Jeju Na Mehkwỳ Jakrã Cunea Wỳr
HAPU NA PETRÔ JÕ KÀHHÔC
Ỹhỹ, pê Petrô pê Jeju jarkwa na memprar catêjê nõ. Ne pê mam cupê tep pro catê. Pê Jeju cupê ihkôt ipa catê na ahna ahwỳ. Ne Jeju te côjkwa wỳr hàpir jirô pê mã ri, cupê Krĩpinkrên kam Jeju na mehkwỳ mehkrĩ atajê to ihhimpej catêjê nõ. Ne ramã cute mehcuran xà na hàhtêp na cute hahkre pej. Ne pom cu hapu na me hõ kàhhôc cahyt ita, pjê cunea kam Jeju na mehkwỳ wỳr, cute ihkujahêc. Na ri hapu na hõ kàhhôc ita japrỳ te Jeju Na Mehkwỳ Jakrã Cunea Wỳr, Hapu Na Petrô Jõ Kàhhôc (2 Petrô).
Ne kam me pamã jũ caxuw jũmjê te me cupê Jeju na mehkwỳ na amji jarẽn, ne nee cute Jeju te amji kam hapac xà intuwti impejti kôt me ipa nare atajê mã ihcawpa. Ne hanea ne Jeju te amji kam hapac xà tuwti ita kôt me papa kam me to pancrà na, me pamã apô.
1Petrô te amji jarẽn xà
1Hàpà me ikwỳ! Ipê Ximãw Petrô pê Jeju Crixtô mã ijàpên catê, ne ipê cumã harkwa na iprar catê nõa wa. Wa ite Jeju jarkwa na memprar catêjê kwỳ me, me amã ihhôc. Ne Jeju pê me pahpytàr catê me, Hũm catyt kam me ipa. Cwỳrjapê ri cukwa kam cute me ato, ate amji mã me to ahimpej catêjê. Na ri ita caxuw me apê ipyràc. 2Ne imã, me ate ihcunea na, Pahpãm me, me pajõ Pahhiti pê Jeju jahkre pej pejti na, me ato prãm. Mãr quê amjia kôt me ato impej, ne me acaxwãm pê me amã ihcarĩcti gõ, mãr ca nee amji mã me ampo cupa nare, ne ihcunea na me ate amji kam me gapac xà tuwti capẽnti to me apa xà ata to, me amã ipicamẽn to mõ.
Pahpãm me pamã ampo pej jàhtôa ne cugõ
Pirip 2.12-13; 1 Texarõn 1.2-4; 2 Petrô 3.18
3Ne ramã me pamã Jeju jahkre pej pejtu, na ri cute Hũm carôat kôt me pamã me pahcarôt jõr, pahte ihkôat catyt kam ame papa xà caxuw. Ne hanea ne Jeju kam me ajpẽn hônco xà ita kôt cute impejti ita kam ajpẽn kam ame papa, ne me papê hũràac xà caxuw, cute me pahcapi. 4Ampeaj kam Pahpãm pej, ne hàhcaprĩ cati, na ri cute ahpỹanre na me pamã ampo pej cunea jõr na amji to hũjahkre. Ne hanea ne cute me pamã, cute amji kam hapac xà tuwti, impejti ita jõr na, amji to hũjahkre. Ne cute me pamã amji kam hapac xà tuwti to hũjahkre ata ri, cute ita kam me pamã hõr, mãr cu me papê hũràac, ne me cupê Pahpãm curê xwỳn catêjê atajê te amji kam hapac xà kên kro, ne ihcacure xen atajê pê me to amji pytà, ne cupê me pahcato, ne quêt pahtỳj catyt kam ame papa.
Cu pahtỳj mãnea mã me hahkre pej to prãm
5Pahpãm te ramã ate Jeju to amji mã me ahimpej na me aton, na ca atỳj ramã amji mã me to ahimpej to me apa.
Na ca ha ita caxuw me caa, ate amji kam me gapac xà impejti kôt, catyt kam me apa.
Na me caa amji mã me ahihcuxêc to me apa.
Ne hanea ne ma, ate me Pahpãm jahkre pej xà ita to me caa, amji mã me apicamẽn to me mõ.
6Ne hanea ne, ate me ampo kên ton xà atajê cunea intête me amji jiprõn to me apa.
Ne ca ha hanea ne ate me amji pupun xà kêanre to me amji pupun xà atajê kam me awcanãa ne, ne nee jũ caxuw me Jeju jicu nare.
Ne hanea ne ihcunea na Pahpãm mã me amji gõ, mãr ca ihkôat catyt kam me apa.
7Ne hanea ne, Jeju kam ajpẽn to me akjêjê atajê me, me ajpẽn to me akwỳ impeaj ne.
Ne ca ha hanea ne Pahpãm cuxà, amã mehcunea kĩnti ne.
8Na ca ha atỳj ate me to hajỹr to apicamẽn to me apa, mãr quê ate amji mã Jeju to me ahimpej xà atajê kôt hamre nare. Na ca ha quêt me pajõ Pahhiti pê Jeju Crixtô kôt catyt kam ame apa xà atajê kôt, ihtỳj me amã ampo. 9Ne me akwỳ kwỳ, nee cute amji kam me hapac xà itajê to me hajỹr to me ipa nare. Atajê mã ri, nee Pahpãm to amji japackre nare. Por cute mehkên atajê cunea to impej, ne to tojnõ, ne me cumã cute amji kam hapac xà intuwti jõr na, nee me to amji japackre nare. Ne me cupê mento tũm pyràac, na ri nee me cumã amji jahkre pej, mã me amji pupun nare.
Cu ha ihcunea na, catyt kam Pahpãm kôt me papa na, amji to me ahcukij
10Jeju kam ajpẽn to me pahkjêjê itajê, he amji mãa ri Pahpãm te me pamã hàkjêr, ne me pahcapi, cwỳrjapê ca ha catyt kam, ihcunea na, Pahpãm kôt me apa na, amji to me ahcukij. Ca ha ate ita to me hajỹr na, ca ha nee jũ caxuw Pahpãm jõ pry kaj na, jũ kam cupê me pry hyr nare. 11Na quê ha ihtỳj me amã, me pajõ Pahhiti pê Jeju Crixtô pê me pahpytàr catê ata himpej xà krac ri, me amã me acjêj xà. Na ca ha me axà, ne cahê na me akrĩ rohnỳtti mã.
12Ne ate ramã me Pahpãm te amji kam hapac xà impejti jahkre pej. Ne ca atỳj amji mã me huwahi to tỳj na, imã me gahkre pej cakrô, wa ha itỳj hõtpê ate hipêr me to amji japackre na me ato, ca me to amji japackre. 13Imãa, wa cormã itĩr na ipa ita kam, wa ha itỳj ate me to amji japackre na me ato ita na imã impejti, na ca ha me to amji japackre. 14He ramã me pajõ Pahhiti pê Jeju Crixtô te imã ityc xà jarẽn, na quê ha ahtũm nare, wa ha ty. 15Cwỳrjapê ca ityc xà jirô pê, nee me to gapac kêt nare, ne me to amji japackre kam me to acrà tu. Ne ita caxuw ite me amã to hahkre xà ihtỳaj to ihtỳj cakrô, wa itỳj ihcunea na me amã to hahkre to mõ.
Pê Petrô into jĩa to Jeju jàhcujro catia pupu
16He pê wa me amã me pajõ Pahhiti pê Jeju Crixtô te amji carôt tỳjti to, cute amji jaxàr na, me amã harẽn xà ata, pê wa nee amjia kôt, ikrãa kam to amji japackre, ne me amã harẽn nare. Ne nee pê jũm amjia kôt imã Jeju jarẽn hêj xi xà nõ to hũjarẽn nare. Ipê Petrô, ne pa pê wa me ikwỳ me, me icunea me ito jĩa to me hirôa pê Jeju catia to cati na me hõmpu to hane he. 17-18Pê wa Jeju me, kẽn pejti na Pahpãm wrỳc xà ata na ame ipa, pê wa me Pahpãm carôt jàhcujrohti te Jeju jĩ cunea kam hàhcujro na me hõmpu. Ne hanea ne ite carôt jàhcujrohti pĩn Hũm pê Pahpãm te me imã Jeju to hũjarẽn to:
— Hũmre ita pê imã ikra kĩnti ata, ne ampeaj kam hũrên ijakry — hajỹr na me kampa.
Mam Pahpãm jarkwa to mehcakôc catêjê nee amehhêj xi nare
19Ne côjkwa pĩn impar xà ata kôt, wa cormã ite me, por pê mam me cupê Pahpãm jarkwa to mehcakôc catêjê atajê te ampeaj kam me hũjarẽn na me to amji japackre, ne me hahkre pej. Ne cormã ite me hũjarẽn xà ita to amji mã me hajỹr to hipêr me ipicamẽn. Na ca ha cute me Pahpãm jarkwa to mehcakôc catêjê kam me gapac na, quê ha ihtỳj me Pahpãm me ato impejti ne. Ne pom awcapàtkô kam hàhcujro xà ahcujro, cu ihkôt me ampo pupu, ita jĩkjê na mã, Pahpãm jarkwa to mehcakôc catêjê te me hajỹar, ne ihtỳj me pahte Pahpãm pupun na me pahto, cu me hõmpu, ne me hahkre pej. Ne pom hãn ne caxêti hapôj mã apẽ to ipa, cu me ampo cunea pupu, ne me hahkre pej, ita jĩkjê na mã, hacpỹ ne Jeju te amji jaxàr xà ata te hajỹar. Ne quê ha Jeju cator xà ata pê caxêtia pyràc, ne ihtỳj me pahte me Pahpãm pupun pejti na me pahto, cu ha me hõmpu, ne me hahkre pej pejtu ne.
20-21Ne mam Pahpãm jarkwa to mehcakôc catêjê atajê, pê nee amjia kôt mehhôc nare. Ne Pahpãm Carõ Pejti te me cumã harkwa to hũjarẽn xà atajê na pê mehhôc pa. Ita kam, xà cu ha ajkĩ mehkàhhôc ata cahyt, ne amjia kôt me kampa, ne me hahkre pej pej pyrentu? Hãpà! He Pahpãm Carõ Pejti ata quê ha me pahte me harkwa ata kôt me hakop, ne me hahkre pej na me pahto, cu ha me hahkre pej, na cu ha me to amji japackrea ne.
2Cute amji kam me hapac xà kên xyre cawpa xà
Coroxo 2.16-19; 1 Timot 3.1-9; 4.1-5; Juta 3-16
1Pê mam Ixaher catêjê wỳr, me hũmre te amji jarkwa kôt me cumã mehcakôc catêjê kêanre atajê me cato. Ne me cupê Pahpãm jarkwa to mehcakôc catêjêa na me cumã me amji jarẽ. Ne cama ame cumã mehhêj, ne ajco mehkrãa kam ame cumã ampo kên atajê to pit mã hahkre to me ipa. Ita jĩkjê na, quê ha me akam ita hanea, ne ihtỳj aracri me awỳr, cute me amã ampo to hahkre catêjê kêanre atajê nõ cato, ne ame amã ihhêj, ne cute ampo to me hahkre xà kêanre atajê to pit mã, me amã hahkre to me ipa. Cute, ate Jeju to amji mã me ahimpej xà ata to me apê hamre prãm atajê te, me pajõ Pahhiti pê mehkên pê me hũtàr catê ata te me hahpan xà na caprô to hàmjõr ata jicu, ne ahna me harcô mẽn. Cwỳrjapê ri me cutea me amji kên mã me amji mẽn. Na quê ha ahtũm nare quê ha ihtỳj jũ caxuw Pahpãm me to hamre hiahpuro.
2Ne cute me cumã ampo kên to hahkre xà atajêa kôt, quê ha me hàhtôa ne mehkôat, cute amji kam me hapac xà kam menxyre kêanre atajê to me amji kam hapac to me ipa. Quê ha me cupê Pahpãm na mehkwỳ nare atajê ahna me hõmpu, ne me amji mã:
— Cute amji kam me hapac xà ata kêanre, mõrmõ me hõ Pahpãm ita kêanre, na mã ihkôat cute amji kam me hapac xà ita kêanre — hane. 3Ne cute me amã ampo to hahkre catêjê itajê te, me apê me gõ pore catia ne incwỳr prãmte ri, ame amã mehhêj xia jarẽn to me ipa. Ne xà quê ha ajkĩ ihtỳj cute mehkên ton xà itajê pê me amji pytà? Hãpà! He Pahpãm te ajpẽn pê me to haprãr catê ata me kôpĩr to ipa, ne rỳ pêa mã cute mehkên mã me mẽn xàa kam ramã jỹ. Ne cumã cute me hajỹrjê to hamre xà na ramã me hahkre pej.
Cu ha Pahpãm tekjê na me amji jarẽ ne mãnea mã pahkên ton nare
4Ne mam côjkwa kam, Pahpãm mã memprar catêjê kwỳ te harkwa jirô pê mehpỳm, ne mehkêanre ton atajê ri nee Pahpãm te, ihtỳj ame ipa na me hamãr nare na, ramã me amã hahkre pej. Ne pê mehcunea pro, ne mehcajpre, ne kre jatôhhy nare kam awcapàtkôti ata kam me to hũcapêr pa. Ne quê ha curi mehcuhhê ita na, quê ha ahnaa Pahpãm te mehcukij, ne mehkên mã me irẽn xà ata jõ amcro kam ahtwỳ. Quê ha mehkên itajêa kôt, ajpẽn pê me to haprã, ne mehkên itajê mã ame curẽ.
5Ne pê hanea ne mam, rỳ pêa mã me panquêtjê nõ pê Nowe xwỳ jõ amcro kam, Pahpãm nee mehkên catêjê cunea te me amji pytàr na me hamãr nare. Ne cute côhti ata to mehcunea jipej tu. Ne cute Nowe xwỳ me, hĩxi me, mehkra incrê me, mehprõ crê atajê pit pytàr. Pê tee catyt kam cute ame ipa to ame cumã hahkre to ipa cakrô, pê nee mempar nare na, ca me to amji japackrea ne. 6Ne Pahpãm te cuhy to Krĩhcumrãrti me, Krĩhpôc jõ krĩ kam mehkên catêjê atajê cunea to caxàr, ne me to hamre na, ca me to amji japackre. Ne cute me to hamre xà ita pê, cute mehkên catêjê cunea mã amji cawpa xà ata na, ca me to amji japackrea ne.
7Ne Ro xwỳ pê Aprãw xwỳ tàmxwỳ ata, pê ma apu hõ krĩ ata kam mehkrĩ atajê te amji kam me hapac xà kam menxyre kêanre atajê cunea caca, ne me hũ na cumã amji kĩn nare. Na pê Pahpãm cuhy to cute krĩ to caxàr xà ata pê hũtà. 8Ne pê Ro pê hũmre impejti ata amcro cunea kam, cute mehkên ton xà atajê cunea pupu, ne kampa, na pê amcro cunea kam, caxwỳn pejti ata cunea kam, me hũ na ihpeacre. 9Ne Pahpãm te ampo to me panquêtjê to hamre xà ita, ihtỳj me pamã cute me pahto amji kam hapac xà to hahkre. Ne ihtỳj cumã, por catyt kam me ipa atajê kên pê me hũtàr jahkre pej. Ne hanea ne cumã mehkêanre atajê te mehkên ton jahpan xà na, cute mehcukij, ne mehkên mã me irẽn xà jõ amcro ata caxuw cute me hamãr, ne me huwahi jahkre pej.
Mehhêj xi catêjê mã nee jũm cupa nare
10Ne quê ha Pahpãm, cute amji kam me hapac xà kêanre kam menxyre atajê to, mehkwỳ jirôa pê apu ihkêanre ne. Ne quê ha hanea ne nee amji mã me pajõ Pahhiti cupa nare atajê to me hirôa pê apu ihkêanre ne. Ne me akwỳ kam, cute me amã ampo kêanre to hahkre catêjê atajê, ampeaj kam amjia kôt me ipa to prãm na, me hàhtàt nare kam me ipa. Ne nee amji mã me côjkwa kam Pahpãm mã memprar catêjê jõ pahhi kwỳ te to ihcupan atajê cupa nare, ne ihtỳj hãn ne me hũn kêanre to me ipa. 11Ne côjkwa kam Pahpãm mã memprar catêjê kwỳa pê, nee ahti na ihtỳj ame hũn to me ipa atajê pyràc nare, ne quêt me hũmre atajê jirôa pê me carôt tỳj cakrô, mã nee Pahpãm mã memprar catêjê te to ihcupan atajê xũn, ne mehkôt harẽn kêanre to ame ipa nare. 12Ne me amã ampo kêanre to hahkre catêjê atajê te amji kam me hapac xà atajê na me hahkre pej nare kam ame hũn to me ipa. Ne ihhêj rũm me cupê ampo pê cute amji kam hapac xà hamreare atajê pyràac. Mã jũmjê te ame hahêr, ne amehcuran xà caxuw, hãn ne me ajhu. Na quê ha me hipej tu, quê ha me hamre tu.
Mehhêj xi catêjê ihtỳj me pahte amji kam me pajapac xà impejti to hamre
13Ne cute me jũm te amji pupun xà kêanre na me ton, mã cute ahna amji pupun ata jahpan xà na, quê ha Pahpãm me to hũràac, ne cute me amji pupun xà kêanre na me to, quê ha ahna me amji pupu. Ne hãn ne amcro cunea kam, hirãa pê me kam mare mã, cute amji kam me hapac xà kêanre kam menxyre atajê kôt apu memprar to pyt. Ne ca ha hãn ne amji mã me amji kĩn to, ne me akrĩ, ne ame apà. Quê ha ihtỳj me acahê na mehkrĩ ne me apà, ne me cupê Pahpãm na mehkwỳa na me amã amji jarẽ, ne cama ame amã mehhêj. Me cupê me amã me apahàm catia ton catêjê, na ca ha atỳj me kam, me apahàm catia to cati.
14Ne quê ha ahti na me jũm cahãj pupun xàa ri, ramã ihtỳj cahê na me hikwa, ne amehcaxun na me amji to prãm pyrentu. Ne nee ajte cute mehkên ton xà itajê kam amehtycrĩ xà nare. Ne ampeaj kam me cumã, pom kyre pê Pahpãm to amji mã mehhimpej atajê to, mehkên mã me hàr xà ata wỳr me to ipa to prãm. Ne mehcunea jirôa pê me cumã, amji mã cute me ampo cunea to mehtũm prãm to ramã cute me amji pyràc tu. Atajê, quê ha Pahpãm mehkên jahpan xà na ame to ihtỳj tu ne. 15Cute Pahpãm jõ pry cupan, na ri ihhêj ne ipictor, ne ma Pahpãm pê ampỳa mã apu ipa. Ne cupê Parãw xwỳ pê Pejor xwỳ kra ata pyràac. Parãw ata pê me cumã Pahpãm jarkwa to ihcakôc catê cakrô, pê ajte cute amji mã ihpore nõ pyr prãmte, ramã ampo te ihcupan xà to me cumã hahkre to mõ. 16Mã cawrô cahàcre te mehĩ cakôc xàa to cumã ihcakôc, ne ihtỳj cute ihkên ton ata tête cumãn, ne pea hõ pahhi kam waj te amji kam hapac xà ata tête ihhyr.
Mehkrã kêanre itajê ihtỳj Xatanaj jõ cuhy wỳr imprar xà
17Ne ihhêj ne me hũmre itajê pê ampo pejti ton catêjê, ne hamreare, rỳ jũ caxuw ajte cute me ampo pejti ton nare. Na ri me cupê ihhêj rũm côhkre kam cô nare ata pyràac, ne hanea ne me cupê ihhêj rũm ahcakrã to ipa, mã kôc ma to pra, mã nee jũ ri hàhhuc nare ata pyràac. Cwỳrjapê ri ramã Pahpãm te ita jahpan xà na, cute ma kre jatôhhy nare kam awcapàtkôti ata wỳr mehkujahêc na me to amji kam hapac hiahpuro. 18Ne nee me cumãa, cute me amji kam hapac xà atajê na amji jahkre pej nare kam, ihtỳj mehcunea mã amji to me hàmnãn to ame ipa. Ne cute amji kam me hapac xà kam menxyre kêanre atajê to, por curmã mehkên ton catêjê atajê pê cormã me hapôj ne Pahpãm wỳr me ipipkjêr, ne cormã kyre pê Jeju to amji mã mehhimpej atajê mã ihhêj, ne intête me to hawry. 19Ne hãn ne me amã hũjarẽn to me ipa to hane he:
— He nee jũm te ampo itajê na, me ato ihhimpej catê hamreare. Cwỳrjapê ca ha gapacta ne atỳj me ampo itajê cunea ton to me apa — hajỹr cakrô, quê ha cute amji kam me hapac xà kêanre to ame ipa to, cute me amji pyràc xà atajêa pê quê ha ihhêj rũm me hõ pahhi, na quê ha taa me to ihhimpej. Na quê ha nee me amji mã hamãr, ne mehkên ton jicu nare. Ỹhỹ, por cu ha ampo to amji mã me pahhimpej ata pê quê ha me pajõ pahhi, na quê ha taa me pahto ihhimpej.
Cu ha me pampej mã me acjêj, ne kam me papa rohnỳtti mã
20Ne mehkwỳ te ame ampo kêanre ton to me ipa, ne ramã mehkên cati wỳr mempraar kam, cute me pajõ Pahhiti pê Jeju Crixtô pê me pahkritxwỳ na me harẽn par. Ne hỹrmã me ipipkjêr, ne toa amji mã mehhimpej xà ata kôt ri, pjê ita kam, cute amji kam me hapac xà kêanre atajê pê me cator. Jirô pê mã ri, cute ajte me Jeju te amji kam hapac xà impejti ita jicu, ne ahna me harcô mẽn, ne hacpỹa mã cute amji kam me hapac xà kêanre ata wỳr me ipipkjêr, ne toa amji mã mehhimpej to me ipa. Ne cute amji kam me hapac xà ita pê ri me hõ pahhi. Ne me cupê ihhêj rũm kryhti te apu ampo tep pro xà ata pyràac, ne nee amji mã hamãr, ne me ampo kên ton jicu nare. Ne hamre, ita caxuw cute mam me amji pupun xà ata jirôa pê ihkêanre ita mã me hàr.
21Quê ha jũm te ramã Jeju jahkre pej, ne ihkôat ramã ipa cakrô, cute hicu, ne hipêr ampo kên ton to ipa na amji mã to ihhimpej na, quê ha jũm te Jeju jahkre pej nare kam, to kên xà ata jirôa pê Pahpãm apu to kêanre ne. Ne por wa ame ato icakôc itajê, quê rỳ mã nee me Jeju te amji kam hapac xà impejti ata na me hahkre pej nare. Ampo na? Cute Jeju te amji kam hapac xà pyr ata jicu xàa kam, quê ha mam cute me amji pupun xà atajê jirôa pê, cute me amji pupun xà ata me cumã ihkêanre ne. 22Ne cute me hajỹr catêjê pê, pê mã nãm, pom rop hãn ne hõjahir, ne ahna ahtũm nare, mã hacpỹa mã hõjahir ku, ita na mã cute me hajỹr. Ne pê mã nãm crô te hajỹar, quê ha cô ata kam xwa, ne amji cuhhõ, ne ahna ahtũm nare, quê ha hacpỹa ne amji jaxà, ne carẽc ata kam xwa. Ita jĩkjê na mã mehkên catêjê te me hajỹar, ne mempej mã me acjêj, ne kam ame ipa ry nare, ne hacpỹa mã mehkên mã me acjêj.
3Quê ha ihtỳj jũ caxuw Pahpãm ampo cunea to hamre
Ruc 13.6-8; Tijac 5.7-11; Ipipẽ Xà 19.11-16
1Imã ikwỳ nõ kĩnti itajê, pom ihkàhhôc ita pê hapu na ite me amã ihhôc ita. Ne pom ite me amã ihkujahêc to ipijakrut ita kam, wa ite hipêr ate amji kam me gapac xà impejti, tetetti to ate amji kam me gapac na me aton, mãr ca nee me to gapac kêt nare. 2Ne wa ite me amã Pahpãm jarkwa rer atajê to, ate me amji japackre na me aton. Ne mam rỳ pêa mã Pahpãm jarkwa to mehcakôc catêjê atajê, pê catyt kam ajco me ipa, ne mempejti. Ne imã, por me harkwa cunea na ihhôc atajê to, ate me amji japackre na, imã me ato prãm. Ne hanea ne me pajõ Pahhiti pê me pahpytàr catê te me amã harkwa na me iprar catêjê na me iton atajê nõa mã cute me amã harkwa jirên atajê to, ca me amji japackrea ne.
3Ne imã me ate ampo cunea jamre xà kam, me awỳr mehkêanre japôj xà ata na, ate me hahkre pej na, me ato prãm. Ne quê ha, cute amji kam me hapac xà kêanre to amji mã mehhimpej to me ipa atajê, quê ha amjia kôt ame ipa. Ne ame ana xwỳ to me ipa to:
4— Por Jeju te amji jaxàr xà na me amã amji to hũjahkre ata, jõ ri mã cator xà ita? Nee jũ caxuw cator xà nare. Ne ramã ame pahcũmxwỳ cunea tyc par. Mã mam ramã pjê te amji ton pêa mã, ampo cunea cormã hãm ita na, ne nee rỳ jũ caxuw ampo te amji to ipintuw nare — hane.
5-6Ne pom me ana xwỳ to ame ipa itajê, cama ame amã mehhêj to ame ipa. Ampo na? He pjê te amji ton pêa mã, ramã kam ampo jàhtôa te amji to ipintuw. Pê mam Pahpãm pjê me côjkwa te amji ton na cumã harkwa, pê ihtỳj amji to. Ne cute cô me pjê to ajpẽn pê ipicapôn jirô pê mã ri, Nowe xwỳ jõ amcro kam, hacpỹa mã cute cô ita to pjê cunea pro, ne to mehcunea jipej tu. Ne pom ame ana xwỳ itajê mã, nee ita jahkre pej prãm nare. 7Pê pjê me, côjkwa te amji ton na cumã harkwa, ne hanea ne jũ caxuw cutea amji to caxàr na cumã harkwa hyr hiahpuro. Ne nee ita caxuw cama me to hamre pyrentu to prãm nare. Quê ha xa Pahpãm te mehcunea cukij xà jõ amcro cato, quê ha amehcukij, ne ajpẽn pê me to haprãr xà ata na pit mã ramã me hikaj. Ne quê ha amcro ata cato, quê ha Pahpãm mehkên catêjê cunea kên mã me curẽ.
Pahpãm mã me pahnõ pictor na to prãm nare, na ri cormã me pajikaj
8Imã me ijõ ikwỳ nõ kĩnti itajê, me pajõ Pahhiti mãa, caku te mir pê amcro pyxit peaj. Ne cumã amcro pyxit peaj pê caku te mir. Na ca ha atỳj me to amji japackre. 9Ne mehkwỳ me to amji kam hapac xà to kêanre ne me amji mã: — Me pajõ Pahhiti te ampo na amji ton atajê, quê ha jũa caxuw cormã to. Nare, quê ha nee cute ampo na amji ton xà atajê nõ ton nare — hane. Ne ampo na mã hacpỹa ne cute pjê ita wỳr amji jaxàr xà ita to kuu apu ihkên? Nee mã ampo na nare, Pahpãm mã mehnõ pictor na to prãm nare, ne cumã mehcunea te hỹrmã me ipipkjêr na me to prãm, na ri cormã me hikaj.
Quê ha jũ caxuw pjê me côjkwa kam ampo cunea to caxàr partu
10He nee amã me hàhkĩj xi te me awỳr imprar, ne me apê ampo to hàhkĩj xà na hahkre pej nare. Ita jĩkjê na mã hacpỹ ne me pajõ Pahhiti cator xà te hajỹar, na ca ha nee amji wỳr cator xà na me hahkre pej nare. Ne cator xà jõ amcro ata kam, quê ha hàhkrihkrit krãhhi tỳjti me ajkaam, quê ha jũ kam côjkwa tẽ. Ne jũ kam ihtẽm xà ata kam, quê ha ramã pyt capa, ne putwrỳ capa, ne caxêre cunea capa, ne ampo cunea caxàr tu. Ne hanea ne pjê kam ampo itajê cunea to caxàr tu.
Jeju te amji jaxàr xà caxuw amji mã me pajàhcuprõn hiahpuro
11Ne me amã ampo itajê cunea jamre na hahkre pej ita kam, jũ mã ca ha ajte me? Ca ha atỳj Pahpãm mã me amji jõr to me apa, ne catyt kam me apa. 12Ne Jeju te amji jaxàr xà jõ amcro ata pê Pahpãm jõ amcro catia. Na ca ha cator xà ata na me hikaj. Ne ca ha ampo pej cunea to me gàpên to me apa, mãr quê cyt ne me awỳr cato. Ne cator xà ata jõ amcro kam, quê ha cuhy côjkwa to hamre. Quê ha pjê cacroa to cacro, ne ihhorhot ne ajgã. 13Cu ha Pahpãm te me pamã pjê intuw me côjkwa tuw ton na, me pamã amji to hũjahkre xà ata na, cu ha me hikaj. Ne pjê me côjkwa tuw atajê kam, quê ha mehcunea, ihcunea na catyt kam Pahpãm jarkwa kôt me ipa rohnỳtti mã. 14Cwỳrjapê ca ha imã me ijõ ikwỳ nõ kĩnti itajê, ate me amcro ita jikaj xà ata kam, ca ha ramã ate amji kam me gapac xà tetetti, impejti kam ampo kên jamreare ata to amji mã me gàhcuprõn hiahpuro na, imã me ato prãm. Mãr quê cato, ne ahnaa me pahcunea pupu, ne ihkôt me pahna amji capa, ne nee ame pahcurê nare.
Pê jũmjê Pawrô jũjarẽn xà kaj na me to pry ta
15Ne Pahpãm te apu kuu ihkên xà ita pyrên ca ame gakry. Ampo na? Ca cormã apu ihkên ita kam, ihhêaj to cormã me anõ hỹrmã apkjê, quê ha akên pê apytà. He Pahpãm te ramã me pamã me pahtõ kĩnti pê Pawrô ata mã amji jahkre pej catia ne hõr. Mã cute amji jahkre pejti ata kôt ampo itajê na me amã ihhôc. 16Ne cute hõ kàhhôc cunea kam ihhôc atajê kam, cute ramã me pamã Jeju te amji jaxàr xà ita kôt harẽn to amji pyràc tu. Ne hõtpê hõ kàhhôc kwỳ kam, me papê ampo kwỳ kam me pajapac jahkre kêatre atajê na hãn ne me pamã ihhôc. Ne cute me amji jahkre kêatre atajê me, cormã kyre pê Jeju kôt me ipa atajê, ampo itajê kôt harẽn xà kaj na ame harẽ. Ne Pahpãm jarkwa jõ kàhhôc kwỳa kôt me harẽn xà ihmajti atajê to pit mã me harẽ. Ne cute me harẽn xà atajê to me taa me amji kên mã me amji rẽ.
Cu ha Jeju te amji kam hapac xà tuwti kam amji to ajcamẽ
17Ne me ca nare, me ijõ ikwỳ nõ kĩnti itajê. Ramã quêt me amã jũmjê atajê te amji kam me hapac xà te ihcupan na, me amã hahkre pej. Cwỳrjapê ca ha amji to me guphêa ne. Ampo na? Ca ihhêaj to hanea ne mehkôt me Pahpãm jõ pry ta, ne ihkaj na ame apa. Ne nee hipêr catyt kam Pahpãm te amji kam hapac xà kôt me apa nare. 18He pê me pajõ Pahhiti pê Jeju Crixtô pê me pahpytàr catê, me pamã cute amji kam hapac xà tuwti gõ ita, ca ha cute me akam ipicamẽn na cama me hamã, quê ajcamẽ. Mãr ca mam ate amji kam me gapac xà atajê jirôa pê catyt kam apa. Ne ita caxuw, cu ha hõtpê Jeju to amji mã me cati to me hane he:
— Quêt apyxit peaj ne acati, ne ampeaj kam apej rohnỳtti mã. Ne wa mehcunea te, pjê cunea kam, quêt acatihti me apejti na, me gahkre pej na me to prãm — hane. Taa mã, ampeaj kam!