TIMOT WỲR
Mam Pawrô Jõ Kàhhôc
Ỹhỹ, pê Pawrô pê Jeju jarkwa na memprar catêjê nõ, ne ajco pjê cunea kam apu ipa. Ne mehcunea mã Jeju pê me pahkritxwỳ na ajco harẽn to ipa. Pê Juta catêjê ma ame Jeju jũjarẽn xà ita par caca. Cwỳrjapê pê me Pawrô pro, ne Roman catêjê mã cugõ, ne pê me hacjên xà kam me haxà. Mã Pawrô cator jirô pê hipêr mehcunea mã Jeju pê me pahkritxwỳ jarẽn xà impejti jarẽn to mõ, na ri hipêr Roman catêjê te Pawrô pro ne me haxàr, me hacjên xà kam. Mã hõtpê cute mehkwỳ mã ihkàhhôc ita ton ne ma ihkujahêc.
Ne pê hũmre nõ japrỳ pê Timot ita Pawrô kôt Jeju pynãr ita na, cormã intuwre. Ne cupê Pawrô tehcajpar catê, ne ajco ihkôt apu ipa. Jirô pê mã pê Pawrô Epet jõ krĩ kam Jeju na mehkwỳ mehkrĩ atajê to ihhimpej catê na Timot xãm. Ne pom cu me hõ kàhhôc pijakrut cahyt itajê kam, pê Pawrô Timot mã, por mehkwỳ mã ampo kên to hahkre atajê cahpêrhyr na awjahkre. Na pê mam hõ kàhhôc ita japrỳ pê Timot Wỳr, Mam Pawrô Jõ Kàhhôc (1 Timot).
Ne hanea ne cumã cute mehkwỳ jamãr catêjê impeaj pyxwỳr, mã cute me hamãr to impejti na hũjahkre. Ne nee Timot te jũ caxuw Pahpãm mã hàpên jicu nare na cumã hũjahkre.
1Pê Pawrô Timot mã amji jarẽ
1Ỹhỹ, ipê Pawrô, por Jeju te ihkujahêc ata, pa wa. Pahpãm pê me pahkên pê me pahto hapôj catê, ne ihcãmter pê Jeju Crixtô te hacpỹa ne amji jaxàr xà ata, cu pahtỳj me hikaj ata jarkwa kôt wa apu ipa.
2Ỹhỹ Timot, apê ihhêj rũm ikra. Ampo na? Ca ikôat Jeju to amji mã ahimpej to apa, cwỳrjapê wa ha amã ihhôc. Ne ahpỹanre na ampo itajê cunea na amã ihhôc partu. Ne wa apu Pahpãm me, me pajõ Pahhiti pê Jeju Crixtô mã me acajrẽn, ne me cumã:
— Me to amji pytà ne me hamã, ne me caprĩ, ne me caxwãm pê me cumã acarĩcre gõ — hane.
Pê Pawrô Timot mã me hapackre kên xà cawpa
3Ỹhỹ, imã Epet jõ krĩ kam gàhhuc na ato prãm, ita to pê wa ramã Maxeton jõ pjê wỳr itẽm xà xwỳjrea na amã icakôc. Ne Epet jõ krĩ kam mehkwỳ te hãn ne ampo to me cumã hahkre xà cupan xà itajê to pit mã ame cumã hahkre to me ipa. Ne caa, ca ha atỳj ita tête me cumã, quê me ita ton jicu. 4Na ca ha me cumã gũjarẽn to hane he:
— Ca rỳ pêa mã ame aquêtjê te amji kam hapac xà itajê me, me haprỳ na ihhôc japjêhti atajê to pit mã ame hahkre prãm to me apa. Nee ca ame ita ton nare. Nãmri ca hãn ne ame ita to, ne tee incwỳrjapê ame apijapu to prãm. Ne Pahpãm mã ihkôt me papa na me pahto prãm, ne pom ate me ampo to hahkre xà itajê, nee Pahpãm kôt me papa na me pahtehcajpar nare. Ne quêt Pahpãm me harkwa to, cu ha amji mã me pahhimpej, ne pahtỳj hỹrmã ame pajapôj — hane.
5Ne wa apu amã ihimpej xà itajê cunea to hahkre, mãr quê Jeju na mehkwỳ pê me pahkwỳ cunea mã cute me ajpẽn kĩn xà to ajcamẽ. Cu ha me pamã ampo kên na prãm nare na, cu ha pahtỳj ame ajpẽn kĩnti ne. Cu ha ame amji kampa, ne pahte ramã ame ampo ton itajê kôt me amji kôt hakop, ne nee amji jũ na me pahpahàm nare na, cu ha pahtỳj ame ajpẽn kĩnti ne. Cu ha ampeaj kam Pahpãm to ame amji mã me pahhimpej na, cu ha pahtỳj ame ajpẽn kĩnti ne.
6Ne mehkwỳ te ramã me Pahpãm jarkwa cupan, ne ihcaprỳ na me harkwa cakrô to ame ajpẽn mã mehhimpej. 7Ne ihtỳj cumã cute amji to me cumã Pahpãm jarkwa to hahkre catê na me amji ton to me prãm, por pê Pahpãm Mojxe xwỳ mã harkwa to hahkre ata to. Ne cama ampo to amehcakôc atajê jahkre pej nare kam ame to ihcakôc, ne nee hãn ne me harkwa na me amji par nare. Ne ihhêj ne ampeaj kam me harkwa atajê na me cumã amji jahkre pej, ne nee ahna me cumã amji jahkre pej nare.
8Pê Pahpãm Mojxe xwỳ mã ihhimpej xà impejti kên nare ata gõ, na pahte ramã me hahkre pej. 9-10Xà ajkĩ catyt kam me ipa catêjê caxuw pê ihhimpej xà ita to ihhimpej? Hãpà. Por cute me pry rên xiti atajê caxuw pê ihhimpej xà itajê to he. Ihtỳj amjia kôt ame ipa catêjê me, me hũpar nare catêjê me, Pahpãm to me amji kam hapac nare catêjê me, mehkrã kêanre catêjê me, Pahpãm to me amji prãr catêjê me, nee cute me Pahpãm Carõ Pejti impar nare catêjê me, cute me hũmxwỳa curan catêjê me, mehkwỳa curan catêjê me, ahti na mehpahàm nõ catêjê me, me hũmrea te me ajpẽn caxun catêjê me, pyjêa te ajpẽn to inxy catêjê me, ahti na cute mehkwỳ to ihpore na me hàhpan prãm catêjê me, mehhêj xi catêjê me, mehcukij catê cuna mã mehkwỳ to mehhêj xi catêjê me, Pahpãm jarkwa to hahkre xà cuna mã mehcakôc kên catêjê. Ne mehcunea te me hajỹr xà catêjê itajê caxuw pê Pahpãm Mojxe xwỳ mã ihhimpej xà ita to. 11Ne Pahpãm catihti, ne impejti ata te ri amji mã icapi, ite me amã ihkra Jeju pê me pahkritxwỳ jarẽn xà impejti to harẽn to ipa xà caxuw.
Pê Pahpãm Pawrô caprĩ pyrên hakry
12Cute icapi ne amji mã ipej na ito hajỹr, ne amji mã cumã hàpên catê na iton. Me pajõ Pahhiti pê Jeju Crixtô te hàpên xà ita caxuw imã icarôt ton, ne imã hõr, wa carôat kôt ijàpên to ipa. Cwỳrjapê ri itajê pyrên ijakryti, wa ijõtpê ijakryti to cumã amji jarẽn to ipa. 13Pê wa mam ajco Jeju to icakôc kêanre to ipa, ne itỳj ahna mehkwỳ jahêr to ipa, ne ajco ame to kêanre to ipa. Cakrô mã Pahpãm te icaprĩ. Ampo na? Pê wa cormã nee Pahpãm jahkre pej nare, ne nee to amji mã ihimpej to ipa nare. Cwỳrjapê pê wa amji jahkre kêt kam apu to kêanre to hajỹr to ipa. 14Mã me pajõ Pahhiti te ito kênre nare, ne amji wỳr ito ipipkjêr, wa hỹrmã ipipkjêr, ne toa amji mã ihimpej to ipa. Mã cute imã ihkĩnti na iton, cwỳrjapê wa me pahkwỳ cunea me, Jeju mã me ajpẽn kĩnti to me amji hônco to me ipa.
15Ỹhỹ, pê ajpên pjê ita wỳr Jeju wrỳ, cute mehkrã kên pytàr xà caxuw. Hõhõ, ijũjarẽn xà ita ri quêt ampeaj kam. Gapacta ne ana cuhkõnre cunea to harẽn xà ita na amji capa, ne to amji jahôt to apa. Ne papê wa me girôa pê ikrã kên cati. 16Cwỳrjapê ri Pahpãm te icaprĩ, quê mehcunea me ipupu ne amji mã me ito:
— Pỳhàpà, ihhêj ne ihtỳj xãmte Pahpãm te Pawrô kêanre ita to impej, wa ha hanea ne cuxà Pahpãm wỳr apkjê, quê ha ito impej. Mãr wa Pahpãm cahê na itĩar na ipa, rohnỳtti mã — hane. Hõhõ, cute amji mã me ito ihcakôc to hajỹr prãmte ri, Pahpãm te icaprĩ. 17Ne imã mehcunea te Pahpãm pupun pejti na me to prãm. Pahpãm pê me pahcunea jõ Pahhiti, na pê nee jũm ton nare, mã ihtĩar na hãn ne ihkrĩ. Quê nee jũm hõmpun nare. He ampeaj kam ri pyxit peaj, ne pjê ita cunea kam cupê Pahpãm. Ne imã mehcunea te quêt Pahpãm catihti na me hahkre pej, ne amji mã ahna mehpahàmti na imã me to prãm, rohnỳtti mã. Hamre.
18Ỹhỹ ikra Timot, ikam gapac peaj ne. Pê ramã Pahpãm jarkwa to mehcakôc catêjê me gàpên xà ita jarẽn to:
— Pahpãm te amji mã acapi, ca ha apê me cumã gũjarẽn pejti jarẽn catê — hane. Ne gàpên xà ita pê krãhtare pijapu xà pyràac, ne ma harkwa ita to amji japackre to apa, ne gõ Pahhiti mã gàpên xà to impejti to apa. 19Ca ha nee Jeju to amji mã ahimpej jicu nare. Por ca ramã ate ampo pejti ton xà jahkre pej ata, ca ha nee ton jicu nare. Ne nee ajte mehkwỳ te me hajỹr nare, ne me cumã ampo pejti itajê jahkre pej cakrô, mã ihkaj na ihtỳj ame ampo kêanre ton to me ipa. Ne ihtỳj hãn ne Jeju kôt me amji ton jicu, ne nee ihkôt me hakop ne me hahkre pej nare. 20Ne me hũmre pijakrut itajê pê ihtỳj ampo kên itajê to ame he: Himẽn me Arexãnre. Cwỳrjapê pê wa me pahcurê xwỳn pê Xatanaj jũhkra mã me haxà. Pê taa ame to kên ne me hapackre, mãr quê nee jũ caxuw hipêr Pahpãm cuna mã amehcakôc kên to me hajỹr nare.
2Timot te catyt kam mehkwỳ to ihhimpej xà
Me Hàpên Xà 10.34-35; Epet 6.18
1Ita caxuw wa ha ate me cuprõn xà kam, ate me acaca xà ton xà ata to me amã hahkre. Mam cati mã, quê ha me pahkwỳ cunea Pahpãm mã mehcakôc, ne cumã me ajpẽn cajrẽn, ne ahna me ahwỳ, ne Pahpãm catihti ne impejti na amji mã me harẽ. Ne Pahpãm te me cumã ampo cunea jõr atajê pyrên, quê ha me hakrya kam me cumã amji jarẽ. 2Ca ha mehkwỳ mã garkwa ta, quê ha mehcunea Pahpãm mã pjê jõ pahhi catêjê cajrẽn, ne krĩ to mehhimpej catêjê cajrẽn, ne cumã ampo cunea to ihhimpej catêjê cajrẽn. Ampo na? Cu ha ame ita to, ne caxwãm catia mã, catyt kam me pahkrĩ, ne amji to me ajpa, ne nee me ajpẽn mãn nare, ne nee ame papijapu nare. 3Ita to pahte me, na ri ihkênre nare. Ampo na? Pahpãm pê me pahpytàr catê ata mã pahte me ita ton xà itajê na prãm, ne ahna cumã impejti. 4Pê mehcunea Pahpãm pê ampỳa mã ajco ame ipa, mehkên ata wỳr. Ne Pahpãm ri mehkên pê mehcunea to hapôj, ne ampeaj kam cute me harkwa pejti ita cunea jahkre pej na, cumã me to prãm.
5Cwỳrjapê pê me pahwỳr ihcãmter Jeju Crixtô kujate, cute Hũm me ajpẽn na me pajaxôr catê na. Ne taa mã quê ha pyxit peaj ne Pahpãm wỳr me paxũmre to cuprõ. Ne iràn xà na, jũ wỳr quê jũm Pahpãm wỳr me pahto apkjê. 6Pê Jeju hàpên xà ita to hàpên to amji pytà, ne taa amji caprôa to me pajahpan xà na amgõ. Ita kôt quê ha mehcunea me hõmpu ne me hahkre pej, nãmri quê ha Pahpãm hõ amcroa kam mehcunea kên pê me to hapôj. 7Cwỳrjapê ri Pahpãm te ito hũjarẽn catê, ne ikujahêc, wa mehcahkrit pê, por me cupê Juta catêjê nare atajê mã harẽn pejti itajê to awjarẽ, ne me cumã to hahkre. Ne me cumã:
— Ca ha Jeju wỳr amji to me apkjê, ne toa amji mã me ahimpej, ne me apej mã ame apỳpỳm — hane. Nãmri ijũjarẽn xà ita ampeaj kam ri, wa nee ame amã ihêj nare.
Me hũmre te ihtỳj Pahpãm mã mehcakôc xà
8Ne imã pjê cunea kam me hũmre te Pahpãm mã mehcakôc na me to prãm. Ne Pahpãm mã mehcakôc catêjê atajê, quê ha catyt kam Pahpãm kôt me ipa. Ne nee ame ajpẽn curê nare, ne nee me ajpẽn mãn nare kam, Pahpãm mã mehcakôc.
9Ita caxuw wa ha Jeju na mehkwỳ cahãj catêjê to icakôc, ne me hapackre to amã hahkre, jũ mã quê ha ame, ne ame amji cũmpej, ne amehkrĩ. Ỹhỹ, ca ha me hapackre to hane he:
— Nee ca amji mã me garkwa to: “Me hũmre cunea te me ikĩn prãmte, wa ha ijahĩ xà itajê cunea mã amji jacjê, cute kam me ikĩn, ne ikôt memprar xà caxuw” hajỹr nare — hane. 10Nãmri quê ha quêt caxwãm catia mã cute amehkwỳ mã ampo pejti ton to ipa, ne Jeju na mehkwỳ na me amji jarẽn na, quê ha catyt kam me ipa, ne mehkwỳ tehcajpar to me ipa.
11Ne me cumã Pahpãm jarkwa to hahkre catêjê, quê ha cute me cuprõn xà kam me cumã to hahkre, quê aracri pyjê itajê mehkrĩ ne ame awpa. 12Quê nee pyjê nõ me hũmre nõ mã ampo to hahkre nare. Ne nee cupê me hũmre jõ pahhi nare. Ne cama amji caxuw ame hũmre kôpĩ, ne nee amehcakôc nare. 13Ampo na mã wa pyjê na amã ihimpej xà itajê to ihimpej? Nee mã ampo na nare. Pê mam Pahpãm Atãw xwỳ xũmre ata to, ne hapu na Ewa xwỳ cahãj ata to. 14Pê nee Xatanaj Atãw xwỳ mã ihhêj nare, ne Ewa xwỳ mã pê ihhêj. Ne taa mã pê nee Pahpãm te amji kam hapac xà impar nare. 15Cwỳrjapê quê ha pyjê cunea mã mehkra hàa to hà. Nãmri quê ha pyjê itajê nõ te Jeju to amji mã ihhimpej, ne cumã mehkwỳ kĩn, ne mehtehcajpar rohnỳtti mã, ne nee ahti na ame hũmre na amji mã prãm nare, ne quêt caxwãm catia mã Pahpãam kôt ame ipa na, quê ha ihtỳj ihkên xà catia pê me amji pytà.
3Timot te mehkwỳ to mehhimpej catêjê pyxwỳr xà
1Ita caxuw, wa ha ate me cuprõn xà jõ pahhi to me amã icakôc, ne me amã to hahkre. Quê ha jũm te Jeju na mehkwỳ to ihhimpej catê na amji to prãm na, quê ha hàpên xà impejti na amji to prãm. Ỹhỹ, ite me gapackre xà ita ampeaj kam ri. 2Por Jeju na mehkwỳ to ihhimpej catêjê pupun catêjê atajê, quê ha me cupê hũmre impejti ne, quê nee jũm ampo kên nõ na me harẽn to kên nare. Ne me cumã hĩxi pyxit peaj, ne hĩxi me ajpẽn na ajkrut peaj. Ne caxwãm catia mã mehpahàmti ne, ne nee ame amji mã hamãr nare nare, ne nee amji to me cati prãm nare. Ne quêt ihcunea na me hàhcajrẽnti ne, me hũrkwa to, ne me cumã ampo pejti cunea to me cumã hahkre jahkre pej. 3Quê ha nee cupê côxỳhti to ihkõm catê nare, ne nee apu hàprê nare, ne quêt hàhcaprĩa kam, aracri ame to ihhimpej to ipa. Ne nee ihpore to amji to hakràj catia to ipa prãm nare. 4Ne ihtỳj cumã hũrkwa kam amji to ihhimpej jahkre pej, ne amji caxuw mehkra japackre, quê amji mã ampo cunea na, catyt kam me hũpahti to me ipa. Cwỳrjapê quê ha ihtỳj cupê Jeju na mehkwỳ to ihhimpej catê na, me jũm ata capi. 5Nãmri quê ha jũm ata pê hũrkwa kam amji to ihhimpej jahkre kêatre na, jũ wỳr quê ha apu amji mã hamã, ne amji to mehkwỳ to ihhimpej catê.
6Ne mehkwỳ to ihhimpej catê ata, quê nee cupê curmã Pahpãm kôt ipa catê nare. Nãmri quê ha curmã jũm ata te Pahpãm kôt ipa catê na amji ton, mã cute me to ihhimpej catê na me hãm na, quê ihhêaj to cama apu amji to cati prãm. Ne cute amji to amji jahkre pejti to prãm to ipa to hanea, pom pê mam me pahcurê xwỳn, ne amji curê mã amji mẽ, ita kôpit na, quê ha jũm ihtỳj amji curê mã amji mẽ. 7Na quê ha me cupê Jeju na mehkwỳ nare atajê kam mare mã, catyt kam ipa, quê ihtỳj me to amji mã ihcakôc to impejti ne. Quê ha cute hajỹr na, quê ha nee Xatanaj pê me pahcurê xwỳn ata cupê Jeju na mehkwỳ to ihhimpej tête ihcahpêrkàr nare.
Timot te hanea ne mehkwỳ jamãr catêjê pyxwỳr xà
8Ỹhỹ Timot, ita caxuw wa ha me pahkwỳ tehcajpar catêjê te amji kam hapac xà to amã hahkre. Jeju na mehkwỳ tehcajpar catêjê, quê ha caxwãm catia mã, catyt kam ame ipa, ne mehcakôc xà hêj xi nare to mehcakôc to me ipa to me prãm. Ne nee apu ampo cacô xỳhti catia ne to ihkõm nare, ne nee ihpore to pit mã apu amji mã mehhimpej to me ipa nare. 9Ne cute Jeju to amji mã mehhimpej ita na, quê amji to mehtỳj tu. 10Quê ha mam me hàpên xà ita na me capi, quê ha cute hàpên xà ita to me hamãr na, quê ha me hõmpu, ne toa mehkwỳ tehcajpar catêjê.
11Mehprõ xwỳjê, quê hanea catyt kam, caxwãm catia mã ame ipa. Quê nee mehkrĩ ne ame harkwa te wô nare, ne quêt catyt kam, caxwãm catia mã, me amji kam hapac to me ipa, ne ihtỳj ampo cunea na me amji jarkwa par to me ipa.
12Ne Jeju na mehkwỳ tehcajpar catêjê mã quê ha mehprõ pyxit peaj, ne ahpỹanre na amji mã mehkra to me ipijapar to mempeaj ne. 13Quê ha cute me hàpên xà to impejti na, quê ha mehkwỳ cunea amji mã me hũpa to ipa. Cwỳrjapê quê ha ihtỳj Jeju to cute amji mã mehhimpej na, me amji jarẽn to me ipa.
Pê Pawrô hipêr Timot mã Jeju kôt harẽn pejti
14Ỹhỹ Timot, wa awỳr ikràr, ite apupun prãmte, ne jũ wỳr wa ha awỳr tẽ, amcro itajê nõ na, cwỳrjapê wa ite amã ihhôc, ne amji cumam amã ihkujahêc. 15Nãmri wa ha cormã ita ri apu ikên, quê ha mam ihkàhhôc ita me awỳr cato, ne me pahkwỳ te cuprõn xà kam me pahte me amji ton xà ata to me amã hahkre, jũ mã cu ha amji to me pahhimpej xà to. Ne me pahte cuprõn xà ita pê cama pahte me cuprõn xà nare, ne cupê Pahpãm te cuprõn xà. Ampo na? Pahpãm ihtỳj me pahcunea kam amji to ajpa. Cwỳrjapê ri ihhêj rũm me papê, pom hãn ne ikre jicjêc ikre cajpar to ihcuhhê ita pyràac, na cu Pahpãm mã cute amji kam hapac xà cunea mã me pajũcanãr to me pahcuhhê, ne ma mehcajpa.
16Ỹhỹ, pom Jeju jarẽn xà ita peaj to impej. Ne taa mã ri catyt kam me papa na me pahtehcajpa. Pê cu mam nee me pahnõ hahkre pej nare, ne ita caxuw ri me pahcunea mã hahkre pej. Na cu ha ampo itajê cunea na amji mã Jeju to me hane he:
Cupê Pahpãm cakrô, pê ajte me pajĩa na amji to ajpẽ.
Mã Pahpãm Carõ Pejti te hõmpun, ne catyt kam ipa na harẽn.
Mã côjkwa kam Pahpãm mã memprar catêjê te hõmpun.
Mã pjê cunea kam harẽn xà ita picràn.
Mã pjê cunea kam mehkwỳ te mempar, ne ihkôat me amji ton, ne ma me hũnãr.
Mã hacpỹa mã Pahpãm te to hàpir, côjkwa wỳr.
Hõhõ, pahte Jeju to amji mã me pahhimpej xà ita ampeaj kam ri.
4Pê Pawrô Timot mã cute me ampo kên to hahkre catêjê cawpa
Coroxo 2.16-19; 1 Timot 3.1-9; 2 Petrô 2.1-3; Juta 3-16
1Ne ampo itajê cwỳrjapê wa ha hipêr cute ampo kên to me amã hahkre catêjê na me amã ihhôc. Ỹhỹ, ramã Pahpãm Carõ Pejti te hirãa pê me harẽn, quê ha ihtỳj jũ caxuw Jeju na mehkwỳ kwỳ, Jeju te amji mã mehhimpej jicu. Mã me pahcurê xwỳn Xatanaj pĩn, cupẽ jarôti pê ampo carõ kên, pê Xatanaj mã hàpên catêjê atajê me hapôj. Mã Jeju na mehkwỳ kwỳa te ampo carõ kên itajê kwỳa to amji mã mehhimpej to me ipa. Ne ampo carõ kên itajêa kôt me cumã ihhêj xi xà kên atajê cunea to hahkre. 2Ne pom cute me ampo to hahkre catêjê itajê pê ihhêj rũm ampeaj kam ampo to hahkre catêjê, ne nee mã ampeaj kam nare, mehhêj xi to pit mã ame cumã hahkre to me ipa. Ne ramã me cupê mencaca xà cunea ihkêanre, mã nee me hahkre pej nare kam, ihtỳj impej na amji mã me to hane. 3Ne me hũmre itajê te me cumã ampo to hahkre xà itajê te hajỹr he:
— Ca ha nee pyjê nõ me gikwa nare, ne ahte apu apa, ita na ri Pahpãm mã impej — hane. Ne hanea ne xwahna, por ampo kur xà impejti atajê, quê ha nee amehkur nare. Ne cama ame cumã ihhêj, ne pom Pahpãm te ampo cunea kur xà ton itajê, nee ihkên nare, ne impej pit, Pahpãm kôt me ipa catêjê mã. Ampo na? Pahpãm mã me pahkĩnti, mã me pamã ampo pej pit gõ, ita na ramã me pahte me hahkre pejtu. Ne me gàpàn xà wỳr, ca ha xa mam me gõ pyrên me gakryti na Pahpãm mã me amji jarẽ. 4Ne pom pê Pahpãm ampo cunea to itajê impej pit, cwỳrjapê cu nee ame papijacri xà atajê cupa nare. Ne gapacta ne ampo itajê cunea na me amji tohpôj, ne Pahpãm mã me harẽn to hane he:
— Ỹhỹ me ijõ Inxũ Cati, ate me imã ampo pejti jõr, itajê pyrên ampeaj kam me ijakry — hane. 5Hõhõ, ca ha Pahpãm jarkwa to Pahpãm mã me acakôc to me hane, quê ha me apijacri xà mã, ampo cawpa xà itajê cunea hamre tu. Ampo na? Pahpãm mã ampo itajê cunea impej pit.
Quê ha Timot pê Jeju mã hàpên catê impejti
6Ca ha atỳj ite gapackre xà ita to, Jeju kam me pahte ajpẽn to me pahkjêjê atajê mã hahkre. Ca ha ate ita to hajỹr na, ca ha apê Jeju mã gàpên catê impejti ne. Hõhõ, ca ha hane, ne Pahpãm jarkwa kôt amji ton to apa, ne me cumã harkwa to hahkre to apa, ne atỳj acaxwỳn to amji mã ihtỳj to apa. Ampo na? Ampeaj kam ri Pahpãm jarkwa ita, nee mã ihhêj xi nare. 7Ne ihkĩnte me aquêtjê jũjarẽn hêj xi xà to me apijacri catêjê mã ampo cawpa xà, itajê kôt hamreare. Na ca ha nee ihkôat me amji ton to me apa nare. Ne quêt Pahpãm jarkwa pejti atajê to, ca ha me hahkre to me apa, ne catyt kam ihkôat me amji ton to me apa. 8Cu ha me pajàpên xà pytĩa to me pajàpên to me papa, ne pahtỳj pajĩ cunea kam ame pahcarôhrôt. Ne ampeaj kam ame pajĩ hi tỳj. Jĩkjê na cu ha Pahpãm mã pajàpên to me papa, ne amji caxwãm pê amji mã me pahcaxwỳn to ihtỳj to me hanea, pom quê me pajĩ kam pahcarôhrôt hi tỳjti he. Ne me pahcaxwỳn tỳjti ita ri me pajĩ hi tỳjti ita jirôa pê impej. Ampo na? Quê ha ihtỳj me pajĩ me pahhi tỳjti ita jũ caxuw hamre, ne me pahcaxwỳn quê ha quêt jũ caxuw hamre nare.
9Ita caxuw wa ha ampeaj kam ite me amã ampo to hahkre xà ata to me amã hahkre. Ca nee me anõ ihcaca nare, ne atỳj ana cuhkõnre cunea to ahna amji capa, ne toa amji mã me ahimpej to me apa. 10Pahpãm ihtĩar ihkrĩ ata pê ri me pahkên pê me pahto hapôj catê. Ne toa, cu amji mã ame pahhimpej, ne ma amji to me hikaj to me papa. Cu pahte mempar, cwỳrjapê cu pahtỳj hàpên xà cati jàhtôa itajê to me pajàpên to me amji cujtên to me papa.
11Cwỳrjapê ca ha ijarkwa itajêa to me cumã hahkre to me apa, quê toa amji mã mehhimpej to me ipa. 12Quê ha me pahkjêjê nõ atuwre na ato ihcakôc, ca nee jũm ata kam gapac nare. Ne cormã atuwre cakrô, ca catyt kam apu apa, ne catyt kam acakôc to apa, ne amã mehcunea kĩn, ca me caprĩ to apa, ne Jejua to amji mã ahimpej na apahàmti to apa. Quê ha me pahkjêjê kwỳ catyt kam ate apa na me apupu, ne hanea ne acuxà catyt kam me ipa. 13Cwỳrjapê ca ha atỳj me cumã Pahpãm jarkwa pejti ita cahyt, ne me cumã Jeju pê me pahkritxwỳ jarẽn xà impejti jarẽn to apa. Ne me cumã Pahpãm te amji kam hapac xà cunea capô partu to apa, wa ha ahnaa me awỳr icato.
14Pê ca cormã gàpên nare kam, pê Jeju na mehkwỳ to mehhimpej catêjê me akrã na me hũxi, ne Carõ Pejti jarkwa kôt me garẽn to hane he:
— Ita caxuw, ca ha Jeju na mehkwỳ jarkwa me, Jeju jarkwa kôt, me cumã Pahpãm jarkwa jarẽn pejti itajê to hahkre to apa — hane. Pê Pahpãm amã acarôt tỳjti atajê jõr partu. Cwỳrjapê ca ha jũ caxuw ita to gapac kêt nare.
15Hõ, gàpên xà ita mã, ca ha amji jõr to apa, ne ma apicamẽn to mõ, mehcunea kam mare mã. 16Ca ha atỳj catyt kam apa na amji jamãr to apa, ne me cumã ampo to hahkre na amji jamãr pejti to apa. Ca ha hane, quê ha Pahpãm ihtỳj cute me akam hapac catêjê me, me akên pê ato hapôj to ipa.
5Jeju na mehkwỳ te ajpẽn to mempejti xà
1Ỹhỹ, wa ha pahte me ajpẽn to mempejti xà jarẽ. Quê me pahkjêjê ame ampo kên ton to me ipa, ca me cumã, quê catyt kam ame ipa. Ne mehwej catêjê, ca ha me cumãn kên nare. Ampo na? Ramã quêt acumam ihwejtu. Ca ha cama cumã acakôc, ne hapackre to hane, pom quê ca me apãmjê mã me acakôc to me apa he. Ne pom ca hapu na me akjêjêa japackre ata na, ca ha akôt mentuwre atajê japackre to hane. 2Ne nee pyjê wej itajê mãn kên to apa nare to hane, pom ca me axyrxwỳ na me apahàm, ne nee me cumãn nare he. Ne atỳj me cuprỳ na apahàmti to hane, pom ca me akjêjê na apahàmti he.
Pyjê wej pê mempjê tyc, pê hamreare atajê tehcajpar xà
3Ne hanea ne me pahkwỳa cahãj wej, pê mempjê tyc atajê, ca ha me ahna apahàm jàhtôti to me apa. 4Quê ha me pahkwỳ nõ pê impjê ty ita cumã ihkra, ne cumã ihtàmxwỳ, quê ha nee mehkwỳ cunea mehtehcajpar nare, ne quêt mehtàmxwỳ me, mehkra itajêa quê ha mehtehcajpa, ne me cumã hõ gõ. Ampo na? Pê mam mehkra itajê me, mehtàmxwỳ itajê kryjre na ihtỳj ajco me cumã hõ gõ, ne me to ajpa, jahpan xà na quê ha ihtỳj me to ajpa, ne me cumã me hõ gõ. Hõhõ, ita na ri Pahpãm mã impej, ne ahna cumã prãm. 5Nãmri quê ha jũm cahãj ata caxuw hamreare, ne nee hũkjê nare, quê ha amji tehcajpar xà na ihtỳj amcro me, caxwa cunea kam ihkrĩ ne Pahpãm wỳ. 6Ne por pyjê pê me pahkwỳa cahãj pijapit, ihtỳj hãn ne mehkwỳ kĩnte ame hapactu to me ipa, ne amji na me ampo cwỳr to me ipa atajê, quê ha nee me pahkjêjê kwỳ me hõ to ame hamãr to me ipa nare. Ampo na? Pom pyjê te hajỹr catêjê itajê, ramã me caxwãm pê ihhêj ne amehtyc. 7Cwỳrjapê ca ha Timot, pom ite me hapackre xà ita to, ca ha me hapackre, ne me cumã to hahkre to apa. Quê ha me akam hapac, ne catyt kam me ipa na, quê ha nee jũm me ahna ihcakôc kên nare. 8Ne por quê ha jũmjê amji to hũkjê atajê, nee me amji to mempej nare na, ne nee hũrkwa kam ame hamãr to impej nare na, quê ha ramã Jeju to amji mã mehhimpej jicu, ne amji to me cupê Pahpãm kôt ipa catêjê nare atajê pyràac, ne me hirôa pê ihkêanre ne.
Mehkwỳ te pyjê wej pê mempjê tyc tehcajpar xà
9Ne por mempijapit pê me hũkjê nare atajê, ca ha me haprỳ nõ, por amji tehcajpar xà na me prãm atajê, mãr quê mehkwỳ mehtehcajpa. Por pê mempjê to pyxit ita kam mempijapit, ne ramã me ahna caku te xêjxẽnta jirôa pê atajê, ca ha me haprỳ nõ. 10Quê ha jũm mehcunea mã impejti na, quê ha ramã me hõmpu, ne me hahkre pej, ne amji mã me harẽn to ipa. Quê ha jũm ita mehkra nõ ata to ipijapar to impejti, ne cute krĩxàre kwỳ mã hõt xà na hũrkwa jahkre to ipa na, ca ha me haprỳ nõ. Ne hanea ne, por me pahkjêjê kwỳ mã hàpên to ipa, ne hanea ne me cupê hamreare atajê tehcajpa, ne me hà catêjê tehcajpar to ipa, ne ampo to hàpên xà impejti atajê cunea mã cute amji jõr to ipa atajê, ca ha atỳj me haprỳ nõ.
11-12Ne por cormã mempijapit tuw atajê kwỳ te Jeju na me amã amji to ihhimpej ne, me amã:
— Wa ha hirãa pê Jeju me, me ca mã amji to ihimpej, nãmri wa ha itỳj me pahkwỳ tehcajpar to ipa, ne nee hipêr jũm me ijikwa nare — hajỹr. Ca ha me haprỳ nõr cakrô, quê ha ihtỳj cormã jũm impjê to prãm. Ne cama cute amji to ihhimpej xà ata to hapac kêt, quê ha Pahpãm mã ita na ihkĩn nare, ne ahna cupê ihkaj na. Cwỳrjapê ca ha mentuw japrỳ nõr nare. Ampo na? Quê me ahna ahtũm nare, quê ha ihtỳj hipêr me hikwa tuw prãm. 13Ne me cupê mempjê tyc tuwre catêjê kwỳ te hajỹar he, quê ha itajê ma krĩ cape na ame ipa, ne ampeaj kam me cumã xuwcaca, ne me xwahna xi, ne nee amji na me hũcapi nare, ne cama mehkwỳ na amehcakôc kêanre to me ipa. 14Cwỳrjapê ri hacpỹa mã imã hipêr pyjê pijapit tuw itajê jikwa tuw, ne mehkra me, me hũrkwa to mehhimpej na, me to prãm. Hõhõ, quê ha ita to ame hane, quê ha nee me pahcurê xwỳn catêjê ame pahna ihcakôc kên nare. 15Ne ihhêj ne ramã mempijapit kwỳ te me Pahpãm jõ pry cupan, ne me pahcurê xwỳn pê Xatanaj jõ pry pynãr.
16Quê ha jũm cahãj jũrkwa kam jũm impijapit, quê ha taa ihtehcajpa, ne ma hamã. Quê ha nee ipu na, ahti na, Jeju na mehkwỳ mehtehcajpar nare. Jũ na quê ha Jeju na mehkwỳ ihtỳj mehtehcajpa? Quê ha quêt me hũkjê hamreare, ne me caxuw hamreare, ita ri quê ha mehkwỳ kwỳa ihtỳj mehtehcajpa, ne me hamã. Hõhõ, ite amã mempijapit to icakôc to hahkre xà ita to, wa ite amã hahkre.
Pê Pawrô Timot mã mehkwỳ to mehhimpej catêjê to hahkre
Me Hàpên Xà 14.23; 1 Petrô 5.1-4
17-18Ne ita caxuw wa ha me cupê me pahkwỳ to mehhimpej catêjê to amã icakôc, ne me to amã hahkre. Pê ramã Pahpãm jarkwa na, ihkàhhôc kam ihhôc ata me pamã hũjarẽn to hane he:
“Quê ha jũm te amã hàpên na, ca ha atỳj cumã gàmjõr to impejti ne.
Ne quê hanea ne pryti xũmti jàpên catêjê nõ amã apê, ca ha nee harkwa na hê nare, hàpàn tête, quê ha taa ihtỳj apà, hàpên xà kam” hane.
Pyràc pej ne quê ha me pahkwỳ jõ pahhi atajê me hàpên xà to impejti na, quê ha mehkwỳ me cumã hàmjõr to impejti ne. Quê ha Pahpãm jarkwa to me cumã hahkre catêjê me cumã ihcakôc to impejti, ne catyt kam, cute me cumã ampo to hahkre to me ipa na, quê ha ihtỳj mehkwỳ me cumã hàmjõr to catia ne.
19Ne ihnõ xwỳjê, quê jũm pyxit peaj ne Jeju na mehkwỳ to mehhimpej catêjê nõ to amã ihcakôc kêanre na, ca ha nee impar nare. Nãmri quê ha mencrê ne ajpẽan kôt me amã to mehhimpej catêjê nõ jarẽn to kêanre na, ca ha cormã atỳj me kampa. 20Ca ha me acunea te ramã mehkwỳ to mehhimpej catêjê nõ te amji mã hamãr nare, ne cute ampo kên ton na ate me hahkre pej na, gapacta ne kam mare mã me cumã, quê ha mehcunea me hõmpu, quê ha ihtỳj me amji mã pa, ne ton jicu.
21Ỹhỹ Timot, wa ha Pahpãm me, ihkra Jeju me, côjkwa kam me cumã imprar catêjê kam mare mã, amã ijarkwa ita ta, ca ha ijarkwa ita pa, ne ma to amji japackre. Ne ihkôat me cumã ampo itajê cunea to hahkre to apipẽnti to apa. Ne nee ca amji mã gõ kwỳ nõ to impejti prãmte, nee cumã ite amã ampo to hahkre xà itajê nõ to kyre pê hahkre to ihcajcucre nare. Ne nee jũm mã amji jirôa pê ampo itajê nõ to hahkre nare, ne me cumã ampo itajê to hahkre to apipẽnti to apa.
22Quê curmã jũm amji to Jeju na mehkwỳ, ca ha nee cormã ne pahhi na me hãm nare. Ca cormã ne pahhi na me hãm, quê ihhêaj to cormã hàpên xà peacre, ne ihtỳj ampo kêanre to, quê ha me gàpên xà ita kôt hamreare ne. Ne nee cute mehkên ton catêjê kôt me akên mã acjêj nare, ne quêt ihcunea na, apejti, ne apahàm jàhtôti to apa.
23-25Ne mehkwỳ hãn ne me kam mare mã ampo kêanre to, mã Pahpãm te me pahcukij xà xwỳjrea na mehcunea mã hahkre pej. Ne mehkwỳ aracri me ampo kên to, mã nee me hahkre pej nare, ne Pahpãm mã ramã me hahkre pej. Ne Pahpãm te me pahcukij xà kam, cu ha me pahcunea me hõmpu, ne me hahkre pej. Ne hanea ne ita xwỳjê na cute hajỹar he, mehkwỳ ihtỳj hãn ne me ampo pej pit to, mehkwỳ kam mare mã. Ne mehkwỳ hanea ne aracri me ampo pej pit to, mã nee mehkwỳ me hahkre pej nare. Mã ihtỳj Pahpãm me hõmpu, ne me hahkre pej. Taa mã, xãmte cormã ihnõ, ca gõtpê gitô kre me atu xàa na apu apa, cwỳrjapê ca ha cô to pit mã akõm nare, ne hanea ne pĩxô cacô xỳre kryjre ne to akõm to apa.
6Pê Pawrô Timot mã cama me cumã hàpên catêjê to hahkre
Epet 6.5-9; Coroxo 3.22–4.1; Tito 2.9-10; 1 Petrô 2.18-25
1Ita caxuw wa ha me hàmcwỳr nare, ne cama me hàpên catêjê atajê pê Jeju na mehkwỳ to me amã awjarẽ. Ỹhỹ, me hàpên catêjê cunea te ihtỳj amji mã me hõ pahhi cupa xà, mãr quê nee jũm me pahte amji kam me pajapac xà to hahkre xà atajê na, Pahpãm na ihcakôc kên nare. 2Quê cama me cumã me hàpên catêjê jõ pahhi pê Jeju na mehkwỳ na, quê nee cumã hàpên catê ata amji mã harkwa to:
— Ipê ijõ pahhi kjê, cwỳrjapê wa ha nee cumã ijàpên cati nare — hane. Quê amji mã hajỹr nare, ne cama quêt harkwa to:
— Ijõ pahhi pê imã ikjê kĩnti ata ri ijàpên xà jahpan xà na hàmcwỳr to ipa, cwỳrjapê wa ha cumã apêa to apê — hane.
Pê hipêr Pawrô cumã, cute me cumã ampo kên to hahkre catêjê cawpa
3-4Ca ha ampo itajê to me cumã hahkre, ne ahna me to ahimpej to apa. He Pahpãm me pamã catyt kam me papa to hahkre. Quê jũm me Pahpãm himpej xà me, me pajõ Pahhiti pê Jeju jarkwa kaj na, cute me cumã ampo to hahkre na, ca ha ramã me hahkre pej pyrentu, amji to cati prãmte ri apu hajỹr to ipa, ne cupê amji jahkre kêatre. Ne me hũmre itajê hãn ne me ajpẽn mãn prãmte, Pahpãm jarkwa kryjre cwỳrjapê me ajpẽn mãn kam pra, ne tee ame ipijapu to prãm. Mã ahna me cuprõ, ne mehkrã, ne me to ihcuhhê atajê hanea ne me ipijapu to prãm. Ne mehkwỳ me hũ na me amji to prãm, ne mehkwỳ ajpẽn kam ame hũn kêanre, ne mehkwỳ mehcakôc xà incràre, kôt hamreare atajê to uu ne ajpẽn krac ri mehcakôc jicu nare. 5Ne pom ame ita ton to ipa itajê, hãn ne mehkrã acto tu, mã nee ame amji kam hapac nare, ne me cumã mehhêj xi to pit mã amehcakôc jahkre pej. Ne cute me amji kam hapac xà kêanre cupan itajê to ri ame amji kampa he:
— Wa itỳj jũ na amji ton to prãm, ijakràj prãmte. Wa ha Jeju na mehkwỳ mã axà, ne Pahpãm mã apê, ne cumã ijàpên ita kam wa ha amji to ijakràj — hane.
6Cu ha me pahte catyt kam me papa na, quê ha tee me papê me pajàhcukrêj crêre cakrô, cu ha me hõmpu, ne me amji mã:
— Mã hã, wa ha tahnaa mã me — hane. Hõhõ, pahte me pajàhcukrêj to amji kam me pajapac xà ita na ri Pahpãm mã me pahto prãm. Ne ramã me pajakràaj to me pajakràj. 7Ne me pahpỳpỳm xà kam, ampo to pê cu pjê wỳr ame pahpỳpỳm? Hamreare, nee pê cu ampo to ame pahpỳpỳm nare. Ne me pajũ kam ame pahpỳpỳm. Na cu ha me ty, ne ampo to cu ha ame pra, pjê ita pĩn, côjkwa wỳr? Hamreare, cu ha me pajũ kam hacpỹ mã ame pra. 8Mẽr hõhõ, quê ha me pamã me pajõ, ne me pahkà, cu ha pahtỳj hũrên ame pajakry, ne me amji mã:
— Mã hã, cu ha ahnaa mã me — hane. 9Ne por me pajõ me, me pahkà jirôa pê amji to me hakràj prãm catêjê itajê pê ihhêj rũm ahtorore pê amji jahkre kêatre ata pyràac. Mã arỳjhy xen te kwỳc mã acjêj, mã mehpro, mã hãn ne mehcura ata pyràac, ne ihpore na mehprãmti ita to ihtỳj mehkên mã me amji rẽn prãm to me ipa. 10Me pahte ihpore kĩnti atajê pê ampo kên cunea xakat. Ne me pahkwỳa kwỳ te me ita par pej nare kam ri, cute me Jeju jõ pry rên, ne to amji mã mehhimpej jicu, ne pea me hĩ caxwãm pê cute ame caxwỳn itajê jaxôp, ampo kên itajê to. Cwỳrjapê ca ha Timot, ma ampo itajê cunea pê amji to gapôj to apa.
Timot te ampo cunea mã hũcanãr xà
11Ỹhỹ Timot, apê Pahpãm jõ me hũmre nõa, cwỳrjapê ca ha quêt mehcunea to amji kam gapac xà to apipẽnti to apa, ne quêt Pahpãm te amji ton xàa kôt, catyt kam amji ton to apa. Ne quêt Jeju to amji mã ahimpej to apa, ne quêt mehcunea to impej, ne amã mehkĩnti ne. Ne quêt gàpên xà ita kam, ca ha to acrà ne cumã gũcanãr to apa, ne nee me hirôa pê amji ton to apa to prãm nare. 12Ne cama Jeju te amji kam hapac xà kôt to amji cujtên kam to acrà tu, ita na ca ha gõtpê cahi na akrĩ, rohnỳtti mã. Hõhõ, pom ite amã ampo to hahkre par itajê kôt, quê ha jũ caxuw acaxwỳn ihtyc nare, ne quêt Pahpãm cahê na atĩr rohnỳtti mã. Pê ca me hàhtô kam mare mã amji jarẽn to hane he:
— Wa Jejua to amji mã ihimpej, ne ihkôat ipa, ne cumã ijàpên to ipa — hane. Pê amcro ata na Pahpãm ana ahwỳ, ca Jeju cape na apa rohnỳtti mã xà caxuw.
13Ỹhỹ Timot, wa ha amã ijarkwa ta, Pahpãm me Jeju kam mare mã. Pê Pahpãm ampo cunea mã amji to ipijapar xà caxuw, cumã cute amji kam hapac xà gõ. Pê Jeju krĩ jõ pahhi pê Pirat cuna mã cupê Pahpãm kra na amji jarẽn to impejti. Wa ha Pahpãm me Jeju kam mare mã, amã ijarkwa ne amã:
14— Por ite amã ampo cunea to hahkre atajê, ca ha ampeaj kam kampa, ne catyt kam apa ita na, quê ha ahnaa hacpỹ ne me pajõ Pahhiti pê Jeju Crixtô te amji jaxàr xà jõ amcro kam ahtwỳ — hane. 15Quê ha Pahpãm hacpỹa ne pjê ita wỳr Jeju kujate. Ne Pahpãm pyxit peaj, ne cupê mehcunea jõ Pahhiti, mã mehcunea impejti na me cumã harẽ, ne cupê pahhi catêjê cunea jõ Pahhiti, ne cupê mehhimpej catêjê cunea to Ihhimpej catê cati. 16Ne pyxit peaj, quê ha nee jũ caxuw ihtyc nare. Ne pyxit peaj ne impeaj to impej. Ne impej ita pê ihhêj rũm pyt cuna mã irĩt xà prà. Ne jũ wỳr quê jũm hõmpun mã awcanã. Ita pyràc pej ne, jũ wỳr quê me paxũmre kêanre nõ awcanã, ne Pahpãm pejti ata na ahtêp ne hõmpu. Rỳ jũ caxuw jũm te hõmpun nare, ne jũ wỳr cu me pahnõ hõmpu. Quê ha pjê cunea kam mehcunea amji mã me hũpa. Ampo na? He pyxit peaj, ne cupê me pahcunea to ihhimpej catê, rohnỳtti mã.
Pê Pawrô Timot mã cute me hakràj catêjê to hahkre
17Ne wa ha cormã hipêr amã me hakràj cati atajê to icakôc crire ne. Ne por pjê ita kam me hakràj cati atajê, ca ha me cumã, quê ha nee ame amji to cati prãm nare, ne nee me hõ pore to pit mã ame amji to ipijapar to prãm to me ipa nare, ne quêt Pahpãm to quê amji mã mehhimpej to prãm to me ipa. Ampo na? Quê ha ihtỳj jũ caxuw hõ pore ata hamre, ne Pahpãm quê ha quêt jũ caxuw hamre nare. Ne Pahpãm mã me pahkĩn, na ri me pamã ampo cunea jõr to catia to ipa, mã hũrên me pajakryti. 18Ne me hakràjti atajê mã garkwa ta, quê mehkwỳ to impeaj ne, ne pom cute mehkwỳ to impejti ita to, quê ha hakràj cati. Ne me to hàhcajrẽnti to ipa, ne ihtỳj mehkwỳ mã me hàhcukrêj jõr to me ipa. 19Quê ha cute ita to ame hajỹr na, quê ha kỳj pê, Pahpãm cahê na, amji mã me hàhcukrêj itajêa to cuprõ. Hõhõ, quê ha me hane, ne Pahpãm cahê na amji to me ipijapar rohnỳtti mã.
Pê Pawrô Timot mã amji jarẽ
20-21Ỹhỹ Timot, pom ite amã ampo jarẽn itajê, ca ha amji mã nõr to impeaj to apa, ne ma to amji japackre ne ihkôat apa. Ne me akwỳ kwỳa hãn ne Pahpãm mã ampo kĩn nare atajê to pit mã amehcakôc to me ipa, ne me amji jarẽn to mehhêj xi to:
— Me imã ri quêt ampo itajê cunea jahkre pej — hane. Cwỳrjapê ri ramã cute me Pahpãm jõ pry cupan ne mehhyr, ne Jeju te amji mã mehhimpej jicu. Ne ca, ca ha cute me hajỹr catêjê pê ampỳa mã apu apa. Ne hamre, imã Pahpãm jarkwa kôt me apeaj na me apa na me ato prãm. Hamre.