Mam Pahhi Catêjê Jõ Kàhhôc
3XARÔMÃW
Pê Pahhi Cati
Ỹhỹ, ihkàhhôc pijakrut itajê ri me pamã me cupê Ixaher catêjê jõ pahhi catêjê to awjarẽ, na ri ihkàhhôc itajê japrỳ te Mam Pahhi Catêjê Jõ Kàhhôc (1 Pahhi Catêjê) me Hapu na Pahhi Catêjê Jõ Kàhhôc (2 Pahhi Catêjê). Ne ihkàhhôc itajê kam pê Tawi xwỳ kra pê Xarômãw to me pamã awjarẽ.
Ne hanea ne ihkàhhôc pijakrut itajê nõa te mam pahhi catêjê na ihkàhhôc atajê jũjarẽn xà jatujre hanea ne harẽn. Cwỳrjapê ri ihkàhhôc itajê japrỳ te Mam Me Hũjarẽn Xà Jõ Kàhhôc (1 Me Hũjarẽn Xà) me Hapu na me Hũjarẽn Xà Jõ Kàhhôc (2 Me Hũjarẽn Xà).
Pê Xarômãw pê pahhi tuw ne cumã amji jahkre pej
Pê Tawi mã ihkra xũmre nõ ata japrỳ Xarômãw, ne hũm tyc jakàn pê haxà kam amji to pahhi. Mã Pahpãm te caxwa ri Xarômãw pimtir kam cumã amji to ipipẽ, ne cumã amji jarẽn, quê rỳ mã ampo na cuwỳ, quê ha ihtỳj cumã ampo gõ.
Mã Xarômãw cumã:
— Pê ca ampeaj kam inxũ Tawi caxuw apej.
Ne ampo na mã, pê ca caxuw apej?
He pê ampeaj kam akampa na pê,
ne ampeaj kam cumã gahkre pej.
Cwỳrjapê pê ca amji mã to me akwỳ jõ pahhi.
Ne ipê ihhêj rũm cormã me hõkre nõre pyràac,
ne cormã ipê ijũpar hamreare.
Ne ipê ate amji mã me capi itajê to ihimpej jahkre kêatre.
Pom me akwỳ jàhtôti itajê caxuw
imã ite amji jahkre pejti gõ.
Mãr wa mehkên na me hahkre pej,
ne ahna mehcukij,
ne mempejti na me hahkre pej,
ne ahna mehcukij,
ne ajpẽn pê me to caprã,
ne catyt kam ajpẽn kam me to ihimpej to ipa,
ne ma ajpẽn na me hamã — hane.
Mã Pahpãm mã cute amji jarẽn xà ita na cumã ihkĩn, mã cumã:
— Wa ha amã ate amji jahkre pejti gõ,
nãmri atea amji mã,
ate amji jahkre pej pê ampo pejti ita capi,
ne ahna gàhwỳr.
Na wa ha mehcunea jirôa pê
amã ate amji jahkre pej gõ.
Ne hanea ne ate ampo na iwỳr nare ata,
wa ha itỳj amã cugõ.
Ne itỳj amã gakràj catia ne cugõ,
quê ha mehcunea ihtỳj amji mã me acupa — hajỹr.
Ne cute Xarômãw mã ihkrã kre te amji jahkre pej catia ne hõr. Mã cute amji jahkre pejti.
Pê Xarômãw ajkam me cahãj pijakrut cukij
Mã amcro nõ na me cahãj pijapit xyre atajê pijakrut ne pahhi Xarômãw wỳr me cator, cute mehcukij prãmte. Mã pyxit ita te cumã harkwa to:
— Ỹhỹ pahhiti, wa ikre pyxit peaj kam ajwar me ikrĩ, mã ajwar me imã me ikra pỳm. Mã caxwa ri cupê ihkra tyc, mã to hãm ne cute ipa kam hir, ne ma ipê ikra impỳn. Wa ipimprar ne tee apu to pijahôr to hahkre, mã ramã xãmte ihtyctu. Ne ahna apẽ, wa ite hõmpun, mã nee cupê ikra nare, ne ihkra ri — hajỹr.
Mã ihnõ ata cumã:
— Quê, ihkraa ri cupê ihtyc, ne ihtĩr ita ri, ikra — hane.
Ne cormã me ajpẽn mãn kwỳa kam mã pahhi te harkwa to:
— Ajpên me imã wapo xwahhihti nõ to tẽ — hajỹr. Mã cumã hàpên catê nõ te cumã wapo xwahhihti pyr ne to tẽ.
Mã pahhi te cumã harkwa to:
— Hã, awryc mã me cumã to ahkrare nõ ita tĩar jipô, ne ita mã hĩkjê gõ, ne ita mã hĩkjê gõ — hajỹr.
Mã ramã cute me to hipôn xàa kam, mã quêt inxi te harkwa to:
— Ame to hajỹr nare! Gapacta ne me cumã ihtĩar na agõ, nee ca mehcuran nare! — hajỹr. Ne ampo na mã cute harkwa ita to hajỹr? Ampeaj kam cumã ihkra japê na ri.
Mã ihnõ ita te harkwa to:
— Nee to hõ tekjê nare, wa pa xwỳjê nee to itekjê nare ita kam, gapacta ne me to hipô — hajỹr.
Mã pahhi te cumã hàpên catê mã:
— Hã, nee to hipôn nare! Por pyjê nõ ihkra tĩar na ahwỳ ata mã ca me agõ, nãmri cupêa ri ahkrare nõ ita nã — hajỹr.
Mã caxuaw Ixaher catêjê kam Xarômãw krã kreti na harẽn cahkũm pyrentu, mã mehcunea amji mã me hõ pahhi ata cupa. Ne pê Xarômãw ajco Pahpãm te cumã amji jahkre pej jõr xà ata kôt mehkwỳ cukij, ne mehkên me, mempej to ajcokjê, ne ma ajpẽn na me hamã. Pê hanea ne ihkrã kreti kôt mehkwỳ japackre, ne ajco ihkàhhôc kam me hapackre xà atajê hôc.
5Pê Xarômãw cute Pahpãm to amji kam me hapac xà jũrkwa xãm
Ne pê caku atajêa kam Xarômãw Pahpãm mã kẽn te ikre pejti xãm, mãr quê kam Pahpãm to me amji kampa. Ne Xarômãw te ikre peaj ton na harkwa, ne me to hàpên catêjê mã:
— Ca ha me cumã pĩ tỳj pit pyxwỳr to mõ, ne kẽn jakati tỳjti impejti ata to pit mã me hahêr to mõ. Ne wakỳre pràti pê ôr ata to me catia ne me to ikre ita xãm. Ne imã me hũrkwa cunea jirôa pê ikre ita peaj na to prãm. Ampo na? Imã Pahpãm kĩan to ihkĩn, na wa ha to hane — hajỹr.
Ne pê cute Pahpãm to amji kam me hapac xà jũrkwa ata na caku xet pê cormã amji jipêj. Ne pê wakỳre prà tepti pê ôr to pit mã ikre kam me ampo atajê cunea jipêj.
Mã Pahpãm te Xarômãw wỳr harkwa kujahêc ne cumã:
“Ca ha ampeaj kam ate ikam gapac,
ne catyt kam ijarkwa kôt apa na,
wa ha itỳj, pom pê wa apãm xwỳ pê Tawi mã ijarkwa to icakôc ita to,
wa ha amã icakôc,
ne Ixaher catêjê cahê na ikrĩ,
ne jũ caxuw me cupê icator nare” hajỹr.
8Pahpãm jàmcjên xà to ipintuw xà
Pê pĩ po te Pahpãm jàmcjên xà ata ampo kà te Pahpãm jũrkwa ata kam ahtwỳ. Mã Xarômãw ma Pahpãm to amji kam hapac xà jũrkwa mã to hàr prãm, por cute kẽn me ôr to ikre tuw xãm ata wỳr. Ne cute Ixaher catêjê pê prohti kam me cupê pahhi catêjê to cuprõn, cute me ajpẽn par, ne me Pahpãm jàmcjên xà ata to me ipintuw prãmte. Mã mehcunea Xarômãw te kẽn te Pahpãm mã hõ pyxwỳr xà ata cuna mã me xa ne me hõmpu.
Mã cute côjkwa mã hũhkra pẽr, ne Pahpãm mã ihcakôc, ne cumã:
— Hàpà, me ijõ Inxũ Cati,
apê Ixaher catêjê cunea Pãm Cati,
ne nee pjê me côjkwa caxuw jũm hamreare,
ne apyxit peaj ca ampo cunea to ahimpej.
Ne amã me ikĩnti.
Ne ca ha me akwỳ mã ampo na amji to, ne atỳj to.
Ne por me hĩ cunea to ame akĩn atajê mã,
ca ha ita kam,
pom pê ca inxũ Tawi xwỳ mã ampo na amji to awjahkre ata,
ca ha atỳj imã to.
— Ỹhỹ, Ixaher catêjê Pãm Cati,
ca ha ita kam,
pom pê ca inxũ Tawi xwỳ pê amã hàpên catê mã ampo na amji to awjahkre ata,
ca ha atỳj imã to.
Quê ha Tawi kra nõ te gõ prya kôt ipa,
ne cute amã ampo na prãm atajê pit ton to ipa na,
quê ha ihtỳj cupê pahhi.
— Ne ampeaj kam acati,
na quê nee côjkwa ita acahuc nare,
ne quê ha nee hanea ne ikre ita acahuc nare cakrô,
ca atỳj gõtpê me ipupu.
Ne wa ijõ Pahhiti, amã icakôc,
ca atỳj ikampa,
ne caxwa me amcro kam ma gũrkwa ita pupu.
Ampo na? He ca ramã ate atỳj ita ri apu apa na amji ton.
— Ipê amã ijàpên catê,
wa ita ri hãn ne amã icakôc,
ca atỳj hãn ne ikampa.
Ne quê hãn ne Ixaher catêjê pê me akwỳ ita ri,
gũrkwa ita kam, me amã ihcakôc,
ca atỳj côjkwa rũm me kampa.
Ne atỳj cute mehkên ton atajê to impej,
ne to tojnõ ne hicu hiahpuro — hajỹr.
11Pê Xarômãw pahpãm cahàc kĩn ita to apu amji to kên
1 Pahhi Catêjê 11.1-13; 12.17-20
Ne pê Xarômãw ramã hĩ tỳj tu ne hakràj cati, ne ajte amji pê Pahpãm to hapac kêt to mõ. Ne pê hũm Tawi xwỳ Pahpãm par pejti ata kaj na apu to.
Pê Xarômãw pjê jàhtôa jõ cuprỳ me hikwa. Ne pê pyjê jàhtôa atajê, nee ampeaj kam Pahpãm tĩar kôt ame ipa nare, ne pahpãm cahàc krekà kôt pit mã ame ipa. Pê Pahpãm ramã mam Ixaher catêjê mã harkwa ta, mãr quê nee pyjê cahkrit pê Ixaher catêjê nare atajê me, ame hikwa nare. Nãmri quê ha me cupê Pahpãm na mehkwỳ nare atajê me ame hikwa na, quê ha cama mehprõ itajê pahpãm cahàc krekà wỳr mempjê to apkjê, cupate pê Pahpãm ramã me cumã harkwa ta, quê me cupê Pahpãm na mehkwỳ cahãj pit me, ame hikwa.
Pê Xarômãw ajte, cute mam me amji kam hapac xà kôt, ihprõ to hàhtôa to hàhtô, ne hanea ne pyjê kwỳ jàhtôa ne to ihpahàm nõ, pê hũrkwa kam mehkrĩ. Ne mehprõ atajê pê amji kôat me Xarômãw to me Pahpãm curê xwỳn, ne pea ihwej. Mã mehprõ itajê te amji kôat Pahpãm cuna mã Xarômãw te pahpãm cahàc krekà kĩn na me ton, pê hũm Tawi xwỳ Pahpãm te amji kam hapac xà pejti ata kaj na.
Pê Xarômãw prõ itajê mã kẽn te me hõ pahpãm cahàc krekà itajê mã ahpỹanre na hũrkwa pyxwỳr pa, cute kam amehkĩn prãmte. Ne me hõ pahpãm cahàc krekà atajê te amji kam me hapac xà kêanre, ne me haprỳ te, Axarot me, Camot me Moroc. Ne pê ajco cute amji to me pahpãm cahàc kêanre krekà itajê cajpuaw prãmte, ihtỳj me ahkrare to me capa, mehtĩr kwỳa kam.
Mã Pahpãm apu Xarômãw kam incryac to incryc. Ampo na? Nee hipêr apu Ixaher catêjê Pãm Cati pê Pahpãm jarkwa kôt ipa nare, ne mehprõ atajêa kôt apu ipa na ri. Cwỳrjapê ri Pahpãm te cumã harkwa to:
“Ca nee ite amã amji ton xà na,
pahte ajpẽn par xà ata to amji japackre nare,
ne nee ite ampo na amã ijarkwa ata par nare.
Cwỳrjapê wa ha nee amã akra to, me akwỳ mã pjê cunea jõ pahhi nare.
Quê ha me akwỳ kwỳa ajpẽn cuna mã mehcuhhê,
ne me ajpu, ne ihtỳj amji to me ajcokjê.
Na wa ha me amã pjê jipô,
mãr quê akra pê pjê jĩkjê jõ pahhi,
ne hĩkjê jõ pahhi ata
quê ha ajteare mã jũm to ihhimpej” hajỹr.
Xarômãw xwỳ himpej xà picapôn xà
Ne pahhi Xarômãw tyc jirô pê mã ri Canãn jõ pjê to ihhimpej xà ata picapôn, ne kỳj rũm hĩkjê ata japrỳ pê Ixaher, ne harã mã hĩkjê ata japrỳ te Juta. Ne Juta jõ pjê jõ pahhi ata pê ri Xarômãw kra, ne Ixaher jõ pjê jõ pahhi ata pê ri ajtea mã jũm ita.
16ERIJ ME ERIXÊW Pê
Pahpãm Jarkwa To Me Cumã
MEHCAKÔC CATÊJÊ
Ỹhỹ, pê Xarômãw tyc jakàn pê ri, pê Ixaher catêjê jakrã te tôxi itajê amji to me ajcapô. Na pê me hakrã te tej itajê amji to me kỳj catêjê, ne kỳj rũm, Krĩrĩtpej jõ pjê kam me Hĩpôjajo jõ pjê kam me ahtwỳ ne amehkrĩ. Ne cute cormã amji mã me haprỳ to Ixaher catêjê.
Ne me hakrã pijakrut itajê te ri amji to me harã catêjê, ne harã mã Juta jõ pjê kam amehkrĩ, ne cute amji mã me haprỳ to Juta catêjê. Ne hõtpê me hakrã te tej atajê pĩn Ixaher catêjê jàhtôa ne ma Juta jõ pjê wỳr me ipintuw, ne curi me cahê na me xa.
Pê Juta catêjê atajê me cupê Tawi tàmxwỳ catêjê to pit mã amji mã me hõ pahhi. Mã mehkĩnte kỳj catêjê pê Ixaher catêjê atajê ri amjia kôt, amji pê me hõ pahhi jũrê, ne ihtỳj pahhi na mehkwỳ pyxwỳ.
Ne me ahna ahtũm nare mã kỳj catêjê pê Ixaher catêjê atajê ma ame Pahpãm caca, ne ihtỳj me to hapac kêt to me mõ. Cwỳrjapê ri Pahpãm te me hỹrmã me cumã harkwa to mehcakôc catêjê kujahêc, atajê japrỳ te Erij me, Erixêw. Mã cute me cumã, cute mehkên ton jahpan xà na mehkên mã me hàr to me cumã hũjarẽn. Ne Pahpãm jarkwa kôt me hỹrmã me cator, ne Pahpãm te to ihkujahêc na me hahkre pej xà caxuw, ihtỳj me cumã Pahpãm carôat kôt ampo na amji to me ipipẽ to me ipa. Ne ihtỳj me hà caprã ne mehtyc to ihtĩr.
Erij pê Pahpãm jarkwa to ihcakôc catê
1 Pahhi Catêjê 16.29-33; 17.1-24
Ỹhỹ, pê caku jàhtôa jirô pê, kỳj rũm pjê jĩkjê ata pê Ixaher jõ pjê jõ pahhi nõ ita japrỳ pê Acapê, ne pjê to ihhimpej itaa to caku to winti ne ihkôt to ajkrut, ne hũm jirôa pê ihkêanre. Ne Ixaher catêjê kam me cupê pahhi catêjê cunea jirôa pê ihkêanre.
Pê curi Pahpãm jarkwa to me cumã ihcakôc catê nõ ita japrỳ Erij. Ne Pahpãm jarkwa kôt, ma pahhi Acapê wỳr cator, ne cute cumã harkwa to:
— Acapê, Ixaher catêjê Pãm Cati pê ri quêt Pahpãm tĩar, na waipê cumã ijàpên catê, neimã ihkĩn. Wa ite cumã icakôc, ne ihwỳr pejti, mãr quê nee ta nõ to iwrỳc nare, ne nee cũmpêti nõ to iwrỳc nare ita na, ahnaa caku to incrê, ate me akwỳ me, me akên ton xà atajê jahpan xà na. Jirô pê wa ha hipêr ahna ahwỳ, quê ha cormã ta nõ to wrỳ — hajỹr. Ne ma tẽ.
Jirô pê mã ri Pahpãm te Erij mã harkwa to:
— Ca ha acato, ne ma pyt cjêj xà wỳr tẽ, ne curia cô jarare nõ ajpjê ata ri, ca ha amxu, ne toa ikõ. Wa ha awỳr pryjara kujate, quê ha awỳr gõ to pra, ne amã to garte — hajỹr.
Mã Erij te Pahpãm te ampo na mẽn xà ata na ton, ne ma cô jarare na hàhhuc. Mã pryjara hỹrmã kwỳr me hĩ to pra, ne to cumã harte, iràrà me pyt cunea kam, mã cô jarare ata to ikõ. Mã ta nõ wrỳc nare ita kam, cô jarare ata crà. Mã Pahpãm te cumã harkwa to:
— Ca ha ma Xarep jõ krĩ wỳr tẽ, ne curia ahtwỳ. Quê ha jũm cahãj pê impjên tyc mã impijapit ata ato ajpa. Wa ramã cute ato hajỹr xà na, ite cumã ijarkwa hyr — hajỹr.
Mã ma Xarep jõ krĩ wỳr tẽ, ne krĩ jõ harkwa na cator me ajkaam, cute jũm pijapit ata pupun, mã apu pĩ to cuprõn to mõ. Mã cute cumã hàkjêr, ne cô na ihwỳr. Mã ma cô wỳr ihtẽam kam, mã hanea ne cute kwỳr na ihwỳr.
Mã cumã:
— Wa ha ampeaj kam Pahpãm krac ri amã amji jarẽ, ipê ampo xàr hamreare, ne imã kwỳr cuhtom pyxit peaj ne nõ, ne caxuw to impê xà incrire ne xa. Wa caxuw apu pĩ to cuprõn to mõ, wa ha ikra me to amji mã impê, ne mehkrẽr hiahpuro. Quê ha hamre, ampo wa ha hipêr me cukrẽ? Quê ha prãm ajwar me icura — hane.
Mã Erij cumã:
— Nee apu amji na atyc cãmjĩ to hajỹr nare, ne nee apu pa nare. Ne gapacta ne ate harẽn xà ita to. Ne mam ihkwỳ to impê, ne ajpên iwỳr to tẽ. Jirô pê mã ca ha cormã akra me amji mã atekjê to. Ampo na? Por Ixaher catêjê Pãm Cati pê Pahhiti ata te imã ato hũjarẽn to hajỹr he: “Quê ha hõtpê gõ kwỳr xôm cjên xà me, to impê xà cuhhê xà kam, amã ihcuhhê ita na, wa ha ahnaa hipêr me ta nõ to wrỳ” hajỹr. Ita na ri cute imã ato hũjarẽn — hane.
Mã cute Erij par pyrentu, ne ma tẽ ne harkwa kôt ton. Ne ihkra ita me, Erij me, me hàpàn pej ita to cute me putwrỳ jàhtôa. Mã jũ caxuw me cupê me hõ ita jamre nare. Ampo na? Pahpãm jũ mã to, mã hamre to ipa, ne hacpỹa mã hipu to ipa, cute to hũjahkre xà ata na.
Ne amcro nõ na cahãj kra xũmre ita xà ne ihtyc. Mã inxi te Erij mã harkwa to:
— Hàpà, Pahpãm mã hàpên catê ita! Ampo to mã wa ite? Ca me iwỳr mõ, wa ite aracri ikên xà nõ ton, mã ca ate hahpan xà na ipê ikra to hy, mã ipê ihtyc? — hajỹr.
Mã Erij cumã:
— Hã, caxi, imã akra ita gõ, wa ha Pahhiti pê Inxũ Cati mã ihcajrẽn — hane. Ne cute ihkra ita pỳn ne ma kỳj pê, hõt xà ata wỳr to hàpir, ne hikwa xà kam hir.
Ne cute Pahpãm mã hàkjêr ne cumã:
— Hã, ijõ Pahhiti, ampo na mã ate impijapit te imã ijàhhuc xà jõr ne ito ajpa ita pê ihkra ita curan? — hajỹr. Ne cute intuw ita jipy amji capô to incrê, ne ampeaj kam Pahpãm mã ihcajrẽn ne cumã:
— Hã, ijõ Inxũ Cati, ca ha intuw ita to hacpỹa mã ihtĩr — hajỹr. Mã Pahhiti te Erij te ahna hàhwỳr xà ita na impar, ne hacpỹa ne cute intuw ita mã carõ kujahêc, mã hacpỹa mã ihtĩr.
Mã Erij te impỳn, ne ma inxi wỳr to mõ, ne cumã:
— Hõmpu he, hacpỹa mã akra tĩr, ne quê ha ihtỳj amã amji to ajpa — hane.
Mã cute Erij mã harkwa to:
— Ita caxuw wa ampeaj kam apê Pahpãm mã gàpên catê na, ite gahkre pej. Ca atỳj Pahpãm jarkwa to acakôc to apa — hajỹr.
18Pê Erij Ixaher catêjê mã Pahpãm carôt na to ajpẽ
20Pê Pahpãm ta nõ kujahêc nare to caku to incrê, ne ihkôt to hĩkjê. Ampo na? Pê nee me Pahpãm jarkwa par nare, ne pahpãm cahàc krekà kôt pit mã me amji kampa na pê. Jirô pê mã ri Pahpãm te cumã ihcakôc catê pê Erij kujahêc, Acapê pê pjê jõ pahhi ata wỳr, quê cumã awjarẽ, mãr quê Carer jõ kẽnti na mehkwỳ to cuprõn tu ne. Mã ma Erij tẽ, ne cute pahhi pê Acapê mã hũjarẽn.
Mã Acapê te mehkwỳ pê Ixaher catêjê cunea to cuprõn tu, me pahpãm cahàc krekà pê Pahar ata mã me hàpên catêjê me, cute Carer jõ kẽnti na me to cuprõn. 21Mã Erij te me hàhtôti atajê mã harkwa to:
— Jũ mã ca ha amji to me gàhtũm ry to, ne amji mã me ipijakrut itajê nõ te amji kam hapac xà nõ capi, ne mehnõ pyxit peaj kôt me amji kampa? Quê ha Pahpãm pê ijõ Pahhiti pê Pahpãam to Pahpãm na, taa mã ca ha me hũnã! Nãmri quê ha pahpãm cahàc krekà pê Pahar ata pê pahpãm na, taa mã ca ha me hũnã! — hajỹr.
Mã nee jũm te cumã jũ mãn nare.
22Mã hipêr me cumã:
— He wa me acatàtkre na, ipê Pahpãm pê ijõ Pahhiti mã ijàpên catê pyxit peaj ne ijàhhuc. Ne Pahar mã me hàpên catêjê mã ajte me hàhtôa to me hàhtô, ne cute me cwatxẽnta ne ihkôt xĩncwẽnta. 23Hã, ajpên me pryti xũmti to me ajkrut ne me to mõ. Quê Pahar mã me hàpên catêjê amji mã mehnõ capi, ne mehcura, ne me to ihkryj ne to caxàr xà kam pĩ ata jipy me haxwỳ. Ne nee ajco, ihkrac ri pĩ ata kam me cuhôn nare. Wa ha hanea ne ihnõ to hanea ne ihcura, ne to ihkryj, ne Pahpãm mã to caxàr xà kam pĩ ata jipy haxwỳ, ne nee ihkrac ri cuhôn nare. 24Ca ha me gõ pahhiti pê pahpãm cahàc krekà pê Pahar ata na ahwỳ, jirô pê mã, wa ha hanea ne ijõ Pahpãm pê Pahhiti na ahwỳ. Ne por quê ha me Pahpãm nõ me pahkampa, ne cuhy kujate, quê ha pĩ ita na cupỳ ne to capa ata pê, quê ha quêt Pahpãm peaj — hajỹr.
Mã ipu na amehcuhhê itajê cunea te ita na me amji caxàr, ne me cumã:
— Pom ate harẽn xà ita na ihkênre nare — hajỹr.
Pê Pahar mã hàpên catêjê cute cuhy kujahêc na tee Pahar wỳ
25Jirô pê mã ri Erij te Pahar mã me hàpên catêjê mã harkwa to:
— Ampeaj kam me gàhtô, cwỳrjapê ca ha me caa mam me pryti ita nõ capi ne mehcura, ne mam me apãm pê me gõ pahhiti pê Pahar ata mã me acakôc, ne nee me pĩ jakôt ata krac ri me cuhôn nare — hajỹr. 26Mã cute me pryti ata curan, ne ame ton, ne cute me to caxàr xà ata jipy me haxwỳr.
Ne pea iràràtia na, me hõ pahpãm cahàc krekà pê Pahar ata pejti na me harẽn kam mehtẽm, ne tàkamrỳ cute me to pyt jàpir to me mõ, ne me caràr to:
— Hàpà, me ijõ inxũ pê Pahar, me ikampa, pom wa me awỳ ita? Me ijõ pahhiti, me ikampa ne ajpên cuhy kujate! — hane. Mã nee cute me kam hapac nare. Mã cute me pryti to caxàr xà ata pu na me hàkrun kam mehtẽm, me cumã cuhy cator prãmte. 27Ne cute me hàkruan to ramã me pahkrã jimoc kam pyt to me hajỹr to mõ.
Mã Erij te me ahna xwỳ kam ihtẽm, ne me cumã harkwa to:
— Ca cormã kyre pê ame acaràr, me acaràr to mehtỳaj ne — hajỹr. Ne me ahna ahtũm ryre mã hacpỹ ma mã cute me cumãn kam ihtẽm, ne me cumã harkwa to:
— Me gõ pahhiti pê Pahar ita mã me acaràr to ihtỳaj ne, mãr quê me akampa. Mõrmõ cormã apu jũm mã ihcakôc, na ri nee cute me apar nare. Nare, mõrmõ ma ihkwỳr xà wỳr mõ, nare, mõrmõ ma jũ kam ihtẽm xà ata na tẽ, nare, mõrmõ ihtỳj nõ ne gõr, na ca ha ate mehcujrõn xà na me akrãhhia kam me cumã me acaràr! — hajỹr.
28Mã mehkrãhhia kam me cumã me caràr, ne cute amji kam me hapac xàa na, ihtỳj wapo xwahhihti to me amji jĩ jakep, ne me hõ kruwxwa to me amji caxwỳ, ne ajco me amji caprô jaxwỳr to me ipa. 29Ne cute me caràr tỳj ita to me pyt to mõ. Mã nee me hõ pahpãm cahàc pê Pahar ata te mempar ne me cumã jũ mãn nare, ne nee cute me caràr par nare, ne nee jũm par nare. Ne hamre, ramã pyt pec to mõr xà ata kam ri, quêt me Pahpãm peaj mã cute me ampo to caxàr xàa kam hàhhuc.
Pê Erij cute cuhy kujahêc na Pahpãm wỳ
30Mã Erij te mehcunea mã hàkjêr to:
— Ajpên me mõ, ne me ina ahtipre ne, mãr ca ahna me ipupun peaj ne — hajỹr. Ne cormã cute ame Pahpãm mã ampo to caxàr xà hur ata to impej kwỳa kam, mã cute ahna me cuprõn. 31Mã cute kẽn te tôxi atajê japỳn. Ne kẽn atajê pê ahpỹanre na me hakrã pê Ixaher kra te tôxi atajê.
32Ne Pahpãm jarkwa kôt cute ahpỹanre na Ixaher kra atajê na kẽn te tôxi atajê nõr par, Pahpãm mã cute ampo to caxàr xà to impej prãmte. Jirô pê mã ri hõtpê cute ipu na cô mã hahkwỳn to kre ryre. 33Ne cute kẽn jipy pĩ kwỳ jakôt, ne kam pryti jĩ kryj ne hakôt, ne cumã harkwa to:
— Me cô jacjên xà catia nõ to me cwat, ne me to hipu, ne pryti jĩ kam me haxwỳ, ne pĩ kam me haxwỳ, ne me to inco tu ne — hajỹr.
34Mã cute me ton jirô pê, hipêr cute me cumã harkwa to:
— Hipêr kam me cô kwỳ jaxwỳ — hajỹr. Mã cute hipêr kam me haxwỳr.
Mã hipêr me cumã:
— Kam me haxwỳr to incrê mã — hane. Mã cute hipêr kam me haxwỳr. 35Mã kẽn te tôxi atajê kam pryti jĩ ata pĩn, cô ajxwỳ ne tàkamrỳ cute ipu na kre jahkwỳn ata to hipu.
36Mã pyt pec kam, cute me Pahpãm mã ampo to caxàr xà to me amji pyràc xà ata kam hàhhuc. Mã Erij xãm ne mõ, ne Pahpãm mã ampo to caxàr xà jĩkjê rũm hàhhuc ne xa, ne Pahpãm mã ihcakôc, ne cumã:
— Hàpà, me ijõ Pahhiti. Por apê Aprãw me, Ixac me, Ixaher pê me apynã atajê jõ Pahpãm. Ne ita kam me cumã apê Ixaher catêjê jõ Pahpãm na amji to ajpẽ, ne hanea ne ipê amã ijàpên catê na me cumã ito ajpẽ. Pom ite ampo cunea ton itajê, wa nee amjia kôt ite ton nare, ne garkwa kôt wa ite ton! 37Ijõ Pahhiti ikampa, mãr quê itajê cunea apê ampeaj kam Pahhiti pê Pahpãm na, me gahkre pej, ne caa pê ca, amji wỳr, amji mã mehĩ to apkjê — hajỹr.
38Me ajkaam mã côjkwa pĩn cuhy pỳm! Ne cute pryti me pĩ to caxàr, ne kẽn to caxàr, ne pjênxôm to caxàr, ne hanea ne cute cô to incrà tu, kre ata kam!
39Mã mehcunea te me ita pupun, ne hũpate, pjê kam, mehcunea mehkuc to mehpỳm, ne me hũjarẽn to:
— Côjkwa kam me pajõ Pahhiti ita pê ri Pahpãam to Pahpãm! Côjkwa kam me pajõ Pahhiti ita pê ri Pahpãam to Pahpãm! — hajỹr.
40Mã Erij te me cumã harkwa to:
— Me pahpãm cahàc krekà pê Pahar mã me hàpên catêjê cunea pro, mãr quê nee jũ kam jũm pyxit ne ihtẽm nare! — hajỹr. Mã cute mehcunea pro, mã ma Erij Quixõ jõ kàj mã nõre wỳr me to mõ, ne curi cute mehcunea jipej.
Pê Erij cute ta kujahêc na Pahpãm wỳ
41Mã Erij te Acapê mã harkwa to:
— Ita caxuw gapacta ne tẽ ne apà ne ikõ. Ampo na? He ramã ite ta nõ pahtỳjti jàhkrihkrit kam ijapac, mã ajpên mõ! — hajỹr. 42Mã ma Acapê tẽ, hỹr ne hàpàn ne ihkõm prãmte.
Mã ma Erij Carer jõ kẽnti ata jimoac wỳr cumã hàpên catê me hàpir, ne pjê kam hỹr, ne cute ihkuc to ihkõn krã catêc ne to jỹ. 43Jirô pê mã ri cute cumã hàpên catê mã harkwa to:
— Mõ ne côxwa wỳr rĩt! — hajỹr.
Mã ma tẽ, ne irĩt ne hacpỹa ne cute Erij wỳr amji jaxàr ne cumã:
— Wa nee ite ampo pupun nare — hajỹr.
Mã Erij te ampo pupun xà atawỳr ihkujahêc to xet, mã cute amji jacjên to xet.
44Mã cumã hàpên catê te amji jacjên to xet ita kam ri, cute cumã hũjarẽn to:
— Wa ite côxwa pĩn ahcakrã nõ incrire pê me hũmre jũhkra pyràcti incrire jàpir to mõr na hõmpun — hajỹr.
Mã Erij te cumã hàpên catê ata mã:
— Atẽm pyrentu, ne Acapê mã awjarẽ, quê hõ cawrô jõ kàhà kam jỹ, ne kẽnti pê to wrỳ, mãr quê nee côhtàm cupê pry jahêr nare — hajỹr.
45Mã nee harkwa cràre nare. Ne côjkwa kam awcapàtkô pyrentu, ahcakrã kam. Mã kôc pahtỳjti ata cator, ne pahhàjê kypê iwrỳc nare. Mã Acapê hũjarêan kam Jexer jõ krĩ wỳr ihtẽam to tẽ. 46Mã Pahpãm te Erij mã ipicahur xà caxuw, carôt tỳj jõr. Mã cute Acapê jakren, ne ma mam hamrea kam tẽ, ne mam Jexer jõ krĩ mã cator.
19Erixêw pê Pahpãm jarkwa to ihcakôc catê
Mã Pahpãm te Carer jõ kẽnti na hõ cuhy kujahêc jirô pê mã, cute Erij mã harkwa hyr ne cumã:
— Amji jaxà ne jũm tuw japrỳ te Erixêw ata japê, mãr quê gaxà kam cupê ijarkwa to me cumã ihcakôc catê — hajỹr. Mã Erij te amji jaxàr ne Erixêw na cator, ne cumã Pahpãm te harkwa to ihcakôc catê na amji mã capi na harẽn. Mã Erixêw te impar, ne ma ihkôt mõ.