Hapu Na Xamer Jõ Kàhhôc
TAWI
Pê Pahhi Cati
Ỹhỹ, pê Xamer pê Pahpãm jarkwa to ihcakôc catêjê nõ, ne cupê me to ihhimpej catê cahhur. Cwỳrjapê ri hõ kàhhôc pijakrut itajê japrỳ te Mam Xamer Jõ Kàhhôc (1 Xamer) ne Hapu Na Xamer Jõ Kàhhôc (2 Xamer). Pê pahhi Xawrô tyc jakàn pê ri Tawi pê Ixaher catêjê jõ pahhi. Ne pê mam cupê harã catêjê jõ pahhi, ne ita caxuw hanea ne cupê kỳj catêjê jõ pahhi. Ne pê pahhi cunea jirôa pê Tawi mã Pahpãm jahkre pej, na pê ajco cumã ihcakôc, ne cumã mencrer xà na ihhôc.
6Pê Tawi hacpỹa ne Pahpãm jàmcjên xà to amji jaxà
Pê rỳ pêa mã Piritew catêjê ma me hõ pjê wỳr pĩ po te Pahpãm jàmcjên xà ata pytà ne ma me to mõ, pê curia ihcuhhê. Cwỳrjapê pê Pahpãm Piritew catêjê kam incryc, ne ajco ame to kêanre. Ne jũ mã me to, pê ame amji pupun xà kêanre to ame amji pupu.
Cwỳrjapê ri Piritew catêjê te hacpỹa ne Pahpãm jàmcjên xà kujahêc, Ixaher catêjê jõ pjê wỳr. Mã hàmcjên xà ita Apinatap jũrkwa ri hàhhuc. Jirô pê mã ri Tawi, ma ajpên Krĩpinkrên wỳr Pahpãm jàmcjên xà ata to mõr prãm. Ne cute krãhtare impej to pit mã mir te trĩnta ne ma me to ihhimpej to mõ, hàmcjên xà ata wỳr.
Pê Pahpãm rỳ pêa mã hàmcjên xà to ipa xà to ramã me cumã hahkre. Quê nee ihtỳj amehcupên nare, ne nee cawrô jõ kàhà kam me to ipa nare. Ne me to ipa catêjê atajêa, quê ha me cumã pĩ jacjê, ne me hikre kam me to ipa.
Mã nee Tawi te ihhimpej xà ata kôt, hàmcjên xà ata to mõr nare. Ne me to ipa xà ata kaj na hacpỹ ne me to mõ. Ne cute pryti jõ kujti intuw nõ kam me hãm, ne ma me to mõ. Mã Apinatap kra pijakrut itajê mam pryti jõ kujti to mehhimpej to me mõ. Mã hapu na Tawi me, mehkwỳ cunea me, me mõ, pryti jõ kujti kôt. Ne Pahpãm kam mare mã ame hakrya to ame hakry, ne cama ame hàkôr xà atajê cakô, ne ame cre.
Mã pryti te amji tõc, mã Apinatap kra ata te hũhkra to Pahpãm jàmcjên xà juwahi, ihpỳm cupate. Mã Pahpãm kam incryc pyrentu. Ampo na? Cute me hàmcjên xà ita cupên xà hamreare, na ri apu kam incryc, mã ihtyc pyrentu.
Mã Tawi mã Pahpãm cupaa to hũpa, amcro ata na, mã cute amji mã harkwa to:
— Jũ mã wa ha Pahpãm jàmcjên xà ita to, ne krĩ mã to mõ? — hajỹr. Ne ma Opet jũrkwa wỳr to mõ, ne cute curia huwahi, mã hàhhuc ne ahna putwrỳ incrê. Mã Pahpãm te Opet na mehkwỳ cunea to impej, hũrkwa kam hàmcjên xà jàhhuc ata jahpan xà na.
Mã Tawi te ita par, ne hacpỹa ne cute amji jaxàr, ne ma hõ krĩ wỳr Pahpãm jàmcjên xà ata to me mõ. Ne ita caxuw nee pryti jõ kujti kam me to mõr nare, ne quêt Pahpãm himpej xàa kôt me hikre kam me to mõ, ne amji mã me hũpahti to mõ. Ne cute me to mõr xà ita kam me pryti me, carà cahàcti hôhti jàhtôa ne me to caxàr, cute me to Pahpãm cajpuaw prãmte.
Mã Tawi mã amji kĩan kam Pahpãm kam mare mã hàkrun to mõ. Ne hanea ne ame hàkôr xà cakô, ne krĩ mã me to cator. Ne cute Pahpãm to me amji kam hapac xà jũrkwa kam, me hàmcjên xà ata xãm. Ne cute hipêr pryti nõ curan, ne me to caxàr, ne Pahpãm mã me hõr. Ne cumã mehkwỳ cunea cajrẽn, quê me to impeaj ne. Ne mehcajrẽn jirô pê mã ri cute ahpỹanre na me cumã kwỳr te pro me, pĩxô pijakrut crà ata jõr. Mã ma ame cahkũm, me hũrkwa wỳr. Mã ma Tawi te hũrkwa wỳr amji jaxàr, cute mehkra cajrẽn prãmte.
Ne pê caku jàhtôa kam Tawi pê pahhi, ne cupê hõ krãhtare to ihhimpej catê impeaj. Ne ajco amji na mehkwỳ to cuprõn tu, ne Pahpãm jarkwa kôt me ipu na krĩxàre catêjê cunea me, me ajpu. Ne ihtỳj ajco catyt kam Pahpãm kôt ipa, ne ihtỳj amji kôt mehkwỳ cunea Pahpãm wỳr to apkjê.
11Pê Tawi ihkên to
Pê Tawi pê pahhi na ramã caku jàhtôa, ne ramã hakràaj to hakràj, ne cumã ampo pej hàhtôa to hàhtô. Mã amcro nõ na, ramã pyt pec kam, Tawi te pyjê impejti nõ pupun, ne ihtỳj to ihpahàm nõ prãm. Ne ramã impjêa kam ri, ahnaa cute haprôr ne apu cume gõr, mã kaam ihkra.
Mã Tawi te amji mã huwahi prãmte, ma me ipijapu xà kêanre wỳr impjên pê krãhtare ata kujahêc, mãr quê ahte ajpu ne ty. Ne cute impjên kujahêc, mã jũm te ihtehcajpar nare kam ipijapu ne ihtyc. Mã Tawi te amji wỳr hĩxi na hàhwỳr, cahê na hàhhuc prãmte. Mã ahna ahtũm nare mã cumã ihkra pỳm.
Mã Pahpãm mãa Tawi te ampo ita ton xà ita kêanre, cwỳrjapê ri cute hỹrmã cumã harkwa to ihcakôc catê nõ kujahêc. Mã hỹrmã cator, ne cute Tawi mã hũjarẽn xà ita to hũjarẽn to:
— Pê krĩ nõ ita kam, me hũmre me ajkrut, ne pyxit ita jakràj, neihnõ ita pê ihkĩnte hamreare. Ne hakràjti ita mã ampeaj kam pryti, ne cumã carà cahàcre hôhti hàhtô. Ne cupê hamreare ita pê cumã carà cahàcre hôhti krare incrire ita pyxit peaj, pê ajco to ajpa. Pê ajco ikrea kam mehkra cahê na apu ipa, ne curia gõr, ne mehcunea mã ihkĩnti.
— Mã amcro nõ na jũa rũm memprar catêjê kwỳ cator, hakràjti ata jũrkwa ri. Mã cute me cumã harte xà caxuw nee cute hõ pryti me, hõ carà cahàc hôhti nõ curan nare, ne cute cupê hamreare ata pê hõ carà cahàcre incrire pyxit peaj ata curan na me mẽn. Mã cute mehcuran, ne me to hàr, mã cute mehkrẽr — hajỹr.
Mã Tawi te hũjarẽn xà ita par ne apu incryac to incryc, ne cute Pahpãm jarkwa to ihcakôc catê ita mã harkwa to:
— Ampeaj kam wa ha amã awjarẽ, pom hũmre jakràjti te ita ton ita, ihtỳj cute mehcuran xà. Quê ha carà cahàcre pyxit jahpan xà na, to cwat ne ahna amgõ — hajỹr.
Mã cute Tawi mã:
— He apêa ri jũm xũmre ata! Ne atea ca ita ton. Ita caxuw ca ha Pahpãm jarkwa na kampa he. Cute garẽn to hajỹr he: “Wa ite ato Ixaher catêjê jõ pahhi, ne ite acurê xwỳn Xawrô xwỳ pê ato ipimxur ne apytàr. Ne ite amã gũrkwa ton, ne amã me aprõ jõr, ne hipêr amã ampo jõr.
“Ampo na mã nee ate amji mã ijarkwa itajê cupa nare, ne ikam mare mã apu ampo kên itajê to? Ca ate impjên curan na me mẽn, mã cute mehcuran, ca ate cupê hĩxi to gàhkĩj. Cwỳrjapê ca ha ita caxuw gõtpê me akwỳ me, me apijapu to me apa.
“Ne ca nee ate amji mã ijarkwa par, ne amji mã hũpa nare, incwỳrjapê quê ha me akra atajê kôt me awỳr ampo kên cato. Ne quê ha acuna mã me amji kam hapac to me hanea, pom quê ate ton he. Ne quê ha ihtỳj jũmjê apê me aprõ to ahkĩ. Ne quê ha ihtỳj mehcunea cute hajỹr xà ita na me hahkre pej” — hajỹr.
Mã Tawi te Pahpãm jarkwa to ihcakôc catê mã harkwa to:
— Ampeaj kam, wa ite Pahpãm cuna mã ikên xà kêanre ita ton — hajỹr.
Mã cumã:
— Pahpãm te ihtỳj akên ita to amã impej ne to tojnõ, na ca ha nee atyc nare. Ne ate cahãj kam akra mã ramã ihpỳm ita, quê ha ihtỳj apê ty. Ampo na? Quê ha Pahpãm curê xwỳn, ate me kam mare mã akên xà ton ata jahpan xà na, nee amji mã hũpa nare — hajỹr.
Ne ma tẽ, hũrkwa wỳr. Mã ahna ahtũm nare mã Tawi kra ata xà ne ihtyc.
15Pê Tawi kra pê Axarãw mã amji to pahhi prãm
Pê Tawi mã hapua na ihkra xũmre nõ ita, ne haprỳ Axarãw. Pê ihtỳj hũm Tawi jaxà kam ajco amji to pahhi prãm. Ne cute caxuw krãhtare kwỳ me amji par, cute hũm cuna mã me ipijapu prãmte. Ne cute me ipijapu kam ihtẽm. Mã ahkêt kam Tawi jõ krãhtare te Axarãw jõ krãhtare tohjê, ne me to winti mir ne me hipej. Mã ma pjê cunea kôt apu mehkwỳ cahkũm. Ne mehtyc atajê jirôa pê me hàhtôa ne ahkêt kam me ipictor.
Mã Axarãw te hũm jõ krãhtare kwỳ me amji cajpar. Ne me hũpate ma jũ kam ihtẽm prãmte, hõ cawrô to pĩ nõ catia ita krac ri hàr. Mã Axarãw kĩ japjêhti ata te pĩ na hê, mã curia kam ajêt, mã ma hõ cawrô ita tẽ. Mã Tawi jõ krãhtare nõ te hõmpun ne hõ pahhi Jôwape mã harẽn.
Mã Jôwape cumã:
— Mẽr ampo na mã ate mehcuran hiahpuro nare? Ca ha ihcura na mã, wa ha ate ihcuran jahpan xà na amã ihpore catia ne cugõ — hane.
Mã krãhtare cumã harkwa to:
— Wa ite pahhi pê Tawi par, mã ma apu jũm te ihkra curan na to ihcaca, na wa nee ite ihcuran nare — hane.
Mã Jôwape te wapo xwahhire to incrê ne incwỳr, ne ma to tẽ. Ne por pĩ pa na Axarãw ajêt ata wỳr cator, ne cute wapo to pôj ne to Axarãw na cuhkõnre kam to caxwỳr. Mã krãhtare te tej ne Axarãw curan na, cute me Jôwape tehcajpar.
Mã Jôwape te kỳj cati pêa mã hõ hõhhi cakôr, cute to hõ krãhtare mã hàkjêr xà na, mã cute me ipijapu to hicu, ne me cuprõn. Ne cute me kreti catia kam Axarãw jĩ to me hũcapêr, ne hipy me kẽn jakôt. Ne ma ikre wỳr me amji jaxàr.
Mã pahhi Tawi te ihkra curan na harẽn par, ne cama apu hapête amrã.
Ne pê caku jàhtôa kam Tawi Ixaher catêjê jõ pjê cunea to ihhimpej ne pea ihtyc. Ne pê ihcunea na catyt kam Tawi ajco Pahpãm kôt ipa. Ne hãn ne ajco ampo kên to, ne amji jũ na ajco ihpeacre, ne ajco hicu, ne ajco Pahpãm mã ahna amji jarẽ, ne nee hipêr ton nare. Ne ampeaj kam Tawi mã Pahpãm kĩn, ne hanea ne cumã ihkĩn. Na ri cute Pahpãm na increr xà jàhtôa ne to increr, ne ahna ihhôc par. Ne cute ahna ihhôc par itajê kwỳ mã ita ri he.