JEREMIJ JÕ KÀHHÔC
1Jeremij pê Pahpãm jarkwa to ihcakôc catê
Ne Ixaj tyc jirô pê mã, hacpỹ ma mã Juta catêjê nee hipêr me Pahpãm par nare. Cwỳrjapê pê Pahpãm hipêr me cumã harkwa to mehcakôc catêjê atajê kujate, pê me cumã, por quê ha Pahpãm te ampo kên to jũ mã me to ata cawpa. Pê Pahpãm me cumã ihcakôc catêjê atajê nõ japrỳ te Jeremij ita me hỹrmã kujate, pê Krĩpinkrên kam ihkrĩ.
Mã Pahpãm te cumã harkwa hyr, mã ma Pahpãm to me amji kam hapac xà jũrkwa wỳr mõ. Ne harkwa nã cute me hàhtôa mã harkwa to:
“Me ikampa! Côjkwa jõ Pahpãm pê Ixaher catêjê Pãm Cati ame amã amji cawpa to:
‘Wa ha, por ite me akên xà to me amã icakôc ata to krĩ ita to apu ihkên,
ne cahi na krĩ atajê to kên.
Ampo na?
Ca nee ate me ipar nare kam,
wa ha me ato hane’ ” hajỹr.
Ne pê Jeremij amehcunea mã Pahpãm cawpa to hajỹr to incrire nare.
Mã Pahpãm to me amji kam hapac xà jũrkwa jamãr catê ata japrỳ te Paxur, ne cute Jeremij jarkwa na impar, ne ma apu ihcakôc xà ata na impar caca. Na ri cute haxàr ne ame caprêprêc, ne me huwapre. Mã huwapre ita na me hacjên xà kam, cute amji to apẽ.
Mã amcro nõ na Paxur te Jeremij mã hikran, mã cute cumã harkwa to:
— Wa ha Pahpãm jarkwa kôt me amã ijũjarẽn xà ita to awjarẽ, ne amã:
“Paxur, wa ha jũ mã me ato,
ca ha me akwỳ mea mã,
me amã paa to me amã pa.
Ne ca ha atỳj me acurê xwỳn jõ wapo xwahhihti te me acuran na me hõmpu.
Ampo na?
He wa ha ma Papirõn jõ pjê jõ pahhi mã Juta jõ pjê himpej xà ita gõ.
Quê ha ma me ato mõ ne me gacjê,
ne me gàhtôa ne me gipej.
Ne cama me ana me acurê xwỳn jamã,
quê ha Krĩpinkrên pê me hakràj cunea to cutor tu.
Quê ha ma wakỳre prà tepti me,
wakỳre prà jakati me,
kẽn pràti itajê cunea to me cutor tu,
Papirõn jõ pjê wỳr.
“Ne ca, Paxur, quê ha me akra mea mã me ato mõ,
ca ha gũrkwa me gõ pjê pê ampỳa mã ty,
Papirõn jõ pjê kam” hane —
hajỹr xà ata na, tahnaa cute hajỹr.
36Pê Pahhi Joquĩ Jeremij jõ kàhhôc kam Pahpãm jarkwa to capa
Pê Joxij pê pahhi pejti ata ty, pê ihkra japrỳ te Joquĩ ata pê pahhi, Juta jõ pjê kam. Ne cupê hũmre kêanre, ne cute Pahpãm jarkwa to ihcakôc catê pê Jeremij ita pro prãmte, apu hahêr to ipa. Mã Pahpãm te Jeremij mã ihcakôc ne cumã:
— Ca ha ihkàhhôc nõ py, ne kam ite Ixaher catêjê na icakôc xà itajê cunea na ihhôc. Ca ha mam ite Joxij pê pahhi mã, ite ampo jarẽn xà ata rũm ahna to apy, ne curmã ite ampo jarẽn itajê mea mã, ahna ihhôc. Quê ha Juta catêjê te icuna mã mehkên ton xà atajê jahpan xà na, ite me to kên xà atajê, wa ha me cumã ihcunea cawpa. Quê ha ihhêaj to mehkên itajê jicu, ne iwỳr me apkjê, ne me hõ pry kên ita jicu, wa ha mehkên ita to impej, ne to ijapac kêt — hajỹr.
Mã Jeremij te ihkàhhôc kam ihhôc catê japrỳ te Paruc na hàhwỳr. Ne cute cumã Pahpãm te harkwa cunea na ihhôc xà jarẽn atajê jarẽn partu. Mã Paruc te ahna ihhôc partu, ne cute me hipêj.
Mã Jeremij te Paruc mã amji jarẽn to:
— Wa ha ita ri, ipimxur xà kam ahtwỳ. Quê ha jũ caxuw, amcro nõ na, Pahpãm to me amji kam hapac xà jũrkwa kam me amji kĩn nõ to, ca ha me cumã ihkàhhôc ita cahyt. Ampo na? Quê ha amcro ata na Juta catêjê cunea curi me cuprõn tu — hajỹr.
Mã amji kĩn nõ na Pahpãm to me amji kam hapac xà jũrkwa kam, cute me cuprõn. Mã Paruc te Jeremij te ampo na mẽn xà atajê cunea ton. Ne cute me cumã Pahpãm te harkwa kujahêc xà itajê cunea cahyt partu, Pahpãm to me amji kam hapac xà jũrkwa kam.
Jirô pê mã ri me hàhtôti atajê jõ pahhi catêjê kwỳ, mã ampeaj kam me hũpar xà ata cupaa to hũpa. Mã cute me Paruc mã:
— Wa ha itỳj pahhi Joquĩ mã me awjarẽ. Ne me imã amji jarẽ, jũ mã mã ate, ne ajte gũpar xà ita to gũpar? — hajỹr.
Mã Paruc me cumã:
— Pahpãm jarkwa to ihcakôc catê pê Jeremij ata te ri imã ita jarẽn, wa ite ahna ihhôc par — hane.
Mã me hàhtôti atajê jõ pahhi te Paruc mã:
— Mẽr Jeremij ita me amxu, ne nee jũm mã jũ kam me amõr na me amji jarẽn nare — hajỹr. Ne me hõ pahhi itajê te jũ ri me Pahpãm jarkwa ita to ipimxur, ne ma pahhi Joquĩ mã me hũjarẽn to me mõ, ne cute me cumã ihkàhhôc ita jarẽn.
Mã ma pahhi Joquĩ te Pahpãm jõ kàhhôc ita wỳr jũm ita kujahêc, quê cumã cupy. Mã ma hỹrmã tẽ, ne cute cumã cator ne ipyr ne hỹrmã to cator, por curi pahhi me, me cumã me hàpên catêjê mehkrĩ ata wỳr. Pê ampeaj kam me cumã kry, pê cuhy na mehkrĩ. Mã jũm ita te me cumã Pahpãm jõ kàhhôc ita hô to incrê ne cahyt. Mã pahhi te wapore to hakep, ne cuhy kam haxwỳr. Ne cute to hajỹr to mõr ita kam, ihcunea to caxàr par. Mã pahhi Joquĩ mã hàpên catêjê itajê mã nee cute Pahpãm jarkwa to caxàr xà ata na hũpa nare, ne nee pahhi te ampo kên ton xà ata na kam mencryc nare.
Mã Pahpãm te hipêr Jeremij mã harkwa nõ ata jarẽn ne cumã:
— Wa ha apu pahhi ita me, mehkra mea mã, ame to kêanre ne, pom ite mehkên to me cumã icakôc xà ata to, wa ha ame to kên, pahhi me, mehkwỳ me, cute me ipar nare na, wa ha ame to kêanre ne — hajỹr. Hamre.
39Pê Juta catêjê mehkên to me amji cator, Papirõn jõ pjê wỳr
Ne caku te jũ mãn jirô pê mã ri, Papirõn jõ pjê jõ pahhi japrỳ te Napuc ita, ma Juta jõ pjê kam Krĩpinkrên wỳr hõ krãhtare to me mõ. Ne cute me ahna krĩ krã, ne me kam ihtẽm ne ame ajpu.
Mã Juta catêjê jõ pahhi japrỳ te Xetequij ita te nee hõ krãhtare to mehcapên nare na, ramã amji cajpẽr. Na ri me curê xwỳn te me hỹrmã krĩ pu na kwỳc ata cahhêc xà ata kam ri ma caxwa ri me curê xwỳn cupate mehcahkũm.
Mã ahkêt wỳr, Papirõn jõ pjê jõ krãhtare ma amehkôt me pra, ne cute me pahhi Xetequij pro, ne ma Papirõn jõ pjê jõ pahhi wỳr me to mõ. Mã pea pahhi ita te Xetequij kra cunea jipej na me mẽn, hũm kam mare mã. Mã cute me hipej tu, mã cormã Xetequij to impeaj ne ihtỳj cute mehkra jipej xà na me hõmpun. Jirô pê mã ri cute me Xetequij to tũm prãmte, into krỳn na me mẽn. Mã wakỳre to cute me huwapre, ne mento krỳn, ne me to amji mã me cumã hàpên catê, mã Papirõn jõ pjê kam me cumã ampo pytĩa to hàpên to ipa.
Mã Papirõn jõ krãhtare te Krĩpinkrên to caxàr partu. Ne cute me pahhi jũrkwa catia ata me, Pahpãm to me amji kam hapac xà jũrkwa ata to me caxàr. Ne cute krĩ me, intête kwỳc ata cunea hur partu. Mã krãhtare jõ pahhi te me cupê Juta catêjê cunea to cutor tu na me mẽn. Mã ajmãr cute mehcunea to cutor tu, Papirõn jõ pjê wỳr, cama cute me cumã me hàpên xà caxuw. Ne cute me cupê hamreare atajê to pit mã tojnõ na me cumã hũjahkre, mãr quê me ahtwỳ ne pur to me apê.
Hõhõ, Pahpãm te mehkwỳ to kên xà ita to ri cute ame to kên. Ampo na? Nee amempar nare.