Gálatas

GÁLATAS

Galatasbi kallari parluguna

Kai cartada apóstol Pabloga Galacia llaktabi tandanukushka crijkunamu kachashka (Gl 1.2). Jesucristo wacharishka k’ipa pichka chunga kinsa (53) wata shinabimi escribishka yuyachin. Galacia llaktaga Uchilla Asia llaktabimiga; kununga Turquía llaktami gan. Chibi kausaj crijkunaga na israelgunachuga. Maijin israelgunaga chi na israelgunadaga mandushkada p’aktachisha israelgunama laya rurachun munuga.

Shinada rurachun munujkuna na allida yuyashkada richuchingumi Pabloga kai cartadaga escribiga. Paiga “¿Diosga kanguna mandushkada p’aktachishkamundachu alligunada rurun?” tapusha (3.5), “Jesucristoda crishkallamundami ima juchachinash illaj tukushka ganchi,” nin (2.16). Shuj yachanagunaga kaibi tiyan: Cristomunda Alli Shimiga shujtijka na tiyan (1.5-10), juchachinash illujkunaga crishkallamundami kausunchi (3.1-14), tukigunami Cristo Jesusbi shuj shinalla ganchi (3.26-29), watushkamunda kacharichishka gasha k’uyanukusha kaishujkun chaishujkun allida ruranukunchi (5.1-15), Diosbuj Espiritumunda granogunada japinchi (5.22-26), Espiritumunda na tukurij kausida japisha nishaga allida ruranagunada na shaikurina (6.7-10).

Galaciabi gajkunamu Pablo escribishkamunda

¹Jesucristosh wañushkagunapuramunda Paida kausachij Taita Diosbish agllusha kachushka Pablomi gani; na genteguna kachushkamundama maijinsh agllushkamundamash na gashkachu. ²Ñukaga tuki kaibi gaj wauki panigunandijmi Galacia llaktabi gaj tandanukushka crijkunada saludanchi. ³Ñukuchij Taita Diosbuj shinaidi Mandaj Jesucristo kushka alligunash k’uilla kausish kangunan gachun. ⁴Jesucristoga ñukuchida kai milli pachamunda kacharichingajmi juchamunda Paibuj kausidadi kurisha, ñukuchij Taita Dios munushkada p’aktachiga. ⁵Diosga ima urash na tukuringama <K’uillami gangui> nishka gachun. Shina gachun.

Cristomunda Alli Shimiga shujtijka na tiyashkamunda

⁶Cristo alligunada kushkan kangunada Kayajmunda ratuidi karuyasha shujtij laya alli shimida katingu rishkada yachushami mancharishkaidi gani. ⁷Alli shimiga shujtijmaga na tiyanchu. Shina gakish maijingunaga kangunada pandachish nisha Cristomunda Alli Shimidaga shujtij layada yachachingumi munun. ⁸Ashtanbish ñukuchi ña yachachishka shina Alli Shimimunda shujtij layada yachachikimaga, ñukuchilladikish na gashaga jawa pachamunda shamushka angelma gakish, llakimu apashka gachun. ⁹Ña nishka shinaidi kununbish kutinmi nini: maijinbish, kanguna ña japishka shina alli shimidaga shujtijmada laya yachachijtaga llakimu apashka gachun.

¹⁰Shina nigushaga ¿genteguna alli nishka gangu, na gashaga valichishka ganguchu munani? Ashtanbish Diosti alli nishka gangumi munani. Genteguna ñukada alli nichun chairijtij nigushamaga ña na Cristobujta rurujka gaimuchu.

Diosti Pabloda agllusha kachushkamunda

¹¹Wauki panigunalla, kaida yachichi: ñuka parlushka Alli Shimiga na gentegunaj yuyushkallachu. ¹²Maijin k’arijtaga na japiganichu, yachimaidash na yachuganichu. Ashtangarin Jesucristolladimi ñukamu rikuchiga.

¹³Ñaubamu israelguna yachachishkada katigushka ratu ima laya ñuka gashkadaga uyushkanguichimi; Diosbujlla tandanukushka crijkunada yallimanaidi katik’ichushami ima layash chingachingu munagani.1.13 Israelgunaga Jesusta crijkunada manchanaidi p’iñashkamundami crijkunagunada carcelbi churangaj Pabloga manchanaidi katik’ichujkuga. Hch 8.3; 9.1-2¹⁴Ñauba taitaguna yachachishkagunada yallimanaidi kazuj gashami, israelguna yachachishkabi katigushaga ñukaj llaktabi ñuka kanllagunapuramunda taugagunadash ñaubusha alli p’aktachijmi gagani. ¹⁵Shinash Diosga ñukadaga mamaj iksabi gagujllabidi ch’ikunyachishami, na kabikish k’uyushkallamunda kayushaga, ima urami Paibujllada rurusha, ¹⁶Paimunda Alli Shimida na israelgunamu parlachun Paibuj Churi ima shina gashkada ñukamu rikuchiga. Shina rurukish chi ratuga pigunbish na parlanukuganichu. ¹⁷Ñukada ñaubushadi agllusha kachushkagunada Jerusalenbi rikungujllash na riganichu. Ashtangarin Arabia llaktamu riganillami. Chi k’ipaga kutin Damascomumi vueltagani.1.17 Hch 9.1-25

¹⁸Kinsa wata k’ipami Pedroda rijsingu Jerusalenmu sikugani. Paigunga chunga pichka p’unlladami sakirigani. ¹⁹Shinash Jesús agllusha kachushka chaishujkunamundaga shujlladash na rikuganichu. Ashtanbish Manduj Jesusbuj wauki Jacobolladami rikugani. ²⁰Kaida ñuka escribigushkabiga Diosbuj ñaubukimi nini, na llagmushkachugun, kabishkami gan. ²¹Chi k’ipaga Siria, Cilicia llaktagunamumi rigani. ²²Shinash Cristobi tandanukushka crijkunaga Judea llaktabiga ñawi ñawidijka ñukadaga na rijsijkunachuga. ²³Ashtanbish ñukamundaga, “Sarunga ñukuchida katik’ichusha crishkada chingachisha nigujkish kununga pailladimi Cristoda crinamunda parlagun,” nishkalladami uyushkagunaga. ²⁴Shina uyusha ñukaj kauzamundami Diosta <K’uillami gangui> nigugaguna.

Jesús agllushkagunash Pabloda <Ari> nishkamunda

¹Chunga chusku wata k’ipami kutin Jerusalenmu Bernabendi rigani. Titodashmi ñukan pushush rigani. ²Chimu rinada Dios ñukamu rikuchiki rishami ñauba imalla rurashka shinaidi ruragushka ama yangalla gashka gachun nisha alli pushajkunallan tandanukusha na israelgunamu Alli Shimida parlashkadaga paigunallamu yachi chayachigani. ³Shinash ñukan pariju shamuj Tito na Israelmunda gakish aicha karada p’itishka gachundijka na mandagagunachu. ⁴<Crijmi ganchi> nij tukushalla, ñukuchipurabi mitikusha waigujkunaj kauzamundami chida rurana gaganchi; paigunaga mandashkabi watushka gaguchunlla munashami Cristo Jesusbi ima laya kacharishka shina ñukuchi kausagushkada pakalla rikungu waigushkagunaga. ⁵Shinash kabishkadi parlagushka Alli Shimiga kangunabi katiguchunlla nishami paiguna mandashkada shuj urawamaidash na rurusha kazuganchichu.

⁶Shinash tukigunamunda <Alli> nishkagunash, paiguna imaguna gashkakish ñukamunga imash na imachugun. Diosga ñawida rikushkallanga <Alli, na allichu> nishaga na ninchu. Paiguna ñukamunga ashtan yachanadaga na yachachigagunachu. ⁷Ashtangarin chibuj randiga ima layami Pedroga israelgunamu Alli Shimida parlachun mingusha kachushka gaga, shina layaidi ñukadash na israelgunamunga parlachun mingushkada yachi tukugaguna. ⁸Pedroda israelgunamu agllusha kachusha Parlachichijlladimi ñukadash na israelgunamunga parlachichingu aglluga. ⁹Shinusha Jacobosh, Pedrobish, Juanchush, wasida charirij pilarmada laya rijsishkaguna gasha, na kabikish Dios k’uyasha ñukamush mingushkada yachi chayushami chilladi rurujkuna gashkada rikuchingu ñukamush Bernabemush alli makida japirigaguna. Ñukuchiga na israelgunamu, ashtanbish paigunaga israelgunamu yachachingu ringau shina ruragaguna. ¹⁰Paigunaga <Imash na charijkunada yuyaribanguichi> nishallami ñukuchida mañugaguna; chidadi p’aktachingumi yuyillandi ruramuguni.

Pedroda Pablo rimushkamunda

¹¹Ashtanbish ima urami Pedro Antioquía pueblomu shamukiga ima ruragushkaga naidi alli gashkamundaga paidati ñawi ñawi rimugani. ¹²Jacobo kachushkaguna narij shamujllabidijka na israelgunan pariju mikugujllamiga. Shinash ña chayamukiga <Aicha karada p’itichinaidimi> nijkunada manchushkamundaga paigunan mikunada sakisha asha asha karuyaga. ¹³Shinalladi Pedroga paigunan na mikujma laya tukuki chaishuj crij israelgunash igul-lladati rurugaguna, shinami Bernabelladikish paigunan apashka gasha na mikujma laya ruruga. ¹⁴Shinushami kabishkadi Alli Shimibi parlashka shina na alli purijkunada rikushaga, tukigunaj ñaubuki Pedrodaga, “Kan, israel gashash na israelma laya kausuj gashadijka ¿na israelgunadaga israelgunama laya rurachun imashti mununguiri?” nigani.

Israelgunash na israelgunash Cristoda crinamunda

¹⁵Ñukuchiga wacharishkamunda israelguna gashami, na israelguna laya mandashkagunada na kazujkunamaga na gaganchichu. ¹⁶Shina gakish mandushkagunada p’aktachishkamundaga pish ima juchachinash illaj na tukushkadaga yachanchi, ashtangarin Jesucristoda crishkallamundami gan. Shinushami ñukuchikish Cristoda crishkamunda ima juchachinash illuj tukungau, mandashkada p’aktachishkamunda ama gachunga Cristodami crishkanchi. Mandashkabi nishkagunada rurushkallamundaga pish ima juchachinash illujka na rurushka gangachu. ¹⁷Cristomunda ima juchachinash illaj gangaj mashkagushaga, ñukuchikish juchayuj gashkada rikuchikimaga ¿Cristoga juchabujta rurajchu ganga? ¿imashi? ¡Nalladij shinachugun! ¹⁸Imada urmachishtashash kutin chilladati shayachingu kallarishaga ñukaidimi kauzayuj tukuni. ¹⁹Ñukaga mandashkagunaj kauzamunda wañugani; Diosbujlla kausungumi mandushkabujka wañushka gani. ²⁰Criston parijumi chakatashka gagani. Shinusha ña na ñukaga kausanichu, ashtangarin Cristomi ñukabi kausan. Kunun ñukaj cuerpo kausashkaga Diosbuj Churibi crishkamundami kausaguni. Paimi ñukada k’uyushkamunda Paibuj kausidadi ñukamunda kuga. ²¹Na kabikish Dios kushka alligunadaga yangabi na churanichu; mandushkagunada kazushkamunda ima juchachinash illuj tukunashkakiga, Cristoga yangamundami wañunmuga.

Mandushkamunda na gashaga crinamunda

¹¡Galacia crijkunalla, yuyi illujmi ganguichi! ¿Pidi kangunadaga muspayachigari? Jesucristo chakatashkada kangunaj ñaubukidi rikuchishkama laya ñami parluganchi. ²Kailladami kangunamunda yachungu munani: ¿Mandushkada p’aktachishkamundachu? na gashaga ¿uyusha crishkamundachu Diosbuj Espiritudaga japiganguichi? ³¿Yuyi illujchumadi ganguichi? ¿Espiritun kallarishka jawash kununga aicha ruri pudishkallanchu p’aktachingu munanguichi? ⁴¿Imadadikish pasushkaga yangallachu? ¡Yangadijmaga na gashkachunga! ⁵Dios Paibuj Espirituda kusha shinaidi pi na ruri pudishkada kangunapurabi rurushaga ¿mandushkada p’aktachishkamundachu shina rurun? Ashtan uyusha crishkamundami gan.

Abrahamgun Dios ari nishkamunda

⁶Shina layaidimi, “Abrahamga3.6 Israelgunabujka Abrahamga ñauba taitamiga. Ro 4.1-3 Diostami criga, shinushami Diosga ima juchachinash illujmada shina japiga.”3.6 Gn 15.6; Stg 2.23⁷Shinushaga kaida yachichi: Abrahambuj wawagunaj wawagunadijka Diosta crijkunami gan. ⁸Sarunmundadi Dios escribichishkabiga <Na israelgunash Diosta crikiga ima juchachinash illajta rurungami> nishkamiga. Shinusha kai Alli Shimidaga, “Tuki llaktagunami kanmunda Diosbuj alligunada japinga,”3.8 Gn 12.3 nisha Abraham-mumi ñaubarijti ña parlushkaga. ⁹Chimunda, crij Abraham-mu alligunada kushka shina, mashnalla crijkunamush kushkami ganga.

¹⁰Mandashkagunada ruranallabi tuki mashnalla yuyida churujkunaga <Llaki tukushkanmu> nishkabimi ganguna; shinusha escribishkabiga, “Mandashka librobi escribishkagunada ruragusha na illujta p’aktachijkunaga, ima llakish tukushkanmu,” nishkami tiyan. ¹¹Shinakiga Diosbuj rikibiga mandashkabi nishkagunada rurashkanga ima juchachinash illujmaga pish na ganchu; shinusha, “Juchachinash illujka crishkallamundami kausunga,”3.11 Habacuc 2.4; Romanos 1.17bi shinaidi nishkamunda ura chakibi yachachishkada rikungui. nishkaga. Chiga laruidimi gan. ¹²Shinash mandushkaga crishkamundaga na shamunchu; ashtangarin, “Maijinsh mandushkabi nishkagunada p’aktachijka chigunamundami kausunga,”3.12 Lv 18.5 ninmi. ¹³Mandushkagunada na p’aktachishkamunda llakichinalla gakimi Cristoga ñukuchij randi, pachun llakida apasha kishpichiga. Chimunda Dios escribichishkabiga, “Maijinbish kaspibi warkushka wañujka <llaki tukushkanmu> nishkami gan,”3.13 Dt 21.23 nin. ¹⁴Abraham-mu Dios alligunada <Kushami> nishka na israelgunamush Jesucristomunda kushka gachun shinaidi crishkamunda ñukuchikish <Kushami> nishka Espirituda japichunbishmi shina tukuga.

¹⁵Wauki paniguna, kaidaga maijin gentesh intindinalladami parlasha. Gentegunapurallabish imadash rurungu, ña ari ninukusha firmanukushka k’ipaga mirachinamash <Na valinchu> ningumash pish na pudingachu. ¹⁶Kununga shinakiga, Diosga Abraham-mu <Kushami> nishkagunadaga paibuj wawagunaj wawamushmi nishkaga. Shina escribishkabiga, taugaidi wawagunamamu layaga na nigunchu; ashtangarin <kambuj wawamumi> nishaga shujlladami nigun. Paiga Cristomi gan. ¹⁷Kaidami nisha nini: Diosga Abrahamgun ari ninukushkadaga ña <P’aktachishadimi> nishkamiga. Chimundami Moisesbuj mandushkagunaga chusku patsaj kinsa chunga (430) wata k’ipa shamushkashaga shina ari ninukushkadash na chingachinllachu, Dios <Kushami> nishkadash yangabiga na churi pudingachu. ¹⁸Diosmunda japinashkaga mandashkagunada kazushkamunda gashkakiga <Kushami> nishkamundaga ña na ganmuchuga. Ashtangarin Diosga Abraham-mu <Kushami> nishkamundaga kumbidagallami.

¹⁹Shinakiga ¿mandushkagunaga ima allibujti gan? Genteguna na kazuj gashkada rikuchingaj chi mandushkaga paltushka gaga; Dios <Kushami> nishkada japingu gaj wawadi shamungagamami chidaga kuga; shuj mañusha kuj Moisesbuj makibimi angelgunada kuchiga.3.19 Moisés mandashkagunada Dios kuki japisha israelgunamu kushkamundami paidaga Pabloga mañusha kujta nin.²⁰Shuj gentella gakigarin mañusha kujmash na tiyanash kabinchu. Shinash Diosgarin shujllami gan.

Mandushkaga ima allijti gashkamunda

²¹Shina gakiga mandushkagunaga Dios <Kushami> nishkagunadaga ¿shujtijtadichu nin imadi? ¡Nalladij shinachugun! Mandashkagunaga kausida kui pudij gashkakiga chi mandushkada kazushkallamundami ima juchachinash illuj tukungunamuga. ²²Ashtangarin Dios escribichishkabi nishka shinaga, juchaga tuki ima tiyashkagunada illujtada prezu shina charigun. Mashnalla crijkunaga Jesucristoda crishkallamunda Dios <Kusha> nishkadaga japichunmi shina nin.

²³Shina gakish crina narij chayamukiga Mandushkaga chi crinada yachi chayachishka gachunmi ñukuchida ichkushtasha prezu layada chariguga. ²⁴Shinusha ñukuchi Cristobi criki ima juchachinash illujta rurushka gachunmi Mandashkaga ima layami shuj sirvijka marada iñachij gan shinaidimi Paibujmu pushaj gaga. ²⁵Shinash crina p’unlla chayamushkamundami, iñachisha sirvijbuj ukubi ña na ganchichu. ²⁶Cristo Jesusta crishkamundami tuki kangunaga Diosbujti wawaguna ganguichi. ²⁷Shinaidi mashnalla Cristobi bautizarijkunaga Cristobimi churarij shina churarishkanguichi. ²⁸Israel ganash griego ganamash ña na tiyanchu; watushka laya na watushka layamash, k’arish warmish illunmi; tuki kangunami Cristo Jesusbi shuj shinalla ganguichi. ²⁹Ña Cristoj gashami Abrahambuj wawagunaj wawagunadi ganguichi, shinaidi Dios <Kushami> nishkadash japijkunami ganguichi.

¹Kaidami nisha nini: Taita mamamunda japina gaj chairijti maraidi gakiga, imalla tiyashkash paibuj gana gakish sirvichun randishkama layaidimi gan. ²Chi maradaga shujkunami yachachinguna shinaidi paibujta rikungu mingaringuna, paibuj taita churashka p’unlla p’aktungagama. ³Shinaidimi ñukuchikish mara gashaga kai pacha genteguna yanga yachachishkagunaida kazungu watushka laya kausaganchi. ⁴Shinash p’aktachina p’unlla chayukimi, Diosga Paibuj Churida kachuga; Paimi warmimunda wachariga shinaidi mandushkagunada kazuj gaga. ⁵Ñukuchimunga Paibuj wawagunada laya japishka gachunga chi Mandashkagunalla rurachishka kausagujkunada kacharichichunmi Churidaga kachuga. ⁶Shinaidi ñukuchi Paibuj wawaguna gakimi Diosga Paibuj Churij Espirituda ñukuchij shungugunamu kachuga. Chi Espiritumi Diostaga wakush nisha, “¡Abba, ñuka Yayalla!”4.6 Romanos 8.15 ura chakibimi yachachigun. nisha mañan. ⁷Shinakiga sirvingu ña na watushka gasha, ashtangarin Diosbuj wawami gangui; Paibuj wawa gashkamundami japina gashkadaga japingui.

Crijkunamunda Pablo manchushkamunda

⁸Ñaubaga Diosta narij rijsishaga naidi dios gajkunada sirvichun randishka shinami gaganguichi. ⁹Ashtanbish kunungarin Diosta rijsijkuna gashaga, ashtan alli ningujka Diosti kangunada rijsishkaguna gashadijka imakish na vali yangaidi yuyashkaida ruranagunallamu ¿ima layamundadi watushka shina kazungu kutin chillamundi vueltungu munanguichiri? ¹⁰Pishta p’unllagunada, killagunada, ch’ikunyachishka tiempogunada, watagunadash kushiyaringu chairijtij yuyarigujllagunaminguichi.4.10 Israelguna festejangu yachushka pishtagunamadami parlagunga. Levítico 23bi chi pishtagunamunda parlan.¹¹¡Ñuka kangunabuj imalla rurushkaguna imakish na vali ganamada kangunamunda manchanimi!

¹²Wauki paniguna, ñukash kanguna layadimi tukugani; chimunda ñuka layaidi tukuchunmi mañabani. Kanguna ñukada ima na allimadaga na rurushkanguichichu. ¹³Kangunaidi yachushka shinami Alli Shimidaga kangunamu yachi chayachingu kallarishkabiga ñukaj cuerpo ungushka gashkamunda shina ruri tukugani. ¹⁴Ñukaj aichabi kashna ungushka gaki kangunamu llakiguna shamukish na yangabi churusha millimaidash na milluganguichichu. Chibuj randigarin Diosbuj angelmada shinami japiganguichi. ¡Jesucristodadi japij layami japiganguichi! ¹⁵Shinakiga kanguna kushida charishkaga ¿imadi tukuga? Kanguna ima laya gashkada rikushkamundami kaidaga nini: kangunaj ñawigunada llujshichisha ñukamu kunallama gakimagarin kunguichimumiga. ¹⁶Kununga ¿kangunada kabishkada nishkallamundachu kanguna p’iñashka tukuganichari?

¹⁷Chaishujkunaga paigunajlla gachunmi kangunadaga mununguna, shinash kangunaj allibujka na ganchu. Ashtanbish paigunallada katingu munachunmi kangunada ñukuchimunda karuyachingu mununguna. ¹⁸Shujkunada allida rurungu munanaga allidimi gan; na ñuka kangunan chibi gashka ratullachu ashtanbish tuki ratumi shina munana gan. ¹⁹Ñuka wawagunalla, kanguna Cristo shina tukungamami ñukaga wachanachiguj warmi nanachij shina kangunamundami llakida apaguni. ²⁰¿Imada kangunamunda yuyashachari? Shujtij layada parlungaj kangunan kunundi ñuka chibi gashkanimu yuyanimi.

Agarbish Sarabish imada rikuchishkamunda

²¹Mandashkabi nishkadadi kazusha katish nijkuna kaillada nibaichi. ¿Nachu chi mandashkabi ima nishkada uyushkanguichi? ²²Chibiga Abrahamga ishki churidami chariga, shuj churidaga watushka shina sirvijbuki chaishujtaga na watushka shina warmikimi chariga nisha escribishkami. ²³Paida sirvijbuj churiga aichallamundami wachariga. Ashtan na watushkaj churiga Dios <Kushami> nishka p’aktachunmi wachariga. ²⁴Kashna tukushkaga yuyi japichunma yuyachishka layami gan; chi ishki warmigunaga ishki ari ninukushkadami rikuchin. Shujka Sinaí urkubi ari ninukushkami gan, paimi watushka shina sirvij ganagunada wachan; chiga Agarmi gan.4.24 Watashka shina sirvij Agarga Sinaí urkubi mandashkagunada kushkadami rikuchin. Ex 19—20²⁵Kununga shinakiga Agarga Arabiabi tiyuj Sinaí urkuda rikuchin. Paiga ima shinami gan, kunun ratu Jerusalenga4.25 Israelgunajka Jerusalenga mandajkunaj jatun pueblomi; shina nigushaga tuki israelgunadashmi shinaidi nin. shinaidimi gan. Chi pueblomi paibuj wawagunandij watashka shina sirvij gan. ²⁶Shina gakish jawa pachaj Jerusalengarin watashka sirvijka na ganchu; paiga ñukuchij mama shinamigun. ²⁷Dios escribichishkabiga,

“Naidi wachuj, na miraj warmi manchanaidi kushilla gai.

Shitushka gaj warmiga kusayuj warmidash yallidami

maragunadash charinga; chimundami

kan wachi nanida na rikuj gashash kushiyarisha jinchida kapari,”4.27 Is 54.1 Isaías escribishkamunda Pablo japishaga <Na wachuj warmi> nisha Saradami rikuchin; shinaidi paibuj taugalladi wawagunaga Jesusta tuki crijkunadami rikuchin, israel gakish na israel gakish.4.27 Is 54.1 ninmi.

²⁸Shinakiga wauki paniguna, kangunaga Isaac shinami Dios <Kusha> nishka shina wawaguna ganguichi. ²⁹Ashtanbish chi p’unllaguna ima layami aichallamunda wacharishka churiga Espíritu wacharichun nishka churida katik’ichuga, shinaidimi kununbish tukun. ³⁰Shinash Dios escribichishkabiga, ¿imadadi nin? Chibiga, “Chi watushka shina sirvijta churindijta llujshichisha shiti. Sirvij warmij churiga na watushka warmij churi japinadaga na japingachu,”4.30 Gn 21.10 ninmi. ³¹Shinushaga wauki paniguna, ñukuchiga watushka shina sirvijbuj wawagunaga na ganchichu. Ashtangarin na watushka warmijti wawagunami ganchi.

Watushka shina kutin na tukunamunda

¹Cristoga ñukuchi ama watushka shina kausachunmi chi watushkamunda kacharichiga. Shinakiga Pai kacharichishkallabidi alli katinguichi. Yugobi watashkaguna shinada rurachun kutin mandushkallabidijka ama gaichichu.

²¡Uyichi! Ñuka Pablomi kaida nini: Kanguna circuncisionda5.2 Circuncisionda nishaga k’ari marada aicha karada p’itichinadami nigun. Hechos 15.1 ura chakibi yachachishkada rikungui. rurachiki Cristoga kangunabujka ima allibukish na ganmuchu. ³Shinaidi kutinlladi maijin k’arish aicha karada p’itichijmunga yachi chayachisha nini: mandushkadaga illujtadadimi p’aktachina gan. ⁴Maijingunaga mandushkada p’aktachishkan jucha illuj tukusha nijkunaga Cristomunda partirisha Diosbuj k’uyimundashmi anchurishkanguichi. ⁵Ashtanbish ñukuchiga ima juchachinash illuj tukuna yuyilla gasha Espiritumunda Diosta crisha shuyagunchilla. ⁶Cristo Jesuskun shujlla tukushka gakiga aicha karada p’itichishka na p’itichishka gakish imash na imachugun. Ashtangarin crishkami shujkunada k’uyasha rikuchiki yallidijka valin.

⁷Kangunaga allimi katiguganguichi. Kai kabishka parlushkada ama kazuchunga ¿pidi jarkuga? ⁸Shina crichishkaga kangunada kayuj Diosmundaga na shamugachu. ⁹“Ashalla levadurami tuki masushkadaga p’unguichin,” ningunami. ¹⁰Shinaidi kanguna shujtij layada na yuyanashkadaga Mandujbimi crini. Shinash kangunada pandachisha purijtaga maijinda gakish Diosga llakichingami. ¹¹Wauki paniguna, ñukamunda parlukiga <Aicha karada p’itichinaidimigun> nisha parlusha katigushkashaga ¿imashti chairijti katik’ichushka gani? Ñuka shina parlush katigushkamakiga cruzmunda parlushkash paigunada ña na p’iñachinmuchuga. ¹²Kangunada shina pandachigujpanaga, ¡paigunajtari illujta p’itirishachari allimash ganmu!

¹³Waukiguna, kangunagarin na watushka shina gangumi kayashka gaganguichi. Shinash <Ña na watushka shina ganchichu> nishaga aicha munushkada rurungu ama yuyichi. Chibuj randiga k’uyanukusha kaishujkun chaishujkun allida ruranukujkuna gaichi. ¹⁴Mandashkaguna illujta shujllamu tandachisha nikiga nin: “Shujkunadash kikinda layaidi k’uyungui.”5.14 Lv 19.18; Mt 22.39; Mc 12.31; Ro 13.9; Stg 2.8¹⁵Yuyin gaichi, kaninukusha kaishujkun chaishujkun mikunukushamaga5.15 Griego shimibiga, “kaninukusha mikunukusha” nigushaga manchanaidi p’iñanukusha takanukushkadami nigun. kangunapuralladi tukuchishtanguichimu.

Aichaj ruranagunash Diosbuj Espirituj ruranagunash

¹⁶Chimundami kaida nini: Espiritullamunda kausichi; chibimi kikinbuj aicha munushkagunada nalladi p’aktachinguichi. ¹⁷Ashtangarin aicha muniga Espiritudaga jarkachijmi. Shinaidi Espiritubish aicha munushkadaga jarkachijmi. Shinusha kaigunaga randimunda na allibi churanukukimi kanguna munushkagunaida na rurachin. ¹⁸Shinusha Espíritu pushashka gashaga ña na mandushkagunalla rurachishka kausanguichichu. ¹⁹Aicha muniida ruranagunaga rijsilladigunami gan. Chigunaga: wainayana, piyunbish siririna, imabish millanaida rurana, aicha munida na jarkarina, ²⁰rurushka dioskunada adorana, brujuna, p’iñanukuna, rimanukuna, shujkun rijta rikusha p’iñarina, jawalladi p’iñarina, p’iñanukibi churana, ch’ikunyarichun chaubinchina, shujtijta yachachina, ²¹shujbujta munana, wañuchina, machana, pishtagunabi maidash gachun rurana, shina layaidi shujtij na alli ruranagunashmi gan. Tuki kaigunamundaga ñuka kangunamu ña parlushka gakish kutinmi nini: Kai shina na allida rurusha purijkunaga Diosbuj mandanabiga ima rikunadash na charingachu.

²²Ashtangarin Espiritumunda granoga kaigunamigun: k’uyana, kushidi gana, chulunlla kausi, na p’iñarijlla gana, tukin allida rurana, alli shungu, p’aktachijti gana, ²³na jatun tukuna, na alli ruranamunda jarkarinashmi gan. Chigunada jarkanaga ima mandushkamash na tiyanchu. ²⁴Jesucristoj gajkunagarin kikinbuj aichadaga milli yuyigunandi na alli munigunandi ñami chakatashkaguna. ²⁵Espiritumunda kausagushadijka, Espiritulladi pushachun sakishunchiri. ²⁶Ñukuchipuraga shujbujta munusha wañurisha kaishujkun chaishujkun p’iñanukuchisha ama jatun tukushunchi.

Crijkunapura ayudanukunamunda

¹Wauki paniguna, maijindash juchabi gajta japishamaga kanguna Espiritun gajkunaga na takush nij yuyin alli tukuchun ayudanguichi. Kikinlladadi yuyasha p’akta kambish pandachishkama tukunguimu. ²Kaishujbuj chaishujbuj aparinagunada aparinukujkuna gaichi; shina rurushami Cristo mandushkada p’aktachinguichi. ³Maijinsh imash na gashash <Jatunmi gani> nisha yuyashaga paillamundimi llagmarin. ⁴Shinakiga tukigunami kikinbuj rurashkalladadi allichushka na allichushkadaga alli yuyarichun. Shina gashami na shujkuna ima rurushkabichu ashtangarin kikinllamundadi imamunda jatunyarina tiyakiga jatunyarisha, <Allimini> ninga. ⁵Shinushaga tukigunami kikinbuj aparinashkalladadimi apusha rinagun.6.5 Tukigunami kikin imalla rurashkagunamundaga Diosbuj ñaubuki chi rurushkaguna rikurinada yachachin.

⁶Diosbuj Shimida maijinsh yachagujka paida yachachijmu ima alligunada charishkamunda kunukuchun.

⁷Kangunallamundi ama llagmanguichichu; Diosga asishka naidi gai pudinchu. Shuj k’ari imada tarbun chilladadimi japinga. ⁸Maijinsh kikinbuj aichamu tarbujka aichamu tarbushkamundaga wañidami siguj shina japinga. Ashtanbish maijinsh Espiritumu tarbujka Espiritumunda ima urash na tukurij kausidami japinga. ⁹Shinushaga allida ruranagunadaga ama shaikurishunchi. Shina na killanachishaga japina p’unlla chayuki siguj shina japishunmi. ¹⁰Shinushaga ima ura pudishaidijka tukigunamu, yallidijka crij wauki panigunamumi allida rurushunchi.

Tukurina yuyigunamunda

¹¹¡Ima laya jatun letragunan ñukaj makinlladi escribigushkada rikichi! ¹²Gentegunallamu allibi rikuringu munushallami <Aicha karada p’itichinaidimigun> nisha atirigundijkuna; kaigunaga Cristoj cruzbuj kauzamunda ama katik’ichushka gangullami shina puringuna. ¹³Aicha karada p’itichishkagunaidikish mandashkabi nishkadaga na p’aktachijkunachushka. Ashtanbish kanguna aichabi p’itishka gakimaga <Allimi ganchi> ningajllami aicha karada p’itishka tukuchun ninguna. ¹⁴Shina gakish ñukaga <Yallimi gani> nina yuyida nalladi nishkanimu; ashtangarin ñukuchij Manduj Jesucristobuj cruzllamundami <Alli gani> nini. Kaimundami kai pachaga chakatashkama shina ña imash na imachugun. Shinaidi kai pachajka ñukash wañushkama laya ña imash na ganichu. ¹⁵Aicha karada p’itichishkash na p’itichishka gashkash imakish na valinchu. Ashtangarin mushujyachishka ganami valin. ¹⁶Kaigunabi mandushka shina tuki purijkunamu shinaidi Diosbuj israelgunamundikish6.16 Diosbuj israelguna nishaga, Jesusta crij tukigunada nigun. Cristobiga israel ganash griego ganash na tiyanchu, nin. Gl 3.28 k’uilla kausish Dios llakishkash paigunan gachun.

¹⁷Ñukaj cuerpo Jesusbuj gashkamunda chugrishkagunada alliyashkadami charini; shinusha kununmunda ichimunga ñukada pish ama llakichichun.

¹⁸Wauki panigunalla, ñukuchij Mandaj Jesucristo na kabikish kushka alligunaga kangunaj espiritun gachun. Shina gachun.