EPET JÕ KRĨ WỲR
Pawrô Jõ Kàhhôc
Ỹhỹ, pê Roman jõ krĩ kam, me hacjên xà kam Pawrô ihkrĩ, ne Jeju na mehkwỳ mã ajco hõ kàhhôc kujate. Na pê Epet jõ krĩ kam, Jeju na mehkwỳ jakrã mehkrĩ atajê mã hõ kàhhôc ita kujate. Na pê hõ kàhhôc ita japrỳ pê Epet Jõ Krĩ Kam Jeju Na Mehkwỳ Jakrã Mehkrĩ Atajê Wỳr, Pawrô Jõ Kàhhôc (Epet).
Ne hõ kàhhôc ita kam ri cute Jeju kôt me ipa catêjê pê Jeju jĩa pyràc na, me cumã harẽn ne to hahkre. Ne pom cu amjia kôt me amji jĩ jamãr to me papa, ita kôpit na mã, ihtỳj Jeju me papê mehkwỳ pê hĩa pyràc ata jamãr to ipa. Ne pom me pahkrã me pajĩ to ihhimpej to ipa ita na mã, Jeju me papê mehkwỳ to ihhimpej to ipa, pjê ita kam.
1Pawrô te amji jarẽn xà
1Hàpà me ikwỳ pê Jeju na mehkwỳ, ipê Pawrô, ne ipê Jeju Crixtô jarkwa na iprar catê. Ampo na? He Pahpãm pê ita caxuw icapi. Na wa Epet jõ krĩ kam, me apê Pahpãm na mehkwỳ atajê mã, apu ihhôc. Ne ca atỳj Jeju Crixtô to ate amji mã me ahimpej, ne ajpẽn kam me ahônco kam me to acrà ita na.
2Ne imã me pajõ Inxũ Cati pê Pahpãm me, me pajõ Pahhiti pê Jeju Crixtô te me ato impejti na me ato prãm, mãr ca nee ame ampo kên cupa nare, ne ihcãmtà rũm me acaxwỳn me, me gĩ cunea cuhkrit pej pêa mã me apa.
Pê Pahpãm ramã cute pjê ton xwỳjrea na amji mã me pahcapi
3Cu ha Pahpãm pê me pajõ Pahhiti pê Jeju Crixtô Pãm pyrên me pajakryti na cumã me amji jarẽ. Ampo na? Cu côjkwa kam me pajõ Pahhiti pê Jeju Crixtô kam me pahhônco tu ita kam, ramã cute ampo pejti cunea to me pahto impejti. 4Pê pjê ton xwỳjrea na, ramã Pahpãm Jeju kam pahte me ajpẽn hônco, ne me papê hõ tekjêa xà caxuw, amji mã me pahcapi. Mãr cu kam pahte amji kam me pajapac xà impej pit, ne Pahpãm kam mare mã me pahkam, ampo kên hamreare ne. 5Ne Pahpãm mã me pahkĩn cwỳrjapê pê mam, rỳ pêa mã, ramã ihcãmter pê Jeju Crixtô kôt me pahto amji kra xà caxuw amji mã me pahcapi, ne ahna amji to. Ita na ri cumã me pahto prãam to prãm na pê to hane. 6Pahpãm kĩnte, ampo caxuw me pampej nare cakrô, mã amjia kôt cumã me pahkĩn. Mã hàhcajrẽnti kam cumã ikra kĩnti ata kôt, me pahto impejti pyrên me pajakryti na, cu ha cumã me amji jarẽ.
7-8Ne pê mam me papê ihhêj rũm pahte me Pahpãm to new catêjê. Ne pahte me to kên xà ita kam ri, cute me hacjên xà kam me pajacjên, cu kam me pahkrĩ. Pê Jeju pê me pahkritxwỳa, ne me pajaxà kam ty ne caprô jaxwỳ. Ne cute caprô jaxwỳr xà ata to pê me pahkên jahpan xà na Pahpãm mã amgõ, mã cute me pahkên ita to tojnõ, cu pahtỳj ame papa. Hõ, pahte me Pahpãm to kên itajê cunea ri, cute to tojnõ, ne hicu to hajỹr. He ampeaj kam Pahpãm jàhcajrẽn cati, mã ihtỳj amjia kôt cama me pahto impejti to ipa, ihkrã kre te amji jahkre pejti kôt. 9Ne pê mam nee jũm Pahpãm te amji kam hapac xà jahkre pej xà hamreare. Ne curmã ri Pahpãm te ihkra pê Jeju Crixtô kôt me pamã amji to ipipẽ to prãm to ri, cute ihkujahêc. 10Ne cute amji kam hapac xà pimxur jahkre kêatre ata te hajỹr he. Quê ha Pahpãm ihtỳj jũ caxuw cute amji mã amcro hyr xà ata na, cute pjê me côjkwa kam ampo cunea ton itajê cunea to cuprõ, ne Jeju mã cugõ, mãr quê cupê hõ pahhi, ne to ihhimpej to ipa rohnỳtti mã.
11Ne hamre, Pahpãm te mam ramã amji kam hapac xà ton atajêa ton partu, cute amji mã ihkĩn xà ata na. Ne Jeju kam pahte me ajpẽn hônco xà ita kam ri, cute amji mã me pahcapi, ne me pahto amji kwỳa. Ne pê ramã ita to amji kam hapac hiahpuro, ne cumã ahna to prãm, na ri cute ton. 12He me ipê Juta catêjê, pê wa mam amji mã me iprĩa kam, Jeju Crixtô pê me itehcajpar catê na me hikaj kam me tẽ. Cwỳrjapê wa Pahpãm mã me amji jarẽn to hane he:
— Me ijõ Inxũ Cati, he ampeaj kam ate me ito kênre nare, na ri me imã acati pê ihhêj rũm ampo jàhcujrohti ata pyràac, ne ampeaj kam apej! — hane.
13Ne pê hanea ne ite me amã Jeju pê me pahkên pê me pahpytàr catê na harẽn to prãm to, pê Pahpãm amji mã me icapi. Ne ite me amã harẽn xà ata, ampeaj kam ri. Na pê ca me ikampa, ne ite me amã harẽn xà to amji mã me ahimpej kam tẽ. Ne pê Pahpãm me pahcunea mã Carõ Pejti to awjahkre ata, pê me amã amji gõ. Ne cute me amã amji jõr xà ata, ihtỳj me apê hõ tekjê na me garẽ. 14Ne pê Pahpãm Carõ Pejti ramã me papê hõ tekjê mã ampo jõr na amji ton hiahpuro ata, quê ha ihtỳj me pamã cugõ, ne ampeaj kam cu ha pahtỳj me pahkên pê me pahcato. Cwỳrjapê cu ha me pahcunea Pahpãm to me amnã ne cumã me hane he:
— Ampeaj kam acati! — hane.
Pawrô te me hũrên hakryti na, Pahpãm mã amji jarẽn xà
Roman 12.3-8; Epet 4.11-16; Coroxo 1.9-12
15-16Ỹhỹ, me ikwỳ, pê wa me ate me pajõ Pahhiti Jeju to amji mã me ahimpej na me garẽn pa. Ne hanea ne me amã me akwỳ cunea pê Pahpãm tekjê atajê kĩn na me garẽn pa. Ne ite me garẽn par xà ata caxuw, wa nee me apyrên, ite cumã ijakryti na, amji jarẽn jicu nare. Ne wa ijõtpê Pahpãm mã me acajrẽn to ipa to hane he:
17— Ỹhỹ Pahpãm, apê me ijõ Pahhiti pê Jeju Crixtô Pãm pê ijõ Inxũ Pejti ata, wa ha awỳ, ca ha Epet jõ krĩ kam me ikwỳ mã Acarõ Pejti te amji kam hapac xà pejti gõ, mãr quê cute amji jahkre pejti, krã kreti kôt me hirôa pê, cute me gahkre pej na me to. 18Ca ha hirãa pê me cumã ampo pejti incrê itajê to hahkre, mãr quê me gahkre pej pejtu ne. Ne mam, ate amji mã me capi, mãr quê amji mã mehprĩa kam jũ caxuw côjkwa kam acahê na amji to me ipijapar rohnỳtti mã. Ne hanea ne me cupê atekjêa, na ca ha côjkwa kam amã gàhcukrêj jàhtô catia ita kam, gõtpê amji mã me to impej to catia to apa.
19— Ne hicu xà ita kam ca hanea ne acarôt tỳjti catihti to, me ite amji mã me ato ihimpej atajê tehcajpar to impeaj ne. Hõ, ampo to ate me cumã hahkre xà itajê to, ate me cumã hahkre xà ita na, wa ana ahwỳ — hane.
20Ỹhỹ me ikwỳ, he por Pahpãm carôt te me pahtehcajpar ata te ri hacpỹa mã Jeju Crixtô to ihtĩr. Ne carôt ita to ri cute côjkwa kam amji cahê na, awpôc rũm hỹr xà ata kam hỹr. 21Ne cute to ampo cunea jõ Pahhiti, me paxũmre me, me pajõ pahhi catêjê me, me carõ cunea me, ampo carõ pej me, me pahcurê xwỳnti carõ kên me, me hõ pahhi catêjê me, cupẽ jarôti me, ampo cunea carôt tỳjti mea mã. Ne pom me hõ pahhi itajê cunea jirôa pê carôt tỳj ita na apu ipa. Pjê ita me, cormã hapua na pjê ata kam, cupê pahhi ita na apu ipa rohnỳtti mã.
Me papê Jeju na mehkwỳ pê hĩa pyràc
22He ampeaj kam ri Pahpãm te ampo cunea jõ Pahhiti na, ihcãmter pê Jeju xãm. Ne hanea ne cute me pahkwỳ krã na hãm, mãr quê taa me pahto ihhimpej. 23Ne ihkrã kre te amji jahkre pejti ita kôt ri me papê hĩ, mã cupê me pahkrã. Na ri me pajĩ kam me pahcukrã xà cunea, ne nee ihnõ jamre nare. Na cu ha pjê cunea kam cumã me pajàpên to me papa.
2Pê Pahpãm amjia kôt me pahkên pê me pahto cato
Roman 3.19-24; 5.6-11; Tito 2.11–3.7
1Ỹhỹ me ikwỳ, pê ca mam me acunea ajco me akên ton to me apa, ne ajco Pahpãm jarkwa jirô pê me apỳpỳm to me apa, cwỳrjapê ri cumã me apê mehtyc pyràac. 2Ne caku atajê kam pê ca pjê kam, cute amji kam me hapac xà atajê to pit mã me amji pyràc. Ne ate Xatanaj pê me pahcurê xwỳn carõ kên atajê jõ pahhi te, Pahpãm jarkwa jirô pê mehpỳpỳm xi atajê to, pê ca ajco amji mã me ahimpej to me apa. 3Ne pê mam me pahcunea pê me hũràac, ne ajco amjia kôt pahte amji kam me pajapac xà kên atajêa kôt, me papa. Ne me pajĩ me, me pahkrã te amji mã ampo na ihprãmti atajê pit ton to me papa. Ne ihkôt me papa xà ita kam, cu me papê mehkên catêjê atajê pyràac, ne ma ramã me cuxà Pahpãm te pahte me amji pupun xà kêanre na me pahton xà ata wỳr me pra.
4-5Ne me pajũpar nare ita kam, ihhêj rũm ramã Pahpãm mã me pahtyc par. Ne Pahpãm mã me pahkĩn catia, ne ampeaj kam cumã me pahcaprĩ. Cwỳrjapê ri cute Crixtô kôt ihhêj ne hacpỹa mã me pahto ihtĩr. Xà mõrmõ ajkĩ me pampej cwỳrjapê mã, cute me pahkên catia pê me pahto cator? Hãpà! He hàhcajrẽan to hàhcajrẽn na ri amjia kôt, cute me pahkên catia ita pê me pahto cator, ne me pahto impej. 6Pahpãm te Jeju Crixtô kam me pahhônco na me pahton. Cwỳrjapê ri ihhêj rũm hacpỹa mã ramã cute me pahto ihtĩr, ne ma côjkwa wỳr me pahto hàpir, ne Jeju cahê na me pajỹr, ne cahê na cute ampo cunea to me pahhimpej na me pahton. 7Ne mẽr ampo na mã cute me pahto hajỹr? He nee mã ampo na nare! He pjê cunea kam ame ipa itajê, quê ha ita caxuw Pahpãm me cumã hàhcajrẽnti, ne ma me pahcaprĩ na me hahkre pej. Ne cute me pamã Jeju kôt me pahto impej na, me hahkre pej na cumã me pahto prãm, rohnỳtti mã.
8Xà cu Pahpãm mã ampo pej pit ton to ame papa na mã, cute me pahkên catia pê me pahto cator? Hãpà! He Pahpãm te amjia kôt, me pahtehcajpar prãmte, me pamã ihkra pê Jeju jõr, mãr cu to amji mã me pahhimpej, quê ha amjia kôt cama me pahpytà. 9Ita cwỳrjapê quê ha nee jũ caxuw jũm amji to hàmnãn to:
— Ite amji kam ijapac xà impejti, ne ijàpên xà impejti ita jahpan xà na ri, Pahpãm te ikên pê ito cator — hajỹr nare. Jũ wỳr quê ha jũ caxuw jũm amji pej na amji to hàmnãn to hane. 10Ne mẽr ampo cwỳrjapê mã pê Pahpãm me pamã pahte amji kam me pajapac xà tuw pejti ita gõ, ne pjê kam me pahto ajpa? Nee mã ampo cwỳrjapê nare. He ramã Pahpãm te Jeju Crixtô kam me pahhônco na me pahton, pahte jũmjê to me pajapên to impejti to prãmti to me papa xà caxuw. Por rỳ pêa mã cute me pamã hàpên xà pejti to me pajàpên na, me pahto amji kam hapac ata to, cu ha me apê. Cwỳrjapê cu ha pahtỳj ajpẽn to impejti to me prãm.
Juta catêjê me, mehcahkrit atajê me ajpẽn hônco xà
Carati 3.28; Coroxo 1.21-23; 1 Petrô 2.4-8
11Wa me ipê Juta catêjê hãn ne me ajhu, ne itỳj amji mã me ipy kà kryjre ne me hakep. Ne hakep xà ata pê ri Pahpãm tekjê na cute me ijarẽn xà. Ne me apê mehcahkrit pê Juta catêjê nare atajê na, ca amji to me amji japackre. Ne pê wa mam ajco me ato amji kam ijapac to:
— Itajê mã mehkà jakep nare, na ri nee me cupê Pahpãm tekjê nare — hane. 12Ata caxuw pê ca caku atajê kam Jeju Crixtô pê ampỳa mã ame apa. Ne pê Pahpãm rỳ jũ caxuw me amã ampo to hũjahkre nare na mã, ca nee rỳ me icuxà Pahpãm me, me ajpẽn kam gapac nare. Na pê me apê Pahpãm tekjê nare, ne me apê Pahpãm jahkre kêatre ita kam, ca nee amji wỳr ihpĩn ampo pejti cator xà ata jikaj nare. 13Ne ita caxuw quêt nee hipêr ate me hajỹr nare, ne Pahpãm pê ampỳa mã ame apa xà nare. Ampo na? Nee mã ampo na nare. Pê Jeju Crixtô me gaxà kam ty ne caprô ajxwỳ, ne ihtyc xà ata kôt, ca ate kam me ajpẽn hônco. Cwỳrjapê ri Pahpãm te amji wỳr me ato hàhtêp.
Quê ha Pahpãm me cupê Juta catêjê me, mehcahkrit na amji capa
14-16Mã Jejua te mehcuran catêjê mã amji jõr, mã cute mehcuran, mã me pajaxà kam ihtyc. Ne ihtyc xà ata te ihcunea na ajpẽn na me pajaxôr to hajỹr he. Cu ha nee hipêr ajpẽn kam me pancryc nare, ne quêt catyt kam ajpẽn mã me pahcakôc to me papa. Quê ha hanea ne, nee hipêr me iquêtjê pê Mojxe xwỳ caca xà ata, me pahto ihhimpej nare. Ne nee hipêr me acahkrit nare, ne nee hipêr me papijakrut nare, ne quêt ajpẽn kam me papê Pahpãm na mehkwỳ pyxit peaj, ne ajpẽn kam me pantuwti, ne me pahpyxit peaj. Ne hacpỹa ne Pahpãm wỳr me pahcunea te amji jaxàr. 17Ne cute me apê mehcahkrit atajê, ca ampỳa mã Pahpãm pê ame apa atajê me, me ipê Juta catêjê, pê wa hũ na pire mã ame ipa atajê to hacpỹa ne Pahpãm wỳr me amji jaxàr. He pê nee jũm ajpẽn na me pajaxôr na harẽn nare. Pê Jejua ajpẽn na me pajaxô. 18Ne pom Jeju te me papijakrut mã ampo ton itajêa kôt, cu ha pahtỳj Pahpãm Carõ Pejti pyxit peaj ata kôt, ihwỳr me axà, ne cumã me pahcakôc.
19Cwỳrjapê ri ita caxuw, nee hipêr me pahnõ te amji to ihcahkrit xà hamreare. Ne quêt me icuxà me apê Pahpãm kraa to kra, ne me apê mehkwỳa, ne ajpẽn kam me papê mehkwỳ ita na, ne me pahpyxit peaj.
Me papê Pahpãm na mehkwỳ pê hũrkwa pyràac
20-21Por mam Krĩpinkrên kam, Pahpãm to amji kam hapac xà jũrkwa ata kam pê Pahpãm ihkrĩ. Ne cute me Pahpãm jahkre pej prãmte, pê ajco ma kẽn me pĩ te ikre ata wỳr me pra. Ita kôpit na mã, me papê mehkwỳa pê Pahpãm jũrkwa pyràac. Ne ita caxuw me pahkam Pahpãm ihkrĩ, ne me pahkôat ri me cumã Pahpãm jahkre pej. Ne me papê Pahpãm jũrkwa mã hikwa xà me, hiwrỳhhi me, pô me hõrti pyràac. Ne pê mam Jeju jarkwa na memprar catêjê me, Pahpãm jarkwa to me cumã mehcakôc catêjê atajê pê ihhêj rũm, harã na ikre mã hũxwỳr xà me, cumã hũxwỳr xà cati pyràac. Ne Jeju Crixtô pê ri ikre mã hãm xà catia ata pyràac, mã tahna ihhê cunea te cuprõn tu. Ata jĩkjê na mã me papê Pahpãm jũrkwa, mã me pahkam ihkrĩ. 22Ne ate me hajỹar ne atỳj Jeju to ate amji mã me ahimpej xà atajêa kôt ri ihhêj rũm me apê Pahpãm jũrkwa, na ri Pahpãm ihtỳj Carõ Pejti ata kôt me akam ihkrĩ.
3Me cupê mehcahkrit mã ri Pawrô pê Pahpãm jarkwa na imprar catê
Roman 15.14-21; Coroxo 1.24-29
1Ata kôt wa itỳj Pahpãm mã me acajrẽn to ipa. Ỹhỹ, ipê Pawrô, ne pa wa me hacjên xà kam ikrĩ. Ampo na? Wa Jeju Crixtô jarkwa kôt me apê mehcahkrit atajê mã Jeju pê me pahkritxwỳ jarẽn xà impejti itajê to harẽ, ne me amã to hahkre. 2-3Ne pê Pahpãm hàhcaprĩa kam icapi, ne ijĩa to me acaxuw ihhimpej to hane he:
— Mõ, ne mehcahkrit catêjê mã ijarẽ. Ne nee mã ampo na, ca ha me cumã ijarẽn nare. He wa hacpỹa mã cute me ajpẽn hônco, ne ajpẽn mã me caprĩ na ri, imã me to prãm. Cwỳrjapê pê wa pjê ita wỳr me cumã ikra pê Jeju ata kujate. Ata ca ha me cumã harẽ — hane. Ne pê ca ramã ita na me ijarẽn pa. Na wa ite curmã ihkàhhôc ita kam hipêr ahna me amã amji jarẽn, ne ahna me amã ihhôc, mãr ca me cahyt ne ahna me ijahkre pej.
4-5Pê mam nee jũm Jeju Crixtô na Pahpãm te amji kam hapac xà ata jahkre pej nare. Ne ita caxuw Pahpãm Carõ Pejti te Pahpãm jarkwa to mehcakôc catêjê me, me ipê Jeju jarkwa na memprar catêjê mã to ajpẽ, ne me imã to hahkre. 6Ỹhỹ, ita caxuw ca ha Jeju tyc xà ata kôt, me icuxà me apê me pajõ Pahhiti pê Jeju Crixtô jĩ pyràac. Ne me ca, me apê mehcahkrit atajê me, me pa, me ipê Juta catêjê me, ajpẽn kam me pahpyxit peaj. Ne por pê Pahpãm ramã mehkwỳ mã ampo pej cunea to awjahkre atajê, ca ha atỳj hanea ne me cuxà me acwa.
7Pê Pahpãm carôt tỳjti ata hàhcaprĩa kam, me amã ipê harkwa na iprar catê na ixãm ne ikujate, mãr wa me amã harẽn xà impejti to harẽ. 8-9Ne wa pa, me cupê Pahpãm tekjê atajê japyre mã icrire na amji to hajỹr cakrô, pê Pahpãm ihtỳj imã ijàpên xà impejti ita gõ. Ite me apê mehcahkrit atajê mã Jeju Crixtô te amji kam hapac xà tuw pejti jarẽn xà kôt harẽn to capô partu xà caxuw, pê imã ijàpên xà ita gõ. Por Jeju te amji kam hapac xà impejti jakràjti ata, wa me amã harẽn to ipa. Mãr ca me acunea Pahpãm te mam pjê ton xwỳjrea na, me amã amji kam hapac xà to ipipẽ nare ata jahkre pej. Ne Pahpãm ita pê, por pê Pahpãm ampo cunea to ata. 10Ne ita caxuw cumã, mehcunea te Pahpãm te amji kam hapac xà jahkre pej na, me to prãm. Ne quê ha, por ampo carõ carôt tỳjti atajê me, pjê me côjkwa kam me hõ pahhi catêjê atajê cunea, quê ha me papê Pahpãm na mehkwỳ pupun xà ata kôt, me Pahpãm te ihcunea na amji jahkre pej catia na me hahkre pej. 11Pê mam, pjê ton xwỳjrea na, Pahpãm ramã Jeju Crixtô pê me pajõ Pahhiti te me pahto impej na to amji kampa. 12Cu pahtỳj Jeju to amji mã me pahhimpej, ne ahna me ajpẽn hônco. Cwỳrjapê cu ha nee Pahpãm mã me pahcakôc na me pajàhtàt nare kam, cumã me pahcakôc. Ne cu ha pahtỳj cute me pahkam hapac na me hahkre pej. 13Ỹhỹ, he me acwỳrjapêa wa me hacjên xà ita kam amji pupun cakrô, ca ha nee ate me ipupun xà ata kôt me amã amji kĩn nare nare. Ne quêt ite me ato impejti xà caxuw ri, ite amji pupun kêanre xà ita.
Pawrô te Pahpãm mã mehcajrẽn xà
14Ampo itajê cunea cwỳrjapê wa me pajõ Inxũ Cati cuna mã ikõn krã na ijỹr, ne ijõtpê cumã me acajrẽn. 15Ampeaj kam Pahpãm pê me pajõ Inxũ Cati. Ne cupê pjê cunea me, côjkwa kam ampo kra me, ikre ry cunea me, por amji mã me to ihhimpej atajê cunea Pãm Cati. 16-17Wa hõtpê cumã me acajrẽn to hane he:
— Me ijõ Inxũ Cati, ampeaj kam acarôt tỳaj to ihtỳj, ne gàhcajrẽn cati. Na ca ha Acarõ Pejti kôt, cute me amji kam hapac xà caxwãm pê me cumã acarôt tỳjti ata gõ, por ate amji kam gapac xà pejti carôt tỳjti ata kôt. Mãr quê kypê Jeju Crixtô to amji mã mehhimpej nare. Ne ajpẽn kam mehhônco ata pê ihhêj rũm me caxwãm pê cute apu ihkrĩ. Ne pom ampo pàr pjê impejti kam harê to ihcuhhê, ne ihtỳj ipicamẽn to ipa, ita kôpit na, ca ha me cumã mehcunea mã ajpẽn kĩnti ita to apicamẽn to mõ. Ne ampeaj kam akra Jeju mã me ikĩn catia, ne nee cumã jũm kĩn nare nare.
18— Ne akra pê Jeju mã me ikĩn ita pê ihhêj rũm kẽnti kàa nõ ata pyràac, ne cupê ihhêj rũm côxwa tua pyràac ne catia, ne ihhêj rũm cupê põti pyràac, ne nee hicu xà hamreare. Ne ampo pejti catihti itajê jĩkjê na mã, akra mã me ikĩn te hajỹr. Na ca ha me caxwãm pê me cumã to hahkre, mãr quê mehcunea mã akra mã mehkĩnti ita te, amji kam hapac xà itajê jahkre pej pa.
19— Jũ wỳr quê me ixũmre nõ akra Jeju mã me ikĩnti xà catia to cati ata na hahkre pej, cwỳrjapê ca ha cute Jeju Crixtô mã ikĩnti itajahkre pej na me akwỳ tehcajpa, quê me kam hapac kam tẽ, ne me hahkre pej. Mãr ca me cumã amji gõ, quê me cupê apyràac to mõ, ne mempejti ne.
20— Ỹhỹ me ijõ Inxũ Cati, me ikam acarôt tỳjti ita kam, ca atỳj me imã, pom ite ampo na me awỳr, ne me to amji kam ijapac xà atajê jirôa pê ate me imã hõr na, imã me gahkre pej. 21Ne me imã me icunea pê Jeju Crixtô na mehkwỳ, ne wa ahna me ajpẽn hônco. Ne wa acatihti me acarôt tỳjti me, gàhcajrẽnti na apyrên me ijakryti na, me amã amji jarẽn to prãm, rohnỳtti mã. Ne tahnaa, hamre — hane. Hõ, wa ita na ijõtpê Pahpãm mã me acajrẽn.
4Me papê mehkwỳ pyxit peaj, na cu ha ajpẽn to mempej
1Ỹhỹ me ikwỳ, pê Pahpãm me ato impej ne amji mã me acapi, mãr ca cute amji kam hapac xàa kôt me apa. Ne ita cwỳrjapê wa me awỳ, he Pahpãm jàpên xà incwỳrjapê wa ipê me hacjên xà kam ikrĩ catê. Ne pa wa me awỳ, mãr ca me apê Pahpãm tekjê atajê, cute amji kam hapac xàa to amji kam me gapac to me apa. 2Ne nee me hirôa pê amji to me acati to me apa prãm nare. Ne ampo na amji mã aprĩa kam, gũcanãr to me apa. Ne amji mã me akwỳ cupa. Ne nee ampo na ame amji to ihtỳj tu to me apa nare. Quê jũm ampo to kên, ca ha nee kam me acryc nare. Ne quêt me amã ihkĩan kam, me gakryti kam cumã me gũcanãr to me apa. 3Pahpãm Carõ Pejti te me acunea mã ajpẽn kĩnti ton, ne ajpẽn kam me apejti na me aton. Cwỳrjapê ca ha ajpẽn mã me awcanã, mãr ca atỳj ajpẽn kam me ahônco to me apa kam me to acrà.
4Xà ajkĩ Pahpãm Carõ Pejti te amji kam hapac xà jàhtô? Hãpà! He Pahpãm Carõ Pejti pyxit peaj. Cwỳrjapê ri ajpẽn kam me pahcunea pyxit peaj. Ne ihhêj rũm me papê Jeju jĩ pyxit peaj ata pyràac. Ne hanea ne pjê ita kam Pahpãm te me pahcunea to ihhimpej xà pyxit peaj ata mã, cu ramã me hikaj xà caxuw ri Pahpãm te me pahcapi. 5Ne hanea ne me pamã me pajõ Pahhiti pyxit peaj. Ne pahte Jeju to amji mã me pahhimpej xà ata pyxit peaj. He ampo pyxit peaj ita caxuw ri cô to me pahcumrãr xà. 6Ne hanea ne Pahpãm pê, por pjê cunea kam amji mã me to ihhimpej atajê cunea jõ Inxũ Cati pyxit peaj, ne mehcunea to ihhimpej. Mã ihtỳj hàpên xà atajê kam ihkôat me apê, ne me Pahpãm ita ri me pahcunea kam ihkrĩ, cwỳrjapê cu ha pahte amji kam me pajapac xà pyxit peaj to, amji kam me pajapac to me papa kam me to pancrà.
Pê Pahpãm ahpỹanre na me pamã pahte to amji japackre xà gõ
7-8Xà Pahpãm te me pahcunea mã pahte me hahkre pej xà pyxit peaj jõr? Hãpà! He cumã me pajàpên xà caxuw ri, cute ahpỹanre na me pamã pahte amji kam me pajapac xà te to amji japackre xà jõr, Jeju Crixtô te amji mã ahna prãm ata na. Ne pê Pahpãm jõ kàhhôc kam, ramã rỳ pêa mã jũm Jeju na ihhôc to:
“Quê ha me curê xwỳn jàhtôa ne tohjê,
ne ma hacpỹ mã côjkwa wỳr api.
Ne pjê kam mehkwỳ ame ipa atajê mã cute ampo jõr xà atajê gõ” hane.
9Hũjarẽn xà ita kôt, cu ha pahtỳj côjkwa wỳr Jeju jàpir na me hahkre pej ne me to amji japackre. He pê nee Jeju põ rũm, pjê ita wỳr pit mã iwrỳc nare, ne hanea ne pjê krac ri mehtyc carõ krĩ xà ata wỳr wrỳ. 10Ne taa hanea ne hacpỹa mã côjkwa wỳr api ne hakren tu, cute ampo cunea to ihhimpej xà caxuw. 11Ne Jejua te ri ahpỹanre na, me pamã pahte amji kam me pajapac xà te amji jahkre pej jõr par. Ne cute me pahkwỳ capi, mãr quê me cupê harkwa na memprar catêjê, ne mehkwỳ pê harkwa to me cumã ihcakôc catêjê, ne mehkwỳ pê Pahpãm te me pahkên pê me pahpytàr xà ata wỳr me to ipipkjêr catêjê, ne mehkwỳ pê Jeju na mehkwỳa jamãr catêjê, ne mehkwỳ pê mehkwỳa mã ampo to hahkre catêjê. Ne Pahpãm te mehkwỳ atajê mã ahpỹanre na cute me amji kam hapac xà te amji jahkre pej atajê jõr, me hàpên xà itajê caxuw.
Cu ha pahte amji kam me pajapac xà to me amji jĩ tỳj to me mõ
12Ne mẽr ampo caxuw mã cute me pamã mehkwỳ itajê jõr? He nee mã ampo caxuw nare. He Pahpãm mã me pajàpên xà ata pê ihwỳr me to me papipkjêr xà caxuw ri, cute me pamã mehkwỳ itajê jõr. Ne me pajàpên xà ita kôt ri me papê mehkwỳ, cu pahtỳj me papicamẽn to me mõ. Ne me pamõr xà ita pê ihhêj rũm Jeju Crixtô jĩ picamẽn to mõr pyràac. 13Ne cu ha me pahcunea me papicamẽn to me pamõr ita kam me to pancrà, ne Jeju Crixtô to pit mã amji mã me pahhimpej to ajpẽn kam me pahhônco tỳaj to me papa. Mãr cu Jeju cuxà, pahte amji kam me pajapac xà itajêa to me amji kà to me amji jĩ tỳj to me mõ.
14Ne cu ha nee hipêr me papê ahkrare pyràc, ne jũm te me pamã ihhêj xi xà ata kôt, Jeju to amji pê me pajapac kêt to me pamõr nare. Nãmri quê ha me pahnõ te hajỹr na, quê ha cupê ihhêj rũm kôc te amji wỳr pjê kam pĩhhô incrà to imprar ata pyràac, na quê ha ihtỳj mehhêj xi catêjê te aracri mehkên mã me irẽn prãm atajê kampa, ne ihtỳj jũ ri me ipa xà ata kam ihkôt me ipa. 15Ne Pahpãm mã cute me hajỹr catêjê kôt, me pahto prãm nare. Ne quêt cumã me pamã ajpẽn kĩnti kam me pahcakôc xà kam, me pahhêj xi nare na, cumã me pahto prãm. Cu ha pahte me hajỹr to me pamõr na, cu ha me papê me pahkrã pê Crixtô ata pyràac ne me ajpẽan. 16Ne Crixtô pê me pahkrã, cu ha kam me pahhônco, cwỳrjapê quê me papê hĩa pyràc. Ne ahpỹanre na me papê hĩ kam cukrã xà atajê pyràac, mã taa pyxit peaj me pahcunea to ihhimpej. Ita kôpit na cu ha me pahcunea Crixtô te amji kam hapac xàa kôt me ajpẽn kĩnti, kam me ajpẽn tehcajpar to me papa. He pahte me pahkwỳ to me hajỹr to me papa xà ata pê Jeju Crixtô jĩ te ipicamẽn to mõr pyràac.
Cu ha quêt me pahte amji kam me pajapac xà tuw pejti ita kôt me papa
17-18Cwỳrjapê wa ha Pahhiti jarkwa na me amã awjarẽ, ca ha atỳj catyt kam me ikampa. Por nee Pahpãm to amji mã mehhimpej nare atajê te amji kam hapac xà atajê wa ha me amã ihcawpa, mãr ca nee hipêr cute me amji kam hapac xà kên atajê kôt me apa nare. He cute amji kam me hapac xà itajê kôt hamreare. Ne ihhêj rũm me cupê awcapàtkôti kam ame ipa, ne nee me ampo pupun nare atajê pyràac. Ne nee me caxwãm pê me Pahpãm pupun ne me hahkre pej nare. Ne cute me hajỹr xà ita kam ri ma ame Pahpãm te amji kam hapac xà tuw pejti ita caca, ne cute mempar cupate me hapac jihê, na ri me cupê hahkre kêatre. 19Ne nee ajte amji jũ na mehpahàm nare, mã mãnea mã mehkrã kên kam, cute mehkên ton xà itajê kam me amji cajpẽr nare na me to. Mã mehcunea ampo kên xen xà pahàm nare atajê mã, me amji jõr to me ipa, ne ihtỳj me ton to me ipa kam me to incrà tu.
20-21He nee Jeju Crixtô te amji kam hapac xà te hajỹr nare. Ne pê ramã jũm me amã Jeju te amji kam hapac xà to hahkre, ne me amã harẽ. Na ca ramã ate mempar ne me hahkre pej, ne kam me amji hônco, cwỳrjapê ca ate amji mã me cute amji kam hapac xà incwỳr. 22Ne mam me amã ampo kên ton to me ipa xà ata pit na me amã prãm. Cwỳrjapê ri ate amji kam me gapac xà tũm kêanre ata ihtỳj me amã ihhêj, na ca hãn ne atỳj ihkôat me akên mã me acjêj. Cwỳrjapê ca ha mam ate amji kam me gapac xà tũm ata mã me hikra, ne nee hipêr me ahna prãm, ne me to amji japackre nare. 23Na ca ha me ate amji kam me gapac xà wej ita me, intuw to me ahpa, ne ate amji kam me gapac xà intuw ata, ca ha amji mã me huwahi to me apa. 24Ne pom cu hãn ne me pahkà tũm to pôj, ne intuw mã me amji jacjê, ne mehtũm jicu ne me curẽ, jĩkjê na, ca ha ate amji kam me gapac xà kên tũm ita to me tojnõ, ne me hicu, ne intuw ita ca ha amji mã me acwa, ne me huwahi, ne me to apa. Ne Pahpãm ri me amã cute amji kam hapac xà pejti jõr to ipa. Mãr ca me apê me hũràac, ne me ate amji kam me gapac xà impejti ne, ne nee ihhêj xi nare, ne ampo cunea kam catyt kam, Pahpãm cuna mã me apejti na me apa.
Cu ha me ajpẽn to me pampej to me papa
25Cwỳrjapê ca ha nee hipêr ajpẽn mã amji to ame ahêj nare. Ne ahpỹanre na quêt catyt kam ajpẽn mã me acakôc to me apa. Ampo na? He me papê Jeju jĩ kam cukrã xà atajê pyràac, na ri ajpẽn kam me pahpyxit peaj. 26-27Ne ca ha me anõ te ame akwỳ nõ kam acryc na, ca ha nee kam acryc kam acrà nare, ne pyt xàr xwỳjrea na, hacpỹa mã ajpẽn mã me acaprĩ. Nãmri ca ha ate nee kam acryc jicu nare, ne mãnea mã kam acryc na, quê ha apê me pahcurê xwỳnti pê Xatanaj te amji kam hapac xà kôt apa catê, na ca ha atỳj Pahpãm to kên to apa. 28Na ca ha mam ajco me gàhkĩj to me apa atajê, ca ha me gàhkĩj jicu, ne me gàpên kam me atẽm pyrentu, mãr ca me akrã kreti te amji jahkre pejti kam, me amji to ajpa, ne me akwỳ pê hamreare atajê tehcajpa.
29Ne nee ame acakôc xà kên kam amji kĩn nare atajê to me acakôc to me apa nare. Ne me acakôc xà impejti kam amji kĩnti to ca me akwỳ mã me acakôc, ne ma me to impej to me apa. Ne cute me Pahpãm kam hapac na mehtehcajpar xà atajê to, ca me acakôc to me apa, mãr quê me akampa atajê, ma me ipicamẽn to me mõ. 30Nãmri ca ha ate me hajỹr nare na, ca ha cama Pahpãm Carõ Pejti mã amji kĩn nare, ne ihpeacre na me to. Ne me akam Pahpãm Carõ Pejti te ihkrĩ xà ita pê ihhêj rũm, cute me akam amji japrỳ na ihhôc. Cute me apê hõ tekjê na me ato apipẽ xà caxuw. Ne ihkôat ca ha atỳj jũ caxuw cute me akên pê me apytàr na me amji jahkre pej.
Cu ha ajpẽn mã me pahcaprĩ to me papa
31Ne ampo kên itajê ca ha me hicu he. Ca ha jũm me ajpẽn kam acryc ne ma ame ajpẽn mã acaprĩ caca ata, ca ha amji pê ihcaca ne hicu, ne atỳj hacpỹa mã ajpẽn mã me acaprĩ. Ne me gàhcurê me, me gàprê jicu, ne quêt me amã ajpẽn kĩnti, ca me ajpẽn caprĩ to me apa. Ne nee ajpẽn mã me gàkjêr nare. Ne nee ame hũn kên to me apa nare. Ne nee ame ajpẽn curê to me apa nare. 32Ne quêt cama ajpẽn mã me acaprĩ, ne ajpẽn mã me apejti ne. Ne Crixtô kam me ahônco, ita cwỳrjapê ri Pahpãm te ramã ate me to kên xà atajê to tojnõ ne me hicu. Na ca ha cuxà ate me ajpẽn to kên atajê to tojnõ ne me hicu.
5Cu ha ampo kên cunea jicu ne quêt catyt kam me papa
Coroxo 3.16-17; 1 Jowãw 1.5-10
1Me apê Pahpãm kra, ne cumã me akĩnti, cwỳrjapê quê ha me apê hũràac na amji kôt me ato prãm. 2Crixtô mã me akĩnti na ri, me acwỳrjapê ihtyc xà mã cute amji jõr. Mã Pahpãm te cumã me akĩnti ita na hõmpun, ne ampeaj kam hanea ne ahna Pahpãm mã Jeju kĩn. Ne cumã Jeju tyc xà ita pê ihhêj rũm ampo cacô cuxwati impejti te ihcajpuaw ata pyràac. Na ca ha Jeju cuxà me amã ajpẽn kĩnti to amji mã me ahimpej to me apa.
3Ne ramã me apê Pahpãm na mehkwỳ, cwỳrjapê ri nee me ate ampo kên crê itajê caxun xà nare he. Mam ca ha nee ahti na ame cupê mehprõ caxun nare, quê nee pyjê xwỳjê ahti na ame cupê mempjê caxun nare. Ne hanea ne nee menxyre impijapit to ame apahàm nõ to me apa nare. Ne ihcote na, ca ha hanea ne nee gàhcukrêj to pit mã amji mã cuprõn to me apa to me amji japackre nare. Ampo na? He jũm te hajỹr to ipa xà ata, nee Pahpãm to amji japackre nare, ne hàhcukrêj itajê pê ri ihhêj rũm me hõ pahpãm, ne ampeaj kam cumã ihkĩn, mã to pit mã amji kam hapac to me ipa. Ca ha nee me anõ te ampo kên itajê nõ caxun to kênre xà hamreare ita kam, jũ wỳr quê jũm ahna me anõ jarẽ.
4Ne hicu xà kam, ca ha nee ame acakôc xà kam, me pahpahàmti atajê to me acakôc to me apa nare. Ne nee me acakôc xà kôt hamreare atajê to me acakôc to me apa nare. Ne nee ca ha me garkwa xỳ xà tũmti kêanre atajê to me acakôc nare. Ne quêt Pahpãm te me amã ampo pejti cunea jõr itajê pyrên me gakryti na, cumã me amji jarẽ.
5Xà quê ha pijamã cute ampo kên crê itajê ton to me ipa catêjê nõ, Pahpãm me Crixtô himpej xà krac ri me axà? Hãpà! He jũm xàr xà hamreare na ramã me pamã hahkre pej. Ampo na? He Pahpãm mã me cupê ihhêj rũm pahpãm cahàc krekà to amji mã mehhimpej catêjê pyràac, ne mehkêanre. 6Nãmri quê ha jũm te awỳr ihtẽm, ne pom wa ite ampo kên tête me amãn atajê nõ to amã ihhêj prãmte, hỹrmã gator na, ca nee me harkwa kôt hamreare atajê kam gapac, ne ihkôt amji ton nare. He ampo kên itajê cwỳrjapêa ri Pahpãm me kam incryc. Ne quê ha ihtỳj jũ caxuw, por jũmjê te nee me kam hapac nare atajê kam incryc, ne ame to kêanre ne, ne ihtỳj mehkên mã me curẽ. 7Cwỳrjapê ca ha nee cute me hajỹrjê to me amji japackre, ne me to amji kwỳ nare.
Cu ha pahte amji kam me pajapac xà tuw kôt me ampo cunea jahkre pej
8Ỹhỹ, he pê ca mam ihhêj rũm me apê mehtyc pyràac, ne me akam awcapàtkô pit. Mã pyt ahcujro, cu pahtỳj me rĩt ne me ampo pupu, ita jĩkjê na mã Pahhiti jarkwa ihtỳj me amã ampo pej to pit mã hahkre to mõ. Ne ate Pahpãm na mehkwỳ na me amji ton xà ata caxuaw, ca ha atỳj ita caxuw ampo pej cunea pupu. Cwỳrjapê ca ha ate ampo pej pupun xà atajêa kôt me amji ton to me apa, ne me to.
9Ỹhỹ, ca ha ate me Pahpãm jarkwa pê hàhcujro xà pyràc ata kam me hajỹr to me apa na, ca ha me apê jũmjê pejti atajê, ne catyt kam ame apa, ne me acakôc xà hêj xi nare pê catyt kam, ampeaj kam atajê to pit mã, me acakôc to me apa. 10Ne ca ha ate me hajỹr to me apa na amji to me gàhcukjêr to me apa na, ca ha me Pahpãm cajpuaw. 11Ne por cute amji kam me hapac xà kêanre kam, Pahpãm jarkwa pê hàhcujro xà pyràcti ata kaj na, awcapàtkô kam me ipa atajê jàpên xà cunea kôt hamreare. Cwỳrjapê ca ha nee mehkôt me apa na amji to prãm nare. Ne quêt mehcunea kam mare mã, ca ha ate amji kam me gapac xà pejti jàhcujrohti to me apa. Mãr quê ahna me apupu, ne cute me apupun xà ita kôat me amji kên itajê pupu, ne ahna me amji jahkre pej.
12Ỹhỹ, ampeaj kam ri cute amji kam me hapac xà atajê kêanre, cwỳrjapê cu ha nee cute me ampo kên to ipimxur, ne aracri ame ton atajê na, nee me pahcakôc xà nare. Ampo na? He kypê ahna me kam me pahpahàm nare. 13Quê ha hàhcujro xà to ampo cujro, quê ha hirã pê hõmpun xà. Ne por hàhcujro xà te ampo jakati pràti cujro ata, ihtỳj ma harwrỳ ita kôt ahcujro. Ita kôpit na quê ha mehkrã kên catêjê atajê, ate amji kam me gapac xà impejti na me apupu, ne me akôat quê ha ramã cute me amji kam hapac xà kêanre na me amji jahkre pej. Ne me akôat quê ha hanea ne cute amji kam me hapac xà impejti to me ipa. 14Ne pê Pahpãm ramã me pamã ita to ihcakôc to hane he:
“Por ate amji kam me gapac xà kêanre ata kôt,
ihhêj rũm ramã me atyc atajê,
me ampra!
Ne me atyc ita pê me to xa,
quê ha Crixtô me amã ate amji kam me gapac xà cujro,
ne hacpỹa mã me ato tĩr!” hane.
Cu ha me pahkrã kreti kam me amji to ajpa
15Cwỳrjapê ca ha ate amji to ame apijapar xà itajê na me amji kôt hakop to mempeaj ne. Ne nee ca ha me apê cute me amji jahkre kêatre atajê pyràc nare, ne quêt me akrã kreti te amji jahkre pejti kam me amji to ajpa. 16Ne amcro atajêa kam, quê ha mehkên catêjê me hàhtô. Cwỳrjapê ca ha atỳj amcro cunea kam Pahpãm mã me apê, ne nee jũ caxuw amcro nõ to me apictor nare. 17Ne nee ca ha me apê cute me amji jahkre kêatre atajê pyràc nare, ne quêt me pajõ Pahhiti mã ampo na me pahto prãm atajê to pit mã, ca ha me gàpên to me apa na amji to me ahcukij.
Cu ha Pahpãm Carõ Pejti ata kôt me pajõ Pahhiti mã me cre
18Ca ha côxỳhti to amji mã me ahimpej jicu, ne nee hipêr me to akõm quê me ato ipipãn nare. Ampo na mã wa me amã ihcawpa? He quê ha ihtỳj ate amji kam me gapac xà cunea kam ato kên. Na ca ha quêt Pahpãm Carõ Pejti to amji mã me ahimpej to me apa. 19Ne ca ha me acakôac kam ajpẽn mã me Pahpãm na increr xà cunea to me acrer to me apa. Ne hanea ne mam Pahpãm te amji kam hapac xà na me ahna increr xà ata to me cumã cre. Ne cute ampo ton xà itajê na curmã me cumã increr xà ata to me cumã cre, ne me amã amji kĩan kam me cumã cre, ne catihti pyrên me gakryti to me cumã cre. 20Jeju Crixtô kam me ahônco, cwỳrjapê ca ha ampo pej me, ampo te me ato jũ mãn xà atajê mea mã hũrên me gakryti na, me pajõ Inxũ Cati pê Pahpãm mã me amji jarẽ. 21Ne pom ca amji mã Crixtô cupa, ne amji caxuw me kampa ita cuxà, ca ha atỳj ajpẽn kam me gapac to me apa.
Pê Pawrô mehprõ catêjê japackre
22Ne pyjê pê mempjê prõ itajê, pom ca amji mã me Pahpãm kampa ita na, ca ha amji caxuw me apjê kampa. 23Ne ampo na mã wa ame amã ita to hahkre to hane? Nee mã ampo na nare. He Crixtô pê mehkwỳ krã pyràac, ne mehkwỳ pê hĩ pyràac. Ne cupêa ri me to ihhimpej catê, ne cupê mehkwỳ kên catia pê me hũtàr catê. Jĩkjê na mã, me apê mehprõ impjê catêjê, ca ha atỳj me aprõ to me ahimpej. 24Cwỳrjapê ca ha me apê me apjê prõ catêjê, ampo cunea na amji caxuw me apjê kam me gapac to me hanea, pom quê Crixtô na mehkwỳ amji caxuw me kampa he.
Pê Pawrô mempjê catêjê japackre
25Mempjê catêjê, quê ha me amã me aprõ kĩn hanea, pom quê Crixtô mã mehkwỳ kĩn, mã me hahpan xà na ihtyc he. 26-27Ampo na pê Jeju me papê mehkwỳ mã ty? Nee mã pê ampo na ihtyc nare. He pê ihcunea na me papê mehkwỳ atajê kên pê me pahto impej partu to prãm to pê ty, mãr quê nee me pahkam ampo kên crire nõ hamreare ne. Ne me pamã me pahte amji kam pajapac xà to impej ne ihcuhhõ, mãr quê ihtetetti ne. Ampo na? He ramã me papê Jeju jĩ pyràac. Ne harkwa ita pê ihhêj rũm cô te ampo tũm cuhhõn pyràc, ne toa ri ihtỳj me pahte amji kam me pajapac xà cuhhõ ne to impej. Ampo na? He cumã Hũm mã cute me pahto ipipẽ xà ata kam me pampejti kam, ampo kên tũm nare na me pahto prãm. He me papê hĩ pyràac na ri. 28Ne me hũmre mã quê ha mehprõ kĩn hanea, pom quê cumã amji jĩa kĩn he. Quê ha jũm mã ihprõ kĩn ne to impej na, quê ha cumã ihkĩn ita pê ihhêj rũm, amji jĩa kĩn ne to impej. 29-30He xà quê ha ajkĩ jũm mã amji jĩa kĩn nare ne cumã amji curê? Quê! He ihtỳj cumã harte, ne ma hamã. Ita na mã Jeju Crixtô me papê mehkwỳ to, ne me papê hĩ kam cukrã xà pyràac. 31Pê Pahpãm mam me panquêtjê mã harkwa ta ne me cumã:
“Quê ha me hũmre mehprõ,
ne me hũmjê me, menxyrxwỳ jicu,
ne hĩxi me ajcaxê ne ajpẽn kam me pyxit peaj” hane.
32Ne pom Pahpãm te me pamã me pahprõ me, me pajikwa tuw xà to hũjarẽn xà ita, pê mam nee me hahkre pej nare. Ne ita caxuw cupê Crixtô me, mehkwỳa pyràc, ne ajpẽn kam me pyxit peaj na, ramã pahte me hahkre pej. 33Ne hanea ne me pamã to hahkre to hane he. Quê ha me hũmre mã mehprõ kĩn hanea, pom quê me cumã amji jĩa kĩn he. Ne mehprõ xwỳjê, quê ha ihtỳj amji mã mempjê cupahti to me ipa.
6Cu ha me pahpãmjê me, me panxyrxwỳ kampa
1Ne me apê mehkra xwỳjê, ca ha atỳj amji mã me apãmjê me, me axyrxwỳ kampa, ne amji mã me hũpahti to me apa, me pajõ Pahhiti jarkwa kôt. Hõ, quêt catyt kam me apa xà itajê te hajỹr he. 2-3Ne pê Pahpãm mam ramã me panquêtjê kra mã harkwa ta, ne me cumã ahna hũjahkre to hane he:
“Ca ha atỳj amji mã, me apãmjê me, me axyrxwỳ kampa,
mãr ca apej pêa mã me apa,
ne amji to me apijapar to irya ne, pjê ita kam” hane.
4Ne me apê me hũmjê me inxyrxwỳ xwỳjê, ca ha nee ame akra mã ame quêt nare, ne nee ame cumã mencryc ton nare. Ne quêt me pajõ Pahhiti jarkwa kôt me cumã aprĩa, ne catyt kam me cumã cute amji to me ipijapar xà to hahkre. Ne Pahpãm krã kreti te amji jahkre pejti te me hapackre xà atajê to, ca me hapackre.
Cu ha me pajõ pahhi catêjê kampa
Coroxo 3.22–4.1; 1 Timot 6.1-2; Tito 2.9-10; 1 Petrô 2.18-25
5Ne cama me cumã me gàpên to me apa catêjê xwỳjê, ca ha atỳj amji caxuw me gõ pahhi kampa, ne amji mã me hũpahti to me apa to hanea, pom ca me amã amji kĩnti kam, amji caxuw me Crixtô kampa ne me hũpa he. Hõhõ, cu ha me hane. 6-7Ne nee cute me gàpên xà impejti na me garẽn prãmte ahêj, ne cama mento kam mare mã, me gàpên xà to mempejti to me apa nare. Ne quêt me cumã me gàpên prãam kam me gàpên to me apa to hanea, pom ca Crixtô pit mã me apê he. Ita na ca ha me hũmre mã me apê. 8Ne me amã me gõ pahhi catêjê me, me gõ pahhi nare catêjê me, Pahpãm te ahpỹanre na ate me gàpên xà impej ton atajê jahpan xà na, me amã hàmjõr na, ca me to amji japackre.
9Ne me apê hõ pahhi catêjê xwỳjê, ca ha me amã me hàpên catêjê to mempeaj ne, ne me hàpên xà na me cumã quêt jicu. Ne cama côjkwa kam me gõ Pahhiti mã ajwar me gàpên na, ca amji to me amji japackre. Ne me pahcunea pipẽn pit, ne cumã me pajàpên xà atajê kôt, quê ha me pahto ajpẽan, ne catyt kam ahpỹanre na me pahcunea mã hàmjõr xà atajê to amgõ.
Pê Pahpãm Xatanaj me, me papijapu xà caxuw me pamã hàprê xà gõ
1 Texarõn 5.8-11; 1 Petrô 5.8-11
10Ỹhỹ, Jeju kam apê me ikjêjê, wa ite me amã ihhôc jicu xà ita kam, wa ha ate mehkên me, me apijapu xà to me amã hahkre. He me papê ihhêj rũm krãhtare kwỳ pijapu xà caxuw, cute apu amji mã hàhcuprõn pyràac. Cwỳrjapê ca ha atỳj me pajõ Pahhiti carôt tỳjti kam me ahônco, mãr quê taa me amã me acarôt to ihtỳj. Ne carôt tỳj ata kôt ca ha me apijapu xà caxuw apu amji mã me ahcuprõ, mãr quê me pahcurê xwỳn pê me apytà.
11-12Ne mẽr me pahcurê xwỳn jũjê me, cu ha me ajpu? He nee mã jũmjê nare, he ampo carõ kên pahtỳjti atajê me, me hõ pahhi pê Xatanaj me ri me papijapu xà. Ne nee mã mehĩ nare, me cupê ampo carõ kên jõ pahhi catêjê pê cupẽ jarôti me, cu ha me ajpu. Ne pjê cunea kam ampo kên to mehhimpej, ne mehpahtỳjti, ne me hũpahti, ne ihcunea na cute me amji kam hapac xà kêanre. Ne mencwỳrjapêa ri ihhêj ne ramã pjê kam awcapàtkô, ne ihtỳj me cumã me papictor na me pahto prãm. 13Cwỳrjapê ca ha me apê krãhtare kwỳ atajê te hàprê xà to amji tỳj, ne to me amji jamã pyràac. Ne Pahpãm te hàprê xà to me apytàr xà caxuw, ca ha me apijapu xà te me apytàr xà cunea to me amji tỳj. Mãr quê me acurê xwỳn me akam tẽ, ca atỳj me apijapu kam tẽ, ne me ajpu, ne me tohjê, ne me to hamre. Jirô pê ca ha nee me hũpate me gõ to me atẽm nare, ne atỳj me acuhhê rohnỳtti mã.
Me papê krãhtare te hàprê xà to amji tỳj atajê pyràc
14-15Por krãhtare hãn ne wakỳti te hitô krekà te hũtàr xà to amji tỳj ata kôpit na, ca ha Pahpãm te me amã ate amji kam gapac xà pejti jõr ata kôt, ca ha catyt kam me apa. Ne ate amji kam me gapac xà impejti ata pê ri me apytàr xà. Ne por krãhtare hãn ne ihtu na hê xà tỳjti to ihtu na hê ata kôpit na, ca ha ate amji kam me gapac xà impejti, hêj xi nare to me apa. Ne por krãhtare hãn ne hõ par kà tỳjti mã amji jacjê, ne ma ramã me to imprar xàa caxuw to ihcuhhê ita kôpit na, ca ha jũ kam atẽm xà caxuw, ramã apu amji mã me gàhcuprõn hiahpuro. Mãr ca mehcunea mã, Jeju te hacpỹa mã Hũm wỳr me to ipipkjêr mã me cumã ajpẽn kĩn na harẽ.
16Ne por krãhtare hãn ne kruw pôc pĩr xà caxuw, wakỳti te hĩ tête hàmtàr xà to amji tỳj ata kôpit na, ca ha Jeju to amji mã me ahimpej xà ata to me Xatanaj pê cupẽ jarôti jõ pahhi pê amji tête me amtà. Ampo na? He catyt kam me papa tête cute me pahhi kwĩn, cu ame pahpec, mã cute me pahkam ihtẽm prãmte ri ihtỳj me pahcyt to ipa.
17Ne por krãhtare hãn ne ihkrã cahhêc cupate wakỳti te ihkrãhkà tỳjti to amji tỳj ata kôpit na, ca ha Xatanaj te akrã kam me amã ate me ampo kên ton to me apa to hahkre cupate, ca ha atỳj Pahpãm te ramã ampo kên itajê pê me pahpytàr na me to amji japackre. Ne por krãhtare hãn ne hũhkra to wapohti xwahhihti cwa ata kôpit na, ca ha amji mã me Pahpãm Carõ Pejti te me amã Pahpãm jarkwa jõr atajê juwahi to impeaj ne.
Cu ha pahtỳj me awcanã, ne ma Pahpãm mã mehkwỳ cajrẽn
18Ne ate ampo itajê cunea to me amji tỳj to me apa xà ita kam, ca ha Pahpãm mã me acakôc xà na, amji caxuw me Carõ Pejti na ahwỳ, mãr quê me atehcajpa, ca cumã me acakôc. Ne nee ame apec ne ahna me amji jicu nare, ne atỳj me awcanã, ne ma Pahpãm mã mehkwỳ cajrẽn. 19Ne hanea ne Pahpãm mã me icajrẽn to hane he:
— Me ijõ Inxũ Cati, ca ha Pawrô mã cute ampo jarẽn xà atajê to hahkre, quê me cumã hũjarẽn xà kam hãn ne nee amji na hàhtàt nare, mãr quê mehcunea, hirãa pê, por pê mam nee ajco me Jeju jarẽn pejti kam hapac nare atajê kampa, ne me hahkre pej — hane.
20He wa me hacjên xà kam ikrĩ cakrô, cormã ipê Jeju jarkwa na iprar catê, na wa itỳj ita ri mehcunea mã Jeju pê me pahkritxwỳ jarẽn xà impejti to harẽ. Na ca ha atỳj ita na Pahpãm mã me icajrẽn, mãr wa ite me cumã icakôc to jũ mãn xà ata kam, nee amji na ijàhtàt nare, ne catyt kam me cumã awjarẽ.
Pê Pawrô hicu xà kam hipêr amji jarẽ
21-22Ne wa ha ma me awỳr me pahtõ kĩnti pê Tiquicô pê Pahpãm mã hàpên catê impejti ata kujate, ijõ kàhhôc ita to. Quê ha curi cato ne taa me amã ihcunea na ijarẽn pa. Ne cute me amã ijarẽn xà ita caxuw wa ite me awỳr ijõ kàhhôc ita to ihkujahêc, mãr ca me ijarẽn pa, ne me amã amji kĩn, ne me gakry.
23Ne wa ijõtpê Pahpãm mã me acajrẽn to hane he:
— Ỹhỹ me ijõ Inxũ Cati pê Pahpãm me, me ijõ Pahhiti pê Jeju Crixtô, ca ha ampo kên jipôc ri me ikjêjê ame ipa atajê mã mehcarĩcti to, mãr quê nee ame amji mã ampo cupa nare. Ne hanea ne me cumã ajpẽn kĩnti to, quê me ajpẽn kĩn to me ipa. Ne hanea ne cute amji mã me ato ihhimpej xà na me to, quê amji mã me ato ihhimpej. 24Ne hanea ne hõtpê me cumã me ijõ Pahhiti pê Jeju Crixtô kĩn rohnỳtti mã atajê mã, ampo pej cunea to — hane. Hamre, ita pit.