ME TO IHHIMPEJ CATÊJÊ
Ỹhỹ, pê Jojuw tyc jakàn pê Ixaher catêjê cama amji pê Pahpãm pê Pahhiti to me hapac kêt to me mõ. Cwỳrjapê ri ihtỳj Pahpãm te me ipu na mehkrĩ atajê te me kam ihtẽm na me hamãr, mãr quê me hapu, ne ame to kêanre ne. Cwỳrjapê ri Pahpãm te me ahna me to ihhimpej catêjê kwỳ pyxwỳr, mãr quê me to ihhimpej. Na ri ihkàhhôc ita japrỳ te Me To Ihhimpej Catêjê Jõ Kàhhôc (Me To Ihhimpej Catêjê).
6Pahpãm na mehkwỳ to ihhimpej catê pê Gitõ
Hõ, pê me hajỹr to mõar kam, ajmãr me pjê ata cunea pytà. Jirô pê mã pê cama Pahpãm to me hapac kêt to me mõ. Pê Pahpãm hacpỹa mã amji wỳr me to ipipkjêr prãmte, ihtỳj me curê xwỳn jũhkra mã ajco me hacjê, ne me hỹrmã Mitij catêjê kujahêc to caku to xet. Pê Ixaher catêjê me hũpate ma ramã krĩ pê me cuto, ne kẽn kre kam ajco amehkrĩ. Ne ajco Ixaher catêjê me hõ pur kam ahkre, pê ajco me hapôj ne ma me cupê ampo to hàhkĩj partu, ne ma me to cuto, me hõ parxare mea mã.
Cwỳrjapê ri Ixaher catêjê te hacpỹa mã Pahpãm wỳr me amji jaxàr, ne amji tehcajpar xà na me ahna hàhwỳr. Mã amcro nõ na Pahpãm te harkwa to imprar catê nõ na amji ton, ne ma Ixaher catêjê nõ intuw japrỳ te Gitõ ita wỳr cator, ne cumã:
— Hàpà! Côjkwa kam Pahhiti pê Apãm Cati quê ha amã acaxwỳn kam acarôt gõ. Pahhiti quê ha ato ihhimpej, mãr ca Mitij catêjê jũhkra pê Ixaher catêjê pytà — hajỹr.
7Pê Pahpãm Gitõ pê hõ krãhtare to incri
Mã Gitõ te impar ne ma tẽ, ne cute mehkwỳ xũmre jàhtôa to ajmãr mir te trĩnta ne ihkôt mir pijakrut ne me to cuprõn. Pê ramã me caxuw, Mitij catêjê jõ krãhtare me hirôa pê hàhtôa, ne kẽnti cahê na caprũm ata kam me ahtwỳ. Ne pê me krãhtare atajê jàhtô, pê ihhêj rũm peture jàhtô. Ne hanea ne me hõ cawrô kô jarôti pê camer atajê jàhtôa, pê ihhêj rũm pjênxôm carôt jàhtô, na quê nee jũm me cahyt par nare.
Mã Pahhiti pê Pahpãm te Gitõ mã me hũmre jàhtôa na me hõmpun, ne cumã harkwa to:
— Ampeaj kam amã me hũmre jàhtô. Ne wa ha nee me hàhtôti itajê pijapu na me hamãr quê me ipijapu nare. Ampo na? Quê ha me hàhtôti atajê me ajpu, ne me cute ame amji pytàr na ihtỳj me amji cãmjĩ, ne me amji mã: “Me itea, wa me amji pytàr” hane. Cwỳrjapê ca ha ma hacpỹ mã ikre wỳr me hàprê nare, ne me capônỹre, ne me cumã hũpahti atajê kujate — hajỹr.
Mã ma cute me mir te winti ne ihkôt mir pijakrut ne ikre wỳr me amji jaxàr. Mã cormã me hũmre te me mir te tej ne me hàhhuc, ne ramã me ipijapu xà caxuw ame amji cũmpej.
Mã Pahhiti pê Pahpãm te Gitõ mã:
— Cormã ampeaj kam amã me hũmre jàhtô. Ma cô mã me to mõ, quê ha ame ikõ, wa ha cormã amã jũmjê atajê jarẽ — hajỹr. Mã ma cô mã me to mõ, ne me iwrỳc, mã ame ikõ.
Mã Pahpãm te Gitõ mã hũjarẽn to:
— Por me cupê rop, ne me harkwa to ame cô to ikõ atajê, quê ha ikre wỳr me amji jaxà, ne por me hũhkra na ame ikõ atajê quê ha me ajpu — hajỹr.
Mã me hũmre te xẽj crê peaj, ne me hũhkra na me cô toikõ. Mã Pahpãm te me hõmpun ne Gitõ mã:
— Pom me hũmre te xẽj crê itajêa to, wa ha Mitij catêjê jàhtôa atajê me ajpu, ne me hipej tu. Ne mehkwỳ itajê ca ha hacpỹa mã ikre wỳr mehkujate — hajỹr. Mã cute ikre wỳr me hàhtôti atajê kwỳ kujahêc. Mã cute me xẽj crê peaj ne me hàhhuc.
Pê Gitõ jõ krãhtare incrêre atajê me curê xwỳn jàhtôa jipej
Mã caxwa ata kam Pahpãm te Gitõ mã harkwa to:
— To jỹ, ne gõ krãhtare to mõ, me acurê xwỳn catêjê wỳr, ne me kam tẽ, wa ha me atehcajpa, ca ha me hipej tu — hajỹr. Mã Gitõ te hõ krãhtare na hàhwỳr, ne me cumã:
— Me to jỹ! Nãmri ramã Pahpãm te me pajũhkra mã Mitij catêjê cunea jaxàr — hajỹr.
Ne cute me to hakrã to incrê, ne ahpỹanre na me cumã me hàkôr xà jõr par, ne ihkôt me cumã pjê te cô run xà caxwãm pê cuhy pôr atajê jõr par. Mã ma põ pê Mitij catêjê jàhhuc xà ata wỳr me to mõ, ne curi awcapàtkô picapôn jirô pê me cator, ne me ahna me ipixêr. Ne ihprõt pê cute ame hàkôr xà cakôr, ne ame cô run xà kam cuhy ihcuhhê ne pôr atajê cahhêc, mã krã, ihpôc xà jàhcujro. Mã cute ame caràr to:
— Pahpãm me Gitõ quê ha me gipej! — hajỹr.
Ne nee cute me kam ihtẽm nare, ne cama mehkrã ne me to xa, ne ame hõmpu, ampo te jũ na ame ton xà ata na. Mã Pahpãm te jũ mã me curê xwỳn atajê ton, mã me taa amehprõt ne awcapàtkô kam me amji kwỳa cura. Ne mehcahhur ma me pra, me hõ pjê wỳr.
Hõhõ, pê Pahhiti pê Pahpãm hõ krãhtare to Mitij catêjê jipej to hane, ne Ixaher catêjê pytà. Pê Gitõ me to ihhimpej to caku jàhtôa, pê ajco ihtỳj Pahpãm kôt me ipa.
14Me to ihhimpej catê Xãnxã
Ne pê Gitõ ty jirô pê mã, pê hipêr Ixaher catêjê Pahpãm to amji pê me hapac kêt, ne me cumã hikra. Cwỳrjapê pê Pahpãm me curê xwỳn pê Piritew catêjê te Ixaher catêjê jõ pjê to ihhimpej na me to tojnõ, mãr quê ha me taa caku jàhtôa kam me to ihhimpej.
Ne ajco amji to me curê xwỳn xà ata jõ amcro kam pê Xãnxã pê Ixaher catêjê jõ pahhi, ne me to ihhimpej ita to caku to winti. Ne ajco Piritew catêjê jàhtôa ne ihcura. Na pê Pahpãm me caxuw mehcunea jirôa pê hĩ kam cumã carôt tỳj catia ne cugõ.
5Pê amcro nõ na Xãnxã hũm me inxi me krĩ nõ japrỳ te Timna wỳr me mõ. Pê me mõr xà kôt me pĩxô intepre amji cwỳrpê me hõmpun to mõ. Mã hamre, ihprõt pê hỹrmã rop cahàc xãm tuwti nõ kam intoj.
6Mã Pahpãm Carõ Pejti te Xãnxã mã carôt catia ne hõr. Na ri Xãnxã te hũhkraa to rop cati ata curan.
16Me to ihhimpej catê Xãnxã
Pê Xãnxã amcro nõ na, ma Piritew catêjê jõ krĩ nõ wỳr mõ, ne cumã hàr. Mã cute ahna me to me hõ krĩ jõ harkwa jihê, ne ihtỳj curia cute amji to apẽ na amehcãmjĩ. Mã iràrà na me curê xwỳn jõ xũmre jàhtôa te me cuprõn, ne mehpro prãmte hỹrmã me mõ.
Mã Xãnxã na awcapàtkô picapôn, mã ma mõ ne cute krĩ jõ harkwati ita hyr, ne impỳn, ne ma krĩ pê to cator ne kẽnti nõ ita wỳr to mõ. Ne ahna to hàpir ne himoac kam cute hir. Hõ, cute harkwati ita hyr to hajỹr, ne Piritew catêjê jũhkra pê amji pytàr.
Xãnxã te amji curan xà kam, me curê xwỳn jàhtôa ne mehcura
Me To Ihhimpej Catêjê 16.21-31
Ne ahna caku te winti ita jicu xà kam ri Xãnxã te Pahpãm kôt amji ton jicu, cwỳrjapê ri Pahpãm te intête carôt tỳjti ata cunea caxàr, mã hacpỹa mã carôt peacre. Ne ihprõ ata pê ri Piritew catêjê kra nõa, na ri cupê curê xwỳn, mã cute Xãnxã pro na mehkwỳ tehcajpar prãmte cumã ihhêj. Mã cute mehpro, ne wakỳre to mehcajpre, ne cute mento krỳn. Ne kẽnti te kwỳr kên xà ata na, cute me hãm, ne me cumã hê. Mã ihtỳj ihcuhhê ne ame cumã to kwỳr kê.
Mã Piritew catêjê te Xãnxã pro xà ita to me amji japackre xà to, cute amji mã me amji kĩn nõ ton. Ne me hõ pahpãm cahàc krekà japrỳ te Tagõ ita to me cati prãmte, ame to ihcakôc pejti, ne me amji mã:
— Me ijõ pahpãm pê Tagõ te ita caxuw me ijũhkra mã Xãnxã jaxàr. Ne taa mã pê ramã me ikwỳ to kêanre, mã hahpan xà na me ijõ pahpãm te me ijũhkra mã haxàr. Ajpên me iwỳr Xãnxã to mõ, wa ame to ijapactu — hajỹr. Mã ajpên mehwỳr me to mõ, ne pahpãm cahàc krekà Tagõ jũrkwati mã kẽn te ihcuhhê xàhti atajê cote na, cute me hãm.
Mã Xãnxã te me hõntuw nõ mã harkwa to:
— Ikre mã ihcuhhê xàhti itajê nõ na ijũhkra xi, wa ahna cupy ne kôt — hajỹr. Ne pê Tagõ jũrkwati ata to me hipu tu. Pê me to ihhimpej catêjê cunea curi mehkrĩ. Ne hanea ne kỳj rũm ihkre nõ kam, me hàhtô na me mir crê ne me jỹ, ne ahpar mã cute me Xãnxã pupun, ne ame hũn kêanre to prãmte pê me jỹ.
Mã Xãnxã te Pahpãm mã ihcakôc ne ahna hàhwỳr ne cumã:
— Me ijõ Inxũ Cati pê Pahhiti, ito amji japackre, ne hipêr imã icarôt catia ne agõ, wa to Piritew catêjê to apu kên, cute me ito krỳn jahpan xà na — hajỹr. Mã Pahpãm te hacpỹa mã cumã carôt catihti jõr. Mã cute carôt cunea to ikre mã ihcuhhê xàhti atajê mã quêat ne ihkujahêc, mã me hipy ihcunea pỳm, ne cute mehcunea jipej tu.
Ne pê ihtĩr reria mã ajco me hàhtôa ne mehcura. Ne ita caxuw cutea mehkôt ikre to amji curan xàa kam hàhhuc, mã cute mam mehcuran atajê jirôa pê mehcuran. Mã me ahna ahtũm nare mã me hũkjê cator, ne ma cute me Xãnxã na hàhwỳr ne me to tẽ, ne hũm cahêa na me harêt. Hamre.