Pahhi Catêjê Pê
XAWRÔ ME TAWI
Ỹhỹ, pê Xamer pê Pahpãm jarkwa to ihcakôc catêjê nõ, ne cupê me to ihhimpej catê cahhur. Cwỳrjapê ri hõ kàhhôc pijakrut itajê japrỳ te Mam Xamer Jõ Kàhhôc (1 Xamer) ne Hapu Na Xamer Jõ Kàhhôc (2 Xamer). Ne Pahpãm te Xamer te Xawrô pê Ixaher catêjê jõ pahhi na hãm na hũjahkre. Ne ihkàhhôc ita hanea ne Tawi to ihcakôc.
1Xamer pê Pahpãm jarkwa to ihcakôc catê
Pê Ixaher catêjê xũmre nõ ita japrỳ pê Ercãn. Ne pê ihprõ ajkrut atajê japrỳ pê Anakwỳj me Penkwỳj. Pê Penkwỳj mã mehkra, ne Anakwỳj pê ihkra nare, ne ihkre crà. Pê ajco caku cunea kam Ercãn me, mehkra cunea krĩ cati nõ wỳr me pra, Pahpãm mã cute me ampo jõr prãmte. Ne Ercãn pê ajco ihtỳj mehkra mã cute ampo jõr xà atajê gõ. Pê ihkĩnte Anakwỳj pê ihkra nare, cute cumã ampo jõr xà na. Pê Penkwỳj ajco Anakwỳj curê to ipa, ihkra nare kam, ne ajco cumãn kêanre.
Pê caku cunea kam ajco to hajỹr to xa. Pê Anakwỳj ajco nee hàpàn nare, ne cama ajco apu amrã. Pê Ercãn hõtpê ajco ihcukij ne cumã:
— Anakwỳj, ampo na mã ca apu amrã, ne nee gàpàn nare, ne cama apu apec? Xà wa akra te tej xà jirôa pê ato impej xà ata na amã ikĩn nare? — hane.
Mã amcro nõ na ma hipêr krĩ cati ata wỳr me mõ, mã ma Anakwỳj ampo kà te Pahpãm to me amji kam hapac xà jũrkwa wỳr hàr, cute Pahpãm na hàhwỳr prãmte. Mã Pahpãm mã mehcajrẽn catê pê Eri ata jỹ, harkwa mã mencjêj xà na, ne Anakwỳj pupu. Mã cumã amji kĩn nare, ne ihpeacre, ne cute Pahpãm mã ihcakôc na cumã amji ton, ne cumã:
— Ỹhỹ, côjkwa jõ Pahhiti carôt tỳjti ita, ca ha ate ipupun, ne ito amji japackre, ne imã ikra xũmre nõ jõr na, wa ha hacpỹa mã amã cugõ, quê ha cupê amã hàpên catê rohnỳtti mã — hajỹr.
Mã Eri te harkwa kà pupun, mã ihtỳj amji cahhy, ne nee ihcakôc nare. Ampo na? Amji caxwãm pê Pahpãm mã ihcakôc na ri. Mã Eri apu ipipãn na ihcãmjĩ, ne cute cumãn to:
— Pĩxô cacô xỳre to akõm jicu! — hajỹr.
Mã cumã:
— Wa nee apu ipipãn nare, ne cama ipeacre, na wa apu Pahpãm mã amji jarẽ, ne apu ahna ahwỳ — hane.
Mã Eri cumã:
— Hã, apej pêa mã mõ. Quê ha Pahpãm ihtỳj amã gàhwỳr xà ita gõ — hane. Mã cute amji jaxàr. Jirô pê mã ri jũ mã me ahna amcro te, mã ma cute me amji jaxàr, me hõ krĩ wỳr.
Mã Pahpãm te cute ahna hàhwỳr xà ata to amji japackre, ne cumã ihkra xũmre ita jõr. Mã cumã ihpỳm, mã cute cumã haprỳ to Xamer, ne haprỳ ata kôt harẽn xà te “Pahpãm te ipar”.
Pê cormã Xamer incrire, na pê nee hacpỹ mã krĩ cati wỳr me to amji jaxàr nare to me caku to cwat. Jirô pê mã ri ma inxi me hũm to mõ, por curi Pahpãm to amji kam hapac xà jũrkwa kam, Eri apu ipa ata wỳr. Ne pea Anakwỳj te Eri mã amji jarẽn ne cumã:
— Ipê, por pê pyjê nõ hĩ cunea peacre to Pahpãm mã ihcakôc, ne ihkra na ahwỳ ata. Mã Pahpãm te imã ikra ita jõr, wa hacpỹa mã cumã hõr to mõ. Cute ita ri, hàpên xà ita to cumã hàpên ita kam ahnaa ihwej xà caxuw — hajỹr.
Mã Eri te Pahpãm mã, Anakwỳj me, impjên cajrẽn. Mã impjên me ajwar Pahpãm mã increr jirô pê mã ri cute me amji jaxàr, me hõ krĩ wỳr, ne curia cute me Eri na Xamer juwahi. Pê Pahpãm hipêr Anakwỳj mã ihkra xũmre to incrê ne cugõ, ne cumã ihkra cahãj to ajkrut ne cugõ.
Pê Xamer ajco Eri tehcajpar to ipa, ampo kà te Pahpãm jũrkwa kam hàpên xà atajê cunea na. Ne ajco ihkà impejti to ihkà, pê inxi caku cunea kam, ajco cumã hitô kà krare to ipa, impjên pê Ercãn me ipa xà ata kam.
Hõhõ, pê intuwre ata to ipijapar to me hane, ampo kà te Pahpãm to me amji kam hapac xà jũrkwa kam.
3Pê Pahpãm Xamer cukij
Pê ramã Eri ihwej ne ajmãr into tũm, ne ramã into puror. Ne amcro nõ na ramã hõt xà caxuw nõr. Mã Xamer ampo kà te Pahpãm jũrkwa kam nõ ne gõr, pĩ po te Pahpãm jàmcjên xà cahê na. Mã Pahpãm te Xamer cukij ne cumã:
— Xamer, Xamer — hajỹr.
Mã Xamer cumã:
— Ampo? — hane, ne ma Eri wỳr tẽ ne cumã:
— Ampo? Wa ramã ita ri xa. Xà ca apu icukij? — hane.
Mã Eri cumã:
— Hacpỹ mã amji jaxà, anõr xà wỳr. Wa nee apu amã ijàkjêr nare — hane. Mã ma Xamer te amji jaxàr.
Mã Pahpãm te hipêr ihcukij, ne cumã:
— Xamer! — hajỹr.
Mã Xamer hipêr hỹr ne ma Eri wỳr tẽ ne cumã:
— Ampo? Xà ca apu icukij? — hane.
Mã Eri cumã:
— Quê, wa nee apu acukij nare. Hacpỹ mã amji jaxà, anõr xà wỳr — hane. Mã ma cute amji jaxàr.
He pê cormã Xamer kam Pahpãm jarkwa hamreare, ne nee cormã Pahpãm jahkre pej nare. Mã Pahpãm te hipêr ihcukij, mã ma hipêr Eri wỳr tẽ ne cumã:
— Ca ate ampeaj kam imã gàkjêr, na wa ramã acuna mã xa — hajỹr.
Mã Eri te Pahpãm te ramã apu Xamer tuwre ata mã hàkjêr na hahkre pej, ne to ihhimpej ne cumã:
— Anõr xà wỳr tẽ ne kam nõ. Quê hipêr jũm acukij, ca cumã: “Pahhiti, pom ipê amã ijàpên catê ita, gapacta ne acakôc, wa ha itỳj akampa” — hajỹr. Mã ma Xamer te amji jaxàr ne tẽ ne nõ.
Mã Pahpãm te hipêr ihcukij, ne cumã:
— Xamer, Xamer! — hajỹr.
Mã cumã:
— Pahhiti, pom ipê amã ijàpên catê ita, gapacta ne acakôc, wa ha itỳj akampa — hane.
Mã Pahpãm cumã:
— Wa ha Eri na mehkwỳ kam apu ampo to kêanre ne. Ne por pê wa ramã me cumã ampo cawpa, ata to wa ha mehkwỳ cunea to hamre tu. Ampo na? He Eri kra xũmre ipijakrut itajê te ramã mehkên ton xà ita te ihhêj ne ramã amehtũmti. Ne ame to kêanre ita kam, jũ mã wa ha me to, ne hacpỹ mã me to ihtetet? Ramã mehtũm ita te me hirô pê ihpỳm tu! — hane.
Mã iràrà, mã Xamer te Pahpãm te ampo to cumã hũjarẽn atajê cunea to Eri mã hũjarẽn partu.
Mã Eri cumã:
— Ita na ri Pahpãm mã me to prãm — hane.
Pê Xamer ihkà to mõ, pê Pahpãm pê Pahhitia ajco cape na apu ipa. Ne pê mehkwỳ cunea ihtỳj harkwa na me kampa. Ampo na? Pê ajco Pahpãm jarkwa to pit mã, me cumã ihcakôc, na pê ajco me kampa.
4Pê Piritew catêjê me amji mã Pahpãm jàmcjên xà pytà
Pê caku ata jõ amcro atajê nõ na, Ixaher catêjê me Piritew catêjê ipijapu kam tẽ. Mã Piritew catêjê te Ixaher catêjê jõ krãhtare to mir te cwat ne mehcuran. Mã ma hacpỹ mã mehkwỳ te me amji jaxàr, por curi me hỹr xà ata wỳr, ne me cator.
Mã Ixaher catêjê pê prohkam cute me amji cukij, ne me amji mã:
— Ampo na mã me Pahpãm te me pahna Piritew catêjê jamãr, mã cute me pahkwỳ jipej? Hacme, ne me Pahpãm jàmcjên xà to ajpên me mõ, ne ma me papijapu xà wỳr me to mõ, quê ha hàmcjên xà ata ihtỳj me pahcurê xwỳn pê me pahpytà — hajỹr.
Ne ma cute Pahpãm jàmcjên xà wỳr mehkujahêc, mã me cator. Mã Eri kra xũmre pijakrut atajê te me ahna hàhwỳ ne ma me ipijapu xà wỳr me to tẽ.
Ne pê ihhêj ne Pahpãm jàmcjên xà ita to pit mã me amji mã mehhimpej, ne nee Pahpãm to amji mã mehhimpej nare. Ne hàmcjên xà to me cator pêê mã, Ixaher catêjê kỳj cati pêa mã ame caràr, me hakryte.
Mã Piritew catêjê ihtỳj ame Ixaher catêjê jõ Pahhiti te me ipijapu na mehtehcajpar na ame cãmjĩ, ne ame amji mã hũpa. Ne hacpỹ ma mã Piritew catêjê te me kam ihtẽm, ne ihtỳj me hapu, ne mehcura. Ne cute me to mir te trĩnta ne mehcuran. Ne hanea ne cute me Eri kra xũmre itajê ajwar mehcuran. Mã ma mehcahhur me hũrkwa wỳr me cupê ame pra. Mã Piritew catêjê ma me Pahpãm jàmcjên xà to me mõ.
Mã Ixaher catêjê nõ pyxit ne ma Eri jõ krĩ wỳr cumã hũjarẽn to tẽ. Ne ihtẽm ita kam cute ajkam hapac xà te apu amji pê ihkà cokjêr, ne apu amji tũm, ne Eri wỳr cator. Mã ramã Eri pry jahkà kam ihkrĩ xà ata na jỹ.
Mã hũjarẽn catê ata cator, ne cute cumã me ipijapu xà atajê jarẽn to hajỹr:
— Wa ita kam ma ajpên me ipijapu xà pê tẽ. Ne Piritew catêjê te me pahkwỳ jipej tu. Ne me akra xũmre atajê ajwar mehhi, ne Pahpãm jàmcjên xà te hajỹar, ne ramã ipictor tu. Ma Piritew catêjê te me hũtàr ne me to mõ — hajỹr.
Ne cormã jũm tuw ita te Eri mã Pahpãm jàmcjên xà jarẽn, me ajkaam mã Eri te amji mã ipikrar, ne ihkrĩ xà pê catuat to ihpỳm. Pê ramã ihwej ne ampeaj kam hicot, cwỳrjapê pê catut to ihpỳm, ne imput kwĩn pyrentu ne ty.
9Pê Pahpãm mehkwỳ jõ pahhi na Xawrô capi
Ne pê caku itajê nõ kam Ixaher catêjê xũmre nõ intuw ita japrỳ Xawrô. Ne pê hĩ to impeaj to impej, ne mehkwỳ jirôa pê ihte ry ne ihhi ihtỳj.
Ne pê Xamer ata ajco Pahpãm kampa, ne ma mehkwỳ mã harkwa jarẽ. Ne pê mam ramã amcro nõ na, Pahpãm Xamer mã Xawrô to ihcakôc, ne cumã:
— Piritew catêjê te ame ikwỳ pê Ixaher catêjê to kêanre, mã cama ame amrã, wa ite mempar ne imã me caprĩ xà. Cwỳrjapê wa ha amã jũm xũmre kujate, wa ha me ikwỳ jõ pahhi catia na hãm xà caxuw. Ite ramã amji mã capi, mãr quê taa me hũtà — hane.
Ne pê amcro nõ na Xawrô pãm ata ma Xawrô me, cumã hàpên catê ita me ajwar ihkujate, por cawrô cahàcre pictor ata japên to. Pê ma Xawrô me hũm mã hàpên catê ita ame cawrô cahàcre japên to me mõ. Ne ame mõr ita kam, Xamer me, cute me ajpẽn cajpar. Mã Xamer te Xawrô pupun, mã Pahpãm cumã:
— Pom hũmre ita wa ite amji mã capi, ne amã harẽn. Ne cupêa quê ha me ikwỳ jõ pahhi, ne me to ihhimpej — hajỹr.
Mã Xamer te Xawrô me, hũm mã hàpên catê ata me ajwar cute me haprôr, ne ma amji kĩn cati nõ ata wỳr me to mõ, ne me to cator. Ne mehkrĩ xà impeaj nõ kam cute Xawrô jỹr, ne hàwmrõ catê mã harkwa hyr, quê hõ nõ impeaj to hỹrmã mõ.
Mã Xawrô Xamer cahê na hàpàn, jirô pê mã ri ma Xamer hũrkwa wỳr Xawrô to mõ, cute curi cahê na hõt prãmte. Ne caxwa ri jỹ ne ajpẽn mã amehcakôc, ne nõ ne me hõt. Mã iràrà na Xamer jỹr ne ma põ mã, krĩ pê, Xawrô to cator, ne cumã:
— Pahpãm te imã acaxuw ampo jarẽn xà ata ri, ite amã harẽn xà — hane. Ne cute ampo cacô impêti, incoti ita caxàr ne ihkrã kam haxwỳr, ne to impê, ne me ajpẽn pỳn, mã cumã:
— Ampo na mã wa apu ato hane? Nee mã ampo na nare. He Pahpãm te ri Ixaher catêjê jõ pahhi na amji mã acapi, ne harkwa kôt wa apu ato hane — hajỹr. Ne ma me ipicapôn.
Mã Pahpãm te Xawrô mã cute amji kam hapac xà intuwti jõr, mã ihtỳj Pahpãm kampa. Mã jũ mã ahna amcro te, mã cute pahhi na amji ton, ne caku jàhtôa kam ajco Ixaher catêjê to ihhimpej to ipa. Ne caku jàhtôa kam, cute me curê xwỳn pê mehkwỳ jũtàr. Ne pê cute amji to cati prãmte, tàkamrỳ amji pê Pahpãm to hapac kêt to mõ.
15Pê Pahpãm Xawrô jaxà kam pahhi na Tawi capi
Pê ajkĩ Xawrô nee Pahpãm jarkwa kôt ipa nare, ne amjia kôt ipa. Na pê jũ mã ahna caku jirô pê mã, Pahpãm te Xamer mã amji jarẽn to:
— Wa ite Xawrô to pahhi ita jũ na ri ipeacre. Ampo na? Nee ipar nare — hajỹr. Mã Xamer mã amji kĩn nare, mã cute Pahpãm mã Xawrô cajrẽan to apẽ. Mã Pahpãm cumã:
— Wa ramã ite pahhi tête Xawrô camẽn ita kam, Xamer, jũ caxuw ca ha hũ na apec jicu? Ca ha ma ampo cacô incoti ata nõ py ne to tẽ, Pãw jõ krĩ wỳr. Ne to acato, ne curi me hũmre nõ japrỳ te Jexê ita na ahcukij, nãmri ramã ite pahhi na amji mã mehkra nõ ata capi, quê ha jũ caxuw Xawrô tyc xà jirô pê ihtỳj haxà kam axà, ne amji to pahhi — hajỹr. Mã cute impar ne ampo cacô incoti ita pyr, ne ma Pãw jõ krĩ wỳr to tẽ ne to cator.
Mã curi pahhi catêjê te ihcajpar prãmte hỹrmã me pra, ne mehcukij to:
— Hàpà ijõ pahhi! Ampo wỳr mã ca mõ? — hajỹr. Mã Xamer me cumã:
— Hamreare, ite cama Pahpãm mã ampo jõr xà jõ amji kĩn wỳr wamõ. Ne ate Pahpãm to amji kam gapac prãmte, ca ate to amji kam gapac xà itajê cunea to amji mã ahcuprõ ne to amji cũmpej, ne ajpên ikôt amji kĩn wỳr me mõ — hane. Ne ma cute Jexê jũrkwa na hàhcukjêr, mã cute me cumã harẽn.
Mã ma hỹrmã mõ ne hàr, ne cute mehkra to cuprõn na mẽn, quê me to cuprõ, ne amehcũmpej. Mã Jexê te mehkra to cuprõn, mã Xamer te mam kà ita pupun, ne amji mã:
— Pom ita mõrmõ Pahpãm te amji mã capi — hajỹr.
Mã Pahpãm cumã:
— Hamreare, nee ipê me axũmre pyràc nare. Wa nee mehkucpupun xà kôt, jũm te amji kam hapac xà na hahkre pej nare. Ne me hũmre ri mehkuc pupun xà kôt, hãn ne cute amji kam hapac xà na me hahkre pej. Ne pa wa quêt me caxwãm pê, cute me amji kam me hapac xà kôt, me hahkre pej — hane.
Jirô pê mã ri hipêr Jexê te mehkra kwỳ pyxwỳr, Xamer kuc ri, mã ame ipa. Mã Pahpãm Xamer mã:
— Por wa ite amji mã capi ata, nee ita ri apu mõr nare — hane.
Mã Xamer te Jexê mã harkwa to:
— Xà ajkĩ me akra itajê pit? Nãmri Pahpãm te nee amji mã itajê nõ capi nare. Xànee cormã jũm apu mõr nare? — hajỹr.
Mã Jexê cumã:
— Cormã intuwre japrỳ te Tawi ita pit apu mõ. Ne nee ita ri apu mõr nare, ma põ pê apu carà cahàcre jamãr to mõ — hane.
Mã Xamer cumã:
— Hỹrmã garkwa kujate quê me haprô, ne me to cato. Cu ha nee cormã ne me pajàpàn nare. Quê ha xa cato, cu ha cormã me apà — hane.
Mã Jexê te Tawi japrôr na harkwa. Ne pê ampeaj kam Tawi ata impej. Mã cute me haprôr ne me to cator, mã Pahpãm te Xamer mã harkwa to:
— Ita wa quêt ite amji mã capi he. Ne ihkrãa kam ca ha ampo cacô impêti, incoti ata jaxwỳ, cupê pahhi xà caxuw — hajỹr.
Mã cormã Tawi apu mehkjêjê cote na mõar kam, mã Xamer te ihkrã kam ampo cacô impêti ata jaxwỳr. Me ajkaam mã Pahpãm Carõ Pejti te cupê pahhi xà caxuw cumã cute amji jahkre pej catia ne hõr, ajpên amcro te amji to hapu na kjê atajê caxuw.
17Pê Tawi Piritew catêjê jàprê xakat cura
Ne pê Piritew catêjê ajco hõ krãhtare to cuprõ, cute Ixaher catêjê wỳr me mõr, ne me ipijapu prãmte. Pê Ixaher catêjê me Piritew catêjê ajco ajpẽn wỳr me ipa, ne ajpẽn jĩkjê na caprũam wỳr me ahtwỳ.
Ne pê Piritew catêjê jõ krãhtare jõ pahhi nõ ita ihkàa to ihkà. Ne ihkà ita pê, ihhêj rũm me ipijakrut te amji jikre kam mehcuhhê kà. Ne ampeaj kam ihtỳj ne hàprê, ne haprỳ pê Gorijti. Ne ajco amcro cunea kam mehkwỳ pê hapôj, ne ajco Pahpãm me Ixaher catêjê jõ krãhtare na, hàprãr xàa to me cumã akij, ne me cumã:
— Wa ha itỳj Piritew catêjê kôt ajpu, ne me ca, ca ha amji mã me jũm xũmre japê, ne me capi, quê me akôt ajpu. Ne quê ha jũm icuran na, wa ha me icunea pê cama me amã me ijàpên catêjê. Nãmri wa ha ite jũm curan na, ca ha me acunea pê cama me imã me gàpên catêjê. Ampeaj kam wa me amã, ca ha me jũm xũmre ata mã me acato, wa ha itỳj cume ajpu — hane.
Pê nee jũm Gorijti catihti ata me ipijapu na amji ton nare. Na pê amcro cunea kam ajco me ahna hàprãr to ipa.
Mã amcro nõ na Tawi curi cator, ne cute hàprãr xà ita na impar. Ne pê Tawi cormã intuwre cakrô, amji mã harkwa to:
— Wa ha itỳj cume ajpu. Wa hãn ne apu inxũ jõ carà cahàcre hôhti jamãr to ipa. Mã hãn ne rop jõkre hôhti me rop tycti, ihkur prãmte hỹrmã hapôj, wa itỳj ihcura. Na wa ha itỳj Piritew catêjê jàprê xakat ata to hanea. Ampo na? Cute Pahpãm tĩar cuna mã ihcakôc kêanre. Ne Pahpãm ihtỳj hãn ne ropti atajê pê ipytà, na quê ha hanea ne ihtỳj Piritew catêjê nõ ita pê ipytà — hane.
Mã pahhi Xawrô te ita kam hapac, ne cama apu ajpẽn na Tawi me Gorijti jamã.
Mã Tawi tẽ ne caprũm kam cute kẽn crecrerti to xĩc ne incwỳr, ne hõ kẽn cjên xà kam incjên. Ne cute hõ kôtàre pyr, ne hanea ne hũhkra na hũcapêr xà pyr, ne ma cuna mã to tẽ, ne Gorijti me cute ajpẽn cajpar.
Mã Gorijti te incryac kam cumã caràr, ne cumã:
— Xà ipê rop mã ca ajpên pĩ ita to pit mã iwỳr tẽ, pahte to papijapu xà ita caxuw? Jũ wỳr quê ha côjkwa kam Apãm Cati ita atehcajpa, ne ipãm cati quê ha itehcajpa, wa ha apu ato kêanre ne — hajỹr.
Mã Tawi te cumã caràr ne cumã harkwa to:
— Ca ajpên gõ xwapo xwahhihti me gõ kruwxwa to tẽ, ne pa, wa quêt ijõ Pahhiti carôt tỳjti pê Ixaher catêjê jõ krãhtare jõ Pahhiti jarkwa kôt awỳr tẽ. Ne itakam quê ha ijõ Pahhiti ijũhkra mã gaxà. Wa ha acura, ne ihkôt akrã jakep, quê ha ampo kên te mehtyc kur xà atajê gĩ me, gõ krãhtare itajê jĩ pin partu. Quê ha krĩ cunea kôt mehcunea me ijõ Pahhiti te Ixaher jõ pjê kam me cahê na ipa na me hahkre pej — hajỹr.
Mã ahna Gorijti jàhtêp. Mã hỹrmã Tawi picahur ne cute hõ kẽn cjên xà pĩn, kẽn nõ pyxit ne caxàr, ne hũhkra na hũcapêr xà ata kam hir, ne kam to hũcapêr. Mã kẽn ita te Gorijti kuc tỳj mã hàr, mã pjê kam ihkuc to ihpỳm. Mã Tawi te cupê hõ xwapo xwahhihti ata caxàr, ne toa inxec, ne to ihkrã jakep.
Mã Piritew catêjê te me hàprê xakat tyc na me hõmpun, ne ma ame prõt. Mã Ixaher jõ krãhtare te me cumã me caràr, ne ma mehkôt me pra. Ne pry kôt cute me cahuc. Ne ihtỳj ajpẽn pê mehcuran to me mõ, ne me haxôp to me mõ, ne cute me hõkrĩa mã me haxàr. Mã hamre, pry kôt mehtyc me, me haxôp catêjê te ame hikwaati.
Pê Tawi Xawrô mã me hàprê catêjê kam jũ mã amji to putwrỳ to, ne ajco me curê xwỳn catêjê jàhtôa ne me hipej.
18Tawi me Jônata
Ne pê Jônata pê pahhi pê Xawrô kra xũmre, ne Tawi me ajpẽn cajpa ne me ajpẽn pupu, ne me cumã ajpẽn kĩn hyre nare. Mã Xawrô te Pahpãm te Tawi to ipa, mã mehcunea mã ihkĩn na, hahkre pej. Cwỳrjapê ri hũ na apu amji to prãm, ne apu Tawi kam incryac to incryc, ne amcro cunea kam, kam incryc ita cumã ajcamẽ. Mã tee apu ihcuran to hahkre.
Mã Tawi te cupê amji pytàr, ne ma tẽ. Ne cute Jônata me ajpẽn cajpar, mã cute ihcukij ne cumã:
— Ampo to mã ite jũ na, mã apãm apu icuran prãm? — hajỹr.
Mã Jônata cumã:
— Hamreare, nee apu acuran prãm nare — hane.
Mã Tawi cumã:
— Quê! Ihtỳj icuran prãm! Ca ha hanea ne hõmpu he. Apẽ quê ha putwrỳ intuw jõ amji kĩn. Wa ijõtpê gũrkwa ri apà, ne apẽ wa ha ma põ mã icato, ne jũ ri amxu. Quê ha apãm ina acukij, ca ha cumã itẽm caprỳ na, ito ahêj ne cumã, wa ma inxũ jũrkwa ri amji kĩn wỳr, Pãw jõ krĩ kam itẽm na, ijarẽ. Quê ha cute ita na amji caxàr na, cu ha ramã ihcunea impeaj na hahkre pej. Nãmri quê ha cute ita na ikam incryc na, cu ha ramã cute icuran prãm na hahkre pej — hane.
Mã Jônata cumã:
— Imã inxũ tyc jakàn pê Pahpãm te ato pahhi na gahkre pej. Ne ipê pahhi kra cakrô, wa ha nee ipê pahhi nare. Na wa ha ampeaj kam amã amji to, wa ha inxũ mã icakôc, quê ha cute apu akam incryc ne apu acuran prãm na, wa ha ma tẽ ne amã awjarẽ, ca ha hahkre pej, ne atỳj cupê amji pytà. Ne quê ha Pahpãm akôt ipa to hanea, pom quê pê ajco inxũ kôt ipa he. Ne ca, ca ha cormã itĩar kam ito impeaj ne, ne ityc jirô pê, ca ha hanea ne me ikra to impeaj ne, Pahpãm te amji mã ato ihhimpej xàa kôt — hane. Mã Jônata me Tawi te ajpẽn par pejti to hajỹr.
Mã ma Tawi tẽ ne põ kam ipimxur. Mã amji kĩn kam hàhhuc, mã Xawrô pê pahhi ata hỹr xà ata kam hỹr, ikre kat na pire mã. Mã hanea ne Jônata hũm cuna mã hỹr, mã Tawi jỹr xà kam caprỳ. Ne hipêr amcro nõ na, cormã hỹr xà kam caprỳ ita na. Mã Xawrô te Jônata cukij ne cumã:
— Ampo na mã nee ihnõ kam ajpên Tawi mõr ne cute ampo krẽr nare, ne ita kam ajte cute hajỹar? — hajỹr.
Mã Jônata cumã:
— Tawi te iwỳr, wa ite to tojnõ mã ma Pãw jõ krĩ wỳr tẽ, me hũmjê wỳr. Curia quê ha apu amji kĩn ita to amji japackre — hane.
Mã Xawrô apu incryac to incryc ne caràar kam cute Jônata mã harkwa to:
— Quê ha ihtĩar na ipa, ca ha nee jũ caxuw apê pahhi nare, ityc xà xwỳjrea na. Tẽ ne haprô, wa ha ihcura — hajỹr.
Mã Jônata te hũm jahkre pej, cute Tawi curan prãm na, ne ma me hàpàn xà pê incryac kam hãm ne tẽ. Ne nee hàpàn nare amcro ata kam. Ne amcro nõ na Jônata ma põ mã tẽ, ne cute Tawi me ajpẽn cajpar. Ne cute me ajpẽn cajpar xà ata kam me ajwar me cumã amji kĩn nare, mã cama ame amrã. Mã Jônata te Tawi mã harkwa to:
— Cu ramã pahte ajpẽn par to impejti, na ca ha gapacta ne apej pêa mã tẽ — hajỹr. Ne ma Jônata hacpỹ mã krĩ mã cute amji jaxàr. Mã ma Tawi xwỳjê tẽ.
24Pê Tawi mã Xawrô caprĩ
Mã pahhi Xawrô ma Piritew catêjê me ipijapu to mõ, ne cute amji jaxàr. Mã cute me cumã Tawi te Engeti jõ põ kam apu ipa na harẽn. Mã Xawrô te krãhtare impej to pit mã mir crê ne capi, ne ma hàhkà jakôtti nõ ita wỳr me to mõ, ne ame Tawi japê. Ne pea kẽn kre nõ ita mã me cator, mã kẽn kre ita mã Xawrô ihkwỳr prãmte hàr. Mã Tawi curia hanea ne hõ krãhtare te xêjxẽnta atajê to cute ipimxur ne to jỹ, mã nee Xawrô te me hõmpun nare.
Mã Tawi cahê na ame ipa atajê cama ame Tawi mã incryc to hahkre, ne me cumã harkwa to:
— Ita kam Pahpãm te amã acurê xwỳn ata jõr he, ca ha caa, ate jũ na ton xà nõ ata na to — hajỹr. Mã Tawi te amji mã ihprĩ, ne aracri Xawrô pê ihkà japjêhti ata kwỳ jakep, ne nee cute ihcuran nare. Mã Xawrô kẽn kre pê cator, ne ramã hũwryre.
Mã ihkôt Tawi cator, ne cute cumã caràr to:
— Hàpà, ijõ pahhi! — hajỹr.
Mã hỹrmã Xawrô pipkjêr ne cute Tawi pupun, mã cuna mã ihkuc to pjê kam ihpỳm, cute amji mã hũpahti to prãm to. Ne cute cumã caràr to:
— Ampo na mã ca apu ite acuran na, cute me amã ito ihhêj catêjê kampa? Ita kam ate atoa to amehhêj xi xà ita na me hõmpun he. Pahpãm te kẽn kre ita kam ijũhkra mã gaxàr. Mã me ikwỳ acuran na me imã awjahkre, wa nee ite ita ton nare.
— Pê Pahpãm amji mã pahhi na acapi, na wa nee ite acuran nare. Ne ijũhkra kam ca rĩt ne kam akà ita kwỳ pupu he. Ite cama apê ihkwỳ jakep, ne nee ite to gaxôp nare. Quê ha Pahpãm ajpẽn na pahpupu, cu ha pahnõ te ajpẽn to kên na, quê ha Pahpãm apu pahnõ to kên — hajỹr.
Mã Xawrô te cumã harkwa to:
— Xà Tawi ca mã ca? — hajỹr. Ne cama ihpahàmte apu amrã, ne hipêr cumã:
— Ijirôa pê apê me hũmre impejti nõ. Ampo na? Wa ite, ate ito impejti na, gahkre pej. Na ca ha atỳj jũ caxuw apê Ixaher catêjê jõ pahhi — hane. Ne ma Xawrô te amji jaxàr ikre wỳr. Mã ma põ kam, kẽn kre wỳr Tawi te amji jaxàr.
30Pê Tawi Amarec catêjê me ajpu
Mã amcro nõ na Tawi apu hõ krĩ nõ japrỳ te Xicrac kaj na ampỳa mã me hũmre cunea pê me hõ krãhtare catêjê me ame ipa. Mã krĩ kam me cahãj me ahkrare pit jàhhuc. Mã hamre, Amarec catêjê me hỹrmã cator ne cute me hõ krĩ ata to kêanre. Ne cute me hõ krĩ pôc ne cute me cahãj me ahkrare cunea pro. Ne nee cute me jũm curan nare. Ne cama cute me ihcajpre par ne ma me hõ pjê wỳr me to mõ.
Mã hamre, mã Tawi te amji jaxàr, me hũmre pê me hõ krãhtare catêjê me, cute me amji jaxàr ne me cator. Mã krãa, me hõ krĩ pôc, mã cute me hõmpun. Ne mehcunea te amji mã me ipikrar ne amji mã:
— Pỳhàpà, mã ajte krãa me pajõ krĩ ita pôc. Ne me pajõ cahãj? Ne me pahkrare? Jũ kam ame pra? Jũm te mã jũ kam me to cutor? — hajỹr.
Mã hamre, Tawi me hũmre jàhtôti to me cator atajê cunea te mencwỳr kam mehtẽm ne me amrãa to amrã. Ne cute mencwỳr ita to apu me amji pec tu. Mã Tawi te ita caxuw amji kam hapac xà nõ pytĩti ita cajpẽr. Ampo na? Nee mã ampo na nare. Mã me hõ krãhtare pê me ahkrare pictor. Ne ita cwỳrjapê ri me hàprê mã me hàr ne ame kẽn to ame Tawi curan prãm. Mã Pahpãm te ri Tawi mã carôt tỳjti ata jõr. Mã Tawi te Pahhiti pê Pahpãm ata cukij:
— Xà wa ha pijamã Amarec catêjê kôt mõ? Xà wa ha pijamã mehpro? — hane. Mã Pahpãm cumã:
— Mehkôt mõ! Mehkôt mõ! Ca ha atỳj mehpro ne me cumã ihpa cajpre atajê cunea pre pôn partu ne — hajỹr.
Mã Amarec catêjê ihtỳj ame ipa jahpà, me hõ krĩ kôt. Ne me hàpàn xà impejti atajê cunea to ame amji mã amji kĩnti cunea ton to me ipa, me hàprê xà jõ amji kĩn xà caxuw. Ne hanea ne ihtỳj ame ihkõm xà pihhoti to ame ihkõm to me ipa.
Mã amcro nõ na iràrà na pyt krã cator pê mã, mã Tawi me, me hõ krãhtare me, cute me Amarec catêjê curan na me mẽn. Mã hamre, Tawi te ipijapu tỳaj to pyt tu, me hõ krãhtare cunea me. Ne cute me Amarec catêjê jipej tu. Mã mentuw te cwatxẽnta peaj ne me hàhhuc ne cute me cawrô kô jarôti pê camer atajê pro ne kam ame ihkrĩ ne maa ame to pra, jũa kam. Mã hamre, Tawi te me cahãj atajê cunea pytàr, ahkrare mea mã.
31Tawi pê Pahhi tuw
Mã caku nõ na Piritew catêjê hipêr apu Ixaher catêjê kam mehtẽm, ne mehcuran to mõ. Mã Ixaher catêjê jõ krãhtare kwỳ ma me pra, mã Gipôw jõ kẽnti na, cute hipêr mehkwỳ curan. Ne Piritew catêjê te hanea ne pahhi pê Xawrô me, mehkra mea mã mehkrã, ne cute me hipej prãmte me kam mehtẽm. Ne cute me Jônata me, mehkjêjê curan ne me Xawrô caxwỳr ne me haxôp, ne ma me pra, ne ihtỳj ihtyc na amji mã me to hane. Mã ihtĩar cormã nõ, ne cutea hõ xwapo xwahhihti to amji curan ne ihtyc.
Jirô pê mã ri ma Tawi wỳr, Ixaher catêjê jakrã jõ pahhi catêjê cunea me pra, Heprõm jõ krĩ kam, ne cute me cumã amji jarẽn to:
— Ipê me akwỳa wa me, pê Pahpãm ramã apê pahhi na ato ihcakôc. Na ca ha apê me ijõ pahhi, ne ma me ijamãr catê na amji to — hajỹr. Mã Tawi te Pahpãm kam mare mã, mehkwỳ mã amji to ihhimpej to intuw, mã cute me to Ixaher catêjê jõ pahhi. Pê Tawi me to ihhimpej ita to caku to cwarẽnta.