CARATI

CARATI JÕ PJÊ WỲR

Pawrô Jõ Kàhhôc

Ỹhỹ, pê Pawrô pê Jeju jarkwa na memprar catêjê nõ, ne ma Carati jõ pjê kam Jeju na mehkwỳ mehkrĩ atajê mã, pom cu me hõ kàhhôc cahyt ita kujate. Na pê hõ kàhhôc japrỳ ita pê Carati Jõ Pjê Kam Jeju Na Mehkwỳ Jakrã Mehkrĩ Atajê Wỳr, Pawrô Jõ Kàhhôc (Carati).

Ne ihkàhhôc ita kam, cute me cumã ihhêj xi catêjê cawpa to hajỹr he: “Nee hipêr me cute me Juta catêjê te amji kam me hapac xà wej tũm ata kôt me ipa xà nare. Jũ wỳr quê Pahpãm pahte me pajàpên xà impejti ton itajê kôt, me pahna amji capa. Ne jũ wỳr quê me panquêtjê me, jũm caca xà kôt me papa xà ita kôt, Pahpãm me pahna amji capa. Ne Jeju to quêt amji mã me pahhimpej, ne kam me pahhônco, mã cute me pamã pahte amji kam me pajapac xà intuwti jõr xà ita kôt, quê ha Pahpãm me pahna amji capa” hajỹr.

Pawrô te amji kôt harẽn xà

Me Hàpên Xà 16.6; 18.23

^1-2Hàpà me ikwỳ pê Jeju na mehkwỳ, ca Carati jõ pjê kam ame akrĩ atajê. Ipê Pawrô, ne ipê Jeju jarkwa na iprar catê. Ne itea wa ijarkwa hyr, mã ijarkwa kôt cute me amã ihkàhhôc ita ton. Ne Jeju jarkwa na iprar xà ita caxuw nee jũmjê xũmre te me icapi nare, ne nee jũmjê xũmre kôt Pahpãm te icapi nare. Ne quêt Jeju Crixtô me, Hũm pê Pahpãm te hacpỹa mã to ihtĩr ata me ri ajwar ijàpên xà ita caxuw icapi. Ne ita ri Jeju kam ajpẽn to me pahte amji to me pahkjêjê kwỳ, icahê na mehkrĩ itajê te me amã amji jarẽn kujahêc.

³Imã Pahpãm pê me pajõ Inxũ me, me pajõ Pahhiti pê Jeju Crixtô te me ato impejti na me ato prãm. Ne cute me acaprĩ, ne me acaxwãm pê me acaxwỳn kam me amã me acarĩcti, impejti jõr to ipa na, imã me ato prãm. ⁴He Pahpãm mã me pahcunea pê mehkên ton catêjê, cwỳrjapê ri ihtỳj me pahkên mã me paxàr xà. Ne pê Jeju ihtyc mã amji gõ. Cute me pahkên mã me paxàr xà ata pê me pahto cator xà caxuw cumã amji gõ, mã me pancwỳrjapê ihtyc. Mãr quê pjê kam, cute me amji kam hapac xà kên ita pê me pahto cato. Hõ, ita na pê me Pahpãm pê me pajõ Inxũ Cati ihkra pê Jeju Crixtô to prãm. ⁵Cwỳrjapê ri imã amcro cunea kam me pahte Pahpãm mã me:

— Mehcunea jirôa pê quêt acatihti, ne apejti rohnỳtti mã — hajỹr to prãm. Ampeaj kam!

Cu ha cute me pamã ihhêj catêjê par nare

Roman 16.17; Coroxo 2.8; 2 Petrô 2.1-3

⁶Pỳhàpà! Mã ajte xãmte ramã me ate, pê Jeju hàhcaprĩa kam amji kôt Pahpãm wỳr pry ata kôt me ana ahwỳ, ca ihkôt me amõr cahtiri, ramã ate me cumã hikran! Pê Pahpãm Jeju te amji kam hapac xà na ihkôt me amõr prãmte me ana ahwỳ, ca ihkôt me amõr cahtiri ihhêj ne ramã ate me cumã hikran! Ne ajte ita caxuw Pahpãm wỳr ajteare mã, me amã jũm te amji kam hapac xà nõ ita kôt ame apa. ⁷He xà ajkĩ ampeaj kam me Pahpãm wỳr pry jàhtô? Hãpà! He Jeju te amji kam hapac xà ita pê ri pry pyxit peaj ata, Pahpãm wỳr. Wa ite curi jũmjê itajê te Jeju te amji kam hapac xà tête ame girên to me ipa na me garẽn par. Ne cute me amã ampo to hahkre xà atajê kôt ri, me akrã cunĩ pit. Ne ihtỳj Jeju te amji kam hapac xà pejti ata to me amã ihhêj to me ipa. ⁸He imã jũm te Jeju ràn xà na ajteare mã me amã ampo kên to hahkre catê atajê to, Pahpãm te Xatanaj jõ cuhy catia ata kam, mehkên mã me mẽn rohnỳtti mã na, me to prãm. Wa ha me ite mãn Jeju ràn xà na ajteare mã me amã ampo to hahkre na, wa ha itỳj Pahpãm te me ito kên na, imã amji to prãm. Ne quê côjkwa pĩn Pahpãm mã memprar catê nõ wrỳ, ne Jeju ràn xà na, ajteare mã, me amã ampo to hahkre na, quê ha ihtỳj imã Pahpãm te cuhy catia ata kam ihkên mã mẽn na, imã to prãm.

⁹He pê wa mam me amã ampo to hahkre, pê ca ahna me amji capa ata ràn xà na, xà wa ha ajkĩ hipêr ajteare mã ihkaj na me amã ampo to hahkre? Hãpà, wa ha hipêr me amã ite to hahkre xà atajê to pit mã hahkre. Ne quê ihhêaj to jũm ita, Jeju ràn xà na, ajteare mã me amã ampo to hahkre ata ri, imã Pahpãm te cuhy catia kam ihkên mã mẽn rohnỳtti mã na, imã me to prãm.

¹⁰Ne por ame amã ihhêj to ipa, ca kam me akrã cunĩhti atajê ri, ito me amã ihhêj to hane he:

— Por Pawrô me amã ampo to hahkre atajê kôt hamreare. Ne ate mehkĩn prãmte ri ame amã ihcakôc to ipa — hane. Wa nee me ate me ikĩn prãmte ame amã icakôc nare, ne quêt Pahpãm te ikĩn prãmte, wa ame amã icakôc. Wa pjê ita kam ite amji to mehcajpuaw prãm na mã, wa ha nee cumã ijàpên xà, pê Jeju mã iprar catê ita, mã ixàr nare.

Pê Jejua harkwa na imprar catê na Pawrô xãm

Me Hàpên Xà 26.9-20

^11-12He por atajê te hanea ne, pom ite me amã ampo to hahkre xà itajê, nee Pahpãm pĩn cator nare na me harẽ. Cwỳrjapê Jeju kam me ikjêjê, wa ha ita cunea na me amã amji jarẽn to capô partu ne. He wa nee ite ikrãa kam ita to amji kam ijapac, ne ame amã harẽn nare. He nee jũm xũmre te me caxuw imã hõr nare, ne nee jũmjê te me caxuw imã ita to hahkre nare. Ne Jeju Crixtô te ri imã itajê cunea jahkre pej na iton, ne imã ipẽr.

¹³He pê ca ramã me ijarẽn pa, pê wa ajco mam Juta catêjê te amji kam hapac xà kôt ipa xà ata kam, pê wa ajco Pahpãm na mehkwỳ jahkre kêt kam, ijàprêa kam ipa. Ne cute me amji pupun xà kêanre na me ton to ipa. Ne ajco ite me to hamre prãmte ihcunea na me ton to ipa. ¹⁴Ne pê wa amcro atajê kam, ajco me ikwỳ pê Juta catêjê te amji kam hapac xà kam, me ikwỳ pê ajkam me icati jirôa pê catyt kam, me iquêt xwỳ pê Mojxe te me hapackre xà kôt ipa. Ne pê wa ajco me iquêtjê caca xàa kôt, caxwãm catia mã, catyt kam ipa na ajco amji to ahcukij.

¹⁵He pê wa cormã ipỳm nare kam, pê ramã Pahpãm hàhcaprĩa kam amjia kôt amji mã icapi, ne ina ahwỳ, cumã ijàpên prãmte. ¹⁶Wa ite mehcahkrit pê, por me cupê Juta catêjê nare atajê mã, Jeju jarẽn, ne ipẽr prãmte, pê Pahpãm imã ikra jahkre ne imã cupẽ. Ata caxuw pê wa nee jũm xũmre wỳr ipicahur nare, cute imã Jeju te amji kam hapac xà to hapackre prãmte. ¹⁷Pê wa nee hanea ne Krĩpinkrên wỳr itẽm, ne mam, icumam me cupê Jeju jarkwa na memprar catêjê atajê nõ cukij nare, cute imã Jeju te amji kam hapac xà to hahkre prãmte. Ne ma cama Põcaprỳhti jõ põti kam me hamreare ata wỳr itẽm pyrentu. Pê curia Jeju imã cute amji kam hapac xà to hahkre, jirô pê mã wa ma, Tamatcô jõ krĩ wỳr ite amji jaxàr.

¹⁸Ne pê wa Krĩpinkrên wỳr itẽm nare to amji to caku to incrê, jirô pê, pê wa cormã Petrô pupun. Ne cumã icakôc prãmte Krĩpinkrên wỳr tẽ, ne icato, ne curia cahê na amji to putwrỳ jĩkjê to hamre. ¹⁹Pê wa nee Jeju jarkwa na memprar catêjê nõ pupun nare, ne ite Tijac pê Jeju tõ te amji to hapu na kjê ata me, Petrô pit pupun. ²⁰He ampeaj kam wa Pahpãm kam mare mã, me amã awjarẽ, pom wa ampo cunea to awjarẽ itajê, nee mã ihêj xi nare, ne ampeaj kam pê Jeju imã to hahkre. ²¹Pê wa Petrô pupun jirô pê, ma Xiri jõ pjê me, Xirixij jõ pjê kam amehkrĩ atajê kwỳ kôt apu mõ.

Pê Jeju Pawrô te amji kam hapac xà cunea to antuw

²²Ne pê amcro atajê kam, nee Juta jõ pjê kam Jeju Crixtô na mehkwỳ atajê me ijahkre pej, ne mento jĩa to me ipupun nare. ²³Ne pê cama ajco me cumã me ijarẽn to hane he:

— Por pê Pawrô ajco Jeju to amji mã me pahhimpej tête me pahcahpêrkà ata ri, ita caxuw ihtỳj mehcunea mã, cute amji mã Jeju to mehhimpej na me ton to ipa — hajỹr na cute me ijarẽn par. ²⁴Ne cute me ijarẽn par xà ita kôt ri, ihtỳj Pahpãm to amji mã me hàmnãn to me ipa.

Pê mam Jeju jarkwa na memprar catêjê atajê Pawrô pejti na harẽ

Me Hàpên Xà 15.1-11

^1-2Ne ina caku te cwatôxi jirô pê mã, Pahpãm te hacpỹa mã Krĩpinkrên wỳr itẽm to imã hũjarẽn, wa ite impar, ne ma amji jaxàr. Ne ma amji kôt Parnap me Tito pê Crec catêjê nõ ata me, me pra, ne curi me icator. Ne ite Jeju na mehkwỳ jõ pahhi catêjê pit me, me cuprõn, wa ite me cumã mehcahkrit pê Juta catêjê nare atajê, mã Jeju jarẽn xà atajê cunea na, amji jarẽn. Ne ampo na wa ite cumã catyt kam amji jarẽn to hajỹr? Ihtỳj ame ite amji kam ijapac xà ita kôt hamreare na mehcãmjĩ cupate, wa ite me cumã harẽn par. ^3-5Mã cute me, ite me cumã harẽn xà ita na me ipar, ne ahna me cumã impejti. Mã ikôt mehkwỳ cator atajê te me cupê Jeju na mehkwỳa na me cumã amji jarẽn. Ne hamreare, imãa cama ame cumã mehhêj. Ne ampo na ri curi me cator? He cama cute ame ikôpĩr prãmte, mõrmõ wa ajkĩ Juta catêjê te amji kam me hapac xà me, Mojxe xwỳ te me hapackre xàa kôt, ajkĩ me mõ. Mã cute ahna me ipupun prãmte, curi me cator. Ne cute me ikôt mõr catê pê Tito pupun, mã nee cupê Juta catêjê nõ nare, na pê nee me ipê Juta catêjê caca xà kôt amji mã impy kà kwỳ jakep nare. Cwỳrjapê ri me imã:

— Ampo na mã ca me pancaca xà to pahte me amji pyràc xà kôt, nee ate me Tito mã impy kà kwỳ jakep nare? Me imãa, me cupê Jeju na mehkwỳ cunea te hanea ne ihtỳj me panquêtjê te amji kam hapac xà to, cute me amji pyràc xà atajê cunea kôt me ipa xà — hajỹr. Wa nee ite me kam ijapac nare, ne cama, ma ame amji pê cute amji kam me hapac xà ita cunea curê. Ampo na? He wa nee me iquêtjê caca xà itajê me, Jeju te amji kam hapac xà impejti ita to me ipicacwỳr prãm nare. Ampo na? He Pahpãm te amji kam hapac xà impejti ita kôt ri, me apa na imã me ato prãm. Xà Jeju na mehkwỳ jõ pahhi catêjê atajê te ajkĩ Tito mã impy kà kwỳ jakep na, me imã hũjahkre? Hãpà! Nee cute ahna me imã hũjahkre nare!

⁶Mã Tijac me, Petrô me, Jowãw pê Jeju na mehkwỳ jõ pahhi catêjê na cute me imã harẽn atajê te nee, ite ampo to ihcupan xà nõ mã cator nare. Na ri nee cute me, ite amji kam ijapac xà ita jirô pê, me imã ampo jarẽn, ne to mehhimpej nare. Ne me cupê Jeju na mehkwỳ mã ihtỳj amji mã me hũmre itajê cupa to me ipa, ne me ajpẽn mã:

— Pê me hũmre itajê mento jĩa to me Jeju pupu, cwỳrjapê ri me hũmre cunea jirô pê me cati — hajỹr. Wa nee ampo ita to amji kam ijapac prãm nare. Ampo na? He Pahpãm mã me pahcunea jahkre pej pejtu, ne cumã me pahcunea pipẽn pit. ⁷Ne me cupê pahhi catêjê atajê mã ijahkre pej, Pahpãm te ite mehcahkrit mã, Jeju te amji kam hapac xà jarẽn catê na, cute ixãm na me ijahkre pej, ahnaa mã cute Petrô, pê me cupê Juta catêjê mã Jeju kôt harẽn catê na hãm he.

⁸Pê Pahpãm mehcahkrit mã, ite Jeju jarẽn xà caxuw, imã ikrã kre te amji jahkre pej xà gõ. Ne hanea ne me cupê Juta catêjê mã Petrô te Jeju jarẽn xà caxuw cumã ihkrã kre te amji jahkre pej xà gõ. ⁹Ne wa ite Jeju na mehkwỳ jamãr catêjê atajê me, Pahpãm te me imã ijàpên xà jõr ata na me ajpẽn par pej jirô pê mã ri, cute ahna Parnap me ijahkre pej, ne mehkwỳ kam mare mã, cute me imã:

— He cu me pahcunea Pahpãm mã hàpên xà pyxit peaj ita to pit mã me apê. Ne me atekjê pê, mehcahkrit jõ pjê kam me ipa atajê mã, ate me Jeju jarẽn xà. Ne me pa, wa ha me cupê Juta catêjê jõ pjê kam ame ipa atajê mã Jeju jarẽ. ¹⁰Ne cormã ampo ata pyxit peaj ri, ate ton xà. Nee mã ampo nare, he ita ri Krĩpinkrên kam Jeju na mehkwỳ pê, me pahkwỳ kwỳ mehkrĩ itajê pê ampo hamreare, na ca ha ihmat ri pjê nõa kam, me pahkwỳ mehkrĩ atajê mã me harẽ, mãr quê me harẽn pa, ne ajpên me cumã ampo kujate — hajỹr. Wa ite me kam ijapac, ne me cumã:

— Imã ri quêt ita ton to prãam to prãm rohnỳtti mã — hane. Ne ite me ajpẽn par jirô pê mã, wa ma hacpỹ mã Antijoc jõ krĩ wỳr me pra.

Pê Pawrô Petrô te to ihcupan xà jarẽ

Roman 3.21-23; 6.1-14

^11-12Ne jũ mã me ina amcro te, mã ma Petrô Antijoc jõ krĩ kam me iwỳr tẽ, ne curi cute to ihcupan to hajỹr he. Pê ajco Petrô Antijoc jõ krĩ kam, mehcahkrit pê Jeju na mehkwỳ cahê na ihkrĩ, ne ajco apà, me cupê Juta catêjê te amji kam hapac xà kaj na. Ne Pahpãm mã, nee ita na ihkaj na nare. Ampo na? He Pahpãm mã me pahcunea pipẽn pit. Mã Tijac cormã Krĩpinkrên kam ihkrĩ, ne cute Petrô wỳr jũmjê itajê kujahêc, cute me hõmpun prãmte. Mã curi me cator, mã Petrô te me hõmpun, ne taa amji mã:

— Wa ha mehcahkrit itajê cahê na ijàpàn kam to icrà, quê ha me hũmre itajê me ipupu, ne me amji jaxà, ne me ijarẽ, quê ha ahna me kam ipahàm — hajỹr. Na ri cute mehcahkrit atajê cahê na hàpàn jicu, ne me cupê ampỳa mã hỹr, ne ahte jỹ ne apà. ¹³Mã hanea ne Antijoc catêjê kwỳ pê Jeju na mehkwỳ pê Juta catêjê te me hajỹar, ne cute me amji to caprãr, ne Petrô kôat, nee hipêr Jeju kam ajpẽn to mehkjêjê, ne mehcahkrit atajê cahê na ame hàpàn nare. Mã hanea ne Parnap te hajỹar, ne cute amji kam me hapac xà kên ata kôt, mehcahkrit atajê mã hikran.

¹⁴Wa ite, cute me Pahpãm jõ pry pejti ata cupan na, me hõmpun pyrentu, ne me kam mare mã, Petrô kuc ri, cute to ihcupan ita tête cumãn to:

— Pỳhàpà! He apê Juta catêjê nõa cakrô, ca nee ajte catyt kam ihcunea na Juta catêjê caca xà kôt apa nare! Mẽr ampo na mã ca Juta catêjê caca xà kôt mehcahkrit itajê ton to me apa to prãm? Nee ate me hajỹr xà hamreare! — hajỹr.

Pê Pawrô Juta catêjê mã ahna ihkôt harẽ

¹⁵Ne curi me cupê Juta catêjê pê Jeju na mehkwỳ, me jỹ atajê mã, ite ihcunea na ihkôt harẽn to hajỹr he:

— He me pahpỳpỳm xà kôt ri, me papê Juta catêjê impeaj, ne nee me papê ampo kra cahkrit pê Pahpãm te to ihhimpej xà jahkre kêatre atajê kwỳ pyràc nare. ^16-17He me pamã Pahpãm te, nee Mojxe xwỳ te me hapackre xà kôt me ipa atajê na, cute amji caxàr nare na, me hahkre pej. Ne quêt Jeju Crixtô to amji mã mehhimpej xà ata kôt ri, Pahpãm me ahna amji to pôj. He me papê Juta catêjê me, mehcahkrit atajê me, me Pahpãm mã me pahcunea pê, me to ihcupan catêjê. Nãmri quê ha mehcahkrit atajê te amji mã Jeju to ihhimpej na, quê ha Pahpãm mã jũmjê atajê impejti ita na. Ne me papê Juta catêjê te me hajỹar. Na cu ha hapac xàa kôt, me ajpẽn to me papicokjêr jicu, ne me Pahpãm te amji kam hapac xà pejti ita kôt pit mã me papa. Quê ha jũm ahna me pahpupu, ne me pamã: “Pỳhàpà, me imãa, ca ihhêj ne ate me Jeju Crixtô te amji kam hapac xà ita cryc, me papê Juta catêjê te amji kam hapac xà jicu, ne ate me hũnãr, ne hamre ate me to ihcupan. Cwỳrjapê ri Jeju Crixtô te, me ate me to kên na me aton” hajỹr. Me ikjêjê, he mehcakôc xà ita kêanre. Xà quê ha pijamã Jeju Hũm pê Pahpãm te amji kam hapac xà kaj na, me pamã ampo kên to hahkre? Hãpà! ¹⁸Ita ri, imãa ihcupan he. Ca ha me pancaca xà kôt hamreare ata mã me hikra, ne impej wỳr me apkjê, ne ana ahtũm, ca ha hacpỹa mã, mam me acaca xà kôt hamreare ata wỳr me apkjê, ita na ri ihkaj na.

Cu ha nee jũ caxuw Jeju te amji kam hapac xà pejti jicu nare

^19-20— Jũ wỳr cu ha me pahnõ Mojxe xwỳ jõ kàhhôc kam, menquêtjê japackre xà cunea kôt, catyt kam me papa. Cwỳrjapê ri Pahpãm mã me pahcunea kêanre, ne ihhêj ne me papê jũmjê te ihkên ton jahpan xà na ihtyc to prãm atajê pyràac. Cu ha ihcunea na catyt kam me papa na mã, quê ha nee me pancwỳrjapê Jeju ihtyc prãm nare. Na pê Jeju amjia kôt me pancwỳrjapê ihtyc mã amji gõ ne ty, na cu ha pahtỳj ihtyc xà ata kôt amji mã to me pahhimpej. Ne amji mã ihtyc xà ata to me pahhimpej xà ata pê ihhêj rũm cahê na me pahtyc. Cwỳrjapê cu ha nee hipêr, pahte amji to mehcajpuw prãm to ame papa nare. Na pê Pahpãm kra mã me pahkĩn, pê me pancwỳrjapê ty, ne cute me pamã amji jõr, ne me pahcaxwãm pê ihkrĩ, ne catyt kam ihkôt me papa xà caxuw, cute me pamã carôt jõr. ²¹Ita kam, xà wa ha ajkĩ Jeju te amji kam hapac xà jicu, ne hacpỹa mã me iquêtjê te amji kam hapac xà wỳr apkjê ne hũnã? Hãpà! Wỳr wa ha hicu!

— Pê Pahpãm Mojxe xwỳ mã hõ kàhhôc kam Juta catêjê mã, cute me hapackre xà gõ ata, nee Pahpãm te ihkôt me pahna amji caxàr xà caxuw impej nare. Quê ha caxuw impej na mã, quê ha nee Jeju ihtyc prãm nare. Ne ampo caxuw ri impej? He cute me pahkên na me pajarẽn, cu pahte me hahkre pej, ne Jeju wỳr me papipkjêr xà caxuw ri impej. Ne Jeju pê Pahpãm kra ata kôt ri, me pahna amji to pôj — hane. Hõ, pê wa me cumã harẽn to hane.

Quê ha Pahpãm nee me pajàpên xà impejti kôt me pahna amji to pôj nare

Carati 5.16-23; Tito 3.4-7

¹Pỳhàpà, ca Carati jõ pjê kam me akrĩ itajê, ca ihhêj ne ame ato kam waj. Ampo na? He ihhêj ne me apê amji jahkre kêatre. He ihhêj ne jũm te me ato hy. Mãr pê wa hirãa pê me amã:

— Me pancwỳrjapêa ri pĩ kam Jeju tyc — hane na harẽ ta? Nõ na mã ca, Pahpãm te me ana amji caxàr prãmte hacpỹa mã menquêtjê caca xà wỳr ate me amji jaxàr? ²Xà pê ca Mojxe xwỳ caca xà kôt me apa xà ata kam, xà pê hõtpê ajco Pahpãm Carõ Pejti me amã amji gõ? Hãpà, nee pê me amã amji jõr nare. Ne quêt me ate amji mã, Jeju jarẽn par ita kam, amji mã me to hajỹr, ne amji mã me to ahimpej xà kôt ri, Pahpãm Carõ Pejti te me amã amji jõr.

³Pỳhàpà, ihhêj ne me apê mehkrã nare catêjê pyràc. He pê ca Jeju to amji mã me ahimpej kam me to atẽm xà ata kam, pê Pahpãm me amã amji Carõ Pejti gõ, mãr ca, carôat kôt, ihkôt me apa. Hõ, pê ca amji mã me to ahimpej kam to atẽm to hane. Nõ na mã ca ita caxuw ihhêj ne Mojxe xwỳ caca xà wejti ata kôt, ate me to ihkrã curan to prãm to mã, ca hỹrmã me apipkjêr? Ne me carôat kôt mehkôt ame apa prãm. ⁴He xà ajkĩ ihcaprỳ na Pahpãm Carõ Pejti te ramã me ate amji kam me gapac xà tuw pejti ato ipijapar to iryti to hajỹr? Hãpà, imã nee cute ahna hajỹr nare! ⁵Pê Pahpãm amji Carõ Pejti kôt, ihcunea na, me amã ate amji jahkre pejti gõ. Ne cute me akam hàpên xà catia ton atajê to, cute amji carôt to ipipẽ, mãr quê mehcunea me hõmpu, ne me akwỳ kam carôt ata jahkre pej. He xà ca ajkĩ, Mojxe caca xà wejti kam, ate me atẽm xà ata kôt mã, ame ato hane? Hãpà! Ne mẽr ampo na mã cute me ato hajỹr? Nee mã ampo na nare, he me ate me Jeju jarẽn par xà ata to amji mã me ahimpej na ri, cute me ato hajỹr.

Pê Aprãw Pahpãm to amji mã ihhimpej, na pê ahna amji capa

Roman 4.1-25

⁶Ca me iquêtxwỳ pê Aprãw to me amji japackre! He xà pê ajkĩ catyt kam ipa, ne nee jũ caxuw ampo kên ton nare cwỳrjapê pê Pahpãm ahna amji capa? Hãpà. He pê Pahpãm Aprãw mã:

— Ate amji mã ito ahimpej, cwỳrjapê ri imã apê catyt kam apa catê — hane. ⁷Cwỳrjapê ri mehcunea amji mã me Pahpãm to ihhimpej atajê pê Aprãw tàmxwỳa pyràc.

⁸Pê rỳ pêa mã Pahpãm amji mã:

— Wa ha itỳj jũ caxuw pjê kam mehcahkrit mehkrĩ atajê te amji mã ito mehhimpej xà ata kôt, me ahna amji capa — hane. Cwỳrjapê pê Aprãw xwỳ mã:

— Acwỳrjapê wa ha pjê cunea kam mehkrĩ atajê cunea to impejti ne — hane. ⁹Mã Aprãw te Pahpãm to amji mã hajỹr, cwỳrjapê ri cute ahna amji caxàr ne to impejti. Cwỳrjapê quê ha Aprãw cuxà mehcunea te Pahpãm to amji mã hajỹr na, quê ha ihtỳj Pahpãm me ahna amji to pôj, ne me to impejti ne.

Jũ wỳr cu me panquêtjê caca xà kôt me papa kôt Pahpãm cajpuaw

¹⁰Quê ha me pahnõ amji mã:

— Wa ha Mojxe xwỳ te me hapackre xà cunea na ihkôt amji kampa, quê ha Pahpãm ihtỳj ina amji capa — hajỹr na, quê ha taa, amji curê capa. Ampo na? He jũ wỳr cu me pahnõ Mojxe te me hapackre xà cunea kôt hakop, ne nee ihnõ to gapac kêt nare. He pê ramã Pahpãm hõ kàhhôc kam amji mã Mojxe caca xà kôt me ipa catêjê crôn to hane he:

“Quê ha jũm te, amcro cunea kam ite Mojxe mã ijarkwa jirên mã cute ahna ihhôc ata kam hapac nare na,

wa ha itỳj apu kam icryc, ne apu cucrô. Quê ha cama pyxit peaj ne to hapac kêt cakrô,

wa ha itỳj hahpan xà na apu to kên” hane.

¹¹Pê ramã rỳ pêa mã Pahpãm jarkwa to ihcakôc catê japrỳ te Hapakuc ita Pahpãm jarkwa kôt hõ kàhhôc kam, ita na ihhôc to hane he:

“Quê ha jũm ito amji mã ihhimpej na,

wa ha to amji kam ijapac to,

cupê jũ caxuw jũm te icuna mã ampo kên ton nare catê ata rohnỳtti mã.

Na wa ha itỳj ahna amji capa,

quê ha icahê na icarôt kôt ihtĩar na ipa rohnỳtti mã” hane.

Ne cute harẽn xà ita kôt, cu ramã pahte me amji jahkre pej. He jũ wỳr quê ha Pahpãm pahte Mojxe xwỳ te me hapackre xà kôt me papa xà ita kôt, me pahna amji capa. ¹²He Mojxe te me pajapackre xà ata, nee me pahte Pahpãm to pahte amji mã me pahhimpej na me pahton nare, ne ajte me pajàpên xà na, pahte amji to me hajỹr na pit mã me pahto. Ampo na? Pê ramã Mojxe ampo itajê na Pahpãm te cumã amji jarẽn xà na, hõ kàhhôc kam ahna ihhôc to hane he:

“Quê ha jũm te ite me cumã ijarkwa jirên xà itajê cunea to amji kam hapac to ipa,

ne nee jũ caxuw ihnõ to hapac kêt nare na,

wa ha itỳj ahna amji capa,

quê ha icahê na ihkrĩ rohnỳtti mã” hane.

¹³Nãmri quê ha me pahnõ te Mojxe te me hapackre xà ita jirô pê ihpỳm na, quê ha taa amji curê capa, quê ha Pahpãm ihkên mã cumẽ. Ne jũ wỳr cu me pahnõ Mojxe te me hapackre xà atajê cunea kôt me papa. Cwỳrjapê cu ha me pahcunea Pahpãm mã me amji curê capa. Na ri Jeju te ita na me pajahkre pej, ne me pajaxà kam pĩ kam ihtyc. Ne ihtyc xà ata te ri me pahcurê pê me pahcaxàr. Ne Pahpãm jõ kàhhôc kam, ramã cute ita na harẽn to hajỹr he:

“Ne por quê ha jũm pĩ kam ajêt ne ty,

ata to, pê Pahpãm ramã amji mã incrôn hiahpuro,

ne toa cute curê mã mẽn” hane.

¹⁴Ne mẽr ampo na pê Jeju pĩ kam ty? He nee mã ampo na nare, por pê Pahpãm Aprãw mã ampo catia to awjahkre ata, quê ha Jeju Crixtô tyc xà ata kôt, hanea ne me apê mehcahkrit mã hõr xà. Mãr cu, me pahcunea, Pahpãm te me pamã Carõ Pejti to hũjahkre ata cwa. Ne Jeju Crixtô to pahte amji mã me pahhimpej cwỳrjapê, quê ha me pamã cugõ.

Pê Pahpãm ampo to hũjahkre ata, ampo cunea jirôa pê irohnỳtti mã

Roman 3.19-20; 5.20-21; 11.32

¹⁵Jeju kam me ikjêjê, wa ha hirãa pê me amã ampo ita kôt harẽ, mãr ca me kam gapac to impeaj ne. Cu ha me pahnõ ajkrut ne ampo na ajpẽn pa, ne to amji mã awjahkre, ne ahna amji xãm jirô pê, quê ha nee jũm hipêr ampo ata to ipicamẽn ne to ipintuw nare. ¹⁶Pê Pahpãm Aprãw xwỳ mã ihtàmxwỳ to awjahkre. Ne pê Pahpãm hõ kàhhôc kam, nee ita to hũjarẽn to: “Mehtàmxwỳ” hajỹr nare, pê nee me hàhtôa to hũjahkre nare, ne quêt Pahpãm hõ kàhhôc kam ita jarẽn to: “Ihtàmxwỳ” hane. Ampo na? He Aprãw xwỳ tàmxwỳ pyxit peaj pê Jeju Crixtô ata to, pê awjahkre. Ne me papê Jeju kam pahte me ajpẽn hônco catêjê mã ri, hanea ne cute to hũjahkre xà ata. ¹⁷Ne ampo na mã wa ame amã ijũjarẽn to hane? Nee mã ampo na nare! Pê Pahpãm rỳ pêa mã Aprãw me, ihtàmxwỳ mã, ampo catia to awjahkre ata na, ramã caku jàhtô te cwatxẽnta ne ihkôt cute trĩnta jirô pê, pê Pahpãm Mojxe mã ajteare mã cute amji kam hapac xà gõ. Ne curmã Mojxe te me hapackre xà tuwti ita, quê nee rỳ pêa mã Pahpãm te Aprãw me amji ton na, me ajpẽn par xà ata to hamre nare.

¹⁸He me amã ihhêj catêjê atajê ri me amã ihhêj to hane he:

— Cu ha nee Mojxe xwỳ caca xà ata kôt me papa nare na, quê ha nee Pahpãm me pamã cute ampo to hũjahkre xà ata jõr nare — hane. Ne cute harẽn xà ata hêj xia to hêj xi. Ampo na? Quê ha ita pê ampeaj kam mã, quê ha ihtỳj Mojxe te me hapackre xà ita, Pahpãm te amji kam hapac xà to, cute me pamã hũjahkre xà ita to hamre. Ne nee ita te hajỹr nare, ne cute Aprãw xwỳ mã to hũjahkre xà ata kôt, amjia kôt to impejti.

Pê Mojxe jõ kàhhôc ita, pahte me to ihcupan xà to me pamã ajpẽ

^19-20Pê Pahpãm Aprãw me pit mã ajpẽn pa. Ne nee pê Pahpãm hỹrmã jũm kujahêc, pê cumã hũjarẽn nare. Pê Pahpãm Aprãw kuc ri cumã awjarẽ, ne cume ajpẽn pa. Ne Mojxe nare, pê nee Pahpãm to hajỹr nare. Pê côjkwa kam cumã memprar catêjê mã, cute amji kam hapac xà ita gõ, pê ma Mojxe mã cugõ, pê ma Mojxe to me cupê Juta catêjê japackre. Ca ihhêaj to me anõ amji mã:

— Ampo caxuw mã Mojxe te me pajapackre xà ita pej? — hane. Ỹhỹ, wa ha me amã harẽ. He mehcunea te Pahpãm te amji kam hapac xà jirô pê mehpỳpỳm na, cute me hahkre pej xà caxuw ri, cute me hapackre xà ita. Ne cute me hapackre xà ata to me amji japackre ita na, mã ahnaa Aprãw tàmxwỳ pê Jeju Crixtô ata cator. Ne nee cute me Mojxe te me hapackre xà ata to pit mã, cute hipêr me amji kam hapac xà nare.

Mojxe caca xà ita nee Pahpãm cahê na me papa na me pahton nare

²¹Ca ihhêaj to me anõ ita kampa, ne amji mã:

— Pỳhàpà, he ihhêj ne Mojxe te me hapackre xà ita, Pahpãm te Aprãw me ajpẽn par xà ata kaj na — hane. Co he! Nee ca amji mã harẽn to hajỹr nare. Ampo na? He Mojxe te me hapackre xà ita hõtpê impej cakrô, quê nee Pahpãm cahê na me pahtĩr rohnỳtti mã na me pahton nare. Quê ha cute mãn me Pahpãm te me pahna amji caxàr na ton na, cu ha nee hipêr ihnõ na mehprãm nare. ²²He ramã Pahpãm te, me pahcunea te hõ kàhhôc kam pjê cunea kam, me pahcunea te me harkwa jirô pê me pahpỳm na, me pajarẽn. Ne me pahte amji kam me pajapac xà kêanre itajê pê ihhêj rũm me pajõ pahhi, mã me pahcunea to ihhimpej. Ne ma me pahte ampo pej ton tête me pajiprõ. Ne cute me pajiprõn xà ita pê ihhêj rũm cute me pahcajpre. Ne ampo kên ton na ri ihtỳj me pajamã. Cu ha quêt Jeju Crixtô to amji mã me pahhimpej, quê ha me pamã me pahcajpre ata pô, cu ha pahtỳj Pahpãm te me pamã ampo pejti to hũjahkre ata cwa.

Pê Mojxe te me pajapackre xà ita ri, Jeju cator jikaj xà me pajamã

Roman 10.4

²³Ne mam Mojxe te me hapackre xà ata pê ihhêj rũm krãhtarea, ne ma cute ampo kên ton tête me hiprõn to hãm ita kam, mã ahnaa Jeju cator, mã cute hũhkra mã me haxàr, mãr quê Jeju to amji mã mehhimpej. ²⁴Ne pê ihhêj ne me cupê me ahkrarea, na pê Mojxe te me hapackre xà ata, cute me ampo kên ton tête, ma mehcahpêrkàr to ipa ita na, mã ahnaa Jeju cator. Mã cute to amji mã mehhimpej, mã Hũm pê Pahpãm te me ahna amji caxàr. ²⁵Ne hamre, cu ramã Jeju to amji mã me pahhimpej ita kam, quê nee Mojxe te me hapackre xà ata me pahto ihhimpej nare.

He Jeju kam pahte me ajpẽn hônco, na ri me papê Pahpãm kra

²⁶Ca Jeju Crixtô to me ate amji mã me ahimpej, ne kam me ajpẽn hônco, na ri Pahpãm te me acunea to amji kra. ²⁷Ne me pahcunea te cô to me amji cumrãr, me Jeju kam pahte me ajpẽn hônco atajê pê ramã hũràac, ne cuxà cute amji kam hapac xàa kôt me papa. ²⁸He Jeju kam ate me ajpẽn hônco ita kam, ajpẽn kam me pahpyxit peaj. Cwỳrjapê ri Pahpãm mã, me ipê Juta catêjê me, me apê mehcahkrit me, me pahcunea pipẽan. Ne me hõ pahhi catêjê jarkwa kôt cama me hàpên catêjê me, amjia kôt me hàpên catêjê me, me apipẽan. Ne hanea ne me hũmre me, pyjê me, me apipẽan, ne nee jũm pê ajteare mã nare. ²⁹He me apê Jeju tekjê ita kam ri, Jeju kôt me acunea pê Aprãw tàmxwỳa. Cwỳrjapê ca atỳj, por pê Pahpãm Aprãw mã ampo to awjahkre ata, ca ha atỳj me acwa.

Mojxe te me hapackre xà nee hipêr me pahto ihhimpej nare

Roman 8.14-17

^1-2Ita caxuw, wa ha hipêr me amã ite ihkôt harẽn xà ata kôt harẽ. Xà quê ajkĩ jũm, ihkra incrire, ne nee cormã mehcapõn catê himpej xà kam ihkà nare, ne cormã amji jahkre kêatre ata mã, pijamã hàhcukrêj atajê cunea gõ, quê to hõ tekjê? Hãpà! Quê ha cama cumã:

— Apê ikraa to ikra, ne cama cormã acrire, ne ate amji jahkre kêatre. Na ca ha ma me acapõn catê krac ri axà, ne atỳj ijàpên xà na itehcajpar to apa, ne ihhêj rũm apê cama imã gàpên catê. Ne jũ caxuw akà, ne amji jahkre pej, wa ha hacpỹ ne me acapõn catê pê gaprô, ne cormã amã ijàhcukrêj gõ, mãr ca caa, amjia kôt hamãr to apa — hane.

³He pê mam me papê hũmre kra ata pyràac, ne pahte me amji kam me pajapac xà to pahte me amji pyràc xà pê me pahcapõn catê te amji kam hapac xà ata krac ri ame papa, pê ajco taa, me pahto ihhimpej. Na pê cute me pamã ampo cawpa xà atajê hàhtôa to hàhtô, ne pê hanea ne ampo carõ te amji kam hapac xà atajê, ajco me pahto ihhimpej. Ampo na? He cu cormã nee me pahte catyt kam, Pahpãm jarkwa jahkre pej nare. ⁴Mã Pahpãm te, me pahto cumã ihkra xũmre ata pyràac, ne cute me pahcapõn catê ata pê me pahcaxàr, cute ahna amji mã amcro hyr xà ata na. Cwỳrjapê pê, intête me pahcaxàr xà caxuw me pahwỳr ihkra pê Jeju kujate, pê me hũmrea na amji to, ne Marij mã ihpỳm, ne Mojxe te me hapackre xà himpej xà krac ri ipa. ⁵Mãr quê Mojxe te me hapackre xà nee me pahto ihhimpej nare. Ne Jejua kôt, cu ha quêt Pahpãm krac ri me axà, ne ihkôt me papê Pahpãm kra, ne pahtỳj amjia kôt ihkrac ri ame papa.

⁶Mã Pahpãm te me pamã ihkra Carõ Pejti kujahêc, mã cute me pamã amji jõr. Mã Carõ Pejti ata me pahcaxwãm pê me pamã:

— Apê Pahpãm kraa to ihkra — hane. Ne hanea ne me pahcaxwỳn caxwãm pê Carõ Pejti ita pahte Pahpãm cukij na me pahto, cu me cumã:

— Inxũ — hane. ⁷Ne hamre, ita caxuw, nee me papê cama me hõ pahhi jarkwa kôt me hàpên catêjê nare, ne me papê Pahpãm kra. Ne me papê mehkra ita kam ri, ihtỳj me pamã, cumã cute ampo pejti to hũjahkre atajê cunea gõ.

Cu ha nee hipêr me panquêtjê te me to ihhimpej xà kôt me papa nare

Coroxo 2.16-19

⁸Pê rỳ pêa mã, cormã nee ate me Pahpãm jahkre pej nare kam, pê ca ajco me aquêtjê te amji kam hapac xà pit to amji mã me ahimpej to me apa. Ne ajco me amã me carõ me, cupẽ jarôti me, ampo cawpa xà kên me, ampo cunea kwỳ cupaa to hũpa. Ne ajco atỳj Pahpãm kaj na ampo to ame pahpãm. Mã pahpãm cahàc atajê mã nee carôt nare. ⁹Ne ita caxuw, nee cute hajỹr nare. Ne me amã Pahpãm jahkre pej, ne hanea ne Pahpãm mã me gahkre pej. Ne mẽr ampo na mã ca ajte hacpỹa mã me aquêtjê te amji kam hapac xà kôt hamreare ata wỳr ate me amji jaxàr? Ne ampo na mã ca ajte hipêr atỳj ampo cawpa xà me, ampo carõ kên atajê to ame amji kampa, ne ame to amji japackre? Mã taa hacpỹ mã me ato ihhimpej, na ca ame amji mã to hane? ¹⁰Ne atỳj amcro kên cawpa xà jàhtôa to amji mã me ahimpej to me apa. Ne atỳj me Juta catêjê jõ amji kĩn jàhtôa kôt me amji ton to me apa. Ampo na mã ca ame amji to hajỹr to prãm? ¹¹Côt mã ca me Pahpãm pê catyt kam ata te amji kam hapac xà jicu? Ca ha ate me hajỹr na, wa ha itỳj amji caxwãm pê ita na me ato po mã quê, ne imã amji kĩn nare, ne ipeacre ne. He xà pê wa ihcaprỳ na ajco me amã Jeju jarẽ, ne to hahkre xà catihti to hahkre to ipa ata, xà ajkĩ ihkôt hamreare?

Pê mam ajco me Pawrô tehcajpar to catia

¹²Jeju kam me ikjêjê, pê ca mam ajco me ito impej ne nee rỳ jũ caxuw ate ito kên nare atajê, wa ha me apê ipyràac xà na me awỳ. He pê mam ipê me apyràac, ne me acuxà ampo cawpa xà atajê cunea kôt ipa. Ne ita caxuw ite ampo itajê cunea jicu, ne Jeju te amji kam hapac xà to pit mã amji kampa. Na ca ha ita caxuw me apê ipyràac, ne me ampo itajê cunea jicu.

¹³Xà ca atỳj cormã ite mam me amã Jeju jarẽn xà ata to me amji japackre? He pê wa ixà, ne me acahê na ahtwỳ, ne jũ mã amji to amcro to ata kam, pê wa me amã Jeju te amji kam hapac xà pejti to hahkre. ¹⁴Pê ca nee ixà kêanre ata kam me ina acprêc nare, ne me ito, ihhêj rũm, kỳj rũm Pahpãm mã memprar catêjê nõ, nare, me ito me pajõ Pahhiti pê Jeju Crixtô pyràac, ne atỳj ina me amji capa. ¹⁵Ne pê ca atỳj ajco, tee me atoa to pôj, ne me imã hõr prãm, ate me itehcajpar prãmte. Ne pê caxuw me amã ikĩn, ne ampeaj kam ipyrên me gakry. Ne mẽr jõ ri mã ita caxuw me gakryti ita? He ihhêj ne nee ita caxuw me gakry nare. ¹⁶He pê wa nee jũ caxuw ame amã ihêj xi jarẽn nare, ne cormã me amã catyt kam to hahkre to ipa cakrô, ca caa ihhêj ne ipê me acurê xwỳn na, ame ito amji kampa.

Pê mehhêj xi catêjê Pawrô te amji kam hapac xà intête me ta

¹⁷Mehhêj xi catêjê atajê hãn ne me amã ihhêj to:

— Ampeaj kam me imã akĩn, na wa itỳj me gamã, ne me ato impejti to prãm — hane. Ne cama ame amã ihhêj, ne ite amji kam ijapac xà ita tête cute me ahyr, ca mehkôat amji kam me gapac prãmte ri ame amã ihhêj. ¹⁸Pê wa curi ame acahê na imõr xà ata kam, pê wa me ate catyt kam me apa na me atehcajpa. Ne pom amcro itajê kam, wa nee curi apu imõr nare ita kam, quê ha ihtỳj ijaxà kam jũm te me atehcajpar xà ata na imã impej. Ne cute me atehcajpar catêjê atajê, nee mempej nare. Ne cute me ato impejti xà ita to ame amã ihhêj, ne ite amji kam ijapac xà ita tête, cute me acaxàr to prãm to ri, ihhêj ne ame amã ihhêj.

¹⁹Me apê imã ikra kĩnti atajê pyràac. Wa ihhêj ne ipê me anã mã me axà, mã tee ame axà te cute amji cupên ata pyràac. Ampo na? He ca ha me apê Jeju pyràac, ne me apejti to prãm to, wa ha amji pupun to kêanre to ipa kam to icrà, ca ha ahnaa ihcunea na, catyt kam Jeju kôt me apa, quê ha cormã ikàj xà ata hamre. ²⁰Jamã ne wa krãa me akuc ri jỹ, ne ajteare mã me amã icakôc xà nõ to icakôc. Wa itỳj me ato po mã quê, ne me ato pit mã amji kampa ita kam, ramã ikrã pictor tu ita kam, jũ mã wa ha ajte me ato.

Pê Mojxe cama jũm jarkwa kôt me pajàpên catêjê na me pahto

²¹Por ca Mojxe jũjarẽn xà kôt me amji kam gapac to prãm atajê, me ikampa. Wa ha pa me amã Mojxe jũjarẽn xà ita kôt pahte amji kam me pajapac xà atajê jarẽ. ²²Pê Mojxe me iquêtxwỳ Aprãw jarẽn kôt me imã harẽ, pê Aprãw mã ihkra xũmre ajkrut. Ne pyxit ne cupê Ixamar, ne hĩxi mã hàpên catê cahãj pê Hacakwỳj kam ihpỳm. Ne ihnõ ita pê Ixac, ne inxi pê Xarakwỳj pê Aprãw me hĩxia kam ihpỳm. Ne pê Xarakwỳj pê nee cama jũm mã hàpên catê nare, ne ihtỳj apu ipa. ²³Mã ihkĩnte Hacakwỳj ita pê Aprãw me hĩxi mã hàpên catê ata, pê Aprãw amjia kôt kam ihkra, pê mam cumã ihpỳm. Ne quêt Ixac to Pahpãm te hũjahkre xàa na pê, inxia kam ihpỳm. ^24-25Ne pyjê pijakrut itajê jarẽn xà kôt, wa ha me amã ita kam me pahte amji kam pajapac xà kôt harẽ. Ne pyjê pijakrut atajê, nee me ipipẽnti nare, ne ajpẽn pê ajteare mã me. Ne Pahpãm me, cute me ajpẽn par xà te hajỹar, ne nee ipipẽnti nare, ne ajpẽn pê ajteare mã me. Hacakwỳj pê Ihcuhhyt jõ kẽnti pyràac. Por pê Põcaprỳhti jõ pjê kam, Pahpãm Mojxe mã Juta catêjê caxuw, Ihcuhhyt jõ kẽnti kam, cumã cute me hapackre xà jõr ata, mãr quê catyt kam ihkôt me ipa xà ata pê Hacakwỳj ata pyràac. Ne cama ame cumã me hàpên xà ata kôt Pahpãm te me ahna amji caxàr na to prãm catêjê caxuw ri harkwa ita. Ne ahnaa ita kam, Juta catêjê Krĩpinkrên kam mehkrĩ atajê pê Hacakwỳj kra pyràac, ne cama me harkwa ita kôt pit mã ame hàpên to me ipa. Ne Pahpãm te me ahna amji caxàr prãmte, ihtỳj me hàhcawpa xà cunea kôt me ipa.

Pê Jeju pahtỳj ame papa na me pahto

²⁶Ne quêt côjkwa kam Krĩpinkrên tuw ata pê Aprãw me hĩxi ihtỳj apu ipa ata pyràac, ne cupê me pahnã pê Xarakwỳj ata pyràac. Ne me pahte Jeju to amji mã me pahhimpej atajê pê Xarakwỳj kra atajê pyràac. Ampo na? Ihhêj ne Pahpãm Carõ Pejti kôt hipêr me pahpỳpỳm, na ri cupê me pahnã. ²⁷Ne pê ramã Ixaj xwỳ Pahpãm jarkwa kôt, hõ kàhhôc kam ita na ihhôc to hane he:

“Por cormã nee jũm mã ihkra pỳm nare ata,

gapacta ne gakryte acaràr,

ne amã amji kĩnti ne.

He quê ha ihtỳj, por me cumã mempjê atajê jirôa pê,

quê ha jũ caxuw amã me akra hàhtô” hane.

²⁸Mẽr hõhõ, me apê Jeju kam me ikjêjê atajê, he me apê Ixac pyràac, ne Pahpãm te me ato hũjahkre xàa kôt ri me apê Pahpãm kra. Me papê, por pê Pahpãm Aprãw mã ihtàmxwỳ to awjahkre ata mã cu me. ²⁹Ne caxuaw, pom amjia kôt me ajhu ita na pê Ixamar ihpỳm ata pê cama me cumã hàpên catê kra cakrô, ajco ihtỳj Ixac to Pahpãm jũjahkre, mã Pahpãm Carõ Pejti kôt ihpỳm ata jahê. Mã cute amji pupun to kêanre xà caxuw pê ajco apu hahê. Ita jĩkjê na mã ita kam cute hajỹar he, ne menquêtjê te me hapackre xà kôt me ipa catêjê atajê, cama me papê Jeju kôt me papa catêjê jahê, cute me pahto kên prãmte. ³⁰Ne pê Mojxe xwỳ ramã ita na Pahpãm jarkwa na hõ kàhhôc kam ihhôc to hane he:

“Ca ha ma jũ kam cama me hàpên catê ita kujate, ihkra mea mã.

Ampo na?

He wa ha nee cama me cumã hàpên catê kra pê Ixamar ata mã,

ite Ixac pê gĩxia kra mã ampo to ijũjahkre atajê nõ jõr nare” hane.

³¹Hõhõ me ikjêjê, he nee me papê, por cama hàpên catê ata kra pyràc nare. Ne quêt me papê Xarakwỳj pê Aprãw me hĩxia kra ata pyràac.

¹Jeju Crixtô te mam me panquêtjê himpej xà atajê pê me pahcaxàr, mãr cu pahtỳj ame papa. Cwỳrjapê ca ha nee hipêr jũm himpej xà mã axàr, ne ihkrac ri apu apa nare.

Quê ha Pahpãm nee me pajàpên xà impejti kôt me pahna amji caxàr nare

Jowãw 8.32, 36

²Ỹhỹ, ipê Pawrô pê Jeju Crixtô jarkwa na imprar catê, ne pa wa ha me amã awjarẽ, cwỳrjapê ca ha ikam me gapac to impeaj ne he. Ihhêj ne ramã Juta catêjê kwỳ me awỳr cator, ne cute me amã:

— Ca ha Mojxe te me hapackre xà kôt, cama amji na me ijamã, wa me amã me apy kà kwỳ jakep. Ampo na? Ca ha ate ita to hajỹr nare na, quê ha nee Pahpãm ana amji caxàr nare — hajỹr na. Ca ha nee kam me gapac, ne amji na me hamãr, quê me amã apy kà kwỳ jakep nare. Ampo na? Ca ha ate amji na me hamãr na, ca ha nee Jeju to pit mã amji mã me ahimpej nare. Quê ha me amã me pajõ Pahhiti tyc xà ita kôt hamreare ne.

Pê Pahpãm amjia kôt me pahna amji capa

³He wa ha hipêr me amã ita cawpa he. Ca ha me anõ te amji na me hamãr, quê ha cute me amã apy kà kwỳ jakep na, hamre, ramã ate Mojxe te me hapackre xà pyxit ne ihkôt amji ton, na ca ha atỳj ate ahpỹanre na ihcunea kam gapac to prãm xà. ⁴Ca ha Pahpãm te me ana amji caxàr prãmte, ate me Mojxe te me hapackre xà ata pynãr na, ca ha ramã me Jeju Crixtô mã hikra. He me atea ca me Pahpãm te hàhcaprĩa kam, amjia kôt cute me apytàr jicu na me ton, mã cute me gicu. ⁵He nee me ite me hajỹr nare. He quêt me imã quê ha Pahpãm amjia kôt me ina amji caxàr na me imã hahkre pej. Ne quêt Pahpãm Carõ Pejti carôt ri, Jeju to ite amji mã me ihimpej tỳj na me itehcajpa. ⁶Cu ha Jeju Crixtô na me ajpẽn hônco ita kam, nee Pahpãm me, me papê ajpẽn pê ajteare mã nare, ne cumã me papipẽn pit. Ne me pahkà jakep me, me pahkà jakep nare itajê me, me Pahpãm mã me papipẽn pit. Ne cumã Jeju to me pahte amji mã me pahhimpej xà ata kôt ri me pamã ajpẽn kĩn, ata na ri cumã impej.

⁷Pỳhàpà! He curmã ca Pahpãm kôt me aprõt kên nare ta? Ne ampo na mã ate amji na me jũm ita jamãr, mã cute me ato pry hyr, ca ate me pry hyr? ⁸He nee Pahpãm te hõ pry ita tête me amẽn nare, ne ihtỳj quêt amji wỳr me amã akij. ⁹He cu ha me pahnõ cuhkõn cahàc to cuprõ, ne hakôt, quê ha ihkrĩ ne hipôc ri ihnõ kam cô, ne ihcacu, ne amji kôt ihkwỳ cunea to kên. Ỹhỹ, ita jĩkjê na mã jũm te, Jeju te amji kam hapac xà kaj na, me amã ampo kên kryjre to hahkre xà atajê to me acunea to kên. ¹⁰Ne jũm ata te me amã ampo kên to hahkre cakrô, wa itỳj, nee ate mempar nare na, amji mã me ato hane. Ne imãa, ca ha me anõ te kam gapac, ne ihkôt amji ton na, ca ha hacpỹa mã ate amji jaxàr, ne hipêr Jeju te amji kam hapac xà impejti ata pynãr na, wa itỳj me ato amji mã hane. Ne por ame amã ampo kên to hahkre to ipa ata, quê ha Pahpãm ihtỳj cute me ato kên xà ata cwỳrjapê to ihtỳj tu ne.

Pê Pawrô nee jũm te impy kà kwỳ jakep to cumã hahkre nare

¹¹Ỹhỹ me ikjêjê, wa ha me amã amji jarẽ. He cute me amã ito ihhêj xi catêjê me amã hane he:

— Pawrô cormã mehcunea te mempy kà kwỳ jakep to me cumã hahkre — hane. Wa ha ite me cumã to hahkre to hajỹr na, quê ha nee Juta catêjê jõ pahhi kwỳ itajê ame ito kên nare. Ne mẽr ampo na mã ame ito kên? Nee mã ampo na nare. He wa mehcunea mã Jeju te pĩ kam me pancwỳrjapê ihtyc xà ata kôt Pahpãm te me pahna amji caxàr na harẽ, na ri ame ikam incryc. ¹²Ne por ame akrã to acto atajê, quê hapacta ne ihtỳj amji mã mehhy me incre cunea jakep hiahpuro, wa ha nee intête mehcahpêrkàr nare.

Cu ha ajpẽn to mempeaj ne

Jowãw 13.31-35

¹³Jeju kam me ikjêjê, pê Pahpãm amji wỳr me pamã akij, mãr quê nee pjê kam jũm cute amji kam hapac xàa to pahte amji kam me pajapac xà to ihhimpej nare. Co he! Ca ha nee me anõ ate amji kam gapac xà tũm kên ata kôt apa prãmte, amji mã:

— Taa mã, jũm nee ito ihhimpej nare ita kam, wa ha itỳj ite amji to amji cajpuaw prãmte, ite ampo ton prãm ata cunea to — hajỹr nare. Ne quêt amã me akwỳ kĩan kam, cute ampo na mehprãmti xà atajê to ca ha me. ¹⁴Ne por Mojxe te me hapackre xà atajê, ca ha ihcunea to cuprõ, ne to pyxit peaj to hane he:

“Quê ha amã mehcunea kĩn hanea,

pom quê amãa amji kĩn he” hane.

Cu ha pahte me ajpẽn to hajỹr na, cu ha ramã Mojxe te me pajapackre xà atajê cunea kôt me ajpẽn to. ¹⁵Nãmri ca ha me apê ampo kên pyràc, ne cama ame ajpẽn curê, ne ajpẽn kam me atẽm na, ca ha me caa me ajpẽn jipej. Cupate ca ha atỳj ate amji kam gapac xà na me amji kôpĩr to me apa.

Pahte mam amji kam me pajapac xà kên atajê pê Carõ Pejti curê xwỳn

Roman 7.7-25; 8.1-11

¹⁶Ỹhỹ me ikjêjê, ca ha Pahpãm Carõ Pejti te amji kam hapac xà tuw pejti ata kôt me apa na, ca ha nee hipêr ate amji kam me gapac xà tũm kên ata kôt me apa nare. Ne nee ate amji to amji cajpuaw prãmte, ate ampo ton prãm ata cunea ton to me apa nare. ¹⁷Mam pahte amji kam me pajapac xà tũm kên ata me, Pahpãm Carõ Pejti te amji kam hapac xà tuw pejti ita me, cupê ihhêj rũm ajpẽn curê xwỳn. Na ri ihtỳj ajpẽn cahpêrkàr to ipa. Na cu nee me pahte amji kam me pajapac xà pejti to me papa to prãm ata kôt me papa nare. ¹⁸Cu ha pahte Pahpãm Carõ Pejti to amji mã me pahhimpej na, cu ha nee hipêr me hàhcawpa xà me, me to ihhimpej xà atajê to apu amji kam me pajapac nare. Ampo na? Nee hipêr cute me hàhcawpa xà ata me pahto ihhimpej nare.

Mam pahte amji kam me pajapac xà tũm kên atajê te hajỹr

¹⁹He me pahcunea mã hirãa pê mam pahte amji kam me pajapac xà tũm kêanre te ampo kên cunea na me pahton na, pahte me amji jahkre pej. Itajê te hajỹr he:

Me pahnõ te me pahprõ kaj na ahti na me pyjê nõ caxun me,

hanea ne pyjê nõ te impjên kaj na, ahti na jũm xũmre caxun.

He ihhêj rũm me pahkwỳ pê rop pyràac, ne pahte amji kam me pajapac xà kam me panxyre kam me pahpahàmti ton to ame papa.

²⁰Ne hanea ne Pahpãm kaj na, pahnõ te amji mã me pahpãm cahàc krekà cupa me,

pahte me pahkwỳ to hy to amji kam me pajapac to me papa me,

pahte me ajpẽn curê me,

pahte me pajarkwa to ajpẽn mãn kên me,

pahte me pajõxỳ to me papa me,

pahte ajpẽn kam me pancryc me,

amji to pit mã amji kam me pajapac to me papa me,

pahte ajpẽn cuna mã ame amji jakrã me,

²¹pahte ajpẽn jũ na ampo kĩn me,

pahkõm ne me papipãn me,

amji kĩn kam, me kam mare mã me pahkõm catia me,

me ampo kwỳ jàhtôa pê itajê pyràcti atajê me.

Ỹhỹ, he mam pahte amji kam me pajapac xà tũm kên itajê, ihtỳj pahte ampo kên itajê cunea ton na me pahto, cu ton to me papa. Ne pom ite mam ramã me amã ampo cawpa atajê, wa ha hipêr me amã ihcawpa. He cute me ampo kêanre itajê ton catêjê, quê ha nee jũ caxuw Pahpãm himpej xà krac ri hàr, ne catyt kam, cumã amji kĩnti jakryti kam ipa nare.

Pahpãm Carõ Pejti te amji kam hapac xà tuw pejti atajê te hajỹr

^22-23Ne quêt Pahpãm Carõ Pejti te amji kam hapac xà ajteare mã. Quê ha me Pahpãm Carõ Pejti te me pamã amji jõr na, cu ha me pahte ampo pej pit ton xà itajê te hajỹr he:

me pamã ajpẽn kĩnti me,

me pajakryti me,

ajpẽn mã me pampejti ne me pahcarĩcti na me pahkrĩ me,

ampo te me pahto kên mã me pajũcanãr me,

ajpẽn mã me pahcaprĩ me,

pahte me ajpẽn to impejti me,

cute amji mã me pahto hajỹr me,

ajpẽn mã me ampejti me,

ampo kên tête pahte me amji jiprõn to me papa me,

cute amji mã ampo na prãm atajê na amji jamãr peaj me.

Ỹhỹ, Pahpãm Carõ Pejti ihtỳj pahte ampo pejti ton xà itajê cunea na me pahto, cu me ton to me papa. Na ri nee jũm xũmre te me hapackre xà te ampo pejti ita tête me pajiprõn xà hamreare. ²⁴Ne me papê Jeju Crixtô tekjê atajê te, ramã ihhêj ne mam me pahte amji kam me pajapac xà tũm kên atajê cunea jipej, mãr cu nee hipêr ihkôt ame papa nare. Na cu ha nee hipêr me pamã ampo kên ton prãmti atajê na me amji jamãr, ne me ton nare.

Cu ha Carõ Pejti te amji kam hapac xà tuw pejti ata kôt me papa

²⁵Ne me Pahpãm Carõ Pejti ata pê me pajõ Pahhiti, cu carôat kôt me papa. Mã taa, me pahto ihhimpej, ne pahte ampo pejti ton na me pahto, cu ha me ton to me papa. ²⁶Na cu ha nee ajpẽn jirôa pê amji to me pahcati prãm nare. Cu ha pahte me hajỹr na, cu ha cama me ajpẽn cyt kam tẽ, ne cama ajpẽn jũ na amji to prãm kam me tẽ.

¹Ỹhỹ, me ikjêjê, quê me akwỳ nõ ihhêaj to ampo kên to, ca ahna me hõmpu, ne me apê Pahpãm Carõ Pejti to ate amji mã me ahimpej catêjê atajê, mehtehcajpa, quê ampo kên ton jicu, ne ihcuhtac, ne catyt kam ampo pejti ton to ipa. Ne ate me hapackre xà ata kam, ca ha amji mã me aprĩ akam, me hapackre. Ne hanea ne ma amji to me guphê, côt ca hanea ne mehkôt ampo kên ton kam tẽ. ²Ne ca ha atỳj me ate amji kam gapac xà kam ampo te me ato kêanre atajê to ate ajpẽn mã mehcajcoc na me ajpẽn tehcajpar to me apa. Cu ha pahte ajpẽn to me hajỹr to me papa na, cu ha ramã me Crixtô te me pamã harkwa jirên xà atajê kôt me amji kampa. ³Quê ha jũm te amji to ihcakôc to:

— Wa me hirôa pê icati, ne ipej — hane, ne nee cati ne impej nare xà ata kam ri, taa ramã apu amji to amji mã ihhêj to ipa. ⁴Na cu ha ahpỹanre na, pahte amji kam me pajapac xà na me amji kôpĩr to me papa. Na cu ha me pahnõ te pajàpên xà impejti ton na, cu ha pahtỳj hũrên me pajakrya, ne cu ha nee amji mã:

— Wa ite itajê jirôa pê ijàpên xà impejti ton — hajỹr nare. Ne quêt cama amji mã:

— Wa ite ijàpên xà impejti ton — hane. ⁵Na cu ha ahpỹanre na, me pajũrkwa caxuw me amji kampa, ne pahtỳj me amji jàpên xàa to me pajàpên to me papa. ⁶Ne cute me amã Pahpãm jarkwa to hahkre catê ata, ca ha ma me hamã, ne ma cumã, amã ampo atajê to ajcokjê.

Jũ wỳr cu ha me pahnõ Pahpãm mã pahhêj

⁷Ca ha nee me anõ amji mã ahêj nare! Jũ wỳr quê jũm Pahpãm mã ihhêj. Xà cu me pahnõ pajõ pur kam, pànkrỳt xỳ pit kre, quê pijamã kam hàn nỹre nõ cato? Hãpà! Quê ha hỳ pit hapôj. Ita jĩkjê na, cu ha pahte amji kam me pajapac xà kên to pit mã amji kampa, cu ha nee hahpan xà na ampo pejti pyr nare, ne hahpan xà na ampo kên pit cwa. Jũ wỳr cu pahte ampo kên ton xà ata kôt, me Pahpãm mã me pahhêj, cute me pamã ampo pejti jõr prãmte. Cu pahte ita to amji kam me pajapac na, cu ha me paa, ramã, amji mã me pahhêj. ⁸Cu ha mam pahte amji kam me pajapac xà tũm kên ata pit kôt me papa na, cu ha ramã Pahpãm kaj na ampỳa mã ame papa, ne me ty, ne me acto rohnỳtti mã. Ne cu ha quêt Pahpãm Carõ Pejti te amji kam hapac xà tuw pejti ata kôt me papa na, cu ha quêt Pahpãm cahê na me pahkrĩ rohnỳtti mã.

Cu ha nee me ampo pejti ton jicu nare

⁹Cu ha nee me ampo pejti ton to mehkĩn hi nare, ne pahtỳj pahte ampo pejti ton xà ata kam me awcanã. Ne hahpan xàa na, quê ha Pahpãm me pamã ampo pejti gõ. ¹⁰Ne atỳj ate mehcunea mã ampo pejti ton na, ca amji to ahcukij. Ne Jeju kam me pahkjêjê to, ca ha me hirôa pê impej.

Pawrô me pancwỳrjapê Jeju tyc xà ita to pit mã apu ihcakôc

¹¹Ita caxuw, wa ha ijũhkra to me amã ihhôc, ca me hõmpu. Mã ihhôc cati pit he, mãr ca me ijahkre pej, nãmri pa wa me amã ihhôc.

¹²Ne por me amã ihhêj catêjê atajê ri, cama amji to ame hàmnãn to me ipa. Ne Jeju te amji kam hapac xà kaj na me amã harẽn to:

— Ca ha apy kà kwỳ crire ne hakep xà ata kôt, quê ha Pahpãm ihtỳj ana amji capa — hane. Me pajõ Pahhiti curê xwỳn te ame to kên cupate ri, nee me amã:

— Pĩ kam me pancwỳrjapê Jeju tyc xàa kôt, quê ha Pahpãm me pahna amji capa — hajỹr nare. ¹³Ne cute mempy kà jakep xà ata to me amji kam hapac to me ipa cakrô, nee me Mojxe xwỳ te me hapackre xà cunea kôt me ipa nare. Ne mẽr ampo na mã ame amã apy kà jakep prãm? Nee mã ampo na nare. Cumã cute me hũnãr catêjê jàhtôa na, cute amji to me hàmnãn prãmte ri ame hane. ¹⁴Ne pa nare, wa quêt me pancwỳrjapê me pajõ Pahhiti Jeju Crixtô tyc xà ata to, wa mehcunea mã, ijàmnãn to ipa. Ne por Jeju te amji kam hapac xà curê xwỳn te amji kam hapac xà itajê, nee icajpuaw nare. Na ri me imãa, cute amji kam me hapac xà itajê pê ampo tyc kro pyràac. Ne hanea ne ite Jeju kôt amji kam ijapac xà ita, nee me hũmre atajê cajpuw nare. Na ri me cumã ite amji kam ijapac xà ita pê ampo tyc kro pyràc, ne ihkêanre. ¹⁵Ne Pahpãm mã, jũm te amji kà jakep ata me, cute amji kà jakep nare atajê pipẽn pit, na ri me ipijakrut itajê na, nee Pahpãm te amji caxàr nare. Cu ha Pahpãm te amji kam hapac xà kôt me papa na, quê ha me pahcunea to antuw, ne me pahto intuw. Cu ha me papê curmã ampo tuwti ata, quê ha cormã me pahna amji capa.

Pê Pawrô Pahpãm mã mehkwỳ cajrẽn pej

¹⁶Ne wa itỳj Pahpãm mã me acajrẽn to hane he:

— Ỹhỹ me Ijõ Inxũ, wa cute, ite me hapackre na me ipar atajê mã, wa ha ana ahwỳ, ca me caxwỳn caxwãm pê me cumã acarĩcti gõ, mãr quê nee cumã ampo hũpa nare. Ne ca ha me akwỳ cunea caprĩ, ne me to impej — hane.

¹⁷Hamre, he nee hipêr imã, ramã ite me amã ampo jarẽn itajê jarẽn prãm nare. Wa ramã ite ita cwỳrjapê amji pupun to kêanre, ne pom ijĩ kam apu icaxõti itajê, ramã ipê Jeju mã ijàpên catê na ijarẽ. He nee ipy kà jakep xà caxõ ata, ipê Pahpãm tekjê na ijarẽn nare. Ne quêt ite mehcunea mã Jeju jarẽn cwỳrjapê jũm te icahhyr jaxà kam caxõ, ita ri quêt ipê Pahpãm tekjê na ijarẽ. Na ri nee hipêr jũm te, ite amji pupun xà kêanre na iton xà hamreare. ¹⁸Ne imã me pajõ Pahhiti pê Jeju Crixtô te amjia kôt, me apê me ikjêjê itajê cunea to, cute impej na to prãm. Taa mã, hamre.