CORINTI JÕ KRĨ WỲR
Mam Pawrô Jõ Kàhhôc
Ỹhỹ, pê Pawrô pê Jeju jarkwa na memprar catêjê nõ, ne hanea ne cupê cupẽhkà te ikre cahyr catê, ne hàpên xà ata to pê ajco amji to ajpa. Ne pê Jeju na mehkwỳ jakrã Corinti jõ krĩ kam mehkrĩ atajê wỳr, pom cu me hõ kàhhôc pijakrut cahyt ita kujate. Na pê mam hõ kàhhôc ita japrỳ pê Corinti Jõ Krĩ Kam Jeju Na Mehkwỳ Jakrã Mehkrĩ Atajê Wỳr, Mam Pawrô Jõ Kàhhôc (1 Corinti).
Ne mam hõ kàhhôc ita kam cute ampo cunea to me hapackre, mãr quê nee mehkwỳ jirôa pê me cati to me amji kam hapac to me ipa nare. Mãr quê nee amji na, cute me amji kam hapac xà kên tũmti nõ te mehkwỳ cunea pãc, ne amehtũm na hamãr nare. Ne hanea ne, pahte me cuprõn xà kam, me pamã pahte Pahpãm na amji to me pahhimpej xà to hahkre. Ne hanea ne Pahpãm te me pahcunea mã Carõ Pejti jõr na me pamã harẽ.
He nee ite Corinti wỳr Pawrô te hõ kàhhôc pijakrut kujahêc atajê cunea to ipintuw nare, ne ihkwỳ jatujre atajê ri ite to ipintuw.
1Pê Pawrô me cumã amji jarẽ
1-2Hàpà me ikwỳ pê Pahpãm na mehkwỳ, ca Corinti jõ krĩ kam me akrĩ atajê. Ipê Pawrô. Pê Jeju Crixtô pê Pahpãm kra amji mã harkwa na cumã iprar catê na ixãm. Na wa ite me amã ihhôc, ne ihkujahêc. Ne Jeju kam me pahkjê pê Xoten ita icahê na ihkrĩ. Ne Jeju Crixtô cukwa kam ri me apê Pahpãm na mehkwỳ, na ca ajtea mã me, ne ampeaj kam me apej. Pê Pahpãm ihkra kam ate me ajpẽn hônco xà ata kôt, pê me ato amji kwỳ xà na, me ana ahwỳ. Ne ihkàhhôc ita hanea ne, pjê cunea kam me cumã Jeju Crixtô pê me pajõ Pahhiti kam me hapac to me ipa atajê cunea mã wa ite ihhôc. Ne Jeju pê me pajõ Pahhiti, ne hanea ne cupê me hõ Pahhiti, na wa ite ahna me amã ihhôc.
3Ne wa ijõtpê Pahpãm pê me pajõ Inxũ Cati me, me pajõ Pahhiti pê Jeju Crixtô mã, me acajrẽn to hane he:
— Ỹhỹ, ca ha Corinti jõ krĩ kam me akwỳ mehkrĩ atajê caprĩ, ne me caxwỳn caxwãm pê me cumã me acarĩcti gõ, mãr quê nee ame amji mã ampo cupa nare — hane.
Cu ha Jeju cukwa kam, ampo pej cunea cwa
4Pahpãm te Jeju Crixtô cukwa kam hàhcajrẽan kam me ato impej xà ata pyrên, wa ijõtpê hũrên ijakryti na cumã amji jarẽn to ipa. 5Ne Jeju Crixtô kam ate me ajpẽn hônco xà ita kam ri, me akrã kre te amji jahkre pejti me, Pahpãm jarkwa kôt me gũjarẽn xà impejti to, ihcunea na me gakràj. 6Ne ate me Jeju te amji kam hapac xà intuw pejti jarẽn xà ita na me amji caxàr, ne ihkôat atỳj me apa. 7Cwỳrjapê, ca ate me pajõ Pahhiti pê Jeju Crixtô te amji jaxàr xà na me hikaj xà ita kam, Pahpãm Carõ Pejti te ihtỳj me amã ampo pejti jõr xà atajê, ne nee me apê hamre nare. 8Ne Jeju to ate amji mã me ahimpej xà ata kam ame apec cupate ri, ihtỳj me atehcajpar to ipa, mãr ca nee ahna ame apec nare. Mãr quê me pajõ Pahhiti pê Jeju Crixtô te amji jaxàr xà ata kam, nee ampo na amji mã me acuhtom nare.
9Ỹhỹ, cu pahtỳj Pahpãm to amji mã me pahhimpej xà ata na, amji mã me to hane. Ne cute hanea ne ihkra pê Jeju Crixtô kam pahte me ajpẽn hônco tu xà caxuw, cute me pahna hàhwỳr, ne nee cute harkwa ata to ipintuw, ne to hapac kêt nare.
Pê Corinti jõ krĩ kam Jeju na mehkwỳ picapôn pa
Roman 15.5-6; Epet 4.1-6; Pirip 2.1-4
10-11Ỹhỹ Jeju kam me ikjêjê, he Crowkwỳj na mehkwỳ nõ te ri imã me akwỳ kwỳa cwỳrjapê ate me garkwa to me ajpẽn mãn na me garẽn, wa ite me garẽn par. Na wa ha me pajõ Pahhiti pê Jeju Crixtô japrỳa na me ana ahwỳ, ca nee hipêr ame ajpẽn mãn to me apa nare, ne nee hipêr ajpẽn to me apicapôn nare. Ne quêt catyt kam cama me ajpẽn par peaj ne, ne ajpẽn kam me ahônco, ne ate amji kam me gapac xà pyxit peaj kôt me apa. 12Ampo na? He ca ihhêj ne me gakrã cunea kam me amji jarẽn to me hane he:
— Me ipê Pawrô kôt me ipa catêjê — hane. Ne me gakrã kwỳ me amji jarẽn to:
— Me ipê Apôr kôt me ipa catêjê — hane. Ne me gakrã kwỳ me amji jarẽn to:
— Me ipê Petrô kôt me ipa catêjê — hane. Ne me gakrã kwỳ me amji jarẽn to:
— Me ipê Crixtô kôt me ipa catêjê — hane.
13Pỳhàpà! Xà ajkĩ Crixtô picapôn? Hãpà! He xà ajkĩ pa wa me acwỳrjapê pĩ kam ityc? Hãpà! Xà ajkĩ Jeju japrỳ kaj na jũm te ijaprỳ na cô kam me anõ cumrãr? Hãpà! He xà me gõ pahhi cwỳrjapê ate amji to me apicapôn ita jũ na, nee me apahàm nare? Ampeaj kam ate amji to me apicapôn ita na, me gũ na ipahàm. Na wa ha me awỳ, ca hacpỹa mã me cuprõ, ne me ajpẽn hônco tu na me apa.
234567891011Cu ha catyt kam Jeju to me amji japackre
17Ne ihnõ, ca cormã ihkaj na ame to, na wa nee ate me to impejti na me garẽn nare. He ca Jeju to ate amji kam me gapac prãmte, ate amji to me cuprõn xà ata kam, ajte nee catyt kam ihkôt me apa nare, ne cama me ajpẽn to kên to me apa. 18Ne mam ramã jũm te imã me garẽn to:
— Corinti jõ krĩ kam Jeju na mehkwỳ atajê ihtỳj Jeju to amji kam me hapac prãmte me cuprõ, ne cama amji to me ajcokjê, ne ajpẽn cuna mã mehcuhhê — hane. Wa ite jũm jũjarẽn xà ita kam ijapac ne amji mã:
— Ampeaj kam mõrmõ cute me hajỹr — hajỹr. 19Ne ampo na mõrmõ ca ame amji to ajcokjê? Mõrmõ me gakrã kwỳ pê catyt kam me ipa catêjê na, cute amji to me ipipẽ xà caxuw, hãn ne me amji to caprã. 20Ca hãn me pajõ Pahhiti to ate me amji japackre xà caxuw me cuprõ, ne me gàpàn xà ata kam, nee Jejua to ame amji japackre nare, ne amji too pit mã ame amji japackre. 21Ampo na? He ca nee me akwỳ jikaj nare. Ne me atũm prãm catêjê me akwỳ jirôa pê me apà, ne me akwỳ prãm na ame apa. Ne me akwỳ me ikõa to me ikõ, ne me ajpã, ne me akwỳ mã kôr cakrô, nee mehkõm nare. 22Pỳhàpà! Pom me acunea mã me gũrkwa ita? Quê me amã prãm, ca kaam me apà, ne ame ikõ. Mẽr ampo na mã ca ame Pahpãm na mehkwỳ caca, ne me cupê hamreare atajê mã amehpahàm to? He ate me hajỹr xà ita kam, jũ wỳr wa ha me apejti to me amã icakôc. Na wa ha quêt catyt kam me amã me pajõ Pahhiti to amji japackre xà jõ kur to hahkre.
Jeju to pahte me amji japackre xà
23-24Pê me pajõ Pahhiti, ite me amã ita to hahkre xà to imã hahkre, pê wa ramã me amã to hahkre to hane he. Pê me Jeju kên mã me mẽn xà ata jõ caxware kam, pê pãw py, ne hũrên hakryti na, Hũm mã amji jarẽn jirô pê, ihkryj ne ihkôt me ipa catêjê cunea mã hõr pa. Ne me cumã:
— Pãw ita pê me gahpan xà na cute me ijĩ to kên ata pyràac, na ca ha ita caxuw ate mehkur xà ata kam, atỳj me ito amji japackre — hane. 25Ne pê me hàpàn jirô pê, hanea ne ihkõm xà ata py, ne to hanea ne me cumã:
— Ampo cacô ita ri, Pahpãm me, me pahte me ajpẽn par xà intuwti na harẽ. Na ri ampo cacô ita pê icaprôa te me acwỳrjapê ipijaxwỳr pyràc, na ca ha ita caxuw ate me ampo cacô to me akõm xà ata kam, ca ha atỳj me ito amji japackre — hane. 26Mẽr hõhõ, ate Jeju to me amji japackre prãmte, ca ha me pãw ita ku, ne me ampo cacô ita to ikõ. Ne me hàpàn xà me, mehkõm xà ata quê ha mehcunea mã, me pancwỳrjapê me pajõ Pahhiti pê Jeju tyc na harẽn ita na, quê ha ahnaa hacpỹ ne amji jaxà.
27Cwỳrjapê quê ha jũmjê te, me pajõ Pahhiti to me amji japackre xà jõ to cute me cuprõn ata kur na, mehpahàm nare kam, mehkur ne amehkõm na, quê ha me pajõ Pahhiti te mencwỳrjapê ihtyc xà catia to, ihtyc ata to mencri, ne me to hõkrenõ, ne amehtũm. 28-29Ỹhỹ, quê ha jũmjê te me hàpàn xà ata kam, nee mencwỳrjapê Jeju tyc xà ata to me amji kam hapac nare kam, cama ame hàpàn, ne amehkõm na, quê ha me taa me amji curê mã me amji mẽ, ne quê ha Pahpãm ihkên mã me cumẽ. Cupate, ca ha xa ate amji kam gapac xà to, ate amji pyràc xà ata to amji kampa, ne ahna amji kôpĩ, jirô pê, ca ha cormã pãw ata krẽ, ne cormã ihkôt ampo cacô ata to ame ikõ.
30Ca nee ihhêj ne ame ita ton nare cwỳrjapê ri me akwỳ jàhtôa ne me kàj xà, ne me akwỳ jàhtôa ne mehpeacre, ne me akwỳ kwỳ tyc. 31Nãmri cu ha pahte amji kam me pajapac xà na ampeaj kam me amji kôpĩr na, quê ha nee me Pahpãm me pahcurê mã me pamẽn nare. 32Ne Pahpãm pê Pahhiti te me pahcurê mã me pamẽn xà ata to me pajapackre, ne to me pahcuhtac, mãr cu nee mehkrã kên te mehkên mã mencjêj xà ata mã, mehkôt me paxàr nare.
33Na ca ha me ikjêjê, ate me pajõ Pahhiti to me amji japackre xà caxuw me cuprõn na, ca ha xaa me ajpẽn jikaj, ne me cuprõ, ne cormã me apà. 34Ne quê ampeaj kam me anõ mã prãm, ca ha gũrkwa ri apà, mãr ca nee ate me cuprõn xà ata kam, ate me to amji kam gapac xà kaj na, gàpàn nare. Ca ha ate me to hajỹr na, quê ha ihtỳj Pahpãm me acurê mã me amẽ. Hamre, wa ite me amã ita pit jarẽn, ne ihkwỳ, wa ha xa curi icato, ne cormã me amã harẽ, ca ha me hahkre pej.
12Pê Pawrô Pahpãm Carõ Pejti to me cumã hahkre
Roman 12.6-8; 1 Petrô 4.10-11; 1 Jowãw 4.1-2
1Ỹhỹ Jeju kam me ikjêjê, imã me apê Pahpãm Carõ Pejti te me amã ampo jõr xà ata jahkre kêatre na me ato prãm nare. Na wa ha ita caxuw me amã to hahkre, ne ihcunea na ihkôt me amã harẽ. 2Xà cormã mam me apê Pahpãm jahkre kêatre ata to mã, ca ame amji japackre? Por pê pahpãm cahàc krekà tĩr nare, kam ampo hamreare ata to me amji mã ahêj, pê ihtỳj ajco me ato ihhimpej to ipa, na pê ca ajco atỳj ihkôt me apa, ata to amji japackre.
3Ne ita kam nee cute hajỹr nare. Quêt Pahpãm Carõ Pejti tĩar ata, ihtỳj me ato ihhimpej to ipa, ne taa mã ri me pamã Jeju pê me pajõ Pahhiti na harẽ. Cwỳrjapê quê ha jũm te harẽn to:
— Jeju ita kêanre — hajỹr na, quê ha ramã Xatanaj carõ kên ata, ihcakôc xà ata na to ihhimpej, quê ha to ihcakôc. Ne nee quê Pahpãm Carõ Pejti jũm ata jũm to ihhimpej to hajỹr nare. Ne quê ha jũm te Jeju jarẽn to:
— Jeju pê Pahhiti — hajỹr na, quê ha ramã Pahpãm Carõ Pejti ata to ihhimpej, quê ha harkwa kôt harẽn to hane. He nee quê ampo carõ kên ata hũjarẽn xà te hajỹr na jũm to ihhimpej nare.
Pahpãm Carõ Pejti ajteare mã me pamã cute amji jahkre pej xà gõ
4He Pahpãm Carõ pyxit peaj cakrô, ihtỳj me pamã ahpỹanre na ajteare mã, me pahte amji kam me pajapac xà te amji jahkre pej xà atajê jõr to ipa. 5Me pajõ Pahhiti pyxit peaj cakrô, cu ahpỹanre na ajteare mã, cumã me pajàpên xà pihho jàhtôa to me apê. 6Ne Pahpãm pyxit peaj cakrô, mã ahpỹanre na cute me pamã ajteare mã, me pahte amji kam me pajapac xà te amji jahkre pej jõr par, mãr cu ahpỹanre na, ajteare mã cumã to me apê.
7Ne Pahpãm te me pahcunea to impej prãmte ahpỹanre na, ajteare mã, hirãa pê me pahcunea mã Carõ Pejti te amji jahkre pej xà atajê jõr par. 8Pahpãm Carõ Pejti hãn ne mehkwỳ mã ahpỹanre na, me hàpên xà pihho jõr to ipa. Ne taa, mehkwỳ kwỳ mã, ihcakôc xà te amji jahkre pej krã kreti jõr to ipa. Ne taa, mehkwỳ kwỳ mã, ihcakôc xà to cute me hapackre xà jõr to ipa.
9Ne taa, mehkwỳ kwỳ mã, cute amji mã me Jeju to ihhimpej xà tỳjti jõr to ipa. Ne taa, mehkwỳ kwỳ mã cute me hà catêjê caprãr xà caxuw me cumã carôt jõr to ipa.
10Ne taa, mehkwỳ kwỳ mã, cute amjia kôt me hàpên xà pihhoti ton xà nare atajê ton xà caxuw me cumã carôt jõr to ipa. Ne taa, mehkwỳ kwỳ mã, cute me Pahpãm jarkwa to mehcakôc xà caxuw me cumã amji jahkre pej jõr to ipa. Ne taa, mehkwỳ kwỳ mã, cute me Pahpãm Carõ te amji kam hapac xà pejti me, ajteare mã jũm te amji kam hapac xà kêanre jahkre pej xà jõr to ipa. Ne taa, mehkwỳ kwỳ mã, ajteare mã cute mehcakôc xà pihho to mehcakôc xà jõr to ipa. Ne taa, mehkwỳ kwỳ mã, cute mehcakôc xà pihho to mehcakôc xà ata kôt harẽn to capô xà jõr to ipa.
11Ne por Pahpãm Carõ pyxit peaj ata ri, ampo itajê cunea to. Ne taa, ahpỹanre na cute me cumã amji kam hapac xà jõr to prãmti atajê jõr to ipa.
Jeju na mehkwỳ pê hĩ kam cukrã xà pyràac
Roman 12.3-8; Epet 1.22-23; 4.11-16
12Me pajĩ pyxit peaj, ne ampeaj kam, kam me pahcukrã xà jàhtô, ne me pahcukrã xà ita te amji to cuprõn, ne amji to me pajĩ pyxit peaj. Ita jĩkjê na mã, me pajàhtôa cakrô me papê Jeju na mehkwỳ pê hĩ kam cukrã xà atajê pyràac. 13Pê mam me pahkwỳ kwỳ pê Juta catêjê, ne me pahkwỳ kwỳ pê krĩxàre cahkrit, ne me pahkwỳ kwỳ pê amjia kôt amji mã me hàpên catêjê, ne me pahkwỳ kwỳ pê cama jũm mã me hàpên catêjê. Ne ahpỹanre na ajpẽn caxuw ajco me papa cakrô, pê Pahpãm Carõ pyxit peaj, ne me pahto cuprõ, ne me pahto Jeju na mehkwỳ. Ne me papê Jeju jĩ pyxit peaj ata pyràac. Ne hanea ne pê Pahpãm Carõ Pejti me pahcunea mã amji gõ.
Me pahcukrã xà itajê ajpẽn pê ajteare mã cakrô, me pamã ihcunea na prãm
14Ne me pajĩ pyxit peaj kam, ahpỹanre na me pahcukrã xà, hàpên xà caxuw, me pahkam ihcuhhê. Ne nee mã me pahkam me pahcukrã xà nõ pyxit nare. 15Quê ihhêaj to me pajĩ par amji jarẽn to:
— Nee ipê gũhkra nare, na ri nee ipê gĩ kam acukrã xà nare — hajỹr cakrô, quê ha cormã cupê me pajĩ kam me pahcukrã xà ata na. 16Ne quê ihhêaj to me pajapac amji jarẽn to:
— Ipê gapac ne nee ipê ato nare, na ri nee ipê gĩ kam acukrã xà nare — hajỹr cakrô, quê ha ihtỳj cupê pajĩ kam pahcukrã xà ata na. 17Ne quê me pajĩ cunea pê me panto pit, jũ mã cu ha me, ne ame awpa? Nare quê me pajĩ cunea pê me pajapac pit, jũ mã cu ha me, ne me ampo pã? 18Mẽr hõhõ, pê Pahpãm me pajĩ kam ahpỹanre na, cute me pajĩ kam me pahcukrã xà pyxwỳr prãmti ata na pê kam hũxwỳ. 19Quê ha me pahkam pahcukrã xà nõ pyxit na mã, quê ha nee cupê me pajĩ nare. 20Ne nee cute hajỹr nare, ne me pajĩ pyxit peaj kam, ampeaj kam me pahcukrã xà jàhtô.
21Cwỳrjapê quê nee me panto me pajũhkra mã harkwa to:
— Imãa icaxuw akôt hamreare, nare, nee imã ana ihprãm nare — hajỹr nare. Nare, quê nee me pahkrã me pahpar mã harkwa to:
— Nee imã ana ihprãm nare — hajỹr nare. 22Ne me pahcukrã xà kwỳ peacre cakrô, mã ihtỳj cumã ihkwỳ na ihprãm. 23Ne nee me pahcukrã xà kwỳ kwỳ impejti nare cakrô, cu ha pahtỳj me hamãr to impeaj ne. Ne me pahcukrã xà kwỳ kwỳ to, nee jũmjê mã me papipẽ xà nare, ne to papipẽ na me pahpahàm, na cu ha ihpro ne ame to papa. 24-25Ne me pahcukrã xà impejti kam me pahpahàm nare atajê ri, nee ihpro xà nare, cu ha pahtỳj põ pê ame to papa. Ne Pahpãm mã me pahcukrã xà atajê pyxit peaj, na quê nee apu ajpẽn japu nare, ne quêt cumã ihcunea te ajpẽn jamãr na to prãm. Cwỳrjapê ri cute me pajĩ kam me pahcukrã xà itajê cunea pyxwỳr, ne to cuprõn. Ne ihkwỳ impej nare atajê ri, Pahpãm te ihkwỳ jirôa pê to impej. 26Ne quê ha me pahcukrã xà nõ pyxit ne hà, quê ha ihcahhur cunea ihkàj xà ata cajpẽ, ne hũ na ihpeacre ne. Ne quê ha ihnõ pyxit ne impej mã ihpỳm, quê ha ihkôt ihcahhur cunea impej mã ihpỳm, ne hũ na hakry.
Pê Pahpãm, cute mehkwỳ to impej xà caxuw mehkwỳ pyxwỳ
27Jĩkjê na mã me papê Jeju Crixtô na mehkwỳ atajê cunea pê hĩ pyràac, ne ahpỹanre na me papê cukrã xà. 28Pê Pahpãm ahpỹanre na cute mehkwỳ jamãr ne to impej xà caxuw, mehkwỳ to ôjtô ne me hũxwỳ.
Ne mam cati mã itajê pê ihkra pê Jeju jarkwa na memprar catêjê.
Ne ihcote na itajê pê, Pahpãm jarkwa to cute me cumã mehcakôc catêjê.
Ne ihkôt itajê pê, Jeju te amji kam hapac xà to me cumã hahkre catêjê.
Ne ihkôt itajê pê, Pahpãm carôt kôt cute amjia kôt me hàpên xà pihhoti ton xà nare atajê ton catêjê.
Ne ihkôt itajê pê, Pahpãm carôt kôt cute me hà caprãr catêjê.
Ne ihkôt itajê pê, mehkwỳ tehcajpar catêjê.
Ne mehkôt itajê pê, mehkwỳ to mehhimpej catêjê.
Ne hanea ne mehkwỳ pê mehcakôc xà pihho to mehcakôc catêjê.
29Xà ajkĩ mehcunea pê Jeju jarkwa na memprar catêjê? Hãpà! Nare mõrmõ, mehcunea pê Pahpãm jarkwa to me hapackre catêjê? Hãpà. Nare, mõrmõ, mehcunea pê Jeju te amji kam hapac xà to me cumã hahkre catêjê? Hãpà. Xà mehcunea Pahpãm carôt kôt amji kôt me hàpên xà pihhoti ton xà nare atajê ton to me ipa? Hãpà. 30Nare, mehcunea Pahpãm carôt kôt me hà caprãr to me ipa? Nare, xà mehcunea Pahpãm carôt kôt me harkwa pihho to mehcakôc to me ipa? Nare, xà mehcunea mehcakôc xà pihhoti atajê kôt harẽn to me capô to me ipa? Hãpà. He ahpỹanre na cute me hàpên xà ton xà pit. 31Ne ihtỳj me amã, Pahpãm te mam cati mã me amã me gàpên xà impejti jõr atajê juwahi to prãm. Ne hàpên xà ata pê Pahpãm jarkwa pejti to cute me hapackre xà. Ne ampo itajê cunea jirôa pê cute amji kam hapac xà impej ata, wa ha cormã me amã harẽn to hane he.
13Me pamã ajpẽn kĩnti xà ata ri ampo cunea jirô pê cati ne impej
Jowãw 13.31-35; Carati 5.13-15; Coroxo 3.12-14
1Imã pjê me côjkwa kam mehkrĩ atajê jarkwa cunea to icakôc jahkre pej cakrô,
imã mehcunea kĩn nare ita kam,
quê ha ite me harkwa to icakôc xà ata pê ihhêj rũm wakỳti kràkràc jõkre, ne ihkôt hamreare ne.
2Wa Pahpãm jarkwa to me hapackre to ipa, ne hanea ne imã ampo cunea jahkre pej, ne hanea ne imã ampo pimxur, ne hahkre kêatre atajê cunea jahkre pej,
ne hanea ne ite Pahpãm to amji mã ihimpej xà ata kôt itỳj jũ kam kẽnti nõ catia to antuw jahkre pej cakrô,
imã mehcunea kĩn nare ita kam ri,
nee Pahpãm mã ipê jũm nare,
ne cupê ampo cunea na ijamreare.
3Wa ite ijàhcukrêj cunea to ipicràn par, ne hanea ne cama ite, Jeju to amji mã ihimpej cwỳrjapê,
cute me ijĩ tĩar to caxàr na me hamã, mã cute me to caxàr cakrô,
imã mehcunea kĩn nare ita kam,
quê ha imãa ihcunea na ihkôt hamreare ne.
4Wa ha imã mehcunea kĩn na mã,
wa ha amji mã me to ijàhtũm ryti to ipa.
Ne hanea ne me kam ijàhcajrẽnti to ipa,
ne nee hanea ne me hũ na amji to prãm to ipa nare.
Ne nee hanea ne amji to ijàmnãn to ipa nare. Ne nee amji to icati prãm to ipa nare. 5Ne nee hanea ne apu amji mã quêt to ipa nare.
Ne nee hanea ne, amji to pit mã apu amji kam ijapac to ipa nare.
Ne nee hanea ne ampo cunea kôt ame kam icryc pyrentu nare.
Ne nee hanea ne jũm te apu ito kên ata to amji japackre nare. 6Ỹhỹ, wa ha imã me ikwỳ kĩn na mã, wa ha nee cute me ampo kên ton xà ata pyrên ijakry nare.
Ne quêt cute me ampo pej ton xà ata pyrên ijakryti to ipa. 7Quê ha imã me ikwỳ kĩn na mã,
wa ha mentête ijàmtàr to ipa ita na.
Ne wa hanea ne Pahpãm to amji mã ihimpej to ipa ita na.
Ne hanea ne Pahpãm to ite amji mã hajỹr ita kam, itỳj me ikwỳ to amji mã hajỹr to ipa ita na.
Ne wa hanea ne ampo cunea kam, ihcunea na ijũcanãr to ipa ita na.
8Ne me pamã me pahkwỳ kĩnti xà ita, jũ caxuw me papê hamre xà nare.
Ne ihkĩnte, cu ha pahtỳj jũ caxuw Pahpãm jarkwa to pahte me hapackre xà ita to me tojnõ.
Ne hanea ne, cu ha pahtỳj jũ caxuw me pahcakôc xà pihho to me pahcakôc to me tojnõ.
Ne pahte me ampo jahkre pej atajê, cu ha pahtỳj me to pajapac kêt partu. 9-10Ỹhỹ, cu ha mam me pahnõ ampo jĩkjê crire ne cupy, ata to ma amji jamãr to papa,
ne jũ caxuw ihcunea na cupy, ne ihkôt ihcunea na ita to pit mã amji kam me pajapac to me papa,
ne nee hipêr hĩkjê incrire ata to me amji japackre nare.
Jĩkjê na mã, amcro itajêa kam me pamã ampo cunea jĩkjê kryjre ne hahkre pej.
Ne hanea ne Pahpãm jarkwa to me hapackre xà jĩkjê incrire to, cu ame hapackre to me papa.
Ne cu ha jũ caxuw ampo itajê cunea jahkre pej.
11Ne pê wa cormã ipê ahkrare ria mã, itỳj ahkrare cakôc xà ata to icakôc,
ne ahkrare te amji mã to ihhimpej xà ata to amji mã ihimpej.
Ne ikà, ne ite ahkrare te amji kam hapac xà atajê cunea rer, ne hicu.
Jĩkjê na mã, cu amcro itajêa kam, me papê ahkrare pyràac, pjê ita kam.
Ne jũ caxuw Pahpãm wỳr me pajàpir xà ata pê ramã me pahkà pyràac,
na cu ha nee hipêr pjê kam ampo itajê to me amji japackre prãm nare. 12Ne cu ha hanea ne irĩt xà nõ wejti cakênti kam,
te ame amji pupun pej prãm,
ita jĩkjê na mã, cormã nee me pahte me Pahpãm pupun pej nare cakrô,
cu ha pahtỳj jũ caxuw Pahpãm kuc ri me hõmpu,
ne me ajpẽn pupu.
Ne cormã ita kam, me pamã Pahpãm jahkre pej crire, ne cu ha pahtỳj jũ caxuw ihcunea na me Pahpãm jahkre pej to hanea,
pom quê ihcunea na cumã me pajahkre pej he.
13Ne cu cormã me Pahpãm jikaj ita kam,
cu ha pahtỳj amji mã me to pahhimpej to me papa rohnỳtti mã.
Ne hanea ne pahte amji mã me to hajỹr ita kam,
cu ha pahtỳj me hikaj to me papa rohnỳtti mã.
Ne hanea ne me pamã mehcunea kĩn rohnỳtti mã.
Ne pahte amji mã me pahkwỳ kĩn ita ri,
quêt ihkwỳ itajê jirôa pê cati ne impej.
15Hacpỹa mã Jeju Crixtô tĩr xà to me hapackre xà
1Ỹhỹ Jeju kam me ikjêjê itajê, wa ha mam ite me amã Jeju pê me pahpytàr catê jarẽn ata to, ate me amji japackre prãmte, wa ha hipêr me amã harẽn to capô. Pê wa me amã harẽ, pê ca ahna me amji capa, ne atỳj Jeju to amji mã me ahimpej kam me to acrà tu. 2Ne pê wa me amã harẽn pejti to harẽ, pê ca amji mã me to hajỹr xà ata kôt ri, Jeju te me apytàr. Na ca ha ite me amã harẽn ita to amji mã me hajỹr tỳaj kam me to acrà tu ne. Nãmri ca ha ate amji mã me to hajỹr xà ita jicu na, ca ha Jeju to ate amji mã me ahimpej xà ata kôt hamreare ne.
3-4Pê wa Jeju na ijũpar xà ata ri ihkwỳ jirôa pê cati ne impejti, ata pê wa me amã harẽn to hane he:
“Pê Jeju Crixtô me pahkên cwỳrjapê ty,
pê me harêt,
pê ahna amcro incrê jirô pê,
hacpỹa mã ihtĩr” hane.
Ne pê ramã Pahpãm jarkwa na ihkàhhôc kam ahna mehhôc ata na ri cute hajỹr. 5Ne hacpỹa mã ihtĩr jirô pê, pê Petrô mã amji to ajpẽ. Ne hanea ne hapu na, ihkôt me ipa catêjê te tôxi atajê mã amji to ajpẽ. 6Jirô pê mã pê, Jeju kam me pahkjêjê jàhtô te quĩjẽnta jirôa pê me cumã amji to ajpẽ. Ne pê me hõmpu atajê kwỳ ramã amehtyc, ne cormã me hàhtôa ne mehtĩar na ame ipa. 7Jirô pê mã, pê hanea ne Tijac mã amji to ajpẽ, ne ihkôt harkwa na memprar catêjê cunea mã amji to ajpẽ.
8Ne me hicu xàa kam hanea ne cute imã amji to ipipẽ, ne hapua na ite hõmpun xà ita pê ihhêj rũm, ahkrare te ihpỳpỳm xà kaj na ihpỳpỳm ata pyràac. 9Wa hapu na icator ita kam, wa mam Jeju jarkwa na memprar catêjê atajê cunea japyre mã, ne icrire. Ne imãa ipê Jeju jarkwa na imprar catêjê nõ caxuw ipej nare. Ampo na? He pê wa ajco ite Pahpãm na mehkwỳ to kêanre to prãm to, ajco itỳj me hahêr to ipa. 10Cakrô mã nee ite Pahpãm to kên ita jahpan xà na, cute icaca nare, ne ihtỳj quêt cute, ite cumã harkwa na iprar catê na amji mã icapi, ne Pahpãm te ito impej xà ita kôt hamre nare, na wa itỳj cumã ijàpên to ipa. Ne Pahpãm te, ite cumã ijàpên xà na itehcajpar xà ita kam, wa harkwa na cumã memprar catêjê cunea jirôa pê cumã ijàpên to catia to ipa. 11Wa ha ite mãn me amã Jeju jarẽn na, nare, me cute mãn me amã harẽn na, quê ha nee ahna jũ mãn nare. Ampo na? He me ijũjarẽn xà itajê pipẽn pit. Ne ate ahna me ipar xà atajê to, ca atỳj amji mã me hajỹr to me apa.
Hacpỹa mã me pahcunea tĩr xà to me hapackre xà
12Wa hirãa pê me amã hacpỹa mã Jeju Crixtô tĩr na harẽn to me ipa ita kam, jũ mã ca ha ajte me anõ amji mã mehtyc jarẽn to:
— Nee hacpỹ mã mehtyc tĩr xà nare — hane. 13Quê ampeaj kam cute hajỹr na, quê nee hanea ne hacpỹ mã Jeju Crixtô tĩr xà hamreare. 14Ne nee hacpỹa mã Jeju Crixtô tĩr nare ita kam, quê ha ite me amã ita na harẽn xà ita kôt hamreare ne, ne hanea ne ate amji mã me to hajỹr xà ita kôt hamreare ne. 15Ne cormã ihnõ te hajỹar he. Quê nee hacpỹa mã mehtyc tĩr xà nare na mã, quê nee Pahpãm hacpỹa mã Jeju Crixtô to ihtĩr nare ita kam, wa cama ite me amã Pahpãm te Jeju to ihtĩr jarẽn xà ita to ame amã ihêj. Ne hacpỹa mã ihtĩr ita kam, jũ mã wa me, ne ame amã ihêj?
16-17Quê ha hacpỹa mã mehtyc tĩr xà hamreare na mã, quê ha nee hanea ne Jeju hacpỹ mã ihtĩr nare. Ne quê nee Jeju Crixtô hacpỹa mã ihtĩr nare na mã, quê ha hanea ne ate amji mã me to ahimpej xà ata kôt hamreare ne, na ca ha cormã me akên mã me axà, ne kam me apictor xà itajêa kam ame apa. 18Ne me pahkwỳ te Jeju Crixtô to amji mã mehhimpeaj kam amehtyc atajê, quê ha ihtỳj hanea ne Pahpãm kaj na me acto. 19Ne quê ha Jeju Crixtô pjê ita kam pit mã me pajamã, ne nee me pahtyc xà jirô pê, pahte me amji pupun xà kêanre atajê jahpan xà na, me pamã ampo jõr nare na mã, cu ha nee ame amji mã hamãr nare, ne mehcunea jirôa pê me pahkên mã me axà.
Cu ha me pahcunea, Jeju cukwa kam, hacpỹa mã me pahtĩr
Me Hàpên Xà 26.23; Ipipẽ Xà 20.1-15
20Ne nee cute hajỹr nare ita kam, quêt ampeaj kam mam ihtĩr cakônĩ to hacpỹa mã ihtĩr, ata na quê ha hanea ne, ihkôat hacpỹa mã mehtyc atajê pê hũràc peaj, ne mehcunea hacpỹa mã mehtĩr. 21-22Ne pê hũmre pyxit peaj pê me panquêtti pê Atãw to kên ata cukwa kam ri, me pahcunea tyc xà. Jĩkjê na mã, hũmre pyxit peaj pê Jeju Crixtô ata cukwa kam, cu ha quêt me pahcunea hacpỹ mã me pahtĩr. 23Quê ha mam hacpỹa mã Jeju Crixtô ihtĩr, ne ihkôt quê ha hacpỹ ne côjkwa pĩn amji jaxà ne wrỳ, me ajkaam, quê ha me cupê me hõ tekjê catêjê atajê hacpỹa mã mehtĩr. 24Ne curia quê ha ampo cunea jicu xà kam ahtwỳ. Quê ha Jeju Crixtô, Hũm curê xwỳn pê Xatanaj na mehkwỳ jõ pahhi catêjê carôt tỳjti atajê, cunea tohjê. Mãr quê nee hipêr pjê kam mehkrĩ catêjê to ihhimpej nare, ne quêt cute Hũm kam hapac na me to, quê ha me kampa.
25Ne quê ha Jeju Crixtô me to ihhimpej to ipa ita kam, quê ha ahnaa Hũm curê xwỳn catêjê cunea ihkra par krac ri me nõr na me to, quê ha me nõ. Quê ha cute me tohjê na me hahkre pej xà na, me hipy ihpar xãm. 26Ne quê ha me pahtyc xà pê me pahcurê xwỳn ata, quê ha hapua na hicu xàa kam me to hamre. 27Pê Tawi xwỳ Pahpãm jarkwa kôt hõ kàhhôc kam ihhôc to:
“Ỹhỹ, Inxũ Cati,
ate ampo cunea to me ihimpej xà na me ixãm,
ne ate ampo cunea ton itajê to me ihimpej,
ne hirô pê me icuhhê na me iton” hane.
Ne Pahpãm te ihkra curê xwỳn catêjê cunea to ihhimpej prãm to, cumã to ihcakôc to hajỹr. Ne nee ihkra te Hũm Cati to ihhimpej xà na cute to cumã ihcakôc to hajỹr nare. 28Ne quê ha xa Pahpãm, ihkra pê Jeju krac ri mehcunea xàr na me to, ne cute me to ihhimpej na me to, jirô pê quê ha ihkra Hũm krac ri axà, mãr quê Hũm ihcunea to ihhimpej.
29Ne wa ha hipêr me amã hacpỹa mã mehtyc tĩr xà kôt harẽn kam to icrà tu ne. Ihhêj ne ramã jũmjê te mehtyc catêjê mã, cô kam me amji cumrãr. Ne ampo caxuw mã cute me hajỹr? Pom quê ha xwahna nee hacpỹ mã mehtyc mehtĩr nare ita? 30Quê ha nee hacpỹa mã mehtĩr xà nare na mã, wa ha nee ampo kên te ito kên xà itajê cunea mã icjêj to ipa prãm nare. 31Pỳhàpà, me ikjêjê! He wa amcro cunea kam ityc xà na pire mã ipa, cu me pajõ Pahhiti pê Jeju Crixtô kam me pahhônco xà ita kam, wa me apyrên ijakryte, me amã amji jarẽn to hane. 32Wa ita ri Epet jõ krĩ kam me icurê xwỳn catêjê me, me ijarkwa to kypê me ajpẽn cujtên nare. Mã me cupê ampo jàprêhti ata pyràc, ne cute me ikam ihtẽm, ne ajmãr me icuran. Ne hacpỹa mã mehtyc tĩr xà nare ita kam, mẽr ampo na mã wa ajte ampo kên itajê cunea mã icjêj to ipa? Ne quê nee hacpỹ mã mehtyc tĩr xà nare na mã, cu ha pajapacta ne mehkrã kên te me amji jarẽn xà kôt me amji kampa, ne me amji mã:
— Apẽ na ame pahtyc xà ita kam, hacme, ne ame ampo to ikõ, ne ame apà, ne cormã ita kam ame amji kĩn cri — hane.
33Co he! Me guphêa ne, mãr quê nee jũm me amã ihhêj nare! Ampo na? He cu ha mehkrã kên kôt me papa, ne me pahna ahtũm nare, quê ha hanea ne me pahkrã kêanre ne. 34He nee me akwỳ kwỳ mã Pahpãm carôt jahkre pej nare ita kam, xà nee ahna amji jũ na me apahàm nare? Na ca ha ate amji kam me gapac xà kên kôt me apa xà atajê jicu, ne hacpỹa mã hipêr catyt kam ate amji kam me gapac xà impejti kam me apa.
Hacpỹa mã me pahtĩr jirô pê me pajĩ tuw kôt harẽn xà
Ruc 20.34-36; Roman 8.10-11; Pirip 3.20-21
35Ca ihhêaj to me akwỳ kwỳ mehtyc te hacpỹa mã mehtĩr na me ajpẽn cukij to:
— Quê ha jũm ty, ne ramã hĩ ihcacu, jũ mã quê ha Pahpãm ramã hĩ jamre ata to, ne hacpỹa mã to ihtĩr? Ne hĩ jũ to quê ha hacpỹa mã cumã ihtĩr, quê ha apu to ipa? — hane.
36Pỳhàpà! He apê amji jahkre kêatre! Pom ca ha ampo hy kre, quê ha xa ty, jirô pê cormã kam huprãj cato ita? 37Ne ca ha arỳjhy kre, nare, ampo hy kre, ne ihhy pit kre, ne nee ihcahkôa na ihkre nare. 38Ne Pahpãm te, ihtỳj ahpỹanre na ampo hy kre ata kam ihcahkô na, cute ton to amji mã ihprãmti xà ata na to. Mẽr hõhõ, pom ca ha ihhy pit kre, quê ha kam ihcakô cato ata, nee ihhy ata me ipipẽn nare, ne ajteare mã, ne hirôa pê impej. Hõhõ, ita jĩkjê na, quê ha jũm ty, quê ha me hĩ jarêt, quê ha hacpỹa mã ihtĩr, ne hĩ to cato ata, quê ha ajteare mã, ne mam ita jirôa pê impej.
39Ne pom ampo cunea tĩr itajê jĩ, ajpẽn pê ajteare mã. He ajteare mã me pajĩ, ne ajteare mã pryre jĩ, ne ajteare mã pryjara jĩ, ne ajteare mã tep jĩ.
40Ne côjkwa kam, ajteare mã me hĩ na me ipa. Ne pjê kam cute hajỹar ne ajteare mã me hĩ na me ipa. Ne pjê kam ampo pejti itajê, me côjkwa kam ampo pej itajê, ajwar impej cakrô, nee impej na ajpẽn na ipimràc nare. 41Ne ajteare mã pyt jàhcujro impejti ata, ne ajteare mã putwrỳ jàhcujro impejti ata, ne ajteare mã ahpỹanre na caxêre jàhcujro impejti atajê. 42Jĩkjê na mã Pahpãm te hacpỹa mã mehtyc to ihtĩr xà ata te hajỹar he. Ne cute mehtyc jarêt xà ata kam, quê ha ramã hĩ hamre to mõ. Ne hacpỹa mã ihtĩr xà ata kam, quê ha quêt hĩ ata ajteare mã, ne nee jũ caxuw hamre nare. 43Ne quê ha mehtyc jarêt xà ata kam, quê ha ramã ihkên ne ihpeacre, na quê ha nee hipêr jũm ahna prãm nare. Ne hacpỹa mã ihtĩr xà ata, quê ha quêt impeaj to impej, ne ihtỳj. 44Ne cute me harêt xà ata kam, quê ha me hĩ pit jarêt. Ne hacpỹa mã ihtĩr xà ata kam, quê ha quêt Pahpãm Carõ Pejti kôt hĩ tuw to ihtĩr ata to ipa. Ne pjê ita kam, me pajĩ itajê pê pjê tekjê atajê to pit mã me papa. Ne hacpỹa mã me pahtĩr jirô pê, cu ha côjkwa kam, Pahpãm Carõ Pejti kôt me pajĩ pê côjkwa tekjê atajê to ame papa.
45Pê Mojxe xwỳ jõ kàhhôc kam, ramã Pahpãm jarkwa kôt mam Atãw cator ata jarẽn to hane he:
“Pahpãm te pjê te mehĩ pê Atãw ton, ne hĩ jakre jakôr, mã hĩa na cute amji ton” hane.
Ne côjkwa pĩn Atãw nõa pê Jeju cator ata ri quêt ajteare mã, ne ihtỳj Carõa kôt me pahto ihtĩr. 46-47Pê mam Atãw ata pê pjêa tekjê, na pê Pahpãm pjêa to, to. Ne quêt hapu na Atãw nõa pê Jeju pê côjkwa tekjê ata, côjkwa pĩn Pahpãm Carõa kôt wrỳ, ata ri mam ita jirôa pê impej, ne cati. 48Ne pjê kam mam Atãw te amji kam hapac xà kôt me ipa catêjê atajê pê ri, pjê tekjê, ne me cupê hũràac. Ne quêt hapu na côjkwa pĩn Atãw nõ pê Jeju te amji kam hapac xà kôt me ipa catêjê atajê pê ri, côjkwa tekjê, ne me cupê hũràac. Cwỳrjapê quê ha me hĩ pê Jeju hacpỹa mã ihtĩr ata jĩa pyràc. 49Ne pjê te mam me panquêtti Atãw jĩ ata japua na ri, me pajĩ ita pê hĩa pyràc, na cu cormã ame to papa. Ita jĩkjê na, cu ha ame pahtyc jirô pê hacpỹa mã ame pahtĩr, ne me pajĩ pê côjkwa pĩn Jeju jĩa pyràc, na cu ha pahtỳj jũ caxuw ame to papa.
Côjkwa kam me pahkrĩ xà caxuw me pamã me pajĩ tuw na prãm
50Ỹhỹ, Jeju kam me ikjêjê, jũ wỳr quê pjê kam me pajĩ kam caprô ramã ihcacu to mõ itajê, côjkwa wỳr Pahpãm himpej xà wỳr api. Ne jũ wỳr quê me pajĩ itajê ihtĩar na ipa rohnỳtti mã.
51Cormã nee ate me ampo jahkre pej nare ata jarẽn na, me ikampa. He cu ha nee me pahcunea me pahtyc nare cakrô, cu ha pahtỳj caxuw ame pajĩ to antuw to hane he. 52Quê ha côjkwa pĩn hõhhi cakôr jicu xà ata jõkre kampa, me ajkaam, hũjarêan kam, cyt ne, me amji to antuw pyrentu. Ỹhỹ, ampeaj kam, quê ha mehtyc hacpỹ mã mehtĩr me ajkaam, cu ha me pahcunea nee jũ caxuw me pajĩ tyc xà nare ata wỳr me amji to antuw, mehtyc ne hacpỹa mã mehtĩr atajê mea mã. 53Ne me pajĩ ty, ne ihcacu xà wỳr pra itajê, ihtỳj cute amji to ipintuw xà pit, mãr quê nee jũ caxuw hipêr ihtyc nare. Nãmri quê ha nee cute amji to ipintuw nare na, quê ha nee Pahpãm cahê na ihkrĩ nare. 54-55Pê ramã Pahpãm jarkwa to mehcakôc catêjê pê Ixaj xwỳ me, Hôxêj xwỳ, harkwa kôt hõ kàhhôc kam hacpỹa mã me pahto pahtĩr, ne amji to me papintuw xà na ajwar mehhôc to:
“Me pahte me pahtyc xà pê me pahcurê xwỳn tohjê,
ne me to hamre partu.
He me pahtyc xà pê pacti pêrhy xà, ne ihtỳj me pahcãmxê.
Ne hacpỹa mã me pahtĩr xà ata pê pacti curan xà pyràac.
Na cu me pahtĩr rohnỳtti mã xà ita kam,
nee hipêr jũ caxuw me pamã me pahtyc xà cupa nare” hane.
56Cu ha Mojxe xwỳ jõ kàhhôc kam Pahpãm jarkwa jirô pê me pahpỳm xà ata pê pahte me Pahpãm to kên, cwỳrjapê ri ihtỳj me pahtyc xà. 57Ne jũm kôt mã pahte me pahtyc xà ita tohjê? He nee mã jũm kôt nare, me pajõ Pahhiti pê Jeju Crixtô kôt, cu pahte me tohjê. Na cu ha Hũm pê Pahpãm te me pamã ihkra pê Jeju kujahêc ata pyrên me pajakryti na cumã me amji jarẽ.
58Ỹhỹ, imã me ikjêjê kĩnti itajê, he ampo itajê cunea cwỳrjapê, ca ha atỳj me pajõ Pahhiti to amji mã me ahimpej kam me to acrà tu ne, ne nee jũ caxuw kam me apec nare. Ca me pajõ Pahhiti mã apê ita kam, quê ha nee me gàpên xà ita kôt apê hamre nare na, ramã me amã hahkre pej. Cwỳrjapê ca ha atỳj cumã gàpên xà ita to pit mã hupkre cahkô to me apa.