Juan

SAN JUAN

Juanbi kallari parluguna

Pi escribiga: Jesusbuj yachagujkunapuramunda Juanchumi. Paiga Zebedeoj churi shinaidi Galilea llakta Betsaida pueblomundami. Juanchuga Kishpichij Jesusbuj yalli k’uyashkami gashka (Jn 21.7). Pai Éfeso pueblobi gashami escribishka yuyachin.

Pimu escribishka: Asia llakta crijkunamu, chi llaktamunda karubi kausaj israelgunamush Jesusta rijsichunmi escribishka.

Jesucristo wacharishka mashna wataguna k’ipabi escribishka yuyachin: iskun chunga pichka (95).

Imadadi parlagun: Jesús Diosbuj Churidi gashkada rikuchin. Judeabi gasha Paiga kutin kutin yachachisha, pi na ruri pudishkagunada ruragushka. Kai librobiga tuki laya yachachishkagunash rurashkagunashmi tiyan. Tuki tukushkagunamunda ashaguna kaibi tiyan: Jesusga yachagujkunada agllashka (1.35-51), Nicodemoga Jesusta rikungu rishka (3.1-21), Samaria warmin Jesús parlanukushka (4.1-26), yaku jawabi Jesús purishka (6.16-24), Jesusga, “Narikish Abraham tiyajllabidimi Ñukaga ña tiyagani,” nishka (8.31-59), cigu wacharishka k’arida Jesús alliyachishka (9.1-41), alli michij gashka (10.1-21), Lazaroda kausachishka (11.1-44), Jerusalenmu Jesús waigushka (12.12-19), yachagujkunaj chakida Jesús maillashka (13.1-17), Jesusbuj yachagujkunamunda Diosta mañashka (17.6-19), Jesusta chakatashka (19.1-42), Pai kausarishka (20.1-31), Simón Pedroda perdonashka (21.15-25).

Parlashka Shimi aicha tukushkamunda

¹Taita Dios imadash narij rurujllabidimi, Parlashka Shimiga ña tiyaga, Parlashka Shimiga Dioskunmiga, chi Parlashka Shimiga Dioslladimiga.1.1 Parlashka Shimi nishaga Jesustami nin. Jesusga Dioslladimi gan. Shinushaga Jesús imada rurushka imada nishkash Dios ima laya gashkadami yachachin.²Tukida kallarikiga Paiga ña Dioskunmiga. ³Paimundami Diosga tuki ima tiyashkadash rurushka; ima tiyashkamundash Pai illujka, imadash na rurugachu. ⁴Paibimi kausiga tiyaga, chi kausiga gentegunajka p’unllayachij Luzmiga. ⁵Yanamangabi chi Luzmi p’unllayachin, shinaidi yanamangaga chi Luztaga na vinci pudishkachu.

⁶Dios kachushka k’arimi tiyaga, paiga Juanchu shutimiga. ⁷Pai rikushkada yachi chayachingu shamuga; pai nishkada uyusha tukiguna crichunmi, Luzmunda yachi chayachiga. ⁸Juanchuga na Luzchuga; ashtanbish Luzmunda yachi chayachichunmi kachushkaga. ⁹Tuki gentegunada p’unllayachij kabishkadadi Luzmi kai pachamu chayamuguga.

¹⁰Chi Parlashka Shimiga kai pachabimi tiyaga, Dios Paiyun kai pachada rurushka gakish, kai pachamundagunaga pi gashkadash na yachushkamundami na rijsigaguna. ¹¹Paibuj gentegunamumi shamuga, shinash Paibuj gentegunaga na japish nigagunachu. ¹²Ashtangarin mashnalla Paida japijkunamu, Paibuj shutibi crijkunamunga, Diosbuj wawagunadi tukuchunmi kuga. ¹³Paigunaga yaurmundama, aicha munimundama, kusa munashkamundamash na wacharishkachu, ashtanbish Taita Diosbuj munimundami Paibujti wawaguna tukunguna.

¹⁴Chi Parlashka Shimiga aicha tukushami, ñukuchin kausaga. Shujlla Churi gashkamunda Taitamunda japishka Pai k’uilladi gashkadami rikushkanchi. Pachunlladi k’uyi junda, imadash kabishkada parlujmiga. ¹⁵Juanchuga Paimundami kashna nisha yachi chayachiga: “ ‘Ñukamunda k’ipa shamujka, ñukada yalli valijmi gan, ñukamunda ñaubushadi tiyashkamunda,’ nisha Ñuka parlagushaga Paimundami nigugani.”

¹⁶Pai pachundi k’uyi junda gashkamunda, tuki ñukuchikish chi jawa chi jawa Dios kushka alligunada japishkanchi. ¹⁷Diosga mandushkagunadaga Moisesmumi kuga, ashtanbish k’uyidash, kabishka parludash Jesucristomundami japishkanchi. ¹⁸Diostaga rikidadijka pish na rikujchushka; shujlla Churi Dioslladi shinaidi Taitandij igulda gajmi ñukuchimu rijsi chayachishka.

Bautizaj Juanchu yachi chayachishkamunda

Mt 3.11-12; Mc 1.7-8; Lc 3.15-17

¹⁹Kaiga Juanchu kabishkagunada yachi chayachishkamigun. Manduj israelgunami Juanchuda <¿Pidi gangui?> nisha tapuchun, curagunadash levitagunadash Jerusalenmunda kachugaguna. Shina tapukimi,

²⁰paiga na pakushalla parlusha, “Ñukaga na Cristochu gani,” niga.

²¹“Shinadijka, ¿pidi gangui? ¿Dios nishkada parluj Eliaschu gangui?” nisha tapuki,

“Na paichuni,” niga.

“¿Shinaga Dios nishkada parlungu shamuna nishkachu1.21 Deuteronomio 18.18bi nishka shinaga Moisés laya Dios nishkada parluj kutin shujta Dios kachana gashkada crishami israelgunaga shuyajkunaga. gangui?” niki,

“Na,” niga.

²²Kutinlladi tapusha, “Shinadijka ¿pidi ganguiri? Ñukuchida kachujkunamuga pi gashkada parlanami ganchi. ¿Kanllamundadijka imada ningui?” niki,

²³Juanchuga Dios nishkada parluj Isaías parlashka shina niga, “ ‘Manduj Diosbuj ñanda derecho rurusha alli parijichi,’ nisha shitashka pushtubi kaparijmi gani.”1.23 Is 40.3

²⁴Juanchun parlarichun kachushkagunaga fariseogunamiga. ²⁵Paigunaga, “Kan Cristo na gasha, Eliasbish, Dios nishkada parlukish na gashaga, ¿imashadi bautizangui?” nisha tapugaguna.

²⁶Shina niki Juanchuga, “Ñukaga yakunmi bautizani, ashtanbish kangunapurallabidimi shujka tiyan, kangunaga na rijsinguichichu. ²⁷Paimi ñukaj k’ipa shamunga. Ñukaga Paibuj pargati watushkada paskungujllash na kabinichu,” niga.

²⁸Kaigunaga Juanchu bautizagushka Jordán yaku ch’imba ladumu gaj Betania pueblobimi shina tukuga.

Dios kachushka Malta Ovejamunda

²⁹Kayundij p’unlla Jesús paibuj kuchumu kuchuyamujta Juanchu rikushaga,

“Rikichi, Paimigun Dios kachashka Malta Oveja shina; Paiga kai pachabi kausujkunaj juchagunadash p’ichajmi gan,” niga. ³⁰“Ñuka parlagushkaga Paimigun; ‘Ñukamunda k’ipa shamujka, ñukada yalli valijmi gan, ñukamunda ñaubushadi tiyashkamunda,’ nishaga Paimundami nigugani. ³¹Ñukaidikish pi gashkada na yachuganichu, ashtangarin Israel genteguna rijsichun nishallami yakun bautizasha shamugani.”

³²Shinaidi kaidash Juanchuga yachi chayachigami: “Jawa pachamunda paloma shina uriyamusha Diosbuj Espíritu Jesusbuj jawabi tiyarijtami rikugani. ³³Ñukaga Pai pi gashkada chairijti na yachuganichu, ashtanbish yakun bautizachun ñukada Kachujmi, ‘Maijinbuj jawabi Diosbuj Espíritu uriyamusha tiyarin, Paimi Diosbuj Espiritunga bautizaj gan,’ nisha ñukamu parlaga. ³⁴Ñukaga Paida ña rikushkanimi, shinushami Paiga Diosbuj Churi gashkada yachi chayachini,” niga.

Jesusbuj kallari yachagujkunamunda

³⁵Kayundij p’unlla Juanchuga kutin paibuj ishki yachagujkunandi chibi gasha, ³⁶Jesús chibi purijta rikushaga, “¡Rikichi; Dios kachashka Malta Oveja shinaga Paimigun!” niga.

³⁷Shina parlujta uyusha chi ishki yachagujkunaga Jesusta katigaguna. ³⁸Paiguna katisha rigujta Jesús vueltusha rikushaga, “¿Imada mashkanguichi?” niga.

Shina niki paigunaga, “Rabí, ¿pibukidi kausagungui?” nigaguna. (Rabí nishaga Yachachij nishami nin.)

³⁹Shina niki Jesusga, “Jakuchi rikungu,” niga. Shina pibuki kausagushkada rikungu rishaga, ña tardi chusku uras shina gashkamundaga chi illujta tardidaga Paigunmi kainugaguna.

⁴⁰Juanchu parlushkada uyusha Jesusta katish rij ishkigunamundaga, shujka Simón Pedroj wauki Andikumiga. ⁴¹Imadash narij rurushaidimi Andikuga paibuj wauki Simonda japishaga, “Mesiastami japishkanchi,” niga. (<Mesías> nishaga Cristo nishkami gan). ⁴²Chimunda Andikuga Simonda Jesusbujmu pushusha riki, Jesús paida rikushaga, “Kanga Juanchuj churi Simonmi gangui; ashtanbish kununmundaga Cefas shutimi gangui,” niga. (Cefas nishaga Pedro nishkami gan.)1.42 Pedro shutiga griego shimibiga rumi nishami nin. Mt 16.18

Felipedash Natanaeldash Jesús kayushkamunda

⁴³Kayundij p’unlla Jesús Galilea llaktamu ringu munusha rigushaga Felipen tupanukusha, “Ñukada katimi,” niga. ⁴⁴Felipega, Andikush Pedrosh kausushka pueblo Betsaidamundamiga. ⁴⁵Felipega Natanaelda mashkungu risha japishaga, “Moisés escribishka Mandushkabi shinaidi Dios nishkada parlujkuna escribishkagunabi parlushka k’aridami japishkanchi. Paiga Jesusmi, Jozij churi Nazaretmundamigun,” niga.

⁴⁶Natanaelga, “¿Nazaretmundaga ima alligunadi llujshi pudingari?” niki,

Felipega, “Shinadijka jaku rikungu,” niga.

⁴⁷Natanael kuchuyamujta Jesús rikushaga, “Rikichi, kaimu shamujka, imabish na llagmuj, kabishka Israelmigun,” niga.

⁴⁸Shina niki Natanaelga, “¿Ima layamundadi ñukadaga rijsingui?” nisha tapuga.

Chimunda Jesusga, “Narikish Felipe kanda kayujllabidi, jigus yura ukubi gakimi kandaga rikugani,” niga.

⁴⁹Shina niki Natanaelga, “Rabí, ¡Kanga Diosbuj Churi, israelgunada Jatun Manduj ganguindi!” niga.

⁵⁰Shina niki Jesusga, “ ‘¿Jigus yura ukubimi rikugani,’ nijllabichu cringuiri? Kaidash yalligunadami rikungui,” niga. ⁵¹Shinaidi, “Kabishkadadimi kangunada nini: jawa pacha paskarijta shinaidi Aichayuj tukushka Churibimi Diosbuj angelgunaga ichimu urimu uriyagujkunada rikunguichi,” niga.1.51 Jesusga Jacob suñushkada ch’imbapurasha yuyachijmi. (Gn 28.10-17) Chi suñibi rikurij escalera shina tukunadami Jesusga nin. Chi escalera layaga jawa pachamu shinaidi Taita Diosbujmu chayachijmi.

Caná pueblobi boda tiyashkamunda

¹Kinsa p’unllabiga Galileabi gaj Caná pueblobi shuj boda tiyaga; Jesusbuj mamash chibimiga. ²Shinaidi Jesusbish Paibuj yachagujkunashmi bodamu shamuchun kayashkagunaga. ³Uvan rurashka vino tukuriki Jesusbuj mamaga Paidaga, “Ña vino illujkunami tukushka,” niga.

⁴Shina niki Jesusga, “Kan warmi, ¿ima nishadi shina ninguiri? Ñukaj uraska chairijti narij chayungandi,” niga.

⁵Shina niki Paibuj mamaga sirvijkunamu, “Pai ima nishkada rurichi,” niga.

⁶Chibimi israelguna Diosbuj ñaubuki maillarina yakuda churana sujta rumi p’unduguna tiyaga. Shuj p’unduga pichka chungama (50), kanchis chungama (70) litro yakuda apujkunamiga.2.6 Chi tuki sujta p’undugunaga chusku patsuj kinsa chunga (430) litro valimunda, sujta patsuj pichka chunga (650) litro valigamamami apuj gashkanga. Chi tuki vinoga pishtaj ministishkadash ashtandi yallimi ganmuga.⁷Chibimi sirvijkunamu Jesusga, “Kai p’undugunabi yakuda jundachichi,” niga. Shina nikimi p’undu shimigama yakuda jundachigaguna. ⁸Chimunda Jesusga, “Kununga ashawada ishisha bodada mingarishka k’arimu apichi,” niga. Shinami apusha rigaguna. ⁹Bodada mingarishkaga vinoda rurushka yakudami malliga, maimunda llujshishkadash na yachushalla; yakuda ishij sirvijkunallami yachugaguna. Chimunda bodada mingushkaga novioda kayushaga, ¹⁰“Tukigunami kallaribiga alli vinodadi rakinguna; kayushkaguna milgada ubiashka k’ipami yangalla vinodaga rakinguna. Ashtanbish kanga kunungama alli vinoda charishkanguindi,” niga.

¹¹Galilea llakta Caná pueblobimi Jesusga kai pish na ruri pudishka rikuchinan rikuchisha kallariga;2.11 Pish na ruri pudishkagunaga Jesús Pai Cristo gashkadami rikuchiga. Israelgunanga rumi p’undugunabi tiyuj yakunga Diosbuj ñaubuki linshu gangaj maillajkunaga. Jesusga chi yakudaga vinoda rurusha Paibuj yaurllamundami kishpiri pudinada rikuchiga. shina rurushami Pai k’uilladi gashkada rikuchiga; shinami Paibuj yachagujkuna Paida crigaguna.

¹²Chi k’ipaga Paibuj maman, Paibuj waukigunan, shinaidi Paibuj yachagujkunanbish Jesusga Capernaum-mu uriyaga. Chibimi shuj p’unllagunada sakirigaguna.

Diosbuj wasida Jesús linshushkamunda

Mt 21.12-13; Mc 11.15-18; Lc 19.45-46

¹³Israelgunaj Pascua pishta ña kuchuyamugukimi, Jesusga Jerusalenmu ichiyaga. ¹⁴Chibimi Diosbuj wasi pungubi wagragunada, ovejagunada, palomagunada k’atusha gajkunada shinaidi kuchkida cambiasha tiyajkunadash japiga. ¹⁵Chida rikusha Jesusga shuj waskada japisha dalinada rurushaga, tukigunada wagragunandi ovejagunandi, Diosbuj wasimunda llujshichisha kachuga. Kuchkida cambiajkunajtash, kuchkigunada pambabi tsirapasha piguga, mizagunadash t’angushtasha shituga. ¹⁶Shinaidi palomagunada k’atujkunadaga, “¡Kaimunda kaigunada anchuchichi! Ñukaj Taitaj wasidaga ama k’atuna wasida rurichichu,” niga. ¹⁷Chibimi Diosbuj Shimibiga, “Kambuj wasida Kambujlla gachun munushami manchanai shungundijta llakirini,” nisha escribishka tiyashkada Paibuj yachagujkunaga yuyarigaguna.2.17 Kai nishkadaga Davidmi shina nisha Diosta mañaga. Sal 69.9

¹⁸Chimunda israelgunada mandujkuna, “¿Imadi gangui kashna rurungujka? ¿Ima pi na ruri pudishkadadi rurusha rikuchisha ninguiri?” nisha Jesusta tapugaguna.

¹⁹Shina tapuki Jesusga, “Kai Diosbuj wasidaga p’akishtakish, kinsa p’unllabiga kutin shayachishallami,” niga.

²⁰Shina niki israelgunada mandujkuna, “Kai Diosbuj wasidaga chusku chunga sujta (46) watagunadami ruragusha shayachishkagunaga. ¿Kanga kinsa p’unllabichu jatarichisha ninguiri?” nigaguna.

²¹Ashtanbish Jesusga Diosbuj wasimunda parlushaga, Paibuj cuerpollamundadimi parluga.2.21 Diosbuj wasida p’akishtasha kutin shayachinada nishaga, Pai wañusha kinsa p’unllabi kausarinadami shina nigun. Kashna nishaga Pai tukida mandujti gashkada rikuchingu nigukish na intindigagunachu. Mt 26.60-61; 27.40; Mc 14.57-59²²Chimunda wañushkagunapuramunda Jesús kausariki, Paibuj yachagujkuna Pai shina nishkada yuyarigaguna, shinushami Diosbuj Shimi nishkadash Jesús parlushkadash crigaguna.

Jesús tukigunada rijsij gashkamunda

²³Pascua pishta p’unllagunabi, Jesús Jerusalenbi gasha pish na ruri pudishka rikuchinagunada ruraki, taugaguna chida rikusha Paibuj shutibi crigaguna. ²⁴Ashtanbish Jesús tukigunaj yuyida rijsishkamundaga paigunada na crigachu. ²⁵Pailladi gentegunaj shungu ima laya gashkada yachushkamundami, chi gentegunamunda maijin imada parlachunbish na ministiga.

Nicodemon Jesús parlanukushkamunda

¹Israelgunapuramunda shuj pushaj Nicodemo shuti fariseo tiyaga. ²Paiga Jesusta tuta rikungu rishaga, “Yachachij, ñukuchimu yachachichun Dios kanda kachushkadaga yachanchimi; maijinbish Dios paigun na igulda gakiga, pish na ruri pudishka rikuchinagunada kan ruragushka layaga, na ruri pudinmuchu,” niga.

³Shina niki Jesusga, “Kabishkadadimi nini, maijin na kutinlladi wacharishaga, Dios ima laya mandashkadaga rijsilladash na rijsi pudingachu,” niga.

⁴Chimunda Nicodemoga, “Shuj k’ari ña ruku gashaga, ¿ima layadi kutin wacharingari? ¿Mamaj iksa ukubi kutin waigusha wachari pudingacha?” niga.

⁵Shina tapuki Jesusga kashnami niga: “Kabishkadadimi nini, maijinbish yakumunda shinaidi Diosbuj Espiritumunda na wacharijka, Diosbuj mandanamunga na waigui pudingachu. ⁶Gentemunda wacharijka gentemi gan; Diosbuj Espiritumunda wacharijka espiritumi gan. ⁷Shinushaga, ‘Kutinmi wacharina ganguichi,’ nisha Ñuka nishkadaga, ama mancharichu. ⁸Waira maimundash shitanllami; chi waira shitashkada uyushash maimunda shamushkada maimu rigushkadash na yachunguichu; Diosbuj Espiritumunda maijin wacharishkaga shinami gan.”

⁹Shina niki Nicodemoga, “¿Kaiga ima layadi ganga?” nisha tapuga.

¹⁰Chimunda Jesusga kashna niga: “Kan, israelgunada yachachij gashash ¿kaigunada nachu yachuganguiri? ¹¹Kabishkadadimi nini, Ñukuchiga ima yachushkadami parlanchi, shinaidi ima rikushkadami yachi chayachinchi; shinash ñukuchi yachi chayachishkadaga kangunaga na cringuichichu. ¹²Kai pachabi ima laya gashkada Ñuka parlakish na crishadijka, jawa pachabi ima laya gashkada parlukigarin, ¿ima layadi cringuichiri? ¹³Jawa pachamunga pish na ichiyashkachu, ashtanbish jawa pachamunda uriyamuj, Aichayuj tukushka Churillami ichiyaj gan. ¹⁴Ima layami Moisés shitushka pushtubi culebrada shuj kaspibi alsuga,3.14 Nm 21.4-9 shina layaidimi Aichayuj tukushka Churish alzushka gana gan, ¹⁵mashnalla Paibi crijkuna na tukurij kausida charichun.”

Kai pachabi kausujkunada Dios k’uyushkamunda

¹⁶“Taita Dios kai pachabi kausujkunada manchanaidi k’uyushami, Paibuj shujlla Churida kachuga, maijinsh Paida crijka ama chingarishalla, ashtangarin na tukurij kausida charichun.3.16 Kaiga Jesusbi maijin crijka kai pachabiga na wañungachu nishaga na ninchu. Aichalla wañushash Jesuskunga tuki ratu kaususha katigungallami.¹⁷Taita Diosga Paibuj Churidaga kai pacha gentegunada juchachisha llakichingujka na kachugachu, ashtangarin paigunada llakichinamunda kishpichingajmi Paidaga kachuga. ¹⁸Maijin Paida crijka, na juchachisha llakichishkachu gan. Ashtanbish maijin na crijka, shujlla Diosbuj Churida na crishkamundaga ña juchachishkami gashka. ¹⁹Luz kai pachamu shamukish gentegunaga na alligunada rurushkamundaga Luzbuj randiga tutadami yalliga munugaguna; shinushaga ña juchachishkagunami gashka. ²⁰Tuki na allida rurujkunaga luztaga na rikunachijkunami; chimunda paiguna ima rurashkagunash ama yacharichunmi Luzmunga na kuchuyanguna. ²¹Ashtanbish maijin kabishkada rurusha kausujka Dios munushka shina ruragushka rikurichunmi luzmunga shamun.”

Bautizaj Juanchu Jesusmunda parlushkamunda

²²Chi k’ipa Jesusga Paibuj yachagujkunanmi Judea llaktamu riga, chibimi tauga p’unllagunada paigunan gasha bautizasha puriga. ²³Juanchush Salim kuchullabi gaj Enón llaktabi, chibi milga yaku tiyashkamundami bautizaguga; chimu rishami bautizashkaguna gaga. ²⁴Kaigunaga Juanchu chairijti narij carcelbi churushka gakimi shina tukuga.

²⁵Chimundaga Juanchuj yachagujkunamunda maijingunaga, shuj Israelgun Diosbuj ñaubuki linsharinamunda rimanukugaguna. ²⁶Chimunda Juanchujmu rishaga, “Yachachij, riki. Jordán yaku ch’imbabi kangun gaj, Paimunda kan yachi chayachigushkami bautizagushka; tukigunami Paibujmu chayanguna,” nigaguna.

²⁷Shina niki Juanchuga, “Imadash Dios na kukiga pish na japi pudinchu. ²⁸‘Ñuka na Cristochu gani, ashtanbish Paimunda ñaubusha kachushkallami gani,’ nisha ñuka parlushkadaga kangunaidi uyuganguichimi. ²⁹Shuj bodabiga noviada charijka noviomi gan, novion igulda gaj apanukujka novio parlushkada uyusha manchanaidimi kushiyarin; shinaidimi ñukash Jesusmunda uyusha kushilladi gani. ³⁰Shinushami Paiga ichiyaj shina ashtan ashtan <Alli> nishka gachun, ñukaga uriyaj shina yanga tukuna ministirin,” niga.

Jawamunda Shamujka ima laya gashkamunda

³¹Jawamunda Shamujmi tukigunada yalli gan. Kai pachamunda gajka kai pachajlladi gashami kai pachamundagunaida parlan. Ashtanbish jawa pachamunda Shamujka tukigunada yalli gashami, ³²imada rikushkada, uyushkada parlan; shinash Pai parlushkadaga pish na uyash ninchu. ³³Ashtangarin maijin Pai parlashkada uyusha japijmi, Dios kabishkada parluj gashkada rikuchin. ³⁴Dios Paibuj Espirituda yallimanaidi kushkamundaga, Dios kachashkaga Dios parlushka shimigunadami parlan. ³⁵Taita Diosga Churida k’uyushami tukida rurachun Paibuj makibi churashka. ³⁶Maijinsh Diosbuj Churida crijka na tukurij kausidami charin; ashtanbish maijin Diosbuj Churida na crish nijka, na tukurij kausidaga na charingachu, ashtanbish Taita Dios p’iñarisha llakichishkabimi kausagun.

Samaria warmin Jesús parlanukushkamunda

¹<Jesusga Juanchudash yalli katijkunada rurashami shinaidi bautizagun> nijta fariseoguna uyushkadami Jesusga yachi chayuga. ²(Jesustijka na bautizagachu, ashtangarin Paibuj yachagujkunami bautizagaguna.) ³Shinami kutin Galilea llaktamu vueltungaj Judea llaktamundaga llujshisha riga.

⁴Shina rigushaga Samariada pasana ministirigaidimi. ⁵Shinami ñauba taita Jacob paibuj churi Jozimu kushka achpa kuchulla, Samaria llaktabi tiyaj Sicar nishka pueblomu chayuga. ⁶Chibimi Jacob-buj yaku puzuga tiyashkaga. Ña chaubi p’unlla tukukimi Jesusga ñanbi shaikushkaidi shamushaga chi yaku puzu manyabi tiyariga.

^7-8Chi ratuga Paibuj yachagujkunaga mikunada randingujmi pueblomu rishkagunaga. Chibimi Jesusga Samariamunda shuj warmi yakuda ishingaj shamuki, “Yakuda ubiangu kumbidi,” niga.

⁹Israelgunan Samariamundagunan na apanukujkuna gashami chimunda warmiga Paidaga, “Kan Israel gashash, Samariamunda warmi gakish, ¿ima nishadi yakuda ñukada mañungui?” niga.

¹⁰Shina niki Jesusga, “Dios imada kuj gashkada, pi yakuda mañagujta kan rijsishaga ashtan kanmi Ñukada mañunguimu; shina mañukiga Ñukaga kausida kuj yakudami kunimu,” niga.

¹¹Shina niki chi warmiga, “Hijo taita, yaku puzuga jundudimi, iman ishinadash na charinguindi. Shinadijka, ¿maimundadi kausida kuj yakudaga kunguiri? ¹²Ñukuchij ñauba taita Jacobdash ¿kanga yallichuma imadi gangui? Paimi kai yaku puzudaga ñukuchimu kuga; kai yakudami pailladi, paibuj churigunash, paibuj animalgunash ubiagaguna,” niga.

¹³Shina niki Jesusga kashna niga: “Tuki kai yakuda ubiujkunaga kutinmi yakunachingaguna. ¹⁴Ashtanbish maijin Ñuka kuna yakuda ubiashaga ima uragamash na yakunachingachu; Ñuka kushka yakugarin paibuj ukumunda p’ugyu yaku shina llujshigushallami na tukurij kausida kunga.”

¹⁵Shina niki chi warmiga, “Hijo taita, ama ñuka yakunachingaj, yakuda ishingu ama shamungajkish, chi yakuda ñukamu kubai,” niga.

¹⁶Chimunda Jesusga, “Kambuj kusada kaimu pushamungaj ri,” niki,

¹⁷chi warmiga, “Kusa illujmini,” niga.

Shina niki Jesusga, “ ‘Kusa illujmini,’ nishaga allidami nishkangui. ¹⁸Kanga pichka kusadami charishkangui, shinaidi kunun kangun kausagushkash na kambuj kusachugun. Kaidaga kabishkadadimi nishkangui,” niga.

¹⁹Shina niki chi warmiga, “Kanga Dios nishkada parlujmishkanguinchin,” niga. ²⁰“Ñukuchij ñauba taitagunash kai urkubimi Diosta adorajkunaga; ashtanbish kanguna israelgunaga ‘Jerusalenbimi Diosta adoranagun,’ ninguichi,” niga.

²¹Shina niki Jesusga chi warmidaga kashna niga: “Ñuka nishkada cri, kangunaga kai urkumu na shamushalla Jerusalenmush na rishalla Diosta <Allimi gangui> nina uraska chayamugunmi. ²²Kanguna Pida <Allimi gangui> nigushkadash na yachunguichichu; israelgunapuramunda Kishpichij shamuna gashkamundami ñukuchiga Pida <Allimi gangui> nigushkadash yachanchi. ²³Ashtangarin Diosta kabishkadi adorajkunaga Diosbuj Espíritu yachachishka shina tuki shungun <Allimi gangui> nina p’unlla kuchuyamugun, chi p’unllaga kununlladimi gan. Shina Paida <Allimi gangui> nijkunadami Taita Dioslladi mashkagun. ²⁴Diosga Espiritumi gan; shinusha Paida adorajkunaga Diosbuj Espíritu yachachishka shina tuki shungun <Allimi gangui> ninaga kabinlladimi.”

²⁵Chimunda chi warmiga, “Cristo nishka Mesías shuti shamuna gashkadaga ñukaga yachanimi; Pai shamushami tuki kaigunadaga alli intindichinga,” niga.

²⁶Shina niki Jesusga, “Paiga Ñukaidimi gani; Pailladimi kangun parlarigun,” niga.

²⁷Shina parlariguki Paibuj yachagujkuna chayamushaga Jesús shuj warmin parlarigujta rikusha mancharishkaidi tukugaguna; shinash chi warmi imada nigushkada shinaidi “¿Imamunda paigun parlarigungui?” nishamallash maijinbish na tapugagunachu. ²⁸Chimunda chi warmiga paibuj p’unduda chi pushtubi sakisha pueblomu riga. Chibimi gentegunamu, ²⁹“Tuki ñuka ima rurushkagunada ñukamu parluj k’arida jakuchi rikungu. ¿Nachu Paiga Cristo ganga?” niga. ³⁰Shina nikimi pueblomunda llujshisha Jesusbujmu rigaguna.

³¹Chigamaga yachagujkunaga, “Yachachij, imaidash mikiri,” nisha atirigaguna.

³²Shina niki Paiga, “Ñukaga kanguna na rijsishka mikunadami mikungu charini,” niga.

³³Shina niki Paibuj yachagujkunaga, “¿Mikunada maijinsh apamugachashi?” nisha kaishuj chaishuj tapunukugaguna.

³⁴Ashtanbish Jesusga, “Ñukada Kachuj munushka shinada rurana, Pai kushka ruranagunadash tukuchinami Ñukaj mikuna shina gan. ³⁵Kangunaga ¿nachu, ‘P’ukushka granuda tandanaga chairijtij chusku killami jualtun,’ nijkuna ganguichi? Ashtanbish Ñukaga, ‘Tarbushkada alli rikichi, granuga ñami p’ukushka tandanalla gan,’ ninimi. ³⁶Maijin p’ukushka granoda tandachisha trabajajka paimu paganada japinmi, shinaidi p’ukushka granoda layami na tukurij kausida japichun gentegunada tandachin, shinami tarbujkish tandachijkish igulda kushilla ganguna. ³⁷Nishkagunabiga, ‘Tarbujkish shujmi, tandachijkish shujmi,’ nishaga kabishkadami nishka. ³⁸Kanguna na trabajashka granoda tandachunga Ñukami kachugani; trabajajkunadijka shujkunamiga; kangunaga paiguna trabajashkallamundami allida japishkanguichi,” niga.

³⁹Chi warmi, “Tuki ñuka ima rurushkagunadami ñukamu niga,” nisha parlushkamundami chi pueblobi kausuj tauga Samariamundaguna Jesusta crigaguna. ⁴⁰Chimunda Samariamundaguna Jesusbujmu shamushaga paigunan sakirichun mañakimi ishki p’unllada chibi sakiriga. ⁴¹Shinaidi Paidi parlushkada uyushagarin ashtan taugagunami crij tukugaguna. ⁴²Chimunda chi warmimu, “Kununga na kan nishkallamundaga crinchichu, ashtangarin ñukuchilladi uyushkamunda, shinaidi kai pachabi kausujkunada Pai kabishkadi Kishpichij gashkada yachushkamundami crinchi,” nigaguna.4.42 Ro 10.17

Mandujbuj ungushka churida Jesús alliyachishkamunda

⁴³Chi ishki p’unllada Samaria llaktabi gashka k’ipaga Jesús Galileamumi riga. ⁴⁴(Jesuslladimi <Dios nishkada parlujtaga kikinbuj llaktallabidijka na valichishkami gan> nisha nishkaga). ⁴⁵Galilea llaktabi gajkunaga paigunash Pascua pishtamu risha Jesús Jerusalenbi tuki ima rurushkagunada rikushkamundami Pai Galileamu chayukiga alli japigaguna.

⁴⁶Maibi yakuda vinoda rurushka Galilea llaktabi tiyaj Caná pueblomumi Jesusga kutin shamuga. Chi llaktada jatun manduj churashka k’arimi Capernaumbi tiyaga; paibuj churimi ungushka siriga. ⁴⁷Chi k’ariga Jesús Judeamunda Galileamu chayamushkada uyusha Paibujmu rishaga, “Ñukaj churimi ña wañunalla sirigun; alliyachingu jakubai,” nisha mañaga.

⁴⁸Shina niki Jesusga, “Kangunaga jatun mancharinagunan rikuchigujta na rikushaga naidi cringuichimuchu,” niga.

⁴⁹Jatun manduj churashka k’ariga, “Mandujlla, ñukaj mara narij wañujllabidi ut’kada jakubairi,” niga.

⁵⁰Shina niki Jesús paidaga, “Wasimu ri; kambuj churiga kausungami,” niga.

Chi k’ariga Jesús shina nishkada crisha rigallami. ⁵¹Ña wasimu vueltusha uriyamuki paibuj sirvijkuna paigun tupungu rigushaga, “Kambuj churiga kausagunmi,” nigaguna.

⁵²Chimunda paiga, “¿Ima uradi alli tukungu kallariga?” nisha tapuki,

paigunaga, “Kaina p’unlla la una shinadami rupuj unguiga p’itiriga,” nigaguna.

⁵³Chibimi <Kambuj churiga kausungami> nisha chi uraslladadi Jesús nishkada taitaga yuyariga; shinami paibish paibuj wasi ukupuragunandi illujta Jesusta crij tukugaguna.

⁵⁴Jesusga Judea llaktamunda Galileamu vueltashaga kaigunga ña ishki kutinmi pish na ruri pudishkada rurusha rikuchishkaga.

Suchu k’arida Jesús alliyachishkamunda

¹Kaiguna k’ipa israelguna Diosta yuyarina pishtada ruraki Jesusbish Jerusalenmu ichiyaga. ²Jerusalenbimi Oveja nishka pungu kuchubi armana yaku kucha tiyaga; hebreo shimibiga Betzatá shutimi gan. Chibimi yaku muyundijbi pichka corredorguna rurushka tiyaga. ³Chigunabimi tauga ungushkaguna, na rikujkuna, suchuguna, na kuyuri pudijkunama sirigaguna.5.3 Ñauba escribishkagunabiga kai verso 3munda tukurij parlushkaga illan. Shinaidi verso 4bi kashna nisha parlushkash illan: “Chi kuchabi yakuda kuyuchijta chapugaguna. Chi yaku kuchamunga wakin wakinllabimi angelga yakuda kuyuchingu rijkuga; yakuda kuyuchishka k’ipaga maijin ñaubusha yaku kuchamu waigujmi ima unguimundash alliyashka sakirijkuga.” Kaidaga intindichingajmi shina rurushkagunanchin.⁵Chi ungushkagunapurabimi kinsa chunga pusuj (38) watada suchu k’ari tiyaga. ⁶Chibi shina sirijta Jesús rikusha unilladadi shina gashkada yachi chayushaga chi k’arida, “¿Alliyangu mununguichu?” nisha tapuga.

⁷Shina niki ungushkaga, “Taita, yakuda kuyuchiki ñukada yaku tandarishkamu waiguchijtaga pidash na charinichu; ñuka waigungu rigujllabidimi shuj ñaubusha waigun,” niga.

⁸Chimunda Jesusga, “Jatari, kambuj wandunada japisha purisha ri,” niga.

⁹Shina nin, chi k’ari alliyashaga paibuj wandunada japishaga puringumi kallariga. Chi p’unllaga samana p’unllamiga. ¹⁰Shinushami israelgunada mandujkunaga chi alliyashka k’aridaga, “Kununga samana p’unllamigun; shinusha wandunadaga na apusha rinachu gangui,” nigaguna.

¹¹Shina niki chi k’ariga, “Ñukada alliyachijmi ñukadaga, ‘Kambuj wandunada japisha ri,’ niga,” nisha parluga.

¹²Paigunaga, “ ‘Kambuj wandunada japisha ri,’ nijka, ¿pidi gan?” nisha tapugaguna.

¹³Shinakish chi pushtubiga taugaguna tiyakimi Jesusga upalla laduyasha chingarishkallaga. Chimunda chi k’ariga pi alliyachishkadash na yachugachu.

¹⁴Chi k’ipaga Diosbuj wasibi paida Jesús japishaga, “Riki, kununga alliyashkami gangui; ama kaidash ashtan yalli llaki tukungujka kununmundaga ama juchada rurunguichu,” niga.

¹⁵Chimunda chi k’ariga Jesús alliyachij gashkadaga israelgunada mandujkunamumi risha parluga. ¹⁶Samana p’unllagunabi Jesús shina alliyachij gashkamundami manduj israelgunaga katik’ichagugaguna.5.16 Israelgunaga samana p’unllabi imaidash rurukiga <Juchamigun> nijkunaga. Shinusha Diosllami samana p’unlla gakish alliyachingu pudiga; Jesús shina rurakiga manchanaidi juchada rurushkadami yuyusha katik’ichajkunaga.¹⁷Ashtanbish Jesusga paigunadaga, “Ñukaj Taitaga tuki ratumi shina ruragushka, shinaidimi Ñukash ruraguni,” niga.

¹⁸Shina nishkamundaga samana p’unlla mandushkada na p’akishkallamunda, ashtandijkarin <Diosga Ñukaj Taitami> nishaga Paiga Dios gashkada nigushkamundash manduj israelgunaga wañuchingu ashtallandi munugaguna.

Taita Diosmi tuki poderda Jesusmu kushka

¹⁹Chimunda Jesusga paigunamu kashna niga: “Kabishkadadimi nini, Diosbuj Churiga Paibuj munillamundadijka imadash na ruri pudinchu, ashtanbish Taita rurushkada rikushami rurun; Taita imalla rurushkagunadami Churish shinaidi rurun. ²⁰Taitaga Churida k’uyashami Pai tuki ima rurushkada rikuchin; kaigunamundash ashtandi yallidami rikuchinga, chida rikushami kangunaga mancharishkaidi sakiringuichi. ²¹Ima layami wañushkagunada jatarichisha Taita kausida kun, shinaidimi Churish Pai kusha nishkagunamu kausida kun. ²²Taitaga pidash na juchachinchu, ashtanbish Paibuj Churimumi juchachina na juchachina tuki poderdaga kushka. ²³Taitada allibi churushka layaidi Churidash tukiguna allibi churachunmi chi poderdaga kushka. Maijinsh Churida allibi na churujka, Paida Kachuj Taitadash shinaidimi ruruj gan.

²⁴“Kabishkadadimi nini, maijinsh Ñuka parlushkada uyusha Ñukada Kachuj Diosta crijka, na tukurij kausidami charin, na llakichishkachu ganga; ashtanbish wañimundami kausimu ña pasushka. ²⁵Kabishkadadimi nini, wañushka layaguna Diosbuj Churi parlushkada uyana uras chayamunmi, kununlladimi gan; maijin uyujkunaga kausungagunami. ²⁶Ima layami Taitaga kausida kungau Paillabidi charin, shinaidimi Churimush kausida kunada Paillabidi charichun kushka. ²⁷Shinaidi Pailladimi Aichayuj tukushka Churi gashkamunda juchachina na juchachina poderda kuga. ²⁸Kaimundaga ama mancharichichu, tuki wañushkaguna Pai parlashkada uyana p’unlla chayamukiga, ²⁹tuki allida rurujkunami pambushkamunda kausida charingu kausaringaguna; ashtanbish na allida rurujkunaga llakichishka gangajmi kausaringaguna.”

Taitaj shutibi kachushka Jesús shamushkamunda

³⁰“Ñukallamundadijka imadash na ruri pudinichu. Taita mandushkada uyashallami juchachingukish na juchachingukish pudini. Ñuka munushkada rurungujka na mashkanichu, ashtanbish Ñukada Kachuj Taita munushkaidami rurani. Shinushami Ñuka juchachishkaga kabishka gan.

³¹“Ñukallamundadi imadash yachi chayachishaga Ñuka yachi chayachishkaga imakish na valinmuchu, ³²shinash Ñukamunda yachi chayachijka shujmi tiyan. Pai yachi chayachishkaga kabishka gashkada yachanimi. ³³Kangunaga bautizaj Juanchuda tapuchun kachukiga, pai yachi chayachishkaga kabishkamiga. ³⁴Ashtanbish Ñukaga Ñukamunda maijin k’arish yachi chayachichunga na ministinichu. Kanguna kishpichishka gachun nishallami Juanchumunda parlani. ³⁵Juanchu parlashkaga p’alaniguj nina japichishka micha shinami p’unllayachij gaga, chi p’unllayachij luz shina pai parlashkadaga ashagamallami kushiyasha uyaganguichi. ³⁶Shina gakish Ñukaga Juanchu parlushkamundash ashtandi yallidami rikuchinada charini. Ñukaga Ñukaj Taita rurachun nishkagunalladami rurani; kai rurushkagunaga Ñukaj Taita Ñukada kachushkadami rikuchin. ³⁷Shinaidi Ñukada Kachuj Taitash Ñukamundami yachi chayachishka. Kangunaga Pai rimarishkadaga ima urash na uyushkanguichichu, Pai ima laya gashkadash na rikushkanguichichu. ³⁸Pai kachukish Ñukada na crishkamundami Pai parlushka kangunabi na sakirin. ³⁹Shinusha kangunaga Dios escribichishkagunadaga <Na tukurij kausida chibi japishun> nishami alli liyusha yachagunguichi, shinash Diosbuj Shimi Ñukamunda yachi chayachigukish, ⁴⁰kangunaga chi na tukurij kausida charingujka na Ñukajmu shamush ninguichichu.

⁴¹“Ñukaga genteguna <Alli> nishkadaga na japisha ninichu. ⁴²Ashtanbish Ñukaga kanguna Diosta na k’uyushkadaga yachanimi. ⁴³Ñuka Taitaj shutibi kachashka shamukish Ñukada na japish ninguichichu. Ashtanbish shuj kikinbuj shutillabidi shamukiga paidaga japinguichimumi. ⁴⁴Kanguna randi randi <Alli> nishka gashadijka, ashtangarin shujlla Dios <Alli> nichun na mashkushadijka, ¿ima layadi Ñukada cringuichiri? ⁴⁵Ñuka Taitaj ñaubuki kanguna na alli rurushkada Ñuka parlanadaga ama yuyunguichichu; kangunaj tuki yuyida churushka Moisesmi kangunadaga juchachinga. ⁴⁶Shinaidi kanguna Moisesta crishaga Ñukadash cringuichimumi; paiga Ñukamundami escribiga. ⁴⁷Pai escribishkadash na crishadijka, ¿Ñuka parlushkadagarin ima layadi cringuichiri?” niga.

Pichka warangagunamu Jesús karushkamunda

Mt 14.13-21; Mc 6.30-44; Lc 9.10-17

¹Kaiguna k’ipa Jesusga Galilea yaku kucha ch’imba ladumumi riga. Chi kuchaga Tiberias nishkamiga. ²Pish na ruri pudishkagunan rikuchisha ungushkagunada alliyachijta rikushkamundami taugalladiguna Paida katigaguna. ³Chimunda Jesusga shuj urkumu sikushaga Paibuj yachagujkunanmi tiyariga. ⁴Israelgunaj Pascua pishtaga ñami kuchuyamuga. ⁵Taugalladiguna katisha shamujta Jesús rikushaga Felipedaga, “¿Maimundadi kai tuki gentegunamunga tandada randishun?” niga. ⁶Felipe imadami nijkushka uyungujllami shina niga; imada ruranashkada Jesuslladi allimi yachuga.

⁷Shina niki Felipega, “Ishki patsuj (200) p’unllada trabajashkamunda pagushka kuchkish asha asha tukigunamu tandada randisha karanallash na p’aktungachu,” niga.

⁸Chimunda yachagujkunamunda Simón Pedroj wauki Andikuga, ⁹“Kaibimi shuj k’ari mara pichka cebada tandada shinaidi ishki chaulada charishka; kaikudijka kai taugagunamunga ¿ima layadi p’aktungari?” niga.

¹⁰Shina niki Jesusga, “Tukigunada tiyarichun nichi,” niga. Chi pushtuga k’iwaidi pambamiga. Chibi tiyarij k’arigunaga pichka warungamamishkanga (5.000). ¹¹Chibimi Jesusga tandada makibi japisha Diosta <Diosolopai> nishaga chibi tiyajkunamu kuchun kuga. Chaulanbish shinaidi rurushami paiguna mashna munushkada kuga. ¹²Ña tukiguna sajsushka k’ipaga Paibuj yachagujkunada, “Imash ama yangadi shitushka gachun tuki p’aki puchugunada tandachichi,” niga.

¹³Paigunaga chi pichka cebada tandamunda puchushka p’akigunamunda chunga ishki (12) canasta jundadami tandachigaguna. ¹⁴Kashna pish na ruri pudishkada Jesús rikuchishkada genteguna rikushaga, “Dios nishkada parluj kai pachamu shamuna nishkaga6.14 Juan 1.21bi ura chakibi gaj yachachishkada rikungui. Pailladimishka,” ninukugaguna. ¹⁵Genteguna uyi na uyi jatun manduj tukuchun pushusha ringu munushkada Jesús yachushaga kutinmi ch’ikunyasha Pailla gangaj urkumu riga.

Yaku jawabi Jesús purishkamunda

Mt 14.22-27; Mc 6.45-52

¹⁶Ña tutayaguki Jesusbuj yachagujkuna yaku kuchamu uriyasha, ¹⁷barcabi sikusha yaku kuchada Capernaum-mu ch’imbusha rigugaguna. Ña illujta tuta gakish Jesús narij paigunajmu shamushkachuga. ¹⁸Chibimi pachundi waira shamuki yaku jatarisha kaimu chaimu apik’ichuga. ¹⁹Ña pichka na gashaga sujta kilómetro shinada barcabi rigushami Jesús yaku jawada purisha barca kuchumu kuchuyamujta rikusha mancharigaguna. ²⁰Chimunda Jesusga, “Ama mancharichichu, Ñukami gani,” niga. ²¹Shina niki paigunaga Jesusta barcabi kushilladi sikachigaguna. Chi k’ipa maimu rigushka achpamu ratuidi chayugaguna.

Jesusta genteguna mashkashkamunda

²²Kayundij p’unllaga yaku kucha ch’imbamu sakirij gentegunaga chibi tiyashka shujlla barcabi yachagujkunalla sikusha risha ashtanbish Jesusga na paigunan sikush rishkadami cuenta kugaguna. ²³Ashtanbish shuj barcagunaga Tiberias pueblomunda shamusha, maibi Manduj Jesús Diosta <Diosolopai> niki tandada mikugaguna, chi kuchulla pushtumumi chayagaguna. ²⁴Gentegunaga Jesusbish Paibuj yachagujkunash na chibi gashkada rikushaga chi barcagunabi sikusha Jesusta mashkungu Capernaum-mu rigaguna.

Jesús kausida kuj tanda gashkamunda

²⁵Yaku kucha ch’imbamu chayusha Jesusta japishaga, “Yachachij, ¿ima uradi kaimu chayamugangui?” nisha tapugaguna.

²⁶Shina niki Jesusga kashna niga: “Kabishkadadimi nini, kangunaga pish na ruri pudishkagunada rurusha rikuchishkada intindishkamundaga na mashkanguichichu, ashtanbish sajsungama tandada mikushkamundami Ñukadaga mashkanguichi. ²⁷Ismujlla mikunamundaga ama trabajichichu, ashtanbish na tukurij mikunamunda shinaidi na tukurij kausida kuj mikunamunda trabajichi. Kai mikunadaga Aichayuj tukushka Churiga Taita Dios Paibi selloda churusha <Alli> nishkamundami kangunamu kunga.”

²⁸Shinusha paigunaga, “Dios nishkada rurungajka ¿imagunadadi rurana ganchi?” nisha tapuki,

²⁹Jesusga, “Ñukada Pai Kachushka gashkada crichunmi Diosga munun,” nigami.

³⁰Chimunda, “Kanda rikusha cringujka ¿imadadi rurusha rikuchi pudingui? ¿Imagunadadi ruribuj gangui?” nisha tapugaguna. ³¹“Ñukuchij ñauba taitagunaga shitashka pushtubimi <maná> nishka tandada mikugaguna, Diosbuj Shimibi escribishka shina: ‘Jawa pachamundami tandada karaga.’ ”6.31 Sal 78.24; Ex 16.4,15; Neh 9.15

³²Shina niki Jesusga, “Kabishkadadimi nini, kangunamunga jawa pachamunda tandadaga Moisesga na karugachu, ashtanbish jawa pachamunda kabishkadi tandadaga Ñukaj Taitami kangunamu kuj gan. ³³Diosbuj tandaga jawa pachamunda uriyasha kai pacha gentegunamu kausida kujmi gan,” niga.

³⁴Shina niki, “Hijo taita, tuki ratuj chi tandada kubangui,” nigaguna.

³⁵Chimunda Jesusga kashna niga: “Na tukurij kausida kuj tandaga Ñukami gani. Maijin Ñukajmu shamujka ima uragamash na yarijachingachu; shinaidi Ñukada crijka ima uragamash na yakunachingachu. ³⁶Ashtangarin ña kangunamu nishka shinaidi kangunaga Ñukada rikushash na cringuichichu. ³⁷Taita Ñukamu kushkagunami tuki Ñukajmu shamungaguna; shina Ñukajmu shamujkunadaga nalladi washamu vueltachish kachashachu. ³⁸Jawa pachamundaga Ñuka munushkada rurungujka na shamuganichu, ashtanbish Ñukada Kachuj munushkada rurungajmi shamugani. ³⁹Ñukada Kachujbuj muniga kaimigun: Pai Ñukamu kushkagunamunda maijinlladash ama chingachichun, ashtanbish tukurij p’unllabi kausachichunmi munan. ⁴⁰Shinaidi Ñukaj Taitaj muniga, mashnalla Diosbuj Churida rikusha Paida crijkunaga, na tukurij kausida charichunmi munan; Ñukami tukurij p’unllabiga kausachisha.”

⁴¹Chimundaga, “Ñukami jawa pachamunda uriyashka tanda gani,” nishkamundami israelgunaga Paimunda washalla rimungu kallarigaguna, ⁴²kashna ninukusha: “¿Nachu kaikuga Jozij churi Jesús gan? ¿Nachu paibuj taita mamadash rijsinchi? Shinadijka kununga, ¿imashadi, ‘Jawa pachamunda uriyashkami gani,’ ninri?”

⁴³Shina niki Jesusga kashna niga: “Kangunapuraidijka ama Ñukamunda washalla imadash ninukichichu. ⁴⁴Ñukada Kachuj Taita na kuchuyachimukiga pish na Ñukajmunga shami pudinchu; shinaidi tukurij p’unllabiga Ñukami kausachisha. ⁴⁵Dios nishkada parlujkuna escribishkabiga, ‘Diosmi tukigunamu yachachinga,’ ninmi. Shinushaga Taita nishkada maijin uyusha yachujka Ñukajmumi shamun. ⁴⁶Maijinbish Taitadaga na rikushkachu; Diosmunda Shamujllami Taitadaga rikushka. ⁴⁷Kabishkadadimi nini, maijin Ñukada crijka na tukurij kausidami charin. ⁴⁸Ñukami kausida kuj tanda gani. ⁴⁹Kangunaj ñauba taitagunaga shitashka pushtubi ‘maná’ nishka tandada mikushash wañugagunami. ⁵⁰Ashtanbish Ñukaga jawa pachamunda uriyashka tandadami parlani, maijin chida mikujka na wañungachu. ⁵¹Ñukami jawa pachamunda uriyashka kausuj tanda gani. Maijin kai tandada mikujka tuki ratumi kausunga; Ñuka kuna tandaga Ñukaj cuerpoidimi gan, chidami kai pacha genteguna kausachunga kusha.”

⁵²Shinushami israelgunaga, “Kaikuga, ¿ima layadi paibuj cuerpodaga ñukuchimu kari pudingari?” nisha kaishuj chaishujkun rimanukungu kallarigaguna.

⁵³Chimunda Jesusga paigunadaga kashna niga, “Kabishkadadimi nini, Aichayuj tukushka Churij cuerpoda na mikusha shinaidi Paibuj yaurda na ubiushaga na tukurij kausidaga na charinguichichu. ⁵⁴Shinaidi maijin Ñukaj cuerpoda mikuj Ñukaj yaurda ubiujka na tukurij kausidami charin, shinaidi Ñukami tukurij p’unllabiga kausachisha. ⁵⁵Ñukaj cuerpoga kabishkadi mikunami gan, Ñukaj yaurga kabishkadi ubianami gan. ⁵⁶Maijin Ñukaj cuerpoda mikuj shinaidi Ñukaj yaurda ubiujka Ñukan tandanukushkami kausan. Ñukash paigunmi tandanukushka kausani. ⁵⁷Ñukada Kachuj Taita kausida charin, Ñukash Paimundami kausani, shina layaidimi maijin Ñukamunda mikujka paibish Ñukamunda kausunga. ⁵⁸Kai tandalladimi jawa pachamunda uriyamushka tanda gan; kai tandaga na kangunaj ñauba taitaguna maná-da mikusha wañushka shinachu gan; maijin kai tandada mikujka tuki ratumi kausunga.”

⁵⁹Kaigunadami Jesusga Capernaúm pueblobi Diosmunda yachana wasibiga yachachiga.

Na tukurij kausida kuj shimigunamunda

⁶⁰Jesusta katijkunamunda kai nishkagunada uyushaga taugagunami, “Kai nishkagunada japingujka jinchimi gan. ¿Pai nishkada pidi kazungari?” nigaguna.

⁶¹Shina Paida katijkuna kaigunamunda washalla rimagushkada Jesuslladi yachushaga, “¿Kai nishkagunaga jarkachinchuma imadi?” nisha tapuga. ⁶²“Aichayuj tukushka Churi sarun tiyashkallamundi ichiyajta rikushaga, ¿ima ninguichimushi? ⁶³Espiritumi kausidaga kun, aichaga imakish na valinchu. Ñuka parlushka shimigunaga Diosbuj Espiritumundami, shinaidi kausidash kuj shimigunami. ⁶⁴Shinash kangunapuramunda shujkunaga na cringuichichu,” niga. Jesusga kallarimundadi piguna na crinadash shinaidi pi Paida japichinadash yachushami shina niga. ⁶⁵Jesús kutin parlarishaga, “Shinushaga Taita pushamusha na kukiga maijinbish Ñukajmunga na shami pudinchu, niganimi,” niga.

⁶⁶Chimunda pachami Paida katijkunamunda taugaguna washayasha ña na Paigun purigagunachu. ⁶⁷Shinushami Jesusga chunga ishki (12) yachagujkunada, “¿Kangunash ringu mununguichichari?” nisha tapuga.

⁶⁸Shina niki Simón Pedroga, “Manduj, ¿pibujmundi rishun? Kambuj shimigunami na tukurij kausida kuj shimigunagun. ⁶⁹Ñukuchigarin Diosmunda jucha illuj Cristo gashkada rijsisha ña crishkanchimi,” niga.

⁷⁰Shina niki Jesusga, “Kanguna chunga ishkigunadaga ¿nachu Ñuka agllugani? Shina gakish kangunamunda shujka diablo layami gan.” ⁷¹Shina nishaga Simón Iscariotej churi Judasmundami parlaga; Judasga chunga ishki yachagujkunamunda gashash paimi Jesusta japichinaga.

Jesusbuj waukiguna Paida na crishkamunda

¹Chiguna k’ipa, israelgunada mandujkuna wañuchingu mashkushkamundami Jesusga Judeabiga na purish nisha Galilea llaktabi puriga. ²Israelguna carpada rurasha Diosta yuyarina pishta p’unllaguna ña chayamuguki,7.2 Kai pishtadaga israelgunami p’ukushka granoda tandachisha tukuchigusha rurujkunaga. Egiptomunda llujshishka k’ipa ñauba taitaguna shitashka pushtubi gashka kausida yuyaringajmi carpagunadaga ramagunan rurujkunaga. Lv 23.34-36,39-43³Jesusbuj waukigunaga, “Ama kaibi sakirichu; kanda crisha katijkuna kan ima rurushkagunadash rikuchunguna Judea llaktamu ri. ⁴Maijin rijsi tukush nishaga imadash na pakallaga rurunchu. Kan shinagunada ruruj gashadijka tuki kai pacha gentegunaj ñaubuki rurush rikuchiri,” nigaguna. ⁵Paibuj waukigunaidikish Paida na crigagunachu.

⁶Shina niki Jesusga, “Ñukaj uraska chairijti narij chayunchu, ashtanbish kangunamunga ima urasbish allimigun. ⁷Kai pachamundagunaga kangunadaga na p’iñi pudinchu; ashtanbish paiguna rurushkaguna na alli gashkada yachi chayachishkamundami Ñukadaga p’iñunguna. ⁸Kangunaga pishtamu richi, Ñukaj uras narij p’aktushkamundaga na rinichu,” niga. ⁹Kaigunada nishka k’ipaga Galileabimi sakiriga.

Carpada rurana pishtabi Jesús gashkamunda

¹⁰Shinash Jesusbuj waukiguna Diosta yuyarina pishtamu rishka k’ipaga pish ama yachi chayachun pakalla shinami Paibish pishtamu riga. ¹¹Israelgunada mandujkunaga pishtabiga, “¿Chi k’ariga maibi purinshi?” nishami mashkagugaguna.

¹²Gentegunapurabimi Paimunda washalla pachun parlagaguna; shujkunaga, “Pai k’ariga allimigun,” nigaguna. Chaishujkunaga, “Na allichugun, gentegunada llagmushami purin,” nigagunami. ¹³Shinash israelgunada mandujkunada manchushkamunda maijinbish na larudaga parlugagunachu.

¹⁴Ña chaubi pishta shina gakimi Jesusga Diosbuj wasimu risha yachachingu kallariga. ¹⁵Shina yachachigukimi chi israelgunaga, “Kaikuga maibish yachungu na rishadijka, ¿ima layadi manchanaidi yachuj ganshi?” nisha mancharishkaidi nigaguna.

¹⁶Shina niki Jesusga kashna niga: “Ñuka yachachishkaga na Ñukaj munimundachu; ashtanbish Ñukada Kachujbuj munimundami. ¹⁷Maijinbish Dios munushkada rurush nijka, Ñuka yachachishkaga Diosmundachu, na gashaga Ñukaj munillamundachu gashkada yachanmumi. ¹⁸Maijin kikinbuj yuyillamunda parlujka kikin <Alli> nishka gangujllami mashkun; ashtanbish maijin paida kachujta <Alli> nishka gachun mashkujka paimi kabishkada parluj imamundash na juchachibuj gan. ¹⁹Moisesga mandushkagunadaga ¿nachu kangunamu kuga? Shina kushka gakish kangunamundaga maijinbish mandushkagunada na p’aktachinguichichu. Shinaga, ¿imashadi Ñukadaga wañuchisha ninguichiri?” niga.

²⁰Shina niki gentegunaga, “¡Yana katishkamishkanguinchin! ¿Pidi kanda wañuchisha nigunri?” nigaguna.

²¹Chimunda Jesusga, “Samana p’unllabi pish na ruri pudishkada shuj kutinlla rurushkamundami tukiguna mancharishkanguichi. ²²Ashtangarin Moisesmi circuncisión7.22 Hechos 15.1 ura chakibi yachachishkada rikungui. nishkada rurachun nisha mandushkamunda kangunaga samana p’unlla gakish k’ari marada aicha karada p’itichinguichillami. (Kai mandushkadaga Moisesga na kallarichigachu, ashtanbish ñauba taitagunamundami shamushka gan.) ²³Shinushaga Moisés mandushkada ama p’akingu nishalla, samana p’unllabish k’ari marada aicha karada p’itichijllagunadijka ¿ima nishadi samana p’unllabi shuj k’arida illujta alliyachishkallamunda Ñukan p’iñaringuichiri? ²⁴Shinushaga <Shinamami gashkanga> nishallaga ama juchachichichu; ashtanbish juchachina gakiga ima laya gashkadadi alli rikusha juchachichiri,” niga.

Jesús maimunda gashkada Pailladi parlushkamunda

²⁵Chimunda Jerusalén pueblobi kausujkunamunda maijingunaga, “¿Wañuchingu mashkagushkaga nachu pai gan?” nigugaguna. ²⁶“Rikichi, tukigunaj ñaubuki parlarigukish pish na imash ningandi. ¿Pai Cristo gashkada kabishkadichu mandujkunaga cringunashi?”

²⁷“Pai maimunda gashkada ñukuchiga yachunchimi, ashtanbish Cristo shamukiga maimunda gashkadash pish na yachungachu.”

²⁸Kai nishkagunada uyusha israelgunaj Diosbuj wasibi yachachigushaga Jesusga jinchidi parlarisha, “Shinadijka kangunaga Ñukadaga, ‘Rijsinchimi, maimunda gashkadash yachanchimi,’ ninguichimi. Ñuka munushkallamundaga na shamushkanichu, ashtanbish Ñukada Kachujka kabishkami gan, kanguna Paidaga na rijsishkanguichichu. ²⁹Ñukagarin Pai kachushkamunda shinaidi Paimunda shamushka gashami Paidaga rijsini,” niga.

³⁰Shina nikiga prezu japingumi munugaguna; shinash Paibuj uras narij chayushkamundaga maijinbish Paida tupiidash na tupi pudigagunachu. ³¹Chi gentegunamundaga taugaguna Paida crishaga, “Cristo shamushaga, ¿kai k’ari rurushkadash yallichu pish na ruri pudishkagunada rurusha rikuchingachashi?” nisha ninukugaguna.

Fariseoguna Jesusta prezungu munushkamunda

³²Genteguna Jesusmunda shina washalla nigushkada fariseoguna uyusha paigunash manduj curagunash Diosbuj wasida chapujkunada Jesusta prezu japichun kachugaguna. ³³Chimunda Jesusga, “Asha killagunaidami kangunan gasha, k’ipaga Ñukada Kachujbujmu rishallami. ³⁴Ñukada mashkunguichimi, shinash na japinguichichu. Ñuka maibi tiyanamunga kangunaga na ri pudinguichichu,” niga.

³⁵Chimunda manduj israelgunaga tapunukungu kallarishaga, “Ñukuchi na japi pudichundijka ¿maimushi paikuga ringashi? ¿Ñukuchipuramundaguna kaimunda risha griego llaktagunabi gajkunamuchu ringa? shinaidi ¿na israelgunamuchu yachachingu ringa imashi?7.35 Babilonia llaktamu apusha rishka watagunamunda pacha (605-536 a.C.) tauga israelgunaga Israel llaktamunda karubi kausungu sakirigaguna. Shinusha Jesús kausashka watagunabiga, Roma mandashka tauga llaktagunabimi, griegogunan chagrushka kausagaguna.³⁶Paiga, ‘Ñukada mashkunguichimi, shinash na japinguichichu, Ñuka maibi tiyanamunga kangunaga na ri pudinguichichu,’ nishaga ¿ima nishadi shina nin?” nisha kaishuj chaishuj ninukugaguna.

Kausida kuj yakumunda

³⁷Pishta tukurij jatun p’unllami Jesusga shayarisha jinchida kaparishaga, “Maijin yakunachijka Ñukajmu shamusha ubiachun. ³⁸Diosbuj Shimibi nishka shina, maijin Ñukada crijbuj ukumundaga kausida kuj yaku p’ugyuguna shinami llujshinga,” niga. ³⁹Jesusga kashna nishaga maijin Paida crijkunaga Diosbuj Espirituda japina gashkadami nisha niga; Jesusta k’uilla gashkada narij rikuchishkamundami,7.39 Juanchu parlushka librobi “glorificado” nishaga Jesusbuj k’uilla gashkada Dios rikuchishkada ashtan yallidijka ima ura chakatashka gashkada shinaidi jawa pacha Taitaj kuchumu rishkadami shina nin. Diosbuj Espirituga narij shamushkaga.

Genteguna chaida kaida yuyashkamunda

⁴⁰Chi tauga gentegunamunda shujkunaga kai nishkagunada uyusha, “Paiga kabishkadimi Dios nishkada parluj shamuna nishka gan,” nigaguna.

⁴¹Shujkunaga, “Paiga Cristomi gan,” nigaguna,

ashtanbish maijingunaga, “Na shinachugun, Cristoga ¿ima layadi Galileamunda gangari? ⁴²Diosbuj Shimibiga Cristoga Rey Davidbuj wawagunaj wawagunamundaminga, shinaidi Davidbuj pueblo Belenmundami shamunga nisha ¿nachu nin?” nigaguna. ⁴³Shinushami genteguna Jesusmunda kaida chaida yuyasha partirigaguna. ⁴⁴Shujkunaga prezu japingumi munugaguna, shinash Paida tupidash na tupugagunachu.

Mandajkuna Jesusta na crishkamunda

⁴⁵Chimunda Diosbuj wasida chapujkuna, manduj curagunajmu fariseogunajmu chayamuki, “¿Imashadi na pushamuganguichi?” nisha tapugaguna.

⁴⁶Shina niki chi guardagunaga, “Pai k’ari parlushka layaga ima urash pish na parlushkachu,” nigaguna.

⁴⁷Chimunda fariseogunaga, “¿Kangunadashchu pandachigachari?” nigaguna. ⁴⁸“Mandujkunamunda na gashaga fariseogunamunda maijinllash, ¿paida crishkacha? ⁴⁹Ashtanbish Moisés mandushkadash na yachuj gentegunaga Dios llakichichun nishkagunami gan.”

⁵⁰Shina niki fariseo Nicodemoga shuj tuta Jesusta rikungu rijka paigunamu kashna niga: ⁵¹“Ñukuchida mandushkabi nishka shinaga shuj k’ari ima nishkada narij uyusha shinaidi ima rurushkadash narij yachushaidijka, imadash na juchachinallachunchi.”

⁵²Shina niki paigunaga, “¿Kambishchu Galileamunda ganguiri? Diosbuj Shimida alli liyusha yachungui, chibiga Galileamundaga Dios nishkada parlujka shujllash shamunashkadaga na parlanchu,” nigaguna. ⁵³Chimundaga tukigunami wasimu rigaguna.

Wainayaj warmimunda

¹Chigamaga Olivos urkumu Jesús riga. ²Kayundij ña p’unllayaguki Diosbuj wasimu vueltuga. Tuki genteguna kuchuyaki Paiga tiyarisha yachachingu kallariga. ³Moisés mandushkada yachachijkunash fariseogunash shuj warmi wainayagujta japisha pushamushaga tuki chibi gajkunaj ñaubuki churushaga, ⁴Jesusmu, “Yachachij, kai warmidaga wainayagujtadimi japimunchi; ⁵Moisés mandushkabiga shina warmigunadaga rumin pigusha wañuchichunmi mandun. Kanga, ¿imada ningui?” nigaguna.

⁶Paigunaga, pandariki juchachingu munushami kaidaga tapugaguna. Ashtanbish Jesusga kumurishaga achpabimi maki dedon escribingu kallariga. ⁷Shina Paida tapusha katishkallamunda shayarishaga, “Kangunamunda maijin jucha illuj gashaga rumida pigusha kallarichun,” niga.

⁸Chimunda kutin kumurishaga achpa pambabi escribisha katigallami. ⁹Shina nijta uyushaga rukugunamunda kallarisha k’ipagunagamami shuj shuj ringu kallarigaguna; shinami chi chaubibi shayuj warmilla Jesuskunga sakiriga. ¹⁰Chimunda Jesús shayarisha chi warmidaga, “Kanda juchachijkunaga, ¿maibidi gan? ¿Pish nachu juchachiga?” niki,

¹¹chi warmiga, “Manduj, pish na juchachishkachu,” niga.

Chimunda Jesusga, “Ñukash na juchachinichu; kununga ri, ama ashtanga juchada rurunguichu,” niga.

Jesusga kai pachaj Luzmi

¹²Kutinmi Jesusga gentegunamu, “Ñukami kai pachaj Luz gani; maijin Ñukada katijka yanamangabiga nalladi puringachu, ashtanbish kausida kuj Luztami charinga,” niga.

¹³Chimunda fariseogunaga, “Kanga kanllamundadimi yachi chayachingui; chi parlushkaga imakish na valinchu,” nigaguna.

¹⁴Shina niki Jesusga kashna niga: “Ñuka Ñukallamundadi parlushka gashash Ñuka parlushkaga kabishkamigun, Ñukaga maimunda shamushkadash shinaidi maimu rigushkadash yachanimi; kangunaga Ñuka maimunda shamushkadash maimu rigushkadash na yachunguichichu. ¹⁵Kangunaga genteguna yuyushkallamundami juchachinguichi; Ñukaga pidash na juchachinichu. ¹⁶Ñuka juchachishash kabishka juchachishkami gan. Ñukallaga na ganichu, ashtanbish Ñukada kachuj Taitami Ñukan juchachin. ¹⁷Kangunajti mandushkabiga, ‘Ishkiguna ima rikushkada chilladadi yachi chayachikiga kabishkamigun,’ nisha escribishkami tiyan. ¹⁸Ñukami Ñukallamundadi imadash yachi chayachini, Ñukada kachuj Taitash Ñukamunda yachi chayachin.”

¹⁹Chimunda paigunaga, “¿Maibidi kambuj Taitaga tiyan?” niki,

Jesusga, “Kangunaga Ñukadash, Ñukaj Taitadash na rijsinguichichu; Ñukada rijsishkashaga Ñukaj Taitadash rijsij ganguichimumiga,” niga.

²⁰Israelgunaj Diosbuj wasibi, Diosmu kuchkida churana kuchubi yachachigushami kai shimigunadaga niga; Paibuj uras narij chayamushkamundaga pish na prezu japigachu.

“Ñukaga na kai pachamundachu gani”

²¹Kutin Jesusga, “Ñukaga rishami, shinusha kangunaga Ñukada mashkunguichimi, ashtanbish kangunaj juchallabidimi wañunguichi. Ñuka rinamunga kangunaga na ri pudinguichichu,” niga.

²²Chimunda manduj israelgunaga, “ ‘Ñuka rinamunga na ri pudinguichichu,’ nigushaga, ¿pailladichu wañuringu munanshi?” ninukugaguna.

²³Chimunda Jesusga, “Kangunaga uramundami ganguichi, Ñukaga jawamundami gani. Kangunaga kai pachamundami ganguichi, Ñukaga na kai pachamundachu gani. ²⁴Chimundadimi kangunamuga, ‘Kangunaj juchallabidi wañunguichi,’ nigani. Shinaidi ‘Ñukadimi gani,’ nishkada8.24 <Ñukadimi gani> nishaga Jesusga Dioslladi gashkadami rikuchin. Taita Diosga <Ñukadimi gani> nishaga Paillamundadimi kai parlashkagunabiga nigun: Ex 3.14-15; Is 41.4; 43.10-13 na crishaga kangunaj juchabimi wañunguichi,” niga.

²⁵Shina niki paigunaga, “¿Kanga pidi gangui?” nigaguna.

Shina niki Jesusga, “¿Imashadi kangunamunga parlashari?8.25 Griego shimibiga ishki laya intindirin. Jawabi parlashka laya shinaidi, “Kallarimunda pacha ñuka nigushkaga,” Jesús parlashka layash intindiri pudin.²⁶Kangunada juchachisha tauga ninagunadashmi charini, shina gakish Ñukada Kachujka kabishkadami nin; shinaidi Ñuka Pai parlushkada uyushkallamundadimi kai pachamundagunamu chidadi nini,” niga.

²⁷Ashtanbish paigunaga Taita Diosmunda parlashkadaga na intindigagunachu. ²⁸Shinusha Jesusga, “Ima ura Aichayuj tukushka Churida cruzbi jawamu alzushami ‘Ñukadimi gani’8.28 Jn 8.58 nijta Ñukadaga rijsinguichi, shinaidi imadash na Ñuka munushkallamunda rurushkada, ashtanbish Taita yachachishkagunaidami Ñuka parlashkada yachunguichi. ²⁹Ñukada Kachujka Ñukanmi gan; ima rurushkabish tuki ratu Paida kushichigushkamundami Ñukaj Taitaga Ñukalladaga na sakishkachu,” niga.

³⁰Kaigunada nijta uyushaga taugagunami Paibi crigaguna.

Abrahambuj wawagunamunda

³¹Chimunda Jesusga Paibi crij israelgunada, “Kanguna Ñuka parlushkada kazusha kausagushaga, Ñukada katijkunadimi tukunguichi. ³²Shinami Diosmunda kabishkada rijsinguichi, chi kabishkami kangunadaga kacharichinga,” niga.

³³Shina niki, “Ñukuchiga Abrahambuj wawagunaj wawagunami ganchi, pibukish sirvichun randishka shinamaga ima urash na gashkanchichu. ¿Imashadi kanga ‘Kacharishkami ganguichi,’ ningui?” nigaguna.

³⁴Shina niki Jesusga kashna niga: “Kabishkadadimi nini, maijinbish juchada rurujka, sirvichun randishka shina juchada rurungu watushka shinamigun. ³⁵Maijin sirvichun randishkaga dueñoj wasibiga na tuki ratu kausagungallachu, ashtanbish churiga tuki ratumi taitaj wasibiga kausunga. ³⁶Shinushaga Diosbuj Churi kangunada kacharichikiga, kangunaga kacharishkadimi ganguichi. ³⁷Kanguna Abrahambuj wawagunaj wawaguna gashkadaga yachanimi; ashtanbish Ñuka parlushkada na japish nishallachu wañuchingu mununguichi. ³⁸Ñukaga Ñukaj Taita rikuchishkadami parlani, kangunash kangunaj taitamunda uyushkada ruranguichi,” niga.

³⁹Shina niki paigunaga, “Ñukuchij taitaga Abraham-mi gan,” nigaguna.

Jesusga, “Kanguna Abrahambuj wawagunaj wawagunadi gashkashaga Abraham rurushka layaidimi rurunguichimuga. ⁴⁰Ashtanbish Dios yachachishkada uyusha kabishkadi shimigunada kangunamu parluj gakish kangunaga Ñukada wañuchingumi mununguichi. ¡Abrahamga ima urash shinaga na rurugachu! ⁴¹Kangunagarin kangunaj taita rurushka layaidimi rurunguichi,” niga.

Shina niki, “Ñukuchiga wainayasha charishka churigunaga na ganchichu; shuj Taitalladami charinchi. Paiga, ¡Diosmi gan!” nigaguna.

“Kangunaj taitaga diablomi gan,” nishkamunda

⁴²Chimunda Jesusga, “Kangunaj Taita, Dios gashkakiga Ñukada k’uyanguichimumiga; Ñukaga Diosmunda shamushami kaibi gani. Ñukaj munimundaga na shamuganichu, ashtanbish Diosmi Ñukadaga kachuga. ⁴³Ñuka parlushkada ¿imashadi na intindi pudinguichi? Ñuka nish nigushkada naidi uyush nishallami shina ganguichi. ⁴⁴Kangunaj taitaga diablomi gan; paibuj gashami pai munushkada rurungu mununguichi. Paiga kallarimunda pachami wañuchij gashka; paibuki ima kabishkash illushkamundaga, imadash ima urash kabishkadaga na parlujchu. Paiga llagmaidi shinaidi llagmagunaj taitash gashkamunda, imada llagmusha parlushash paillamundadi parlan. ⁴⁵Ñukadaga, kabishkada parlagushkamundaga na cringuichichu. ⁴⁶Kangunamunda, ¿maijindi Ñuka ima juchada rurashkada rikuchi pudinguichi? Shina kabishkada parlukidijka ¿imamundadi na cringuichiri? ⁴⁷Maijinsh Diosbuj gashaga, Diosbuj Shimigunadami uyun; shinushaga kangunaga na Diosbuj gashkamundami na uyush ninguichi.”

Ñaubamundadi Jesús tiyushkamunda

⁴⁸Shina niki israelgunaga Jesustaga, “ ‘Kanga yana katishka Samariamundami gangui,’ nishaga, ¿ñukuchiga nachu allida nishkanchi?” nisha tapugaguna.

⁴⁹Chimunda Jesusga, “Ñukaga na yana katishkachu gani. Taitadami allibi churuj gani, ashtanbish kangunaga Ñukadaga na allibimi churanguichi. ⁵⁰Shinash Ñukaga Ñukada jatunyachichunga na mashkanichu. Shujmi jatunyachichun mashkujka tiyan, Paimi kabishkadi juchachij gan. ⁵¹Kabishkadadimi nini, Ñuka parlushkada maijin kazujka ima urash na wañungachu,” niga.

⁵²Shina niki israelgunaga, “Kununmi allidijka yana katishka gashkadagarin yachanchi. Abrahambish, Dios nishkada parlujkunash wañushkami, shinash kanga, ‘Ñuka nishkada kazujka ima urash na wañungachu,’ ningui. ⁵³Ñukuchij taita Abrahamga wañugami. Kanga Abrahamdash ashtan yallichuma ¿imadi gangui? Dios nishkada parlujkunash wañugami. ¿Pi gashkadadi kanga yuyanguiri?” nigaguna.

⁵⁴Chimunda Jesusga kashna niga: “Ñukada Ñukaidi jatunyachishaga Ñuka jatunyashkash imakish na valinchu. Ñukada jatunyachijka Ñukaj Taitalladimigun; Pailladadimi kangunaga <Ñukuchij Diosmi> ninguichi. ⁵⁵Ashtanbish kangunaga Paidaga na rijsinguichichu, Ñukagarin Paida rijsinimi. <Na rijsinichu> nishadijka kanguna laya Ñukash llagmami ganimu. Ñukaga Paidaga rijsinidimi, shinaidi Pai parlushkada kazuni. ⁵⁶Kangunaj ñauba taita Abrahamga Ñuka shamuna p’unllada <Rikushami> yuyusha kushiyaga, rikushagarin ashtanmi kushiyaga.”

⁵⁷Shina niki israelgunaga, “Narij pichka chunga (50) watada charishash ¿Abrahamda rikuganguichari?” nigaguna.

⁵⁸Chimunda Jesusga, “Kabishkadadimi nini, narikish Abraham tiyajllabidimi Ñukadimi gagani,”8.58 Griego shimibiga Jesús Pai kai ratu tiyashkadami parlan. Shina parlushaga Dioslla ima laya gashka shina tuki ratu Pai kausanashkadami rikuchin. niga.

⁵⁹Chimunda paigunaga Jesusta rumigunan pigungu japigaguna, ashtanbish Jesusga mitikusha israelgunaj Diosbuj wasimunda llujshisha riga.

Cigu wacharishka k’arida Jesús alliyachishka

¹Jesús rigushami wacharishkamundadi cigu k’arida rikuga. ²Paibuj yachagujkuna, “Yachachij, ¿imashadi kai k’ariga na rikuj wacharishka? ¿Paibuj yayungunaj juchamundachu, na gashaga paibuj juchallamundadichu shina tukushkanga?” nisha tapugaguna.

³Shina niki Jesusga, “Na paibuj juchamunda, na paibuj taita mamaj juchamundashchu; ashtanbish Dios ima ruri pudishkaguna paibi rikurichunmi shina wacharishka. ⁴P’unlla gajllabidi Ñukada Kachujbuj mandashkagunadaga ruranalladi ganchi. Ñami tutayamugun. Chibimi pish imadash na ruri pudinga. ⁵Ñuka kai pachabi purishkagamallami, kai pachaj Luz shina gani,” niga.

⁶Kashna nishka k’ipaga achpabi t’iukusha, t’iukan lododa rurusha, chi lodon na rikuj ñawigunabi llutachishaga, ⁷“Siloé yaku tandarishka kuchabi maillungu ri,” niga. (Siloé nishaga <Kachushka> nishami nin). Shina niki na rikujka chimu risha maillarishaga ña rikujmi shamuga.

⁸Chimundaga pai kuchkida mañujta sarun rikujkunash, kuchullabi kausujkunash, “¿Nachu kaikuga kuchkida mañusha tiyuj gan?” nisha tapunukugaguna. ⁹Maijingunaga, “Ari, paimigun,” nigaguna. Kutin kaishujkunaga, “Na paichu gan, shinash paimu rijchujmi,” nigaguna.

Shina niki paiga “Ari, ñukaidimi gani,” nisha nigugallami.

¹⁰Chimunda, “¿Ima layadi kununga riki pudingui?” nisha tapuki,

¹¹paiga, “Jesús nishka k’arimi lododa rurusha ñawibi llutachisha, ‘Siloé yaku tandarishka kuchabi maillungu ri,’ nikiga rigani. Ña maillushaga riki pudiganillami,” niga.

¹²Shina niki paigunaga, “¿Pai k’ariga maibidi gan?” nisha tapuki, “Na yachanichu,” niga.

Na rikuj alliyashkada fariseoguna tapushkamunda

¹³Chimunda chi alliyashka k’aridaga fariseogunajmu pushugaguna. ¹⁴Jesús lododa rurusha ñawida alliyachibiga samana p’unllamiga. ¹⁵Shinusha kutinmi ima laya rikuj tukushkada fariseogunaga tapugaguna. Paiga, “Jesús lododa ñawibi churushka k’ipa maillarishaga ña rikuj tukuganillami,” niga.

¹⁶Chimunda maijin fariseogunaga, “Samana p’unllada chi k’ari na kazushtijka na Diosmunda shamunchu,” nigaguna.

Kutin kaishujkunaga, “Juchayuj gashkashaga, ¿ima layadi pi na ruri pudishkagunadaga kashna ruri pudinmugari?” nigaguna. Shinami paigunapura kaida chaida ninukugaguna.

¹⁷Shinusha chi ña rikuj tukushka k’aridaga kutin, “Kanga kambuj ñawida rikujta rurujmundaga, ¿imada ningui?” nisha tapuki,

“Dios nishkada parlujmigun ninimi,” niga.

¹⁸Shinash manduj israelgunaga na rikuj gashkadaga, shinaidi kutin rikuj tukushkadash na crigagunachu. Ashtanbish rikuj tukushkaj taita mamada kayushaga, ¹⁹“¿Paichu kanguna, ‘Na rikujmi wacharishka,’ nigushka kangunaj churi gan? Shinadijka, ¿ima layadi kununga rikuj ganri?” nisha tapugaguna.

²⁰Shina niki taita mamaga, “Ñukuchij churi gashkada, shinaidi na rikuj wacharishkadash yachanchimi; ²¹shinash ima laya rikuj tukushkada na yachunchichu, pi ñawigunada rikujta rurushkadash ñukuchikish na yachunchichu. Pailladadi tapichilla, ñami wataguna p’aktushka gan; pailladi ima laya gashkadash parlungallami,” nigaguna.

²²Maijinbish Jesusta <Cristomi> nijtaga Diosmunda yachana wasimunda llujshichisha kachungu, manduj israelguna ña parlanukushkada yachusha manchushkamundami paibuj taita mamaga shina niga. ²³Chimundami taita mamaga, “Pailladadi tapichilla, ñami watagunash p’aktushka gan,” nigaguna.

²⁴Shinusha na rikuj alliyashka k’arida israelguna kutin kayushaga, “Chi k’ariga juchayuj gashkadaga ñukuchiga yachanchimi, shinushaga Diosbuj ñaubuki kabishkada parli,” nigaguna.

²⁵Chimunda paiga, “Juchayuj gashkakish ñukaga na yachanichu, ñuka na rikuj gashash kununga rikuj gashkaidami yachani,” niga.

²⁶Paigunaga kutinlladi, “¿Imadadi kandaga ruruga? ¿Ima rurushadi rikujta ruruga?” nisha tapuki,

²⁷paiga, “Ña niganindi, na uyush nishkanguichichu. ¿Imashadi kutin parlachun ninguichi? ¿Kangunashchu paida katij tukush ninguichi?” niga.

²⁸Shina niki, “Kanchari pai k’arida katijma imash gangui. Ñukuchiga Moisestami katij ganchi,” nisha paida rimagaguna. ²⁹“Moisesmu Dios parlushkadaga yachanchimi, ashtanbish chikudaga maimunda gashkadash na yachanchichu,” nisha nigaguna.

³⁰Shina niki chi k’ari paigunadaga, “Ñukadaga ñawida rikujta rurukish, kangunaga pai maimunda shamushkadash na yachungudijka ima layashigunshi. ³¹Paida manchujkunaida Pai munashkada rurajkunaida Diosga uyaj gashkada ashtanbish juchayujkunadaga na uyaj gashkadaga allimi yachanchi. ³²Shinaidi ñukada rurushka shina na rikuj wacharishkada rikujta rurushka nishkadaga pimundash ima urash na uyushkanchichu. ³³Pai k’ari na Diosmunda shamushkashaga imadash na ruri pudinmuchuga,” niga.

³⁴Chimunda paigunaga, “Kan juchasapaidi wacharishkakuchu ¿ñukuchida yachachinguiri?” nishka k’ipaga Diosmunda yachana wasimunda llujshichisha kachugaguna.

Diosta na crijkuna na rikuj laya gashkamunda

³⁵Chi k’arida llujshichisha kachushkada Jesús yachushaga paida mashkusha ña tupanukushaga, “¿Aichayuj tukushka Churibi cringuichu?” nisha tapuga.

³⁶Chi k’ariga, “Hijo taita, Paibi cringujka Paiga pidikun parlabai,” niki,

³⁷Jesusga, “Ña rikushkanguimi, kangun parlarijlladi Ñukaidimi gani,” niga.

³⁸Chimunda chi k’ariga Jesusbuj ñaubuki kungurishaga, “Manduj, crinimi,” niga.

³⁹Chi k’ipa Jesusga, “Ñukaga juchayujkuna gashkada rikuchingu, na rikujkunaga rikuj gachun, shinaidi rikujkunaga na rikuj tukuchunmi kai pachamunga shamugani,” niga.

⁴⁰Paigun gaj fariseoguna shina nijta uyushaga, “¿Ñukuchikish shinadijka na rikujkunachu ganchiri?” nisha tapugaguna.

⁴¹Shina niki Jesusga, “Kanguna na rikujkuna gashkashaga juchamunda na kauzayuj ganguichimuchuga; ashtangarin <Rikujmi ganchi> nishkamundaga juchaguna kangunaj jawabi gagungallami,” niga.

Ovejagunada michijmunda

¹Chimunda Jesusga kashna niga: “Kabishkadadimi nini, maijinbish ovejagunaj currulmu na punguda waigushalla maidash sikusha waigujka shuwajmi, shinaidi uyi na uyidi takusha shuwajmi gan. ²Ashtanbish punguda waigujka ovejagunada michijmi gan. ³Chi michijmu punguda chapuj paskuki, michijka paibuj ovejagunada paigunaj shutin shutin kayuki paigunaga paibuj shimida rijsinllami. Currulmundash paimi llujshichin. ⁴Ña tuki paibuj ovejagunada llujshichishaga michijka paigunada ñaubushami rin; shinami ovejagunaga paibuj shimida rijsishkamundaga katinguna. ⁵Ashtangarin na rijsishkadaga nalladi katingachu; shujbuj shimida na rijsishkamundami paimundaga mitikusha ringaguna.”

⁶Kai yuyachinan Jesús parlakish paigunaga ima nisha nigushkadash na intindigagunachu.

Jesusga alli michij gashkamunda

⁷Shinushaga kutinlladi Jesusga, “Kabishkadadimi nini, Ñukaga ovejagunaj waiguna pungumi gani. ⁸Ñukada ñaubusha tuki shamujkunaga shuwaguna, uyi na uyidi takusha shuwajkunamiga; shinash ovejagunaga paigunada na uyush nigagunachu. ⁹Ñuka pungumi gani; maijin Ñukamunda waigujka kishpichishkami ganga. Shuj oveja layami waigusha llujshisha shinaidi mikuna muyadash japingami. ¹⁰Maijin shuwa shamushaga wañuchingu, shuwangu, tukuchishtangajllami shamun; ashtanbish Ñukaga kanguna na tukurij kausida charichun shinaidi chi kausida charishash yallimanaidi charichunmi shamugani.

¹¹“Ñukaga alli michijmi gani. Alli michijka kikinbuj kausidash ovejagunamunda kujmi. ¹²Kuchkida paganallamunda michijka, na michijti gashkamunda shinaidi na paibuj oveja gashkamundaga lobo shamujta rikushash ovejagunada sakisha shujllami mitikusha rin; chibimi loboga ovejagunada japishaga kani kani rurusha kaida chaida kachun. ¹³Chi michijka pagushkallamunda michishkamundaga ovejaguna imash tukuchun nishami shitusha rin.

^14-15“Ñukaga alli michijmi gani. Ima layami Ñukaj Taita Ñukada rijsin Ñukash Taitada rijsini; shina layaidimi Ñukaga Ñukaj ovejagunadaga rijsini, paigunash Ñukada rijsingunami. Shinushami Ñukaj kausida ovejagunamunda kuni. ¹⁶Shinaidi na kai currulmunda shuj ovejagunadashmi charini, chigunadash pushamunami gani; paigunaga Ñuka parlashkadaga uyangagunami, shinami kanllalladi shujlla tukusha shuj michijllada charingaguna.

¹⁷“Ñukaj kausida kutin japingumi kuni. Chimundami Taitaga Ñukada k’uyun. ¹⁸Ñukaj kausidaga pish na kichunchu, Ñukaj munillamundadimi Ñukaga kuni. Ñukaj kausida kungajkish kutin japingajkish Ñukaga pudinimi. Shina rurachunmi Ñukaj Taitaga manduga,” niga.

¹⁹Kai shimigunamundami israelgunaga kaida chaida yuyasha kutin rimanukugaguna. ²⁰Paigunapuramunda taugagunami, “Yana katishka gashami paiga loco gan. ¿Imashadi kazu ruranguichi?” nigaguna.

²¹Kutin shujkunaga, “Kai shimigunaga na yana katishkajchu gan; ¿shuj yanaga na rikujtaga rikujta ruri pudinchari?” nigaguna.

Israelguna Jesusta na rikunachishkamunda

²²Jerusalenbimi Diosbuj wasida Diosllamu linshuyachishkada yuyarisha pishtada ruragaguna. Tamia shinaidi chiri killagunami gaga. ²³Jesusga Diosbuj wasibi gashami Salomonbuj nishka Corredorbi puriguki, ²⁴israelguna muyundijta shayarishaga, “¿Ima uragamadi kaida chaida yuyarichun chapachisha ninguiri? Kan Cristo gashaga ashtan laruda parlillari,” nigaguna.

²⁵Shina niki Jesusga kashna niga: “Ñami kangunamu nigani, shinash na cringuichichu. Ñukaj Taitaj shutibi rurushkagunami laru rikuchigungandi.10.25 Jn 5.36²⁶Shina gakish kanguna na Ñukaj ovejaguna gashkamundami na cringuichi. ²⁷Ñukaj ovejagunaga Ñuka parlashkada uyajkunami, shinaidi paigunada rijsinimi, shinami Ñukada katinguna. ²⁸Ñukami paigunamuga na tukurij kausida kuni; shinusha ima uragamash na chingaringagunachu, shinaidi Ñukaj makimundaga pish na kichungachu. ²⁹Ñukamu kuj Ñukaj Taitaga tukimunda yalli jatunmi,10.29 Ñauba escribishkagunamunda maijingunaga ningunami: “Ñukaj Taita kushkaga tukimunda yalli jatunmi gan.” Ñukaj Taitaj makimundaga pish na kichi pudingachu. ³⁰Ñukash Taitash shujllami ganchi.”

³¹Israelgunaga kutinmi paidaga rumigunan pigungaj japigaguna. ³²Chimunda Jesusga, “Taitaj podergunmi tauga alli ruranagunada kangunaj ñaubuki rurusha rikuchishkani; ¿chigunamundaga maijinmundadi rumida pigush ninguichi?” niga.

³³Shina niki israelgunaga, “Allida rurushkamundaga na rumin pigush ninchichu, ashtanbish kan Diosta imakish na valichisha parlashkamunda; kan gente gashash kanlladi Dios tukush nishkamundami rumin pigush ninchi,” nigaguna.

³⁴Shina niki Jesusga kashna niga: “¿Nachu kangunamu mandushkagunabiga Dios escribichisha, ‘Ñukaga “dioskunami ganguichi”10.34 Sal 82.6 ninimi,’ nishka tiyan? ³⁵Diosbuj Shimi nishkadaga <Na shinachugun> ningujka na pudinachugun. Maijingunamu Dios parlushkada uyujkunadaga Diosga, ‘dioskunami ganguichi,’ nikidijka, ³⁶¿Taita Dioslladimi Paibujlla gachun ch’ikunyachisha kai pachamu kachushkadaga, ‘Diosbuj Churimi gani,’ nishkallamundachu Ñukadaga, ‘Diosta imakish na valichin,’ ninguichiri? ³⁷Ñukaj Taita rurushkagunada laya Ñuka na rurukiga ama cringuichichu. ³⁸Ashtanbish Taita rurushka laya rurakiga Ñukada na crishash Ñuka rurushkagunalladash crichiri; shina crishallami Ñukaj Taita Ñukabi gashkada shinaidi Ñukash Paibi gashkada ashtan illujta alli yachunguichimu,” niga.

³⁹Kutinlladimi paigunaga Jesusta prezungu munugaguna, shinash Jesusga paigunaj makimunda kachachirishami riga.

⁴⁰Shinami Jesusga maibi sarun Juanchu bautizasha purishka Jordán yaku ch’imbamu kutin risha chibimi sakiriga. ⁴¹Tauga genteguna Paibuj kuchumu chayushaga, “Kabishkadadimi Juanchuga pish na ruri pudishkadaga ima urash na ruragachu, shina gakish kai k’arimunda tuki nishkagunaga kabishkami gashka,” ninukugaguna.

⁴²Shinami chibiga taugaguna Jesusta crigaguna.

Lázaro wañushkamunda

¹Betania pueblomunda Lázaro shuti k’arimi ungushka kausaga; paibuj pani Mariash, Martash chillamundadimiga. ²(Chi ungushka Lazaroj pani Marialladimi Manduj Jesusbuj chakibi k’uilla ashnariguj yakuda tallisha juakchan chakichiga.) ³Shinushaga chi ishki ñañundijkunami, “Manduj, kan k’uyashka Lazaroga ungushkamigun,” nisha Jesusmu parlachun kachugaguna.

⁴Shina nijta Jesús uyushaga, “Kai unguiga na wañuchingabujchu, ashtanbish Diostash, Diosbuj Churidash <Alli k’uillami gangui> nichunmi shina tukushka,” niga.

⁵Jesusga Martadash, paibuj ñañadash, Lazarodashmi k’uyajkuga. ⁶Lázaro ungushkada yachi chayushash ishki p’unlladami maibi gashkallabidi sakiriga. ⁷Chi k’ipa Paibuj yachagujkunada, “Kutin jakuchi Judea llaktamu,” niga.

⁸Shina niki Paibuj yachagujkunaga, “Yachachij, chibi gaj israelguna rumigunan pigusha wañuchingu munushkaga na uningandi. ¿Shinashchu kutinlladi chimu rish ninguiri?” nigaguna.

⁹Jesusga, “¿Nachu shuj p’unllaga chunga ishki (12) urasta charinri? Shinushaga maijinsh p’unllapachabi purishaga, kai pachada p’unllayachijta rikushkamundaga imabish na trankarisha urmangachu. ¹⁰Ashtanbish maijinsh tutabi purijka luz paibuki illushkamundaga trankarisha urmangallami.”

¹¹Shina nishka k’ipa Jesusga, “Ñukuchin alli apanukuj Lazaroga puñurishkami; shinash rijchachingu rinimi,” niga.

¹²Chimunda Paibuj yachagujkunaga, “Manduj, puñurishkamundaga alliyangami,” nigaguna.

¹³Jesusga Lázaro wañushkamundami shina niga, ashtanbish Paibuj yachagujkunaga <Puñurishkallamundami shina nigushkanchin> yuyugaguna. ¹⁴Shinushami Jesusga paigunada, “Lazaroga wañushkami,” nisha laruda niga. ¹⁵“Ñuka na chibi gashkamunda kushiyanimi, kanguna crichunga shinami alli gashka. Ashtanbish paibujmu jakuchi,” niga.

¹⁶Chimunda Ishkipura Wacharishka nishka Tiumaga, kaishuj yachagujkunadaga, “Ñukuchish Jesuskun wañungu jakuchi,” niga.

Jesusga kausida kujmi

¹⁷Jesús chayushaga Lázaro ña chusku p’unllada pambana ut’kubi11.17 Jn 11.38; Mt 27.59-60 churushkadami japiga. ¹⁸Betania puebloga Jerusalenmunda kinsa kilómetro vali kuchullabimi gaga. ¹⁹Tauga judeamundagunami Martada Mariadash <turi wañushkamunda ñukuchikish llakirinchimi> ningu shamushkagunaga. ²⁰Martaga Jesús shamugushkada yachushaga tupanukungumi llujshisha riga. Ashtanbish Mariaga wasibimi sakiriga. ²¹Martaga Jesusta, “Manduj, kan kaibi gashkakiga ñukaj turiga na wañunmuchuga; ²²ashtanbish Diosta kan ima mañushkadash kununbish kanmu Pailladi kuna gashkadaga ñukaga yachanimi,” niki,

²³Jesusga, “Kambuj turiga kausaringami,” niga.

²⁴Shina niki Martaga, “Ari, wañushkaguna kausarina tukurij p’unllabi kausarinadaga yachanidimi,” niga.

²⁵Jesusga paidaga, “Ñukami wañushkagunada kausachijkish, kausida kujkish gani; maijin Ñukada crijka wañushka gashash kausangami. ²⁶Shinaidi tuki Ñukada crisha kausujkunaga ima uragamash na wañungachu, ¿kaigunadaga cringuichu?” niga.

²⁷Shina niki Martaga, “Ari, Manduj; Kan Cristo shinaidi Diosbuj Churi gashkada, Kan kai pachamu shamuna gashkadash ñukaga crinimi,” niga.

Lazaroda pambushka pushtubi Jesús wakushkamunda

²⁸Shina nishka k’ipaga Martaga paibuj ñaña Mariada kayungu risha pakalla kashna niga, “Yachachijka kaibimi gan, kanda kayagunmi.”

²⁹Shina nijta uyunmi Mariaga apuruidi jatarisha Jesusta rikungu riga. ³⁰Jesusga narij pueblomu waigushkachuga, chairijtij Martan tupanukushka pushtullabidimiga. ³¹María apuruidi jatarisha rijta rikusha <llakirinchimi> nisha wasibi paigun igulda gaj Judeamundaguna <Pambushka ut’kumumi wakungu rinchin> yuyusha washa katigaguna.

³²Jesús maibi gashka pushtumu María chayushaga Paibuj ñaubuki kungurisha, “Manduj, kan kaibi gashkakiga ñukaj turiga na wañunmuchuga,” niga.

³³Shina María wakajta, paigun igulda chayuj israelgunash wakajta Jesús rikushaga shungundijta manchanaidi llakirishaga, ³⁴“¿Maibidi churaganguichi?” nisha tapuki,

paigunaga, “Manduj, jaku rikungu,” nigaguna.

³⁵Chibi Jesús wakuga.

³⁶Chimundami israelgunaga, “Rikichi, manchanaidimi Lazaroda k’uyashka,” ninukugaguna.

³⁷Ashtanbish shujkunaga, “Na rikuj k’arida rikujta rurujtika, ¿Lázaro ama wañuchunga nachu imaidash ruri pudishkangari?” nigaguna.

Lazaroda Jesús kausachishkamunda

³⁸Jesús shungundijta kutin llakilladimi pambushka ut’kumu kuchuyaga. Chi ut’kuga k’akabi kinrimu ut’kusha shuj rumin tapachishkamiga.

³⁹Chibi Jesusga, “Rumida anchuchichi,” niki,

wañushkaj pani Martaga, “Mandujlla, pai wañushkaga ñami chusku p’unllagun, ña ashnarigungami,” niga.

⁴⁰Jesusga, “ <Kan crishaga Dios ima allidash rurujlla gashkada rikunguimi> nisha ¿nachu kanda nigani?” niga.

⁴¹Chimunda rumida anchuchiki Jesús jawa pachada rikushaga kashna niga: “Taitalla, Ñuka mañushkada uyushkamunda <Diosolopai> nini. ⁴²Ñuka mañushkada Kan jursa uyuj gashkadaga yachanimi; ashtanbish kaibi gaj genteguna Kan Ñukada kachushkada crichunmi kaidaga nini.”

⁴³Shina nishka k’ipaga, “¡Lázaro, washamu llujshi!” nisha jinchida kapariki, ⁴⁴chi wañushkaga makida chakidash llikishka linsun pilluchishka, ñawidash illujta linsun pilluchishka llujshiga. Chimunda Jesusga, “Pilluchishkada kanguna paskusha richun sakichi,” niga.

Jesusta wañuchingu yuyarinukushkamunda

Mt 26.1-5; Mc 14.1-2; Lc 22.1-2

⁴⁵Shinushami Mariagun igulda gangu shamuj israelgunamunda taugaguna Jesús ima rurushkada rikusha Paida crigaguna. ⁴⁶Shinash paigunapuramunda maijingunaga fariseogunajmu rishaga Jesús imada rurushkadami parlugaguna. ⁴⁷Chimunda manduj curagunash, fariseogunash, israelgunada mandujkunapura tandanukushaga kashna nigaguna: “¿Imadadi rurashun? Kai k’ariga tauga pish na ruri pudishka rikuchinagunadami ruragun. ⁴⁸Paida shinalla sakikiga tukigunami paida cringaguna; shinushaga Romamundaguna shamusha ñukuchij Diosbuj wasida, ñukuchij pueblodashmi illujta tukuchishtunga.”

⁴⁹Shina niki paigunapuramunda chi watabi jatun manduj cura Caifás shutiga, “Kangunaga imadash na yachunguichichu; ⁵⁰kai tuki pueblo tukuchishtashka gana randiga shuj k’arilla tukigunamunda wañuna gashkaga kangunaj allibujmigun; chidaga na intindinguichichu,” niga.

⁵¹Caifasga kaidaga na paibuj yuyillamunda nigachu. Pai chi watabi jatun manduj cura gashkamunda Dios yuyida kukimi israelgunamunda Jesús wañuna gashkadaga parluga. ⁵²Na chi pueblollamundash, ashtanbish kaibi chaibi kausuj Diosbuj wawagunash shujlla tukuchun tandachingajmi shina wañuna gashka. ⁵³Shina ninukushka p’unllamundami manduj israelgunaga Jesusta wañuchingu ari ninukugaguna.

⁵⁴Shina gakimi Jesusga Judeagunapurabiga ima laya purishka shina ña na puriga; ashtanbish chi Judea llaktamunda llujshisha shitashka pushtu kuchullabi gaj Efraín shuti pueblomu riga. Chibimi Paibuj yachagujkunandi sakiriga.

⁵⁵Israelgunaj Pascua pishtaga ña kuchubimiga, pueblogunamunda tauga gentegunami narij Pascua pishta chayujllabidi Diosbuj ñaubuki linsharingaj11.55 2Cr 30.17-19 Jerusalenmu ichiyagaguna. ⁵⁶Chibimi Jesusta mashkusha purisha Diosbuj wasi pungubi gasha randi randi, “¿Imada ninguichi? ¿Pishtamu shamungachuma imashi?” nisha tapunukugaguna.

⁵⁷Manduj curaguna, fariseogunash, Jesús maibi gashkada maijin yachushaga prezu japingaj parlachun nisha mandushkagunaga.

K’uilla yakuda Jesusbuj chakibi tallishkamunda

Mt 26.6-13; Mc 14.3-9

¹Chimunda Pascua pishtaj sujta p’unlla jualtagukimi Jesusga Pai kausachishka Lázaro kausashka Betania pueblomu riga. ²Chibimi Jesús shamushkamunda mikunada ruragaguna. Martaga mikunada karaguga; Jesuskun mizabi mikusha tiyajkunapurabi shujka Lazaromi gaga. ³Chimunda Mariaga nardo yuramundadi rurushka imanbish na chagrushka manchanaidi valij k’uilladi ashnariguj yakuda chaubi litro shinada apamusha Jesusbuj chakibimi tallisha k’akuga. Chi k’ipa paibuj juakchanmi chakichiga; shinami wasi ukuga illujta ashnarigujti k’uidi tukuga. ⁴Chimunda Jesusbuj yachagujkunamunda Jesusta k’ipalla japichingu gaj Judas Iscariotega, ⁵“¿Imashadi kai k’uilla ashnariguj yakudaga na kinsa patsuj (300) denario12.5 Shuj denario nishkaga shuj p’unlla trabajashkami valin. kuchkibi k’atusha imadash na charijkunamu kugashi?” niga.

⁶Kaidaga imadash na charijkunada llakirishkamundaga na nigachu, ashtanbish shuwa gashkamunda, pai kuchki bolsada wakichij gasha chibi churashkada asha asha shuwajlla gashami shina niga.

⁷Chimunda Jesusga, “Sakilla, Mariaga Ñukada pambana p’unllajmi chidaga wakichigushka. ⁸Imadash na charijkunadaga jursami kangunan charigunguichilla, ashtanbish Ñukadaga na jursa charigunguichillachu,” niga.

Lazaroda wañuchingu ari ninukushkamunda

⁹Jesús Betania pueblobi gashkada yachushami tauga israelguna chimu rigaguna, na Jesusta rikungajllaga ashtanbish Jesús kausachishka Lazaroda rikungajkishmi rigaguna. ^10-11Lázaro shina tukushkada rikusha tauga israelguna manduj curagunamunda ch’ikunyasha Jesusta cringu kallarigaguna. Chimundami manduj curagunaga Lazarodash wañuchingu ari ninukugaguna.

Jerusalenmu Jesús waigushkamunda

Mt 21.1-11; Mc 11.1-11; Lc 19.28-40

¹²Tauga gentegunami Pascua pishtajka Jerusalenmu rishkagunaga. Jerusalenmu Jesús shamunada paiguna kayundij p’unlla yachusha, ¹³palmera ramagunada p’itisha Jesuskun tupungaj llujshishaga,

“¡Hosana!12.13 Mateo 21.9 ura chakibi yachachishkada rikungui. ¡Manduj Diosbuj shutibi Shamuj,

Israelgunada Jatun Manduj alli nishka gachun!”12.13 Sal 118.25-26

nishami kaparigaguna.

¹⁴Jesusga shuj malta burruda japisha sikushka shamuga, Diosbuj Shimibi kashna nishka shina:

¹⁵“Sión12.15 Shimi shimi parlusha, “Sionbuj ushi” nishaga Jerusalén pueblobi kausujkunamundami nisha nin. Ashtandij alli yuyigunada yachukiga Diosta crijkunamundami nisha nigun. pueblobi kausujkunalla, ama mancharichichu;

rikichi, kangunaj Jatun Mandujka shuj malta burrubimi sikushka shamugun.”12.15 Zac 9.9

¹⁶Kallarimunga Jesusbuj yachagujkunaga ima tukugushkadash narij intindigagunachu. Ashtan Jesús kausarishka k’ipami, kai tuki Paida rurashkagunaga ñaubamundadi Paimunda escribishka tiyashkadami cuenta kugaguna.

¹⁷Pambushka Lazaroda Jesús kayusha kausachijta rikusha Paigun gaj gentegunaga ima tukushkadami tukigunamu parlagaguna. ¹⁸Shinusha kai pish na ruri pudishkada rurusha rikuchishkada yachi chayushami, chi tauga gentegunaga Jesuskun tupungaj llujshiga. ¹⁹Chimundami fariseogunaga kaishuj chaishuj, “Ñukuchi imada rurungu munashash imadash na rurushkadaga, kangunaidi ña rikunguichimi. Rikichi, tukiguna Paillada katisha ringuna,” nisha ninukugaguna.

Griegoguna Jesusta mashkashkamunda

²⁰Pascua pishtabi Diosta <Allimi gangui> ningu Jerusalenmu rijkunapuramundaga shuj griegogunashmi puriga. ²¹Paigunaga Galilea llaktabi tiyaj Betsaida pueblomunda gaj Felipejmu kuchuyashaga, “Hijo Taita, Jesuskunmi parlaringu munanchi,” nisha mañuki, ²²Felipe rishaga Andikumu parluga. Chimunda Felipesh Andikush Jesusmumi parluga.

²³Shina niki Jesusga kashnami niga: “Kununmi Aichayuj tukushka Churida k’uilladi gashkada rikuchina uraska ña chayushka. ²⁴Kabishkadadimi kangunada nini, trigo muyu na pambabi urmusha wañushaga, chi muyuidimi sakirin; ashtanbish wañushaga manchanaidimi granuda apan. ²⁵Maijin kikinbuj kausida k’uyajka chingaringami; maijin kikinbuj kausida kai pachabi na llakirijka tuki ratu kausanadami wakichinga. ²⁶Maijin Ñukada sirvish nijka Ñukada katichun; shinaidi maibi Ñuka gashkabimi paibish ganga, shina maijinsh Ñukada sirvijtaga Ñukaj Taitaga allibimi churanga.”

Jesús Pai wañunada parlushkamunda

²⁷“Kunun kai ratu Ñukaga llakilladimi gani. ¿Imadadi nisha? ‘Taitalla, kai llakimundaga anchuchibairi,’ nisha ¿nishachu? ¡Kaigunada p’aktachingujlladimi kai uraska Ñukaga shamugani! ²⁸Taita, Kan k’uilladi gashkada rikuchibairi.”

Shina niki, “Ñami k’uilladi gashkada rikuchishkani, shinaidi kutinbish rikuchishami,” nisha parlarishka jawa pachamunda uyariga.

²⁹Chibi gaj genteguna uyashaga, “Relampami gulun mandushka,” nigaguna; kutin shujkunaga <Shuj angelmi Paigun parlarishka> nigaguna.

³⁰Chimunda Jesusga, “Chi parlarishkaga na Ñukaj allibuj uyarigachu, ashtanbish kangunaj allijmi uyariga. ³¹Kai pachada juchachishka ganaga ñami chayamushka, kununmi kai pachada manduj diablodaga llujshichishtashka ganga. ³²Ashtanbish Ñuka kai pachamunda jatarichishka gashaga tukigunadami Ñukajmu pushasha,” niga.

³³(Kaida nishaga Pai ima laya wañuna gashkada yachi chayachisha nishami shina niga.)

³⁴Chimunda gentegunaga kashna nisha tapugaguna: “Mandushkagunabi nishkada uyushami tuki ratugama Cristoga kausana gashkadaga yachuganchi. ¿Imamundadi, ‘Aichayuj tukushka Churiga jatarichishkami ganga,’ nishaga ninguiri? Chi Aichayuj tukushka Churiga, ¿pidi gan?”

³⁵Shina niki Jesusga, “Asha p’unllagunaidami Luzga kangunan ganga. Shinushaga yanamanga kangunada ama kunguida japichunga chairijti Luzta charishkamundaga Luzbi purichi; maijinsh yanamangabi purijka maimu rigushkadash na yachunchu. ³⁶Chi Luzbuj gangujka Luz kangunan gashka ratuidi Luzbi crichi,” niga. Kaigunada nishka k’ipaga Jesusga risha paigunamunda mitikuga.

Israelguna Jesusta imamunda na crishkamunda

³⁷Paigunaj ñaubuki taugaidi pish na ruri pudishkagunada Jesús rikuchigukish Paida na crigagunachu. ³⁸Dios nishkada parluj Isaías kashna escribishka p’aktachunmi shina tukuga:

“Manduj, ñukuchi parlushkadaga ¿pidi crishkari?

Manduj Diosga Paibuj poderdaga ¿pimundi yachi chayachishka?”12.38 Is 53.1

³⁹Shina nishkamundami na cri pudigaguna, Isaiasga kaida escribishkamundash:

⁴⁰“Diosmi paigunaj ñawidash ichkushka paiguna ama rikuchun; shungudash jinchida rurushka ama intindichun; ama Ñukajmu shamuchun shinaidi Ñuka ama alliyachingaj.”12.40 Is 6.10; Mt 13.14-15

⁴¹Isaiasga Jesús k’uilladi gashkada rikusha Paimunda parlashkamundami kaidaga niga.

⁴²Shina gakish israelgunada mandujkunapuramundash taugaguna Jesusta crigaguna, ashtangarin fariseogunada manchushami Diosmunda yachana wasimunda ama llujshichisha kachachun, crishkadaga tukigunamunga na yachi chayachijkunachuga. ⁴³Paigunaga Dios <Alli> nishka gangu munashash yalliga genteguna <Alli> nishka ganada munushkamundami na parlugaguna.

Jesusbuj shimigunalladimi gentegunada juchachinga

⁴⁴Chimunda Jesusga jinchida kaparisha, “Maijinbish Ñukada crijka na Ñukallada crinchu, ashtanbish Ñukada Kachuj Taitadashmi crin. ⁴⁵Shinaidi maijin Ñukada rikujka Ñukada Kachujtashmi rikun. ⁴⁶Ñukaga Luz gashami tuki Ñukada crijkuna ama yanamangabi sakirichun nishkamunda kai pachamu shamugani. ⁴⁷Maijinsh Ñukaj shimigunada uyushash na kazukiga Ñukaga na juchachishachu. Kai pachada juchachingujka na shamuganichu, ashtanbish kishpichingujmi shamugani. ⁴⁸Maijin Ñukada na rikunachisha Ñukaj shimigunada na kazujka llakimu kachujtaga ñami charin. Ñuka parlushka shimigunaidimi tukurij p’unllabiga juchachinga. ⁴⁹Ñukaga Ñukaj munillamundaga na parluganichu; Ñukada Kachuj Taitami imada parlanadash imada yachachinadash manduga. ⁵⁰Pai mandushkaga na tukurij kausimu pushaj gashkadaga yachanimi. Shinakiga imada Ñuka parlushash Taita mandushka shinami parlani,” niga.

Yachagujkunaj chakida Jesús maillashkamunda

¹Jesusga kai pachamunda llujshisha Taitaj kuchumu rina uras chayamushkadaga Pascua pishta narikish chayujllabidi yachushami Paiga kai pachabi gaj Paibujkunadaga tuki ratu k’uyujkuga, shinami tukurina p’unllagama k’uyuga.

²Tuta mikuna urasmi gaga; Simón Iscariotej churi Judasbuj yuyibiga diabloga Jesusta japichina yuyida ñami churashkaga. ³Jesusga Taita tukida rurachun Paimu poderda kushkada, shinaidi Diosmunda shamushkada Diosllamundi vueltanashkadash yachushami, ⁴mikushka ratu mizamunda jatarisha, jawalla churanada anchuchisha, shuj toalladash chumbillinabi watariga. ⁵Chi k’ipa shuj batiabi yakuda churusha Paibuj yachagujkunaj chakida maillushami chumbillinabi watarishka toallan chakichingu kallariga.

⁶Ña Simón Pedroj chakida Jesús maillungu kuchuyaki paiga, “Manduj, ¿Kanchu ñukaj chakigunada maillush ninguiri?” niki,

⁷Jesusga, “Ñuka ima ruragushkadash kununga na intindinguichu, k’ipallami alli yachungui,” niga.

⁸Chimunda Pedroga, “Ñukaj chakida maillachunga nalladi sakishachu,” niki,

Jesusga, “Chakida Ñuka na maillukiga Ñukaj gangujka na pudinguichu,” niga.

⁹Chimunda Simón Pedroga, “¡Manduj, ñukaj chakilladaga ama maillichu, ashtanbish makidash umadash maillabai!” niga.

¹⁰Jesusga, “Maijinbish kununlla armushkalla gashaga tuki linshu gashkamundaga chakilladami maillana gan. Kangunaga linshu ganguichi; shinash na tukigunadijka linshu ganguichichu,” niga. ¹¹Maijin japichina gashkada Jesús yachushkamundami <Na tukigunaga linshu ganguichichu> niga.

¹²Shinushaga chakida maillushka k’ipaga jawalla churanada kutin churarisha mizamu kutin tiyarishaga, “¿Ñuka kangunada ima rurushkada intindinguichichu?” niga. ¹³“Kangunaga Ñukada ‘Yachachij’ shinaidi ‘Manduj’ nishaga allidami ninguichi; Ñukaga shinami gani. ¹⁴Shinushaga Ñuka, Manduj shinaidi Yachachij gashash kangunaj chakida maillukidijka, kangunash kaishuj chaishujmi chakida maillanukunanguichi. ¹⁵Ñuka rurushka layada kangunash rurachunmi shina rurusha rikuchishkani. ¹⁶Kabishkadadimi nini, maijin mandushkada rurujbish mandujtaga na yallichugun, shinaidi kachushkabish kachujtaga na yallichugun. ¹⁷Kaigunada alli intindisha shinaidi p’aktachishaga kushiyachishkami ganguichi.13.17 Tuki mashnalla Pai nishkada rurujkunamunga, kai kushilla ganadaga Diosmi kun.

¹⁸“Kangunapuramunda tukigunadaga na ninichu; maijingunada Ñuka agllushkadash rijsinimi. Shina gakish Diosbuj Shimibi kashna nishkaga p’aktanaidimi gan, ‘Ñukan igulda mikujlladimi Ñukada jaituj laya ruruga.’13.18 Ñauba griego shimibiga <Ñukada p’iñusha chaki talonda alsuga> nishaga manchanaidi litushka shinami gan. Sal 41.9

¹⁹“Ima ura shina tukukiga <Ñukadimi gani> nigujta kanguna crichunmi narikish imash tukujllabidi kununmundadi nini. ²⁰Kabishkadadimi nini, maijin Ñuka kachushkada japijka, Ñukadami japin; shinaidi maijin Ñukada japijka Ñukada Kachujtami japin,” niga.

Judas japichinada Jesús rikuchishkamunda

Mt 26.20-25; Mc 14.17-21; Lc 22.21-23

²¹Kaigunada nishka k’ipaga Jesusga llakilladi tukushaga, “Kabishkadadimi nini, kangunamunda shujka Ñukadaga japichingami,” nisha yachi chayachiga.

²²Chimunda Paibuj yachagujkunaga maijinda nishkadash na yachusha kaishuj chaishujmi rikunukugaguna. ²³Yachagujkunapuramunda Jesús pachun llakishkaga mikuna ratuga Paibimi kimirishkaga. ²⁴Chimunda Simón Pedroga, pimunda shina nigushkada Jesusta tapuchun nishami señaskunada ruruga.

²⁵Shina ruraki pai Jesusbuj kuchubi gashaidi, “Manduj, ¿pidikun?” nisha tapuga.

²⁶Chibimi Jesusga, “Tanda p’akida nuyuchisha maijinmu Ñuka kushka, paimi gan,” nisha tanda p’akida nuyuchishaga Simón Iscariotej churi Judasmu kuga. ²⁷Tandada Judas japinmi Satanasga paibi waiguga. Shinusha Jesusga, “Kan ima rurana gashkada ut’kada rurilla,” niga.

²⁸Mizabi tiyajkunamunda maijinbish imamunda paida shina nishkadaga na intindigagunachu. ²⁹Judas kuchkida apuj gashkamundaga shujkunaga <Jesusga pishtaj ima ministishkada randichun, na gashaga, imadash na charijkunamu imaidash kuchun nishami shina nigushkanchin> yuyugagunami. ³⁰Tandada japishka k’ipaga Judasga llujshisha rigallami; ña tutamiga.

Mushuj mandanada Jesús mandushkamunda

³¹Judas llujshisha rishka k’ipaga Jesusga kashna niga: “Kununmi Aichayuj tukushka Churiga k’uilla gashkadadi rikuchina chayamun. Taita Diosbish k’uilla gashkaga Ñukamundami rikuchishka gan. ³²Aichayuj tukushka Churi Dios k’uilla gashkada rikuchikiga, shinaidi Dioslladimi Churida k’uilla gashkada ñalla rikuchinga. ³³Ñuka k’uyashka wawagunalla, ña ashalladami kangunan gasha. Kangunaga Ñukada mashkunguichimi, shinash manduj israelgunada nishka layaidimi kangunadash nini, Ñuka rigushkamunga na ri pudinguichichu. ³⁴Kai mushuj mandushkadash kangunamunga kunimi: kaishuj chaishuj k’uyanukichi; ima laya Ñuka kangunada k’uyani, shinaidimi kangunash kaishuj chaishuj k’uyanukuna ganguichi. ³⁵Kanguna kaishujkun chaishujkun k’uyanukukimi Ñukaj yachagujkunadi gashkada tukiguna rijsingaguna.”

Pedro “Jesusta na rijsinichu” ninamunda

Mt 26.31-35; Mc 14.27-31; Lc 22.31-34

³⁶Simón Pedroga Jesusta, “Mandaj, ¿maimundi ringui?” nisha tapuki,

Jesusga, “Ñuka rigushkamunga kunundijka na katisha ri pudinguichu; k’ipallaga katinguillami,” niga.

³⁷Shina niki Pedroga, “Manduj, ¿imamundadi kununlladi na katish ri pudiniri? ¡Kanmunda ñukaj kausida kuna gakish kushallami!” niga.

³⁸Shina niki Jesusga, “¿Ñukamunda kambuj kausida kunguimuchari? Ashtanbish kanda kabishkadadimi nini, narikish gallo cantujllabidimi kinsa kutin Ñukadaga <Na rijsinichu> ninguimi,” niga.

Jesusga Taitajmu chayachij ñanmi

¹Jesús paigunada kashna niga: “Ama kaida chaida yuyasha mancharichichu, ashtanbish Diostash Ñukadash crichi. ²Ñukaj Taitaj wasibiga tauga kausana ukugunami tiyan; na shina gashkakiga ñami kangunamu parlanimuga. Shuj pushtudami kangunamu parijangu rini. ³Shina risha shuj pushtuda parijashka k’ipaga Ñuka tiyashka pushtullabidi kangunash gachun Ñukan pushusha ringu kutinmi shamusha. ⁴Kangunaga Ñuka maimu rigushka pushtumu pushuj ñandaga rijsinguichimi,” niga.

⁵Shina niki Tiumaga, “Manduj, Kan maimu rigushkadash na yachunchichu; ¿ñandagarin ima layadi yachashunri?” niga.

⁶Chimunda Jesusga, “Ñukami ñanbish, kabishkash, kausish gani. Maijinbish Ñukallamundami Taitajmunga chayi pudin. ⁷Kanguna Ñukada rijsishadijka Ñukaj Taitadash rijsinguichimi; ña rikushkamundaga kununmundadimi rijsinguichi.”

⁸Chimunda Felipega, “Mandaj, ñukuchimu Taitada rikuchibai; chilladami mañanchi,” niga.

⁹Shina niki Jesusga, “Felipe, unida kangunan ganindi; ¿shinash Ñukada narijchu rijsingui? Maijin Ñukada rikujka Taitadami rikushka. ¿Imashadi, ‘Taitada ñukuchimu rikuchibai,’ nisha mañungui? ¹⁰¿Ñukaga Taitabi shinaidi Taitash Ñukabi gashkada nachu cringui? Kangunamu imada nishash na Ñukaj munimunda ninichu. Ashtanbish Ñukabi kausuj Taitami Paibujti ruranagunadaga rurun. ¹¹Ñuka Taitabi gashkadash Taitash Ñukabi gashkadash crichi; na gashaga Ñuka rurushkagunallamundash crichiri. ¹²Kabishkadadimi nini, maijin Ñukada crijka Ñuka rurushkagunaidadimi rurunga; shinaidi Ñuka Taitajmu rigushkamundaga ashtandi yalligunadami rurunga. ¹³Shinaidi kanguna Ñukaj shutibi ima mañushkadash rurushami. Taita k’uilla gashkaga Churimunda rikuchishka gachunmi Ñukaga shinada rurusha. ¹⁴Kanguna imadash Ñukaj shutibi Ñukada mañukiga rurushami.”

Diosbuj Espirituda Jesús <Kushami> nishkamunda

¹⁵“Kanguna Ñukada k’uyushaga Ñuka mandushkagunada kazunguichimi. ¹⁶Ñukaga, kutin shuj Allimu Pushaj14.16 Allimu pushaj Espíritu nishaga, Diosbuj Espiritumunda parlan. Diosga ñukuchin gachun kachan; Paiga yachachij, kushichij, Dioskun allichichijmi ganga. Espirituda kuchunmi Ñukaj Taitada mañasha. Chi Pushajka tuki ratumi kangunan ganga. ¹⁷Chi Espirituga kabishkadadi yachachijmi, na crijkunaga Paida na rikushkamunda, na rijsishkamundaga na japi pudingagunachu; ashtanbish kangunan kausagushkamundaga Paida rijsinguichimi, shinaidi kangunabimi ganga. ¹⁸Shitashkagunadaga na sakishachu, kangunan gangu shamushami. ¹⁹Asha k’ipaga kai pachamundagunaga Ñukadaga na ashtan rikungagunachu; ashtanbish kangunaga rikunguichimi, shinaidi Ñuka kausagunalla gashkamundaga kangunash kausunguichimi. ²⁰Chi p’unllabimi Ñukaga Ñukaj Taitabi gashkada, kangunash Ñukabi gashkada, Ñukash kangunabi gashkada yachi chayunguichi. ²¹Maijin Ñuka mandushkagunada japisha kazujka, Ñukada kabishkadi k’uyushkadami rikuchin. Maijin Ñukada k’uyujtaga Ñukaj Taitash k’uyungami, Ñukash k’uyushami; shinaidi paimumi rijsirisha,” niga.

²²Chimunda chaishuj Judasga (paiga na Iscariotechuga14.22 Lc 6.16), “Mandaj Jesús, ¿imashadi ñukuchimu rijsirisha ashtan kai pachaj gajkunamunga na rijsirisha ninguiri?” nisha tapuga.

²³Shina tapuki Jesusga, “Maijin Ñukada k’uyujka Ñuka parlushkada kazungami, Ñukaj Taitash paida k’uyungami, shinaidi Taitash Ñukash paibimi kausungu shamushun. ²⁴Maijin Ñukada na k’uyajka, Ñuka parlushkadaga na kazunchu; kanguna uyashka shimigunaga na Ñukajchugun, ashtanbish Ñukada kachuj Taitajmi gan.

²⁵“Kaigunadaga kangunan gashka ratuidimi niguni. ²⁶Ashtanbish Taita Diosga Ñukaj shutibimi Paibuj Allimu Pushaj Espirituda kachunga; Paimi tukida yachachinga, shinaidi kangunamu Ñuka ima nishkadash tukida yuyachinga. ²⁷Ñuka rishaga k’uilla kausidami kangunamu sakini; chi k’uilla kausiga Ñukallamundadimi shamun, kai pachamundaguna kushka shinaga na kunichu. Shinusha ama kaida chaida yuyasha musparichichu, shinaidi ama mancharichichu.

²⁸“ ‘Rinimi,’ nishkada shinaidi, ‘Kutin kangunan gangu shamushami,’ nishkadash ña uyushkanguichimi. Kanguna Ñukada kabishkadi k’uyushkashaga, Taitajmu rinashkada yachushaga kushiyanguichimumiga. Taitaga Ñukadash yallimi gan. ²⁹Kai nishkaguna p’aktuki kanguna crichunmi narij shina tukujllabidi kaidaga parlani. ³⁰Kai pachada manduj diablo shamugushkamundaga kangunanga yalliga ña na parlarigushallachu. Chi shamuj Ñukada imadash na ruri pudinchu. ³¹Ashtanbish Ñukaga, Taitada k’uyuj gashkada shinaidi Pai mandushkalladadi ruruj gashkada kai pachabi kausujkuna yachachunga, shinaidimi gana gan.

“Kununga, jatarisha kaimunda jakuchilla,” niga.

Jesusga uva yura shinami

¹Jesusga nigami, “Ñukaga kabishkadi uva yura shinami gani, Ñukaj Taitaga achpabi rurujmi. ²Ñukaj ramagunamunda maijin uvada na aparij ramadaga p’itishtangami; ashtanbish uvada tuki aparijtaga ashtan aparichun linshushami parijanga. ³Kangunaga Ñuka parlushkagunan ñami linshushka ganguichi. ⁴Ima layami Ñuka kangunan tandanukushka gani, shinaidi Ñukan tandanukushka gaichi. Shuj ramaga yuran na tandanukushka gashaga pailladijka na uvada apari pudinchu. Shina layaidi Ñukan na tandanukushka gashaga kangunallaga ima granudash na kui pudinguichichu.

⁵“Ñukaga uva yurami gani, kangunaga ramagunami ganguichi. Ñuka illujka imadash na ruri pudinguichichu. Chimundami maijin Ñukan tandanukushka gasha, Ñukash paigun tandanukushka gakiga granuda pachun kunga. ⁶Maijin na Ñukan tandanukushka gajka ramagunada shina washamu shitashkami ganga. Chakirishka ramagunada tandachisha ninamu shitusha rupachishka shinami ganga. ⁷Kanguna Ñukan tandanukushka kausasha, shinaidi Ñuka yachachishkagunada rurusha katishaga, tuki ima munushkadash mañichilla; kangunamu kungami. ⁸Shina pachun granuda kuj gashami kanguna Ñukaj yachagujkunadi tukunguichi; chibimi Ñukaj Taitaga k’uilladi gashkan rikuchishka ganga. ⁹Ñukaj Taita ima laya Ñukada k’uyun, shinaidimi Ñukash kangunada k’uyani. Shinushaga Ñuka k’uyushkabi katichi. ¹⁰Ima layami Ñukaga Ñukaj Taita mandushkagunada kazusha Paibuj k’uyushkabi katini, shinaidi kangunash Ñuka mandushkagunada kazushaga Ñuka k’uyushkabimi katinguichi.

¹¹“Ñuka kushiyashka laya kushilla gachun kangunaj kushilla ganash illujta p’aktushka gachunmi kaigunada parlani. ¹²Ñukaga kaidami mandani: ima layami Ñuka kangunada k’uyani, shinaidi kangunash kaishujkun chaishujkun k’uyanukuchun. ¹³Maijinsh alli apanukujkunamunda kikinbuj kausida kujmi jatun k’uyidaga charin. Chida yalliga pish na k’uyanchu. ¹⁴Kangunaga Ñuka mandushkada rurushaga Ñukan alli apanukujkunami ganguichi. ¹⁵Kununmundaga kangunadaga <sirvijkuna> nishaga na nishachu; sirvijka paida manduj imada ruragushkada na yachunchu; ashtangarin kangunadaga Ñukaj Taita Ñukamu ima nishkagunada tukida kangunamu yachi chayachishkamundaga <Ñukan alli apanukujkuna> ninimi. ¹⁶Kangunaga Ñukadaga na aglluganguichichu, Ñukami kangunadaga agllugani. Kanguna risha pachun granuda kuj yura shina gachun shinaidi kanguna apashka granugunaga na chingarichunmi mingugani. Shinami Ñukaj shutibi imadash mañukiga Taitaga kangunamu kunga. ¹⁷Kaishujkun chaishujkun k’uyanukuchunmi kangunadaga mandani.”

Kai pachamundaguna Jesustash Paibujkunadash p’iñushkamunda

¹⁸“Kai pachamundaguna kangunada p’iñukiga Ñukadadi p’iñushkada yuyunguichi. ¹⁹Ñukami kai pachagunapuramunda kangunadaga agllugani, shinusha na kai pachaj gashkamundami kai pachaj gentegunaga kangunada p’iñunguna. Kanguna kai pachaj gakiga kai pacha gentegunaga paigunapura k’uyanukushka laya k’uyunmumi. ²⁰Ñuka kai parlushkada yuyarichi: ‘Maijin mandushkada rurujkish mandujtaga na yallichu.’15.20 Jn 13.16 Ñukadash katik’ichujkunadijka kangunadash katik’ichungagunami; Ñuka parlushkagunadash paiguna kazushkashaga, kanguna parlushkadash kazungagunami. ²¹Ashtanbish Ñukada Kachujta na rijsishkamundami kanguna Ñukada katishkamunda kai tukigunadaga rurungaguna.

²²“Ñuka parlungu na shamushkakiga jucha illujkunami ganmuga.15.22 Tukiguna juchayujkunami ganchi (Ro 1.20; 3.23). Kaibiga Jesusga Pai parlashkada na crisha Paida p’iñashash juchada rurushkadami yachachin. Ashtanbish kununga <Ima juchash na charinichu> ningujka na pudingagunachu. ²³Maijin Ñukada p’iñujka Ñukaj Taitadash p’iñunmi. ²⁴Pish narij rurushkagunada paigunaj ñaubuki Ñuka na rurushkakiga, jucha illujkunami ganmuga; ashtanbish ña kaigunada rikushkagunami; shina rikushash Ñukada Ñukaj Taitadash p’iñungunami. ²⁵Paigunada mandushkabi,15.25 Kaibiga Ñauba Testamentobi rurushka tuki librogunamundami parlagun. ‘Ñukada yangami p’iñagaguna,’15.25 Sal 35.19; 69.4 nisha escribishka shimiguna p’aktachunmi shina tukuga.

²⁶“Ashtanbish Taitamunda shamuj Espíritu shamushami Ñukamunda yachi chayachinga. Paimi Taitajmunda Ñuka kachana Allimu Pushaj shinaidi kabishkada yachachij Espíritu gan. ²⁷Shinaidi kangunash kallarimundadi Ñukan gashkamundaga Ñukamunda yachi chayachinguichimi.

¹“Kanguna Ñukada crishkada ama chingachichunmi kaigunadaga nini. ²Diosmunda yachana wasimundash kangunada llujshichisha kachungagunami, shinaidi maijinsh kangunada wañuchishaga <Shinami Dios munushkada ruranchi> nina p’unllagunash chayamungami. ³Taitadash Ñukadash na rijsishkamundami kaigunadaga shina rurungaguna. ⁴Chi p’unllaguna chayukiga Ñuka kangunamu ña nishkada yuyarichunmi kaigunadaga shina parlani.”

Diosbuj Espíritu shamusha tukida yachachinamunda

“Kangunan igulda gashkamundami kallarimundadijka kaigunadaga na parlugani. ⁵Kununga Ñukada Kachujbujmumi riguni; kangunamunda maijinllash ‘¿Maimu ringui?’ nishash na tapunguichichu. ⁶Ashtanbish Ñuka kaigunada parlushkamundaga shungundijta llakilladimi tukushkanguichi. ⁷Ashtanbish kangunabujka Ñuka rishkami alli ganga, nishaga kabishkadami nini. Ñuka na rikiga Allimu Pushaj Espirituga kangunan gangujka na shamungachu; ashtanbish Ñuka rishaga Paida kangunamu kachushami. ⁸Pai shamushaga maijindi juchayuj maijindi kabishkada ruruj gashkada, shinaidi maijindi Diosbuj llakichinada japina gashkadash tuki kai pachamundagunamu laruda rikuchinga. ⁹Juchamunda parlashaga Ñukada na crishkamunda juchayuj gashkadami rikuchinga. ¹⁰Kabishkada ruruj gashkamundaga, Ñuka Taitajmu rigushkamunda, kanguna Ñukada ña na rikunashkamundash, Paimi rikuchinga. ¹¹Diosbuj llakichinamundaga, kai pachada manduj diablodaga ñami juchachishka gashkadash rikuchinga.

¹²“Kangunamu parlanadaga chairijtij manchanaidimi charini, ashtanbish kununbiga ashtan cargada apachij shina parluki japingujka na pudinguichichu. ¹³Ashtanbish kabishkada yachachij Espíritu shamushami tuki kabishkamu pushanga; na Paibuj munillamunda parlungachu, ashtanbish tuki ima uyushkaidami parlunga, shinaidi ima tukunagunadash yachi chayachingami. ¹⁴Ñuka parlashkada japishami kangunamu rijsichinga, shina rurushami Ñuka k’uilla gashkadash rikuchinga. ¹⁵Ñukaj Taita tuki ima charishkash Ñukajmi gan, shinushami, ‘Diosbuj Espíritu Ñuka parlashkada japisha kangunamu rijsichinga,’ nigani.

¹⁶“Asha k’ipallaga Ñukada ña na rikunguichichu. Shinaidi ashan k’ipallagunaga kutinmi Ñukada rikunguichi,” niga.

“Llakilla gashkash kushimi tukunga”

¹⁷Shinushaga Paibuj yachagujkunamunda maijingunaga, “ ‘Asha k’ipallaga Ñukada ña na rikunguichichu. Shinaidi ashan k’ipallagunaga kutinmi Ñukada rikunguichi,’ nisha shinaidi ‘Ñuka Taitajmu rigushkamunda,’ nishaga ¿ima nishadi shina nin?” nisha kaishuj chaishuj tapunukugaguna. ¹⁸Shina, “ ‘Ashan k’ipallaga,’ nishaga, ¿imadadi nisha nigun? Na intindinchichu,” ninukukimi,

¹⁹Jesusga Paida tapungu munushkada yachushami kashna niga: “¿Ñuka, ‘Asha k’ipa ña na rikunguichichu, asha k’ipallaga kutin rikunguichimi,’ nishkadachu kangunapura tapunukunguichi? ²⁰Kabishkadadimi nini, kangunaga wakusha llakilla ganguichimi, ashtanbish kai pacha gentegunaga kushiyangagunami. Ashtangarin kanguna llakilla gashkash kushimi tukunga. ²¹Shuj warmi wachanalla gasha ña uras p’aktushkamundaga nanachishami llakirin. Shinash marada mirushka k’ipaga kai pachamu shuj mara wacharishkamundaga kushiyarishami nanidash kungarin. ²²Shinaidimi kangunash kununga llakiringuichi; shinakish Ñuka kutin rikungu shamushami. Chibimi kangunaj shungubiga pish na anchuchi pudibuj kushi jundunga. ²³Chi p’unllabiga Ñukada ña imadash na tapunguichichu. Kabishkadadimi nini, Ñukaj shutibi imadash Taitada mañukiga kangunamu kungami. ²⁴Kangunaga Ñukaj shutibi kunungamaga imadash na mañushkanguichichu. Shinusha mañichi, japinguichimi, kangunaj kushi illujta p’aktushka gachun.”

Jesús kai pachada ña vincishkamunda

²⁵“Kaigunadaga ch’imbapurashallami kangunamu parlushkani; shinaidi ch’imbapurashkagunan ña na parlushalla ashtanbish Ñukaj Taitamunda tukida laru parlana urasbish chayamungami. ²⁶Chi p’unllagunaga Ñukaj shutibimi kangunaga Paida mañunguichi. <Kangunamunda Taitada Ñukalladi mañushami> nishaga na ninichu. ²⁷Taitalladimi kangunadaga k’uyan. Kanguna Ñukada k’uyushkamunda shinaidi Diosmunda Ñuka shamushkada crishkamundashmi kangunadaga k’uyan. ²⁸Taitajmundami kai pachamu shamugani; kutin kai pachamunda risha Taitajllamundimi riguni,” niga.

²⁹Shina niki Paibuj yachagujkunaga, “Kununmi ch’imbapurashkagunada na churusha laruda parlangui. ³⁰Kununmi Kan tukida yachuj gashkada, shinaidi pi ima tapunash na ministirishkadash yachanchi,16.30 Paiguna narij tapujllabidi Jesús contestashkamundami shina nin. Genteguna ima yuyashkada Diosllami yachi pudin. shinushami Kanga Diosmunda shamushkada crinchi,” nigaguna.

³¹Shina niki Jesusga, “Shinushaga ¿kununchu cringuichi? ³²Rikichi, ñami uraska kuchuyamun, kanguna Ñukaida sakisha kangunaj wasimu t’siraparisha rinash kununlladimi gan. Shinash Taita Ñukan gashkamundaga na Ñukalla ganichu. ³³Kanguna Ñukan tandanukushka gasha k’uilla kausida japichunmi kai tukigunadaga parlugani. Kai pachabi kangunaga llakidami apana ganguichi; shinash jinchi tukunguichi, Ñukami kai pachadaga ña vincigani,” niga.

Jesús Paillamundadi Diosta mañushkamunda

¹Kaigunada nishka k’ipaga jawa pachada Jesús rikushaga, “Taita, ñami uraska chayamushka: Kambuj Churi pachun k’uidij gashkada rikuchibai, Kambuj Churish Kanda pachun k’uidij gashkada rikuchichun. ²Shinaidi mashnalla Kan Ñukamu kushkagunamush na tukurij kausida kuchunmi, tuki gentegunada mandachun Kan Ñukada churashkangui. ³Kan shujlla kabishka Diosta shinaidi Kan kachushka Jesucristodash rijsishami paigunaga chi na tukurij kausidaga japinga.

⁴“Kan kushka ruranagunada tukuchishami kai pachabi Kan pachun k’uidij gashkadaga Ñukaga rikuchishkani. ⁵Kununga Taitalla, kai pacha narikish tiyajllabidi Ñuka Kangun gasha charishka k’uilla gashkalladadi Kambuj ñaubuki rikuchibai.”

Paibuj yachagujkunamunda Jesús Diosta mañushkamunda

⁶“Kai pachabi gajkunamunda Kan agllusha kushkagunamunga Kan pi gashkada rijsichishkanimi. Kambujkunamiga. Shinash Ñukamumi kugangui. Shinaidi Kan parlushkadash kazushkagunami. ⁷Kununga Kan tuki imalla Ñukamu kushkagunaga Kanmundadi shamushkadami yachunguna. ⁸Kan parlachun nishkagunadash parluganimi. Paigunaga japishkami. Kabishkadi Kanmunda shamushkada yachi chayagagunami. Shinaidi Ñukadaga Kan kachushkadash crishkagunami.

⁹“Paigunamundami mañani. Kai pachabuj gajkunamundaga na mañanichu. Ashtangarin Kambujkuna gashkamundami Kan Ñukamu kushkagunamunda mañani. ¹⁰Imalla Ñukabuj gashkaga Kambujmi, imalla Kambuj gashkaga Ñukajmi. Shinaidi Ñuka pachun k’uilladi gashkaga paigunabi laru rikunallami.

¹¹“Ñukaga kai pachabiga na gashachu, paigunaga kai pachabimi katingaguna; ashtanbish Ñukaga Kangun gangumi riguni. Jucha illuj Taitalla, ima shina Ñukash Kambish shujlla ganchi, shinaidi paigunash shujlla gachun, Ñukamu kushka Kambuj shutibi wakichibai. ¹²Ñuka kai pachabi paigunan gashaga Ñukamu kushka Kambuj shutibi ama imash tukuchun wakichigugani. Paigunamunda maijinsh na chingarigachu, ashtanbish Diosbuj Shimi nishka p’aktachunga chingarinaj k’arillami chingariga.

¹³“Kununga Kan maibi tiyashkamumi riguni. Ñukada katijkuna Ñuka kushiyashka laya kushilla gana illujta p’aktushka gachunmi kai pachabi gashaidi kaigunadaga niguni. ¹⁴Ñukaga Kan parlachun nishkadami paigunamu parlugani. Ñuka na kai pachamundachu gani, paigunash na kai pachaj ganchu. Chimundami paigunadaga kai pachamundaguna p’iñunguna. ¹⁵Ñukajkunada kai pachamunda anchuchichunga Kanda na mañanichu, ashtangarin paigunada na allimunda17.15 “Na allimunda” nishaga diablomunda wakichichun nishka layami gan. wakichichunmi mañani. ¹⁶Ima layami Ñukash na kai pachabuj gani, shinaidi paigunash na kai pachabujchu gan. ¹⁷Kan parlashkami kabishka gan. Kan kabishka parlashkan paigunada Kambujlla gachun rurabai. ¹⁸Ima layami Ñukada kai pachabi kausujkunajmu kachugangui, shinaidimi Ñukash paigunadaga kai pachabi gajkunajmu kachani. ¹⁹Paigunash kabishka parluda crisha Kambujlla gachunmi, Ñukaga Ñukalladi Kambujlla gangu ch’ikunyarishka gani.”

Tuki crijkunamunda Jesús Diosta mañushkamunda

^20-21“Paigunallamundaga na mañanichu, ashtanbish paiguna parlushkada uyusha k’ipalla Ñukada crij ganagunamundashmi, tukiguna shujlla gachun mañani. Taitalla, Ñukada Kan kachashka gashkada kai pachabi kausajkuna crichunga, ima layami Kan Ñukabi gangui Ñukash Kambi gani, shinaidi paigunash Ñukuchibi shujlla gachun nishami mañani. ²²Ñukuchi shujlla gashka layaidi paigunash shujlla gachunmi Kan Ñukamu kushka chi k’uilla gashkalladadi rikuchichun paigunamush kugani. ²³Ñukash paigunabi, Kambish Ñukabi shujlla gana illujta p’aktushka gachunmi mañani. Shinami kai pachamundaguna Kan Ñukada kachushka gashkada shinaidi Ñukada k’uyashka layaidi paigunadash k’uyushkada yachungaguna.

²⁴“Taitalla, kai pachada narij rurujllabidimi Ñukada k’uyasha pachun k’uidij ganada Ñukamu kugangui. Kan Ñukamu kushka gentegunaga shina k’uilla gashkada paiguna rikuchunga Ñuka maibi gashkallabidimi paigunash Ñukan gachun munani.

²⁵“Kabishkada ruruj Taitalla, kai pachabi gajkunaga Kandaga na rijsinchu; ashtanbish Ñukaga Kandaga rijsinimi, shinaidi kaigunash Ñukada Kan kachashkadaga yachungunami. ²⁶Kan Ñukada k’uyushka layaidi paigunash chi k’uyillandi shujkunada k’uyachun, shinaidi Ñukaidikish paigunabi gangu, Kan pi gashkadaga rijsichishkanimi; shina rijsichisha katigushallami,” niga.

Jesusta prezu japishkamunda

Mt 26.47-56; Mc 14.43-50; Lc 22.47-53

¹Shina nishka k’ipa Jesusga Paibuj yachagujkunandijmi Cedrón waiku yaku ch’imbamu riga. Chibiga huertomi tiyaga. Chimumi Jesusga Paibuj yachagujkunandij waiguga. ²Shinaidi Jesús Paibuj yachagujkunan tauga kutin chibi tandanukuj gashkamundaga Paida japichiguj Judasbish chi pushtudaga rijsijmiga. ³Shinami Judasga tauga soldadogunan shinaidi Diosbuj wasida chapujkunandij, manduj curaguna fariseogunash kachushka chayugaguna. Paigunaga nina japichishka kaspigunan lamparagunan tuki laya takanukunagunadash apushkagunamiga. ⁴Ashtanbish Jesusga Pai ima tukunashkadash tukida ña yachushkamunda llujshishaga, “¿Pida mashkagunguichi?” nisha tapuga.

⁵Paigunaga, “Nazaretmunda Jesusta,” niki,

Jesusga, “Ñukami gani,” niga. Japichingu purij Judasbish chibi paigunanmiga. ⁶Shina, “Ñukami gani,” nisha Jesús nikiga, washamu sikiyasha pambamu urmugaguna. ⁷Chimunda Jesusga, “¿Pida mashkagunguichi?” nisha kutinlladi tapuki,

paigunaga, “Nazaretmunda Jesusta,” nigaguna.

⁸Shina niki Jesusga, “Ñukaidimi gani nisha ña niganindi. Ñukada mashkagushaga Ñukaj katijkunadaga richun sakichi,” niga. ⁹“Ñukamu kushkagunamundaga shujlladash na chingachiganichu,” nisha ña parlashka p’aktachunmi Jesusga shina niga. ¹⁰Chimunda Simón Pedroga pai charishka espadada surkusha jatun manduj curamu sirvij Malco shuti k’arij alli ladu rinrinda p’itishtaga. ¹¹Chimunda Jesusga Pedrodaga, “Kambuj espadada chi pushtullabidi churi. Taita Ñukamu jayuj ubiana shinada kukidijka, ¿maidadi na ubiashallari?” niga.

Jesusta Anasbujmu pushashkamunda

Mt 26.57-58; Mc 14.53-54; Lc 22.54

¹²Kanllalladi soldadogunaga paigunada mandajbish shinaidi israelgunaj chapujkunash Jesusta prezu japisha watugaguna. ¹³Chimundaga Caifasbuj suegro gashkamundami Anasbuj wasimundi Jesustaga pushugaguna; Caifasga chi watabiga jatun manduj curamiga. ¹⁴Caifaslladimi, “Kai llaktabi kausujkunamunda tukiguna wañuna randiga shuj k’arillami wañuna alli gan,” nisha israelgunamunga nishkaga.

Pedro “Jesusta na rijsinichu” nishkamunda

Mt 26.69-70; Mc 14.66-68; Lc 22.55-57

¹⁵Simón Pedroga shuj yachagujkunmi Jesusta katisha rigugaguna. Pedron rij yachagujka jatun manduj curaj rijsishka gashkamundami Jesuskundij pungu pambamu waiguga. ¹⁶Pedroga washa pungullabimi sakiriga. Chimundami curagunada manduj rijsishka yachagujka kanllamu llujshisha punguda chapuj warmin parlanukusha Pedroda ukumu waiguchiga. ¹⁷Pedro waiguki punguda chapuj warmiga, “¿Nachu kambish chi k’arij yachaguj gangui?” nisha tapuga.

Shina niki Pedroga, “Na, na ñukachuni,” niga. ¹⁸Chiri gakimi Diosbuj wasida chapujkunash sirvijkunash ninada japichishkagunaga. Chibimi Pedrosh paigunandi igulda kunusha shayaguga.

Jesusta Anas tapushkamunda

Mt 26.59-66; Mc 14.55-64; Lc 22.26-71

¹⁹Jatun manduj curaga Jesusta Paibuj yachagujkunamunda shinaidi Pai ima yachachishkadami tapungu kallariga. ²⁰Chimunda Jesusga, “Ñukaga tukigunaj ñaubukimi parlushkani. Diosbuj wasibish Diosmunda yachana wasigunabish tuki israelguna maibi tandanukushkabimi yachachishkani; imadash pakalla na yachachishkanichu. ²¹¿Imasha Ñukada tapungui? Ñuka parlushkada uyujkunada tapiri. Paigunaga Ñuka ima nishkadash yachunmi,” niga.

²²Jesús shina niki chibi gaj chapujkunamunda shujka, “¡¿Jatun manduj curadachu shina ninguiri?!” nisha Jesusbuj ñawibi lutskiga.

²³Chimunda Jesusga, “Imada na alli nishkakish, ima na alli gashkada rikuchibai. Shinaidi Ñuka ima nishka alli gakiga, ¿imashti Ñukada lutskingui?” niga.

²⁴Chimunda Anasga jatun manduj cura Caifasbujmu Jesusta watushkada kachuga.

Pedro kutin “Jesusta na rijsinichu” nishkamunda

Mt 26.71-75; Mc 14.69-72; Lc 22.58-62

²⁵Pedroga ninabi kunusha katigallami. Chimunda shujkunaga, “¿Nachu kambish chi k’arij yachagujkunapuramunda gangui?” nisha tapuki,

Pedroga, “Na ñukachuni,” niga.

²⁶Shina niki jatun manduj curaj sirvijkunamunda shujka, “¿Nachu paigun huertobi kanda rikugani?” niga. Tapujka Pedro rinrinda p’itishkaj familiamiga.

²⁷Kutinlladi Pedro, “Na” ninmi, gallo cantuga.

Pilatoj ñaubuki Jesús gashkamunda

Mt 27.1-2,11-14; Mc 15.1-5; Lc 23.1-5

²⁸Caifasbuj wasimundaga manduj Pilatoj wasimumi Jesusta pushusha rigaguna. Ña p’unllayamuki israelgunaga ama mapalla tukungu ashtanbish Pascua mikunadaga linshu gasha mikungajmi chi wasi ukumunga na waigugaguna.18.28 Na israelgunaj wasibi waigushaga israelgunaga “Mapalla tukushkami ganchi,” nisha yuyujkunaga; shina tukushaga Pascua mikunadaga “Na miki pudinachugun,” nijkunaga.²⁹Chimunda manduj Pilato parlaringu llujshishaga, “Kai k’aridaga, ¿imadadi juchachinguichi?” niki,

³⁰“Ima millidash na ruruj gashkakiga kambujmuga na pushamunchimuchuga,” nigaguna.

³¹Shina niki Pilatoga, “Kangunaj mandushkabi nishka shina juchachingujka pushusha richilla,” niga.

Chimunda manduj israelgunaga, “Ñukuchijka pidash na wañuchinallachu ganchi,” nigaguna. ³²Shinami Jesús Pai ima laya wañuna gashkada parlushka p’aktuga.

³³Chimunda Pilato pai mandusha tiyana ukumu kutin waigusha Jesusta kayushaga, “¿Kanchu israelgunaj jatun manduj gangui?” nisha tapuga.

³⁴Shina tapuki Jesusga, “¿Kaidaga kambuj yuyimundachu? na gashaga ¿shujkuna Ñukamunda nishkalladachu tapungui?” niga.

³⁵Chimunda Pilatoga, “¿Ñukaga israelchu gani? Kambuj llaktabi kausujkuna manduj curagunashmi kandaga ñukajmunga pushamuga. ¿Imada rurugangui?” nisha tapuga.

³⁶Shina tapushkamunda Jesusga, “Ñuka mandanaga na kai pachabujchu. Kai pachabi mandana gakiga Ñuka nishkada rurujkunaga takanukusha israelda mandajkunamu kuchunga na sakinmuchuga. Ashtangarin Ñuka mandanaga na kai pachabujchu,” niga.

³⁷Chimunda Pilatoga, “Shinaga ¿kanga jatun mandujchu gangui?” nisha tapuga.

Shina tapuki Jesusga, “Ñuka jatun manduj gashkadaga kanlladimi nishkangui, Ñukaga kai pachamu shamusha kabishkada parlungumi wacharigani. Shinaidi mashnalla kabishkabuj gajkunaga Ñuka parlushkada uyanmi,” niga.

³⁸Shina niki Pilatoga, “¿Imadikun kabishka shimiga?”18.38 Pilatoga <Maijinsh kabishkada illujta alli yachana illungamami> nisha yuyashkanga. Shuj gente Pailladi kabishkadi gashkadaga naidi yachi pudigachu. Jesús, <Kabishkami gani> nishkada Juan 14.6bi rikungui. nisha tapuga.

Shina tapushka k’ipa Pilatoga kutinmi israelgunan parlaringu llujshiga; chibimi, “Kai k’aribiga ima na alli rurushkadaga na japinichu. ³⁹Ashtanbish kangunaga Pascua pishtagunabiga prezu tiyajkunamunda shujta kacharichun nijkunami ganguichi. ¿Israelgunada jatun mandujta kacharichun ninguichichu?” nisha tapuga.

⁴⁰Shina tapuki tukigunami, “¡Paidaga ama kacharichu! ¡Barrabasta ashtan kachari!” nisha kutin kaparigaguna. Barrabasga manchanaidi shuwami gaga.

¹Chimunda Pilatoga Jesusta japishaga azilgun dalichunmi19.1 Jesusta dalishka azilga taugaidi puntagunada charijmi. Chi puntagunaga jirrudash na gashaga tulludashmi rurushkaguna gaga. kachuga. ²Soldadogunaga Paida mandujma layada rurusha shuj coronada kashan rurushami Jesusbuj umabi churachigaguna. Shinaidi jawalla yana puka churanadash churachigaguna. ³Chi k’ipaga, “¡Israelgunada jatun manduj alli gachun!” nishalla kuchuyashaga takugallagunami.

⁴Pilato kutin washamu llujshishaga paigunada, “Rikichi. Ima na alli rurashkada paibiga na japinichu; chida kanguna yachachunmi washamu pushamushkani,” niga. ⁵Jesusga kashan rurashka coronada umabi churashka shinaidi yana puka churanada churashkami washamu llujshiga. Chimunda Pilatoga, “¡Kaibimi kai k’arida charinguichi!” niga.

⁶Manduj curagunash shinaidi chapujkunash Jesusta rikushaga, “¡Chakati! ¡Chakati!” nisha kaparigaguna.

Chimunda Pilatoga, “Kangunaidi paida pushush risha chakatichilla. Ñukaga ima na alli rurushkadaga paibiga na japinichu,” niga.

⁷Shina niki israelgunaga, “Ñukuchiga mandushkadami charinchi. Chi mandashka shinaga, ‘Diosbuj Churimi gani,’ nisha purishkamundaga wañunami kabin,” nigaguna.

⁸Shina nijta uyushagarin Pilatoga ashtanmi manchariga. ⁹Pilatoga pai mandusha tiyanamu kutin waigushaga, “Kanga, ¿maimundadi gangui?” nisha Jesusta tapuga.

Shinash Jesusga imadash na nigachu. ¹⁰Chimunda Pilatoga, “¿Nachu ñukamu imadash parlasha ningui? Ñukaga kacharichunbish na gashaga cruzbi chakatachunbish mandi pudinashkadaga, ¿nachu yachungui?” niga.

¹¹Shina niki Jesusga, “Dios kanmu na kushkakiga Ñukada ima rurachun mandanada na charinguimuchuga. Shinushaga Ñukada maijin kanmu chayachijmi kandash yalli juchayuj gan,” niga.

¹²Shina nishkamunda pachami Pilatoga Jesusta ima layash kacharingu yuyaguga. Shinash israelgunaga, “Kan kai k’arida kacharishaga, ¡jatun manduj Cesargun na apanukujchu tukungui! Maijinsh jatun manduj tukush nijka ¡Cesarda p’iñajmi gan!” nisha kaparigaguna.

¹³Shina nishkada Pilato uyusha Jesusta washamu llujshichichun mandushka k’ipaga juez gangu mandanabi tiyariga. Chi pushtuga hebreo parlubiga, Gabata shutimiga. Shina nishaga Rumi Pamba nishkami gan. ¹⁴Pascua pishtaj shuj p’unlla jualtaguki chi chaubi p’unlla shinadami Pilatoga israelgunamu,

“¡Kaibimi kangunaj jatun mandujta charinguichi!” niga.

¹⁵Shinash paigunaga, “¡Llujshichi, llujshichi! ¡Cruzbi lavusha wañuchilla!” nisha kapariga.

Chimunda Pilatoga, “¿Kangunaj jatun mandujtachu chakatashari?” nisha tapuga.

Chimunda manduj curagunaga, “Ñukuchijka jatun manduj Cesarlladami charinchi,” nigaguna.

¹⁶Chimundami Pilatoga cruzbi lavungu richun Jesusta paigunamu kuga. Shina kukimi pushusha rigaguna.

Jesusta cruzbi lavushkamunda

Mt 27.32-44; Mc 15.21-32; Lc 23.26-43

¹⁷Jesusga cruzta aparisha Uma Tullu nishka pushtumumi llujshisha riga. Hebreo parlubiga, Gólgota nishkami gan. ¹⁸Chibimi Jesustaga ishki k’arigunandij shujta alli ladubi chaishujta lluki ladubi cruzbi lavusha chakataga. Shinami Jesusga chaubibi sakiriga.

¹⁹Shinaidi Pilatoga, “NAZARETMUNDA JESUSGA ISRAELGUNADA JATUN MANDAJMI,” nisha escribishaga cruzbi churachun manduga. ²⁰Maibi Jesusta cruzbi lavushkaga, Jerusalén kuchullabi gashkamundami tauga israelguna chi escribishkada liyuga. Shinaidi hebreo parlubi, latín parlubi, griego parlubishmi rurashkaga. ²¹Chimundami israelgunada manduj curagunaga Pilatoda, “ ‘Israelgunada jatun manduj,’ nishaga ama escribichu, ashtangarin, ‘ “Israelgunada jatun mandujmi gani,” nijmi,’ nisha escribiri,” nigaguna.

²²Shina niki Pilatoga, “Ñuka escribishkaga escribishkami sakiringa,” niga.

²³Soldadogunaga Jesusta ña cruzbi lavushka k’ipaga churanada japisha chuskubi partishaga shuj shujmi japinukugaguna. Shinaidi na sirushalla jawamunda ura chakigama awashka ukumu churanadashmi japigaguna. ²⁴Chimundami soldadogunaga, “Ashtan na llikishalla maijinmumi urmushkada rikungu sorteoda rurashunchi,” nisha parlanukugaguna. Shina rurukimi,

“Ñuka churanada partinukugaguna, shinaidi

ukumu churanadash surtiyashami japigaguna,”19.24 Sal 22.18

nisha Dios escribichishkaga p’aktuga. Shinaidimi soldadogunaga ruruga.

²⁵Jesusta lavushka cruz kuchubiga Paibuj mamash, Paibuj mamaj ñañash, Cleofasbuj warmi Mariash, shinaidi Magdalamunda Mariashmi chibiga. ²⁶Jesusga mamadash Pai k’uyashka yachaguj maman shayajta rikushaga mamadaga, “Riki mama, kaibimi kambuj churi,” niga. ²⁷Chi k’ipa Paibuj yachagujmu, “Chibimi kambuj mamada charingui,” niga. Shina nishka p’unllamunda pachami chi yachagujka Jesusbuj mamadaga paibuj wasibi kausachun japiga.

Jesús wañushkamunda

Mt 27.45-56; Mc 15.33-41; Lc 23.44-49

²⁸Chi k’ipa Jesusga ña tuki p’aktushkada yachushami Dios escribichishka p’aktachunga, “Yakunayunmi,” niga. ²⁹Chibimi shuj wallu junda jayuj vino tiyaga. Chimunda hisopo ramabi shuj esponjada watusha chi jayuj vinon lapujyachisha Jesusbuj shimimu kuchuyachigaguna. ³⁰Jayuj vinoda Jesús ubiushaga, “Ña tukimi p’aktachishka gan,” niga. Shina nishka k’ipaga umada kumurichisha Paibuj espirituda Diosmu mingusha wañugallami.

Jesusta shuj soldado chugrichishkamunda

³¹Pascua pishta p’unllajka shuj p’unllallami jualtuga. Chi samana p’unllaga yalli valij gashkamundami israelgunaga chi wañushkaguna cruzbi lavushkaidi sakirichunga na munagaguna. Shinushami changagunada p’akishtasha cruzgunamundash cuerpogunada uriyachichun nisha Pilatoda mañagaguna. ³²Shinusha soldadoguna rishaga Jesuskun igulda cruzbi lavushkagunaj changagunada kaishujbujtash chaishujbujtash p’akiga. ³³Jesusbujmu kuchuyashaga ña wañushkada rikushami Paibuj changagunadaga na p’akigaguna. ³⁴Shina gakish shuj soldadoga lanzan tujsisha Jesusbuj kustista chugrichinmi, chi chugrimundaga yakush yaurbish llujshiga. ³⁵Kaigunada parlujka rikushkadami parlan. Rikushkamundami kabishkada parlushkada pailladi yachan. Kanguna crichunmi paiga kabishkada parlan. ³⁶Dios escribichishkabiga, “Shuj tullulladash na p’akishkachu ganga,”19.36 Kaibi Dios escribichishkada yuyachishkanmi Jesustaga Pascuabi mikuna oveja shinabi rikuchin. (Ex 12.46; Nm 9.12) Ima layami chi ovejaj yaur israelgunada kishpichiga Jesusbish cruzbi yaurda jichashami Diosbujkunada kishpichiga. (1Co 5.7; 1Pe 1.19) Ima layami Pascuabi mikuna ovejagunada shuj tullulladash na p’akigaguna shinaidimi Jesustash shuj tulluidash na p’akigaguna. nishka p’aktachunmi kaigunaga shina tukuga. ³⁷Shinaidi shuj pushtubiga Dios escribichishkabiga, “Tujsisha chugrichishkadash rikungagunami,”19.37 Zac 12.10 nishkashmi tiyan.

Jesusta pambushkamunda

Mt 27.57-61; Mc 15.42-47; Lc 23.50-56

³⁸Kaiguna k’ipaga Arimatea pueblomunda Joziga Jesusbuj cuerpoda apusha ringaj Pilatoda mañungu riga. Joziga mandaj israelgunada manchushkamundami Jesustaga pish na yachushkalla katij gaga. Shina mañuki Pilato <Ari> nikiga Joziga Jesusbuj cuerpoda apusha rigallami. ³⁹Shinaidi sarundi shuj tuta Jesusta rikungu rij Nicodemosh, mirran, áloe nishkan chagrushka k’uilla ashnarigujta patsuj libra shinada apashka chayamuga. ⁴⁰Shinami Jozish Nicodemosh Jesusbuj cuerpoda apusha rishaga pi wañukish israelguna pambungu rurushka shina chi k’uilla ashnarigujkunan linsun Jesusta pilluchigaguna. ⁴¹Jesusta chakatashka pushtubimi shuj huerto tiyaga. Chi huertobimi pidash narij pambushka mushuj pambana ut’ku tiyaga. ⁴²Israelgunaj samana p’unlla ña chayamugushkamunda shinaidi chi ut’kuga kuchullabi gashkamundashmi Jesusbuj cuerpoda chibi churugaguna.

Jesús kausarishkamunda

Mt 28.1-10; Mc 16.1-8; Lc 24.1-12

¹Semana kallari domingo p’unlla puzu puzuidimi Magdala pueblomunda Mariaga Jesusta pambushka ut’kumu riga. Chimu chayushaga ut’kuda tapushka tiyaj rumida anchuchishkada rikuga. ²Chida rikushaga Simón Pedrojmu shinaidi Jesús k’uyashka kaishuj yachagujbujmu apuruidi riga. Paigunajmu chayushaga, “Manduj Jesusbuj cuerpoda ut’kumunda apush rishkagunandi. Maibi churushkadash na yachanchichu,” niga.

³Shina niki Pedrosh kaishuj yachagujkish llujshisha pambushkamu rigaguna. ⁴Ishkindijkunami vulusha rigaguna. Shinash kaishujka Pedrodash yalli apuruidi vulush rishaga ut’kumunga ñaubusha chayuga. ⁵Rikungu kumurishaga pillushka linsugunalladami chibiga rikuga; shinash na waigugachu. ⁶Paibuj k’ipa Simón Pedro chayamusha ut’kumu waigushaga paibish linsuguna chibi sirijlladami rikuga. ⁷Shinaidi Jesusbuj umada pilluchishka linsuga na chaishuj linsugunan igulda tiyagachu, ashtanbish shuj ladumu kururasha churashkadami rikuga. ⁸Chimunda pambushka ut’kumu ñaubusha chayuj yachajbish ukumu waigusha rikushaga crigami. ⁹Diosbuj Shimibi Pai kausarinadi gashkada escribishkada paigunaga narij intindishkagunachuga. ¹⁰Chi k’ipaga chi yachagujkunaga wasimumi vueltugaguna.

Magdalamunda Mariamu Jesús rikurishkamunda

Mc 16.9-11

¹¹Mariaga pambushka ut’ku ladullabidimi wakusha sakiriga. Shina wakusha shayagushami ukuda rikungu kumuriga. ¹²Chibimi yurajlladi churanada churushka ishki angelguna Jesusbuj cuerpoda churashka pushtubi shujka uma ladumu kutin shujka chaki ladumu tiyajkunada rikuga. ¹³Chimunda angelguna pai warmidaga, “¿Imasha wakangui?” nisha tapuki,

paiga, “Ñukada Manduj Jesusbuj cuerpodami apush rishkaguna; maibi churushkadash na yachanichu,” niga.

¹⁴Chida nin washamu vueltush rikushaga Jesús chibi shayajta rikuga. Shinash Mariaga Paidaga na rijsigachu.

¹⁵Chimunda Jesusga, “¿Imasha wakangui? ¿Pidadi mashkagungui?” niga.

Shina niki paiga <Huertoda cuidujmishkanchin> yuyashaga, “Hijo Taita, kan Paida apush rishkashaga Paida maibi churashkada ñuka mashkungu ringu parlabai,” niga.

¹⁶Shina niki Jesusga, “María,” niga.

Chimunda María washamu vueltarishaga hebreo shimibi, “¡Rabuni!” niga. (“Rabuni” nishaga “Yachachij” nishami shina nin).

¹⁷Chimunda Jesusga, “Ama Ñukada tupichu, Ñukaj Taitan gangujka narij rishkanichu. Ashtanbish Ñukada katij waukigunajmu ri. ‘ “Ñukakish kangunakish Taitajmu, Ñukakish kangunakish Diosbujmumi Ñukaga riguni,” ninmi,’ nisha parlungui,” niga.

¹⁸Chimunda Magdalamunda Mariaga Manduj Jesusta rikushkada shinaidi Pai imada nishkada yachagujkunamu parlungu chayuga.

Yachagujkunamu Jesús rikurishkamunda

Mt 28.16-20; Mc 16.14-18; Lc 24.36-49

¹⁹Chi p’unllaidi ña tutayamuki semana kallari p’unllami yachagujkunaga manduj israelgunada manchushkamunda pungugunada alli ichkusha tandanukusha tiyakish Jesús rikurisha paigunaj chaubibi shayarishaga, “K’uilla kausi kangunan gachun,” niga.

²⁰Shina nishka k’ipa Paibuj makigunadash kustistash rikuchiga. Shinami yachagujkunaga Mandujta rikushkamunda kushiyagaguna. ²¹Chimunda kutinlladi Jesusga, “¡K’uilla kausi kangunan gachun! Taita Ñukada kachushka layaidimi, Ñukash kangunada kachani,” niga.

²²Shina nishka k’ipa paigunada p’ukushaga, “Diosbuj Espirituda japichi,” niga. ²³“Maijin juchayujkunada kanguna perdonakiga perdonashkami sakiringa. Shinaidi maijindash na perdonakiga na perdonashkalladimi sakiringa,” niga.20.23 Mt 16.19; 18.18

Jesús kausarishkada Tiuma rikushkamunda

²⁴Jesús chimu chayamushka ratuga chunga ishki (12) yachagujkunapuramunda Ishkipura Wacharishka nishka Tiumaga illugami. ²⁵Shinusha chaishuj yachagujkunaga paidaga, “Manduj Jesustami rikushkanchi,” nigaguna.

Shina nikish Tiumaga, “Makibi lavugunan chugrichishkada na rikusha shinaidi chi chugribi ñukaj dedoda na waiguchisha Paibuj kustisbish ñukaj makin na tupushaga nalladi crishachu,” niga.

²⁶Pusuj p’unlla k’ipash yachagujkunaga kutin shuj wasibi tandanukugaguna. Chi ratuga Tiumaga chibimi gaga. Pungugunash alli ichkushkami gaga, shinash Jesús rikurisha paigunaj chaubibi shayarishaga, “K’uilla kausi kangunan gachun,” nisha saludaga.

²⁷Chi k’ipa Tiumadaga, “Kambuj dedoda Ñukaj makibi churusha riki. Kambuj makida apami, Ñukaj kustista tupusha riki. Ama shina na crij gaichu, ¡ashtanbish cri!” niga.

²⁸Shina niki Tiumaga, “¡Ñukada Mandujlla! ¡Ñukaj Dioslla!” niga.

²⁹Chimunda Jesusga, “Kanga Ñukada rikushadimi crishkangui. ¡Na rikushash crijkunaga kushiyachishka gachun!” niga.

Imamunda kai libroda escribishkamunda

³⁰Jesusga Paibuj yachagujkunaj ñaubukimi kutin shuj tauga pish na ruri pudishka rikuchinagunada ruruga. Kai librobiga na tukiguna escribishka tiyanchu. ³¹Ashtanbish Jesusta Cristo gashkadash Diosbuj Churi gashkadash kanguna crichun, shinalladi Paida crishami na tukurij kausida charichun kaigunadaga escribishka gan.

Kanchis yachagujkunamu Jesús rikurishkamunda

¹Chi k’ipa Jesusga Tiberias shuti yaku kucha manyabimi Paibuj yachagujkunamu kutinlladi rikuriga. Chibiga kashnami tukuga. ²Jesusbuj yachagujkunapuramunda Simón Pedrosh, Ishkipura Wacharishka nishka Tiumash, Galilea llaktabi gaj Caná pueblomunda Natanaelbish, Zebedeoj churigunash, shinaidi ishkigunashmi chibi tandanukushka gaga. ³Chimunda Simón Pedroga, “Chaulagunada japingumi rini,” niki,

paigunaga, “Ñukuchikish kangunmi rigunchi,” nigaguna.

Shina ninukushaga shuj uchilla barcabimi sikusha rigaguna. Chi tutaga shuj chaulaidash na japigagunachu.

⁴Ña p’unllayamugukimi Jesusga yaku kucha manyabi rikuriga; shinash yachagujkunaga Jesús gashkadaga na rijsigagunachu. ⁵Chimunda Jesusga Paibuj yachagujkunada, “Maraguna, ¿chaulada nachu japishkanguichi?” nisha tapuki,

“Na,” nigaguna.

⁶Shina niki Jesusga, “Barcaj alli ladumu chaula japinada piguichi. Chimi chaulagunada japinguichi,” niga.

Shina nishkada rurashka k’ipaga taugalladi chaulaguna tiyashkamundaga chaula japinada llujshichingukish na pudigagunachu. ⁷Chimunda Jesús pachun k’uyushka yachagujka Pedromu, “¡Manduj Jesús gashkandi!” niga.

Shina Manduj gashkada uyun Simón Pedroga na churanada churarishka gashkamundaga chi ratu churanada churarisha yakumu waigugallami. ⁸Chaishuj yachagujkunaga yaku manyamunda patsuj (100) metro shinallada karubi gashkamundami chaula japinada barcabi aisusha yaku manyamu chayamugaguna. ⁹Paiguna barcamunda pambamu uriyashaga nina katichishkabi shuj chaula paltushka kusarigujta shinaidi tandash tiyajtami rikugaguna. ¹⁰Chibimi Jesusga, “Kununlla japishka chaulagunamunda ashada apamichi,” niga.

¹¹Shina niki Simón Pedroga barcomu sikusha chaula japinada jatun chaulagunan jundada yaku manyamu aisamuga. Patsuj pichka chunga kinsa (153) chaulaguna gaga; taugalladi gakish chaula japinaga na llikirigachu. ¹²Chimunda Jesusga, “Shamichi mikungu,” niga.

Manduj Jesús gashkada yachushkamundaga maijinllash, “¿Kanga pidi gangui?” nisha tapungumallash manchagagunami. ¹³Chi k’ipa Jesús kuchuyashaga tandada japisha shinaidi chauladash paigunamu kuga.

¹⁴Jesús wañusha kausarishka jawaga kaigunga kinsa kutinmi Paibuj yachagujkunamu rikurishkaga.

Simón Pedron Jesús parlanukushkamunda

¹⁵Mikusha tukuchishka k’ipa Jesusga Simón Pedroda, “Juanchuj churi Simón, ¿paiguna Ñukada k’uyushkadash yallichu k’uyangui?” nisha tapuga.

Shina niki Pedroga, “Ari, Mandujlla; ñuka Kanda k’uyushkada yachunguimi,” niga.

Chimunda Jesusga, “Ñukaj malta ovejagunada michingui,” niga.

¹⁶Kutinlladi Jesusga, “Juanchuj churi Simón, ¿Ñukada k’uyanguichu?” nisha tapuga.

Chimunda Pedroga, “Ari, Mandujlla; ñuka Kanda k’uyashkada Kanlladi yachunguimi,” niga.

Shina niki Jesusga, “Ñukaj ovejagunada michingui,” niga.

¹⁷Kaigunga kinsa kutin Jesusga, “Juanchuj churi Simón, ¿Ñukada k’uyanguichu?” nisha tapuga.

“¿Ñukada k’uyanguichu?” nisha kinsa kutin tapushkamunda Pedroga llakilladi, “Mandajlla, Kanga tukidami yachuj gangui. Shinusha ñuka Kanda k’uyashkadash yachunguimi,” niga.

Chimunda Jesusga, “Ñukaj ovejagunada michingui. ¹⁸Kabishkadadimi nini, kan chairijti gashaga kan munushkamu ringujka kanlladi churanadash churarijmi gagangui; ashtan ña yuyij tukushaga makidami rikuchingui, shinusha churanadash shujmi churachinga, shinaidi kan na munushkamumi pushusha ringa,” niga.

¹⁹Kashna nishaga Jesusga Pedro ima laya wañunashkada shinaidi pai shina wañusha Diosta k’uilla gashkada rikuchinashkadami parlaguga. Chi k’ipa Jesusga, “Ñukada katimi,” niga.

Jesús pachun k’uyashka yachagujmunda

²⁰Pedro washamu vueltush rikushaga Jesús pachun k’uyashka yachaguj katimugujta rikuga. Paimi chi Pascua mikunabi Jesusbuj ladubi kimirisha, “Mandajlla, ¿pidij Kandaga shujkunamu japichinga?” nisha tapuga. ²¹Paida Pedro rikushaga, “Mandaj, ¿paiga ima tukunga?” nisha Jesusta tapuga.

²²Shina tapuki Jesusga, “Ñuka shamungama paidaga kausachun nikish kanga ¿ima ninadadi charingui? Kanga Ñukada kati,” niga. ²³Shina nishkamundami crijkunapurabi chi yachagujka na wañuna gashka parlu uyariga. “Paiga na wañungachu,” nishaga Jesusga na nigachu. Ashtangarin, “Ñuka shamungama paidaga kausachun nikish kanga, ¿ima ninadadi charingui?” nishami shina niga.

²⁴Chi yachagujka kai parlugunada yachi chayachij shinaidi kaida escribijlladimi gan. Paiga kabishkada parlagushkadash yachanchimi.

²⁵Jesusga shujtij ruranagunadash pachunmi ruraga. Imalla rurashkagunada shuj shuj kallarisha escribisha nikiga tuki escribina gaj librogunada tuki kai pachabi churangujka na p’aktanmuchu yuyanimi.