Filemón

FILEMÓN

Filemonbi kallari parluguna

Kai cartadaga apóstol Pabloga carcelbi gasha, Filemonmu kachasha Jesucristo wacharishka k’ipa sujta chunga shuj (61) wata shinabimi escribishka yuyachin. Filemonga Colosas pueblobi kausasha shuj sirvichun randishka esclavoda charijmiga. Kai Onésimo shuti runaga mitikusha, Romamu rishka. Chibi gashami Pablo Diosbuj Shimida parlaki crij tukushka. Chi k’ipa Pabloda alli ayudajmi gaga. Shina gakish Roma llakta mandashkabi nishka shinaga shujbuj esclavodaga na charigunallachu gashka, ashtanbish amomunmi vueltachina gashka. Pabloga Filemondaga “Onésimo kanmungarin yalli k’uyashka gaki ñukada japijma laya paida japingui,” nisha escribisha kachashka.

Pablo saludashkamunda

¹Cristo Jesusta parlushkamunda prezu tiyaguj Pablomi kai cartadaga wauki Timoteon ñukuchin igulda ruruj k’uyashka Filemonmu, ²shinalladi kambuj wasibi tandanukuj crijkunamu, pani Apiamu, ñukuchi laya soldado shina wauki Arquipomush kachanchi. ³Ñukuchij Taita Dios shinaidi Manduj Jesucristosh Paibuj kushka alligunada k’uilla kausidash kangunamu kuchun.

Filemonbuj k’uyimundash alli crishkamundash

^4-5Manduj Jesusta kan alli crisha shinaidi tuki linshuyachishkagunadash k’uyuj gashkadami uyugani. Shinushkamundaga Diosta mañusha kanda yuyarishaga Diosta <Diosolopai> nigunillami. ⁶Cristobi tuki alligunada charishkada kan illijta intindingu Paida crishkada parlachun Diosta mañani. ⁷Wauki Filemón, linshuyachishkagunaj shunguda kan kushiyachishkamundaga kambuj k’uyimi ñaubujmu rinada ñukamu manchanaidi kushiyachin.

“Onesimoda kutin japibai,” nishkamunda

⁸Chimunda ñuka Cristobi gasha kan imada ruranada jinchi shimigunan mandi pudini; ⁹shina gakish k’uyin gashkamundaga ashtan kanda rugaguni. Ñukaga ruku Pablomi gani. Cristo Jesusta parlashkamunda kununga prezush tiyaguni. ¹⁰Shinushaga ñukaj churi laya Onesimomunda kanda rugani. Carcelbi gasha crinabi paibuj taita laya1.10 Onesimoga Pablo carcelbi gasha parlakimi crij tukuga. tukugani. ¹¹Sarunga paiga kanmunga imakish na vali esclavomiga; kununga kanmush ñukamush imadash rurusha ayudangami.

¹²Ñuka manchanaidi k’uyashkadaga paidadimi kambujmu kachani. ¹³Alli Shimida parlushkamunda prezu tiyashkabi kambuj randi ñukada kaibi ayudasha ñukan sakirichunmi munugani. ¹⁴Shinash ñuka rugushka, ama mandushkallamunda ashtangarin kan kikin munin rurashka gachunmi, narij kan <ari> nijllabidijka imadash na rurush niganichu. ¹⁵Onésimo kambujmunda asha p’unllagunada laduyashkaga1.15 Onésimo mitikusha rikish Diosga Filemonbuj Onesimobukish allibujtaga ruraguga. Ro 8.28 paida na tukuribujta kan japichun chibujchari tukuga. ¹⁶Kununga paiga ña na watashka shinachu, ashtanbish watashkada yalli gashash munushka shuj wauki shinami. Ñukamunga manchanaidi alli munashkami, ashtan kanmungarin yalli alli rijsishka gashkamunda, Manduj Jesusta crij gashkamundash yalli k’uyashkami.

¹⁷Shinakiga kan ñukan igulda purij gashkamundaga, ñukada japijma laya paida japingui. ¹⁸Pai ima na allida rurashkakish na gashaga imada vueltachina gakish ñukada cobrangui. ¹⁹Ñuka Pablolladimi kaida ñukaj makin escribini. Chi cobrashkada ñuka pagashami. Kangarin, mushuj kausida japishkamunda ñukamu dibinguimi, shinash ña na parlushachu. ²⁰Ari, wauki, Manduj Jesusbi kai mañushkada ñukamu rurusha, Cristobi ñukaj shunguda kushichibai. ²¹Kan kazunada crisha, kai ñuka mañashkada ashtan yalli ruranada yachusha escribini.

²²Kanguna Diosta mañagushkamunda kangunada rikuchun Pai ñukada kachachunmi shuyaguni. Shinusha maibi ñuka samarinadash parijangui.

Tukurina yuyigunamunda

^23-24Cristo Jesusta parlushkamunda ñukan igulda carcelbi tiyuj Epafrasbish, shinaidi ñukan igulda rurujkuna Marcos, Aristarco, Demas, Lucasbish saludangunami.

²⁵Manduj Jesucristo kushka alliguna kangunan gachun.