PAPIRÕN JÕ PJÊ
Kam Ame Ipa Xà
Ỹhỹ, pê Exeker pê Juta catêjê nõ, ne Papirõn jõ pjê kam me cupê Juta catêjê mehkrĩ atajê mã cupê Pahpãm jarkwa to ihcakôc catê. Ne cute ihcunea na hõ kàhhôc kam ihhôc. Cwỳrjapê ri hõ kàhhôc ata japrỳ te Exeker Jõ Kàhhôc (Exeker). Ne hõ kàhhôc kam, cute Juta catêjê te mehkên ton atajê cunea na ihhôc. Ne cute kam me pamã Krĩpinkrên jamre xà na ihhôc. Ne hanea ne hõtpê jũ caxuw Juta catêjê cahhur me, Ixaher catêjê cahhur te me cuprõn, ne ajkam mehpỳm ne hacpỹa mã Canãn jõ pjê kam, cute me cuprõn. Quê ha Pahpãm me cumã jũm pê Tawi xwỳ tàmxwỳ pê me hõ pahhi catia ata kujate, quê ha me to ihhimpej to impejti ne.
Ne caku atajê nõa kam ri Juta catêjê cahãj nõ impejti japrỳ te Extikwỳj ita Papirõn jõ pjê jõ pahhi nõ me hikwa tuw. Na ri hõtpê cute mehkwỳ pê Juta catêjê tehcajpar ne me curê xwỳn catêjê pê me hũtàr. Na ri hõ kàhhôc japrỳ te Extikwỳj Jõ Kàhhôc (Extikwỳj).
Ne Taner pê Juta catêjê jõ xũmre nõ ne cormã incrire, ne Krĩpinkrên kam ihkrĩ, pê ahnaa mehpro ne ma Papirõn jõ krĩ wỳr me to mõ. Mã curia ihkrĩ, ne catyt kam Pahpãm jarkwa kôt ipa rohnỳtti mã. Cwỳrjapê ri Pahpãm te cumã cute amji jahkre pej krã kreti catia ne hõr, na pê Papirõn jõ pahhi kwỳ tehcajpar to ipa to caku to hàhtôa. Na ri hõ kàhhôc ita japrỳ te Taner Jõ Kàhhôc (Taner). Ne ita caxuw Taner jõ kàhhôc kwỳ mã he.
1Papirõn jõ pjê kam Taner ipa na harẽn xà
Pê Papirõn jõ pjê jõ pahhi pê Napuc ita te me cumã me hàpên catêjê jõ pahhi mã harkwa to:
— Ca ha imã Juta catêjê intuw kwỳ capi, por pê ijõ krãhtare Juta jõ pjê pĩn me to cato atajê kwỳ — hajỹr.
Ne pê me hàpên catêjê jõ pahhi cumã Juta jõ pjê kam mehhimpej catêjê kra to pit mã caprã, cute me cumã Papirõn jõ pjê jarkwa me, cute amji kam me hapac xà to hahkre prãmte. Ne pê mempejti atajê me, me capẽnti atajê me, me hũpar krã kreti atajê to pit mã caprã.
Pê pahhi pê Napuc ita, cute hõ kur xà atajêa to me cumã harte na, cumã me hàpên catêjê jõ pahhi mã harkwa. Ne pê ihkàhhôc to hahkre xà kam, me cumã ihkàhhôc to hahkrea to caku to incrê na awjahkre, mãr quê ame amji jahkre pej, ne ihtỳj me pahhi catêjê tehcajpa. Ita na pê pahhi Napuc me to prãm.
Mã cute me to caprãr atajê kam, cute me cwat itajê ri, mehkwỳ jirôa pê cute me amji jahkre pej. Ne cute me cwat itajê nõ ita japrỳ pê Taner. Mã Taner ma apu pahhi jàpàn xà itajê caca, ne ma apu hõ pĩxô cacô xỳre ata to ihkõm caca. Ampo na? Pê ramã Pahpãm me cupê mam Ixaher catêjê atajê mã me hàpàn xà itajê me, me hõ pĩxô cacô xỳre ita cawpa, ne me to ihkõm tête me cumã. Cwỳrjapê ri ma apu ihcaca, ne cute me hàpên catêjê jõ pahhi mã amji jarẽn, quê ihtỳj me hõ pê ampo hy me, ampo hô me, ampo xô pit to me cumã harte.
Mã me hàpên catêjê jõ pahhi ihtỳj apu ita na amji mã hõ pahhi cupa, ne Taner mã:
— Ca ihhêaj to ame gàpàn xà itajê to ame apà, ne me akwỳ kĩnte me ahire, ne me apeacre ne, quê pahhi me gõmpu, ne apu ikam incryc — hajỹr.
Mã Taner cumã:
— Cu ha ajpẽn par to hane he. Wa ha itỳj ame ijàpàn xà itajê to me ijàpàn to amcro to me tej, jirô pê mã ca ha me ipupu, ne me icapi. Wa ha ite, cute me pahhi jõ kur catêjê japyre mã me ijicot ne me itỳj na, wa ha itỳj me cuxà pahhi jàpàn xà ata to me apà, ne ihkõm xà ata to me ikõ — hajỹr. Mã me hàpên catêjê jõ pahhi te mehkôat amji ton.
Mã Taner me, mehkwỳ incrê itajê te me ampo hy me, hô me, ihhô kur, ne cô to mehkõm to me amcro to tej. Jirô pê mã ri cute me hõmpun, mã mentuw kwỳ itajê jirôa pê ame hicot ne amehtỳj. Mã pahhi te hõtpê me hàpàn xà itajêa na me to ihtỳj.
Mã Pahpãm te mentuw te cwat itajê mã, me cute me amji jahkre pej jõr, ne ihtỳj ihkàhhôc to hahkre xà kam mehtehcajpar. Mã cute me cyt ne me ampo cunea ton jahkre pej. Mã Pahpãm te Taner mã me ipimtir jarẽn to hahkre, mãr quê hahkre pej. Ne pê caku jàhtôa kam ajco pahhi pê Napuc tehcajpar to catia.
2Pê Napuc ipimtir kêanre to amti
Pê Napuc ramã Papirõn jõ pjê kam ihhimpej to caku to ajkrut. Ne cute ipimtir catia to ipimtir. Ne ihkrã pictor tu ne nee hõt nare. Ne cute Papirõn jõ pjê jõ xũmre krã kreti cunea me, me hũxy xi catêjê cunea me, me cute me caxêre cunea te amji kam hapac xà to me hahkre catêjê cunea me na hàhwỳr, mãr quê me cumã ipimtir xà kôt harẽ. Mã me cator ne cute me cuprõn. Mã pahhi me cumã:
— Wa ipimtir kêanre to ipimtir ne ikrã pictor tu. Quê ha nee jũm imã ipimtir xà ita kôt harẽn nare, wa ha cormã ikrihkrit ita na ikrĩ — hane.
Mã me cumã:
— Hàpà pahhi! Me imã, ate amji to apijapar xà rohnỳtti mã ita na ato prãm. Wa me awỳ, ca ha mam me imã apimtir xà ita jarẽ. Jirô pê wa ha amã cormã apimtir xà ita kôt me harẽn pa — hane.
Mã quêt pahhi me cumã:
— Quê! Ca ha me caa me imã ijõt kam ipimtir ita jarẽ. Ne ca ha hanea ne me imã ihkôt harẽ. Ca ha nee me imã harẽn nare, wa ha me axexec to mõ ne hanea ne me apê gũrkwa to hanea. Ca ha quêt ate me imã ipimtir ita jarẽ, ne ca ha me imã ihkôt harẽn na mã, wa ha me amã ampo pejti jàhtôa ne cugõ ne amji mã me acatihti na me acapi — hajỹr.
Mã me hũmre atajê cunea te hipêr me cumã harẽn to hajỹr:
— Pahhi, wa me awỳ, ca ha caa me imã apimtir xà ita jarẽ. Jirô pê wa ha me amã ihkôt harẽ — hane.
Mã pahhi te amji kam hapac xà to huwahi tỳjti, ne me cumã:
— Imã me acaca xà jahkre pej. Ca cama amji mã ame amcro ata pyr prãm. Ampo na? Mõrmõ wa ame acuran prãm na mã, ca ame icupa! Imã me gahkre pej. Ate me amji par xà ita na, na ca me imã ahêj prãm. Ne me ahêj xi atajê to, ca me amji mã amcro ita juwahi prãm. Imã mam ipimtir jarẽ! Ca ha ita ton na, ampeaj kam me amã ipimtir kôt harẽn xà ita jahkre pej! — hane.
Mã mehkrã kreti atajê pahhi mã:
— Wỳr quê jũm hõt kam ipimtir ita jarẽ! Jũ caxuw jũm pjê ita kam hajỹr nare. Pahhi, ca ahna prãm, quê nee hajỹr nare! Wỳr quê jũm to hane. Côjkwa kam me pahpãm cahàc atajê pit mã ita jarẽn jahkre pej. Ne ampỳa mã me ihkrĩ, ne ita cwỳrjapê ri wa ha nee mempar nare — hane.
Mã hamre, pahhi te mehcunea mã harkwa kêanre to ihcakôc kam ihtẽm ne me cumã:
— Na wa ha me ahna cumẽ, quê ha ijõ pjê kam me akrã kreti catajê me, me apê hũxy xi catêjê me, me apê caxêre pupun catêjê me, me acunea curan partu — hane.
Pê pahhiti jarkwa na mehhôc catêjê mehhôc ne me hõ pjê cunea kôt apu cucrà. Na pê pahhi jõ krãhtare apu Taner me, me hõ ikwỳ nõ catêjê me, ame hapê, mehpro prãmte.
Pê Pahpãm Taner mã ipimtir kôt harẽn xà to ajpẽ
Pê caxwa ata kam Taner apu irĩat kam ampo pupu. Mã Pahpãm te cumã irĩat ita kam Napuc pimtir ita kôt harẽn xà ita to ipipẽ. Hamre, mã Taner pimprar ne ma Arioc pê krãhtare jõ pahhi wỳr tẽ. Ampo na? Pê Napuc Arioc mã harkwa ta quê mehkrã kreti catêjê cunea curan pa. Mã Taner Arioc mã:
— Arioc, wa ha awỳ, ca ha nee mehkrã kreti catêjê curan nare! Ca ha ma pahhi wỳr ito mõ! Wa ha pa cumã ipimtir ita kôt harẽ. Nee ca cormã ame curan nare — hajỹr.
Mã Arioc te hũjarêan kam Taner japrôr ne ma to tẽ, pahhi jũrkwa wỳr. Mã pahhi te Taner mã:
— Xà ca atỳj imã ipimtir xà ita jarẽ? Ne xà ca hanea ne atỳj imã ihkôt harẽ? — hajỹr.
Mã Taner cumã:
— Nee pjê ita kam mehkrã kreti me, hũxy xi catêjê me, cute me caxêre pupun catêjê me, jũm hamreare, me amã apimtir xà jarẽn xà caxuw. Nee jũm quê ate ahna prãm xà ata jahkre pej nare. Mã quêt kỳj pê, côjkwa kam Pahpãm pyxit pej. Ne cupêa ri ampo cunea jahkre pej catê. Ne cumã ampo pimxur cunea jahkre pej. Ỹhỹ, pahhi, apimtir ita kôt Pahpãm quê ha amã mam cute pjê cunea kam ampo na prãm xà ata jarẽ. Pahhi, hamre, wa ha amã apimtir xà ita jarẽ.
Ỹhỹ, pahhi, ate gõt kam ampo carõ japjêhti cupahti ata pupun, mã akuc ri xa. Ne ampo carõ ita ihpràti, ne amã hũpa. Ne ihkrã pê ôr pràti me, ne hitô me ihpa pê wakỳre prà jakare, ne ihtu pro xà pê wakỳre pràti intepti, ne ihkjê me ihte hi kam pê wakỳti, ne ihpar hĩkjê rũm wakỳti, ne hĩkjê rũm carẽc tôti.
Pom pahhi, gõt kam ate hàhkàj jakôtti catia pupun. Ita pĩn kẽn carôtti catia ita amjia kôt cator ne tẽ. Mã ajpên ajpô xàhti pĩn ampo carõ japjêhti ita wỳr tẽ ne cute ihpar kwĩn, me ajkaam apu ipicagãn tu ne to hamre tu. Me ajkaam mã, krãa, cute ampo jacrôre na amji ton. Ne hacrôre ita pê arỳjhy jacrôre pyràac. Mã krãa, kôc cator ne ma to cutor tu. Mã hamre, mã hakàn pê hamreare. Mã kẽn carôtti catia ata hakàn pê hàhhuc ne curia amji kôt cati to mõ ita na. Ne cute kẽnti catia na amji ton. Ne cute pjê cunea jahêr tu. Hamre. Pom gõt kam apimtir ita te hajỹr he.
Ne hamre, wa ha amã ihkôt harẽn to hane he: Ỹhỹ, pahhi, apê pahhiti peaj, ne apê pjê cunea kam pahhiti cunea jirô pê acarôt tỳaj to ihtỳj. Ỹhỹ, côjkwa jõ Pahhiti pê Pahpãm te ri amã pahhi ita ton ne amã pahhi ita na hãm. Ne cutea ri amã acarôt tỳjti ita jõr. Apê ihhêj rũm ampo carõ krã pràti pê ôr ata pyràc. Ne hamre, pahhi, quê ha Papirõn himpej xà hamre, ne pahhi tuw nõ quê ha cato. Ne ihhimpej xà ita ahimpej xà ita japyre mã carôt tỳj. Ne ita jirô pê mã quê ha pahhi tuw nõ himpej xà quê ha cato. Cupê wakỳre pràti intepti te ihtu pro xà ita pyràc. Ne hamre, taa mã quê ha pjê cunea to ihhimpej to ipa. Ne hamre, ita jirô pê quê ha pahhi tuw nõ himpej xà quê ha cato. Ne carôt ita pê wakỳti tỳjti ata pyràc. Ne quê ha mehcunea hi kwĩ ne me cupê carôt to hamre.
Pahhi, ate hõmpun, ihpar jĩkjê rũm wakỳti, ne ihpar jĩkjê rũm carẽc tôti ata. Jũm quê ha ihhimpej xà to ajcapô cakrô, cormã cumã carôt tỳj ita na, hĩkjê rũm. Amcro ata na, quê ha cormã côjkwa jõ Pahhiti jũm ata pê pahhi tuw kujate. Ne quê ha nee jũm pahhi ata to kên ne intohjê nare. Mã quêt ihhimpej xà tuw ata quê ha pahhi catêjê cunea tohjê ne hàhhuc rohnỳtti mã. Ne ihhimpej xà tuw ita pê ihhêj rũm ate gõt kam kẽnti carôtti pupun ata. Kẽnti ata te ampo carõ cunea to hamre tu. Ỹhỹ, mã hamre.
Mã côjkwa jõ Pahhiti quê ha amã apimtir kôt harẽ cute mam ampo to amji kam hapac atajê to — hane.
Mã hamre, pahhi pê Napuc ita Taner mã:
— Ne me gõ Pahpãm ata pê ampeaj kam me pahpãm cahàc cunea jirôa pê carôt tỳaj to ihtỳj. Ne taa mã ri pahhi catêjê cunea jirôa pê cati ne impej. Ampeaj kam ri cupê ampo pimxur ata jarẽn catê, ne nee cupê ampo pimxur nare. Ne ita cwỳrjapê ca ate imã ipimtir kôt harẽn — hajỹr. Ne hipêr cumã:
— Ne hamre, wa ha ita caxuw mehcunea jõ pahhiti na axãm, Papirõn jõ pjê kam. Ne wa ha hanea ne mehkrã kreti jõ pahhi na axãm — hajỹr.
Ne ita jirô pê pahhi Napuc te Taner mã ampo pejti jàhtôa ne hõr. Ne tahna hĩ jàhwỳrti atajê jõr.
3Me hõ ikwỳ nõ incrê cuhy pôcti kam
Pê caku nõ na pahhi Napuc harkwa ta:
— Imã wakỳti te pahpãm cahàc krekà japjêti to ne hãm. Ca ha kam mare mã me acunea akõn krã na me acuhhê ne cumã me amji cajrẽn. Quê ha nee jũm to hajỹr nare, ne to caxàr xà pê kĩjti ata wỳr axà — hane.
Ne por amcro ata kam cute me amji jahkre pej atajê pê ajco caxêre cunea te amji kam hapac xà to me hahkre to me ipa atajê kwỳ ma me Juta catêjê caca. Na pê ma Napuc wỳr me mõ ne me cumã me ahna harkwa kêanre to mehcakôc ne me cumã:
— Hàpà pahhi! Me imã, ate amji to apijapar rohnỳtti mã na, ato prãm. Pê Juta catêjê mencrê pê Xatrac me, Mexac me, Apet-Nego me, ma ame apar caca, ne nee gõ pahpãm cahàc krekà ata mã me amji cajrẽn nare, ne nee kam mare mã mehkõn krã na mehkrĩ nare — hane.
Mã Napuc te cute me hũmre incrê atajê na mehcakôc xà kêanre ata par. Na pê me kam incryac to incryc ne me krãhtare mã quê mehpro. Mã cute mehpro ne pahhiti wỳr me to mõ.
Mã me hũmre incrê atajê ma pahhi mã:
— Me ijõ pahhi, wa ha garkwa kôt nee me amji pytàr nare. Ampo na? Nee mã ampo na nare. Me imã Pahpãm pê Pahhiti kĩn. Quê ha cumã apê me ipytàr prãm na mã, quê ha to hane he. Ne quê ha cumã cuhyhti pê me ipytàr prãm na mã, quê ha to hane.
Ne quê ha Pahpãm nee apê me ipytàr nare, wỳr wa ha gõ pahpãm cahàc krekà ita cuna mã me ikõn krã na me jỹ — hane.
Ne mehcakôc xà ita cwỳrjapê ri Napuc ma apu mehcaca ne ihkuc kêan kam me kam incryac to incryc. Na pê harkwa ta quê cuhy to me catia to cati, ne mencrê pro ne cuhyhti kam me curẽ, quê me to capa.
Pê krãhtare mencrê pro ne me huwapre ne me to hane. Ne cute me cuhy kam me irẽn. Mã quêt cuhy cacroti te põ pê krãhtare atajê cunea jipej tu.
Mã ahtũm nare mã, pahhi Napuc amji mã ipikrar ne hãm ne hũphêa rũm cute me to ihhimpej catêjê cukij ne me cumã harẽn to hajỹr he:
— Xà ampeaj kam me krãhtare te me hũmre mencrê peaj ne me pro ne cuhy kam me irẽn? — hane. Mã me cumã: — Ỹhỹ, pahhiti, mencrê peaj pit! — hajỹr. Mã pahhi me cumã:
— Ne ampo na mã wa apu me hũmre te cwat itajê pupu, cuhy caxwãm pê? Ne me hõmpu, me hũwapre nare kam ihtỳj ame ipa! — hajỹr.
Ne ampeaj kam ri cuhy caxwãm pê me hũmre incrê me impej kam ame ipa, ne nee cute mehkên nõ cajpẽr nare. Ne hũmre nõ pyxit ata pê ihhêj ne côjkwa pĩn Pahpãm jarkwa to imprar catêjê atajê nõ pyràac.
Ỹhỹ, mã cuhy pôc jarkwa mã pahhi Napuc me hỹrmã hàhtêp ne me cumã caràr ne me cumã:
— Xatrac me, Mexac me, Apet-Nego me, apê Pahpãm pê Pahhiti mã hàpên catêjê, cuhy pê me acato ne ajpên iwỳr me mõ! — hane. Mã cuhy pê mencrê itajê cator. Ne nee cuhy pôc te jũ kam me to caxàr nare, ne nee jũm kĩ caxàr nare, ne nee mehkà nõ te caxàr nare. Ne nee me ahna cuhy kũm cuxỳ nare. Na pê pahhi Napuc harẽn to hane:
— Hacme, cu ha me Xatrac me, Mexac me, Apet-Nego jõ Pahpãm pejti na me harẽ. Cute harkwa to imprar catê ata mencrê wỳr kujahêc ne cuhy pê me hũtàr prãmte. Ampo na? Nee mã ampo na nare. Mencrê itajê hõtpê Pahpãm to amji mã mehhimpeaj to mehhimpej, na pê me to hane — hane.
5Pê Taner me cumã ikre kat kam ihhôc kôt harẽ
Pê caku jàhtôa jirô pê, pê pahhi ata ty, pê ihtàmxwỳ pê Perxar haxà kam amji to Papirõn jõ pjê jõ pahhi. Ne amcro nõ na cute me cumã amji kĩn catia nõ ita ton, ne cute pahhi to mir ne me hator. Mã ihtỳj ame ikõ, ne ame ajpã.
Ne cormã Perxar apu ihkõm kwỳa kam, cute Krĩpinkrên pĩn, por pê pahhi Napuc xwỳ Pahpãm to me amji kam hapac xà jũrkwa pĩn, mehkõm xà impejti to cato atajê to cute amji japackre. Ne amji wỳr ahna hàhwỳr. Mã hỹrmã me to mõ, mã Perxar me, pyjê atajê me, pom cute ame hator atajê me, ame ampo cacô xỳre to ame ikõ, mehkõm xà atajê kam. Ne pê ramã Pahpãm ihkõm xà impejti itajê intête me cumã, quê nee jũm cahkrit kam ampo to ihkõm nare cakrô, mã ihtỳj kam amehkõm.
Jirô pê mã ri ame pĩ me kẽn te me hõ pahpãm cahàc krekà itajê kĩn. Me ajkaam mã ikre kat kam jũm jũhkrahhi te ihhôc kam ihtẽm. Mã nee jũm te ikre kat kam ihhôc catê ita jĩ na hõmpun nare, ne me hũhhi pit pupun. Mã pahhi ita te ikre kat kam jũm jũhhi te apu ihhôc na hõmpun, me ajkaam hũpate apu ihtertet ne ihkõn to apu amji jahy, ne cupê ihte peacre, ne ihkuc jakare. Ne cumã hũpaa to hũpa. Mã cute ihkrãhhia kam harkwa to:
— Ajpên cute me amji jahkre pej atajê cunea to me cuprõ. Quê ha jũm te ikre kat kam ihhôc ita cahyt na, wa ha jũm ata mã pahhi kà gõ, ne amji mã to imã hàpên catêjê jõ pahhi na, quê ha cupê pahhi catia — hajỹr.
Mã cute mempar ne cute me amji jahkre pejti atajê cunea to cute me cuprõn, mã nee jũm te ikre kat kam ihhôc ita cahyt nare.
Mã pahhi menxi te ita par, ne ma Perxar wỳr tẽ ne cute cumã hũjarẽn to:
— Ikra, apu ita to amji japackre nare, ne nee apu hũpa nare. He ita ri jũm xũmre ita pê aquêt xwỳ pê Napuc ata tehcajpar catê, ne kam côjkwa kam Pahpãm ata Carõ, ne cupê hũràac, ne cumã ampo cunea jahkre pej. Pê amji mã to cute me amji jahkre pej catêjê me, me hũxy xi catêjê jõ pahhi na hãm ata apu mõ, ne haprỳ te Taner. Ata ca haprôr na awjahkre, quê me haprô, quê ha ihtỳj amã ikre kat kam ihhôc ita jũjarẽn xà jarẽ — hajỹr.
Mã pahhi te inxi jũjarẽn xà ata na impar ne ahna hàhwỳr. Mã hỹrmã cator, mã pahhi te Taner cukij ne cumã:
— Xãmte apê mã Taner, por pê pahhi pê Napuc xwỳ Juta jõ pjê pĩn ato cato, ne amji mã ato cumã hàpên catê ata mã ca? Wa ite akam me Pahton catê te amji kam hapac xà te amji jahkre pejti na garẽn par, ne ana ijàhwỳr. Wa ite tee cute me amji jahkre pej catêjê cunea to cuprõn, mã ihtỳj me ikre kat kam ihhôc ita cahyt, ne nee cute me hahkre pej nare, ne tee ame hahkre.
— Wa ite ate ampo jahkre kêatre atajê jahkre pej na garẽn par, na wa ite ana ijàhwỳr. Ca ha ate ikre kat kam ihhôc ita cahyt, ne imã hũjarẽn xà ata jarẽn na, wa ha amã pahhi kà gõ, ca ha apê imã me hàpên catêjê jõ pahhi, ne apê pahhi catia — hajỹr.
Mã Taner cumã:
— Imã ate imã ampo jõr xà ata kĩn nare, ne ahna imã prãm nare, ne gapacta ne jũm mã agõ. Wa ha itỳj cama amã ikre kat kam ihhôc ita cahyt, ne amã hũjarẽn xà jarẽ.
— Côjkwa kam me Pahton catê pê me ijõ Inxũ Cati te ri ikre kat kam harkwa itajê na ihhôc to hajỹr he: “Cahyt, Cahyt, Ihcajpẽr, To Ipicapôn”. Ne hàhhôc itajê hũjarẽn to hane he. Wa ha amã harẽ.
— Ne por ihhôc to “Cahyt” hane ata hũjarẽn xà pê me ijõ Inxũ Cati te gõ amcro cahyt xà cahhur mã ita. Na ca ha atỳj ita kam ty.
— Ne por ihhôc to “Ihcajpẽr” hane ita hũjarẽn xà pê me ijõ Inxũ Cati te ramã ate amji kam gapac xà cajpẽr, mã ramã cumã ihkêanre, ne ramã hamre.
— Ne por ihhôc to “To Ipicapôn” hane ita hũjarẽn xà pê me ijõ Inxũ Cati te apê ate gõ pjê to ahimpej xà to ipicapôn, ne pahhi tuw pijakrut atajê mã me hõr xà. Ne ampo cwỳrjapê ri me ijõ Inxũ Cati te ato hajỹr? Nee mã ampo na nare. Akêanre, ne ate amji kam gapac xà kêanre, incwỳrjapê ri cute ato hajỹr — hajỹr.
Mã caxwa ata kam krãhtare pê me curê xwỳn catêjê krĩ mã me cator, ne cute me pahhi Perxar curan, ne hanea ne mehkwỳ jàhtôa ne amehcuran. Ne nee cute me Taner curan nare. Mã ihtỳj ihkrĩ, ne pahhi tuw ata tehcajpa.
6Pê mehkên catêjê rop jàprêhti mã me Taner mẽ
Pê Papirõn jõ pjê kam pahhi tuw ita japrỳ Tarir. Ne cute me hõ pahhi catêjê to incrê ne me hũxwỳr, ne atajê nõ pê Taner. Ne pê Taner mã Pahpãm par jahkre pej, na pê, por me ipijakrut atajê jirôa pê cumã ampo cunea jahkre pej. Ita cwỳrjapê pê pahhi Tarir ata amji mã Taner to cute me to ihhimpej catêjê atajê jõ pahhi to prãm.
Na pê mehkwỳ itajê mã hũ na amji to prãm, ne tee ame to hahkre, cute jũ mã me ton, ne hàpên xà ita kam ihkên mã me mẽn prãmte. Ne jũ wỳr quê jũ mã me to, ne ihkên mã me cumẽ. Ampo na? Pê nee hàpên xà kam apu ampo kên ton nare, ne ajco ihcunea na catyt kam ipa, ne impejti.
Mã amcro nõ na me curê xwỳn itajê te amji to me cuprõn, ne me ajpẽn mã:
— Jũ wỳr cu me Taner ita kên mã me cumẽ, hũmre ita peaj to impej, hàpên xà ita kam. Ne côjkwa kam me Hũm Cati kôt ipa ita to, cu ha me to hahkre ne ihkên mã me cumẽ — hane. Ne ma pahhi Tarir wỳr me pra, ne cute me cumã hũjarẽn to hajỹr he:
— Hàpà pahhi! Me imã, ate amji to apijapar rohnỳtti mã na, ato prãm. Wa pahhi kwỳ me ite me amji par to hajỹr he, quê ha nee putwrỳ pyxit ita kam, jũm aràn xà na pahpãm nõ na hàhwỳr nare, ne nee ampo na jũm xũmre wỳr nare. Ne ampo na me hàhwỳr prãm, ne anaa pit mã me ahwỳ.
— Quê ha jũm te hõ pahpãm nõ na hàhwỳr na, nare, quê ha jũm xũmre na cute hàhwỳr na, quê ha ma ropti jõkre hôhti jàprêhti ata jõ kreti kam, cute me mẽn xà. Ne me imã, ite me amã icaca xà ton ita na ihhôc, ne kam gaprỳ xir na to prãm, mãr quê nee jũ caxuw ipintuw nare — hajỹr. Mã pahhi te Taner to mencaca xà ita jahkre pej nare kam, ihhêj ne cumã impejti, mã cute ahna ihhôc, ne kam haprỳ xir.
Mã Taner te hõ pahhi jõ kàhhôc cahyt, ne nee cute amji kam me hapac xà ita par nare, ne ma ikre wỳr mõ ne ihtỳj Pahpãm mã ihcakôc, ne amji na cuwỳ. Ne hõtpê amcro cunea kam Pahpãm mã ihcakôc to incrê, ikre jõ harkwa krare krac ri, ne ampo cunea pyrên hakryti na Pahpãm mã amji jarẽ, ne amji mã ahna ahwỳ. Ne pê ramã Pahpãm mã ihcakôc ita to amji pyràc tu.
Mã me hũmre itajê te me Taner kên mã mẽn prãmte, ma hũrkwa ri me mõ, ne cute Pahpãm na amji mã hàhwỳr na me hõmpun. Ne ma pahhi wỳr me pra, ne cute me cumã hũjarẽn to:
— Xà nee ate amji mã acaca xà ita na ihhôc nare? Pom ate putwrỳ pyxit ita kam jũm te aràn xà na, nee ampo na jũm wỳr nare ahna ihhôc ita? Xà ate cute me akaj na ampo na me jũmjê wỳr mã ate ropti jàprêhti jõkre hôhti jõ kreti kam me irẽn na ate me imã, me cumã ihhôc nare? — hajỹr.
Mã pahhi Tarir me cumã:
— Ỹhỹ, ampeaj kam me pahte amji kam me pajapac xàa kôt wa ite ita ton, na ri nee to ipintuw xà nare — hane.
Mã me cumã:
— Ne pom Juta jõ pjê rũm Taner ita, nee acaca xà ita kôt amji kam hapac, ne to amji japackre nare, ne ihtỳj amcro cunea kam côjkwa kam Hũm Cati ita na amji mã hàhwỳr to incrê — hane.
Mã pahhi te ita par, ne hacpỹa mã amji mã incryc. Ampo na? Pê cumã Taner kĩnti na pê. Ne tee apu Taner pytàr to hahkre.
Mã ramã pyt xàr xàa kam, mã hacpỹa ne pahhi wỳr me to ihhimpej catêjê itajê me pra, ne cute pahhi mã me harkwa to:
— Pahhi, jũ mã ca ha ajte Taner ita to? Pom ate pahte amji kam me pajapac xàa kôt ita ton ita, ca nee to apintuw nare — hajỹr.
Mã pahhi Tarir te Taner na hàhwỳr. Mã cute me haprôr, mã pahhi te cumã harkwa to:
— Pom ca Apãm Cati mã gàpên to apa ita, quê ha apytà — hajỹr. Jirô pê mã ri cute kreti kam rop jàprêhti jõkre hôhti ata kam me Taner mẽn. Ne kẽnti catia nõ to me ahna harkwa jihê. Mã cormã pahhi Tarir te ihtô xà to ahna ihtô, jũm te aracri hihê mẽn cupate.
Ne ma pahhi ita mõ, ne cumã amji kĩn nare, ne cumã prãm nare, ne hàpàn nare, ne cama nõ. Ne nee hanea ne caxwa ri hõt nare.
Pê Pahpãm ropti jàprêhti atajê pê Taner pytà
Mã ramã ahna apẽ jàhtêp, mã ma ropti jõkre hôhti jõ kre wỳr mõ, por kam cute me Taner mẽn ata wỳr. Mõ, ne cumã amji kĩn nare kam, incwỳar kam cute Taner cukij ne cumã:
— Taner, Pahpãm tĩar mã hàpên catê ita, xà Apãm Cati ita te ihtỳj ropti jàprêhti itajê pê apytàr? — hajỹr.
Mã xãmte Taner cormã ihtĩar xa ne cute pahhi ita mã:
— Pahhi, he wa itĩar xa. Ijõ Pahpãm te côjkwa pĩn harkwa na imprar catê nõ kujahêc, mã cute itête ropti jàprêhti itajê jarkwa to ipijapỳn partu, mã nee jũ mã ihnõ te iton nare. Ne wa Pahpãm krac ri nee ite ampo to ihcupan nare, ne nee hanea ne acuna mã ite amji kam ijapac xà nõ to kên nare, Pahpãm kam mare mã — hajỹr.
Mã pahhi te hihê mẽn ne Taner tĩar na hõmpun, ne hũrên apu hakry, ne cute caxàr na hũjahkre. Mã cute me caxàr, ne tee amehkôpĩ, mã nee ropti itajê nõ te jũ kam ihcakên nare, ne nee cute jũ kam inxar xà hamreare. Mã tee cute amehkôpĩr par.
Mã pahhi Tarir te me cupê pahhi catêjê te ame Taner to kên prãm atajê cunea me, mehkra me mehprõ mea mã me ahna hàhwỳr. Ne ma kre kam ropti jàprêhti ata kam, cute me irẽn na hũjahkre. Mã kam cute mehcunea rẽn. Mã ropti itajê te amji wỳar mehpro par, ne me hipej tu.
Jirô pê mã ri pahhi te hõ pjê kam mehcunea mã ihkàhhôc ton, ampo kra mea mã, ne cute kam me cumã harkwa to:
“Me amji to impej ne,
nãmri wa ite Taner jõ Pahpãm kam mare mã,
me ate amji mã me hũpahti to ame atertet na,
ite me amã ihhôc, ne ahna me amã ijũjahkre.
Ampo na? Quêt hõ Pahpãm ita ihtĩar cumã ihkrĩ, ne nee apu amji kam hapac xà to ipintuw nare.
Ne por ihhimpej xà atajê,
quê nee jũm to cô nare.
Ne pom carôt ita quê nee jũ caxuw cupê hamre nare,
cwỳrjapê ri ihtỳj amji mã mehkwỳ pytà.
Ne ihtỳj ampo pej pit to.
Ne jũ wỳr quê jũm cuxà ampo pejti itajê nõ to.
Ne cutea ri ropti jõkre hôhti jàprêhti itajê pê Taner pytàr” hajỹr.