2 Tesalonicenses

K’ipa TESALONICENSES

2 de Tesalonicensesbi kallari parluguna

Kai cartadaga apóstol Pabloga Tesalónica pueblobi tandanukushka crijkunamu kachasha, Jesucristo wacharishka k’ipa pichka chunga shuj (51) wata shinabimi escribishka yuyachin.

Tesalónica crijkuna llakida apaguga. Kai cartaga chi llakichishka crijkunamu shinada parlan: Manduj Jesús Paibuj angelgunan shamusha, Pai parlashkada na kazujkunada llakichingami (1.4-10), Jesús shamuki ima tukuna (2.1-12), maijin imadash na rurash nijka ama mikuchun (3.6-15).

Pablo saludashkamunda

¹Tesalónica pueblobi ñukuchij Taita Dioskunbish Mandaj Jesucristonbish iglillamumi kaidaga Silvanon Timoteon ñuka Pabloga escribini. ²Ñukuchij Taita Diosmunda shinaidi Mandaj Jesucristomunda kushka allish k’uilla kausish kangunabi gachun.

Jesús llakichingu shamunamunda

³Wauki paniguna, kanguna crishka kutin ashtan mirarishkamundash tuki kanguna k’uyanukusha katishkamundashmi p’unllandijta kangunamunda Diosta <Diosolopai> nina ganchi. Shina nishkaga kabishkami. ⁴Kangunada tuki laya katik’ichusha llakichigukish alli crij gashkadash alli katigushkadash rikuchishkamundami Diosbuj iglillagunabi manchanaidi kushiyasha ñukuchilladi parlanchi. ⁵Tuki kai tukushkaga Dios kabishkadi juchachij gashkadami rikuchin. Chi laya gashkamunda Diosga Pai mandanabuj kanguna alli valichishkaguna gashkada rikun. Chi mandanamundami kangunaga llakida apagunguichi.

⁶Kabishkada ruraj Diosmi kangunada llakichijkunadaga pachun llakichinga. ⁷Kunun llakigunada apashkamunda kangunadash ñukuchidash samachinga. Mandaj Jesús jawa pachamunda shami p’unllabi Paibuj imadash rurajlla angelgunan, ⁸nina rupagushka chaubibi shamushami Diosta na rijsijkunadash, ñukuchij Mandaj Jesusbuj Alli Shimida na kazujkunadash llakichingajmi shamunga. ⁹Paigunaga na tukuribuj llakibimi chingachishka ganga, Mandajbuj ñaubujmundash, k’uilladij gaj tukida ruri pudijmundash karumu shitashkami ganga. ¹⁰Manduj shamuna p’unllabimi chi chingachinash shitanash tukunga. Paiga Paibuj linshuyachishkaguna Paidaga k’uilla gashkada rikuchichunbish tuki crijkuna Paida mancharisha rikuchunbish shamunga. Kangunash ñukuchi crishkada parluki crishkamundami chibi ganguichi.

¹¹Chimundami ñukuchij Diostaga Pai kayusha agllushkabi, kanguna Pai alli valichishka gachun mañarianchi. Shinaidi kanguna tuki ima allida rurangu munushkagunadash, kanguna crishkamunda rurashkagunadash Dioslladi tukida ruri pudishkan p’aktachichunbishmi mañarianchi. ¹²Shinakiga ñukuchij Manduj Jesusbuj shuti alli k’uilla gashkaga kangunabi rikuchishka ganga. Ñukuchij Dios, Manduj Jesucristosh kushka alligunamundami kangunash Paimunda alli k’uillaguna gachun mañanchi.

Jesús shamuki ima tukunamunda

¹Kununga, wauki paniguna, ñukuchij Mandaj Jesucristo shamunamundash, ñukuchi Paiyun tandanukunamundashmi nigunchi. ²Maijingunaga <Mandaj shamuna p’unllaga ña chayamushkami> nisha yachachikish ama musparisha jawalla pandarigunguichichu, nishami mañagunchi. Maijinsh <Espiritumunda parlachishkami> nigukish maimundash yachashkada shimillan parlakish, ñukuchi escribisha cartada kachushkama layaidi kachukish ama mancharinguichichu. ³Ima layash amalladi pandachishka tukunguichichu. Chi p’unlla narij chayamujllabidimi Diosta p’iñusha crishkada sakijkunadimi shamunga. Shinaidi chi millisapa k’ariga, jatun llakibi chingarinaj churiga rikurinalladimi gan. ⁴Kai milli rikurishaga tukida Diosbuj shutida charijkunada na gashaga tuki adorashka gajkunada trankungajmi jatun tukusha shayaringa. Shinalladi Diosma laya tukushaga Diosbuj wasimunda mandungajmi tiyaringa.

⁵Ñuka kangunan gashaidi kaigunada ña parlagushkadaga ¿nachu yuyaringuichi? ⁶Chi k’arida, pai rikurina p’unllagama ama rikurichun ima jarkagushkadaga kanguna yachanguichimi. ⁷Na rijsishka, na yachashka milli ruranaga paibuj rurachi pudishkan ñami rurarigun. Shinash kunun jarkagujtaga paibuj chaubimunda anchuchinallami jualtan. ⁸Chi millisapa k’ari rikurikimi, Mandaj Jesusga Paibuj shimin p’ukushallami wañuchishtanga, shinaidi Paibuj p’alaniguj shamushkanmi chingachinga. ⁹Chi milli shamujka Satanasbuj rurachi pudishkagunan rikurisha tuki laya ruri pudishkagunadash, ima rikunagunadash, pish na ruri pudishkada llagmusha rurushkagunadashmi ruranga. ¹⁰Paiga mashnalla chingarijkunada paigunalladi kishpichishka gangu kabishkada na k’uyasha na japishkamundami tuki laya milli rurashkagunan pandachinga. ¹¹Chimunda Diosga llagmushkada crichun sakisha imabish pandarichinalla yuyida kachan. ¹²Shinami mashnalla kabishka parlushkadash na crisha ashtan paigunalladi milli rurushkagunabi kushiyajkunami manchanaidi llakichishka ganga.

Kishpichingu agllashkagunamunda

¹³Mandaj k’uyashka wauki paniguna, ñukuchiga kangunamunda Diosta <Diosolopai> nisha mañagunallami ganchi. Kallarimunda pacha kangunadash Dioslladimi Paibuj Espíritu linshuyachishkan shinaidi kabishkada crishkanbishmi kishpichingaj aglluga. ¹⁴Ñukuchi parlashka Alli Shimida kangunamu parlakimi ñukuchij Mandaj Jesucristoj k’uilla gashkabi gachun kangunadash Diosga kayaga.

¹⁵Chimunda, wauki paniguna, kangunamu ñukuchij parlashama na gashaga escribishama yachachishkagunan jinchi jinchi shayarisha ama washamu risha alli katinguichi. ¹⁶Kununga ñukuchida K’uyaj, Pai allida kushkamunda, llakibi gakish na tukurij kushiyana, alligunaida shuyana yuyidash Kuj, ñukuchij Mandaj Jesucristolladi Taita Diosbish ¹⁷kangunaj shunguda kushiyachisha jinchiyachichun, shina kanguna tuki ima parlanabish ruranabish alli gachun.

“Diosta mañabanguichi”

¹Ña tukuchingujka, wauki paniguna, tuki llaktagunabi Mandajbuj Shimi, ut’kada chayachun kanguna layaidi allibi churasha alli japichun ñukuchimunda mañabaichi. ²Na tukiguna crishkamundami chi naidi alli shinaidi ashtan milli gentegunamunda kacharishka gangu Diosta mañabanguichi. ³Mandajka Pai imada rurasha nishkada P’aktachijllami gan. Pailladimi kangunadaga ashtan jinchi crijkunada rurasha millimundash wakichinga. ⁴Ñukuchij ima mandushkagunada kanguna ruragushkadaga ashtan rurusha katinadash Mandujmunda chi yuyillami ganchi. ⁵Mandujlladi kangunaj shungubi Dios k’uyuj gashkada shinaidi Cristoda alli katiriashka shina ñaubujmu ashtan alli katinada yuyachichun.

Shaikungagama jinchida trabajashkamunda

⁶Wauki paniguna, ñukuchij Mandaj Jesucristoj shutibimi maijin crij imadash na rurungu munusha ñukuchi yachachishka laya na kausujmundaga laduyachun mandanchi. ⁷Kangunalladi, ñukuchi laya kaususha katinadaga yachunguichimi. Kangunan kausashaga na yangalla puriganchichu. ⁸Shinaidi ñukuchiga maijinbuj mikunada na yangaga mikuganchichu. Ashtangarin kanguna maijinllamundash na kausash nishami p’unllash tutash shaikungagama jinchida trabajaguganchi. ⁹Kangunamunda ima ministishkada japina kabiganchimi. Shinash kanguna ñukuchida rikusha trabajasha katichunmi trabajaguganchilla. ¹⁰Kangunan gashaidimi, maijin imadash na rurash nijka ama mikuchun, mandaguganchi. ¹¹Shina gakish ñukuchiga kangunapuramunda maijingunaga imadash na rurashalla shujkunaj kausibi satirisha purijtami uyushkanchi. ¹²Mandaj Jesucristomunda shina purijkunadaga kausibi imalladash charingujka na killanachishalla rurachun yuyachisha mandanchi.

¹³Kangunaga wauki paniguna, allida ruragushkamundaga ama shaikunguichichu. ¹⁴Maijinbish kai cartabi nishkada na kazukiga ima laya gashkada paida rikuchiki pinganachichun ama paigun tandanukunguichichu. ¹⁵Ashtan ama na rikunachinguichichu, ashtanbish kambuj wauki panimu alli rikuchisha parlujma laya yachachinguichi.

Tukurina yuyigunamunda

¹⁶K’uilla kausida kuj Mandajlladi kangunamu imabi gakish k’uilla kausida p’unllandi kuchun shinaidi tuki kangunan gachun.

¹⁷Ñuka Pablolladimi kaidaga ñukaj makillandi escribiguni. Shinami tuki ñukaj cartagunabiga ñukajlladi gashkada rikuchini. ¹⁸Ñukuchij Mandaj Jesucristolladi Pai kushka alliga tuki kangunabi gachun.