Efesios

EFESIOS

Efesiosbi kallari parluguna

Kai cartadaga apóstol Pabloga Roma pueblo carcelbi gashami (Ef 3.1, 4.1) Uchilla Asia llaktabi tiyaj Éfeso pueblobi tandanukushka crijkunamu kachashka (Ef 1.1). Jesucristo wacharishka k’ipa sujta chunga ishki (62) wata shinabimi escribishka yuyachin. Kununga Éfeso ña na tiyanchu, ashtanbish Turquía llaktaj pueblogunallami chibiga rikurin. Pabloga kinsa watadami Efesobi kausaga (Hch 20.31).

Kai cartabiga <Diosbuj iglilla> nishaga wasimunda na parlanchu, ashtan tandanukushka crijkuna gashkadami rikuchin. Shuj yachanagunaga kaibi tiyan: Diosga ñaubamundadi Pai rurungu yuyushka shina ñukuchida ch’ikunyachiga (1.3-14), Diosga Cristondijmi ñukuchimu mushuj kausida kuga (2.1-10), Cristomi tuki ñukuchimu k’uilla kausanada kun (2.11-18), mushujti k’arimada churarij shina churarichun (4.20-32), maragunash taita mamagunash, sirvichun randishkagunash amogunash (6.1-9), ima na allidash ruruj espiritugunan takanukungu Dios kushka takanukungu charishkagunan churarichun yachachin (6.10-18).

Pablo saludashkamunda

¹Dios munashkamunda Jesucristo agllusha kachushka Pablomini; Éfeso1.1 Ñauba rurushkagunabi maijingunabiga <Éfeso pueblo> nishkaga illun. pueblobi Cristo Jesuskun tandanukushka na shaikurishalla katij linshuyachishkagunamumi escribini. ²Ñukuchij Taita Dios Manduj Jesucristosh k’uyasha alligunada k’uilla kausidash kangunamu kuchun.

<Cristollabi alligunada japinchi> nishkamunda

³Ñukuchida Mandaj Jesucristoj Taita Diosta <Allimi gangui> nishunchi. Criston tandanukushka gashkamunda espiritumu tuki laya alligunada jawa pachabi layaidi1.3 Griegobiga shimi shimida nisha, “Jawa jawa pushtugunabi” nishami nin. Ef 1.20; 2.6 ñukuchimu kushka. ⁴Shinaidi kai pachada narikish rurushaidimi Paibuj ñaubuki ima juchash illij linshuyachishka gachun nisha, Jesucristobi ñukuchidaga aglluga. Diosga k’uyushkamundami, ⁵Pai ima munashkada alli p’aktachingu ñukuchidaga Jesucristomunda Paibujti wawaguna tukuchun nisha, ñaubamundadi ch’ikunyachishka. ⁶Shinushami Pai k’uyashka Churimunda ñukuchimu na kabikish kushka alliguna k’uitij gashkada <Allimi> ningu pudijllagunada ruraga. ⁷Paimundami manchanaidi k’uyasha alligunada kushkan juchagunamunda perdonashka shinaidi Paibuj yaur jichashkamunda kishpichishka ganchi. ⁸Pai tukida yachuj yuyisapaidi gasha chi kushka alligunada yallimanaidi kushami, ⁹pish na yachushka Pai rurush nigushkadaga ñukuchimumi yachi chayachiga. Chidaga Dios munashka shina ñaubarijtimi Cristomunda allida rurungu yuyashkaga. ¹⁰Shina yuyushkagunada rurana p’unllaguna p’aktuki Cristolla mandachun churangajmi jawa pachabi imalla tiyashkada kai pachabi imalla tiyashkadash illujtada tandachinga.

¹¹Shina layaidi Paiyundi tandanukushkamunda ñukuchikish Diosmunda japinashkada charichunmi, Diosga ñaubamundadi Pai rurungu yuyushka shina ñukuchida ch’ikunyachiga; imallada rurasha Pai munashkada shinaidi Paimu alli rikurishkadami ruran. ¹²Ñukuchidi ñaubusha Cristobi shuyagujllaguna gashkamunda, Dios k’uilla gashkada tukiguna <Allimi> nichunmi shina rurushka. ¹³Kangunash Paillabidimi kabishka parludaga kangunada kishpichina Alli Shimida uyusha Cristobi crishkamundami Diosbuj <Kushami> nishka jucha illuj Espiritun selloda churashka shina gaganguichi. ¹⁴Diosga Paibujllagunada kishpichingagama Paimunda japina gashkada p’aktachingudi nisha ñaubachisha kushkaga chi Espiritumi gan. Pai k’uilla gashkada <Allimi> nichunmi gan.

Crijkunamunda Pablo Diosta mañushkamunda

¹⁵Chigunamundami ñukaidikish, kanguna Mandaj Jesusta crishkamunda shinaidi Diosbujlla gaj tukigunan k’uyanukushkamundash uyushami, ¹⁶Diosta mañagüi ratu kangunamundash <Diosolopai> ninada na sakishalla kangunada yuyarisha, ¹⁷ñukuchij Mandaj Jesucristoj Dios, k’uilla gashka Taitaga, Paimunda ashtan ima laya gashkada rijsij tukuchun yuyisapaidi ganada ruruj kabishkada rikuchij Espiritudaga kangunamu kuchun mañani. ¹⁸Kangunaj yuyidash p’unllayachij shina paskachunmi mañani. Shina paskakimi kangunaga imada shuyangaj kayushka gashkadash, Dios Paibujlla gajkunamu kuna gashkaga tukida yalli k’uilla munanaidi gashkadash, ¹⁹shinaidi Paibuj tukida ruri pudishkaga pish na jarki pudibuj manchanaidi jatun poderga ñukuchi crijkunaj allibuj gashkadash yachunguichi. Kashna pachundi ruri pudishkaga tuki jursanmi ²⁰Cristobi rurariga; Paidaga wañushkagunapuramunda kausachisha shinaidi jawa jawa pushtugunabi Paibuj alli ladumu tiyachisha,1.20 Diosbuj alli laduda nisha allibi churashka, tukida mandi pudina pushtudami nigun.²¹tuki jatun mandujkunaj, mandanada charijkunaj, poderda charijkunaj, milli espiritugunaj, kai pachabi tuki imalla tiyashkaj jawa jawabidimi mandachun churuga; na kunun p’unllagunajllash ashtanbish shamuj p’unllagunakishmi gan. ²²Shinaidi imalla tiyajtash illujta Cristoj chaki sarunabi churushami Paidaga tandanukushka crijkunamush kusha uma shina tukida mandachun churuga. ²³Tandanukushka crijkunaga Cristoj cuerpo gashami tukibi tukida jundachiki Paiyun illujtada jundashkaguna tukun.

Na kabikish alligunada kusha kishpichishkamunda

¹Ñaubamu kangunaga milligunadash juchagunadash rurushkamundaga wañushka shinami gaganguichi. ²Kai pachamundaguna yuyashka shinada katishami, wairabi purij manduj milli espíritu munashkada rurusha kausujkuna gaganguichi. Chi espiritumi Diosta na kazujkunadaga na allida rurachisha mandagun. ³Shinami ñaubaga paiguna layaidi tuki ñukuchikish aicha munushkada rurusha, shinaidi kikinbuj munish yuyish ima nishkaida p’aktachisha kausuganchi. Ñukuchikish chaishujkuna layaidi wacharishkamunda pacha Dios p’iñarisha llakichishka ganaidimi gaganchi. ⁴Shina gakish Diosga manchanaidi llakij gasha ñukuchida Paibuj jatun k’uyin k’uyushami, ⁵juchada rurushkamunda chairijtij wañushka gakish, Cristondijmi ñukuchimu kausida kuga. Na kabikish Dios alligunada kushkamundami kishpichishkaguna ganguichi. ⁶Shinaidi Cristo Jesuskun kausachishaga Paigunlladimi igulda ñukuchidash jawa jawa pushtugunabi tiyachiga.2.6 “Jawa jawa pushtugunabi tiyachiga” nishaga ñukuchi kai pachabi katigukish mushuj kausida kusha jawa pachajkunada ñukuchida rurushkadami nin.⁷Diosga na k’uyana gakish yallimanaidi k’uyushkada shinaidi Cristo Jesusmunda ñukuchimu alli gashkadash shamuj watagunagama rikuchingumi kashna rurashka. ⁸Dios na k’uyana gakish k’uyushkallamundami kanguna criki kishpichishka ganguichi. Kaiga kangunamundadijka na gashkachu; ashtangarin Dios kumbidashkami gan. ⁹Ama pish jatun tukuchunga, ima allida rurushkamundaga na ganchu. ¹⁰Ñukuchiga Pai rurashkami ganchi, kununga Cristo Jesusbi alligunada rurachunmi rurashkaguna ganchi; Diosga ñaubarijmunda pacha ñukuchi rurachunga chi alligunadami parijashkaga.

Cristomunda shujlla tukushkamunda

¹¹Shinakiga kanguna na israelguna kaigunada yuyarichi: aichamunda rikukiga sarungunaga aicha karada makillan circuncidashka2.11 Hechos 15.1 ura chakibi yachachishkada rikungui. nishkagunaga <Na circuncidashkapanaga> nisha rimashkami gaganguichi. ¹²Chi p’unllaguna kangunaga Cristo illij, israel ganamundash ch’ikanyachishkami gaganguichi. Shinaidi Dios <Kushami> nisha ari ninukushkagunadash imadash na rikuna charijkuna shinaidi kai pachabiga imada shuyana yuyimash Diosmash illujkunami gaganguichi. ¹³Shina gakish, sarungunaga karubi gashash kununga Cristo Jesuskun tandanukushka gasha Paibuj yaurmunda Diosmu kuchuyachishkagunami ganguichi.

¹⁴Cristomi tuki ñukuchimu k’uilla kausanada kun. Na alli apanukunada churaj pirka layada urmachishami ishki pueblogunamunda shujllada rurusha p’iñanukushkadaga Paibuj cuerpollandi anchuchishtaga. ¹⁵Mandashkabi nishka ima ruranagunada kazunagunadash chingachisha ishki pueblogunamunda Kikinllamundadi shujlla k’arida mushujyachishkada rurashami tukigunapura k’uilla kausanada ruruga. ¹⁶Pai cruzbi wañushkanmi paigunapura p’iñanukushkada tukuchishtasha ishkigunamundaga shujlla cuerpomada shina Dioskun alli tukuchun ruraga. ¹⁷Cristo shamushami kanguna Diosmunda karullabi gajkunamush shinaidi kuchubi gajkunamush Paigun k’uilla alli tukuna Shimida yachi chayachiga.2.17 Isaías 57.19munda japisha na israelgunada Diosmunda karullabi gajkunada nin; israelgunadagarin kuchubi gajkunadami nin.¹⁸Paimundadimi kaishujkunash chaishujkunash chi shujlla Espiritullandi gasha Taitabujmu kuchuyanallaminchi.

¹⁹Chimundami kangunaga ña na karu llaktamunda shamushkama naidi rijsishkamash ganguichichu. Ashtangarin Diosbujlla gajkunapura tukushkaguna shinaidi Diosbuj familiagunapurallamundadimi ganguichi. ²⁰Jesús agllusha kachushkaguna Dios nishkada parlujkunash wasida rurungu kallarichishka jawabimi kangunaga wasichishkaguna ganguichi; shinash kallarimu churushka rumiga Jesucristolladimi gan. ²¹Paimundami wasi illujtada tuki pushtubi alli tandachishka gasha Diosbujlla wasi tukungama Mandujmu ch’ikunyachishka ichiyarigun. ²²Paillandimi kangunash Dios Paibuj Espiritubi kausana wasi gachun tandachisha wasichishka shina ganguichi.

Na israelgunamu parlachun Pabloda Dios mingushkamunda

¹Chimunda ñuka Pabloga Jesucristobujta rurushkamunda kanguna na israelgunaj allibuj prezu tiyani. ²Dios kushka alligunada kangunamu parlanada ñukamu mingashkadaga ña uyashkanguichimi. ³Pish na yachushkada Dios ñukamu rikuchisha yachi chayachiga; chidaga ñaubamu ñami ashawaida escribigani. ⁴Chida kanguna liyushaga Cristomunda pakalla tiyashkada ñuka yachi chayashkada yachunguichimi. ⁵Ñaubagunaga ni pigunamush na yachi chayachishka gakish kununga Diosllamu ch’ikunyachishka Pai agllusha kachashkagunamush, Pai nishkada parlujkunamush kai pakalla tiyashkadaga Espiritunmi rikuchin: ⁶Diosbuj Alli Shimimundami Cristo Jesuskun gajkunaga israelguna layaidi na israelgunash japina gashkada japijkunami gan, chi cuerpollamundadi gajkuna shinaidi Dios <Kushami> nishkabish igulda japijkunash ganami gan. ⁷Ñuka kai Alli Shimida parlusha sirvij gachunmi Diosga Pai pachun ruri pudishkallandi alligunada ñukamu kusha shina rurushka.

⁸Ñukaga Diosbujllagunapuramunda uchinllagunamundash ashtandi na tantolla laya gakish kashna alligunada kusha Diosga na israelgunamunga Cristoj maida na cuentibuj k’uillagunada charishkamunda Alli Shimida yachi chayachichunmi ñukadaga churashka. ⁹Shinaidi tuki imalla tiyashkagunadash ruruj Diosga ñaubarijmunda pacha pish na yachushka pakalla charigushkada ima laya p’aktachigushkadaga tukigunamu laruidi rikuchichunmi ñukadaga minguga. ¹⁰Shinalladi Diosga yuyisapaidi gashkadaga jawa wairabi tiyaj poderyujkunamu mandujkunamush tandanukushka crijkunamundami kunun yachi chayachishka gachun shina ruruga. ¹¹Shinami Diosga ñaubamunda pacha Pai imada rurusha nigushkadaga ñukuchida Manduj Jesucriston p’aktachiga. ¹²Paibimi ñukuchiga Paida crishkamunda imadash na manchushalla Diosmu kuchuyanallaminchi. ¹³Chimundami mañabani: ñuka kangunaj allibuj llaki apagushkamundaga ama killanachij shina llakirichichu, ashtanbish kai llaki apagushkaga kangunajkarin allibi churashka gachunmi gan.

Cristoj k’uyiga yachushkagunadash yallimi

¹⁴Kaillamundami Taita Diosbuj ñaubuki kungurini. ¹⁵Paimundami jawa pachabi gajkunash kai pachabi gajkunash tuki familiaguna shutiyujkuna tukun.3.15 “Paimundami shutiyujkuna tukun,” nishaga tuki angelgunash tuki gentegunash Taita Dios rurushkaguna gasha Paimunda kausida charishkadami nisha nigun.¹⁶Pai tukida yalli k’uilla charishkagunada kangunamu kusha Paibuj Espiritumunda ruri pudishkan shungu ukubi jinchiyachichun mañani. ¹⁷Shinaidi crishkamunda kangunaj shungugunabi Cristo kausaguchunbishmi mañani. Shinusha kangunaga angusapa yura shina k’uyibimi alli jinchi tiyarishka gasha, ¹⁸tuki Diosbujllagunan igulda Cristoj k’uyidaga uku pambamush, jawamush, chaimush, kinrimush, maida na tukuribuj gashka illujtada yachi pudichun, ¹⁹shinaidi chi k’uyidaga tuki yachigunadash ashtandi yalli gajta rijsi chayasha Dios ima laya gashkan illujta jundachishka gachunmi mañani.

²⁰Kununga tukida ruri pudij Diostaga Pai pachun ruri pudishkan ñukuchibi ruragushkamunda ima mañushkadash nash yuyushkamadash ashtandi yallida ruri Pudijtami, ²¹Cristo Jesusmundash Paida crijkunamundash ñaubagunamunda pachash k’ipagamash ima urash na tukuringagama <¡K’uillami gangui!> nishka gachun. Shina gachun.

Cristoj cuerpobi shuj shinalla ganamunda

¹Shinusha ñukaga Mandujbujta rurushkamunda prezu tiyashami kangunada Dios kayashkamunda ima laya kausanashka shina kausachunmi mañabani. ²Imallamundash na jatun tukushalla k’uyi shungun na p’iñarinukushalla kaishujkun chaishujkun k’uyimunda aguantarinukusha, ³watanukushkama laya tukigunan alli kaususha Espiritumunda shuj shinalla gagushkabi katinallada mashkichi. ⁴Shuj cuerpolla shinaidi shuj Espiritullami tiyan; shinaidimi kanguna shuj shuyanalladadi shuyachun kayashkaguna ganguichi. ⁵Shinaidi Mandajkish shujlla, crinash shujlla, bautizarinash shujllami. ⁶Shuj Dioslla Paiga tukigunaj Taitami; Pailladimi tukigunaj jawabi gan, tukigunamunda ruran, tukigunabimi tiyan.

⁷Shinash Cristo manchanaidi kumbidangu munashka shina tuki ñukuchimu kushka alligunada shuj shujmu kushka. ⁸Chimundami Dios escribichishkabish kashna nin:

“Ichimu ichiyashaga

prezu japishkagunadami prezu apuga,

gentegunamunga kumbidanagunadami kuga.”4.8 Sal 68.18

⁹“Ichimu ichiyaga,” nishaga ¿ima nishadi nin? Kishna nishkaga, kai pacha uramundi uriyashkadashmi shina nin. ¹⁰Chi uriyajlladimi tukibi junda gangabujka tuki jawa pachagunadash ashtandi jawamu ichiyaga. ¹¹Pailladimi shujkunadaga agllasha kachushkaguna gachun, kaishujkunadaga Dios nishkada parlujkuna gachun, chaishujkunadaga Alli Shimida yachi chayachijkuna gachun, maijingunadaga michijkuna yachachijkunash gachun mingasha kuga. ¹²Diosbujlla gajkunada Paibujta rurachun ña pudinallada rurasha Cristobuj cuerpoda jinchiyangama iñachingumi, ¹³tuki ñukuchi Diosbuj Churida crinabi Paida rijsinabish shuj shinalla ganamu chayungagama illujtabi Criston igulma shina jatun, imabish na pandarij k’ari laya tukungagamami shina rurun.

¹⁴Chimundami tuki layaidi pandachingu ninunlladi k’ariguna llagmusha yachachishkagunabi, waira kaimu chaimu apashkama yaku apik’ichushkama shina jawaidi yuyi cambiarijlla uchinlla maraguna shina ña ama gashunchichu. ¹⁵Ashtangarin kununga k’uyimunda kabishkaida ninukusha ñukuchij uma shina gaj Cristomu illujtabi Pai shinaidi ganamu iñashunchi. ¹⁶Shinaidi Cristomundami cuerpoga chibi tiyuj tuki partiguna ima ruranada alli ruruki pachun tandanukusha shuj shinalla tukun;4.16 Cristoj cuerpo shina crijkunaga Dios munashka shina tuki mukugunan tandachisha watashkami jinchiyan. Col 2.19 chibimi tukigunapura allida rurush katinukusha cuerpodaga k’uyibi iñachin.

Cristonga mushuj kausimunda

¹⁷Shinusha Mandujbuj shutibi <Kaida rurabaichidi> nini: Diosta na rijsijkuna shina yangaidi na alli yuyigunanga ña na kausanachunguichi. ¹⁸Paigunaj yuyigunash yanamangabi gasha na yachajkuna gashkamundash jinchi shunguguna gashkamundash Diosmunda shamuj kausimundaga karubimi sakiringuna. ¹⁹Paigunaga ima pinganachinamaidash na sintishalla tuki laya naidi alligunada rurungu na jarkarish nisha munushkaida ñalla ñalla ruranguna.

^20-21Shinash kangunagarin Jesusbi tiyaj kabishkada uyajkuna Paidi yachachishkashmi ganguichi; shinakidijka Cristo yachachishaga shina kausachunmaga na yachachishkachu. ²²Shinushaga ñaubamu ima shina kausashka chi ñauba k’aridaga kangunamunda anchuchishtichi. Chi ñauba kausiga pandarishka munigunan ismugujma shina tukurimushkami. ²³Espiritumunda kangunaj yuyiguna mushujyarishaga, ²⁴mushujti k’arimada churarij shina churarichi; kaidaga pish na juchachibuj linshuyachishka kabishka shina kausachunga Diosmu rijchuj gachunmi rurushka.

²⁵Shinushaga ama ashtanga llagmichichu; kaishujkun chaishujkun chi cuerpobujlladi gashkamundaga4.25 Cristobimi shuj cuerpolla ganchi. Ro 12.5 tukiguna chaishujkunan kabishkada parlichi. ²⁶P’iñarishamash juchadaga ama rurichichu; indi waigungagama ama p’iña katigüichillachu; ²⁷diablo na allida rurachichun amalladi sakichichu. ²⁸Shuwasha purijka ama shuwasha katichun, ashtangarin trabajachun; imash na charijkunamu kumbidangu charingau kikinbuj makigunan ima allidaga ruranami. ²⁹Kangunaj shimimunda milli rimarishkaguna ama llujshichun, ashtanbish uyujkuna jinchiyarichun paigunamu alligunada apamuj shimigunaida alli rimarichi. ³⁰Diosbuj jucha illuj Espirituda ama llakichichu. Paigunmi illujta kishpichina p’unllagama selloda churashka shina gaganguichi.4.30 1Jn 3.2-3³¹Kangunamunda tuki jayuj yuyida, p’iñarinada, coleranada, kaparinukunada, juchachisha rimanada, tuki laya na alligunadash anchuchishtichi. ³²Ima layami Diosbish kangunaj juchagunada Cristomunda perdonaga, shinaidimi kangunash llakirinukusha imadash perdonanukusha kaishujkun chaishujkun allida ruranukusha kausichi.

Diosbujkunaga ima laya kausanamunda

¹Shina gashkakiga Pai k’uyashka wawaguna gashami Dios rurashka layaidi rurujkuna gaichi. ²Ima layami Cristoga ñukuchida k’uyasha Pailladi ñukuchimunda japi tukusha Diosmu k’uitij ashnaguj rupachish kushka shina tukusha wañuga,5.2 Rupachish kushka nishaga israelguna animalgunada wañuchisha rupachisha sacrificioda Diosmu kushkada yuyachin; Jesús wañuki Diosga shinalladadi japiga. shina layaidi tukigunan k’uyibi purichi.

³Ashtangarin Diosbujlla gajkunaj kabishka shina, kangunapurabiga piyunbish siririnama, tuki millanaidi ruranama, charij ganaida munanamaidash, amalladi nimaidash nichichu. ⁴Shinaidi pinganaidi shimigunama maidash gachun parlashkagunama, milli yuyigunan asichishkagunamash ña na tiyanachugun. Kaigunaga na allibujchu; chibuj randiga Diosta <Diosolopai> ninaga allimi. ⁵Kaida yachushka shinaga maijin piyunbish siririj, milligunada ruruj, na gashaga charij ganaida munuj (paimi rurushkalla dioskunada <Alli> nij shinaidimigun), paigunaga Diosbuj shinaidi Cristobuj mandanabiga ima japinadash na japingagunachu.

⁶Maijinllash yanga shimigunada parlusha p’akta kangunada uma pillunmu. Kai rurashkagunamundami Paida na kazujkunada Dios p’iñarisha llakichinga. ⁷Shinusha paigunan tandanukusha igul-lladadi rurujkunaga ama gaichichu. ⁸Ñaubaga kangunash yanamanga shinami gaganguichi; kununga Mandujbi gashaga luzmi ganguichi. Shinushaga luzbuj wawaguna shina kausichi. ⁹Luzbuj granogunaga tukibimi shujkunada allida rurana, pish na juchachibuj shinaidi kabishkada ruranash gan. ¹⁰Mandajta kushiyachingu munujllaguna gaichi. ¹¹Ashtanbish, yanamanga shina imakish na valij ruranagunabi ima rikunadash ama charichichu; chibuj randiga yacharichun rimushtichi. ¹²Paiguna pakalla imada rurashkagunada parlanamallash pinganaimi gan. ¹³Imallagunadash luz p’unllabi rikuchikiga illujta laru rikuringa. Tukida laru rikuchijka luzmi gan. ¹⁴Shinushami kashna nishka tiyan:

“Kan puñugujlla rijchari,

wañushkagunaj chaubimundash jatari.

Chibimi Cristoga kanda p’unllayachinga.”

¹⁵Shinusha kununga, imada rurashash yuyillandi rurujkuna gaichi. Na intindish nijkunama shinaga ama rurichichu, ashtan yuyisapaidijkuna gaichi. ¹⁶Na alli p’unllagunabi kausagushkamunda allida rurana ima urash tiyakiga chidati rurichi. ¹⁷Maidash gachun rurujkuna ama gaichichu, ashtangarin Mandujbuj muni imadi gashkada intindijkuna gaichi.

¹⁸Ama vinon machichichu; shina purijka imabibish na jarkarinchu. Chibuj randiga Diosbuj Espiritun jundashka gaichi. ¹⁹Kangunapura parlanukigunabish salmoskunada, Diosmunda shinaidi Diosbuj Espíritu yuyachishka cantogunan tuki shungun cantusha Mandajtaga <Allimi gangui> nisha, ²⁰ñukuchij Manduj Jesucristoj shutibi Dios ñukuchij Taitadaga tukimunda p’unllandijta <Diosolopai> nigüichilla.

Crijkunaga kusandij warmindijma laya kazunukunamunda

²¹Cristoda manchujkuna gashkamunda kaishuj chaishuj kazunukujkunami gananguichi.

²²Warmiguna, kikinbuj kusadaga Manduj Jesusmada kazuj layaidi alli kazujkuna gaichi. ²³Ima layami Cristoga tandanukushka crijkunajka uma shina gan, shinaidimi kusash warmibujka uma shina gan. Tandanukushka crijkunaga Cristoj cuerpomi, Paiga paigunada Kishpichijmi. ²⁴Ima layami crijkunaga Cristoda kazujkuna gan, warmigunash kusadaga tukibi shina layaidi gachun.

²⁵Kusagunaga, ima layami Cristoga Paida crijkunada k’uyuga, shinaidimi kusagunash kangunaj warmidaga k’uyananguichi; Cristoga Paibuj kausidati kurishami paigunamunda wañuga. ²⁶Diosbujlla gachun ch’ikunyachisha yakunbish maillasha parlushka shiminbish linshuyachisha, ²⁷k’uilladi gaj tandanukushka crijkunadaga Paillamundi rikuchingajmi, ima mapamash, sipumash, ima kai layagunamash illuj, ashtangarin linshulladijta ima juchachinash illuj gachunmi shina ruruga. ²⁸Shina layaidi kusagunash paibuj warmidaga paibujti cuerpomada laya llakinami gan. Maijin paibuj warmida llakijka pailladadikish llakinmi. ²⁹Maijin gashash kikinbuj cuerpolladadijka naidi p’iñunchu, ashtangarin karush katisha imash ama tukuchun chapan; shina layaidimi Cristosh tandanukushka crijkunadaga chapan, ³⁰ñukuchi Paibujti cuerpobujkuna gashkamunda. ³¹“Chimundami k’ariga taitada mamada sakinga paibuj warmin kazarasha tandanukungaj. Shinami ishkindijmunda shuj shinalla tukunga.”5.31 Gn 2.24; Mt 19.5; Mc 10.7

³²Kai pakalla tiyashkaga manchanaidi yachi chayanami; ashtanbish kaimunda ñuka parlushaga Criston tandanukushka crijkunan ima shina gashkadami niguni. ³³Shina gakish tuki kangunash kikinbuj warmidaga kikinlladi k’uyarij shina k’uyichi. Shinaidi warmigunash kusada allibi churasha kazunami gan.

Maragunamush taita mamagunamush

¹Maraguna, kangunaj taita mamadaga Mandujkun gasha kazichi. Shina ruranaga kabishkaidimi gan. ²Kaiga <Allida kushami> nishka kallarimu mandashkami gan: “Kambuj taita mamada allibi churi; ³shina rurushaga tuki imabibish allimi gangui, kai pachabibish unidami kausangui.” ⁴Kutin kanguna taita mamagunaga, kangunaj maragunada ama p’iñachichichu. Ashtangarin na allida ruruki llakichisha shinaidi Mandajbuj mandushkagunada yachachisha iñachichi.

Sirvichun randishkagunamush amogunamush

⁵Sirvichun randishkaguna, kai pachabi amogunadaga Cristomundi ruragujma laya, manchin ch’ujchusha na nij tukushalla kangunaj shungumundadi kazichi. ⁶Ama paiguna rikugujllabi alli nichun nishallaga ashtan Cristobujta rurungu watashka shina gashkamunda tuki shungun Dios munushkada p’aktachisha rurichi. ⁷Imada ruragushash na gentegunamu rurushkama shina ashtangarin Mandajmundi rurashkada yuyasha alli yuyin rurichi; ⁸sirvichun watushka laya na watushka laya gashash, kikin ima allida rurashaga Mandajmundaga chidati japinashkadami alli yachananguichi.

⁹Kangunash amoguna, shina layaidi paigunan rurichi; <Llakichishami> nishalla ama manchachinguichichu. Paigunakish kangunakish Mandajka jawa pachabi gashkada yachushkamunda shina rurichi. Paimunga yalli alli nishkagunamaga pish na tiyanchu.

Dios kushka takanukunagunada japirinamunda

¹⁰Kununga tukuchingaj, Mandujbi gasha Pai pachun ruri pudishka jursan ashtan ashtan jinchiyarichi. ¹¹Ima layash pandachisha urmachingu diablo munakish, jinchi shayaringaj Dios kushka tuki takanukungu charishkagunan churarichi. ¹²Ñukuchiga yauryuj aichayujkunanga na takanukujchunchi. Ashtangarin jawa wairabi purij ima na allidash ruruj espiritugunan, jatun mandujkunan, mandanada charijkunan, kai yanamanga pachabi mandajkunanbish takanukugunchi. ¹³Chimunda na alli p’unlla chayamuki jinchi shayari pudingaj Dios kushka tuki takanukunagunada japirichi; illujtada p’aktachishaga jinchi jinchida shayarigüichilla.

¹⁴Shinushami kabishkada parlashkan alli chumbillirishka shina, shunguda tapachij jirru churanada churarij shina pish na juchachibuj ruranagunan churarisha jinchi gaichi. ¹⁵Zapatosta churarishka shina k’uilla kausida kuj Alli Shimida parlungu rinallaguna gaichi. ¹⁶Tukimunda yalliga Cristoda crishkadaga escudomada shina japirichi; chigunga millida rurachij6.16 Millida rurachij nisha diablodami nigun. kachushka nina katichishka flecha layagunadaga wañuchi pudinguichi. ¹⁷Cascoda umabi churarij shina kishpichishka gashkada japirichi. Espirituj espadadash charirichi; chiga Diosbuj Shimimi. ¹⁸Tukimunda Dioskun parlanukusha Espíritu parlachiki p’unllandijta mañariagüichilla; chi yuyilla gasha rijchuj shina chapariasha Diosbujlla tuki gajkunamundash mañusha katichi. ¹⁹Shinaidi ñuka shimida paskuki Dios ñukamu parlana yuyida kuchun Alli Shimimunda pakalla tiyashkadaga na manchushalla yachi chayachingau ñukamundash mañichi. ²⁰Chi Alli Shimidadi ñukaga parlachun kachushka gashami cadenagunan watashka tiyani. Ñuka parlanashka shina imadash na manchushalla Paimunda parlachun Diosta mañabaichi.

Tukurina yuyigunamunda

²¹Manduj Jesusbujta rurusha alli p’aktachij, ñukuchi k’uyashka wauki Tiquicomi ñuka ima ruragushkada kaibi ima shina gagushkadash kangunash yachachun tukidami alli parlungu ringa. ²²Chimundami paidaga ñukuchi kaibi ima laya purigushkada yachi chayachisha kangunaj shunguda kushiyachichunmi kachagani.

²³Taita Diosbish Manduj Jesucristosh k’uilla kausida, k’uyana shinaidi crina yuyidash wauki panigunamu kuchun. ²⁴Ima urash na chingarij k’uyin ñukuchij Manduj Jesucristoda k’uyujkunamunga Dios kushka alligunaga tukigunan gachun.