Hacpỹa Mã Me Hõ Pjê Wỳr CUTE ME AMJI JAXÀR XÀ
Ỹhỹ, pê Juta catêjê ajmãr mehcunea me hõ pjê pê me to cutor tu, ne curia Papirõn jõ pjê kam mehkrĩ. Pê mehcahhur mencrêre ne me hõ pjê pê mam Canãn jõ pjê pê Ixaher jõ pjê me, Juta jõ pjê kam mehkrĩ, ne jũ mã me, ne me hamre, ne me acto.
Pê pjê ata kam mehkrĩ itajê ihtỳj mehkrĩ, ne me ipicamẽn to me mõ. Pê Papirõn jõ pjê kam krĩxàre catêjê ajco me hõ pahpãm cahàc krekà itajê kôt pit mã ame amji kampa. Pê Juta catêjê ma ame pahpãm cahàc krekà itajê kôt me amji kam hapac caca. Pê mam pahpãm cahàc krekà kôt me amji kampa, jahpan xà na mehkên mã me axà, ata to ri ma me amji japackre, ne ita caxuw quêt côjkwa kam Pahpãm tĩar rohnỳtti mã ata to me amji mã mehhimpej to me ipa.
Ne me ahna caku te xetẽnta jirô pê mã ri, hacpỹa mã Papirõn jõ pjê pĩn me hõ pjê pê Canãn wỳr mehkwỳ te amji jaxàr. Ne Extra me Nemij pê me to ihhimpej catêjê, ne me cupê me cumã Pahpãm jarkwa to mehcakôc catêjê. Ne me hỹrmã me cator, ne cute hacpỹa mã me Pahpãm to amji kam me hapac xà jũrkwa xãm, ne hanea ne hacpỹa mã Krĩpinkrên tête me kwỳc to intuw. Ne cute ihcunea na me hõ kàhhôc kam mehhôc, na ri cute me ihkàhhôc ata mã haprỳ to, Extra Jõ Kàhhôc (Extra), me Nemij Jõ Kàhhôc (Nemij).
Ne caku atajê kam hanea ne mehkwỳa kwỳ te hacpỹ ne me amji jaxàr, ne Krĩpinkrên to mentuw. Mã Pahpãm jarkwa to mehcakôc catêjê incrê itajê pê Agew, me Xacarij me, Maraquij itajê ihtỳj me hàpên xà na me cumã apô. Ne hanea ne catyt kam Pahpãm kôt ame ipa na me cumã apô. Ne me hõ kàhhôc japrỳ te Agew Jõ Kàhhôc (Agew) me, Xacarij Jõ Kàhhôc (Xacarij) me, Maraquij Jõ Kàhhôc (Maraquij). Ne ita caxuw Extra jũjarẽn na, hõ kàhhôc kwỳ mã he.
1Pê Pahpãm hacpỹa mã me hõ pjê pê Canãn wỳr, Juta catêjê kujate
Pê me ahna caku xetẽnta jirô pê mã ri ramã mam itajê mehwej partu, ne ramã mehtyc to mõ ne mencrêre. Ne por pê Juta jõ pjê me Krĩpinkrên pĩn mentuwre na me to cato atajê ri cormã ame ipa, ne hanea ne ramã amehwej. Ne mehtàmxwỳ ri hõtpê ampeaj kam me hàhtô.
Mã ramã Pahpãm mã Juta catêjê caprĩ, mã cute Papirõn jõ pjê kam hipêr pahhi tuw japrỳ te Xiro ata mã, cute amji kam hapac xà nõ ita ton. Mã hanea ne cumã Juta catêjê caprĩ, mã cute me hõ pahhi catêjê to cuprõn, ne mehcukij, ne me cumã:
— Xà ca ajkĩ atỳj jũmjê hacpỹa mã me gõ pjê pê Juta jõ pjê wỳr me amji jaxàr to prãm? Quê ihhêaj to me akwỳ mã hacpỹa mã me amji jaxàr to prãm na, quê ha hapacta ne me amji jaxà, ne hacpỹa mã me gõ krĩ pê Krĩpinkrên ata to mentuw, ne mam cati mã hacpỹa mã kam me Pahpãm mã hũrkwa nõ xãm — hajỹr.
Mã Juta catêjê jõ pahhi kwỳ te cumã:
— Ỹhỹ, pahhi Xiro, me ijàhtôa wa me amji jaxàr prãm — hajỹr. Pê caku ata kam me hàhtôa ne Papirõn jõ pjê pĩn me amji jaxà, me hõ pjê wỳr, ne me krĩ xãm, ne kam mehkrĩ.
7Pê Extra Juta jõ pjê wỳr amji jaxà
Pê caku atajê kam Papirõn jõ pjê kam, me hũmre nõ ita japrỳ pê Extra ita ihkrĩ, ne cupê ihkàhhôc ton catê, ne cupê me cumã ampo to hahkre catê. Ne cumã Mojxe xwỳ jõ kàhhôc kwỳ mã ampeaj ne hahkre pej.
Mã Juta catêjê jõ pahhi kwỳ jàhhuc atajê te mehkôt ihkujahêc, Canãn jõ pjê pê Juta jõ pjê wỳr, quê me ahna awcapi, jũ mã mõrmõ cute me. Ne hacpỹa ne amji jahpan xà Extra te me hõmpun xà atajê na, pahhi kwỳ mã ihkàhhôc nõ to, ne kujate.
Mã ma mehkôt mõ ne curi cator, ne cute krĩ na hũcapi, mã ramã krĩ te amji jipêj ne xa. Ne nee cormã kam, cute me Pahpãm to me amji kam hapac xà jũrkwa to impej par nare, mã ahnaa ihcuhhê. Cwỳrjapê ri Pahpãm jarkwa kôt Agew te me cumãn, ne me cumã:
“Me gõ krĩ to mempej jicu,
ne mam me Pahpãm jũrkwa to mempej!
Jirô pê ca ha cormã ame gũrkwa to mempej!” hajỹr.
Mã hanea ne Extra te Juta catêjê xũmre te ampo kwỳj pê Pahpãm jahkre kêatre atajê me, ame hikwa na me hõmpun. Na ri Pahpãm jarkwa kôt me cumã:
“Ampo kwỳj itajê me, me gikwa to hicu,
ne me cumã hikra!
Ampo na? Ca hame hane,
quê ha ihtỳj Pahpãm kaj na me amã ampo kêanre to hahkre to me ipa” hajỹr.
Extra jõ kàhhôc, me ho pahhi catêjê wỳr
Ne cute me ahna ihhôc par, ne ma hacpỹ mã, Papirõn jõ pjê kam Juta catêjê jõ pahhi kwỳ jàhhuc, ne ame ipa atajê mã, cute ihkujahêc. Ne cute ihkàhhôc kam harkwa to hajỹr he:
“Ỹhỹ, me ijõ pahhi, wa ita ri Juta jõ pjê kam icator, mã Juta catêjê pê pahhi kwỳ iwỳr me mõ, ne cute me hàhtôa to imã hũjarẽn, ne me imã:
“ ‘Me pahkwỳa kwỳ jàhtôa pê ihhêj rũm me cupê Juta catêjê nare atajê pyràac, ne ihtỳj mehkêanre ton to me ipa. Ne mehkwỳa Pahpãm jũrkwa to me hàpên cakrô, cormã mehkên ton to me ipa. Ne pê ramã me Pahpãm me pahkwỳa kwỳ te ampo kra cahãj me, ame hikwa tête me cumãn cakrô, mã cormã ihtỳj hãn ne ampo kwỳj me, ame hikwa. Mã hanea ne me cupê pahhi catêjê ihtỳj me ita to’ hajỹr. Hõhõ, cute me imã me pahkwỳ jarẽn to hajỹr. Wa Pahpãm cuna mã ipahàm xàhte ikõn krã na ijỹr, ne ite cumã ijarkwa to:
‘Me ijõ Inxũ Cati,
ampeaj kam ri me ikêan to me ikên,
me ikên xà ita jũ na ipahàam to ipahàm.
Pê ramã rỳ pêa mã garkwa to mehcakôc catêjê me imã awjarẽ.
Me ikên te ramã ihhêj ne me ijõ pjê ita tũam to ihtũm.
Pê ca garkwa to:
“Ca nee ajteare mã ampo kwỳj me ame gikwa nare,
ne me akwỳa cahãj me, ame gikwa.
Ne nee hanea ne ita na ame akra jamãr nare,
ne nee cute hajỹr xà ita na ame jũm tehcajpar nare” hajỹr cakrô,
wa ite me garkwa itajê impar pej nare’ hajỹr.
Wa cormã ipec xàhte Pahpãm to me amji kam hapac xà jũrkwa cuna mã ijõ pôrpo ne nõ, ne cormã icwỳar kam Pahpãm mã me ikên xà ita to icakôac kam, mã me hũmre me, me cahãj me, me ahkrare me, me hàhtôa ne me cator. Ne cute me cuprõn ne ihtỳj icahê na ame amrã, cute me amji kên xà kêanre ata pupun ne. Mã mehnõa xũmre ita te imã harkwa to:
“Ỹhỹ, Pahpãm cuna mã ame pahkên crire nare. Ampo na? Cu pahtỳj ame cupê me pahkwỳ nare atajê cahãj me, ame pajikwa. Ne cu cormã pahtỳj me to. Ampo na? He cu me pahte Pahpãm kam mare mã me ajpẽn par, me pahte pyjê itajê me, mehkra itajê mã me hikran, ne mehkujahêc na me pamã harkwa.
“Hã, kepê cu ita caxuw Pahpãm jarkwa kôt ame amji ton to me papa nare, ne por quêt cormã Pahpãm jarkwa kôt me pajõ pahhi ame ipa atajê kampa. Ne Extra, caa ca ha amji to ihtỳj, ne ite me ampo ton xà ata na me imã awjahkre, wa ha itỳj me to” hajỹr.
Wa ixãm ne ite me cupê pahhi catêjê cunea mã ijarkwa hyr. Ne ite Pahpãm to me amji kam hapac xà jũrkwa kam me hàpên catêjê me, me hàhtôti atajê cunea cukij, ne me cumã:
“Ca ha me acunea, pom hũmre te harkwa to ihcakôc xà ita na me amji capa?” hajỹr.
Mã mehcunea te ita na me amji caxàr. Wa curia Pahpãm to me amji kam hapac xà jũrkwa kam ijàhhuc, ne apu ipijacri to mõ, ne nee ite kwỳr nõ krẽr nare, ne nee ikõm nare. Ampo na? He me ikwỳ kên xà atajê jũ na ipec xàhte, wa apu ipijacri to mõ. Mã mehcunea te me imã harkwa to:
“Cu me pahcunea te Pahpãm cuna mã me pahkên xà ton, cwỳrjapê cu ha pahtỳj ita caxuw me kampa” hajỹr. Hõhõ, wa ite me kam ijapac to hajỹr, ne me amã ahna ihhôc, ne me amã ihkujahêc” hajỹr. Hamre.