TIMOT WỲR
Hapu Na Pawrô Jõ Kàhhôc
Ỹhỹ, pê Pawrô pê Jeju jarkwa na memprar catêjê nõ Timot mã, pom cu me hõ kàhhôc pijakrut cahyt itajê kujate. Na pê hapu na hõ kàhhôc ita japrỳ pê Timot Wỳr, Hapu Na Pawrô Jõ Kàhhôc (2 Timot).
Ne Timot pê intuw, ne ajco Pawrô kôt apu ipa. Jirô pê mã pê Pawrô Epet jõ krĩ kam Jeju na mehkwỳ mehkrĩ atajê to ihhimpej catê na Timot xãm. Ne Pawrô Roman jõ krĩ kam me hacjên xà kam ihkrĩ, ne ramã cute mehcuran na hàhtêp na, cumã amji jahkre pej. Ne pom cu hapu na me hõ kàhhôc cahyt ita kam, pê Pawrô Timot mã cute Pahpãm cwỳrjapê mehcuran xà ata cupa nare na, amji jarẽ. Ne hanea ne cute cumã, jũ caxuw jũmjê te me cupê Jeju na mehkwỳ na cumã amji jarẽn, ne ajteare mã cute me amji kam hapac xà atajê cawpa.
1Pê Pawrô Timot mã amji jarẽ
1-2Ikra Timot, ipê Pawrô, wa ha hipêr amã ihhôc. Ca ikôt Jeju kôt apa ita kam, wa ato amji kra, ne imã akĩnti. Pê Pahpãm Jeju Crixtô mã iprar catê na ito. Na wa ipê cumã iprar catê. Ne pê imã harkwa ta, na wa pjê cunea kam, mehcunea mã icakôc ne me cumã awjarẽ. He cu ha Jeju na me amji hônco tu, quê ha me pamã pahte amji kam me pajapac xà tuw pejti atajê gõ. Imã Pahpãm pê me pajõ Inxũ me, me pajõ Pahhiti pê Jeju Crixtô te me ato impejti na, me ato prãm. Ne cute me acaprĩ na, imã me ato prãm, ne amã acaxwãm pê, cute acaxwỳn kam acarĩcti impejti jõr to ipa na, me ato prãm.
Pê Pawrô amji caxuw Timot japackre
3Wa Pahpãm mã apu ijàpên to ipa, ne cute ampo cunea na ito ihhimpej atajê cunea wa ton to ipa, me quêtjê cuxà, ne nee amji pê ihhimpej xà nõ to ijapac kêt, ne ihcaca nare. Ne wa hãn ne amcro me, caxwa kam Pahpãm mã icakôc, ne nee amji pê ato ijapac kêt nare Timot, ne itỳj cumã acajrẽn, ne cumã apyrên ijakryti na amji jarẽn to ipa. 4Ne me papicapôn xà ata kam, wa cormã acwỳr ata na ato amji japackre. Na wa hipêr apupun prãm, ite apyrên amji jakryti prãmte. 5Na wa itỳj ate Jeju to amji mã ahimpej to apa na, ato amji japackre to ipa to hanea, pom quê atocatyjre pê Rojtikwỳj, me anã pê Ewnixêkwỳj Jeju to amji mã mehhimpej he. 6Na pê wa akrã na ijũ xi, ne acajrẽn ne apê Pahpãm mã gàpên catê na, cumã agõ. Pê Pahpãm amã Carõ Pejti carôt gõ, ate nee amji mã ampo cupa nare xà na. Ne akam carôt ita to amji japackrea ne. 7Quê ha Pahpãm me pamã Carõ Pejti gõ, cu ha nee ame amji mã pahto me papa nare. Ne quêt ampo crê itajê na quê ha me pahtehcajpa he. Quê ha carôat kôt ame papa na, me pahtehcajpa. Ne me pahcunea te ajpẽn kĩnti na, me pahtehcajpa, ne hanea ne pahte me ampo kên to amji kam pajapac tête, me amji jiprõn na, me pahtehcajpa.
Pê Pawrô mã Timot te ihkôat amji ton na to prãm
8Cwỳrjapê ca ha nee me cumã me pajõ Pahhiti to gũjarẽn na apahàm nare. Ne hanea ne, nee Jeju cwỳrjapê cute me ijaxàr ita na, apu ikam apahàm nare. Ne quêt icahê na gũjarẽn pejti xà itajê na, ca amji pupun xà kêanre to apa. He ramã me Pahpãm te ita caxuw amã carôt jõr. 9Ne pê me pahkên pê me pahto hapôj, ne me pahto amji kwỳa. Xà pê cu ajkĩ me ampo pejti to na mã, pê me pahto hane? Hãpà. Pê cute amji kam hapac xà to hajỹr prãmte, pê me pahto impejti ita to hane. Ne pê mam, rỳ pêa mã, Pahpãm pjê ton xwỳjrea na amji jarẽn to:
— Wa ha mehkritxwỳ na me cumã ikra Jeju kujate, quê ha mehtyc jahpan xà na ty. Wa ha hõmpu ne ihkôt me to impejti ne, quê ha nee jũ caxuw ihkên cati mã mencjêj nare — hane. 10Ne pê amji jarẽn xà ata na, me pamã me pahtyc jahpan xà na, Jeju tyc xà wỳr ihkujate. Pê ty, ne hacpỹa mã ihtĩr. Cwỳrjapê quê ha Jeju to amji mã mehhimpej to me ipa atajê me ty, ne me cupê hũràac, ne hacpỹa mã mehtĩr rohnỳtti mã. Hõhõ, me pajũjarẽn xà impejti itajêa, cu ha me cumã harẽn to me papa.
11Ne Pahpãm pê icapi, ite ijũjarẽn xà impejti itajê jarẽn, ne Jeju na mehkwỳ mã to hahkre prãmte, pê icapi ne ikujate. 12Cwỳrjapê wa ampo itajêa na amji pupun xà kêanre to amji pupu. Ne nee apu ipahàm nare, ne nee apu amji mã pa nare. Ampo na? Pahpãm pê imã ijàpên xà ita gõ, ne cute imã ijamãr xà caxuw carôt tỳjti jõr. Ne quê ha hàpên xà ita ijamãr itaa na, quê ha ahnaa hacpỹ ne Jeju amji jaxà, hõ amcro ata na.
13Ne pom ampeaj kam ite amã ampo to hahkre itajê, ca ha amji mã hahkre pej, ne me cumã to hahkre to apa. Ne ihkôat amji ton to apa xà caxuw, wa ite amã to hahkre partu, he ampeaj kam ri quêt ite amã ampo to hahkre xà to ihimpej atajê. Ne Jeju to ca ha amji mã me ahimpej na amji to ihtỳaj to apa kam to acrà tu ne. Ne ca ha hanea ne Jeju na mehkwỳ kwỳ me, kam ajpẽn kĩnti to me ahônco tu ne. 14Ca ha atỳj amji mã me ite amã ampo pejti to hahkre xà itajê cunea nõr to me apa na, quê ha acaxwãm pê Pahpãm Carõ Pejti ate ton xà ata na atehcajpa.
Pê Pawrô Timot mã Onetipo pejti na harẽ
15Ne ramã ate Axij jõ pjê kam mehcunea te me ijicu, ne ma ame icaca na me ijahkre pej, mã hanea ne Pijer me Hermojẽn te ijicu. 16Imã Pahpãm te Onetipo me, mehkra to impejti na me to prãm, ne cute me caprĩ na imã me to prãm. Ampo na? Ramã cute imã ijakry catia jõr, ne nee cute me ijaxàr ita jũ na amehpahàm nare. 17Ne Roman jõ krĩ mã cator, pê ma apu ijapên to mõ, ne ina cator. 18Ne amã Epet jõ krĩ kam cute itehcajpar catia na hahkre pej. Ne imã Pahpãm te, Jeju to amji jaxàr xà kam, cute Onetipo caprĩ na to prãm.
2Quê ha Timot pê Jeju cahê na ipijapu catê impejti
1Ỹhỹ ikra, ca ha Jeju carôt to amji to ihtỳj. 2Ne pom me hàhtôa kam mare mã ite amã icakôc xà to hahkre itajê, ca ha hanea ne jũmjê mã to hahkre. Ne por jũmjê atajê quê ha catyt kam me ipa, ne me hũpar pejti to me ipa na, quê ha ihtỳj ma amũ irô mã, jũmjê mã ampo itajêa to hahkre.
3Me papê Jeju cahê na me papijapu catêjê, cwỳrjapê ca ha icuxà ajũcanãar kam apa. 4Ne me ipijapu xà kam krãhtare pê me hàprê catêjê ihtỳj amji caxuw me hõ pahhi kam hapac to me ipa. Cwỳrjapê ri nee me ipijapu xà te amji kam hapac xà ata ràn xà na, ihkwỳ to amji kam hapac nare. 5He me hàhcukren catêjê te hajỹar, quê ha me hacrer catê me hacrer, quê ha ajkaam amentoj, ne jũm te imprar tỳj ne mam cator na, quê ha ihtỳj amcwa. Hõhõ, cu ha me papê me hàhcukren catêjê pyràac, ne Pahpãm jarkwa kôt, catyt kam me cumã pajàpên to mempejti na, cu ha pahtỳj me amcwa. 6Ne pur kam hàpên catê te me hajỹar, quê ha pur kam apê, quê ha cumã hõ intuw, quê ha mam quêt hõ intuw ata nõ krẽ, ne Jeju mã me gàpên xà itajê pê itajê pyràac. 7Ne ite amã ampo jarẽn itajê to amji kampa ne ihkôt hakoap ne, quê ha ihtỳj Pahpãm ate impar jahkre pej na atehcajpa, ca ha hahkre pej.
8Ne Jeju pê pahhi Tawi xwỳ tàmxwỳ, ne hacpỹa mã ihtĩr na, harẽn xà impejti itajê to wa mehcunea mã ijũjarẽn to ipa. 9Cwỳrjapê ri ihhêj rũm ipê mehkên catêjê pyràac, mã wakỳti te ijara juwapre. Ne Pahpãm jarkwa nare, jũ wỳr quê jũm ihcajpre. 10Na wa itỳj Pahpãm na mehkwỳ mã, ite amji pupun xà kêanre itajê mã ijũcanãr to ipa. Hõ, wa itỳj apu hajỹr to ipa, mãr quê xwỳ mã Pahpãm wỳr me apkjê, quê Jeju mehkên pê me to hapôj pa, mãr quê mempejti na Pahpãm cahê na, côjkwa kam ame ipa rohnỳtti mã. Hõhõ, pê ramã rỳ pêa mã Pahpãm amji mã me pahto hajỹr to prãm.
11Ita caxuw wa ha caxwãm catia mã, ite ampo to me amã hahkre xà impejti atajê to me amã hahkre he:
Cu ha amjia kôt me papa jicu me mãa mã, pahtỳj Jeju cwỳrjapê me pahtyc to prãm na,
cu ha pahtỳj cahi na ame papa.
12Cu ha ame amji pupun xà kêanre ita kam ame pajũcanãr kam me to pancrà na,
cu ha pahtỳj cahê na amji to ame pahhi.
Nãmri cu ha pahte amehcaca, ne me hicu na,
quê ha hanea ne ame pahcaca, ne me pajicu.
13Nãmri cu ha pahte me amji jarkwa par nare na,
quê ha ihtỳj quêt Jeju amji jarkwa pa.
Ampo na? Jũ wỳr quê taa amji mã ihhêj.
Pê Pawrô Timot mã amji krac ri mehcakôc kên catêjê cawpa
14Ne me akwỳa te ampo to hahkre xà impejti itajê to ma me amji japackrea ne ajco, ne ma me to. Ne ahna me to ihtỳaj ne, quê nee ihcaprỳ na mehcakôc xà kryjre incwỳrjapê ame ajpẽn mãn nare. Nãmri mehkwỳ kam mare mã cute me ajpẽn mãn ita na ihkaj na, quê ame hane, quê ame kampa, ne hanea ne mehkêanre ne. 15Ne me hàpên catê nõ impejti ata, quê ha hàpên xà to impejti to ipa, mãr quê jũm hàpên xà ata pupu, quê nee hàpên xà ita jũ na ihpahàm nare. Ne pom ca ramã gàpên xà to apê ita to ca ha apê, ne Pahpãm na mehkwỳ mã ampo to hahkre to impejti to apa. Mãr quê Pahpãm jũ caxuw acukij, ca nee gàpên xà nõ impejti ata jũ na apu apahàm nare.
16Ne mehkwỳ pê Pahpãm na mehkwỳ nare atajê ri ajteare mã me amji kampa, ne amjia kôt me harkwa kôt hamreare atajê to ame hahkre to me ipa. Ne Pahpãm ma apu mehcakôc xà kôt hamreare atajê caca. Ampo na? Cute Pahpãm jõ pry tête mehkwỳ to pry rên prãmte ri amehcakôc xà itajê to. 17Ne me hũmre te me hapackre xà ita pê ihhêj rũm cagã te mehcãmxar, mã kam ihtu, ne hĩ cacu, ne ihpỳpỳm to ipa ata pyràac. Ne me hũmre atajêa ri kam Pahpãm te amji kam hapac xà cakrô, mã ihtỳj ame to kêanre to me ipa. Atajê pê ri ampo kên to pit mã hahkre catêjê he: Himẽn me Piret. 18Ne ma ame Pahpãm jarkwa cajrer pejti, cuhtacti ata caca, ne cute mehcupan, ne mehkwỳ mã mehhêj xi xà to:
— Pom Pahpãm te hacpỹa mã me pahto ihtĩr na amji ton xà ata te ma ramã me pajakren — hajỹr. Cwỳrjapê ri Jeju na mehkwỳ jàhtôa ne cute me hũhhyr, mã kyre pê ajpẽn kam Jeju kôt ame amji ton to me ipa. 19Ne quêt Pahpãm na mehkwỳ te Jeju to amji mã mehhimpej tỳjti itajê pê ihhêj rũm ikre jicjêc tỳjti ata pyràac. Mã Pahpãm pê ikre ton catê pyràac, ne cute ikre mã hũxwỳr, mã cumã apu ihcuhhê. Ne jũ wỳr quê jũm hũhta. Ne por pĩ tỳjti ata kam ihhêj ne ihhôc ata jũjarẽn xà te hajỹr he: “Pahpãm mã ihtỳj amji kwỳa jahkre pej” ne: “Quê ha mehkwỳ te Pahpãm na mehkwỳ na amji jarẽn na, quê ha ihtỳj mehkên cunea mã hikra, ne me hicu” hane.
20Me hakràj catêjê jũrkwa kam ampeaj kam me cumã me hàwmrõ xà me, me hàpàn xà pyxwỳr xà jàhtô. Ne ihkwỳ na kyre pê hĩ ahwỳ, ne ihkwỳ impejti atajê na ri ampeaj kam hĩ ahwỳ. Ne por impejti atajê ri quêt, cute me to amji mã amcro jirên xà atajêa na kam me apà, ita jĩkjê na ri me papê ampo itajê pyràac. 21Cu ha me pahte ame pahkên jicu, ne ampo te ame pahtũm atajê jũrê, ne ame pahtetetti ne, me pajàpên xà caxuw. Quê ha ihtỳj Pahpãm me pamã hàpên xà impejti nõ gõ, cu ha me cumã apê.
22Ỹhỹ Timot, cormã atuwre cakrô, ca ha nee apê mentuwre te amji kam hapac xà, kôt hakop nare atajê pyràc nare. Nãmri mentuwre itajê quê ha pjê kam me ampo pejti pupu, ne nee ihkôt me hakop nare kam, ma ihkôt me pra. Ne caa, ca ha hajỹr nare, ca ha nee apu ita ton to apa nare, ne quêt catyt kam apa, ne Pahpãm to amji mã ahimpej to apa. Ne nee me akwỳa me ame ajpẽn mãn nare, ne nee ame apijapu nare, ne catyt kam cama ame ajpẽn kĩnti to me apa. Ampo na? Nãmri me akwỳ cunea te amji kam hapac xà cunea tetet pit, ne quêt Pahpãm te me atehcajpar na, ca me ahcukij.
23Ne pom ajpẽn krac ri me harkwa cakrô to amehcakôc atajê pê, ca amji to guphêa ne. Nãmri ramã ate, cute me hajỹr to mõr mã mã, ma ame ipijapu na me hahkre pej. 24Ne Pahpãm mã me pajàpên catêjê itajê nee ame papijapu xà nare. Cu ha quêt cama me amji mã pahprĩa ne me pajàhcaprĩa kam me cumã ampi ne, ampo to me cumã hahkre to me papa. 25-26Quê ihhêaj to jũm ame pahkam incryc, cu ha me cumã ampi ne me cumã pahcaprĩ, ne hacpỹa mã mehcuhtac. Ne por me pampar nare atajê pê ihhêj rũm, ramã me pahcurê xwỳn pê Xatanaj jõ kwỳc mã amencjêj. Mã Xatanaj ita me to ihhimpej, mã harkwa kôt amji to mehhimpej to ame ipa. Cu ha me cumã ampi ne me to hahkre to me papa, ne me ahna Pahpãm wỳ, quê ihhêaj to mehtehcajpa, quê ha xwỳ mã hacpỹa mã Pahpãm wỳr me apkjê, ne me amji krã kre, ne Xatanaj jõ kwỳc ata pê ame hapôj.
3Pê Pawrô Timot mã amcro cahhur atajê cawpa
Coroxo 2.16-19; 1 Timot 4.1-5; 2 Petrô 2.1-3; Juta 3-16
1Ỹhỹ Timot, wa ha ita caxuw amã Jeju te amji jaxàr xà jõ amcro cahhur kôt harẽ. Ne amcro cahhur ata kam, quê ha ampo cunea apu amji mã hamãr nare. 2Quê ha amcro atajê ihkêanre, ne ampeaj kam hũpa. Ampo na? Quê ha mehcunea amehkêanre, ne amji to pit mã ame amji kam hapac to me ipa, ne me hàhcukrêj me, ihpore to pit mã amji mã me cuprõn to me ipa prãm. Ne mehkwỳ amji jirôa pê amji to me cati to prãm, ne amji to me hàprãr to me ipa. Ne mehkwỳa kwỳ to ihhêj rũm mehkryjre ta, ne ampo cunea na me cumã hũjahkre to me ipa. Ne mehcunea me amji xũn kêanre to ame ipa, ne nee me hũmxwỳ impar nare, ne nee cute me cumã ampo pejti jõr atajê pyrên, me cumã me hakryti na me amji jarẽn to me ipa nare, ne nee amji mã me Pahpãm cupa nare. 3Ne nee me cumã mehkwỳ kĩn nare, ne nee me hàhcaprĩ nare, ne cama mehkwỳ to ihhêj xi xà to kêanre to me ipa, cute mehkên mã me irẽn prãmte. Ne amji mã mehkêanre ne, ne me amji mã hamãr nare ne. Ne me cupê ampo pejti to kên catêjê, ne nee me cumã ampo pejti kĩn nare, ne me hàprêa to me hàprê. 4Ne me hõ ikwỳ nõ catêjêa jarẽn to mehkêanre to me ipa, cute mehkên mã me irẽn prãmte. Ne hãn ne ampo kên kam mehkrã acto tu, mã nee kam me amji cajpẽr nare, ne mehkên itajê to ihtỳj amji to ame catia to me prãm. Ne cute Pahpãm kaj na amji kam me hapac xàa na amji mã me ampo ton to prãm, itajê to pit mã ame ipa. 5Ne mehkwỳ mã me cupê ihhêj rũm ampeaj kam Pahpãm carôat kôt, catyt kam Jeju kôt me ipa catêjê, ne nee mã cama ampeaj kam nare, ne amehhêaj to ame ipa. Ne pom cute me hajỹr catêjê itajê pê, ma amji to guphê to apa.
6Nãmri hãn ne ikre cunea kôt mencjêj to me ipa, ne pyjê mã mehhêj xi xà kêanre atajê to mehhêj to me ipa. Mã hãn ne pyjê itajê te me hahkre pej nõ kam, mehkôat ame ampo kêanre atajê ton to me ipa. Ne ramã me caxwãm pê cute mehkêanre na me amji jahkre pej, na ri amehpeacre. 7Ne pom cute me cumã ampo to hahkre catêjê itajê cuxà, cute ame ampo itajê jahkre pej prãmte, tee ampeaj kam me kampa cakrô, ne nee jũm te ihkôt hakop, ne kam hapac, ne hahkre pej pej nare. 8Ahnaa mã pê Janaj xwỳ me Jãmprê xwỳ he, ne Mojxe xwỳ cuna mã amji kam me hapac xà to kêanre he. Ita kôpit na mã, me hũmre hêj xi itajê te Pahpãm jarkwa hêj xi nare ata cuna mã me amji kam me hapac xà kêanre to me amji kam hapac he. Ne mehkrã kêanre, ne cute Jeju kôt me amji kam hapac jicu. 9Ne pom me hũmre itajê quê ha nee ame ipa ry nare. Ampo na? Quê ha mehcunea, cute me Janaj me Jãmprê cuxà, cute me amji jahkre kêatre ata na me hõmpu.
Pê Pawrô Pahpãm jarkwa na Timot japackre
10Ne ca nare, he ca ramã ite amã ampo to hahkre xàa kôt ate amji ton. Ne ca ramã ite amji kam ijapac xà cunea na ate ipupun, ne ahna ijahkre pej. Ne ramã ate ampo caxuw ipa na ijahkre pej. Nãmri wa ramã Jeju to amji mã ihimpej to ipa, ne ampo cunea na, amji mã me ato ijàhtàtti to ipa, ne amehkĩnti to ipa, ne ijũcanãar kam ampo itajê kam to icrà to ipa. Mã mehkwỳ te ame ito kêanre prãmte, cama ame icapôr to me ipa. 11Na wa amji pupun xà kêanre to amji pupun to ipa. Ca ramã ate ijarẽn par, ne ahna ipupun xà atajê na amã ijahkre pejtu. Ne ate Antijoc jõ krĩ me, Ampokrekà jõ krĩ me, Ritij jõ krĩ kam, por ampo cunea te ito kêanre ata na ate ijahkre pej pejtu. Pê ajco Pahpãm pê Pahhiti ampo itajê cunea pê ito hapôj to ipa. 12Ne por Jeju kôt me amji ton to me ipa prãm atajê cunea, quê ha icuxà, ampo itajê na me amji pupu. 13Ne me hũmre krã kêanre, mehkwỳ mã ihhêj to ipa atajê kwỳa to ri, cute me cumã ihhêj jahpan xà na, mehkwỳa kwỳ te hanea ne me cumã ihhêj.
14Ne ca Timot, pom ate ampo to hahkre ne hahkre pej, ne catyt kam ihkôat apa atajê kam, ca ha quêt to acrà tu. 15Ne pê ca gõkre nõre naa mã, Pahpãm jarkwa to cute me amã hahkre catêjê jahkre pej, atajê cukwa kam ri amã Pahpãm jarkwa jahkre pej. Ne pom Pahpãm jarkwa jõ kàhhôc ita, quê ha ihtỳj ampo cunea na atehcajpa. Ca ha gũpar krã kreti to awpa, ne Jeju Crixtô to amji mã ahimpej to apa, ne akên cati pê acato.
Cu ha Pahpãm jarkwa to me pajàpên xà caxuw me pahcũmpej
16Ne pê ramã mam Pahpãm na mehkwỳ, Pahpãm Carõ Pejti jarkwaa kôt, ihkàhhôc ata kam mehhôc. Ne ampo pejti itajê cunea caxuw ri impej he. Ihtỳj ampo pej cunea to me cumã hahkre xà caxuw impej. Ne cute me ampo kên ton, mã intête cute me cumãn xà caxuw impej. Ne me cute amji kam me hapac xà jikutti, mã cute hacpỹa mã mehcuhtac xà caxuw impej. Ne caxwãm catia mã, catyt kam me ipa xà to me cumã hahkre xà caxuw hanea ne impej. 17Hõhõ, quê ha jũm mã Pahpãm kôt ipa, ne cumã hàpên catê na cumã amji ton to prãm na, quê ha ihkàhhôc ita cahyt, ne ampo par jahkre pej to mõ, ne ramã hàpên xà impejti cunea caxuw amji mã hàhcuprõn to mõ.
4Timot te mehcunea mã Pahpãm jarkwa jarẽn xà
1Ỹhỹ Timot, wa ha gapackre ne Pahpãm me, Jeju Crixtô kam mare mã amã ijarkwa ta. Pom Jeju te mehcukij ne me ajpẽn pê me to ipicokjêr xà jõ amcro kam, quê ha amji na mehtyc to cuprõ, ne mehtĩr to cuprõ, ne cute ahpỹanre na, cute ame amji kam hapac xà ton atajê kôt, mehcukij xà caxuw. Mã Jeju te ahna me hahkre pej atajê na, quê ha mehcukij. Ne cute mehcukij jirô pê, quê ha amji to pjê cunea jõ Pahhiti. 2Cwỳrjapê wa ha amã ijarkwa ta, ca ha mehcunea mã Pahpãm jarkwa to acakôc to apa kam apec xà nare kam, kam xuwcaca nare kam, me cumã to acakôc to apa. Ne hanea ne apec xà kam, xuwcaca kam, me cumã Pahpãm jarkwa to acakôc to apa. Ne gũjarẽn xà ita na me cumã awjahkrea ne, ne ma mehkên tête mehcahpêrkàr to apa. Ne me cumã ampo itajê to hahkre na, amji mã me to gàhtàtti to apa, ne ma ajpẽn kam me hakryti na me cumã gũjahkre to apa. 3Nãmri quê ha cormã me hũmre jũpar nare atajê jõ amcro kam ahtwỳ, quê ha nee me gũjarẽn pejti pê ampeaj kam atajê kam me hapac nare. Ne amjia kôt cute amji mã me amji kam hapac xà kĩnti atajê kôt, quê ha ame ipa. Ne amji mã, cute me ampo to hahkre catêjê jàhtôa ne me to cuprõ. Ne me cumã:
— Ite amji mã me ampo par na prãmti atajê to, ca ha me imã hahkre — hane. 4Ne pom me hũmre itajê, quê ha me Pahpãm jarkwa pejti kam me hapac jicu, ne ajte menquêtjê jũjarẽn hêj xi xà kam, quê ha quêt me hapac to me ipa.
5Ne ca Timot, ca ha itajê cunea pê amji to guphê to apa, ne ma ahna amji jamãr peaj ne. Ne ate amji pupun xà kên itajê mã awcanãa ne, ne cama amji to apê Pahpãm wỳr me to ipipkjêr catê na, amji to impeaj ne. Pom apê Pahpãm mã me gàpên catêjê nõ ita? Na ca ha cumã gàpên xà itajê cunea to impeaj to apa.
6Pê wa mam Pahpãm mã ramã amji gõ, ne cumã amji to awjahkre, ite cumã ijàpên itaa kam ityc xà jõ amcro mã hahêr, na pê wa cumã amji to awjahkre. Ne ramã ipê pjê krãn to mõ, ite amji to ijũjahkre xà ata wỳr. 7He wa ramã ite ampo kên itajê cunea me amji cujtên to kênre nare. Ne hanea ne ijàhcukren kênre nare, ne wa hanea ne ite amji mã ite Jeju to amji mã ihimpej xà ita juwahi to kênre nare. 8Ne pom ijàpên xà itajê jahpan xà na, ramã Pahpãm cahê na imã ijàmcwỳr xà impejti ata nõ. Ne mehcukij ne me to ipicokjêr xà jõ amcro kam, quê ha Pahhiti pê krã kreti te catyt kam me pahcukij catê ata, quê ha imã ijàmcwỳr xà ita gõ. Ne ijàmcwỳr xà ita pê ihhêj rũm pjê kam pahhi krãhkà. Quê ha Pahpãm ikrã na ihkrãhkà ata pupu ne imã:
— Ate amji kam gapac xà cunea na apeaj to apej — hane. Hõhõ, quê ha Pahpãm ito hane, ne nee wa ha ahte hajỹr nare, ne por Jeju jikaj kam, me cumã amji kĩan kam me hikaj to ipa atajê, quê ha me hanea ne icuxà ame amcwa.
Pê Pawrô Timot mã amji jarẽ
9Na ca ha atỳj ajpên iwỳr atẽm pyrentu ne ipupu, nãmri wa ahte ikrĩ. 10Pê Tema amji mã pjê ita te amji kam hapac xà kĩn, ne incryc imã hikra ne ma tẽ, Texarõn jõ krĩ wỳr. Mã Crexẽn ma Carati jõ pjê wỳr hàpên xà wỳr tẽ, ne hanea ne Tito ma Tarmati jõ pjê wỳr hàpên xà wỳr tẽ. 11-12Ne pê wa ma Epet jõ krĩ wỳr Tiquicô kujate. Mã Ruc pyxit peaj ne icahê na ihkrĩ. Ca ha tẽ ne Macô japrô ne ajpên to tẽ, nãmri taa mã quê ha ihtỳj ijàpên xà ita na itehcajpa. 13Ne ajpên me amõr xà wỳr, ajpên me imã ite Trôwat jõ krĩ kam, Carpo jũrkwa kam, ikàhti juwahi ata pỳ, ne hanea ne ajpên imã ihkàhhôc kwỳ jàhhuc atajê incwa, ne nee ca ha, por wa cormã kam ihhôc to prãm ata to me gapac kêt nare.
14-15Ne ma amji na me wakỳti to hàpên catê japrỳ te Arexãnre ata to me guphêa ne. Nãmri pahte amji kam me pajapac xà ita na, ampeaj kam cama me pahkam hàprê, na pê ramã ito kên crire nare. Ne imã cute ito kên jahpan xà na, Pahpãm te cumã hàmjõr na to prãm.
16Ne pê Roman catêjê jõ pahhiti icukij prãmte, amji cuna mã ixãm, pê wa ahte me cuna mã xa, ite amji na ijaprãr prãmte. Pê ajte me pahkwỳ itajê cunea me ire, ne ma ipê amehcahkũm. Ne pom cute me ito hajỹr xà ita na, quê nee ijahpan xà na jũ caxuw Pahpãm jũ mã me ton nare. 17Pê Pahpãm icahê na xa, ne ma imã carôt gõ, pê wa carôat kôt mehcahkrit atajê mã Jeju jarẽn pejti itajê cunea jarẽn toxa, ne pea ite amji to ityc xà jahpan. 18Ne quêt me Pahpãm pê Pahhiti te hajỹr romã mã, quê ha ampo itajê cunea pê ipytà, ne ma côjkwa wỳr ijaprô, wa ha curia ihhimpej xà ata krac ri ikrĩ. Ỹhỹ, cu ha hõtpê Pahpãm mã me pajũjarẽn to hajỹr to me papa he:
— Hirã pê, mehcunea jirôa pê acati — hane. Quê ha mehcunea me pahkampa, ne me harkwa to:
— Ampeaj kam! — hane.
Pê Pawrô me, mehkwỳ Timot mã me amji jarẽ
19Ne Prixirakwỳj mã ijarẽ, Aquira mea mã, ne hanea ne Onetipo me, mehkra mea mã, me cumã ijarẽ. 20Ne Eraxô mat ri Corinti jõ krĩ kam hàhhuc, ne ite amji jakàn pê Tropimo juwahi, Krĩtêpti kam, pê hà incwỳrjapê pê wa huwahi. 21Ajpên me amji jahkre, ne pahhàjê pỳm xwỳjrea na iwỳr me acator to me hahkre. Ne hanea ne me pahkjêjê kwỳ itajê te ri me amã amji jarẽn kujahêc he: Ewpuro me, Prutẽn me, Rino me, Cawtikwỳj me, mehkwỳ cahhur itajê cunea te me amã amji jarẽn kujahêc. 22Na wa ijõtpê ite Pahpãm mã me acajrẽn to hajỹr he:
— Me ijõ Inxũ, ca ha Timot mã acarôt gõ, quê nee apu acarôt ita kam amji na ampo cãmjĩ nare. Ne Timot na mehkwỳ cunea to impeaj ne — hajỹr. Hamre.