame ty. Ampo na? He Pahpãm te nee me amã me akên itajê to impej ne to tojnõ nare ata kam, ca ha ame ty — hajỹr.

²²Mã Juta catêjê ajpẽn mã me harẽn to:

— Jũ kam mã quê ha ajte tẽ? Cu ha nee hipêr me hõmpun nare? Xà quê ha ajkĩ amji cura? — hane.

²³Mã Jeju me cumã:

— He me apê pjê kam me apa catêjê, ne quêt ipê kỳj pê, côjkwa kam Pahpãm na mehkwỳ, na ri nee ipê pjê kam me akwỳ nare. Ne ate amji kam me gapac xà itajê pê pjê te amji kam hapac xà, ne ite amji kam ijapac xà pê ri kỳj pê, côjkwa kam, Pahpãm te amji kam hapac xà. ²⁴Ca ate nee ite me amã amji jarẽn xà ita to amji mã me hajỹr nare, cwỳrjapê wa ite me akên atajêa kam me atyc na me amã harẽn. Ca me ate, por Pahpãm te ajpên ikujahêc ata to amji mã me hajỹr nare, ne amji mã me ito ahimpej nare na, ca ha atỳj me atyc partu, ne nee hacpỹa mã me atĩr ne Inxũ cahê na me akrĩ nare — hajỹr.

²⁵Mã cute me Jeju cukij to:

— Ne mẽr me anõ mã ca? — hajỹr. Mã Jeju me cumã amji jarẽn to:

— He ipê, por pê wa mam ramã me amã amji jarẽ ata, nepa wa cormã. ²⁶Ne wa ha cormã, hipêr me amã me ate me akên ton itajê cunea jarẽ. Ne nee wa ahte cama me amã me akên xà itajê to icakôc to ipa nare. Ampo na? He wa, por Inxũ Cati pê cute amji jarkwa par catê, ne catyt kam ipa, ne ajpên cute ikujahêc ata jarkwa to, wa pjê kam mehkrĩ atajê cunea mã icakôc to ipa. Ne wa ha itỳj jũ caxuw amjia kôt me amã me akên xà ton itajê cunea jarẽ — hane.

²⁷Pê nee cute me cumã côjkwa kam Hũm to ihcakôc xà ata na me hahkre pej, ne me kam hapac nare. ²⁸Cwỳrjapê pê Jeju me cumã amji jarẽn to:

— He ca ha jũ caxuw, ipê me Ahàkà te me hũmre na amji jahkre, mã cute pĩ na menxôr na me hõmpu, ne cormã me ijahkre pej pej. Na wa nee amjia kôt ampo itajê ton to ipa nare, ne Inxũ te ahna imã harkwa ne to imã hahkre atajê to pit mã ijàpên to ipa. ²⁹Ne ampo na ri ajpên cute ikujahêc ata nee amji pê irer nare, ne ihtỳj apu icahê na ipa? Wa cumã cute amji mã ampo na prãmti xà atajê to pit mã ijàpên to ipa na ri — hane.

³⁰Ne Jeju te ihcakôc xà to hajỹr jirô pê mã ri me hàhtôa te cupê Pahpãm kra na amji mã me to ihhimpej kam mehtẽm.

Jeju pê me pahcunea pytàr catê

³¹Mã Jeju te Juta catêjê kwỳ te amji mã me to ihhimpej kam mehtẽm atajê mã:

— Ca ha ate amji mã me ito ahimpej kam me to acrà na, ca ha me apê ikôt me apa catêjê impej pit. ³²Na ca ha me ite amji kam me ijapac xà impejti itajê cunea jahkre pej partu. Na ca ha nee me apê cama me jũm jarkwa kôt me cumã hàpên catêjê atajê pyràc nare, ne atỳj quêt ame apa — hajỹr.

³³Mã me cumã:

— He me ipê Aprãw xwỳ tàmxwỳ tàmxwỳ, mã nee rỳ jũ caxuw jũm te amji mã me ito cama me harkwa kôt me cumã hàpên catêjê nare, ne wa itỳj ame ipa, nõ na mã ca ajte jũm pê ate me ipytàr na amji jarẽ? — hane. ³⁴Mã Jeju me cumã:

— Jũ wỳr quê cama jũm pê me cumã hàpên catê ata apu hàpên to mõ, ne amjia kôt hicu. Quê ha hõ pahhi cute hicu na cumã harkwa, quê ha cormã hicu. Ita jĩkjê na mã, me pahcurê xwỳn pê Xatanaj me ato hane, ne ihtỳj cormã me ato ihhimpej ita kam, ca nee me akên ton jicu nare. Ne ampeaj kam wa me amã awjarẽ, wa nee ame amã ihêj xi jarẽn nare. ³⁵Ne ihnõ xwỳjê te hajỹar he. Quê ha nee cama me hõ pahhi jarkwa kôt me cumã hàpên catêjê nõ hõ pahhi jũrkwa kam ihkrĩ kam incrà nare. Ampo na? Quê ha ramã hõ pahhi mã ihkĩn nare, quê ha ihtỳj hũrkwa tête cator, ne jũ kam ihkujate. Ne quêt ihkra ata quê nee amji tête cator nare, ne nee jũm mã ihpore na to hàhpan nare. Ampo na? Cupê ihkra, na quê ha hũrkwa kam ihkrĩ rohnỳtti mã. ³⁶Ne ipêa ri Inxũ Cati kra. Nãmri wa ha itea me acurê xwỳn pê Xatanaj pê me apytàr na, ca ha atỳj cama ame apa rohnỳtti mã, quê ha nee iràn xà na hipêr jũm me ato ihhimpej nare.

Pahpãm pê me pajõ Inxũ Cati

³⁷— He ampeaj kam ri me apê me panquêt xwỳ Aprãw tàmxwỳ tàmxwỳ, wa ramã ite me gahkre pej. Nõ na mã ca ajte ame icuran prãm. Ne mẽr ampo na mã ca ame icuran prãm? Nee mã ampo na nare, ca ma ame ite me amã ampo to hahkre xà itajê caca, na ca ame icuran prãm. ³⁸Ne Inxũ te imã ampo jahkre, ne imã to hahkre xà atajêa na wa to icakôc to ipa. Ne me amã ajtea mã, me apãm pê Xatanaj ata ihkrĩ, ne me ato ihhimpej. Na ca ihkôat me amji kampa, ne atỳj me ampo kên ton to me apa — hane.

³⁹Mã me Jeju mã:

— He me ipãm pê Aprãw xwỳ — hane. Mã Jeju me cumã:

— Quê ha me apê Aprãw xwỳ kra na mã, ca ha cute amji kam hapac xàa to amji kam me gapac to me apa. Ne imãa, nee me apê ihkra nare. Ampo na? Ca nee me cute amji kam hapac xà to me amji kam gapac nare. ⁴⁰Na wa ite ampeaj kam me amã Inxũ te imã ampo to hahkre na harẽn. Atajê jarẽn cwỳrjapê mã, ca ame icuran prãm. He pê Aprãw xwỳ nee jũ caxuw jũm pejti curan prãm nare. ⁴¹Ne ajteare mã, Inxũ Cati kaj na me apãm te me amã ampo ton to hahkre xà atajêa mã, ca me ton to me apa he — hane. Mã Juta catêjê Jeju mã:

— Ne nee me ipê jũm mã ajteare mã hũm ata nare. He Pahpãm ita pê ri me ipãm, wa me to amji mã me ijõ Pahpãm, ne me ipê mehkra impeaj wa me — hane.

⁴²Mã Jeju me cumã:

— Hamreare, me apê Pahpãm pê Inxũ Cati kra nare. Quê ha me apê Pahpãm kra na mã, quê ha ihtỳj me amã ikĩn. Ampo na? He ihpĩan wa icator. Ne nee wa amjia kôt apu ipa nare, ne cute amji kam hapac xàa to wa apu ipa. Ne cutea ri ajpên ikujahêc. ⁴³Ne ampo na mã ca nee me icakôc xà itajê impar jahkre pej nare? Nee mã ampo na nare. Ca nee caxwãm catia mã ito amji kam me gapac prãm nare. Cwỳrjapê ca ha nee me icakôc xà itajê impar jahkre pej nare. ⁴⁴Ne me apê Pahpãm curê xwỳn pê Xatanaj ata kra, na ca cumã ampo kĩnti itajê to pit mã me gàpên to me apa. Ne cute amji kam hapac xà ato, ca me amji kam gapac to me apa he. Ne pjê te amji ton pê mã, pê ramã me apãm ita mehcuran kam tẽ. Ne nee cupê catyt kam, ampeaj kam ampo to ihcakôc catê nare, ne amji cãmtàa rũm ri cupê ampo cunea to ihhêj xi to ihcakôc to ipa catê. Ne cupê ampo cunea hêj xi pãm, na ri ampo hêj xi xà to pit mã ihcakôc to ipa. Ne rỳ jũ caxuw ampeaj kam ampo to ihcakôc nare. Ne ramã cute me acaxuw incaca xà ita ton to amji pyràc tu. ⁴⁵Ne wa quêt catyt kam, ampeaj kam ampo hêj xi xà nare to ijũjarẽn to ipa, ca ampo ita na ajte ma ame ipar caca. Ampo na? Ca nee caxwãm catia mã ito amji mã me ahimpej, ne me ipar nare to prãm to mã ca ame hane. ⁴⁶Ne gapacta ne ite ampo to kên japê ame amji cukij, ca ha nee me anõ amji mã ite ampo to kên xà nõ na ijarẽn nare. Ampo na? He wa rỳ jũ caxuw ite ampo kên ton nare. Na wa hãn ne catyt kam ampo atajê jarẽ, ca ma ajte ame ipar caca. Ne mẽr ampo na mã ca ajte nee amji mã ito me ahimpej nare? ⁴⁷Ne me cupê Pahpãm kra catêjê ihtỳj amji mã me harkwa cunea na me kampa, ne mempar to kênre nare. Ne me ca nare, nee me apê ihkra nare, na ca ma amempar caca — hane.

Pê Jeju Aprãw xwỳ pupu

⁴⁸Mã me Jeju mã:

— Nee mã apê Juta catêjê kra impeaj nare, ne me ikĩnte apê Krĩrĩtpej jõ pjê catêjê nõ, ne ihpĩan pê ca acato, ne akam ampo carõ kên te hipu tu — hane.

⁴⁹Mã Jeju me cumã:

— Hamreare, ikam quêt ampo carõ kên hamreare, na wa quêt amji mã, por Inxũ te ajpên ikujahêc ata pit cupahti to ipa, ne ma haprỳ to cati to ipa. Ne me ca nare, ca ajte nee amji mã me icupa nare, ne cama me ito icrire to prãm. ⁵⁰He wa nee cute amji mã me icupa to prãm to icator nare cakrô, quê ha ihtỳj Inxũ Cati ata, por nee amji mã me icupa nare itajê cukij, ne mehkên mã me cumẽ. ⁵¹Ne ampeaj kam wa ha me amã awjarẽ. Por quê ha me ijarkwa kampa, ne amji mã me icupahti to me ipa atajê, quê ha jũ caxuw amehtyc nare, ne mehtĩr ita na ame ipa rohnỳtti mã, Pahpãm cahê na — hane.

⁵²Mã me cumã:

— Hamre, ita caxuw wa ite me akam ampo carõ kên na me gahkre pej pejtu. Ne pê ramã Aprãw xwỳ me, por me cupê Pahpãm jarkwa to mehcakôc catêjê catia atajê mehtyc partu. Nõ na mã ca ajte amji jarẽn to: “Quê ha jũm amji mã ikampa, ne cute ijarkwa kôt ipa na, quê ha nee jũ caxuw ihtyc nare” hane? ⁵³Pom me ipãmjê pê Aprãw me, cute Pahpãm jarkwa to mehcakôc catêjê atajê ihtỳj ramã amehtyc par ita? He xà ajkĩ me hirôa pê acati? Jũ mã mã ca apu amji to, amji kam gapac xà itajê to? Mõrmõ ca atỳj apu amji catia na amji cãmjĩ? — hajỹr.

⁵⁴Mã Jeju me cumã:

— He wa ha ipyxit peaj ne amji mã ipejti to icakôc to ipa na mã, quê ha icakôc xà atajê kôt hamreare ne. Ne pom ca Inxũ to amji mã me Apãm ata ri ihtỳj ijaprỳ to cati to mõ. ⁵⁵Ne ikĩnte me apê Pahpãm jahkre kêatre, ne imãa ri quêt hahkre pej. Wa ha ipê hahkre kêatre na amji jarẽ na mã, wa ha ipê me apyràac ne ampeaj kam ihêj xi. Ne nee ite hajỹr nare, ne itỳj quêt imã hahkre pej, na wa amji mã harkwa na kampa, ne amji mã hũpahti to ipa. ⁵⁶Ne me aquêt xwỳ pê Aprãw ata pê ramã icator xà ata na ipupu ne ijahkre pej, cwỳrjapê pê ampeaj kam hũrên hakry — hane.

⁵⁷Mã me Jeju mã:

— Pỳhàpà? Xà pê ca atỳj ajte Aprãw xwỳ pupu? Pom nee cormã ana caku te xĩncwẽnta nare ita? Ne cormã atuwre, nõ na mã ca ajte ate Aprãw xwỳ pupun na amji jarẽ? — hane.

⁵⁸Mã Jeju me cumã:

— He wa ha ampeaj kam me amã amji jarẽ. Pê wa ramã Aprãw pỳm xwỳjrea na apu ipa, ne cormã apu ipa rohnỳtti mã — hane. ⁵⁹Mã Juta catêjê te mempar, ne caxuw kẽn to me amji tỳj, cute me to kam hũcapêr, ne to mehcuran prãmte. Ampo na? Cupê Pahpãm pyràac ne rỳ pêa mã mam ipa rohnỳtti mã na cute amji jarẽn, na ri kẽn to amehcuran prãm. Mã me cupê Jeju pimxur ne ma Pahpãm jũrkwa pê cator ne tẽ.

Pê Jeju jũm to tũm ita caprã

¹Ne Jeju cormã mõr kwỳa kam, cute jũm to tũam na ihpỳm ata pupun. ²Wa me ipê ihkôt me ipa catêjê te ahna mehcukij, ne me cumã:

— Me ijõ Pahhi, ampo na mã pê hũmre ita into tũm ita na ihpỳm? Xà pê ajkĩ ihkên xà nõ to jahpan xà na mã cute hajỹr? Nare, xà ajkĩ hũm me inxi te ihkên xà nõ ton jahpan xà na mã into tũam na ihpỳm? — hajỹr.

³Mã Jeju te me ipar ne me imã:

— Nee mã ihkên nõ cwỳrjapê into tũm nare, ne nee mã hũm me inxi kên nõ cwỳrjapê cute hajỹr nare. Ampo na ri into tũm? He Pahpãm te hũmre ita kôt carôt tỳjti to ipipẽ to prãm to ri, cute to into tũm. ⁴Pom hãn ne ihtỳj amcro kam me hàpên xà to me hàpên to me ipa, ne caxwari nee me hàpên nare. Ita jĩkjê na mã ite hajỹar. Na wa ha cormã ita ri pjê kam apu imõr reria mã itỳj, por cute ajpên ikujahêc ata mã, apu ijàpên to ipa. Ne wa ha ma jũ caxuw hacpỹ mã tẽ, ne nee hipêr ita ri cumã ijàpên nare. ⁵Ne pom pyt me parĩt xà caxuw me pamã pjê cujro, cu me rĩt, ne me ampo pupu ne me hahkre pej, ita jĩkjê na mã ipê me cumã Inxũ te amji kam hapac xà cunea to hahkre catê, mãr quê mehcunea me hahkre pej — hajỹr. ⁶Hõ, cute ita jarẽn to hajỹr jirô pê mã ri cute pjê kam harcô mẽn, ne to pjê to incrire ne to ihtô, ne to carẽc ne cumã into na to ihtẽm, ne cumã harkwa to:

⁷— Tẽ ne Kujahêc jõ cô kam akuc cuhhõ — hajỹr. Mã into tũm ata te mõr ne ihkuc cuhhõn, ne hacpỹ ne amji jaxàr, ne ramã ampo cunea pupun to mõ. ⁸Mã cahi na mehkrĩ catêjê me, hàhwỳr na cute me hõmpun pejtu atajê te me hõmpun, ne ahna me ajpẽn cukij to:

— Xà into tũm ihkrĩ ne me pahna ahwỳ ata mã? — hajỹr.

⁹Mã mehkwỳ me cumã:

— He taa mã ri! — hane. Mã mehkwỳ me cumã:

— Quê nare! Taa mã nare! — hane. Mã mehkwỳ me cumã:

— He mã ajte cupê hũràcti — hane. Mã me cumã amji jarẽn to:

— He pa wa! — hane.

¹⁰Mã cute mehcukij ne me cumã:

— Ne mẽr jũ mã mã ate ne atỳj rĩt? — hajỹr.

¹¹Mã me cumã:

— He jũm japrỳ te Jeju ata te ri harcô to pjê incrire ne carẽc na ton, ne ito na imã to ihtẽm ne imã: “Tẽ ne Kujahêc jõ cô kam ca akuc cuhhõ” hane. Wa ma mõ ne ite ikuc cuhhõn, ne amji jaxàr, ne ramã ampo cunea pupun to imõr pyrentu — hane.

¹²Mã ahna mehcukij ne me cumã:

— Jõ ri mõrmõ jũm xũmre ita apu mõ? — hane. Mã me cumã:

— Pỳpỹn — hane.

Pê Parixêw catêjê me ahcukij

¹³Mã ma me cupê Parixêw catêjê wỳr, por pê mam into tũm ata to me mõ. ¹⁴Ne por pê amcro nõ na Jeju carẽc to ihtô, ne hũmre into tũm ata na to tẽ, ne hacpỹa mã cumã irĩt to impej jõ amcro ata kam pê mehkôt xà jõ amcro. ¹⁵Mã Parixêw catêjê kwỳ te ahna mehcukij ne me cumã:

— Jũ mã mã cute aton ne acaprãr? — hajỹr. Mã me cumã:

— Pjê kam cute harcô mẽn ne to carẽc to ihtô, ne ito na imã to ihtẽm, wa ma tẽ ne ite ihcuhhõn ne irĩt pej pyrentu — hajỹr.

¹⁶Mã Parixêw catêjê kwỳ ajpẽn mã me harẽn to:

— Por jũm te ita ton ata pê nee Pahpãm tekjê nare. Xà ajkĩ Pahpãm jarkwa kôt mã cute hàpên xà ita to hajỹr? Ne mẽr ampo na mã nee me pahkôt xà jõ amcro ita pupun, ne amji mã hũpa nare, ne ihtỳj apu ahna apê? — hane. Mã mehkwỳa nõ te me cumã harẽn to:

— Xà quê ajkĩ jũm kêanre ata ihtỳj carôat to ampo pihho catia pejti atajê nõ ton to hane? — hajỹr. Ne ajpẽn mã me harẽn ita cwỳrjapê cute amji to me ipicapôn. ¹⁷Mã hipêr Parixêw catêjê atajê te ahna mehcukij ne me cumã:

— Ca ate cute amã ato tũm caprãr na amji jarẽn, nejũ mã mõrmõ ca to amji kam gapac to? — hajỹr. Mã me cumã:

— Imã cupê Pahpãm jarkwa to ihcakôc catêjê nõa ri — hane.

¹⁸Mã Juta catêjê jõ pahhi kwỳ te nee amji mã, jũm te into tũm caprãr, mã hacpỹa mã irĩt na, amji mã me to hajỹr nare. Cwỳrjapê ri cute hũm me inxi na me hàhwỳr, cute ahna mehcukij prãmte. ¹⁹Mã hỹrmã me cator, mã cute ahna mehcukij to:

— Xà me akra mã ita? Pê ca into tũm ita na ihpỳm na me imã harẽ, nõ na mã ajte ihtỳj rĩt? — hajỹr.

²⁰Mã hũm me inxi atajê me cumã:

— Wa cupê me ikra na ite me hahkre pej, ne pê into tũam na ihpỳm. ²¹Ne pom jũm te caprãr, mã hacpỹa mã irĩt ita na ri, me ipê hahkre kêatre. Ne ramã ihkàhtu. Mehcukij, quê ha taa me amã amji jarẽ — hane.

²²Ampo na pê hũm me inxi me cumã harẽn to hane? Nee mã ampo na nare. Quê ha jũm te Jeju pê, por pê Crixtô to Pahpãm awjahkre ata jarẽn pejti to harẽn na, quê ha ma cute me cuprõn xà pê me jũm cator, quê ha jũ caxuw hacpỹ ne amji jaxàr nare na, cute me hahkre pej. Na ri nee me kam mare mã me cumã Jeju pê me pahkritxwỳ jarẽn xà impejti nõ jarẽn nare. ²³Cwỳrjapê pê me hũpate hũm me inxi me cumã harẽn to:

— Ramã ihkàhtu, mehcukij, quê ha taa me amã amji jarẽ — hane.

²⁴Ne hipêr cute me hũmre into tũm ne hacpỹa mã irĩt ata na hàhwỳr, ne me cumã:

— Me imã ahêj jicu ne Pahpãm kam mare mã ampeaj kam me imã gũjarẽn na amji to. Ampo na? He wa ite me Jeju kêanre na me hahkre pej — hajỹr.

²⁵Mã into tũm ne hacpỹa mã irĩt ata me cumã:

— Pỳpỹn, ipê Jeju kêanre ita na hahkre kêatre, ne ampo pijakrut ita na ri imã amji jahkre pej he, mam ito tũm, newa itỳj ita caxuw rĩt — hane.

²⁶Mã hacpỹ ma mã cute mehcukij to:

— Jũ mã ri cute aton ne amã ato tũm ita to impej? — hajỹr.

²⁷Mã hipêr me cumã:

— Wa ite ramã me amã amji jarẽn, ca ma ame ipar caca. Ne mẽr ampo caxuw mã ca hipêr ahna me icukij? Xà ca ha ajkĩ hanea ne amji to ihkôt me apa catêjê na me amã amji to prãm? — hane.

²⁸Mã cute me hũn kam ihtẽm, ne me cumã:

— He apêa ri ihkôt apa catê, ne me ipê ri Mojxe xwỳ te amji kam hapac xà kôt me ipa catêjê. ²⁹Ne wa ite me Pahpãm te Mojxe xwỳ mã ihcakôc, ne cumã ampo to hahkre na me hahkre pej. Ne jũm xũmre ita, wa nee ite jũ rũm cator na me hahkre pej nare — hajỹr.

³⁰Mã me cumã:

— Pỳhàpà! Xãmte me apê jũ rũm cator xà ita na hahkre kêatre? Cakrô mã ihtỳj cute icaprãr, wa hacpỹa mã itỳj rĩt. ³¹He me pahcunea mã Pahpãm te mehkên catêjê impar nare na me pamã hahkre pej. Ne por amji mã me Pahpãm cupa, ne me cumã, cute ampo na ihprãmti xà ton to me ipa atajê ri, ihtỳj quêt me kampa. ³²Ne cu rỳ jũ caxuw pjê te amji ton pê mã, me pahnõ te jũm te jũm to tũam na ihpỳm ata caprãr na me harẽn par nare. Mã ihtỳj Jeju te icaprãr, ne imã ito to impej. ³³Xà quê ajkĩ Pahpãm ihkujahêc nare, quê ihtỳj ajkĩ ampo itajê nõ to? Hãpà, ne imãa ampeaj kam ri Pahpãm te ihkujahêc — hane.

³⁴Mã cute mempar, ne me cumã harkwa to:

— Pê ca apỳm pê akên ton kam tẽ, nõ na mã ca ajte cormã me ipê pahhi catêjê mã ampo to hahkre prãm? Me ipê ahna ihkaj na! — hajỹr. Ne ma cute põ mã cute me cuprõn xà jũrkwa pê me into tũm ata to cator. Cwỳrjapê quê ha nee jũ caxuw hipêr cute me cuprõn xà ata mã hàr nare.

Me cupê Pahpãm te amji kam hapac xà jahkre kêatre atajê

³⁵Mã Jeju te, cute me cuprõn xà jũrkwa pê põ mã me hũmre ata cator na harẽn par. Na ri apu hapê ne ahna cator ne cute ihcukij to:

— Xà ca ha ajkĩ atỳj Pahpãm kra to amji mã ahimpej? — hajỹr.

³⁶Mã cute Jeju mã harkwa to:

— Ijõ Pahhi, jũm pê mã Pahpãm kra ita? Wa itỳj amji mã to ihimpej — hajỹr.

³⁷Mã Jeju te cumã amji jarẽn to:

— Pom ca ipupu ita! He pa wa amã icakôc — hajỹr.

³⁸Mã hũmre ata te Jeju kĩnte amji crire na Jeju mã amji jarẽn prãm to, cuna mã ihkõn krã na hỹr, ne cumã:

— Wa ha itỳj ato amji mã ihimpej — hajỹr.

³⁹Mã Jeju te cumã hũjarẽn to:

— He wa nee mento tũm caprãr to pit mã pjê ita wỳr icator nare. Ne ite mempej te amji kam me hapac xà me, mehkên te amji kam me hapac xà pupun prãmte wa icator. Ne wa itỳj mento tũm caprã, mãr quê hacpỹa mã me irĩt pej, ne ihtỳj me ampo cunea pupun to me ipa. Ita jĩkjê na mã wa itỳj me cumã Pahpãm te amji kam hapac xà to hahkre to ipa, mãr quê me hahkre pej, ne ihtỳj ihkôt me ipa. Mã mehkwỳ ihtỳj, cute ramã me Pahpãm jarkwa cunea jahkre pej na ame amji cãmjĩ, atajê pê ihhêj rũm mento tũm pyràac. Ampo na? He nee cormã me cumã Pahpãm jarkwa jahkre pej nare, na wa ite me cuna mã icakôc to prãm to, wa mehwỳr icator — hajỹr.

⁴⁰Mã curi me cahê na Parixêw catêjê kwỳ ihcuhhê atajê te me Jeju cukij to:

— Pỳhàpà! Xà mõrmõ ajkĩ hanea ne me ipê mento tũam pyràac, ne me ipê Pahpãm jarkwa jahkre kêatre? Hãpà! He wa itỳj ite me Pahpãm jarkwa jahkre pej — hajỹr.

⁴¹Mã Jeju me cumã:

— Quê ha jũm to tũm amji jarẽn to: “Me anõ itehcajpa, jũ wỳr wa ito tũm ita kam ahte mõ” hane, ne me kam mare mã kre kam ihpỳm na, quê ha nee taa amji curê caxàr nare. Ne me apê Parixêw catêjê te nee me hajỹr nare. Me apê jũm to tũm te amji jahkre kêatre ata pyràac. Ne ihtỳj irĩt na amji jarẽ, ne ma jũm te ihtehcajpar na apu ihcaca, ne amjia kôt kre kam ihpỳm ata pyràac. Ne ca me amji jarẽn to: “Ramã me imã Pahpãm jahkre pej” hajỹr cakrô, cormã me apê Pahpãm jahkre kêatre. Cwỳrjapê ca rỳ ate me amji curê caxàr ne me akên mã me axàr — hane.

Jeju pê me pajamãr catê

¹Mã Jeju te hipêr mehcunea mã harẽn to:

— Wa ha me amã ijũjarẽn xà nõ ita jarẽ. Ca ha ihkôat me ijahkre pej. He Pahpãm himpej xà ata pê ihhêj rũm kwỳc kam, cute me carà cahàcre hôhti jamãr xà ata pyràac. Ne hỹrmã harkwa pyxit peaj. Ne por quê ha jũm nee carà cahàcre jõ kwỳc jarkwa na hàr nare, ne ihtỳj intoj ne hàr ata pê ri me hàhkĩj xi, ne cupê me hàprêa kam me cupê ampo cwỳr catê. ²Ne por quê ha harkwa na axà ata pê ri carà cahàcre hôhti jamãr catê. ³Quê ha harkwa jihê rẽn catê caxwãm pê jỹ ata ihtỳj cumã harkwa jihê mẽ, quê ha axà ne hõ carà cahàc mã haprỳa na akij, quê ha ihtỳj hõkre kampa. ⁴Ne hỹrmã pra, quê ha ma kwỳc pê to cato, põ mã, ne ma mam cumã mõ, quê ha ihtỳj ihkôt ipa. Ampo na? Ihtỳj hõkre kampa na ri. ⁵Ne jũ wỳr quê ajteare mã jũm kôt pra. Quê ha ma cama jũ kam cupê pra. Ampo na? Jũ wỳr quê cute jũm cahkrit jõkre par nare ne hahkre pej nare kam ihkôt pra — hajỹr.

Jeju pê Pahpãm wỳr me pancjêj xà jõ pry

⁶Hõ, Jeju te me cumã hũjarẽn xà ita to hajỹr. Mã nee cute mempar ne me hahkre pej nare cormã, por cute me cumã ampo jarẽn xà ata na.

⁷Cwỳrjapê ri hipêr Jeju te me cumã hũjarẽn xà ita kôt harẽn to impej ne me cumã:

— Wa ampeaj kam me amã amji jarẽ. He ipê, por harkwa na carà cahàcre incjêj xà ata pyràac. Cwỳrjapê wa ha nee me hỹrmã me curê xwỳn cjêj na me hamãr, quê ha me hỹrmã mencjêj nare.

Jeju pê me pajõ Pahhiti impeaj

⁸— Ne por quê ha icumam ramã me pra atajê pê ri me hàhkĩj xi, ne me cupê me hàprêa kam me cupê ampo cwỳr catê, mã me ikwỳ pê carà cahàcre pyràc atajê te nee me hõkre par nare. ⁹Ỹhỹ, ipê Pahpãm te me hamãr xà ata wỳr harkwa. Ne quê ha jũm ina Pahpãm wỳr axà ata, quê ha ampo kên cunea pê amji pytà. Quê ha cupê hõ parxa pyràc ne ihtỳj acjêj ne hapôj, ne apu hàpàn to ipa. ¹⁰Ne ikĩnte me hàhkĩj xi atajê quê ha cama me hàhkĩj me, cute me carà cahàcre hôhti curan ne me to hamre to prãm to, quê ha hỹrmã me pra. Ita jĩkjê na mã me ikwỳ curê xwỳn me hỹrmã pra, cute me to kên prãmte. Ne pa, wa quêt ajpên mehwỳr icator, cute catyt kam amji to me ipijapar xà impejti cunea to me amji to ipijapar prãm to.

Jeju pê me pajamãr catê impejti ata

¹¹— Ipê me ikwỳ pê carà cahàcre hôhti jamãr catê impeaj ata pyràc. Ne ipê cumã cute amji kam hapac xà jõr catê, na wa itỳj me hũtàr prãmte ityc to prãm. ¹²Ne por ihpore na pit mã me hàpên catêjê atajê ikĩnte nee me carà cahàcre jamãr to impejti nare. Ampo na? Carà cahàcti hôhti atajê pê nee me hõ tekjê nare. Cwỳrjapê quê ha rop cahàc jàprêhti nõ ihwỳr cato ne apu cucrà, quê ha cute me hamãr to kêanre atajê hũpate nee me to amji japackre nare, ne me cumã hikra, ne ma ame pra. Quê ha pea rop cahàcti jàprêhti ata carà cahàcre hôhti atajê kam tẽ, ne ihtỳj apu cucrà ne ihcura. ¹³Ampo na? Ihpore na pit mã me apê, na ri nee me cumã carà cahàcre hôhti jamãr to impej prãm nare.

Jeju me mehkwỳ mã ajpẽn jahkre pej

^14-15— Ne ipê carà cahàcre hôhti jamãr catê impejti ata pyràac na Inxũ mã ijahkre pej, ne hanea ne imã Inxũ jahkre pej. Ita jĩkjê na mã ite hajỹar, ne imã me ikwỳ pê carà cahàcre jahkre pej, ne hanea ne me cumã ijahkre pej. Na wa itỳj me hamãr to impejti to prãm to ityc to prãm. ¹⁶Ne mehkwỳ pê itekjê atajê, nee ite me hamãr xà ita mã cormã mencjêj nare. Na wa itỳj hanea ne ajpên amji wỳr me to ijàhtêp prãm. Na wa ha me cumã akij, quê ha me ijõkre kampa, ne mehkwỳ me ina me cuprõ, ne ajkam me pyxit peaj. Na wa ha ipê me hamãr catê pyxit peaj ata.

^17-18— Ne pê Inxũ ramã imã harkwa to: “Ca ha ate jũm te acuran na hamãr nare na, quê ha nee acuran nare. Nãmri ca ha ate cute acuran na amji na hamãr na, quê ha ihtỳj acura, ca ha atỳj hacpỹa mã atĩr. Xà caxuw wa ite amã icarôt cunea jõr, ne ate hajỹr xà na ri imã ato prãm” hane. Wa ite Inxũ jarkwa kôt hajỹr, cwỳrjapê ri cumã ikĩn — hajỹr.

Jeju to cute me amji kam hapac xà pijakrut

¹⁹Mã Juta catêjê te me ita par, ne hipêr amji to me ipicapôn. ²⁰Ne me hàhtôa ne ajpẽn mã me harẽn to:

— Apu into kam waj! Ne kam ampo carõ kên! Ampo kôt mã ca, cute me amã ampo jarẽn xà itajê na ame kampa? — hane.

²¹Mã mehkwỳ ajpẽn mã me harẽn to:

— Jũ wỳr quê jũm kam ampo carõ kên quê ihcakôc xà to hane! Xà quê ajkĩ jũm kam ampo carõ kên quê ihtỳj jũm to tũm caprãr to hane? — hane.

Pê Juta catêjê kwỳ ma ame Jeju caca

²²Ne pê hacpỹa mã Pahpãm jũrkwa to impej xà jõ amji kĩn na, Jeju Krĩpinkrên kam apu mõ, ta jõ putwrỳa kam. ²³Pê Jeju Pahpãm to amji kam me hapac xà jũrkwa jarkwa mã mencjêj xà cwỳrpê hàmkrã xà japrỳ te Xarômãw Jõ Amkrã ata krac ri apu mõ. ²⁴Mã Juta catêjê kwỳ te Jeju na me cuprõn, ne ahna me ipixêr, ne cute mehcukij to:

— Ne rỳ pêa mã wa tee ate me imã amji jarẽn, wa ite me apar pej japê tee me akampa. Ne jũ caxuw ca ha me imã amji jarẽn to impej, wa me akampa ne me gahkre pej to impej? Ne me imã amji jarẽ, xà ampeaj kam ri ajkĩ apê Crixtô pê, por pê Pahpãm me imã ato awjahkre ata mã ca? — hajỹr.

²⁵Mã Jeju te me cumã amji jarẽn to:

— Wa ite ramã me amã amji jarẽn, ca nee ate ijũjarẽn xà ata kôt amji mã ito me ahimpej nare. Ne pom wa Inxũ carôt kôt ijàpên xà pihho pejti ton to ipa itajê, hanea ne ihtỳj ito awjarẽ. ²⁶Ca nee ajte ikam me gapac nare. Ampo na? Me apê me ikwỳ nare, na ca nee me ikam gapac nare. ²⁷Ne quêt me ikwỳ atajê pê carà cahàcre hôhti atajê pyràac, ne ipê me hamãr catê impejti ata pyràac. Na wa ite ramã me ikwỳ pê me ijõ parxa kwỳ pupun pejtu, mã ihtỳj me ijõkre kampa, ne ma ikôt me ipa. ²⁸Cwỳrjapê wa ha nee ampo te me to hamre na me hamãr nare, quê ha Pahpãm cahê na amji to me ipijapar rohnỳtti mã, ne nee jũ caxuw Inxũ pê me ipictor nare. Ne jũ wỳr quê jũ caxuw ijũhkra pê jũm mehnõ capa. ^29-30Ampo na? Por Inxũ te imã me hõr ata ri quêt mehcunea carôt jirôa pê carôt tỳj, cwỳrjapê quê nee jũm hũhkra kam cupê jũm caxàr nare. Ne taa mã pê imã icarôt ita gõ, na wa me ipipẽan. Ne quê ha nee jũ caxuw jũm ijũhkra kam ipê jũm caxàr nare — hajỹr.

³¹Mã hacpỹ ma mã Juta catêjê kwỳ te kẽn to me amji tỳj, cute me to capêr, ne me to ihcuran prãmte. ³²Mã Jeju te me cumã harkwa to:

— Wa ite me akam mare mã icarôat to ampo pejti pihho jàhtôa ne ton, por Inxũ te ton xà na imã harkwa atajêa na. Ne mẽr ampo pejti itajê nõ incwỳrjapê mã, ca kẽn to ame ikam gũcapêr prãm? — hajỹr.

³³Mã Juta catêjê te me cumã:

— Wa nee ampo pejti itajê nõ incwỳrjapê apu kẽn to me acapêr prãm nare, ne pom ca apu apê Pahpãm na amji to acakôc, ita to ca ramã apu Pahpãm mãn kêanre. Ne ihkĩnte apê me hũmrea to me hũmre, nõ na mã ca ajte apu amji to Pahpãm to apa — hajỹr.

^34-35Mã Jeju te me cumã harkwa to:

— Pê Pahpãm me panquêtjê mã cute amji kam hapac xà me harkwa gõ, pê me amã ihkàhhôc kam ihhôc. Cu me pahcunea te ihkàhhôc ita kam ihhôc itajê nõ te ihhêj xi xà nõ jarẽn nare na me pamã hahkre pej. Ne catyt kam ampeaj kam hũjarẽn rohnỳtti mã. Ne pê Pahpãm me panquêtjê te me kam hapac xà caxuw me cumã ihkàhhôc ita gõ, ne me cumã:

“Me apê me ikraa to me ikra, cwỳrjapê ri me ate amji kam gapac xà me, ite amji kam ijapac xà pipẽan” hane.

³⁶— Ne pa nare, pê Pahpãm icapi ne ajpên ikujate, ite ate me harkwa ita par na me atehcajpar xà caxuw. Cwỳrjapê ri me panquêtjê jirôa pê icati. Na wa itỳj ipê Pahpãm kra impeaj na amji to icakôc. Ne mẽr ampo na mã ca ame ikam acryc? ³⁷Nãmri wa ha ite Inxũ jàpên xà ton nare na, ca ha nee me ikam gapac nare. ³⁸Nãmri wa ha ite hàpên xà ton na, ca ha atỳj ite Inxũ Cati carôt kôt jàpên xà pihho ton ata kôt me ikampa. Ca ha ate ite me amã ijũjarẽn xà to ijũjarẽn ita na me ikam gapac nare cakrô, ca ha atỳj, pom wa hàpên xà to apê itajê kôt me ikampa. Ne ihkôat ca ha Inxũ me ipipẽan, ne me ipyxit peaj na me ijahkre pej — hajỹr.

³⁹Mã hacpỹ ma mã amehpro prãm cakrô, mã ma me hũhkra pê cator.

Pê Côpijapjêr jõ cô jĩkjêa kam Jeju apu mõ

⁴⁰Ne ma Jeju te amji jaxàr, Côpijapjêr jõ cô jĩkjê wỳr, mãr pê curi Jowãw xwỳ ajco cô kam mehcumrã ata ri. Ne curia apu ipa. ⁴¹Mã me hàhtôa ne hỹrmã me ipa, ne ajpẽn mã me harẽn to:

— Pê Jowãw xwỳ pê me cumrãr catê ata, nee Pahpãm carôt kôt hàpên xà pihho pejti te hajỹrjê nõ ton nare cakrô, pê ihcunea na ihtỳj Jeju jarẽn xà to harẽ atajê, ampeaj kam pê — hane.

⁴²Mã curi me hàhtôa ne cute me Jeju kam hapac, ne amji mã me to ihhimpej to me ipa.

Raxaro tyc xà

¹Pê hũmre nõ ita japrỳ te Raxaro ita xà. Ne pê mehkjêjê pê Marij me Marta mea mã krĩ jacot japrỳ te Mehkênpupunxà jõ krĩ ata kam mehkrĩ. ²Ne Marij ata pê amcro ata na Jeju par kam ampo cacô cuxwati ata jaxwỳ, ne ihkĩa to cumã incrà. ³Mã Raxaro kjêjê cahãj itajê te Jeju mã hũjarẽn to hajỹr xà ata kujahêc he:

— Me ijõ Pahhi, por amã gõ ikwỳ nõ kĩnti ata xà! — hajỹr.

⁴Mã Jeju jũpar ne cute harkwa to:

— Quê ha nee hicu xà kam hà ita ihcuran nare. Ne hà ata kôt quê ha me hàhtôa ne quêt ipê Pahpãm kra carôt tỳjti na me ijahkre pej. Ne hà ata kôt quê ha me hàhtôa ne quêt me Pahpãm carôt tỳjti ata pupu ne amji mã me hũpa — hajỹr.

⁵Ne pê ihtỳj Jeju mã Marta me ihtõj Marij ata kĩn, ne hanea ne cumã Raxaro kĩn. ⁶Mã Jeju te Raxaro xà na harẽn par cakrô, curia hàhhuc xà ata kam apu mõ, ne apu ihkên, ne ahna amcro pijakrut. ⁷Jirô pê mã ri cute me ipê ihkôt me ipa catêjê mã harkwa to:

— Hacme, hacpỹ mã Juta jõ pjê wỳr — hajỹr.

⁸Wa me cumã:

— Me ijõ Pahhi, mãr curmã curi Krĩpinkrên catêjê kẽn to ame acapêr prãm ta? Ca ajte ramã hacpỹa mã amji jaxàr prãm? — hane.

^9-10Mã Jeju me imã:

— Nee ita na cute imã jũ mãn nare, ne jũ wỳr quê jũ na me ito. Pom ca me pyt pupu, mã hapôj ne ma acjêj mã caxwa ata jĩkjê na ri ite hajỹar. Ne wa cormã ite ijàpên xà jipêj nare kam, quê nee jũ na me iton nare. Ne hanea ne cu caxwari me papa, ne pahtỳj me papihur to ame papa. Ne pom pyt me pamã ahcujro, cu kam ame papa, ne me pamã papa xà jahkre pej, ne nee ame papihur, ne me pahkên mã me pancjêj nare. Ita jĩkjê na mã Inxũ te ito hajỹar. Mã Pahpãm te ikrã kam imã ite amji jahkre pej jõr, cwỳrjapê ri imã ampo te amji kam hapac xà cunea jahkre pej, na wa nee ikên mã icjêj nare.

¹¹— Me pajõ ikwỳ nõ Raxaro ramã nõ ne apu gõr cakrô, wa ha itỳj ihcujrõ ne hỹr — hane.

¹²Na wa me cumã:

— Pahhi, quê ha cute nõ ne hõt na, quêt taa nõ ne gõr, ne amji cajpẽ. Ampo na? He cormã me hỹrmã me pahcator xà ita ampỳa mã — hane.

¹³Ne pê tee Jeju ame imã ramã Raxaro tyc na harẽn to hahkre, na wa itỳj amji mã me to hõtxwa mã hõt na amji mã ame to hane! ^14-15Mã Jeju hirãa pê me imã:

— Ramã Raxaro tyc, ne me acwỳrjapêa ri, ampeaj kam hũrên ijakry. Quêt taa ty, wa nee curi apu imõr nare na ri ihtyc. Ne ihkôat ca ha atỳj ito amji mã me ahimpej. Hacme, ne me hõmpu — hane.

¹⁶Mã Tome ita me imã:

— Hacme, me pajõ Pahhi kôt, quê cuxà me pajipej — hajỹr.

Jeju pê me pahto ihtĩr catê

¹⁷Mã ramã cute kẽn kre kam me Raxaro jarêt na amcro te cwat, wa Jeju me, me icator. ¹⁸Mã Mehkênpupunxà jõ krĩ ata ri rec pyxit jĩkjê kam xa, Krĩpinkrên wỳr. ¹⁹Cwỳrjapê pê Juta catêjê hàhtôa ne me cato, cute me Marta me Marij pupun, ne me cupê hũjapê cutor prãmte. ²⁰Mã Marta te Jeju te ajpên hàhtêp to mõr na harẽn par, ne ma hỹrmã tẽ ne cute pry kôt ihcajpar. Pê Marij curia ikre kam jỹ. ²¹Mã Marta Jeju mã:

— Ijõ Pahhi, ca ha ita ri apu mõ na mã, quê ha nee ikjê ipê ihtyc nare, ne ramã ihtyc, ca hakàn pê acator. ²²Cakrô ca ha ahnaa Pahpãm na ahwỳ, quê ha amã ate ampo cunea na gàhwỳr xà atajê gõ — hane.

²³Mã Jeju cumã:

— Quê ha akjê ihtỳj hacpỹa mã me amã ihtĩr — hane.

²⁴Mã Marta cumã:

— Quê ha ampo cunea jamre xà ata jõ amcro kam ihtỳj hacpỹa mã ihtĩr na, imã hahkre pej — hane.

²⁵Mã Jeju cumã:

— He ampeaj kam ri, ipê hacpỹa mã mehtyc to ihtĩr catê. Na quê ha jũm te ihkên ton to ipa na, quê ha ramã Pahpãm mãa jũm ata tyc pyràc. Cakrô quê ha ito amji mã ihhimpej na, wa ha cumã cute amji kam hapac xà tuw pejti gõ, quê ha Pahpãm mã jũm ita ihtĩr rohnỳtti mã. ²⁶Ne por jũm ito amji mã ihhimpej to ipa ata, quê ha nee jũm ata ihtyc ne ihtyc tu nare. Ne ca? Xà ca ha ajkĩ pijamã ijũjarẽn xà ita to amji mã ahimpej? — hane.

²⁷Mã cumã:

— Ỹhỹ ijõ Pahhi, wa itỳj apê Pahpãm kraa to ihkra na amji mã ato hane, ne imãa apê Crixtô pê, por pê Pahpãm pjê ita kam ate me ito ahimpej xà na ato awjahkre ata mã ca — hane.

Pê Marij pê Raxaro tõj Jeju cajpa

²⁸Jirô pê mã ri Marta te amji jaxàr ne ihtõj mã hàkjêr ne kyre pê cumã hũjarẽn to:

— Pajõ Pahhi cator ne cute ana hàhwỳr — hajỹr.

²⁹Mã Marij te harẽn par, ne hãm pyrentu, ne ma Jeju wỳr tẽ. ³⁰Pê nee cormã krĩ mã hàr nare, ne cormã Marta ihcajpar xà ata kam, curia pry kam apu mõ. ³¹Ne pê ramã hõtpê Juta catêjê kwỳ ikre kam ame ipa, cute me Marij jũjapê tête me cumãn prãmte. Ne cute me Marij xãm na me hõmpun, mã hũjarêan kam hãm ne ma tẽ, mã ma ihkôt me pra. Ne pê ihtỳj cute kre wỳr ihtẽm ne kam apu incwỳr na amji mã me to hane.

³²Mã Marij Jeju wỳr cator, por curi xa ata ri, ne ihpar cahê na ihkõn krã na hỹr, ne cumã:

— Ijõ Pahhi, ca ha ita ri apu mõ na mã, quê ha nee ikjê ipê ihtyc nare, ne ramã ihtyc, ca hakàn pê acator — hane.

³³Mã Jeju te Marij cwỳr na hõmpun. Ne hanea ne cute Juta catêjê kwỳ incwỳr na me hõmpun. Ne hõtpê ahna incrycre, ne cumã amji kĩn nare. ³⁴Mã cute mehcukij, ne me cumã:

— Mẽr jõ ri ca ate me hir? — hajỹr. Mã Marij cumã:

— Ajpên mõ ne hõmpu — hane.

³⁵Mã Jeju te ahna kẽn kre pupun ne apu kam amrã.

³⁶Mã Juta catêjê me ajpẽn mã:

— Me hõmpu he, cumã Raxaro kĩan to ihkĩn na mã apu kam amrã! — hane.

³⁷Mã mehkwỳ me harẽn to:

— Hõtpê cute into tũm caprãr, ne quê rỳ mã Raxaro tyc xwỳjrea na jũ na to, quê ha nee ihtyc nare. Ne hamre ramã ihtyc, ne jũ mã mã quê ha to? — hane.

Pê hacpỹa mã Raxaro tĩr

³⁸Mã hipêr ahna Jeju crycre, ne cumã amji kĩn nare, mã ma kẽn kre wỳr tẽ, ne cute kẽn kre jarkwa pupun, mã kẽn nõa te kre ata jarkwa jihê, Juta catêjê te amji jarêt xà ata kôt.

³⁹Mã cute kre na harkwa hyr to:

— Me kẽn te kre jarkwa jihê ita capa — hajỹr. Mã Raxaro kjê pê Marta ita te cumã harẽn to:

— Ijõ Pahhi, ramã harêt na amcro te cwat ita kam ramã ihkro — hajỹr.

⁴⁰Mã Jeju cumã:

— Xà wa ite curmã me amã amji jarẽn to: “Ca ha ate me ipar na, ca ha atỳj me Pahpãm carôt pupu” hajỹr nare? — hane.

⁴¹Mã cute me kẽn kre ata jihê mẽn. Mã Jeju kàj mã irĩt ne cute Hũm mã harkwa to:

— Inxũ, wa hõtpê amã icakôc, ca atỳj ikampa pyrên ri ijakry. ⁴²Ampo na mã wa ite icakôc xà ita ton? He me hàhtôti atajê mã wa ite icakôc xà ita ton, mã cute me ipar. Ne ate ikujahêc na me ijahkre pej to prãm to wa ite me cumã hajỹr — hajỹr.

⁴³Ne cute hũjarẽn to hajỹr jirô pê mã ri cute Raxaro mã hàkjêr to:

— Ikwỳ nõ Raxaro, ajpên põ mã acato! — hajỹr.

⁴⁴Mã por Raxaro tyc ata tĩr pyrentu. Mã cupẽhkà te ihpar me hũhkra cunea cajpre ita kam, jũ wỳr quê mõr pej, na ri ajpên põ mã to amji rẽn to mõ. Mã hanea ne ihkuc na hê. Mã Jeju te ame hõmpu atajê mã harkwa to:

— Intête me cupẽhkà te ihcupu ata pô, quê ihtỳj tẽ — hajỹr. Mã cupê ipôt par, mã ma põ mã tẽ.

Jeju cuna mã mencaca xà kêanre

⁴⁵Mã Juta catêjê jàhtôa ne me Marij pupun to mõ atajê, te me Jeju te Inxũ carôt kôt hàpên xà pihho pejti ton ata na me hõmpun, ne ihtỳj amji mã me to ihhimpej pyrentu. ⁴⁶Ne mehkwỳ te nee me hajỹr nare, ne ma cute me amji jacjên, ne Parixêw catêjê mã, Jeju te ampo ton xà atajê na harẽn.

Pê Jeju curan na, me curê xwỳn me ajpẽn pa

⁴⁷Mã Parixêw catêjê me, cute Pahpãm mã mehcajrẽn catêjê jõ pahhi me, cute me cuprõn, prohti kam catêjê me, ne cute me ajpẽn par, ne me ajpẽn mã:

— Ampo to mã cu ha ajte me? Nãmri jũm xũmre ita carôt catia to hàpên xà pihho pejti pit ton to mõ. ⁴⁸Cu cama ahna me hamã, ne nee intête mehcahpêrkàr nare, quê ihtỳj me cumã ton to mõ, quê ha mehcunea ahna me hõmpu, ne me kampa, ne ihkôat me amji kampa. Quê ha Roman catêjê jõ pahhi me hõmpu, ne ihtỳj hacpỹa mã me pahna apkjê, ne me pahkam tẽ, ne me papê Pahpãm to amji kam me hapac xà jũrkwa pytà, ne ame pajõ krĩ to kêanre ne — hajỹr.

⁴⁹Mã caku ata na Cajpa ata pê Pahpãm mã cute mehcajrẽn catêjê jõ pahhiti. Na ri cute harkwa to:

— Pỳhàpà, ajte me acunea pê amji jahkre kêatre! ⁵⁰Ne imãa ite amji kam ijapac xà te hajỹr he. Quê ha jũm xũmre pyxit peaj ne ty, cu ha nee me pahcunea me pahtyc nare. Nãmri quê ha pyxit peaj te ihtyc nare na, cu ha me pahcunea me pahhi tu. Cwỳrjapê ri Jeju pyxit peaj ne ihtyc xà — hajỹr.

⁵¹Ne pê Cajpa ihcakôc xà ata kam, nee amjia kôt ihcakôc nare, Pahpãm pê cumã ihcakôc xà ita to hahkre. Ne pê cupê Pahpãm mã cute mehcajrẽn catêjê jõ pahhiti. Cwỳrjapê pê Jeju te Juta catêjê cunea incwỳrjapê ihtyc na, me cumã amji jarẽ. ⁵²He nee mã Juta catêjê incwỳrjapê pit mã ihtyc xà nare. Ne pjê cunea kam, mehcunea pê Pahpãm kra ame ipicràn atajê to cute cuprõn, ne me to pyxit peaj prãm to, quê ha ihtỳj ty.

⁵³Ne amcro ata kam cute me Jeju curan prãmte pê me cupê Juta catêjê jõ pahhi kwỳ cunea ahna me ajpẽn pa. ⁵⁴Cwỳrjapê pê nee Jeju hirã pê ajco apu Juta jõ pjê kam ipa nare. Na wa ma, por põ na pire mã, pjê kam põ kam me hamreare ata wỳr Jeju me, me mõ, por Pĩxôhrôt jõ pjê ata wỳr, ne curia wa me ijàhhuc.

⁵⁵Ne pê ramã amcro incrêre me Hakren xà jõ amji kĩn wỳr. Pê amji kĩn ata xwỳjrea na Juta catêjê jàhtôa ne Krĩpinkrên wỳr me cato, cute ame ampo kên ton atajê to me hapac kêt, ne ame amji cũmpej. Ne amji kĩn ata na mempejti na ame ipa xà caxuw. ⁵⁶Ne pê mehcunea ame Jeju japên to me ipa, ne ajco ahna ame ajpẽn cukij, Pahpãm to me amji kam me hapac xà jũrkwa kam. Ne me ajpẽn mã:

— Pỳhàpà, mõrmõ quê ha ajkĩ ihtỳj ajpên Jeju amji kĩn ita wỳr mõ, nare, quê ha nee mõr nare? — hajỹr.

⁵⁷Me Pahpãm mã cute mehcajrẽn catêjê jõ pahhi kwỳ me, me cupê Parixêw catêjê kwỳ me, cute me Jeju jaxàr na me ajpẽn par. Cwỳrjapê ri cute ahna me harkwa, quê jũ ri jũm hõmpu, ne uua ne me cumã harẽ, por jũ ri apu mõr xà ata ri.

Pê Marij Jeju par kam ampo cacô na hĩ jàhwỳrti ata jaxwỳ

¹Ne ramã me Hakren xà jõ amji kĩn wỳr amcro te xêj, wa ma Jeju me, Mehkênpupunxà jõ krĩ wỳr me mõ. Por pê curi hacpỹa mã Raxaro to ihtĩr mã ihkrĩ ata ri. ²Mã cute Jeju te hacpỹa mã Raxaro to ihtĩr na me to amji japackre, ne amji mã me to catia to prãm to ri, cute me cumã hõ ton. Mã Marta apu mehtehcajpa, mã Raxaro me cahê na me hàpàn xà na jỹ. ³Mã Marij te ampo cacô cuxwati ata japrỳ te nartô cacô te rit cahti na hajỹr ata pyr. Ne pê ampeaj kam nartô cacô ata na hĩ ahwỳ. Mã cute Jeju par kam haxwỳr, ne ahna haxwỳr partu ne cute to cumã ihpar cuhhõn, ne ihkĩa to cumã incrà, mã ikre cunea cuxwaa to cuxwa.

⁴Mã me ikwỳa nõ pê Juta Carijot te cormã Jeju kên mã mẽn catê ata te harkwa to:

⁵— Pom ampo cacô ita na ihpore jàhtô na cute xẽj crê, ne cupê caku pyxit jàpên xà jõ porea. Ne mẽr ampo na mã cama cute haxwỳr, ne nee cute ihpore na to hàhpan ne imã hõr, wa ite me cupê hamreare atajê mã hõr nare? — hajỹr.

⁶Ampo na pê Juta Carijot ihcakôc xà ita to hane? Nee mã pê ampo na nare. Pê hàhkĩj xi, na pê harkwa ita to hane. Pê nee cute me cupê hamreare atajê tehcajpar prãmte harkwa ita to hajỹr nare. Pê ajco me cupê me hõ pore incjên xà cwa, ne ajco me cupê ihpore to ahkĩ na pê. Pê ramã hàhkĩj ita to amji pyràc tu.

⁷Mã Jeju te cumã harkwa to:

— Quêt taa Marij ito hane! Cute ijarêt xwỳjrea na ramã icuxwa, me panquêtjê te amji ton xàa kôt. ⁸Ne me cupê hamreare atajê, quê ha hõtpê ame ipa me acahê na. Ne pa nare, wa ha nee ame acahê na imõr kam to icrà nare — hajỹr.

Pê Raxaro curan na me hõ pahhi kwỳ ajpẽn pa

⁹Mã Juta catêjê jàhtôti atajê te me Jeju te Mehkênpupunxà jõ krĩ kam apu mõr na me harẽn par. Ne ma curi me cator. Ne nee pê Jeju pit wỳr me mõr nare, ne Raxaro me ajwar hỹrmã me mõ, por hacpỹa mã Jeju te to ihtĩr ata. ¹⁰Mã hamre, Pahpãm mã cute mehcajrẽn catêjê jõ pahhi kwỳ te me ajpẽn par, ne hanea ne ihtỳj me Raxaro curan prãm. Ampo na? Nee mã ampo na nare. ¹¹Pê Juta catêjê jàhtôa ne Raxaro tĩr xà ata kôt, me hõ pahhi mã me hikra, ne Jeju to amji mã mehhimpej to me ipa na pê.

Pê me hakrya kam, Krĩpinkrên mã Jeju axà

¹²Ne amcro ata na, pê me hàhtôa ne me Hakren xà jõ amji kĩn na ame ipa. Ne cute me Krĩpinkrên wỳr Mehkênpupunxà jõ krĩ pĩn Jeju mõr na me harẽn par. ¹³Ne cute me ampo hô pê crowràti hô pyràcti ita to me amji tỳj, ne ma hỹrmã me to pra, cute me to ihcajpar prãmte. Ne me to ihcajpar, ne me hakryte cama cumã ame to hàpêr to me ipa, ne ame cumã caràr to:

— Pahpãm cati ne impej! Pahpãm ri me pahwỳr mõ! Pahpãm te amji japrỳa na me pahwỳr me pajõ Pahhiti kujahêc! Me imã Pahpãm te me pajõ pjê to ihhimpej na to prãm! — hane.

¹⁴Mã Jeju cawrô cahàcre nõ ita na cator, ne kam hỹr ne to mõ. Por ahnaa rỳ pêa mã ramã Pahpãm jõ kàhhôc kam harẽn to:

¹⁵“Krĩpinkrên pê Xijãw jõ hàpkàjti me, ca kam me akrĩ atajê, ca ha nee hipêr amji mã ame ampo cupa nare.

Nãmri ramã ajpên me gõ Pahhiti cawrô cahàcre intuwre nõ kam hỹr ne to mõ he” hane,

mã ahnaa.

¹⁶Ne amcro ata kam pê wa nee me ipê ihkôt me ipa catêjê nõ ampo atajê nõ kam ijapac, ne hahkre pej nare. Mã Jeju tyc, ne hacpỹa mã ihtĩr, ne ma Pahpãm wỳr hàpir, wa cormã ite me ita to amji japackre, por ramã ampo te to hajỹr xà ata na Pahpãm jõ kàhhôc kam ahna ihhôc ata to. Na pê ihtỳj to hanea to hane.

¹⁷Mã me hàhtôa ne Jeju kôt me mõ, mã me kam mare mã cute carôt tỳjti to Raxaro mã hàkjêr, ne hacpỹa mã to ihtĩr ata na, cute me hõmpun catêjê te ihtỳj me harẽn cràn. ¹⁸Mã me hàhtôa te me harẽn par, na ri ma mehcajpar to me mõ. ¹⁹Mã Parixêw catêjê kwỳ ajpẽn mã me harẽn to:

— Me hõmpu he, wỳr cu ame amji mã hamã ne intête me cuta. Ne ramã pjê cunea pĩn mehcunea ihkôt ame ipa — hane.

Cu ha mam pahte me amji kam me pajapac xà kên ita mã hikra

²⁰Ne por Krĩpinkrên wỳr, amji kĩn wỳr me mõ atajê kôt hõtpê Crec jõ pjê catêjê kwỳ me mõ. ²¹Atajê ma me ikwỳa nõ japrỳ pê Pirip ata wỳr me pra. Ne Pirip ata pê Tep jõ krĩ kam Hĩpôjajo jõ pjê kam me xa atajê jõ xũmre nõ. Mã cute ahna me hàhwỳr, ne me cumã:

— Jeju pupun prãmte wa me mõ — hajỹr.

²²Mã Pirip hõ ikwỳ nõ Antre wỳr tẽ, ne cute cumã hũjarẽn, ne ma ajwar Jeju wỳr me mõ, ne me cumã:

— Crec catêjê kwỳ cator, ne ame amã ihcakôc to prãm — hane. ²³Mã me cumã:

— Ipê me Ahàkà, ne ipê, por pê côjkwa kam amji to incrire ne hũmrea na amji to, ne me awỳr wrỳ ata. Ne hamre ramã ite hacpỹ mã amji jaxàr, ne icati taa to, icati xàa kam ramã hàhhuc to mõ. ²⁴Wa nee ame amã ihêj nare, ampeaj kam wa me amã awjarẽ. Quê ha pjê kam jũm ampo hy kre, quê ha cute amji to ipixô nare na, quê ha nee kam hiprãj ne ihhy nare, ne ihhy atapit cormã nõ. Nãmri quê ha cute me hàmĩr na, quê ha amji to ajxô ne kam hiprãj ne ihtỳj kam ihhy hàhtôa to hàhtô. Jĩkjê na mã ite hajỹr. Wa ityc ne amji jarêt nare na mã, wa ha nee hacpỹa mã me acunea to atĩr nare. ²⁵Jĩkjê na mã me acunea te me hajỹar. Ca ha me amã mam ate amji kam me gapac xà kên tũm ata kĩn, ne me amã hapêti na, ca ha nee me amji mã intuw pejti ita nõ pyr nare. Nãmri ca ha ate mehcaca, ne me cumã hikran na, ca ha hirôa pê me amji mã ate amji kam me gapac xà tuw pejti ita py. Ata quê ha me amã irya to iry, ca ha côjkwa kam Pahpãm cahê na ame apa rohnỳtti mã. ²⁶Ne quê ha jũm te ikôt amji ton, ne imã hàpên prãm na, quê ha jũm ata ipynã, ne ikôt amji to. Ne wa ha jũ ri apu mõ, quê ha hanea ne ikôt imã hàpên catê apu mõ. Quê ha Inxũ pê Pahpãm, por jũm imã apê ata to impejti ne.

Pê Pahpãm Jeju pê ihkra na harẽ, côjkwa pĩn

²⁷— Wa ita kam imã amji kĩn nare catia na ite amji cajpẽr. Ne jũ mã wa ha ajte? Xà wa ha ajkĩ amji mã Inxũ na ahwỳ ne cumã: “Inxũ, itête ampo kên te ito jũ mãn xà ita camẽ” hane? Hãpà, jũ wỳr wa ha cumã ijarkwa to hane, he ita caxuw wa icator, pjê ita kam — hajỹr. ²⁸Ne cute Hũm mã:

— Inxũ, imã ate amji mã gaprỳ to catia to cati na ato prãm — hajỹr. Mã côjkwa pĩn jũm jõkre ita te cumã:

— Wa ramã ite to cati, ne wa ha cormã hipêr itỳj to cati to mõ — hajỹr.

²⁹Mã me hàhtôti atajê te me hõkre ita par, ne mehkwỳ ajpẽn mã me harẽn to:

— Pahhàjê jàwrãrãc mõrmõ — hane. Mã mehkwỳ amji mã me to:

— Côjkwa kam Pahpãm jarkwa to imprar catê nõ te cumã ihcakôc — hane. ³⁰Mã Jeju te me cumã harẽn to:

— Nee mã icwỳrjapê jũm jõkre ita cakôc nare, me acwỳrjapêa ri hõkre ita cakôc. Ampo na? Ate me hõkre par xà ata kôt ca ramã ate Pahpãm te ihtỳj ikam hapac na, me ijahkre pej. ³¹Ne ramã pjê cunea kam ame icurê catêjê cukij ne mehkên mã me hàr xàa kam ri hàhhuc. Ne por me pahcurê xwỳn pê Xatanaj pê pjê kam me to ihhimpej catê ata, quê ha Pahpãm mentête hũrê. Quê ha nee hipêr me kam ihhimpej nare. ³²Quê ha pĩ na me ixô, ne kỳj pê ina me hãm, wa ha kam ityc to imõr me ajkaam amji wỳr me hàhtôa ne me to apkjê, mãr quê ito amji mã ihhimpej to me ipa — hajỹr.

³³Ne hũjarẽn xà ata to pê ajco cute jũ mã mehcuran xà ata to amji jarẽn to ipa.

Jeju te amji kam hapac xàa to me papa xà

³⁴Mã me hàhtôti atajê te me Jeju kam hapac ne me cumã:

— Pỳhàpà! He wa ijõtpê hãn ne me Mojxe xwỳ jõ kàhhôc cahyt, ne kam me, por pê ramã Pahpãm me pamã jũm te jũ caxuw me pahto ihhimpej xà to me pamã awjahkre ata jarẽn par. Ca ajte côjkwa pĩn me hũmrea na ate amji ton, ne awrỳc ne apu apa na, me imã amji jarẽ. Cwỳrjapê ri apê ihhêj rũm, por pê Pahpãm jũm to me pamã awjahkre ata. Ne quê ha apê Pahpãm te ato hũjahkre ata mã impàràpên, ca ha atyc nare, ne me icunea to ahimpej kam acrà tu ne, ne jũ caxuw atyc xà nare. Nõ na mã ca ajte, cute me acuran ita na amji jarẽ ita kam, me icunea pê gahkre kêatre. Na ca ha hirãa pê me imã apê jũm te côjkwa pĩn me hũmrea na amji jahkre ne iwrỳc ita na amji jarẽ, wa me gahkre pej — hajỹr.

³⁵Mã Jeju me cumã:

— He cormã nee ate me ite me amã ampo jarẽn xà itajê cunea par xà hamreare, ne jũa caxuw ca ha cormã me kampa ne me hahkre pej. Ne me ijũjarẽn xà ita kampa ne mehkôt hakop. Ne me hõmpu he, cu ha hàhcujro xà nõ to ampo cujro, ne hõmpun kênre nare, quê ha ampo kêanre na, cu ha me hõmpu ne me hahkre pej pyrentu. Na ri ipê hàhcujro xà nõ ata pyràac. Na wa ha ihhêj ne me acujro, ne me amã ate amji kam me gapac xà pupu, mõrmõ ajkĩ impej, nare, mõrmõ ajkĩ ihkêanre. Na ca ha ihkôat amji mã ate amji kam me gapac xà jahkre pej. Ampo na? He wa ha nee ita ri me acahê na apu imõr kam to icrà nare, ite me amã ijàhcujro xà caxuw. Na wa ha ita ri cormã apu imõr kwỳa kam, ca ha amji mã ate amji kam me gapac xà to antuw, ne me to intuw. Nãmri quê ha ahtũm nare wa ha ma me apê tẽ, quê ha me apê awcapàtkô, ne jũ mã ca ha me, ne ite me atehcajpar nare kam, ame amji mã hamã? Ne jũ mã ca ha me amji mã me ate amji kam me gapac xà to me antuw? Wỳr ca ha ame amji mã hamã. ³⁶Nãmri ca ha ate amji mã me ito ahimpej na, ca ha gàhcujro jarwrỳhti ita na me akrĩ, ne icuxà jũmjê kwỳ cujro, mãr quê cute amji kam me hapac xà to me antuw — hane. Hõ, Jeju te me cumã ihcakôc xà to hajỹr, ne ma tẽ, ne me cupê ipimxur.

Pê me hàhtôti atajê nee amji mã me Jeju to ihhimpej nare

³⁷Ne pê ramã me kam mare mã Pahpãm carôt tỳjti ata to hàpên xà pihho catia to, pê me hõmpu cakrô, nee me kam hapac ne amji mã me to ihhimpej nare. ³⁸Na pê Ixaj xwỳ pê Pahpãm jarkwa to ihcakôc catêjê nõ ata ramã ita na ihhôc to hane he:

“Ỹhỹ me ijõ Pahhiti, ca ate me cumã acarôt tỳjti ata to apipẽ,

ne to gàpên xà catia ton na ite me cumã garẽn cakrô,

mã nee jũm te me ipar nare” hane.

Hõ, ita na pê Ixaj xwỳ ihhôc, mã ahnaa cute.

³⁹Ampo na? He mehkwỳ amjia kôt ma amempar caca, na pê Ixaj xwỳ me ahna ihhôc to hane he:

⁴⁰“Pahpãm te cute ampo pupun cupate, ihhêj ne me to into puror, ne cute mempar cupate, ihhêj ne me to me hapactuare.

Cute amji kam hapac xà to me ipintuw ne hỹrmã amji to me ipipkjêr, mã cute me to impej cupate” hane.

Hõ, pê ma ame Pahpãm par caca, na pê me to hane.

⁴¹Ampo na pê Ixaj xwỳ ihhôc to hane? Nee mã ampo na nare, pê ramã mam rỳ pêa mã Jeju te carôt tỳjti to ampo catia to hàpên xà ata na me hõmpu, na pê ahna ihhôc to hane.

Pê pahhi kwỳ cupate, nee ame Jeju jarẽn pejti to me harẽn nare

⁴²Mã me hàhtôa ne nee me Jeju par nare cakrô, mã Juta catêjê jõ pahhi kwỳ te hõtpê mempar. Ne nee cute me kam mare mã, amji mã me Jeju pejti na me harẽn nare. Ampo na? Nee mã ampo na nare. Parixêw catêjê te cute me cuprõn xà intête, põ mã me hapôj mã hipêr na mencjêj nare cupate. ⁴³Ne me cumã Pahpãm te mempejti na me harẽn na ihkĩn nare, ne ajte me cumã me hũmre te mempejti na me harẽn na, amji to prãm.

Pê Pahpãm Jeju mã ampo to hahkre atajêa to ri, me cumã hahkre

⁴⁴Mã Jeju te ihkrãhhia kam mehcunea mã hũjarẽn to:

— Quê ha jũm te amji mã ito ihhimpej na, quê ha nee ipyxit peaj ne amji mã ito ihhimpej nare. Quê ha cute ito amji mã ihhimpej me ajkaam, por cute ajpên ikujahêc ata to hanea ne amji mã ihhimpej. ⁴⁵Ne hanea ne, por jũm ipupu ata, ramã ajpên cute ikujahêc catê ata pupu. ⁴⁶Ne pjê ita kam cute me amji kam hapac xà kêanre jàhtô, ne me cupê cute amji to me ipintuw jahkre kêatre. Na ri ihhêj ne awcapàtkô kam ame ipa. Na wa ihhêj rũm ipê mehcujro xà, ne me hỹrmã icator, ite cute amji kam me hapac xà to ipintuw ne ihhêj ne awcapàtkôti to mentête hamre xà caxuw. Na quê ha jũm te amji mã ito ihhimpej na, wa ha itỳj cumã cute amji kam hapac xà to antuw.

^47-48— Ne por ma ame icaca atajê me, ma apu ite me hapackre xà itajê caca atajê, quê ha ihtỳj jũ caxuw hahpan xà na Pahpãm mã me amgõ. Ne pa nare, wa nee ite me hũhkra kam ijàmcwỳr xà caxuw pjê ita wỳr icator nare. Quêt ite me to impej ne mehkên catia pê me hũtàr xà caxuw wa icator. Ne pom wa me cumã icakôc xà ton to ipa itajê, quê ha me ahna ahwỳ, quê ha, por jũ caxuw ampo cunea jamre xà ata kam, ihtỳj me cumã amgõ.

⁴⁹— Ampo na? Inxũ rũm ri ajpên icakôc xà itajê imã pra. Na wa Inxũ te ampo to, ite icakôc xà na irẽn atajê to pit mã, me cumã icakôc to ipa. Wa nee amjia kôt icakôc to ipa nare. ⁵⁰Na quê ha jũm te icakôc xà atajê kam hapac, ne to amji mã ihhimpej na, quê ha Inxũ cahê na amji to ipijapar rohnỳtti mã. Caxuw ri, Inxũ te imã ite to ijũjarẽn xà itajê jõr — hajỹr.

Pê Jeju ihkôt me ipa catêjê mã ihpar cuhhõ

¹Pê ramã me Hakren xà jõ amji kĩn jõ amcro wỳr amcro pyxit peaj ne nõ. Pê Jeju te ihtyc, ne pjê ita rer, ne ma hacpỹ mã côjkwa wỳr, Hũm wỳr cute ihtẽm jõ amcro ramã hàhtêp na, cumã hahkre pej. Ne pê hõtpê cumã pjê kam me cupê me hõ tekjê atajê kĩn, ne cumã mehkĩan to mehkĩn ita na mã ahnaa ihtyc xà ita mã cute to hahêr. Mã cute me ikĩnti ita to me imã hahkre to hajỹr he.

²Wa Jeju me, me ipê ihkôt me ipa catêjê me, ramã caxwa xàa kam, me ikrĩ ne ame apà. Pê ramã caxuaw me pahcurê xwỳn pê Xatanaj ata me ikwỳ nõ japrỳ pê Juta Carijot ata mã, cute amji kam hapac xà kêanre ata jõr, mã ihkôt aracri cute Jeju kên mã mẽn xà caxuw. ³Mã Jeju te, Hũm te cumã carôt cunea jõr na, cumã amji jahkre pej. Ne hanea ne cumã Hũm pĩn cator, ne quê ha hacpỹa mã hỹrmã api na, cumã amji jahkre pej. ⁴Cakrô mã hãm ne cute ihkà ata caxàr, ne cute cupẽhkà nõ ita to amji cahti na hê. ⁵Ne cute crat nõ ita kam cô kwỳ mẽn, ne ahpỹanre na kam me imã me ipar cuhhõn kam ihtẽm. Ne ihcuhhõ ne ma cupẽhkà ata to me imã incrà.

⁶Ne ma Ximãw Petrô na to cator, mã cute Jeju cukij to:

— Pỳhàpà ijõ Pahhi, pom ampeaj kam acati ita, nõ na mã ca ha ajte me ipar cuhhõ? — hajỹr. Mã Jeju te cumã harkwa to:

⁷— Ca ha nee ita kam ampo caxuw ite amã apar cuhhõn xà ita jahkre pej nare, ne jũa caxuw ca ha hahkre pej. Na ca ha ito tojnõ wa amã apar cuhhõ — hajỹr. Mã Petrô cumã:

⁸— He apêa ri ijõ Pahhi, na wa ha nee ate imã ipar cuhhõn ita na ato tojnõ nare — hane. Mã Jeju cumã:

— Wa ha ite amã apar cuhhõn nare na, ca ha nee hipêr apê ikôt apa catê nare — hane. Mã Petrô te ahna hàhwỳr to:

⁹— Ijõ Pahhi, mẽr imã ipar pit cuhhõn nare, ne hanea ne imã ijũhkra me ikrã cuhhõ! — hajỹr. ¹⁰Mã Jeju cumã:

— Hamreare, nee mã gĩ cunea xwỳr xà nare, ne apar pit cuhhõn xà. Por ramã jũm xwỳr ata tũm nare, ne cumã ihpar pit cuhhõn xà. Ampo na? Pjê kam apu to ipa mã ihtũm, cwỳrjapê ri cumã ihpar pit cuhhõn xà. Ne imã ihhêj ne ramã me acunea tetet pit, ne por jũm ata ri pyxit peaj ne nee ihtetet nare ne ihtũmti — hajỹr.

¹¹Ne pê ramã Jeju cute ihkên mã mẽn catê ata jahkre peaj, na pê harkwa ita to hane he:

— Ramã me acunea tetet, ne jũm ata ri pyxit peaj, ne nee ihtetet nare ne ihtũmti — hajỹr. Ne nee mã mehtũm to pê Jeju hũjarẽn to hajỹr nare, ne cute me amji kam hapac xà kên to pê hũjarẽn to hane.

Pê me hàpên catêjê me hàpên xà na me ajpẽn tehcajpa

¹²Mã cute me imã ipar cuhhõn par jirô pê mã ri hacpỹa mã cute ihkà mã amji jaxàr, ne me ijàpàn xà na hỹr, ne cute me icukij to:

— Xà ate me ite curmã ampo ton xà ita kam me gapac, ne me hahkre pej? Mõrmõ nee ate me hahkre pej nare, cwỳrjapê wa ha me amã ihkôt harẽ. ¹³Ca me ito amji mã: “Me imã ampo to hahkre catê” hane. Ne hanea ne amji mã me ito: “Ijõ Pahhi” hane. Ne ampeaj kam ri ate me ijarẽan to me ijarẽan. ¹⁴Ỹhỹ, he tee ipê me gõ pahhi, ne ipê me amã ampo to hahkre catê cakrô, wa itỳj me amã ijàpên, ne ite me amã me apar cuhhõn par. Cwỳrjapê ca ha me caa icuxà ajpẽn mã me apar cuhhõn pa. Ne ampo cunea na me ajpẽn tehcajpa, ne ajpẽn to me acati, ne ajpẽn mã me apê. ¹⁵Ne ite me amã to hahkre na, ca ha ikôat me to, ne ajpẽn mã me apar cuhhõn pa. ¹⁶Wa ampeaj kam me amã awjarẽ, he me hàpên catêjê nõ hõ pahhi jirôa pê cati nare. Ne nee hõ pahhi japyre mã hàpên nare. Ne quêt hõ pahhi ri me hirôa pê cati. Ne hanea ne, por harkwa na cumã imprar catê ata, nee cute ihkujahêc catê ata jirôa pê cati nare. ¹⁷Hamre, ita caxuw ca ha ite amji kam ijapac xà na me ijahkre pej kam me to tẽ. Na ca ha ate ikôat me ton to me amji pyràc na, ca ha atỳj hũrên me gakry.

Pê Jeju, por cute ihkên mã mẽn catê ata jarẽ

¹⁸— Wa nee ite me acunea to icakôc nare. Ampo na? Wa itỳj ite amji mã me acapi atajê pupu, ne imã me gahkre pej. Ne pê Pahpãm jõ kàhhôc kam ramã me anõ ata to hũjarẽn to: “Por icahê na ijõ pãw ku ata, quê ha ihtỳj icuna mã ahtwỳ ne amji to icurê xwỳn” hane. Ne ampeaj kam quê ha caxwa ita kam, jũm ita ito hane. ¹⁹Ne wa ha ita kam ampo te ito hajỹr xà ita xwỳjrea na, me amã harẽ. Mãr quê jũm ita ito hane, ca ha ramã me ipê Pahpãm kraa to Pahpãm kra na me ijahkre pej. ²⁰Ne ampeaj kam wa me amã awjarẽ, quê ha jũm te, por ite jũm kujahêc ata na amji caxàr me ajkaam, hanea ne ina amji capa. Ne quê ha jũm te ina amji caxàr me ajkaam, hanea ne Inxũ te ajpên ikujahêc ata na amji capa — hajỹr.

Pê Jeju cute ihkên mã mẽn catê jahkre

²¹Cute ita jarẽn jirô pê mã ri cumã amji kĩn nare, ne hĩ cunea kam ihpeacre. Mã hirãa pê me imã amji jarẽn to:

— Wa ampeaj kam me amã amji jarẽ, ca ha atỳj me anõ me icurê xwỳn tehcajpa ne me cumã igõ, neikên mã imẽ — hane.

²²Wa tee ame ajpẽn pupu, ne nee me ite, por cute jũm to ihcakôc ata jahkre pej nare. ²³Ne pê ampeaj kam Jeju mã ikĩn, cwỳrjapê pê wa cahi na jỹ. ²⁴Mã Ximãw Petrô te hũhkra to imã hàpêr, ne hũhkra to imã, ite jũm ata na Jeju cukij na awjahkre.

²⁵Wa Jeju wỳr ipipkjêr ne ite kyre pê ihcukij to:

— Ijõ Pahhi, jũm mã ajte? — hajỹr. Mã Jeju imã:

²⁶— Por wa ha jũm mã pãw co ne cugõ ata — hajỹr.

Ne cute pãw kwỳ hyr ne crat kam cô cacro to inco, ne Juta Carijot mã hõr. ²⁷Mã cute pãw ata pyr me ajkaam mã Xatanaj te cumã amji jõr. Mã Jeju te cumã harkwa to:

— Gapacta ne ate amji mã acaca xà nõ na prãm ata ton pyrentu — hajỹr.

²⁸Mã me ikwỳ me ijàpàn xà na me jỹ atajê te nee me ita jahkre pej nare, por Jeju te imã harẽn xà ata na. ²⁹Ne pê Juta ihpore incjên xà to amji pytà, ne ajco apu to ipa na, pê ihtỳj cute amji kĩn caxuw cute ampo japrôr na Jeju te cumã harkwa na amehcãmjĩ, nare, cute me cupê hamreare atajê mã ihpore nõ jõr na amehcãmjĩ. ³⁰Mã Juta te pãw pyr, ne ihkrẽr ne ma ihtẽm pyrentu. Mã ramã awcapàtkô ne caxwa.

Pê Jeju ihtẽm xà na ihkôt me ipa catêjê mã amji jarẽ

³¹Ne ma Juta tẽm jakàn pê ri Jeju te me imã hũjarẽn to:

— He ipê me Ahàkà ata pê wa me hũmre na amji to, ne côjkwa pĩn wrỳ. Ne ita caxuw quê ha mehcunea me hirôa pê icati na me ijahkre pej. Ne icwỳrjapêa quê ha hanea ne me Inxũ japrỳ to me catia to me cati na me hahkre pej. ³²Wa ha mehcunea mã Inxũ carôt catihti impejti cupahti ata to ajpẽ, ne ahtũm nare, quê ha hanea ne me cumã icarôt catihti impejti cupahti ata to ajpẽ. ³³Me apê me ikrare pyràac. Ne wa ha nee me acahê na apu imõr kam icrà nare, ne ahtũm nare wa ha ma tẽ. Na ca ha tee ame ijapê. Ne por wa ite ramã Juta catêjê mã amji jarẽn xà ata to, wa ha me amã amji jarẽ, ne me amã: “Jũ wỳr ca ha curi imõr xà ata ri me mõ” hane.

Cu ha me pamã ajpẽn kĩnti ne

³⁴— Na wa ha me amã ite ijarkwa hyr xà intuwti ita ta, ne me amã harẽn to: “Atỳj me acunea mã ajpẽn kĩnti, to hanea, pom quê wa me akĩnti to amji kampa he, ita to quê ha hanea ne me amã ajpẽn kĩnti ne” hane. ³⁵Quê ha me acunea mã ajpẽn kĩnti na, quê ha mehcunea ajpẽn na me apupu, ne me apê ikôt me apa catêjê na me gahkre pej pyrentu — hane.

Pê Jeju Petrô mã cute hõmpun nare na harẽn na cumã harẽ

³⁶Mã Ximãw Petrô te Jeju cukij to:

— Jõ ri ca ha ajte mõ? — hajỹr. Mã Jeju cumã:

— Jũ wỳr ca ha ita kam curi imõr xà ata ri mõ, ne jũa caxuw ca ha atỳj curi ikôt acato — hane.

³⁷Mã hipêr Petrô Jeju cukij to:

— Mẽr ampo na wa ha nee ita kam akôt imõr nare? Pom ipê akôt ipa catê ita, cwỳrjapê wa ramã ita kam akôt ityc xàa caxuw apu mõ — hane. ³⁸Mã Jeju cumã:

— He xà ca ajkĩ ampeaj kam ikôt atyc xàa caxuw apu mõ? Hamreare. Wa ha amã ijũjarẽn hiahpuro. Ca ha ita kam, hôxãhxãc kàr xwỳjrea na, ate ipupun nare, ne apê ijahkre kêatre na, amji jarẽn to incrê — hane.

Pahpãm cahê na ampeaj kam me pamã me pahkrĩ xà jàhtô

¹Jirô pê mã ri cute me pahcunea mã harkwa to:

— Nee ca me amji mã pa, ne ame akrihkrit nare. Ne Pahpãm to ca quêt amji mã me ahimpej, ne hanea ne ito amji mã me ahimpej. ²Ne Inxũ krĩ xà kam ampeaj kam mehkrĩ xà caxuw mehkrĩ xà jàhtô, na wa ha ma hacpỹ mã tẽ, ne me amã ihnõ cũmpej hiahpuro. Wa nee ame amã ihêj xi jarẽn nare, quê ha curi mehkrĩ xà caxuw ikre caxwỳn atajê hamreare na mã, wa ha nee me amã harẽn to hajỹr nare. ³Na wa ha ihcũmpej par jirô pê mã, wa ha hacpỹa ne me awỳr amji jaxà, ne me gaprô, mãr wa curi apu ipa ata ri, ca hanea ne ikôt curi ame apa.

⁴— Ne ramã me amã jũ kam itẽm xà ata jõ pry jahkre pej — hajỹr.

Jeju pê ri Pahpãm wỳr me pancjêj xà jõ pry

Mã me ikwỳ nõa pê Tome ata te ihcukij to:

⁵— He me ipê cormã jũ kam atẽm xà ita na gahkre kêatre ita kam, jũ mã wa ha ajte me, ne me gõ pry ita jahkre pej? — hajỹr.

⁶Mã Jeju cumã:

— He Pahpãm wỳr pry pyxit peaj. Ne ipêa ri pry ata. Cwỳrjapê ca ha ipyxit peaj kôt Inxũ wỳr me acato. Ne ipê me amã ite Inxũ to ipipẽ xà to ihêj xi nare xà xakat. Ne ipê me ate amji kam me gapac xà impejti cunea xakat. ⁷Ne ramã ate me ipê Pahpãm kra na me ijahkre pej, na ca ha atỳj hanea ne ita caxuw me Inxũ jahkre pej. Ỹhỹ, he pê ca ramã me hõmpu — hane.

Jeju me Pahpãm pipẽan

⁸Mã me ikwỳ nõa pê Pirip ata te Jeju mã:

— Me ijõ Pahhi, me imã Apãm to ajpẽ, wa me hõmpu, ne tahnaa mã ihkôt me amji kampa, ne nee wa iràn xà na me ampo pupun prãm nare — hajỹr.

⁹Mã Jeju cumã:

— Pỳhàpà, he rỳ pêa mã wa me acahê na ipa, ca ajte nee cormã ate me ipupun nare? Por jũm ipupu ata, ihtỳj hanea ne Inxũ pupu, ne mẽr ampo na mã ca cormã imã: “Me imã Apãm to ajpẽ, wa me hõmpu” hane? ¹⁰Pirip, xà ca nee ajte, wa Inxũ me ajpẽn kam ihônco, ne ajkam me ipyxit peaj na amji mã me ito hajỹr nare? — hane. Ne Jeju me icunea mã:

— Ne pom wa me amã awjarẽ itajê, wa nee amjia kôt harẽn nare. Ne wa ite Inxũ me ajpẽn mã amji jõr, ne ajpẽn kam me ihônco, na ri taa hàpên xà itajê cunea to. ¹¹He, wa Inxũ me ite ajpẽn mã amji jõr, ne ajkam me ipyxit peaj, na wa me amã amji jarẽ, ca atỳj me ikampa. Nãmri quê ha me amã icakôc xà itajê na ipar jahkre kêatre na, ca ha me ijàpên xà itajê pupu, ne ihkôat amji mã me ito ahimpej ne me ikampa.

Ampo na pahte me Jeju wỳr xà atajê, ihtỳj me pamã cugõ

¹²— Wa ampeaj kam me amã awjarẽ, quê ha jũm te ampeaj kam ito amji mã ihhimpej na, quê ha, pom wa ijàpên xà to itajê jirôa pê hàpên xà ton to ipa. Ampo na? Wa ha ma Inxũ wỳr hacpỹ mã tẽ, na quê ha ajpên me amã icarôt kujate. ¹³Ne wa me ato amji kwỳ cwỳrjapê ca ha ampo na me iwỳ, wa ha itỳj me amã hõr pa, mãr quê mehcunea me acwỳrjapê Inxũ catia to cati na me hahkre pej. ¹⁴Ne wa me ato amji kwỳ cwỳrjapê, ca ha ampo na me iwỳ, wa ha itỳj me amã cugõ.

Pahpãm Carõ Pejti te me pamã caprĩ xà

¹⁵— Nãmri quê ha me amã ikĩn na, ca ha atỳj ite ampo na me amã ijarkwa jirên atajê na me ikampa. ¹⁶Ne wa ha me amã Inxũ na ahwỳ, quê ha ijakàn pê ijaxà kam, me amã jũm kujate, quê ha me atehcajpa. Ne taa mã quê ha quêt me acahê na ipa rohnỳtti mã. Ne jũm ata pê ri Inxũ Carõ Pejti. ¹⁷Ne taa mã quê ha me amã Inxũ te amji kam hapac xà impejti to ipipẽ to mõ. Ne por me cupê Inxũ tekjê nare, ne hanea ne me cupê me ikwỳ nare atajê, quê ha nee amji mã me Inxũ Carõ Pejti itacwỳr nare. Ampo na? Jũ wỳr quê ha me hahkre pej, ne me hõmpu. Ne me ca nare, ca ha atỳj quêt me hõmpu. Ampo na? He quê ha ihtỳj quêt me acaxwãm pê ihkrĩ, quê ha me acahi na ipa.

Quê ha Jeju me parer, cu ahte ame papa nare

¹⁸— Ne quê ha ina ahtũm nare, wa ha ma tẽ cakrô, wa ha nee me ato tojnõ ne me amã hikran, ca ha ahte ame apa nare. Ne itỳj me awỳr amji jaxà, ne me acahê na apu ipa. ¹⁹Ne quê ha ina ahtũmre quê ha me cupê Pahpãm tekjê nare atajê nee hipêr me ipupun nare, ne me ca nare, ca ha quêt atỳj hipêr me ipupu. Ne wa ha itỳj hacpỹa mã itĩr ne Pahpãm cahê na apu ipa. Cwỳrjapê ca ha icuxà hanea ne hacpỹa mã me atĩr, ne me atĩr ita na Pahpãm cahê na ame apa. ²⁰Ne quê ha jũ caxuw, amcro nõ na me awỳr Pahpãm Carõ Pejti cato, ca ha Inxũ me ite ajpẽn mã amji jõr, ne ajkam me ipyxit peaj na me ijahkre pej. Ne hanea ne me amã, wa Inxũ Carõ Pejti kôt, me akam ikrĩ na ijahkre pej, na cu ha ajpẽn mã me amji gõ, ne ihhêj ne ajkam me pahpyxit peaj.

²¹— Ne por quê ha jũmjê ito amji kampa, ne ijarkwa kôt me ipa atajê, quê ha me cumã ikĩnti na me to ipipẽ to ipa. Ne quê ha hanea ne Inxũ mã, por jũmjê mã ikĩnti atajê kĩn, wa ha hanea ne imã mehkĩn, na wa ha me cumã amji to ajpẽ, mãr quê me ipupu ne me ijahkre pej pejtu ne — hane.

²²Mã me ikwỳ nõa pê ajtea mã Juta nõ ata, pê nee Juta Carijot nare ata te Jeju cukij to:

— Jũ mã ca ha ajte ne me imã pit mã amji to ajpẽ? Ne nee me cupê me akwỳ nare atajê mã amji to apipẽ nare? — hajỹr.

²³Mã Jeju cumã:

— Quê ha jũm mã ikĩn na, quê ha ihtỳj ite cumã ampo na ijarkwa jirên itajê na ikampa. Cwỳrjapê quê ha ihtỳj Inxũ mã ihkĩn, wa ha Inxũ me ajwar me cumã amji to ajpẽ, ne ajpẽn kam me ihônco, ne me cahê na me ipa rohnỳtti mã. ²⁴Nãmri quê ha jũm mã ikĩn nare na, quê ha nee ite ampo na cumã ijarkwa jirên atajê na ipar nare. Ne cute hajỹr xà ita kam jũmã wa ha ajte, ne me cumã amji to ajpẽ, ne ajpẽn kam me ihônco to ipa? Jũ wỳr wa ha me to hane — hane.

Carõ Pejti ri pahte me Pahpãm te amji kam hapac xà impar na me pahto

Ne cute me icunea mã:

— He wa ampeaj kam me amã awjarẽ. Pom wa icakôc xà to icakôc, ca ahna me ikampa itajê nee cupê icakôc xà nare, ne cupê, por pê Inxũ ajpên ikujate ata cakôc xà.

²⁵— Ne wa ita ri cormã ame acahê na imõr xà ita kam, ramã ite me amã ampo itajê cunea to icakôc partu. ²⁶Na quê ha Inxũ hacpỹ ne ajpên ijarkwa kôt me awỳr Carõ Pejti kujate, quê ha taa me atehcajpa, ne me amã ampo cunea to hahkre. Ne taa ite ampo to me amã icakôc xà itajê to, ate me amji japackre na me ato, ca ha me to amji japackre.

Quê ha Jeju me pahcaxwãm pê me pamã me pahcarĩcti gõ

²⁷— Ne wa ha me amã, pom wa icarĩcti kam ipa ita gõ, mãr ca nee amji mã ame ampo cupa nare, ne nee ampo cupate ame akrihkrit nare. Ampo na? He wa ha pa me apê ate amji mã me ampo cupa, ne ame akrihkrit xà atajê to hamre, ca ha atỳj ame apa. Ne wa ha nee ipê me cupê Inxũ na mehkwỳ nare atajê pyràc, ne ijarkwa cakrô to me amãn, ca ha me anõ akên nõ mã axàr nare, ne me apej pêa mã ame apa, ne quêt me acarĩcti kam ame apa. ²⁸Ne wa ramã ite me amã: “Wa ha ma tẽ, ne hacpỹa ne me awỳr amji jaxà, ne me acahê na apu ipa” hajỹr na, ate me ipar. Ampo na? He wa ha ma, por ijirôa pê Inxũ Cati ata wỳr amji jaxà. Ne quê ha me anõ mã ikĩn na, ihtỳj itẽm xà ita pyrên hakry. ²⁹Wa ha ampo itajê te ito hajỹr xà xwỳjrea na me amã harẽn to ipa, mãr quê jũ caxuw ito hane, ca ha amji mã me ito ampeaj kam pyrentu. ^30-31Ne jũ wỳr wa ha ahkri xa ne ame amã icakôc. Ampo na? Quê ha ahtũm nare, quê ha me pahwỳr me cupê Pahpãm na mehkwỳ nare atajê jõ pahhi, pê me pajõ xwỳn cato. Ne cupê me pajõ xwỳn cakrô, quê ha nee jũ na iton nare. Ampo na? Hirôa pê icarôt cati na ri. Ne pê ramã Inxũ imã: “Cama amji na me pajõ xwỳn jamã, quêt taa acura” hane. Na wa ha itỳj Inxũ te imã harkwa to hajỹr xà ita na kampa. Ampo na? Mehcunea te imã Inxũ kĩnti na me ijahkre pej prãmte, wa ha hane. Me to xa cu uu ne me — hajỹr. Wa ite me ajpẽn mã:

— Mẽr hacme — hajỹr.

Jeju pê pĩxô pàr pyràc

¹Ne wa cormã pry kôt me imõar kam, mã Jeju te me imã amji jarẽn to:

— He ipê pĩxô pàr ata pyràac, mã Inxũ pê pĩxô pàr ata jamãr catê ata pyràac, ne ma ijamã. ²Ne por amji mã me ito ihhimpej catêjê atajê pê ihhêj rũm ipajũhtê atajê pyràac. Cwỳrjapê quê ha nee jũm te amji mã ite amji kam ijapac xà impar nare na, quê ha ihtỳj Inxũ itête põ mã mẽn to hanea, pom quê hãn ne pĩxô pàr pajũhtê hô nare, mã hamãr catê hakep ne curẽ, ata jĩkjê na Inxũ te hajỹar. Ne quê ha pĩxô pàr nõ pajũhtê na hô pyxitre apu harij, quê ha hamãr catê hõmpu, ne intête ahna xà me, ahna ampo kên cunea harij atajê jũrên pa, cute cumã hô to hàhtôa to prãm to. Ita jĩkjê na mã Inxũ hãn ne cute amji mã me ito ihhimpej catêjê atajê to hane. Cute amji kam hapac xà kam, cute me ampo kên to me amji kam hapac atajê cunea jũrê, mã mempej, ne ma ijarkwa kôt, me hàpên xà impejti to amji mã me ipicamẽn to me ipa. ³Ne ramã Inxũ te, ite me amã ampo to hahkre itajêa kôt, cute me amã ate amji kam me gapac xà kên jũrên ne to impej. ⁴Nãmri quê ha pĩxô pàr pajũhtê nõ te impàt ne ihpỳm na, quê ha nee hô nare, ne cama incrà. Ita jĩkjê na, ca ha me anõ, ate ijarkwa kôt gàpên xà impejti to gàpên to apa nare, ne amjia kôt gàpên na, quê ha gàpên xà ata kôt apê hamreare ne. Cupate ca ha ikam me akrĩ kam me to acrà, wa ha hanea ne me akam ikrĩ kam to icrà. Na cu ha me ajpẽan, ne ajkam me pahpyxit peaj, ne atỳj ijarkwa kôt me apê. Ne me apê pĩxô pàr pajũhtê pejti ata pyràac, ne ampeaj kam me axô hũhhĩc itajê pê me gàpên xà jàhtôa ne impej.

⁵— Ipê pĩxô pàr cati pyràac, ne me apê ihpajũhtê pyràac. Quê ha pĩxô pàr pajũhtê nõ ipàar kam ihcuhhê, ne ihtỳj ahna hô. Ita jĩkjê na, ca ha ikam me akrĩ kam me to acrà, ne atỳj ijarkwa kôt me gàpên xà impejti to me gàpên to me apa. Nãmri ca ha ate ikam me akrĩ kam me to acrà nare, ne amjia kôt ame apa na, ca ha nee me ampo pejti ton nare. ⁶Quê ha jũm te ijicu, ne nee ikam ihkrĩ kam to incrà nare na, quê ha cupê, cute me pĩxô pajũhtê jakep mã incrà, mã cute me to cuprõn, ne cuhy kam me haxwỳr, ne me to caxàr ata pyràac. Quê ha jũm te ipê ampỳa mã apu ipa na, quê ha ihtỳj amji to acto. ⁷Ca ha ate amji mã me ito ahimpej kam me to acrà, ne atỳj ikam me gapac kam me to acrà na, cu ha me ajpẽan, ne ajkam me pahpyxit peaj, ca ha ampo na me iwỳ, wa ha itỳj me amã cugõ. ⁸Na ca ha ate ijarkwa kôt gàpên xà impejti jàhtôa to gàpên to apa na, quê ha ahna me apupu, ne apê ikôt me apa catêjê na me gõmpu, ne me akam ihtỳj me Inxũ catia to cati. Ne cute amji kam hapac xà impejti ata na me gahkre pej, ne hanea ne Inxũ, ihtỳj jũm te amji kam hapac xà to impej na hahkre pej.

Jeju mã me pajakryti na me papa na me pahto prãm

⁹— Ne pom Inxũ mã ikĩnti, mã ma ipupu ne ijamã ita na, wa ha hanea ne me ato, ne imã me akĩn, wa ha ma me apupu, ne ma me gamã. Cwỳrjapê ca ha nee amji tête ame ijarkwa curê nare, ne ikôat quêt ame apa, mãr wa imã me akĩn ita na. ¹⁰Wa hãn ne amji mã Inxũ jarkwa na kampa, na ri cumã ikĩn, ita na ca ha icuxà hãn ne ijarkwa na me ikampa, wa ha imã me akĩn ita na.

¹¹— Ne mẽr ampo na mã wa ame amã icakôc xà ita to icakôc? He icuxà me gakryti cunea kam me apa rohnỳtti mã na me ato prãm, cwỳrjapê wa ame amã icakôc xà ita to icakôc.

Cu ha me pamã ajpẽn kĩnti kam me papa

¹²— Ne wa hãn ne ijõtpê me amã ijũjarẽn to: “Pom imã me akĩnti ita cuxà, ca ha me amã ajpẽn kĩnti ne” hane. ¹³Imã me akĩn cràti ita kam, wa ha pa me icurê xwỳn mã amji gõ, quê ha me acwỳrjapê me icura. Ca ha cormã imã me akĩn cràti ita na me ijahkre pej.

Me papê, por Jeju te amji mã me pahcapi atajê jõ ikwỳ nõ

¹⁴— Ca ha ate ijarkwa kôt me gàpên na, ca ha me apê me ikwỳa to me ikwỳ. ¹⁵Ne imã, nee me apê cama me imã me gàpên catêjê atajê nare, ne me apê me ikwỳa to me ikwỳ. Ampo na? Nee mã ampo na nare. He cama me cumã me hàpên catêjê atajê pê me hõ pahhi te amji kam hapac xà jahkre kêatre, ne me ca nare. Wa itỳj quêt me amã, por Inxũ te imã ampo cunea jarẽn atajê jarẽn to ipa. ¹⁶He pê ca nee amji mã me icapi nare, ne pa pê wa quêt amji mã me acapi. Ampo na? Nee mã ampo na nare. He ijarkwa kôt ate me gàpên xà pejti ton to me apa to prãm to, pê wa amji mã me acapi. Ne me gàpên xà impejti atajê pê quê ha ampo pĩxô pejti te jũ caxuw hamre xà nare ata pyràac, ne ihcuhhê rohnỳtti mã. Cwỳrjapê ca ha ijaprỳa na ampo na me Inxũ wỳ, quê ha ihtỳj me amã cugõ. ¹⁷Ne wa ha hipêr me amã me ate me ajpẽn kĩnti xà ita na awjahkre.

Me cupê Pahpãm na mehkwỳ nare atajê ma ame cupê mehkwỳ atajê curê

¹⁸— Ne wa ha ma itẽm jakàn pê, quê ha me cupê Pahpãm na mehkwỳ nare atajê, ma ame acurê. Ca ha me acumam cute ame icurê na me to amji japackrea ne. ¹⁹Ne me cupê Pahpãm na mehkwỳ nare atajê mã mehkwỳ pê me hũràcti catêjê pit kĩn. Na quê ha me apê me hũràc na mã, quê ha ihtỳj me cumã me akĩn. Ne cama nee me apê me hũràc nare. Ampo na? He wa ite amji tekjêa na amji mã me acapi. Cwỳrjapê ri ma ame acaca ne ame acurê. ²⁰Ne curmã ite me amã ijũjarẽn xà ata to ca me amji japackrea ne. “Me cumã hàpên catêjê, nee me hõ pahhi catêjê jirôa pê me cati nare. Ne hanea ne nee me hõ pahhi japyre mã, me amji pupun to kên to me ipa nare” hajỹr. Na quê ha me cupê Pahpãm na mehkwỳ nare atajê, me imã ite amji pupun xà kêanre na me ito. Cwỳrjapê quê ha hanea ne ame ate amji pupun xà kêanre na me ato, ca ha ahna me amji pupu. Ne por me pyxitre amji mã me ijarkwa kampa atajê, quê ha hanea ne ihtỳj amji mã me akampa. ²¹Ne mẽr ampo na mã quê ha ate me amji pupun xà kêanre na me ato? Nee mã ampo na nare. He me apê ikôt me apa catêjê, na quê ha me ato hane. Ne hanea ne me cupê Inxũ te ajpên ikujahêc ata jahkre kêatre, na quê ha ma ame acurê.

²²— Na wa ite me cumã cute mehkên ton xà atajê intête me cumãn, ne me cumã harẽn prãmte, wa me hỹrmã icator. Mã cute me hahkre pej cakrô, ajte nee cute me ton jicu nare. Cwỳrjapê quê ha Pahpãm ame to kêanre ne. Wa ha icator ne me cumã, cute mehkên xà ton ita jarẽn nare na mã, quê ha nee me hahkre pej nare, quê ha Pahpãm xwỳjê nee ame to kên nare. Ne hamre, jũ wỳr quê ita caxuw, cute mehkên ton xà ata pê jũ kam me cato. ²³Ne por ma ame icaca, ne ame icurê atajê, hanea ne ma ame Inxũ caca ne ma ame curê. ²⁴Wa icator, ne me kam mare mã ite icarôt tỳjti to, rỳ jũ caxuw jũm te ampo pejti pihho ton nare atajê cunea ton par. Wa ha me kam mare mã ampo itajê ton nare na mã, quê ha nee Inxũ me cumã harkwa to: “Me apê ate me akên ton catêjê” hajỹr nare. Mã ajte cute ita na me ipupun cakrô, ajte ma Inxũ me ajwar ame icurê. ²⁵Ne pê ramã rỳ pêa mã Mojxe xwỳ ina ihhôc to hane he: “Wa ite ampo kên ton nare cakrô, mã ajte ma ame icaca, ne ma ame icurê” hane. Hajỹr ata na mã cute me iton he.

Pahpãm Carõ Pejti ri me pamã Jeju to hahkre

²⁶— Ne quê ha ampo kên itajê te ame ato hajỹr cakrô, ca ha nee ame amji mã pa, ne nee ame akrihkrit nare. Ampo na? He wa ha itỳj me amã Pahpãm Carõ Pejti te catyt kam me amã ampo to hahkre catê ata kujate. Quê ha me atehcajpa, ne me amã ihcunea na ikôt harẽn to hahkre. ²⁷Ne me ca, ca ha hanea ne mehcunea mã ikôt harẽn to me apa. Ampo na? He pê ca mam quêt ikôt me apa, na ri ihcunea na ramã me amã ijahkre pej.

Quê ha me pahte amji pupun xà kêanre ata nee me pahto jũ mãn nare

¹— Ne wa ha jũ caxuw ampo te ito hajỹr xà ata kam, ate ame icaca, ne ame imã hikran cupate, wa ite ramã me amã ampo itajê cunea jarẽn hiahpuro. ²Nãmri quê ha ihtỳj ikôt me cumã me acurê, ne quê ha cute me cuprõn xà jũrkwa pê, ihtỳj me gapôj. Ne quê ha mehkwỳ kwỳ te amji to me Pahpãm cajpuaw na me amji cãmjĩ xà to, quê ha ihtỳj hanea ne me acura. ³Ne ampo na quê ha ame ato hane? He me cupê ijahkre kêatre, ne me cupê Inxũ jahkre kêatre, na quê ha ame ato hane. ⁴Ne quê ha ampo itajê me ato hane, ca ha ite ramã me amã harẽn hiahpuro na, me ito amji japackre pyrentu. He pê wa mam aracri ame akôt ipa, ne nee ajco me amã ampo itajê jarẽn to hajỹr to ipa nare. Ampo na? Pê wa pa me apytàr to ipa na pê.

Quê ha Jeju me pamã Pahpãm Carõ Pejti kujate

⁵— Ne hamre, ramã ma hacpỹ mã ajpên cute ikujahêc catê ata wỳr ite amji jaxàr xàa kam ramã hàhhuc to mõ, na wa itỳj me amã ampo itajê cunea jarẽn to mõ. Ca nee ajte jũ kam itẽm xà ita na me icukij nare. ⁶Ne wa ramã ite me amã hacpỹa mã amji jaxàr xà ata na amji jarẽn, cwỳrjapê ri ajte me amã amji kĩn nare, ne me apeacre. He nee ame apec nare! ⁷He ampeaj kam wa me amã amji jarẽ, ne wa nee apu ihêj xi jarẽn nare he. Imãa hacpỹ mã ite amji jaxàr xà ita na ri me amã ihkênre nare. Ampo na? He wa hacpỹa ne amji jaxàr nare, quê ha nee ajpên Pahpãm Carõ Pejti te me atehcajpar catê ata me awỳr iwrỳc nare. Na wa ha ma tẽ, ne itỳj ajpên hacpỹ ne amji jaxà kam me amã ihkujate.

Quê ha Carõ Pejti hỹrmã me cupê mehkwỳ nare atajê pipkjêr na me to

⁸— Ne quê ha Inxũ Carõ Pejti te catyt kam me amã ampo to hahkre catê ata te me awỳr cator na, quê ha taa me cupê Pahpãm na mehkwỳ nare atajê mã ampo crê atajê to hahkre, quê hame hahkre pej. Atajê pê, cute me ampo kêanre ton xà na cute me amji jahkre pej xà me, cute catyt kam imã ite amji kam ijapac xà to impejti jahkre pej xà me, jũ caxuw Pahpãm te, cute me hàpên xà ton na amehcukij na cute me hahkre pej xà. Hõ, ampo crê itajê to, quê ha Inxũ Carõ Pejti ata cute me hahkre pej na me to he. ⁹Quê ha Carõ Pejti, por nee ito amji mã mehhimpej nare ne ame ampo kêanre ton to ame ipa atajê na, cute me amji jahkre pej na me to. ¹⁰Ne quê ha hanea ne ipê Pahpãm mã catyt kam ipa catê na, cute me ijahkre pej na me to. Na wa hama hacpỹ mã Inxũ wỳr tẽ, ca ha nee me ipupun to acuhhê tu nare. ¹¹Ne quê ha hanea cute mehkên ton xà atajê jahpan xà na, Inxũ te mehcukij ne mehkên mã me irẽn na, cute me hahkre pej na me to. Na ri cute me ampo kên ton xà itajê jõ pahhi pê Xatanaj ata kên mã mẽn xàa kam xa.

Quê ha Pahpãm Carõ Pejti me pamã, ampo cunea to hahkre

¹²— Ne cormã ampeaj kam imã me amã ampo jarẽn xà itajê jàhtô, wa me amã ampo itajê cunea jarẽ na mã, ca ha nee mempar, ne me hahkre pej nare. ¹³Ne nee ita na cute me amã jũ mãn nare. Ampo na? Quê ha jũ caxuw Inxũ Carõ Pejti te catyt kam me amã ampo to hahkre catê ata ajpên me awỳr cato, ne ta ame amã ampo itajê cunea to hahkre pa. Ne catyt kam, harkwa kôt, Inxũ te amji kam hapac xà impejti itajê to pit mã me amã hahkre, ne nee mã, quê ha amjia kôt me amã to hahkre nare. Ne me amã, por ajpên cormã me awỳr ampo cator nare atajê to hahkre. ¹⁴Ne me akam mare mã amji mã icatia to icati na ijarẽ, ne cute amji mã me icupa na me to, quê ha ihtỳj amji mã me icupa. Ampo na? He quê ha icakôc xà to pit mã ihcakôc, na quê ha hane. ¹⁵Ne por Inxũ mã ampo cunea atajê te hajỹar, ne cupê itekjê. Na wa ha Pahpãm Carõ Pejti mã ampo jarẽ, quê ha ma me amã to awjarẽ.

Pê Jeju hacpỹa mã ihtĩr na me cumã amji jarẽ

¹⁶— Ne quê ha ina amcro hàhtô nare, ca ha nee hipêr me ipupun nare. Ne hanea ne ina amcro hàhtô nare, ca ha hacpỹa mã me ipupu — hajỹr. Jeju te me imã amji jarẽn to hajỹr.

¹⁷Wa ite me ajpẽn cukij kam me itẽm, ne me ajpẽn mã:

— Ne mẽr ampo na mã tee ame pamã amji kôt harẽn to hahkre. Ne ajte amji jarẽn to: “Quê ha ina amcro hàhtô nare, ca ha nee hipêr me ipupun nare. Ne hanea ne ina amcro hàhtô nare, ca ha hacpỹa mã me ipupu” hane. Ne hanea ne ajte amji jarẽn to: “Ita cwỳrjapê wa ha ma hacpỹ mã Inxũ wỳr tẽ” hane. ¹⁸Ne mẽr ampo jarẽn xà pê mã: “…amcro hàhtô nare…” ita? Wa nee me ite ihcakôc xà itajê nõ na mempar, ne me hahkre pej nare — hajỹr.

¹⁹Mã ampo na ite me Jeju cukij prãm ata na cute me hahkre pej pyrentu, cwỳrjapê ri me imã:

— Xà ite me amã: “Quê ha amcro hàhtô nare, ca ha nee me ipupun nare, ne ina amcro hàhtô nare ca ha hipêr me ipupu” ata na mã ca ame ajpẽn cukij? ²⁰Ampeaj kam wa ha me amã ijũjarẽn xà ita to awjarẽ. Ca ha atỳj jũ caxuw ame amrã, ne me amã amji kĩn nare ne, ne me apeacre ne. Ne me cupê Pahpãm na mehkwỳ nare atajê, quê ha ihtỳj quêt ame hakry. Cakrô, quê ha hacpỹ ma mã mam me amã amji kĩn ata jirôa pê me amã amji kĩn. ²¹He pom hãn ne me cahãj mã mehkra hà mã me cumã amji kĩn nare, mã me cumã ajhu, mã hacpỹ ma mã mehkàj xà to me hapac kêt, ne me cumã amji kĩn, ne me cumã mehkra pỳpỳm pyrên ame hakry, ita jĩkjê na ca ha me hanea. ²²Ne amcro itajê kam me amã amji kĩn nare cakrô, cu ha hipêr me ajpẽn pupu. Jirô pê mã quê ha me amã amji kĩan to amji kĩn ata, quê ha nee jũm me apê caxàr, ne me apê to hamre nare.

Cu ha Jeju japrỳa na me Pahpãm mã me pahcakôc

²³— Ata caxuaw ca ha nee hipêr ampo na me iwỳr nare, ne me apê me ikwỳ te hajỹr romã mã, ca ha ijaprỳa na, ampo cunea na ate Inxũ na me gàhwỳr xà atajê, quê ha ihtỳj me amã cugõ. ²⁴Ca ajte nee cormã me ate ijaprỳa na ampo na me Pahpãm wỳr nare. Na ca ha ita caxuw atỳj ijaprỳa na ampo na me Inxũ wỳ, quê ha ihtỳj me amã cugõ, ca ha me acwa, ne me to mam me amã amji kĩnti ata ràn, quê ha me girô pê ihpỳm tu ne.

²⁵— He wa nee cormã hirãa pê me amã ijũjarẽn xà itajê jarẽn to ipa nare, ne incwỳrpê me amã harẽn to ipa. Ne wa ha jũ caxuw quêt hirãa pê me amã Inxũ te amji kam hapac xà jarẽ, ne me amã to ajpẽ. ²⁶Ne ca ha jũ caxuw me apê me ikwỳ te hajỹr romã mã ijaprỳa na ampo na me Pahpãm wỳ, wa ha nee hipêr ahna cumã me acajrẽn to prãm nare. ²⁷Ampo na? He ihtỳj ita caxuw cumã me akĩn, cwỳrjapê quê ha taa me akampa, ne me amã ampo atajê gõ. Ampo na ri cumã me akĩn? He ca ihpĩan icator xà na amji mã me ito me ahimpej, ne me amã ikĩnti incwỳrjapê ri ihtỳj cumã me akĩn. ²⁸Ne wa Inxũ pĩn ajpên pjê ita wỳr icator, na wa ha ita caxuw pjê ita re, ne ma hacpỹ mã hỹrmã tẽ — hajỹr.

Pê Jeju ihkôt me ipa catêjê mã cute me cumã hikran na harẽ

²⁹Wa ite me cumã:

— Hamre, ca ita caxuw hirãa pê gũjarẽn xà itajê kôt harẽn to mõ. Ne nee incwỳrpê me imã ihkôt harẽn to amõr nare. ³⁰Na wa ita caxuw, ite me ate ampo cunea jahkre pej na me gahkre pej, ne amã cute ampo na me acukij xà xwỳjrea na, ramã amã me hahkre pej, me hàhcukjêr xà atajê na. Cwỳrjapê wa ita caxuw itỳj Pahpãm pĩn acator na amji mã me ato ihimpej — hajỹr.

³¹Mã me imã:

— Xà ita kam cormã, ajkĩ ate amji mã ito me ahimpej? ³²Co he, nãmri ramã ihhêj ne ipê me apicràn xàa kam hàhhuc to mõ. Ca ha atỳj me irer pa, ne ma ame gũrkwa wỳr me pra, wa ha ahte ahtwỳ cakrô, wa ha nee ahte ijàhhuc nare. Ampo na? Quê ha ihtỳj Inxũ icahê na apu mõ. ³³Ne ame akrihkrit cupate, wa mam ite me amã ijũjarẽn xà itajê to ijũjarẽn. Mãr ca ikam me amji hônco, ne me acaxwãm pê me acarĩcti ne. Ne pjê ita kam, me cupê Pahpãm na mehkwỳ nare atajê kam, ca ha ame amji pupun xà kêanre to ame amji pupu. Cakrô, ca ha nee ame cumã me apec nare, ne me cumã amji to ihtỳaj ne. Ampo na? He wa ramã me hõ pahhi mea mã ite me tohjê, ne me hirô pê ixãm — hajỹr.

Pê Jeju Hũm Cati mã amji cajrẽn

¹Jeju te me imã hũjarẽn to hajỹr jirô pê mã ri kàj mã, côjkwa wỳr irĩt, ne cute Hũm mã:

— Ỹhỹ Inxũ, hamre ramã ityc xàa kam hàhhuc. Inxũ, ipê akra catia to icati na, cute me ijahkre pej xà na me to, quê mehcunea me ijahkre pej, mãr wa hanea ne acatia to acati na, cute me gahkre pej xà na me to, quê mehcunea gahkre pej. Cwỳrjapê ca ha hacpỹa mã ityc jirô pê ito itĩr ne amji wỳr ijaprô. ²Ne pê ca imã garkwa hyr to hane he: “Pjê wỳr ate acator, ne ate amji to me hõ Pahhiti na, ne mehcunea to ahimpej xà caxuw, ramã ite amã acarôt jõr. Ne wa ha amã me hàhtôa ne cugõ, ate me to gõ tekjê xà na, quê ha ato amji mã mehhimpej, mãr quê pahcahê na amji to me ipijapar rohnỳtti mã” hane. ³He apyxit peaj ne quêt apê Pahpãm, ne nee aràn xà na jũm pê Pahpãm nare. Ne ipê por ate Jeju Crixtô kujahêc ata. Ne me pahkwỳ te me pajahkre pej, cwỳrjapê quê ha me pahcahê na amji to me ipijapar rohnỳtti mã. ⁴Ite ramã acatia to acati na pjê ita kam, cute me gahkre pej xà na me ton. Ne ate imã ijàpên xà jõr ata, ramã ite hipêj xàa kam. ⁵Ne pê wa ramã ate pjê ton xwỳjrea na mam acahê na ipa, pê amã icatia to icati. Na wa ha ita caxuw ma awỳr amji jaxà, ca ha amji cuna mã hacpỹa mã ito icatia to icati.

Pê Jeju Hũm Cati mã ihkôt me ipa catêjê cajrẽn

⁶— Ỹhỹ, pê ca imã me cupê me akwỳ atajê gõ, ite me cumã ate amji kam gapac xà to hahkre, mã cute me gahkre pej prãmte. ⁷Na ri ihtỳj cute me garkwa kam hapac. Ne ihtỳj ita caxuw arũam iwỳr me cumã ampo cunea imprar na hahkre pej. ⁸Na wa ite, ate me cumã icakôc xà na gũjahkre xà atajêa to, wa ite me cumã icakôc, mã ihtỳj cute mempar, ne ahna me amji caxàr. Ne ihtỳj amji mã ate ajpên me hỹrmã ipyxit peaj ne ikujahêc na me ato hane. Ampo na? He nee mã ita pê ahêj xi xà nare, ne ampeaj kam ri.

⁹— Ne wa itỳj amã mehcajrẽn, ne nee mehkôt amã mehcunea pê me pahkwỳ nare atajê cajrẽn nare, ne por ate me imã hõr atajê pit, wa amã mehcajrẽn. Ampo na? Me cupê gõ tekjêa, na wa apu mehcajrẽn. ¹⁰Ne mehcunea pê itekjê atajê pê atekjê, ne mehcunea pê atekjê atajê pê itekjêa. Cwỳrjapê ri pahkôt me ipa catêjê atajê kôt, cute ramã icarôt tỳjti, ne icatia to icati na me ipupun. ¹¹Ne wa ha ma hacpỹ mã awỳr amji jaxà, quê ha ahte pjê kam cormã me ahtwỳ ne ame ipa. Inxũ, ampeaj kam apeaj to apej. Cwỳrjapê ca ha ca atỳj acarôat to me pahkwỳ jamã. Ampo na? He ampeaj kam acarôt tỳj, na pê ca imã icarôt tỳjti ita gõ. Cwỳrjapê ri ajkam pahpyxit peaj. Mãr quê me pahkwỳ itajê pê me pahpyràac, ne me ajpẽn hônco tu ne, cute pahcuxà ajkam me pyxit peaj prãmte. ¹²Pê wa pjê kam cormã ame cahê na imõr reria mã, itỳj, por ate imã acarôt jõr ata to ajco me hamãr to me hũtàr to ipa. Mã nee ijũhkra pê mehnõ cator, ne ipictor nare. Ne por ramã gõ kàhhôc te jũm pyxit peaj ne, ne cupê Juta Carijot ata ipictor na harẽn ata ri, amjia kôt ahnaa cute amji to ipictor.

¹³— Ne wa hacpỹ mã ite awỳr amji jaxàr xwỳjrea na, cormã pjê kam ame cahê na imõr reria mã me cumã garkwa cunea to hahkre to ipa, mãr quê me hahkre pej, ne me cumã amji kĩnti ne. Pom wa ahnaa mã imã amji kĩn na amji cajpẽ ita na, quê icuxà me amji cajpẽ. ¹⁴Wa ite ramã me cumã garkwa to hahkre, ne me cumã hõr. Mã me cupê ipyràac, ne nee me cupê pjê ita tekjê nare, cwỳrjapê ri me cupê pjê tekjê atajê ma amehcaca, ne ame curê. ¹⁵Ne wa ha me cumã ana ahwỳ, ca nee cormã ne pjê ita pê amji wỳr me haprôr nare, ne ma cama me ahna me pahcurê xwỳn jamã, ne me cupê me hũtà, mãr quê nee ihkôt me amji kam hapac nare. ¹⁶Ne cute me amji kam hapac xà pê ite amji kam ijapac xàa pyràc, na ri nee me cupê pjê tekjê atajê te amji kam hapac xà pyràc nare. ¹⁷Ne garkwa cakôc xà itajê nee ihhêj xi jarẽn nare, ne ihtỳj cute catyt kam me ipa xà caxuw me hapackre, mãr quê ihtỳj me awpa, ne catyt kam me ipa. Na quê ha me cupê atekjê. ¹⁸Ne pom pê ca pjê wỳr ikujate ita na, wa ha me to, ne pjê cunea kôt ame cucrà, quê ha ame cumã pajarkwa pejti ita to hahkre to me ipa. ¹⁹Ne wa ite ijàpên xà caxuw amã amji jõr ita na quê ha me amã amji gõ, ne ihtỳj me amã me hàpên to me ipa.

Pê Jeju Hũm Cati mã mehkwỳ cunea cajrẽn

²⁰— Ỹhỹ Inxũ, wa ha nee me pahkwỳ crêre itajê caxuw pit mã ana ijàhwỳr nare. Ne hanea ne cute cormã jũ caxuw mehkôt me ikam hapac ne ito amji mã mehhimpej atajê mã, wa ha ana ahwỳ. ²¹Ne imã cute me amji kam hapac xà pyxit peaj na mehhôncoti na me to prãm. Pom ahnaa mã pamã pahte amji kam pajapac xà pyxit peaj he, ita to cute me amji kam me hapac na ri, imã me to prãm. Ita na quê ha me cupê me pahkwỳ nare atajê cute amji kam me hapac xà pyxit peaj na me hõmpu, ne ihtỳj ate ikujahêc na me gahkre pej. ²²Ne pom ate ito icati ita na, wa ite me to cati, na ri cute amji kam me hapac xà pyxit peaj na me amji hônco tu, ne me pyxit peaj te hajỹar, pom cu ajkam pahhônco, ne pahpyxit peaj he. ²³Ne ampo na mã wa ame cumã ana ijàhwỳr to hane? Nee mã ampo na nare. He mehcunea mã cute amji kam me hapac xà pyxit peaj to prãm to, wa ame cumã ana ahwỳ, mãr quê mehcunea me hõmpu ne ate ikujahêc na me gahkre pej. Ne pom amã ikĩnti ita na, quê ha amã mehkĩnti na cumã me gahkre pej.

²⁴— Ỹhỹ Inxũ, por ate imã me hõr atajê me pahcahê na amji to me ipijapar na, imã to prãm. Ne ca ha me kam mare mã ate ito icati, mã cute me ipupun, ne me ijahkre pej. Na ca ha atỳj ito hane. Ampo na? Pê ca ramã mam pjê ton xwỳjrea na amã ikĩnti, na ca ha ito hane.

²⁵— Inxũ, he ca quêt catyt kam akrĩ ita na, ne ita ri pjê kam mehcunea pê gahkre kêatre. Ne pa nare, ihtỳj quêt imã catyt kam akrĩ ita na gahkre pej. Ne por ate imã me hõr atajê te hajỹar ne ihtỳj ate ikujahêc na me cumã gahkre pej. ²⁶He wa ite me cumã garẽn, mã cute me gahkre pej. Ne wa ha me cumã garẽn to ixãm ita na, mãr quê me cumã ajpẽn kĩn to hanea, pom quê amã ikĩn he. Ne ite amji kam ijapac xà pyxit peaj ata to pit mã me amji kam hapac to me ipa, mãr wa ajpẽn kam me ipyxit peaj — hajỹr.

Pê krãhtare te Jeju pro

¹Ne Jeju te Hũm mã ihcakôc to hajỹr jirô pê mã ri ma me ipê ihkôt me ipa catêjê to mõ, Kỳhti jõ caprũm jĩkjê wỳr. Mã curi pĩxô jõ pjê ata, wa cumã me ixàr.

²Pê Juta pê Jeju kên mã mẽn catê ata ramã pjê ata jahkre pej. Ampo na? Pê Jeju ramã curi me ito ipa to hàhtôa na pê. ³Mã ma me iwỳr Juta ata krãhtare kwỳ to mõ, mã hanea ne mehkôt Pahpãm jũrkwa jamãr catêjê kwỳ me mõ. Ne pê Pĩxô jõ pjê ata wỳr me mõ atajê pê, me cumã Pahpãm mã mehcajrẽn catêjê jõ pahhi kwỳ me, Parixêw catêjê kwỳ me, me ajpẽn pa, na pê me harkwa kôt me iwỳr me hàprê xà me, ihpôc xà me, cuhy pàr kwỳ me, me to mõ.

⁴Pê ramã Jeju ampo te to hajỹr xà atajê cunea jahkre pej. Cwỳrjapê ri me cuna mã mõ, ne cute mehcukij to:

— Jũm mã ca ame hapê? — hajỹr. ⁵Mã me cumã:

— Naxare jõ krĩ pĩn Jeju cator ata wa ame hapê — hane. Mã hanea ne Juta pê Jeju kên mã mẽn catê ata me cahê na xa. Mã Jeju me cumã:

— He pa wa! — hane. ⁶Mã Jeju te me cumã amji jarẽn to: “He pa wa” hajỹr, me ajkaam mã hũpate Juta kôt me ipa catêjê cunea, hacpỹ mã pjê kam me hõ to ame ipihur.

⁷Mã hipêr Jeju te mehcukij to:

— Jũm mã ca ame hapê? — hajỹr. Mã me cumã:

— Naxare jõ krĩ pĩn Jeju cator ata wa ame hapê — hane. Mã me cumã amji jarẽn to:

⁸— Wa ite ramã me amã amji jarẽn, he pa wa. Ne ca ha ate ame pamãn japên na, ca ha nee ame ikwỳ caxun nare, quêt taa ame pra — hane.

⁹Ampo na ri cute ita ton? Nee mã ampo na nare. He pê ramã taa me ahna Hũm mã amji jarẽn to: “Ijõ Inxũ Cati, ate imã me hõr itajê, ite nee amji pê mehnõ to ipictor xà nare” hane.

Pê Petrô jũm ita japac jakep

¹⁰Mã Ximãw Petrô te wapo xwahhihti caxàr, ne to hũmre nõ japrỳ te Marco ita jaxôp, ne awpôc rũm to hapac jakep. Ne pê hũmre ata pê Pahpãm mã mehcajrẽn catêjê jõ pahhi mã hàpên catê. ¹¹Mã Jeju te Petrô mã harkwa to:

— Ajõ wapo xwahhihti ita xi, nee ca apu to me cupê ipytàr prãm nare. He ite amji pupun xà kêanre xà ita caxuw ri Inxũ te ajpên iwỳr mehkujahêc. Xà wa ha ajkĩ nee cumã ixàr nare? Wa ha itỳj cumã axà — hajỹr.

Jeju Anati cuna mã xa

¹²Mã krãhtare me, to ihhimpej catê me, Pahpãm jũrkwa jamãr catêjê jõ pahhi kwỳ me, cute me Jeju pro, ne hũntỳj na mehcajpre. ¹³Ne pê Cajpa pê caku ata kam, me cupê Pahpãm mã cute mehcajrẽn catêjê jõ pahhi. Ne ma Cajpa ata jũprequêt pê Anati ata jũrkwa wỳr me to mõ. ¹⁴Ne Cajpa pê pahhi ata pê ramã me hapackre to hane he: “Quê ha jũm xũmre pyxit peaj ne ty, cu ha nee me pahcunea me pahtyc nare” hane.

Pê Petrô cute nee Jeju pupun nare na, amji jarẽ

¹⁵Wa ma Ximãw Petrô me, Jeju kôt me mõ. Pê ramã Pahpãm mã cute mehcajrẽn catêjê jõ pahhiti ata ipupun pejtu. Cwỳrjapê wa ma Jeju kôt ixàr, pahhi jũrkwa jarkwa mã carã intête kwỳc ata wỳr. Mã cormã curia, põ pê Petrô xa. ¹⁶Wa ite harkwa jamãr catê cahãj nõ ata mã icakôc, ikwỳ nõ Petrô te ikôt hàr xà caxuw. Mã ihtỳj cute hàr na hamãr, mã hàr. ¹⁷Mã cahãjre te hõmpun ne cumã harkwa to:

— Xà apê, por cute me jũm pro ata kôt apa catêjê nõ amã ca? — hajỹr. Mã cumã:

— Quê! — hane.

¹⁸Ne ampeaj kam kry, cwỳrjapê ri pahhi mã me hàpên catêjê me, krãhtare te me cuhôn, ne mehkrã ne ahna me xa, ne ame amji cro. Mã hanea ne me cahê na Petrô xa ne amji cro.

Pê Jeju cute Pahpãm mã mehcajrẽn catêjê jõ pahhiti cuna mã xa

¹⁹Mã Pahpãm mã mehcajrẽn catêjê jõ pahhiti te Jeju cukij ne cumã:

— Jũmjê pê mã akôt me ipa catêjê? Ne ampo to mã ca amehcunea mã hahkre to apa? — hajỹr.

^20-21Mã Jeju te cumã amji jarẽn to:

— He wa ijõtpê mehcunea kam mare mã icakôc to ipa. Ne ramã cute Pahpãm to me amji kam hapac xà jũrkwa me, cute me cuprõn xà jũrkwa atajê kam, ite me cumã ampo to hahkre to amji pyràc tu. Ne rỳ jũ caxuw ite ampo to ipimxur pêa mã apu harẽn to imõr nare, nõ na mã ca ajte apu icukij xà ita to icukij? Ne cute me ipar catêjê ca mehcukij, wa ite ampo jarẽn xà atajê na, cute me ipar to kênre nare. Na ca ha mehcukij — hajỹr.

²²Jeju te ihcakôc to hajỹr. Mã cahi na krãhtare xa ata te cakwĩn, ne cumã harkwa to:

— Xà ajkĩ Pahpãm mã mehcajrẽn catêjê jõ pahhi mã me pahcakôc xà te hajỹr? — hajỹr. Mã Jeju cumã:

²³— Wa ihhêaj to ampo jarẽn xà kaj na harẽ, ca ha mẽr imã harẽ, wa hahkre pej. Nãmri wa ha ite ampeaj kam ijũjarẽn na, ca ha nee icakwĩn nare. Ne mẽr ampo na mã ate icakwĩn? — hane.

²⁴Jirô pê mã ri Anati pê amji jahkre kêatre, mã cute Jeju cajprea na Cajpa, pê cute Pahpãm mã mehcajrẽn catêjê jõ pahhi ata mã ihkujahêc.

Pê hipêr Petrô cute nee Jeju pupun nare na amji jarẽ

²⁵Mã curia cormã cuhy na Petrô xa, ne amji cro. Mã cute mehcukij to:

— Xà apê cute me jũm pro ata kôt me apa catêjê nõa mã ca? — hajỹr. Mã me cumã amji jarẽn to:

— Quê, he nee ipê mehnõ nare — hane.

²⁶Mã pahhi mã hàpên catêjê nõ pê, por Petrô te jũm japac jakep ata jũkjê nõ ata, te Petrô jarẽn to:

— Mãr wa ite Pĩxô jõ pjê kam ihkôt apupun ta? — hajỹr. ²⁷Mã hipêr Petrô cumã:

— Quê — hane, me ajkaam mã hôxãhxãc kàr.

Pê Jeju Roman catêjê jõ pahhi pê Pirat cuna mã xa

²⁸Jirô pê mã ri Roman catêjê nõ pê krĩ jõ pahhi jũrkwati ata wỳr Jeju to me mõ, ramã apẽ intuwti kam. Mã nee ikre ata mã Juta catêjê nõ xàr nare. Ampo na? Cute me amji to me amji kam hapac xàa na pê me hane. Quê ha ramã amji kĩn ata na ahtêp, quê ha nee Juta catêjê me, mehcahkrit catêjê atajê pê Juta catêjê nare atajê jũrkwa mã amencjêj nare. Ampo na? Cute amji kĩn ata japy ame amji to kên cupate. Na pê nee ikre ata mã Juta catêjê nõ hàr nare, cute ihtỳj me Hakren xà jõ atajê kur prãmte. ²⁹Mã Pirat pê Roman catêjê nõ pê krĩ jõ pahhi ata cator, põ mã, cute mehcajpar prãmte. Ne cute mehcajpar ne me cumã:

— Hũmre ita jarẽn kên jũ to mã, ca ha ame imã harẽ? — hajỹr.

³⁰Mã me cumã harẽn to:

— Quê ihkên nare na mã, wa ha nee mehpro ne awỳr me to imõr nare — hane. ³¹Mã Pirat me cumã:

— Ca ha caa quêt, ate me amji kam me gapac xàa kôt, me ate me amji ton xàa kôt, mehcukij ne ihkên mã me amẽ — hane. Mã Juta catêjê me cumã:

— Pom hũmre ita te ihkên xà ton xà ita ihtỳj ihcuran na awjahkre. Cakrô wa nee amjia kôt ite mehcuran xà nare, ne apêa ri pahhi, cwỳrjapê ca ha caa amji kampa, ne ihcuran na me imẽ, wa ha cormã mehcura — hane.

³²Ne pê ramã Jeju kỳj pê, pĩ na ajêt ne ihtyc to mõr na amji jarẽa na pê, Juta catêjê cakôc xà ata ramã cute amji jarẽn xà ata na to ipipẽ to mõ.

³³Mã hacpỹa mã Pirat xàr, hũrkwa mã, ne cute Jeju mã hàkjêr ne ihcukij to:

— Xà apê Juta catêjê jõ Pahhi? — hajỹr.

³⁴Mã Jeju cumã:

— Xà amjia kôt ate icukij xà ita to hajỹr? Nare jũmjê te amã ijarẽn xà kôt mã ca ate icukij ita to hajỹr? — hane.

³⁵Mã Pirat cumã:

— Côt mã ca atỳj ipê Juta catêjê nõ na apu icãmjĩ? He me akwỳa kwỳ me, me hõ pahhi catêjê te ri imã me gõr. Ne mẽr ampo to mã ate jũ mãn? — hane. ³⁶Mã Jeju cumã:

— He ihimpej xà ita pê nee pjê ita tekjê nare, ne quêt côjkwa kam ri ihimpej xà. Wa ha ipê pjê ita kam pahhi xà na mã, quê ha ramã ikôt me ipa catêjê ihtỳj itête me ajpu, Juta catêjê mã cute me ijõr to hajỹr cupate. Ne nee pjê ita kam ipê pahhi xà nare — hane.

³⁷Mã Pirat cumã:

— Xà mẽr apê pahhi? — hane. Mã Jeju cumã:

— Pom ca atea ita na ijarẽn ita? Ampeaj kam ri ipê Pahhi, ne ite catyt kam amji kam ijapac xà jarẽn to ipa xà caxuw, wa pjê ita wỳr icator, ne caxuaw pê wa ipỳm, ne pjê ita wỳr ajpên mõ. Ne por quê ha jũm ampeaj kam ite catyt kam amji kam ijapac xà ata na ito amji mã ihhimpej ata, quê ha ihtỳj ikôat amji to — hane. ³⁸Mã Pirat cumã:

— Ne mẽr ampo pê mã “…ampeaj kam…” me “…catyt kam…” ita? — hane.

Pê Pirat Parapa mã hikra

Jirô pê mã ri hipêr Juta catêjê wỳr cator, cute me cumã ihcakôc prãmte, ne me cumã:

— Wa nee ite hũmre ita curan xà caxuw kam ampo kên nõ mã icator nare. ³⁹Ne me Hakren xà jõ amji kĩn ita cunea kam wa hãn ne itỳj me amã me hacjên catêjê pyxit ne hapôj. Xà wa ha ajkĩ Juta catêjê jõ Pahhi ita mã hikra? — hajỹr.

⁴⁰Mã mehcunea ame caràr to:

— Quê, nee ca cumã hikran nare, Parapa mã, ca ha hikra — hane. Ne por Parapa ata pê ri hàprêa kam me cupê ampo to pôj catê.

Pê krãhtare Jeju cahhy ne ahna xwỳ

¹Mã Pirat te krãhtare kwỳ mã pryti kà kam wakỳre to Jeju cahhyr kêanre na harkwa. ²Mã krãhtare te me to hapactu na me ajpẽn par, ne me amji mã:

— Hacme, ne ame to pajapactu — hajỹr. Ne cute hômjĩ to me cumã pahhi krãhkà, ne ihkrã mã me haxàr. Ne cute me hõ pahhi kà intepti ata mã me haxàr, ne ahna me hãm, mã xa. ³Mã hỹrmã me pra ne ahna me ahtêp ne me ahna xwỳ to:

— Hàpà Juta catêjê jõ pahhi, ampeaj kam apej, ne ampeaj kam atỳj! — hane. Ne ajco me hũhkra krã to mehcahhy.

⁴Mã hipêr me hàhtôti atajê wỳr Pirat cator, ne me cumã:

— Me ikampa! Wa ha ajpên Jeju ita to mõ, ne me acuna mã hãm. Ne imãa ihhêj ne nee cute ampo kên ton nare, ite ihcuran xà caxuw. Ne mẽr ampo na wa ha ajte ihcura? — hane. ⁵Mã Jeju cator, ne ihkrã na hômjĩ te me hõ pahhi krãhkà ata ajêt, mã ihkà intepti kam xa. Mã Pirat te me cumã harẽn to:

— Nãmhã hũmre ita xa he! Me hõmpu, imãa ramã ihhêj ne cute amji pupun xà kêanre na amji pupun — hajỹr.

⁶Mã Pahpãm mã mehcajrẽn catêjê jõ pahhi kwỳ me, cute me Pahpãm jũrkwa jamãr catêjê me, cute me Jeju pupun, ne me caràr kam me to ihtẽm, ne me caràr to:

— Pĩ kam me axô! Pĩ kam me axô quê ty! — hane. Mã Pirat me cumã:

— Wa nee ite kam ampo kên mã icator nare ita kam, wa nee ihcuran nare. Quê ha me amã ihcuran prãm na, ca ha me caa, ate amji kam me gapac xàa to me to mõ, ne pĩ kam me axô ne mehcura — hane.

⁷Mã Juta catêjê me cumã:

— Me icaca xà jõ kàhhôc kam, cute harẽn to: “Quê ha jũm te cupê Pahpãm kra na amji jarẽn na, quê ha ihtỳj mehcura” hajỹr. Cwỳrjapê ca ha atỳj ite mehcuran xà na me imẽ, wa ha mehcura — hane.

⁸Mã Pirat te, Jeju te Pahpãm kra na amji jarẽn na, me harẽn par, ne ampeaj kam cumã hũpa. ⁹Mã ma hacpỹ mã hũrkwa mã hàr, ne cute Jeju cukij to:

— Jũ pĩn mã ca ajte acator? — hajỹr. Mã nee Jeju te cumã jũ mãn nare. ¹⁰Mã Pirat te cumã harkwa to:

— Xà amã imã acakôc prãm nare? He xà amã itỳj ite acuran xà me, amã hikran xà na, apê ijahkre kêatre? — hajỹr.

¹¹Mã Jeju cumã:

— Quê ha kỳj rũm côjkwa kam Inxũ pĩn ate ito hajỹr xà ita caxuw amã acarôt cator nare na mã, ca ha nee ito jũ mãn nare. Ne por jũmjê te amã ijõr atajê te ri girôa pê ito kêanre — hane.

¹²Mã Pirat te ihcakôc xà ata na kam hapac, cwỳrjapê ri ihtỳj cumã Jeju mã hikran prãm cakrô, mã Juta catêjê ame cumã caràr to:

— Ca ha ate cumã hikran na, ca ha nee ramã apê pjê cunea jõ pahhiti pê Xexa ata jõ ikwỳ nõ nare! Ne por jũm amã cupê pahhi na amji jarẽ ata pê ri gõ pahhiti, ne cupê Xexa curê xwỳn! — hane.

¹³Mã Pirat te ita kam hapac, ne põ mã Jeju to cator. Por põ pê kẽn te ihcahty, mã Juta catêjê te me harkwa na me cumã haprỳ to Capata ata wỳr Jeju to cator, mã xa. Mã Pirat te ihkrĩ xà kam mehkên catêjê cukij xà ata kam hỹr, cute Jeju kên mã mẽn xà caxuw. ¹⁴Ne pê amcro ata kam, cute me Hakren xà jõ amji kĩn kam me to ihtẽm xwỳjrea na, ramã pyt ajmãr me pahkrã jimoac kam hỹr kam pê me to hane. Mã Pirat te Juta catêjê mã hũjarẽn to:

— Ihnãm hã, me gõ Pahhi xa he! — hajỹr.

¹⁵Mã cute me caràr to:

— Quê ha ty! Pĩ kam me axô, quê ty! — hajỹr ita na. Mã Pirat me cumã:

— Xà me amã pĩ na me gõ Pahhi ita xôr, mã kam ihtyc na to prãm? — hane. Mã Pahpãm mã mehcajrẽn catêjê jõ pahhi kwỳ te me cumã harkwa to:

— Me imã Roman jõ krĩ kam, pjê cunea jõ pahhiti pê Xexa pê me ijõ pahhiti ata pyxit peaj. Na ri nee iràn xà na me imã me ijõ pahhi nõ hamreare — hajỹr.

¹⁶Mã hamre Pirat te pĩ na cute me Jeju xôr xà caxuw me cumã hõr, mã ma me to mõ. Ne cute me Jeju mã pĩhti catia te amji kam ihcapa ata jõr.

Pê krãhtare pĩ na Jeju xô

¹⁷Ne ma kẽn nõ ata wỳr me to mõ. Ne Juta catêjê jarkwa na kẽn ata japrỳ te Corcota, ne ihkôt harẽn xà te “Mehkrãhhi jõ kẽn”. Mã ma cute hõ pĩhti ata pỳn ne cupjê.

¹⁸Mã curi me to cator, ne cute pĩ na me hir, ne ahna hũhkra me ihpar kam wakỳre cuhhêc, ne ahna me hãm, mã kỳaj pê kam ajêt. Ne hanea ne cute ihkôt me hũmre to me ipijakrut, ne hajỹar ne ajtea me hõ pĩa kam me haxôr, ne ahna me hũxwỳr. Mã Jeju mehcote na ajêt, mã cute me hũjê ne me to ajêt.

Pê pĩ na ihkàhhôc ajêt ata Jeju jarẽ

¹⁹Mã Pirat te Jeju na ihkàhhôc jipêj, ne cute ihkrã cwỳrpê pĩ na inxôr na hũjahkre. Ne pê krĩxàre incrê jarkwa na ihhôc atajê pê Juta catêjê jarkwa me, Roman catêjê jarkwa me, Crec catêjê jarkwa. Ne ihkàhhôc ata hũjarẽn to:

— Naxare jõ krĩ pĩn hũmre pê Jeju cator, ita pê ri Juta catêjê jõ Pahhi — hane. ²⁰Pom curi cute pĩ na me Jeju xôr ata, krĩ na pire mã, na ri ihtỳj Juta catêjê jàhtôa ne cute mehkàhhôc ata cahyt. ²¹Mã Pahpãm mã mehcajrẽn catêjê jõ pahhi catêjê te Pirat mã ihkàhhôc ata to mehhimpej to:

— Pom ate ahna ihhôc to: “Cupê Juta Catêjê Jõ Pahhiti” hajỹr to ita ca ha antuw, ne “Cutea amji jarẽn to, ‘Ipê Juta Catêjê Jõ Pahhiti’ ” hajỹr na, ca ha ihhôc — hajỹr. Mã Pirat me cumã:

²²— Pom wa ite ahna ihhôc ita, quê ha hàhhuc rohnỳtti mã — hane.

Pê krãhtare amji mã Jeju kà to ajcrà

²³Mã krãhtare atajê te pĩ na me Jeju cakrô inxôr, mã ihcakrô ajêt. Jirô pê mã ri cute me cwat itajê te ahpỹanre na ihkà to me amji tỳj. Ne hanea ne cute me ihkà te ihpar kõn na iwrỳc tu ata pyr. ²⁴Ne cute me ajpẽn par to:

— Cu ha nee ame ihkà impejti pijapỳn xà nare ita cokjêr nare, ne cama kẽn to ihkôt me amji pê hũhkà. Ne me pahnõ te amji pê to hũhkàr na, cu ha me pahnõ amji mã ihcunea na cupy — hajỹr. Hõ, pê ramã Pahpãm jõ kàhhôc ita jarẽan xà na pê hane, pê harẽn to:

“Cute ikà to me amji tỳj, ne ihkôt kẽn to ame amji pê hũhkà” hane.

Ne ampeaj kam pê cute harẽn xà ata. Na ri krãhtare te hahkre pej nare kam ihtỳj ton.

Pê Jeju Jowãw te inxi to amji pytàr na cumã awjahkre

²⁵Mã pĩ na Jeju ajêt ata krac ri cuna mã wa Jeju menxi me, ihtõj xa, mã hanea ne me cahi na Marij Matarkwỳj me, Marij nõ pê Cropa me hĩxi ata, hanea ne xa. ²⁶Mã Jeju te ipupun, ne icahê na inxi pupun, ne cumã:

— Inxê, por ijaxà kam acahê na akra xa ata — hajỹr. ²⁷Ne imã:

— Jowãw, por ana acahê na xa ata — hane. Cwỳrjapê wa ite ahna amji caxàr, mã ijũrkwa kam hõtpê icahê na ihkrĩ.

Jeju tyc xà

²⁸Jirô pê mã ri Jeju te ramã pjê kam hàpên xà cunea jipêj na amji jahkre pej, na ri cute harkwa to:

— Ampeaj kam imã kôr — hajỹr. Ne pê ramã Pahpãm jõ kàhhôc harkwa jarẽan xà na ri cute ihcakôc xà ita to hajỹr.

²⁹Mã curia ampo cacô xwa xỳre na kyre pê hĩ ahwỳ ata xa, mã cute ampo pĩhhê nõ na, me ampo rerecti ita xôr, ne me to inco, ne Jeju jarkwa mã me haxàr. ³⁰Mã cute to ihkõm ne harkwa to:

— Hamre, ramã ite ijàpên xà cunea jipêj, mã hamre! — hajỹr. Ne pea imput pec to mõ ne ihtyc.

Pê krãhtare Jeju jĩpê kam caxwỳ

³¹Mã Juta catêjê te Pirat na me hàhwỳr, quê me hũmre incrê ne pĩ na me harij atajê te kẽhkẽ, mãr quê cyt ne amehtyc pa, quê pĩ pê me to irôrôc pa. Ampo na? Ramã mehkôt xà jõ amcroa kam hàhhuc to mõ, na ri ma apu pĩ kam me jũmjê tyc ne ame harij na ame to ihcaca. Ampo na? Por ajpên iràrà mõ ata na ri ramã cute me amji kĩn catia kam me to ihtẽm xà. Na ri Pirat te mehte kẽhkẽn na hõ krãhtare mã harkwa kujahêc. ³²Mã krãhtare te, por pĩ kam ame harij atajê te kẽhkẽn. Ne mam cute, por cute me ipijakrut to me Jeju jũjê atajê nõ te kwĩn, ne ihkôt cute me ita te kwĩn. ³³Jirô pê mã ri ma Jeju wỳr me mõ, ne ahna me hàhtêp ne cute me hõmpun, mã ramã ihtyc tu ne ajêt. Cwỳrjapê ri nee cute mehte kwĩn nare. ³⁴Mã krãhtare nõ te hõ kruwxwa to Jeju jĩpê kam caxwỳr, ne cumã caxàr, mã ihkôt mare mã caprô me cô ajxwỳ.

³⁵He wa ite ito ita to hõmpun, na wa ite ihkàhhôc ita kam me amã harẽn, mãr ca hanea ne me kampa, ne catyt kam Jeju to amji mã me ahimpej. He wa nee ame amã ihêj xi jarẽn nare. ³⁶Pê Pahpãm jõ kàhhôc Jeju jarẽn to:

— Quê ha nee ahi nõ impàt nare — hane. ³⁷Ne pê hanea ne kam harẽn to:

— Quê ha me, por kruwxwa to cute me jũm caxwỳr ata pupu — hane, ata na ri cute hajỹr.

Cute me Jeju jarêt xà

³⁸Ne pê Joje pê Krĩhkàhti jõ krĩ catêjê nõ ata mã, Juta catêjê jõ pahhi kwỳ cupa, na pê aracri cupê Jeju kôt ipa catê. Mã cator ne cute Jeju jĩ na Pirat wỳr. Mã Pirat te cumã hahkre. Mã ma Joje tẽ. Mã ma ihkôt, por pê caxwa ri Nicotem mõ ne Jeju pupu ata tẽ, ne cute pĩ pê me Jeju jĩ caxàr. ³⁹Ne Nicotem ata ampo pĩ pàrkà cuxwati ata me, ampo pĩhhô pê ràm cuxwa pyràcti ata pỳ, ne to kwỳ ata pê hũtĩ trĩnta quir. ⁴⁰Ne me hũmre pijakrut atajê te me Jeju jĩ na hàhwỳr, ne ma me to kwỳ, ne cute ampo kà ata me, ihnõ cuxwa pê ràm cuxwa pyràcti ata to me Jeju cunea cukên, ne cupẽhkà jakati impejti to mehcupu. Hõhõ, pê Juta catêjê cute me amji jarêt xà caxuw ajco me amji to hane.

⁴¹Ne por pê curi pĩ na me Jeju xô ata cahê na, pĩxô jõ pjê kam, cute me amji jarêt xà caxuw kẽn kre tuwti nõ ata, mã rỳ nee jũm te kam amji jarêt nare. ⁴²Ne pê Juta catêjê mã amcro te amji mã incjêj xà pê, ajco pytre kam ajpẽn mã acjêj. Ne caxwa pê, pê ajco ramã amcro intuw amji mã acjêj. Ne ma apu amji kĩn kam mehkôt xà kam mehtyc to me hàpên tête me ajpẽn mã. Na pê me hũjarêan kam pĩxô jõ pjê kam kẽn kre nõ ata kam, me Jeju jĩ xi.

Pê hacpỹa mã Jeju tĩr

¹Mã mehkôt xà jõ amcro jirô pê, tômĩc na, iràràtia na cormã ahkũmti kam, ma Marij Matarkwỳj kre wỳr tẽ. Ne cute, por kẽn to cute me Jeju kre jarkwa jihê ata pupun, mã ajte hihê mẽn na xa. ²Mã cute hõmpun ne ma Petrô me, iwỳr ipicahur. Ne me iwỳr cator ne cute me imã hũjarẽn to:

— Cute kre pĩn me pajõ Pahhi jĩ caxàr ne jũ ri me hir! — hane.

^3-4Wa ma Petrô me ajwar kẽn kre wỳr me ipicahur, waite irer ne mam kre wỳr icator. ⁵Ne kẽn kre jarkwa mã inõr, ne tee apu Jeju jĩ japê, ne nee ite hõmpun nare. Ne ite cupẽhkà pit pupun, ne nee hỹrmã ixàr nare. ⁶Mã hapu na ikôt Petrô tẽ ne cator, ne ma kre mã hàr. Ne cute cupẽhkà pit pupun, nõr xà kam. ⁷Ne hanea ne, por pê cupẽhkà ihkrã jarij ata, curia hakàn pê ajtea ihkrã pejti ne nõ. ⁸Wa hanea ne ihkôt ixàr ne ite cupẽhkà pit pupun, ne ite hacpỹa mã Jeju tĩr na amji mã to hajỹr pyrentu. ⁹Ne nee ajte cormã me Pahpãm jõ kàhhôc kam cute harẽn xà to: “Quê ha ihtỳj hacpỹa mã Jeju ihtĩr” hajỹr ata na ihkôt me hakop to impej nare. ¹⁰Ne ma hacpỹ mã ikre wỳr ite me amji jaxàr.

Pê Jeju Marij Matarkwỳj mã amji to ajpẽ

^11-12Mã Marij Matarkwỳj curia xa ne põ pê apu amrã. Mã aracri ramã côjkwa pĩn Pahpãm mã memprar catêjê pijakrut ne Jeju nõr xà kam me jỹ. Mã Marij Matarkwỳj te Jeju japên prãmte kre mã nõr, ne cute Pahpãm mã memprar catêjê pupun. Mã ihkrã nõr xà kam ita jỹ, mã ita ihpar nõr xà kam jỹ, mehkà jakati kam, cute me hũjê ne me to jỹ. ¹³Ne cute me Marij cukij to:

— Ampo na mã ca apu amrã? — hajỹr. Mã me cumã:

— Jũ kam cute me ijõ Pahhi jĩ caxàr ne me to tẽ, ne jũ ri mõrmõ cute me hir, ipê hir xà na hahkre kêatre! — hane.

¹⁴Ne cute me cumã ita jarẽn jirô pê mã ri ipipkjêr ne cute Jeju pupun, mã xa, mã nee cute cupê Jeju na hahkre pej nare. ¹⁵Mã cute ihcukij to:

— Ampo na mã ca apu amrã? Ne jũm mã ca apu hapê? — hajỹr. Mã ihtỳj apu to pĩxô jõ pjê jamãr catêjê nõ, ne cumã:

— Ca ha ate mãn caxàr ne jũ ri hir na, ca ha imã harẽ, wa ha capa ne hacpỹa mã kẽn kre wỳr to mõ — hane.

¹⁶Mã Jeju cumã:

— Marij — hane. Mã hỹrmã ipipkjêr, ne cute Juta catêjê jarkwa na cumã:

— Rapõn! — hane, ne Rapõn ita jũjarẽn xà te “Ikrã tũmti!”

¹⁷Mã Jeju cumã:

— Nee ca icupên nare, nãmri wa cormã nee Inxũ wỳr ijàpir nare. Ne cama atẽm pyrentu ne me ikjêjê mã ijarẽn to: “Wa ha ma Inxũ pê me Apãm, pê ijõ Pahhiti pê me gõ Pahhiti wỳr tẽ” — hane.

¹⁸Mã ma Marij ihtẽm pyrentu, ne cute me imã hũjarẽn to:

— Wa ite me pajõ Pahhi pupun — hajỹr. Ne cute me imã Jeju te cumã harkwa hyr xà atajê jarẽn par.

Pê Jeju ihkôt me ipa catêjê mã amji to ajpẽ

¹⁹Mã amcro ata na, me ipê Jeju kôt me ipa catêjê te ramã caxwa ryre kam me cuprõn, ne ite amji na me to harkwa jihê, Juta catêjê kwỳ cupate. Mã ihprõt pê, krãa, me iwỳr Jeju cator ne me icote na xa, ne me imã:

— Hàpà, mãr me apeaj? Nee ca icupate ame akrihkrit nare — hane.

²⁰Jirô pê mã ri cute me imã hũhkra me hĩpê caxwỳr xwakre jahkre, wa ite me hõmpun, ne ampeaj kam hũrên me ijakry. ²¹Mã hipêr Jeju me imã:

— Inxũ mã, me amã ampo cupa nare na me ato prãm. Ampo na? Pom ahnaa mã Inxũ te ajpên ikujahêc ita na, wa ha me ato, ne pjê cunea kôt ame acrà ne ame akujate — hane.

²²Jirô pê mã ri cute me icunea jakôr, ne me imã harkwa to:

— Imã me ate me Inxũ Carõ Pejti incwỳr na me ato prãm. ²³Na ca ha me cumã acakôc ne ijaprỳa na me cumã acakôc. Ne ita caxuw, ca ha ate jũm te Inxũ Cati to kên ata mã: “Ca ate Pahpãm to kên ata, cute to tojnõ ne hicu” hajỹr na, quê ha Inxũ Cati acuxà ihtỳj cute to kên ata to tojnõ ne hicu. Nãmri ca ha ate jũm mã: “Pahpãm te nee ate to kên xà ata to tojnõ ne hicu nare” hajỹr na, quê ha Inxũ Cati acuxà, garkwa kôt nee to tojnõ ne hicu nare — hajỹr, ne curia hamre, ne ma tẽ.

Pê Jeju Tome mã amji to ajpẽ

²⁴Ne me iwỳr Jeju cator xà ata kam, ne pê nee me ijõ ikwỳ nõ japrỳ te Tome pê, por ajkrut ne ihpỳm ata, ame icahê na mõr nare, ne jũ ri apu mõ. ²⁵Na wa ite me cumã ijũjarẽn to:

— Wa ite me pajõ Pahhi pupun! — hajỹr. Mã me imã:

— Wa ha nee ate me imã gũjarẽn xà ita kam ijapac ne amji mã to hajỹr nare. Ne xa hũhkra caxwỳr xwakre pupu, ne kam ijũhkrahhi xi, ne hĩpê caxwỳr xà kôt ijũ jaxà ne ihcupê, ne cormã ita na amji mã to hane — hane.

²⁶Mã me ina amcro te xet, wa hacpỹa mã ite me cuprõn, mã ita caxuw curia hanea ne me icahê na Tome apu mõ. Wa ite me to harkwa cunea jihê partu cakrô, mã krãa, Jeju me ijipôc ri cator ne xa, ne me imã:

— Hàpà, mãr me apeaj? Nee ca icupate ame akrihkrit nare — hane.

²⁷Ne Tome mã:

— Tome, mẽr ijũhkra pupu ne caxwỳr xà xwakre mã gũhkrahhi jaxà ne to ihcupê. Ne ijĩpê caxwỳr xà xwakre mã gũ jaxà ne ihcupê ne ijahkre pej. Nãmhã ne gàprãr xi ita mã hikra, ne ito ca amji mã ahimpej! — hane.

²⁸Mã Tome cumã:

— Apê ijõ Pahhiti pê Pahpãm — hane.

²⁹Mã Jeju cumã:

— Ca ate ato jĩa to ipupun, cwỳrjapê mã ca cormã ate ito amji mã ahimpej. Por jũmjê me ipupun nare kam ihtỳj ito amji mã mehhimpej atajê ri ampeaj kam me hakry! — hane, jirô pê mã ri hamre ne ma tẽ.

Pê ihkàhhôc ita Jeju to pahte amji mã me pahhimpej na me pamã awjahkre

³⁰Ỹhỹ, he me ikam mare mã Jeju te Hũm carôt kôt hàpên xà pihho catia jàhtôa ne ton atajê, wa nee ite me amã ihkàhhôc ita kam nõr nare. ³¹Ne pom ca ame cahyt itajê, wa ite ihkàhhôc ita kam me amã nõr partu, mãr ca ate me Jeju Crixtô pê Pahpãm kra, mã cute me pahpytàr catê na me pamã to hũjahkre ata to, ate amji mã me ahimpej prãmte, wa ite ahna me amã ihhôc. Ampo na? He ca ha ate Jeju to amji mã me ahimpej na, ca ha atỳj cukwa kam Pahpãm cahê na amji to me apijapar rohnỳtti mã.

Pê Jeju Hĩpôjajo intohkà na ihkôt me ipa catêjê mã amji to ajpẽ

¹Jirô pê mã ri Jeju te me ipê ihkôt me ipa catêjê mã hipêr amji to ipipẽ, Hĩpôjajo jõ pjê pê Tiperij jõ krĩ ata cahê na. Hõ, pê hane.

²Ite me xet itajê wa ame ipa he: Wa itõ pê Tijac me ipê Xeptew kra me, Ximãw Petrô me, Tome pê ajkrut ne ihpỳm ata me, Têtêc jõ krĩ pĩn Natanew cator ata me, me ikwỳa kwỳ pijakrut atajê me. ³Mã Ximãw Petrô te me imã:

— Wa ha ma mõ ne tep pro xà to ihnõ pro — hajỹr. Wa me cumã:

— Wa ha hanea ne me akôt me to ihnõ pro — hane. Ne ma me icunea me mõ, ne pàr kre mã me ixàr. Ne caxwa ri ihpro xà to ite me hapêan to apẽ, ne nee ite me to ihnõ pro nare.

⁴Mã ramã apẽ to mõ, mã ramã xãmte aracri Jeju cô tohkà na xa. Wa nee ite me cupê Jeju na hahkre pej nare. ⁵Mã me imã caràr to:

— Hàpà me hũmre itajê? Ampo ca ate me to ihpro? — hane. Wa me cumã:

— Hamreare, wa tee ite me to hapêan to apẽ, ne nee ite me to ihnõ pro nare — hane.

⁶Mã Jeju me imã:

— Mẽr cô kam awpôc rũm, pàr kre jĩkjê rũm me gõ tep pro xà ita to me awcapê, ca ha atỳj me to ihkwỳ pro — hane.

Wa ite cô kam me ijõ kryhti to me ijũcapêr, ne ite me to ihkjên, ne nee hacpỹ ne pàr kre wỳr me to ijàpir nare. Ampo na? Ampeaj kam, tep itajê cati ne hàhtô, na ri hũtĩ.

⁷Wa ite Petrô mã ijarkwa to:

— He me pajõ Pahhiti pê Jejua ri xa! — hajỹr. Mã Ximãw Petrô ihcakrô apu kwỳ ne cute Jeju jarẽn par, ne hitô kàhti ata mã amji jaxàr, ne ma mrõr ne ihpa na kwỳ ne ma Jeju wỳr cô tohkà na cator. ⁸Wa ma hapu na me ikwỳ me pàr kre to ajpên me tep na, ihpro xà kjên to me mõ, por hỹrmã hũwry na me pajara capô te xĩncwẽnta ata wỳr, ne hỹrmã me to icator. ⁹Ne põ mã pàr kre pê me ijapôj pê, ite me cuhy prà kam tep kwỳ krĩ na me hõmpun. Ne hanea ne ite me pãw pupun, mã hikwa.

¹⁰Mã Jeju me imã:

— Ajpên me imã, pom curmã ate me to tep pro itajê kwỳ to tẽ — hane.

¹¹Mã ma Ximãw Petrô pàr kre mã hàr, ne cute hõ na tep pro xà mã hê, ne ajêt ata mã hê pôn, ne ma pjê wỳr to hàpir. Mã kam tep cati pit jàhtô na cute xẽj ne ihkôt xĩncwẽnta ne ihkôt incrê ne to hipu tu, ne nee ajte cute tep pro xà ata jipôn nare. ¹²Mã Jeju me imã:

— Ajpên me mõ ne me apà — hane. Wa ramã ite cupê me ijõ Pahhiti na me hahkre pej. Ne hũpate, nee me inõ te cupê jũm ata na ihcukij nare. ¹³Mã Jeju te me imã pãw me tep ata kryj, ne ahpỹanre na me imã hõr par.

¹⁴Hõ, pê Jeju hacpỹ mã ihtĩr jirô pê me imã amji to ipipẽ to incrê to hane.

Pê Jeju Petrô mã ihkĩn na ihcukij

¹⁵Wa me ijàpàn jirô pê mã ri Jeju te amji na Ximãw Petrô cukij to incrê ne cumã:

— Ỹhỹ Ximãw Petrô pê Jowãw kra ita, xà ajkĩ me akwỳ jirôa pê amã ikĩn? — hajỹr. Mã Ximãw cumã:

— Ỹhỹ ijõ Pahhi, imã akĩn na ramã atea ijahkre pej — hane. Mã Jeju cumã:

— Ỹhỹ, ca ha me cupê ijahkre kêatre, mã nee cute me ipupun nare atajê mã ijarẽ, ne me cumã ijarkwa gõ. Ampo na? He me cupê carà cahàcre hôhti kra pê hamãr catê nare ata pyràac, ne amjia kôt ikaj na ame ipa — hane.

¹⁶Ne cute ihcukij to ipijakrut ita kam ri hipêr cumã:

— Ximãw xà ajkĩ ampeaj kam amã ikĩn? — hajỹr. Mã Petrô cumã:

— Ỹhỹ ijõ Pahhi, imã akĩn na ramã atea ijahkre pej — hane. Mã Jeju cumã:

— Ca ha me ikwỳ pê carà cahàcre pyràc pê hamãr catê nare atajê to amji pytà ne me hamã — hane.

¹⁷Ne hipêr Jeju te ihcukij to:

— Ximãw, xà ajkĩ ampeaj kam amã ikĩn? — hajỹr. Mã Petrô mã amji kĩn nare, mã apu ihpec. Ampo na? Nee mã ampo na nare, Jeju te cumã ihkĩn na ihcukij to incrê, na ri cumã amji kĩn nare, mã cumã:

— Ijõ Pahhi, amã ampo cunea jahkre pej, na ri atỳj amã ite akĩn na ijahkre pej! — hane. Mã Jeju cumã:

— Ca ha me ikwỳ pê carà cahàcre pyràc pê hamãr catê nare atajê to amji pytà ne me hamã.

Jeju Petrô mã, por ampo te to jũ mãn xà ata jarẽ

¹⁸— Ỹhỹ, wa ha amã awjarẽ, pê ca atuwre na, ajco akà to amji cũmpej, ne ma jũ ri amã amõr xà na ihprãmti ata wỳr ajco pra. Ne ampeaj kam wa ha ita caxuw amã awjarẽ. Ca ha awej, quê ha jũmjê gara cajpre, ne jũ ri amã amõr prãm nare, ne hỹrmã gitõtti ata wỳr me ato mõ — hane.

¹⁹Pê Jeju hũjarẽn xà ata to ramã Petrô mã, jũ caxuw cute mehcuran xà ata to hahkre. Ne quê ha Jeju cwỳrjapê Petrô tyc xà ata kôt, quê ha mehcunea me Pahpãm cati na me hahkre pej. Ne cute Petrô mã:

— Ita caxuw ca ha ito pit mã amji mã ahimpej, ne ikôat apa! — hajỹr.

Pê Jeju nee ampo te Jowãw to jũ mãn xà na harẽn nare

²⁰Mã hacpỹ mã Petrô pipkjêr ne amji jõ kôt cute ipupun. Ne pê ramã Petrô mã Jeju mã ikĩnti na ijahkre pej. Ampo na? He pê wa me Hakren xà jõ amji kĩn na me ijàpàn xà na cahê na jỹ ne ihcukij to: “Jũm mã quê ha ajte akên mã amẽ?” hane cwỳrjapê. ²¹Mã Petrô te ipupun, ne ina Jeju cukij to:

— Pahhi, ne mẽr hũmre ita, jũ mã quê ha ajte? — hajỹr.

²²Mã Jeju cumã:

— Quê imã ihtĩr ita na ipa, wa ahnaa hacpỹ ne ite amji jaxàr na to prãm na mã, quê ihtỳj ipa, ca ha nee ahna ihho nare. Ne ca, ca ha ito pit mã amji mã ahimpej to apa — hane.

²³Mã Jeju kôt me ipa catêjê te amji mã me ijarẽn cràn, Jeju te xwahna ityc xà nare na ijarẽn ata na. Ne nee cute harẽn to hajỹr nare. Ne nee ito Petrô mã:

— Quê ha nee Jowãw ihtyc nare — hajỹr nare. Ne cama cute ijarẽn to hajỹr he:

— Quê imã ihtĩr ita na ipa, wa ahnaa hacpỹ ne ite amji jaxàr na to prãm na mã, quê ihtỳj ihtĩr ita na ipa, ca ha nee ahna ihho nare — hajỹr.

Pê Jeju jàpên xà atajê, ampeaj kam hàhtô

²⁴He ipê Jowãw, pê wa ito ita jĩa to ampo itajê pupu, ne impar xàa na wa ite ahna pit mã me amã ihhôc par. Ne ramã ate me ipupun pejtu, ihêj xi nare na, na ri ampeaj kam cute hajỹr. ²⁵Ne cormã Jeju te ampo jàhtôa ne ton atajê, wa nee ite ihkàhhôc ita kam ahna ihhôc nare. Quê jũm ahna ihhôc na mã, quê ha nee pjê cunea kam ihkàhhôc itajê nõ hàhtô na cahuc nare. Hamre.