IXAHER CATÊJÊ

IXAHER CATÊJÊ WỲR

Jũm Jõ Kàhhôc

Ỹhỹ, cute ihkàhhôc ita hôc catê te nee kam amji japrỳ xir nare, ne ihhêj ne Pawrô te mõrmõ ihhôc. Ne Ixaher catêjê te Jeju to amji mã mehhimpej atajê cunea mã ri cute ihhôc ne ihkujahêc. Na ri ihkàhhôc ita japrỳ te Ixaher Catêjê Te Jeju To Amji Mã Mehhimpej Atajê Wỳr, Jũm Jõ Kàhhôc (Ixaher).

Pê ihhêj ne Ixaher na mehkwỳ nare atajê hacpỹa mã Jeju na mehkwỳ to, mam menquêtjê te amji kam me hapac xà tũm ata wỳr ipipkjêr prãm. Cwỳrjapê ri ihkàhhôc ita nee cute Jeju to amji mã mehhimpej jicu nare na me cumã apô. Ne Jeju te amji kam hapac xà tuwti ita ri, mam Ixaher catêjê te amji kam hapac xà tũm ata jirôa pê impej. Ne ite nee Ixaher catêjê wỳr ihkàhhôc tẽ ita cunea to ipintuw nare, ne ihkwỳ jatujre atajê ri ite to ipintuw.

Pahte Pahpãm to amji mã me pahhimpej xà kôt harẽn xà

Ixaher 11.1-40

2 Petrô 3.5-7

¹Ỹhỹ me ikwỳ pê Juta catêjê pê Ixaher catêjê, wa ha me amã me ate Pahpãm to amji mã me ahimpej to hahkre, ne to capô, mãr ca me hahkre pej pejtu ne. Quê ha Pahpãm te me pamã ampo to hũjahkre xà ata, cormã nee me pahwỳr cator xà nare cakrô, cu ha pahtỳj ampeaj kam, cormã me pamã hõr na amji mã me to hane, ne pahtỳj me hikaj. Cu ha pahte Pahpãm to amji mã me pahhimpej na, quê ha ihtỳj me pamã ampo pupun xà nare ata te ihkrĩ na hahkre peaj to hahkre pej. Nãmri cu ha pahte Pahpãm to amji mã me pahhimpej nare na, cu ha nee me hahkre pej nare.

^2-3Ne cu Pahpãm to amji mã me pahhimpej, cwỳrjapê ri me pamã Pahpãm jarkwa kôt pjê me côjkwa kam ampo cunea te amji ton na hahkre pej. Na ri me pamã, pahte nee me ampo pupun xà nare ata te ri ampo itajê cunea ton na hahkre pej. Ne pê me panquêtjê ihtỳj Pahpãm to amji mã mehhimpej, cwỳrjapê ri Pahpãm te me to ihcakôc to impejti, ne me ahna amji caxàr.

Pê Ixaher catêjê quêtjê itajê ihtỳj Pahpãm to amji mã mehhimpej

⁴Pê ajco Aper xwỳ Pahpãm to amji mã hane, cwỳrjapê ri Pahpãm mã cute Cãn xwỳ jirôa pê ampo jõr xà ata peaj to impej. Mã Pahpãm te, cute cumã ampo jõr xà ita na cupê catyt kam ipa catê na harẽn to impeaj to impej. Na pê ihtỳj ihkôt Aper xwỳ na amji capa. Ne pê ramã Aper xwỳ ty cakrô, mã cormã cute Pahpãm to amji mã ihhimpej xà ata, ihkôat me pamã to hahkre.

⁵Pê Enoc hanea ne Pahpãm to amji mã hane, na pê ihcajpuaw pê Pahpãm ahna amji jarẽ, na pê nee pjê ita kam ihtyc nare, pê Pahpãm amji mã ihtĩar na to api, pê nee hipêr jũ caxuw jũm cumã cator ne hõmpun nare. ⁶Jũ wỳr cu Pahpãm to me pahte amji mã hajỹr nare xà ata kam ihcajpuaw. Quê ha jũm te Pahpãm wỳr hàhtêp na amji to hàhcukjêr na, quê ha ihtỳj Pahpãm te ihkrĩ na amji mã to hane. Ne quê ha hanea ne caxwãm catia mã Pahpãm kôt me ipa prãmte ahna ahcukij, quê ha ihtỳj cute ahna hàhcukjêr ata jahpan xà na, cute ahna amji caxàr na amji mã to hane.

⁷Pê Nowe xwỳ hanea ne ajco Pahpãm to amji mã ihhimpej, na pê ihtỳj cumã, por rỳ nee jũm te ta catia pupun nare ata cawpa. Pê cute cumã ihcawpa xà ata kôt, amji mã pàr kreti to, mãr quê kaam mehkra me, amji to mehtyc xà jahpa. Mã ihkĩnte cute nee Pahpãm to amji mã mehhimpej nare atajê te amji curê mã me amji mẽn, ne mehcunea jamre. Mã Pahpãm te Nowe xwỳ te amji mã to hajỹr xà ata kôt ahna amji caxàr, ne cumã:

— Ate ikam gapac pejti, na ri apê catyt kam apa catê — hajỹr.

Aprãw pê cute Pahpãm to amji mã mehhimpej catêjê xakat

⁸Pê Aprãw xwỳ hanea ne ajco Pahpãm to amji mã ihhimpej to ipa, pê Pahpãm cumã jũ ri cute pjê to hõ tekjê xà ata to, hũjahkre xà ata na, amji mã to hane. Ne ma harkwa kôt, nee jũ ri cute hõ pjê ata jahkre pej nare kam, ihwỳr mõ. ⁹Pê Pahpãm Aprãw mã pjê to hũjahkre xà ata kôt, ihkôat ihwỳr mõ ne curi cato, ne kam ihkrĩ. Ne hanea ne ihkra pê Ixac me, ihtàmxwỳ japrỳ te Jaco ata me, kam mehkrĩ. Ne pê hanea ne Pahpãm Aprãw tàmxwỳ tàmxwỳ mã, menquêtti kôt pjê ata to awjahkre. Ne pê me cupê mehcahkriat, ne ajco pryre kà te ikre ata kam mehkrĩ. ¹⁰Ampo na? Nee mã ampo na nare. Pahpãm te me cumã amji ton xà ataa na, cute me cumã jũ caxuw krĩ jamre nare ata xãm na, cormã me hikaj.

¹¹Pê Aprãw ramã ihweaj to ihwej, ne hĩxi pê Xarakwỳj ihkre crà cakrô, pê Pahpãm ahnaa cumã ihkra to awjahkre. Mã cute cumã ihkra to hũjahkre xà ata na amji mã to ihhimpej, ne ihtỳj hikaj, mã cumã ihkra pê Ixac pỳm. ¹²Hõ, pê hũmre pyxit peaj ne ajmãr ty, ata kôt ri mehtàmxwỳ jàhtôa to hàhtô, ne me cupê caxêre jàhtô pyràac, nare, me cupê côxwa tohkà na pjênxôm carôt jàhtô pyràac.

¹³Ne ite me amã me panquêtjê jarẽn xà kôt harẽn itajê ri, Pahpãm to amji mã mehhimpej to me ipa ita kam amehtyc. Ne nee cute me Pahpãm te me cumã ampo to hũjahkre xà atajê cwỳr nare kam amehtyc. Ne cute cormã me ampo cunea to Pahpãm te me cumã hũjahkre ata jarẽn par, ne nee cormã me hõmpun pej nare kam, ihhêj ne ramã cute me hõmpun, na ri ame hakry, ne ihtỳj ahna me amji jarẽn to me hane he:

— He nee me ipê pjê ita tekjê nare, ne me ipê mehcahkrit, na wa pjê nõa pĩn icator, ne ma ihnõ ita wỳr mõ — hane.

¹⁴Ne cute me amji jarẽn xà ita kôt, cu ramã pahte me hõ pjêa japên na me hahkre pej. ¹⁵Quê rỳ mã pjê pĩn me cator ata wỳr hacpỹa mã me amji jaxà, ne nee hipêr hacpỹ mã cute me amji jaxàr xà to ame amji kam hapac nare. ¹⁶Ne quêt ame côjkwa jõ pjê impejti ata pit japên to me ipa. Ne atajê pê Pahpãm kra impeaj, na ri nee me hũ na ihpahàm nare. Na ri ramã cute me cumã côjkwa kam mehkrĩ xà ata ton.

^17-18Pê Pahpãm Aprãw mã ihkra pê Ixac to hũjahkre to hane he:

— Ixac pê akra ita cucwa kam, quê ha amã me atàmxwỳ hàhtôa to hàhtô — hane. Pê Pahpãm Aprãw mã hajỹr cakrô, cute ihkra pê Ixac na capi prãmte ihcuran na cumã harkwa. Mã Pahpãm jarkwa kôt ramã cute ihkra curan ne to caxàr xàa kam, cute amji mã harkwa to:

¹⁹— Wa ha ihcura, quê ha ihtỳj Pahpãm hacpỹa mã ikra to ihtĩr — hajỹr. Mã Pahpãm te cute ihkra curan tête huwahi xà ata pê ihhêj rũm ramã hacpỹa mã ihtĩr.

²⁰Pê Ixac xwỳ hanea ne ajco Pahpãm to amji mã ihhimpej to ipa, na pê Pahpãm mã mehkra pê Jaco me Exaw tàmxwỳ te amji to me ipijapar xà na mehcajrẽn, ne me cumã:

— Quê ha Pahpãm ihtỳj jũ caxuw ato impej cati, me atàmxwỳ mea mã — hajỹr.

²¹Pê Jaco hanea ne ajco Pahpãm to amji mã ihhimpej to ipa, na ri ramã ihtyc xàa kam, cute Pahpãm mã mehtàmxwỳ pê Joje xwỳ kra pijakrut atajê cajrẽn, ne ihtỳj cormã hàwkô ata na cute amji cajpar ne xa ne Pahpãm pejti na harẽn, ne to amji kampa.

²²Pê hanea ne Joje ajco Pahpãm to amji mã ihhimpej to ipa, ne ihtyc xà wỳr, mehkjêjê pê Ixaher catêjê te Ejit jõ pjê pê me cator na me cumã harẽ. Ne cute me cumã harkwa hyr, mãr quê jũ caxuw hacpỹ mã me amji jaxàr xà wỳr mehhi to mõ, ne ma Pahpãm te me cumã pjê to hũjahkre xà ata ri me harêt.

²³Pê Mojxe xwỳ pãm me inxi hanea ne ajco Pahpãm to amji mã mehhimpej to me ipa. Na pê Mojxe cumã ihpỳm, pê Paro xwỳ pê pahhi me ahkrare curan na me cumã harkwa ata kaj na, me to amxu. Ne pê ihkra ata impeaj to impej, pê me hõmpu, na pê nee amji mã me pahhi ata cupa nare, ne cama me to ipimxur to putwrỳ incrê.

Pê Mojxe Ixaher catêjê mã cute mehkritxwỳ curan na to hahkre

²⁴Pê Mojxe hanea ne ajco Pahpãm to amji mã ihhimpej to ipa, ne ihkà, ne ma apu cute me, cupê Paro kra cahãj ata kra na me harẽn na ihcaca. ²⁵Na pê cute ampo kên cunea to amji cajpuaw to ipa xà to hatujre xà ata kam pê hicu, ne quêt ma mehkwỳ mã hàr na amji to. Ne me cumã axà ne me cahê na amji pupun xà kêanre to amji pupun to ipa. ²⁶Ne pê amji mã:

— He quê ha ihtỳj jũ caxuw Pahpãm ite amji pupun xà ita jahpan xà na hirôa pê imã amgõ. Na wa ha Ejit jõ pjê jàhcukrêj pejti itajê cunea to amji pê ijapac kêt. Ne Pahpãm te me pamã cute ampo kên cunea pê me pahpytàr catê to hũjahkre ata cwỳrjapê, wa ha cute ame icurê catêjê kam amji pupun to kêanre ne — hane.

²⁷Pê Mojxe ajco amji mã Pahpãm to ihhimpej to ipa, na pê nee cumã pahhi pê Paro ata te kam incryc xà ata cupa nare, na pê ihtỳj Ejit jõ pjê pê mehkwỳ to cato, ne ma me to mõ. Ne me to mõr xà ata kam, ihtỳj ihhêj ne, por me Pahpãm pupun xà nare ata pupun to me mõ. Na pê kypê me cumã hũcanãr nare. ²⁸Ne pê Pahpãm to amji mã ihhimpej, na pê me Hakren xà jõ amji kĩn to Pahpãm jarkwa kôt mehkwỳ mã ihhimpej, ne to hahkre. Ne amji kĩn ata kam, pê ikre cunea kôt cute ame carà cahàcre kra pê mehkritxwỳ caprô jaxwỳr na me cumã harkwa ta. Mãr quê ame haxwỳ, quê Pahpãm pĩn ajpên me ahkrare cakônĩ curan catê ata tẽ, ne mehkritxwỳ caprô pupu, ne nee mehkwỳ pê Ixaher catêjê nõ pê ihkra curan nare.

²⁹Ne pê Ixaher catêjê hanea ne Pahpãm to amji mã mehhimpej, na pê ma Côxwatepti cajpuw amcràre ata na me rê. Pê Ejit catêjê me cuxà ahna me irêr prãm cakrô, pê cama cô me hipej.

³⁰Pê Ixaher catêjê Pahpãm to amji mã mehhimpej, na pê Cana jõ pjê mã me hàr xà ata kam, ihtỳj Pahpãm jarkwa kôt Krĩcuxwati ata pu na me ipijarõa to me amcro to xet, me ajkaam pê krĩ tête kwỳc ata cunea apu ajxwỳ, ne pê kam mehkrĩ catêjê atajê cunea jipej tu. ³¹Pê Rapekwỳj xwỳ pê mempijapit xyre ata, ihtỳj Pahpãm to amji mã ihhimpej, na pê Ixaher catêjê te krĩ pupun catêjê atajê na amji capa, pê nee cute me Pahpãm par nare atajê kôt me cahãj ata curan nare.

Pê menquêtjê kwỳ te Pahpãm to amji mã me hajỹr atajê, ihtỳj me ampo cwa

³²Hamre ramã ite me amã ijũjarẽn xà ita jamre. Ampo na? He ampeaj kam cute mam Pahpãm to amji mã mehhimpej catêjê jàhtô, na wa rỳ mã me amã Gitõ me, Parac me, Xãnxã me, Jeta me, Tawi me, Xamer me, Pahpãm jarkwa to mehcakôc catêjê kwỳ jarẽ. ³³Ne itajê pê hanea ne ajco Pahpãm to amji mã mehhimpej to me ipa, na pê krĩxàre kwỳ jõ pjê kôt ajco me ajpu ne me hipej, ne amji mã me hõ pjê atajê cunea pytà, ne me to hõ tekjê. Ne pê catyt kam, mehkrã kên me, mempej catêjê atajê to ajpẽn pê me ajcokjê. Ne pê ihtỳj Pahpãm te me cumã ampo to hũjahkre atajê incwa, ne ihtỳj amji tête me rop cahàcti jõkre hôhti ata jarkwa to me ajpỳ.

³⁴Ne pê hanea ne mehkwỳ, cuhy kam cute me irẽn xà ata kam, ihtỳj cuhy pôc kam ame ipa, ne nee jũm caxàr nare. Ne pê hanea ne mehkwỳ, wapo xwahhihti to cute mehcuran xà ata pê me amji pytà, na pê nee me jũm curan nare. Ne pê mehkwỳ peacre atajê, carôt tỳj mã me axà. Pê mehkwỳ mã me hàprê xà caxuw ampeaj kam me carôt tỳj cati, ne pê ihtỳj krĩxàre jõ krãhtare jàhtôa ne ajco me tohjê. ³⁵Ne pê pyjê kwỳ te ramã mehkjêjê tyc atajê tĩar na hacpỹ mã amji mã me huwahi.

Catyt kam Pahpãm kôt ame ipa atajê, ihtỳj me amji pupun xà to kêanre

Ne pê mehkwỳ hanea ne Pahpãm to amji mã mehhimpej cakrô, ihtỳj cute amji pupun xà kêanre to me amji pupu. Ne ma me amji mã hikran caca, ne ihtỳj Pahpãm cwỳrjapê amji na me curê xwỳn jamã, mã me cumã mehkàj xà ton to me ipa ita to mehcura. Ne pê ajco mehkàj xà na me amji pupun xà ata kam me amji mã:

— Quê ha ihtỳj Pahpãm ite incwỳrjapê amji pupun xà kêanre to amji pupun xà ata jahpan xà na, hacpỹa mã cute ito itĩr xà ata kam, hirôa pê imã amgõ — hane.

³⁶Ne pê mehkwỳ na cute me xwỳ xà kêanre xà atajê to me cumã ihpahàm catia to, ne mehcahhyr xà kêanre to mehcahhy. Ne wakỳre te mehcajpre xà to mehkwỳ cajpre, ne me hacjên xà kam me hacjê. ³⁷Ne pê kẽn to mehkwỳ capê ne to mehcura. Ne pĩ cokjêr xà to mehkwỳ tĩar kam mehcokjê. Ne pê wapo xwahhihti to mehkwỳ cura. Ne pê mehkwỳ pê hamreare, pê me curê xwỳn cama ame hahêr to mehcapôr to me ipa, ne ame to kêanre, pê ajmãr mehcakrô ame ipa, ne prykà to pit mã me amji pro to me ipa. ³⁸Ne kẽn me põti kam me hamreare ata kam me acto ne ihtỳj kẽn kre me, pjê kre kam ajco amehkrĩ. Ne Pahpãm mã pjê kam mehcunea mehkrĩ atajê jirôa pê quêt mempeaj to mempej.

³⁹Ne atajê cunea, pê ihtỳj Pahpãm to amji mã mehhimpej to me ipa, na pê Pahpãm mã mempej pit, pê me ahna amji capa cakrô, pê nee cormã cute me, por Pahpãm te me cumã ampo to hũjahkre ata cwỳr nare. ⁴⁰Ampo na? Pahpãm mã cormã cute me ampo cwỳr xà ata jõr xà nare, quê ha cormã me to me pajikaj, mãr cu ajkaam, Pahpãm te ihcunea na me pahto impej prãmte me pamã hàmjõr xà impejti catia ata to me pamã amgõ.

Cu ha menquêtjê cuxà, me pahte amji pupun xà kêanre ata mã me awcanã

Ixaher 12.1-29

Pirip 3.12-16

¹Ne mam me panquêtjê amji mã me Pahpãm to mehhimpej to me ipa catêjê atajê jàhtôa picarõ, cormã ihtỳj me pahkôpĩr to me ipa. Ne cute Pahpãm to amji mã mehhimpej xà atajê ihhêj ne ihtỳj me pamã hàpôr to me ipa. Pom hãn ne me ipicahur curê, ne me hàhcukrêj me, ampo cunea pytĩti me, ampo te mehcahpêrkàr xi atajê cunea jicu, ne mehcakrô me ajcahu, ita jĩkjê na, cu ha amji pê me ampo kên cunea me, ampo kên te me pahcupu xi atajê cunea jicu, mãr quê nee ampo me pahcahpêrhyr nare kam, catyt kam Jeju to amji mã me pahhimpej kam me to pancrà. ²Ne pom me ipicahur catêjê amji cumam memprar xà mã catyt kam me irĩt to me pra, ita jĩkjê na, cu ha Jejua to pit mã amji mã me pahhimpej to me papa. Ampo na? He taa mã pê mam Pahpãm jõ pry kam me paxãm. Ne taa mã pê pahte amji mã me to pahhimpej na me pahto. Ne taa mã quê ha ampo cunea jicu xà kam me pahtehcajpa, mãr cu nee pahte amji mã me to pahhimpej xà ata jicu nare. Ne pê Jeju pjê ita kam ajco apu ipa, ne nee pĩ kam ihtyc xà ita tête amji hi kwĩn nare. Ne ihtỳj cumã jũ caxuw hakryti na amji jahkre pej, na pê ihtỳj ihtyc xà kêanre kam ihpahàmti ita mã awcanã. Na ri amcro ita kam ihtỳj Pahpãm cahê na, awpôc rũm Pahhiti krĩ xà pê me hàmtàr cati krĩ xà ata kam jỹ.

³He Jeju te amji pupun xà kêanre to amji pupun, pê mehkrã kên hàhtôa ne ma ame curê cakrô, pê ihtỳj awcanã na, to ca me amji japackre, mãr ca cuxà, nee ampo kên cunea mã gũcanãr tête me amji hi kwĩn, ne Pahpãm kôt me apa jicu nare. ⁴He nee cormã mehkrã kên te amji kam hapac xà kêanre pê, ate me amji pytàr xà ita kam, nee rỳ me anõ caprô pijaxwỳr nare. Ne nee jũm te cormã me anõ curan nare. ^5-6He pê ramã Xarômãw xwỳ, cute me amã acarôt to ihtỳj xà caxuw, Pahpãm jarkwa na hõ kàhhôc kam me amã ita na ihhôc, ca ramã ihhêj ne ate me to gapac kêt! He pê me pajapackre to:

“Ikra, quê ha Pahhiti pê Pahpãm mã jũm kĩn,

quê ha ihtỳj jũm ata japackre xà to ihcãmxê,

mãr quê catyt kam ihkôt ipa.

Ne quê ha Pahpãm jũm to ihkra xà na ahna amji capa,

ne ihtỳj cute ampo kên ton tête cumã,

ne cumã ihkàj xà to, mãr quê catyt kam ihkôt ipa.

Na quê ha jũ caxuw Pahhiti akàj xà nõ to acãmxê,

ca ha atỳj cute acãmxêr xà ata na ihkôpĩ, ne ihkôt hakop.

Ne quê ha ampo tête amã,

ca ha cute amãn xà ata kam,

ihkôt apa intête amji hi kwĩn nare” hane.

⁷Na quê ha ate me amji pupun xà kêanre me akam ajhu, ca ha atỳj me cumã awcanã. He ate me amji pupun xà kêanre itajê pê, pom hãn ne me hũmxwỳ mehkra japackre he. Ne ate me amji pupun xà kêanre itajê, ihtỳj ramã me apê Pahpãm kra na me garẽ. He xà ajkĩ cute mehkra japackre xà caxuw me hũmjê me hamreare? Hãpà. Cute me hapackre xà caxuw ihtỳj me cumã me hũmjê me, menquêtjê. ⁸Ne pom krô na mehkra, mã nee me hũmjê me hapackre, ne mehcãmxêr nare, mã amjia kôt me amji to ajpa, ita jĩkjê na, quê ha Pahpãm nee jũ caxuw acãmxêr nare na, ca ha nee apê ihkra impej nare.

⁹He pê me pajõkrenõre na ihtỳj me pahcũmxwỳ ajco me pajapackre, ne me pahcãmxê, na pê cu pahtỳj ajco amji mã me hũpa. Cwỳrjapê cu ha ita caxuw me hirôa pê amji mã me côjkwa kam me pajõ Inxũ Cati cupa. Ne cute me pahkàj xà to me pahcãmxêr, na cu ha pahtỳj me kampa, ne me awcanã, mãr cu cahê na me pahkrĩ rohnỳtti mã. ¹⁰Pê me pahcũmxwỳ, me pantuwre na, caku crêre kam, jũ na cute amji mã me pahto prãm xà ata na ajco me pajapackre, ne me pahcãmxê. Ne Pahpãm te nee quêt hajỹr nare. Ne cute me pahto impejti xà caxuw ri me pahcãmxê, mãr cu me papê hũràac, ne me pampeaj to me pampej. ¹¹He pê me pahcũmxwỳ me pahcahhyr xà ata kam, pê nee me pamã ahna ihkĩn nare cakrô, cu pahtỳj cute me pahcahhyr xà atajê kôt catyt kam ame papa, ne me pampej pêa mã me amji to ajpa.

Cu ha pahtỳj Pahpãm kôt me papa rohnỳtti mã to prãm

Carati 5.16-21

¹²Cwỳrjapê, quê ha ate me amji pupun xà kêanre me awỳr hapôj, ca ha nee Pahpãm kôt me apa tête me amji hihkẽhkẽn nare, ne cama quêt caxuw amji mã me acarôt to mehtỳj. ¹³Na ca ha atỳj gõtpê catyt kam Pahpãm te amji kam hapac xà kôt apa, mãr quê ihtỳj jũm akôt mõ ata, nee akôt amji cahpêrhyr, ne Pahpãm kôt ipa tête amji hi kwĩn, ne hicu nare.

¹⁴Ne catyt kam mehcunea me, me apijapu to me apa na me amji to prãm nare na, ca amji to me ahcukij. Ne catyt kam ate amji kam me gapac xà impejti to me apa na, ca me caa amji to me hahkre. Nãmri quê ha jũm te ihcunea na catyt kam, cute amji kam hapac xà impejti to ipa nare na, quê ha nee jũ caxuw Pahpãm pê Pahhiti pupun nare. ¹⁵Ne ca ha ma me ajpẽn jamã, mãr ca nee me anõ Pahpãm jàhcaprĩhti ata cwỳr jicu nare. Ne nee ca me akwỳ kam, jũm te amji kam hapac xà kên to ipa na hamãr nare. Ampo na? Por jũm te amji kam hapac xà kên ita pê ihhêj rũm pjêpjêcrejĩ pyràac. Ne por mehcunea pjêpjêcrejĩ na me pra atajê, quê ha mehcunea caxwỳ, quê ha me kàj xà partu. Jĩkjê na, quê ha mehcunea jũm te amji kam hapac xà kên ata têp, ne ramã ihkên mã hàr pyrentu. ¹⁶Ne nee ca me akwỳ kam, jũm te amji kam hapac xà xyre kam pahpahàmti ton to ipa na hamãr nare. Ne nee ca jũm pê Exaw xwỳ te amji mã Pahpãm te amji kam hapac xà cupa nare pyràc ata na hamãr nare. He pê Pahpãm Exaw xwỳ mã ampo pej cunea gõ, pê to hõ tekjê. Ne ampo atajê to hõ na crat pyxit peaj na to ahpa. ¹⁷Jirô pê hapu na ihkrã kre mã ihpỳm, ne tee hacpỹ ne apu Pahpãm te cumã ampo pejti jõr ata pyr to hahkre, ne tee incwỳar kam hacpỹ ne ahna ahwỳ cakrô, nee hacpỹ ne cute ipyr xà nare na, ramã me amã hahkre pej.

Pê Ixaher catêjê Pahpãm wỳr me hàhtêp xà ata ihtỳaj to ihtỳj

^18-21Pê Ixaher catêjê, põti kam me hamreare ata kam, Pahpãm wỳr me ahtêp, ne ma kẽn japrỳ te Ihcuhhyt ata na me cato. Ne mento jĩa to me cuhy catia pupu, ne mehcajpẽ. Ne cute me awcapàtkôti catia pupun. Ne cute me kôcti catia pahtỳjti ata cajpẽr. Ne cute me hapac jĩa to me côjkwa pĩn hõhhi jõkre krãhhi ihtỳjti ata kam hapac, ne hanea ne cute me Pahpãm te ihcakôc na me kam hapac. Ne hanea ne cute me Pahpãm jõkre kam hapac, ne ampeaj kam me cumã hũpa. Na ri cute mehwỳr, quê nee hipêr ihcakôc quê mempar nare. Ne Ihcuhhyt ata kam pê Pahpãm me cumã ihcakôc, cwỳrjapê ri ihtỳj cute amji mã me hũpa xà. Cwỳrjapê pê Pahpãm me cumã kẽn ata cawpa to:

— Nee me anõ te kẽnti ita cupên xà hamreare, ne nee hanea ne ampo pry te ihcupên xà hamreare. Quê ha ampo pry ihcupê, ca ha me caa, me kẽn kwỳ cwa ne to me capê, ne to mehcura — hane. Mã hũpate, cute nee me cumã harkwa hyr xà ita na me amji caxàr, ne kam me hapac prãm nare. Mã Mojxe te ampo itajê cunea pupun, ne cute ahna amji jarẽn to:

— Wa itỳj ampo itajê cupate apu itertet — hane. Hõ, pê Ixaher catêjê Pahpãm na me ahtêp xà ata kam, pê me to hane. Ne nee quêt ate me hajỹr nare.

Pahpãm wỳr me pajàhtêp xà quêt ihcajcucre, ne nee ihtỳj nare

²²Ne ca Pahpãm na me gàhtêp xà ata kam, ca ihhêj ne côjkwa kam Xijãw jõ kẽn pupun xà nare ata na me gàhtêp. Ne por côjkwa kam Krĩpinkrên pê Pahpãm tĩr rohnỳtti mã ata jõ krĩ na, ca me gàhtêp. Ne côjkwa kam krĩ ata kam, ampeaj kam Pahpãm mã me hàpên catêjê jàhtôa to me hàhtô, ne me hakrya kam curi me cuprõ. ²³Ne hanea ne Pahpãm na mehkwỳ ihkôt me ipa atajê, ramã Pahpãm te cahê na me ipa xà caxuw côjkwa kam, hõ kàhhôc kam me haprỳ nõr atajê na me gàhtêp. Ne hanea ne Pahpãm pê catyt kam, me pahcukij ne ajpẽn pê me to ipicokjêr catê ata na me gàhtêp. Ne ca hanea ne, por pê ihcunea na catyt kam ajco me ipa, ne ramã amehtyc atajê na, me gàhtêp. ²⁴Ne hanea ne Jeju te Pahpãm me, me pahte ajpẽn par to intuwti ata na me gàhtêp. Ne Jeju caprô te ihhêj rũm me pahkên cuhhõn, ne me pahpytàr. Ne pê Aper xwỳ caprô, ihtõ te ihcuran jahpan xà na, Pahpãm na cute to kên prãmte ahwỳ. Ne nee Jeju caprô te hajỹr nare. Ne quêt cute mehcunea caprĩ xà caxuw, Pahpãm na hàhwỳr.

Cu ha nee me pahte Pahpãm par nare na, quê ha ihtỳj me pahto kên

²⁵Cwỳrjapê ca ha nee amji pê Pahpãm jarkwa curê nare, ne quêt kam me gapac to impeaj ne. Pê Pahpãm mam pjê wỳr wrỳ, ne me aquêtjê mã amji cawpa. Pê nee me kam hapac nare, ne cama mehkêanre ton to ajco me ipa, na pê nee jũm Pahpãm te me to kên xà ata pê amji pytàr ne hàhhuc nare. Japu na ri ihtỳj côjkwa pĩn Pahpãm me pamã amji cawpa. Cu nee mempar nare ita kam, cu ha pijamã me pahnõ Pahpãm te me pahto kên xà ata pê amji pytà? Quê! Cu ha pahtỳj me cuxà, me hirôa pê me pahkên mã me acjêj. ²⁶Ne amcro ata kam pê Pahpãm ihcakôc, pê pjê ahcujrõ. Ne ita kam ri quêt cute me pamã amji to hũjahkre to hajỹr he:

— Wa ha nee hipêr ita caxuw pjêê to pit mã ijàhcujrõn nare, ne jũ caxuw côjkwa mea mã to ahcujrõ — hane. ²⁷Ne pom icakôc xà pê “…hipêr ita caxuw…” ita kôt harẽn xà te, quê ha Pahpãm cute ampo cunea ton itajê to ahcujrõ, ne ihcunea to hamre tu, mãr quê ampo cunea jàhcujrõn te ampo to hamre xà nare atajê, ihtỳj ahtwỳ ne ihcuhhê.

^28-29Ne quê ha Pahpãm ihhimpej xà krac ri me pamã, me pahkrĩ xà jàhcujrõn te to hamre xà nare ata gõ, cu ha kam me pahkrĩ rohnỳtti mã. Na cu ha pahtỳj hũrên me pajakryti na cumã me amji jarẽ. Pahpãm pê cuhy catia te ampo cunea to hamre xà ata pyràac, cwỳrjapê cu ha pahtỳj hũpahti kam, catyt kam cumã cati, ne impejti na me harẽ.

Cu pahtỳj me ajpẽn kĩn kam me to pancrà to prãm

Ixaher 13.1-25

1 Jowãw 3.17-18

¹Ca Jeju kam ajpẽn to me akjêjê ita kam, ca ha atỳj me amã ajpẽn kĩn kam me to acrà tu ne. ²Ne ca ha atỳj mehcahkrit na me amji to pôj kam me to acrà tu ne. Ca ha ate me ita to hajỹr na, ca ha me apê mam me aquêtjê pyràac, ne pê mehkwỳ, kỳj rũm me Pahpãm mã me hàpên catêjê na me hahkre pej nare kam, ihtỳj me hũrkwa kam me ahna amji to pôj. ³Ne ca ha me hacjên catêjê to ma me amji japackre, ne mehtehcajpar to hanea, pom ca ihhêj ne me cahê na me acuhhê he. Ca ha cute me amji pupun to kêanre atajê jamãr to me apa to hanea, pom ca me caa ate me amji pupun xà kêanre to me amji pupun he.

⁴Ne ate me gikwa tuw xà na ate me ajpẽn par xà atajê, ca ha atỳj amji mã me hũpahti to me apa. Na ca ha me apê mempjê me, me apê mehprõ, ca ha ate mam me ajpẽn par xà ata na, ma me amji jarkwa to me amji japackre to me apa. Ne nee jũ caxuw ahti na, me aprõ me, me apjê kaj na ate jũm me ajpẽn caxun to amji kam me gapac xà hamreare. Ampo na? He quê ha ihtỳj Pahpãm, por jũm ahti na jũm caxun to ipa ata, to kêanre ne. Ne hanea ne, por jũm te amji kam hapac xà xyre kam me pahpahàmti ton to ipa ata, quê ha hanea ne apu to kêanre ne.

Cu ramã me pamã ampo atajê pyrên ri me pajakryti to prãm

⁵Ne nee hanea ne, ame ihpore pit kĩn to me apa ata kam, me gõ pore incwỳr xà to pit mã me amji kam gapac to me apa nare. Ne pom ramã me amã ampo atajê pyrên, ca ha atỳj me gakrya na ame apa. He pê Mojxe xwỳ jõ kàhhôc kam, Pahpãm ramã me ana ita na amji jarẽn to:

“Wa ha nee jũ caxuw me arer nare,

ne nee jũ caxuw me amã hikran nare” hane.

⁶Pahpãm te me ana amji jarẽn xà ita cwỳrjapê, cu ha pahtỳj Tawi xwỳ jõ kàhhôc kam, cute amji jarẽn xà ata kôt, me amji jarẽn to:

“Pahhiti pê Pahpãm pê itehcajpar catê ita kam,

jũ wỳr quê ha jũm amji mã hamã ne ito kên,

na wa ha nee apu amji mã pa nare” hane.

⁷Ne mam cute me ato ihhimpej catêjê te me amã Pahpãm jarkwa to hahkre na, ca me to amji japackre. Ne cute amji kam me hapac xà me, mehtyc xà na me to amji kampa, ne mehkôat Jeju to amji mã me ahimpej to me apa. ⁸Ne nee jũ caxuw Jeju Crixtô pintuw xà nare. Ne amcro itajê kam, cupê mam Jeju ataa, ne quê ha cormã cupê Jeju ata rohnỳtti mã. ⁹Ca ha nee ite me amã Jeju te amji kam hapac xà pejti to hahkre xà ata kaj na, jũmjê te me amã ajteare mã ampo pihho to hahkre xà ata kôt, amji kam me gapac nare. He Pahpãm ri hàhcaprĩa kam, me pamã pahte amji kam me pajapac xà to ihtỳj ne to impej. Ne jũ wỳr quê me panquêtjê te amji kam hapac xà te me pamã me pajõ cawpa xà ata, me pamã me pahte amji kam pajapac xà to impej. Ampo na? Por cute amji mã me hõ cawpa xà ata me, me ipijacri xà atajê cunea kôt hamreare.

Jeju ihtỳj me pamã pahte amji kam me pajapac xà to ihtỳj

¹⁰Ne por Krĩpinkrên kam Pahpãm mã mehcajrẽn catêjê Pahpãm jũrkwa kam cumã me ampo pry to caxàr to me ipa atajê, ihtỳj cute ampo pry to me ipijapar xà ata to me Pahpãm kam hapac atajê kwỳ ku, mã me hĩ to pit mã ihtỳj, ne nee me cumã caxwãm pê cute amji kam me hapac xà to ihtỳj nare. Ne me pa nare, he ihtỳj quêt Jeju me pamã pahte amji kam me pajapac xà to ihtỳj. Mã nee Pahpãm jũrkwa kam cumã me hàpên catêjê atajê te ahna me pahho xà hamreare. ¹¹Ne Pahpãm mã mehcajrẽn catêjê jõ pahhiti caku cunea jõ amcro pyxit kam, cute me Pahpãm to kên jahpan xà na, me ampo pry cura atajê caprô to Pahpãm jũrkwa caxwỳn pejti ata mã acjêj, ne Pahpãm mã cupẽ. Ne por cute me ampo pry curan atajê jĩ to ma krĩ pê me hapôj, ne curia me to capa. ¹²Cwỳrjapê ri cute me ampo pry curan kôpit na, krĩ kaj na Jeju tyc, mãr quê caprô to me pamã me pahkên cuhhõ. ¹³Hỳ cu me papê hũràac, ne cuxà krĩ ita kam cute me amji kam hapac xà tũm itajê mã me hikra, ne Jeju kôt põ mã me pahcato. Quê ha me pahpahàmti na me pahto, cu ha nee ame pahpahàm nare. Ampo na? Pê Jeju to me hanea, ne me pahcumam me cumã ihpahàm catia to. ¹⁴Ne me pamã pjê kam krĩ itajê nõ jàhhuc rohnỳtti mã xà hamreare, na cu ha pahtỳj côjkwa pĩn Pahpãm te me pamã krĩ kam me pahkrĩ rohnỳtti mã xà jõr xà ata japê.

¹⁵He Jeju Crixtô kôt ri, Pahpãm na me pajàhtêp xà, ne nee cumã ampo pryre to me ipijapar ata jõr xà kôt ahna me pajàhtêp xà nare. Cwỳrjapê cu ha me Pahpãm mã cupê me pajõ Pahhiti cati ne impejti na hũrên me pajakryti na, cumã me amji jarẽn to me pahcuhhê tu. He pahte me to hajỹr xà ita pê pahte cumã ampo jõr pyràac, na quê ha ihtỳj me pahpyrên hakryti ne. ¹⁶Ne hanea ne gõtpê atỳj me ajpẽn tehcajpar to me ajpẽn to impejti to me apa. Ampo na? He ita te hajỹar ne cupê ate Pahpãm mã ampo jõr xà. Na quê ha hanea ne ihtỳj hũrên hakry.

Cu pahtỳj me pahto ihhimpej catêjê Pahpãm mã mehcajrẽn to prãm

¹⁷Na ca ha atỳj me akwỳ kam me ato ihhimpej catêjê krac ri me acjêj, ne me kampa, ne catyt kam ihkôt me apa. Ampo na? He ihtỳj cumã jũ caxuw cute Pahpãm mã me ana amji jarẽn na cumã hahkre pej, na ri ihtỳj me gamãr to me ipa. Ca ha ate me kam gapac na, quê ha ampeaj kam cute me gamãr xà ita pyrên hakry, nãmri ca ha ate me kam gapac nare na, quê ha cumã amji kĩn nare kam, me gamãr to ipa. He ate me hajỹr xà ita te nee me atehcajpar xà hamreare.

¹⁸Ca ha atỳj Pahpãm mã me icajrẽn kam to acrà tu ne. He ihtỳj jũmjê ampo kên na me icãmjĩ cakrô, wa Pahpãm kam mare mã catyt kam me ipa na, me imã amji jahkre pej. Ne me imã ihcunea na catyt kam me ipa kam me to icrà tu na me amji to prãm. ¹⁹Ne wa ha kypê me awỳr nare, mãr ca Pahpãm mã me icajrẽn, wa me awỳr amji jaxàr to amji to ijàhtũm nare, ne amji jaxà.

Pê Pawrô Pahpãm mã mehcajrẽn

^20-21Jeju pê me pajõ Pahhiti, ne me pancwỳrjapê ihtyc xà ata kôt ri, cupê carà cahàcre hôhti jamãr catê catia pyràc, ne cupê me pajamãr catê catia. He Jeju pê me pahkritxwỳ caprô pijaxwỳr xà ata te ihtỳj Pahpãm te me pahkên pê me pahpytàr rohnỳtti mã na harẽn. Pê Pahpãm hacpỹa mã Jeju to ihtĩr. Pahpãm te me pahcarĩcti kam ame papa na me pahton, mãr cu nee ame amji mã ampo cupa nare ata mã, wa me acajrẽn to hane he:

— Me ijõ Inxũ Cati, Juta catêjê pê hanea ne Jeju na mehkwỳ atajê tehcajpar to impeaj ne, mãr quê ate ampo cunea na amji mã to prãmti xà te acajpuaw xà ata to pit mã, me to me ipa. Ne hanea ne akra Jeju Crixtô kôt me imã ite amji kam me ijapac xà to impeaj ne, mãr wa ihcunea na me acajpuaw. Ne me imã mehcunea te akra to acatia to cati na to prãm rohnỳtti mã. Ampeaj kam! — hane.

Ihkàhhôc jicu xà kam cute amji jarẽn xà

²²Ỹhỹ Jeju kam me ikjêjê, wa ite me amã ihkàhhôc jatujre ita hôc, mãr ca ite me gapackre xà itajê kam me amã amji kĩan kam, me kam gapac to impeaj ne. ²³He xà ramã me amã, cute me hacjên xà pê me pahkjê pê Timot cator na, me amã hahkre pej? He ramã cute me cator. Na quê ha iwỳr cute uua ne ita ri cator na, wa ha me ajwar me awỳr me mõ ne me apupu. ²⁴Ne wa ha cute me ato ihhimpej catêjê me, me cupê Pahpãm na mehkwỳ cunea mã me ijõ hàpà kujate. Ne ita ri, me pahkjêjê kwỳ pê Prytikra jõ pjê catêjê te me acunea mã me hõ hàpà kujahêc. ²⁵Ne imã Pahpãm te hàhcaprĩa kam me acunea to impej na to prãm.