PJÊ JÕ PAHHI CATÊJÊ KWỲ
Ỹhỹ, pê pahhi Xarômãw tyc jakàn pê ri, pê Juta catêjê atajê me cupê Tawi tàmxwỳ catêjê to pit mã amji mã me hõ pahhi. Pê pahhi kwỳ crêre atajê impej ne ihtỳj Pahpãm jarkwa kôt ame ipa. Ne mehkĩnte pahhi kwỳ cati atajê ma ame Pahpãm caca, ne ihtỳj, mehkwỳ mea mã, me to hapac kêt to me mõ.
2HAPU NA PAHHI CATÊJÊ JÕ KÀHHÔC
Pê carĩjre côjkwa wỳr Erij to api
Ne jũ mã ihkôt ipa na caku te, jirô pê mã ri, Pahpãm te ma amji wỳr côjkwa wỳr, carĩjre to Erij to hàpir xà jõ amcroa kam hàhhuc. Mã cormã Erixêw apu Erij kôt mõ. Ne ma Krĩjajo jõ pjê pĩn me mõ, mã Erij te Erixêw cajpẽr prãmte cumã harkwa to:
— Ita ri ahtwỳ, nãmri quê ha ma Pahpãm Peter jõ krĩ wỳr ikujate — hajỹr.
Mã Erixêw cumã:
— Wa ha Pahpãm kam mare mã amã amji jarẽ, jũ wỳr wa are — hane. Ne ma ajwar me mõ, Peter jõ krĩ wỳr. Ne pê curi Pahpãm jarkwa to hahkre xà jũrkwa nõ ita xa.
Mã Pahpãm jarkwa to hahkre catêjê kwỳ intuw itajê ajpên mehwỳr me pra, ne cute mehcajpar ne me Erixêw mã:
— Xà ca ramã ate ita kam, Pahpãm te ma gõ pahhi pê Erij to ihtẽm na, hahkre pej? — hajỹr.
Mã Erixêw me cumã:
— Wa ite ramã hahkre pej, mẽr me kêt — hane.
Mã Erij Erixêw mã:
— Quê ha ma Pahpãm Krĩcuxwati wỳr ikujate, ca ha ita ri ahtwỳ — hane.
Mã hipêr Erixêw cumã:
— Wa ha Pahpãm kam mare mã amã amji jarẽ, wa nee arer nare — hane. Ne ma me mõ, Krĩcuxwati wỳr. Mã curi hanea ne Pahpãm jarkwa to hahkre xà jũrkwa nõ ita xa, mã curi me cator.
Mã me hỹrmã Pahpãm jarkwa to hahkre catêjê kwỳ me pra, ne cute me Erixêw cukij to:
— Xà ramã ate ita kam Pahpãm te ma Erij japrôr ne to ihtẽm na, hahkre pej? — hajỹr.
Mã Erixêw me cumã:
— Ỹhỹ, wa ite hahkre pej, mẽr me kêt — hane.
Mã Erij Erixêw mã:
— Quê ha ma Pahpãm Côpijapjêr jõ cô wỳr ikujate, na ca ha ita ri ahtwỳ — hane.
Mã Erixêw cumã:
— Wa ha Pahpãm kam mare mã amã amji jarẽ, jũ wỳr wa ha are — hajỹr.
Ne ma Côpijapjêr jõ cô wỳr me mõ. Mã ma Pahpãm mã me hàpên catêjê intuw te me xĩncwẽnta ne ihkôt me mõ, ampỳa mã cute me hõmpun prãmte. Mã Erij te ihkà japjêhti ata to cajõt ne to cô cakwĩn, mã cô picapôn ne ihcajpuw amcràare. Mã me ipijakrut itajê ihkôt me irêr. Mã Erij te Erixêw mã harkwa to:
— Ca ha ampo na iwỳ, waha itỳj, itẽm xwỳjrea na, amã ampo ata gõ — hajỹr.
Mã Erixêw cumã:
— Wa ha Pahpãm te ato acarôt tỳjti ita jirôa pê to ajkrut ne ahna awỳ — hane.
Mã Erij cumã:
— Ca ate atỳj ampo catia ne ahna iwỳr, ne ca ha ate itẽm xà na ipupun na, ca ha atỳj amji mã ate ampo na iwỳr xà ita cwa. Nãmri ca ha ate itẽm xà ita na ipupun nare na, ca ha nee ate ampo na iwỳr xà ata cwỳr nare — hane.
Ne ma me mõr ita kam, me amji mã mehcakôc to mõ, mã ihprõt pê cuhy te cawrô jõ kujti ita côjkwa pĩn cator, ne cute me to ipicapôn. Mã ma carĩjre te côjkwa wỳr Erij to hàpir. Mã Erixêw te ita pupun ne caràar kam cumã harkwa to:
— Inxũ, inxũ! Ixaher catêjê jõ cawrô me hõ kujti, ca me hõmpu he! — hajỹr. Mã ma me ipictor.
Mã Erixêw te apu amji pê ihkà cokjêr, ne ma cute Erij pê ihkà pỳm ata pyr ne to mõ, cô wỳr. Ne cute Erij cuxà to cô cakwĩn, mã cô picapôn ne ihcajpuw pjê incràre, mã ma irêr. Ne pê ita caxuw Erixêw pê Erij jakàn pê Ixaher catêjê mã Pahpãm jarkwa to ihcakôc catê.
4Pê Erixêw cahãj pijapit mã hõ ampo to impê xà to ajcamẽ
Pê Pahpãm jarkwa to hahkre catêjê intuw atajê nõ hikwa tuw, ne jũ mã ahna caku pê ty. Mã ma hĩxi Erixêw wỳr cator. Ne cute cumã amji jarẽn to:
— Por pê ipjê pê amã hàpên catê ata ramã ihtyc. Ne cumã Pahpãm kĩn na, amã hahkre pej. Pê jũm ita to new catia to cati, ne ahnaa ihtyc, mã ramã ina ahwỳ, ite cumã ipjê te to new ata jahpan xà na ijàmjõr prãmte. Ne ampo to wa cumã amgõ? Na quê ha ma ipê ikra xũmre pijakrut itajê japrô, ne amji mã me tocumã hàpên catêjê na rohnỳtti mã — hajỹr.
Mã Erixêw cumã:
— Jũ mã wa ha ajte ato? Ampo mã gũrkwa kam amã? — hane.
Mã impijapit ita cumã:
— Ipê ampo hamreare, ne imã ampo to impê xà na incjên xà pyxit peaj ne xa — hajỹr.
Mã Erixêw cumã:
— Hã, ca ha tẽ ne me acahi na amehkrĩ atajê pê ampo to impê xà run xà cunea incwa, ne amcro nõ na hacpỹa mã me cumã hõr na me cumã harẽn hiahpuro. Ne gũrkwa mãto acjêj pa, ne amji na to hihê. Ne me hàmrun xà atajê cunea kam ampo to impê xà pyxit ita jaxwỳ, quê ha amjia kôt hipêr amji to hipu to mõ, ne ihcunea to hipu partu, quê ha to hipu pa, me ajkaam incrà — hane.
Mã ma tẽ ne cute mehkra mãn. Mã cute cumã me hàmrun xà to cuprõn, mã cute to hipu partu. Ne ramã me hàmrun xà jamre, me ajkaam mã ampo to impê xà jamre.
Mã ma hacpỹ mã Erixêw wỳr tẽ, ne apu cumã harẽ, mã cumã:
— Hã, ca ha tẽ ne ampo to impê xà ata to ihpore na ahpa, ne ihpore to ate new ata jahpan xà na amgõ. Quê ha cormã ihpore cahhur ata me amã ahtwỳ. Ne pom quê ha ihpore cahhur ahtwỳ ita, quê ha ihtỳj akra me, ate amji to me apijapar na me atehcajpa — hane.
Mã cahãj pijapit ita te harkwa kôtton partu, ne ihkên pê amji pytàr.
5Pê Namã ma Ixaher jõ pjê wỳr tẽ
Ne pê caku atajê kam pê Xiri jõ pjê kam krãhtare jõ pahhi nõ ita japrỳ Namã. Ne ampeaj kam ihpa tỳj cakrô apu ihkà xêtti. Ne ihxêtti ata quê ha ihkêanre kam, ihtỳj jũ caxuw ihcura.
Pê Xiri jõ krãhtare ma Ixaher catêjê jõ pjê wỳr me pra ne ajco pyjê to me ahkĩ. Pê Namã hanea ne jũm cuprỳre ita japrô, ne hĩxi mã cugõ, cute amji mã to cumã hàpên catê prãmte. Ne amcro nõ na cahãj cuprỳre ita te hõ pahhi cahãj ita mã:
— Quê rỳ mã ijõ pahhi pê Namã ijõ pjê kam Pahpãm jarkwa to ihcakôc catê ata mã ihkà xêt ita na amji jarẽ, quê caprã — hajỹr.
Mã hĩxi te impjên mã hũjarẽn. Mã Namã te Xiri jõ pahhi mã ita na amji jarẽn. Mã hõ pahhi te cumã:
— Hã, mẽr mõ ne Pahpãm jarkwa to ihcakôc catê ita pupu ne cumã amji jarẽ. Wa ha Ixaher catêjê jõ pahhi mã ana ihkàhhôc kujate — hajỹr.
Mã Namã te amji caprãr jahpan xà na cumã ampo jõr xà na cumã kẽn pràti me, wakỳre pràti me, ihkà me, ma to mõ. Ne ma hanea ne hõ pahhi jõ kàhhôc ata, Ixaher catêjê jõ pahhi wỳr to mõ.
Mã ihkàhhôc ata hũjarẽn to:
“Ỹhỹ, Ixaher jõ pjê jõ pahhi ita.
Ipê Xiri jõ pjê jõ pahhi.
Ne por amã ihkàhhôc to mõ ata pê imã hàpên catê.
Ca ha imã, cumã ihkà xêtti ita caprã” hajỹr.
Mã Namã Ixaher jõ pahhi wỳr ihkàhhôc ita to cator, ne cute cumã hõr. Mã cute ihkàhhôc ita cahyt jirô pê mãri, cute ihpeacre na me hahkre pej prãmte, amji pê hitô kà jipôn, cute me amji kam hapac xàa kôt. Ne me cumã:
— Xiri jõ pjê jõ pahhi ita te imã ihkà xêtti ita kujahêc, wa caprã. Xà ajkĩ ipê Pahpãm, wa caprã, ne itỳj cumã cute amji kam hapac xà tuwti nõ gõ? Hãpà! Tee ame papijapu prãmte me pahto hahkre — hajỹr.
Mã Pahpãm jarkwa to ihcakôc catê pê Erixêw te pahhi peacre na harẽn par, ne cumã harkwa kujahêc ne cumã:
— Ampo na mã ca apu apec? Ajpên imã Namã kujate, wa ha pa caprã. Quê ha ihtỳj cormã ita ri, pjê ita kam, Pahpãm mã hàpên catê te ipa na hõmpu ne hahkre pej — hajỹr. Mã Ixaher jõ pahhi te Erixêw wỳr Namã kà xêtti ata kujahêc.
Namã caprãr xà
Mã ma Namã tẽ ne Erixêw jũrkwa wỳr cator, ne harkwa mã hõ cawrô me hõ kujti to hàhhuc. Mã Erixêw nee hỹrmã cator nare, ne cute hỹrmã cumã hàpên catê nõ pit kujahêc, quê to ihhimpej to hane he:
— Ca ha ma Côpijapjêr jõ cô wỳr tẽ, ne kam amrõr to xet, ne amji cajpẽr pyrentu, quê ha akà xêt ita amã hamre, ne akà tetet, ne ramã acaprãr — hajỹr.
Mã Namã apu incryac to incryc, ne ma mõ, ne cute cumã me hàpên catêjê mã harkwa to:
— Wa itỳj amji mã: “Mõrmõ quê ha iwỳr cato ne ijũ na cupy, wa ha ajpẽn mã me icakôc, quê ha ina hũ xi ne Pahpãm mã icajrẽn” hajỹr, cakrô mã ajte nee cute ito hajỹr nare, ne cama cute imã harkwa ita kujahêc. Ne ijõ pjê kam cô ita, Ixaher jõ pjê jõ cô itajê cunea jirôa pê ihtetet ne impej, cute jũm caprãr xà caxuw. Ne mẽr ampo na mã wa curi cô ata kam ixwỳr, quê icaprãr nare? — hajỹr. Ne apu incryc ne ma cawrô jõ kujti to tẽ.
Mã ihtẽam kam cumã me hàpên catêjê te me cumã harkwa to:
— Ijõ pahhi, quê Pahpãm jarkwa to ihcakôc catê cama ampo jahkre kêatre na amẽ na mã, ca ha atỳj to. Nõ nã mã ca ha ajte nee hahkre kêt nare ita ton nare? — hajỹr.
Mã Namã te cumã me hàpên catêjê impar, ne ma Côpijapjêr jõ cô wỳr mõ. Ne cute kam mrõr to xet, mã pea ihkà impej pyrentu, ne ihkà ita pê ihhêj rũm ahkrare kà tetet. Mã Namã me, cumã me hàpên catêjê me, ma mehcunea te me amji jaxàr, Pahpãm jarkwa to ihcakôc catê wỳr, ne me cator, ne cuna mã me xa. Mã Namã te Erixêw mã harkwa to:
— Hamre, ita caxuw wa ite pjê cunea kam Pahpãm ita pyxit peaj na hahkre pej, ne cupê Ixaher catêjê Pãm Cati. Xà ca ha atỳj ate icaprãr jahpan xà na, ite amã ampo jõr xà ita na amji capa? — hajỹr.
Mã Erixêw cumã:
— Wa ha Pahpãm kam mare mã amã amji jarẽ, wa nee ihnõ na amji caxàr nare — hane. Mã Namã ihtỳj cormã to kampa, mã nee cute ihnõ na amji caxàr nare.
Mã Namã cumã:
— Wa ha ma ijõ pjê wỳr amji jaxà, ne por Ixaher catêjê Pãm Cati pyxit peaj ata, wa ha itỳj kampa, ne to pit mã, amji mã ihimpej to ipa — hane. Ne ma cute amji jaxàr, hõ pjê wỳr.
6Côjkwa pĩn Pahpãm jõ krãhtare
Ne pê caku nõ na, Xiri catêjê me, Ixaher catêjê me ipijapu kam tẽ. Ne hãn ne ajco me kam imprar xà wỳr, Xiri catêjê jõ pahhi hõ krãhtare jõ pahhi kwỳ me ajpẽn pa, ne me ajpẽn mã:
— Por curi me papicaxêr xà ata ri, pjê ata kam, cu ha me pajõ krãhtare to me cuprõ, pahte me Ixaher catêjê jõ pahhi pro prãmte — hane.
Mã ramã Erixêw te me hahkre pej, ne Ixaher jõ pahhi mã hũjarẽn, mãr quê amji to huphê, quê Xiri catêjê jõ pahhi ata nee mehpro nare. Hõ, pê ajco Erixêw jũjarẽn xà ata me cumã amji jahkre pej gõ to hane, na pê me amji pytà. Ne ihtỳj ajco me to hajỹr to xa.
Mã Xiri catêjê jõ pahhi tee apu amji jahkre, jũ mã quê ha ajte. Ne pea cute krãhtare jõ pahhi catêjê na hàhwỳr, ne me cumã:
— Jũm te mã ajte Ixaher jõ pahhi mã pahte me ajpẽn par xà ita jarẽn? — hajỹr.
Mã krãhtare jõ pahhi nõ ita cumã:
— Nee me pahkwỳ nõ te me hõ pahhi mã hũjarẽn nare. Ne por Pahpãm jarkwa to ihcakôc catê pê Erixêw ata te ri hõ pahhi mã hũjarẽn, ne ihtỳj cumã ate ahtee gũrkwa caxwỳn kam acakôc xà ton ata jahkre pej — hane.
Mã Xiri catêjê jõ pahhi te ahna me mẽn, ne me cumã:
— Me hapên to mõ ne mehpro — hajỹr.
Mã amcro nõ na jũm te Xiri catêjê jõ pahhi mã Kwapijakrut jõkrĩ kam Erixêw apu mõr na harẽn. Cwỳrjapê ri pahhi te hỹrmã hõ krãhtare jàhtôa ne ihkujahêc, hõ cawrô me, hõ kujti mea mã. Mã caxwa ri Kwapijakrut jõ krĩ mã me cator, ne cute me krĩ krã.
Mã Erixêw mã hàpên catê nõ intuwre nõ ita iràrà na hỹr, ne cute põ pê, krĩ pu na Xiri catêjê jõ krãhtare kwỳ pupun. Mã me cumã hũpa mã ma Erixêw wỳr tẽ, ne cute cumã hũjarẽn to:
— Ijõ pahhi! He ramã me pahcurê xwỳn te me pahkrã tu ita kam, jũ mã cu ha ajte? — hajỹr.
Mã Erixêw cumã:
— Apu amji mã pa nare. Ampo na? Pom me cumã krãhtare jàhtô ita jirôa pê ri me pamã hàhtô — hane. Ne cute Pahpãm wỳr ne cumã:
— Me ijõ Inxũ, wa ha awỳ, ca ha imã hàpên catê ita to jũ mã, quê côjkwa pĩn me pra jõ krãhtare pupu — hajỹr.
Mã Pahpãm te ihhêj ne into jahkjên, mãr quê ihtỳj me hõ krãhtare pupu. Mã cute cuhy te cawrô me, hõ kujti ita me hàhkà jakôt nõ ita to hipu tu na hõmpun.
Mã ramã ajpên Xiri catêjê jõ krãhtare te amji mã mõr, krĩ wỳr.
Mã Erixêw te Pahpãm wỳr ne cumã:
— Me ijõ Inxũ, me to into tũm — hajỹr. Mã Pahpãm te Xiri catêjê jõ krãhtare cunea to into tũm. Hõ, Pahpãm te me to hajỹr, ne me cupê cumã hàpên catê ata pytàr. Hamre.
1111
PJÊ JÕ PAHHI CATÊJÊ KWỲ
Ỹhỹ, pê pahhi Xarômãw tyc jakàn pê ri, pê Juta catêjê atajê me cupê Tawi tàmxwỳ catêjê to pit mã amji mã me hõ pahhi. Pê pahhi kwỳ crêre atajê impej ne ihtỳj Pahpãm jarkwa kôt ame ipa. Ne mehkĩnte pahhi kwỳ cati atajê ma ame Pahpãm caca, ne ihtỳj, mehkwỳ mea mã, me to hapac kêt to me mõ.
Juta jõ pjê jõ pahhi Jôwat jarẽn xà
Pê caku jàhtôa jirô pê, Juta jõ pjê jõ pahhi nõa ty. Ne pê ihtỳj ihkra jaxà kam, inxi amji to pahhi prãm. Ne pê cahãj ata japrỳ Atarijkwỳj, ne ihkêanre. Ne cute ihtàmxwỳ itajê cunea jipej na me mẽn, mã cute me hipej. Pê pyxit peaj ne cormã incrire, ne haprỳ Jôwat. Pê into catyjre haprô, ne ma to tẽ, ne Pahpãm to me amji kam hapac xà jũrkwa kam to amxu. Mã nee cute ihcuran nare. Mã curia cute me to ipijapar to caku to xêj.
Mã Atarijkwỳj te amji to pahhi, ne ihhimpej to caku to xêj. Mã Pahpãm mã mehcajrẽn catêjê jõ pahhi pê Jojata te me hũjamãr catêjê jõ pahhi na hàhwỳr. Pom krãhtare Pahpãm to me amji kam hapac xà jũrkwa jamãr catêjê atajê jõ pahhi me, me Atarijkwỳj jũrkwa jamã atajê jõ pahhi me, cute me ahna hàhwỳr.
Mã cute me cuprõn, ne ma ajpẽn pê ame jũm te, jũm mã Jojata cakôc xà ata jarẽn tête me ajpẽn mã. Mã mehcunea te ampeaj kam, nee jũm mã me harẽn nare na me amji ton. Ne cute me cumã, por pê pahhi xwỳ ty ata kra pê Jôwat to ipipẽ, mã cute me hõmpun. Mã pea Jojata te me to ihhimpej to hajỹr he:
— Ca ha me akwỳ me Atarijkwỳj jũrkwa jamã, mãr quê nee jũ kam ihtẽm nare. Ne me akwỳ me Pahpãm to me amji kam hapac xà jũrkwa krã, ne kam hũmre intuwre pê pahhi xwỳ kra ata jamã. Quê ihhêaj to jũm apu ihkra ita to jũ mãn prãm, ca ha me jũm ata pro ne mehcura — hajỹr.
Mã Pahpãm mã mehcajrẽn catêjê jõ pahhi te mam pahhi xwỳ kra intuwre ita japrôr, ne me kam mare mã ihkrã mã pahhi krãhkà mẽn, nepea cupê pahhi xà caxuw, hanea ne ihkrã kam ampo cacô impêti ata jaxwỳr. Ne cute cumã ihkàhhôc kam Pahpãm jarkwa ata jõr, ne to pahhi tuw. Mã mehcunea ame cumã me hũhkra cahhy, ne ame cumã caràr to:
— Pahhi tuw! Ca ha caku jàhtôa kam amji to ajpa! — hane.
Mã Atarijkwỳj te mehtàmxwỳ jipej ata te me harkwa xãmti ata kam hapac, ne ma Pahpãm to me amji kam hapac xà jũrkwa wỳr ipicahur, ne cute pahhi tuw pupun. Mã krãhtare te hũtàr tu ne to xa, ne cama ame hakry, ne ame hõhhi cakô. Mã Atarijkwỳj caràr, ne cute harkwa to:
— Côt ca me acunea icuna mã me akên? — hajỹr, ne ihpeacre.
Mã Jojata te krãhtare jõ pahhi mã Atarijkwỳj curan na hũjahkre ne me cumã:
— Me to acato, ne nee Pahpãm to me amji kam hapac xà jũrkwa kam mehcuran nare. Ne por jũm te ihtehcajpar prãm ata mea mã, atỳj mehcura — hajỹr. Mã cute mehpro ne ma põ mã me to cator, ne cute mehcuran, mã hamre.
Ne caxuaw pê cormã Jôwat na caku te xet peaj cakrô, ihtỳj cute pjê to ihhimpej kam ihtẽm. Mã Pahpãm mã mehcajrẽn catêjê jõ pahhi pê Jojata ata te ihtehcajpar kam ihtẽm, ne ihtỳj hõtpê ihtehcajpa. Mã cute mehkwỳ mã, pahpãm cahàc krekà pê Pahar ata jũrkwa jũhhyr ne to hamre na, harkwa hyr. Mã hỹrmã me mõ, ne cute me hũhhyr.
Pê pahhi pê Jôwat ata catyt kam Pahpãm jarkwa kôt ipa, ne Juta jõ pjê to ihhimpej to caku to cwarẽnta ne ty.
18Juta jõ pjê jõ pahhi Exequij
Ne caku nõa na pê Juta jõ pjê kam pahhi nõ ita japrỳ Exequij. Ne Krĩpinkrên kam ajco ihhimpej. Pê Axiri jõ pjê jõ pahhi ata kêanre, na pê nee Pahpãm to amji kam hapac nare. Ne Exequij pê amji mã Juta jõ pjê kam krĩ atajê cunea pytà. Pê hõ krãhtare kwỳa hanea ne Krĩpinkrên pytàr prãmte me hỹrmã me cato.
Pê ma Exequij Pahpãm to me amji kam hapac xà jũrkwa wỳr tẽ, cute Pahpãm wỳr, mã cute krĩ pytàr prãmte. Ne cute ihkà impejti ata jipôn, ne cupẽhkà kêanre nõ ata to ihkà, cute me cumã amji kĩn nare na me hahkre pej prãmte. Ne ma cute Ixaj pê Pahpãm jarkwa to ihcakôc catê ata wỳr jũm kujahêc, mãr quê jũm cumã awjarẽ quê Pahpãm mã mehcajrẽn. Mã ma tẽ ne cute cumã hũjarẽn. Mã Ixaj te Pahpãm mã krĩ kam mehkrĩ atajê cajrẽn.
Mã Pahpãm te kam hapac ne cumã:
— Wa ha Axiri jõ pahhi ata te hacpỹ mã hõ pjê wỳr amji jaxàr na me to, quê ha amji jaxà, quê ha curia jũm ihcura — hajỹr.
Mã hamre, amcro nõ na ma hacpỹ mã krãhtare atajê te hõ pjê wỳr me amji jaxàr to me amji kam hapac. Mã ihtẽm xà wỳr Axiri jõ pahhi te Exequij mã ihkàhhôc juwahi, mã ihkàhhôc ata hũjarẽn to:
“Ỹhỹ, por côjkwa kam me Apãm Cati ata, ca nee ampeaj kam ame kam gapac nare.
Quê Apãm Cati te, ite Krĩpinkrên to kên nare na me ijarẽn na,
ca ha nee kam me gapac nare.
Ampo na? Wa ha itỳj me amji jaxà ne ame ato kêanre ne.
Ne ramã mehcunea te, por wa pjê kwỳ kam ite me amji hi ata ri,
ite ame ampo to kêanre na me cumã me ijahkre pej.
Mã nee jũ ri me hõ pahpãm cahàc krekà itajê nõ te jũm pytàr nare,
na wa ite mehcunea to hamre tu” hajỹr.
Mã cute Exequij mã hõ kàhhôc ita kujahêc. Mã cute ipyr ne cahyt jirô pê, ma Pahpãm to me amji kam hapac xà jũrkwa wỳr to mõ, ne cute kam hir, ne Pahpãm mã ihcakôc to:
— Hã, me ijõ Inxũ Cati,
apyxit peaj ne apê Ixaher jõ pjê Pãm Cati, ne apê côjkwa jõ Pahhiti.
Ca pjê kam pahhi itajê cunea to ahimpej.
Ne caa pê ca côjkwa me pjê to.
Me ijõ Pahhiti ikampa,
ne pom Axiri jõ pjê jõ pahhi te ihkàhhôc ton ita pupu he.
Cute atĩar cuna mã ihcakôc xà kêanre ita to ihcakôc he.
Me ijõ Inxũ,
he ampeaj kam ri cute ampo kra me, krĩxàre kwỳ cunea jipej,
ne cute me hõ pahpãm cahàc krekà atajê to caxàr partu.
Ne por me hõ pahpãm cahàc krekà atajê akĩn te nee ihtĩr nare,
na ri cute me to hamre.
Ne ampo na ri cute mehcunea to hamre? Nee mã ampo na nare.
He me hũmrea te ri pĩ me kẽn te me hõ pahpãm cahàc krekà atajê ton,
cwỳrjapê ri cute to hamre.
Ne me ijõ Pahhiti, pahhi ita pê me ipytà.
Quê ha mehcunea me apyxit peaj pê Pahpãm Cati na me gahkre pej — hajỹr.
Jirô pê mã ri Pahpãm jarkwa to ihcakôc catê pê Ixaj te pahhi Exequij mã Pahpãm jarkwa kujahêc. Mã harkwa ata hũjarẽn to:
“Wa ite me ate Axiri jõ pjê jõ pahhi to me imã acakôc xà ata na me apar.
Na quê ha nee me gõ krĩ mã me hàr nare. Ampo na?
He pa wa ha me cupê me apytà” hajỹr.
Ne caxwa ata kam Pahpãm te Axiri jõ pjê jõ krãhtare jàhtôa jipej. Ne iràrà na Krĩpinkrên catêjê pimprar ne cute me curê xwỳn jàhtôa tyc pit pupun.
Cwỳrjapê Axiri jõ pahhi te hõ pjê wỳr amji jaxàr pyrentu, ne hõ krãhtare cahhur me, me cator. Mã amcro nõ na mehkraa te mehcuran. Hõ, pê Pahpãm pahhi Exequij jõ amcro kam Krĩpinkrên pytàr to hane.
22Juta jõ pjê pahhi pê Joxij
2 Pahhi Catêjê 22.1-20; 23.1-25
Ne pê caku jàhtôa jirô pê Juta jõ pjê kam mehkrĩ atajê cunea hipêr me Pahhiti pê Pahpãm to me hapac kêt ne me cumã hikra. Ne pê caku ata kam krĩ jõ pahhi ata japrỳ Joxij, ne cupê hũmre impeaj, ne quêt ihtỳj cumã Pahpãm pynãr prãm. Cwỳrjapê ri cute pahpãm cahàc krekà cunea to hamre, ne Pahpãm to amji kam me hapac xà jũrkwa to apu impej partu.
Mã amcro nõ na, Hirquij pê Pahpãm mã mehcajrẽn catê jõ pahhi ata apu Pahpãm to amji kam me hapac xà jũrkwa kam mõ. Ne cute Pahpãm jõ kàhhôc weaj nõ ita mã cator, ne cute ipyr, ne cute pahhi Joxij mã ihkujahêc. Mã jũm te Joxij mã Pahpãm jarkwa na ihkàhhôc wej ata cahyt, mã cute impar, ne hũ na ihpec pyrentu.
Ne cute Hirquij na hàhwỳr ne cumã amji jarẽn to:
— Ỹhỹ Hirquij, ate imã Pahpãm jarkwa weaj kujahêc ata, jũm te imã cahyt, wa ite impar, ne ajte ipeacre. Ne mõ ne Pahpãm to me amji kam hapac xà jũrkwa mã axà, ne cumã icajrẽn. Ne cumã me papê Juta catêjê cunea cajrẽn. Ampo na? Cu ramã nee kam me pajapac nare. Mã ame pahkam incryac to incryc, mã hõ kàhhôc ita kam cute me pahna amji jarẽn — hajỹr.
Mã Hirquij me, mehkwỳ atajê te impar, ne ma Pahpãm mã mehcajrẽn catê cahãj ata wỳr me mõ. Ne cute me cumã pahhi Joxij te ampo cunea na ihpeacre, mã cute amji cajrẽn na hàhwỳr xà na, cumã harkwa kujahêc atajê cunea jarẽn.
Mã mehcajrẽn catê cahãj ita te Hirquij mã harkwa to:
— Ca ha pahhi mã awjarẽ, nãmri Pahpãm te pahhi ata mã harkwa kujahêc to:
“Pa wa ha krĩ ita cunea jipej tu.
Ne por ihkàhhôc kam ampo kên cunea na ihhôc ata, quê ha ihkên to hane.
Ampo na? He me ikwỳ pê Juta catêjê te cama ramã me ito hapac kêt,
ne ahti na ame hõ pahpãm cahàc krekà atajê kĩn,
na ri ampeaj kam me kam icryc,
por cute ame ampo ton atajê incwỳrjapê.
Ne Joxij, atea ca gõtpê ipar, ne ikam mare mã, icuna mã,
ate apeacre na imã amji jarẽn, ne amji pê akà jipôn, ne acwỳr.
Cwỳrjapê ca ha nee ampo kên atajê cunea pupun nare.
Wa ha nee gõ krĩ to hamre nare, ca ha ahnaa jũ caxuw ty, wa ha cormã krĩ ita jipej” — hajỹr.
Mã hacpỹa mã pahhi Joxij wỳr cute me Pahpãm jũjarẽn ita to me amji jaxàr, ne me cumã harẽn, mã cute impar. Ne cute mehkwỳ to cuprõn, ne hũpar xà ita to me cumã hahkre.
Mã cute me hahkre pej ne krĩ cunea kôt ame ipicràn, ne kam cute ame pahpãm cahàc krekà jũrkwa atajê cunea to me hamre partu. Ne quêt cute amji kam hapac xà cunea to Pahpãm to me amji mã ihhimpej, ne catyt kam ihkôt me ipa.