Ampo Cunea
KAM TO IHTẼM XÀ
Jarẽn Xà
Ỹhỹ, pê Mojxe xwỳ pê Pahpãm jarkwa kôt, Ixaher catêjê japackre catê. Ne ajco me cumã Pahpãm jarkwa jarẽ, ne ahna ihhôc. Ne cute Mam Ihkàhhôc Tũm ita to xĩc ne ihhôc. Mam ihkàhhôc ita pê Ampo Cunea Kam To Ihtẽm Xà Jõ Kàhhôc (Kam To Ihtẽm Xà). Ne ihkàhhôc ita, Pahpãm te pjê kam mam ampo cunea ton na me pamã harẽ. Ne hanea ne Atãw me, mehkra to me pamã awjarẽ. Ne hanea ne Nowe me, mehkra te, Pahpãm te cô to ampo cunea jipej xà ata pê me amji pytàr na, me pamã to awjarẽ. Ne hanea ne Aprãw me, Ixac me, Jaco pê Ixaher me, mehkra to me pamã awjarẽ. Ne ihkàhhôc ita jicu xà kam ri, Canãn jõ pjê pĩn, Ejit jõ pjê wỳr Ixaher catêjê pintuw na, me pamã harẽ.
Ỹhỹ, pê Aprãw jõ caku atajê kam, ajteare mã pjê nõa kam me hũmre nõ japrỳ te Jo ita ihkrĩ. Nari hõ kàhhôc japrỳ te Jo Jõ Kàhhôc (Jo). Ne ite Ampo Cunea Kam To Ihtẽm Xà Jõ Kàhhôc cajpuw hõ kàhhôc nõr, Aprãw jarẽn xà cumam. Ne pê hũmre ata impeaj to impej, ne ihtỳj catyt kam Pahpãm kôt ipa, ne ampo cunea na Pahpãm cajpuaw. Mã me pahcurê xwỳn pê Xatanaj te Jo na Pahpãm wỳr, cute to kên prãmte. Mã cute Jo capi prãmte cumã hahkre. Mã cute to kêanre. Mã cute amji pupun to kêanre cakrô, nee cute Pahpãm na ihcakôc kên nare, ne ihtỳj ampo kên cunea mã awcanã, ne nee cute Pahpãm to amji mã ihhimpej jicu nare. Cwỳrjapê ri Pahpãm te cute amji pupun xà kêanre ata jirô pê hacpỹa mã to impej.
1Pê Pahpãm amcro te xêj kam ampo cunea to
1Pê nee jũm Pahpãm ton nare, ne nee jũ caxuw amji ton nare, ne ramã pjê ton xwỳjrea na ihkrĩ rohnỳtti mã. Pê mam Pahpãm côjkwa me pjê me, ampo cunea to. Ne nee pê ampo to, ampo itajê ton nare. 2Pê pjê ata kam ampo hamreare, ne caprỳ, ne kam awcapàtkuti, ne cô me pjê cormã ajcacwa tu. Pê Pahpãm Carõ Pejti ata, cô me pjê picacwỳr ata cwỳrpê, curia ajco apu ipa.
3Mã Pahpãm te hũjarẽn to:
— Imã hàhcujro xà nõ na prãm! — hajỹr me ajkaam, mã amcro pyrentu. 4Mã Pahpãm te amcro ita pupun, mã cumã impeaj to impej, mã cute amcro me caxwa to ipicapôn. 5Ne cute amcro mã haprỳ to: “Apẽ” hajỹr, ne awcapàtkô mã haprỳ to: “Caxwa” hajỹr. Hõhõ, amcro cakônĩ ita na, pê hapên xà itajê kwỳ ton to hane.
Amcro pijakrut ata kam Pahpãm jàpên xà
6Ne amcro pijakrut jõ iràrà na, pê Pahpãm cô mã harkwa to:
— Amji to ajcapô, ne kỳj rũm côjkwa wỳr akwỳ api ne ahtwỳ, ne harã mã pjê kam akwỳ ahtwỳ — hane. 7Mã cô te amji to ipicapôn pyrentu, ne kỳj pê ita jàhhuc, ne harã mã ita jàhhuc. 8Mã Pahpãm te kỳj rũm ita mã haprỳ to: “Côjkwa” hajỹr. Hõhõ, amcro pijakrut kam pê hàpên xà itajê kwỳ ton to hane.
Amcro incrê ata kam Pahpãm jàpên xà
9Ne ahna amcro incrê jõ iràrà na, pê Pahpãm pjê kam cô me amcrà mã harkwa to:
— Me amji to ajcapô, ne ita wỳr amcrà, ne ita wỳr cô — hane me ajkaam, mã cute amji to ipicapôn. 10Mã cute amcrà mã haprỳ to: “Pjê” hajỹr. Ne cute cô te cuprõn ata mã haprỳ to: “Côxwa” hajỹr. Ne cute hõmpun, mã cumã impeaj to impej. 11Pê Pahpãm pjê mã harkwa to:
— Amji kam pĩhhy me, pĩhhô me, ahpỹanre na ajpẽn caxuw me hàprà hy cunea to — hane. 12Mã cute amji ton pyrentu, ne pjê kam apu hapôj. Ne ahpỹanre na ajpẽn caxuw kam ihhy, ne kam hô ne hapôj. Mã cute hõmpun, mã cumã impeaj to impej. 13Hõ, ahna amcro incrê itajê kam, pê hàpên xà itajê kwỳ ton to hane.
Amcro te cwat ata kam Pahpãm jàpên xà
14-15Ne ahna amcro te cwat jõ iràrà na, pê Pahpãm côjkwa mã harkwa to:
— Amji kam gàhcujro xà nõ to, mãr quê pjê cujro, ne caxwa me amcro to ajcapô, ne amcro me, putwrỳ jõ amcro me, caku jõ putwrỳ cahyt — hane. Mã cute amji ton pyrentu ne ajêt. 16Ne cute hàhcujro xà catia to ipijakrut ne ton. Pê amcro to ihhimpej catê ata ri ampeaj kam cati, ne caxwa to ihhimpej catê ata ri hapyre mã incrire. Ne hanea ne cute caxêre ton. 17-18Ne ma côjkwa kam apu haxôr, cute pjê cujro, ne caxwa me apẽ to ihhimpej, ne amcro me awcapàtkô to ipicapôn prãmte. Mã cute hõmpun, mã cumã impeaj to impej. 19Hõ, ahna amcro te cwat itajê kam, pê hàpên xà itajê kwỳ ton to hane.
Amcro te xĩc ata kam Pahpãm jàpên xà
20Ne ahna amcro te xĩc jõ iràrà na, pê Pahpãm côxwa me côjkwa mã harkwa to:
— Hã, ate amji kam ampo to me apijapar xà atajê to amji kam me hipu tu ne, côjkwa kam pryjara tor xà me, cô kam ampo cunea prar xà atajê mea mã — hane. 21Ne Pahpãm te cô kam ampo te amji to ipijapar xà atajê cunea ton, côxwa kam ampo catia atajê mea mã, ahpỹanre na ajpẽn caxuw, mã hàhtôa to hàhtô. Ne hanea ne, ajpẽn caxuw pryjara cunea ton, ne hõmpun, mã cumã impeaj to impej. 22Mã cute ihcunea caxuw carôt jõr ne cumã harkwa to:
— Me akra to me hàhtôa, ne ma cô kam me apicamẽn to me mõ, ne me cô to hipu tu ne. Ne kỳj pê cuwênre tore to hàhtôa ne, ne ma me apicamẽn to me mõ — hajỹr. 23Hõ, ahna amcro te xĩc itajê kam, pê hàpên xà itajê kwỳ to hane.
Amcro te xêj ata kam Pahpãm jàpên xà
24Ne ahna amcro te xêj jõ iràrà na, pê Pahpãm pjê mã harkwa to:
— Hã, pjê, amji kam ampo cunea capônỹre te amji to ipijapar xà atajê to, ne pjê na ampo apu ipa atajê to, ne ampo pry jàprêhti atajê to, ne ahpỹanre na ajpẽn caxuw — hane. Mã cute amji ton pyrentu. 25Ne Pahpãm te ampo pryre jàprêhti itajê ton, ne ampo capônỹre itajê ton, ne pjê kam ampo apu ipa itajê cunea ton, ne ahpỹanre na ajpẽn caxuw. Ne cute hõmpun, mã cumã impeaj to impej.
Pê Pahpãm me panquêtjê to
26Jirô pê mã ri Pahpãm te ajpẽn mã:
— Ita caxuw cu ha amji kôat me hũmre nõ to, quê ha cupê me pahpyràac, ne ihtỳj amji kampa. Ne quê ha hanea ne côxwa kam tep me, côjkwa kam pryjara me, pjê kam ampo capônỹre atajê me, pryre jàprêhti atajê me, pjê kam ampo apu ipa itajê jamãr to ipa, ne me to ihhimpej to ipa — hajỹr. 27Ne cute amji kôat jũm xũmre ata ton, ne cahãj ita ton. 28Ne cute me cumã harkwa to:
— Me akra to me hàhtôa to hàhtô to me mõ, ne ma me apicamẽn to me mõ, ne pjê to me hipu to me mõ, ne amji mã me hũtà ne me to ahimpej to me mõ. Ne côxwa kam tep to me ahimpej, ne côjkwa kam cuwênre to me ahimpej, ne ampo cunea pjê kam apu ipa atajê to me ahimpej.
29— Ne ate me gõ to, me gàpàn xà caxuw, ite me amã ihhy cunea me, pĩxô cunea ton, ate mehkur xà caxuw. 30Ne pryre me, pryjara me, pjê kam ampo ipa atajê me, por ampo cunea amji cajpẽ ne incaca atajê mã, ite ahtu me ahtetet cunea ton, cute ihkur xà caxuw — hajỹr. Hõ, pê ampo itajê cunea ton to hane.
31Ne cute ihcunea pupun, mã cumã impeaj to impej. Hõ, ahna amcro te xêj atajê kam, pê hàpên xà atajê kwỳ ton to hane.
2Pê Pahpãm amcro te xet ata kam kôt
1Pê Pahpãm côjkwa me, pjê me, côxwa jipêj, ne kam ampo te amji to ipijapar xà atajê cunea to. 2Pahpãm te amcro te xêj atajêa kam, cute hàpên xà itajê cunea jipêj. Cwỳrjapê ri cute amcro te xet ton ita kam ri ihkôt xà, na ri nee kam hàpên xà nare. 3Ne cute amcro kam ihkôt xà ata to ajteare mã, ne cute to impejti, kam ihkôt xà na. Ampo na? He cute amcro ata xwỳjrea na ampo cunea jipêj, na quê ha cute xet ata kam cama kôt.
Pê Pahpãm Atãw xwỳ pê me panquêtti to
4Pê Pahhiti pê Pahpãm côjkwa me pjê to. Pê harẽn xà catia hane he: 5-6Pê nee cormã kam ampo hiprãj nare, ne nee kam ahkêt tetetti nõ hamreare. Pê cormã Pahpãm nee kam ta to iwrỳc nare, ne ahcakũm kam atàr ata pê ajco pjê inco. Ne hanea ne cormã pjê kam jũmjê jàpên xà caxuw me hamreare. 7Mã Pahpãm te pjê te mehĩ ton ne pea hĩjakre jakôr, mã hĩa na cute amji ton. Hõ, pê mehĩ ton xà ita hane.
8Mã Pahhiti te pjê impejti japrỳ te Etẽ ita kam hàhkre, pyt japôj xà rũm, ne kam pjê te mehĩ xũmre jĩa mã hikran, kam ihkrĩ xà caxuw. 9Mã Pahhiti pê Pahpãm te Etẽ jõ pjê kam ampo pej pit kre. Mã ahpỹanre na ajpẽn caxuw pĩxô pàr pej pit japôj ne hiprãj, ne ihkur xà caxuw ihcunea impeaj. Ne pjê ata jipôc ri Pahpãm te pĩxô pàr to ipijakrut ne ihkre, atajê ri ihkwỳ pê ajteare mã. Ne pyxit ne cupê mehtĩr rohnỳtti mã xà jõ pĩxô. Na quê ha jũm te pĩxô ata nõ krẽr na, quê ha jũ caxuw ihtyc nare, ne quêt ihtĩr rohnỳtti mã. Ne ihnõ ata pê ri ampo pej me, ampo kên jahkre pej xà jõ pĩxô pàr. Na quê ha jũm te pĩxô ata nõ krẽr na, quê ha ihcunea na amji jahkre pej ne ihkrã kre. 10Ne pjê ata kam Pahpãm te cô ton, mã ajpjê, cute pjê inco xà caxuw. Ne Etẽ jõ pjê ata pĩn pê cô ata cato, ne kaam ihcahkũm, ne cute amji to cwat ne ajpjê. 11-14Atajê ri ahpỹanre na haprỳ itajê te hajỹr he: Pixõ jõ cô me, Gijõ jõ cô me, Ticre jõ cô me, Cômpejti jõ cô.
15-17Mã Pahpãm pê Pahhiti te pjê ata kam hũmre pê Atãw xwỳ ata mã hikran, kam ihkrĩ ne cute hamãr, ne kam hàpên xà caxuw. Ne cumã pĩxô pàr pyxit ne ihcawpa ne cumã:
— Ca ha gapacta ne atỳj pĩxô pàr itajê xô cunea ku, ne por ampo pej me, ampo kên jahkre pej xà jõ pĩxô ata, ca ha nee ihnõ krẽr nare. Ampo na? Ca ha ate ihnõ krẽr na, ca ha ramã impejti xà jahkre pej, ne ihkêanre xà jahkre pej, ne hanea ne amcro ata kam atỳj atyc kam tẽ — hane.
18-20Ne pê ramã pjê ata kam ahpỹanre na ajpẽn caxuw pjê kam pryre atajê to, ne kỳj pê ahpỹanre na pryjara ton pa. Ne ma ihcunea to mõ, Atãw wỳr, ne cumã ihcunea jahkre, mãr quê Atãw ahpỹanre na ihcunea mã haprỳ jõr pa. Mã cute amji mã ampo mã haprỳ jõr prãmti ata na, cute cumã hõr partu. Ne haprỳ ata na quê ha ipa rohnỳtti mã. Ne cute pryre capônỹre mã haprỳ, ne ahkêt kam pryre atajê mã haprỳ, ne kỳj pê pryjara cunea mã haprỳ jõr partu.
Pê Pahpãm cahãj pê me pahnã to
Ne ampo itajê cunea jipôc ri, Atãw te nee amji caxuw ampo pê ihnõ ata mã cator nare. Jirô pê mã ri Pahpãm pê Pahhiti te amji mã:
— Imã hũmre ita ahte apu ipa ita na to prãm nare, na wa ha hĩa na cumã catê nõ to — hajỹr. 21Ne jũ mã cute Atãw ton ne to hõtxwaa to hõtxwa, mã hõt mã ihtyctu, ne ihtỳj nõ ne gõr. Mã Pahpãm te hiwrỳhhi nõ caxàr, ne hacpỹa mã haxà to cumã ipijapỳn. 22Ne hiwrỳhhi ata to cumã cahãj ton, ne ma hỹrmã to mõ, mã ramã ipimprar, mã cute cumã hõr.
23Mã Atãw te harkwa to:
— Taamã! Pahpãm te ijiwrỳhhi kwỳ caxàr ne to imã cahãj, na ri quêt cupê ijĩa kwỳ, cwỳrjapê wa ha cumã haprỳ to: “Cahãj” — hane. 24Cwỳrjapê quê ha ita caxuw me hũmre menxyrxwỳ me, me hũmjê jicu, ne me hikwa tuw, ne ma mehprõ wỳr me rê, ne mehprõ me, me ajcaxê ne ajpẽn kam me pyxit peaj.
25Pê Atãw me hĩxi nee mehkà to me amji pro nare, ne mehcakrô ame ipa, ne nee ajco ajpẽn kam amehpahàm nare.
3Pê Xatanaj me panquêtjê mã ihhêj
1Ne pjê kam Pahpãm te ampo cunea ton atajê jirôa pê cagãti ita te amji jahkre kitre nare. Ne ma cahãj ata wỳr tẽ ne ahna hàhtêp, ne cute ihcukij, ne cumã:
— Xà ampeaj kam Apãm Cati te, ate me pĩxô itajê cunea kur tête me amãn? — hajỹr.
2-3Mã cahãj ata cumã:
— Quê, itỳj ite mehcunea kur xà. Ne por ipàr pyxit peaj ne ihkwỳ jipôc ri xa ata ri, Inxũ Cati te intête me imãn, wa nee mehnõ krẽr nare, ne nee ahna me ijũhkra nõr nare, ne amehcupên nare. Nãmri wa ha mempar nare na, wa ha itỳj me ty, ita na ri Inxũ Cati pê Pahhiti te me imã harẽn — hane.
4-5Mã cagãti cumã:
— Quê! Ame amã ihhêj, ca nee me atyc nare! Ampo na ri ame amã ihcawpa? Nee mã ampo na nare. He ate mehnõ krẽr, ne cume, me apipẽan, ne mempej jahkre pej ne mehkên jahkre pej cupate ri ame amã ihhêj — hane.
Pê me panquêtjê Xatanaj kampa
6Mã cahãj ata te ihtỳj harkwa kôt pĩxô ata kur xà na impeaj na amji mã to hajỹr. Ne cute pĩxô ata pupun, mã cumã impejti, ne ihtỳj amji mã cute amji jahkre pej xà caxuw impej na cute to hajỹr. Ne cute hô nõ hyr ne ihkrẽr, ne hanea ne impjên mã ipyr ne cumã hõr, mã cute ihkrẽr. 7Me ajkaam cute ampo cunea jahkre pej kam ihtẽm, ne cute mehcakrô na me amji jahkre pej, ne amehpahàm pyrentu. Cwỳrjapê ri cute me pĩhhô kẽhkẽn, ne me cahyr, ne me to amji pro.
Pê Pahpãm me panquêtjê crôn xà kêanre to me cucrô
8Ne pyt ata kam ramã ahpreprer to mõr kam, mã cute pjê impejti ata kam, me Pahhiti pê Pahpãm mõr na me kam hapac, ne ajwar cupê pĩ catàtkre na me ipimxur. 9Mã cute me cumã hàkjêr ne me cumã:
— Atãw, ampo na mã ca apu ipê amxu? — hajỹr.
10Mã Atãw cumã:
— Wa ite ajpên amõr na me apar, ne ate icakrô na me ipupun cupate, wa apê me ipimxur — hane.
11Mã cumã:
— Jũm te mã acakrô na garẽn? Xà ajkĩ ate, ite amã pĩxô pàr cawpa ata nõ krẽr? — hane.
12Mã Atãw cumã:
— Ỹhỹ, por ate imã cahãj jõr ata te ri imã hõr, wa ite ihkrẽr — hane.
13Mã Pahhiti pê Pahpãm te cahãj ita mã:
— Pỳhàpà, ampo na mã ajte ate me hajỹr? — hajỹr.
Mã cumã:
— Por cagãti ata te ri imã ihhêj, wa ite ihkrẽr — hane.
14Mã Pahpãm te cagãti ata mã:
— Ca ate me cumã amji kam gapac xà to hajỹr cwỳrjapê, wa ha acrôn xà kêanre ita to acrô he. Ampo pryre capônỹre me hàprêhti atajê jirôa pê akêanre. Na quê ha apa xà ita pê ajteare mã, na ca ha pjê kam atu na apu pra, ne pjê jacrô pit kur to apu apa rohnỳtti mã. Quê ha ampo pryre kwỳ cunea, ma ame acaca, ca ha ahnaa jũ caxuw gamre. 15Hamre, ita caxuw ca ha cahãj ita me apê ajpẽn curê xwỳn. Quê ha hanea ne me atàmxwỳ me, mehtàmxwỳ pê ajpẽn curê xwỳn. Ne ca ha jũ caxuw amcro nõ na, cahãj ita tàmxwỳ tàmxwỳ nõ par kat kam ihtõc, quê ha taa mã ato hajỹr nare, ne quêt akrã gãntu — hajỹr.
16Ne cute hanea ne cahãj ita crôn xà ita to incrôn, ne cumã:
— Ita caxuw wa ha amã akra xà to ajcamẽ, ne kypê amã to hà nare. Cakrô ca ha atỳj cormã amã apjên kĩn, ca ha atỳj ahna amji to pôj, quê ha cupê ato ihhimpej catê. Na quê ha me atàmxwỳ me acukwa kam, ahnaa me to hãm ita na — hajỹr.
17-19Ne cute Atãw mã hajỹar ne cumã:
— Ca ate gĩxia kôt amji kam gapac, ne ite amã pĩxô pàr cawpa ata krẽr, cwỳrjapê wa ha ita caxuw apê pjê ita to kêanre ne. Quê ha kam hômjĩ pàr hapôj, ne kam ahkêt kêanre hapôj, na ca ha pĩhhô me ampo hy pit kur to apa, ne apêa to apê, ne akuc na cô pra, mãr quê me amã gõ, ca me apà. Hõ, ca ha hajỹr to acuhhê ita kam ahnaa awej ne jũ caxuw ty, quê ha pjê ita to me garêt, ca ha hacpỹ mã pjê ita na amji jahkre. Ne pjê ata to pê wa ato, na ca ha hacpỹa mã pjê ita mã axà — hajỹr. Mã ajwar cute mempar.
20Ne Atãw te hĩxi mã haprỳ to Ewakwỳj, ne haprỳ ita kôt harẽn xà te “Mehcunea menxi”. 21Mã Pahpãm pê Pahhiti te ampo pry curan, ne ihkà to me cumã mehkà.
22Ne cute amji mã:
— Ita caxuw quê ha mehĩ itajê pê me pahpyràac, ne ihtỳj ihkên jahkre pej ne impej jahkre pej. Cwỳrjapê ri cute pĩxô pê mehtĩr rohnỳtti mã xà ata nõ krẽr xà nare. Nãmri quê ha cute ihnõ krẽr na, quê ha ihtỳj cute ihkên mã hàr xà ita kam amji to ipijapar to ipa rohnỳtti mã — hajỹr.
23Cwỳrjapê ri Pahpãm te pjê impejti japrỳ te Etẽ ata tête me cator, ne ampỳa mã pjê nõ ata wỳr mehkujahêc, mãr quê, cute pjê to Atãw ton ata, curi kam apê ne apà. 24Cute me cator jirô pê mã ri, pyt japôj xà rũm, Pahpãm te côjkwa kam cumã hàprê catêjê kwỳ pyxwỳr, cute me harkwa jamãr xà na. Ne hanea ne cute wapo xwahhihti pôr ata xãm, cute mehtĩr rohnỳtti mã xà ata jõ pĩxô pàr jamãr prãmte. Mã pra ne ipu na ajrõ ita na.
4Pê Cãn ihtõ pê Aper cura
1Mã Atãw hĩxi me hikwa, ne cute kam ihkra, mã cumã ihkra xũmre pỳm. Mã cute cumã haprỳ to Cãn. Mã Ewakwỳj te amji jarẽn to:
— Pahhiti te itehcajpar, mã imã ikra xũmre ita cator — hajỹr. 2Jirô pê mã ri hipêr cumã ihkra xũmre nõa pỳm ata japrỳ te ri Aper. Ne ajwar mehkà. Mã Aper pê carà cahàcre to ipijapar catê, ne Cãn pê ri pur to hàpên catê.
3Ne amcro nõ na Cãn te Pahhiti mã hàprà ata jõ xô nõ pyr ne to mõ, ne cama cumã hõr prãmte, to kam hapac. 4Mã hanea ne Aper te Pahhiti mã hõ parxare nõ cakônĩ pỳm ata curan ne hĩ pejti kwỳ pyr, ne to mõ, ne to Pahhiti kam hapac. Mã cumã Aper jõ hĩ ata kĩnti, mã cute ahna amji caxàr. 5Ne ma apu Cãn pê hàprà xô ata caca. Mã Cãn incryac kam, ihkuc kêan kam, apu amji kam hapac to mõ.
6Mã Pahhiti cumã:
— Ampo na mã ca apu acryc, ne akuc kêan kam apu mõ? 7Ca ha ate icajpuaw ampo ton na, wa ha itỳj ahna amji capa. Nãmri ca ha ate apu amji kam gapac xà kêanre ton to apa na, quê ha akên xà ata pê ihhêj rũm ampo pry jàprê kêanre ata pyràac, ne ihtỳj apro to prãm, ne taa ato ihhimpej to ipa. Na ca ha caa, akên itajê to amji mã capônỹre ne, ne tohjê, ne caa to ahimpej to apa — hajỹr. Mã Cãn te impar, ne nee ihkôt amji kam hapac nare. 8Ne amcro nõ na cormã ihtõ kam incryc, mã cumã:
— Hacu ne põ kam apu mõ — hane. Mã ma ihtõ pê Aper ihkôt mõ, mã põ kam hamreare ata kam, Cãn te Aper kam ihtẽm ne ihcuran.
9Mã ahna ahtũm nare mã Pahhiti Cãn mã:
— Jõ ri mã atõ Aper? — hane.
Mã cumã:
— Pỳpỹn, wa ite nee hõmpun nare. Xà ajkĩ ipê itõ jamãr catê, mã ca apu ahna icukij? — hane.
10Mã Pahpãm cumã:
— He pỳhàpà! Ampo caxuw mã ate atõ to hajỹr? Pom atõ caprô ita ihtỳj pjêa kam imã akij, ne imã ate to kên jahpan xà ite ato kên na, awjahkre ita? 11-12Atea amji mã acrôn xà kêanre na gàhwỳr, ne por ate pjê kam atõ caprô jaxwỳr, mã cute to ihkõm ata, quê ha nee hipêr amã gàprà xô nõ jõr nare. Na ca ha ita caxuw cama apu amji jacjê, pjê cunea kam — hane.
13Mã cumã:
— Ite ikên mã ijũcanãr xà ita jirôa pê, ate imã ton. 14Ca ha pjê ita pê ikujate, wa ha itỳj apê ampỳa mã pjê cunea kam ipa. Quê ha jũ ri cute me icajpar atajê cunea ihtỳj me icuran to prãm — hane.
15-16Mã Pahhiti cumã:
— Hãpà, nee cute ahna hajỹr nare. Wa ha gĩ kam, cute me gahkre pej xà na amã ihhôc, quê ha mehcunea me hõmpu ne me gahkre pej, ne nee me acuran nare. Nãmri quê ha jũm te acuran na, wa ha ihcura, ne ihkôt cormã mehkwỳa kwỳ to xêj ne me hipej — hane. Ne cute Cãn jahkre pej xà ita na kam ihhôc, mã ma Cãn Pahhiti pê tẽ, ne pyt japôj xà rũm, pjê nõa kam ihkrĩ. 25Mã hipêr Atãw te Ewa kam ihkra, mã cumã ihpỳm, mã cute me cumã haprỳ to Xet. Mã Ewa te harkwa to:
— Pahhiti te Cãn te Aper curan ata jaxà kam hipêr imã ikra xũmre ita jõr — hajỹr. 26Mã Xet ita ihkà, ne hikwa tuw, mã hanea ne cumã ihkra xũmre nõ cator, mã cute me cumã haprỳ to Enotti.
Ne caku atajêa kam ri cute me Pahpãm cukij to: “Ihtĩr Rohnỳtti Mã Ata” hajỹr, ne ahnaa me cukij kam ihtẽm. Hamre.
5Pê me panquêtjê me hàhtô to mõ
Ỹhỹ, pê Atãw me hĩxi pê Ewa caku jàhtôa kam amji to ajpa, ne ramã mehkra jàhtôa to me hàhtô. Ne mehkra itajê cukwa kam ramã me hàmtàr to mõ, ne tapi me hikwa to mõ, ne me hàmtàr to mõ. Ne pê cormã Ewa ihkra to hapôj rohnỳtti mã. Ne pê caku jàhtôa kam amehpỳpỳm itajê cunea kam ri me hàhtô to mõ, ne pjê kôt me ipicràn to mõ. Pê Pahpãm pê Pahhiti ata me hõmpu, pê tàkamrỳ mehkên to me mõ, ne ramã mehkêanre. Ne ajco cute me amji kam hapac xà kên to pit mã me amji kam hapac to me mõ.
6Pê Pahpãm pjê kam ihkrĩ atajê cunea jipej na amji to
6Mã Pahhiti te me ton catê ata ramã me kam ihpeacre, ne me kam cumã amji kĩn nare. Na ri cute me caxuw amji kam hapac xà nõ to ipintuw, ne ahna jêt, cute me hajỹr xà ita kam. 7Cwỳrjapê ri cute amji mã harkwa to:
— Ite me ton xà ita kam amji jũ na ipeacre, na wa ha pjê kam mehcunea to hamre tu. Ne pom wa ite mehĩ ton itajê me, pryre me, pryjara me, wa ha mehcunea to hamre tu. Nãmri ramã ite me caxuw amji kam ijapac xà nõ na ijêt, ne imã me hapê nare — hajỹr. 8Pê por me hũmre nõ pyxit peaj ne haprỳ Nowe ata pê Pahpãm cajpuaw. 9Ne pê Nowe ata quêt pyxit peaj ne ajco catyt kam ipa, ne ihcunea na impejti ne ajteare mã, pjê kam me hũmre atajê cunea cote na. Ne Pahpãm te amji kam hapac xàa to, ajco amji mã ihhimpej to ipa. 10Ne cumã ihkra xũmre incrê, ne me haprỳ pê Xẽm me, Cãw me Jape.
11-13Ne pê pjê cunea kam mehcunea ajpẽn to me hàprê to me ipa. Ne Pahpãm mã, ramã cute amji kam me hapac xà cunea kêanre, ne ihhêj ne ihcacu, ne ramã ihkro. Na pê Pahpãm Nowe mã amji jarẽn to:
— Wa ha pjê kam mehcunea to hamre tu. Ampo na? He imãa ramã pjê kam mehcunea kêanre. Me hàprê me, cute me ajpẽn curê me, ihcunea na cute amji kam me hapac xà kên itajê te ramã ihhêj ne me to ihkro. Cwỳrjapê wa ha itỳj pjê kam me hũmre me, ampo tĩr itajê cunea to hamre tu.
14-15— Ne Nowe, wa ha itỳj me akra me apytà. Na ca ha pĩ tỳj to pit mã, amji mã pàr kreti nõ to, ne to catia to cati to hane he. Ca ha iry na to gara capô to xetẽnta ne ihkôt xĩc, ne ihpo na to gara capô to cwatôxi, ne ihkà na to gara capô to ôjtô. Ne ca ha ihkre cahty xà tôti pê penhôc hôc ata to cô mã hàr xà mã ihcahty. Ne põ rũm to ihcahty, ne caxwãm pê to ihcahty, cô te cumã hàr cupate. 16Ne ca ha kam pĩ to ikre, ne pĩ to hahêr to kam ikre ata tipre to gũhkra capô to incrê. Ne ca ha kam to ihkre to incrê, harã mã me ita to, ne ihcote na me ita to, ne kỳj rũm me ita to, ne ahpỹanre na kam to caxwỳn partu. Ne hĩpê kam ca ha harkwa to pyxit peaj. 17Nãmri wa ha cô catia ne ihkujate, quê ha pjê kam ampo cunea pĩr pa.
18— Ne wa ha ana amji ton to hane he. Ca ha ca me, aprõ me, me akra me, mehprõ me, ca ha me acunea pàr kreti mã me axà, mãr wa cô pê to me apytà. 19-20Ne pryre xwỳjê ca ha ajpẽn caxuw hũmre me cahãj to apijakrut partu, ne pàr kreti mã to axà, ne kỳj pê ampo jara to ne pra itajê, ca ha ajpẽn caxuw hũmre me cahãj to apijakrut partu ne to axà, mãr quê me acahê na ihtyc xà jahpa. Ne pom ite ampo na amẽn itajê, quê ha amji to ajkrut pa, ne amjia kôt awỳr ipa ne acjêj. 21Ca ha cumã hõ cunea to cuprõ ne to axà, ne amji mã me gõ catia ne to cuprõ ne me to axà — hane.
22Hõhõ, pê Pahpãm Nowe mã harkwa hyr to hane, pê harkwa kôt ampo atajê cunea ton pa.
7Pê Pahpãm pàr kreti kam me panquêtjê to ihtyc jahpa
Kam To Ihtẽm Xà 7.1, 7-12, 17-24
1Ne pê Nowe jàpên xà ita kam ahna caku hàhtôa, pê hipêj pa. Mã Pahhiti te Nowe mã:
— Hã, hamre, gapacta ne ajpên me akra mea mã pàr kreti ita mã me axà. Nãmri apyxit peaj, ca me hũmre itajê cunea cote na catyt kam ijarkwa kôt apa — hajỹr.
7Mã Nowe me, hĩxi me, mehkra me, mehprõ me, mehcunea xàr, cute cô catia te me hipej xà pê me amji pytàr prãmte. 8-9Mã pryre cunea me, pryjara cunea te ahpỹanre na amji to ipijakrut par, ne hỹrmã incjêj par, Pahpãm te ahna me mẽn xà ata na. Mã Pahhiti pê Pahpãm te me ahna to harkwa jihê.
10-11Mã ramã me ahna amcro te xet, mã kam mehkrĩ ne me côhti jikaj. Ne pê caxuaw ramã Nowe na caku xêjxẽnta. Mã ihprõt pê hatuj xà cunea pĩn cô catõtõc, ne cute amji mã hũhhyr, mã côjkwa pĩn hanea ne ta catia te iwrỳc kam ihtẽm. 12Ne wrỳa to wrỳ, ne cute iwrỳc ita to amcro to cwarẽnta, ne hanea ne to caxwa to cwarẽnta.
17-20Mã tàkamrỳ cô catihti ita te pjê jaxir to mõ, ne pea cute pjê cutor tu. Ne ihtua to ihtu, ne cute kẽn kàhti atajê cunea cutor tu, ne cormã kàj mã ihtu na me pajara capô te cwat. Mã pàr kre ihtỳj ihcajcoc, ne cô kam apu mõ.
21-23Mã pjê kam ampo cunea incaca atajê tyc par ne me hamre tu. Pryre me, pryjara me, ampo to me ipijapar xà me, ampo jàprê me, mehĩ me, ampo kra me, ampo cunea jamre tu. Cô te me hipej tu. Mã Nowe pyxit peaj ne ihtĩr, mehkra me, por ampo cunea cahê na pàr kre kam hàhhuc atajê me. 24Pê cô pjê cunea to hipu ita na ahna putwrỳ xĩc.
8Pê me panquêtjê pàr kreti pê me cato
1-2Mã nee Pahpãm te Nowe me, mehkra me cahê na pryre atajê to hapac kêt nare. Ne cute pjê caxwãm pê cô jatuj xà jihê ne kôcti kujahêc, cute cô cajpêr, ne to incrà xà caxuw. 3-5Mã ihcajpê, ne tàkamrỳ cute to inxô ne to incrà to mõ, mã pàr kreti ata mõ, ne kẽnti kàhti catia japrỳ te Ararati ata na hàhhuc. Mã hipêr pjê kam cô ita te amji to putwrỳ to incrê, ne cormã inxô to mõ.
6-7Ne me ahna amcro te cwarẽnta, mã Nowe te harkwa krare nõ ita jihê mẽn, ne ma põ mã xônti cahàc nõ kujahêc. Mã ihtẽm rohnỳtti mã, ne nee hacpỹ ne cute amji jaxàr nare.
8-9Mã ihkôt cute tutti kujahêc, mã cute amji jaxàr pyrentu. Ampo na? Cormã nee pjê incrà nare ita kam, jõ ri quê ampo na xa? 10Mã me ahna amcro te xet jirô pê mã ri, hipêr cute tutti kujahêc. 11Mã ramã ahna pyt xàr xàa kam, mã cute amji jaxàr, ne ihkrỳt kam pĩ hô nõ tetetti ita xa, mã to tẽ. Mã Nowe te ramã pjê kam cô incrà to mõr na hahkre pej pyrentu. 12Ne cute amji to amcro to xet jirô pê mã ri, ma hipêr cute tutti kujahêc, mã nee hacpỹ ne cute amji jaxàr nare. 13-14Mã hipêr Nowe te pàr kreti ata kam amji to putwrỳ to ipijakrut, cô incrà jikaj xà, mã caxuaw ramã ahna caku te xêjxẽnta ne ihkôt pyxit. Mã cute pĩ te harkwa jihê ita jihê mẽn, ne pjê kam ramã cô incrà na hõmpun.
15-17Mã Pahpãm te Nowe mã:
— Ajpên pàr kreti pê põ mã me acato. Ca me, gĩxi me, me akra me, mehprõ me, pryre me, pryjara me, me acunea me acato. Ne pjê cunea kam atỳj me apicràn to me mõ, ne me gàhtô to mõ — hajỹr.
Nowe hakryte Pahpãm mã ampo gõ
18-20Mã mehcunea japôj. Mã Nowe Pahpãm pyrên hakrya to hakry, na ri cute ampo pry ita curan, ne Pahpãm mã hõr prãmte to caxàr.
21-22Mã Pahpãm te ampo pry to me kam hapac xà ita na cumã ihkĩn, mã cute amji mã harkwa to:
— Wa ha nee jũ caxuw hipêr pjê ita to kêanre nare, ne nee mehcunea jipej nare. Ampo na? He cute me hajỹr tũam, ne mehkêanre. Ne wa ha ita caxuw pjê kam me caxuw ampo to ajpẽn catê partu. Na quê ha caku cunea kam me hàhkre xà caxuw, me cumã cô me amco, ne cute me hõ kẽhkẽn xà caxuw amcrà me amcro, ne hanea ne, ajpẽn caxuw, amcro me caxwa. Na quê ha to hajỹr ita kam, ahnaa ampo cunea jicu xà mã to cumẽ — hajỹr.
9Pê Pahpãm me panquêtjê mã amji to awjahkre
1Ne Pahpãm te Nowe to impejti ne cumã:
— Hamre, ita caxuw ca ha me gàhtô to mõ, ne pjê cunea kam, quê ha me atàmxwỳ me hàhtôa to me hàhtô to me mõ, ne mehcahkũm to me mõ. 2Ne quê ha pryre cunea ihtỳj amji mã megĩ itajê cupa, ne me cupê me gõ tekjê, na ca ha me caa me to ahimpej. 3Na ca ha gapacta ne atỳj me ampo itajê cunea ku. Nãmri pê wa mam me amã, ate me ampo hô kur xà itajê to pit mã hahkre. Ne ita caxuw ca ha atỳj me ampo cunea ku.
4— Ne nee ca ha cormã ne apu hĩ caprô pijaxwỳr nare itajê kur nare. Ampo na? Kam caprô ata pê incaca xà xakat.
5-6— Ne pê wa amji kôat me ato, ne megĩa na me ato, cwỳrjapê ri nee me ate me ajpẽn curan xà nare. Nãmri quê ha ampo jàprê te me anõ curan na, nare quê ha jũm jĩa te megĩa nõ curan na, ca ha hanea ne atỳj mehcura, cute ihcuran jahpan xà na.
9-17— Ne wa ha me amã amji jarẽ, ne jũ caxuw hipêr cô to pjê kam ampo cunea to ipictor to hajỹr nare. Cwỳrjapê wa ha côjkwa kam ta jõxwỳn xô, mãr wa hõmpu, ne amji mã:
— “Pê wa me cumã to awjahkre xà ata mã ajêt he. Na wa ha nee jũ caxuw hipêr cô to pjê to ipictor nare” — hane. Hõhõ, pê Pahpãm me Nowe, ita na me amji ton to hane. Hamre.
11Pê Pahpãm me panquêtjê mã harkwa to ahho
Ỹhỹ, ne pê caku jàhtôa kam pjê cunea kam me hàhtô to me mõ, ne ajco me harkwa pyxit peaj to mehcakôc. Ne mehcunea te kẽn te ikre kàhti ata xãm na me ajpẽn par. Ampo na? Nee mã ampo na nare, ma ame Pahpãm par caca. Ne ma pjê cunea kam amehcahkũm caca, cwỳrjapê pê me krĩ catia ton to prãm, cute amji to me catia prãmte. Ne me ajpẽn mã:
— Hacme, ne me ikre nõ kàhti to, ne ihkôat côjkwa wỳr me api, ne nee pjê kôt ame papicràn nare — hane. Ne cute me ton. Mã Pahhiti wrỳc, ne cute krĩ ata me kẽnti te ikre kàhti ata pupun, ne nee ahna cumã ihkĩn nare. Mã me ajpẽn mã:
— Mehcunea me harkwa pyxit peaj to mehcakôc ita kam, quê ha me ampo cunea jahkre pej, ne ihtỳj jũ caxuw me ampo kên catia to. Hacu ne ahpỹanre na me cumã me harkwa pihho jõr pa, mãr quê nee me ajpẽn par nare — hane.
Ne me iwrỳc, ne cute mehcunea mã harkwa jõr par, mã ajpẽn kaj na cute mehcakôc kam mehtẽm. Ne nee me ajpẽn par nare ita kam, jũ wỳr quê me ajpẽn kampa. Ne ma pjê cunea wỳr cute me ipicràn kam mehtẽm. Ne pea cute me ikre ita me krĩ ita jicu, ne me ipicràn partu.
Pom krĩ ita japrỳ te Meharkwapihho jõ krĩ. Ita cwỳrjapê ri krĩxàre cunea me harkwa pihho to pit mã mehcakôc, ne ma pjê cunea kam amehcahkũm. Hamre.
Pê Pahpãm menquêtti Aprãw na ahwỳ
Kam To Ihtẽm Xà 11.31-32; 12.1-8
Ne pê caku atajê kam pjê nõa kam, hũmre nõ ita hõ pjê mã hikra, ne ma Canãn jõ pjê wỳr mõ. Ne amji kôt ihkra japrỳ te Aprãw me, mehkjêjê nõ to mõ. Ne Pjêncràti jõ krĩ mã me cator, ne curia hũmre nõ ata tyc. Mã Aprãw pê ihkra ita te harêt.
Mã Pahpãm te Aprãw mã ihcakôc ne cumã:
— Gõ pjê me, acũmxwỳ jũrkwa me, me akwỳ pê acato, ne ma ite amã pjê jahkre xà ata wỳr mõ. Wa ha amã pjê ata jahkre, ne me atàmxwỳ to hàhtôa to hàhtô. Wa ha ato impej, ne ato acatia to acati. Ca ate ito amji mã ahimpej, na ca ha me hàhtôa ne me to impej. Cwỳrjapê cute me ato impejti atajê jahpan xà na, wa ha ame to impejti ne. Ne cute ame ato kêanre atajê jahpan xà na, wa ha ame to kêanre ne. Ne acwỳrjapê wa ha pjê cunea kam me to impejti ne — hajỹr.
Mã Aprãw cator, hĩxi me, hapar Ro me, me cumã hàpên catêjê me, me hõ parxare me, ne mehcunea Canãn jõ pjê wỳr me cutor, Pahhiti jarkwa kôt. Pê Aprãw cator xà ata kam ramã ahna caku xetẽnta ne ihkôt xĩc.
Mã ma Aprãw mõ ne Canãn jõ pjê mã me cator. Mã Pahpãm te Aprãw mã amji to ipipẽ ne cumã:
— Wa ha itỳj jũ caxuw me atàmxwỳ mã pjê ita gõ — hajỹr. Mã Aprãw te hakryte Pahhiti mã amji jõr, ne to cati prãmte cumã ihcakôc pejti.
Ne Aprãw me, hĩxi me, hõ parxare me, ma Peter jõ krĩ cahê na kẽn atajê wỳr me mõ. Mã ihkôt hapar Ro hõ parxare me, cumã hàpên catêjê to mõ, ne curia ame hàhhuc cri.
13Pê Aprãw me Ro ajcapô
Kam To Ihtẽm Xà 13.1-18; 15.5-6
Pê ampeaj kam Aprãw me Ro ita me hakràj cati. Pê pjê kam me ahtwỳ ata incrire, cute kam me hõ parxare to me ipijapar xà caxuw, ne pê ampeaj kam me cumã hõ carà cahàcre hàhtô. Cwỳrjapê ri Aprãw me Ro mã hõ parxa jamãr catêjê cama ame ajpu. Ne Aprãw jàhcajrẽan to hàhcajrẽn, cwỳrjapê pê Ro mã harkwa to:
— Cu amji to pajũkjê ita kam, jũ wỳr cu ajpu. Ca ha amji mã pjê nõ capi ne hỹrmã axy, cu ha ajcapô — hane.
Mã Ro te Côpijapjêr jõ cô cahê na pjê ata pupun, mã kam põre, ne kam ahtu, ne impejti, ne impej ita pê mam Etẽ jõ pjê pyràac. Mã Ro te pjê pupun, ne amji mã capi ata kam pê mam ramã Krĩhpôc me Krĩhcumrãrti atajê ihcuhhê. Mã ma hỹrmã hõ parxa me, cumã hàpên catêjê to hy. Mã Aprãw Canãn jõ pjê kam hàhhuc.
Pê Pahpãm Aprãw mã amji to awjahkre
Pê Ro xy jirô pê mã Pahhiti Aprãw mã ihcakôc ne cumã:
— Hõmpu he, ne pom ca pjê cunea pupu ita, wa ha amã ihcunea gõ, quê ha hanea ne me atàmxwỳ ihtỳj kam mehkrĩ. Ne ite amã me atàmxwỳ jõr xà atajê, quê ha me hàhtôa to me hàhtô. Quê ha me hàhtô pê ihhêj rũm pjênxôm carôt pyràac, ca ha nee uu ne me cahyt par nare — hane.
Ne hipêr caxwa ri irĩat kam, Pahpãm te cumã ihcakôc, ne cumã:
— Aprãw, nee ca apu pa nare. Ampo na? Wa ha itỳj ato impej ne gamã, ne apytà — hajỹr. Ne ma põ mã Pahpãm te haprôr ne cumã:
— Côjkwa wỳr ca rĩt ne hõmpu, ca ha ate caxêre cahyt par na, ca ha cahyt pa. Ampo na? He wa ha amã atàmxwỳ to hàhtô to hanea, pom quê caxêre jàhtô he — hajỹr.
Mã Aprãw te Pahpãm kam hapac, ne ampeaj kam amji mã to ihhimpej. Ampo na? Cute Pahpãm te cumã harkwa to ihcakôc ata na, cute impar na ri.
16Pê Hacakwỳj mã Ixamar pỳm
Ne ramã jũ mã me ahna caku te, mã cormã nee Aprãw me hĩxi pê Xarakwỳj ata mã ihkra nare kam, ramã ajwar mehwej. Cwỳrjapê ri Xarakwỳj te impjên mã harkwa to:
— Pom imã hàpên catê cahãj pê Hacakwỳj ita me, ca ha apu gõr ne kam akra, quê ha cumã ihpỳm, cu ha to pahkra, wa ha pa to ajpa — hajỹr.
Mã harkwa kôt Aprãw te Hacakwỳj ita to hajỹr ne kam ihkra. Mã cute amji cajpẽr me mãa mã, ma apu hõ pahhi kwỳj pê Xarakwỳj ata par caca. Cwỳrjapê ri ma Xarakwỳj apu Hacakwỳj curê ne apu to kêanre, mã ma põ wỳr cupê tẽ.
Mã curia Pahhiti te côjkwa kam cumã memprar catêjê nõ na amji jahkre ne cumã harkwa to:
— Ca ha nee gõ pahhi kwỳj ata mã hikran, ne hipêr cupê acator to hajỹr nare. Ne hacpỹa mã hỹrmã amji jaxà, ne atỳj amji caxuw kampa. Ne wa ite ramã amã akra jõr ita, quê ha amã ihpỳm, ca ha cumã haprỳ to Ixamar. Quê ha ampeaj kam ihtỳj, ne cukwa kam quê ha ampeaj kam amã atàmxwỳ hàhtô, ne ihtỳj mehkjêjêa me, me ajpu — hajỹr.
Mã Hacakwỳj te impar ne hacpỹa mã amji jaxàr. Mã cumã ihkra ata pỳm, mã Aprãw te cumã haprỳ to Ixamar.
17Pê Pahpãm Aprãw mã ihkra to awjahkre
Ne ramã ahna caku te trêxi, mã Aprãw wỳr Pahpãm cator, ne cute cumã harkwa to:
— Ỹhỹ, Aprãw, hipêr ite amã amji ton xà ata to intuw, quê ha ihtỳj amã akra xũmre nõ cato. Na quê ha apê me hakat, ne apĩan quê ha pahhi catia catêjê kwỳ me hapôj. Wa ha amã Canãn jõ pjê ita gõ, ne hanea ne me atàmxwỳ mã cugõ, ca ha kam me akrĩ rohnỳtti mã. Ne ca ha caa me, me atàmxwỳ me, me apê me ikwỳ, na wa ha pa amji to me Apãm Cati.
— Ne mehcunea te, ate ipar ne apê me ikwỳ na, cute me gahkre pej prãm to, ca ha ite ato ihimpej xà ita na ikam gapac to hane he. Ca ha me akam, me hũmre mehkrĩ atajê me, me atàmxwỳ me, ca ha me acunea me apy kà kryjre ne ajpẽn mã me hakep. Ne quê me atàmxwỳ nõ mã ihkra xũmre nõ pỳm, ne ramã ahna amcro ôjtô, quê ha acuxà me cumã impy kà kwỳ jakep. Ne por jũmjê te impy kà kwỳ jakep nare atajê quê ha nee me cupê me ikwỳ nare. Ampo na? He nee ite amã amji ton xà na, pahte ajpẽn par xà ita mã hàr nare na ri.
— Ỹhỹ, Aprãw, ramã gĩxi Xarakwỳj me ajwar awej cakrô, quê ha ihtỳj me amã me akra xũmre nõ cato. Ne cupê me atàmxwỳ cunea xakat — hajỹr.
Mã Aprãw te Pahpãm par, ne cuna mã ihpỳm, cute cumã incrire na amji jarẽn prãmte. Ne cute nee impar xà ita to amji mã hajỹr nare, na ri cama apu acxa, ne amji mã:
— Pỳhàpà, quê ha pijamã cormã imã ikra nõ cato? — hajỹr jirô pê mã, cute Pahpãm mã:
— Ca rỳ mã Ixamar to me itàmxwỳ tàmxwỳ xakat — hajỹr.
Mã Pahpãm cumã:
— Quê nare! Gĩxia pê Xarakwỳj kam quê ha akra xũmre ita cato, caku nõ na, ca ha cumã haprỳ to Ixac. Ne cupêa quê ha me atàmxwỳ jàhtôti atajê xakat — hane. Ne ma cupê tẽ. Mã amcro ata na Aprãw me ihkra xũmre pê Ixamar me, curi cahê na mehkrĩ atajê me, mehcunea te amji mã mempy kà kryjre ne me hakep, Pahpãm te ahna mẽn xàa na.
18Pê Pahpãm hipêr Aprãw mã ihkra to awjahkre
Pê Pahpãm hipêr awcahti nõ na Aprãw mã amji to ajpẽ to hane he. Pê Aprãw pyt te ihcahpa kam, harkwa mã incjêj xà ata na jỹ. Ne cute me hũmre to incrê ne me hõmpun. Ne ma cute mehcajpar prãmte me cuna mã hãm ne tẽ. Ne cute mehcajpar ne mehkôt na me cumã hũjahkre, ne cute hõ to me kam hapac. Mã ahna me cumã impejti.
Mã Aprãw te hỹr xà wỳr amji jaxàr, ne hĩxi pê Xarakwỳj mã harkwa to:
— Awjarêa ne me hũmre itajê mã kwỳr te pro nõ to — hajỹr. Ne ma hõ carà cahàcti hôhti wỳr tẽ, ne cute harĩntuwti nõ capi ne ahna cumã hàpên catê mẽn, quê ihcura ne ihkrẽr xà caxuw to. Ne ramã cute amji jipêj mã hanea ne pryti kà cacô incrà me, ihkà cacô to me mõ, ne cute me cuna mã hũxwỳr.
Mã cute mehkrẽr, ne me Aprãw cukij to:
— Mẽr jõ ri mã aprõ pê Xarakwỳj ata? — hajỹr.
Mã Aprãw me cumã:
— Ma ihkrĩ xà kam ri jỹ — hane.
Mã me hũmre nõ pyxit ita pê Pahhiti pê Pahpãm, ne cute Aprãw mã harkwa to:
— Caku ajpên mõ ita kam, quê ha gĩxi mã ihkra xũmre ihpỳm — hajỹr.
Mã Xarakwỳj te ita par ne cama apu amji na acxa. Ampo na? Nee cute amji mã Pahhiti jarkwa to hajỹr nare na ri. Ramã Aprãw me ajwar ihwejtu, ne mehkra xà jirô pê ihpỳm tu, ne cormã nee mehkra nare.
Mã Pahhiti te Aprãw mã:
— Ampo na mã gĩxi apu acxa? Xà quê ipê gõ Pahhiti nee ajkĩ ita ton nare? Wa ha itỳj to. Caku pyxit ita jirô pê, quê ha ihtỳj cumã ihkra xũmre nõ cato — hajỹr.
Mã hũpate Xarakwỳj te ipicxar na cumã amji na hàprãr to:
— Wa nee apu ipicxar nare — hane.
Mã cumã:
— Ca apicxar, wa ite apar — hane.
Pê Aprãw Pahpãm mã Krĩhpôc me Krĩhcumrãrti cajrẽn
Jirô pê mã ri hũmre itajê me hãm, ne ma Krĩhpôc jõ krĩ wỳr me mõ. Mã ma Aprãw mehkôt mõ. Mã Pahhiti te amji mã:
— Pom wa ite amji mã Aprãw pê me ikwỳ cunea xakat na capi ita? Nõ na mã wa apu cupê ite krĩ to kên xà ita to ipimxur to mõ? Wa ha itỳj cumã harẽ — hajỹr, ne Aprãw wỳr ipipkjêr ne cumã:
— Pom me hũmre pijakrut itajê pê côjkwa kam imã me hàpên catêjê, ne wa ha krĩ kam mehkêanre atajê wỳr mehkujate, quê ha krĩ mea mã, me to hamre tu ne — hajỹr.
Mã ma Krĩhpôc me Krĩhcumrãrti wỳr me ipijakrut itajê me mõ. Mã Aprãw te hapar pê Ro ata te mehkra mea mã krĩ ata kam me cahê na mehkrĩ na me to amji japackre, na ri cute Pahpãm na hàhwỳr to:
— Ỹhỹ, mõrmõ ihtỳj curi me cahê na mempej te me xĩncwẽnta ne amehkrĩ. Xà ca ha ajkĩ mehkên catêjê cahê na mempej te me xĩncwẽnta atajê mea mã, me hipej tu? — hajỹr.
Mã Pahpãm cumã:
— Quê! Quê ha curi me cahê na mempej catêjê me xĩncwẽnta ne amehkrĩ, wa ha nee mehkêanre atajê kôt me hipej nare — hane.
Mã Aprãw cumã:
— Xà quê ihhêaj to mempej me xĩncwẽnta xà wỳr, me xĩc ne me hamre, ca ha ajkĩ atỳj ahnaa me hipej? — hane.
Mã Pahpãm cumã:
— Quê! Quê ha cute me cwarẽnta ne ihkôt xĩc itajê mempej pit, wa ha itỳj mehkôt mehkwỳ cunea caprĩ — hane.
Mã Aprãw cumã me harẽn to ihkryj to mõr ita kam, tàkamrỳ me to hõkre nõ to mõ. Ne cute cumã ihcakôc jicu xàa kam cumã:
— Xà quê ha mempej catêjê me tej peaj, ca ha ajkĩ atỳj ahnaa mehkôt me hipej? — hajỹr.
Mã Pahpãm cumã:
— Quê! Quê ha cute me tej peaj cakrô, wa ha itỳj mehkôt mehcunea caprĩ ne me hicu — hane.
Jirô pê mã ri ma tẽ, mã ma Aprãw te hũrkwa wỳr amji jaxàr.
19Pê Ro krĩ te caxàr xà pê cato
Mã ma ramã me hũmre pijakrut atajê Krĩhpôc jõ krĩ mã me cator. Mã Ro te ihtỳj hũrkwa kam me ahna amji caxàr. Mã caxwa ata kam krĩ ata kam me hũmre mehkrĩ catêjê atajê jàhtôa ne cute me ahna me cuprõn, ne me Ro na hàhwỳr, ne me cumã:
— Ramã ite me pyjê caxun to ihkĩn hi, na ca ha me imã me hũmre impejti itajê jahkre, wa ame caxun to me ipa — hajỹr. Hõhõ, pê cute amji kam me hapac xà kêanre kam menxyre ita me cumã hajỹr rohnỳtti mã, na pê Pahpãm ame hipej prãm.
Mã côjkwa pĩn me hũmre pijakrut atajê te jũ mã me hũmre atajê into ton, ne me to into puror, mãr quê nee me ikre jarkwa pupun, ne ahna me hỹrmã mencjêj nare. Mã cute me Ro mã:
— Krĩ ita pê gũjarêan kam, me akra mea mã, me acato! Ne ma kẽn nõ na, ca me akrĩ. Ampo na? Wa ha pjê ita kam, krĩ itajê cunea to me hamre tu ne — hajỹr.
Mã Ro te, por ramã ihwawỳ to cute ihkra me hikwa na cume ajpẽn par atajê mã hũjarẽn, mã nee cute mempar nare, ne ihtỳj cute ame cumã hapactu na amehcãmjĩ. Mã pea me hũmre pijakrut atajê te me Ro pa na ipyr, ne hanea ne me hĩxi pa na ipyr, mehkra cahãj pijakrut atajê mea mã, ne ma me to ipicahur, krĩ pê, põ mã me to cator prãmte. Ne ma me to cator, ne curia ri me cumã:
— Kẽn wỳr me aprõt pyrentu, ne nee hacpỹ mã amji jahpan xà na mehwỳr ame arĩt ne me gàhhuc nare. Ampo na? Wa ha mehcunea to me hamre tu ne — hane.
Mã ma mehprõt, mã côjkwa pĩn Pahpãm te cuhy te ta kujahêc, mã cute Krĩhpôc jõ krĩ ata me, Krĩhcumrãrti ata na impỳn, ne mehcunea to caxàr tu. Ne mehkôt ampo to me hàhcukrêj atajê me, me hõ pur me, pjê ata kam ampo cunea to cute caxàr partu, mã pjê pit jàhhuc, ne carãre nõ.
Mã nee Ro me hĩxi ata te Pahpãm mã hàpên catêjê ipijakrut atajê impar nare, ne krĩ japê xà to hacpỹ mã hỹrmã irĩt, ne curia cute caaxwa carôt na amji jahkre, ne curia ihcuhhê rohnỳtti mã. Mã ma Ro me mehkra quêt me pra, ne curia pê kẽn na mehkrĩ.
Mã apẽ mã ma Aprãw hacpỹ mã mõ ne kẽnti nõ jimoac kam xa, ne ampỳa mã krĩ wỳr irĩt ne cute hõmpun. Mã krĩ atajê kũm, me pjê kũm pit kàj mã hàpir to mõ, mã cute hõmpun.
21Pê Xarakwỳj mã Ixac pỳm
Mã Pahpãm te me Aprãw me Xarakwỳj mã ihkra to hũjahkre ita ihtỳj cumã ihpỳm, caku pyxit jirô pê. Mã Aprãw te cumã haprỳ to Ixac, ne haprỳ ita jũjarẽn xà pê “Ipicxar”. Mã Xarakwỳj te amji jarẽn to:
— Pahpãm te ihtỳj ajte imã ikra xũmre ita jõr, cwỳrjapê wa ame ikwỳ mea mã, me ijakryte ame acxa — hajỹr.
Mã ramã Ixac kàre to mõ, ne cute ihkà jicu. Mã cute ihkà jicu pyrên hũm pê Aprãw apu hakry, ne cute me to amji pyràc xà kôt, cumã amji kĩn catia ton.
Mã Ixamar pê Hacakwỳj kra ata, cama apu Ixac mãn kêanre to mõ. Mã Xarakwỳj te ahna hõmpun, ne kam hapac, ne apu kam incryc ne impjên mã:
— Ixac me hũm, imã atyc jirô pê Hacakwỳj kra pê Ixamar ita te amji mã acukrêj nõ pyr na to prãm nare. Cwỳrjapê ca ha ma inxi me ajwar jũ kam mehkujate, quê me mõ — hajỹr.
Mã Aprãw mã ahna ihkĩn nare, ne ihpeacre. Mã ma apu jũ kam amehkujahêc caca.
Mã Pahpãm te ita to cumã ihcakôc ne cumã:
— Gapacta ne jũ kam Hacakwỳj me ihcãmter kujate. Wa ha pa me hamã, quê ha hanea cupê me hàhtôa xakat — hajỹr.
Mã Aprãw te impar ne ma Ixamar me inxi kujahêc, põ kam me hamreare ata wỳr. Mã curia mehkrĩ, mã ihtỳj Pahpãm me hamã. Na pê cupê me hàhtôa xakat ne ihtỳj ajco mehkjêjêa tàmxwỳ tàmxwỳ me, me ajpu.
22Pê Pahpãm Ixac na, Aprãw capi
Ne ahna caku jàhtô nare mã ramã Ixac kàre. Mã Pahpãm te, Aprãw te to amji mã ihhimpej na capi, ne hahkre pej prãmte cumã:
— Por akra Ixac pyxit peaj ne amã ihkĩnti ata, ca ha to mõ, ne ate to ikam gapac xà na, imã ihcura. Ca ha to mõ, wa ha amã Morij jõ pjê ata jahkre, ca ha hàhkà jakôt atajê nõ na ihcura, ne imã to capa — hajỹr.
Mã apẽ mã Aprãw jỹr, ne cute to pĩ cahhêc, cute to cuhôn xà caxuw, ne cawrô cahàcre kam haxwỳr. Ne cute Ixac japrôr, ne ma amji kôt cute cumã me hàpên catêjê to ipijakrut ne to mõ. Ne cute me mõar to me amcro incrê jirô pê mã ri Aprãw te pjê ata pupun, ne cute cumã me hàpên catêjê itajê mã:
— Ita ri me ahtwỳ, cawrô cahàcre na. Wa ha ma ikra me mõ, ne ame Pahpãm to amji kampa, ne ampo to me kampa, ne ihkĩnti na me cumã amji jarẽn jirô pê, wa ha hacpỹa ne me amji jaxà — hajỹr. Ne Aprãw te Ixac jikre kam pĩ pre xir mã ma to mõ. Mã Aprãw te cuhy me wapo pyr, ne ma ajwar me mõ.
Mã Ixac te carà cahàcti hôhti japên, ne hũm cukij ne cumã:
— Inxũ, ihtỳj pamã wapo ne pĩ, ne jõ ri mã carà cahàcti hôhti ita, pahte to Pahpãm kam pajapac xà caxuw? — hajỹr.
Mã Aprãw cumã:
— Quê ha Pahpãm pamã ihnõ — hane.
Ne por Pahpãm te cumã pjê jahkre ata wỳr me cator, mã Aprãw te ajpẽn jipy kẽn jakôt, ne kam pĩ jaxwỳr. Ne cute Ixac cajpre, ne pĩ jipy hir. Ne caxuw wapo pyr, ne ramã cute Ixac curan xàa kam, mã côjkwa pĩn Pahhiti te ihkrãhhia kam Aprãw mã:
— Aprãw! Aprãw! Akra curan nare! Ita kôt wa ite, ca ampeaj kam ikampa na, gahkre pej. Ampo na? Ate imã akra pyxit peaj ata jõr xà caxuw ajmãr ihcuran — hajỹr.
Mã Aprãw rĩt, ne cute carà cahàcti hôhti xũmti te hĩpàr to ahkêt na hê, ne to hãm na hõmpun. Ne cute ihpro ne ihcuran, ne kẽn jipy hir ne to caxàr, cute Pahpãm mã hõr xà ata caxuw.
Cwỳrjapê ri Pahhiti te hipêr Aprãw to impejti na amji ton, ne cumã ihtàmxwỳ jàhtôa ne hõr na amji ton.
Ne hanea ne Pahpãm te cumã amji jarẽn, ne cumã:
— Ỹhỹ Aprãw, ca ate ito amji mã ahimpej, cwỳrjapê wa ha krĩxàre jàhtôti atajê cunea to impejti ne, atàmxwỳ itajê cwỳrjapê. Quê ha krĩxàre itajê ihtỳj, pom ite me atàmxwỳ to impej ita na, quê ha me ina ahwỳ — hajỹr.
Jirô pê mã ri Aprãw me, Ixac me, cumã me hàpên catêjê me, cute hacpỹ mã ikre wỳr me amji jaxàr.
24Pê Ixac me Repecakwỳj hikwa tuw
Ne ahna jũ mã caku te jirô pê mã ramã Aprãw weaj to ihwej, ne cute cumã me hàpên catêjê jõ pahhi kujahêc, quê ihcãmter mã ihprõ japên to mõ. Nãmri cumã Ixac te curi jũm cuprỳ me hikwa na to prãm nare, ne hõ pjêa pê Pjêncràti jõ pjê rũm, jũm cuprỳ me Ixac jikwa na to prãm.
Mã cumã hàpên catê ita te cawrô cahàcti kô jarôti pê camer ita to tej, ne kam ampo kĩn xà to hipu tu, cute cuprỳhti ata jahpan xà na hũm mã hõr xà caxuw, ne ma to mõ. Mã jũ mã ahna amcro te, mã Aprãw na mehkwỳ jõ krĩ mã to cator. Ne cute Pahpãm mã ihcakôc, cute cumã cahãj cuprỳ ata jahkre prãmte. Ne cute ihwỳr to hajỹr he:
— Ỹhỹ, me ijõ Inxũ pê Pahpãm. Ca ha ite Ixac mã hĩxi nõ mã icator na itehcajpa to hane he. Quê ha jũm cuprỳ te cawrô cahàcti pê camer mã cô kwỳ jõr prãm ata pê, quê ha Ixac prõ — hajỹr.
Ne cormã Pahpãm mã ihcakôc to hỹr kwỳa kam, mã me cuprỳ nõ impejti japrỳ te Repecakwỳj ata curi cator. Pê cupê Aprãw na mehkjêjê cahãj nõa. Mã hàpên catê ita te cô na ihwỳr, cute to ihkõm prãmte. Mã cute cumã hõr jirô pê cute camer mã kwa pĩn cô kwỳ to hàpir na amji ton. Me ajkaam mã hàpên catê ata te, Pahhiti te Repecakwỳj capi na hahkre pej pyrentu.
Mã cute cumã hapac jakrô xà jõr, ne hanea ne cumã wakỳre pràti pê ôr te ihpa xê xà to ipijakrut ne hõr. Ne ihcukij to:
— Xà hõtpê gũrkwa kam imã ijõt xà nõ — hajỹr.
Mã cumã:
— Hõtpê — hane.
Mã hàpên catê ita te Pahpãm te ihtehcajpar pyrên hakryti na cumã amji jarẽn. Jirô pê mã ri, ma Repecakwỳj kôt mõ, hũrkwa wỳr. Ne cute Repecakwỳj tõ pê Rapãw mã mõr xà atajê cunea na amji jarẽn partu. Ne hanea ne cute Pahpãm te cumã Repecakwỳj cuprỳhti ata pê Ixac prõ na to ihhimpej na harẽn.
Mã hũm me Rapãw pê ihtõ te hàpên catê ita mã Repecakwỳj to mõr xà na hahkre. Mã hanea ne ihtỳj ihkôt ihkràr. Mã hàpên catê ita te hũkjê mã cute ampo jõr xà atajê jõr par, ne caxwa mã curia hõt.
Mã iràrà na Repecakwỳj me Aprãw mã hàpên catê ita ma me mõ. Mã ma Repecakwỳj kôt ihtehcajpar catê cahãj nõ ita mõ.
Ne amcro nõ na ramã pyt xàr xàa wỳr, mã Canãn jõ pjê kam Ixac ma apu põ pê, Pahpãm mã ihcakôc to mõ. Ne irĩt ne cute ramã camer te hapôj to ipa na hõmpun. Mã Repecakwỳj camer pê wrỳc, ne cute Aprãw mã hàpên catê ita cukij ne cumã:
— Mẽr jũm xũmre mã põ pê apu mõ, ne ajpên me pahcajpar to tẽ ita? — hajỹr. Mã cumã:
— Ijõ pahhi Aprãw kra ri ajpên tẽ — hane.
Mã cute cupẽhkà to ihkuc pro. Pê mam cute me amji kam hapac xàa na cute cupẽhkà to ihkuc pro, ihpahàm cupate.
Mã hàpên catê ita te Ixac mã mõr xà ata cunea na amji jarẽn par.
Mã ma Ixac te inxyrxwỳ krĩ xà wỳr Repecakwỳj japrôr, ne cute to amji mã ihprõ kĩnti ata.
Pê Aprãw na caku jàhtôa pê xẽj ne ihkôt xetẽnta ne ihkôt xĩc ne ramã ihweaj ne ty.
25Pê Repecakwỳj mã Exaw me Jaco pỳm
Ne caku te winti jirô pê mã ri Ixac me Repecakwỳj mã mehkra pijakrut hiahpuro. Ne cormã inxi tu kam me jêt kwỳa kam, pê Pahpãm inxi mã me to hũjarẽn to:
— Krĩxàre xakat pijakrut ne atu kam harij, quê ha pyxit ne ihnõ jirôa pê carôt tỳj. Ne por carôt tỳj ata pê, quê ha hapu na ihpỳm ata, ne ihtỳj cupê mam ihpỳm ata jõ pahhi — hane.
Pê jũ mã ahna amcro pê cumã ihkra xũmre ajkrut ne ihpỳm. Ne pê mam ihpỳm ata mã haprỳ to Exaw ne hapu na ihtõ ita mã Jaco. Ne pea ajwar mehkà. Ne pê Exaw into capôc, ne ampeaj kam cumã hũjahêr prãm, ne cupê põ jõ xũmre. Ne Jaco pê amji mã ampejti ne hõtpê ajco ikre pua na ampo to ajpa. Pê Ixac mã ampeaj kam Exaw kĩn, ne hĩxi mã ampeaj kam Jaco kĩn.
27Pê Ixac Jaco cajrẽn
Pê caku hàhtôa jirô pê ramã Ixac ihwej, ne ramã into tũm. Ne amcro nõ na Exaw mã harkwa to:
— Ramã ita caxuw iwej, ne wa ha itỳj amcro nõ na ty. Ne ityc xwỳjrea na, ca ha gõ cuhê me gõ kruw cwa, ne ma põ mã to mõ, ne imã ampo cura, ne hĩ to imã jũ na wa ha cukrẽ, ite amji mã hàn xà ata na. Jirô pê mã wa ha itỳj acajrẽn to acũmpejti ne. Nãmri apê ri mam kà — hane.
Mã Repecakwỳj te ihcakôc xà ita na impar, ne Jaco mã hũjarẽn, ne ihkujahêc, quê carà cahàcre to ajkrut ne to mõ ne ihcura. Ne cute Jaco mã harkwa to:
— Cu ha apãm wej to tũm mã pahhêj. Wa ha cumã hõ to cuxwa, quê ha cukrẽ, ne Pahpãm mã acajrẽn to acũmpejti ne, Exaw cupyre mã — hajỹr.
Mã Jaco te inxi par pyrentu, ne Exaw kà mã amji jaxàr, ne cute carà cahàcre kà to amji mã hitô kà, mãr quê cupê Exaw pyràac ne ihpa hôhti ne. Ne ma hũm wỳr hõ to mõ, por curi hikwa xà ata ri, ne cute cumã:
— Inxũ, to jỹ ne apà, ne icajrẽn — hajỹr. Mã hũm te ihcukij to:
— Me anõ mã ca? — hajỹr. Mã cumã:
— Ipê acãmter kà pê Exaw — hane.
Mã nee ajmãr hũm te cupê Exaw na amji jarẽn xà ata na impar nare. Ne cute ihcukij to ipijakrut. Ne cute ihpa cupên ne ihtỳj apu amji mã to Exaw. Ne cute hõ ita krẽr jirô pê, cute Pahpãm mã Jaco cajrẽn pejti to ihcajrẽn to hajỹr he:
— Pahpãm gõtpê gàhkre ita mã ta gõ, ne kam ihhy to hàhtôa ne. Ca ha gakràj cati mãr quê me hàhtôa ne cama me amã hàpên catêjê na me ipa. Ne ca ha atỳj apê me akjêjê jõ pahhi. Ne por jũmjê ame ato kêanre atajê, quê ha Pahpãm hanea ne jũmjê ame to kêanre ne. Ne por ame ato impejti atajê, quê ha hanea ne jũmjê ame to impejti ne — hajỹr. Ne cute ihcakôc jicu, mã ma Jaco cator.
Mã hakàn pê Exaw hõa to hũm wỳr cator, ne cute cumã:
— Inxũ, to jỹ ne apà, ne icajrẽn — hajỹr. Mã hũm te ihcukij to:
— Me anõ mã ca? — hajỹr. Mã cumã:
— Ipê acãmter kà pê Exaw — hane.
Mã Ixac te amji mã ihhêj na amji jahkre pej pyrentu, ne to amji jigẽc hyr, ne apu ihtertet. Ne jũ wỳr quê cute Jaco cajrẽn xà ita hacpỹ ne cupê capa. Mã Exaw te incwỳr kam ihtẽm, ne hũm mã incwỳr kam amji na hàhwỳr, mãr quê Pahpãm mã ihcajrẽn.
Mã hũm te cumã:
— Mam iwỳr atõ te amji to hapu na kjê cator, ne cute imã ihhêj, wa ite cumã ato impejti xà ita cunea jõr ne to ihcajrẽn cakrô, wa ha itỳj cuxà acajrẽn — hajỹr. Ne cute ihcajrẽn xà cahàcre, kyre pê impej ata to ihcajrẽn.
28Pê Ixac Pjêncràti wỳr Jaco kujate
Mã Exaw te hũm tyc jirô pê ihtõ pê Jaco curan na amji ton. Mã Repecakwỳj te ita par ne cute jũ kam Jaco kujahêc to amji kam hapac pyrentu. Ne cute Ixac na hàhwỳr, quê mehkwỳ wỳr Jaco kujate, quê curia hikwa tuw.
Pê Ixac me Repecakwỳj mã Canãn jõ pjê kam mehkrĩ ata jõ pyjê cuprỳ kĩn nare, na pê ma Ixac Jaco kujate, inquêtti Rapãw jũrkwa wỳr, mehkwỳa jõ pjê japrỳ te Pjêncràti ata wỳr.
Pê Pahpãm Jaco mã amji to awjahkre
Mã Jaco ma me hũmjê jũrkwa pê cator ne mõ, Pjêncràti jõ pjê wỳr. Ne cute mõr to pyt ne nõr xà ata na cator. Mã ahna caxwa mã nõ, ne cute kẽn to, amji mã ihkrã japat xà ton, ne to ihkrã japat ne to nõ ne gõr, ne ipimtir.
Mã ipimtir ita kam, cute côjkwa wỳr me hàpir xà pupun, mã ma côjkwa mã hàr. Mã Pahhiti jarkwa na memprar catêjê ihkôt me api ne me irôrôc. Ne cahi na Pahpãm xa ne cute cumã harkwa to:
— Ipê Aprãw Pãm Cati, me Ixac Pãm Cati. Ne pom ca pjê kam nõ ne gõr ita, wa ha amã cugõ, ne hanea ne me atàmxwỳ mã cugõ. Quê ha me atàmxwỳ itajê pê pjênxôm carôt pyràac, ne ampeaj kam me hàhtô. Wa ha pyt japôj xà me, pyt cjêj xà me, pjê cunea kôt me cucrà.
— Ne wa ha pjê cunea kam me to impej, me atàmxwỳ itajê cwỳrjapê. Wa ha itỳj acahê na apu ipa, ne jũ ri apu amõr xà ata na, wa ha itỳj gamã, ne hacpỹa mã ate amji jaxàr na ato, ca ha pjê ita wỳr hacpỹ mã amji jaxà. Ne nee wa ha gicu nare, ne por ite ahna amã icakôc xà ton ata, wa ha itỳj amã to — hajỹr.
Mã ipimprar, ne cute amji mã harkwa to:
— Ampeaj kam ri Pahpãm pjê ita kam apu mõ, wa nee ite ita ri ipa xà ita na hahkre pej nare. Ampeaj kam imã pjê ita cupa. Pjê ita pê Pahpãm jũrkwa mã hàr xà, côjkwa wỳr — hajỹr.
Ne Jaco awcahti xà wỳr hỹr, ne cute kẽn te ihkrã japat xà ata jarẽc ne hãm, ne Pahhiti te kẽn to hõ tekjê xà caxuw hipy ampo cacô incoti ata jaxwỳr. Ne cumã haprỳ to Peter, ne me harkwa na hũjarẽn xà ata te “Pahpãm jũrkwa”. Jirô pê mã ri cute amji mã harkwa to:
— Quê ha Pahpãm te ampeaj kam ikôt ipa, ne apu ipa xà itajê me, ijõ me, ikà me, ipej pêa mã inxũ me inxê jũrkwa wỳr ito amji jaxàr na, quê ha cupê ijõ Pahpãam to ijõ Pahpãm, na wa ha itỳj to amji mã ihimpej ne cumã apê. Ne pom kẽn xa ita pê quê ha Pahpãm jũrkwa. Ne pa wa ha ijõtpê Pahpãm mã ampo gõ. Quê ha imã ampo tej, wa ha cumã pyxit ne cugõ, quê ha imã ihcahhur ahtwỳ — hajỹr. Ne cute amji jarẽn ita jirô pê mã, ma ihtẽm xà ita na tẽ.
29Pê Jaco Raquewkwỳj me hikwa tuw
Ne ahna amcro jàhtôa jirô pê mã ri, ma inquêtti jõ pjê wỳr cator. Ne ampỳa mã cute kwa pupun. Mã jũm te kẽn to kwa kre ryti ata jihê, mã xa. Mã carà cahàcti hôhti jamãr catêjê ihtỳj mehkrĩ, ne me jũm pahtỳjti te hihê mẽn na me hikaj.
Mã Jaco me hỹrmã cator, ne cute mehcukij to:
— Hàpà! Xà ajkĩ gõtpê me anõ te Rapãw jahkre pej? — hajỹr. Mã me cumã:
— Ỹhỹ — hane. Mã ramã ihcaxwỳj Raquewkwỳj ajpên carà cahàcti hôhti to mõ. Ne curi to cator.
Mã Jaco te kẽn te kwa kre jihê ata to hũcapêr, cute carà cahàcti hôhti mã cô kwỳ jõr na, mehtehcajpar prãmte. Jirô pê mã ri cute cupê Raquewkwỳj jũkjêa na cumã amji jarẽn, ne apu hapête amrã.
Mã ma hũm jũrkwa wỳr, hũm mã harẽn to ipicahur, ne cute cumã harẽn. Mã Jaco wỳr hũm pê Rapãw cator, ne cute ihcajpar, ne haprôr ne hũrkwa kam, cahê na hàhhuc prãmte cute huwahi. Ne Rapãw pê Jaco menxi tõ.
Mã curia Jaco jàhhuc, ne apu inquêtti mã hàpên to ipa. Mã ahna putwrỳ pyxit jirô pê mã ri Rapãw te Jaco cukij to:
— Ampo na ca ha ihprãm, imã gàpên jahpan xà na? — hajỹr. Mã Jaco cumã:
— Wa ha hapu na akra cahãj pê Raquewkwỳj ata na amã ijàpêan to caku to xet — hane.
Pê Jaco mã Raquewkwỳj kĩn, ne ahna cumã amji to prãm, na pê ihtỳj cume hikwa to prãm. Pê Rapãw mã ihkra cuprỳ cahãj ita ajkrut peaj, Rijakwỳj me Raquewkwỳj.
Mã Jaco te caku te xet kam Rapãw mã ihkra cahãj na hàpên, jirô pê mã ri cumã:
— Hã, hamre imã iprõ gõ, nãmri ramã pahte amji mã amcro hyr xàa kam hàhhuc — hajỹr. Mã Rapãw te curi pjê ata kam, mehkrĩ atajê cunea to cuprõn, ne me cumã amji kĩn ton.
Mã caxwa mã Rapãw te aracri ihkra Rijakwỳj japrôr ne ma to mõ, ne cute Jaco mã hõr. Mã nee Jaco te awcapàtkô kam, cupê Rijakwỳj na hahkre pej nare, ne ihtỳj apu to Raquewkwỳj. Mã ahna apẽ, mã cormã cute Rapãw te cumã ihhêj na hahkre pej.
Mã Rapãw te cute me amji ton xàa na to hajỹr na, cormã cumã ihkôt harẽn to impej, quê nee mam ihkra ita xwỳjrea na cumã hapu na ihkra ita jõr, quê cume hikwa nare. Ne hipêr cute Jaco me ajpẽn par, cute Raquewkwỳj na hipêr hàpên to caku to xet prãmte.
Mã amcro te xet jirô pê cute hanea ne cumã Raquewkwỳj jõr, mã Jaco te Raquewkwỳj me hikwa jirô pê mã, hũm mã hàpên to caku to xet.
Ne pê Jaco mã ihprõ ajkrut atajê kam, mehkra xũmre tôxi ne hanea ne jũ mã me cahãj me. Ne me hũmre itajê pê me haprỳ hane he: Rupẽn me, Ximãw me, Rewi me, Juta me, Ixaca me, Xepurõ me, Joje me, Pẽnjamĩ me, Tã me, Naptar me, Cate me, Axer.
32Pê Pahpãm Jaco japrỳ to antuw, Ixaher wỳr
Pê Pahpãm caku te cwatôxi kam Jaco to impejti, ne cumã ihparxare jàhtôa ne cugõ. Mã ma Jaco inquêtti jũrkwa pê cator, ne ma hũm jũrkwa wỳr hacpỹ mã cute amji jaxàr. Ne mehprõ me, mehkra cunea to mõ, cumã me hàpên catêjê me, hõ parxare cunea to mõ. Ne ma, por pjê kam ihtõ Exaw ihkrĩ ata wỳr me mõ.
Mã caxwa ri Pahpãm te jũm xũmre na amji ton ne Jaco wỳr cator, ne cute me ajpẽn cujtêan to côjkwa caprêc. Mã hũmre nõ ita te nee Jaco mã hũcanãr nare na amji cajpẽr, ne hapôr hi jagãn, cute cuprõan kam, ne cupê to ipicapôn.
Mã hũmre pê Pahpãm ata cumã:
— Cama imã hikra, wa uu ne tẽ, ramã apẽ to mõ he — hane.
Mã Jaco cumã:
— Wỳr wa ha, ate imã ihcunea to impejti na amji ton nare kam, amã hikra — hane.
Mã hũmre ita cumã:
— Imã amji japrỳ jarẽ — hane.
Mã cumã:
— Ipê Jaco — hane.
Mã cumã:
— Hamre, hipêr apê Jaco nare. Ampo na? He gaprỳ ita kôt harẽn xà pê “Ihhêj xi”. Ne ita caxuw apê Ixaher. Ampo na? He gaprỳ ita kôt harẽn xà pê “Pahpãm me cute ajpẽn cujtên”. Ampo na? Ca ate ipê côjkwa kam Apãm Cati me ajpẽn cujtên, cwỳrjapê ca atỳj, me hũmre me, me Apãm Cati tohjê — hane.
Mã Jaco te ihcukij to:
— Jũ mã ri gaprỳ te? — hajỹr.
Mã hũmre ita cumã:
— Ampo na mã ca apu ijaprỳ na icukij? — hane. Ne pea cute Jaco mã ihcakôc to impej, ne ma tẽ.
Mã Jaco te pjê ata mã haprỳ to Paniher, ita jarẽn xà te “Pahpãm kuc”. Ne cute amji mã:
— Wa ite Pahpãm pupun ne cormã itĩar — hajỹr. Ne pyt cator, mã ma me mõr xà ita na me mõ. Ne cumã ihkjê xà, mã to jôt to mõ.
33Jaco me Exaw hipêr me ajpẽn pupu
Jirô pê mã ri Jaco te Exaw pupun, mã hỹrmã cute me hũmre to cwatxẽnta ne me to mõ. Mã Jaco te hõmpun ne ampeaj kam cumã hũpa. Mã cute amji mã:
— Pê wa cupê ihcajrẽn xà py, cwỳrjapê quê ha ihtỳj hahpan xà na icura — hajỹr. Na ri Jaco te ihtõ cajpar xwỳjrea na mam cute cumã ampo jõr xà atajê kujahêc. Ne hapua na mehkra to me mõ. Mã Jaco mam ihkrãa ri mõ, ne Exaw cuna mã hõpôrpo ne ihpỳpỳm to xet.
Mã Exaw ma hỹrmã ipicahur, cute ihcajpar prãmte. Ne cute me ajpẽn cajpar, ne me ajpẽn cahôr, ne me ajpẽn japête ame amrã. Mã Exaw rĩt ne cute pyjê atajê me, me ahkrare itajê pupun, ne Jaco cukij ne cumã:
— Mẽr jũmjê mã akôt me mõ itajê? — hajỹr.
Mã Jaco cumã:
— Pahpãm te ri ipê cumã hàpên catê ita mã mehkra itajê jõr — hane. Mã me hàpên catêjê cahãj me, mehkra me, mehprõ cunea te Exaw cuna mã mehkõn krã na me hỹr.
Mã Exaw te ihcukij ne cumã:
— Ne mẽr ampo na mã ate amji cumam ampo jàhtôa to me hũmre kujahêc, por wa ite mehcajpar atajê? — hajỹr.
Mã Jaco cumã:
— Wa ite amji to acajpuaw prãmte, ite amã ampo jõr xà atajê kujahêc, mãr ca nee ikam acryc nare — hane.
Mã Exaw cumã:
— He imã hàhtôa to hàhtô, pom amã ampo itajêa ri hanea ne imã — hane.
Mã Jaco cama apu ampo itajê to kam hapac to mõ ne cumã:
— Quê ha amã ikĩn na, ca ha atỳj ite amã ampo jõr xà itajê na amji capa. Ampo na? Wa ite akuc pupun, mã ihhêj rũm akuc ita pê Pahpãm kuc, na ri ijirôa pê acarôt tỳj. Ne gapacta ne ite amã ampo jõr xà itajê na amji capa. Ihkwỳa ri Pahpãm te hàhtôa ne imã hõr, na wa ha amã itajê gõ — hane. Ne pea cute ihhi kwĩn.
Mã Exaw te ampo itajê na amji caxàr, ne cute Jaco mã harkwa to:
— Mẽr hacme, wa ha ma me akôt mõ — hajỹr.
Mã Jaco cumã:
— Amã, imã cormã ikra kryjre na, me hahkre pej. Ne hanea ne imã pryti cahãjti kà cacô na, amã hahkre pej. Cu ha me to pahkyhkyj, quê ha nee me hũcanãr nare, cwỳrjapê wa ha hapua na akôt me to mõ — hane. Ne ma Jaco te Exaw pynãr, ne ma Xucot jõ krĩ kam me hàhhuc cri. Ne ma Krĩjikre wỳr me mõ ne me cator.
Jirô pê mã ri krĩ ata na pire mã Jaco pê Ixaher te pjê nõ kwỳ japrôr, ne kam hũrkwa xãm ne kam ihkrĩ. Ne curia ri cute Pahpãm mã me ampo to caxàr xà caxuw ajpẽn jipy kẽn jakôt, ne ihtỳj kam, cute Pahpãm mã me ampo jõr xà caxuw ampo pry to me caxàr. Ne cute cumã haprỳ jõr to Ererore Ixaher, ita jũjarẽn xà te “Pahpãm Carôt tỳjti ata pê ri Ixaher catêjê jõ Pahpãm”.
37Joje pê Ixaher kra jarẽn xà
Pê Raquewkwỳj mã ihkra pỳm ata haprỳ Joje, ne Ixaher pê Jaco mã pê ampeaj kam Raquewkwỳj kra pê Joje ata kĩn, mehkjêjê kwỳ jirôa pê. Na ri cute cumã ihkà impejti, crorti, pajapjêhti ton.
Mã mehkjêjê te ramã me hũm te Joje kĩnti ita na me hahkre pej, ne hũ na ame amji to prãm. Cwỳrjapê pê ma ame Joje curê, ne nee cumã amehcakôc pej nare.
Pê Joje amti
Mã Joje pimtir, mã ipimtir ita kam pur kam cumã hõ arỳjhy pre ita xa, mehkjêjê jõ arỳjhy pre cahê na. Pê mam cute me arỳjhy pre xà ata, pê ajco ihcahkôa na me hakep, ne me ihpre ne me hũxwỳ. Mã mehkjêjê jõ arỳjhy pre itajê ihcuhhê impejti kam, hõ tekjê cupate cuna mã ihcunea pỳpỳm, mã hõ tekjê hãm to xa. Ita na ri Joje te mehkjêjê mã ipimtir ita jarẽn. Mã mehkjêjê te mencryac kam mehcukij to:
— Xà ca ha ajkĩ apê me ijõ pahhi, ne me ito ahimpej, wa ha acuna mã acupate ame ipỳpỳm? — hajỹr. Ne pea hipêr kam me cumã mencryc picamẽn.
Mã hipêr ipimtir.
Mã pyt me putwrỳ me caxêre mehcunea cuna mã hõpôrpo ne hikwa. Ne pea cute hũm me, mehkjêjê itajê mã harẽn.
Mã hũm te ihcukij ne cumã:
— Xà wa ha ajkĩ me ipê caxêre pyràc, ne acuna mã acupate me ijõpôrpo ne ame ijikwa? — hajỹr. Mã mehkjêjê ame kam mencryac to amencryc. Ne hũm ri cama apu ipimtir jarẽn xà itajê to amji kampa.
Pê mehkjêjê mã Joje curan prãm
Amcro nõ na Joje kjêjê ma Krĩjikre jõ põ wỳr, hũm jõ carà cahàcti hôhti to me mõ, cute ame hamãr to ipa xà caxuw. Ne me ahna amcro te jũ mãn jirô pê Ixaher pê me hũm ita te Joje mã hàkjêr ne cumã:
— Me akjêjê kôt tẽ, ma Krĩjikre jõ põ kam ame carà cahàcti hôhti jamãr to me ipa. Ca ha tẽ ne me hõmpu, jũ mã ri cute me, ne ajpên imã me harẽn xà nõ to tẽ — hajỹr.
Mã Joje cumã:
— Ma — hane. Ne ma Krĩjikre jõ põ wỳr tẽ. Mã me hũmre nõ te põ kam apu Joje mõr na hõmpun ne cumã:
— Jũm mã ca apu hapên to mõ? — hajỹr.
Mã Joje cumã:
— Wa me ikjêjê japên to mõ. Xà ca atỳj ajkĩ imã me harẽ? Jõ ri mõrmõ ame carà cahàcti hôhti jamãr to me ipa? — hane.
Mã hũmre ita cumã:
— Wa ite me akjêjê itajê impar, mã ijapac kam me amji mã: “Hacme Kwapijakrut jõ põ wỳr” hajỹr, wa ite mempar — hane.
Mã cute impar ne ma mehkôt mõ, ne Kwapijakrut jõ põ kam me kôt cator.
Mã cute ampỳa mã amji wỳr me hõmpun, ne ihcuran na me amji ton pyrentu, ne me ajpẽn mã:
— Por ipimtir catê ata ri ajpên tẽ, hacme ne mehcura, ne cô kre crà itajê nõ kam me cumẽ, ne ampo jàprê te ihkrẽr na, hũm mã me harẽ. Ne caxi ipimtir ita te jũ na ton ita na mehkôpĩ. Jũ wỳr quê ha me pahto ihhimpej — hajỹr.
Mã Rupẽn pê mehkjêjê nõa, ma apu Joje curan ita na to ihcaca ne cute harkwa to:
— Cu ha cô kre kam cô nare nõ kam mehtĩar mẽ, ne nee mehcuran nare — hajỹr.
Ne ampo na mã cute me cumã harkwa to hajỹr? Nee mã ampo na nare. Harkwa kôt cô kre nõ kam, cute me mẽn, mã ahna ahtũm mã hacpỹa ne cute ihtẽm, ne aracri amji mã caxàr prãm to, pê mehkjêjê mã harkwa to hane.
Pê mehkjêjê Joje to ihpore na ahpa
Mã Joje cator, mã mehkjêjê itajê te mehpro ne me cupê ihkà impejti ita caxàr, ne cô kre ryti, kam cô nare ata kam me mẽn. Ne ame kwỳr kur prãmte, me hỹr, ne pea cute me ampo to hàhpan catêjê kwỳ pupun, mã cawrô cahàc kô jarôti pê camer kam me mõ. Atajê pê ihtỳj ampo to me hàhpan to me mõ, Ejit jõ pjê wỳr.
Mã mehkjêjê nõa japrỳ te Juta ita te mehkjêjê kwỳ mã:
— Cu ha me pahkjê ita cura, ne nee me ampo pyr nare. Cu ha cama ihpore na me to ahpa, ne nee mehcuran nare, ampo na cupê me pahkjê na ri — hajỹr. Hõ, pê me ajpẽn par to hane. Pê nee mehkjêjê nõ pê Rupẽn ita me cahê na apu mõr nare.
Mã ampo to me hàhpan catêjê atajê me ahnaa me amji to mõ, mã mehkjêjê itajê te cô kre ita pĩn me Joje caxàr, ne kyre pê me to hũpẽr, ihpore hy pràti te winti peaj na cute me to hàhpan. Mã ma amji kôt Ejit jõ pjê wỳr Joje to me mõ.
Mã Rupẽn te amji jaxàr ne nee Joje pupun nare, na ri ihpeacre, ne cumã amji kĩn nare. Mã mehkjêjê te me carà cahàcti nõ curan, ne caprô to cute ame Joje kà jatom, ne ma hũm wỳr me to pra ne me to cator. Ne me cumã ihkà pẽr ne me cumã:
— Xà ajkĩ akra kàa mã ita? Wa ite põ kam me cumã icator — hane.
Mã pea, hũm te ihkà pupun pyrentu ne pea apu amrãahti ne amji mã:
— Ampo jàprêa te mõrmõ ihkrẽr — hajỹr. Ne amcro jàhtôa kam cormã ihkra tyc ata japê xà to ihkrĩ ne amrã. Pê tee mehkwỳ, cute ihkra ita to hapactu prãmte ame to hahkre. Ne jũ wỳr quê me cupê hũjapê ita cahpêrta.
39Pê cahãj Joje kên mã cumẽ
Mã ampo to me hàhpan catêjê itajê Ejit jõ pjê kam Joje to me cator. Ne cute krãhtare jõ pahhi japrỳ te Potipar ita mã ihpore na me to hàhpan.
Pê Pahpãm ajco Joje cahê na apu ipa rohnỳtti mã. Ne Potipar jũrkwa kam cute hàpên xà ton xà atajê cunea na ihtehcajpa, ne Joje kôat pê Pahpãm ajco Potipar jũrkwa to impej. Na pê Potipar Joje to ikre kam me hàpên catêjê jõ pahhi. Ne pê Pahpãm, Joje cwỳrjapê, ihcunea na ikre ata to impej. Ne Potipar ata pê ihtỳj Joje to amji mã ihhimpej, ne hũhkra mã hàpên xà cunea jaxà.
Pê Potipar me hĩxi ita ma Joje pupu, ne cumã ihkĩn, pê ajco te cama hõmpuu ne cumã:
— Icahê na nõ — hane. Pê Joje ajco cumã:
— Wỳr wa ana amji capa. Ampo na? Apjên te ihtỳj amji mã ito hane, ne apê ihprõ. Wa nee ikên xà ita mã ixàr nare, Pahpãm cuna mã — hane. Ne pê ajco amcro cunea kam Joje wỳ.
Mã amcro nõ na ikre kam me hamreare, mã ahte Joje me Potipar me hĩxi apu mõ. Mã cute Joje kà na ipyr ne ihkjên to mõ, cahê na nõr prãmte. Mã ma Joje te cupê amji caxàr ne tẽ, mã hũhkra kam ihkà jàhhuc.
Mã apu kam incryc ne apu caràr, ne cute põ pê me hàpên catêjê ame ipa atajê mã hàkjêr ne me cumã:
— Por Ixaher catêjê nõ ata apu icahê na nõr prãm, ne cute ipro, wa icaràr mã cute ijicu ne jũ kam tẽ — hajỹr.
Mã impjên te amji jaxàr, mã cute cumã Joje kà pẽr ne hanea ne cumã ihhêj xi. Mã pea Potipar te hĩxi hêj xi xà ita kam hapac, ne Joje pro, ne Ejit jõ pjê jõ pahhi te me hacjên atajê cahê na, me hacjên xà kam haxàr. Mã putwrỳ jàhtôa kam curi ihcuhhê.
40Pê Joje me hacjên xà kam me ipimtir kôt harẽ
Ejit jõ pjê kam pahhi japrỳ pê Paro ata apu hõ pĩxô cacô capi catêjê jõ pahhi kam incryc, ne hanea ne apu hõ pãw ton catêjê jõ pahhi kam incryc. Ne cute ajwar me haxàr, me hacjên xà kam, por curi Joje me hacjên xà kam xa ata ri. Mã ajwar me ipimtir xà ita to me ipimtir, ne tee apu ihkôt me hakop to hahkre. Mã Joje te mehpeacre na me hõmpun, ne me cumã:
— Ampo na mã ca ita kam ame apec? — hajỹr.
Mã me cumã:
— Wa me ipimtir, ne jũm quê ajte me imã me ipimtir itajê kôt hakop ne harẽ? — hane.
Mã Joje me cumã:
— Pahpãm mã ri me apimtir xà itajê jahkre pej, ne ihtỳj imã harẽ, na ca ha me imã apimtir xà itajê jarẽ — hane.
Mã pĩxô cacô jõ pahhi te cumã amji jarẽn ne cumã:
— Wa ipimtir, mã pĩxô kre xà kam pĩxô krô crê ne ihcuhhê. Ne pea kam irã ne kam hô. Ne ramã imã Paro kõm xà xa, wa ite pĩxô pyr, ne kam hatên, ne Paro mã hõr, mã cute to ihkõm — hajỹr.
Mã Joje cumã:
— Apimtir kam pĩxô krô incrê ita pê amcro incrê. Quê ha ana amcro incrê, quê ha acator na Paro me cumẽ, quê ha me acator. Ca ha hacpỹa mã mam gàpên xà ata to apê. Ma ito amji japackre, ne Paro mã ijarẽ. Ampo na? Wa rỳ mã nee me hacjên xà ita kam ixãm nare. Ne nee ite ampo kên ton nare, ixàr xà ita caxuw, me hacjên xà mã — hane.
Mã pãw ton catêjê jõ pahhi te hajỹar, ne Joje mã ipimtir ita jarẽn partu, ne cumã:
— Ijõt kam, ikrã kam pãw na kàhàre incrê ne ihcuhhê, wa ma Paro mã to mõ, mã cuwênre pra, ne cute ikrã kam ihcunea pin partu — hajỹr.
Mã Joje cumã:
— Pom kàhàre incrê ita pê amcro incrê. Quê ha ana amcro incrê ita kam, quê ha Paro akrã jakep na me cumẽ, quê ha me akrã jakep, quê ha cuwênre gĩ krẽ — hane.
Ne amcro incrê ata kam pê Paro pỳm xà jõ amji kĩn jõ amcro. Mã cute me cumã me hàpên catêjê pijakrut itajê cator na me mẽn, mã cute me cator, me hacjên xà pĩn. Mã cute pĩxô cacô jõ pahhi mã hacpỹa mã hàpên xà jõr, ne cute pãw jõ pahhi krã jakep na me mẽn, mã cute me ihkrã jakep ne mehcuran. Mã Joje te me hacjên xà kam hũjarẽn xà ata na, cute me hõmpun. Mã Joje te amji jarẽn na, pĩxô cacô jõ pahhi mẽn, mã ajte nee cute Paro mã harẽn nare, ne cama to hapac kêt.
41Pê Joje pjê jõ pahhi pê Paro mã ipimtir kôt harẽ
Kam To Ihtẽm Xà 41.1-16, 25-36
Ne pea cute amji to caku to me ipijakrut, mã Paro pimtir. Ne ipimtir ita kam ma Nir jõ cô cahê na xa. Mã pryti cahãjti jicotti itajê te xet, ne cô pĩn hàpir, ne apu ahtu kur to ipa. Mã hanea ne ihkôt cahãjti kwỳ kôkôtre, ihhire atajê te xet, ne cô pĩn hàpir. Ne pea cute impejti, jicotti itajê cunea pin par. Mã Paro pimprar.
Ne hacpỹa mã hõt ne hipêr ipimtir xà ita te hajỹr. Ipimtir ita kam ri cute põhy cahkô pyxit kam ihte te xet pejti, xwa pejti pupun. Ne hanea ne ihte te xet kêanre, xwa nare, ihkrôkrôcre itajê japôj na hõmpun. Mã ihkêanre itajê te impejti te xet itajê cunea pin par. Mã Paro hacpỹ ma mã ipimprar, ne ihkrã pictor tu ne nee hõt nare, ne ipimtir ita to pit apu mã amji kampa, ne irĩat na ahna apẽ.
Mã cute Ejit jõ pjê jõ xũmre krã kreti te me amji jahkre pejti atajê cunea na hàhwỳr, mã cute me cuprõn. Mã cute me cumã ipimtir itajê jarẽn, mã nee jũm te cumã ipimtir itajê kôt harẽn nare.
Mã cormã pĩxô cacô jõ pahhi te Joje to amji japackre, me hacjên xà kam, ne cute Paro mã, pê Joje ihtỳj me ipimtir kôt harẽn xà ata na harẽ. Mã Paro te me hacjên xà pĩn Joje na hàhwỳr. Mã cute to hama hô mẽn, ne ihkà to hàhpan, ne ma Paro wỳr cator, ne cuna mã xa. Mã Paro Joje mã:
— Wa ipimtir itajê to ipimtir, mã nee jũm te imã ipimtir itajê nõ kôt harẽn nare. Mã cute, ate atỳj me cumã me ipimtir kôt harẽn na, imã me garẽn. Na wa ite ana ijàhwỳr — hane.
Mã Joje cumã:
— Wỳr wa amjia kôt amã harẽ, quêt ijõ Pahhiti, côjkwa kam ihkrĩ ata, quê ha imã apimtir ita kôt harẽ, wa ha cormã amã harẽ — hane. Mã Paro te Joje mã hõt kam ipimtir itajê jarẽn partu.
Mã Joje cumã:
— Pom gõt pijakrut ita, quê ha hũjarẽn to hane. Pom pryti cahãjti impejti itajê me põhyhti impejti itajê pê caku kam ampeaj kam me cumã me hõ ata pyràc. Ne pom pryti cahãjti te xet kôkôtre itajê, me põhyhti te xet kêanre itajê pê ri prãm jõ caku te xet ata pyràac.
— Quê ha caku te xet itajê kam ihtỳj ame hõ kur to ipa. Ne hapu na caku te xet ita kam, quê ha prãm ihkêanre ne. Quê ha caku kam me cumã prãm kêanre xà ata kam, quê ha nee ame mam caku pejti atajê to me amji japackre nare. Cwỳrjapê ca ha Paro, atỳj jũm te amji jahkre pejti ata japê, quê ampo hy catia ne to cuprõ, ne haxwỳr xà kam haxwỳ, por caku jahkre kêatre kam prãm te hajỹr xà atajê caxuw — hane.
Pê Joje pê pahhi, Ejit jõ pjê kam
Joje te Paro japackre xà ata na cumã impejti ne cumã ihkĩn, mã cute to amji kam hapac, ne amji mã:
— Ihhêj ne côjkwa kam Pahpãm te Joje mã, cute amji jahkre pejti jõr. Cwỳrjapê wa ha me cupê ijarkwa kôt pahhi catêjê jõ pahhi na hãm — hajỹr. Ne cute cupê me hõ pahhi xà caxuw cumã hũhhi na hê xà caxàr ne cumã hõr, ne hanea ne cute cumã pahhi kà impejti jõr, mehcunea te cupê Paro mã hàpên catêjê cunea jõ pahhi na, me hahkre pej prãmte. Pê Joje pahhi nõ kra cahãj me, me hikwa tuw. Ne pê cumã ihkra xũmre ajkrut ne ihpỳm, ne me cumã haprỳ to Manaxê me Eprĩ.
Ne ramã Joje na caku te trĩnta. Mã cute Ejit jõ pjê cunea kam, krĩ cunea kôt, ampo hy to cuprõn na me mẽn. Mã ihtỳj ihkôt me amji jacjê. Mã caku te xet ita kam ampeaj kam me cumã hõ cati ne hàhtô ita kam, nee me to ipipẽn nare, ne ahnaa me haxwỳr. Ne Joje te ampo hy to ikre kwỳ jàhtôa to hipu par.
42Pê Canãn jõ pjê kam prãm
Ne pê hanea ne Canãn jõ pjê kam prãm ata cato. Mã Jaco pê Ixaher te caku kam prãmti ata kam, Ejit jõ pjê kam ampo hy me, me hõ jarẽn par. Mã ma Joje kjêjê atajê me ampo hy japrôr to me pra, Ejit jõ pjê wỳr. Mã hapu na ihkjê Pẽnjamĩ ita ikre kam hũm me hàhhuc. Mã Ejit jõ pjê kam mehkjêjê kwỳ cator, ne Joje mã amehcakôc.
Mã Joje te mehkjêjê pupun ne me hahkre pej pyrentu, mã nee cute me Joje pê mehkjê na, me hahkre pej nare. Ne xwỳjê mã pê nee me cumã amji jarẽn nare, na pê cuna mã mehpỳpỳm, cute amji to mehkryjre to prãm to. Mã Joje te mam ipimtir nõ ata to amji japackre. Ne cute mehcukij to:
— Jũ pĩn mã ca me mõ? — hajỹr.
Mã me cumã:
— Canãn jõ pjê pĩn wa me ampo hy kwỳ japrôr to me mõ. Me ikjêjê me, me ipê hũmre pyxit peaj ata kra pit, wa me. Ne ite me tôxi, ne hapu na intuwre ita ri curia ikre kam me ipãm me hàhhuc, ne me inõ pê rỳ pêa mã hamre — hane.
Mã Joje te me cajpẽar prãmte ihhêj ne incryac kam me cumã:
— Me apê me hõmpun catêjê, ca pjê kwỳ to me gàhkĩj prãmte ame hajỹr to me apa — hajỹr. Ne cute me hacjên xà kam me hacjên, mã me ahna amcro incrê. Mã Joje te me cumã harkwa to:
— Wa ite me gahkre pej prãmte, wa ha me acapi, mõrmõ ajkĩ me ahêj xi nare, nare, mõrmõ me ahêj xi. Ca ha me gũrkwa wỳr me ampo hy to me mõ, ne hacpỹ ne ajpên ate me amji jaxàr xà ata kam, ca ha ajpên me atõ intuwre ita japrô. Ne ca ha me anõ pyxit ne ahtwỳ, ne me hacjên xà kam xa, quê ha ahnaa me akwỳ me atõ intuwre ita to me cato — hajỹr. Mã mehnõ ita japrỳ te Ximãw ita curia me hacjên xà kam hàhhuc.
Mã Joje mã hàpên catêjê te ampo hy to me cumã hàhcuprõn partu, ne por ihpore to ampo hy pan me hàmjõr ata, cute hacpỹa mã Joje jarkwa kôt ampo hy cjên xà kam me hir. Mã nee mehkjêjê te me hahkre pej nare. Ne ma me to mõ. Mã me ahna caxwa, mã cute ampo hy kam mehpore mã cator, ne ampeaj kam me cumã amji na pa, mã cute amji mã me harkwa to:
— Jũ na xà na mã Pahpãm te me pahto hajỹr? — hajỹr. Ne me hũrkwa mã me cator, ne cute me hũm pê Ixaher mã mehcunea jarẽn par.
Mã cute harkwa to:
— Ramã nee Joje ipa nare, ne Ximãw nee ita ri apu mõr nare, ca ramã hacpỹ mãa mã Pẽnjamĩ to me amõr prãm cakrô, ca ha nee me to amõr nare — hajỹr.
43Pê hipêr Ejit jõ pjê wỳr me mõ
Mã jũ mã me ahna putwrỳ te mã me cupê, por cute me hõ japrôr ata jamre. Mã Ixaher te mehkra mã:
— Hacpỹ mã me amji jaxà, Ejit jõ pjê wỳr, ne hipêr me ampo hy kwỳ jũhkà — hajỹr.
Mã Juta te hũm mã:
— Ejit jõ pjê jõ pahhi ma ame ikjê intuwre ita to me imõr nare ita na, me ito ihcaca. Jũ wỳr wa me Pẽnjamĩ japrôr nare ne me mõ — hajỹr.
Mã Ixaher te amji kam hapac, ne amji mã harkwa to:
— Jũ wỳr cu ita pê me amji pytà, mẽr pahhi ita mã ate me ampo jõr xà impejti to me mõ, ne hanea ne me Pẽnjamĩ to mõ. Quê ha Pahpãm pahhi ita cuna mã, cumã cute amji kam hapac xà nõ xi, quê ha ihtỳj Ximãw me Pẽnjamĩ to tojnõ, quê ha me amji jaxà — hajỹr. Mã ma hipêr Ejit jõ pjê wỳr me mõ.
Pê Joje hipêr mehkjêjê pupu
Ne ma Joje pê ihtõ wỳr me cator. Mã Joje te mehkôt Pẽnjamĩ pupun, ne cute cumã hũrkwa jamãr catê mã:
— Quê ha me hũmre itajê ita kam ijũrkwa kam me apà, na ca ha me hàpàn xà caxuw me haprô — hajỹr. Mã ma cumã hàpên catê ita te me haprôr ne me to mõ, Joje jũrkwa wỳr. Mã ampeaj kam me cumã amji na pa. Ampo na? He ihtỳj ampo hy cjên xà kam ihpore ata na ame amji na amjĩ na ri. Ne cute me Joje mã hàpên catê mã, por ampo te hajỹr xà ata na, me amji jarẽn.
Mã me cumã:
— Ame pa nare, ne Pahpãm pê me amã ihpore ata gõ, ne ampo hy jõ pore, pê wa ramã cupy — hane. Ne cute Ximãw cator, me hacjên xà pĩn, ne ma Joje jũrkwa kàhti ata wỳr me to mõ. Mã Joje te me ahna amji caxàr, mã cuna mã mehpỳpỳm par, jirô pê mã ri cute ame cumã ampo jõr xà atajê jõr.
Mã cute mehcukij to:
— Xà cormã me apãm ita tĩar? — hajỹr.
Mã me cumã:
— Ỹhỹ, cormã ihtĩar ne impeaj, ne cama ramã ihwejtu — hane.
Mã apu Pẽnjamĩ pupu, ne cute me cumã harkwa to:
— Xà atõ ita pê mã me acahhur? — hajỹr.
Mã me cumã:
— Ỹhỹ — hane. Mã Joje te hapu na mehcahhur pê ihtõ ita mã harkwa to:
— Ikra, quê ha Pahpãm ato impej — hajỹr. Ne ramã me kam incwỳr xàa kam, ne ma põ mã cato.
Ne cute mehkjêjê mã ajkôt pit mã ihkrĩ xà jahkre par. Cute mam ita jỹr, ne hapu na ita jỹr, ne ihcote na ita jỹr, ne hapua na mehcahhur na, Pẽnjamĩ jỹr. Mã mehkjêjê mã hũpaa to hũpa. Ampo na? Jũ mã mã cute ne ajte ajkôt me pỳpỳm xà ata na me hahkre pej, ne me krĩ par? Ne me hirôa pê cute Pẽnjamĩ mã hõ jõr. Mã mehcunea jàpàn.
44Pê Joje hipêr mehkjêjê capi
Mã iràrà na ma ramã me mõr xàa kam, mã Joje te cumã hàpên catê mãn, ne cumã me hàmcjên xà kam ampo hy to hipu partu, ne kam ihpore nõr par. Ne Pẽnjamĩ jàmcjên xà kam, cute aracri cumã Joje kõm xà impejti ata xàr. Mã ma awcahti xà wỳr me to mõ. Mã me ahna ahtũmre mã Joje te mehkôt cumã hàpên catê kujahêc, quê mehcukij, ampo na mã ajte cute me cupê ihkõm xà to hàhkĩj.
Mã ma cumã hàpên catê ata mehkôt tẽ, ne cute me cahuc, ne mehcukij, ne me cumã:
— Ampo na mã ate me ijõ pahhi pê ihkõm xà to gàhkĩj? — hajỹr.
Mã mehkjêjê me cumã:
— Hamreare, wa nee me inõ te to ijàhkĩj nare. Ca hapên prãm ne gapacta ne hapê. Ca ha ate me inõ jõ kàhà kam pahhi kõm xà ita mã acator na, quê ha ty, ne me icahhur, wa ha cama amji to me cumã ijàpên catêjê na — hane. Mã cute hõ pahhi kõm xà japên kam ihtẽm, ne cute Pẽnjamĩ jõ kàhà kam cumã cator. Mã mehcunea amehpec, ne ma hacpỹ mã cute krĩ wỳr me amji jaxàr.
Mã cormã ikrea kam Joje jỹ, mã cute me amji jaxàr ne hỹrmã me cator, ne Joje cuna mã pjê kam mehpỳpỳm. Mã cute harkwa to me cumã:
— He, xà ite ampo itajê cunea na me gahkre pej na, me apê ijahkre kêatre? — hajỹr.
Mã Juta cumã:
— Me ijarkwa jũ to, wa ha amã me icakôc? Pahpãm te ri, por pê wa me ikên to ata jahpan xà na, ame ito kên. Na wa ha cama amji to amã me ijàpên catêjê na — hane.
Mã Joje te me cajpẽar prãmte me cumã:
— Quê! Por hõ kàhà kam ikõm xà nõ ata, quê ha pyxit peaj ne cupê imã hàpên catê, ne me acahhur gapacta ne me acuto, me apãm wỳr — hajỹr.
Mã Juta cumã:
— Me ijõ inxũ ita ramã ihwejtu, ne ramã cumã ihkra kĩnti ata cupê ipictor, ne wa ihkra ita to me cumã imõr nare, quê ha hũjapê to amji cura. Ne ito ca ha haxà jahê, wa ha pa amji to amã ijàpên catê na — hane.
45Pê Joje mehkjêjê mã amji jarẽ
Mã Joje te hũcanãr nare na amji cajpẽr, ne mehkjêjê intête, cute me cuprõn atajê cunea cator, mã mehkjêjê pit jàhhuc. Mã apu amrã ne cute mehkjêjê mã:
— He ipê Joje — hajỹr. Mã Joje cupate mehkjêjê aracri amehcuhhê. Mã hipêr me cumã:
— Ipê Joje, ipê, por pê ca me atõ to ihpore na me ahpa ata wa. Pê Pahpãm mam me acumam ikujate, mãr wa me ato me atyc xà jahpa. Na ca ha me pra, ne me pajõ inxũ mã me ijarẽ — hane. Ne cute Pẽnjamĩ pỳn, ne ihkôt mehkjêjê japỳn par.
Mã Paro te Ixaher pê Joje pãm na harẽn par, ne cute haprôr na mẽn, quê amji wỳr haprô quê cahê na ihkrĩ. Mã Joje te me cumã amji jarẽn jirô pê mã ri, hũm mã cute ampo kĩn xà jõr xà atajê kujahêc.
Pê Ixaher mehkra mea mã Ejit jõ pjê wỳr me antuw
Mã mehkjêjê te me amji jacjên, Canãn jõ pjê wỳr, ne cute me hũm pê Ixaher ata mã Joje tĩar na me harẽn. Ne hanea ne cupê Ejit jõ pjê jõ pahhi na me cumã harẽn. Mã nee hũm te me hũjarẽn xà ita to amji mã hajỹr nare, ne nee ajmãr hũpar nare, ne ihkrã pictor tu. Ne cute Joje te ampo kĩn xà te cawrô jõ kujti to hipu tu na hõmpun, ne hacpỹa mã amji krã kam hapac. Ne cute amji mã harkwa to:
— Xãmte cormã ikra pê Joje tĩar na ipa, na wa ha ityc xwỳjrea na itỳj hõmpu — hajỹr.
46Pê Pahpãm Ixaher to hàhtôa na cumã hũjahkre
Kam To Ihtẽm Xà 46.1-7, 28-33; 47.1-11
Ne ma Ixaher ita hàhcukrêj me, hõ pryti me, mehkra cunea to mõ, ne ma pry cahti ri Pêxerpa jõ krĩ xa ata wỳr me mõ, curi me hõt prãmte, ne me cator. Mã caxwa mã cute ampo pry ita curan, ne cute to Pahpãm kam hapac xà caxuw to caxàr.
Mã caxwa ri Pahpãm te Ixaher mã ihcakôc, ne cumã:
— Ipê gõ Pahhiti, ne ipê apãm Pãm, na ca ha nee apu Ejit jõ pjê wỳr amõr xà ita cupa nare. Ampo na? Wa ha ato gàhtôa to gàhtô, ne jũ caxuw hacpỹa ne Canãn jõ pjê wỳr ajpên me atàmxwỳ tàmxwỳjê to amji jaxà — hajỹr.
Mã me ahna apẽ mã ma me mõ, Ejit jõ pjê wỳr. Ne ramã me hàhtêp, mã Ixaher te amji cumam Juta kujahêc, quê Joje mã ramã hỹrmã hàhtêp to mõr na harẽ. Mã tẽ ne Joje wỳr cator, ne cute cumã hũm jarẽn. Mã Joje jũpar, ne cute hõ cawrô na kujti to hàhcuprõn, ne ma cute hũm cajpar prãmte tẽ. Ne cute ihcajpar, ne me ajpẽn pỳn, ne ame ajpẽn kam me amrãhti, ne cute me ajpẽn kam mencwỳr ita krỹnre nare.
Mã Ixaher pê hũm ata te cumã harkwa to:
— Hamre, wa ha itỳj ato ijapac xà nare kam ty. Ampo na? Wa ite atĩar na akuc pupun, ne hanea ne apeaj na apupun, na wa itỳj ita caxuw ityc to prãm — hajỹr.
Mã Joje te mehkjêjê mã:
— Hã, wa ha ma tẽ, ne Paro mã ramã me acator na me garẽ, ne hanea ne me apê carà cahàcti jamãr catêjê na cumã me garẽ. Quê ha ihtỳj põ ita kam me gàhhuc na me gamã, ca ha kam me ahtwỳ — hajỹr.
Ne ma tẽ ne cator, ne cute Paro mã me harẽn, ne cute mehkjêjê to xĩc ne cumã me hahkre. Jirô pê mã ri Joje te hũm japrôr ne ma Paro wỳr to mõ, mã cute Pahpãm mã Paro cajrẽn to impejti. Mã Paro te Ejit jõ pjê kam me hàhhuc na me cumã harkwa, mã me hàhhuc. Hamre.
47Pê Ejit jõ pjê kam prãm cati cato
Ne caku te xet ita kam hàhhuc, mã hamre, pjê cunea kam ampo cunea tyc par, ne ampeaj kam prãm cati.
Na ri ma Joje wỳr mehcunea me pra, cute me ampo hy japrôr prãmte. Mã hanea ne ampỳa mã amehkrĩ atajê te hajỹar, ne me hapôj. Ne me cupê ihpore jamre par, mã cute me hõ parxa to, ihpore na me hàhpan kam mehtẽm, mãr quê ame to me hõ pê ampo hy japrô. Ne me cupê pryti jamre par, mã ma cute me hõ pjê to, ihpore na me hàhpan kam ihtẽm, ampo hy caxuw.
Pê Joje Paro mã ajco ampo itajê cunea japrôr to ipa. Mã hamre, Paro Ejit jõ pjê cunea to hõ tekjê ne to hõ pjê. Ne Joje pê ri me hõ pahhi catêjê jõ pahhi.