Jeju Na Mehkwỳ Jakrã Cunea Wỳr
MAM JOWÃW JÕ KÀHHÔC
Ỹhỹ, pê Jowãw pê Jeju jarkwa na memprar catêjê nõ. Ne pê mam cupê tep pro catê, pê Jeju ihkôt ipa catê na ahna ahwỳ. Pê caku crê kam Jeju kôt ipa, ne cute amji kam hapac xà cunea na hõmpu. Ne ramã ihwejtu kam ri cute pjê cunea kam Jeju na mehkwỳ mã ihkàhhôc ita hôc, ne ihkujahêc. Na ri hõ kàhhôc ita japrỳ te Jeju Na Mehkwỳ Jakrã Cunea Wỳr, Mam Jowãw Jõ Kàhhôc (1 Jowãw).
Ne pom cu me mam ihkàhhôc cahyt ita kam ri cute me pamã, pahte me ampo kên ton, ne ahna amji to me papimxur nare, ne hirãa pê Pahpãm mã pahte ahna me amji jarẽn to me pamã hahkre. Ne hanea ne jũ mã me pahte me, ne me papê Pahpãm tekjê na pahte me amji jahkre pej to me pamã hahkre. Ne hanea ne cute me pahkwỳ me, me pamã ajpẽn kĩnti to me pamã hahkre.
1Jowãw te Jeju pupun na amji jarẽn xà
1Hàpà me ikwỳ pê Jeju na mehkwỳ, ipê Jowãw pê mam Jeju kôt me ipa catêjê atajê nõ. Ne pa wa ha me amã ihhôc ne ihkujate. Ỹhỹ, wa ha me amã ramã rỳ pêa mã pjê ton xwỳjrea na jũm ipa ata jarẽ, ne ahna ihhôc. Ne jũm ita pê me pamã pahte amji kam me pajapac xà jõr catê. Ne cupê Pahpãm te amji kam hapac xà xakat. Ne cupê me pamã Pahpãm to ipipẽ catê. Cwỳrjapê ri haprỳ pê “Pahpãm Jĩa Jarkwa”. Ne por jũm ata pê jũm nare, he cupê Jeju Crixtô. Pê hũmrea na amji to, ne pjê wỳr wrỳ, pê wa ihkôt me ipa catêjê me, me ijapac jĩa to me kampa, ne me ito jĩa to ajco me hõmpu, ne mehkôpĩ, ne itỳj me ijũhkra to ajco mehcupê.
2Ỹhỹ, Jeju mam Pahpãm cahê na ihkrĩ, ne cupê Pahpãm Jĩa Jarkwa, ne cupê me pamã côjkwa pĩn Pahpãm te amji kam hapac xà to ipipẽ catê, ne pê wa cute me cumã to ipipẽ na hõmpua na, wa me amã harẽn to mõ. Ne taa mã ri Pahpãm cahê na pahte amji to me papijapar rohnỳtti mã na me pahto. 3Ne ampo na mã wa me amã Jeju jarẽn to ipa to hane? Nee mã ampo na nare. Imã me ate Jeju me Pahpãm pê Hũm me, me ajpẽn to ikwỳ nõ na me ato prãmte hajỹar, pom pê wa ipê hõ ikwỳ nõ he. Ita na cu ha me pahcunea Jeju me ajpẽn kam me pahhônco ita na me papa. 4Ate me ijõ kàhhôc ita cahyt ne mempar, cu ajpẽn kam me pajakrya to me pajakry prãm to, wa ite me amã ihhôc ne ihkujahêc.
Cu ha catyt kam Pahpãm jarkwa kôt me papa na, cu ha me pahhônco tu
5Pê Jeju me imã, ite me amã Pahpãm jarẽn xà ita to pê hahkre he:
— Amcro jàhcujrohti ita ihtỳj jũ ri me pamõr xà ata to me pamã hahkre, ne awcapàtkô kam, cu nee jũ kam me pamõr xà ata na me amji jahkre pej nare. Ita kôpit na mã Pahpãm pê amcro jàhcujrohti ata pyràac, ne ihtỳj me pahte amji kam me pajapac xà impejti to me pamã hahkre — hane. 6Cwỳrjapê cu ha me pahnõ te nee Pahpãm kôt papa nare, ne pahtỳj ampo kên ton to me papa na, cu ha ihhêj ne awcapàtkô kam me pahkrĩ. Cu ha awcapàtkô kam me pahkrĩ cakrô, cu ha me amji jarẽn to:
— Ipê Pahpãm jõ ikwỳ nõ, na wa cume ajpẽn kam ihônco ita na ipa — hajỹr na, cu ha ame pahhêj xia jarẽ, ne nee me papê catyt kam me papa catêjê nare. 7Ne nee pahte me hajỹr xà nare, cu ha quêt Pahpãm cuxà, catyt kam me papa, ne harkwa kôt me pahcunea ajpẽn to me ikwỳ nõ. Hõ, cu ha me pahcunea me hane, ne pahte me hajỹr xà ita pê ihhêj rũm amcro jàhcujrohti kam me papa xà ata pyràac, ne ma amji mã me papa xà pupu ne ihkôat, catyt kam me papa. Pê Pahpãm kra pê Jeju me pajaxà kam ty, ne caprô jaxwỳ, ne caprô ata pê ihhêj rũm cô te ampo tũmti cuhhõn pyràac. Ne cute me pahkên atajê cunea cuhhõn par ne to hapac kêt. Cwỳrjapê ri pahte amji kam me pajapac xà cunea tetet pit.
Cu ha Pahpãm mã pahte me ampo kên ton atajê cunea na me amji jarẽ
8Quê ha me pahnõ te amji jarẽn to:
— Nee ite amji kam ijapac xà kên nõ hamreare — hajỹr na, quê ha ramã taa apu amji to ihhêj to mõ, ne nee caxwãm pê cumã Jeju te amji kam hapac xà jahkre pej nare. 9Ne quêt ajteare mã ita to, cu ha me he. Cu ha Pahpãm mã me pahte ampo kên ton atajê cunea na me amji jarẽ. Ne pahte amji jarẽn xà ata kam, quê ha Pahpãm pahte me pahkên ton atajê to tojnõ ne hicu, ne pahte amji kam me pajapac xà kên cunea pê ihhêj ne me pahcuhhõn pa. Ne cupêa ri catyt kam ipa catê, ne pê ramã me pamã ahna amji jarẽn xà ata, quê ha to. 10Ne pê ramã Pahpãm rỳ pêa mã me pahto hũjarẽn to hane he:
— Pjê kam mehcunea mehkrĩ itajê ihtỳj hõtpê mehkên ton to me ipa — hane. Cwỳrjapê quê ha me pahnõ te amji jarẽn to:
— Wa ite nee jũ caxuw ampo kên ton nare — hajỹr na, quê ha ramã Pahpãm mã ihhêj xi na hacjê, ne nee Pahpãm jarkwa to amji jahôt to ipa nare.
2Jeju Crixtô pê me pahkritxwỳ
1Me apê imã me ikra kĩnti atajê pyràac. Ampo na? He ca ikôt Jeju to amji mã me ahimpej, na wa ite me amã ihkàhhôc ita ton, mãr ca me cahyt ne me kampa, ne nee me ampo kên ton to me apa nare. Nãmri quê ha me pahnõ te ihkên xà nõ ton na, quê ha Jeju pê catyt kam ipa catê ata taa to amji pytà, ne taa Hũm mã harẽ. Ne cumã amji jarẽn to:
— Jũm ata te ihkên ton xà ita jahpan xà na ihkên mã mẽn nare. Ampo na? He pê wa ramã pa amji to ihkritxwỳ, ne hahpan xà na ty — hane. Jeju peaj to impej, na ri ihtỳj me pahto hane. 2Jeju tyc xà ata kôt ri Pahpãm ihtỳj pahte me pahkên ton itajê jicu, ne to tojnõ ne to hapac kêt. Ne nee mã pahte me pahkên ton xà jahpan xà na pit mã Jeju tyc nare, ne pjê cunea kam, mehcunea te mehkên ton atajê cunea kritxwỳ na ri cute amji ton ne ihtyc.
3Cu ha pahte me Pahpãm te me pamã harkwa jirên itajê kam catyt kam me pajapac na, cu ha pahtỳj me pamã pahte Pahpãm jahkre pej na me amji jahkre pej, ne ihkôt me papa xà impej na, me pamã amji jahkre pej. 4Nãmri quê ha jũm te amji jarẽn to:
— Wa ramã ite Pahpãm pupun pejtu, ne imã hahkre pej, na wa itỳj ihkôt ipa — hajỹr, ne nee por cute cumã harkwa jirên xà atajê kam hapac nare na, quê ha taa ramã apu amji to ihhêj to mõ, ne apu ahna amji caprỳ jarẽ. 5Ne quêt jũm te Pahpãm kam hapac pejti to ipa ata mã ri caxwãm catia mã Pahpãm kĩn, ne ihtỳj cumã Pahpãm me cute ajpẽn kam ihhônco na amji jahkre pej. 6Nãmri quê ha jũm te amji jarẽn to:
— Wa Pahpãm me ajpẽn kam ihônco tu — hajỹr ata, quê ha harkwa to amji japackrea ne, ne ihtỳj Jeju pê Pahpãm kra te amji kam hapac xàa kôt ipa na amji to ihtỳj tu ne. Ne ihtỳj cumã Pahpãm me ajpẽn kam ihhônco tu na amji jahkre pej.
Cu ha me pamã ajpẽn kĩnti to me papa to me prãm
Jowãw 13.34-35; 1 Jowãw 3.14-18
7Imã me ijõ ikwỳ nõ kĩnti itajê, xà ajkĩ cormã wa Pahpãm te me amã harkwa jirên xà itajê na me amã ihhôc? Hãpà! He rỳ pêa mã ramã pahte me ajpẽn kĩnti xà ita na cute me pamã harkwa jirên xà ata na me gũpar. 8Na wa ha Jeju te amji kam hapac xàa kôt hipêr me amã harẽn to intuw. Ne pahte me ajpẽn kĩn kam me pahtẽm xwỳjrea na, pê mam ramã Jeju amji mã me pahkĩn. Ne pom Jeju te amji mã me pahkĩn ata pê ihhêj rũm pyt krã cator pêê mã hàhcujro. Ita kôpit na, pahte me ajpẽn kĩn to me papa xà ita pê ihhêj rũm ramã pyt jàpir tu jàhcujro. Na ri pahte ajpẽn kĩnti to me papa xà ita pê ihhêj rũm, nee me pahkam awcapàtkô nare.
9Nãmri quê ha jũm amji jarẽn to:
— Pahpãm te ihhêj ne imã ite amji kam ijapac xà cujro, cwỳrjapê ri imã ampo pej cunea ton jahkre pej — hane, ne ma apu Jeju kam ajpẽn to mehkjêjê atajê nõ caca, ne nee me to impej nare na, quê ha ihhêj ne cormã awcapàtkô kam apu ipa ita na. 10Ne por jũm mã Jeju kam cute ajpẽn to ihkjê kĩnti, mã ihkĩn mea mã ipa ata pê ihhêj rũm amcro jàhcujro kam ipa xà, cwỳrjapê quê ha nee catyt kam ipa jicu nare. 11Ne por jũm mã ihkjê kĩn nare, mã ma apu ihcaca ata pê ri ihhêj rũm awcapàtkô jàmkrã kam mõr xà ata pyràac. Ne cupê ihhêj rũm mento tũam, ne nee hãn ne catyt kam Pahpãm te amji kam hapac xà kôt ipa nare.
Cu ha pjê kam amji kam me hapac xà kaj na me papa to me prãm
12-14Ihhêj rũm me apê me ikra pyràac, na wa ite me amã ihhôc. Ampo na? He me amã Pahpãm pê me Apãm jahkre pej. Na ri ihkra pê Jeju tyc xà ata kôt, cute me akên itajê to tojnõ ne hicu. Ne por ca ramã Jeju kôt ate me apa to me amji kàhtu atajê mã, wa ite hanea ne ihhôc. Ampo na. Me amã, por pê ramã Pahpãm pjê ton xwỳjrea na jũm ipa ata jahkre pej. Ne pom ca curmã Jeju kôt ate me apa kam me atẽm atajê mã hanea ne ite ihhôc. Ampo na? He ampeaj kam me atỳj, ne me acaxwãm pê ihtỳj Pahpãm jarkwa amji to ajpa. Na ca ate amji kam me gapac xà impej to, ate me pahcurê xwỳn pê Xatanaj jirô pê me axãm, ne me tohjê.
15-16Ne wa ha me amã pjê ita kam, Pahpãm curê xwỳn te amji kam hapac xà me ampo cunea hapôj itajê cawpa. Pom pjê kam ampo kên itajê nee côjkwa pĩn, Pahpãm pĩn hapôj nare, ne pjê ita pĩn ri hapôj. Ne por Pahpãm curê xwỳn catêjê atajê te amji kam hapac xà incrê itajê mã he:
Cute me Pahpãm mã ampo kĩn nare atajê xen.
Ne cute me cumã ampo kên xen atajê to, cute me amji cajpuaw prãmte, ampeaj kam me cumã hàn.
Ne hanea ne quê ha ampo te mehcajpuaw ata pupu, ne me ahna prãm pyrentu.
Ne hanea ne me cumã hàhcukrêj jàhtôti atajê kôt ihtỳj amji to me cati prãm to me ipa.
Atajê mã ri Pahpãm kĩn nare. Na ca ha nee me apê jũmjê atajê pyràc, ne amji mã ampo itajê na pit mã prãm to me apa nare. Ne Pahpãm ca quêt amehkĩn. Nãmri ca ha ate me amã ampo itajê pit kĩn na, quê ha nee me amã Pahpãm kĩn nare.
17Ne mẽr ampo na mã wa me amã ampo itajê cawpa to hane? Nee mã ampo na nare. He quê ha jũ caxuw pjê te amji kam hapac xà itajê cunea me, Pahpãm curê xwỳn te ampo xen xà itajê cunea ihkên mã axà ne hamre tu. Ne por quêt me cumã Pahpãm kĩn, mã Pahpãm mã ampo kĩnti to pit mã amji kam me hapac to me ipa atajê, quê ha quêt me ahtwỳ, ne amji to me ipijapar rohnỳtti mã, Pahpãm cahê na.
Cu ha nee Crixtô curê xwỳnti hêj xi xà kam me pajapac to me prãm nare
18Me ikra, he ramã ampo cunea jamre xà na hàhtêp. Ne ramã ate me Jeju Crixtô curê xwỳnti ata jarẽn par. Ne por jũm ata pê ihhêj ne põ rũm Jeju Crixtô te amji kam hapac xà kôt ipa catê, ne caxwãm pê aracri cupê Jeju curê xwỳn. Ne ramã Jeju curê xwỳn catêjê jàhtôa ne me hapôj, cwỳrjapê ri ramã me pamã ampo cunea jamre xà na hàhtêp to mõr na hahkre pej. 19Ne pê mam me pahcurê xwỳn itajê pê me pahkwỳa, ne ihtỳj me pahcahê na ipa. Ne hamre, ramã ma me papê cator, ne nee mã ampo na me papê cator nare. Pê pahte amji kam me pajapac xà kaj na amji kampa. Quê ha cama me cupê me pahkwỳ na mã, quê ha ita ri me pahcahê na ame ipa. Pê me papê me hapôj xà ata kôt me pahcunea te me cupê me pahkwỳ nare na me hahkre pej.
20Pê Jeju Crixtô me amã Pahpãm Carõ Pejti gõ, pê ca ahna me amji capa, cwỳrjapê ri me acunea mã Pahpãm te amji kam hapac xà impejti, hêj xi nare ata jahkre pej. 21Xà ajkĩ ate me Pahpãm te amji kam hapac xà impejti jahkre pej nare na mã, wa ite ahna me amã ihhôc? Hãpà. He ramã me ate, cute amji kam hapac xà impejti kam ihhêj xi nare na, ate me hahkre pej.
22Wa ha me amã mehhêj xi catêjê jarẽ. Quê ha jũm te me amã hũjarẽn to:
— He nee Jeju pê, por pê Pahpãm me pamã pahpytàr catê na Crixtô to awjahkre ata nare — hajỹr na, ca ha mehhêj xi na me hahkre pej pyrentu. Ne ihtỳj Jeju me Hũm pê Pahpãm to mehhêj to me ipa, ne ma ame curê. Cwỳrjapê ri jũm ata pê Crixtô curê xwỳnti. 23Ne por jũm Jeju pê Pahpãm cãmter ita to ihhêj xi ata, hanea ne ihtỳj Pahpãm pê Hũm to ihhêj xi, ne ma apu curê. Ne quêt jũm te ihcãmter na amji caxàr ata te ramã hanea ne Hũm na amji caxàr.
24Pê ca Pahpãm wỳr me apkjê, ne me kampa ata kam, pê ca me Pahpãm te amji kam hapac xà cunea jahkre pej. Ne ate me hahkre pej atajêa kôt, ca ha catyt kam me apa kam me to acrà. Ita na ca ha ihcãmter me Hũm kam me ajpẽn hônco ita na, ne me atĩr rohnỳtti mã, Pahpãm cahê na. 25Hõ, ampo ita to pê ihcãmter me pamã awjahkre.
26Ne pom ame amã ihhêj xi prãm to me ipa itajê na, wa ite me amã ihhôc. 27Ne ramã Crixtô te me amã Carõ Pejti jõr. Mã me akam Carõ Pejti ita kam, ca ha nee me jũm te me amã ampo to hahkre xà ata na me prãm nare. Ampo na? Carõ Pejti ata ri ihtỳj me amã Pahpãm te amji kam hapac xà cunea to hahkre to ipa. Ne cute ampo to hahkre xà atajê nee mã ihhêj xi nare, ne quêt ampeaj kam ri. Cwỳrjapê ca ha Carõ Pejti te me amã ampo to hahkre xà atajê na kam me gapac to impeaj ne, ne ma ihkôt me hakop. Ne Crixtô me ajpẽn kam me ahônco kam me to acrà.
28Ỹhỹ, imã me ikra kĩnti itajê. Quê ha ihtỳj jũ caxuw me pajõ Pahhiti pê Jeju Crixtô hacpỹ ne me pahwỳr amji jaxà. Cwỳrjapê ca ha Crixtô me ajpẽn kam me ahônco kam me to acrà ita na. Mãr ca nee kam ame apahàm, ne ame amji mã hũpa nare, ne atỳj cuna mã me xa.
29Ne ramã me amã Crixtô pê Pahpãm kra te catyt kam ampo pej pit ton to ipa na hahkre pej. Na cu ha pahte catyt kam ampo pej pit ton to me papa na, cu ha hanea ne me papê Pahpãm kra na ramã me pamã amji jahkre pej.
3Cu ha pahtỳj jũ caxuw Jeju Crixtô me, me ajpẽan
Jowãw 1.12-13; 1 Petrô 1.13-21; 2 Petrô 3.11-14
1Pỳhàpà, he Pahpãm mã me pahkĩan to me pahkĩn! Ne ihtỳj cute me pahto amji kra. Mã pjê kam me cupê Pahpãm tekjê nare, ne ma ame curê atajê pê me papê ihkra na me pajahkre kêatre. Ampo na? He nee me Pahpãm jahkre pej nare na ri. 2Imã me ijõ ikwỳ nõ kĩnti itajê, ramã me papê Pahpãm kra. Ne cormã jũ caxuw me papê ihkraa to ihkra xà ata na, cormã pahte me amji jahkre pej pej nare. Ne ita ri me pamã hahkre pej he: Quê ha hacpỹ ne Jeju me pahwỳr amji jaxà, ne me pamã amji to ajpẽ, cu ha ajteare mã, ihnõ na me hõmpu. Ne pahte me hõmpun xà ata caxuw, cu ha me amji to intuw, ne Jeju me, me ajpẽan. 3Ne pahte amji to me papintuw xà impejti ita jikaj xà ata kam, cu ha hahkà na amji tête pahte amji kam me pajapac xà kên cunea japôj to me mõ. Ne pahte amji kam me pajapac xà tetetti impejti to me amji kampa to me hanea, pom quê Jeju te amji kam hapac xà tũm nare ne ihtetetti he.
4Ne quê ha jũm te, cute amji kam hapac xà kam ampo kên to ihtũm na, quê ha taa ramã Pahpãm jarkwa jirô pê ihpỳm, ne ihkaj na amji kampa. 5Ne ramã me amã Jeju te jũ caxuw ampo kên ton nare na hahkre pej. Ne taa mã pê me pahwỳr wrỳ, cute me pahcunea tête me pahkên jũrên prãmte. 6Na cu ha pahte Jeju kam me ajpẽn hônco na, cu ha nee me pahkên ton kam me to pancrà nare. Nãmri quê ha jũm te Jeju jahkre pej nare, ne hõmpun pej nare kam, mãnea mã ihkên ton kam to incrà na, quê ha nee Jeju to amji mã ihhimpej, ne me ajpẽn kam ihhônco nare.
7Imã me ikra kĩnti itajê, nee ca amji na me jũm jamãr quê me amã ihhêj nare. Ne por jũm catyt kam Pahpãm cuna mã impejti to ipa ata pê ri Jeju pyràac, ne catyt kam ipa. 8Nãmri quê ha jũm te mãnea mã ihkên ton to ipa na, quê ha Pahpãm cuna mã ihkêanre ne, ne cupê me pahcurê xwỳnti pê Xatanaj tekjê. Ampo na? Pê Pahpãm pjê ton pêa mã, pê Xatanaj ihkên ton kam tẽ. Cwỳrjapê ri cute Xatanaj jàpên xà cunea to hamre xà caxuw me Pahpãm kra cato.
9Ne por me cupê Pahpãm kra atajê, nee mehkên ton kam me to incrà nare. Ampo na? Me caxwãm pê Pahpãm te amji kam hapac xà hàpên to ipa na ri. Ne Pahpãm pê me Hũam to me Hũm ita kam, jũ mã quê ne ajte mehkên ton kam me to incrà? Jũ wỳr quê jũm hane! 10Mẽr me Pahpãm kra, me Xatanaj kra te amji kam hapac xà to me ajpẽn ne me hõmpu. Por jũm nee catyt kam ipa nare ata me, cumã ihkjê kĩn nare ata hirã pê nee cupê Pahpãm kra nare, ne cupê Xatanaj kra.
Cu ha me pamã ajpẽn kĩnti to me papa to me prãm
11Imã me ijõ ikwỳ nõ kĩnti itajê, por pê wa mam me amã Pahpãm jarkwa jarẽ ata, wa ha hipêr me amã harẽn to mõ:
— Cu ha me pamã ajpẽn kĩnti ne — hane. 12Cu ha nee me papê me panquêt xwỳ pê Cãn kêanre pê Xatanaj tekjê, ne ihtõa cura ata pyràc nare. Ne mẽr ampo na mã pê ihtõ te amji to hapure ita cura? Pê ajco hapure catyt kam impejti ton to ipa, ne Cãn pê ihkĩnte ajco ihkêanre ton to ipa, ne ma apu ihtõre te impejti ton ita na to ihcaca, na pê ihcura.
13Ỹhỹ me ikjêjê, he me cupê pjê ita tekjê catêjê te ihkên ton to hajỹr tũam. Ne quê ha cute me hajỹr catêjê ma ame acurê, ca nee me amji mã:
— Pỳhàpà, ampo na mã ame icurê? — hajỹr nare. 14Ne por me cumã mehkĩn nare atajê pê ri ihhêj rũm mehtyc pyràc, ne nee me ampo pej ton nare, ne ma ramã ihkên kam, cute me amji pupun xà kêanre ata wỳr me pra. Ne me pa nare. Ihtỳj quêt me pamã Jeju kam me cupê me pahkjêjê kĩn. Cwỳrjapê cu ramã me papê ihhêj rũm pahte me pahtyc xà jahpan, ne ma me pampej mã, amji kĩnti ata wỳr me pamprar pyràac. 15Quê ha jũm te ma apu ihkjê curê na, quê ha ramã Pahpãm mã cupê mehcuran catê pyràc. Ne ramã me pamã, jũm pê mehcuran catê ata te nee Pahpãm cahê na ihkrĩ nare na, hahkre pej.
16Jũ mã cu ha ajte me, ne me pamã ajpẽn kĩn ita na me ajpẽn jahkre pej? Me Jeju pupu he. Ampeaj kam cumã me pahkĩn, cwỳrjapê ri me pajaxà kam ihtyc. Ata pê ri me pamã ajpẽn kĩnti xà. Na cu ha me pamã me pahkjêjê kĩn hanea, cu ha pahtỳj mencwỳrjapê me pahtyc na me amji to ihtỳj tu to me papa. 17-18Ne nee cu ha me pajarkwa to pit mã ame pahkjêjê kĩn, ne me to impej nare. Ne me hàpên xà na cu ha me tehcajpa, ne me to impejti ne, ne ampeaj kam me pamã mehkĩn. Ne quê me anõ mã ampo, ca me akjêjê nõ pupu quê apu ampo na prãm to mõ, ca ha hõmpu ne atỳj gàhcukrêj to ihtehcajpa. Nãmri ca ha ate nee me akjêjê caprĩ nare, ne nee mehtehcajpar nare ita kam, jũ mã ca ha ajte ne amji jarẽn to:
— Imã Pahpãm kĩn — hane?
Cu ha ajpẽn kĩnti to me papa na, cu ha pahcaxwỳn carĩcti kam me papa
19Me pamã me pahkjêjê caprĩ xà ita ihtỳj me papê Pahpãm hêj xi nare ata tekjê na me pajarẽ. Cwỳrjapê cu ha Pahpãm cuna mã me paxãm xà jõ amcro ata kam, cu ha nee me pahkên na me amji cãmjĩ nare, ne quêt me pahcaxwãm pê me pahcarĩcti ne. 20Nãmri cu ha me pahcaxwãm pê me pahcarĩc nare na, cu ha cama me amji cukij to:
— Xà ajkĩ ipê Pahpãm tekjê? Nare mõrmõ nee ipê hõ tekjê nare — hajỹr na, cu ha cormã me Pahpãm mã ampo cunea jahkre pej ata to me amji japackre. Ne hanea ne cumã me pajirôa pê me pamã pahte amji kam me pajapac xà pupun na me hahkre pej. Ne ita jirô pê cu ha cormã cumã me pahcaprĩ ata na me to amji japackre.
21Imã me ijõ ikwỳ nõ kĩnti itajê, cu ha pahte me ajpẽn kĩn na, cu ha nee me pahcaxwãm pê amji mã ame Pahpãm cupa, ne nee ame pahpahàm nare. 22Ne por cu ampo cunea na me cuwỳ atajê, quê ha ihtỳj me pamã cugõ. Ampo na? Cu pahtỳj cute me pamã harkwa jirên itajê na me kampa, ne cute amji mã ampo kĩnti itajê to pit mã me hupkre cahkô to me papa. 23Pê Pahpãm mehcunea mã harkwa hyr to hane he:
— Ikra pê Jeju Crixtô to ca amji mã me ahimpej, ne hanea ne me amãa ajpẽn kĩnti ne — hane. Ne pê hanea ne me imã harkwa hyr to hanea he. 24Quê ha jũm te Pahpãm te cumã harkwa jirên itajê na kam hapac to ipa na, quê ha cume ajpẽn hônco tu ne, ne ajpẽn kam mehkrĩ. Ne pê Pahpãm me pamã Carõ Pejti gõ, cwỳrjapê ri me pamã ita jahkre pej.
4Cu ha nee Jeju curê xwỳnti atajê kam me pajapac to me prãm nare
1 Texarõn 5.21-22; 1 Jowãw 2.18-26; 2 Jowãw 7-11
1Imã me ijõ ikwỳ nõ kĩnti itajê, quê ha me hàhtôa ne me amã amji jarẽn to:
— Pahpãm Carõ Pejti te imã amji jõr, wa harkwa kôt harẽn to ipa — hane. Ca ha nee me kam gapac nare. Ampo na? He ramã me hàhtôa ne pjê kam amehcahkũm, ne Pahpãm jarẽn xà kaj na ame harẽn to me ipa. Cwỳrjapê ca ha ma me jũm te me amã amji jarẽn to hajỹr ata kôpĩ, ne ihkôt me hakop, hàpên xà atajê na. 2Cu ha me kampa, quê ha cute catyt kam me amã Pahpãm jarẽn to:
— Pê Jeju me paxũmrea na amji to, ne me pahwỳr wrỳ, ne cupê, por pê Crixtô to me pahkritxwỳ na, Pahpãm me pamã awjahkre ata — hajỹr na, ca ha me kampa. Ne me amã ampeaj kam cupê me amã Pahpãm jarkwa to ihcakôc catê, ne kam Pahpãm Carõ Pejti na me hahkre pej pyrentu. 3Nãmri quê ha cute Jeju jarẽn to hajỹr nare na, ca ha ramã kam Pahpãm Carõ Pejti nare na me hahkre pej, ne kam Jeju Crixtô curê xwỳnti carõ kên na me hahkre pej pyrentu. He pê cu ramã ampo carõ kên ita te pjê wỳr ajpên mõr na me harẽn pa, ne hamre, ramã cator ne ihtỳj apu mõ.
4Jeju kam me apê me ikra kĩnti atajê, me apê Pahpãm tekjê, na ca ramã cute me Pahpãm jarẽn kaj na ame harẽn catêjê atajê jirô pê me axãm, ne me tohjê. Ampo na? He me akam Pahpãm Carõ Pejti ihkrĩ ita ri, pom pjê kam me kam ampo carõ kên atajê jirôa pê ihtỳj. 5Ne me cumã pjê kam ampo itajê jarẽ, mã ihtỳj me cupê pjê ita tekjê pê Pahpãm curê xwỳn catêjê me kampa. Ampo na? He pjê ita te amji kam hapac xà ri me cumã harẽ, mã pjê ita kam me ipa catêjê pê Pahpãm curê xwỳn atajê ihtỳj ahna me kampa. 6Ne me pa nare, he quêt me papê côjkwa pĩn Pahpãm tekjê, ne cu me Pahpãm te amji kam hapac xà to pit mã me hupkre cahkô to me papa. Quê ha jũm mã Pahpãm jahkre pej na, quê ha ihtỳj me pahkampa. Nãmri quê ha cumã Pahpãm jahkre pej nare na, quê ha nee me pahkam hapac nare. Ita na cu ha me Pahpãm Carõ Pejti te amji kam hapac xà impejti hêj xi nare ata me, ampo carõ kên te amji kam hapac xà kên te to ihcupan xà na me hahkre pej.
Cu ha Pahpãm cuxà me pamã ajpẽn kĩnti na to prãm
7Imã me ijõ ikwỳ nõ kĩnti itajê, cu ha me pamã ajpẽn kĩn, cu ha me ajpẽn to impejti ne. Ampo na? Pahpãm te amji kam hapac xà ita te hajỹr pit, ne taa mã ri me pamã ajpẽn kĩnti ita na me pahtehcajpar to ipa. Por jũm mã mehcunea kĩn, mã me to impej ata pê ri Pahpãm kra, ne ihtỳj cumã Pahpãm te amji kam hapac xà na hahkre pej ne hahkre pejtu. 8Ne por jũm mã mehkĩn nare ata pê Pahpãm jahkre kêatre. Ampo na? Pahpãm jàhcaprĩa to hàhcaprĩ, ne cupê cumã mehkĩnti xà cunea xakat. 9Ne Pahpãm mã me pahkĩnti na cute me pamã amji to ipipẽ xà caxuw, me pamã pjê wỳr cumã ihkra pyxit peaj ata kujate, mãr cu me cute amji kam hapac xà intuwti impejti ita cwa, ne kam me pahtĩr rohnỳtti mã. 10Me pamã Pahpãm kĩn, ne me pajirôa pê cumã me pahkĩn. Cwỳrjapê pê me pamã ihkra pê me pahkritxwỳ ata kujate, mãr quê pahte me to kên ata jahpan xà na ty, quê Pahpãm pahte me to kên xà atajê jicu.
11Imã me ijõ ikwỳ nõ kĩnti atajê, he ramã Pahpãm mã me pahkĩnti ita kam, cu ha pahtỳj me pamã ajpẽn kĩnti ne. 12Rỳ jũ caxuw jũm te Pahpãm pupun nare cakrô, cu pahtỳj kam pahte me amji hônco. Mã me pahcaxwãm pê ihkrĩ, ne cumã me pahkĩnti na ri cute amji kôat me pahton, mã me pamã ajpẽn kĩnti. 13Ne cute me pamã Carõ Pejti jõr na, ca me to amji japackre. Cwỳrjapê ri pahte Pahpãm kam me ajpẽn hônco tu na me pamã amji jahkre pej. 14Pahpãm pê me pajõ Inxũ Cati, na cu hõtpê mehcunea mã me harẽn to me papa to me hane he:
— Pê Pahpãm pjê wỳr ihkra kujate. Pê wa hõmpu ata te mehcunea caprĩ ne mehkên catihti ata pê me hũtàr xà caxuw pê pjê wỳr ihkujate — hane. 15Nãmri quê ha jũm te Jeju Crixtô pê Pahpãm kra na harẽn na, quê ha Pahpãm jũm ata mã amji gõ, ne kam ihkrĩ, quê ha hanea ne Pahpãm mã amji gõ, ne kam ihkrĩ, ne ajpẽn kam mehhônco tu ne. 16Ne me pamã Pahpãm te me pahkĩnti na hahkre pej, na cu toa amji mã me pahhimpej to me papa. He Pahpãm pê me pamã ajpẽn kĩn ton catê xakat. Ne por me cumã ajpẽn kĩan kam mehkrĩ atajê ri, Pahpãm kam cute me ajpẽn hônco tu. 17Ne quê ha ihtỳj jũ caxuw Pahpãm te me pahcukij xà ata kam ihtỳj me pahto ajcokjê. Cu ha Jeju te cormã pjê kam ipa reria mã me cumã mehkĩnti ata cuxà, me pamã mehkĩnti na, cu ha nee amji mã ame hũpa, ne kam ame pahpahàm nare. 18Quê ha jũm te mehcunea caprĩ ne mehkĩn to ipa na, quê ha nee jũ caxuw amji na ampo cãmjĩ nare. Ampo na? He Pahpãm mã ampeaj kam me pahkĩn, na cu ha nee amji mã ame ampo cupa nare. Nãmri quê ha jũm mã mehcunea kĩn nare na, quê ha ihtỳj amji na Pahpãm cãmjĩ pyrentu, ne cumã hũpa. Ne cumã ampo cupahti ata quê ha ihkên ata mã cumẽ.
19Pahpãm mã mam me pahkĩnti, cwỳrjapê ri me pamã ihkĩn. 20Nãmri quê ha jũm te amji jarẽn to:
— Imã Pahpãm kĩn — hajỹr, ne cumã Jeju kam ihkjê kĩn nare, mã ma apu curê, ata ri ihhêj xia to ihhêj xi. Ne jũ mã quê Pahpãm pupun nare kam cumã ihkĩn, ne ihkjê pupun cakrô, ma apu curê ne apu ihcaca? Jũ wỳr quê cute hajỹr ita kam apu amji mã hamã. 21Pê Crixtô me pamã ita na harkwa jirên to hane he:
— Por jũm mã Pahpãm kĩn ata mã, quê ha ihtỳj hanea ne ikam cupê ihkjê ata kĩn — hane.
5Cu ha me pamã Pahpãm kĩn na, cu ha me harkwa kampa
1Por quê ha jũm Jeju Crixtô pê Pahpãm kra, pê Hũm me pamã cupê me pahpytàr catê na to awjahkre ata to jũm amji mã ihhimpej, ata pê ri Pahpãm kra impeaj. Cu ha me pamã jũm xũmre ata kĩn na, quê ha hanea ne me pamã ihkra ata kĩn. 2Jĩkjê na mã, quê ha me pamã Pahpãm kĩn, cu ha cute me pamã harkwa jirên xà atajêa na, kam me pajapac na, quê ha hanea ne ihtỳj me pamã me cupê Pahpãm kra na mehkwỳ atajê kĩn. 3Xà quê pijamã me pamã Pahpãm kĩnti ita kam, cu nee ajte cute me pamã harkwa jirên xà itajê kam me pajapac nare? Hãpà, cu ha pahtỳj amji mã me kampa! He xà cute me pamã harkwa jirên itajê ajkĩ ampeaj kam me pamã ihtỳj? Hãpà. 4-5He pom me papê Pahpãm kra ita, ne cutea ri me pamã ampo cunea kam, pahte Pahpãm kam me pajapac xà caxuw carôt jõr. Ne pahte Jeju pê Pahpãm kra to amji mã me pahhimpej, cwỳrjapê cu ha pahtỳj, Pahpãm te me pamã carôt jõr ata kôt, pjê ita kam Pahpãm curê xwỳn atajê te me amji kam me hapac xà kên cunea tohjê.
Cu ha Jeju Crixtô cãmtà rũm Pahpãm cahê na me papa rohnỳtti mã
6-7Ne jũ mã cu ha me, ne me Pahpãm te Jeju to mehcunea pytàr catê na hãm xà ata na me hahkre pej? He côjkwa kam mencrê ne cute me pamã harẽn. Atajê pê, Jeju Pãm pê Pahpãm ata te cô kam ihcumrãr xà ata kam ri, Jeju pê ihkra na harẽ. Ne pê hanea ne Jeju pê Hũm Jĩa Jarkwamã iwrỳc ne ihtyc, ne cute caprô jaxwỳr ata te ri, cupê Pahpãm kra na harẽn. Ne pê hanea ne Pahpãm Carõ Pejti hêj xi nare ata cupê Pahpãm kra na harẽ. Ne mencrê atajê pê Pahpãam to Pahpãm, ne ajpẽn kam me pyxit peaj.
8Ne hanea ne cormã ita kam pjê kam mencrê ne me pamã Jeju pê Pahpãm kra na harẽn to me ipa ita na. Atajê pê Pahpãm Carõ Pejti hêj xi nare ata, mã catyt kam me pamã Jeju jarẽ. Ne hanea ne cô kam me pahcumrãr xà ata ihtỳj me pamã harẽ. Ne hanea ne me pamã Jeju tyc na pahte me to amji japackre xà ata, ihtỳj me pamã harẽ. Ne harẽn crê itajê pipẽn pit, ne ajpẽn kam pyxit peaj.
9-10Ne quê ha jũm te me pamã ampo jarẽn na, cu ha pahtỳj me kampa. Ne quê ha Pahpãm te me pamã Jeju pê ihkra na harẽn na, cu ha pahtỳj pahte me hũmre jũjarẽn kam me pajapac jirôa pê me Pahpãm kampa. Ne por quê ha jũm Jeju pê Pahpãm kra na amji mã to ihhimpej ata, quê ha ramã amji caxwãm pê amji mã:
— Ampeaj kam ri Jeju pê Pahpãm kraa to Pahpãm kra — hane. Nãmri quê ha jũm te Pahpãm to amji mã ihhimpej nare ata, quê ha ihtỳj Pahpãm te apu ihhêj xi na harẽ. Ampo na? He nee Pahpãm te Jeju pê ihkra jarẽn xà ata to amji mã ihhimpej nare na ri. 11Pê Pahpãm me pamã ihkra jarẽn to hane he:
— Ikra tyc xà ita cwỳrjapê, wa ha me amã cute amji kam hapac xà tuw pejti gõ, ca ha ihkôat me apa, ne me atyc xà jirô pê mã icahê na me akrĩ rohnỳtti mã — hane. 12Hõ, por jũm te Pahpãm kra to amji mã ihhimpej ata te ri, cute amji kam hapac xà tuw pejti pyr. Na quê ha ihtyc jirô pê, Pahpãm cahê na apu ipa rohnỳtti mã. Nãmri jũm te nee ihkra to amji mã ihhimpej nare ata te nee amji mã Jeju te amji kam hapac xà tuw pejti ata pyr xà hamreare. Na quê ha ihtyc jirô pê, Pahpãm pê ampỳa mã apu ipa rohnỳtti mã. 13Ne me ca nare. Ca atỳj Jeju to amji mã me ahimpej, na ri ate me amji mã cute amji kam hapac xà tuw pejti ita pyr. Na ca ha me atyc jirô pê, atỳj Pahpãm cahê na me akrĩ rohnỳtti mã na ate me hahkre pej pejtu, na wa ite me amã ihhôc.
Cu ha Pahpãm mã me pahcakôc, quê ha ihtỳj me pahkampa
14Cwỳrjapê cu ha nee Pahpãm cuna mã hũpa kam, ahna me pajàhtàt kam, cumã me pahcakôc nare, ne pahtỳj pahte ampo na me prãm xà ata na, cumã me amji cajrẽn. Ne ramã me pamã Pahpãm te me pahkam hapac, ne me pahtehcajpar na hahkre pej. 15Quê ha ihtỳj me pahkampa, ne me pamã pahte ahna me pajàhwỳr xà atajêa jõr na, ramã me pamã hahkre pej.
16-17Quê ha jũm te Jeju to amji mã ihhimpej cakrô, ihtỳj cormã ampo kên ton na, me anõ te hõmpun na, ca ha atỳj Pahpãm mã ihcajrẽn. Mãr quê Pahpãm akampa ne jũm ata tehcajpa, quê nee hipêr ihkên itajê nõ ton nare, ne quêt cute amji kam hapac xà tuw pejti na ipa. Pê Pahpãm pahte cuna mã me to kên xà atajê cunea pê me pahcator na me pamã harkwa to. Mã pahte hirô pê me pahpỳm xà ata na ri ihkaj na, ne ihkêanre. Ne ampo kên pyxit ata ri ihkwỳ jirôa pê ihkêanre. Na quê ha jũm te ihkên catia ata ton to hajỹr to ipa na, quê ha ihtỳj jũ caxuw hahpan xà na ty. Cwỳrjapê ca ha jũm te ihkên xà catia ata ton to hajỹr na, ate hõmpun na, wa ha nee ate mehcajrẽn xà na, me amã ijũjahkre nare.
Pahpãm me pahte ampo kên ton nare na me pahtehcajpa
18Me papê Pahpãm kra impeaj, na cu nee me pahnõ ampo kên ton to me papa kam to pancrà nare. Ampo na? Jeju pê Pahpãm kra, ne ihtỳj me pahcurê xwỳnti pê me pahpytà, ne me pahto kên cupate me pajamãr to ipa na, ramã pahte me hahkre pej. 19Me pahcurê xwỳnti ita pjê cunea kam mehcunea to ihhimpej cakrô, mã ihtỳj cormã me pamã papê Pahpãm tekjê na, ramã me pamã amji jahkre pej. 20Pê Jeju pê Pahpãm kra cato, ne me pamã pahte amji jahkre pej krã kreti gõ, mãr cu me Pahpãm pê Pahpãam to Pahpãm na me hahkre pej. Ne Jeju pê ihkra, ne cupêa ri pahte amji kam me pajapac xà tuw pejti xakat na me pamã hahkre pej. Ne taa mã ri Hũm cahê na me pahkrĩ rohnỳtti mã na me pahto. Ne por Hũm pê Pahpãam to Pahpãm ata me, cu ha ajpẽn kam me pahhônco ita na.
21Imã me ikra kĩnti atajê, ca ha nee jũ caxuw Pahpãm ràn xà na pahpãm cahàc krekà nõ to amji mã me ahimpej nare. Hõ, ijõ kàhhôc ita pit. Hamre.