IXAJ

IXAJ JÕ KÀHHÔC

Ỹhỹ, harã catêjê pê Juta catêjê atajê, hanea ne kỳj rũm catêjê pê Ixaher catêjê cuxà, Pahpãm to me hapac kêt to me mõ. Cwỳrjapê ri Pahpãm te me hỹrmã me cumã harkwa to mehcakôc catêjê jàhtôa ne ihkujahêc. Mã Pahpãm te ahpỹanre na me cumã ampo to hahkre atajêa to me cumã ihcakôc to me ipa, ne cute me hõ kàhhôc kam ahna mehhôc.

Ne Pahpãm jarkwa to me cumã mehcakôc catêjê pijakrut itajê japrỳ te Ixaj me Jeremij. Na ri ahpỹanre na ihkàhhôc atajê kam me haprỳ te Ixaj Jõ Kàhhôc (Ixaj) me, Jeremij Jõ Kàhhôc (Jeremij). Mã Jeremij te hõ kàhhôc nõ kam ramã ampo pej cunea jamre ata to cute me amji japackre xà caxuw ahna ihhôc, cwỳrjapê ri hõ kàhhôc ata japrỳ te Mencwỳr Jõ Kàhhôc (Mencwỳr). Cwỳrjapê ri ajwar me hõ kàhhôc catihti atajê kam, cute me Juta catêjê mã me Pahpãm cawpa. Ne ita caxuw Ixaj me Jeremij jõ kàhhôc kwỳ mã he.

Pahpãm amji wỳr mehkwỳ to ipipkjêr xà caxuw me cumã akij

Ixaj 1.1-4, 10-20

Me ikwỳ, me ikampa! Pahhiti pê Pahpãm me amã ihcakôc to hane he:

“Pê wa Ixaher catêjê jakrã te tôxi atajê to amji mã ikra,

ne ajco me hamãr to impejti.

Mã ajte icuna mã mehkêanre.

Pryti me cawrô cahàcre,

ihtỳj to ipijapar catê pupu.

Mã ajte nee ihkĩnte me ikwỳ pê Juta catêjê me ipupun nare.

Ne imãa ihhêj ne me ikwỳ jàhtôti itajê,

nee me ipar nare.

Ne me cupê mehkên catêjê,

ne iwỳr me catut to me ipipkjêr,

ne cute me imã hikran.

“Me ikwỳ, xà ca cormã me amã ite ame ato kên xà ata na me prãm?

Xà ca ha ajkĩ ipê me gõ pahhi na,

ma ame icaca ita na?

Ca ha ame hane,

quê ha me acurê xwỳn me akrã rũm me ato kên na cucwa,

ne ma me apar mã to ajhu.

Quê ha me gõ krĩ

hanea ne caxàr tu ne.

“Me ikampa he:

Pom ca me akên jahpan xà na,

me imã ampo pryre to me capa itajê kam, ramã ipeacre.

Hipêr me imã ihnõ ton nare.

Imã hipêr carà cahàcti hôhti twỳmti na prãm nare.

Ne imã hipêr ampo itajê nõ caprô pupun prãm nare.

Ne imã hipêr me akên jahpan xà na,

ate me imã ampo pryre to caxàr ita na prãm nare.

Ampo na? He ca nee me akên xà itajê jũ na me apec nare.

“Ca ha me imã acakôc,

ne kàj mã côjkwa wỳr me imã gũhkra curor, ne me apẽ,

wa ha nee me apupun nare,

ne nee me apar nare.

Ca ha ampeaj kam, tee imã me acakôac to me acakôc,

wa ha nee me apar nare.

Ampo na?

Me gũhkra itajê pê mehcuran catêjê jũhkra.

Ne ihhêj ne cormã ahna ate mehcuran atajê caprô.

“Imã me ate me amji cuhhõn ne me atetet na me ato prãm.

Nãmhã, ne me akên ton jicu.

Ne ampo pejti ton to ca me amji kampa,

ne me to amji pyràc.

Ne me cupê hamreare atajê me,

me cupê me hũmjê nare atajê me,

me cupê mempjê nare atajê,

ca mehtehcajpa.

“Ca ha ita to hane,

wa ha ana amji capa ne ato impej.

He ampeaj kam wa me amã amji jarẽ.

Ca ha te ate me akên itajê ton,

mã cute me acaxwỳn to kên cakrô,

ate ihkên ton jicu jahpan xà na,

wa ha itỳj hacpỹa mã me amã to impej.

Ne ca ha ampeaj kam me ikampa,

ne ito pit mã amji mã me ahimpej,

wa ha itỳj me ato me gakràaj to me gakràj.

“Nãmri ca ha ma ate ame ipar caca,

ne icuna mã ame akên ton na,

wa ha cama me ana me acurê xwỳn jamã,

quê ha jũ mã ame ato,

ne me gipej tu” hane.

Hõhõ, quê ha ita me ato hane he.

He me gõ Pahpãm, pê Pahhitia te ri me amã hũjarẽn xà ita to hajỹr.

Pê Pahpãm Mexij pê mehkên catia pê me tohpôj catê to awjahkre

Ixaj 11.1-11

¹Pê Pahpãm hipêr harkwa to ihcakôc catê pê Ixaj ata mã harkwa kujahêc to hane he:

“Quê ha jũm pĩ pàr nõ kat na hakep,

quê ha ihtỳj ipàr wej ata kat kam, haxà kam hitêr,

ne kam ipàr tuw nõ cato.

Jĩkjê na, quê ha pahhi xwỳ pê Tawi tàmxwỳ tàmxwỳ nõa cato.

Ne quê ha ramã pahhi xwỳ pê Tawi ihtyc cakrô,

quê ha ihtỳj ihtàmxwỳ tàmxwỳ nõa cato,

ne cupê imã hàpên catê.

²“Quê ha ipê Pahhiti Carõ Pejti ata cumã amji gõ,

ne ihkôt cumã ihkrã kre te amji jahkre pejti gõ,

mãr quê carôt tỳjti to me hapackre,

ne ihtỳj cumã ijahkre pej, ne cumã icupa.

³Ne quê ha ampeaj kam ihcunea na, cumã ipar prãm pit.

Ne cupê ajpẽn pê mehkrã kên me, me mempejti to ipicokjêr catê impeaj.

Ne nee quê ha cute mempar xà kôt pit mã,

põ rũm cute me hõmpun xà kôt mehkên mã me irẽn,

ne mempej mã me irẽn nare.

⁴Ne quêt cute catyt kam,

me cupê ampo hamreare atajê tehcajpar prãmte,

cute ame to kên catêjê atajê kên mã me curẽ.

Ne harkwa to cute me cumã ihcakôc xà to, quê ha me hipej.

⁵Ne ihtỳj catyt kam ahpỹanre na,

mehcunea to impej to ipipẽnti to ipa.

Ne ihtỳj cute ampo to hũjahkre xà ata na, amji jarkwa par to ipa.

Quê ha mehcunea ahna me hõmpu,

ne me cumã impejti ne.

⁶“Ne quê ha pahhi xwỳ pê Tawi tàmxwỳ tàmxwỳ ata himpej xà jõ amcro ata kam,

quê ha ampo cunea hacpỹa mã,

mam cute amji ton pê mã,

amji ton xà ata na quê ha.

Ne rop cahàc jàprêhti atajê hacpỹa mã capônỹre ne,

ne ihtỳj carà cahàcti hôhti atajê cahê na apu ipa.

Ne ropkror jàprêhti atajê hacpỹa mã capônỹre ne,

ne ihtỳj carà cahàcre atajê cahê na apu hikwa.

Ne hanea ne rop cahàc jõkre hôhti atajê,

quê ha ihtỳj pryti krahti atajê me ajpẽn cahê na apu hàpàn to ipa.

Quê ha hanea ne, ihtỳj ahkrare kwỳ amji kôt ame to ipa.

⁷Ne quê ha ihtỳj ampo jàprêhti pê uxô atajê hacpỹa mã capônỹre ne,

ne ihtỳj pryti cahãjti atajê cahê na apu hàpàn to ipa.

Quê ha pryti krare me uxô kra xwỳjê ihtỳj ajpẽn cahê na hikwa.

Ne rop cahàc jõkre hôhti atajê,

quê ha cupê prytia pyràc,

ne ihtỳj ahtu pit kur to ipa.

⁸Ne me ahkrare kryjre itajê,

quê ha ihtỳj cagã pahtỳj ihkrĩ xà atajê cahê na

ame hàkrun to me ipa,

ne ahkrare kàre itajê,

ihtỳj hũhkra to parpup krĩ xà kam hahê atajê caxun to me ipa,

quê ha nee mehcãmxar nare.

⁹Ne quê ha ijõ pjê impejti ita kam,

nee ampo te me to kên xà caxuw hamreare ne,

ne nee kam ampo jamre xà nare.

Ne mẽr ampo na mã quê ha ampo itajê cunea to hane?

Nee mã ampo na nare.

Pom côxwa hãn ne hipu,

ne ampo cunea pro ne inco,

mã nee incrà nare,

ita jĩkjê na,

quê ha pjê kam mehkrĩ atajê cunea

ipê Pahhiti na me ipupu,

ne me ijahkre pej pejtu ne,

na quê ha nee jũm pê ijahkre kêt nare.

¹⁰“Ne amcro ata kam,

quê ha pahhi xwỳ pê Tawi ata tàmxwỳ tàmxwỳ ata pê pjê cunea jõ Pahhiti catia.

Quê ha krĩxàre cunea me,

pjê cunea kam ampo kra cunea,

hỹrmã me cuprõ,

ne me cumã amji kĩan kam ihhimpej xà krac ri me axà.

Ne ihtỳj ihkrac ri mempejti to ame kôt.

¹¹Ne amcro ata kam,

quê ha pjê cunea pĩn,

hipêr Pahhiti na mehkwỳ pê Juta catêjê me Ixaher catêjê cahhur to caprã,

ne amji na me to cuprõ,

mãr quê hanea ne ihhimpej xà krac ri me axà” hane.

Pê Pahpãm mehkwỳ mã caprĩ

Ixaj 40.1-31

^1-2Ỹhỹ me ikwỳ, Pahpãm te me acaxuw ito cumã ihcakôc catê na, ne imã ampo jarẽn ata, wa ha me amã harẽ. Cute imã hajỹr he:

“Ca ha Krĩpinkrên kam me ikwỳ pê Juta catêjê mã ito gũjarẽn picre to awjarẽ, ne me cumã:

‘Ate me amji pupun kên tỳjti ata hamre.

Ne ate me ito kên jahpan xà na,

wa ramã ite me amji pupun xà kêanre na me aton to ipijakrut,

na wa nee hipêr ate me ito kên ita to amji japackre nare’ hane” hajỹr.

³Ne Pahpãm te imã harkwa to imprar catê nõ kujahêc, mã cute imã caràr to:

“Me pajõ Pahhiti mã, ate amji kam me gapac xà kên atajê jicu,

ne me to impej xà te hajỹr he:

Ca ha gõ pahhi mã põti kam,

pjê kam me hamreare ata kam pry nõ to,

mãr quê cumã ihcuhtacti ne,

ne ajpẽnti ne.

⁴Ne hanea ne me caprũm to hipu,

ne me kẽn to hõkre nõ,

ne ahkre jituw to me hipu pa,

ne me awjarô to ajpẽn pa,

ne cumã pry jikôtti atajê to ihcuhtac,

mãr quê ahna mõr xà ata cumã ajpẽnti ne.

Jĩkjê na, ca ha me cumã

ate amji kam gapac xà impejti ton to me apa,

ne catyt kam me apa.

⁵Ne quê ha pjê kam mehcunea mehkrĩ atajê

me pajõ Pahhiti carôt jàhcujro ata pupu.

Ne Pahpãam te ri ita ton na amji jarẽn,

na quê ha ihtỳj ton to hane” hajỹr.

^6-7Mã jũm ita te imã:

“Acaràr!” hajỹr.

Wa cumã:

“Mẽr icaràr xà jũ to mã, wa ha icaràr?” hane.

Mã cute imã:

“Ca ha acaràr to hane he:

‘Pom mehcunea pjê kam mehkrĩ atajê pê ihhêj rũm ahtu pyràc,

ne me hàpên xà impejti atajê pê pĩrã pejti pyràc!

Ne quê ha ahtu me pĩrã incrà,

ne cyt ne hamre,

ita jĩkjê na,

quê ha mehcunea cyt ne me hamre,

me hàpên xà mea mã!

Quê ha hanea ne ahtu me pĩrã

põ kam kôc pahtỳjti cacrohti ita apê,

ne to incrà pyrentu,

ita jĩkjê na,

quê ha Pahpãm me hakô,

quê ha me hamre pyrentu!

⁸Ne ihtỳj jũ caxuw ahtu incrà xà,

ne hanea ne ihtỳj ampo rã inxô,

ne hamre xà.

Ne quêt me pajõ Pahpãm jarkwa nare,

quê ha quêt ihtỳj ihkrĩ rohnỳtti mã!’ hane” hajỹr.

⁹Mã hipêr jũm ita te imã:

“Ca ha ate me gũjarẽn pejti to me gũjarẽn catêjê nõ,

hawênti nõ kàa na api,

ne Krĩpinkrên kam mehkrĩ atajê mã acaràr,

ne akrãhhia kam me cumã acaràr,

ne nee apu amji mã me ampo cupa nare.

Ne Juta jõ pjê kam

krĩ cunea kam mehkrĩ atajê mã:

‘Ramã me gõ Pahpãm cator to mõ!’ hane” hajỹr.

Pahpãm ri mehcunea jirô pê carôt cati ne cute amji jahkre pej cati

¹⁰Ỹhỹ, Pahhiti pê Pahpãm ri ramã carôt tỳjti catia to cator to mõ!

Ne quê ha carôt kam ihhimpej xà tỳjti ata me to ihhimpej.

Ne quê ha ahpỹanre na cute me ampo ton atajê jahpan xà na,

me cumã hàmjõr xà impejti ata to ajpên ahpar mã mõ.

¹¹Ne pom hãn ne carà cahàcre hôhti jamãr catêjê hamãr prãmte to ipa,

ita jĩkjê na,

quê ha ihtỳj mehkwỳ atajê to amji pytà,

ne taa cupê me hamãr catê impejti ata na amji to.

Ne ihpa kam quê ha mehkrare japỳ ne me to ipa,

ne ma menxyrxwỳ me,

me hamãr peaj to ipa.

¹²Ne jũm te mõrmõ Pahpãm cuxà,

hũhkra to côxwa to ipipẽn?

Hamreare,

nee jũm te cuxà ton nare!

Nare, jũm te mõrmõ Pahpãm cuxà,

hũhkra to côjkwa to ipipẽn?

Hamreare,

nee jũm te cuxà ton nare!

Ne jũm te mõrmõ Pahpãm cuxà,

hõ kàhà kam pjê jacrô cunea to cuprõn?

Hamreare!

Nare, jũm te mõrmõ, cute ampo to ipipẽn xà kam,

hawênti jõ kẽn cunea to ipipẽn ne hũtĩ na hahkre pej?

Hamreare!

¹³Ne jũm te mõrmõ Pahpãm cuxà,

Pahhiti Carõ Pejti ata jahkre pej pejtu?

Hamreare!

Ne jũm te mõrmõ Pahpãm Carõ japackre prãmte,

cumã ampo to hahkre?

Hamreare!

¹⁴He xà ajkĩ Pahhiti te,

jũm te cumã ampo to hahkre xà na,

jũm na hàhwỳr?

Hãpà!

He xà ajkĩ jũm te Pahhiti mã catyt kam ipa to hahkre?

Hãpà!

He xà ajkĩ jũm te, cute ampo jahkre pej xà to cumã hahkre,

mã cute hahkre pej?

Hãpà.

He xà ajkĩ jũm te cumã cute amji jahkre pejti ita to hahkre?

Hãpà!

¹⁵He Pahpãm mã pjê kam ampo cunea na,

krĩxàre mehkrĩ itajê jamreare.

Ne cumã me cupê cuhkõn kam,

cô kryjre ne ahtwỳ

ne ihpehpec pyxit peaj ata pyràac,

ne ihcunea na me hamreare.

Ne cumã me cupê ihhêj rũm

ampo te ipipẽn xà kam

pjê jacrô to amji japackre xà nare ata pyràac.

Ne cumã cô jipôc ri pjêncrà itajê to ipipẽn xà te hajỹar,

pom quê ampo cajcucre to ipipẽn xà nare he.

¹⁶Quê ha te kẽn catia atajê na pĩ cunea to me cuprõ,

ne cumã kẽn atajê kam pryre apu ipa atajê cunea jõr prãmte,

pĩ ata kam haxwỳ ne me to caxàr cakrô,

quê ha nee Pahhiti mã ihnõ na cormã cati nare!

¹⁷Ne cumã ampo na,

krĩxàre atajê jamreare ata,

ne cumã me cupê ampo kôt hamreare atajê japyre mã me.

Pahpãm cahàc krekà atajê pê nee Pahpãm pyràc nare

¹⁸Ne mẽr ampo me ca ha Pahpãm ita to me ajpẽn?

Xà ajkĩ pahpãm cahàc krekà me ipipẽan?

Hãpà!

¹⁹He pahpãm cahàc krekà ton catêjê,

ihtỳj hãn ne carẽc to me to,

ne wakỳre prà tepti pê ôr ata to hipy me ahna pra ne me to incururo,

ne ihkôt wakỳre jakati to,

cumã me hakrô xà to.

²⁰Ne me cupê hamreare pê wakỳre prà tepti pê ôr me,

wakỳre prà jakati na hĩ jàhwỳr atajê jamreare,

na quê ha ihtỳj amji mã pĩ impejti atajê nõ capi,

cute cumã pahpãm cahàc krekà na ton prãmte.

Ne cute me pĩ to ipihho catêjê nõ te amji jahkre pejti nõ mã cugõ,

mãr quê cumã pahpãm cahàc krekà cuhhê impejti nõ to.

Ne nee ampo itajê nõ pê Pahpãm pyràc nare.

²¹He xà nee jũ caxuw ate Pahpãm jahkre pej nare?

He xà nee ajkĩ jũm te me amã harẽn nare?

He pom pê mam me amã Pahpãm to hahkre ita?

He xà pê ca, pjê te amji ton pê mã,

ramã cute ihcakôc xà ton ata na,

ate hahkre pej nare?

²²He Pahpãm ri pjê jajoti ita jipy ihkrĩ,

ne cumã me pahkryjre te hajỹar,

pom quê me pamã xycxycre kryjre he.

Ne taa mã ri côjkwa capô,

ne ihkrac ri ihkrĩ to hanea,

pom cu ahpykrã xà caxuw me cupẽhkà capô,

ne ihkrac ri me pahkrĩ he.

²³Ne taa mã ri pjê kam,

pahhi carôt tỳjti me,

me to ihhimpej catêjê catia atajê to ihkryjre,

mã cumã me ampo na me hamreare.

²⁴Ne cumã me cupê ampo kre xà ata pyràac,

ne pom me ampo hy kre,

mã kam harê me ajkaam,

mã kôc to incrà, mã carĩjre ma to ahhi, ne to cuto ita na mã,

cumã pahhi atajê te hajỹr,

mã cyt ne me to hamre.

²⁵Ampo cunea jirô pê Pahpãm pejti ata te amji na hàhcukjêr to hajỹr he:

“He ampo me, ca ha me ito ajpẽn?

He xà ajkĩ ipê ampo pyràc?

He xà ajkĩ jũm me ipipẽan?

Hãpà” hane.

²⁶Ne ca ha caxwa ri côjkwa wỳr rĩt,

ne caxêre jàhtôti atajê cunea pupu,

ne jũm te mõrmõ ton?

He Pahpãm te ri ton,

ne ahpỹanre na haprỳ atajêa na,

cute cumã hàkjêr par,

ne ihkrĩ xàa kam ihkrĩ par.

Ne carôt pahtỳjti catihti ata kôt,

nee ihnõ jamre nare.

²⁷Hàpà, Pahpãm na mehkwỳ pê Juta catêjê itajê! Ampo na mã ca ame Pahpãm mã me gàhcahhõn itajê to ame amji jarẽn to:

“He Pahhiti te nee ite amji kam ijapac xà na ijahkre pej nare,

ne cupê ipimxur tu.

Mã nee cute, ite ampo na prãm ata na ito amji japackre nare” hane?

²⁸He xà apê Pahpãm jahkre kêatre?

Xà nee jũ caxuw ate harẽn par nare?

He Pahhiti pê Pahpãm tĩr rohnỳtti mã ata,

ne cupê pjê me kam ampo cunea ton catê.

Ne nee quê ha jũ caxuw ihtycrĩ, ne ihpeacre nare.

Ne nee jũm te, Pahpãm te amji jahkre pej krã kreti atajê cunea na hahkre pej nare.

²⁹Ne taa mã ri mehtycrĩ atajê mã carôt to ihtỳj,

ne mehpeacre atajê mã carôt to ajcamẽ.

³⁰Ne mentuwjê intuw cakrô,

ihtỳj jũ caxuw mehtycrĩ, ne mehpeacre xà.

Ne mentuw picahur na mehte tỳjti cakrô,

quê ha ihtỳj jũ caxuw ame ajhu,

ne ame hikwa.

³¹Ne quêt Pahhiti to amji mã mehhimpej,

ne me hikaj to me ipa atajê,

quê ha ajteare mã me,

ne hõtpê amji mã me carôt to intuw.

Ne me cupê hàcti jara tỳjti,

mã to ne kỳaj pê apu ipa to pyt ata pyràac,

ne ampo cunea mã me hũcanãr to ipa.

Na quê ha Pahpãm jarkwa na memprar catêjê na ame pra,

ne nee amehtycrĩ nare.

Ne quê ha harkwa kôt catyt kam ame ipa xà ata caxuw,

nee me cupê me carôt hamre nare.

Mexij te mehkwỳ pytàr xà caxuw ihtỳj amji pupun to kêanre

Ixaj 53.1-12

¹Pahpãm te jũm ita na, me pamã harkwa kujahêc,

cu pahte ahna mehkwỳ mã me harẽn cakrô,

mã ihhêj ne, nee cute mempar,

ne amji mã me to hajỹr nare.

He Pahhiti te me cumã mehkritxwỳ to hũjahkre ata to ipipẽ cakrô,

mã ma hỹrmã ame irĩt,

ne ame hõmpun caca.

²Ne pom pjê incrà kam me ahkêt jakep,

mã kam harê ahtwỳ, ne hacpỹa mã kam hitêr ne hapôj,

ita jĩkjê na mã,

jũm ita te Pahhiti kam mare mã, ampo kên cunea jipôc ri,

amji to ipijapar ne ihkà.

Ne põ rũm pê hĩ kam,

ihhêj ne nee impej nare.

Ne ihhêj ne, nee cupê jũm catihti ata nare,

ne cupê me pajĩ te hajỹrỹre ata pyràac.

Na ri nee ihhêj ne cute amji wỳr me pahto hàhtêp xà caxuw,

hirã pê impej ne cati nare.

³Ne cupê hũmre te amji pupun xà kêanre kam ipa catê,

cama hanea ne amehcaca,

ne ame curê.

Na ri nee hỹrmã me irĩt,

ne me hõmpun prãm nare,

ne ma amehcaca.

Cu nee ajte pahte amji mã me to cati nare.

⁴Ne me pahte hajỹr cakrô,

mã ihtỳj cutea me pahte me amji pupun xà kêanre ata mã amji jõr,

ne cutea amji kam me pahte me amji cajpẽr xà kàj xàhti atajê cunea jaxwỳr.

Cakrô, cu pahtỳj ajpẽn mã me harẽn to:

“Pahpãm ri apu hũmre ita to kên he,

ne taa mã ri apu ihcahhy,

mã ihkàj xà” hane.

⁵He pahte ajpẽn mã me harẽn to hajỹr cakrô,

mã nee cute hajỹr nare.

Ne pahte me to kên,

ne me to ihcupan xà atajê cwỳrjapê ri,

cute me hũmre ata caxwỳr.

He pahte me ampo kên ton atajê jahpan xà na ri,

ma cute me to irô,

ne cupê me hĩ to kêanre.

Ne cute me to kên xà ita kôt ri,

cute me pamã ampo cupa nare na me pahton,

mãr cu me pahcarĩcti kam me papa.

Ne cute me haxôp xà ata kôt ri,

ihhêj ne hacpỹa mã, me pahcaprãr, ne me pahcapẽnti.

⁶Ne pom carà cahàcre hôhti me hamãr catêjê kaj na apu ipa,

ne cute amji to ipictor,

ita jĩkjê na mã,

cu pahte me Pahpãm jõ pry cupan,

ne amjia kôt me pajõ pry itajê pynãr.

Ne Pahhiti te,

pahte me to kên ne me to ihcupan xà atajê jahpan xà na,

nee me pahto kên nare,

ne ma jũm pê me pahkritxwỳ ata to irô, ne cute apu to kêanre.

⁷Mã cute mehkôt harẽn hêj xi xà kêanre to me harẽn,

ne to me cumã ihkàj xà catia ton cakrô,

mã nee cute amji pytàr xà na

me cumã ampo to ihcakôc nare,

ne nee amji jahpan xà na mencrôn nare.

Ne pom ma carà cahàcre kra curan xà wỳr me to ipa, mã aracri ipa,

ita jĩkjê na ri cute mehcuran na, cama amji na me hamãr,

mã cute mehcuran.

Ne pom me carà cahàcti hôhti hô jakep, mã nee incwỳr nare,

ita jĩkjê na mã cute,

ne nee amji jahpan xà na cute ame to kên catêjê mãn kên nare.

⁸Ne cute mehpro, ne mehhêj xia to cute me to ihhêj xi,

ne mehcukij xà kêanre to mehcukij,

ne nee cormã ihkra nare kam mehcuran,

mãr quê nee hipêr ita ri me hipôc ri apu ipa nare.

Ne me pahkwỳ te me to kên,

ne me to ihcupan xà cwỳrjapê ri amehcahhy.

⁹Ne nee apu hàprê to ipa nare,

ne nee apu ihhêj xia to ihcakôc to ipa nare cakrô,

mã ihtỳj cute me hàhcuran catêjê cahê na me harêt na harkwa cakrô,

mã me hakràjti jarêt xàa kam, cute me harêt.

¹⁰Ne nee cute ampo to kên nare cakrô,

mã Pahhiti te to mehkên catêjê pyràac,

ne cumã ihkàj xà ton.

Ne pê mam ramã Pahhiti ita ton xà ita na amji kampa,

na pê to hane.

Ihhêj ne Pahhiti te, jũm te me to ihcupan xà jahpan xà na,

cute me hũmre ita curan na me hamãr,

mã cute mehcuran cakrô,

quê ha ihtỳj hacpỹa mã ihtĩr,

ne ihtĩar na apu ipa rohnỳtti mã.

Na quê ha ihtỳj jũ caxuw cumã mehkra jàhtôti atajê pupu,

ne Pahhiti mã ihkôt pjê kam me hàhtôa to ihkra prãm.

¹¹Ne cute amji cajpẽr xà kêanre to amji cajpẽr xà ata jakàn pê,

quê ha cormã me hàhtôa atajê,

cute amji cajpẽr xà kên ata cwỳrjapê

cupê Pahpãm kra na me hahkre pej,

na quê ha ampeaj kam hũrên me hakry.

Ne quê ha cupê Pahpãm mã hàpên catê, ne catyt kam ipa.

Na quê ha me hàhtôa ne, cupê mehkritxwỳ ita na me hahkre pej,

ne ihtỳj amji mã me to ihhimpej.

Ne quê ha taa, cute me to ihcupan xà jahpan xà na,

ihkên cunea mã amji gõ,

mãr quê Pahhiti me ahna amji capa,

quê ihtỳj mempej pêa mã ame ipa.

¹²Cute mehcuran xà mã amji jõrtu.

Mã cute me to ihcupan catêjê cahê na

cute mehcuran xà ata pê,

cute amji mã mehkên ton xà atajê cunea juwahi,

ne ihtỳj cute me to ih cupan catêjê cajrẽn.

Na quê ha Pahpãm pê Pahhiti itajê cunea jahpan xà na to catia to cati,

ne ampeaj kam to carôt tỳj.

Pê Pahpãm mã mehcunea te hỹrmã ipipkjêr na to prãm

Ixaj 55.6-13

⁶Ỹhỹ me ikwỳ, cormã Pahhiti te ita ri apu mõr ita kam,

ca ha atỳj me hapê,

ne cormã ame acahê na mõr xà ita kam,

ca ha atỳj cute me apytàr xà na me wỳ.

⁷Ne quê ha mehkrã kên catêjê,

cute me amji kam hapac xà kên ton jicu,

ne nee hipêr cute me ton na me amji to amji japackre nare,

ne rỳ mã me pajõ Pahhiti pê Pahpãm wỳr me apkjê na mã,

quê ha taa ame caprĩ,

ne cute me to kên atajê to tojnõ hiahpuro,

ne nee hipêr to amji japackre nare.

⁸Pahhiti te me pamã, me pahna amji jarẽn to:

“Ite amji kam ijapac xà pê nee me ate amji kam me gapac xà pyràc nare.

Ne nee ijàpên xà pê me gàpên xà pyràc nare.

⁹Pom pjê jirôa pê côjkwa te pjê jirãr,

ita jĩkjê na mã,

ijàpên xà te me gõ tekjê jirãr.

Ne ite amji kam ijapac xà te gõ tekjê jirãr.

Pê Pahpãm jarkwa cakôc xà kôt ihtỳj ampo

¹⁰Ne pom hãn ne côjkwa pĩn cô carôt wrỳ, ne ta wrỳ, ne xa pjê inco,

mãr quê pjê kam ampo cunea to ajcamẽ,

quê ha me cumã cute me hõ kur xà atajê,

ne cute mehkre xà caxuw me cumã ihhy,

ne cormã hacpỹa mã api,

ita jĩkjê na,

quê ha ijarkwa hane he.

¹¹Ne ipĩn, ijarkwa hapôj ata,

quê ha nee hacpỹ ne caprỳ iwỳr amji jaxàr nare.

Ne cute me kam hapac prãmte,

wa ite mehwỳr ihkujahêc,

na quê ha nee ahna mehprãr nare ne ihtỳj me kampa.

¹²Na ca ha atỳj, jũ caxuw, me gakrya kam,

me acurê xwỳn catêjê jõ pjê pê me acato,

ne me acarĩcti kam,

me amã ampo cupa nare kam,

ma me gõ pjê impejti ata wỳr me axy.

Na quê ha, me amãa ihhêj ne hàhkà jakôt me, awjarô atajê cunea,

ate me amji jaxàr xà ita pyrên hakryte apu cre.

Quê ha hanea ne pĩ cunea

me apyrên cumã amji kĩnte,

ihhêj ne apu hũhkra cahhy.

¹³Ne curi hômjĩ jaxà kam,

quê ha quêt pĩ tỳjti pejti cuhtacti atajê hapôj.

Ne curi pĩhhô jàprêhti hapôj ata jaxà kam,

quê ha quêt ampo pĩhhô cuxwati atajê hapôj.

Ne ampo pejti itajê,

quê ha quêt ijaprỳa na hapôj.

Ne ipê Apãm Cati pê Pahhiti to

ate me amji japackre rohnỳtti mã xà na,

quê ha ita hane.

Na quê ha nee jũ caxuw hamre nare” hajỹr.

Quê ha Mexij ihtỳj me cupê hamreare atajê tehcajpa

Ixaj 61.1-11

¹Ỹhỹ me ikwỳ, por Pahpãm te me pamã jũm kujahêc na to hũjahkre ata te amji jarẽn to:

“Pahhiti te ampo cunea to ihhimpej catê ata te me cupê hamreare atajê mã,

ite ijũjarẽn xà pejti jarẽn catê na ixãm,

cwỳrjapê ri Carõ Pejti te imã amji jõr.

Ne cutea ri mehkwỳ wỳr ikujahêc,

mãr wa mehpeacre me,

me cumã amji kĩn nare atajê caprĩ,

ne hacpỹa mã me cumã me carôt gõ.

Ne hanea ne cute awcapàtkôti kam me hacjên catêjê mã:

‘Gapacta ne me gapôj’ hajỹr to ipa.

²Ne wa hanea ne mehcunea mã Pahhiti jarẽ, ne me cumã:

‘Quê ha caku itajêa kam

Pahhiti me akên cati pê me gapôj

ne me ato impej,

ne amji jahpan xà na,

mehkrã kêanre atajê to kên’ hane.

Ne wa hanea ne mehcunea ame amrã atajê mã caprĩ.

³“Ne por Xijãw jõ kẽn cahê na Krĩpinkrên kam mehkrĩ

ne ame amrã atajê,

wa ha itỳj cute ame ampo na prãm atajê,

me cumã cugõ.

Ne me cumã amji kĩn nare na cute me hahkre pej prãmte,

pro to cute me amji krã cunea jipro atajê,

wa ha quêt me cumã pahhi krãhkà impejti gõ,

hacpỹa mã me cumã amji kĩn na, cute me hahkre pej prãmte.

Ne mehpeacre atajê,

wa ha me cumã ampo cacô cuxwati gõ,

mãr quê me hakry.

Ne jũm mã amji kĩn nare ne cupê amji jahkre kêatre atajê,

wa ha me cumã cupẽhkà impejti gõ,

ne cute me Pahpãm pej na hũrên hakryti na harẽn na me to.

Ne pom hãn ne me ampo pĩxô pejti pàr kre,

mã cati ne ihkô, mã mehcunea amji mã ihkre catê jarẽn pejti,

ita jĩkjê na,

quê ha mehcunea me Pahhiti na mehkwỳ pê catyt kam me ipa na ame hõmpu atajê,

ihtỳj me Pahpãm jarẽn to impejti ne.

Quê ha Mexij hacpỹa mã mehkwỳ to ajcamẽ ne to cati

⁴“Ỹhỹ me ikwỳ, por pê mam me curê xwỳn me panquêtjê pê me hõ krĩ to kên ne me to hamre atajê,

ca ha hacpỹa mã me to impej.

⁵Quê ha me cupê mehcahkrit atajê,

ihtỳj me amã me aparxare jamãr to me ipa.

Ne me cupê me akwỳ nare atajê,

quê ha ihtỳj me gõ pur kam me amã me apê.

⁶Ne quê ha mehcunea mã me apê Pahhiti mã amehcajrẽn catêjê,

ne apê cumã me gàpên catêjê na

me gahkre pej.

Ne ca ha krĩxàre cunea jõ to amji mã garte,

ne to garte tu.

Ne ca ha me hàhcukrêj atajê pê me atekjêa na ahna me amji jarẽ.

⁷“Ampeaj kam quê ha me ikwỳ te amehpahàm catia pro xà kaj na,

mehcunea kam mare mã me ampo pejti catia pyr to me ajkrut.

Ne mehpahàm xàhte amencwỳr xà kaj na,

quê ha cute me ampo pejti ita pyr pyrên ame hakryte ame cre.

Ne quê ha pjê to hõ tekjê ata kam me to ajkrut ne me cukwa.

Na quê ha hũrên cumã amji kĩn rohnỳtti mã.

Pahpãm ma apu ampo kên cunea caca

⁸“Ne ampo na mã quê ha me hane?

Nee mã ampo na nare.

Pahhiti te me ahna amji jarẽn to hajỹr he:

‘He ipêa ri me hõ Pahhiti,

ne quêt imã,

catyt kam jũm te me ampo kên ton jahpan xà na,

cute mehcukij xà hêj xi nare kam mehcukij ata na ri,

imã ihprãm.

Newa ma apu hàhkĩj xi me,

ampo kên cunea caca.

Ne wa itỳj ite me cumã ampo to ijũjahkre ata na,

amji jarkwa kampa,

ne wa ha itỳj

ite me cumã ijàmjõr xà gõ.

Ne itỳj me ajpẽn pa.

Ne quê ha ite me ajpẽn par xà ata kôat me ipa rohnỳtti mã.

⁹Ne quê ha pjê cunea kam,

krĩxàre cunea, me ikwỳ tàmxwỳ tàmxwỳ jahkre pej.

Ne quê ha mehcunea ame hõmpu atajê me amji mã harẽn to:

“Itajêa kam ri Pahpãm te harcô mẽn, ne me to impej he” hane’ hajỹr.

Hõ quê ha ihtỳj amji jarẽn to hane” hane.

¹⁰Na quê ha Pahpãm na mehkwỳ me amji jarẽn to:

“Pahhiti pê Pahpãm pyrên

me ijakrya to me ijakry,

ne me imã amji kĩn hyre nare” hane.

Ampo na?

He pom me hakràjti me cupê hamreare tehcajpar prãmte,

me cumã ihkat kà impejti me,

hitô kà pejti gõ,

mãr quê impej pêa mã apu kam me ipa,

ita jĩkjê na ri,

Pahpãm te me itehcajpar prãmte,

ampo kên catia pê me ipytàr,

ne catyt kam me ipa na me ito,

mãr wa catyt kam ame ipa.

Ne pom me hikwa tuw catêjê

me amji krã jakrô,

ne me hakrô xà to me amji cũmpej,

ita jĩkjê na mã,

Pahpãm te me ito impej,

mãr wa me ipej pêa mã ame ipa.

¹¹Ne pom pjê kam me ampo hy kre,

mã huprãj hapôj,

ita jĩkjê na mã,

Pahhiti te ampo cunea to ihhimpej catê ata,

pjê cunea kôt krĩxàre cunea te catyt kam me ipa na me to,

quê ha catyt kam me ipa.

Ne quê ha Pahpãm to cute me cati prãmte,

ihtỳj cumã impej ne cati na me harẽn to me ipa.

Quê ha Pahpãm ampo cunea to antuw ne to impej

Ixaj 65.17-25

¹⁷Ne Pahpãm pê Pahhiti pê ampo cunea to ihhimpej catê ata te amji jarẽn to:

“Wa ha ijàpên xà to ita

ca hõmpu he:

Wa ha côjkwa tuw me, pjê tuw to,

ne ramã ampo cunea tuw pit ita kam,

quê ha nee jũm hipêr mam ihtũm atajê to me amji japackre nare.

¹⁸Ne ite me amã ampo tuw ton itajê pyrên,

ca ha ame gakry,

ne me amã amji kĩn rohnỳtti mã.

Ne quê ha pjê cunea kam

me hàhtôa Krĩpinkrên me,

kam mehkrĩ atajê pyrên me cumã amji kĩn,

ne ame hakry.

¹⁹Ne pa, ite hajỹar, Krĩpinkrên pyrên ijakry,

ne hanea ne kam mehkrĩ atajê pyrên imã amji kĩn.

Na quê ha nee hipêr jũm incwỳr nare,

ne nee hipêr jũm, amji japête incwỳr kam hapac nare.

²⁰“Ne nee quê ha hipêr jũm krare amji to ipijapar to incri

ne hacpỹ ma mã ihtyc nare,

ne ihtỳj amji to ipijapar to ipa.

Ne mehwej catêjê, quê ha ihtỳj mehwej to me ipa,

ne maa, cute me to hõ caku mã hahêr xà ata mã me to hahêr tu,

ne cormã mehweaj to ihwej,

ne mehtyc to hane he.

Ne cormã jũm na caku te xẽj ne ihtyc ata,

quê ha me amji mã harẽn to:

‘Pỳhàpà, nee cormã ihwej nare,

ne intuw kwỳa kam ihtyc’ hane.

Ne nee cormã ahna caku te xẽj nare, ne ihtyc ata,

quê ha me amji mã harẽn to:

‘Ihhêj ne ihkrã kêanre,

ne cute Pahpãm to kên cwỳrjapê ri,

intuw kwỳa kam cute ihcuran’ hane.

^21-22Ne pom pĩ tỳjti, ihtỳj caku jàhtôa kam awcanã ne ihcuhhê,

ita jĩkjê na,

quê ha ihtỳj me ikwỳ caku jàhtôa kam me awcanã,

ne mempej pêa mã me amji to ipijapar to me ipa.

Ne por wa ite amji caxuw me ikwỳ capi atajê,

quê ha ihtỳj caku jàhtôa kam,

cute hũhkra to hàpên xà ton atajê to me amji cajpuaw to me ipa.

Ne nee hipêr amji mã me ikre nõ xãm,

quê kam jũmjê mehkrĩ nare.

Ne nee hipêr kam amji mã pĩxô kre,

quê ha ajteare mã jũmjê cupê mehkrẽr nare.

Ne quêt amji mã me hũrkwa pyxwỳ,

ne me taa kam mehkrĩ.

Ne kam me amji mã pĩxô kre,

ne quêt me taa me cuku.

²³“Ipê me hõ Pahhiti,

ne hanea ne ipê mehtàmxwỳ jõ Pahhiti.

Ne paa, wa ha me kam ijarcô mẽ,

ne me to impej ita kam,

jũ wỳr quê me apê,

ne me hàpên xà kôt hamreare ne.

Ne quê ha mehkra ihpỳpỳm,

quê ha nee ampo kêanre mehwỳr cator nare.

Ne mehkra hãn ne me cumã me ajhu,

ne mempejti kam me amji to ajpa.

²⁴Ne hãn ne ampo na me icukij,

wa ha itỳj me kampa.

Ne cute amji tehcajpar xà na me iwỳr xwỳjrea na,

wa ma ramã ite mehtehcajpar xà caxuw me cahê na ipa.

²⁵“Hõhõ, amcro atajêa kam,

quê hacpỹa mã rop cahàc jàprêhti atajê,

carà cahàcre kra me ajpẽn cahê na hàpàn to ipa.

Ne rop cahàc jõkre hôhti,

quê ha cupê pryti pyràac, ne ahtu pit kur to ipa.

Quê ha mehkĩnte cagã,

pjê jacrô pit kur to ipa ita na.

Ne quê ha ijõ pjê pejti ita kam,

nee ampo te to kên xà hamreare,

ne nee jũ caxuw ampo te to hamre xà nare” hajỹr.

Hõ, Pahhiti te amji jarẽn to hajỹr.