CUTE ME TO IHHIMPEJ XÀ

Cute Me To Ihhimpej Xà Jõ Kàhhôc

MOJXE

Te Me To Ihhimpej Xà

Ỹhỹ, ihkàhhôc te xĩc kam ri, Mojxe te Canãn jõ pjê mã me hàr xà, ne hipêr cute me cumã cute me hapackre xà cunea jarẽn. Cwỳrjapê ri ihkàhhôc ita japrỳ te Cute Me To Ihhimpej Xà Jõ Kàhhôc (Cute Me To Ihhimpej Xà).

Hipêr cute me to ihhimpej xà

Cute Me To Ihhimpej Xà 6.4-16

Ne pê Mojxe hipêr Ixaher catêjê to ihhimpej to:

— Ixaher catêjê, me ikampa, Pahpãm pê ri me pajõ Pahhiti, ne taa mã ri pyxit peaj ne cupê Pahpãm. Cwỳrjapê cu ha me pahna cuhkõnre cunea me, me pahcaxwỳn cunea me, me pahcarôt cunea to, quê ha me pamã ihkĩn, ne to pit mã amji kam me pajapac to me papa. Ne nee me Pahpãm ràn xà na, ame amji mã ampo kĩn nare. Ca ha atỳj, cute me acaxuw imã ampo na harkwa, wa ite me amã harẽn atajê to me amji japackre. Ca ha atỳj me pahkra mã harẽn xà itajê to me harẽ, ne me cumã to hahkre, ne hanea ne ikre kam me cumã to awjarẽ, ne ca ha hanea ne põ pê ame apa xà ata kam, atỳj me cumã awjarẽ. Ne caxwa ri ca ha hanea ne me gikwa xà wỳr amji mã me harẽ, ne hanea ne iràrà na me akrĩ pê amji mã me harkwa ita to awjarẽ.

— Pê Pahpãm me aquêtjê pê Aprãw me, Ixac me, Jaco mã pjê ita to awjahkrea na, quê ha ihtỳj ita caxuw hỹrmã me ato mõ. Ne me amã, por pê ca nee me krĩ catia ton nare atajê gõ, ne ramã kam me amã ampo pejti te hipu hiahpuro. Quê ha me amã ate me kwa kwỳn nare atajê gõ, ne me amã me ate me pĩxô pàr kre nare atajê gõ, ca ha me ku ne me to garte. Ata caxuw ca ha Pahpãm te, por Ejit jõ pjê kam ate me amji pupun xà kêanre, mã cute ihpĩn me ato cator na, ca ha atỳj me to amji japackre.

— Ne ame garte jirô pê, ca ha harkwa kôt ame apa, ne cumã pit mã me apê. Ne nee ca ame pahpãm cahàc krekà atajê kĩn nare. Ampo na? Ca ha ate ame pahpãm cahàc krekà atajê kĩn, ne ihkôt ame amji kam gapac, ne me Pahpãm tĩar ita mã hikran na, quê ha hanea ne me Pahpãm me amã hikra. Ne ame akam incryac to incryc, ne ame ato kêanre ne. Ca ha ampo kên cunea kam me amji pupun xà kêanre atajê to ame amji pupu, ne kaam me gamre. Cupate ca ha Pahpãam kôt pit mã me apa, ne nee pahpãm cahàc krekà to hipêr me amji japackre nare — hane.

Pê Mojxe me cute Pahpãm mã ampo jõr xà to ihhimpej

Cute Me To Ihhimpej Xà 26.1-11

Pê ajco Mojxe Ixaher catêjê japackre to hane he:

— Ca ha ma Pahpãm te me amã pjê to hũjahkre ata wỳr me acato, ne curi mehkrĩ catêjê tohjê, ne me hipej ne hõ pjê kam me akrĩ jirô pê, ca ha me gõ pur ata kam mam ate me gõ to me cuprõn atajê, Pahpãm mã me agõ.

— Ca ha kàhà kam me to hipu, ne ma Pahpãm to me amji japackre xà jũrkwa wỳr me to apa. Ne Pahpãm mã mehcajrẽn catê mã me agõ, ne cumã me amji jarẽn to hane he: “Ite Pahpãm mã ampo jõr xà ita mã he. Cute pjê to imã hũjahkre ata mã ito hàr na, harẽn xà mã he” hane.

— Quê ha Pahpãm mã mehcajrẽn catê kàhà na me gõ atajê incwa, ne Pahpãm mã cute me hõ to caxàr xà cuna mã me hũxwỳ. Ca ha me acunea Pahpãm mã me acakôc to me hane he. “Pê me iquêtjê mencrêre, ne Ejit jõ pjê mã me axà. Ne ita caxuw ite me amji ràn ne me ijàhtôa to me ijàhtô. Ne ite ame amji pupun xà kêanre to me amji pupun, ca ate me ikam gapac, ne apa tỳjti ita to ate me ito acator, pjê impejti ita mã. Jahpan xà na wa amã mam pjê impejti ita jõ intuw ita to mõ” hane.

— Jirô pê ca ha me cumã cre, ne ma me gũrkwa wỳr me amji jacjê, ne ame gàpàn xà impejti atajê to ame apà, ne ame akwỳ cunea kam me gakryti ne — hane.

Mojxe jaxà kam Jojuw pê pahhi tuw

Cute Me To Ihhimpej Xà 31.1-8; Me Cahyt Xà 27.15-23

Ne Mojxe te Pahpãm mã ihcakôc ne cumã harkwa to:

— Me ijõ Inxũ Cati, pê ca me icunea mã ite amji kam me ijapac xà gõ, na ca ha me icaxuw me akwỳ nõ capi, ne to me ijõ pahhi tuw na. Ne por me hũmre nõ mã me ipijapu kam me to ihhimpej jahkre pej ata pê, quê ha me ijõ pahhi, mãr quê nee me cupê me akwỳ pê carà cahàcre jamãr catê nare atajê pyràc, ne amjia kôt ame ipa, ne me ipictor nare — hajỹr.

Mã Pahpãm Mojxe mã:

— Jojuw pê Nũm kra ata, ca ha ihpa na me apy. Ampo na? He kaam ri Icarõ Pejti te hipu tu. Ca ha Erexa pê imã mehcajrẽn catê ata wỳr to tẽ, ne mehcunea kam mare mã me cuna mã ihkrã na gũ xi. Ne cumã me caxuw cupê pahhi ita gõ, mãr quê mehcunea me kampa. Ne wa ha itỳj ite cumã icakôc prãmte, caxuw Erexa pê imã mehcajrẽn catê ata mã ijarkwa juwahi.

— Hõ, wa ha me to hajỹr to xa. Wa ha ampo na Jojuw mã icakôc prãm, ne mam Erexa mã icakôc, mãr quê ikampa ne Jojuw mã ijarkwa jarẽ, quê ha Jojuw xwỳjê ma amũ mehkwỳ mã ijarkwa to awjarẽ — hane.

Mã Mojxe te Pahpãm te ampo na mẽn xà ata ton, ne ma Jojuw japrôr ne ihpa na ipyr ne to mõ, Pahpãm mã cute mehcajrẽn catê japrỳ te Erexa ata wỳr. Mã cormã mehcunea me xa ne me hõmpu, mã Mojxe te me kam mare mã Jojuw krã na hũ xir, ne cute cupê me hõ pahhi xà caxuw cumã carôt jõr.

Mojxe tyc xà

Cute Me To Ihhimpej Xà 34.1-10

Ne Mojxe ihtyc xà wỳr pjê pupun prãmte, por Canãn jõ pjê cahê na kẽnti japrỳ te Nepo ata na hàpir. Mã Pahpãm te cumã pjê ata jahkre, mã cute hõmpun, Krĩcuxwati me. Jirô pê mã ri Pahpãm cumã:

— Pjê ita pê wa Aprãw me, Ixac me Jaco tàmxwỳ mã to awjahkre, ne ite amã hahkre. Ca rỳ cama ate hõmpun, ne ca, ca ha nee curi mehkôt acator nare — hane. Me ajkaam mã Mojxe tyc, mã curia Pahpãm te jũ ri harêt. Mã nee jũ ri Pahpãm te harêt xà ata na jũm te hahkre pej, ne hõmpun nare. Pê Mojxe cormã irĩt peaj, ne cormã carôt pê mentuaw carôt, ne ahna caku xẽntiwinti pê ty.

Pê Ixaher catêjê Mojxe xwỳ to hapac xà te mencwỳar to me putwrỳ pyxit. Pê mam pahhi cati to cute amji kam me hapac xà te hajỹr tũam, na pê me to hane. Mã Nũm kra pê Jojuw ata te amji jahkre pejti, Pahpãm Carõ Pejti kôt. Ampo na? Pê Mojxe ihkrã incwỳrpê hũhkra pẽ, na pê cumã amji jahkre pej. Mã Ixaher catêjê ihtỳj me Jojuw kampa, por pê Pahpãm Mojxe mã ahnaa harkwa to ata na.

Rỳ jũ caxuw Pahpãm mã ihcakôc catê nõ pê Mojxe xwỳ pyràc nare. Pom ahnaa mã me hõ ikwỳ nõ mã ihcakôc ita na, pê me Pahpãm ajco ihkuc ri cumã ihcakôc.