MOJXE
Pê Pahpãm Jarkwa To Me Cumã
IHCAKÔC CATÊ
Ỹhỹ, hapu na ihkàhhôc ita kam, Mojxe pỳm xà me, cute amji kam hapac xà cunea jarẽ. Pê Ejit catêjê me hõ pjê kam, Ixaher catêjê to kêanre. Pê tee menquêtjê jõ pjê wỳr ame amji jaxàr prãm. Na pê Pahpãm Mojxe te Ejit jõ pjê ata pê me to cator catê na hãm. Mã Ixaher catêjê cunea to pjê ata pê cator. Cwỳrjapê ri ihkàhhôc ita japrỳ te Me Cator Xà Jõ Kàhhôc (Me Cator Xà).
1Pê Ixaher catêjê Ejit jõ pjê kam me amji pupun xà to kêanre
Ỹhỹ, pê caku jàhtôa kam, ajco Ixaher kra curi mehkrĩ. Pê Ixaher xwỳ ty, pê hakàn pê cormã me ahna caku hàhtôa pê Joje ty. Ne pê Joje tyc jirô pê, caku jàhtôa kam ihtàmxwỳ me, mehkra me, me amtà, ne me hàhtôa to me hàhtô. Ne pê hanea ne ramã Paro ty.
Pê haxà kam jũm xàr ata pê Paro tuw, ne amji to pahhi. Ne nee pê Joje pupun nare, ne nee hahkre pej nare. Ne cute Ejit jõ pjê kam mehkrĩ catêjê mã harkwa to:
— Me pajirôa pê Ixaher catêjê kra jàhtô, cwỳrjapê quê ha jũ caxuw me pahkam incryc, ne ihtỳj me pajirô pê me xa, ne me pamã me hàpên jicu, ne ma jũ kam me papê me cato. Cwỳrjapê cu ha amji mã me to cama me pamã hàpên catêjê na — hajỹr.
Ne Ejit catêjê te Ixaher catêjê caxuw me hõ pahhi pahtỳjti atajê mã hapôj, ne me ahna me hũxwỳr, mãr quê me cumã me hàpên xà tỳjti atajê to hàhtôa, ne ahna me cumã quêt, quê ampeaj kam me apê. Pê me hàpên xà jirôa pê me hàpên to catia to cati, pê nee me cumã hàmjõr nare. Ne cute me Ixaher catêjê mãn, mã me harkwa kôt cute me cumã krĩ catia to ipijakrut ne me hãm.
Ne me apêa to me apê cakrô, cyt ne me hàhtô to tẽ ne me hàmtàr, ne cormã me ajhu. Mã Paro te me cumã mehkra pỳpỳm catêjê atajê tehcajpar catêjê mã harkwa hyr, ne me cumã harkwa to:
— Quê Ixaher catêjê mã mehkra xũmre mehpỳpỳm, ca ha ma mehcura — hajỹr.
Mã nee cute mempar, ne nee harkwa kôt cute me ita ton nare. Ampo na? Ampeaj kam me cumã Pahpãm cupa, na ri nee Paro te ampo na me mẽn ata to cute me nare. Mã Pahpãm te me cumã mehkra pỳpỳm catêjê atajê tehcajpar to impejti, ne hanea ne cute mehtehcajpar, ne me cumã mehkra jõr.
Mã Paro te mehkwỳ mã, cô kam Ixaher catêjê mã ihkra xũmre pỳpỳm atajê cunea rẽn na hũjahkre, mãr quê cô me ipĩr pa.
2Mojxe pỳm xà
Pê amcro ata na Ixaher catêjê nõ pê Rewi tàmxwỳ tàmxwỳ cahãj nõ ita mã ihkra xũmre ita pỳm, ne impejti. Mã cute to ipimxur ita to putwrỳ to incrê. Jirô pê mã ri cupê to ipimxur jahkre kêatre, mã cute kàhà ton, ne cumã cô xàr cupate, cute ihtô xà to ihkre cunea jihê partu, ne to ihcahty. Jirô pê mã ri cute kam ihkra xũmre ata xàr, ne cô tohkà na têtêc krô ata catàt kre na hãm. Mã ihkjê cahãj japrỳ te Mirãnkwỳj ita ampỳa mã ahna xa ne irĩt, mã ampo te kam mare mã to jũ mãn, mã cute ahna hõmpun prãmte.
Pê Paro kra cahãj cô kam Mojxe mã cato
Mã Paro kra wỳr prãmte, ma cô mã mõ, ne cute cô tohkà na têtêc krô ata catàt kre na kàhà pupun, mã kam me ahkrare nõ ita nõ. Mã cute ahna cumã hàpên catê cahãj nõ mẽn, mã cute cumã to hàpir. Mã cute ihpro mẽn, mã cute incwỳr kam ihtẽm. Mã Paro kra mã hapê, mã cute harkwa to:
— Ixaher catêjê kra nõ mõrmõ he — hajỹr.
Mã ahkrare tõj ita ampỳa mã apu hamãr to mõ, ne ma Paro mehcaxwỳj wỳr tẽ, ne cute ihcukij ne cumã:
— Xà wa amã Ixaher catêjê cahãj nõ japrô, quê amã ahkrare nõ ita to pijahô ne to ajpa? — hajỹr.
Mã cumã:
— Ỹhỹ, mẽr tẽ, ne jũm japrô — hane. Mã ma tẽ, ne cute ihtõre menxi japrôr, ne hỹrmã to cator. Mã Paro mehcaxwỳj ita cumã:
— Ca ha ahkrare nõ ita pỳ ne imã to ajpa, wa ha amã amgõ — hane. Mã hamre, ma hũrkwa wỳr cute ihkra ata pỳn ne to tẽ.
Pê jũ mã ahna caku pê ramã cati ne ihkà. Mã ma inxi ita to tẽ ne cute Paro kra ita mã hõr. Mã cute amji mã haprôr, ne to amji kra, ne cumã haprỳ to Mojxe. Ne haprỳ ata kôt harẽn xà pê “Cô pê cute me to hàpir”.
Pê Mojxe Paro cupate põti kam me hamreare ata wỳr tẽ
Mã ramã Mojxe na caku jàhtôa, mã ramã ihkà to mõ. Ne amcro nõ na apu mõ, ne cute Ejit catêjê nõ te Ixaher catêjê nõ cahhyr na hõmpun. Ne amji pu na irĩt mã me hamreare, mã cute hapête ihcuran, ne pjênxômti kam me hamreare ata kam, to ipimxur.
Ne amcro nõ na ma hipêr apu mõ, ne cute Ixaher catêjê pijakrut te apu ipijapu na me hõmpun, ne me cumã:
— Ampo na mã ca ame ajpẽn cahhy, pom ca ajpẽn to me akjê ita? — hajỹr.
Mã ihnõ ita cumã:
— Jũm te mã ajkam me ito impej catê ita na axãm? Xà ca ate mam Ejit catêjê nõ curan ata cuxà mã, ca apu icuran prãmte, ito hane? — hane. Mã Mojxe te hàhcuran xà ita na amji jarẽn par na amji jahkre pej, ne ampeaj kam cumã pa.
Mã Paro te Mojxe na harẽn par to hajỹr, ne cute ihcuran na me mẽn. Mã ma ramã me wỳjrea na, Mitij jõ pjê wỳr ipictor ne tẽ. Ne curi cator, ne curia jũmjê cahê na hàhhuc, ikre ata kam, ne pea hikwa tuw, ikre kam hàhhuc ata kra nõ me.
Mã ahna caku jàhtôa jirô pê Paro ata tyc jakàn pê, mã cormã Ixaher catêjê apu amji pupun xà kêanre to me amji pupu. Mã Pahpãm te mencwỳr kam hapac, ne cumã me caprĩ xà. Mã cute mehtehcajpar to amji kam hapac.
3Pê Pahpãm Ixaher catêjê to ihhimpej catê na Mojxe mã harkwa
Mã amcro atajê nõ na, põ kam Mojxe apu hũprequêt jõ carà cahàcti hôhti jamãr to mõ. Ampỳa mã, por Pahpãm jõ hàhkà jakôtti japrỳ te Ihcuhhyt jõ kẽn ata cahê na, apu hamãr to mõ. Mã Pahpãm te côjkwa pĩn harkwa na memprar catê na amji ton, ne cuhy kam Mojxe wỳr iwrỳc. Mã Mojxe te ahpytĩ nõ pupun, mã kam cuhy pôr, ne nee ajte to caxàr nare. Mã ma hỹrmã tẽ, cute hõmpun pej prãmte, ne taa amji mã:
— Ampo mã ajte apu hane? — hajỹr.
Mã Pahpãm te cumã hàkjêr ne cumã:
— Mojxe, nee ca ina gàhtêp tu nare, ne apar kà to pôj. Ampo na? He pom ca pjê kam xa ata ajteare mã, ne cupê itekjê, na ca atỳj apar cakrô kam xa — hajỹr.
Mã Mojxe te harkwa kôt hõ par kà to pôj, ne ampỳa mã xa ne kampa. Mã cute cumã harkwa to:
— Ipê apãm Pãm Cati, ne cormã ipê me aquêtjê pê Aprãw me, Ixac me, Jaco Pãm Cati wa — hajỹr.
Mã Mojxe te ihkuc pro, cute Pahpãm pupun ne ihtyc cupate. Mã Pahpãm cumã:
— Wa ite Ejit jõ pjê kam me ikwỳ te amji pupun xà kêanre to me amji pupun na me hõmpun. Na wa ha pjê ata pĩn me to icato, ne ma pjê impejti ata wỳr me to ihimpej to imõr to prãm. Na wa ha pa pahhi pê Paro wỳr akujate, ca ha cumã ijarẽ, quê me ikwỳ mã hikra, quê Ejit jõ pjê pê me cato — hane.
Mã Mojxe cumã:
— Jũ wỳr wa ha apu amji mã hamã, ne ijàpên xà ita to — hane.
Mã Pahpãm cumã:
— He wa ha itỳj gàpên xà ita kam acahê na apu mõ — hane.
Mã cumã:
— Wa ha Ixaher catêjê wỳr mõ, ne icato, quê ha jũm icukij ne imã: “Jũm jarkwa kôt mã ca me iwỳr acator?” hane. Jũ mã wa ha cumã amji jarẽn ita to? — hane.
Mã Pahpãm cumã:
— Ca ha me cumã ijarẽn to hane he “Pahpãm te imã amji jarẽn to hajỹr he: ‘Ipê, por mam me aquêtjê Pãm Cati ata’ ” hane. Quê ha ahna me acukij to: “Jũ mã mã jũm ita japrỳ?” hane, ca ha me cumã: “Jũm ata japrỳ pê ‘Ipê’ hane. Ampo na? He cupê me Pahton catê me, me pajõ Pahhiti pê Pahpãm. Ne cute haprỳa na me awỳr ikujahêc” hajỹr — hane. Mã Mojxe te impar.
Mã hipêr Pahpãm te Mojxe mã harkwa to:
— Ca ha Ixaher catêjê pê prohkam atajê to cuprõ, ne me cumã ijarẽn to hane he: “Me Apãm Cati te me ate me amji pupun xà kêanre na me apupun, na quê ha Ejit jõ pjê pê me ato cato, ne ma pjê impejti ata wỳr me ato ihhimpej to mõ” hane.
— Quê ha ihtỳj ate me cumã gũjarẽn xà ita to amji mã me hane, ne me akampa. Ne ihtỳj pjê jõ pahhi pê Paro wỳr akôt me mõ, ne me acunea acator xà ita na me ahwỳ. Ne ca ha me cumã: “Ca ha me ijamã, wa ha pjê kam me hamreare ata kam me imõar to amcro to incrê. Ne côjkwa kam me ijõ Pahpãm to me amji kampa ne cumã me ampo gõ” hane. Ne ramã pahhi ata te me acator na me gamãr nare na imã hahkre pej. Cwỳrjapê wa ha ite Ejit jõ pjê me, me to kên prãmte, me hỹrmã ite to kêanre xà ata kujate. Jirô pê mã quê ha ihtỳj pahhi ata me acator na me gamã, ca ha me acato — hajỹr.
4Pê Pahpãm Mojxe te ampo to ipihho xà caxuw cumã carôt gõ
Mã Mojxe te Pahhiti pê Pahpãm mã harkwa to:
— Mõrmõ quê ha nee me ikam hapac nare — hajỹr.
Mã Pahpãm te ihcukij ne cumã:
— Mẽr ampo mã ate gũhkra to ipyr ita? — hajỹr.
Mã cumã:
— Pĩ cajrer — hane.
Mã cumã:
— Mẽr pjê kam amẽ — hane. Mã Mojxe te pjê kam pĩ cajrer ata mẽn, mã cute cagã na amji jahkre, mã ma hũpate tẽ.
Mã Pahpãm cumã:
— Amji jaxà ne cagã ita japy na apy — hane. Mã cute amji jaxàr ne hapy na ipyr, mã hamre, hacpỹa mã cute pĩ cajrer na amji jahkre. Mã cumã:
— Ca ha me cumã ita to hane, quê ha me gahkre pej pyrentu — hane.
Mã Mojxe cumã:
— Ijõ Pahhiti, ipê icakôc xà to impejti jahkre kêatre — hane.
Mã cumã:
— Mẽr jũm te mã me hũmre itajê mã harkwa ton? Pom wa itea me amã me garkwa ton ita? Ca ha ita caxuw ma mehwỳr mõ, wa ha acakôc na atehcajpa — hane.
Mã cumã:
— Ajteare mã jũm ca ihkujate, ne pa, ca nee ikujahêc nare — hane.
Mã Pahpãm apu kam incryc ne cute cumã harkwa to:
— He atõ Arãw ri ihcakôc pejti, na wa ha acaxuw cumã ijarkwa ta, ca ha ca cumã harẽ, mãr quê taa pahhi mã awjarẽ. Wa ha pa me cumã acakôc na me atehcajpa, ne hanea ne me ate me cumã ampo ton xà atajê to hahkre — hajỹr.
Mã Mojxe te impar ne hĩxi me, mehkra japrôr ne cawrô cahàcre kam me hỹr, ne ma me to mõ. Ne cute hũhkra to hõ pĩ cajrer te cagã na amji jahkre ata pyr ne to mõ.
Pê Mojxe prohti kam Pahpãm jarkwa jarẽ
Mã ramã Pahpãm te Mojxe tõ pê Arãw ata, hĩpê ihkujahêc, mã me ipicaxêr. Ne ma Ejit jõ pjê wỳr me mõ, ne me cator. Ne cute me Ixaher catêjê kà to pit mã me cuprõn, cute me ajpẽn par prãmte. Ne cute me cumã Pahpãm carôt to ipipẽ. Mã Ixaher catêjê pê prohti kam Pahpãm te me hũtàr xà na, me hỹrmã Mojxe me Arãw kujahêc na me hũpar, ne hũrên ame hakry. Na ri cute Pahpãm to cati prãmte me cumã:
— Me ijõ Inxũ Cati! Ampeaj kam acati ne apej! Na ri ate me iwỳr me ikên pê me ito cator catê kujahêc pyrên me ijakry — hajỹr.
5Pê pahhi Paro hipêr Ixaher catêjê to kêanre
Jirô pê mã ri ma Paro wỳr Mojxe me Arãw mõ, ne cute me cumã hũjarẽn to:
— Ỹhỹ, Paro pê pahhi, me ipê Ixaher catêjê jõ Pahhiti, ne côjkwa kam me ijõ Inxũ Cati ata te amã harkwa to hajỹr he: “Me ikwỳ to tojnõ quê põ mã me cato, ne põ kam ame amji kĩn, ne ipejti na ame ijarẽ”. Hõhõ, cute amã harkwa to hajỹr — hajỹr.
Mã Paro jũpar ne me cumã:
— Wa nee ite me Apãm Cati pê Pahhiti ita na hahkre pej nare ita kam, jũ wỳr wa ha me apê mehkwỳ itajê to tojnõ quê me mõ. Ne cama hacpỹ mã me gàpên xà wỳr me amõr pyrentu! — hane. Ne caxuaw amcro ata na Paro te me ahna me hõ pahhi pahtỳjti ata to ihhimpej, ne me cumã:
— Me cumã me hàpên xà to ajcamẽ ne to catia, mãr quê me apêa to me apê, ne me ahna cô pra, quê hipêr me Mojxe me Arãw hêj xi xà ita par nare — hajỹr.
7Pê Pahpãm Paro mã ihkrã tỳj jahpan xà na, cute amji pupun xà kêanre gõ
Mã Pahpãm te hipêr Mojxe mã ihcakôc ne cumã:
— Hacpỹa mã Paro wỳr me amji jaxà ne cumã me ijarẽ. Quê ha ihtỳj meikwỳ pê Ixaher catêjê to tojnõ, quê ha me cato. Ne quê ihhêaj to Paro me acukij to: “Jũ mã wa ha ajte, ne me Apãm Cati te me akujahêc xà ita na me gahkre pej?” hane, me ajkaam quê ha Arãw pjê kam pĩ cajrer ita mẽ, quê ha Paro kam mare mã cagã na amji jahkre — hajỹr.
Mã ma Paro wỳr Mojxe me Arãw te amji jaxàr ata caxuw ri, pĩ te cagã na amji jahkre. Mã Paro te me hũxy xi catêjê to cuprõn, mã hanea ne cute me cagã ton. Mã Mojxe me Arãw te cagã ton ata te me cupê hõ cagã atajê cunea pin par.
Mã Paro te hõmpun cakrô, nee cute mempar nare. Ne amjia kôt ihkrã tỳj mã hàr, na ri ma amempar caca. Ne nee cute hõ pjê pê, Ixaher catêjê cator na me hamãr nare.
Mã Pahpãm amji mã:
— Mã ajte Ejit catêjê itajê nee amji mã me icupa nare, ne ite amji mã me ampo ton atajê pit cupa to me ipa. Ne ampo itajê pê Nir jõ cô me, ampo jarare me, ampo pry. Ne me cumã ampo itajê pê me hõ pahpãm. Na wa ha me cumã ampo itajê pê pahpãm nare na to ajpẽ, ne toa mehkên mã me cumẽ — hane.
Mã Pahpãm te ma amcro nõ jõ apẽ nõ na Mojxe me Arãw kujahêc, Nir jõ cô tohkà wỳr. Mã hanea ne Paro curi cator. Mã kam mare mã Arãw te hõ pĩ to cô cakwĩn, mã cô te me caprô na amji jahkre. Mã apu tep tyc partu. Ne jũ wỳr quê jũm cô ata kwỳ to ikõ. Ne ampo itajê cunea te cama Paro mã ihkrã to ihtỳj cati to cator. Cwỳrjapê ri Pahpãm te cumã cute amji pupun xà kêanre atajê kujahêc.
8Pê Pahpãm hipêr Paro mã cute amji pupun xà kêanre kujate
Me Cator Xà 8.1-22; 9.1-35; 10.1-29
Mã hipêr Pahpãm te Ejit catêjê mã mehkên xà nõ kujahêc. Ne Pahpãm hãn ne ampo itajê kujate, mã Paro hãn ne Mojxe me Arãw na ahwỳ, cute me ampo kên atajê to hamre prãmte, ne me cumã:
— Ca ha ampo kên itajê to me hamre, wa ha me acutor na me gamã, ca ha ma me acuto — hane.
Mã hãn ne Mojxe me Arãw ampo kên atajê to me hamre, mã hõmpu ne ma hacpỹ mã ame huwahi. Ne por Pahpãm ampo kên kujate itajê, cama Paro mã ihkrã to ihtỳj.
Na ri hipêr cute pôrôre jàhtôa ne ihkujahêc, mã cute pjê to hipu tu, ne ikre mã acjêj, ne hanea ne me hõ kam ajhu, ne hanea ne me hõt xà kam ajhu, ne ampo cunea kam ihkrĩ.
Jirô pê mã ri hanea ne cute prũmre xàre kujahêc, jirô pê mã ri hanea ne cute kôp kujahêc. Mã ma ajte cormã Paro ame cator ita na ame to ihcaca.
Mã Pahpãm te me cumã hà pahtỳjti nõ ita kujahêc, mã cute Ejit catêjê pê hõ parxare cunea jipej.
Jirô pê mã ri Pahpãm te me cumã cuhê kujahêc, mã Ejit jõ pjê kam me hãm catêjê cunea na cuhê.
Mã hanea ne cô carôt te amji to kẽn itajê pỳpỳm, côjkwa pĩn, ne cute apu põ pê me ipa catêjê kwỳ jixôn, ne ame hàprà atajê kwỳ to kên.
Mã hanea ne cute mehwỳr xycxyc jàhtôa ne ihkujahêc. Mã cô carôt te amji to kẽn te ame hàprà to kên nare atajê, xycxyc te ma to irô ne ipin partu.
Jirô pê mã ri cute Ejit catêjê kam awcapàtkô na amcro incrê ita kujahêc, mã me kam awcapàtkô ita na amcro incrê. Ne Ixaher catêjê kam, nee awcapàtkô nare.
Mã ajte cormã nee Paro te Ixaher catêjê kujahêc nare, ne nee me cator na me hamãr nare, ne cama cute Mojxe me Arãw mã me harkwa to:
— Nee ca ha hipêr me amji jaxàr nare! Ca ha hipêr me amji jaxà ne me ty! — hajỹr.
11Pê Pahpãm Mojxe mã me Hakren xà jõ amji kĩn to hahkre
Mã Pahpãm te hipêr Mojxe mã harkwa to:
— Wa ha hipêr Paro mã, hõ pjê kam mehkrĩ atajê cunea mã, mehkên xà nõ kujate. Jirô pê mã quê ha ihtỳj me gamã, ca ha me acato. Wa ha awryc mã awcapàtkô picapôn kam Ejit jõ pjê cajpuw tẽ, quê ha me hũmre cakônĩ pỳpỳm atajê cunea ame ty. Quê ha mam Paro mã ihkra xũmre cakônĩ pỳm ata ty, ne ihkôt mehkwỳ cunea pê mehkra xũmre cakônĩ cunea ihtyc pa. Ne hanea ne ampo pry mã mam ihkra xũmre pỳpỳm atajê te hajỹar ne ihtyc pa.
— Ne pom putwrỳ ita kam, pjê ita pê me acator xà, quê ha cupê caku cunea kam, me gõ amji kĩn catia jõ putwrỳ, ne me gõ amji kĩn ita quê ha hane he.
— Ca ha amcro te tej ita na ahpỹanre na ikre kôt ame carà cahàcre hôhti kra xũmti te xwỳ nare na caku pyxit atajê capi ne me to caprã, ne ma me hamã. Ne amcro te cwatôxi ita jõ caxwa kam, ca ha me carà cahàcre kra itajê cunea cura. Ne me caprô cwa, ne me to me gũrkwa jarkwa jatom to me hũjê.
— Ne me acunea cuhy na me hĩ xêt, ne ampo hô xỳre ata kam ame ku. Ne nee ame, por pãw kam ampo jacrô te pãw to cati xà atajê kur nare, ne quêt me pãw tỳjre pit ku. Ne por quê ha me gõ cahhur ahtwỳ atajê, ca ha me to caxàr partu. Ne me akà me, me apar kà mã me amji jacjê, ne me axy xà caxuw amji mã me gàhcuprõn hiahpuro, ne me acuhhêa kam me apà. Ne me gũjarêan kam, me gàpàn cati hiahpuro, por me aprar xà jũwryhti atajê caxuw. Pom me gõ ita pê me Apãm Cati jõ amji kĩn jõ, ata wa me amã to hahkre.
— Ỹhỹ, wa ha Ejit jõ pjê cajpuw tẽ, ne mehkra cakônĩ cunea jipej tu. He, ipyxit peaj ne ipê me Apãam to me Apãm, ne imã me gõ amji kĩn ita to, ate me ito amji japackre na me ato prãm. Na ca ha caku cunea kam atỳj me amji kĩn ita to — hajỹr.
Carà cahàcre amji to Ixaher catêjê kritxwỳ
Mã Mojxe te Ixaher catêjê pê prohti kam mehcunea to cuprõn ne me cumã hũjarẽn to:
— Me acunea amji mã me carà cahàcre hôhti cakônĩ xũmre na caku pyxit atajê pyxit ne me capi, ahpỹanre na ikre kôt, ne me to amji tỳj. Ne mehcura, ne cratti kam me caprô cjê, ne caxuw me ahtu pre incwa, ne me to gũrkwa jarkwa jatom to me hũjê, ne hanea ne kỳj rũm me to hatom. Ne nee caxwa ri ikre pê ame gapôj nare, mãr quê Pahpãm me ana tẽ, ne hõmpu, ne nee ame akra caxun nare. Ampo na? Quê ha me Pahpãm pjê ita kam wrỳ ne apu mõ, ne Ejit catêjê xũmre cakônĩ cunea jipej. Quê ha harkwa na carà cahàcre kra pê me pahkritxwỳ ata caprô pupu, ne nee mehcuran catê jamãr, quê ha me akra curan wỳr mencjêj nare — hajỹr.
Pê Pahpãm me cakônĩ jipej
Mã Ixaher catêjê te Mojxe te ampo na me mẽn atajê ton partu. Mã Pahpãm te caxwa ata kam côjkwa pĩn harkwa na cumã hàprê catêjê nõ kujahêc, mã cute Ejit jõ pjê kam me cakônĩ catêjê jipej tu. Mã me hõ pahhi catêjê pê mehkra xũmre cakônĩ tyc par. Ne hanea ne me cupê pahhi nare catêjê pê mehkra cakônĩ tyc par. Ne hanea ne ampo pry pê ihkra cakônĩ atajê tyc partu.
Mã Paro me cumã me hàpên catêjê me Ejit jõ pjê kam, hõ krĩ cunea kam, caxwa ri ajpẽn to me hỹr, ne ame amrãa to ame amrã. Ampo na? Nee ikre nõ pyxit ne kam mehtyc nare, ne Ejit jõ pjê cunea kam mehtyc. Mã Paro te Mojxe me Arãw na hàhwỳr ne me cumã:
— Hamre! Gapacta ne me acunea me ipê me acato! Ne ma me gõ Pahhiti te amji mã me ato prãm xà ata to, ca me. Ne hanea ne me gõ carà cahàcre hôhti me, pryti cunea to me acutor tu, ne ma cumã me icajrẽn, quê me ito impejti ne — hajỹr.
Ne pê Ejit jõ pjê pê me cator xwỳjrea na, ramã Mojxe mehkwỳ mã Ejit catêjê na me hàhwỳr na, harkwa ta. Mã harkwa kôt ma me hỹrmã ame pra, ne ihpore catia na cute me hàhwỳr, ne hanea ne mehkà jàhtôa ne cute ahna me hàhwỳr, ne cormã cute me kẽn pràti me, wakỳre pràti me, me hũhhi na hê xà me, ahna me hàhwỳr. Mã Pahpãm te Ejit catêjê na me hàhwỳr xà ata kam mehkwỳ tehcajpar, ne por ampo cunea na me hàhwỳr atajê, cute me cumã hõr partu.
Mã caxwa ata kam Ixaher catêjê te Ejit jõ pjê pê me cator prãmte me mõr na me ipyr.
13Pê Ixaher catêjê cunea Ejit jõ pjê pê cato
Ỹhỹ, pê Pahpãm mehkwỳ to mõr xà ita pê hane he. Pê me cumã ahcakrã nõ kujate, mãr quê ihkôt me ipa. Ne amcro mã mam ahcakrã ita ahpar mã iry to ipa, ne me cumã pry to ipipẽ to ipa, mã ihkôt me ipa. Ne caxwa mã amji to cuhy ne me cumã pry cujro to ipa, mã ihkôt me ipa. Mã Pahpãm te Mojxe mãn ne cumã:
— Me ikwỳ pê Ixaher catêjê mã awjarẽ, quê Côxwatepti cahê na me ahtwỳ. Ampo na? Quê ha ihtỳj Paro ame apictor na ame acãmjĩ, ne ihtỳj põ me côxwa tohkà na ame gapê. Ne wa ha Paro mã ihkrã to ihtỳj, quê ha me pahpynã. Wa ha ita caxuw hõ krãhtare cahhur, me cute icatihti na me ijarẽan to me ijarẽn na me to. Quê ha ita caxuw Ejit catêjê me ijahkre pej, ipyxit peaj ne ipê me Apãm carôt tỳjti cati na — hajỹr.
Mã Mojxe te impar ne me cumãa harẽn. Mã Ixaher catêjê jàhhuc, por curi Pahpãm te me to hũjahkre xà ata ri. Mã pea Ejit jõ pahhi pê Paro ata wỳr, Ixaher catêjê te nee me amji jaxàr xà nare jarẽn cator.
Mã Paro te cumã me hàpên catêjê cukij, ne me cumã:
— Ampo na mã pahte me Ixaher catêjê jamãr, mã amũ me cutor ne cute me pamã hàpên jicu? Hacme mehkôt! — hajỹr. Ne cute hõ cawrô jõ kujti to hàhcuprõn, ne cute cawrô jõ kujti to xêjxẽnta ne capi, ne kam hõ krãhtare to hipu, ne ahna me hõ pahhi pyxwỳr partu, Ixaher catêjê kôt me to imprar xà caxuw.
Mã Ixaher catêjê te amji kôt Ejit catêjê jõ krãhtare pupun, ne ampeaj kam me cumã me hũpa. Na ri cute Pahpãm te mehtehcajpar ne me hũtàr na me hàhwỳr, ne me Mojxe mã:
— Xà me ijipej xà caxuw mã, ate põ mã me ito acator? Ne ampo na mã ate Ejit jõ pjê pê me ito acator? — hajỹr.
Mã Mojxe me cumã:
— Nee ca ame pa nare, ca ha ita kam, me Pahpãm te me pahpytàr xà impejti ita na me hõmpu. Ampo na? Pom ca ita kam ame Ejit catêjê pupu itajê, ca ha nee hipêr jũ caxuw me hõmpun nare. Pahpãm quê ha jũ na me pahto ne me pahpytà. Jũ wỳr cu amjia kôt me amji pytà — hane.
Pê Pahpãm me cumã Côxwatepti to ajcapô
Mã Pahpãm te Mojxe mã harkwa to:
— Mojxe, Ixaher catêjê mã awjarẽ quê me cahi rẽ. Ne ca, ca ha côxwa cwỳrpê gõ pĩ cajrer pẽ, quê ha ajcapô, ne ihcajpuw me amã pry. Ca hame acunea côxwa cajpuw pry ata kôt, amcràre kôt me rê — hajỹr.
Mã Pahpãm te ahcakrã to ipintuw, ne Ixaher catêjê me Ejit catêjê cote na inxôr. Ne hãn ne ahna caxwa mã ahcakrã ata amji to cuhy ne Ixaher catêjê rũm ahcujro, ne Ejit catêjê rũm ri awcapàtkô. Na quê nee Ejit catêjê Ixaher catêjê cahuc nare.
Mã Mojxe te cô incwỳrpê hõ pĩ cajrer ita pẽr, mã pea Pahpãm te cô to ipicapôn. Mã kôc pahtỳjti ata cô cajpuw, pry ata kôt apêa to apê. Mã pry ita kôt amcràre. Mã ihtỳj Ixaher catêjê Côxwatepti cajpuw amcrà ata kôt me irêr par. Mã cô te me hũjê kam amji to kwỳc ne xa.
Pê Ejit catêjê cô kam ame ty
Mã Ejit catêjê jõ krãhtare me, me hõ cawrô me krãhtare me, Paro jõ cawrô jõ kujti me, Ixaher catêjê kôt cô mã me hàr. Mã awcahti xà wỳr Pahpãm te Ejit catêjê to kên, ne me huwahi kam ihtẽm. Mã pea cawrô jõ kujti amjia kôt ipinkrên, ne ihpỳpỳm, cwỳrjapê quê nee ihtẽm nare.
Mã Ixaher catêjê cunea côxwa jĩkjê mã me irêr par, mã Pahpãm te Mojxe mã:
— Hacpỹa mã côxwa cwỳrpê gõ pĩ cajrer pẽ, quê ha cô amji jaxà ne Ejit jõ krãhtare me, cawrô me, hõ kujti cunea pro, ne me ipĩr partu — hajỹr.
Mã Mojxe te cô incwỳrpê hõ pĩ cajrer ata pẽr, mã hacpỹa mã cô picaxêr, ne cute Paro jõ krãhtare me, hõ kujti cunea pro, ne ihcunea to ipictor. Mã nee côxwa na ame irêr prãm atajê nõ jàhhuc nare.
Hõhõ, Pahpãm te Ejit catêjê jũhkra pê Ixaher catêjê pytàr xà ita to ri, cute me cupê me hũtàr. Mã côxwa tohkà na, cute Ejit catêjê tyc ne ame hikwa na ame hõmpun. Ne cute me ahna Pahpãm carôt tỳaj to ihtỳj pupun, ne ame amji mã hũpa. Ne cute amji mã Pahpãm to me cati prãmte me cumã:
— Apeaj to apej! — hajỹr. Ne hanea ne cute Pahpãm mã hàpên catê pê Mojxe ata to amji mã mehhimpej.
16Pê Pahpãm mana to Ixaher catêjê mã harte
Ne ma põti ata cajpuw cute me mõr kam me to incrà. Mã mehcunea Mojxe me Arãw cuna mã amehcakôc, ne me cumã me harkwa to:
— Cu rỳ mã curia Ejit jõ pjê kam ame ty na mã. Ampo na? He quêt curi ampeaj kam me pamã me pajõ cati. Mã ajte ate me põti ita mã me ito acator, ate prãm to me ijipej prãmte — hane.
Mã Pahpãm te mempar ne Mojxe mã:
— Hõmpu he, wa ha côjkwa pĩn, iràrà cunea na me amã me gõ pê mana ata kujate. Quê hapacta ne, cute ame ampo na amji mã me prãm atajê cawrà, ne ame cuku. Ne me cumã quê amcro pyxit kam me cawrà to pyxit, ne amcro te xêj ita jõ iràrà na, quê ha me cawrà to ajkrut. Ampo na? He amcro te xet ita jõ iràrà na wa ha nee me amã ihkujahêc nare. Wa ha cute me ipar na me hahkre pej prãmte, me cumã ampo itajê to — hajỹr.
Mã Mojxe me Arãw te Ixaher catêjê to cuprõn, ne me cumã:
— He amcro ita kam, ca ha me Pahpãm te Ejit catêjê jõ pjê pê me ato cator na me hahkre pej. Ne apẽ ita jõ iràrà na, ca ha me Pahpãm carôt pupu. Ampo na? Me ate cuna mã ame acakôc na cute me apar. Na quê ha pyt kam me amã hĩ gõ, ne iràrà na me amã kwỳr xôm gõ — hajỹr.
Mã caxwa ata kam pryre jara jàhtôa ne cator, ne ihhêj rũm cupê tutre, ne cute põ ita to ipictor tu. Mã mehcura ne me cuku.
Ne iràrà mã ampeaj kam atàr, ne atàr ata crà me ajkaam, mã krãa, ampo pê kwỳr xôm pyràcti, inxôti ita cator, ne apu ihkrĩ pjê kam. Mã cute me hõmpun, ne ahna me hàhcukjêr to:
— Mẽr ampo mã ita? — hajỹr.
Mã Mojxe me cumã:
— Kwỳr ri Pahpãm te me amã hõr, ne haprỳ te mana. Na ca ha amji mã, me gũrkwa caxuw, ate ahna me prãm atajê to ame cuprõ — hane. Mã ame hapôj, ne ahpỹanre na cute ame hõ itajê incwỳr.
Mã Mojxe te me cumã:
— Ca ha nee me anõ gõ pê mana ata to ihhi, ne amcro nõ caxuw amji mã ihcahhur kwỳ xãm nare — hajỹr. Mã nee mehkwỳ kwỳ te amempar nare, ne amehcahhur pyxwỳr. Mã ahna apẽ mã cute ame hõmpun, mã ramã kam ampo côre, ne ihkro. Mã Mojxe ame kam incryc.
Mã iràrà cunea na me hõ ata pit cawrà to mehcuhhê. Mã hãn ne amcro cacro ne ihxêt, mã pjê kam kwỳr to ame cuprõ atajê hamre ne jũ kam pra. Ne amcro te xêj ita kam ri, cute me kwỳr to cuprõn to me ipijakrut. Mã me hõ pahhi catêjê te me Mojxe cukij, ampo na mã amcro te xêj ita kam hãn ne ame kwỳr to cuprõn to me ajkrut. Mã me cumã:
— Ampo na nare, me Pahpãm te ri me amã amcro ata to ajteare mã, cute me ato ihkôt prãmte. Ne amcro te ihkwỳ to xet ata ri, ajteare mã ne pyxit peaj ne cupê Pahpãm jõ amcro, ne impeaj to impej — hane. Mã Pahpãm jõ amcro ata kam hõtpê mehkwỳ kwỳ ma põ mã me cator, ikre pê, ne ame hõ japê, ne nee cute me ampo mã cator nare.
17Pê Pahpãm kẽn pĩn me cumã cô gõ
Ne Ixaher catêjê me mõr xà ata kam, pjê nõ japrỳ to ame Repitĩ ita mã me cator. Ne me cator xà ata kam me cupê cô jamreare, mehkõm xà caxuw. Mã cute me Mojxe mãn kam mehtẽm, ne me cumã:
— Me imã cô kwỳ, wa me to ikõ — hajỹr.
Mã Mojxe me cumã:
— Ampo na mã ca ame ikam acryc, ne Pahpãm to ate me amji mã ahimpej nare kam, amji caxuw amehcyt to me apa? — hane.
Mã ampeaj kam me cumã kôr, mã me cute me Mojxe mã harkwa to:
— Ampo caxuw mã ca ate Ejit jõ pjê pê me ito acator, põti ita wỳr, quê hakôr me ijipej, me ikra me, pryti mea mã? — hajỹr.
Mã Mojxe te Pahpãm mã amji jarẽn to hajỹr he:
— Ampo to wa ha ajte? Ramã kẽn to cute ame icapêr ne me to icuran xàa kam — hajỹr.
Mã Pahpãm cumã:
— Mẽr mam amji kôt prohti kam mehkwỳ to mõ, quê ha hapu na mehkwỳ jàhtôti atajê me akôt me mõ, kẽnti japrỳ pê Ihcuhhyt ata wỳr. Ne gõ pĩ cajrer ata to gapac kêt nare ne apy ne to mõ. Wa ha curia kẽnti pê Ihcuhhyt ata krac ri kẽn na acajpa, ca ha to kẽn tac, quê ha cô cato — hane.
Mã Mojxe ma kẽn wỳr tẽ, ne curi cator. Ne me kam mare mã, cute hõ pĩ cajrer pyr, ne to kẽn tac. Mã hamre cô te amji mã hũhhyr pyrentu ne ajpjê. Mã mehcunea me to ikõ.
19Pê Pahpãm Mojxe mã kẽn po kam hũhkrahhi te ihhôc ata gõ
Me Cator Xà 19.1-2, 16-18; 24.12-18
Ne Ejit jõ pjê pĩn Ixaher catêjê cator na, putwrỳ incrê kam ri, kẽnti ata jõ pjê mã, me cator. Mã pjê ata kam ampo hamreare. Mã kẽnti ata krac ri me hàhhuc. Mã Pahpãm te Mojxe mã:
— Ca ha kẽnti na api ne curia ahtwỳ. Wa ha amã, ite kẽn po kam ijarkwa na ihhôc ita gõ, ca ha me cumã to hahkre — hajỹr.
Mã Mojxe me, ihtehcajpar catê pê Jojuw, ma Ihcuhhyt jõ kẽn pê Pahpãm jõ kẽn ata wỳr me tẽ. Ne kẽn ata na me hàpir xwỳjrea na, pê prohti kam me cumã harkwa to:
— Ita ri me ijikaj, wa ha ahnaa me amji jaxà. Ne quê ihhêaj to me amã ampo na prãm, ca ha me itõ pê Arãw cukij — hane.
Ne ma kẽnti ita na me hàpir, ne pea ahcakrã nõ ita wỳr me cator, ne cumã me hàr. Mã Pahpãm carôt jàhcujro te kẽn ata pro, ne cute ihcujroa to amcro to xêj. Mã kẽnti ata jàhcujrõn, ne kam cuhy, ne kam ihkũm, ne kypê hàhkrihkrit nare. Cwỳrjapê ri mehcunea mã hũpa, mã hũpate amehtertet.
Ne amcro te xet kam ri, me Pahpãm te ahcakrã ita kam Mojxe mã hàkjêr. Mã ma hỹrmã hàpir, ne curia ahna amcro te cwarẽnta. Mã Pahpãm te Mojxe mã ihcakôc jicu, ne cute cumã kẽn po kam hũhkrahhi te ihhôc ata jõr. Pê Pahpãm kam harkwa na ihhôc to hane he.
20Me cumã harkwa to ihhimpej xà pyxit
Ipê me gõ Pahhiti pê me Apãm Cati. Ne imã me akwỳ kĩan to me akĩn. Cwỳrjapê wa ite Ejit jõ pjê pê me ato icator, por curi me apê cama me cumã me gàpên catêjê ata pĩn. Na wa itea me amã amji jõr, ne amji to me gõ Pahhiti. Na ca ha nee iràn xà na, hipêr amji mã me jũm to me gõ pahhiti prãm nare. Ne imã me pahte ajpẽn kĩnti ita na me ato prãm.
Me cumã harkwa to ihhimpej xà pijakrut
Ne pa wa ha ampo kên cunea pê me apytàr to ipa, ne me atehcajpar to ipa. Na ca ha nee ame apãm cahàc krekà itajê to amji kam me gapac nare, ne nee hanea ne ame ampo carõ kên pê cupẽ jarôti ata to amji kam me gapac nare, ne nee cute me atehcajpar xà na ame ahna gàhwỳr nare. Nãmri ca ha ate iràn xà na amji mã me jũm to hajỹr na, ca hama ramã ame icaca, wa ha itỳj ahna ame akam icryc, ne hahpan xà na ame ato kên. Ne por pjê cunea kam me cumã ikĩnti, mã ijarkwa kam me hapac to me ipa atajê, wa ha imã mehkĩn, ne me caprĩ.
Me cumã harkwa to ihhimpej xà incrê
Ne imã me akwỳ kĩnti incwỳrjapê wa ite me amã ijarkwa me ijaprỳ jõr. Na wa ha me amã gaprỳ to “Me cupê Pahpãm tekjê”. Cwỳrjapê ca ha ijaprỳ to me amji jamãr peaj ne. Ne catyt kam me apa, ne nee ame ampo kên ton to me apa nare. Nãmri ca ha ame ampo kên ton to me apa, quê ahna me apupu, ne ito amji kam me hapac to: “Mõrmõ me Hũm ita kêanre na mã, ihkôat mehkêanre” hane. Nãmri ca ha ate me ipar nare, ne mãnea mã ate me ampo kên ton to me apa to hajỹr na, wa ha itỳj hahpan xà na ame akam icryc, ne ame ato kêanre ne.
Me cumã harkwa to ihhimpej xà te cwat
Imã me akwỳ kĩnti na pê wa, ite me amã pjê me ampo cunea impejti itajê jõr xà caxuw, to ijàpêan to amcro to xêj. Ne pom amcro te xet ata to, wa ite ajteare mã, kam me pahkôt xà na. Na ca ha atỳj me to amji japackrea ne, ne icuxà amcro te xêj itajê kam ca ha me apê, ne cute xet ita kam, ca ha nee ame gàpên nare, ne cama me kôt. Ne amcro ata kam, ito pit mã me amji kam gapac to me apa.
Me cumã harkwa to ihhimpej xà te xĩc
Imã me akwỳ kĩnti incwỳrjapê wa ite me amã me apãmjê me, me axyrxwỳ jõr, cute me gapackre xà caxuw. Ca ha pjê ita kam, amã amji to apijapar to irya to prãm na, ca ha atỳj me apãmjê me, me axyrxwỳ kampa ne amji mã me hũpa.
Me cumã harkwa to ihhimpej xà te xêj
Imã me akwỳ kĩnti incwỳrjapê, pê wa pa amji mã me ato, ate amji to me apijapar xà caxuw. Na ca ha nee jũ caxuw me jũm curan nare.
Me cumã harkwa to ihhimpej xà te xet
Imã me akwỳ kĩnti incwỳrjapê wa ite ahpỹanre na me axũmre mã, me aprõ jõr par. Ne hanea ne ahpỹanre na me apyjê mã, me apjê jõr par, ahte ate ame apa cupate, ate me ajpẽn kĩn, ne ajpẽn na me gũjaxôr prãmte. Na ca ha nee amji jũ na ame aprõ kĩn nare, quê ha pyjê xwỳjê nee amji jũ na amempjê kĩn nare, ne nee ajpẽn pê ame amji caxun nare.
Me cumã harkwa to ihhimpej xà te ôjtô
Imã me akwỳ kĩnti incwỳrjapê wa ite me amã ampo kwỳ cunea jõr, ate me to atekjêa to prãm to. Na ca ha atỳj ajpẽn mã me ampo itajê na pahti ne, ne nee jũ caxuw jũm pê ampo to me gàhkĩj nare.
Me cumã harkwa to ihhimpej xà te nowi
Imã me akwỳ kĩnti incwỳrjapê, ca gapacta ne atỳj amji mã me ikampa. Ampo na? Wa hãn ne ampo to icakôc, ne nee apu ihêj xi to icakôc nare. Na ca ha icuxà, nee ame ahêj xi jarẽn nare. Ne nee me akwỳ kên mã me irẽn prãmte, ame to ahêj xi to me apa nare.
Me cumã harkwa to ihhimpej xà te tej
Ne imã me akwỳ kĩnti incwỳrjapê ri imã me akwỳ me, me amã me ajpẽn kĩnti na me ato prãm. Na ca ha nee me akwỳ mã ampo atajê na ame amji caprẽp nare. Ne ampo itajê pê: me hũrkwa me, hĩxi me, cumã me hàpên catêjê me, cute ampo to me ipijapar xà me, ampo pej itajê cunea me.
Ixaher catêjê cunea mã Pahpãm cupa catia to cati
Hõhõ, ita to pê Pahpãm Mojxe mã ihcakôc. Mã pjê kam me hàhtôti atajê te me pahhàjê jàhcuxê me, kẽn kam ihkũmti ata pupun, ne kam me hàhkrihkrit me, hõhhi jàkôrti catia ata kam me hapac, ne hũpate amehtertet. Ne ampỳa mã amehcuhhê, ne cute me Mojxe mã me amji jarẽn to:
— Ca ha caa me imã Pahpãm jarkwa to acakôc, wa ha itỳj me akampa. Ne nee me ina Pahpãm te me imã ihcakôc na hamãr nare. Quê me imã ihcakôc, wa me icunea ame ty — hajỹr.
Mã Mojxe te me cumã harkwa to:
— Nee ame amji mã pa nare. Ampo na? He nee Pahpãm me amã ihkên jõr nare. Ne cama cute me acapi, ne ate amji mã me to ahimpej kam me to acrà na, cute me gahkre pej prãmte ri me amã carôt tỳjti ita to ipipẽ to mõ. Ca hame hõmpun to mõ, ne me hahkre pej, ne amji mã me hũpahti to me apa. Ne ca ha nee cuna mã ame ampo kên ton nare, ne atỳj ame apej mã me apỳpỳm — hajỹr.
Mã ampỳa mã amehcuhhê, mã ma awcapàtkôti ata mã Mojxe pyxit peaj ne Pahpãm wỳr hàr. Mã hipêr Pahpãm te me hapackre to hàhtôa to hàhtô.
32Pê Ixaher catêjê amji mã pahpãm cahàc krekà to
Mã Mojxe curia kẽn na apu ihkên, mã me hàhtôti atajê te me hapêê ne Arãw wỳr me pra, ne me cumã harkwa to:
— Me imã ampo krekà pê pahpãm cahàc nõ to, quê ha taa me pahto ihhimpej, ne me pahto mõ. Ampo na? Pom Mojxe te Ejit jõ pjê pê me pahto cator ata jũ kam ipictor. Wa nee ampo te jũmã ton xà ata na ite me hahkre pej nare — hajỹr.
Mã Arãw me cumã:
— Mẽr ite ton xà caxuw me imã wakỳre pràti kwỳ — hane. Mã cute me cumã hõr, mã Arãw te pryti kra xũmti krekà na ton. Mã me cumã impejti, mã cute me harẽn xà te cupan xà ata to me ajpẽn mã:
— Pryti kra krekà ita pê ri me pajõ pahhiti pê pahpãm, mã Ejit jõ pjê pê cute me pahto cator — hajỹr. Mã Arãw te cumã hãm xà ita to ihkàhti, ne himoac kam pryti krahti ata xãm, ne amji mã me harẽn to hane he:
— Apẽ quê ha me Pahpãm jõ amji kĩn — hane.
Mã apẽ ata na cute me pryti kra krekà pê pahpãm cahàc ata mã ame ampo pry curan, ne cuna mã ame to caxàr, cute me to ihcajpuaw prãmte. Ne cute amehkĩn to ihhi jirô pê me hỹr, ne ame hàpàn ne amehkõm jirô pê, cute ame hapactu kam me to ihtẽm.
Mã Pahpãm te Mojxe mã:
— Apu uua ne wrỳ, nãmri me hàhtôti atajê te nee me ijarkwa itajê impar nare, ne mehkên mã me hàr. Wa ite ramã me hõmpun, mã me hũpar nare ne ampeaj kam mehkrã tỳj, na ri ahna ampeaj kam me kam icryc. Na wa ha me hipej, ne ato irô ne akam me to hàhtôa — hajỹr.
Mã Mojxe te ahna hàhwỳr ne cumã:
— Ampeaj kam ri mehcunea kêanre cakrô, ca ha me caprĩ, ne nee ame kam acryc nare. Ne por pê ca mam amã me hàpên catêjê pê Aprãw me, Ixac me, Jaco mã ate amji ton xà ata to ca amji japackre. Pom pê ca mehtàmxwỳ mã jũ caxuw pjê pejti mã me hàr xà to awjahkre ata to, ca ha amji japackrea ne — hajỹr.
Mã nee me Pahpãm te me hipej nare, mã Mojxe te kẽn po kam Pahpãm jarkwa pyr ne ahpar mã to mõ. Ne cute wakỳre pràti te pryti kra krekà pupun, ne hanea ne ipu na ame hapactu na me hõmpun, ne me kam incryac to me kam incryc. Mã cute pjê kam kẽn po ita to hũcapêr, mã ihpỳm ne ipicahhêc. Mã ma me hỹrmã tẽ, ne cute pryti kra krekà ita jũhhyr ne gãn par, ne kam cuhôn ne to caxàr, ne cô kam ihpro jaxwỳr, ne cute me to kõm partu na me mẽn. Mã Pahpãm te me cumã hà nõ pahtỳjti ata kujahêc, cute ame pryti kra krekà pê pahpãm cahàc kĩn jahpan xà na.
33Mojxe te Pahpãm mã ihcakôc xà
Pê Mojxe ajco Pahpãm mã mehcakôc xà caxuw ikre pyxwỳr to ramã amji pyràc tu, por curi jũ ri me hàhhuc xà atajê kam. Ne pê ampỳa mã ajco me hàhhuc xà pê hũxwỳ. Ne por pê ajco Pahpãm mã mehcakôc prãm atajê, quê ha curia hỹrmã me ipa. Pê ajco Mojxe Pahpãm mã mehcakôc xà jũrkwa wỳr ipa, pê ajco mehkwỳ cunea me hũrkwa jarkwa mã mehcuhhê, ne kam mento cuhhê ne me hõmpun itaa na, pê ajco acjêj.
Pê ajco ahcakrã catia ata harkwa mã irôrôc, pê kam Pahpãm ajco Mojxe mã ihcakôc. Ne pê hũrkwa jarkwa mã amehcuhhê atajê ajco Pahpãm pejti na me harẽ. Pom ikre kam Pahpãm mã mehcakôc xà ita kam ri, hãn ne Pahpãm me Mojxe ajpẽn mã mehcakôc, ne hãn ne Mojxe kuc ri cumã awjarẽ. Pom hãn ne me hũmre ame hõ ikwỳ nõ mã mehcakôc ita na mã, hãn ne Pahpãm Mojxe mã ihcakôc. Ne cute cumã ihcakôc jicu jirô pê mã, pê ma hãn ne Mojxe mehkwỳ wỳr amji jacjê.
Ne pê Jojuw intuwti na cupê Mojxe tehcajpar catê ata, pê curia ajco apu Pahpãm mã mehcakôc xà jũrkwa kam Mojxe jakàn pê ahtwỳ ne apu ipa.
34Pê Pahpãm hipêr kẽn po kam harkwa na ihhôc
Ne amcro nõ na Pahpãm te Mojxe mã harkwa to:
— Hipêr kẽn po to ajkrut ne cuprã, ne ajpên to mõ, wa hipêr kam ijarkwa na amã ihhôc, ate ihcahhêc ata jaxà na — hajỹr. Mã cute cuprãr ne ma to tẽ, ne curia hipêr ahna amcro te cwarẽnta. Ne ihtỳj Pahpãm me ajpẽn mã ihcakôc. Ne ma hacpỹ mã iwrỳc ne ihkuc pràti. Ampo na? Cute Pahpãm pupun na ri. Mã mehkwỳ ma ame hũpa, mã cute cupẽhkà to ihkuc pro, mãr quê nee me hõmpun nare.
Ampo kà te Pahpãm jũrkwa caxuw Mojxe te hàhcukrêj to hàhcuprõn
Ne pê cormã Mojxe apu kẽn jimoc ri mõr kwỳa kam, pê Pahpãm cumã hũrkwa ton xà ata to hahkre, jũ mã quê ha ne Pahpãm jũrkwa xãm to ne hãm. Jirô pê mã ri Mojxe te Ixaher catêjê mã harkwa to:
— Pahpãm te imã me acaxuw harkwa hyr. Na ca ha me gàhcajrẽnti atajê, atỳj Pahpãm mã me ampo jõr prãm, ne ampo itajê to ca ha hỹrmã me apa he: wakỳre pràti me, wakỳre prà jakare me, wakỳti tỳjti me, cupẽhkà kukũmti, intepti, jakati, impejti atajê me, carà cahàcre kà me, pĩ caxwỳn tỳjti impejti atajê me, ihpôc xà caxuw pĩ xô cacô impêti atajê me, ampo cacô impêti cuxwati atajê me, wakỳre prà tepti atajê te hajỹar. Ne atỳj ajpên hỹrmã me to apa.
— Ne por Pahpãm te me anõ mã cute me amji jahkre pej jõr atajê cunea, quê ha ajpên ame pra, ne me cuprõ. Ne Pahpãm te, cute ampo to me hàpên xà me mẽn atajê to, ame cumã apê. Cu ha Pahpãm mã ampo kà te me hũrkwa nõ xãm, ne hanea ne pĩ to me hàmcjên xà nõ ata jũjê, ahna cute me hapỳn xà caxuw, cu ha me to. Ne hàmcjên xà ita kam, por cute kẽn po kam, me pamã harkwa to ihhimpej xà te tej jirên, ne ahna ihhôc ata, cu ha caxwãm pê hir. Ne quê ha cupê Pahpãm te me pamã amji ton na, me pahte me ajpẽn par xà jàmcjên xà.
— Ne hanea ne cupẽhkà impejti te Pahpãm jũrkwa caxwỳn tête hahêr xà ata, cu ha me to, ne ahna me hàpàn xà nõ me, me to, ne pĩ to me hũjê, cute me hapỳn xà caxuw. Ne cô cuhhê xà itajê me, ampo jacrô cuxwati to caxàr xà atajê mea mã, cu ha me to. Ne hanea ne hũrkwa caxwỳn nõ to cujro xà caxuw, cu ha hàhcujro xà nõ me to.
— Ne hanea ne Pahpãm mã me hàpên catêjê cunea kà impejti atajê me, Arãw kà me, mehkra kà mea mã, cu ha me cumã to. Hõ, me pajàpên xà itajê cunea to, cu ha Pahpãm mã me — hajỹr.
Mã ma me hũrkwa wỳr ame ipicràn, cute ame cumã ampo jõr xà atajê wỳr. Ne por Pahpãm Carõ Pejti ata ri mehkrã caxwãm pê cute me cumã ampo jõr xà atajê to ihhimpej. Mã cute amencwỳr, ne ma hỹrmã me to amji jacjên. Mã pyjê kwỳ te cupẽhkà ton jahkre pej atajê te me cupẽhkà ton. Mã pyjê kwỳ nõa te carà cahàcre kà to me cupẽhkà. Ne me hõ pahhi catêjê atajê ri kẽn pràti itajê to me mõ. Ne me hàhcajrẽan kam me hũmre me pyjê te Pahpãm mã me ampo jõr xà atajê to me mõ, ne me cumã hõr.
40Pahpãm ampo kà te ikre mã hàr ne kam ihkrĩ
Mã Mojxe te hàpên xà ata krã curan, me ajkaam mã ampo kà te Pahpãm jũrkwa te amji jipêj ne xa. Mã Pahpãm jõ ahcakrã te ikre pro, mã carôt jàhcujro te to hipu tu. Na quê nee Mojxe ahcakrã kam Pahpãm carôt jàhcujro ata mã hàr nare.
Pê ahcakrã ata ajco api ne ma me cumã ipa. Pê Ixaher catêjê ajco me hõmpu ne ma ihkôt me ipa. Ne ajco pry kà te ikre ata to ma me ipa. Ne ahcakrã ata pê ajco ahtwỳ, pê cume mãa mã ajco me ahtwỳ. Ne amcro kam pê ahcakrã ata ampo kà te Pahpãm jũrkwa cwỳrpê ajco harij, ne ahna caxwa pê ajco kam cuhy, ne ahcujro, Ixaher catêjê te amji mã me irĩt xà caxuw.
Hõhõ, me ipa xà ita to pê ajco me ipa, ne me ahtwỳ. Ne ma Canãn jõ pjê mã me cator.